Current han awm lo ringawt chu thil tih laklawh lâi pawh a tih hleih theih loh zawng a ni e, bati lei turin fate koh haw leh ngei a ngâi dâwn a nih hmêl! Ka ṭhutna savun ṭhutthleng aṭang chuan thovin pâwn lamah ka tei chhuak a, ka fate infiam hlim thawm chu kâr lovah ka hre zui nghal zat bawk.
"Ka û a lo haw tawh em?" pâwn ka chhuah rual deuh thawa rawn titu ka pasal nau chiah, u Kimi chu hmuh ka inbeisei lo nasa mai.
"La haw lo ve, a lo haw vel mêk ka ring" ka ti thla ve ringawt a, khua a hniam deuh tawh bawk nen a lo haw har ka rin tawh loh vang a ni pakhat!
"A nih chuan ka rawn kal leh lo mai ang" nèlawm teh chiam lova ṭawng deuh salh hian a kal sawn nghal nal nal a, biak lehna hman pawh a awm lo tluk a ni.
Ka pasal nau mah ni se kan inngaina hran lo va, ani chang a ni lo, ka pasal chhûngte hrim hrim hian min nêl mawh khawp a, mahse ka pasal erawh a dang hlak thung. Ka hmuh phak maia awm ka fate lam chu ka hawi phei a, an infiam laklawh hmêl viau lehnghal!
"Puipui, lo haw lawk teh" ka fapa ball pet lâi chu ka ko lang lang a, ka kohna aw hriain a rawn hawi a, phei pawh a rawn phei har lo hle.
"Eng nge nu?" ka bul a lo thlen ruala a rawn tih chuan
"Dawrah han kal lawk rawh le, bati lei a ngâi leh tawh a" ka lo ti ve nghal mai a, a nau chiah Zualtei erawh ka ko haw ve ta lo law law mai.
Pawisa chu ka pe a, hmanhmawh zet hian dawr lamah a tlan chho nghal nal nal a, a ṭhiante nen an inkhel laklawh bawk si a, hmanhmawh pawh a àwm viau mai. Bati a han lei hnu chuan in aṭang tlan chhuak leh nghalin infiam tur bawk chuan a phei leh a, kei pawh bati éng hnuaiah rawng ka bàwl zawm ve leh ta malh malh bawk.
Dâr 5 a ri hnai a, rin ai taka in a rawn thlen har avangin ka pasal chu ka call ta nge nge a, mahse phone call a là thei lo hrim hrim, a lo haw mêk a nih ka ring ve tawp! Call nawn leh tawh chuang lovin ei rawng ka bàwl zawm mial mial a, rei lovah ka bâwl zo chu a ni der!
Khua a thim fel tâkah chuan naupangte pawh an rawn haw ve ve tawh a, Zualtei chu ka bulah awm chawtin ka hmarcha rawt chhûng zawng zawhna min zàwt neuh neuh reng a, a û chiah Puipuia erawh bual inah a inbual mêk thung.
"Au Puipuia inbual zawh veleh inbual ve nghal daih la" ka tih chuan
"Aih....kei chu apa rualin ka inbual dâwn" a lo ti hmak reuh a, chutianga min chhàn chu ka rin lâwk sa erawh a ni tho.
"I inbual tlai lutuk chuan i dam lo mai ang" ka tih leh pawh chuan
"Apa rualin ka inbual duh" a ti deuh tlat a, ka phalsak ta mai!
"A nih chuan chaw ei khamah inbual mai rawh u" ka tih lâi tak chuan kan in kawta bike rum ri vut vut thawm kan hre zui zat a, chutah Zualtei chuan
"Apa a lo haw" tih leh tlan chhuah a rual nghal thuai a, thawm aṭang chuan ka pasal ngei a ni tih ka hre nghal bawk.
"I va rawn tlai ve, phone call i là thei bawk si lo" tiin a iptêpui ah lâi chu ka lâk thlaksak a, ka rin âi a rit zek lehnghal!
"Nia, vawiin chu ka'n duham deuh alawm le" a lo ti ve mai a, iptêpui chhûng ka'n keu vel chu eng emaw ni hi ka khawih fuh a, ka phu zawk nghe nghe.
"Eng nge awm a?" ka ti hliai a, current a awm lo kher bawk nen iptêpui chhûnga mi chu eng nge a nih ka hre thei mai lo.
"Chhuatah khan han bun chhin la..." a rawn ti sup a, ka bun chhuah vek tâkah chuan sava lian zet a lo hawn chu niin!
"Awi, eng va nge? A va'n lian ve le, engtin nge? I kap em ni?" ka ti leh ta mawlh mawlh mai.
"Vahrit a nih kha! A remchâng êm a, ka rawn hawn ta ringawt" tih leh thingpui no inlàk a rual a, ka che chhuak ve nghal vat bawk.
"Khawi, keima'n ka lo siam ang che" tiin a no ken chu ka làksak a, hmangatih tih hriat taka mi en reng chung hian
"Nei lo ta che ila chuan i thingpui lùm hi ka in khât àwm" a rawn ti dam thlup a, current awm lo mah se a thusawi avanga ka khi nghal heu chu a hmuh vek ka ring.
"Min neih vang alawm i in ziah nì" ka tih chuan
"Ni chiah e" ti sup hian a nui zui sun sun a, a thingpui in tur pawh ka peih fel har lo hle.
"Au Puipui, apa'n sava lian tawk a rawn hawn a nia" Zualtei chuan a ti lang lang reuh a, bual in aṭanginu Puipuia chu a rawn chhuak rang teh e!
"I thawmhnaw va ha phawt rawh" ka tih chuan hmanhmawh zet hian pindan lamah a tlan phei thuai a, thil ri chawrh ri kan hriat hnu lawkah ṭap thawm kan hre zui zat bawk.
"Engati nge?" tih leh thawh ka rual a, mahse a pa'n min thlen phei khalh thung.
"I inchhuih a ni maw" ti thum bulin a pa chuan a pawm tho va, a thawmhnaw hak tur nen lam a buaipui zawm ta mual mual a, ka inrawlh buai ta lo law law mai.
"Phei ang le" tiin Zualtei chu choka lamah ka kai phei a, mak a lo tih ve hmèl hle bawk.
Current a rawn awm chiah chu naupang pahnih an 'yes' nghal vak a, keini chenin kan naupan lâi aṭang tawha kan tih ṭhin dan kha a ni a, current ber a rawn awm tâkah chuan a thim leh hmâin zanriah kan kil nghal thuai a, Zualtei leh a pa pawh chaw ei khamah tui lûmin inbual tawh mai rawh se!
"Engtin nge i Vahrit lo hawn khi kan tih dâwn? In inbual hlanin ka lo buaipui mai dâwn em ni ang?" chaw ei lâia ka tih chuan
"Inbual zawhah ka rawn khawih ang, lo dah tawp rawh" a lo ti sam mai a, hnial tumna pawh ka nei chuang lo.
Kan ar vulh te ho nen a intiat deuh tho avangin sava lian buaipui ngai lo mah ila ka thiam chawp ve theih mai ka ring a, ni dangah chuan hem hmin tham lek lek a rawn hawn ṭhin kha a ni a, mahse tun ṭum zet zawng a rawn hawn hrawl ṭha nelh nawlh khawp mai.
"Tlaiah khan u Kimi lo kal a tum a, mahse i lo la haw si lo va, a haw leh daih a" ka tih chuan a ngawi reng a, ka ṭawng chu hre miah lo te pawh a ang zâwk, a hria tih erawh ka hre chiang ropui si!
"Naktuk tlai chu lui kal kan tum a nia" ka thil sawi lâi nena inkungkaihna pakhat mah nei lo thu a rawn chhakchhuak ta daih a, ka en nghal thuai nghe nghe.
"Tute nen? Min hrilh àwm ka va'n la hre lo ve" ka ti deuh hliai a, sawi lâwk sa chu ni se mak ka ti hran lo ang.
"Pa Khumate ho nen maw le" a rawn tih chuan
"I sawi si lo va" ka lo ti diai a, ani pawh chuan
"Kan rek chawp nawk nawk a, hrilh pawh ka la hrilh hman lo che" a rawn ti ṭha ve leh nghal mai bawk.
Chaw kan ei kham a, Puipuia nen chaw eina kan seng fel hlanin Zualtei leh a pa a lo inbual thung a, a sava rawn hawn pawh a kutah ka dah ta tawp a, khawih thiamin buaipui ṭhang ila chuan a inbual zawh kher nghah a ngâi lo tur a nia!
Tapchhaka ṭhu reng lovin Puipuia lehkha ka zirpui ta zàwk a, current lah chu a rawn awm lo leh ringawt a, zan rei thlengin a awm lo tluan ta zel lehnghal a, khawnvar tui nei tam ila chuan bati aiah lalṭin han chhit én mai pawh a pawi lo tur a nia, khawnvar tui lah chu naktukah a rawn thleng dâwn chauh bawk si.
"Engtin nge siam i tum a?" ka pasal che vel chu ka en reng a, kan pahnih chiahin tapchhakah chuan kan awm tawh nghe nghe.
"Tui deuhin" a rawn ti sup a, ka nui zui nghal hak!
"I rawn hawn tawhah chuan a la lian berin ka hria, ti raw?" ka tih leh chuan
"La lian ber ang ka ring" a lo ti ve leh mai bawk.
Thingpui lo lùmsak leh lo ṭawng siam siam tih loh chu tih tur dang ka nei lo tluk a ni a, ani erawh a che mual mual a, mut zâi kan rèl meuh chuan a lo tlai duai tawh a, kan fate pawh an lo muhil tui bawrh bawrh tawh hle.
"I chau em?" mut hmuna ka tih chuan
"Chau hran lo ve" a lo ti dam ruih a, a saisîr zâwnga mu chung hian min en reng a, chu chuan min tiawm thiam lo lek lek bawk.
"Eng nge khatia min en reng a?" ka ti ta ringawt a, ka ṭhen zui seih nghe nghe.
"Ka en reng duh che a ni mai alawm" min chhán dan avang chuan ka nui ri hak a, mahse ka nui ring hran lo.
"Naktuk chu kan zan chhuah ang a, zîng lamah kan rawn haw ka ring" a rawn tih leh thlup thlup chuan
"Immm....." tia lo bu nghat nghat pah hian
"Min hrilh láwk si lo va, mak ka ti deuh mai mai maw le" ka ti dam diai a, a mut dan siam ṭha sut suta min thlir reng chu ka hrethiam lo tulh tulh!
"Eng nge a?" ka ti leh hliai ta nge nge bawk.
"Engmah" a rawn ti leh ang lawi a, nui sen sen chung hian
"Engmah chu a ni hauh lo mai, vawiin lamah min lo ngâi viau a nih te chuan sawi ve mai la" ka ti deuh tan tan a, mahse ka ṭawng ring lo hle thung.
"A nih loh paw'n ka bula i mu châk a nih te chuan kan fate mutna sawnin i rawn mu phei thei reng alawm" inla zei fahran hian ka tih zawm leh sar sar a, ka nuih a za ru ang reng viau bawk.
"A nih min lo ngâi ve em?" nui thum dut dut paha a rawn tih chuan
"Ka ngàih àwm che pawh ka hre lo" ka lo ti deuh hmak a, ka fiamthu tih erawh hrilh hranpa a ngâi lo chiang hle.
"Hmmm....." ti hlukin a che hrut hrut a, kan fate pahnih chu a mutna lamah a sawn phei den den a, kei pawh ka lo insiam rem ve sat sat a, ka hnungah chuan min kuah hlun chung hian a rawn mu nghal thak bawk.
"Min ngàih te chuan sawi ve mai tur che a nia" titau aw zet hian ka ti thawp sep a, engtin tak mi chhâng ang maw!
"Ka awm danah i hre vek tho alawm" a ti thum bul a, hlim ru veng vengin ka nui var var a, a kut chu ka dul zawnah ka kuah hnan a, ka maimitchhing zui ta vang vang.
Zîngah chuan ka harh hmâsa ber a, min lo la kuah rengtu ka pasal lama inletin a muhil thaw ri suk suk chu lungchim zet hian ka thlir reng a, kum 10 dâwn chu kan inneih ve tawh a, nitin mai hian pasal ṭha a nihzia leh pa ṭha a nihzia ka hre nawn fô va, ka pasal a ni lo ang tih ka hlau hliah hliah ṭhin.
Nizana a awm dan te kha a va'n lungawithlak reuh tak! Min ngáih hi chuan a sawi mai zel a, a sawi loh paw'n a awm danah a hriat nghal vek zel! A tam zâwk hi chu sawi kher lovin a awm danah a tilang mai ṭhin a, kei tak pawh hian ka sawi hrehin ka tilang hreh ngai chuang lo.
Kei, hmeithai fanu ve mai leh hmeichhe satliah ve mai hi a nupui atân min duh tlat kha a ni a, khatih hun lâi, kan inngàihzàwn ve lâi kha chuan min neih duh tak tak pawh ka ring lo, mahse ka rin phak baka mipa rilru nghet leh nupui fanaute tâna innghahna tlâk a ni tih ka hre fiah tulh tulh a, a chhûngte'n kei min duh loh avanga min indanpui hmiah ṭum te kha ka tân chuan a lawmawm rualin a va'n hrehawm ru vawng vawng tak!
Hmeithai fanu pawh tih tawh nâk alâiin unau pakhat mah ka'n nei lo leh ta zel a, chutah ka nu'n min han boralsan zui leh ta nghal a, mahse ka nun a khawhar lâi leh ka mangan em em lâia min thlamuan ber ṭhintu chu tu dang ni lovin tuna ka pasal ngei hi a ni a, ka laka a chet dan te, min ngaihtuaha min ngaihsakna ṭhinna te, engkim avang khan ka thinlungah amah hmangaihna a piang lo thei lo a ni.
A châng phei chuan ka hmangaih lèt aia nasa hian min hmangaih zàwka hriat chângte pawh ka nei rum rum fô va, chutiang taka mipa rilru ṭha, sum leh pâi tel miah lova chhûngkaw boruak hrisel min dinpui theitu chu ka pasal a ni a, ka tân chuan ani hmangaih reng tluka nun hlimawm leh nun hahdamthlak a awm kherin ka ring lo.
"Thingpui ka lo siam ang che aw" pindan aṭanga a rawn chhuak ka hmuh rual chuan ka lo ti zàng vâh a, mi buk khum nghut pah hian a inphih fai zui mawlh mawlh a, kan fate erawh an la muhil tui hle thung.
"Nimin khan vawk chaw ka rawn hawn belh miah lo" a rawn ti thâm ṭuak a, tho hlìm aw tih a hriat khawp mai.
"A la awm ṭeuh alawm, mei pawh ka nun tawh a, dai deuha eitîr ai chuan ka chhûang lûm hlek ang chu ka lo tia" ka tih chuan
"Immm.....a pawi lo ang" a lo ti sup a, thingpui chu ka pe zui nghal zat bawk.
Ei rawngbàwl pahin eng eng emaw ka sawi dun a, vawk vulh belh chu a ṭha dâwn riau hian a hria a, ṭul a tih phawt chuan vulh belh pawh pawi ka ti hran lo, hah erawh kan hah zual deuh ka ring.
Nî èngin kan ventilation a rawn chhun tlang tâkah chuan kawmthlanga vawk chaw pe turin ka che chhuak a, kan vêng tuikhurah tui a rawn haw ve chiah bawk a, mahse tui lam erawh ka pasalin a lo va buaipui thung a, kan fate pahnih pawh an rawn tho ve ve tawh nghe nghe.
Vawk in ka thlen thlak hmâ chuan kan vawk vulh pathumte chu an lo ngek nghal vak vak a, an ril a ṭâm tawh teh pawh a ni ang. Vawk chaw ka'n pe chiah chu a hap hian an hap ri nghal bawrh bawrh a, an hap per buan buan hlawm lutuk a, din pawh ka din hnaih duh lo, ka berh vek a ni mai.
Ka vawk chaw pe zo kan in sîr step-a ka chho chu ka thil rah a nalh thut a, ka tlu tur ka innemna lamah chuan ka bân rek ka ti ulh deuh ni ngei tur a ni! A nâ nghal vawng vawng a, vawk chaw pekna bucket pawh ka kut lehlamin ka khâi ta ringawt a, in chhûng ka lut te chu a nâ zual ni mai te'n ka hria.
"Engati nge?" ka pasal chuan nâ ka nei tih a lo hai lo chiang khawp mai.
"Ka tlu sual a" tih bakin ka chhâng lo va, min rawn pan nghal vut bawk.
"Ai a! A rek lâi tak hi a nâ a" ka tih chuan ka bân chu a khawih dim sawt a, mahse nâ erawh a la awm reng tho.
"Ka rawn chhoh lamah ka tlu tura kha ka innem sual a, a nâ reuh tak tak a ni" ka ti leh sap sap a, ka bân rek chu a vûng nghal ni mai te'n ka hria.
"I innem ulh a nih dâwn hi!" ti nghutin ka bân chu a thlah riai riai a, pindanah va lutin kan damdawi bâwm a rawn là chhuak a, bandage vâr chu phawrhin dim zet hian ka bân nâ lâi chu a tuam zui nghal mawlh mawlh bawk.
"A va'n hun lo tak" ka ti vawng vawng a, buai lâi lâia ka lo innem ulh kher chu ṭul lo ka ti tak tak a ni.
"Lo che vak rih suh" ti sup hian tui chàwina bucket pahnih chu khâiin pâwn lamah a tei chhuak vut a, ka kut nâ lo lam chuan chawhmeh chhùan lâi erawh ka chawk ta tho.
Ka pasal a buai em em lâiin kei lah chu eng ka ti hleithei der bawk si lo, ka bân rek nâ ber chuan min tiṭhuanawp a ni. Kan fate pahnih paw'n ka kut chu an en chhen a, zawhna min zàwt reng bawk a, awm awl tawp ka duh loh avangin ka che lui ve ṭang ṭang tho va, ka pasal hmuhah erawh ka che vak duh lo thung.
Tui a chawi zo chu eng khaw sawi set set lo hian min buaipui chawt a, têl bûr chu làin a kutah tlêm azâwng a leih chhuak a, mawm tliang ralh hian a nuai darh a, mei lúmah hem deuh vang vangin ka bân rek, a tuamna a phelh zawh chiah chu dim zet hian a zút riak riak a, nâ ru ngut ngut mah se engtin emaw hian a zia deuh sawng sawngin ka hria.
"Lui kal chu ka ṭhulh mai ang" min tihnàt hlau tih hriat taka ka bân rek zút dan dan pah hian a rawn ti sup a, kan fate paw'n min bawihsawm dan chu an lo en duh khawp mai.
"Nimin lamah in rêl fel vek tawh a ni lo'm ni?" ka tih lah chuan
"A ṭhulh theih alawm" a lo ti mauh mai si a, zep thu a cheng lo, ka bân rek nát avanga kal lo tur mah ni se ka lawm ru ang reng.
"A nih chuan pa Khumate pawh i hrilh ṭhat leh vat a ngâi dâwn a nih chû....." ka ti ve leh a, ani pawh chuan
"A harsa hleinem" a lo ti ve leh nghal mai bawk.
Ka bân lah chu a dam mai dâwn emaw ka ti kha a nia, mahse a teuh lo mai, a nâ zual ngut ngut zâwk te'n ka hria. Tukṭhuan ei lâi paw'n ka hmang hleithei lo va, fianin chaw ka ei phah ringawt a, tih luih ka tum ve ngial nàin ka hmang ṭha thei meuh lo zawng a ni e.
Chhun lamah chuan Puipuia leh a nau Zualtete'n sikul an kal a, an sikul kalna a inan avangin an lo haw rual mai ṭhin a, Zualtei pawh a pâwl khat zirna mah ni se a fel thlip thlep ve reuh tawh khawp mai. Chu bakah mahni intipuitling chì leh thil hre thei tak a ni reuh a, mî kâ aṭanga a fin reuh thu kan dawng leh zauh zauh ṭhin nghe nghe.
"Hman luih tum suh, i tinâ zual mai mai ang" ka pasal lam chu ka hawi zawk a, min hmu lo emaw ka ti kha a nia, min lo hmu reng a nih hmêl!
"A nát ang ànga awmtîr tawp te chu a ṭha dâwn em ni? Heti hian, nâ deuh mah se ka hmang lui hret hret ang chu ka lo tia, dam pawh a dam chak ka ring záwk asin" ka ti deuh duah a, ka thil tih lâi chu ka tawp chat bawk.
"A la nâ tir em mai" ti nghut hian choka lamah a rawn phei a, amahin thingpui a insiam zui mual mual bawk.
"Àw.....ka ti thei reng alawm, sawi mai la, khawi......" tia a thingpui siam lâi khawih chhunzawm ka tum chu a lo phal awzâwng lo.
"Khawi maw" ka tih leh pawh chuan ngawi ngul hian a chet zawm mawlh mawlh a, ka en tawp ringawt!
"Pa Khumate chu i hrilh tawh em?" tiin thu dangah ka pakâi ta daih a, ani pawh chuan
"Hrilh chiah lo, a harsa hleinem" a rawn ti ve mai a, a tlai hmâin hrilh vat se ka duh!
"Hrilh thuai la, an lo ring laklawh tawh si che ang asin" ka tih leh chuan
"Immm....." ti deuh nghut hian pindan lamah a thingpui in lâi nen chuan a phei nul nul a, pindan aṭanga a rawn chhuak leh chu call nghal tih hriat tak hian a bengah phone a chuktuah run a, a hman dâwn loh thu a sawi tâkah chuan ka awm pawh a nuam ta sawng sawng mai.
"Khaw'nge i lehkha hi? I nei tawh na nge?" rap chung sîr bang rel dap ri rak rak pah chuan ka ti a, ka dap fuh thei hauh lo lehnghal!
"A zo tawh a ni maithei" pangngai taka a rawn tih chuan
"Ka han lei lawk ang e" tih leh pawisa là tura pindan lam pan ka rual a, pa tam takin cigarette man to tak tak an zuk lâia zozial ngat a zu duh tlat te hi kan chhûngkaw dinhmun nen a inmil viau lawi a, mi dangte angin zu to ve duh ta pawh ni se tlinna chen chu kan neih tho ka ring.
Dawr chhûnga zozial lehkha ka lei lâi chuan ka nu, ka pasal nu nen kan inhmu teh hlawl a, khaw khata awm mah ni ila kan inhmu khât em em a, kan vêng a inan loh vangte pawh a ni mah nà! Chutih rual chuan kan intlawhpawh tam lo hrim hrim a, intlawhpawh tam tur paw'n kan innêl tehchîam lo a ni e.
"In dam ṭha maw ka nu?" zàngkhà vâh hian ka bia a, mahse ka ṭawng chu hria ang paw'n a awm eih lo.
"Mi dangin eng nge an tih hlawm a?" pan hnai titih hian ka ti leh a, ka biakna hmâsa zâwk kha a hre lo tak tak emaw ka tih vang a ni pakhat!
"Sukhlo pakhat kha a pumin lehkhaah min lo funsak nghal mai teh a" tiin dawr nghaktu zâwk chu a be daih a, ka zak ru chem chem!
Biak luih chìah ka ngâi tawh lo va, kan in lam panin ka haw thla ta nal nal bawk. Kan in ka thlen thlak hnuah pawh ka laka ka nu awm dan chuan ka rilru a kam ru reng a, kum 10 dâwn a mo lo ni ve tawh mah ila min la ngaithei lo reng chu hrehawm ka ti ru ngawih ngawih!
Ka mo tirh phat aṭang khan khawsak leh nunphungah min mil lo nghal em em kha a ni a, ka pasalin min ṭan nachang hre ṭhin lo ngat phei se chu hnuaichhiah kha ka tawng awl lo hialin ka ring ṭhin. Ka pasal a fel èm zâwk a, min ngaihtuah loh lâi a nei ngâi lo va, a chhûngte duh loh chunga min nei lui mah ni se a bulah chuan ka thla a muang tlat ṭhin.
"Eng nge i ngaihtuah a?" ka pasal aw ka hriat rual chuan ka harh chhuak zawk a, ka aw ka thian zui kharh kharh ringawt bawk.
"Engmah maw le" ka ti liam puat a, ka awm danah chu a hriatthiam lo hram ka beisei.
"Eng nge tih i tum a?" ka ti lèt ve ta thung a, ani pawh chuan
"Vawk in tlabal deuh lâi khu ka zu thawm ṭha lawk ang e" rawn ti ve leh maiin hmanrua nen chuan a chhuak zui thauh thauh a, ina a awm pawh hian a ṭangkâi bîk thei teh e!
Ka tih theih ang àng chu ka ti ta mial mial a, ka pasal pawh kawmthlang lamah a buai mawp mawp khawp mai. Ara-a thing a zai rik loh leh a tubohin thil a chhu ri bur bur a, kan vawk vulh ho lah chu an lo phusa ve em em ringawt bawk a, nuih an tiza lehling ang reng!
A bulah chuan ka chhuk thla ve leh ta nge nge a, step-a ka kal te chu ka fimkhur tawh em em a, lung nal rah palha tluk leh mawlh chu ka hlau a ni. Kal pawh ka kal chak ngam lo va, a bul thlen thlak nân chuan hun ka hmang rei khawp mai.
"Eng nge i lo tih dâwn?" min hmuh rual chuan a rawn ti a, rei pawh min en chuang lo.
"Eng lo......dawra ka han kal khan ka nu nen kan inhmu a" tiin ka rilrua awm chu ka sawi chhuak ta nge nge a, mahse hria ang paw'n a awm lo.
"Ka bia a, vawi hnih lâi, an dam ṭhat leh ṭhat loh te ka záwt a" tia chawl deuh dat hian
"Mahse ka ṭawng a hre lo der hmak a" ka ti zuih raih a, a thil kilh lâi chu a tawp chat nghe nghe.
"I be duh kher a nih chû......" ti bung hmuk hian a chet zawm leh mawlh mawlh a, min dem angin lang lo mah se ka nu ka bia chu ṭul a ti lo tih a hriat khawp mai.
"Kan inhmu bawk sia, biak loh tawp kha chu a nuam lo alawm" ka tih leh pawh chuan
"I bia a, nuam i ti chuang em ni?" a lo ti deuh nghut a, ka chhâng zui ta lo, a sawi dik tho bawk si a tin a ni!
"Lehkha leh vaihlo ka rawn keng thla asin, ka lo zialsak ang che chù.....?" tiin thu dang ka sawipui ta zâwk a, ani pawh chuan awkâ pangngai tak hian
"A lawmawm ngawt ang" a lo ti ve mai bawk.
Ka nu leh a chhûngte lam rèng ka sawi zuipui duh ta miah lo va, intuithlar hmak êm chu ni lo mah se keimah avanga a chhûngte nen an hrang ta nalh chu ka khawngaih ru leh veng veng ṭhin. Kei leh kan fate chawm nân a thawkrimin a hah thei bawk si, ka theih ang àng chuan ka pui ve ṭhin ngei alawm, mahse a thawhrim ngaihtuah chuan thawk nep bîk tak ka ni!
Ka zozial zialsak chu zuin a pak khu luih luih a, a sî zui leh ham ham ṭhin a, thosi tam lutuk tur pawh a titlêm sàwtin ka hria. Kan fate sikul bán hun a rawn nih chuan in lamah kan inzui chho va, thingpui ka lumsak leh a, thingpui sen hâng a in tam avang hian siamsak a harsa lo ṭhin khawp mai.
Kan fate'n in an rawn thlen tâkah chuan ei rawngbáwl a hun tih hrilh hranpa ka ngâi lo va, naupang pahnih erawh an ṭhiante nen infiam turin a chhuak leh daih tawh thung. Kan in kawt leh a chheh velah an chetlâ mai ṭhin a, an thawm ka hriat phak vek avangin an awm dan hriat a awlsam khawp mai.
Khua a thim fel ta maw tihah zanriah kan ei a, chaw ei lâiin Zualtei chuan a pa thil a záwt zet zet reng a, Puipuia pawh a bang chuang lo. Chhuna ka nu nen kan inhmuh dan mawlh khan chaw ei kham hawt aṭangin ka rilru a luah thar leh ta hle a, dik tak chuan ka pasal lakah inthiam lohna ka nei thar a ni ber.
A hmâ paw'n neih chu ka nei ṭhin tho va, mahse tun ṭum erawh a dan a dang a, ka rilruah 'min nei lui lo ta se' tih ringawt a awm ngut ngut a, chu tak chuan ka awm dan thlengin a tidanglam vek a, kan fate lehkha zirpui daih lo phei se chu ka awm dan aṭangin ka rilrua awm tur àwm ang a hriatthiam nghal vek ka ring.
"Thingpui i duh ang ti raw?" tiin ka thaw zui halh a, inngaihtuah kun reng ai chuan rilru tihthawven luih hram hram ka tum a ni ber.
"Immm....." ka pasal chuan a lo ti thum dut a, tapchhak lamah chetlâin thingpui chu ka siam ri rak rak a, ka in tur nen lam ka insiam kep nghe nghe.
"Kan zir zo ṭep" thingpui ka pek lâia a rawn tih chuan eng a sawi tumna nge tih ka hrethiam chiah lo.
"Khum ka lo va siam láwk ang e" tiin kei pawh chu pindan lamah ka lut zui ve nghal mai bawk.
Khum ka siam zo chiah tihah kan fate lehkha zir zo thawm chu ka hre zawm zat a, zunram thiar fel tê téin pindanah an rawn tlan lut rawk rawk a, puan sin tur ka phah chungah chuan an han infiam leh té tè phawt a, kan chhûngkua têin kan infiam a ni zâwk mah ang chu!
"Le!.....mut a hun e" an pain a tih tâkah chuan kan fate pawh an mu ṭha ve nghal mai a, Puipuia chu a pa lamah a tawlh phei nghal chawn chawn a, Zualtei erawh ka pang si chètin a bei ran thung.
Kan fate chu zawi tê té hian thawnthu ka hrilh a, ka hrilh chhûng zawng chuan an ngawi kar a, mut pawh an muhil har lo. Kan fate tihharh hlau ru zet chuan ka che sat sat a, min lo en rengtu ka pasal mitmeng chu ka hmu lo der ngar ngar a, tapchhaka mei ka va chhèm nun tâkah chuan a rawn phei har bîk lo hle.
"Ka rilru a nuam thei lo a" ring fahran lo hian ka ti zawi sap a, kan hmâ lawka meialh chu ka en reng a, ka pasal chuan min rawn ṭhut hnaih sawt tih pawh ka hre reng!
"Ka nu vang bawk a nih chuan rilru nawm lohna tur a awm lo" ti dam thlup mah se ka rilru erawh a kal thui nasa hman viau thung.
"I kut chu eng nge a an?" ti leh supin ka kut nâ lam chu a rawn chelh a, min vawn dan aṭang chuan tihnàt a hlau tih a hriat hle bawk.
"Lo innei lo ta ila chuan i chhûngte nen in inkâr a chhe àwm tawp si lo va ti raw?" tiin ka rilrua riak reng chu ka sawi chhuak ta nge nge!
"Ka chhûngte chu eng vanga ngaihtuah viau nge maw i nih le!?" a ti khauh hluk a, a aw aṭang chuan a lungawi lo tih hai rual a ni lo.
"Nuam i ti bîk miah lo tih ka hria alawm" ka tih chuan
"Inhnialna chawk chhuak zâwngin thil sawi tawh lo teh" ti bung hmukin ka kut chu a hmer nâ deuh salh a, ka ṭhen sawk nghe nghe.
"Têl bûr kha lo la lawk mai teh" a rawn tih leh chuan ka ban ve nghal mai a, tlêmin a aw chu hriat a nuam ta deuh bawk; min hmer nâ tih a hai bîk lo a ni mah nà!
"Ngaia neih a har êm a ni" têl sa hat hata ka kut a zùt lâi chuan ka ti chhuak sap a, ani erawh a ngawi ngul thung.
Ṭawng lovin eng emaw chen chu kan ṭhu dun tlawk tlawk a, kan ngaihtuahna kan kawm ve ve te pawh a ni mah nà! Ka bân rek erawh a la zût den den reng a, chu chuan a nâ pawh a tizia ang reng viau bawk. A hmêl chu ka en leh zeuh ṭhin a, lungawi hmêl rèng a pu lo va, thil sawi chhuah ṭul lo ka sawi tih ka inhre chhuak hnuhnawh leh ta nge nge bawk.
"I awm a nuam thei ngàng lo a nih chuan inphah hniamin kan tlawn thei reng alawm, mahse chu erawh i duh dan a nih vang chauh a ni ang" inngaihtuah vang vanga chu thu a rawn sawi lâi chuan a inseh ruh nasa hle a, a thin ka tirim tih lah ka hai hauh si lo.
"An laka inphah hniam lam pawh ka sawi chiah lo" ka ti dek dek chu
"Eng vanga nei che nge ka nih min han hrilh teh?" a rawn tih khauh nghal hmuk a, ka melh ta kar bawk.
"Rinhlelhnain i lo khat ta nge i sawi duh lo mai mai zâwk?" ka ngawih vang vang lâia min biak dan chuan ka awm a tinuam lo tak zet!
"Min hmangaih vang tih ka hria alawm" zawi raiha ka tih chuan
"A nih a hnu!" a lo ti bul hmuk a, ka kuah ta tawp ringawt!
"Ka tihpalh" mittui tling pam hian ka ti ta sep a, thinrim insum tih hriat zeta a thaw chhuak hawk ri te chuan ka awm a ti nuam lo vawng vawng thei!
"Ka chhûngte an nih avanga ngaihtuah i ni tih ka hria, mahse awmzia a awm chuang lo ang, heti hian, kan chhûngkua pawh hian kan hlim tâwk ve tho alawm, ni lo'm ni?" awkâ dam thlupa a rawn tih chuan ka lo bu nghat nghat a, chutah amah bawk chuan
"Kan dinhmunin a zir lo emaw kan rethei viau pawh a ni mai thei, mahse zahawmna hi chu tu mihring paw'n kan nei vek, ka thisen zawmpui ka chhûngte ngei mah ni se kan zahawmna leh kan chhûngkaw hlimna tur zawng zawng an rah beh ka phal lo a ni" a rawn tih zawm leh dap dap a, ka kuah nghet sauh a, ani paw'n a âwmah min kuah bei nghet ve ta hle bawk.
"An lo ṭawngkhum hlak ṭhin che emaw i hmuhmawh zâwngin an lo awm ṭhin a nih paw'n ngaiah neih i tum hram dâwn a nia" a tih leh chuan bu nghatin ka inla hrang riai riai a, rilru pawh a thâwl ta hawk mai.
"Mu tawh ila" ti nêm diaiin ka chho melh ral a, ka mit leh a chhehvel la hnawng chap chu dam zet hian a rawn tuai hul dan dan a, min hmangaih tih a va'n hriat ngawih ngawih tak!
Khuma kan mu chiah chu ka mut a rawn chhuak nghal riai riai a, engtik lâia muhil nge ka nih pawh hre lo leh mumang bo ṭhak khawpa tui hian ka lo muhil chu niin, a thawh pawh ka tho nuam sawng sawng khawp mai. Zîng boruak thianghlim sar chu hip vang vangin kawtah chuan ka tei kual vel ta mai mai a, zan lama kan awm dan ka ngaihtuah lèt rauh rauh pah reng bawk a, pasal ṭha tak neia fa duhawm tak tak pahnih kan nei leh zel te chu Pathian malsawmna ka ti lo thei lo a ni.
Kâr thar duhawm tak kan chûang kâi a, ka pasal pawh ram lam leh lui lamah a buai mawp mawp ṭhin hle a, balu làa inhlawh châng pawh a ngah a, kei chenin kan awm awl mai mai lo dun khawp mai. Fate sikul kal chhûngin kan feh dun ṭhin a, lui lam leh balu làa a inhlawh loh ṭumah chuan hna kan thawk dun ziah a, mi dangte angin kan pawisa thawh chhuah dan awlai lo mah se kan vui ngai chuang lo.
Kumin phei chu kan tifuh zual dâwnin ka hria, khaw chhak lamah sawhthing rate a to em em a, ka pasal taimak azârah sawhthing hmun ṭha tak kan lo nei leh zel bawk nen kan sawhthingte a tak ṭhat phei chuan pawisa pawh kan làk luh ve nual theih ka ring. Amaherawhchu, hmâ hun a hriat loh êm a, beisei ang ngawtin thil a thleng lo ve thei tho bawk.
Nîtin chhun nî sen sâ hnuaiah hna kan thawk tlauh tlauh ṭhin a, kan fate sikul bán hmâin keimah zâwk ka haw hmâ ziah thung a, a châng chuan ka pasal pawh ka rualin a haw hmâ ve ṭhin tho va, mahse haw hmà a nei khât hle thung.
Tin, ka pasal ka chhùanna ve em em chu a taimakna hi a ni a, kei leh a fate min hmangaih chu thuhran ni se, Pathian pawh hian a taimakna leh a thawhrimnate a hriatsak ṭhin ni berin ka hria. Kum 10 dâwn chu kan innei ve tawh a, mahse kut bêng leh ṭhenawmte chaw khawnin min la awmtîr chhin ngai lo hrim hrim!
Mipa a nih ang ngeiin a thutlukna a puitling a, a funkim ṭhin hle bawk. Ka tâna zah tlâk ngawih ngawih hian a nung a, chutih rual chuan nèlawm loh ti táwk pawh an awm nawk a, mahse mi dang laka nèlawm tehchiam kha a fuh ber paw'n ka hre lo. Eng dang a ni lo ve, ani ang pasal ṭha tak Pathianin min pe hi ka vannei a ni.
Ram lamah ni se engkim a mir emaw tih theih turin a zârah huan leh lò ṭha kan nei thei em em a, a pate in chhuahsana kan indan dâwn khan a pa'n teak hmun zau lutuk lo a pe ve kha a ni a, mahse tun thleng hian a la buaipui zui lo hrim hrim a, a awm áwmin kan awmtîr tawp a ni ber.
A tih tawh lama ti bur chì a nihna te hi kan vanneihpuiin ka hria, a chhan chu a thil tum lian ber pawh a chhûngkua, kei leh kan fate tâna pasal ṭha nih leh pa ṭha nih a ni a, a châng phei chuan hmeichhe âwm nêm zâwk leh tharum ngah lo zâwk ka lo ni bawk nen a lakah ka insit leh rum rum ṭhin, mahse chu erawh khawvela a thil duh loh ber te zînga mi a ni.
Puipuia ka pai lâi pawh khan 'ka hrisela ka dam ṭhat chhûng chuan chhûngkaw chawmtu leh pawisa thawk chhuaktu zâwk ka ni ang a, nang erawh kan fate enkawl tur leh kei min hmangaih reng turin ka duh che; chu baka hlu chu a awm lo!' a ti dam thlup thlup kha a ni a, kha thu a sawi lâia ka lo thlamuanzia mawlh mai kha, thuin ka sawifiah thiam kher lo ang.
Tin, nupa kan nih hnua ka thil hriat chhuah tâk pakhat chu 'sum leh pâi ngah nazawng an hlim vek lo ang bawk hian rethei chung paw'n nupa hlim tak leh chhûngkaw hlim tak a lo din theih reng' tih hi a ni.
Sawi leh sawi hnu, kan indan tirh aṭang tawh khan engkim kha a chiah chiah vekin kan nei a, mahse engtik lâi mah khan rilru nâ leh rum vawng vawngin min awmtîr ngai meuh lo thung. Ka rilru tibuai ṭhin bertu chu ka pasal chhûngte kha an ni mai a, kha'ng tih lovah kha chuan nupa reka khawsa kan nih lâi pawh khan kan hlim tâwk ve em em ṭhin; tun thleng pawh hian!
"Zâithanpui" min kotu lam chu ka hawi phei thuai a, Ramngheta lo ni rengin!
"Awi, i la dam ve a ni maw?" tiin ka nui zui hak hak a, ani paw'n ka fiamna chu a nuih pui ve vur vur bawk.
"Dam ang chu maw le, inhmuh a va khât ve le, eng nge tih i tum reng reng a?" ti lung lungin ka awmna lamah a lo phei a, thlen pawh a rawn thleng phei har lo.
"Kan pa nen kan han feh lawk dâwn a nih hî! I la vakrawlai tluang zel nge nupui neih te i tum hnai ve tawh?" sikul kan kalho ṭhin lâi aṭang tawha kan fiam bawrh bawrh ngam kha a ni a, Aizâwlah sawrkâr hna thawkin awm daih tawh mah se ka biak dan chu hmân ang mai kha a la ni!
"Ve khanglang a che!" tham lo zeta ti hluk hian
"Khu, in pa pawh a lo chho alawm" a rawn tih zawm leh nghal zat a, iptêpui nena rawn pen chho thauh thauh ka pasal chu ka en zawk a, tui kan ken theihnghilh tih hre chhuak hnuhnawh lo ila chuan huan kan thlen daih tawh ka ring.
"I rawn zin chho em ni?" bike bul a rawn thlen rualin ka pasal chuan Ramngheta chu a be ve sup a, Ramngheta paw'n
"Aw, zin chho lawk mai mai" a lo ti ve mai a, biak erawh an inbiak chhunzawm leh tawh chuang lo.
Rama hna kan thawh dun lâi chuan Ramngheta chanchin chu ka sawi melh melh a, ka pasal erawh a ngawi reng a, mahse ka thusawi chu a hria tih ka hre reng thung. Min titipui vak loh avangin ka ngawi ta hle hle a, hna kan thawk dun mawp mawp a ni ber e! Nî èn dan inthlak danglamin chhun chaw fak hun a lo inher chhuak a, thlâm lamah inzui chhovin lêngser hnah ka thliak chho zeuh zeuh a, chawhmeh atâna ka tih vang a ni pakhat!
"Kan haw hmâ tâkin, maian hawn tur kan là láwk dâwn em ni ang?" a rawn tih chuan
"A pawi hleinem, vawiin chu lo haw hmâ ve daih tak rawh" ka ti nghal hliai a, maian zàm dulna lamah chuan kan phei zui zat bawk.
"Ka nute kan hawn kep dâwn a nia" inhnaih taka kan awm dun lâi chuan a rawn ti leh a, hmân zana kan thil sawi dun kha ka hre chhuak zawk a, han hnaih ngam chì ni lo mah se a chhûngte an ni tho tho va, pawh loh tawp zawng a dikin a hre bîk lo a nih ka ring.
"Nia.....chuan vawiin chu haw hmâ deuh ang aw, Puipuiate an bâng hmâ dâwn tlatin ka hria" ka tih ve leh chuan
"Kan haw hmâ dâwn a nia" a lo ti sam mai a, thil dang ka sawipui ta daih bawk.
Chaw chhun kan fâk lâi chuan kan sawhthing chawh dan tur te, kan huan siam dan tur te leh thil chi hrang hrang a sawi ve nuap nuap a, chaw lah chu kan ei tui em em leh ta nghal a, ni dang zawng ai kan ei tuiin ka hria.
Chawhnu herah chuan rei kan thawk tawh lo va, maian hawn tur kan là sa vek tawh bawk nen haw pawh kan haw awlsam ang reng viau a, ka nute inah kan pêng haw ta ngei bawk a, u Kimi chiah a lo awm a, ka pasal zâwk a biak deuh siam siam lâiin kei erawh ṭawngkam khat paw'n min be duh miah lo thung.
In kan thlen aṭanga rei lovah kan fate pawh an lo haw thleng thuai a, Zualtei zâwk chu ka bual nghal daih nghe nghe. Tlai nî nèmah chuan pa Khuma a rawn tei lut hlawl a, lui kalah ka pasal a rawn sâwm a ni zâwk mah ang chu! Ka kut ka tihnàt avangin a hmâ khan ka pasal a kal loh phah ringawt tawh a, tun ṭum chu kal ve tawh mah se pawi ka ti hran lo.
"Apa, thil min lo hawn rawh aw" Zualtei chuan a ti deuh chùl a, an tlai chhuah dâwn avangin an kal thei chu a ni nghal mai a, naktuk zîng kârah chauh an lo haw a rinawm bawk.
"Immm.....anu thu lo awih ula" tiin ka pasal chuan kan fate pahnih chu a kuah thuak a, keiin a chaw pai tur ka lo funsak mawlh mawlh a, a iptèpuia ka khung hnu chuan pu Khuma nen an inzui chhuak zawm nghal zat bawk.
Pa ber kal liam lâi chu kei leh ka fate chuan kan thlir liam vang vang a, a rawn hlawhtlin haw leh ngei pawh ka ring. Lui lam a ni emaw ram lam pawh ni se ka pasal hi chu a rawn hlawhtling haw ve ziah a, ama'n hlawhtling haw lova a inngaih chângte pawh hian eng emaw tal hi chu a rawn hawn ziah ṭhin.
Khua a thim fel a, chaw ei kham aṭang chuan ka ruak ru nghal em em a, ka pasal leh a ṭhianteho tak phei chu an kalna tur lui pawh an la thlen ka ring chiah lo. Chutiang khawp chuan a la rei lo va, mahse ka ngâi ru nghal em em chu a ni bawk si.
Zan dâr 8 vel pelh hretah chuan ka call ta nge nge a, ani paw'n Puipuia leh Zualtei awm dan min rawn záwt ve luam a, zanriah an ei kham chiah thu leh an chet chhuah hnaih nghal thu a rawn sawi tâkah chuan kan inbe rei zui ta lo va, fimkhur tur erawhin ka chah ngun hman hle thung.
"Anu!" tia Zualtei ṭap feih feih ri chuan min tiharh zawk a, ka ngaihven nghal vat bawk.
"Awi, Bawihte, engtin nge i awm? I khawi lâi nge nâ?" tiin ka buaipui zui nghal zung zung a, kan thawmah Puipuia pawh a rawn harh ve vat nghe nghe.
"I khau a sik a nih hî" ti hluaiin Zualtei chu ka pawm kang nghal rawk rawk a, Puipuia lam chu hawiin
"Puipui, damdawi bâwm lo là la, chuan tui va là bawk rawh, hmanhmawhin" ka ti deuh hlawk hlawk a, ka fanu awm dan avang chuan hlauhthawn loh tum viau mah ila ka thei der lo, a chhan chu a pian tirh ata a vawi khat dam lohna a ni tlat!
Puipuian ka sawi ang ngeia damdawi leh tui a rawn làk hnu chuan Zualtei chu damdawi ka pe nghal thuai a, a ṭap tawh lo va, mahse a taksa a zawi vek thung a, a pang lah chu a sat hian a sa hat hat reng a, a taksa pumin a sa chhuak vek a ni mah zâwk a, a awm dan engkim mai chuan min tihlauthawng lo thei lo a ni.
Ka theih anga rangin ka pasal ka call thuai a, mahse vawi tam a ring hnuah pawh a là thei reng reng lo va, lui lamah an chhuk tawh tih ka hriatthiamna chuan ka mang a tiang zual a, ka tihtheih awmchhun ni ta chu health sub-centre-a tlan chhohpui a ni tawh mai.
Zualtei chu ka paw làwp a, in kawngka ka kalh fel hnu chuan health sub-centre lamah kan tlan chho ta hlawk hlawk a, zan lâi a pel tawh bawk nen thawm chu a reh ṭhiap a, zah pawh dâwn lovin mangan luatah engkim chu ka ti mawp mawp a ni ber.
Health worker te'n min hmuh rual chuan min lo buaipui nghal zung zung a, hlauthawng leh mangang reng rengin hun chu ka hmang a, ka pasal ka call lahin chhànna ka dawng thei bawk si lo. Ka mangan luatah ka nu, ka pasal nute lam ka call leh ta tawp a, mahse ka nu chuan ṭawng peih lo aw zet hian
"A dam lo satliah a ni lo maw, a ṭha ve leh mai ang" tiin phone min dahkhum hmak a nih chu!
Ka rilru a nâ bawk si, a ipik bawk si, hrehawm ka va'n ti ngawih ngawih tak em! Ka thluak chhûng a buai nuaih nuaih a, health worker te'n ka fanu khawsik a san thu leh hospital pangngai panpui vat a ngaih thu an han sawi leh zel te phei chuan ka thluak a tichawmawlh vek a, kan awmna a la thingtlâng bawk si, ka fanu chungah chuan thil pawi a thleng ang tih mawlh ka hlau a ni.
Ka fanu leh fapa tlansanin kan in lamah ka tlan thla rawk rawk a, in ka thlen rual rual chuan kan pawisa kawl zawng zawng ka là nghal zung zung a, rilru hmanhmawhnain ka khat tawh a ni ber. Ka fate awmna ka thlen chhoh hnu chuan a rang a rangin hospital changtlung zâwk lamah kan inphur phei thuai thuai a, kan khua aṭanga hospital ṭha pangngai awmna a hla mah mah te chuan ka thin a tirim hlur a, tih theih erawh ka nei tlêm si!
Dârkâr khat leh a chanve hnuah kan thleng ve thei ta chauh a, emergency a ni tawh avangin hospital-a hnathawkte chuan min lo buaipui nghal vat vat a, doctor-in ka fanu thluaka khawsikpui a luhna chance a sànzia a sawi chiah chu ka mang vek a, sawi tur pawh ka hre lo.
Engmah tihtheih nei ve ta lo chu doctor te'n ka fanu an bawihsàwm chhûng zawng chuan ṭhutna awmah kan lo ṭhu tlawng a, Puipuian a pa a rawn lam ri chiah phei chu ka ṭap chhuak tawp nghe nghe a, mahse ka ṭah zawm loh nân ka insum hram hram thung.
Ka pasal lui kal nî taka chutiang thil kan tawng chu hrehawm ka ti zual em em a, ani tal awm se chuan ka mangang leh lungngâi lutuk pawh a zia deuh ngei ang, mahse ani erawh hmun hlâ taka awm ang mai a ni rih tlat bawk si, kan hun tawn mêk chuan min va'n hmer sawp hneh tehreng êm!
Hospital-ah chuan rilru buai nuaihin kan awm ta reng a, kan khaw health worker te pahnih paw'n min awmpui ve reng a, a thlamuanthlak viau rualin ka thla erawh a muang thei tak tak bawk si lo. A éng lam zâwng hlir hian min titipui deuh reng a, hmeichhia ve ve an lo ni kher bawk nen ka rilru tur chu min hriatthiampui te pawh a ni mah nà!
Ka fanu dam loh ṭan dan min zawh chuan chhán ngaihna ka hre mai lo va, lui kal tura a pa leh a ṭhiante an liam hnu khan a awm dan a pangngai chiah lo tih kha chu ka hre deuh reuh ngei a, mahse chutianga nâ nei a ni bawk si lo kha ka ngaihtuah zui loh phah ni ta berin ka hria.
Engtin nge Puipuia lehkha zir lâia a mut a chhuah thu a sawi te khan rinhlelhna pakhat mah ka neih loh záwk le, zan dangah te chuan a û lehkha zir zawh hmâ chu a mu duh bîk ngai miah lo a ni ṭhin si a, khuma ka mutpui te khan engmah ka hre lo kha a nia, ka lo va'n mawl hliah hliah tak!
Ka thiam loh vek a ni!
Puipuia sam chu ka chûl niap niap a, tui tak hian a muhil bâm reuh a, a nau Zualtei erawh a dinhmun a ṭhat loh avangin oxygen hiptîr mêk a la ni a, a taksa dinhmun ṭha lo zual thut theih a nih avangin nurse te'n an la vil reng bawk a, keini a chhûngte takngial paw'n kan la hmu thei lo.
Varṭian a ni tawh a, kan khaw health worker te pahnih chu an mut a chhuak tih hai rual a ni lo va, han chhìn zeuh pawh an neiin ka hria, mahse kei erawh chhìn khat pawh ka chhîng thei lo, nâtna tuara ka fanu a awm mêk lâia lo muthilh chu ka thei ngàng lo a ni. Ka phone nghawr dat dat chu là kangin ka en thuai a, zankhuaa ka lo beisei ruk tawh ka pasal ngei a ni e.
"Hello, kan lo haw mêk e, missed call ka hmu nual a, in ṭha maw?" dam raiha a rawn tih chuan insum thei lovin ka ṭap chhuak hak a, chutah amah bawk chuan
"I ṭha em?" a rawn ti leh nghal thuai a, phone-ah chuan a pen ri khep khep thawm pawh ka hre tawh lo, a ding chat ni ngei tur a ni.
"Nizan khan Zualtei a dam lo nasa lutuk a, chuan health sub-centre-ah ka chhohpui thuai a, mahse a khawsik a lo sâng lutuk a, hospital-ah kan phei ta tawp a, mahse tun thlengin a la rawn harh lo" ṭap lovin sawi chhuak thei teh mah ila ka mittui erawh a tling nasa hle thung.
"Lo mangang lutuk lo la, ka lo thleng thuai ang" hlauthawng aw tih hriat tak hian a rawn ti nghet churh a, kan inbiakna pawh chu a hmet tawp zui nghal hmak bawk.
Khua a vâr telh telh a, Puipuia erawh a la muttui hle a, kan khaw health worker te pawh an ṭawng duh sawt leh ta khawp mai. Pakhat zâwk chuan hospital bul hnaia mi thingpui leh chhang a zu lei nghe nghe a, min rawn lei kep thlap chu niin, tlêma han inhnawh puar deuh tâkah chuan harh pawh ka harh deuh sawtin ka hria.
Dârkâr hnih dâwn a liam leh hnu chuan ka pasal paw'n hospital a rawn thleng ta, ṭah loh ka tum ngial a, mahse ka insum thei thlawt si lo. Puipuia chuan a pan nghal vat a, a pa paw'n a lo pawm kang thuai a, lui kal haw tih takah a thawmhnaw hak pawh hnathawh thawmhnaw a la ni a, mahse kan zînga a awm ve tawh hrim hrim chuan min va thlamuan ru si êm!
"Nizan chuan ka pate i bia em?" a rawn ti sup a, ka hrilh ang nge ka hrilh lo law law ang tihah ka buai ta!
"Zualtei chanchin hi ka pate'n an hria em?" a rawn tih nawn leh ngat tâkah chuan zep neih buai ka tum tawh lo.
"Hrilh chu ka hrilh ngei a, chu pawh ka mangan êm avangin, ka call che lahin chhànna engmah ka dawng thei si lo. Ka rilru hlauthawng lutuk khan ka nu ka call ta tawp a, mahse dam lohna satliah mai maiah min lo ngaihsak a, engmah hrilh zui chíah ka ngâi tawh lo a ni" tiin engkim chu ka hrilh ta vek a, thinrim insum tih hriat zet hian a lo inseh ruh ṭawlh ṭawlh a, a hmel pawh rum ṭha ngel ngul tak a ni.
"Hetiang em em hi chu an nih ka ring lo asin" a rawn ti chang bawl a, ṭhut hnaihin a darah chuan ka bei ta hle hle a, ka rilruah ka nute lam réng a leng rih lo; ka fanu tih chauh lo chu!
Dârkâr tam a liam leh hnu chuan doctor paw'n kan fanu mutna room-a kan luh a phal ve ta a, kan khaw health worker te pahnih pawh rei lo tê an rawn lut ve zawk a, ka pasal ber a lo thleng tawh bawk nen min hawsan tura ka tih tâkah chuan min hawsan ve mai a, an lakah lawmthu sawisen loh kan bâ ka ti lo thei lo.
Chawhnu lamah Zualtei chu a rawn harh a, nurse kan hrilh vat a, doctor pawh a rawn thleng har lo khawp! Doctor-in kan pa awm lâi ngeia kan fanu nunna an chhan hman loh teuhzia a sawi lâi chuan ka lo meng khup zal zal a, chutianga kan fanu dam loh chhan chu keimah ka ni tih ka inhre chiang si, ka inthiam thei thlawt lo a ni.
"Pathian zârah kan dam ve leh em em ang" tiin ka pasal chuan min thlamuan viau ṭhin mah se ka indem ngawih ngawih!
"Ka ngaihtuah tâwk lo êm a ni! A awm dan chik nachang engmah ka hre lo te kha ka mawl tak zet, a dam lo tih hrethiam thuai ila chuan hetiang hian a awm miah lo ang" ti ṭiauin ka inhup zui tlawk tlawk a, ka mitthlâa Zualtei hmêl rawn lang zut zut te chuan min tinâ zual ting ni mai te'n ka hria.
"Inthiam lo duh lutuk suh, i thiam loh a awm lo, eng èm a thlen loh hi, Zualtei pawh a dam ve leh mai ang" rilru nâ miah lo anga a awm thei tlat bîk chu ka awt lehling zâwk, kei lah ka intipachang hleithei bawk si lo.
"Kan bulah i awm tawh tal a, a zia" tih bak sawi tawh lovin ka ngheng leh ta hle hle a, chutia kan nufaa min kuah lâi chuan phone call a dawng a, mit ka chhìnsan ta daih bawk.
"In rawn ngaihtuah a ngâi lo ve!" ka pasal aw chang bul hmuk ka hriat rual chuan ka meng kawk a, a biak mêk chu a chhûngte an nih ka ring nghal hmiah!
"Ngai lo, ngai lo, lo kal reng reng suh u!" thinrim aw zeta ti leh chhur chhurin phone chu a hmeh tawp hmak a, zawhna ka neih rualin zawh a hun ber em tih erawh ka hre chiah lo thung.
Kan ṭawngṭainate Pathianin a chhâng tih hai rual lovin kan fanu taksa dinhmun chuan hmasawn lam a pan ve zel a, hospital-ah kan riah chilh hmiah a, doctor paw'n kan fanu awmpui chu min phalsak nghe nghe a, dam lo dangah chuan mi pahnih khat bakin an riahpui thei lo hi a lo ni a, kan chhûnga kan fanu awmpui min han phalsak bîk chu a chungah pawh lawmthu kan sawi nasa khawp mai.
A tukah chuan ka pasal chhûngte hmêl kan hmu ta ngei a, mahse thinrim takin an haw leh hnà hná hlawm a, ka pasalin Zualtei hmêl takngial pawh hmuhtîr a phal tlat loh avanga haw leh ta ringawt an ni a, hmuh ṭalh tum lui ngat se zawng hospital-ah chuan buaina hial a chhuah ka ring.
Kâr hnih lâi a liam leh tâkah chuan kan fanu pawh a dam ṭha ve tawh hle a, kan chhûngkua pawh hlimnain min tuam khawm leh ṭan ta! Chutah kan hospital awmna bill zawng zawng chu kha doctor, kan fanu chhantu ngei mai khan min lo peksak vek tawh chu niin, lawm avangin ka ṭap leh ta nge nge a, kan chhûngte pawh ni lo, mi dang hnen aṭanga khawngaihna kan han chang mawlh mai chu a lungchhiatthlak lehling zâwk a ni.
Ka pasal chuan chu doctor pa phone number chu a dil nghe nghe a, ani paw'n ṭha deuh hian a lo pe ve mai bawk a, a ṭhen azâr tal rulh lèt a tum thu ka pasalin a sawi charh charh lâi chuan a ngaih loh thu a lo sawi ve nasa viau a, mahse awmzia a awm tam lo hle.
Hospital chu dam takin ka chhuahsan a, kan fanu Zualtei pawh a pa thla zar hnuaia awmin a ṭawng leh zet zet thei tawh a, khawpui chhûnga an thil hmuh apiang mai chu Puipuia nen an inzàwh chhawk mawlh mawlh reng a, ding dat hian ka pasal leh kan fate inpawm riala kal mêk chu an hnung lam aṭang ka thlir vang vang a, ka vanneihzia ka hre thar awn awn a, ka pasal mawlh chuan ka lung a dum hliah hliah; amah avang chauha chhûngkua din thei leh kan fate nu ni thei ka ni si a!
Comments
Post a Comment