SANGLURA By Havali Adam

SANGLURA

(Mizo Romantic Short Story)

By 

Havali Adam

Thla èn zan a ni tih hai rual lovin thla chu a êng fiah mawi hle a, zâwl khawpui lam aṭanga pian leh murna khaw lam pan mêk kan ni leh zel te chu thla êng nen chuan a inchawih lehling phian a, boruak pawh a vawt tawh khawp mai.

December thla lâi hawl a ni a, Krismas kan hnaih tawh viau bawk. Sumo chhûngah chuan passenger kan chûang khat ṭhap a, kan khaw Sumo driver u Nghaka ṭawng chu kan nuihpui leh dar dar ṭhin a, kan ri laih laih a ni ber. Kan khua kan hnaih tawh viau e ti lo chuan thlen thuai thuai duhna rilruah a awm ru reng a, ka haw khât ṭhin em vangte pawh a ni mah nà!

Pâwl 12 ka zir khan ka zir zawh hunah chuan zir zawm tawh loh ka tum kha a ni a, mahse ka nu leh pa zâwkin B.A degree tal nei turin min duh tlat a, a tirah kha chuan anni avanga zir zawm leh mai chauh ka ni a, mahse tun hnu; ka zir zawm leh tak tak hnuah hi chuan ka tâna an lo dâwn thuizia ka hre chhuak ta fô mai. 

Sawrkâr hna hmuhna atân leh eizawnna atân chauha zirna min chhunzawmtir an ni lo va, ka tâna ṭha tur an hriat avang zâwk a ni tih ka hriat chhuah apiang hian ka lawm ru veng veng ṭhin. Tin, Aizawl lamah ka nîte an lo awm leh zel bawk nen Pathian paw'n zirna ka chhunzawm zel kha rem a ti a ni mah nà, ka nîte chhungkaw bula àwm lah a nuamin an fel bawk si, ka vannei tak zet a ni!

Kan khaw dâia zun in awmna; zin dâwn apianga ṭawngṭaina hmun atâna kan dinna ṭhin bulah chuan zû rui ni àwm tak tak mi palî hi an lo ṭawng ri lawng lawng hlawm a, u Nghaka chu a tlan muan phah nghe nghe bawk. Sumo chhûnga mite pawh chu ennawm leh hmuhnawm thlir ang hrim hian pâwn lam kan hawi ṭhap a, kawngpui sira lo awm te zînga pakhat chu u Nghaka chuan a bia a, a mi biak pa hmel kan han hmu chiang chiah erawh mak kan ti hlawm ngei mai. 

"I lo chûang chho ve nghal daih duh em?" u Nghaka chuan a ti zàng vah a, kan ding titih náin motor erawh a la rum ri vut vut tho.

"Bike ka keng alawm, min lo han chhohsan rawh u, kei pawh ka lo chho har lo ang" ti dam daptu hmel chu ka en reng a, motor chhûnga chûangte min en kual dan dan tih pawh ka hmu vek a, min rawn en ve tâkah chuan ka hawi sawn ta chauh bawk! 

"A nih kan kalsan ang che aw, a vawt si a, awm rei lutuk duh suh" hawihhâwm tak hian u Nghaka chuan a ti ve leh mai a, kan tlan chhuak zui nghal chu a ni mai.

"Kan khuaa pastor lo awm tawh zawng zawngah u Sanglura hi chu a la naupang ber náin ka la ngaina berin ka hria, a fel pawh a fel rèng a!" tiin u Nghaka chuan titi a vawrh zui zat a, nichin lawka kan din chilh pa, kan khaw pastor kha ka mitthlaah a rawn lang nghal bawk. 

"Ni e, a fel khawp asin! Ruihlo ngâi leh rualban lo thleng hian a tua mah a en hrang ngai lo, a mi pangngai en vek ti ila kan sawi sual lo ber ang. Nupui ṭha deuh nei se te hi ka ti ṭhin ngawt mai, pastor ni chunga han parawl tlawng atân chuan ka ui a ni. Amaherawhchu rawng a bawlsak Pathianin  nupui ṭha tak a la pe ngei turah ngai ila, ka hriat sual loh chuan tunah hian kum 32 emaw 33 vel chiah chiah a niin ka hria, nupui neih chu a hun ve reng tawh maw lè" a hmâa ṭhu pa Hminga; vêng sânga mi chuan a rawn tih zawm ve duah a, khaw hmuna awm tam a nih avangin a thusawi chu a dik thawkhat viau ka ring. 

"Keini ai kum 3-in a û tlatin ka hria, tunah hian 29-na ka hmang mêk a, ka la zawt chiah lo nà chu kum 32 a nih ka ring" tia chawl deuh datin u Nghaka chuan

"U Sanglura hi chu mak ve deuh asin! A hmâa kan khaw pastor te kha chu sawi septu kha an awm leh nawlh ṭhin a, mahse ani erawh hi zawng sawiseltu a neih àwm ka la hre lo reng reng. Kumin bak min awmpui tawh dâwn loh leh nghal a, uitu a ngah viau ang" a tih zawm leh dat dat a, ka chùanpuite'n tuihnih zui nghal sap sap mah se kei erawh ka mi hriat chian zawng a nih miau loh avangin ka ngawi reng thung.

Zan dâr 9 rik hmain khaw chhûng kan lut a, kan in kawtah ka chhûngte'n min lo hmuak ṭhap a, kan in dik taka ka lut te chu sawi thiam si loh hian ka hah a dam nghal veng veng ni maiin ka hria. Ka nu'n ṭawng siam siam pahin chaw ei min siamsak a, kawng lakah kan chawl tawh tho nàin ril erawh a ṭâm leh der tawh!

"Nu, kan pastor hian kumin bak hun a nei tawh na nge?" tiin ka rilrua riak reng pakhat chu ka zawt deuh tawl a, ka nu pawh chuan

"Aw, a term a tawp tawh a, Kolasib lamah a awm dâwn tlatin ka hria" a lo ti ve mai a, tapchhaka mei lûm âi pahin chaw chu ka bâr mial mial a, zawngṭah mawlh chuan ka chaw ei a titui zual tak zet!

"A fel hle a ni ang a, kan rawn haw kawngah a chanchin an sawi liam liam a, khaw dâia zun in bulah khuan kan rawn tâwk chho hlawl leh nghal a, ka hmuh tirh chuan mak ka ti tawp!" ka ti liam puat a, ka thusawi chu ngaihtuah pawh ka ngaihtuah zui lem chuang lo.

"Sanglura te chu a fel alawm, zû zuar ṭhin Thangzauvi pawh khu tun thleng hian Sanglura vang liau liauin a zû zawrh a bansan hmak asin! Mî sawi dan chuan zû in ṭhin tam tak pawh a buaipui ṭhin a ni àwm e, i nau Gabriel-a nen pawh sawn an innêl ang reng khawp mai" mit khap fak fakin ka nu thusawi chu ka ngaihtuah zui rauh rauh a, ka pa meizial zu chuan ka mit lá zawm nghal zatin

"I zu leh tawh elo pa? I nghei tawh emaw ka tia?" ka ti deuh halh a, ka pa pawh chuan

"Ka zu tam hran lo, kum thar aṭangin ka nghei tak tak tawh ang" a lo ti sam mai a, ka nu erawh awih vak loh hmel hian a lo nui hak thung.

Chaw ka ei kham a, ka eina thleng sil fai nghalin tapchhakah bawk chuan ka ṭhu leh a, ka nu leh pa titi ngaihthlak pahin ka ngaihtuahna ka kawm melh melh a, kan upa ber u Puia lêng a rawn haw meuh chuan inthlak lovin ka ṭhu rei ta hle tih ka hre chhuak nghal bawk.

Inbual lo mai turin min ti nà chu tui chhûang lùm leh tê tê phawtin ka inbual ta tho va, inbual fai sar hnua mut zet zawng nuam sawng sawng tak a ni! Ka nau Gabriel-a nen khum khatah kan mû a, ka pa leh ka nu an mu dun a, u Puia erawh amahin a mu thung.

Kan mu tawh e ti lo chuan ka nîte ka la be miah lo tih ka hre chhuak thut a, mut hmunah biain tluang taka ka thlen tawh thute chu ka hrilh hnuhnawh leh a, kan inbiakna kan tihtawp rualin current a rawn thim nghal ringawt bawk a, thla êng a lang chiang si; full moon tih takah a lunglenthlak ngawih ngawih! 

Engtik laiin nge ka muthilh pawh ka hre lo, ka harh chuan khua a lo vâr vek tawh a, dâr 8 dâwn a lo ni tawh nghe nghe. U Puia leh Gabriel-an tui an khâi a, kei leh ka nu'n ei rawng kan bâwl dun mial mial a, ka pa erawh chempui chher tirin pùmah a kal thung a, mahni tâwkah ṭheuh kan buai ve hlawm khawp mai.

"Êeeee....kha....in va buai laih laih àwm ve?" mipa aw lo chhuahna lam ka hawi chuan kan khaw pastor hmel ka hmu nghal zat a, ka beisei loh lam tak a ni!

"Buai lo ve, lo ṭhu rawh, tukin chu khawi lamah nge?" ka nu chuan a lo ti zung zung a, kei pawh chu ka awm pangngaiin ka awm ve leh mai bawk.

"Vêng thlang lamah khuan ka'n tei kual vel mai mai a ni e" pastor Sanglura chuan a lo ti ve leh nghal mai a, an titinaa lo inrawlh chu ka tum hran lo.

"A nih chu maw lè, thingpui han siam la Angaih, a hâng a duh ang aw" ka nu'n a rawn tih chuan ngawi rengin ka che zui mial mial a, siam buaithlak a ni lo bawk a, thingpui chu ka siam zo hmâ hle. 

"Nula thingpui lúm in lohna pawh a rei ta hle mai" thingpui ka pek laiin pastor Sanglura chuan fiamthu tih hriat tak hian a ti deuh kher a, ka làih phah ṭep nghe nghe.

"College kal lâi màw i nih a?" amah bawkin a rawn tih zui leh nghal zat chuan

"Immm....." tih chauhin ka chhâng mawl tawp a, ka chhûngte kâ aṭangin ka chanchin ṭhenkhat a lo hre tawh a nih ka ring hmiah!

"A nih chuan eng subject nge i Major?" pangngai deuh hian a rawn ti leh a, kan inen chiang ta hle bawk. 

"Tunah rih chuan major ang leh core ang zawngin kan la kal chiah lo, mahse 5th Semester aṭang chuan Mizo core ka tum deuh" ka ti ṭha ve mai a, bu nghat nghat pah hian

"Ni tak e, kan hun lai ang emaw ka'n tih ngawt chu lè! Keini hun lai kha chuan Major kan ti mai zel kha a ni a, Mizo pawh hi Core Subject atân a ṭha viau tho a nia" a rawn tih zawm dap dap a, a aw chu hriat a nuam phian leh nghal. 

"Nia, ṭha ve ang reng" tih leh kal sawn ka rual a, ka nu nen inkawm zâwk se nuam pawh a tih zâwk ka ring. 

Gas bul ka thlen phei chuan hmui phunin ka nu chu pastor Sanglura bula kal turin ka signal a, nui var var chung hian a phei ve nghal mai bawk. Kan khaw pastor chu a awm rei hran lo va, tukṭhuan ei ve nghal mai tura ka nu sâwmna pawh mawihnai takin a hnar a, ka pa a rawn haw meuh chuan tukṭhuan kan ei zui nghal chu a ni mai. 

Chhun lam chu insuk leh in chhûng tihfaina hun atân ka hmang nilêng deuh thaw a, awm hahdam mai mai turin min ti mah se ka thei lo a ni. Krismas a hnai vet vet tawh bawk a, chhun nî sat lai paw'n boruak lêng vel hrim hrim chu a vawt deuh hiam tawh a, ṭhenawm khaw vêngte Boney M hla play thawm zawng zawng nen a Krismas tawh tak zet!

"Puih i ngâi em?" aw lo chhuahna lam chu ka hawi phei a, pastor Sanglura lo ni rengin!

"Aih....." ka ti deuh tawp a, ka chhan dan chu a hawihhawm loh thlak tih hre chhuak leh nghalin

"Ka sawi awmzia chu ngâi lo ve, a rit hleinem" ka ti zui zat a, a kiai deuh suk chu ka en rei ngam chiah lo, nuam ka ti chiah lo a ni ber.

"Min lo nghak rawh" tih leh a bike chu kawngpui sira hun ṭhat a rual a, a chet dan zung zung chuan min tihamhaih ang reng viau!

"Ih....eng lo....puih ka ngâi lo tak tak a nia" ka ti ve tak ná chu ka bul a rawn thleng phei der tawh! 

"Khawi, ka lo khâi ang e" tih leh ka insuk pho ro ho dahna plastic bâwm chu khai a rual nghal a, chutah amah bawk chuan

"Ka rin ai a zàng" a ti zui leh sup a, plastic bâwm chu lianin rih hmel viau mah se kei paw'n rit ka ti lem lo. 

"Nia......eng lo, ka pawm thei tho a nia, i buai lo em ni?" kan in lam kan pan lai chuan ka ti ve ta sep sep a, amah a puitlingin a zahawm khup bawk nen ka zâm ru ang reng hle bawk. 

"Buai zo chiah" a lo ti mai a, sawi leh tur a vâng ta pharh mai. 

Kan in kan thlen chuan ka nu'n a lo be nghal siam siam a, thingpui erawh in khawmuang tawh lovin a haw tlang nghal a, ngaihtuah zui loh ka tum tehreng nen ka ngaihtuahnaah a châm veng veng leh nghal! Dik tak chuan pangngai taka a hmel ka hmuh hmasak ber zan; ka haw zana a hmel ka hmuh khan ka mit a là ru viau a, mahse engti lam zawnga ka mit là nge a nih erawh ka ngaihtuah ngai lo hrim hrim thung.

Ka buai zawm mawlh mawlh tâkah chuan ngaihtuahnaah thil dang a awm lo thei lo va, ka pate hna thawka chhuak pawh an lo haw har lutuk hran lo. Kan huanah mipaho an kal a, hmeichhe pahnihin in kan lo nghak thung a, kan tê ber Gabriel-a chenin chhûngkaw tân kan ṭangkai ve tawh hle.

Kan chhûngkua hi panga kan ni a, ka nu leh pate hi chu sawi vak ngâi lovin thingtlâng hnathawk an ni mai a, u Puia erawh kan khaw High School-ah zirtirtu hna a thawk mêk thung a, kei leh Gabriel-an lehkha kan la zir mêk bawk a, kan naupan zual lai ang em ema kan buai laih laih tawh bik lo hrim hrim te pawh chu hmasawnna pakhat niin ka hria.

Zanriah ei kham erh awrh velah current a rawn thim a, a awm leh har phian leh nghal a, current a awm leh meuh chuan hun a kal duai hman tawh nghe nghe. Ka'n chhûngin ka pute in lamah kan lêng chho va, current awm hnuah kan haw thla chauh bawk. 

Mut hmunah chuan ka ngaihtuahna ka kawm melh melh a, ka pute ina kan len laia ka nutei te thusawi mawlh kha ka ngaihtuahna luahtu pakhat a ni a, chu pawh pastor Sanglura chanchin bawk a ni. Tun ṭum ka haw zet zawng a chanchin ka hre zing malh malh khawp mai; kum dangah te kha chuan ka ngaithla liam mai zel kha a ni a, mahse tun ṭum erawh keimaha a thawh dan a dang tlat!

Ka mut dan siam remin thil dang ka ngaihtuah ta daih a, duh ai ka mu tui mah mah a ni mah nà! Ka harh chuan khua a lo vár fel diam tawh a, keimah chiah ka lo mu tawh nghe nghe. Tapchhakah ka nu leh pate an awm a, u Puia leh Gabriel-a te erawh zing dang ang bawkin tui an châwi a, kei pawh hmai phih sawk sawkin tui chàwina lamah ka phei zui ve nghal mai bawk.

Tukṭhuan ei lai chuan ka pa'n kan zavaia feh a rawt a, ka phurh nghal sarh a, thlâma chhun chaw fâk vel ka châk tawh a ni ber. Ka pa rorel lâwk ang ngei chuan kan feh ta vek a, feh kawngah erawh pastor Sanglura kan tâwk leh hram a, a mak ka ti, kan khua ka thlen tirh aṭang khan kan inhmu fuh thei tawp! 

Chu mai a ni lo, ka chhûngte a biak reng lai paw'n min en deuh bik tlata hriatna ka nei a, ka hre sual a ni maithei, mahse ka en apiangin min lo en ve hman ziah a, a hawi sawn hmasa zâwkah ka ṭang ziah bawk. Kan inhmuh lah hian tum lâwk pawh ni miah lovin ka ngaihtuah zui ziah leh nghal a, thil mak ve tak chu a ni.

Ram kan thleng a, kan thlen tirh aṭang mipa hovin thing lam an buaipui a, kei leh ka nu'n thlai eng ilo hawn tur kan buaipui zui nghal mial mial bawk. Chhun chawlh a rawn hun chuan thlâm chhûngah chaw kan fâk bial laih laih ta ngei a, ka beisei ang ngeiin chaw ei pawh a tui khawp mai. 

Chawhnu her tlai lutuk lovah kan haw a, hna ka thawh lohna a lo rei ve ta deuh bawk nen ka chau ru ang reng viau a, mahse chau ang erawh chuan ka awm duh bik chuang lo. Tlai mah ni se ina rawn lêng lut an awm pheuh pheuh a, chauh pawh a sawi theih chiah loh a ni ber; zan mut hmâ erawh ka tum viau thung.

Chawlh kâr a liam a, ka haw chauh emaw tih laiin Krismas kâr kan hmang thleng ta der mai. Zan khat chu beisei loh deuh hian pastor Sanglura a rawn lêng lut hlawl a, ka nu'n thingpui siam turin min ti a, ka siam ve nghal mai bawk. Tihtur dang ka neih tawh loh avangin pindan lamah ka awm ta daih a, ka nu leh pate nen an titi tui viauin ka hria.

A haw dâwnah erawh ka zung tur nen kan inen chiang leh hle a, kan inen chhuna kan inen chiang thei lutuk te chu mak ka ti ru tulh tulh, a chhan lah ka hre bik der si lo. Ṭul hle lovah chuan kan inbe ngai mang lo va, ka chhûngte nen an lo innêl danah a rawn chûangkâi ve fô a nih ka ring hmiah bawk.

Ka nute thlah thawm chu mut hmunah ka ngaithla kar a, a haw aṭanga rei pawh la ni lovah current a awm lo leh nghal ringawt bawk a, tun lai chu a chhun a zanin current a awm ṭha lo ṭhin khawp mai. Thla êng erawh a lang chiang hle thung a, ka phone chu phawrhin thla làk ka tum a, mahse ka duhthu a sam lo.

Mu fel vek tawh si kha ka tho leh ang lawi a, thla êng mawi tak thla lâk tuma pâwn ka chhuak tur chu ka nu'n min ko va, ka chhuah tum chhan ka sawi chuan ho a ti teh e! Pâwn ka thleng a, boruak a lo hit vawt ang reng viau a, thla eng fiah tak thla làa ka tin vang vang lai chuan

"Thla êng i làwm ve tho elo?" rawn ti thum duttu ka hre thut a, ka phutna lamah ka phone ka thlauh ṭep nghe nghe. 

"Eheeeeee.......!" ti deuh hliaiin

"I la haw na nge?" ka tih zawm leh zat a, ka mi biak pa; pastor Sanglura pawh chuan min rawn pan phei nghal chhut chhut bawk.

"Thla a én hi chuan mut mai hi ka harsat ṭhin" ka bul chetah a ding a, min bia nge a rilrua awm a sawi chhuak mai mai zâwk pawh ka hre lo e a!

"Vawt i ti lo em ni?" a rawn tih leh sup chuan

"Ti ve tho e, ka rin ai a lo vawt daih a" ka ti ṭha ve mai a, kan inbe nà chu kan la inen lo hrim hrim. 

"Thla êng hian ka lung a lèn riau ṭhin" a ti zawi hniam leh ruih a, ṭawng ring lo e ti lo chuan a thusawi chu ka hre chiang viau lawi si!

"A lunglenthlak ve alawm" chhan loh aia ka tih chuan

"Luh i la tum lo em ni?" a rawn ti daih a, ka melh chho nghal zeuh nghe nghe.

"Ka va lut tawh ang e" ti sapa inher mai ka tum lai chuan

"Angaih" a rawn ti leh lawi a, tun ṭum zet zawng kan inmelh chiang leh ta viau mai.

"Mut tui le" ti hniam supin thutak zet hian min en run a, thla a êng ṭha bawk nen a hmel lan dan chu ka hmu chiang hle bawk. 

"Immm....nang pawh mut tui le" ti fiah raihin ka inher ta nge nge a, ka thin phu rang dawt dawt lutuk te chu ka hrethiam rih mai lo. 

Khuma ka mut fel hnuah pawh ka thin chu a la phû rang reng a, mahse a sarhu lai ang em em kha chu a ni tawh lo thung. Pastor Sangluran ka hming ngeia min ko kha mak ka ti ta ber mai, min ko thei lo chu a ni miah lo, mahse min koh lai khan ka zâm ru hle a, ka mi zah ruk em emin ka hming ngeia min ko teh thut kha ka dawnsawng thiam chiah lo ni berin ka hre ta!

Chumi zan aṭang chuan pastor Sanglura ka melh dan leh ka ngaihtuah dan chu a pangngai thei ta reng reng lo va, ni lo, a nihna takah chuan ka haw zan aṭang daih tawh khan ka mit a là ru tawh zâwk a ni. Tlangval hmelṭha leh zahawm tak a ni tih ka hai lo va, a felin Pathian rawngbawltu a ni leh zel te hi amah tizahawm khuptu a ni pakhat bawk.

Krismas hmâ zawng chu kan inah a rawn lêng lut leh ta miah lo va, eng nge keimahah dik lo awm pawh ka hre tawh bik lo, pastor Sanglura chu ka ngaihtuah zual ta tlat ni berin ka hria. Thawk leh khata ka rilru puthmang danglam teh thut avang chuan Aizawl ka awm laia kan khaw nulate'n pastor Sanglura an ngaihzawn ruk hlawm theihzia ka hre chhuak uarh uarh a, a hun lai khan ho ka ti thei hle kha a ni a, mahse tunah zet zawng ho ka ti ta hauh lo.

Ni lo, ka ngâizâwng tihna a ni lo, ka ngaihtuah dan a dan tâk avangin ka ngaizawng tihna a ni kher lo, ngaihtuah zui turin a rawn awm zel alawm, ni e, a dik chiah! Ka tum pawh ni miah lova ka ngaihtuah leh rauh rauh ṭhin avang hian ka ngaizawng tihna a ni lo va, ani phei chuan engtin nge min ngaih ang, ka rilrua awm ang hi hre ve phei se chu ka tân a mualphothlak dâwn lutuk tlat! 

Krismas nî a rawn thleng ta nge nge a, chawhma leh chawhnu, zan thlengin ka inkhawm kim ṭhap a, zanah chuan pastor Sangluran kan kohhranah thu a rawn sawi nghe nghe a, ṭum dang ang bawkin min en deuh bik tlata hriatna ka nei leh tlat tawh a nih chu! 

A Pathian thusawi ka vawi khat ngaihthlakna a ni bawk a, ka rin ai a ṭawngkam a puitlin mai bakah a sawi thiam ang reng hle a, a thusawi tumah leh a thupuiah a chiang viauin ka hre bawk. Inkhawm kan bâng a, in kan thlen hnu chuan pindanah inthlakin sitting room-ah ka ṭhu awn der der a, ka mut pawh a chhuah har ka ring lo. 

"Zanin chu i sawi ṭha dap dap leh pek hle mai" tia ka nu ṭawng lang lang ri ka hriat hnu lawkah pastor Sanglura aw ka hre zui zat a, ka hawi phei chuan in chhûngah a lo lut fel diam tawh bawk.

"Khà....i va chau àwm ve?" hriat nuam ang reng taka pastor Sangluran min rawn biak tâkah chuan

"Chau lo ve, ka lo ṭhu hahdam vel mai mai alawm, thingpui ka lo lûm dâwn che a nia" tiin ka tho zui ve mai a, tun ṭum chu ka nu tirh ngâi lovin ka awm ve teh mial a, ka awm deuh húih leh nghal.

Pastor Sanglura nen chuan kan mit a intawng fô leh ta nghal a, ni danga engtin mah awm ngai lo kha tun ṭuma ka thinpui lûmsak erawh ka zâm ru hle thung a, a mitmei te chu ka awih ngam chiah lo nàin nula enin min en ni berin ka hria, mahse ka hre dik lo ve thei tho bawk.

Ngaihzâwng hi vawi khat chu ka nei ve tawh a, kum hnih dâwn chu kan inzui ve hman a, mahse nâ taka min siam hnuah kha chuan inṭhen lo thei kan ni ta si lo va, ka vawi khat neihna a nih vang nge pawh ka hre lo. Kan inṭhen hlim kha chuan ka tuar nâ hle a, mahse hunin a liampui a, zawi zawiin ka zia ve leh mai a, khami hnuah kha chuan ngaihzâwng ka nei leh tawh lo hrim hrim. 

Hmeichhiate hi chuan mipate mitmeng, min en dan leh min biak dan aṭang hian thil ṭhenkhat hi chu kan hrethiam ve nghal uarh thei a, mahse pastor Sanglura erawh hi chu rinhlelh loh theih pawh a ni lo, ka awih ngam lo a ni mah zâwk! Ka ngaihruat ang a lo nih loh phei chuan ka rilru hre kher lo mah se ka tân pawh zah chem chemna tham a ni!

"A va tui sa var var dâwn ve le, a hâng ti raw?" thingpui ka pek lai chuan a lo ti sup a, min en tih pawh ka hre reng, mahse ka en lêt ve duh lo thung. 

"Immm.....a hâng ni e" ka lo ti ve mai a, ka kal sawn rualin ka nute nen an titi zui nghal daih bawk. 

Rei tak a rawn pêng lo va, inkhawm bâng tih takah coat nen a la ni up a, kan in aṭanga a chhuah dâwn lai tak chuan a lam ka hawi phei a, min lo en ve chiah bawk a, kiai suk hian min buk khum zauh a, chu tê mai pawh chuan ka rilru leh ngaihtuahna a tibuai leh nghal vek tawh a nih chu! 

Ka TV en lai pawh chu ngaihsak lem lo tak hian pâwna ka nu leh pate nena an ṭawng thawm chu ka ngaithla ran a, an inthlah liam fel ta maw tihah TV pawh ka en pangngai ve leh chauh nghe nghe. Ka nute an rawn luh hnu chuan thil eng eng emaw ni kan sawi a, ngaihtuahna pawh hmun dangah a kal peng ta daih nghe nghe.

A tukah chuan ruai ṭheh turin kohhran mipui kan inbuatsaih mup mup a, kan chhûngkua aṭangin ka pa leh u Puia an fatu a, kan naupan lai ang khan ruai ṭhehna tur hnah lâk a ngâi ve tawh lo va, Dispo thlengin kan BAFE dâwn a nih hmel a, tun hmâ leh tun hnuaa kan ruai ṭheh dan pawh a inang lo ta khawp mai.

"In hman tawh em?" mipa aw ka hriat rualin ka hawi chhuak a, pastor Sanglura bawk ka hmu leh ta, eng nge a lo tih dâwn erawh ka hre hauh lo. 

"Aw.....hman tawh chu a ni mai" ka ṭhutthleng nawh fai lai chawl dat paha ka tih chuan

"I va la hman loh hmel si ve" a rawn ti ve leh dut a, a nui deuh suk hmel ka hmuh rual chuan ka nui ve ringawt bawk. 

"Nia, ruai ṭhehnaa kan ṭhut tur a nia, ka hru fai lawk a nih hi, lo zu lut rawh, ka'n ti zo law law ang e, ka nute pawh an la kal lo" ka ti zàngkhai zung zung a, a lut mai dâwn emaw ka ti a, mahse lut lovin a ding ta reng zâwk!

"He lamah rawn ṭheh ve daih la?" a ngawih vung vung lai chuan ka ti mawihnai leh a, ruai ṭheh tura kal mêk te thlirin ka awmna veranda-ah a ding ve reng bawk si a, biak loh tawp zawng mawiin ka hre chiah lo a ni. 

"Nia...." tih chiahin min chhâng nà chu a lam ka hawi chho rang hle a, chutianga min chhan ka ring lo hrim hrim bawk.

"Kumin bak ka awm tawh àwm si lo va, he lamah hian ka'n ṭheh ve hrim hrim ang e" mi pawh en chuang lova a rawn tih leh tâkah chuan ka mak tihna pawh a kiam ta deuh! 

"Kan bulah rawn ei daih la a ni mai alawm" ka tih liam puat laia min rawn en chiah chu ka hawi sawn rang ngei mai. 

"In bulah alawm ei ka tum" ti supin in chhûng lamah a lut zui ta daih a, a awm lo chiah chu ka thaw deuh huai nghe nghe. 

Ruai ṭheh dâr a rik tâkah chuan pastor Sanglura hovin biak in lam kan pan ta ṭhâm ṭham a, min en zeuh zeuhtu an tam lutuk chu a nuam lo lehling zâwk! Pastor Sanglura vang a ni tih hai rual a ni lo va, betu pawh a tawng nûal a, kohhran upa chenin an rawn ngaihsak a, a thleng tur dawhsak te an tum hial a, mahse chutianga tihsak chu lo duh bik mai lovin kan rualin chaw a dawh ve thlap ta zâwk a, ruai kan ṭheh lai te chuan ka bulah kher a la awm zui a, mî mit kan lâk zual phah viauin ka hria.

Inbe lovin chaw chu kan ei mial mial a, ka nu'n a be leh zauh ṭhin tih loh chu kan ṭawng lo tluk a ni! Kei nen phei chuan kal hmâa kan inbia tih loh kha chu kan inbe leh tawh lo hrim hrim a, inbe dâwn ta pawh ni ila sawi tur ka hre rih lo, ani pawh chutiang vel tho chu a nih ka ring, a ngawi ren run êm mai! 

Ruai ṭheh zawh hnuah pawh kan inah a lêng ve deuh reng a, ka nu'n kan ina lo kawi lut te a be daih bawk si nen sitting room-ah kan pahnih chauhin kan awm a, mi dang zawng choka lamah an awm laih laih a, in chhûng kan luh tirh khan a puar leh puar loh ka zâwt vek tawh a, han sawi mai tur ka hre leh tawh rih lo a ni.

"Naktuk eng nge i tih ang?" a rawn ti deuh thut chu ka en zawk a, ka hawi sawn leh thuai thung. 

"Ka hre lo le" ka ti ve mai bawk a, a phone khawih lai chu dahin min en leh ta run mai. 

"Local Football Tournament ka han en ve dâwn emaw ni ka tia, i nau nen kan kal dâwn asin, i peih chuan lo kal ve la?" a sâwmna avang chuan ka mit ka khap fak fak a, chhán dan tur ka haihchham hle bawk. 

"Nge ni a, i peih chiah lo?" a rawn ti leh nghal zat a, a ṭawng ring hran lo nà chu ka hre chiang viau tho.

"Peih loh pawh a awm lo, hman chu ka hman ngei ka ring a, mahse...." tiin ka ngawi zui daih a, min lo en run bawk nen sawi zawm dan tur ka bangbo vek!

"Naktuk han thleng phawt se, Gabriel-a sâwmin ka rawn chhuk dâwn tho bawk a, i peih chuan i lo kal ve dâwn a nia" tih leh thawh a rual a, ṭawngkâa chhâng lovin ka buk khum ta ringawt.

Kan in aṭanga a chhuak tur chu ka nu nen an inbe tawi khawmuang leh hret a, a haw fel hnua ka ngaihtuahnaa lo lut hmasa ber chu sawi chhuah chî ni paw'n ka hre lo. Ei rawngbàwl a ngâi lo bawk nen ka awm ta vel mai mai a, ka ṭhiante paw'n lêng chhuaka tei hawi kual vel mai mai turin min lo sâwm reng a, mahse chhuah vah ai ina awm ka thlang ta zâwk a ni. 

Mi dang zawng an chhuak vek a, Gabriel-a chenin an lêng dial a, kei erawh khumah ka mu zâl mai mai thung a, ka lo muhil tlang daih chu niin ka harh leh chuan khua a lo thim vek tawh a, ka chhûngte pawh an lo haw fel vek tawh nghe nghe.

Zan hun a ral a, zîng khawvâr eng mawi tak chuan ni thar a rawn her chhuahpui a, Gabriel-a pawh inkhel en tur tih takah a phur tawh khawp mai. A sawi lâwk tawh ang ngeiin pastor Sanglura chu kan inah a rawn chhuk ta ngei a, kan inmelh fu thei ṭhin lutuk erawh ka zàm ru leh veng veng ṭhin.

Ka nu leh pate awm lai renga min han sàwm leh tâkah chuan tihtur em em ka lo nei chuang bik bawk si lo nen an bula kal chu ka peih ve ta nge nge a, ka nu leh pate'n kal ve tura min tih vang a ni pakhat! 

Field kan han thleng chu inkhel boruak a lo ṭang pap pap hle a, a inkhela te ai mah chuan inkhel entu te zawk an ṭang emaw tih theih turin boruak chu a sosâng a, khûang nen an ri dur dur a, mite'n min en leh zeuh zeuh ṭhin tih hmu ru reng mah ila tun ṭum chu ka hre lo der ve hmak tawh a, ka ṭhiante nen pawh kan inhmu a, pastor Sanglura hovin inkhel chu kan en ho ta daih a, ka beisei ai a nuam ang reng phian bawk. 

"Khawi zâwk nge i ṭan?" min en miah lo hian a rawn ti sup a, inkhel chu a en reng a ni mah zâwk!

"Ṭan bik pawh ka nei hran lo" ka ti ve mai a, ka ṭhiannu pakhat chuan min lo nghawk zauh a, awmze nei tak hian mi a la melh khai khai zui! 

"Nuam lo i ti em?" a rawn tih leh chuan

"Aih.....ti lo ve, ka rin ai a nuam daih" ka lo ti zung zung a, min rawn en zâwk lai chuan ka nui deuh sâng pawh ka tim dai mai.

"A ṭhat chu" a ti dam leh sup a, ka bula awm ve reng ka ṭhiante mawlh chuan a rukin min va han nghawk nasa hlawm tak!

"A va'n ngaihsak che ve a?" ka ṭhiannu pakhat chuan ka beng bulah a rawn ti sar sar a, ka ner khum deuh sak ringawt. 

"Tak tak alawm!" a rawn ti leh hram a, ka ding lam sir lawkah pastor Sanglura a ding ve reng bawk si nen sawi tawh rih lo turin ka khap thuai thung.

Inkhel kan ei rei tâk hnu chuan hmuhnawm ka ti tulh tulh a, ṭan pawh a nâ duh zek leh nghal a, mahse keini ṭhianho ang em emin pastor Sanglura erawh a ṭang ve paw'n ka hre lo, ngawi reng hian a en deuh tawp ni maiin ka hria. Gabriel-a ni se a ṭhiante bulah a awm daih leh nghal a, haw lamah pawh pastor Sanglura nen chauh kan haw phah ringawt a, biak erawh kan inbe tam lo viau!

Kâr lovah kum hlui thlah zan kan chuangkâi der a, pastor Sanglura erawh inkhel kan en ho ṭum tih loh kha chu a reh leh ta vang vang a, ka nute sawi dan chuan kumin aṭang khan kum dang zawng ai kan inah a rawn lut tam zual a nih hmel a, Gabriel-a nen pawh kumin aṭang thova innêl an nih ka ring hmiah bawk. 

Zan a ral a, kum thar ni duhawm tak kan han hmu leh thei te chu Pathian kaihhruaina a ni ka ti lo thei lo. Kum thar tir chauh mah ni se rilruah erawh chhuk hun tur a lo lang nghal a, rei deuh hlek chàm ve te pawh a châkawm rualin zirna avanga chhuk hmâ a ngâi leh ṭhin bawk si a, a châng hi chuan ninawm ve ṭhin tak a ni. 

Zan khat chu ka ṭhiante an lo lêng a, keia lêng chhuak peih lo ta nà nâ nà chu min rawn lén chilh fô va, an thusawi erawhin ka beng a verh ṭhin ngei mai. Pastor Sangluran min ngaihsak riaua an hriat thu ringawt an sawi a, ka chhûngte awm se chu ka khap ngei ang, mahse an awm lo hlauh a, an thusawi chuan ka rilru leh ngahtuahna a kai pêng ziah daih bawk.

Ni e, a hmâ kha chuan nia ka hriat; mahse ni tak tak si lo ang khan ka ngâi a, mahse keimah chauh pawh ni lo ka ṭhiante leh zel paw'n pastor Sangluaran min ngaihsak ru deuh tlata an lo hre ve tho chu ka rilru a sawh nghet sawt ni maiin ka hria. Kei ngei paw'n ka ngaihven ru reng tih ka pha lo, mahse mi dang hriat theih tur ang zawngin ka tilang ngai lo thung.

Kum thar ruai ṭheh nî ah pawh pastor Sanglura hmel ka la hmu lo tluang zel a, kan kohhran lama ruai a rawn ṭheh ka ring ru ve ringawt a, mahse ka ngaihtuah tawizia ka hre chhuak chiang hle. Kan kohhran hi pastor ṭhuthmun a ni lo tlat a, chu vangte pawh chu a ni mah nà, kan kohhran lovah ruai a ṭheh tihna a ni mai.  

Chumi nî aṭang chuan ka hmu khât telh telh a, mahse ka inhrethiam tawh bik lo, ka vei zual tulh tulh ni berin ka hria. Hun rei lo tê chhûngin thil tam tak a thleng zung zung hman a, mahse engkim chu keima lam chauh a la ni rih thung a, ka rilrua riak reng pakhat pawh engtin nge pastor Sangluran min ngaih ang tih a ni. 

Kum thar kâr a ni a, chawlhni lo awm hmasa ber chu pastor thlahna hun atân kohhranin a ruat a, chumi nî chuan inthlahna thu a sawi nghe nghe a, mahse chu bak chu kan inhmu leh tawh lo hrim hrim thung. Ka hriat chhuah tâk chu keimah leh keimah beiseina ka lo insiam chawp mai mai zâwk hi a lo ni a, hun a ral ang a, ka ngaihtuahna aṭang ka paih chhuah ve leh theih mai ka ring bawk. 

Thla a liam a, zirna avangin kei pawh Aizawl lamah ka awm leh daih tawh a, ka nîte nen pawh kan infiam nasa tawh hle. Ka nîte hi ka awm chilh titih tawp a ni ber a, in luah kan han tum viau kha a ni a, anmahni lam zâwkin an phal tlat lo va, an bula awm tura min tih tlat avangin ka awm ve ta nawk nawk a, ka beisei phak bakin min ngaihven a, fa nei lo an ni kher bawk nen min duat ṭhin khawp mai. 

Thawhṭanni zan a ni a, number lawng tawp aṭang hian 'Angaihi a ni em âw?' tih message hi ka dawng hlawl a, a tirah chuan chhàn enah pawh ka en lo. Message open kher lova a hmuh nghal vek theih avangin open pawh ka open duh lawk lo va, mahse ka online tih erawh a hriat vek tho. 

Dâr 11 velah daih 'Tu nge âw? Angaihi chu ka ni ngei a, ka va'n hre mai lo che' tiin ka reply ve ta chauh a, ka hriat ngai mi ni lo mah se reply loh tawp zawng dikin ka hre lo a ni. Chutia ka reply hnu chuan engmah ka ngaihtuah zui ta lem lo va, zíng ka thawh ruala ka message dawn leh erawh chuan ka ngaihtuahna a tikal tui khawp mai. 

"Sanglura ka nia" tih tê mai hi a lo ni a, number lawng tawp aṭang bawk khan a ni leh ta zel a, chutah ka mitthlaah pastor Sanglura hmel a rawn lang hmasa ber leh nghal. 

Chu message tawi tê chuan nilêngin ka rilru a luah ta reng a, college-a ka ṭhiante nen hun kan hman ho lai paw'n ka ngaihtuah chhuak fô mai a, kan khaw pastor hlui Sanglura kha a nih ka ring deuh bawk si, ring ngam chiah bawk si lo ang hian ka awm a, chu bakah ani ang te chuan ka phone number a neih ka ring lo hrim hrim.

"Aizawlah ka rawn kal lawk dâwn asin" tih thu chu zanriah ei khama whatsapp ka luh rualin ka hmu hmasa ber a, number lawng tawp aṭang bawk a ni leh a, a chung berah lo awm vàng lo se chu ka hmu nghal lo mai thei a ni. 

"A nih chû" tih bakin ka reply lo va, ka message lah chu a la in-double blue tick rang em em zui!

"Khawi vêngah nge in awm?" a rawn ti ta zel a, ka hrilh ṭha ve mai bawk a, pangngai taka biak a ṭha zâwk dâwnin ka hre ta!

"Min hrethiam la, ka hre chiah lo che a, mahse min hriat hmel viau bawk si a, i insawi chiang deuh thei ang em le?" ka ti ve leh ta tawp a, ka thu thawn dan chu mawi lo lamah a lâk loh hram ka beisei.

"Naktukah kan lo chho dâwn alawm, kan inhmu ang a, min hre mai ang, ka rawn bia ang che" a message chu ka chhiar nawn tluk tluk a, 'chho' a tih lai tak te chuan pastor Sanglura kha min ngaihtuahtîr lo thei lo.

Ani kha Kolasib District, Diakkawnah a awm tawh tlat a, Kolasib aṭang Aizawl chu 'chhoh' a ngâi ngei a, mahse amah kha lo ni reng ta se engati nge ṭha taka a insawi mai loh le? Min biak dan aṭang hi chuan min hriat chian hmel bawk si, kei lahin ka hre chiang ve der si lo, rilru a tibuai ru reuh tak zet!

Engtin mah ka chhán lêt tawh loh avangin ani pawh a reh ta hmak a, mut hmun thlengin ka ngaihtuah chhuak thung a, mahse ka ngaihtuah ngut ngut hran lo. A tukah chuan ni dang ang bawkin college ka kal leh a, B.A chhuak turin kum chanve vel chiah chiah a la ngâi a, chhuah thuai thuai ka châk tawh dan chu pui tak a ni. 

"I buai em?" tih message chu lunch break kan neih laiin ka dawng leh ta! 

"Buai lo e, college-ah ka awm a" ka ti ve mai bawk a, duh ai ka chhâng lêt rang ang reng!

"Eng College nge?" a rawn tih leh chuan

"Gov't Aizawl College" tih chiah thawnin ka ṭhiante thusawi laiah chuan ka ṭawng zawm zui nghal mawlh mawlh a, message lo thleng leh pawh ka en nghal lawk lo nghe nghe. 

"Synod Office-ah ka awm mêk a, ka tihtur ka zo chiah, ka lo chho ang" tih thu ka hmuh rual chuan ka meng buai ta nak mai. 

Message chu ka chhâng lêt tawh lo va, tu nge a nih chiah la hre chiang fak rih lo mah ila hmaichhana kan inhmuh ngei ka ring nghet bur! Lunch break zawh nân minute 15 vel a la awm tihah number lawng aṭang bawk phone call ka dawng a, ka pick up ruala a aw ka hre chiah chu tu nen nge kan inhmuh dâwn ka hai tawh lo chiang teh e! 

"In college kawtah ka awm mêk" a rawn tih chuan canteen aṭangin ka chhuak a, ka ṭhiante pawh ka ngaihsak tawh lo a ni ber. 

"Min hre tawh em?" ka hmel a hmuh rual chuan a rawn ti nghal a, lài zet hian ka nui ringawt a, ani pawh a kiai deuh suk bawk.

"Nangmak lek elo? Engtin nge ka number i neih daih a?" nêl tak ang mai hian ka ti tan tan a, mahse ka awm dan chu a lutuk deuh hlek tih ka hre chhuak chawpchilh nghal thung.

"Ka nei har viau zâwk asin" a lo ti sam mai tak nàin awmzia a nei tih erawh ka hai lo hle. 

"I hman chuan Synod Conference Centre kawng chhovah khian han ṭhu lawk ang hmiang?" tia min sawm zui zatna chu ka hnar ang nge hnar lo ang tihah ka buai ru leh ta!

"Nia.....ih.....aw....pawi lo.....kal ila" thil chi hrang hrang ngaihtuah pawlh nuk nuk pah hian ka ti bah nuaih a, chawhnu first period nei mah ila pastor Sanglura bula hun hman chu ka châk ve tlat si a ni.

"Eng nge i rawn tih reng reng a? I dam ṭha maw?" a duhna laia kan awm dun chuan a ṭawng hmasa zâwkah ka ṭang a, nuam ka tih rualin ka zàm ru ang reng hle.

"Dam ṭha e, lehkha pawimawh ka rawn là lawk maw lè, thil zawh duh che ka nei a...." tiin min zawh duh pawh chu min zawt nghal mai lo va, kan mit a intawng nghal chat bawk. 

"Tunah hian...." tia chawl deuh datin

"Ngaihzawng i nei em?" a rawn tih zawm leh zat a, chhàn mai nachâng pawh ka hre lo, ka en deuh kal ringawt! 

"Ih......nei lo e" ka ti lawi rût a, ka làihzia chu pui tak a ni. 

"A nih chuan lo be ṭhin ta che pawh ni ila a rem a ni maw?" a rawn tih leh zel te chuan ka thin a tiphu rang dawt dawt a, ka sa deuh pup pup bawk.

"Rem lohna pawh a awm chuang hleinem" ka aw chu a chhuak chang chang tih theih tur hi a ni a, mahse a hriat phak vek tho ka ring. 

"Ih...eng lo....ka hmanhmawh deuh a...u Sanglur" kan ngawih dun vang vang laia ka tih leh chuan nui suk pah hian

"Min û lo mah la a pawi lo a nia Angaih" tih leh chet a rual a, ṭawngkam mawi tak mah ni se û a duh chiah lo a nih hmel.

Bike-a rawn zin a nih avangin College kawt thleng kein min kalpui a, kal tawh tura ka tih chuan naupang thu awih tak ang mai hian a bike hùnna lamah a kal phei ve hna hná mai leh nghal a, ka nuih a tiza ru ang reng viau bawk. Step aṭangin a tlan liam lâi chu ka thlir zui vang vang a, ka mood zawng zawng a in-on vekin ka hria. 

Zan lama min rawn biak leh chuan whatsapp message ni tawh lovin phone call a ni tawh thung a, a thlen tluan leh tluan loh thute ka zâwt a, ṭha tak hian min chhâng ve mai a, kan awm dan chu ka suangtuah phak bak daih a ni a, nuam ka ti ru viau bawk. 

Kan khuaa pastor a nih lai khan bike a lawmzia te, a tleirawl chhuah tirha bike intlansiaknaa a tel ṭhin thute kha khaw chhûngah a lar chiam tawh a, car nei reng tho mah se a chhuah vahnaah pawh bike hlir a lek chhuak ṭhin rèng a, Aizawla lo zin chhoh nân pawh bike bawk a rawn hmang a, bike hi chu a lawm ve chiang a ni.

Chumi nî, kan khua a chhuahsan hnua kan inhmuh leh hmasak ber nî aṭang chuan phone call-in kan inbe ta fô mai a, a bikin zan lamah a ni deuh tlangpui a, zirlai ka la nih vang nge ni!

"I lehkha zir ka tibuai em?" a rawn ti hmasa tê tê phawt ṭhin a, kei; a ruka lo vei veng veng ṭhin tân chuan hnar phal chi ziazang a ni mawlh si lo.

Kan inbe ngun telh telh a, vei satliah mai ni tawh lovin ka thinlungah hmun a khuar thuk tial tial a, a aw te thleng chuan keimahah a mikhual tawh lo viau bawk. Ka duhna leh ngainatna erawh ka la tilang ngai lo tluang zel a, ṭha takin ka be mai ṭhin a, inhmu tam lo mah ila min ngaihven tih chu hai rual a ni tawh bik lo.

Inrinni zan a ni a, inkhawm bàn aṭanga rei lo tê hnuah a hnen aṭangin phone call ka dawng a, kan inbe rei fû leh nghal a, sawi tur a ngah pawh a ni lo, keimah zâwkin sawi tur ka ngah a ni mah zâwk ang chu! 

Inngaizawng ni chiah si lo, mahse ṭhian ni bawk si lo ang hian kan inbia a ni ber a, kan inbiak aṭang khan thla 2 dâwn chu a liam ve leh der tawh a, kan inbiak apiang hian hun a kal chak bik ziaha hriatna ka nei ṭhin nghe nghe.

Ni khat chu chhunah min rawn call ve teh mial a, Aizawla a lo zin dâwn thu min hrilh lai chuan ka phur ru nghal em em a, inrinnia inhmuh a rawt laia ka hlimzia te chu hria se zawng min nuih hial ka ring. Kan inbiak zawh hnu thlengin ka khi heu reng a, ka ṭhiante paw'n min nuih tawp ringawt. 

Kâr thar a lo inher chhuah chuan Aizawlah a rawn zin leh ta ngei a, tun ṭum chu ka nîte inah ngei min rawn kal chilh a, ka nîte nupa paw'n fel an ti khawp mai. Pastor a nih thu an hriat hnuah phei chuan an nêl zual a, an be siam siam a, min chhuahpui daih lo se chu an be reng peih ang ka ring.

Falkland kawng lamah kan inphur thla vang vang a, eng nge kan tih dâwn erawh ka hre hauh lo thung. Kan tlan zel a, Falkland park thlen hma kawng reh phei raihah chuan min dinpui a, ka chhuk fel hnuah pawh kan la inbe lawk lo va, chutiang hmun reh lutuka min hruai teh daih chu sawi tur a neih vang a nih ka ring tawp!

"I chhûngte an dam ṭha em?" amah zâwk a rawn ṭawng hmasa ta nge nge a, phone-a inbiak nen kha chuan inang lo tak a ni. 

"Immm.....dam ṭha e" ka tih chuan

"A nih nang?" a rawn tih zawm zat a, min din hnaih nghal sawt bawk. 

"Ṭha a ni mai, nang zâwk?" ka ti ve tak nà chu ka zawhna pawh chháng miah lo hian

"Angaih" ti hniam dam ruihin a ngawi zui vung vung a, ka dar tawn tawna a chelh rual chuan kan inen chiang nghal hle.

"Ka veiin ka ngâizâwng hle che tih hi i hria em?" a rawn tih leh chuan ka thin a phu dup dup a, ka thin phu ri chu a hriat phâk hial ka ring.

"U Sanglur" ka ti thâm chhal a, sawi mai tur pawh ka hre lo. 

"Min û lo la ka duh Angaih" tiin min en chhuk run a, hnuai lam ka bih ta ringawt! 

"Ka lakah eng rilru nge i put chu ka hre chiah lo va, mahse ka duh che tih hi hria la ka duh a ni" a rawn ti dam leh dap a, kei erawh ka sa chhuak vek a, chutiang chuan vawi khat mah ka la awm ngai lo.

"Min en teh le" thum chhal hian a ti leh a, a kut ding lam chuan ka khabe a châwi zui nghal zat bawk. 

"Ka laka i rilru puthmang ka hre ve duh tih i hrethiam ang chu ti raw? I mipa duh chî ka ni lo a nih paw'n a pawi lo, sawi hreh reng reng suh" a ṭawngkam chhuak tin chu hriat a nuam em em vek a, chu chuan ka rilru dik tak sawi chhuak lo thei lovin min siam ta a ni.

"Ih....dik tak chuan.....eng lo" tia chawl datin a mitah tak ka en chho kal a, a mitmeng aṭang chuan a hlauthawng ni mai te'n ka hria, mahse ka hmu sual a nih ka ring.

"Ka haw bik lo che alawm, mahse i zahawm ka ti, mite chung en i ni a, i rawngbawlnain a lo zir bawk nen ka tihmingchhe palh ang che tih ka hlau, kei aia àwm leh ṭha zâwk an awm ka ring" ka ti ta duah a, pangngai taka ka rilru dik tak ka sawi chhuak parh thei chu ka thaw a veng huaiin ka hria.

"Àwm leh ṭha zâwk lo awm ta pawh ni se kei chuan nangmah alawm ka duh" tih leh ka sam chu chùl a rual a, chutah amah bawk chuan

"Pathianin ka tâna a hmeichhe ruat i niin ka hria Angaih" ti leh supin a rawn kun hniam riai riai a, min fawp ta vang vang a, kei erawh zâm thin phû dawt dawtin ka lo ding mar âwt ringawt.

Inla hrang deuh hlekin a vawi hnihna atân min fawp nawn leh a, chutah zet zawng ka hmui chu ka tiche ve ta nge nge a, ka biang tawn tawn dawm meuha min fawh zui leh zel tâkah chuan a nawmna leh a dangdaina pawh ka dawng har lo kher mai.

A âwma min kuah bei hle hle hnu chuan a tua mah kan ṭawng lo va, kan rilru kan kawm ve ve te pawh a nih mah nà! Haw lam thleng chuan tawi té têin kan inbe leh zauh ṭhin tih loh chu kan ṭawng tam lo dun hle a, kan in thleng min thlah thlap a, Kolasib lam pana a tlai chhuah dâwn avangin ka ngaihtuah ru hle a, a bulah pawh fimkhur turin ka chah nawn àwn awn a, kan inngaihzawn tâk vang pawh a ni lo, ka ngaihtuah ve hrim hrim a ni ber e.

Diakkawn a thlen hlim veleh min rawn be leh thlap a, Pastor quarter a luh fel chiah thu a sawi lai te chuan ka lawm rilru veng veng a, a ruka ka duh leh ka lo vei ṭhin em em mipa nena kan inngaizawng ta tak tak chu awihawm loh rum rum mah se a tak ngei a ni bawk si, ka hlim a ni. 

Ka hun hman chu a danglamin a hlimawm tial tial a, Sanglura nen kan inngaihzawn vang a ni pakhat bawk. Nungchang zahawm leh hawihhawm tak, ngainatawm bawk si a nei tih ka hre chiang tial tial a, ka duhna pawh a zual zel a, ni khatah vawi khat tal kan inbiak loh chuan ka awm thiam tawh lo te pawh ti ila a sual tampui lo ang. 

Tin, ka zirna a ngâi pawimawh thiam em em a, chungte hlei hlei chuan ka duhna a tizual leh ta deuh deuh a, final exam hmachhawn mai tur ka lo ni kher bawk nen ṭha taka lehkha zir turin min fuih awl lo va, kei paw'n a thu awih chu nuam ka ti ṭhin khawp mai. 

Thla 1 leh a chanve vel kan inngaihzawn hnu chuan lehlânga mi rawn rim chilh a chîng chho ṭan a, ṭul ka ti lo viau nàin nuam erawh ka ti viau lawi a, kan inngaihzawn tâk aṭang hian ka hmu ṭha zual tulh tulh bawk. Kan khaw pastor a nih lai pawh khan inchengvawng tih takah hmeichhe tam tak ai khan a ngo daih zâwk a, Diakkawna a awm hnu hian a fai leh zualin ka hria, kan khaw boruak ai a ngeih zâwk a nih ka ring. 

Zan khat, Diakkawn aṭanga min rawn rim chho leh vang vang chu a thutak ang reng hle a, thil sawi duh nei hmel a pu run bawk. Thla liam ta maiah khan final exam kan nei zo va, kan exam chhûng zawng khan min tihbuai hlau tih takah kan inbe tam hran lo va, mi pawh a rawn leh chilh ngai lo va, exam kan han zo chiah erawh min rawn rim tluk tluk a ni ber.

"B.A hi lo chhuak ta la eng nge tih chhunzawm i tum ang?" a bike hunna bulah kan awm dun ran a, ka kut chu a hum hneh hle bawk.

"Ka hre lo le" ti sepin

"Engati nge?" ka tih zawm leh nghal zat a, nui suk hian ka chhip chu a fawp zeuh a, chutah ka beisei loh lutuk hian

"Nupuia neih che ka duh tawh, ka hmangaih che asin Angaih, Pathian hnenah ka kawppui àwm mi tak ka dil ṭhin a, chu chu nang ngei hi i ni tih ka ringhlel ngai lo bawk" a ti dam leh dap dap a, ka melh chho kiau a, ani pawh bike ngheng tawh bik lovin a ding ngil zui zat bawk.

"Ka hmangaih che" ti hniam leh supin min fawp vang vang a, min hmangaihzia a lantir mawlh mawlh a ni ber.

"Min nei duh ang em?" kan awm dan a pangngai hnu chuan a ti dam thluam a, ka rilrua awm dik tak chu sawi chhuakin

"Kan la inngâizawng rei lo ê" ka ti fiah raih a, ka thaw chhuak deuh halh nghe nghe a, chutah keimah bawk chuan

"Dik tak chuan ka duhin ka hmangaih che tih ka pha bik lo, mahse innei tur êm chuan kan la inngaizawng rei lo i ti ve lo em ni?" tiin zawhna ka zawt lét ta khauh a, a hmel chu ka melh chho kal bawk. 

"Inngaihzawn rei leh rei loh hi a pawimawh tho rualin a pawimawh ber hleinem Angaih, kan inhmangaih chuan a tâwk mai alawm" a tih chuan ka ngawi vang vang a, sawi dik loh a nei hauh si lo. 

"Ih...eng lo....haw tawh zâwk rawh Sanglur, i hawna tur a la hla si, i zàn thlen dâwn leh nghal. Ka lo inngaihtuah ang a, ni dangah kan sawi ṭha zâwk dâwn a nia" ka ti ta zung zung a, ani erawh chuan mi din hnaih hret pah hian

"Ka lawm e" tiin ka sam chu a chûl a, ka bangbo hman teh e!

"Engati màw?" ka ti deuh hû rèng a, a lawmthu min hrilh chhan chu ka hrethiam miau si lo a tin a ni!

"Min hmangaih avangin" ngainatawm taka nui sun sun chung hian a ti sup a, ka nui zui ve ta hak hak bawk.

"Hmangaih loh i hlau em alawm" ka ti fiamthu chu

"A dik chiah, min hmangaih loh ka hlau teh asin!" a rawn tih zawm hluai a, a awm dan leh ṭawngkam te chuan ka nuih a tiza zual a, inthlah liam tawh dâwn a rûaiah kan nui ta chiam nghe nghe. 

Ṭum danga a tih fô ṭhin ang bawkin Diakkawn a thlen veleh min rawn be leh thlap a, khuma mu pahin ka be ar ar a, thla tam la inngaizawng lo chunga kan inkar nghet tawh lutuk chuan ka lung a tiawi hliah hliah a, ka hah a dam veng veng te pawh ti ila a sual lo ang. Ni e, ka thinlung leh tih tak zetin ka hmangaih tawh a, ani paw'n min hmangaih bawk a, kan inkâr chu a hahdamthlak hliah hliah ka ti lo thei lo.

Ni tinin ka ngaihna leh ka thlakhlelhna a thar zual zel mai bakah amah ka hmangaihna pawh a nghet tial tial a, inngaihzawn rei leh rei loh aia hmangaihna a dah pawimawhzia te kha dik ka ti thar tulh tulh a, Sanglura nena kan chungchâng ka chhûngte bula engmah ka la sawi ri ngai lo hrim hrim erawh ka inthlahrun ruk phah ta khawp mai. 

Hun a'n vei leh deuh hlek a, zan khat ka nute nen kan inbia chu Samglura chungchang ka sawi ri ta nge nge a, sawi loh theih ni hek lo. A tir chuan kan inngâizâwng tih ka sawi tlang nghal lawk lo va, ka sawi lang chiah erawh mak tihna nen lawm tho bawk si nen an rawn ṭawng nghal chiam a, ka nu phei chu nui chunga ṭawng reng ang vel a ni; a ring lo lutuk te pawh a ni maithei! 

Ka chhûngte'n kan inkâr chungchâng an hre tawh tih Sanglura bula ka sawi ṭum chuan kan khuaa zin a rawt nghal ringawt a, ka'n va nui dun nasa tak! A mizia ka hre chiang zual zel a, a belhchianawm ngawih ngawih ka ti lo thei lo. Ka nîtei te nupa phei chuan

"Chhuah reng reng suh" an ti fiamthu deuh chhen ṭhin a, kei tak paw'n Sanglura ang mipa ṭha lutuk ka tawng chu vannei ka inti a, Pathian hnenah pawh lawmthu ka sawi fô ṭhin.

Nî leh thlate chu hriat loh kârin an liam zung zung a, B.A result pawh a chhuak fel vek tawh a, Pathian zârah ṭha takin ka pass a, ka pass lawm nân tiin Sanglura pawh Kolasib aṭangin a rawn zan lén chho leh vang vang a, chumi zan vek chuan a nupui atân min sâwm nawn leh a, hmangaihna avangin ka hnar thei ta bik lo a ni.

Chu erawh kan pahnih chiahin kan la hre rih a, Synod inkhawmpuia a rawn zin chhoh leh ṭum chuan an khua Sialsukah min hruai a, a chhûngte hma ngeia a nupui ka nih tur thu a'n sawi chiah mai chu a làih theih ngei mai. Chutih rual chuan a chhûngte an lo fel em em thung a, mi tihtlângnèl tum tak hian min be deuh reng hlawm a, Sanglura kâ aṭangin min lo hre tawh hrim hrim chu niin, engkimah chuan zah lo thiam a ngâi khawp mai. 

Sanglura nena kan inkâr boruak a ṭhat ang zelin kan hun hman pawh a tluang chho viau a, a tawp a tawpah chuan palâi hmel kan hmu ta nge nge bawk. Mizo dan takin engkim chu a kal tluang purh a, ka mi ngaihsan, ka mi zah leh ka hmangaih em em mipa nena kan innei tak tak tur chu lungawi hliah hliah avangin awih lo rum rum châng a awm leh ṭhin a, ama bulah pawh ka sawi tawp tawh a, kan inkâra zep ruk awm ngai miah lo te hlei hlei chuan nupa nih châkna min neih zual tir ni mai te'n ka hria.

Thla khat a liam leh a, ruahman lâwk tawh ang ngeiin Sanglura nena kan inneih hun pawh a rawn her chhuak ta! Kan inneih nî chuan a ṭhiante, a bikin a pastor ṭhiante an rawn kal tam ang reng hle a, duhsakna thu leh kuta chibai kan dawng awl lo va, ka rin ai a chauhthlak daih bawk.

Khua a hniam tial tial a, lâwichal kaihhruaina ngeia ka pasal ni ta Sanglurate in chhûng ka làwi luh lai chuan ka khi deuh reng a, Sanglura pawh chutiang tho chu! Zan lamah ni se ṭhiante mai bakah ṭhen leh rual te nen hun hlimawm tak kan hmang ho va, ka pasal chhûngte, a bikin ka nu leh pa thar te nen pawh inchhûngkhat sa ang mai hian kan innêl nghal em em a, pasal ṭha tak mai bakah chhûngkaw thar ṭha tak ka nei tih hai rual a ni lo. 

"Ngawi lawk Sanglur!" tiin ka kut chuan a âwmah ka nam deuh ṭai a, ṭawngṭaina hun kan hmang zo chiah nà chu a hmanhmawh leh lutuk a, a ṭha dâwn lo tlat!

"I phur ê" ngawi renga min en lai chuan ka ti leh tawl a, ka nui zui hak hak a hmuh rualin a rawn nui chhuak ve ta hawk hawk bawk. 

"Nang nena fa duhawm tak tak neih ka duh tawh alawm" nui sun sun chung hian a ti thum sup a, zawimuangin ka kut chu ka kuai sawn riai riai a, a rawn kun hniam tial tial tâkah chuan hmangaih taka lo dawnsawn chu ka tihmakmawh a ni tih ka hre chiang hle.

A tawp ta