"Ka duh tâwk e, ka kâi lutuk dâwn tlat" tih leh ka hmâa no chu hnawl ka rual a, ka ṭhiante erawh an la tui chho dâwn chauh a nih hmêl.
"Tun ṭum chu i va duh tâwk hmâ ve?" Sawma chuan a rawn ti a, ani pawh chu in tam vak lo se ka duh!
"Nang pawh duh tâwk tawh rawh, kan inkhalh haw thei lo palh ang e" ka ti ve tak náin a ngâi thutak lo hle thung.
"Eng nge i hriat a zanin hi?" a rawn ti deuh lung lung a, kei paw'n ka awm dan teh thut chu ka hrethiam bîk lo.
"Haw ang" ti tawi hmukin ka tho zui zat a, ani pawh chuan min lo zui ve mai bawk.
"In haw mai dâwn em ni?" tia kan ṭhiante min biakna pawh chu ka chhâng lem lo va, Sawma zâwk chuan chhângin kan inphur haw zui nal nal a, mahse ka hlauh ang ngeiin thil a thleng ta tlat mai.
Zemabawk aṭanga khawpui chhûng lam pana kan haw chu kawng kawiah Taxi pakhat nen kan intàwk thut a, rui lo hai lo kan ni bawk si lo nen khalh kawi hman lovin kawng sîr lamah kan tlan tlang vûk a, electric ban su lo hlauh phei ila zawng kawng thlang lamah tlan liamin kan nâ viau ang ka ring.
Chutah taxi driver lah chu a rawn pawr em em leh nghal a, hliam tuarin kan awm e ti lo chuan min cho ar ar hle a, mi dang pawh an lo pung khawm chak khawp mai. Vanneihthlak takin nâ mang ka nei lo hlauh a, mahse Sawma erawh a nâ ang reng viau thung.
A lû a sawh thih nûal mai bakah a ke ruh a sawh nâ hle a, a tliak ni maiin ka hria. Zû rim kan nam kher bawk nen inbuaipui zung zung a hnekin min zilh sap sap hlawm a, Sawma chu ka hnungah chùantîrin ka tlanpui ta vang vang a, Hospital hnai ber kan thlen rual rual chuan ka paw lut nghal thuai thuai a, ka hlauthawng ru tawh viau bawk.
Doctor te'n Sawma an buaipui chhûng zawng chuan ṭhutna awmah ka lo ṭhu deuh tlawng a, a chhûngte pawh kan chanchin ka hrilh aṭanga rei lo tê hnuah an lo thleng thuai a, an hmêla manganna leh hlauhthawnna lang zut zut chuan ka awm a tinuam lo zual hle. Kei lah ka him pial mai bawk si a, khalh haw zâwk ta ila chuan kan che sual kher lo maithei a ni.
"Engtin nge in chet sual theih?" Sawma pa chu melh pawh ka melh ṭha ngam chiah lo.
"Kawng kawiah Taxi kan tâwk thut a" tih bakin ka chhâng lo va, han sawi vak tur ka hre lo a ni e.
Rei fê chu kan nghak deuh tlawk tlawk a, ka chhûngte hnen aṭang paw'n phone call ka dawng nghe nghe a, ka haw hár vang a ni tih ka hria. Ka awmna leh kan hun hman mêk dan ka hrilh chuan an hlauthawng nghal em em a, a bîkin ka nu phei chu hlauthawng zual tak a ni. Kan awmna Hospital-ah an lo kal thuai a, him piala kei min hmuh tâkah chuan an hmêl pawh a pangngai nghal sawng sawngin ka hria.
Ka pa leh Sawma pa chu an inbe mual mual reng a, ka pa hi kohhran upa a ni a, an fapa mal leh fa neih chhun ka nih avang hian a kip a kawiin min ngaihtuah ru thei hle a, kâr tawpa zû in chhuah ka chîng ṭhin tih pawh a hre vek a, a zilh pawh min zilh awl lo ṭhin, mahse ka la sim hlei thei lo chu a ni!
Dârkâr eng emaw zah hnuah Doctor a rawn chhuak ve ta nge nge a, Sawma ke ruh a tliah thute, thir phum a ngaih thute a sawi lâi chuan ka khawngaih rualin ka vanneihzia ka hre thar awn awn a, ka kâi deuh chiai chiai pawh kha a reh vek tawhin ka hria. Sawma pa chuan haw rih turin min ti a, ka hnial eih lo hrim hrim, haw kawngah erawh ka pa zilhna ka dawng haw nasa malh malh khawp mai.
A tukah chuan Sawma va kan turin ka chawhmâ chhuah a, inrinni a ni bawk a, kawng pawh a tawt ṭha leh viau! Nizan khan keima'n lo khalh haw ni ila chuan tawhsual kan tawh ka ring chiah lo, Sawma ni se a khalh chak chî a lo ni kher bawk si, kan ina min rawn sàwm lâi aṭang tawh khan chhuah kha ka peih em em hran lo va, kan chhuak ta tho chu a ni a, tawhsual kan tâwk dâwn tih hria ila chuan ka chhuak miah lo ang maw le.
"Oh!!!!.....sorry.....sorry" tiin ka mipa naupang sut thluk chu ka kai tho thuai a, ka kalna tur lam pana kal sawn mai ka tum a, mahse ka mi hmuh avang chuan ka hawi lèt nghal zawk!
"E hêeee.......u Robert-a chu! Eng nge hetah daih daih i tih ve a? Inhmuh a va khât ve?" Remremi chuan a rawn ti hliai a, min hmu chu mak a ti ve hlein ka hria.
"Nia, khât khawp mai, ka ṭhianpa ka'n kan lawk ang e ka tia....." ka tih chuan mi buk khum nghauh pah hian
"Lo kal rawh le Mampui" tiin ka naupang sut kha a rawn kai a, min hnung chhawn zâwngin an kal sawn zui ta nal nal bawk.
Ka thlir reng a, rilru leh mitthlâah hun liam tawha thil thleng tam tak a rawn inlan chhunzawm zut zut a, khawvela ka mi huat ber hmêl pawh a rawn lang chiang khawp mai. Lû thing nawk nawkin ka pen zui thauh thauh a, ka thil ngaihtuah chhuah ṭul lo tak chu ngaihtuah chhuah nawn leh pawh ka duh tawh lo.
Sawma hmêl nui var var ka hmuh tâkah chuan hun kal tawhin rilru leh ngaihtuahna a luah reng tawh bîk lo va, dam lo zâwk mah ni se fiamthu a thawh reng a, thi kan awm loh avanga kan vanneihzia kan sawi deuh reng bawk. A ke ruh tliak lah chu eng teh ualah a ngâi miah lo leh nghal a, nâ ti hmêl pawh a pû lo hrim hrim.
Kan awmna ward lêna khum sîr ber, tukverh bula awm laih laih te chuan ka mit an là ru hle a, a chhan pawh nichin maia ka hmuh zawh chiah Remremi kha a ni tlata ka hriat vang a ni. Dam lo inkan satliahah ngaih ka tum a, mahse ka thei tlat lo, Remremi nia ka hriatna chuan engtin emaw tak hian min mawlh a, an bula mipa naupang che tlâ vel ka hmuh leh zel phei chu anmahni ngei niin ka hre ta!
"Lawk aw, saw tawh sawn ka va phei lawk, ka hmêlhriatte an niin ka hria" tih leh din ka rual a, ka kal sawn tur Sawman min fiam zauh chu ka kiai suk nghe nghe.
Khum sîr ber lam chu ka pan phei zel a, ka hnaih tial tial a, Remremi nia ka hriat chu a lo ni tak tak a, amah mai ni lo a nu leh pate nen lam chuan ka hmu chawpchilh ta zel a, ka ding deuh dawt nghe nghe. Khuma mu saisîr mawlh chu hriat châknain ka khat a, min hnungchhawn kher leh nghal a, chu chuan min tihre chiang châk lehzual!
"Remrem" ka tih chuan a rawn hawi a, a nu leh pate paw'n kei teh daih chu lâi hmuna min hmu chu mak an ti tih a hriat hle.
"E....lo kal rawh, i ṭhianpa a awm ve tak ti raw.....?" a lo ti zaih zaih a, a zawhna pawh chhâng lo chuan khuma mu saisîr zàr chu ka en deuh duk duk a, ka din hnaih lutuk lo bawk nen tu nge a nih tih erawh ka la hre thei chiah lo.
"U....hei u Robert-a a lo kal a" khuma hmeichhe mu mêk Remremin a ko chiah chu ka thin a phû rang nghal dawt dawt a, ka kal hnaih nghal thuai bawk.
"A rem lâiah khan lo ṭhu ve tawp rawh" Remremi nu, nu Chhani chuan a rawn ti a, ṭhut pawh ka tum chuang lo.
"Inhmuh a va khât ve...." khuma hmeichhe mu mêk, ka nun zawng zawng thlak danglam vektu chuan nui lui tih hriat tak hian a rawn ti thawp sap a, hun liam tawh ngaihtuah chhuah loh tum teh mah ila a harsa lam hret chu a ni.
"Khât khawp mai" ka ti chang deuh bul a, a hmêlah chuan dam lo tih hai rual a ni lo va, mahse engmah zawhna zawh ka tum lo hrim hrim.
"Ka va phei ang e" tih leh kal sawn ka rual zawm zat a, a hmêl ka hmu reng a nih chuan kum 5 liam ta ang chiah khan ka nâ nawn leh dâwn tlatin ka hria a ni.
Ni e, ka thinlung chhûng kil tin a tinâ a, ka haw hluah hluah bawk, tû dem theih mah ka ni lo. Ka hringnun a tihkeh sawm hnehzia ka ngaihtuah chhuak leh ta nghal a, ka haw lutuk chu ka nui chhuak hawk nghe nghe a, dam lo khuma a lo mu bàm te chu a phû tâwk chiahah ka ngâi hmiah!
Ka awm erawh a nuam lo tluan zak thung a, ka thlen tirh ang khan ka pangngai thei tawh lo a ni ber. Haw pawh ka haw har lo hle a, mahse kan ina haw tlang lovin hmun dang daihah ka kal a, duh lo eng ang mah ila hun liam tawha thil thleng tam tak chu ka ngaihtuahnaah leh mitthlâah a rawn lang lo thei si lo a ni.
"I lo haw tawh dâwn em? Chaw ei kan peih vek tawh a nia, i pa inkhawm a ngâi bawk si" phone ka pick up rualin ka nu chuan a rawn ti lang lang a, ka haw har tawh an lo ti te pawh a ni mahnà!
"Aw.....ka lo haw mêk" ka tih chuan kan inbiakna a hmet tawp zui ve mai a, ho lam taka hun khawh rala ngaihtuahna ka sêng chîam ringawt chu nep ka inti hnuhnawh khawp mai.
In ka thleng a, zanriah kan kil nghal a, inrinni zan a ni tih hre chhuakin inkhawm a awm tih ka hre chawpchilh ve leh chauh bawk. Ka pa chu dâr rik hmâin a kal a, kei leh ka nu erawh kan kal hmâ lutuk hran lo. Kâr tawpa zû in ka ching tih ka pha lo va, mahse inkhawm hi chu ka ṭhulh ngai bîk miah lo thung.
Kan inkhawm chhûng zawng chuan ka rilruah chhuna ka thil tawn hlir kha a rawn lang a, a bîkin amah Rinsangi ngei mai kha! A awm dan aṭang khan a dam lo chu a ni phawt a, mahse ka khawngaih tur a ni lo, kei hian ka khawngaih tur a ni reng reng lo, min bum kual mai mai tawh lo bawk ang.
Engtin pawh awm rawh se, keia lo ngaihtuah ve chiam a ṭul lo va, a phû pawh a phû hek lo. A duh chuan kei aia a thlan pa khan ngaihsak se, ngaihtuah khu vul chûk rawh se, mahse eng vanga kha pa hmêl kha an zîngah khan hmu ve miah lo nge ka nih? Engati nge a bulah khan a awm loh? Ni lo, ni lo, kei hi ka inrawlh lohna turah ka inham buai palh hlauh ang e!
Khuangpui ri ah chuan ka harh chhuak zawk a, mipui an lo ding vek tawh chu niin, thil ṭul miah lo ka ngaihtuah luatah keimah leh keimah ka intimualpho va, min en duh hrik hrek hlawm khawp mai. Ka nu leh pa'n min rawn hmu lo hlauh zàwk a, min rawn hmu ngat phei se chu ka zak zual teh ang chu!
Zan thla êng fiah kàk chuan ngaihtuah chhuah loh tur tùr min ngaihtuah chhuahtîr leh nghal a, duh lo eng ang mah ila ka thunun theih piah lam thil a ni tlat bawk si. Ka mu meng kur a, thawm chu a reh ṭhiap a, boruak a lûm chho ṭan bawk nen mut pawh mu rei lovin ka ṭhu chhuak ta hial a, zunram thiar tur ni àwm tak ke pen thawm chu ka nu emaw ka pa an nih ngei ka ring.
"I mu thei na nge?" ka pa aw ka hriat rual chuan ka hawi phei zawk a, ka mut tawh leh tawh loh hriat an duh ṭhin avangin mi rawn thlithlai a chîng leh zauh ṭhin a, zanin pawh chutiang vel bawk chu a nih ka ring.
"Ka ṭhu mai mai maw le" tih bakin ka chhâng lo va, thawm a rawn hnaih zel danah a lo kal phei tih ka hrethiam nghal mai bawk.
"I ṭhianpa chu eng nge a an?" ka pa chuan a rawn ti a, ka bul lawkah a ṭhu tih hre tho mah ila a lam ka hawi leh tawh lo hrim hrim thung.
"A ṭha viau e" ka ti sam mai a, thawm reh danah ka nu chu a muhil tawh a nih ka ring.
"Thil dang tè....?" awmze nei deuh hian a rawn ti leh a, ka awm dan aṭang chuan a hrethiam a ni mahnà!
"Ngaihtuah bing bîk i nei tlatin ka hria" amah bawk chuan a tih zawm leh zat a, ka pa mah ni se ṭhian ang tak taka ka kawm theih pa a ni miau a, ka awm dan aṭang chuan ka rilrua awm àwm ang tur a man chak khawp mai.
"Rinsangi kha i la hria em?" ka ti ta nge nge a, ka mitthlâah chuan dam lo khuma Rinsangi lo mu bàm lâi kha a rawn lang nghal zut bawk.
"Hmâna mi kha em ni?" ka pa chuan a la hre ve reng tih ka hrethiam nghal mai a, sawi kual vak pawh ka tum lem lo.
"Vawiin khan damdawi inah ka hmu thut a" tia ngawi deuh dat hian
"A dam lo ni ngei tur a ni" ka tih zawm zat a, ka pa chuan
"An chanchin te i zàwt lo em ni?" a rawn ti a, min en chiang ngar ngar hle bawk.
"Zàwt hran lo, a hmêl ka hmu chiah kha ka haw so bawrh bawrh zâwk!" ka ṭawngkam chu a mawihnai lo tih ka hria, mahse ka haw êm a tin a ni!
"Hun kal tawh avanga intih buai reng tur a ni hleinem, chu bakah hmeichhe laka huatna rilru put reng zawng a mipa loh thlak êm mai" ka pa chuan a ti dap dap a, ka tawn ang a tawn ve miau loh avangin a hrethiam lovah ka ngai hmiah!
"Mu tawh rawh, kei pawh ka va phei ang e" tia ka dar ben thek thek leh thawh a rual a, kei erawh ka rilru a la kal ding viau thung.
Ka pa phei hnuah pawh chuan ka mu tak nà chu ka la meng reng a, ngaihtuah loh ka tum pôh leh Rinsangi hmêl chu ka mitthlâah a rawn lang nasa zual ni mai te'n ka hria. Hun liam tawha ka hringnun hman dan bawkin min chenchilh zawm zat a, Rinsangi nena kan inkâr mawlh kha a ni ka ngaihtuahna luah hneh em em tu chu!
Ni e, ka tân chuan theihnghilh mai a awlai lo ve bawk êm a ni. Higher aṭangin kan inngâizâwng chho ṭan kha a ni a, mahse kan hmâ hun erawh kan hre hauh si lo. College pawh kan kal dun zel a, kan kalna thlengin a inang a, tu dang kha kan ngâi bîk lo, mahse final year-ah erawh kha chuan engkim a danglam ta si!
A ṭhiante zînga ka mipa thik em em nen ka mit hmuhah ngei an infawp a, kha ta ka nàtzia kha sawi ngaihna pawh ka hre lo hial zâwk! Rinsangi lah khan a ruih avanga engmah a hriat loh thu leh keimah emaw a tih thu min hrilh chamchî a, mahse bum hmang thusawi kha engah mah ka ngâi duh lo a nih kha!
Ka rin em em khan mipa dang lakah min phatsan a, keh thei dawma ka dawm ṭhin leh duat taka ka ngaihven ṭhin khan ka dawhtheihna leh ka duatna chu remchângah làin min bum a nih kha! Ka mit ngeia ka hmuh chian êm avangin a thusawi pakhat mah ka awih lo va, zû in ngai miah lovin a ruih avanga khang thil kha thleng a nih thu min hrilh te kha ka tân chuan awih harsa ṭalh ṭalh tak a ni.
Ei rawngbâwl thawm chuan min ti harh a, ka muthilh theih pawh ka ring lo kha a ni a, mahse ka lo muhil ngei a nih hmêl. Chawlhni tuk tih takah chaw ei kham phat aṭangin ka pa chu inkhawm turin a siam nghal malh malh a, kei leh ka nu erawh kan hmanhmawh lo dun khawp mai.
Inkhawm kan bâng a, chawhnu inkhawm lova Sâwma kan turin ka inkhalh chhuak ta daih a, ei tur pawh ka lei nghal nghe nghe. Damdawi in ka va thlen chuan Sawma chhûngte an lo tam ang reng hle a, a ruka ka mi zawn te erawh ka hmu tawh miah lo thung.
Nurse pakhat hnenah chuan ka zàwt ta tawp a, eng ka hria nge ni! Haw viau si khan ka ngaihtuah leh hnuhnawh tlat a nih chu!
Thil ṭul lo ka ti tih pawh ka hria, mahse hre reng chungin ka ti tho bawk si, ka inhrethiam tawh bîk lo. Nurse chuan nimin lama an chhuah tawh thu min hrilh a, zawhna dang erawh zawh ṭulin ka hre tawh lo thung.
Kâr a liam a, thla hial a vei hnuah chuan Sâwma pawh a ṭha chho ve zel a, tawhsual kan tawh aṭang khan kâr tawpa zû in ka nei tlêm ta tial tial a, kan tawhsual tawh vang a nih rualin ka pa hmai ka zah ṭhin vang a ni pakhat bawk. Ka pa kohhran upa lâi a ni ve a, mi chuan zû ka in ṭhin tih pawh an hre mang lo ang, mahse fel tak anga awm chu a khamawm ka ti, lemchan ka ning a ni ber e!
MZU lamah ka kal nitin leh ta tlauh tlauh a, han hmuh loh vang vang tâkah chuan Rinsang pawh ka ngaihtuah zui reng tawh bîk lo va, ka hnaah ka insawrbing leh hle tawh bawk. Ka hun hman dan chu a pangngai chho leh ta viau a, haw lamah Sawma ka tlawh kawi zauh zauh ṭhin a, ani pawh a ṭha chak viau mai.
Tlai khat erawh tum loh deuhin Rinsangi nau Remremi nen kan inhmu leh hlawl a, intâwk zâwnga kan kal avangin inbiak loh theih a ni lo va, kum 5 liam ta ang maia min la nêl thei te chu ka mak tih a tling a, ka be chhe bîk pawh a ni chuang lo, mahse dik tak chuan Rinsangi leh a chhûngte hrim hrim hnaiha awm ka duh tawh lo a ni.
"Fate hial i lo nei tawh a?" ka sawi tur hre lo chuan ka ti deuh tawp a, kal sawn mai tum se zawng chutiang thu teh tlawng chu ka zàwt kher lo ang.
"Keima'n maw!?" tiin a nui zui hak a, a mizia hrim hrim pawh chu a lo puitling ve tawh khawp mai.
"A nih mai lovin, ka bia che alawm" ka ti nghut a, nui var var chung hian
"Fa ka la nei hleinem" a rawn ti sam mai a, kei pawh chuan
"Damdawi ina ka hmuh kha i fapa emaw ka lo ti mai asin" ka lo ti sam ve leh mai a, kal sawn ka tum rilru deuh ut ut tawh nghe nghe.
"Ni lo ve, kha te kha chu ka û fapa alawm" a rawn tih chuan ka melh zawk a, nui tawp riai riai hian min melh chho kal a, thil tisual ang hrim hian a meng buai nak bawk.
"A nih.....ka kal mai" tih leh hmanhmawh zeta kal sawn a rual nghal sawk sawk a, a awm dan teh thut chu ka hrethiam lo lek lek dâwn alawm lè!
Sawmate inah chuan ka lut a, rei pawh ka awm lo, ka haw leh vat a, ka ngaihtuahnaah Rinsangi bawk a rawn lang leh a, Remremi khan fa a nei tawh thu kha a sawi a, a awmzia chu pasal a nei tawh tihna a ni ngei ang a, a pasal tur pawh ka ngaihruat thiam mai e! Pasal a nei tawh tih hre reng chunga ka la ngaihtuah ru tlat chu ka inhaw hluah hluah a, ka thluak chhûng aṭanga vawm bo vang vang ka duh tak zet bawk.
A dik alawm, kei hian ka lo hmangaih hman êm a tin a ni! Ka nupui tur ang hiala ka suangtuah tluk tluk ṭhin kha a ni a, mahse ani chuan mipa dang lakah min phatsan thung si! Kum 5 lâi a liam tawh tih ka hai lo, engtik lâi paw'n hre reng lo mah ila ka theihnghilh ngai lo va, Delhi lama zirna ka chhunzawmsan daih chung pawh khan ngaihtuah chhuah châng ka ngah a, nep ka intih fô phah ṭhin reng a nih kha!
In ka thleng te chu engtin emaw ni hian ka awm a, ka dik hlei thei lo, keimahah chuan eng emaw tak a awm lo ni maiin ka hria. Ka hna lamah thil tih kim loh ka nei a nih ringin ka ngaihtuah lèt vang vang a, mahse engmah kim lo awm àwm rèng ka hre si lo.
Nilainî a ni a, kan thawhpuipa pakhatin nupui a neih nî a nghe nghe a, chutah chuan ka mihring huat em em, Rinsangi hmêl ngei chu ka hmu leh hlawl a, dam lo ang paw'n a awm tawh lo va, a dam ṭhat hmèl var var tawh hle zâwk!
Ei tur viltu ho zíngah chuan a awm ve ran a, inneih ruai chu an catering a ni zâwk mah ang chu! Min rawn hmuh tâkah chuan a khup zal zal ni mai te'n ka hria, mahse lemchan bak a nih ka ring leh ta lo. A mitmeng pawisawi lo zet chu en reng pawh ka duh lo, min bum theih nâna a thil neih ṭhat ber te pawh a ni ta ve ang, mahse min bum nawn theih a inring a nih chuan a tisual chiang hle ang.
"In pa'n a chawm hneh vak na che nge?" ka ṭawng ring hran lo nà chu ka ṭawng a hria tih erawh a hriat hle thung.
"I ei tui maw?" pangngai tak hian a rawn ti daih a, a aw nêm diai te chu bum tumna awah ka ngâi vek tawh!
"Kan dinhmun a inthlau ta hle mai" ngeiawm zet hian ka ti leh kher a, tih nât ngawih ngawih ka châk vang a ni pakhat!
"Ni ngawt mai ti raw......." a rawn ti dam leh thliam a, en pawh min en ngam lo ang mai hian a awm a, a awm dan thianghlim vel lutuk chu ka awih mai loh nân ka infuih ru nasa kher mai.
Ngawi rengin a che vel chu ka en reng a, ka khawngaih tur taka a rawn inlan leh kher chu ka ngei a, ka rilruah huatna a tuh zual a, amah avanga ka nât ang chiah khan nâ ve se tih bak duh dang ka nei lo. Hmuhsit tum em em si khan ka hmusit hlei thei leh tlat si lo te chu nep kan inti ru vawng vawng a, hre ve ngat phei se zawng min va han nuihzat dâwn tehreng êm!
Mi dang bula ka awm lâi reng paw'n an zawhna hre lo hial khawpin Rinsangi thleng sil mial mial chu ka thlir reng a, chutia ka en reng lâi chuan a hnunga thingpui awmna bâwm chu an thawhpui pakhat hian a nek tlu palh a, thingpui bâwm tlu baw chuaih chuan Rinsangi kut leh ke a buak zui zat a, chu veleh rang tak mai hian ka che chhuak nghal thuai a, ka rilruah thil dang a awm thei tawh rih lo a tin a ni!
"Eng nge tih i tum?" ti hluaiin ka bânah chuan a hmer vak a, kei erawh chuan ngawi reng hian ka pawm kang lawp a, a thawpuite paw'n an rawn ngaihven hlawm khawp mai.
"Min dah thla thuai rawh!" a aw chu a nêm tehchiam lo hle.
"Eng nge i hriat a!?" a rawn ti vin leh vak a, chutah amah bawk chuan
"Robert!?" a tih zawm leh nghal ṭhat bawk.
"Ka thin tihrim i duh loh chuan ngawi hle hle rawh" ti hmukin ka car hùnna lam ka panpui hmawk hmawk a, tal chhuah tum eng ang mah se thlah ka tum teuh lo.
Car chhûnga ka ṭhut luhtîr lai chuan a ngawi kar a, min en kar tih pawh ka hria, mahse ka hmu lo der hmak thung. Chak zet hian ka tlan chhuak nghal a, ṭawngkam khat paw'n kan inbe tawh lo hrim hrim. Pharmacy dawr pakhatah luhpuiin kang damdawi ka lei a, ka buaipui nghal zung zung a, ani pawh ka tih ang àng chuan a awm tawp a ni ber.
"Ka lawm e" a rawn ti zawi sap a, za lo fê hian ka lo nui nghawr dat thung.
"I pasal i call dâwn nge in in thleng ka thlah dâwn che?" ka tih chuan
"Min thlah a ngâi lo ang" a rawn ti ve nghal a, min chhán dan erawh ka duh dan a ni hauh lo.
"I pasal chu i call dâwn em?" ka ti leh ngat a, kan inen chiang ta hle bawk.
"A pawi khawp mai, pasal ka la nei lo tlat" tih leh chhuah a tum zui zat a, a darah chuan ka man bet chiang teh e!
"Min bum nawn theih inbeisei tawh suh Rinsang, kha pa nen khan fa hial in nei dun tawh a ni lo'm ni?" dam fahran lo hian ka ti chhur chhur a, min en dan chu a inthlak nghal hlawk nghe nghe.
"Min vawnna hi i thlah theih chuan ka lawm khawp ang" thinrim insum tih hriat tak hian a ti fiah fak a, a mitmengah chuan min huatna hlir a lang bawk.
"Nge ni a, kha pa nen khan i lerhsan avang bawkin in inṭhen leh tawk zâwk?" ka ti leh chiah chu
"LALCHHUANAWM!" a rawn ti vin nghal ṭhawt a, ka hmingpum ngeia min ko chu ka la nâ teh e!
"Thu dik hi chu a kha fak ṭhin a nia" ka tih zawm leh nghat a, mittui tling pam hian a thaw chhuak hap a, a thinlung ka tinâ tih ka hriatna chuan min tihhlim ka rin tehreng nen ka hlim phah chuang hauh si lo.
"Enteh, khawngaihin khatiang lam kha chu sawi tawh lo teh" a rawn ti zawi ta raih a, beidawng ngawih ngawih te pawh a ang ve alawm lè!
"A ṭha e" tih leh an vêng lam pana tlan chhuah ka rual nghal zat a, engmah a sawi tawh miah lo bawk.
An in kawta kan din rual chuan ngawi reng hian a che sat sat a, car aṭanga chhuah mai a tum chu ka lock tlat avangin mak tih hmèl zet hian min rawn en deuh hâ a, ka lo en lèt chiang bawk nen hawi sawn hmâsa zâwkah a ṭang thuai a, kan tlan chhuah tirh aṭang khan thu kam khat mah kan la chhak chhuak lo ve ve a, eng ka hria nge ni; eng thu emaw tal sawi turin ka phut deuh tlat a nih chu!
"Engtin nge i awm zel tâk?" ti sapin a thaw zui hak a, kan awm mêk dan chu ka duh dan a ni chiah em pawh ka hre lo.
"I hriat a ṭulna ka hre lo" ka ti kha fuk a, ka ṭawngkam chu kei ngei paw'n dawngsawng dâwn ila ka duh teuh lo mai.
"Eng lo.....thil pakhat...." tiin a ngawi zui dat a, chutah amah vek chuan
"A ngâi leh lo mai....min buaipui avang leh min thlah thlap avangin ka lawm e" a rawn tih zawm leh nghal zat a, awki dam raiha min be thei zel chu mak ka ti, ṭeu hlar se ka ngaih a ṭhat daih zâwk ka ring.
"Ka chhuak thei tawh ang em?" ngawi ngula ka awm lâi chuan a ti zawi fiah leh raih a, ka huat tluk zetin min hua tih hre tlang vek mah ila a awm dan aṭang chuan min huatna nei lo ang mai a ni a, a rilru chhûngril nâ hmel te chu thup tum viau mah se ka hai lo chiang hle.
"Eng vanga damdawi inah khan awm nge i nih?" ka ti ve ta sup a, ka awki leh ka ṭawngkam pawh a pangngai sawt viau bawk.
"Engmah a ni lo" a rawn ti ve nghal mai a, dàwt a sawi tih leh thu zep a nei tih a mitmeng aṭang chuan ka hre tlang nghal vek thei!
"I nau Remremi hnen aṭangin fapa i neih thu ka lo hria a, i pasal chuan a enkawl peih leh si na che nge?" tluangtlam taka sawi ka tum tehreng nen ka thei der lo.
"Pasal ka la nei lo ka tih tawh khâ....." ti deuh hliaiin a kut chu a sik neuh neuh a, a zàm apianga a tih ṭhin dan a ni a, ka la hre chiang khawp mai.
"A nih chuan kei aia i thlan tâk mipa khan i fapa chu a enkawlpui peih lo che a nih dâwn chu!" ka ti bul leh hmuk a, a ngawi ta vang vang a, a ngaihtuahna a kal ding hle te pawh a ni mahnà!
"Ka lo chhuk tawh ang chù.....?" a rawn tih leh tâk sepah chuan ngawi reng hian car kawngka unlock-na chu ka hmet ri khep a, eng thu mah sawi belh tawh lovin a chhuak ta nal nal bawk.
Car chhûngah chuan ka ṭhu tlawk tlawk a, an in chu ka thlir vawng vawng a, haw châkna pawh ka nei lo, ka eng tih tha mah a tho lo a ni ber e. Ka che chhuak riai riai a, car chhûng aṭanga ka chhuah rual chuan boruak ka hip lut vang vang a, ka thil tih tum chu a atthlak tih hre reng chungin hmâ lam ka pan zel a, an in kawngka bula ka din lai te chuan mawl ka inti hliah hliah!
"Lo lut rawh" kawngka ka kik hnu lawka hmeichhe awki zàng vâh ka hriat chu Remremi a ni tih ka hre nghal a, kum 5 lâi liam tawh mah se a nau aw ringawt pawh ka lo la hai reng reng lo chu a ni e.
"E hêeeee.....i lo kal elo? Lo lut rawh, lo kal rawh" kawngka ka hawn rual chuan a lo ti bah nawk nawk a, a bul chiahah a û Risangi pawh a lo ṭhu ve ran bawk.
"Eng nge i lo tih dâwn?" Rinsangi zâwkin a rawn ti ve leh nghat a, hrilh làwk miah lova ka kal ringawt chu a lawm vak lo a nih hmêl.
"Khaw'nge i chhûngte?" tih leh ṭhutthlenga ṭhut ka rual a, ka inti ngampa lui te pawh a ni zâwk mah ang chu!
"An inkhawm" a rawn ti ṭha ve mai bawk.
"Anu....." mipa naupang aw ka hriat rual chuan thawm lo chhuahna lam chu ka hawi phei vut a, Remremi zâwk chuan
"I lo harh tawh elo Mampui?" tih leh mipa naupang lam chu pan a rual nghal zat a, mahse chu mipa naupang erawh chuan Rinsangi zâwk a rawn pan chat thung.
"I ril a ṭam tawh em Mampui? Chaw ei thuai thuai ang aw? Chuan....i lian sawt ang a, i ṭhiante zîngah pawh i lian ber ang a" tiin Rinsangi chuan pawm chung hian a be siam siam a, ka lo thlir tlawk tlawk ringawt.
"Lo ei ve nghal la u Robert" thleng lak pahin Remremi chuan a rawn ti ve leh a, ka lû ka thin khum thuai thung.
Hmân ang bawk khan an chhûngkaw mizia a la ngai reng tih ka hre chhuak zawk a, Rinsangi mai ni lo, a chhûngte bula awm chen khan nuam ka ti ṭhin hle kha a ni a, a chhan pawh mi biangbiak an thiam mai bakah ze zau leh hawihhawm tak an nih vang a ni a, mahse tunah chuan engkim hunin a liampui vek tawh a, ka nêl tak tak thei tawh lovin ka hria.
"Engati nge i lo kal?" rei fê a ngawih vang vang hnu chuan Rinsangi paw'n min be ve leh ta nge nge a, a ngawih chhûng zawng khan Remremi zâwkin min be deuh reng a, chhàn pawh ka chhâng pangngai viau!
"Ka rawn kal chu i duh vak na nge?" ka ti kher chu min melh nghal zawk a, Remremi pawh a ngawi ta ran a, lo ṭawng ve na chî ah a ngâi tawh lo te pawh a ni mahnà!
"Inkhawm bàn hmâa i haw theih chuan a lawmawm ngawt ang" awmze nei fê hian a rawn ti ve salh a, ka biak dan a dam hran lo bawk a, a ṭawngkam chu a khauh ve fak mai.
"Ka haw thei turah ngâi ang" ka tih chuan min biak zawm tawh lo va, a fapa zâwk chu a be melh melh ta daih bawk.
An chaw ei lâi chuan ka awm âwmin ka lo awm ve tawp a, Remremin min rawn be leh zauh ṭhin tih loh chu ka ṭawng lo tluk a ni. Ka phone ka khawih mual mual a, Rinsangi fapa chaw ei kham chu ṭhutthlenga ding chungin a nu a be zat zat reuh a, ka rin ai a ṭawng thei tawh daih, a ṭawng pawh a fiah reuh khawp mai.
A ṭawng zawng chuan ṭhutthlengah a ke a per ri at at reuh a, ka mit lah chu a là ru zek leh nghal. Chutia phone khawih reng chunga ka en zawk lâi chuan ṭhutthleng bâna din a tum chu a ke a chhep sual thut a, a zàngthal zâwng hian chhuat lamah a let thla vut a, vanneihthlâk takin ka pawm hman hlauh zâwk a, ni lo se zawng a insawh nâ thawkhat viau ang.
Rinsangi chuan a chaw ei lâi kalsan meuh hian a rawn ngaihven nghal vat a, Remremi pawh a lo hlauthawng hman hle a ni tih a hriat khawp mai. Chaw an ei kham tâkah chuan haw zâi ka rél zui a, ka awm rengna chhan tur ka hre lo miau a tin a ni! Car chhûnga ka ṭhut luh hnu chuan ka tlan chhuak leh ta lawk lo va, eng rilru pûa che chhuak mai lo nge ka nih pawh ka hre nek lo.
Dârkâr chanve dâwn chu ka ṭhu reng a, Rinsangi nu leh pa inkhawm bâng pawh ka hmu vek nghe nghe. Tlan chhuah tuma car ka tihnun lâi tak chuan Rinsangi pa'n hmanhmawh zeta Rinsangi ngei a rawn pawm chhuak thuai thuai chu ka hmu thut a, car chhûngah an inhnawh lut nghal sawk sawk a, thil awm dan chu ka hrethiam lo kher mai.
An tlan chhuah rualin ka tlan chhuak ve nghal a, an hnungah ka tlan zel a, ka thil tih lâi chu a dik leh dik loh pawh ka ngaihtuah tawh rih lo, Rinsangi mawlh chuan ka rilru a tibuai a ni. Damdawi in kan thleng a, Rinsangi chhûngte'n ka hmêl an hmu hlawl chu mak an ti viau a, mahse an insiam ṭha leh vat thung.
"Engati nge?" ka ti chhuak hluai a, biak ber pawh ka nei chuang lo.
"Chaw kan ei kham kha a nuamsam chiah lo va, ka pate lo haw hnu lawkah a taksa a rawn khawng vek ringawt bawk a, a mak khawp mai" Remremi thusawi chu ka beisei loh lam tak a ni.
"A kut leh a ke kha lo hmet char char r'u, doctor ka va ko lawk ang e" tih leh nurse chuan kal sawn a rual a, chu velah che chhuak nghalin Rinsangi nu leh pate bulah ka phei thuai a, Rinsangi taksa lo khawng mar vek chu ka hmet zui nghal mawlh mawlh bawk.
"A bân vei lam leh a ke kha in dim deuh dâwn a nia, vawiin khan thingpui sâin a buak a, damdawi hnawih hlim chauh a ni a, a la dam chian hman ka ring lo" ka ti zung zung a, nu Chhani chuan min rawn en rang teh e!
"A nih dâwn hi!" ti supin a pa chuan a en chik deuh ngur a, doctor pawh a rawn thleng har lo hle.
"Vawiinah in lo inhmu em ni?" nu Chhani chuan min melh chho kal tih ka hre reng a, mahse ka en lèt ve lem lo thung.
"Immm.....hmu e, an rawn catering-na kha kan thawhpuipa nupui neihna alawm a nih" ka ti ṭha ve mai a, a rawn thaw zui hak a, en kher lo mah ila a mangang tih chu hai rual a ni lo.
Doctor-in a buaipui deuh mawlh mawlh hnu chuan Rinsangi pawh a rawn pangngai ve leh mai a, min hmu chu mak a ti viau leh nghal. Ka zui haw leh ta ringawt bawk a, mahse an in chhûng êmah chuan ka lut duh tawh lo thung. Ngaihṭha zan lovin ka haw ta nge nge a, ngaihtuah loh tum paw'n ngaihtuah ngâiin a awm tlat bawk si a ni.
A tukah chuan Remremi zâwk hmuh tum ranin an in kawt sîrah bawk ka ding leh ta ran a, kawngpui a rawn chhuak phei chu ka lo ko pêng thuai a, min hmuh inbeisei loh hmél zet hian min en a, car chhûnga ṭhu lut tura ka tih chuan a rawn ṭhu lut ve mai a, lehkha a la zir em tih leh eng nge a zir thlen tawh lam ka zawh chuan college a kal tawh thu min hrilh liam liam a, an college thleng thlah ka tum thu ka sawi nghal nghe nghe bawk.
"Rinsangi hi engati nge? A va dam lo zing ve?" kan tlan chhuah rual chuan ka ti tlang nghal pawp a, mi rawn en zawk pah hian
"Nia....." a rawn ti ve mai a, a ngawih zui daih avang chuan ka hriat belh châkna a zual ting ni maiin ka hria.
"A chhan sawi la?" ka ti leh nghut a, thil sawipui duh tih takah ka tlan chak hran lo hle bawk.
"Engati nge?" a rawn ti ta khauh a, ka chhâng nghal mai lo chu
"Engati nge ka û chu i rawn ngaihven thar em em a u Robert?" a rawn ti fiah leh fak reuh a, aw nêm thliamin zawhna min zàwt mah se lungawi lohna nei a ang hle thung.
"A kâ ngei aṭangin pasal a la neih loh thu ka hre tawh a, mahse khaw'nge a fapa pa hi a awm?" a zawhna pawh chhâng lo chuan ka ti ve leh ngat a, zawhna kan inzàwt tawn a ni ber e.
"Chu lam zawng keia lo sawi theih a awm lo, amah i zàwt zâwk dâwn a nia, chuan thil pakhat u Robert, a theih hram chuan rawn ngaihven tawh lo la ka ti khawp mai" a rawn ti salh salh a, a û chu a ṭan ve hle mai.
"Ka rawn ngaihven leh ngaihven lovah chuan buaina a awm em ni?" ka ti leh chu min en deuh vang vang a, a lû a thing zui nak nak bawk.
"A remchâng lâiah khan ka lo chhuk ang e" a rawn tih chuan
"In College kan la thleng hleinem" ka lo ti mai a, mahse ding tura min tih tlat avangin ka ding ta tho.
"Ka û nen ang êm chuan inzawmna thuk nei lo mah ila i lo danglam tawh hle mai u Robert, kum 5 ngawt i bîk bosan tih hre reng bawk ang che" a aw chu a tluangtlam viau náin a thinrim tih erawh hai der theih a ni mawlh lo.
MZU ka thlen thlak hnuah pawh Remremi thusawi chu ka ngaihtuah zui rauh rauh reng a, class ka làk lâi paw'n ka thluak chhûng kil khatah a awm ru reng a, sawi tum nei tlata ka hriatna chu rinhlelh ka tum deuh ren rawn a, mahse ka thei ngawt bawk si lo. Chutih rual chuan eng nge a sawi tum tak pawh ka hre lem chuang hlei lo va, rilru erawh a kam ru ang reng viau lawi si!
Zan a rawn ni a, léng chhuak turin chaw ei kham hlim aṭang chuan ka inpuahchah nghal a, chu pawh Rinsangite inah bawk! Chhun lamah khan a nau Remremi khan min hrilh chiang viau tawh a, mahse ka lêng lui leh ngat dâwn chu a ni si a, Rinsangi hmuh châkna hlira ka khat tlat te chu ka ngaihven ruk em em vang a ni tih ka phâ lo va, mahse ngaihven thei dinhmunah ka ding em tih erawh hriatthiam a har khawp mai.
Rinsangite in kawt ka thlen chuan tumah an awm lo tih hriat tak hian an in chu eng tho mah se a reh ṭhiap thung a, an lêng chhuak rih a nih ringin an lo haw hun ka nghak ngawt ngawt a, dârkâr 3 dâwn ka nghah tawh hnu pawha an la rawn haw miah lo chu mak ka ti tawlh tawlh a, an ṭhenawmte inah lutin ka zàwt ta tawp a, mahse ka thu hriat chuan min va han ṭhawng tehreng èm!
Chak zet hian damdawi in lam ka pan thuai a, ka rilruah chuan Rinsangi bak a awm thei tawh lo. Kum 5 a liam hnua kan inhmuh leh hmasak ber dan te kha ka ngaihtuah kir a, kha tah pawh khan a bawrhsâwm viau a nih kha! Tunah lah damdawi ina kalpui a ngaih thut thu ka hre leh a, zep thu cheng lo, ka rilru a nuam thei thlawt lo a ni.
Damdawi in ka thlen rual rualin nurse ka hmuh hmasak ber hnenah ka zàwt nghal zung zung a, cabin-ah an lo sawn fel chiah chu niin, a chhûngte pawh ka hmai zah buai thei tawh lo. Khawngaih loh tum teh mah ila khawngaihna hlirin ka khat a, a muhil hmêl dâng bal ka hmu chiah phei chu ka thinlung chhûng a insawi nghing hlawk hlawk ni berin ka hria.
"Engati nge i lo la kal hram a u Robert?" Remremi chu chhán pawh ka tum lo, ka thlir ngai ka thlir tlawk tlawk ringawt!
"Ka û rilru tina ngawih ngawih leh tur bawkin em ni i lo kal?" ṭap titih hian a rawn ti leh a, ka thaw chhuak hawk a, ka chhûngril chu a tawt tak zet!
"Ṭawng zawi deuh rawh Remrem, hei...... Mampuia pawh a muthilh tawh hî........" tiin nu Chhani chuan Rinsangi fapa pawm muhil chung hian a lo bengdai a, pa ber erawh khaw'nge a awm ka hre lo, ka thlen tirh aṭang khan ka la hmu lo hrim hrim.
"Rinsangi hian nâtna benvawn a nei em ni?" nu Chhani zâwk chu ka bia a, mahse Remremi bawk chuan thinrim zet hian
"Hrilh reng reng suh nu, engmah hriat a phû lo, engtin nge......engtin nge ka û hian a la hmangaih reng theih zâwk che le...." a rawn ti deuh hlawk hlawk a, a hnuk a ulh zawm zat bawk.
"I sual ka ti dâwn nge i mawl ka ti dâwn pawh ka hre lo u Robert, hmâna mi kha i ang tawh lo tak zet" ti lehin a insut zui feih feih a, chutiang taka a rilru nâ hmél chu ka la hmu ngai miah lo.
Remremi chu a chhuak ta daih a, ka inthlahrung ru viau nàin Rinsangi vang ber chuan ka inthlahrung lo lui hram hram a, hun liam tawha thil thleng zawng zawngah khan min dem tih hai rual a ni lo va, thiam lohna erawh ka neih àwm pawh ka hre lo, min dem ang àng chuan ka en liam tawp a ni ber.
"Rinsangi dam loh chhan hi ka hriat ve chì a ni em?" thawm a reh vang vang hnu chuan ka ti leh ta nge nge a, Rinsangi chungchang chu ka hre chiang duh tlat bawk si a ni.
"A tam ang reng" pangngai taka a rawn tih chuan hriat belh ka châk sawt!
"Ka hriat ve rem i tih chuan ka lawm ngawt ang" ka ti ve leh nghal zat a, min hrilh tlang law law se ka ti tak zet!
"A kal a ṭhat tawh loh avang hian a taksa a vûng leh thut ṭhin a, a pumpui ni se a chiang lo leh zel bawk a, hnate hi vawi engzah nge thawk tawh lo tura kan tih pawh ka chhiar sêng tawh lo. Mampuia mawlh hi a mawhphurnaah a ngâi nghet bur si a, kum naupangtea a nuthlawi tâk aṭang khan a rilru leh hriselna dinhmun zawng zawng a tla hniam vek ni maiin ka hria" nu Chhani chu a thaw chhuak zui ham ham a, a mittui a rawn parawl ṭiam ṭiam zawm zat bawk.
"A nih chuan a fapa pa hi khawiah nge a awm reng reng? Engati nge tun ang dinhmunah pawh a la rawn inlan loh?" ka zawhna avang chuan chiang zet hian min en ran a, ka hawi sawn phah nghe nghe.
"Mampuia pa chungchang hi chu ka sawi lo zâwk mai ang e" a chhànna tawi fel thlap chuan ka thluak a luah ngut ngut a, eng thil emaw tak chu a la awm chiang a ni.
Chutia kan ngawih dun vang vang lâi chuan doctor leh Rinsangi pa an rawn inzui lut a, ka ding hluai a, inthlahrun loh ka tum luih nasat tehreng nen Rinsanga pa nena kan han inhmâchhawn meuh tâkah chuan ka inthlahrung thar zual khawp mai.
"Naktukah test chi hrang hrang kan ti ṭha ang a, chutah chuan chanchin kimchang zâwk kan inhrilh thei turah ngai ila, mahse ka sawi tlang tawp ang ka pu, tunah rih chuan lo beisei sâng viau lo ula a ṭhat ka ring, a taksa khawi lâi pawh hi a derthawng em em vek a ni" Rinsangi pa bula doctor thusawi chuan ka beng mai ni lo ka thinlung thleng a verh thla vawng vawng a, Rinsangi hriselna panzia chu a chiang viau bawk.
Doctor chhuah hnu chuan ka ngawi ta reng a, Rinsangi nu leh pate titi chu ka ngâithla a ni deuh ber mai. Ka awm ve tih pawh hre lo ang hrim hian Rinsangi pa chu a ṭawng sup sup a, kum 5 a liam hnua kan inhmuh leh hmasak ber nî aṭang tawh khan ṭawngkam khat paw'n kan la inbe lo hrim hrim a, kan la inbe lo tluang zel chu thil dik a ni em tih erawh ka hrethiam rih chiah lo.
"Zanin chu keima'n ka'n riahpui phawt ang e, va haw hnai tawh rawh u, Mampuia a lo harh palh hlauh chuan kan buai mai mai zâwk ang" tiin Rinsangi pa chuan nu Chhani chu a hrilh dap dap a, nu Chhani pawh a lo bu nghauh nghauh a, cabin kawngka inhawng thawm kan hriat rualin Remremi hmêl kan hmu zawm zat bawk.
"I nu hovin va haw tawh r'u Remrem, Mampuia a lo ṭe hiar deuh a nih paw'n i nu nen tih tlei dan in lo ngaihtuah hram hram dâwn a nia" Rinsangi pa bawk chuan a ti leh nghal zung zung a, awm dan tur ka vàn ta khawp mai.
"Ni e, i haw teh ang u, i pa'n a riahpui dâwn si chuan taxi-in kan haw mai dâwn a nia, taxi service an la awm èm ang chu màw" nu Chhanin a ti zo chiah chu
"Car-in ka lo kal alawm, ka phur haw thei ang che u" ka lo ti nghal vat a, mahse chhànna pakhat mah ka dawng lo hrim hrim thung.
Hospital kawta kan awm hnu chuan an in thleng ka thlah theih thu ka sawi nawn leh a, taxi service a lo vâng tawh kher bawk nen ka thlah haw chu an remti ve hram a, kan boruak tluangtlam lo zet avang chuan biak pawh kan inbe tam lo khawp mai. An in kawt kan thlen rual chuan Rinsangi fapa chu a rawn harh a, mipa naupang pangngai ve tawh taka ka ngaih kha a ni a, mahse a nu ngen leh zawng ruai chung a'n ṭah tâkah chuan khawngaih loh a harsa teh e!
Eng pawh ni se, eng vang pawh ni se, tun dinhmunah chuan Rinsangi leh a kaihhnawih lam hrim hrim ka ngaihvena ka ngaihtuah chhan ai mahin ka ngaihtuah a ṭul tih ka hre chiang hle a, a chhan leh vang lam dap duhna rilru pakhat mah ka pu tawh hek lo. A dam lo hmêl ka hmuh te khan lainatna leh khawngaihnain ka khat a, ka thinlung chhûngril a nâ vawng vawng a nih kha!
"Anu kha a dam lo alawm Mampui, doctor te'n an enkawl ang a, a dam ṭha leh vat dâwn alawm, ṭap tawh lo la....immmm?......Nang chu i fel êm khâ......." tia thlem siam siamin Remremi chuan a û fapa chu a pawm a, mahse awmzia a awm lo hle a ni.
Car chhûng aṭang chuan kan chhuak zui zat a, Mampuia erawh a la ṭap bâng hleithei lo va, Remremi pawmna aṭangin a tal pit nghe nghe a, chutiang em em chuan a awm ang tih ngaihna pawh ka hre lo. Remremi thlem ve na te chu sawtna pakhat mah a awm lo va, a nu pawh tih tawh nàk a lâiin a ni lehzel chutianga a awm tlat chu rilru a tibuai duh khawp mai.
"Mipa nih chuan ṭah tur a ni hleinem, i ṭah reng te chuan hmeichhia paw'n pà an ti lo mai ang che, ṭap tawh suh le" Mampuia hmâa ṭhuhniam chung chuan ka ti dap dap a, ka biak mêk erawh chu a la ṭap pur reuh thung.
"Ṭap tawh suh le" ti dam leh dapin a bianga mittui chu ka hruk hulsak a, a sam ka chûlsak zawm zat a, ṭap bâng thei lova a ṭah zel tâkah chuan ka kuah ta tawp ringawt!
Chutah beisei loh deuh hian min rawn kuah lêt nghet reuh em em leh nghal a, a aw râwl tawp meuhin a ṭap bai bai a, kuah reng chung chuan ka pawm kang thuai bawk. An in lamah ka pheipui a, Remremi leh nu Chhani lamin ka rilru an luah thei tawh rih lo; chu mipa naupang, ka hmeichhe hmangaih em em ṭhin fapa tih chauh lo chuan!
In chhûng lama nu Chhanite nufa inzui lut chu ka zui ve zel a, in chhûng han luh tâkah chuan Mampuia pawh a ṭap bâng tial tial a, mittui tling pama min rawn chhoh melh chiah chu ka thin a phu rang nghal dawt dawt a, a nu mitmeng ang chiah chiah a ni a, khawngaihna hlirin ka khat a, a pa chu tu pawh lo ni se a dem hian ka dem ngawih ngawih!
Mampuia insût feih feih ri chu a zawi tial tial a, a ṭap thawm a reh vang vang hnua ka'n en chiang chu a lo ṭap muhil daih chu niin, tih ngaihna a vâng teh e! Kei chang ni lo, nu Chhuani leh Remremite pawh chuan mak an ti ve tho tih an mit aṭangin a hai theih lo va, khuma Mampuia ka mut thlak lâi te chuan lungawi lohnain ka khat ru ṭûn a, ka inrawlh lohna tur mah ni se inrawlh loh ngawt zawng dikin ka hre bawk si lo.
Ina ka haw chu ka chhûngte hnehah engmah ka sawi lo va, room-ah ka lut tlang tawp a, ka mu zui nghal tak nàin muthilh erawh a har lam hret chu a ni. Thil chi hrang hrang ngaihtuahin ka mu meng kur a, engkim mai chu a dik lo vel vek ni berin ka hria.
Zîng khu a rawn vâr a, chhìn khat pawh chhîng lo tih takah ka tho hmâ hle a, damdawi in lam pan tuma kawngka ka pan lâi chuan ka pa a rawn tho va, ka chhuah lawk tur thu hrilhin ka chhuak zui nghal nal nal bawk.
Damdawi in ka va thleng chu nurse pakhatin duh dûh huna dam lo a kan theih loh thu min lo hrilh a, ka harh chhuak nghal zawk a, Rinsangi ka ngaihven luatah ka thil ngaihtuah a tawi vek ka ti lo thei lo. Car chhûngah ka ṭhu ngawt ngawt a, dam lo kan theih hun a rawn thlen chuan ka che chhuak nghal vat a, Rinsangi pa nen chauha kan awm dun erawh a nuam lem lo khawp mai.
"Eng nge i rawn tih?" Rinsanga aw ka hre chiah chu ka hawi chhuak vut a, a rawn harh lâi rèng ka hre lo.
"I zia deuh tawh em?" tih leh ṭhut hnaih ka rual thuai a, a pa chuan min en tih pawh ka hre reng, mahse ka hmu lo der hmak thung.
"I nute pawh an lo thleng ṭep ang, kawtah ka lo zu hmuak ang e" a pa chu a tho zui nghal daih a, cabin aṭang chuan a chhuak zui zat bawk.
"Engati nge hetah hian i awm ve?" a rawn tih leh ngat a, sawi hmâsak ber tur pawh ka hre lo.
"Khawiah nge i fapa pa hi a awm? Eng ang paw'n innei lo mah ula a fapa nu i ni a, rawn ngaihven tur che a ni asin; nang chang ni lo i fapa thleng hian!" ka khawngaih nufa êm avangin chutiang zawhna chu ka zàwt lo thei lo a ni.
"Sawi teh Rinsang, sawi mawlh teh" ka ti leh ta thlawt a, a mittui a rawn hnâm ṭiam ṭiam a, engkim chu hmuh harsa ka va'n ti ru tak èm!
"Ani chuan......." tia chawl deuh dat hian
"Fapa a nei tih pawh a inhre lo" a rawn ti ṭial ruai a, ṭah a insum tih lah hai theih a ni bawk si lo, ka thin a rim hlur ringawt!
"A phone number min pe la a ṭhat ka ring, in nufa chanchin hi ka hrilh hreh reng reng hleinem" ka aw chu a ngainatawm thlawt loh ti ila a sual lo ang.
"A phone number ka nei tawh lo, kan inhmuh lohna pawh kum 5 lâi chu a ni tawh" a rawn ti thei hram a, ṭap lo se ka ti ngawih ngawih, a chhan chu a ṭah chhuak hmêl ringawt pawh chuan min vit zawk zawk tawh a ni.
"A awmzia chu kha pa, kei aia i thlan pa kha a ni ang maw?" ṭawngkam pangngai taka biak ka tum tehreng nen ka thei lo a chha chu a ni e.
"Eng pawh sawi ila nang chuan....." tia ṭawng tawp hmakin a ner deuh sawk a, a pum chu a dawm zui zat bawk.
"Engati nge!?" hlauhthawnna hlirin ka khat a, a awm dan teh thut chuan min ṭhawng tak zet!
"Ka pum....ka pum a nâ lutuk...." tiin a ṭhen zui chai chai a, hmanhmawh taka thovin cabin aṭang chuan ka tlan chhuak thuai thuai a, kalsan hreh hle mah ila ka buaipui thiam si lo a tin a ni!
Doctor-in a buaipui mawlh mawlh lâi te chuan a ṭhen chawn chawn a, nâ a ti ngàng a ni ang. A nâ chhawk zàngkhai tur chuan tih theih eng emaw tal nei ila ka va'n ti tehreng ém, ka hmangaihin nâ a tawrh tlawk tlawk bîk lâia a thlirtu mai ka lo ni bîk chu hrehawm ka ti ngawih ngawih!
Ni e, a dik alawm, kei hian ka la hmangaih reng a ni. Ka huat em em lâi pawh khan ka hmangaih reng a, amah avanga ka nât vawng vawng ṭhin lâi pawh khan chhe tê mahin ka hmangaihna a kiam phah lo va, ka haider ṭhin mai zâwk a ni. Tuna chinah chuan dawihzep takin ka thup tawh lo ang, eng ang paw'n harsa dâwn mah se, emaw nuthlawi niin fapa hial pawh nei tawh mah se ka taah ka siam leh ang a, ka nei lèt leh ngei tur a ni.
Doctor leh nurse te'n cabin aṭanga an nawr chhuah lâi te chuan ka zui ve zel a, ka kal ve theih lohna chin kan thleng chiah chu awm ngaihna reng ka hre lo. A pa hmêl ka hmu leh ta zel a, loh theih lovin kan inbe ta nge nge a, chanchin min zàwt nghal zung zung a, kei paw'n a pum rawn nàt thut dan te chu ka hrilh ve nghal mai bawk.
Doctor te'n an buaipui fel hnu chuan cabin-ah bawk kan insawn lut leh a, Remremi leh nu Chhuanite pawh an lo thleng tawh nghe nghe. Rinsangi a rawn harh leh tawh rih lo bawk nen damdawi in kawt lamah ka tei chhuak a, kan boruak hip mêk chu a ritin a hahthlak thlawt a ni.
Remremin min lo zui chhuak ve reng chu niin, ngawi renga kan awm dun vang vang hnu chuan luhsan mai ka tum a, mahse a thu rawn sawi chuan ka ke pen lâi a titawp chiang kher mai. Ka zawh nawn ngâi lovin amah bawk chuan thinrim mittui tling pam hian a rawn sawi nawn leh salh salh a, engkim chu a reh duak ni mai te'n ka hria.
Rang mangkhengin cabin lam chu ka pan thuai thuai a, Remremi thu min hrilh zawh chiah khan awihna chen nei mah ila Rinsangi kâ ngei aṭanga thu dik tak ka hriat phawt loh chuan ka awih pumhlum thei lo a ni. Cabin chhûng ka lut te chu ka dik thei tawh lo va, Mampuia mitmeng thianghlim fiah ralh te chuan min chhun ngut ngut a, ka thluak chhûng chu rinna leh rinhlelhnain a khat a ni ber.
Tlai khaw thim det detah Rinsangi chu a rawn harh ta nge nge a, mahse mi dang an awm ve vek avangin ka thluak chhûnga zawhna ri ring em em chu ka zàwt lawk duh lo va, mahse ka tawt vek thung. Ka awm dan chu ka sawi thiam lo, a khamawmin a hahthlak tak zet; tui lâi rapa awm ang mai ka ni! Remchâng zawn reng chu a dikin ka hre ta lo va, mi dang hmai pawh ka zah zo tawh hek lo.
"Mampuia hi ka fapa a ni em?" ka zawhna chuan a ṭhawn ka rin tehreng nen hmêl danglam a pû lo hrim hrim.
"Rinsang?" dawhthei lo zet hian ka ti leh nghal nghut a, ka aw chu a dam ta lo viau bawk.
"A lian ve tawh i ti em?" a rawn ti a nih chu!
"A pa chanchin min zawh châng phei chuan chhàn ngaihna ka hre lo ṭhin teh asin" tih leh maimitchhin a rual a, a mittui erawh a rawn lûang chhuak nghal thung.
"Khaw'nge apa? tia min zawh ṭhin lâia chhàn dan tur ka baihvai ṭhinzia kha âw........." ṭah chhuak insum aw zet hian a rawn ti leh ṭiau a, ka thil hriat mêkin min tihamhaih lutuk chu ka tha hial a khur vek thei!
"Engati nge min hrilh loh? Min hrilh thei reng asin, engati nge kum 5 chhûng zawng kha i ngawih tlat?" a kut vuan chung chuan ka ti thuai a, ipik zet hian ka thaw chhuak ham ham zawm zat bawk.
"Hrilh ta che ila chuan i awih chuang lo ang, chu bakah min huatna kha a nasa êm a, hrilh thei che dinhmunah pawh ka ding lo a ni. Zawma nen khan kan inngâizâwng lo asin Robert, mipa dang nen ka kawp lo che a, ka duh lo bawk, mahse keimah avanga i nâ ngawih ngawih tih ka hriat khan ka indem a, ka phû tàwk chiahah ka ngâi a, i fa ka pai tih takngial pawh ka hrilh ngam lo che kha a ni a, a hun lâi khan ka lo huaisen tâwk lo te pawh a ni mahnà" a hmui chu a khur dar dar a, a ṭap zui feih feih a, ka mit ka hriat chian tluk zetin dàwt a sawi lo tih ka hre chiang a, chu vanga inchhir ta em em pawh chu ka ni!
"Min en teh, meng teh Rinsang" tia ka hnaih pawh chuan a rawn meng duh lo hrim hrim a, nâ se ka tih lâi leh ka huat ngawih ngawih lâi te khan ani erawh ka lakah a lo inthiam lo em em ṭhin chu a ni si a, ka va han nep tak èm, engmah kha ka lo hre chiang hauh si lo.
"Rinsang" ti supin a kut pahnih chu ka hum a, ani erawh a la kun ngul thung.
"Khawngaihin min en teh...khawngaih takin...." ka ti chuai raih a, a ngenin ka ngen a ni ber.
"Mahni indemna nei miah lovin min en teh le" awkâ dam thlupa ka tih leh chuan zawimuang hian a lû a rawn kan riai riai a, kan mit a intawng chiah chu a ṭap chhuak hawk a, ka âwmah ka kuah bet nghal thuai bawk.
"Ka tihpalh....ka thiam loh a ni, engkim hi ka thiam loh a ni" rilru nâ taka ka tih vawn vawn lâi te chuan a rawn ṭap chhuak hawm hawm a, hun kal tawhah khan lèt leh theih ngat se zawng engkim kha ka siam ṭha chiang khawp ang.
Kha nî, kan inṭhen nî hmâ kârah khan kan chesual kha a ni a, mahse ka hmangaih chuan amah chauhin a rah chhia zawng zawng a lo seng a, chu pawh ka thil hriat sual vang leh ka chapo êm vang leh nghalin! Keimah avanga kum naupang têa a nuthlawi ringawt te kha a zahthlak turzia leh a mualphothlak turzia ka ngaihtuah thiam pha lo hial zâwk a ni.
Ka fapa Mampuia lam chu ka pan ruai a, kuah thuakin ka pawm kang nghal cháwn chàwn a, a chal leh a bianga ka fawp kual den den vel te chu a hriatthiam loh hmêl viau a, mahse duh loh emaw pawh a nei chuang lo. Min nêl lo hranpa lo tih chu mi â tân lo chuan hriat loh theih pawh a ni lo, kan inhriatna la rei lo mah se pafa nge nge chu a dan dangte pawh a ni ang.
"I fapa nu ka nih avang hian min rawn ngaihven tel ve zel a ngâi lo a nia" Rinsangi chu ka en reng a, ka lakah a inthlahrung hle tih lah ka hai mawlh si lo.
"Tunah rih chuan i dam ṭhat phawt a ngâi, chu chu thil pawimawh hmâsa ber a ni" tih leh a kut chu vawn ka rual a, a taksa sia mu ran Mampuia chuan min lo en chiang ngàng mai.
"Ka la hmangaih reng che tih hria la ka duh, ka theihnghilh ngâi reng reng lo che, tum pawh ni ila ka thei lo" ka tih zawm leh thlup thlup a, a mittui chu kâr lovah a rawn tling nghal ṭiam ṭiam a, mahse chu erawh hlim avanga mittui tling a ni tawh thung.
*
*
*
Comments
Post a Comment