SYLVIA ROMAWIZUALI By Havali Adam (Page 2)

SYLVIA ROMAWIZUALI

By

Havali Adam

Chapter 11

Zing khua a rawn vâr a, zan lama min hrilh lâwk tawh ang ngeiin hawi khawthawng tur chuan kan chhuak a, hnai zâwka Eiffel Tower ka hmu chiang chiah chu lian ti rem rem tak ka ni. U Maṭhuama phone-in thla kan lá dun deuh chhen bawk a, innêla inhmangaih tak nupa kan ang ve tawh lutuk. Eng pawh ni se, kan inhmangaih emaw hmangaih lo emaw, kan innêl emaw nêl lo emaw, hlim theihna kawngah chuan hlim em em phawt ila a ṭha mai.

A phone hlirin thla kan lá ta char char a, a ṭha zâwk miau a, Tower bulah te chuan thla min lâksak ngun mawlh mawlh hle. Hmeichhiate hi chu kan ni deuh vek mai thei, mipate ai chuan thlalak kan ngaina zâwk tlangpui a, kan hlimna te ho viau angin lang mah se kan tân chuan chu ai hlu chu a awm bik chuang lo.

Hmun hrang hrang min fan kualpui a, vawi tam lo zin tawh ang mai a ni. Tin, French ṭawng pawh a la thiam belh ta deuh deuh zel a, a mak hi a ni tawp! Kei ni ta ila chuan ka theihnghilh nghal zel dâwn tih ka chiang, phone kaltlanga zir mai mai mah ni se a thluak ṭha lutuk chu a awihawm loh lek lek zâwk a ni.

A chang chuan pafa te pawh kan ang ka ti ṭhin, a pa lian roh bawk si a, kei lah ka nu lian tehchiam bawk si lo, hnam dangho lakah pawh a zahpuiawm loh khawp mai. Min en lo emaw ka tih lai te hian min ngaihtuah ru reng a, nuam lo ka tih ka hlau ni berin ka hria. Tourist Bus-a kan chuan lai te chuan ka kut a chelh ran a, ka awm a tinuamin a tihahdam hliah hliah.

Kâr khat a ral a, Paris khawpui chhunga hun hman nuam ka tihna erawh a la bo lo nasa mai. Chu bakah hmun hrang hrang tlawh tur a tam em em a, keini anga zin veivak an tam ve tho bawk a, kan hmuh tam tak phei chu French mi an ni lovin ka hria. Park nuam tak takah kan kal kual a, hmuh tur leh tlawh tur a tam si, ka mit a va tlai tak!

Park mai a ni nâng, in ropui leh mawi tak tak pawh kan tlawh kual ṭeuh a, zan lamah ni se kawtthler ngainatawm takah thil kan ei dun ta ziah bawk a, hmangaihna leh duhna tel miah lova ka neih ka pasal chu ka ngaina tawh tak zet a ni. Suma min vur avang leh ka kal ngai lohna hmuna min hruai avanga ngaina ka ni lo va, a hnathawh leh a hausakna lam aiin a mizia leh a hmel chuan min hneh zâwk a ni.

Honeymoon hmanga zin kan ni bawk a, mipa a nihzia min hriattir mawlh mawlh ṭhin a, vawi khat phei chu kan intifai dun nghe nghe a, a tirhah chuan ka duh lo ngei a, ka hnial tlat a, mahse tih ngaihna a awm lo, luhlul tak a ni. Mi chhang lêt zawt zawt chuang si lo hian rilru ngai a pu reng a, zak lo ang deuhin ka lan ve phah ta ringawt bawk.

Kan inneih aṭangin thla khat pawh a la ral lo va, chutih rual erawh chuan a sual lo tih leh rilru chhe tak a ni lo tih ka hre chiang ve tawh viau chuan ka hre thung. A hmel pawh ka hmu ṭha tawlh tawlh a, han sawi vak dan ka thiam rih lo, ka mitah chuan a hmelṭha a ni tawp mai. Tin, phat rual lovin zún a nei tih ka chiang a, ka hria a, chu a zún chu ka phur zo lo lek lek ṭhin.

Paris khawpuiah chuan kâr hnih lai hun kan hmang tling ta, nuam ka tih ngaiin nuam ka la ti reng a, awm reng dâwn pawh ni ila ka theih ka ring. Thawmhnaw dawr pakhatah min luhpui a, ka thawmhnaw tur chiah min leisak a tum chu ka duh bik teuh lo. A thawmhnaw tur pawh ka thlang diat diat a, nalh ka tih tíh ka hâktir chhin vek a, inhmeh loh pakhat mah zu han nei lova maw le.

Model lamah kalin hlawhtling ta pawh ni se ka dem lo vang, a chhan chu model pian ang maia mawi leh nalh taksa a nei tlat! Ka lo en duh lutuk nge ni, a nui suk hmel chuan min tiharh chhuak zawk a, ka va han lái ru nasa mai mai tak, ani lah chu mi en a nghal sawt leh nghal.

Zan khat chu kawtthlerah bawk hun kan hmang dun leh a, kan piah lawka rimawi tumtu pakhat chu a ko phei a, pawisa a pek pah chuan hla a tumtir zawm zat a, a chet dan vel chu mit lá sawn lêk lo hian ka lo en tlawk tlawk a, kan bula ṭhu ve mi dangte'n min lo en lai chuan min fawp zauh leh ta nghal a, za lutuk lovin ka nui hul hak ringawt.

Kan nupa tâna rimawi tumtu chuan mawi takin a tum ri a, keini nupa pawh kan lo inkuah chial a, ka rilru a hahdam a, ka thla a muang hliah hliah bawk. Kan thlenna Hotel lam pana kan haw lai te chuan hlim zetin ka be mawlh mawlh a, ani paw'n ning hmel pu miah lo hian min chhang ve zel a, kan nupa boruak chu a fuh vel vek a ni ber.

"Aw Hello u Siam" phone pick up rual chuan ka ti nghal a, chhuak tura ka insiam lai mêk a ni a, u Maṭhuama erawh a insiam zo vek tawh thung a, phone khawih mual mualin khumah a ṭhu ngawi reng bawk.

"Sylvia, i bulah u Maṭhuama a awm em? A awm chuan i phone kha pe vat teh, hmanhmawhin, kan phone tlang thei bawk si lo" a rawn ti mawlh mawlh a, u Maṭhuama lam hawi pah chuan

"U Maṭhuam, an be duh che, u Siami a nia, a hmanhmawh khawp mai" ka ti ve ta thuai a, eng nge a rawn sawi dâwn ka hre hauh lo, mahse ka lo hmanhmawh ru ve em em ringawt tho.

"Eng nge ni ta?" tiin u Maṭhuama chuan Loudspeaker a On zawm zat a, ka hre châk hmel chu a hmu ru reng a ni mahna.

"In theih chuan lo haw vat rawh u, ka pa hi a zual thut a, nizan aṭang khan a ni tawh! A ṭhat ve leh mai kan ring a, mahse tukin khan a ṭha lo zual a, tunah ICU-ah a awm mêk" u Siami aw chu a phelh deuh phang a, kei pawh ka ding khawng âwt mai.

"Honeymoon in hman laia tihbuai loh hram che u kan duh a, amah ka pa paw'n nizan khan a sawi nghe nghe asin, mahse kan hlauthawng tawh a ni" u Siamin a rawn tih leh chuan

"Eng vangin nge min hrilh vat loh? Ka pa'n phal lo eng ang mah se min hrilh vat tur in ni, khaw'nge mi dang?" a lo ti bul hmuk a, biak reng châkawm loh ngawih ngawih khawpa a ṭawngkam nelawm loh ta thut chu eng dang vang a ni lo, ka pa hriselna dinhmun vang a ni.

"Siami?" nêm fahran lo hian a ti leh hrawih a, ka lo ip deih chawih nghe nghe.

"Eng lo, ka tihpalh, kan awm kim vek! U Maṭhuam, ka pa mar phu an hmu tawh lo a nia, eng nge ka tih dâwn?" u Siami chu a aw aṭang ringawt paw'n a chiáizia hai theih a ni lo.

"Kan lo haw nghal ang" ti ram hmukin an inbiakna a hmet tawp zui nghal a, ka phone ni lovin a phone ni zâwk se chu a vawm keh pawp duh mai ka ring.

"Haw turin insiam rawh!" ti leh hlukin khum aṭang chuan a tho vut a, tukverh darthlalang hlai pui lamah a kal phei daih a, chutah amah bawk chuan thinrim aw lutuk tak mai hian

"Insiam rawh ka ti a ni lo'm ni?" a rawn ti vin leh ṭhawt a, ka phu dâwrh a, chet nachang hre lova ka lo ding ngawi reng kher kher chu ka inchhir tak zet!

"Ka tihpalh, ka tihpalh lutuk" tih leh chet ka rual nghal a, kan thawmhnaw bâwm lam panin ka pen phei pawk pawk a, ka thin te chu phu rang dawt dawt tak a ni.

Ka thá zawng zawng a khur vek a, zep thu cheng lo, u Maṭhuama chu a hlauh hian ka hlauh ngawih ngawih. Ka thiam loh a awm tih ka hria, thinrim awkâ vina min biak chhan pawh keimah ka ni, ka hre vek, mahse a taka a thinrim aw ka hre zet kha chu hlaua khurh lohna chí a ni lo hrim hrim. Ka che reng reng chu a dik lo kual vel vek a, ka thá a khur nasa bawk si, inthunun tum viau mah ila ka thei teuh lo.

Thawmhnaw bâwm Zipper te chu ka Zip ṭha hlei thei lo va, pawi tihna leh mahni inthiam lohna hlirin ka khat a, ka pa paw'n ka rilru a luah thei meuh lo. Taksa khur ru dar dara ka chet mawlh mawlh lai chuan ka hnung lam aṭang hian min rawn kuah a, ka taksa a sik tirh phei chuan ka phu zawk nghe nghe.

"Min hrethiam teh Sylvia" a rawn ti dam thlup a, a hma lawka min biak dan nen chuan a va inang lo tehreng êm.

"I ṭha em?" ka hnung lama aṭang min la kuah reng a, a aw thum dam ta lutuk chu ka awm tinuam lo zualtu pakhat a ni.

"Aw, ka ṭha" tiin ka lo chhang a, ka aw chu a la khur zui leh ta nghal a, nuam lo ka tihna a zual tulh tulh bawk.

"Min en teh le" amah zâwk chuan min kuai her zui nghal a, awkâ vinin min be leh tawh lo hrim hrim a, a mitmeng ka hmu chiang chiah chu ka khawngaih lutuk; mahni inthiam lohna hlir ka hmu.

"Ka tihpalh, vin takin ka ṭawngkhum tawh lo ang che" a tih hniam sup rualin a che hmasa zâwkah ka ṭang a, min kalsan hlau zet ang maia ka kuah thut tâkah chuan min lo kuah lêt ve nghal mai.

"A pawi lo, ka tihpalh zâwk a ni. Ka mawl êm alawm ti raw, i sawi rual khan insiam nghal thuai ila chuan vin takin min be bik tawp náng" ka ti mawlh mawlh a, ka aw khur ru dar dar chu a la reh fel thei lo tluang zel bawk.

"Insiam fel ang le" ti dam ruihin a taksa aṭang chuan min nam hla deuh hlek a, ka chalah a rawn fawp zui nghal vawng vawng a, tunah chuan hlauhna pakhat mah ka nei tawh lo.

Thawmhnawte chu min khungpui zung zung a, mahse vawi leh khatah min pawm kang lawp a, ka chet a phal lo nge ni, khumah min ṭhuttir ta hle hle. Ngawi reng hian a khung fel mawlh mawlh a, keiin tihtur dang ka lo ti mial mial bawk a, kan insiam zo har lo hle. Theihnghilh kan neih palh hlau zetin engkim ka ngaihtuah nawn vek a, Hotel kan chhuahsan hnu thleng chuan ka ngaituah zui reng a, mahse theihnghilh kan neih áwm ka hre miah lo.

Airport lam kan pan lai chuan a ngawi reng a, biak a fuh vak lova ka rin avangin ka be duh rih lo law law a, a kut erawh thlamuan tum takin ka chelh reng thung. Tun ṭum chu a ngaihtuahna a kal ding hle a ni ang, min vuan lêt lo reng reng. Kal ding pawh ni se a áwm alawm, a rilruah ka pa bak a awm dâwn rih lo ka hre chiang hle bawk.

Airport kan thlen chuan Counter lamah kan kal tlang nghal a, Emergency-a kan haw ngei ngei a ngaih thu a hrilhfiah mawlh mawlh a, ka pa dinhmun thlengin a sawi vek a, a tirah chuan an lo phal lawk lo nghe nghe. Thuneitute lam nen an inrâwn khawm phawt a ni mahna, rei fê an inbiak hnuah vanneih thlak takin zan dar 8-a chhuak tur Flight Ticket kan nei thei hlauh a, Hotel-ah pawh kan lêt leh tawh chuang lo.

Ka pasal chu buaipuia a rilru thlamuan a ngai tih ka hria, ka thiam ang tâwkin ka buaipui a, mahse a engah mah a thawk lo hrim hrim thung. Thil ngaihtuah ngut ngut hmel hi a pu reng a, khawngaih ru tak ka ni. A kut chelhin thlamuanna thu chhak chhuak ve ṭhin mah ila min chhang lêt lo va, a nui hmel hmuh phei chu khawi lamah hi a ni ringawt.

Ei tur leia ka kal sawn chhung te chuan a awm ngaiin a lo awm reng a, a chang leh ka nute a be bawk a, a phone a tlang hleih theih miau loh avangin ka phone hlir a hmang a, ei tur ka leisak ve tak na a, ka inṭhut hnaih tehreng nen a thil ei lai pawh ka hmu lo. Ka nu nena kan inbiak chuan ka pa marphu an hmuh leh tawh thu min lo hrilh a, mahse ICU-ah erawh an la dah reng thung.

Kei aiin u Maṭhuama a be hnem zâwk a, pawi ka ti miah lo, nufa an ni a, inthlamuan dan pawh an thiam zâwk ka ring. U Maṭhuama chu ring lutuk lo hian a vin leh hluk ṭhin a, eng dang vang a ni lo, ka pa a ngaihtuah êm vang a ni ber. An inbiak laia hmeh tawp hmak hmak chang te pawh a nei a, a thaw ri leh hawk ṭhin a, thlamuan theih ka châk ngawih ngawih a ni.

Khua a rawn thim a, darkar a liam zel a, keini pawh India ram lam panin thlawhnaah kan chuang fel ta. Kan inbe tam lo dun em em a, mahse ka pa dinhmun ṭhat loh thu a hriat tirh ang em em kha chu a ni tawh bik lo. Ka kut pawh a chelh lêt ran leh tawh a, a taksa lûmna chenin ka hre leh thei ta, tlêm chuan ka awm a tinuam deuh sawt bawk.

Amah ka ngaihtuah luatah ka awm a nuam lo vek kha a ni a, chu bakah thlamuan theitu ka ni lo tih ka inhriatna khan ka awm a tinuam lo zual bawk a, a nupui mah ni ila kan inkarah hmangaihna a awm miau si lo va, thlamuan ngawt chu a harsa ve a ni. A dar hnuai deuh, a âwm zawn vela lû nghatin ka ngheng chial a, a kut pakhat chu ka kut pahnihin ka hum ran a, tunah rih chuan tlêm tê tal paw'n a rilru hahdam se ka duh ber.

Darkar eng emaw zah thlawhnaa kan ṭhut tlawk tlawk hnu chuan India ram kan thlawk thleng a, zing dar 6 leh a chanve vel a ni a, chawhnu lama thlawk chhuak leh nghal turin kan intintuah zawm zat a, dik tak chuan a chauh thlak ka ti ang reng. Min ngaihtuah tih hriat zet hian u Maṭhuama chuan Mizoram lam pana kan thlawh chhuah leh hma zawng muhil rih turin min ti a, mahse muthilh ka tum bik bau lo, tum pawh ni ila ka thei dâwn chuang lo tih ka chiang a ni.

Khuap hneh takin ka taksa chu a kuah run a, keiin thlamuang deuhin ka lo ngheng chial bawk a, inthlamuantawn ve ve thei ila ka ti ngawt mai. Ani chuan awlsam têin min thlamuan thei mai zel a, hahdamna min pe thei mai zel a, kei erawh a hahdam phah chuangin ka hre lo, a awm ngaiin a awm reng zâwk ni maiin ka hria.

Ruahman lâwk ang ngeiin chawhnu herah Mizoram lam pan chuan kan thlawk chhuak leh a, mutmu tuah ṭha lo kan ni bawk a, keimah zâwk chu ka mut a chhuak ru khawp mai, mahse ka sawi duh bik der lo. Ka muhil ta nge nge a ni mahna, thil che dawtah ka harh a, u Maṭhuaman min lo la kuah reng a, thlawhna chu a lo ṭum vel chiah bawk.

Ka ṭhut dan ka siam rem a, ka bula mi erawh mut chhuah hmel viau mah se muthilh a tum loh hmel khawp mai. Thlawhna din fel rualin kan che sap sap a, keini pahnih phei chu kan rilru a hmanhmawh ru dun viau tawh zâwk a ni. Aizawl lam pana kan tlan lai te chuan rilruah thil dang a awm thei rih lo, ka pasal pa mah ni se ka pa chu ka pa a ni ve miau a, a thi mai ang tih ka hlau a ni.

Kan ina innghat hmasa lovin Hospital-ah kan tlang nghal a, kan chhungte nen kan inhmu chiah chu ka nu a rawn ṭap titih nghal a, u Maṭhuama chu a kuah thlawp bawk. U Maṭhuama paw'n nghet zet hian a lo kuah lêt a, chhungkawpa ber tih lovah chuan mipate zinga upa ber a nih mai bakah an unau zinga upa ber a ni a, ka nu tân pawh a thlamuan thlak viau ang.

Tlêmin kan boruak a pangngai chho ṭan a, ka nu chuan ina indah fel phawt turin min ti a, mahse keini nupa erawh haw kan tum lo bur. U Maṭhuama nau chiah u Rinzauvan kan bungrua zawng zawngte chu min phur hawsak vek a, Hospital-ah chuan kan awm ve ta reng a, mutchhuakin min zém chiai chiai mah se mutchhuak anga lan bik ka tum lo bur.

Chutia hma hun hre miah lova kan ṭhut ṭhap lai chuan doctor hnen aṭangin ka pa taksa dinhmun kan hria a, zun thlum a neih mai bakah BP sâng hi a lo ni a, chu chuan a taksaah nghawng a lo nei nasa em em tawh bawk. U Maṭhuama chuan a ṭha thei ang bera enkawl turin a lo ti thuai a, a ṭawngkam reng reng chu a nghet charh vek a, zawm loh ngam chi a ni paw'n ka hre lo.

A bulah ka ṭhu ngawi reng a, a vei lamah ka ṭhu a, a ding lamah ka nu a ṭhu bawk a, mi dangte erawh ṭhutna hranah an ṭhu ṭhap thung. U Rinzauva lo lêt leh chuan ṭhenawm khawvêng ṭhenkhat a rawn hruai nual a, an lo zui a ni mah zâwk ang chu! Kan tam ta deuh a ni ang, doctor paw'n awm tur chin a bituk ta nghe nghe.

Ka mit chu ka chhing leh diar diar ṭhin a, dik tak chuan ka chau ru tak zet a ni. Paris khawpui aṭanga India ram lam pana kan chuanna khan min tichau berin ka hria, kan chuang rei tlawk tlawk ve ém bawk a, chuang ṭhang lo tân phei chuan chauh lohna chi a ni lo. Ka mut a chhuak a ni tih an hriat hlau zetin ka hawi kual leh zawk ṭhin a, ka bula mi ber chuan a hria ang tih ka hlau, min ngaihtuah leh nasa dâwn si, min hawpui duh mai ang.

Ka intiharh lui hram hram a, tum na nâ na chuan tlémin ka mutchhuak pawh a zia ta deuh a, mahse bo hmak erawh a ni lo. Khumah mu ta ila chu ka muthilh nghal bawrh bawrh theih ka ring, chutiang khawp chuan mutchhuahnain ka rilru leh taksa a chenchilh a ni.

Ka pa chu a ṭha chho zel dâwn emaw kan tih laiin a rawn buai thut a, a marphu an hmu lo leh ta hial a, an hmuh leh mai ka rin tehreng nen darkar chanve dâwnah pawh an hmu ta hauh lo mai. Khawl chi hrang hrang hmangin doctor te'n an endik a, an buaipui a, mahse awmzia a awm chuang lo.

Pawm thiam harsa em em ka pa hnukchah fel tawh thu chuan ka nu a khawih nâ hle a, a ṭap hlawp hlawp a, nikhaw hre lovin a awm phah ta hial a, kan buai laih laih khawp mai. U Maṭhuama chu ka en leh zauh ṭhin, a insehruh hmel chuan ka lai a chhun a ni. Hai rual lovin a tuar nâ tih a lang a, mahse a mittui far khat pawh a tla lo, chiai hmel a pu miah lo bawk.

Kan vêng lam panin ka pa ruang chu kan hawpui nghal a, ka pite'n kan chanchin an hriat rualin min rawn be nghal a, ka nuhrawnte nufa paw'n an rawn hre rang khawp mai. Ka nuhrawn phei chu ka nu kuahin a ṭap hial a, an ṭap uar dun em em a, kei pawh ka mittui a tla ve ta nge nge, mahse ka ṭah chhan chu ka pa thih vang em em pawh a ni lo.

U Maṭhuama ka khawngaih êm avanga ṭap ka ni ber a, a hmela lungngaihna tam tak lang zut zut chuan ka rilru a tina a, amah ka khawngaih zual phah a, thup a tum tih ka hria, mahse ka hmu tlang vek si a ni. Ka pa ruang kilin kan ṭhu ṭhap a, a ṭhen an ṭap a, a ṭhen an kun ngul a, u Maṭhuama tak ngial pawh a pangngai thei bik lo.

A kut lian zet chu ka humsak a, che miah lo hian mi nung ni tawh lo tih hriat zeta ka pa hmel dâng lap chu a en tlawk tlawk a, thlamuan thei ila ka ti ngawt mai. Ka ṭap leh ringawt ṭhin a, dik tak chuan ka pa chu ka la hrawn tam lo va, thla khat vel er awr chauh kan la cheng ho va, ngaina tak leh ngai tak ka la ni hran lo, eng dang zawng aiin u Maṭhuama awm dan mawlh zâwk chuan ka ṭah a tichhuak ngawih ngawih a ni.

Khawvela awm ve tawh lo ka nu leh pate pahnih ka hriat chhuah phan ta hial a, ka ṭah a chhuak zual sauh a, ṭum dang ang lo takin u Maṭhuama paw'n min ngaihven lo hrim hrim a, ka phut miah lo bawk. Amah zâwk chu thlamuan thei ila ka ti ngawih ngawih a, thisen zawmpui ngei chan nátzia ka hre tawh a, a tuar nâ dâwn tih pawh ka hria, chu vanga thlamuan châk em em pawh chu ka ni.

A tukah chuan ka pa chu kan vui zui nghal a, kumhlun tur kan awm lohzia ka hriat chhuah phah a, khawvela mihringte hi chu kan la thi vek dâwn tho tho a, kan thih hun tur kan hre lo mai zâwk a lo ni. A reithei emaw a hausa emaw thihna chuan kan chungah inang khat vekin ro a rel a, demin haw em em ṭhin mah ila thihna hi chu a awm ngei a ngai bawk si.

Thlanmuala kan awm laiin ka nu chu nikhaw hre lovin a awm leh a, u Maṭhuama naute'n an buapui zung zung a, in lamah an hawpui vat bawk. Ka pa phum fel a nih hnu chuan keini pawh kan haw ve nghal a, in kan va thleng chu ka nu a lo ṭap ri rawih rawih a, ka pa thihna chuan a deng nâin a tuar thiam thlawt lo a ni e.

"Ka tihpalh" ti suptu lam chu ka hawi chho vat a, kan nupa room-ah kan mu dun diam tawh a, a âwmah min kuat bet chial bawk.

"I ṭha em u Maṭhuam? Muhil daih la, i chau awm si a, muhil rawh aw" ngaihtuah taka ka tih chuan

"Nangmah zâwk hian mut i mamawh" a lo ti hniam ruih a, mu tawh lovin ka tho zui nghal ta vat.

"Ni lo, ka mut a chhuak lo, rizai hi sin rawh aw" tia rizai ka sintir zung zung lai chuan ka bán rekah a rawn pawt a, a âwm si chétin ka mu chu a ni nghal mai.

"A pawi ngawt mai" ka ti sep ta ringawt a, pawi ka ti tak tak réng a, chuti teh thuta ka pa thihna chuan a tua te pawh min tihrilhhai a ni ber.

"Muhil la" dâk chho hau chunga ka tih leh chuan chet pawh a che lo, min chhang lo hrim hrim bawk.

"U Maṭhuam?" tia a hmel en ka tum chu a âwmah min kuah bet nghet zual a, tal chhuah a harsa lam lek lek a ni.

"Ka mut a chhuak hleinem, nang leh zel i mut ṭhat loh chuan ka rilru a nuam lo zual ngei ang. Chu vangin muhil rawh le, tui takin muhil la ka duh" dam dapa a tih tâkah chuan ka ngawi kar a, a âwm lûm ham ham khanin ka mu ta hle hle.

Ka harh leh meuh chuan khua a lo thim fel vek tawh a, ka harh ve tak na a, ka mut a la chhuak em em tho. Ka bula mu taksa lúm nuam zet chu tu nge a nih ngaihtuah chawp ka ngai lo va, min mutpui lo se chuan ka muhil thei bik kher lo mai thei a ni. A muhil nge muhil lo hriat tumin ka mut dan ka siam rem a, a hmel ka hmuh chuan a lo meng reng a, a thil en ngai a en tlawk tlawk bawk.

Khawngaihna hlirin ka khat a, ka ṭap leh thei tak ngial dâwna ka hriat avangin ka hawi sawn ta ringawt a, ka ṭap hmel hmu lo se ka duh a ni. Nghet zetin ka kuah a, ani erawh a awm ngaiin a awm reng thung a, sawi lo mah se ka pa thihna chu a tuar nâ tak zet a ni.

"U Maṭhuam, in harh tawh em? Zan a rei mai dâwn asin, chaw ei turin lo chhuk tawh ula? An la harh lo emaw ni le?" kan room kawngka pâwn aṭanga rawn titu chu a aw aṭangin u Siami a ni tih ka hre thei.

Rei lo tê hnuah in hnuaia chhuk thla thawmin a zui nghal a, keini pahnih erawh kan mu ngawi reng a, tunah rih chuan biak loh law law a fuh zâwkin ka hria. Thil tih theihna chak tak neiha ka pasal lungngaihna zawng zawng chu lâk kiansak vek theih ka châk tak zet, mahse chutiang chu suangtuahna vâk vel mai chauh a ni thung si.

Ka lo muhil leh daih chu niin, ka harh rual rual chuan u Maṭhuama ka ngaihven hmasa ber a, a hmel ka en thuai a, a ngai tê bawkin a lo la meng reng a nih chu! Chutah zet zawng ka insum thei ta bik lo va, duh lo viau mah ila a hmuhah leh a hriatah ka ṭap ri ta nge nge.

"I ṭha em? Nâ i nei em ni?" a pa a sún avanga a lungngaihna pawh hre chang lovin kei min ngaihtuah em em chu a ni si a, ka ṭah a va'n tichhuak zual tak êm.

"Ka khawngaih ém mai che u Maṭhuam" zep nei hauh lovin ka ti ṭuau a, ka ṭap zui feih feih a, ani erawh a ngawi ta reng.

"Ka hria asin, kan thisen zawmpuite chan nâtzia hi ka hria alawm, mahse engati nge i ṭah miah loh? I awm dan hian ngaihtuah lo thei lo chein min siam a, nangmah khawngaihna hlirin ka khat bawk asin" ṭah chhuak lutuk aw zeta ka ti leh chuan

"Ṭap thei ila ka ti ngawt mai" ti thâm ṭial ruihin min kuah nghet sauh a, ka chala a fawh vang vang hnu chuan a taksa chhunga ka luh vek duh ang mai hian min kuah nawn mawlh mawlh a, ka lo ṭap ri leh ta hawk bawk.

Ka ṭah chhuak zualpui a reh fel hnu chuan a lam ka hawi chho a, timna nei miah lovin a hmui lûm chhah tapah chuan ka han fawp vang vang a, chu chu hnem dan ka hriat theih awmchhun a ni tlat si. Keimah zâwkin ka fawh hmasak vawi khatna a ni a, min chhan lêt lai te chuan a lungngaihnate hip chhuahsak duh ang mai hian ka lo fawp tawn tawn a, chal insi rialin kan thaw hlawi hlawi dun zui nghal bawk.

A mit a chhing tlat a, kei erawhin amah ka en reng thung a, chhe tê paw'n kan la inawm hlat lo hrim hrim. A nupui ka ni a, a tawrhnate chu tawrhpuia thawi damsak ka duh tak zet a ni. Chuti taka inpawh leh innél kan la ni hran lo tih ka hai lo, mahse nupa nihna hian thil tam tak a lo keng tel a ni. Pakhat a hlim loh chuan pakhat zâwk pawh a hlim theih tak tak loh, a chhan chu pumkhat kan nih tawh vang a ni.

"In hnuaiah chhuk ila, i ril a ṭam tawh em?" ka ti sep a, tun ṭum chu ka pasal hi ka ngaihtuaha ka ngaihven a ngai tlat, chuti lo zawng rilru nát avangin a che buai mai ang.

"Nang?" a rawn tih thum ruih chuan

"Ṭam ve tawh tho, nang pawh a ṭam tawh ngei ngei ang. Thil kan la ei mumal reng reng hleinem, chhuk tawh ila ti raw?" ka lo ti ve leh nghal thuai a, a hmuhah ka nui lui sen sen a, a hahdam phah erawh ka ring em em chuang lo.

"Chhuk ang aw" ti nawn leh ngatin ka tho a, a bána ka pawh rualin a rawn tho ve ṭuah ṭuah a, thawh emaw thil ei emaw hrim hrim chu a peih loh hmel khawp mai.

In hnuai kan thleng thla chu min lo ngaihtuah hlawm em em a, a bikin u Maṭhuama an ngaihtuah hle a, a naute pawh an bang chuang lo. U Maṭhuama ei loh vang nge ni, a naute chuan zanriah an lo la ei miah bik lo va, naupangte leh ka mo puite erawhin an ei vek tawh thung. U Maṭhuama bulah ka ṭhu a, kan hma zawnah u Rinzauva chaw bel changin a ṭhu bawk a, mi dang pahnih chu u Rinzauva ṭhutna lênah an ṭhu ve ve thung.

Ka pa ruang kan kil lai khan u Maṭhuama tih loh kha chu an ṭap vek a, a tuar nâ tih hrethiam taka a nau pathum te'n an ngaihtuah em em chu hmuhnawm ka ti tak zet. Unau neih ve min tichâk thar hial a, chutah mipa hlang ṭhah an ni leh nghal a, ka pa kan sún lai mah ni se ka nu tân chuan a lungawithlak hliah hliah ngei ang.

"Muhil ve tawh rawh aw" mu tura khum kan chuankai hnu chuan ka ti sep a, a mitah tak ka en kál bawk.

"Ka lawm e" awkâ dam zet hian a lo ti daih a, ka ngawi rei lo chiang hle.

"Engati maw?" ka tih chuan

"Min ngaihtuah avangin" a lo ti ve leh nghal a, ngaih ṭha zetin ka nui ta ringawt a, kan inawm hnaih si a, min en chiang ngáng mai.

"Muhil ang le, kei ai mut i mamawh zâwk a nia, i muthilh loh chuan ka meng kar dâwn, chu vangin i muthilh ngei ngei a ngai" tiin ka awm dan ka siam rem zui mial mial a, ani erawh a lo meng nûr nang thung.

"Chu, pasalte thu pe zet zet ṭhin nupui ka lo nei reng a ni maw?" a rawn tih chuan a hmel ka en vat a, a ṭawngkam chhuak pawh a dik ṭan hle a, a pangngai ve tawh lutuk chu ka awm a nuam sawng sawngin ka hria.

"Muhil vat teh u Maṭhuam, i lo meng leh reng ang tih ka hlau a nia" ngenngawl aw lam lek lek hian ka ti leh a, a mitah nuihza hmel hmu mah ila ka inla thutak lui ve rih tlat!

"A nih, muthilh kan tum ang e" tiin ka hmuiah a rawn fawp zeuh a, hneh taka min kuah khawm vek hnu chuan a thin phu dup dup ri chu ka ngaithla kar a, ka mut pawh a rawn chhuak leh ṭan nghal bawk.

"Mut tui" ti sepin ka mit ka chhing a, ka chhip samah a rawn fawp vang vang tih loh chu hriat mumal pawh ka nei tawh lo.

Ka hmai lûm deuh hat hat avangin ka harh a, ka thil hmuh hmasak ber leh hriat hmasak ber chu ni êng a ni a, tukverh parda kan lo zâr miah lo tih ka hre chhuak nghal bawk. A saisir zâwngin ka lo mu fel diam a, ka hnunga mi erawh a la che lo hrim hrim a, tiharh ka hlau ru khawp mai. Kei chuan mut ka kham ta viau a, thawh ringawt ka tum a, ka ṭhulh leh nghal thung.

Ka che a nih chuan a harh ngei ang a, kham takin mutmu tuah ṭha se ka duh bawk si, kei lah ka mut a chhuak tawh der si lo. Muangchangin ka che hret hret a, harh lo turin ka ti rilru mawlh mawlh a, ka dul zawna a bân inkham ber chu chawi sawn ka huphurh ta a ni. Maimitchhing chungin ka chawi sawn riai riai a, vanneih thlak takin a harh lo hlauh a, khum aṭang chuan ka tho chhuak nghal vat bawk.

Room chhung aṭanga kal chhuak ta mai lovin a muhil hmel chu ka thlir reng a, a mit a meng lo chung paw'n hmelṭha ka ti ta khawp mai. Thawm engmah ka chhuah lo va, ka rilruin keimah leh keimah ka inbe mial mial a, ka rilru dik tak chu ka hre chhuak leh ta nge nge bawk. Ni e, tunah chuan u Maṭhuama hi ka duh tawh chiang alawm, hmelṭha ka ti satliah mai mai emaw ka ti kha a ni a, a laka ka rilru puthmang a danglam tial tial chhan tak pawh ka hre bik chuang lo.

Tin, tarmit a vuah tawh ngai miah lo va, chu chuan a tilang hmelṭha zual sawtin ka hre bawk. Zaii sawi dan takah tarmit a vuah lai kha chuan a officer hmel hliah hliah a, a hmelṭha tih reng ka hre ngai lo. Tunah ve thung chuan ka pasal a ni tawh a, a bula awm a hahdam thlakzia te, a hmelṭhatzia te, kawng engkima min ngaihtuahzia te, ka laka zún a neih nasatzia te, min tinâ dâwn lo tih nen lam ka hre vek tawh a, ka tân chuan râlmuanna kulhpui nghet tak ang mai a ni.

(End of Chapter 11)

SYLVIA ROMAWIZUALI

By

Havali Adam

Chapter 12

In hnuai ka thleng thla chu thawm a lo reh ṭhiap a, zing dâr 6 pawh a la ri lo va, kei tih loh tho an la awm lo tih ka hrethiam nghal mai. Tui lûm ka chhuang a, zingkâr a ni bawk nen thawm a rehin ngaihtuahna pawh a kal ding ṭha duh hle. Thihna hi chu pumpelha dan ringawt theih a ni miau si lo va, ka nu leh u Maṭhuamate pahnih ka khawngaih zual a ni. Ka nu chu thuhran ni se, hmeichhia a nih angin a ṭap mai a, a tawrh nâtzia a tilang pawp pawp a, u Maṭhuama berin ka rilru a kap ta a ni.

Chutia mahni chauha ka awm lai chuan u Veni a rawn tho va, u Mahṭhuama te unau zinga naupang ber dawttu nupui a ni a, fa pakhat an nei tawh a, kan innêlin ka lakah pawh a fel ṭhin khawp mai. Min hmuh rualin chokaah a lo lut ve nghal a, ni dang ang bawkin thil sawi tur a hre leh hle. Ka pa chanchin min hrilh nual a, ka hriat ngai loh thlengin ka hriat phah a, pa nélawm tak a nih thu leh fiamthu duh ve tak a nih thu ka hre zing malh malh khawp mai.

Kan pahniha in turin thingpui ka siam a, u Veni kâ aṭangin u Hlimin ka nu a riahpui tawp thu ka hre leh ta zel a, kan in chhung boruak chu a hahdamthlak tehchiam rih lo a ni. Dâr 7 bâwr velah an rawn tho ta sap sap a, ka lakah chuan an hawihhawmin an fel em em vek a, min biakna pawh ka chhang ṭha thei khawp. Dâr 8 a ri dâwn hnai a, u Maṭhuam hmel réng ka la hmu ve lo thung.

Thingpui ken chhohsak ka tum chu u Hlimin bawnghnute kensak zâwk turin min ti a, a thu sawi chu ka zawm ve mai a, a hmeh tur chhang tlêm azawng ka keng tel bawk. Kan nupa room kawngka chu dim tê hian ka hawng dêk dek a, room chhung ka luh ruala ka hmuh hmasak ber erawh tui taka ka pasal muhil lai a ni. Ka lukhum chu a âwmah a kuah bet run a, kawng leh lam zawng tak chuan nuih a tiza ang reng.

Kaih thawh ka tum ve tak na a, ka ṭhulh leh ta nge nge. A hmai te chu tawha sik ka châk a, zút ka châk ru zek zek a, mahse ka rilrua thil awm ka ti a nih vaih chuan a harh nghal a ni mai. In hnuai lamah ka chhuk leh ta ringawt a, bawnghnute leh chhang pawh a ngai ngaiin ka keng thla a, u Rinzauva ka intir ta daih bawk. Dâr 8 leh a chanve velah ka nu a rawn tho chhuak a, ka mo puite'n lo be siam siam mah se tûmah a chhang lo va, kei chuan ka be duh rih lo law law ta mai, ka pa a la ngai dâwn tih ka chiang a ni.

Dâr 9 a pelh fel tâkah chuan ka ngaih a ṭha chiah tawh lo, ka rilruah u Maṭhuama hlir a awm a, a la muhil ti dâwn ila a harh a hun viau tawh bawk si. Chaw ei siam laiin in chung lamah ka chho a, kan nupa room ka lut chu ka hmu ta hauh lo mai. Hlauhthawnna hlirin ka khat a, amah zawnga bathroom lam ka pan pâwk pawk lai chuan a rawn chhuak nulh a, towel vâr chiah a veng a, a lo inbual fai a ni ngei ang. Eng khaw sawi set set lovin ka kuah ta ringawt a, a hamhaih deuh a ni mahna, min kuah lêt lawk lo nghe nghe.

"Min tihlauthawng alawm" tiin ka kuahna aṭang chuan ka inla hrang a, a taksa bawh rawk rawk khawpin a lamah min pawt nghal thung.

"I mu rei phian si a, ka pa hnung i lo zui ve mai ka hlau hman lutuk a, i ṭha deuh tawh ti raw?" ka ti leh a, la ṭawng miah lo mah se a mitmeng aṭangin ka hlauhthawn chhan min zâwt tih ka hre thei miau si a ni.

"I mu ṭha em?" a rawn ti daih a, chu zawhna chu ka zawh tur zâwk a ni asin maw le.

"Mu ṭha e, nang i mu ṭha em? Zingah khan bawnghnute leh chhang nen ka rawn chho va, i lo la muhil tui bawk si a, ka kai tho duh lo ta law law che a ni" ka tih chuan ka kawngah a chelh a, min pawt hnai sawt bawk.

"Min ngaihtuah viau a ni maw?" a rawn ti sup a, a ṭawng ring hran lo va, towel tih loh a taksaah thil dang reng a awm si lo va, ka danglam tial tial dâwnin ka hre tlat!

"Ngaihtuah é le" ka ti hliai chuan a lo nui suk a, pangngai taka a nui hmel ka hmu leh thei ta chu ka lawm ru khawp mai.

"A dik ang, i hmelah hian dawt a lang lo tlat" tih leh ka hmuia fawh a rual nghal a, min fawp reng chung hian ka kawngah a rawn chawi a, khum lama min pheipui lai te chu ka hre reng, mahse ka dang miah lo a nih chu!

"U Maṭhuam....ti rih lo mai ang, chaw...chaw ei an siam vek tawh" ka nghawng leh a chheh vela a hmui a chettir lai chuan ka lo ti thâm ṭiak a, a tawp duh der lo leh nghal.

"Nupa nun hmanpui che ka tum hleinem Sylvia, i taksa mawi tak hian min thunun hneh hle chu a nih hi!" rum deuh nghuta a tih zawh rualin ka hmuiah bawk a fawp leh vang vang a, a tukhum sam ṭham meuhin ka lo chhang lêt tawn tawn a, min han nawrlui deuh se zawng ka dang rei thei miah lo ang.

Thawmhnaw pangngai a hâk chhung zawng chuan khumah ka ṭhu ngawi reng a, a ruala chhuk turin mi ti tlat hek! A che vel hrim hrim chu ka lo en reng a, a dik thlup ni mai hian ka hria. A hman ta maw tihah room aṭangin min kai chhuak deuh kher a, a hma ang bawkin min ngaihtuah leh ta viau e. Keimaha ka kal theih thu leh vawn kher ka ngaih loh thu ka hrilh ve tak na a, ka kut erawh a thlah phah chuang der lo. In hnuai chhuk thlakna step-a kan kal lai chuan min nghak titih deuh a, a awm dan vel chu ka hrethiam lo lek lek zâwk a ni.

Tukṭhuan kan ei kham a, naupangho thawmin in chhung a luah khat a, kan boruak a la pangngai loh avangin school an chawl vek a, naupang tih takah ka pa thihna la rei lo mah se hlim taka thawm an chhuah pawh chu áwm ka ti viau tho mai. A ṭhen kawtah an infiam a, a ṭhen in chhungah Toys nen an awm hnawk rup bawk a, naupangte hi chu a theih hram chuan hauh vak te, vin vak te hi ṭha lo ka ti ve tlat. Chhungkua tichhungkuatu te zinga mi an ni ve a, a tlangpuiin naupang awm lohna chhungkua hi chu a reh ruih ṭhin reng a ni.

Rei lo tê hnuah ka nu chuan thlanmual lama kal a rawt a, tûma'n kan hnial hran lo va, an thlawp hmel hlawm viau zâwk. Ka pa thlan bul kan thleng chiah chu ka nu a insum thei lo leh ta nge nge a, u Hlimin a ṭahpui bawk a, chhungkawpa berin mual min liamsan ta chu kan pawm thiam thei rih lo a ni e. Ina kan haw hnuah pawh ka nu chuan ṭah ban zai a la rêl hlei thei lo va, ka khawngaih tak zet.

Chhun thingpui in tur siama kan chet malh malh laiin chokaah u Maṭhuama a lo lut hlawl a, pâwnah chhuakin a bo deuh vang vang kha a ni a, ka bul hnaiha a rawn awm hrim hrim pawh chu a lawmawm viau e. Ka mo puite'n an be siam siam a, pangngai takin a chhang ve zel mai bawk a, ṭawng erawh a ṭawng peih loh hmel viau thung.

Tlai a rawn ni a, mote zinga fa la nei lo awmchhun tih takah ei rawng ka bâwl mial mial a, ka mo puite chuan min pui tho na a, an fate bual fai an duh hlawm avangin min pui lutuk hman lo va, kei paw'n ka hrethiam khawp mai. Ei rawng báwl hrim hrim chu harsa ka ti hran lo, ka tih tur ve rengah ka ngai hmiah bawk. Mipaho pawh an reh diak a, ka hmuh lai kha chuan an inzui chhuak hlawm ngei a, khawiah emaw ni an kal dâwn a ni mahna le.

Ka pa thih aṭanga kâr khat a ral hnu chuan kan chhungkua paw'n ngai a awh chho ṭan a, ka nu ber chuan hma a sâwn mawh em em a, a sâwn hlei thei lo a ni ber. Mi dangho erawh kan awm dan a pangngai viau tawh a, u Maṭhuama thlengin; thihna zawng kan dana kan pumpelh theih a ni miau si lo a tin ni!

Tlai lamah ka nuhrawn hmel kan hmu ta ziah bawk a, ka nu nen hian an inkawm ngeih phian a, mahse pawi tihna ka nei hran lo. A chhan chu ka pa a sún em em a, a tuar thiam lo va, hnemtu a mamawh tih ka hria, ka nuhrawn nena an awm dun hi chuan tlêmin a zia deuh ṭhin bawk. Ka nuhrawn nen pawh a lo kal apiangin kan inbe ve ziah a, thui tak erawh kan inbe ngai lo thung.

Chhani chanchin ka zâwt leh zauh ṭhin a, mahse a sawi ṭha duh vak ngai lo. Kei aiin ka mo puite a be nêl zâwk a, kan inbiak laklawh lai te hian a va be daih zel. Dik tak chuan ka nuhrawn mah ni se ka nu a ni ve tho a, mi dang hmuhah inngeih lo lutuk anga lan ka duh loh vanga be lui hram hram ṭhin ka ni.

Hun a liam zel a, u Maṭhuama nen kan inneih aṭangin thla khat a pum ve ta, ani pawh a office ni tin leh tawh a, chhun chawlh hun awm velah hian kan inbe ziah a, amah ka ngainatna leh ka duhna a zual tulh tulh a ni ber. Zirna lam erawh a sawi lang rih tawh miah lo va, ka pa thihna a la rei lo bawk nen hun a tih hunah min sawipui ve mai ka ring. Ka pite nen pawh kan inbe fô va, an upa dun ve tawh bawk si a, ka ngaihtuah ṭhin khawp mai. Ka nuhrawn ve thung chu kan inah a lo chuangkai hnem tulh tulh a, kan inbe lo tawlh tawlh a, min biak loh chuan biak châkna ka nei bik hran lo.

Tlai khat ka inbual tur darthlalanga ka inen chu thil danglam hmu tlata hriatna ka nei a, ka âwm bâwr ber chu ka en chian pôh leh a danglamin ka hria a ni. Ka'n khawih vel chhin a, a hma ai a lian deuh sawta hriatna ka nei a, mahse puitling ṭhankin tawh hnua hnutê ṭhan ngawt thu a awm si lo. Ngaihtuah thui buai duh lovin bathroom-ah ka lut a, ka inbual lai te chuan ka en leh ṭhin, a ṭhang ti dâwn ila a ṭhan chhan tur ka hre si lo, mak ka ti khawp mai. Ka inbual zo bathroom aṭanga ka chhuak chu kan nupa room-ah u Maṭhuama a lo lut ve chiah a, min en chiang lutuk a, ka lái titih ringawt nghe nghe.

"I lo haw tawh a?" ka lo ti nghal a, towel-in ka âwm khuh vek mah ila ka hup deuh ṭat tho va, inthlakna ka ken luh lo tlai bera a lo haw hma teh thut chu mak ka ti ang reng.

"Ka tlai a ni maw?" a tih chuan hrethiam lo zetin ka en hâ a, a la nui suk zui.

"Tun ai hian lo thleng hma hret ila chuan kan inbual rual ngei ang" a rawn tih zawm leh zat a, a thu sawi tum ka hrethiam ve ta chiah bawk.

"A ho mai mai" tiin wardrobe lam ka pan a, pen thawm ka hriat aṭanga rei lo tê hnuah ka hnung lam aṭangin min rawn kuah a, nam sawn ka tum chu a duh der lo leh nghal.

"Zah a hun tawh lo, ka hmu zing tawh" a tih sup chuan keimahah zahna hlir a awm ta zâwk a, thawmhnaw hâk thuai thuai duh laia min kuah teh tlat chu a buaithlak a ni.

"Awm sawn teh u Maṭhuam, ka inthlak duh a nia" tia chet ka tum chu chhe tê them paw'n min kuahna a phelh thawl duh lo hrim hrim a nih chu!

"I inthlak thei reng" a ti ve tak na a, min thlah hauh chuang si lo.

"Awm sawn ta reng che, hetia min kuah reng te chuan thawmhnaw ka ha thei nâng" ka ti ta hlak hlak a, ka rin ai ka aw chu a chhuak vin daih mai.

"Chu, ka kuah che avang hian i thinrim deuh reuh tihna em ni?" a hmuia ka nghawng vun nêm lai núl thuak thuak pah hian a ti hniam ruih a, ka dik lo leh tak ngial dâwnin ka hria.

"Ka ning a nia u Maṭhuam, awm sawn thuai teh!" tih leh ka kawng zawna a bán chu hmer vak ka rual a, nâ pawh a ti lo hrim hrim, mahse zawimuang hian a awm sawn ve ta tho.

"Inthlak rawh le, ka lo en ang che" a thu sawi hmasa zâwk chuan ka ngaih a tiṭha viau a, a hnuhnung zâwk erawh a teuh lo nasa!

"A ṭul lo, va inbual fai rawh, ka lo inthlak ang" ka ti leh salh salh a, ka aw chhuak hrim hrim a vin lam lek lek ṭhin chu ka hrethiam bik lo tak zet a ni.

"I inthlak hma chu ka inbual fai lo ang, nge ni a, thawmhnaw ka hâktir kher che i duh zâwk?" tih leh wardrobe lam pan a rual a, Hanger-a ka thawmhnaw inkhaite chu a en diat diat a, a luhlul lutuk chu a buaithlak!

"I pasal ka nih hi maw le Sylvia, zak duh suh, ka duh ang taka min la nêl thei lo hi ka hmumawh ṭan a ni" thawmhnaw hâk tur min pek pah hian a ti deuh hmuk a, a nui miah bawk si lo, tlêm chuan ka inthiam lo ve deuh.

"Ha rawh le" a rawn ti leh a, ngawi rengin ka towel bih lai chu amah zâwkin a pawt phelh a, ka âwm bâwra a mit a fu rei ta lutuk chu ka awm a nawm loh vek phah nghe nghe.

"Min hrethiam teh Sylvia, ka rilru hi ka thlak ngei ngei a ngai" ti thutin mi pawm zui nghal a, tal chhuah tumna pawh ka nei bik chuang lo.

Bathroom-ah min pawm lut a, a thawmhnawte chu muangchang lo fê hian a phelh mial mial a, kei erawhin a che vel chu ka lo en tlawk tlawk ringawt. Ka hmel a hmuh rual chuan a kiai suk a, ka kawngah chelhin min fawp zui nghal ta mawlh mawlh bawk. Kei pawh ka bang bik chuang lo, thlahlel em em hian ka lo fawp lêt tawn tawn a, rei pawh min din pui lovin ka kawngah a rawn chawi a, ka lo kherh nghal thuai bawk. Ka taksa chhunga awmhmun a rawn khuar chiah chu a kâ chhungah ka thaw lut ham ham a, ka taksa pumin ka mur chhuak leh vek ta, tawng ngai lo ni lo mah ila tawng ngai lo ang mai ka ni.

A chet dan chuan min thunun hneh lutuk a, tha pawh ka nei mumal tawh lo. Ka taksa chhung aṭanga chhuakin bathroom chhuatah min nghat a, ka ding ngil thei lo chiang kher mai. Amah hnungchhawn tura min siamrem lai te chuan a tih ang ângin ka awm tawp a, ka engkim chu a thu hnuaia awm vek ang a ni tawh tlat a tin ni! Ka tluk mai loh nân bathroom bang chu ka nem hram hram a, ka bawp ding lam chawi kang paha ka taksa chhunga riah buk a rawn sual leh chiah chu a men hian ka meng phal tawh lo hrim hrim.

Mipa a nihzia mi hriattirin ka taksa chhung hmun tin kil tin chu a luah khat fai vek a, nawmna vawrtawp pawh ka thleng har lo chiang hle. Ani erawh chawl miah lovin a la che char char thung a, hah ve thei lo leh tha zawi ve thei lo ang mai a ni. Kei tak pawh chu zawi hnawk e ti lo chuan rei lo tê hnuah ka taksa a rawn insangmar ṭha leh ṭan a, engkim chu ka thunun theih piah lam thil vek a ni a, min thununtu erawh ka hre chiang em em thung. A rum nghut ri te chuan ka beng a ti tlai a, amah ka mamawhna leh ka thlakhlehna a tizual a, tum lâwkna pawh awm miah lovin thawm ka chhuah ve leh ta nge nge.

Ka taksa aṭanga a chhuah lai te chuan ka khup a sai awt awt a, ka ding ngil ṭha thei tawh rih lo tih a hrethiam a ni mahna, ka kawngah chelhin min chawi kang a, ka taksa chhungah a rawn luh zawm leh nghal zat bawk. Mi pawm kang reng chung si hian bathroom bang chu min nghentir a, a che erawh a hma ang em emin a rang lo va, ka hmuiah a fawp reng tawh thung. A chang leh ka âwm bâwr chu a hmuam tawn tawn a, rilṭam lutuka thil ei hi ang ka ti ta ber mai. Kei lahin ka lo dawngsawng ṭha si, a tukhum sam ka ṭham loh leh a hnungzang ka ham tawn tawn a, nawmna nasa lutuk avangin mu leh mal reng ka nei thei lo a ni.

A che rang tial tial a, ka taksa chhunga a rawn luh rual te chuan thawm ka lo chhuah leh hak hak ṭhin a, tun ṭum chu a dan a dang thlawt a ni. Ka âwm bâwra bur ngar ngar pahin a che ta mawlh mawlh a, a muangchang lo tial tial a, a hmanhmawh pôh leh ka lo dawngsawng ṭha emaw tih turin ka taksa chu a mur chhuak leh ta vek a, ani pawh a rum nghut nghut bawk. Vanram tla fual tluk zeta ngaih theih nawmna vawrtawp kan tawng buak dun hnu chuan min la pawm kang reng a, min nghat thla ta pawh ni se ka din ngil theih ka la ring lo. Ka hmuiah a rawn fawp leh vawng vawng a, ka tân chuan a va han mipa ngawih ngawih chiang êm.

"I taksa mi hipna ngah lutuk avang hian ka insum thei lo ṭhin" a aw chu thum ṭha viau mah se a phelh deuh phang a, a la pangngai bik chiah lo tih ka hrethiam mai bawk.

"Inbual ang le" tiin bathroom chhuatah min nghat thla a, ka tluk hlau ang hrim hian ka kawng leh ka darah a chelh a, ka thil hmuh mawlh chu mak ka ti báng thei lo a ni.

"I en reng chuan darkar chuang fê inbual nân hun kan hmang ngei ang" a rawn ti chiah chu ka harh chhuak zawk a, a chhan pawh ka hriat si loh hian a lo nui nghawr dat a, ka mit zek zek lah chu hmun dangah a fu hlei thei tlat lo leh nghal.

"Ih.....eng lo...ka chhuak duh" maimitchhing chungin ka ti ta ringawt a, ka meng a nih chuan ka mit funa tur ka hre chiang a, ka en reng a nih ngat phei chuan keimah zâwk ka zauthau thuai dâwn tih ka hre chiang em em bawk.

"Ka phal hram ang" a tih rual chuan chhuak turin ka che nghal a, a taksa lian zet hmangin min lo dang vat thung a, mahse ka thil khawih fuh ber kher chu a va han ṭul lo tehreng ém.

"Eu..." ti hniam supin a nui nghawr nghal dat a, ka thil khawih fuh mêk; ruangam tê lo tak leh lumnaa khat ang maia pangtilum ngah em em chuan ka kut chauh si mah se ka taksa pumin a tisa chhuak hat hat thei nia maw le.

"Ka chhuak duh tawh" mumal lo zeta ti hliaiin a lam ka hawi chho a, ka hmuia a rawn fawh leh hram hnu chuan a awm sawn ve ta chauh bawk.

"Ka rei dâwn lo a nia, i lo inhak fel hman loh vaih chuan a ni mai" bathroom chhung aṭanga rawn ti khawk rum rumtu chu ka pasal ngei kha a ni si a, tunah chuan ka hre chiang tulh tulh a, ka duhna a pung tial tial bawk a, a ngainatawm zual zel a ni ber e.

Ka inha fel thuai thuai a, a sawi lâwk ang ngeiin a inbual rei lo kher mai. Ruak ngal ngat hian a lo chhuak a, a saruakna chu a zahpui lo hrim hrim ni maiin ka hre tawh. Chu bakah bathroom-a kan luh khan towel tih vel ngaihtuah hmanin kan khawsa lo va, ruaka a lo chhuah mai lo nâk a! Ni tak e, kawr a ha lut tak alawm, mahse engati nge a rawn ken chhuah miah si loh? Bathroom chhuatah khan a la awm a ni ngei ang, a huh vek awm si a, suk a ngai dâwn chiang e.

Ka thil hriat chhuah avang chuan bathroom lam ka pan nghal a, ka rin ang ngeiin a thawmhnaw chu a lo awm huh hnuang a, bathroom aṭanga ka chhuah leh hnuah erawh Boxer a lo ha fel tawh a, kekawr a lo ha vel mêk bawk. Nupa nun hmang zo chiah mah ila kan inbe leh ta miah lo va, a rukin ka en nasa khawp mai. A sam la hnawm deuh chap te, a rim fai sar te chu hriat leh hmuh nuam ka ti thar em em a, a sam mawlh chu hru ro lo mai se ka duh, sawi ngawt lah ka duh bik bawk si lo.

A inhâk fel hnu chuan in hnuai lamah kan inzui thla a, chokaah lut tlangin ei rawng bâwlte ka pui nghal mial mial a, u Maṭhuam erawh ka nute room-ah a kal thung. Eng eng emaw ni sawiin u Siami nen ei rawng kan bâwl dun a, ani hi chu u Maṭhuamate unau zinga naupang ber nupui a nih angin ka mo puite zingah a naupang ber a, kan kum pawh a inthlau lutuk lo, ka nêl ber dâwnin ka hria. Fiamthu a ngaina phian a, a thu sawi ṭhenkhat phei chuan min tinui reng mai.

U Hlimi leh u Veni te pahnih erawh khawiah nge an awm ka hre chiah lo, anni hi chu nêl loh vang ni lo se, tlêmin an kum a han fal deuh tawh a, chu chu u Siami anga ka pawh ngam lutuk rih lohna chhan niin ka hria. Tlai dâr 5 bâwr velah ei rawng kan bâwl zo va, mi dang pawh in chhungah an awm kim vek tawh a, ka nu chuan chaw ei hma hun hman a rawt a, hun hmangtu erawh u Maṭhuama a ni daih thung. Zep lo chuan mak ka ti ru ang reng viau a, a chhan pawh a ṭawngṭai ngai ka hre tlat lo a ni.

"Kâr leh aṭang khian Sylvia-i paw'n zirna a chhunzawm thei tawh turah ngai ang" zanriah eia kan ngawih ṭhap laiin u Maṭhuama chuan a rawn ti a, a hmel ka en nghal vat bawk.

"Eng nge i sawi awmzia?" ka nu a lo ṭawng hmasa ber a, nuam lo ka ti ru ang reng, u Maṭhuama pawh mi sawipui hmasa phawt áwm, nge a hmaa kan sawi dun tawh kha a ring tlang nghal zâwk!

"Kan inneih hma khan kan inneih hnua zirna a chhunzawm ka phalsak tawh alawm, ka pa pawh khan min hriatpui nghe nghe asin, a hrilh miah lo che a ni maw?" u Maṭhuama aw chu dam dap mah se ka nu hmel erawh a danglam nasa mai.

"I pa khan chutiang thil eng mah min hrilh lo, a reng reng thuah Sylvia-i pawh engati nge zirna chhunzawm i la duh a? I chawlhsanna a rei tawh a ni lo'm ni?" za lo zetin ka nu chu ka nuih ringawt a, chhan dan tur pawh ka hre rih lo.

"Ka nu" u Maṭhuama zâwkin a lo ti sup a, ka awm a nawm loh phah a hlauh avangin ka nu chu a khap tih pawh ka hre reng.

"I rilru dik tak han sawi ve hrim hrim teh" ka nu bawk chuan a rawn ti leh a, thinrim awkâ vin paw'n min be chuang lo mah se ka inthlahrung em em tho.

"Eng lo...B.A tal graduate ve ka duh a, a chhan chu" tia ka ṭawng laklawh lai chuan u Maṭhuaman min lo mitmei a, sawi lo turin min duh ni maiin ka hria.

"A chhan chu eng maw?" ka nu chuan a lo tih zawm ta chat mai.

"Hriat ve vek a ṭul hran hleinem ka nu, tui takin chaw hi i ei tlâng zâwk teh ang u" ka chhan hmaa u Maṭhuama rawn ṭawng leh avangin ka nu chu a ngawi ve mai a, nuam lo ka tihna erawh a zual tulh tulh thung.

Zanriah ei chhung zawngin chaw ei tuina ka nei thei ta reng reng lo mai a, ka nu awm dan avang chuan hrehawm ti ru tak ka ni. Min vinin min hrawk hrep lo mah se zirna ka chhunzawm a remti vak lo tih ka hmu tlang vek a, u Maṭhuama khan min chhan khalh zel lo phei se chu ka rilru dik tak ka sawi chhuah hial ka ring. Chaw kan ei kham ta sap sap a, ei inna ka seng fel nghal mial mial a, ka awm erawh a la nuam thei lo tluang zel thung. Ka ngaihbel nge pawh ka hre lo, ka nu chuan min rawn en leh deuh vang vang ṭhin a, zirna han chhunzawm loh ngawt lah dikin ka hre thei bawk si lo.

Kan nupa room-a kan awm hnu chuan lungni vak lovin u Maṭhuama ka sawi ṭhatpui a, a sawi dâwn tih tal min hrilh lâwk se chu ka nu zawhna te kha chhan dan ka thiam ngei ang, ani lah chuan eng teh ualah a ngai der lo leh nghal. Ngaih ṭhat hmel zet hian khumah min kuai mu a, ka nu lam reng a rilru a awm tawh lo niin a lang. IGNOU-a zirna chhunzawm mai turin min ti a, hnialna pawh ka nei chuang lo, zirna ka chhunzawm dâwn hrim hrim chuan khawiah pawh ni rawh se, ka pawm vek! Chu bakah ni tin college kala hun ka hman chuan a nawm lohna chen a awm ngei dâwn a, IGNOU-a Admission tih chu a fuh berin ka hria.

Thil dang sawi chhunzawmin kan inneih thlalak ṭhenkhat kan en dun ta daih a, kan han en kual kan en kual chu thil hriat chhuah ka nei a, inneih lai khan ka mit a del a nih ngei ka ring. Thlalaka a hmel leh a inthuamna chu ka en nawn leh ṭhin, a pá hliah hliah bawk si, a hmelṭha thlawt a ni. A pa lian a, a pian a nalh a, a zawng zawng chu an ni kher lo vang, mahse hmeichhe tam zâwk chuan kei ang thovin hmelṭha an ti ve dâwn tih ka chiang. A hmel ni se a fai vang bawk si a, ka mitah chuan a ber a kai pha tlat a ni.

"I mawi lutuk" amah zâwkin a rawn ti sup a, chu thu chu ka sawi áwm zâwk tak a ni asin maw le.

"Ka awih kher lo ê" nui chunga ka tih chuan

"Ka mitah chuan i mawi lutuk" tiin min fawp zeuh a, kan thil en lai dah felin kan mu dun ta hle hle zui nghal bawk.

Kâr khat a ral hnu chuan Admission min tih felpui ta ngei a, ka lawm rualin ka nu lakah erawh inthlahrun a nâ duh khawp mai. Chutih rual chuan u Maṭhuama berin min thlawp em em thung a, mi dang ve thung chu ka nu lam an áwn deuh vek a, kawng leh lam zawng tak chuan áwm ka tihpui tho. Mo zinga a nuapang ber leh la mo rei lo ber ka ni leh nghal a, in chhungkhura ka chet peih loh vang leh ka thatchhiat vangah an ngai ang tih ka hlau hle bawk. Chutiang lam rilru chu engmah ka pu lo hrim hrim a, hlawhtlin ka tum em em ringawt a, chu bak thil dang a awm rih lo.

A hma zawng aiin kan inah ka nuhrawn hmel hmuh tur a tam ṭan ta a, a changin Chhani pawh a rawn lang zeuh zeuh ṭhin bawk. A bikin ka nu leh ka nuhrawnte pahnih chu an inkawm ngeih em em a, a tirah kha chuan ka nu lusún lai a ni bawk nen a lo kal ṭhin chu pawi tihna ka nei hran lo, mahse tunah chuan thil hlauhthawn ruk ka nei tawh thung. Pasal ka neih hma zawng kha kan chengho ve hrep tawh a, ka nu lakah chuan ni lo lôvin min lo sawi ang tih ka hlau a ni.

An titi ni se a tluang dun viau zel leh nghal a, thingpui ka va pek te hian ka nuhrawn zâwk chuan min lo nuih lui sak ṭhin a, ka nu chu thu lawi lo a lo fah ṭeuh ang tih ka hlau khawp mai. Ka rilruah erawh kan in bawk a awm leh a, ka hlawhtlina hna te ka neih hunah chuan engtin emaw ni tak buaipui ka tum a ni. Ka pa khan document felfai thlap min hnutchhiah bawk si lo va, ka nuhrawnte nufa ni se min chuhpui an tum hmel si, rilru ka neih a ngai tak zet.

Kan nupa inkar erawhin ṭhat lam a pan zel thung a, a chang phei chuan ka duh ruk thu hrilh tawp mai ka duh rum rum ṭhin, mahse hmeichhia zâwkin han sawi hmasak lah thil mawi niin ka hre bawk si lo. Kan inneihni khan a hming chuan 'hmangaih' tih ṭawngkam kha kan chham dun ve ngei a, khang hun lai phei kha chuan ka engah mah a thawk lo hrim hrim. Tunah erawh thla hial a ral tawh a, a ruka ka duhna a zual zel mai chu a chhan ka hrethiam bik lo a ni.

"I va zung ngun mawlh mawlh ve?" min ngaihtuah miah lo emaw ka ti a, min lo chik ru reng zâwk chu niin.

"Nia, ka zun hi a chhuak reng mai" tih chiahin ka chhang a, toilet-ah ka lut zui nghal bawk.

"I zun a ín a ni lo maw?" toilet kawngka bula dingin a rawn ti a, a aw aṭang chuan min ngaihtuah leh ta viau e.

"Ín lo vang, zun ín chhan tur a awm lo, mahse ka chau deuh nghulin ka hria, vawiinah ka chhuak miah si lo" thil sawi ṭul loh tak ka sawi tel tih ka hre hnuhnawh leh a, tun lai chu ka dik chiah lo a ni.

"Damdawi ei hrim hrim teh, i zung zo tawh dâwn em?" a rawn tih chuan nêl aw zet hian

"Zung zo chu a ni mai, en teh u Maṭhuam, tun hnai hi ka e khât tawp, ka ek chhunah lah a khal thei si, ka ek khát vang a ni ang ka zun ngun em em" ka lo ti niah niah a, toilet aṭangin ka chhuak zui nghal bawk.

"I ṭha chiah maw?" tiin min thlek kual dan dan a, ka buk khum nghat nghat hnu chuan a kal sawn a, damdawi awmna lam a pan danah damdawi min eitir dâwn chiang e.

"Kha, hei hi ei hrim hrim la, i zung ngun lutuk pawh a tiziaawm deuh mahna" khuma ka ṭhut rualin tui leh damdawi min lo pe nghal a, damdawi chu ka ei ve mai a, eng damdawi nge ka ei pawh ka hre chuang lo, taksa tâna hlauhawm loh a nih ka ring ve tawp ringawt.

Damdawi ka ei fel hnu chuan khumah kan mu dun ta hle hle a, thla hnih la tling chiah lo mah se thla khat leh a chanve vel chu nupa kan ni ve leh reng tawh a, hun a kal chak ka ti viau mai. Ka hnung lam aṭangin min kuah run a, keiin a bán chu ka lo chelh ran bawk a, thla a va timuang hliah hliah tak êm. A hma ang em em kan ni tawh bik lo va, kan inbe tam ve sâwt khawp mai. Keimah zâwk hian sawi tur ka dap nasa ṭhin hle a, thil hre zau viau mah se ṭawngkam a thiam tehchiam bik lo va, titi vawrh tur phei chuan ka phut buai duh lo law law a ni.

Ni a ral a, kâr a ral a, zirna ka chhunzawm avangin nuam lo ka tihna a zual ta tulh tulh mai. A bikin ka nu lakah, chaw ei lai te hian rilru khei deuh hleka ṭawng fak fak a hrat chho ṭan a, ni lo, a uar tawh lutuk zâwk maw le. U Maṭhuama tih loh chuan ka chungchang ber kher chu an sawipui peih vak ngai lo, u Rinzauva tak ngial pawh ka chungchang lam a nih chuan a ngawi daih zel. Tin, u Veni leh u Hlimi te pahnih nen kan inpawh lo sâwt em em a, inthlahrunna hlirin ka khat a, chutih rual erawh chuan ka tân u Maṭhuama a awm reng a, ani hi zawng kawng engkimah min ngaihtuah a ni ber.

Tlai khat chaw kan ei chu ka awm a nuam lo ru em em a, tlai ei rawng bawl lai aṭang tawha nuamsam chiah lo ka ni a, ka nu lah a ṭawngkam a khá ang reng si a, ka ning ru khawp mai. A chang chuan ka nuhrawn hri a kai tawh ni mai te'n ka hre ṭhin, ṭawngkam a duh tui lo sâwt lutuk chu amah hre chiang lo tu tân chuan mak ti tak ka ni. Chaw pawh ka ei ṭha mumal thei lo va, zahzelah kham ang deuhin ka tho ta tawp a, u Maṭhuama chuan min en zui reng a, ngaih ṭha deuha awm tura ka duh avangin ka nuih lui sak ta ringawt.

Sitting room-ah keimahin ka ṭhu ngawi reng a, kan nupa room-a chhoh daih chu ka duh lutuk, mahse chaw ei khamah thleng sil leh dawhkan tihfai a ngai dâwn a, chu bakah ka nu hmel nelawm loh zet ka hmu peih lo a ni. Ka awm dan chu ka hrethiam bik chiah lo, dik tak chuan chaw ka ei tam theih loh chhan pawh kan chawhmeh kha ni berin ka hria, ka siam lai te kha chuan ka ei châk viau zâwk kha a ni a, a mak ngawt mai. Naupang kham sap sap hnu chuan u Maṭhuama a kham a, ka awmna lamah a lo phei ding nghal hle a, a hmelah min ngaihtuahzia ka hmu thei, mahse mi dang laka ka inthlahrunna a zual tulh tulh thung si.

"I ṭha chiah lo ti raw? Tun lai hi i dik lo riau, khaw maw, i dam lo em ni?" tih leh ka pang deuh a rual a, chaw eina dawhkan lam ka hawi phei chu ka nu leh u Hlimin min lo en reng a, ka mit ka lá sawn rang kher mai.

"Ka ṭha alawm, min ngaihtuah suh, i va kham hma ve? Keimah vang a ni em?" a kut pawh thlaksak paha ka tih chuan

"Ka ei tui thei bik hleinem" a lo ti ve mai a, ka nui leh ta ringawt a, ani erawh a ṭhutna aṭanga tho nulhin kan nupa room lamah a chho nghal daih a, eng nge a han tih dâwn ka hre hauh lo.

Ka nu leh mi dangte chuan chaw an ei kham fel a, thleng leh hmun sila tifelfai turin ka che nghal a, ka ding thut bawk nen ka tlu ṭep a, ka lû a hai muai muai a, maimitchhing vang vangin ka kut ka hum ruh ngawt ngawt a, vanneih thlak takin ka tlu lo hlauh thung. Tuma'n min rawn ngaihven lem lo va, pawi ka ti miah lo, ka awm dan chu an rawn hmu ang tih ka hlau ru viau zâwk a ni. Ni dang ang lo takin thleng ka sil lai chuan ka awm dan a danglam leh a, chawhmeh rim leh kan thleng silna rim inpawlh chu ka hnarah a châm reng a, rimtui lo ti tak ka ni. Thleng lah sil loh ngawt chi a ni bawk si lo, tum lui viau lo ila chuan ka sil zo peih kher lo ang.

"In rawh le" kan nupa room chhunga ka luh rualin u Maṭhuama chuan a lo ti a, zawhna mitmengin ka en hâ tih a hrethiam a ni mahna, awkâ dam dap hian

"ORS a nih hi, i dam lo palh hlauh ang e" a rawn ti leh a, ORS a siamna no chu ka kutah a hmehbel zui nghal bawk.

"Ka lawm e" ti sepin ka in ri khawlh khawlh a, tui ka ti phian leh ta nghal a, ka nulat ve lai pawh khan ORS ber kher hi chu ka ngaina hran lo, ka in ngai lo tluk kha a ni a, mahse tun ṭuma mi hi chu a tui tak zet.

Khumah kan mu zâl dun ta mai mai a, a bân vei lamin min kuah a, keiin a âwm ka khan thung a, ka rilru leh taksa pawh pangngai tawh khawp mai. Ka lo muhil a ni ngei ang, ka harh deuh hlawl a, zan dar 9 leh a chanve a lo la ri lo deuh a, keimah chiahin ka lo mu tawh bawk. Khum aṭanga tho chhuakin in hnuai lamah ka chhuk a, ka tui a hal hrim hrim a, kan room-ah tui thianghlim pangngai in tur awm se chu ka chhuk thla kher lo mai thei a ni. Filter bul ka thlen rualin ka nu ṭawng ri hlak hlak thawm ka hria a, phone bia a ang mah zâwk a, mahse a ṭawng zawha u Maṭhuama aw ngei ka hre ve leh chiah chu ka tui in lai pawh ka tawp ta chat!

"Heti ang taka i buaipui reng a nih chuan a ṭha lo ang, kan chhungkaw boruak hi a chhe palh hlauh ang e" step-a chhoh ka tum lai takin ka nu aw ka hre leh a, keimah min sawi tlata hriatna ka nei.

"A kawi zawngin rilru pu ṭhin lo teh ka nu, ka nupui a ni a, ka ngaihtuah ve bawk lovin maw le" u Maṭhuama awah chuan ka thlavang a hauhzia hriat loh theih a ni lo.

"Kha, khatiang kha alawm ka hlauhthawn ruk reng chu! I ṭan tlat dâwn tih hi ka hre sa vek asin, Ruati phei chuan awmpui a hahthlak thu leh dawm a ngaih nasat thu min hrilh nghe nghe alawm, i nupui a nih angin a ze ṭha lo lai siamṭhat hi i mawhphurhna a ni" ka nu chuan a ti chang fak fak a, ka nuhrawn hming a lam rik danah a chhe zawng hlirin ka chanchin a hre dâwn tih ka hrethiam nghal vek bawk.

"A bul ber chu zirna a chhunzawm leh hi i lungawi lo a ni ti raw? Han ngaihtuah chiang teh ka nu, lungawi lohna tur a awm lo hrim hrim. Ni tin a chhuak pawh a ni hleinem, kan lakah a inthlahrung em em zâwk asin, a pasal ni mah ila ka lakah ngei pawh hian a inthlahrung tih ka hria, ka nupui hi ka pizawn sawi ang em em kha a ni lo tih hre tel bawk la ka duh" titu u Maṭhuama aw pawh chu a dam ta vak bik lo.

"I nu hi min chhang lêt zawt zawt chu a ni si a, i pa ka ngai hle mai" ka nu chuan a ti daih a, an thil sawi chu hriat zel ka duh tawh lo, ka rilru a tikal dik lo vek dâwnin ka hria.

Kan nupa room ka luh rualin khumah ka lâwnkai nghal a, rizai lá sawk sawkin ka inkhuh zui hmak bawk. Ka mit ka chhing vang vang a, ka ngaihtuahna chu a nû but but a, dik tak chuan ka nu chu ka ngei ve reng. Ka nuhrawn thu sawi tam tak awihin min ring chhe nghal em em ringawt a, a fapa u Maṭhuama thu sawi zâwk pawh a awih lo lek lek kha a ni a, ngei ru viau mah ila tunah chuan a lakah ka inthlahrung zual ta hle mai. Kawngka inhawng thawm leh inkhar thawm ka hriat rual chuan muhil ang deuhin ka awm a, a rim aṭang leh a taksa lûm dan aṭangin u Maṭhuam a ni tih ka hre nghal bawk.

(End of Chapter 12)

SYLVIA ROMAWIZUALI

By

Havali Adam

Chapter 13

Ka mit ka men leh chuan khua a lo vâr fel diam tawh a, zing dang ang bawkin ka hnung lam aṭangin min kuah run a, ka tho nuam lo ang reng khawp mai. 'Ka dam lo' ti dâwn ila ka dam tho si a, 'ka dam' ti dâwn ila ka nuamsam chuang bawk si lo va, ka dik chiah lo a ni ber e. Kan room chhung banga Sana ka en chuan zing dâr 5 leh a chanve a lo la ri lo deuh a, thawhna atân chuan a la hma viauin ka hria.

Ka mut dan chu ka thlak a, che riai riaiin u Maṭhuama lam hawi zawng chuan ka mu ta daih a, ka mut erawh a chhuak tawh vak lo. A hmel chu ka en reng a, ka rilrua lo lang hmasa ber chu a ngai te bawk, a hmelṭha chiang a ni. Ngaihtuah zui vak ngaihna ka hre lo, a naupang zawk zawk tawh lo tih chu a hmel aṭang ringawt paw'n tlâng hriat a ni a, mahse amah aia kum naupang zâwkte ai paw'n a fai daih zâwk a, a hmaifang pawh a ṭha daih zâwk a, a naute pathum hmel nen phei chuan ka tehkhin buai duh lo law law, an inhmelṭhat hleih ém mai.

A mit leh a hnar ka enna aṭangin a hmuiah ka mit a ṭuan thla a, mipa hmui tih hriat taka chhah tap te, a hnapthleng nen lam chuan a hmuhnawm ngawih ngawih a ni. Chutiang em ema hmelṭha ka tih tâk chhan chu ka hre bik chuang lo, a bula awm nuam ka ti tawlh tawlh a, a ruka ka duhna a zual tulh tulh bawk a, kawng engkima min ngaihtuah em em zel leh ta zel a, ka lawm a ni.

Chutia ka en dauh dauh lai chuan a rawn che deuh hrut a, mutchhuah hmel zet hian ka mutna lam a hawi a, hnuai lam a rawn hawi zawm nghal zat a, a mut a la chhuak ngâng a ni ang, a maimitchhing lo chauh! Ka hmel a hmuh tâkah chuan kan rizai sin lai pawtin min sin ṭhattir a, a hmel ka lo la en reng a, a meng tawh lo hrim hrim.

A âwma min kuah beh rual chuan nghet zetin ka lo kuah lêt chial a, a rim te chu ka hnim vang vang a, a rimtuiin a mipa rim bik hliah hliah thlawt a ni. A taksa lûm ham ham chuan min ur a, zawi zawiin ka mut a chhuak ṭan a, a la hma tho bawk nen muthilh leh daih chu pawi ka ti miah lo. Thawm ri sek sek chuan min tiharh a, ka taksain vawt a hriat nghal danah u Maṭhuama a tho tawh tih ka hre nghal bawk.

"I lo harh tawh maw? I mut tui em?" kamis rawng dum tak hlak, rawng vâra de ṭhek ṭhek ha mial mial pah hian a rawn ti a, ka rilruah erawh thil dang daih a lo lut thung.

"Zingkâr karah khaw'nge kal i tum a?" tiin ka zimar ṭiah ṭiah a, ka tho zui nghal chu a ni mai.

"Zingkâr a ni tawh hleinem Sylvia, office kal a hun tawh alawm" a kamis hak lai chu kekawr chhungah a bilh lut malh malh a, kei erawh a thu sawi chuan min va tiharh chiang tehreng êm.

"Enga!?" ti hluaiin dâr zat ka en vat a, dâr 9 a lo pel daih tawh a nih chu!

"Min kai tho vat ta che, engati nge min kaih thawh miah loh?" ti deuh hlak hlakin ka tho zui nghal thuai thuai a, ka chhungte lakah chuan inthlahrung tak ka ni.

"Mu ṭha la ka duh alawm" a lo ti duh lek chauh a, a ngaih ang ngawt a ni der si lo.

"Dawhkan têa kha i chaw ei tur a awm, chhuk lovin hetah ei law law mai rawh, i ei zawh hunah ka kal ang" ka chet phat ruala a rawn tih leh chuan ka ke pen a tawp chat a, a sawi ang tak takin dawhkan té ah chuan chaw leh chawhmeh a lo awm ngei e.

"A va'n nuam lo tak, tukṭhuan ei hun pel ṭhakin ka mu chu a ni si a, ka awm dan hi a mo thar zia lo ngawt mai" ṭhu ngawi reng hian ka ti sep a, ka ṭawng zawi hran lo va, a hriat phak vek ka ring.

"Nuam lo ti suh, i nawmsam loh thu ka sawi vek tawh, chaw hi ei rawh le" tiin min rawn ṭhut chilh a, min barh a tum chu ka lo dang ta zâwk a, chaw barh ngai khawpa nuamsam lo pawh ka ni hleinem le.

"Min hrethiam mai teh, tun lai chu ka dik hlawl lo, dam lo ni si lo hian ka awm a nuam em em chuang bawk si lo va, mahse min ngaihtuah phah viau kher lo la aw" ka ti sép sep ta ringawt a, a lakah leh ka chhungte lakah chuan ka inthlahrung tak tak, a nuam lo ve êm asin.

"Hun remchang a awm veleh damdaw inah kan kal dâwn nia, chaw hi han ei phawt teh le" a tih leh sup tâkah chuan ka ei ve nghal mai a, chawhmeh chu nizana ka ei hleih theih miah lo kha a ni reng si a, tunah erawh ka ei tui leh viau lawi bawk si.

"Ei ve leh la" ka tih chuan lû min thin khum a, ka ei zawh hma chu office tura kal a tum lo tak tak a ni ang, a ṭhu nghet êm mai.

"Ka zin lawk a ngai mai thei" a thu rawn sawi chuan min ṭhawng ang reng, chaw ei ṭhulh meuhin ka en deuh hâ ringawt.

"Engtikah? Khawi hmunah nge i zin dâwn a?" ka ṭawng hmahmawh lam hret a ni mahna, ner nâng hian min nuih suk a, ka awm dan chu ka siamṭha nghal thuai bawk.

"Kan Department aiawhin phaiah ka zin lawk a ngai mai thei, ni khat emaw ni hnih vel bak ka châm lo ang" a tih chuan ka lo bu nghat a, thil dang ka zawh zawm tawh lo hrim hrim.

Chaw ka ei kham thleng ka chawi tur chu amah zâwkin min lâk khalh a, a office bag akin kawngka lam pan a rual a, ka che chhuak ve nghal vat bawk. Kan nupa room-ah ka chaw ei tur min lo ken chhohsak pawh tih tawh náka laiin min ken thlaksak a tum leh zel a, chung em em chu ka tihtir tawh dâwn lo. A thil ken lai chhuhsakin a hmaah ka kal tharh tharh a, mi lo laksak leh emaw phal loh tlat ang kha a nei lem lo va, min lo zui thla ve zel chuan ka hria. Chokaa ka luh dâwn chuan a lam ka hawi phei a, min hnungchhawn zawngin pâwn lamah a chhuak nul nul a, rei pawh ka en zui lo.

"I zia deuh tawh maw? Nizan te khan i sawi mai lo va, chaw ei lai aṭang khan i dik lovin ka hre réng a ni" chokaa ka luh rual chuan u Siamin min lo be nghal a, ani hi chu mi dang nen an inang lo khawp mai.

"Ka ṭhat ve leh mai ka ring a, a zia lo tak tak a ni. Tukin phei chu in lakah ka inthlahrung zual, thawh ka hai chiang em em leh nghal" ka ti ve ta melh melh a, ka thil eina chu ka sil fai zui nghal bawk.

"A ho lutuk, inthlahrung duh reng reng suh" a ti ve tak na a, an laka ka inthlahrunna chu a reh teuh lo.

"Sylvia, inbe lawk teh ang, min lo zui rawh" rawn ti deuh tlawngtu chu ka nu a ni a, ka thleng sil lai dah hmakin a kalna lam ka kal phei ve nghal mai a, a ruk tak chuan a fâla awm dun ka huphurh a ni.

"A theih chuan zirna hi chhunzawm lo law law la a ṭha ang, kan buai dâwn tlat! Nizan khan Maṭhuama nen kan inbia a, a ṭan hlur ringawt che a, a rilru thlaksak ang che" room chhunga kan awm hnu chuan a rawn ti a, chhan dan tur ka va baihvai si êm.

"Mo ṭha lovin laina a hnawt kiang an ti ṭhin a, chutiang mi chu ni lo hram la ka duh, i nih ka ring lo bawk. Chu vangin Maṭhuama rilru hi ka thlak mai mai theih ka ring lo, kei ai chuan i thu sawi a awih zâwk ang" a ti zawm leh zat a, chu erawh dikin ka hre bik lo.

"Kei ai chuan i thu sawi a awih ka ring daih zâwk ka nu, kei te chu kan inneihna pawh a la rei hleinem" ka ti hman ṭawk!

"Chu tak reng chu alawm ka buaina pakhat, in inneihna a la rei lo tehreng nen hian a ṭan nghal hlur ringawt che a, a rilru thlak ngei ngei ang che. Tin, nangmah berin zirna chhunzawm i duh loh chuan a dik vek a ni mai, a nawr luih che ka ring lo" a rawn ti nghal hmarh hmarh a, nuam lo ti tak ka ni.

"Ka hre lo le" ka ti sep a, ka chhan dan chu a lo bengkhawn khawp mai.

"Ka thu sawi hi i zawm lo a nih chuan buaina kan la nei dâwn chiang a nia, chu bakah kan buai êm hi hre ta che maw le Sylvia, kan chhangchhe nuaih nuaih si" a ti leh hlak hlak a, ngawih tawp chu a fuh rih zâwkin ka hria.

"I thil tih lai kha va tih chhunzawm leh tawh rawh, ka sawi chiang tâwk viau chuan ka hria" a ṭawng zo chiah chu rang takin ka chhuak nghal a, tunah chuan ka hma hun êng emaw ka tih kha a thim tial tial leh ta.

U Siami nena kan titi lai pawh chuan ka rilruah ka nu thu sawi hlir a awm a, hmaichhanah ngei chiang fek fawkin zirna chhunzawm rem a tih loh thu min hrilh a, ka ngaihtuahnaa lo lang tel pakhat chu ka nuhrawn a ni. Ani khan a lo fuih pawrh khaw lo kual vel hman a ni ngei ang, ka rin dan a dik ngat phei chuan ṭawngkhum ka hreh reng reng lo. Pasal ka neih hma aṭang tawh ka tân a ṭha lo zawng hlirin an awm a, ka kawng dip buai reng rengin hun an hmang a, insual a ṭul a nih leh ka insual leh mai a ni ang chu!

Ka nuhrawnte nufa laka lungawi lo ru ṭunin hun ka hmang nilêng ta ringawt a, dik tak chuan ka nu lakah pawh ka lungawi em em bik chuang lo. Kan chhangchhia a ti a, a dik reng, mahse mo pali lai kan awm a, tihtur kan insem thiam chuan a buai loh theih lutuk, zirna ka chhunzawm zel a phal loh vang mai mai a ni. Han hnial ngawt dâwn ila ka ngam bik bawk si lo, mahse kan inbiak dan zawng zawng erawh u Maṭhuama hrilh ka tum lo bur, keimah avangin kan in chhungkhurah buaina a chhuah ka hlau daih zâwk.

Tlai a rawn ni a, u Maṭhuama leh a naute office bâng an lo haw sap sap a, chawhma lama ka hmuh tih loh chu ka nu hmel ka hmu leh tawh miah lo bawk. U Siami nen ei rawng kan bâwl dun leh a, eng eng emaw ni kan sawi a, a changin kan nui a, a chang leh kan thutak a, a bula awm a nuam khawp mai. Ei rawng kan bâwl zo pâwn lama ka tei chhuak mai mai chu ka nu leh ka nuhrawn lo ṭhu dun reng ka va hmu a, an lo titi siam siam a, ka rilru a kal dik lo nghal laklawh bawk nen ka chanchin an sawi rinna hlirin ka khat a, ka nu'n min la hmu ve lo mah se ka nuhrawn erawhin min rawn hmu ru reng ti ka hria, rei chhuak lovin in chhungah ka lut ta daih bawk.

"I zin dâwn ta em?" khuma ṭhuin u Maṭhuama chu ka en reng a, room-a ka luh tirh aṭang tawh paper a la khawih mual mual a, hnathawh tur a lo hawn a ni ngei ang.

"Ka zin ngei chu a ngaih hmel" tih bakin min chhang lo va, lungawi lohna tur awm miah lo mah se ka lungawi lo ru tlat a nih chu!

"Zing lam ai i zia deuh em?" khuma ka mut zál rualin a rawn ti sup a, chhan pawh ka chhang peih rih lo.

"Sylvia?" tlêmin a aw chu a danglam a, 'hriam hraih' han tih tur êm chu a ni hran lo va, a dam dap tawh hauh lo thung.

"I nuam lo em ni?" min be reng te chu ka hne ru ngawih ngawih a, chawhma lama ka nu min ṭawngkhum dan zawng zawng ka rilruah a rawn lut zut zut leh ta zel a, ka ṭah a chhuak ru kher mai.

"Ka biak che chuan min chhang la" chiang zeta min en chung hian a ti leh a, ka lo thaw hak a, ka mood inthlak kual nasa lutuk chu a chhan ka hrethiam lo tak zet a ni.

"Ka ṭha" ka ti sep a, a awih loh hmel hle thung.

"Chhuk ang le, zanriah ei a hun dâwn" tih leh mi pawm a rual nghal a, ṭawng tuma ka án zuau lai chuan min rawn fawp a, chu thil chu ka lo mamawh hle a ni mahna, ka mood chhia zawng zawng a thlak danglam nghal vek thei a nih chu!

In hnuai kan thleng thla chu ka nu'n min lo en chik hle a, thil kan sawi dun a ring a ni mai thei, kan sawi dun der si lo. Chaw ei chhung zawng tûma'n min be lo va, ṭawng erawh an ṭawng siam siam hlawm reng tho va, ka chaw ei a tui lo kher mai. Ṭawng lo awmchhun chu kei leh u Maṭhuama kan ni mai a, u Siami pawh zan dang ang lo takin a ṭawng tlêm hle. Chaw eina kan tihfel fai vek hnu chuan kan nupa room-ah ka chho a, kan boruakin a zir rih lo bawk nen u Maṭhuama bula awm daih chu ka châk zâwk tlat a ni. Mi dang erawh sitting room-ah an ṭhu ṭhap a, ka awm leh awm loh pakhat mah a hriat loh hrim hrim.

"I va'n buai awm ve a?" a bula din pahin ka ti sep a, min chhang dâwn lo emaw ka tih tawh hnuah

"Naktuka ka ken tur a nih hi" a lo ti ve chauh a, a thil khawih laiah chuan a rilru a pe hle a nih ka ring.

"Dâr eng zatah nge i chhuah ang?" ka ti leh a, a darah ka kut ka nghat a, hre lo ang maiin a awm thung.

"Chawhnu lamah a nih ka ring" mi a chhang tawi thei tik tek khawp mai.

"Ka lo va mu ang e, mut tui" tia ka biak leh pawh chuan min chhang tawh lo hrim hrim a, khumah lâwnin ka mu ta daih a, ka mut a chhuak ru nghal viau leh nghal.

Ka taksa che deuh dat datah chuan ka harh muai muai a, ka mut tui lai tak a nih vang nge ni, ka harh chiang lo hle. A pangtilúmin min ur rual chuan u Maṭhuama a ni tih ka hre chawpchilh nghal mai a, hneh zet hian min kuah khawm vek a, muthilh leh nghal mai ka tum chu a chet dan chuan min tiharh tial tial zâwk a, fiah lutuk lovin ka men phah ta nge nge bawk. A lam hawi zawngin ka inlet a, a kiua indo kang nghalin min en reng a, a kut pakhat zâwk chu ka biangah a vah kual tir riak riak a, ka en chhoh kal lai chuan

"I lungawi lo ti raw?" a rawn ti thum dam dap a, awlsam zet hian ka lo bu nghat a, a nui suk hmel ka hmu zawm zat bawk.

"Ka rawn thlem hman che ka ring a, mahse i lo muhil hman daih alawm le" ti hniam ruihin ka beng vun nêm lei chu a hmer ne nê a, ka lo ner khum náng thung.

"Zingah thawh ka hai leh dâwn a nih chuan min kai tho tawh ang che" ti sepin a âwmah ka bei phei zui nghal a, min lo kuah hlûn a, a taksa nghawr dat danah a nui tih ka hre thei.

"Ka kai tho phal lo mai thei che a ni" dam ruiha a tih chuan ngaih ṭha zet hian ka kuah nghet sauh a, tun lai chu eng nge a chhan pawh ka hre lo, ka thlahlel ru ngawih ngawih a ni ber.

A tuk chawhnu her tawntirh lamah u Maṭhuama chu phai lama zin turin a chhuak ta ngei a, Airport thleng thlah ka duh viau a, mahse ka nu hmel ngainatawm loh zet avangin ka thlah ta lo mai. Insuk tur awm zawng zawng ka su a, u Siamin thil dang a tifel a, u Hlimi leh u Veni leh ka nute pathum erawh an awm hrang thung a, ka chanchin an sawi ang tih ka hlau khawp mai. Tun lai phei chu ka nu nen kan boruak a ṭha lutuk bawk si lo va, chutah ka nuhrawn hnen aṭangin ka chanchin a hre nual dâwn tih hriat sa reng reng, ka ipik ru ṭûn ni maiin ka hria.

U Maṭhuama hmel hmuh tur awm lo leh tlai dang angin a rawn haw dâwn lo tih ka hriatna chuan khawhar ruk riauna min neihtir a, u Siami nen awm dun lo phei ila chu nuam lo ka tihna a zual ngawt ang ka ring. Chhun thingpui in hun pelh fê ah ka nute pathum chu an lo lut sap sap a, hnuhnawh tawh viau mah se u Siami nen chhang leh thingpui kan lo chhawpsak nghal a, an ṭawng melh melh a, u Siami chu an be zauh zauh a, kei erawh ṭawngkam khat paw'n min be miah lo thung. Dik tak chuan an bula awm ve reng chu hrehawm ka ti, kal sawn ngawt dâwn ila an inei puar zawha no sil a la ngai bawk si, an lam ka hawi duh lo law law ta ringawt.

"Sylvia, têl saw a burah va chhung rawh le, tihtur i nei em ni? Engati nge chhoh i tum?" kan nupa room pan chhohna step bul ka thleng tawh tihah ka nu chuan min lo ko ding chat a, a vin hran lo va, mahse a aw chu nelawm zawk zawk a ni miah lo.

"Nei hran lo ve, ka va ti nghal ang e" tih leh choka lam pan ka rual a, a lo reh ṭhiap a, ka mo puite chu an fate hruaiin an chhuak vek rih a nih ka ring.

"Awi!" phu zet hian ka rak deuh ṭhat a, ka nu chuan min lo en reng chu niin, chutah ka têl thun lai ka la ti baw zui.

"Kha kha kha, i va han zei lo tak! Têl to tawhzia i hre lo emaw ni le, a buak tam hma khan i ken dan kha thlak vat ta che" ti hlak hlakin a rawn kal phei a, ka thil ken lai chu a lá sawk a, ka lo ding ngawi reng ringawt thung.

"Ruati lo sawi kha a dik dâwn a nih hi, ka rin ai i che ṭawp daih mai" a ti leh chuan ka rilruah ka nuhrawn a rawn lang hmasa ber a, a hming pangngaia a koh duh danah an innêl tih leh a chhe zawng hlirin ka chanchin a hre dâwn tih hai rual a ni ta lo.

"Awm sawn la, tlaia hmeh tur zawngṭah kha lo va ziat lâwk zâwk teh, hei chu ka lo ti tawh mai ang. Mo pali lai chu ka nei ve a, tun thlengin ka chet a la ngai reng chu a ni si a, a buaithlak ṭhin mang e!" a ṭawngkam hrim hrim chu ka tâna hriat nuam loh vek a ni.

"Ziat bung miah suh, i ziah zawhah tui lumin i chiah nghal bawk dâwn a nia, i ziat thiam em?" zawngṭah ka ken lai chuan a rawn ti leh a, ṭawngkâa chhang lovin ka buk khum nghat nghat a, mahse chu chuan a thin a lo tirim daih a nih chu!

"Ṭawng thei lo pawh i ni tawp si lo va, mi chhan a harsa viau emaw ni le, Maṭhuama chu i lo sawipui tawh em?" ti salh salhin thu dangah a pakai zawm zat a, a zawhna chu chhan huphurh viau mah se ka chhan ngei a ngai si.

"Sawipui chiah lo, min hrethiam la ka nu, zirna ka chhunzawm hi phal hram la ka duh a ni. Engkim ka ti vek tho ang, in chhungkhurah ka chet loh phah miah lo ang, ka tiam a che" ngenngawl aw zet hian ka ti ve ta mawlh mawlh a, ngawih reng ringawt zawng a dik lo a ni.

"Ka rilru i hre chiang viau tawh turah ka lo ngai asin Sylvia" hriam deuh hraiha min chhan hnu chuan ṭawng zawm lovin ka ngawi zui ta hle hle.

Ṭawngkam khat pawh chhak chhuak tawh lovin zawngṭah chu ka ziat a, ani pawh a ṭawng tawh bik lo. A hnuah phei chuan choka aṭangin a chhuak ta daih a, ka hma hun khirh lutuk tur chu ka peih lo lâwk a ni. Zanriah kan ei lai te chuan u Siami tih loh min bia pakhat mah an awm lo va, u Maṭhuama zin lai a ni kher bawk nen an zinga awm chu hahthlak ka ti ru tak zet. Chaw kan ei kham a, ngawi rengin ka tihtur ka ti nghal mial mial a, u Siamin chaw ei kham thingpui tur a lúm bawk a, rei lo tê hnuah ka nuhrawn leh Chhani hmel ka hmu leh ta zel a, ka boruak tawn mêk chu nuam ka ti hlawl lo a ni.

In chung lama chho nghal tawp lovin u Siami ka pui leh a, thingpui chu ka sempui zung zung a, Chhani intithei hmel te, ka nuhrawn min hnuihsawh hmel te chu hai der a harsa khawp mai. Chokaa ka lêt tur phei chu Chhani ke avangin ka tlu ṭep nghe nghe a, ka nu leh mi dang awm lo ngat se zawng ka ṭawng chhuak chiang khawp ang. Kan nupa room-ah ka chho ta daih a, tihtur a awmin ka hre tawh lo a ni. Khumah mu zál nghalin ka mit ka chhing vang vang a, ka mitthlaah chuan u Maṭhuama hmel a lo lang hmasa ber a, zep thu cheng lo, ka ngai tak zet a ni. Phone chu ka khawih mual mual ta ringawt a, darkar eng emaw zah liam hnua u Maṭhuama Whatsapp Status lo Update tawh ka en chu ka muhil lai thlalak ngei hmang hian

'Ka ngai che' tih tê hi thu a lo ziak tel a, lawm avangin ka khi nghal ver ver a, ka ngaih ang bawka min lo ngai ve chu ka lawm a, ka mood zawng zawng a ṭha nghal vek a tih theih hial ang.

Biak ka tum deuh ut ut a, ka ṭhulh leh a, min rawn be hmasa se ka duh zâwk vang a ni pakhat. A phone call chang chuan ka meng kar a, ka ngaichang reng a, phone call a lo lut thut chu ka pick up rang ngei mai, mahse u Maṭhuama ni lovin Zaii zâwk a lo ni a, thil kan sawi dun luam a, thil danga ngaihtuahna ka sêng daih hrim hrim chu a lawmawm viau tho. Kan inbiak zawh hnu chuan tui bottle lá turin in hnuaiah ka chhuk leh a, ka nuhrawn leh Chhani pawh an lo la léng reng a, ka mo puite nen lam an hlim dar dar khawp mai. Chutih rual erawh chuan an zinga va awm ve kher ka châk hran lo va, u Maṭhuama nena inbiak ka duh daih zâwk.

Room chhunga ka luh rualin ka phone chu a lo ri ral ral a, caller ID ka en vat a, tunah chuan u Maṭhuama ngei a ni ta.

"Hello" phone pick up ruala ka ti chu thawm a reh vung vung a, ka ṭawng a hre thei lo emaw ka ti hman hial nghe nghe.

"I ṭha em Sylvia? Zanin chiah riah ka tum ang, naktuk tlai lamah ka lo haw hman ngei ka ring" a rawn ti deuh mawlh mawlh a, amah a ang lo ka ti ru ang reng.

"I la buai em?" khuma mu chungin ka be ta zâwk a, hmuh phak lovah awm rih mah se a aw ringawt pawh chuan ka thla a timuang em em thei tho.

"Buai tawh lo ve, eng nge i an? I ṭha zel em? Ka zawhna i la chhang miah lo Sylvia?" min ngaihtuah hriat taka a rawn tih chuan

"Ka ṭha alawm" ka lo ti ve mai a, ka ngaihtuahnaah ka nu min ṭawngkhum dan zawng zawng leh kan inbiak dan zawng zawng a rawn lut zut zut a, min ngaihtuah em emtu aw ka hre tawh bawk nen ka rilru chu a rawn no rang kher mai.

"Ka ngai viau che a ni" dam ruiha a tih leh chuan ka mit ka chhing vang vang a, ka ngai lutuk chu ka ṭap thei tak ngial dâwnin ka hria.

"Kei paw'n" ti thawp sepin phone chu ka dah hla thuai a, ka aw aṭang chuan ka ṭah a chhuak ru et et tih a hriatthiam lo hram ka beisei.

"Ka lo haw thuai ang Sylvia, eng nge ka lo hawn ang che? Duh i nei em?" zawi zawiin ka rilru chu a pangngai ve leh mai bawk a, mahse phat rual lovin ka ngai tak zet a ni.

"Duh ka nei hran lo, thil hawnsak ka ngai hleinem, ka nu hi lo hawn zâwk rawh, duh a nei mai thei asin" ka tih chuan

"Ka nu nen in boruak a ṭha maw? Nizan khan kan inbia a, a lo ṭawngkhum deuh che a nih paw'n i hrethiam hram dâwn nia, ka pa thihna kha a la tuar nâ ang reng a, a la pangngai chiah lo vang" a lo ti ve leh nghal a, amah hringtu a nu dik tak a ni miau a, a rawn insawifiahsak pawh chu áwm ka ti viau mai.

"Engmah buaina kan nei lo, min ngaihtuah suh u Maṭhuam, mut tui aw" tih leh kan inbiakna hmeh tawp ka rual a, nghet zetin ka mit ka chhing vang vang a, ka bula awm ang maiin ka suangtuah ta ringawt bawk.

Kawngka inchum ri dawt dawt thawm chuan min tiharh zawk a, ka hminga min ko mawlh mawlhtu chu a aw aṭangin u Rinzauva a ni tih ka hre thei nghal. Zingkâra min kaih thawh chhan erawh ka hre hauh lo, ka phone ka ban hnu chuan khum aṭanga chhuk thuaiin kawngka lam chu ka pan vat a, ka va hawnsak rual chuan mitmeng pangngai lo zet hian a rawn lut nghal a, min tihrilhhai ang reng viau a ni.

"Tunah hian i pite in a kang mêk a, kan kal nghal dâwn a nia, chutih rual chuan chiai a hun rih lo Sylvia" tih leh ka bána rawn chelh a rual a, ka phih thla vat thung.

"Eng thu maw i sawi zawh chiah kha!? Eng nge i sawi awmzia!?" hlauhthawn avanga hmui khur dar dar chungin ka lo ti thuai a, a thu sawi zawh chiah chu a tak a ni ang tih hlauhna bakin ka khat tawh lo.

"A hmun thleng phawt teh ang Sylvia, thil sawi duahna hun a ni lo, i pi leh i pute in chhung aṭangin an la hruai chhuak lo leh nghal a, kan hmanhmawh a ngai" tiin ka bânah bawk a rawn vuan leh a, min kai kal nghal thuai thuai bawk.

In hnuai kan thleng thla chu kei tih loh mi dangho zawng zawng an lo ṭhu ṭhap a, ka nu chenin an mangan hmel em em vek a, naupang erawh tûmah an tho lo thung. Ka nu chuan kal a rawt nghal a, u Hlimi leh u Veni ina awm turin a hrilh a, an awm dan hrim hrim chu ka hrethiam lo tak zet. Pâwn kan chhuah hnuah erawh u Siami hnen aṭangin kaih thawh ka harzia thu leh ka thawh hun an nghah ṭhap thu ka hre zui nghal a, ka hlauhthawnna a zual tulh tulh a, ka thin phute chu rang tak a ni. Tukverh darthlalang chu herh hniam pâwn lam ka thlir dauh dauh a, varṭian tak tak a la ni a, boruak pawh a la vawt deuh súk a, ka pi leh ka pute pahnihin ka rilru an luah khat hneh lutuk a, vawt tihna reng ka nei lo.

Ka pite vêng kan thleng a, rei lo tê hnuah an in kawt kan thleng zui nghal bawk a, mahse ka thil hmuh chuan min tiṭim uaih uaih a, ka lairil thlengin a fan nghal vawng vawng bawk. Ṭhelh mih harsa khawpa nasa hian ka pite in chu a kang hluah hluah a, ṭhelh an tum ve ṭhin tak na a, awmzia a awm lo hrim hrim. Fire Department lam ni se an lo kal mêk thu bak hriat tur a la awm rih bawk si lo, ka rilru a buai tak zet a ni. Ka pi leh ka pute pahnih chu ka ngaihtuah ngawt ngawt a, an kang hlum a nih vaih chuan ka dam zo lo mai ang, anni bak chhungte tia belh tur ka nei tawh lo leh nghal.

Darkar a liam a, khua a rawn vâr tial tial a, mipui pawh kan pung tam sâwt hle a, Fire Department lamin kang an ṭhelh mit fel tawh bawk a, mahse khawvela ka thil duh lo ber a thleng thung si. Ka ṭap tlawk tlawk a, ka pi leh ka pu ruang chu rei pawh ka hmu hman lo, an kan hlum avangin an tuam thuai a, an tuamna puan chhanah bawhin ka ṭap baw hawk hawk a, anni pahnih leh zelin mi nung ram ata min liamsan tur chu ka ngaingam lo va, ka phal ngâng lo a ni.

Ka theih tawpa ringin ka ṭe vak vak a, ka rak vak vak a, zah reng ka hre tawh lo. Min vuantu apiang chu ka chum pawp pawp a, ka ham bawrh bawrh a, tute nge an nih tih nen lam ka hre chang tawh lo a ni ber. Thawk leh khatah ka kang nawlh a, min pawmtu chu u Rinzauva a ni tih ka hria, mahse kei thinlung nâ leh keh sawm mêk tân chuan chhia leh ṭha hmanga inthunun dan zawh rual a ni.

"Min dah thla nghal rawh" ti vin tuar tuarin a samah leh a bengah ka pawt pawp pawp a, a changin ka ṭap hawm hawm a, mu leh mal reng ka hre tawh lo.

Ka harh leh meuh chuan khumah ka lo mu fel diam tawh a, ka awmna hmun chu damdawi in a ni tih ka hre nghal thuai bawk. Ka rilruah ka pi leh ka pute an rawn lang nghal a, ka mitthlaah an ruangin hmun a rawn luah zawm zat a, ka ṭap chhuak leh ta hawk hawk a, ka bul lawka ṭhu u Siami chuan min lo kuah thuai a, mahse ka ṭap bâng thei chuang lo. Ka ṭap khur ngawt ngawt a, ka âwm chu a rawn tawt up up a, ka thawk a buai vek a, ka thi mai dâwnin ka hria. Ka khaw hmuh a thim mup a, ka zawi hnuang a, ka tha zawng zawngte chu keimah aṭangin an chhuak fai ta vek bawk.

"A ṭha miah lo a nia" hlauthawng aw zet chu ka thil hriat hnuhnun ber a ni a, u Siami aw ngei niin ka hria, mahse meng tur tak ngial paw'n tha ka nei tawh si lo.

Ṭawng sep sep thawm ka hre leh a, ka meng nghal lawk lo thung. Ka harh chian hnuah chuan ka meng ta nge nge a, ka bula lo awmte chu ka nu leh u Siami an ni a, ka harh tih pawh an hre lo. Tukverh lam ka hawi ta daih a, rei lo tê ka mu emaw ka ti kha a ni a, mahse khua a lo thim fel vek tawh a, thil hriat chhuah ka nei nghal bawk. A sarhu lai ang em emin ka chiai tawh lo va, ka rilru chu nât tak tê hian a nâ ngawih ngawih thung a, ka ṭap feih feih thawmah ka bula mite pahnih chuan min ngaihven nghal thuai a, ka pite nupa ka chân leh zel chu ka nâ tak zet a ni. Kawngka inhawng thawm ka hriat rualin mittui tling pam hian ka hawi phei a, beisei loh lutukin u Maṭhuama hmel ngei ka hmu a, ka ṭah a chhuak zual sauh nghal.

"Sylvia" ti thum chhalin ka mutna khum lamah a rawn pen phei pâwk pawk a, ka ban phaka a awm rualin ka lo kuah nghal vat a, ka ṭap zui hlawp hlawp bawk.

"Min lo va chhuahsan lawk mai teh u" a ti bul deuh hmuk a, u Siami chu a ṭhutna aṭangin tho mai a, ka nu erawh a tho duh miah lo.

"Ka nu" ti nghutin u Maṭhuama chuan a en run a, kei ve thung chu a ṭângah ka lo bei hle hle ringawt.

"Chutianga han ngaihtuah khu vul chûkna tur pawh a ni hran lo, thihna hi chu a nâ êm a, tawrh thiam a har a, chu chu a tuar thiam lo mai chauh a nih kha!" a chhuah hmaa ka nu ṭawng dan chuan ka thinlung a khei em em a, min ngaihtuah emaw ka lo ti hman a, tunah chuan min ngaihtuah tak tak lo tih ka hrethiam chiah e.

"I ṭha em? Min en teh le, eng thil chiah nge thleng? Engtin nge i pute in chu a kán ringawt theih? Hlauthawng lo la, ka bulah i awm tawh alawm, hlau miah suh Sylvia" duat aw zet hian u Maṭhuama chuan min be mawlh mawlh a, ka ṭap leh ta nge nge.

"Ka lo zin kher kher hi a pawi a ni" ti ram hmukin min kuah vawng vawng a, ka thla a muan rualin ka pi leh ka pute thihna chuan keimahah nghawng a la nei nasa em em tho.

"Sawi teh le Sylvia, i hriat ang âng han sawi teh? Mut tui hun laia in kán ngawt thu a awm lo, i pite nen engtik nge in inbiak tawp ber?" a tih leh chuan lungngai zet hian khum sira ka phone chu ka ban a, ka pe zui nghal bawk.

"Nizanah Missed Call vawi 3 i dawng a nih hi" a thu sawi chu mak ti tak ka ni!

"Ka hre lo, ka hre bik lo, eng lo....tukina u Rinzauvan min kaih thawh pawh khan kaih thawh ka har thu an sawi a, ka hre lo a ni ngei ang. Âw....engati nge nizana min lo call te chuan ka lo hriat loh reng reng ni? Ka mawl lutuk, ka thiam loh vek a ni. Lo hria ila chuan engmah a thleng lo ang a, thihnain an chungah ro a rêl lo ni mai tur" ṭap aw ṭuaua ti zuah zuahin ka ṭap zui nghal a, ani erawh chuan min kuah hle hle thung.

"Eng pawh ni se ka ṭhianpa ka chhui chiantir ang a, in kán chhan hi rei rial lovin kan hre thuai bawk ang. Pawi ka tihpui lutuk che Sylvia, chutih rual erawh chuan chhel taka i awm a ngai" ka bianga mittui luang hru hul hliau hliau pah hian a ti a, nautê ṭahbelh lutuk ang maiin ka ṭah a chhuak zel tlat si a ni.

"Tha pawh ka nei tawh lo u Maṭhuam, ka nâ êm mai, ka nâ lutuk" ka tih laklawh lai chuan ka hmui a rawn hup vat a, a lu a thing zui nghal bawk.

"I neih a ngai, a chhan chu ka fa i pai mêk a ni Sylvia. I pum chhungah hian kan pahniha kan fa tur a awm mêk asin, nang leh ka fa lo piang mai tur hi ka theih tawpa ṭhain ka enkawl dâwn che u. Tun atân chuan muhil tawh rih lo turin ka duh che, kan hun tawn mêk hian a zir si lo va, i mut hlum mai ka hlau a ni" a thil sawi zawng zawng chuan min va barakhaih chiang êm.

"I ti tak tak em u Maṭhuam? Kei hi ka rai maw!? Ka pum chhungah hian nautê a awm tak tak em?" hamhaih aw zet hian ka ti thuai a, a nui suk hmelah chuan dawt a sawi lo tih ka hmu chiang hle.

"Fa duhawm tak min hrinsak dâwn avangin ka lawm e Sylvia, ka fa i pai hi ka lawm tak zet, vawi khat mah ka zinsan leh tawh lo vang che. Eng ang paw'n ṭul mah se, ka bulah i lo kal ve dâwn a nih loh chuan ka zinsan tawh lo ang che, ka fa i pai avanga ka lawm rualin i lakah ka inthiam lo hle bawk a ni" awkâ dam ril ruiha a ṭawng zo chiah chu ka ṭah nuih ta hawk.

"Min kal sawn tawh suh" ti thawp sepin ka ṭap leh ta nge nge a, min kuah vawng vawng a, tunah chuan ka nât viau lai pawha min thlamuan theitu awmchhun chu amah chiah hi a ni tih ka chiang ta hle bawk.

(End of Chapter 13)

SYLVIA ROMAWIZUALI

By

Havali Adam

Chapter 14

Minute eng emaw zah hnuah ka nu leh u Siami leh Doctor pakhat an lo lut a, Doctor chuan min check mial mial a, ka rai tih ka hre miah lo te chu a mak a ni. Ka hun hman dan ka ngaihtuah kir a, keimaha danglam awm ka hre chhuak zawm zat a, ka thla tin hunbi neih ṭhin ka awl ta daih te, ka zung ngun viau te, ka mood inthlak awlsam em em te chu eng dang vang a ni lo, ka rai vang a ni. Doctor chuan nau pai laia taksa enkawl ṭhat a pawimawhzia min hrilh malh malh a, ka rilruah erawh thil dang daih a awm thung. Ka pi leh ka pu thihna avanga ka nát tho rualin zirna ka chhunzawm theih loh mawlh ka hlau ta ber a, chu chuan ka ngaihtuah a luah khat hneh khawp mai.

Doctor chhuah fel hnua ka nu min biakna ṭhenkhat chu hriat nuam loh lam lek lek a ni hlawm a, a ṭawngkam tinrenga min ngaihtheih lohna lang zel ta chu ka hrethiam bik chiah lo, a hma kha chuan a ni em em miah lo asin le. A bul ber erawh ka nuhrawnte nufa ka puh rilru nghal tawp a, mahse a ni lo ve thei tho bawk. U Maṭhuama nena kan inneih hma aṭang tawh khan min nêl hran lo tih chu ka hria, kan inneih hnu khan tlêmin a zia deuh a, sual tak a nih ka ring lo va, ka pa dam lai kha a ni nghe nghe a, tunah erawh khang hun laia a zia zawng zawng kha chu a bo fai vek tawh a ni.

U Maṭhuaman a khap leh deuh ṭhin zawk a, chuti ni lo phei se chuan mi lainatna reng a nei lo. A lam pawh ka hawi rei peih tak tak lo, nêm fahran lova min biakna chu ka chhang tawi tak tak a, a aw aṭang leh a ṭawng dan hrim hrimah chuan mi biak reng a peih bik lo tih a hriat ngawih ngawih a ni. U Siami erawhin ngaihtuah tak tê hian min ngaihtuah ve a, nau ka pai chu min lawmpui em em bawk a, ka nu min biakna leh ani min biakna chu inang lo tak a ni. Chhan lêt pawh a nuam a, ṭawngkam dawnsawn nuam tak min fah zel bawk si a, ka nu ai thlawt chuan ka chhan dan pawh a pangngai daih zâwk.

Damdawi in aṭanga kan chhuah hnu chuan in lamah kan haw tlang nghal a, engmah hre lova ka awm laiin ka pite nupa an lo vui fel vek tawh bawk si a, chu chuan ka rilru a tilungpuam a, ka ṭap pur reng a, ka ṭap bâng hlei thei lo a ni ber. U Maṭhuama ngaihtuahna leh ngaihvenna awkâ dam tak dawng reng mah ila ka pite nupa thihna avanga ka nâtna erawh a bo thei chuang lo va, anni leh zelin min liamsan chu ka la ring phal thlawt lo a ni. Ka ṭah nasat lutuk avangin ka chau vek a, ka zawi vek a, u Maṭhuama chuan mi tiharh hram hram a tum tih ka hria, a chhan pawh ka mut hlum a hlau a, kei lahin chutiang lam reng ka ngaihtuah ve tawh bawk si lo.

Rilru nâtna nen nilêng hun chu ka hmang ral ṭhak a, chaw ei châkna pakhat mah ka nei lo va, ka nu mitmeng tur ru zet hmuh reng te chu ka kham ngawih ngawih a ni. Office chawlin u Maṭhuaman min awm nilêng hial a, inthlahrung ru viau mah ila engmah ka sawi peih rih lo, tunah tak phei chuan a bulah bak awm duhna ka nei lo, ani tih loh thil dang engkim chu ka hne vek a ni ber e. Chaw a barh ngai khawpin ka damsam lo va, kan nupa room-ah min awmpui chawt a, chutiang chuan ni hnih lai min buaipui ta hial a, ka rilru leh taksa a zia phah viau thung.

"Vawiinah ka ṭhianpa a lo kal dâwn a, i rilru dik tak i lo hrilh dâwn a nia" chaw min barh paha a tih sup chuan ka lo en kal a, min duat ta lutuk chu kan inneih dan leh hun kal tawh ngaihtuah chuan a mak lam hret a ni.

"Tu i ṭhianpa maw?" ka lo ti thâm chhal a, ka ṭah nasat lutuk avang khan ka aw a chháng vek a, hritlangin min tlâkbuak zui nghal leh ta zel a, ka aw aṭang chuan kiam lam an la pan lo tih a hriat hle bawk.

"Police Officer a ni a, tunah hian Investigation a nei mêk a, zawhna a zawh theih awmchhun chu nang leh ka pizawnte nufa an ni a, mahse nangmah zâwt hmasa zâwk turin ka hrilh a, chawhnu lamah a lo kal ka ring" a thu sawi zawng zawng chu ka bengah a fiah em em vek a, a them paw'n awih lohna ka nei lo hrim hrim.

Chaw chu min barh zawm leh ta mial mial a, a chet danah chuan min duat tih a hriat ngawih ngawih a, ka rilru a tihahdam sawng sawng a, a hlimchhawna ka nât ang em emin ka nâ tawh lo bawk. Chaw ka ei puar hnu chuan engkim a tifel leh vek a, chet ka tum paw'n a phal ṭhak lo. Ei rawng bawl a phal lo va, taksa hah zawnga chet hlek pawh a phal lo hrim hrim a, chu chuan inthlahrunna min neihtir thung. Room-a kan awm dun laiin phone call a dawng a, rei lo tê hnuah amah aia tê hret tur awm vel mipa pian chhe lem lo tak hi kan nupa room-ah a rawn lut a, a chet danah chuan lo kal ṭhang tak a ang khawp mai.

"Tun hnaiah i pite nen hian inhuatna emaw inhmuh thiam lohna innei em?" tia zawhna min zâwt ṭan chu u Maṭhuama zâwkin

"Ṭhiana, ka sawi lâwk vek kha maw le" a lo ti ram deuh hmuk a, a aw aṭang chuan a lungawi chiah lo tih a hriat hle.

"Ka hria alawm, mahse i nupui a nih avanga ka zawh loh ringawtna chhan tur a awm hleinem; ka ringhlel tihna ni lovin" a ṭhianpa chhan dan chu ka pawmpui khawp mai, a duh duh min zâwt rawh se, kei paw'n zep nei hauh lovin ka chhang ngei ang.

"A pawi lo u Maṭhuam, ka pite nen hian inhalna emaw inhuatna kan nei ngai lo hrim hrim a, kan inngaihtuah tawn em em zâwk a ni" ṭawng tuma ka pasal âng zuau tawh chu bengdai vatin zawhna ka chhang zawm zat a, ka nui lui sak bawk.

"A nih chuan mi dang han huat deuh emaw han hmelmak deuh an nei em?" a rawn ti leh nghal a, u Maṭhuama erawh lo inrawlh buai tawh lovin a ngawi ta reng.

"Chutiang an awm áwm pawh ka hre lo, mahse ka nuhrawnte nufa nen hian an inpawh vak lo va, tun hnaiah hian inhmuh thiam lohna an neih ka hre miah lo thung" ka ti sêp sep a, thil dang chi hrang hrang min zawh belh ṭeuh a, dik takin ka chhang vek a, chhui chhuah a harsat hmel rih khawp mai.

"Eng pawh ni se, i nuhrawnte nufa pawh chu zawhna eng eng emaw ka zâwt dâwn tho va, in pa sawi dan takah mut tui hun laia in kán ngawt thu a awm chiah lovin ka hria. I pi leh pute mizia ni se in pa hi chuan a sawi pangngai viau a, i sawi dan nena inna mual mual pawh a tam khawp. Theih tawp ka'n chhuah phawt ang a, chutih rual erawh chuan thil chhui hautak ang reng tak a ni a, beseina lo nei sang viau rih lo ang che u" a tih chuan ka bu nghat a, u Maṭhuama nen rei lo tê an titi hnuah a haw zui nghal bawk.

Tlai a rawn ni a, in hnuaiah ka chhuk thla a, u Maṭhuama erawh thil leiin a chhuak lawk thung. A chhuah dâwn khan lo che miah lo tur leh ei rawng bâwl miah lo tur khan min hrilh lâwk vek a, mahse ka che lui ta tho. U Siami ei rawng bâwl melh melh chu ka pui a, ka lang thut bawk nen a la phu em em zui. Ka nu leh mi dang awmna ka zâwt a, a ṭhenin insuk pho an seng thu te, a ṭhen ṭhenawma an lén thu te a lo sawi ve mai bawk a, ka nawm leh nawm loh min zâwt zui nghal a, ani hi chuan min ngaihtuah ve tak tak a ni. Chutia ei rawng bâwl paha kan titi melh melh lai chuan u Maṭhuama a lo haw a, chokaa ka hmel a hmu chu a meng rum ál nghal a, a mitmeng aṭang chuan a lungawi lo tih hai rual a ni lo.

"Siami, ka sawi lâwk lo em ni?" khauh hmuk hian u Siami zâwk a hau nghal ringawt a, u Siami chu a inthlahrun hmel tak zet.

"A ho lutuk u Maṭhuam, ka ṭha tawh alawm, che thei lo pawh ka ni hleinem, khatiang khan ṭawng ringawt suh" ka lo ti thuai a, ka bâna kaih a rawn tum chu ka lo duh lo tlat bawk.

"Ka che thei ka tih kha maw le, min ngaihtuah avangin ka lawm lutuk, mahse ka ṭha tawh a, ka pangngai tawh a, ei rawng pawh ka bâwl thei vek tawh, mahni chauhin ka bâwl dâwn pawh ni hlei lo" ka ti leh ta salh salh a, ka aw chu ka thunun hman lo chiang khawp.

"Han inbual fai zâwk rawh" a din ngawih reng hnua ka tih chuan a mitmeng a danglam nghal zawk a, naupangchhia zet hian a inhnim dûk duk a nih chu!

"I bál ka tihna a ni lo, han inbual fai la, han mu hahdam zâwk rawh, min ngaihtuah suh, ka ṭha tak tak" ka ti leh ta nge nge a, a awm dan vel chuan ka nuih a tiza ang reng.

"A nih chuan khá" tih leh a thil khai lai chu mi pek a rual nghal a, ka lo lá ve mai a, min en run a, keiin ka lo nuih sen sen thung a, a lungawi chiah lo hmel pawh chu ṭha hliah hliah tak a ni.

"Awi, sawi leh tawh chuang lo la Sylvia, a lawmawm reuhzia kha! Khatiang khan a awm ṭhin tih ka vawi khat hriatna, ka nuih a va'n tiza reuh tak" in chunga a chhoh hnu chuan nui hak hak pah hian u Siamin a rawn ti hliai a, ka lo nuihpui sak ringawt.

"U Hlimi leh u Veni te paw'n hmu se mak an ti ve tho ang, khatiang hmel lawmawm zet kha a pu ngai reng reng lo, a mitak hmel lutuk zâwk ṭhin" a rawn ti leh a, a hmelah chuan a nuih a la za tih a hriat hle.

"A bulah ka sawi chhin dâwn" uang ru taka ka tih chuan

"A ṭul kher lo aw Sylvia, ka ti tak tak alawm, he ina ka mo tirh phei kha chuan a ṭihin ka ṭih ṭhin, nang paw'n i hria ang chu maw le, biak hmasak ngai zel ang chi hi a ni run bawk si, a ngawi ngul zel bawk si, nêl lo thei tak ka ni, mahse a sual chuang miah lo" a rawn ti mawlh mawlh a, a sawi ṭhenkhat chu a dik viauin ka hria.

Zanriah ei lai chuan u Veni leh u Hlimin min be ve teh mial a, tun hnai hian kan inbe khât em em a, ka nu erawh a la ngai reng. Mi dang zawng zawngin min be vek a, ka lakah chuan hawihhawm an chhuah tih ka hria, a bikin u Maṭhuama naute chuan min be tam phian a, ani pui roh hian a lo hrilh a ni zâwk mai thei a ni. Ka nu chu a kham hmasa ber a, mak ka ti ang reng. Ni dangah te chuan a kham hnuhnung ber pâwl a nih loh leh a kham hmasa ber a ni ngai lo hrim hrim, ka mitmei ru ran a, ka laka a lungawi lohna a lantir mawlh mawlh ta mai chu ka tân pawh áwm a nuam thei tak tak tawh lo a ni.

Hunin nî a liampui zel a, ka pi leh ka pu thih aṭanga kâr khat a ral chiah chu ka beisei loh deuhin thil a thleng leh ta. Ka nuhrawn leh Chhanin min rawn kal chilh a, mi dang awm ṭhep ṭhup lai chuan ngaihdam min dil lawm lawm ringawt a nih chu! An ṭap pur bawk a, u Maṭhuama ṭhianpa'n zawhna chi hrang hrang a lo va zâwt tawh chu niin, ka pite thihnaah ringhlel angin min chhuah ta ringawt a, ka nu mawlh chuan min melh no lo a ni. Ka nu chuan ka nuhrawn zâwk chu ka hmaa a ṭhingṭhitna aṭangin a kai tho va, u Venin Chhani a kai tho bawk a, engkim chu ka thiam loh angin a lang ta vek mai.

"Sylvia-i hi a rilru a chiang tawh lo a nih ber hi a, tu nge mahni nute puhchhe duh ngai an awm pawh ka hre lo. Chu bakah a chet lah hian rilru buai thut ang maiin a awm ṭhin a, Psychiatrist lampang râwn la a ṭhat ka ring Maṭhuam" khá fak hian ka nu chuan a ti ta hial a, ka mittui chu a tling rang teh e!

"Ṭawngkam hmang fimkhur teh ka nu, mi dang awm lai leh nghal" tia u Maṭhuama khapna pawh chu engah mah a ngai duh awzâwng lo.

Thil chi hrang hrang a sawi kual duah a, nu áncheh tak a ni tih ka hre ve chiah bawk. Ka nuhrawn leh Chhani ni se an ṭap der thiam si, khawvela lemchan thiam ber ang mai hian an awm a, ka mit ngeiin hmu lo ngat ila zawng an awm dan chu ka awih lo hial ang ka ring. Ka nu bula ṭhu chungin ka nuhrawn chuan ngaihdam min rawn dil leh ṭhin a, engmah thiam lohna an neih loh thute a sawi zuah zuah a, enga mah hmaa a insawi thiam zut zut chu rinhlelhna min neihtir ta zâwk a ni. Police lam aṭangin zawhna tlêm azawng an dawng dek dek a, an hlauthawng nghal viau leh lem an rawn chang nghal mawlh mawlh chu ka rinhlelhna chhan pakhat a ni.

Rei pawh awm lovin kan nupa room-ah ka chho ta daih a, u Maṭhuaman min lo zui nghal a, dik tak chuan ka nu án hla kha ka hre rei peih thlawt lo a ni. Ka ṭah pawh a chhuak chuang lo, ka rilru a nâ em em zâwk a, u Maṭhuama bulah chuan ka rilrua awm zawng zawng ka hrilh fai vek duh rih lo thung. Rin thu maiin ka ringhlel deuh ringawt a, keimah leh keimah ka inbât hnawk palh ang tih a hlauhawm zâwk a ni. Mi dang phei chu hrilh ka tum lo nasa mai, an hmuha ṭah leh buaipui ngai renga awm pawh ka tum tawh lo bur. U Maṭhuama min duatna leh ngaihsakna erawh a zual tulh tulh thunga a, tunah chuan pasalah ka nei lo vang tih ka hlau hnuhnawh ta ber bawk.

Ka nau paiin thla 4 hmel a hmuh meuh chuan ka taksa lan dan a danglam sâwt hle a, ka rai tih a hriat chho ṭan viau a, kan in chhungkhur boruak ve thung chu a chhe tulh tulh thung. Vawi khat phei chu ka kawr ni miah lo hi kan wardrobe chhung Hanger-ah a lo inkhai ringawt a, u Maṭhuama office bán hma a ni a, ka nu'n min han ankhum tak tak mai chu rapthlak ka ti ngawih ngawih. Chu kawr lah chu u Siami kawr ngei a la ni zui a, u Veni leh u Hlimi paw'n min zilh hlak hlak a, u Siami ber erawh mak tih hmel deuhin a ngawi reng thung.

Chu thil chu ka nu'n zanriah ei laiin a sawi chhuak nghe nghe a, u Maṭhuama ngaihdan a ni lo nasa ngâng mai. Chaw ei lai leh lai lo pawh sawi lovin u Siami chu zawhna a zâwt nghal a, u Siami lah chuan sawi ngaihna a hre bik bawk si lo. Thil awm dan ka hrethiam ṭan a, engkim chu ka nu leh ka mo puite pahnih ruahmanna bak a nih ka ring ta lo. Ka nu ṭawngkam chu a mawihnai lo tawlh tawlh a, a ṭawng duhthaw sâwt em em a, u Maṭhuama a zilh lêt hrep ta zâwk a, buaina chhuahna bul chu keimah bawk a ni leh ta.

Inhaua kut inthlak chiam ni si lo hian ka nute nena kan boruak chu a ṭang mar ṭha em em a, biak huphurhawm leh chet sual huphurhawm khawpin ka lakah a awm ni tin ta ziah a, a ngai tê bawkin u Maṭhuama erawh engmah ka hrilh duh chuang lo thung. Ka hrilh a nih vaih chuan kan chhungkuaah buaina a punlun dâwn tih ka chiang a, in dan chungchang pawh vawi hnih chu min sawipui tawh nghe nghe a, mahse keimah zâwkin ka duh lo tlat a ni. A chhan chu kum khat êm pawh ka la mo tling lo va, mi min sawi dan tur ka dâwn a ni ber.

Nauté kan neih hnuah te chuan ka nu chu a pangngai ve mai rinna ka nei nghet em em a, mahse tunah rih chuan ka neih a la hun bawk si lo, a tawrhhlelhawm sâwt tak zet a ni. Ka mo puite pawh an bang chuang lo, ka awl bik an hlau ni awm hrim hian chetna tur an sawi ta reng a, dik tak chuan ka rai tih an hre chang tawh lo a ni mah zâwk. A bikin u Hlimi leh u Veni chu an khirh sâwt em em a, eng pawh ti ila ka nu ang chiahin sawiselna lai tur leh mi zilhna tur an hre thei em em a, ka tân pawh chet a nuam lo ngawih ngawih. Ka pum ni se a puar lian ṭan tawh leh nghal a, vawi eng zat chiah nge u Maṭhuama kâ aṭangin che tawh lo tura min duhna chhuak tawh ang pawh ka hre sêng lo, mahse ka chet loh chuan keimah bawkin ka tuar zel tho si a ni.

Zan khat chu kan inchhâng buai leh deuh hlek a, ni lo, chutiangin ka ṭawng thui hman lo, insawifiah pawh ka insawifiah hman lo zâwk hial ang. Ka thlavang hauha min ṭantu awmchhun chu u Maṭhuama a ni leh mai a, thaw lâk dan thiam a har ṭalh ṭalh thei hle a ni. Nau pai lai ka ni bawk nen ka mood fuh loh a zual a, ṭawngkhum hrep ka châk ve ṭhin, mahse ṭawng pawh ka ṭawng hman lo. Ka nu chu a âng hlawk hlawk a, hrawn hrehawm tak zawng a ni chiang a ni. Chutah Chhani leh ka nuhrawn an rawn la lêng zui, kan boruak hip lai ṭha lo tak chu an tichhe zual tak zet.

"Nula thianghlim emaw tih laiin mipat hmeichhiatna kawngah fihlim lo a lo ni leh zel a, a tir aṭang tawh khan ka hlauthawng ru hrim hrim a, ka hlauhthawn ang ngeiin kan chhungkaw boruak thianghlim tak ṭhin kha a bawlhhlawh ta vek chu a nih hi!" thingpui no chawi paha ka nu thu sawi avang chuan ka sa chhuak vekin ka hria.

"Keimah min sawina a ni em ka nu?" ka aw chu ring hran lo mah se a khauh deuh fak thung.

"I lo hrethiam leh pek na nge, kan buaithlak ṭhin a ni e" tiin ka nu chu a nui hul hak a, a nuih a za thlawt lo.

"Sylvia-i i ṭawngkhum dan hi i ti mah mah a ni ka nu, hetiang reng a nih chuan kan in dang thuai ang" u Maṭhuama aw pawh tunah chuan a ram ve leh ta hmuk mai.

"I nupui hian a hruai khaw lo zo tawh che tih i hrethiam mang si lo, min chhang lêt lo mai teh" a tih zawh rual chuan

"Khawi aṭanga i hriat nge? Khawi aṭangin nge mipat hmeichhiatna kawnga ka fihlim loh thu chu i hriat ka nu? Tu nge sawi?" ka lo ti mawlh mawlh a, a mitah ka en kar bawk.

"A sawitu hriat kher a ngai hleinem, ka sawi mai mai a nih kha!" ka nu hmel pha deuh dui chuan ka rilru a tibuai zual sauh thung.

"Sawi teh ka nu, ka hre duh alawm, tu nge thianghlim lovin pasal ka nei lo ti reng reng?" ka ti vin tuarh a, ka insum theihna a puak keh tawh a ni ber.

"Awi awi awi, a zah lohzia hi! A pasal nu min vin ngam chu a nia, i lo va rapthlak ngai êm, a sawitu i hre duh maw? Tu dang ni lovin college i kal ve laia nangmah hre chiang em emtu i unaunu hi maw le, vawi khat mah min vin tawh reng reng suh, a chiang em?" min chhan lêtna chu engah mah ka ngai tawh lo.

"LALCHHANHIM!" ti vin leh tuarhin Chhani ṭhutna lamah ka pen phei nghal pawk pawk a, a bul ka thlen rual chuan ka theih tawpa nâin ka kek nghal buan buan a, nau pai lai ka ni tih chu ngaihtuahnaa dah har tak a ni.

"Awi, a rapthlakzia hi! Ṭhelh vat ta che u!" rawn titu chu ka nu ni lovin ka nuhrawn zâwk a ni a, thlah erawh ka tum lo nasa.

"Duh tâwk rawh le Sylvia, a tâwk tawh" dam dapa min betu chu u Maṭhuama a ni tih ka hria, Chhani ka keh sawk sawk lai chuan ka bánah a rawn man a, hneh zetin min pawt sawn nghal thuai bawk.

"Hre rawh ka nu, heti taka ka nupui i ngaithei lo hi ka lungawi lo hle a ni. I awm danah hi chuan chhuak turin min duh ni maiin ka hria, naktukah kan chhuak nghal bawk ang" ka thlavang hauha a ṭawng khawk rum rum leh chiah chu ka mittui a hnai zual sauh nghal.

"Khatiang khan min ṭawngkhum hlek suh VANLALṬHUAM! Ka hnutê tui ringa ṭhang lian, ka chawm seilen i nih kha! Zah lo takin min be reng reng suh, a puitling tur bera rin hi i puitling lo ber a, nupui i neih hnua i danglam sâwtzia te, mi zahna i tlakchham sâwtzia te hi i hria em? I pa pawh kha la dam se chuan i awm dan avang hian a lungawi bik hauh lo vang, ka chiang a ni" tiin ka nu chu a ṭawng hlawk hlawk a, a thinrim hmel nasa zet chuan min tiṭim uaih uaih thei hial.

"A dik, ka pa kha la dam se zawng hetiang em em hi i ni bik lo vang" u Maṭhuama ṭawng zawh rualin ka nu chu kan dinna lamah a lo kal phei a, u Maṭhuama hmai tak a bêng ri ta sawk mai, ka va han phu tehreng êm, chutianga a rawn chet chu ka ring hlawl lo.

"Insum teh ka nu" u Rinzauvan a lo tih pawh chuan a thinrim zual sauh emaw tih tur a ni.

"In chhuak duh a nih te chuan chhuak mawlh rawh u, zanin la lâ la hian chhuak nghal rawh u, zak lo nupa dun lutuk mai" ka nu ṭawngkam phuh chhuah chuan ka lai a chhun nâ ngawih ngawih.

"A ṭha e, engtikah mah kan lo lêt leh tawh lo vang" ram hmuka ti nghet charhin u Maṭhuama chuan min kai sawn nghal a, step kan thleng chu zo zet hian min pawm a, engmah ka sawi ngam tawh lo, a thinrim insehruh hmel chu hmuhnawn ka duh lo chiang khawp mai.

"A pawimawh zualpui chin lá la a tâwk" room chhunga kan luh rualin a ti sup a, a hmelah thinrim tih hriat em em mah se dam dapa min be thei chu ka hrethiam lo lek lek zâwk a ni.

"U Maṭhuam" ka ti sep a, keimah avanga buaina a tâwk ve zel chu ka khawngaih tak zet.

"Muangchan a hun lo a nia Sylvia" ti dam ruih hian min rawn en a, a hmel chuan lung a va'n tizim zual tehreng êm.

"Hawh, chhuk ang, ngaihdam zu dil ang. Ni lo, nang chu a ngai lo, keimah zâwkin ka zu dil ang nge" ti thuai thuaia kal ka tum chu min pawt ding chat a, ka bán bul a nâ zawk nghe nghe.

"Chutiang tih a ṭul lo" a tih chuan insum hma lovin ka ṭap chhuak hawk a, awkâ dam taka min biakna chuan ka ṭah zu han tichhuak tlata maw le.

"I ṭap hmel hi min hmuh tawh lo hram teh Sylvia" ti hniam supin ka biang tawn tawn chu a khuap a, ka mittui luang ngiai ngiai pawh a hru hul mawlh mawlh a, insum ru zetin ka ṭap báng ve thei hram.

Ka kut a chelh hnu chuan room aṭangin min chhuahpui a, in hnuai kan thleng thla chu min lo en ṭhap a, ka nu phei chuan sakei mitmeng tluk zetin min lo melh ran a, en pawh ka en rei duh lo. Kan chhuak nghal mai dâwn emaw ka ti a, an ṭhut ṭhapna lamah min kai phei a, eng thil chiah nge kan tih dâwn ka hre hauh lo.

"Engkim hriat chhuah a nih hunah chuan ngaihdam indilin awmzia a nei tawh lo vang, in hria maw nu Ruat?" a thu sawi teh daih chu mak ti tak ka ni, ka nuhrawn a koh dan mawlh chu a mak, a hma zawnga 'ka pi' ti hram hram ṭhin kha a ni a, tunah erawh a hming ngeiin a ko a, u Maṭhuama awm dan leh ṭawng dan chuan min ṭhawng tak zet!

"Maw?" ka nu hrawn paw'n hamhaih aw tak hian a lo ti hû réng a, mahse a hmel aṭangin eng emaw thil dik lo a awm tih ka hre nghal thung.

"Nang pawh ka nu, i ṭhian kawm aṭangin nâtna hri ṭha lo i kai tih i inhriat chhuah hunah chuan i inchhir ngei awm si a, mahse i tlai tawh ang, kan lo lêt tawh dawn lo" ka nu lam hawiin u Maṭhuama chuan a ti nghet leh charh a, u Rinzauva zâwkin

"Chhuah kher a ṭul lo u Maṭhuam, han chho rawh u, a reng reng thu ah ka nu pawh i ṭawng nasa mah mah a ni" a rawn ti thuai a, u Maṭhuama rilru erawh a insawhsawn lo nasa mai.

"Ka dang dâwn tho che u a nia, chhuah luih tum suh u" kan kal tur chu u Rinzauva bawkin a lo ti leh a, a u darah chuan a chelh ran bawk.

"Kut thlak che ka duh lo Rinzau, i kut hi lá sawn rawh le" thum chhah hniam ruiha a tih pawh chuan

"Min thlak dâwn lo tih ka hria alawm" a lo la ti ṭalh a, thawk leh khatah ka petek sawn deuh dâwr a, ka tlu lo chauh a ni.

"VANLALṬHUAM!" ka nu chuan a ti vin hlar a, chhuata let ruah ka hmuh rualin u Maṭhuama lam ka hawi thuai a, ka kut a rawn chelh nghal chu a ni mai.

"I va han sual rapthlak tak êm, mahni unaute ngei pawh kut i thlak duh chu a ni si a, chhuak mawlh teh u" awkâ vin hraka ti lawng lawngtu chu ka nu a ni a, pâwn lamah chhuakin a ṭawng ri chu kan hre zuih ral tial tial bawk.

Motor-a kan chuan dun chhung zawng chuan kan inbe miah lo va, ka pum puar ve ṭan tawh tak chu dawmin ka mit ka chhing vang vang a, kan thil tawn mêk chuan min tichau tak zet a ni. Kan tlan zel a, ka meng leh zauh ṭhin a, khawi vêng lam nge kan pan pawh ka hre lo, zan chu ni lo se chuan ka hre mai thei a ni. Kan ding dat a, kan dinna hmun chu khawi lai nge tih hriat tum takin ka en nghal a, Zaii te in a ni thanin ka hria, ka en chiang a, a ni ngei e. Chhuk tharhin ka ṭhutna lam motor kawngka chu min hawnsak a, ka kut a chelh zawm zat a, min kai chhuak nghal bawk. Kan la inbe lo tluang zel a, biak hun a ni rih lovin ka hria, kei tak pawh min be rih lo mah se pawi ka ti miah lo.

Zaii leh a chhungte'n kan nupa hmel min hmuh chuan léng tur emaw min lo ti a, u Maṭhuaman in luah tur kan hmuh hma chu an ina kan awm rih dâwn thu a sawi tlang nghal hmiah a, mak an ti hlawm teh e! Inthlahrung ru zet hian ka nui tawi tak a, Zaii chuan ka kutah kaiin min hruai hrang thuai a, a hmelah zawhna ka hmu hnem ngâng mai. Beisei ang ngeiin mi dang hmuh phak lova kan awm chiah chu zawhna min zâwt nghal mawlh mawlh a, in aṭanga kan chhuah chhan te, in luah tur kan zawn chhan te, mahse enga mah chu ka chhang ṭha duh lo. Chu bakah ka tâna sawi mawi lo tam tak a awm a, ka rilru ka tipaukhauh lui ngar ngar ta zâwk a ni.

Rei lo tê hnuah u Maṭhuama nu leh Zaii nu leh pate an inbe nghal a, phone kaltlang paw'n ka nu chu a la rawn âng nasa hlawk hlawk khawp mai. U Maṭhuama erawh a ngawi ngul a, an biakna pawh a chhang mang lo, a rilru a nát hmel hle bawk. Keimah avanga a tuar ve zel chu pawi ka ti a, tunah phei chuan amah hringtunu'n in aṭangin a hnawt chhuak titih tawh a ni der a, engkim chu ka thiam loh tih ka hre chiang em em bawk. Tû mit hmuhah mah ṭah ringawt ka tum tawh lo va, u Maṭhuama hmuhah tak ngial pawh ṭah ka tum tawh lo. Ka ṭap a nih chuan min ngaihtuah leh ang a, lungngaihna chhum chhah takin a zín hnan laia lungngaihna tur dang lo siam belhsak chu ka tum lo bur.

Zaii chuan kan nupa tân a room min kian a, fa mal a ni hrim hrim a, a nu leh pate bulah a riak daih a, an in chhung a zau ṭha tho bawk nen chhuata mut pawh pawi ka ti miah lo, mahse u Maṭhuama zâwkin a pha lo nasa mai. Kan pahnih chauha kan awm laiin ka sawipui dek dek a, sawi zawm chî a ni lo tih a hmel aṭangin ka hriat chian phah hle. Zaii khum chu kan nupa anga zau a nih loh avangin kan leng vel chiah chiah a, u Maṭhuama phei chu a mut nawm ka ring hlawl lo. A saisir zawng hian a mu a, a zangthal zawnga a mu a nih chuan kan leng lo a ni deuh thaw nghal mai.

Kâwl a rawn êng a, ka harh ruala a harh danah a mu ṭha bik lo tih ka hre thei. Ni lo, a hmelah chuan a muhil miah lo tih ka hmu zâwk a ni. A hmel, a awm dan leh a chet danah a rilru buaizia chu thup a tum tih ka hria, mahse a mitmeng erawh chuan dâwt a sawi si lo. A hmai chu ka chúl riak riak a, ka zût a ni mah zâwk ang chu! Min en reng a, kei paw'n ka en reng a, kan inbe miah lo thung. Ka ṭah a chhuak ru tet tet a, keimah avangin ka hringnun vanduaina chu ka pasal; u Maṭhuama hringnunah a kangkai mêk chu a ni si a, pian nawn leh theih ni se zawng piang nawn thlangin chutiang taka vanduai tur chuan ka piang nawn tawh bik hauh lo ang.

"Nizana ka nu thu sawi zawng zawng kha i hriatna aṭangin paih bo ang che" ṭial ruih hian a ti dam dap a, thophang aw ang maia a ṭawng ringawt pawh tunah chuan hriat nuam ka ti tawh tak zet.

"Engtin nge kan awm zel dâwn? Kei chu lêt leha ngaihdam dil mai ṭha ka ti, buaina neih ai chuan a thlanawm zâwk bawk" tiin ka rilru dik tak chu ka sawi sêp sep a, ka mitthlaah ka nu leh ka mo puite an lo lang nghal zut zut bawk.

"Kan lêt tawh dâwn hleinem, in luah tur ka zawng hmu har lo vang, min ring tawp rawh" ka kut fawp vang vanga a tih chuan

"Ka ring che alawm, mahse keimah avanga buaina i tâwk ve zel hi hrehawm ka ti a ni" ka lo ti zuih raih a, ka ṭah mai loh nân ka hmui ka pet fan fân a, ka mood danglam chak lutuk chu ka rai vangah ka puh ta ringawt.

"Nupa kan ni tih theihnghilh suh Sylvia, i awm dan aṭang te, zawhna ka zawh apiang chea min chhan dan aṭang te hian ka nu nen in inkar a ṭha lo tih ka hre thei, ka laka in awm dan i sawi ṭhat duh loh chhan hi eng nge? Zirna i chawlhsan chhan thleng khan min hrilh rawh, Siami kâ aṭangin ka hre vek tawh" a rawn ti mai chu ka meng phawk teh e!

"I hre vek tawh maw!?" ka ti hluai a, min chhang lo hrim hrim a, ngawi rengin min en run thung.

"Eng lo, nia....iiihhh....dik tak chuan zir zawm zel chu ka duh ngei a, mahse....â.....sawiin awmzia a nei tawh chuang lo, ka sawi leh lo mai ang" tia ka riat nawk nawk lai chuan ngaihtheih loh hmel zet hian

"I kâ aṭang ngei thu dik ka hre duh si alawm, engkim min hrilh vek rawh Sylvia" a lo ti nghut a, awkâ vinin min bia pawh a ni hran lo.

"Ka chawlhsan chhan chu ka nu'n a phal lo miau a, in chhungkhura chet ka ṭhulh phah dâwn loh thu ka sawi chung paw'n a phal chuang lo. Ka hrilh duh loh chhan che erawh buaina a awm ka hlau a, mahse hei, buaina chu a chhuak tho a nih hi!" tih leh a mit ka enna ata hawi sawn ka rual a, min khawngaihna mitmeng chu ka en rei thei lo a ni.

"Ka tlaw ngawt mai ti raw?" a rawn tih chuan lû ka lo thin khum nawk nawk a, mahni inthiam lo taka a awm tur chu ka duh lo, a thiam loh a awm reng reng hleinem!

"Min nêl theih nân hian eng nge ka tih ang? Ka bula engkim i sawi ngamna turin eng nge ka tih ang? Min hrilh teh, min hrilh mawlh teh! Min nêl la, min be bawrh bawrh ngam la, min ṭih ru taka awm tawh lo turin ka duh che Sylvia. Han sawi teh le, eng thil nge ka tih ang?" a tih zawm nghal mawlh mawlh a, a aw erawh a dam dap tho.

"Engmah tih a ngai lo, a chhan chu ka nêl lutuk tawh che alawm u Maṭhuam, mahse nangmah pawh inngaihtuah lova kei min ngaihtuah hian i lakah ka inthlahrung ṭhin" ka tih laia a hmel chu danglam nasa tak a ni.

Ngawi reng hian a âwmah min kuah bei hle hle a, a changin ka chhip sam chu a fawp leh zauh ṭhin a, ka thla a timuang leh ta khawp mai. Office a kal chhung zawngin Zaii te inah ka awm a, a nu mawlh chu a fel a ni. Min ngaihtuah em em a, nau pai laia ei tur chi hrang hrangte min hrilh a, chet luih hram hram a ngaih chang te min hrilh ṭeuh a, a sawi zawng zawng chu a dik vek ka ring. Zaii leh a chhungte lakah chuan ka inthlahrung ru viau na a, ka inthlahrung rei thei tak tak miah lo. A mak lutuk, kan nêl nghal em em ringawt a nih chu!

Zaii te bula kâr khat kan awm tlin hnu chuan u Rinzauva hmel kan hmu ta fo mai a, ni lo, a naute pahnih pawh office bán áwm velah an lo kal ṭhin a, u Maṭhuama a lo haw hi chuan u Rinzauva chiah a awm tawh ṭhin thung. Kan in puia haw leh tawh turin min sâwm awl lo va, kei chuan chhanna pakhat mah ka pe ngai lo, u Maṭhuama zâwkin a chhang zel a, min lêtpui a tum tawh lo em em leh nghal. Zaii paw'n a tih tawh lamah chuan a luhlulzia min hrilh tawh tak alawm, nupa kan nih hnu pawh hian a luhlul thawkhatzia chu ka hria, mahse ka tâna hnawksak zawng leh rilru tinâ zawngin pakhat mah a awm ngai lo thung.

Kâr hnih a ral leh tâkah chuan in luah tur kan hmu ta nge nge a, a tozia chu pui tak a ni. Changkan pawh a changkang viau a, mahse mi pahnih chauh awmna atân chuan a zauvin a changkang mah mah a ni. Thawmhnaw lei turin Zaii chu a tir ṭhin a, kal ka tum ve ṭhin reng, mahse a phal tlat lo a nih chu! Ei rawng bâwl hmanin a rawn haw ziah leh ta nghal a, dik tak chuan ei rawng bawl a thiam tih reng ka lo la hre bik lo. Zaiin a ei rawng bâwl lai a hmuh tlai phei chuan an inkhak deuh hmuk hmuk a, Zaii ni se a nghal bawk si, an awm dan chuan min tihlim letling khawp mai.

In kan luah aṭanga thla khat a ral hnu chuan ka pum pawh a lian sâwt hle a, ṭum khat kan in-check-up chu doctor-in phir ka pai thu a sawi ta mai, mak ka ti bawk si, ka lawm tho bawk si, awm ngaihna pawh ka hre lo. Mak ka ti lutuk chu Ultrasound hmangin ka en nawn leh ṭhin, u Maṭhuama tak ngial paw'n mak a ti ve tho. Doctor chuan min lawmpui thiam hle a, inenkawl uluk a ngaih hun lai ka nih chhoh mêk thu min hrilh bawk a, chu tak chu u Maṭhuama zâwkin a lo lá fuh ta a ni. Mi râwn hmasa miah lovin awmpui a lo lá ringawt a, a office hlana ka awmpui tur atâna lâ a ni a, kei erawh chuan ka duh lo em em thung. Ṭha takin ka sawipui a, awmpui chu kan nei leh lo zui ve mai bawk.

Tlai khat chu u Maṭhuama office lo bán hmain ka nu a rawn lang hlawl a, a hma ang bawkin ṭawngkam a duh tui lo leh em em a, zawhna min zâwt a, ka chhang ve mai a, min zâwt zel a, ka tâna hriat nuam loh thlenga a sawi kai tâkah chuan ka ṭawngkam pawh a nêm vak bik tawh lo. A sawi thui telh telh a, ka lakah thinrimna tur hlir a zawng ka ti mai, u Maṭhuama lo haw thut se ka ti khawp a, mahse a rawn haw a la hun chiah bawk si lo. Kan inchhang lêt ta fak fak a, ka zah loh vang pawh a ni lo, ka thianghlimna ka hloh hnua pasal nei angah min ngai tlat a, ka nuhrawnte nufa thu sawi apiang a tak tak emaw a ti zel chu a mak zâwk a ni.

"Khawngaihin haw rawh ka nu, inchhan buai ka peih tawh lo" ka ti ta ringawt a, a thin a rim nasa ngáng mai.

"I va han zak lo pang pang ve le" tiin min bêng hawi sawk a, ka kut ka hum ruh ngar ngar a, kawngka lama thawm a rawn awm rual chuan ka hawi phei nghal a, u Maṭhuama ngei a ni e.

"Eng vanga lo kal nge i nih?" ka nu hmel a hmuh hnu chuan a ti ram hmuk a, min bén laia a rawn lut hman lo chu pawi ka ti hran lo, lo lut hman se zawng buaina a punlun nghal ngei ang.

"Hmeichhe thianghlim lo nupuia nei duhtu fapa mawl ka lo nei reng che tih ka hre chhuak a, ka lo kal a nih hi!" zámna nei miah lova ka nu ṭawng dan chuan ka thinlung a khei zawk zawk a, room-ah ka lut ta daih bawk.

"Ka nupui thianghlim leh thianghlim loh hre chiang bertu chu ka ni, kan inah hian lo kal tawh lo ang che" tia u Maṭhuama ṭawng ri chu khuma ṭhu chungin ka ngaithla kar a, kawngka inkhar thawmin a zui danah ka nu chu a chhuak nghal a nih ka ring.

"I ṭha em?" room chhunga lo luh pahin u Maṭhuama chuan a rawn ti a, mittui tling pamin ka lo melh ral thung.

"I ṭha miah lo" ti leh supin ka biang tawn tawn chu a kut hrawl zet chuan a khuap lûm vung vung a, a kut ka pawh thlaksak lai te chuan min en chiang hle.

"Thih daih ka châk, ka thi daih châk lutuk! Khawvelah hian awm lo law law ila ṭha tur, tu tân mah harsatna ka siam lo ang a, vanduaina nena hringnun hman reng ai chuan thih ka thlahlel zâwk tak zet a ni. Eng nge ka tih ang u Maṭhuam? Mahni inthah ka duh si lo, thih ka duh luata ka inthat a nih chuan hremhmunah bak ka kal dâwn chuang si lo" ti lawm lawmin ka ṭap khur ngawt ngawt a, min kuah vawng vawng a, ka ṭah a chhuak tulh tulh bawk.

"Cancer natna te hi vei ila, thi ngei ngei tur ni tawh ila, min hmangaih em emtu te bula awm ve daih ka châk ngawih ngawih a ni. Ka tân hi chuan dam hi hremhmun tluk zet a ni asin, thih erawh a nawm zâwk ngei ka ring" ṭap feih feih pahin ka ti thâm chhal a, ka khabe rawn chawitu chu mittui nen ka melh chho ral a, hmuh pawh ka hmu ṭha thei lo.

"Ka tihpalh" tih bakin min ṭawng thlamuan lo va, rilru nâ zet hian ka ṭap ri rawih rawih a, ka nâ tawngkhawng tawh a ni e.

(End of Chapter 14)

SYLVIA ROMAWIZUALI

By

Havali Adam

Epilogue Chapter 1

"Mu rih rawh, hahdam i mamawh" ka harh ruala thawh ka tum chu min kuah bet titih a, tukverh lam ka hawi chuan khua a lo thim vek tawh a, ka lo ṭap muhilh daih tih ka hre chhuak zui nghal bawk.

"Ka'n tho zâwk ang e, ei rawng ka la bâwl reng reng hleinem" ka tih pawh chuan min kuahna a tithâwl chuang der lo va, a phal lo bur a ang mah zâwk a ni.

"Ngaihtuah suh, ka bâwl vek tawh, mu lawk ang" ti supin a taksa ngheng zawng hian min kuah nghet sauh a, ngawi rengin ka awm ṭha ve ta hle hle.

"Keimah vang a ni ti raw?" kan ngawih dun vang vang hnu chuan a ti thum chhal a, eng lam hawi zawngin nge chu zawhna chu min zawh ka hre miah lo.

"Pasalah min nei lo la chuan hetiang em em hian harsatna i tâwk lo ang a, hrehawm pawh i tuar lo ngei ang" dam dap tho si hian a tih zawm leh nghal a, a awah chuan mahni inthiam lohna a lang tam khawp mai.

"Hetiang lampang hi chu sawi ka duh tawh lo" ti sepin a bán chu ka kuai a, a khauh ṭung ka rin ruk tehreng nen beisei loh deuhin a lo inthlah dul a, ka tho chhuak zui nghal bawk.

A sawi ang ngeiin ei rawng a lo bâwl fel diam tawh a, zanriah ei hun a ni ve tawh tho bawk nen chaw ei ka siam a, chaw ei ka siam zo kan room-a ka va lut leh chu zangthal zawnga mu thluang duai hian chung lam a lo melh reng a, thawm a chhuah loh avang khan a muhil emaw ka ti a, mahse a lo muhil teuh lo. A ngaihtuahna a kal ding hmel hle a, ka vawi khat kohna pawh a hre lawk lo nghe nghe a, a taksa ka sawi ngai khawpin a awm a, ka hmel a hmuh rualin a rilru hah hmel chu a thup thuai a, eng ang paw'n thup tum mah se ka hmu chiang em em thung si.

Chaw kan ei chhung zawng chuan ka be lui char char a, sawi tur chi hrang hrang ka dap kual a, ka laka a inthiam loh hmel chuan ka lai a chhun pha tlat a ni. Min ngaihtuahna leh min ngaihsakna erawh chhe tê them paw'n a kiam eih lo va, ṭawng vak lo mahs se min ngaihtuahin min ngaihsak tih ka hre vek tho. Chaw kan ei kham a, a phal lo chung thleng ka sil lui a, ani'n dawhkan a tifai thung a, minute eng emaw zah a ral tâkah chuan a rilru pawh a pangngai ve leh maiin ka hria. Ṭhutthlengah ṭhuin TV kan en dun ta mai mai a, mut nân ém chuan a la hma deuh si a ni.

Dâr 10 rik dâwnah mut zai kan rêl ta chauh a, ka mut erawh a la chhuak lo khawp mai. Ka pasal muhil thaw ri suk suk thawm chu meng karin ka ngaithla reng a, a hnuah phei chuan a lam hawi zawngin ka inlet ta hial a, a hmel chu ka en chiang a, tlémin a tlá ve deuhin ka hria. Tin, a hmui leh biang velah hmul a ṭo deuh siar siar a, a hmel a ro deuh rap a, kei min ngaihtuah avanga mutmu tuah ṭha lo ṭhin a ni a, ka khawngaih ru khawp mai. Kan in dan tâk aṭang hian ka rin loh deuh deuhin a awm ṭhin a, ei rawng bawl te, insuk te, thleng sil leh dawhkan tihfai te, a tam mai, mahse chung zawng zawng chu keimah min ngaihtuah vang leh min duat vang vek a ni thung.

Thla thar kan chuangkai a, ka pum pawh a puar lian ve ta khawp mai. Phir pai tih takah ka rit ṭan hle a, mahse ka che lui hram hram ṭhin. U Maṭhuama erawh thla hmasa mai aṭang khan a danglam deuh tlata hriatna ka nei a, thil thup nei hmel hi a pu ka ti mai. Min ngaihsakna leh min duatna chu a la ngai reng tho va, Paris khawpui kan awm laia min vin tih loh kha chu ṭawngkam vinin min ṭawngkhum tawh ngai lo hrim hrim bawk. Ei rawngbawl hmana rawn haw a la ṭhulh ngai chuang lo va, mahse a danglam tlat a ni. Thil thup a nei tih ka hria, eng nge ka hre bawk si lo.

Tlai khat a rawn haw phei chu a thin a rim hmel hle a, ka zâwt ta nge nge a, mahse ka duh ang chhanna ka hmu hauh lo. Thil dang min sawipui daih a, in hmun lei chungchang hlir a sawi a, a changin a ṭhianpa thil chhui lam a sawi bawk a, chik zet hian ka lo en reng a, a danglam thlawt a ni. A danglama ka hriat avangin min duat loh phah lo va, min ngaihsak loh phah chuang lo va, thup erawh a nei chiang a ni. Kei lah a changa mood ṭha, a changa mood ṭha lovin ka awm chho ṭan leh ta nghal a, ka vin deuh hlak hlak chang pawh a tam ta khawp mai, mahse ani chuan min dawh mai mai zel, ka sawi ang apiangin a awm ṭhin a ni ber.

Inrinni chhun a ni a, u Maṭhuama chu chawhmeh leiin a bazar mék a, Zaii a rawn lêng bawk a, mahse phone-a ka thil dâwn chuan min barakhaih chiang khawp mai. U Maṭhuama leh Chhani ngei mai chu room khatah an awm dun a, dawhkana eng emaw ni neuh neuh a awm danah office chhung a nih ka ring nghal hmiah. Thlalak lah chu ka en rei thei lo, ka rilru a tinâ tak zet a ni. Chhanin u Maṭhuama Tiffin Box a pe lai ngei hi a ni a, thla hmasa lawk aṭanga a danglam chhanah khan ka hmehbel zui nghal a, a nih ngei ka ring bawk.

Zaii chuan min be siam siam a, a ṭawng melh melh a, thil kan ei dun pah reng a, mahse ka rilruah thil dang a awm thei tawh lo. A rukin u Maṭhuama lo haw hun ka nghakhlel zek zek a, Zaii tak pawh chu haw daih mah se pawi tihna ka nei miah lo. Ka mood zawng zawng a chhe vek a, ka ṭah a chhuak et et a, mahse ka ṭap a nih vaih chuan Zaiin zawhna min zâwt nghal ngei dâwn tih ka chiang, chu vanga ṭah insum hram hram pawh chu ka ni. Darkar eng emaw zah hnuah u Maṭhuama chu a rawh haw ta, chik zet hian ka lo en reng a, a hmel a pangngai viau a, Zaii chu chaw eiah a la sâwm zui.

"Inbe lawk teh ang" ka aw a hriat rualin min rawn en nghal a, a hmel aṭang chuan min ngaihtuah hmel leh ta viau e.

"He thil hi eng nge a awmzia?" tia ka phone ka lék kan tâkah chuan ka phone chu a bih ve mai a, ka aw a nêm tehchiam lo bawk nen Zaii paw'n min rawn en zawk nghe nghe.

"Zanah kan sawi dun dâwn nia" tih chauha min chhang chu ka duh khawp lo nasa a ni.

"Aih, tunah, tunah ngei hian ka hre duh! Eng vangin nge Chhani nen hian in awm dun? Ngaihzawng i nei chiang ti raw? Sawi ta che, min chhang rawh!" ka ti hlawk hlawk a, vawi leh khatah ka insum theihna a puak keh vek a ni ber e.

"Engati nge Sylvia?" tiin Zaii chu choka aṭangin a lo phei vat a, ka phone a en zawm nghal zat bawk.

"U Maṭhuam?" ning aw zeta ti vakin ka men pur a, ka ṭap titih a ni mah zâwk, Zaii awm leh awm loh pawh ka ngaihtuah thei tawh lo.

"Inbengdai teh Sylvia, zaninah kan sawi ṭha dâwn a nia ka tih kha maw le" dam ruihin min be mah se ka thinrimna a zual tulh tulh thung.

"Ngaihzawng chu i nei tak tak em ni u Maṭhuam? Chutah Chhani leh nghal maw!?" titu chu kei ni lovin Zaii zâwk a ni a, a hmelah mak tihna a lang nasa hle bawk.

"Ngaihzawng neihsan tur che khawpa mawl leh rilru nghet lo ka ni lo Sylvia" Zaii ni lovin keimah zâwk min melh chhuk run a, a ṭawngkam erawh nghet charh mah se a vin leh ta chuang miah lo.

"A nih a hnu, sawi ta reng che! Ka zawhna kha chhan a harsa viau em ni?" mood dik loh luatah ka aw chu ka thunun theih piah lam vek tawh a ni.

"Zaninah ka hrilh ang che, lunngai suh Sylvia, i rilru tinâ zawngin ka awm lo" tia min rawn kuah a tum chu ka lo che sawn a, ka kê ka la chhep sual chiang em em zui.

"Awi, Sylvia, fimkhur rawh" Zaii aw ka hriat rualin ka awn riai riai a, mahse u Maṭhuaman min chelh hman hlauh a, ni lo se zawng ka tlu chiang khawp ang.

"Va sawi dun r'u u Maṭhuam, ei rawng hi chu ka lo bâwl vek mai ang. Nang pawh Sylvia, i rai vang tih hria la, i rilrua awm zawng zawng kha a dik vek bik lo thei tho a nia, room-ah va awm daih zâwk r'u" Zaii bawk chuan a ti leh nghal mawlh mawlh a, min pawm kang lawptu chu ka en reng a, ka mittui a rawn luang chhuak ta nge nge bawk.

"Zaninah kan sawi dun dâwn alawm Sylvia, ṭap tawh suh le, nu ber i ṭah chuan kan fate hian awm ngaihna an hre lo mai ang asin" khuma min mutpui hnu chuan dam dap hian a ṭawng a, ka mittui chu a hru hul hliau hliau a, zawi zawiin ka thinrim lutuk pawh a reh ve ta tial tial.

"Engati nge maw ka vanduai bik em em mai le? Eng nge ka tihsual? Heti taka vanduai tur hian eng nge ka tihsual bik?" mahni leh mahni inkhawngaih lutuk avangin ka insût zui nghal feih feih a, thinrimna chu lung puamnain a rawn luah khat a ni ber.

"Engmah tihsual i nei lo" tia ka chal a fawh mawlh mawlhna te chuan ka rilru a tino zual a, ka ṭap khur beuh beuh a, choka lamah Zaii awm reng mah se eng mah ka dâwn tawh lo.

"Ka nun a nawm deuh theih nân tiin pasalah ka nei che a, mahse ka nun a nawm phah si lo. Tunah chuan ka pasal thlengin min chhuhsak an tum leh ta zel a, kei zawng thih bak ka thlahlel ta lo ve, hetiang reng renga hringnun hman hi ka zuam tawh lo a ni. Ka thi duh, ka thi duh tawh!" ka ṭawng tir lam chu thawp zawi viau mah se a tawp lam erawh a ring ṭha khawp mai.

"I thih ka phal lo Sylvia" ti supin min kuah vawng vawng a, a taksa lûm vung vung leh a aw dam thlup te chuan ka ṭah a tichhuak zual sauh a, naupang ṭahbelh tak ka ang ngawt ang ka ring, mahse ka hun tawn ang tawng ve tawh tân chuan insum theihna chi ziazâng a ni si lo a ni.

Ka lo ṭap muhil leh pek a ni ngei ang, ka harh chuan zan a lo fel vek tawh a, thawm a reh ṭhiap a, ka nghenchhan lûm nuam tak chu tu nge a nih ka hre zui nghal bawk. Ka hma lawka ka phone chu ka lá a, darkar chuang fê liam tawha Zaii message lo thleng chu ka chhiar a, u Maṭhuama nen ṭha taka sawi dun tura min duhna te, u Maṭhuaman chaw a la ei loh thu te leh thil dang tam tak a lo thawn ṭeuh a, ka tân hi chuan ṭhian ṭha a ni ve chiang a ni. Ka mut dan thlakin a lam ka hawi a, ka thawmah a lo harh thuai a, mut chhuah hmel zet hian min en a, ka khawngaih hnuhnawh tak zet a ni.

"Ka tihpalh u Maṭhuam" ti sepin a hmuiah ka fawp zeuh a, a hamhaih hmel ang reng khawp mai.

"Inthunun hram hram hi chu ka tum ve ṭhin, mahse Chhani nena in awm dun lai thlalak khan min tinâ lutuk a, ka rilru a kal dik lo nghal vek a ni" ka ti leh sêp sep a, min en chiang sawt hle.

"Tlaia ka awm dan avang khan tihpalh aw" ti nawn lehin ka kut vei lam chuan a sam ka chûlsak a, a lo man chat a, a fawp vawng vawng zui nghal bawk.

"Chaw ei tawh ila, i la la ei lo tih ka hria. Hawh, chaw ei tawh ang, ka ril a ṭam" a ngawi run tlat si a, ka ṭawng hmasak zel a ngai rih tlat a ni.

"Engati nge? Kan tho dâwn lo em ni?" ka chet ruala min kuah deuh thut avang chuan ka ti hluai a, ka dul puar ul leh ka âwm inkarah a bân a khâm run a, a bân ringawt pawh a lian ṭha khawp mai.

"Heti hian rei lo tê awm lawk teh ang, ka ngai tak zet che Sylvia, ka khawih phâk leh ka hmuh phâkah awm mah la i hla tlatin ka hre ṭhin" a tih sup tâkah chuan ka ngawi ta reng a, ka awm hle hle bawk.

"I ril a ṭam hrim hrim em?" kan ngawih dun vang vang hnuah keimah zâwk ka ṭawng chhuak hmasa leh ta nge nge a, ka biakna pawh chu min chhang lo hrim hrim, a muhil leh daih a ni mai thei a ni.

"U Maṭhuam?" zawi sep hian ka ti a, a hma ang bawkin a lam hawi zawng chuan ka inlet a, a lo muhil daih tak tak a nih chu!

"Keimah avanga i hahna te, i buaina te hi engtikah mah ka theihnghilh tawh lo vang" ti thawp raihin a muhil lai hmelṭha tak chu ka thlir dauh dauh a, a hmelṭha satliah a ni lo, a pá tel bawk.

Kâwl a rawn phe zuk a, rei lo tê hnuah khawipui ríin a rawn chhunzawm nghal a, ka phu uih nghe nghe a, chu chuan a tiharh chiang khawp mai. Ka taksa chet dawt rual rualin a harh nghal a, a hmela min ngaihtuahna te chu hmuh hmaih theih a ni lo. Thawha chaw ei ka rawt leh chu ngawi reng hian a tho nulh a, current a rawn awm lo zui nghal a, ruah pawh a sur har lo hle. Chaw kan ei dun lai te chuan ka ṭawng siam siam a, chaw kan ei kham a, Chhani nena an awm dun chhan chu min hrilh ta alawm, a thu sawi zawng zawng chu pakhat mah rinhlelhna ka nei lo, a chhan chu amah a nih vang a nih mai bakah ka pasal a nih vang a ni.

A sawi dan chuan ka nuhrawnte nufa pahnih chu ka pite thihna chungchangah rinhlelhawm an ni a, ka pite ṭhenawmnu pakhatin in a kán hluah hluah zan khan mi hmuh a lo nei a ni awm e. Chhum lo chat lovin a ṭhianpa a chhuitir reng a, evidence chiang tak la awm lo mah se rinhlelh kai ber chu ka nuhrawnte nufa an nih thu min hrilh vek a, an lo nih tak tak phei chuan ka rilru a nâ zual khawp ang. Chhani lah chuan office-ah Tiffin a lo pe ni tin ṭhin leh ta zel a, ka nuih an tiza zâwk, min er reng renga an nung chu kham luatah ka nuih a za a ni. A thu hrimah hahthlak an ti ve lo emaw ni le, engmah ka ni bik hauh si lo va, u Maṭhuama leh zel chhuhsak min tum erawh engtikah mah an hlawhtling ngai lo ang.

"I harh elo?" ka mit ka men rualin a lo ti sup nghal a, chhuak tur ang mai hian thawmhnaw a inbel mawlh mawlh a, ka hrethiam lo ang reng.

"Muhil leh rawh, ka rei lo ang, ka lo haw leh vat ang?" a tih chuan chhuah a tum tih ka hrethiam nghal.

"Khawiah nge i kal dâwn?" a chhuah tum hun chu a awm ang lo tak zet a ni.

"Ka ṭhianpa police officer khan thil pawimawh tak a hmu chhuak a, kei paw'n ka la hre bik lo" a rawn tih rual chuan

"Zan dâr 10 a rik tawh hî, kal lo mai rawh, naktukah a theih lo em ni?" ka lo ti thuai thung a, ka bulah a rawn ṭhu thla nghal bawk.

"Dâr 11 hmain ka lo lêt leh ang, tuna mi hi chu a pawimawh lutuk a, hahdam deuhin lo awm rawh aw" tih leh ka hmuia fawh a rual a, kal tuma a tho chu

"Fimkhur rawh aw u Maṭhuam, ka ngaihtuah che a nia, ruah hi a la sûr tam em?" ka lo ti leh zung zung a, ka ngaihtuah tak tak a ni.

"Sûr tam tawh lo ve, a hmi seng seng a ni mai, ngaihtuahawm ka ni lo Sylvia" tiin kan nupa room aṭang chuan a kal chhuak nghal a, rei lo tê hnuah motor tlan chhuak thawm ka hre zawm zat bawk.

Ngaih ṭha taka mut ka tum chu ka thei ta miah lo va, minute eng emaw zah hnuah chuan ruah a rawn sûr tam zui leh ta nghal a, u Maṭhuama ngaihtuahin ka buai ṭan chu a ni der. Khawiah tak nge a kal dâwn pawh ka hre lo va, zawh nachang pawh ka hre lo hrim hrim kha a ni a, tlaw ka inti hnuhnawh khawp mai. Ka phone ṭhin, a pick up thei bawk si lo, a hnuah phei chuan keimah zâwkin signal ka nei lo ta daih a, ka mut réng a chhuak thei tawh lo. Thli thaw ri vûk vuk te chuan ngaihtuahna ṭha lo min neihtir a, ka hlauthawng tawlh tawlh a, ka awm a nuam tawh lo tak zet.

Dâr 11 a ri ta, mahse u Maṭhuam hmel pakhat mah hmuh tur a la awm lo va, a thawm hriat tur a la awm lo bawk a, a sawi lâwk anga a awm loh vawi khatna chuan min tichiai tial tial a, ka phone ni se signal a awm thei bawk si lo. Kan nupa room chhungah chuan ka tei sek sek a, ka kal chhet chhet a ni mah zâwk, ka pum chuan min uai rit khawp mai. Motor inhûng ri hrawk thawm a rawn awm a, lawm avangin ka rilru chuan u Maṭhuama hming a lam mawlh mawlh a, mahse kan in kawngka ka hawn ruala ka mipa hmuh erawh u Maṭhuama a ni ta hauh lo mai.

"Khaw'nge u Maṭhuam?" ka lo ti nghal thuai a, ka rilru a pangngai thei tawh lo.

"Rilru fim tak put tum hram ang che Sylvia, kan lo haw kawngah motor pakhat hian rin loh lam aṭangin a motor khalh lai an rawn su chawrh ringawt a, tunah hian damdawi inah a awm mêk a ni. A harh pangngai lai khan a chanchin hrilh hmasa ber tur chein min ti a, hlauthawng lo turin a duh bawk che" ka pasal ṭhianpa thu sawi zawng zawng chu ka bengah a ri nawn tluk tluk a, rilru fim put a va harsa tehreng êm.

"Dáwt i sawi" nem fahran lo hian ka ti khauh fak a, ani erawh chuan a lû a lo thing nawk nawk thung.

"Lo kal rawh le, damdawi in lamah kal ang. A lo harh hunah a hmuh duh che ka ring, chumi hunah chuan engkim chhui chhuah a nih tawh angin a hrilh vek ngei ang che" tiin ka darah a rawn chelh a, min tih ang ang chuan ka awm tawp a ni ber.

SYLVIA ROMAWIZUALI

By

Havali Adam

Epilogue Chapter 2

Damdawi in lam pana kan tlan chhung zawng chuan ka ngawi reng a, u Maṭhuama ka ngaihtuah lutukna lamah ka ṭah pawh a chhuak thei rih lo. A kal hma khan hahdam taka muhil turin min chah kha a ni a, dâr 11 hmaa lo haw leh ngei a tum thute kha a sawi a, ka muhilh theih miah loh chhan kha eng dang vang a ni lo, tawh sual a lo tawh dâwn vang vek a ni. Lo muhil ta ila chuan kaih thawh ka harsa leh ngei ang a, u Maṭhuama ṭhianpa tân tak pawh a buaithlak khawp ang. Thil thlen dan chu kimchang lutuk lovin min hrilh mawlh mawlh a, ka rilruah erawh a thu sawi ni lovin u Maṭhuama hlir a awm thung.

Damdawi in kawt kan thleng a, ruah sûr hán tawh chu a rawn sût ṭha leh a, damdawi in chhung kan luh hnu phei chuan sûr hnem hem hem tak a ni. Rai kawr leh kawr lûm chhah lutuk lo ka lo ha kher bawk nen vawt ka ti ru viau a, u Maṭhuama ṭhianpa ni se Tshirt bak a ha bik der si lo, a ruk tak chuan ani paw'n vawt a tih ve tho ka ring. Nurse te kâ aṭangin u Maṭhuama chu Doctor te'n an buaipui mêk thu kan hria a, hahdam turin min hrilh bawk a, mahse ka hahdam thei chuang lo. A duty-na hmuna a kal hma chuan min be siam siam a, ka nau pai chu thla engzat nge a nih tawh te min zâwt a, a ṭawngkam a felfai si, biak a nuamin a fel khawp mai.

A kal sawn tâkah chuan ka ngawi leh ta tlawk tlawk a, u Maṭhuama ṭhianpa erawh a chhungte hnen aṭangin phone call a dawng reng a, a chang leh a hnuaia thawk ni áwm tak te a be leh bawk a, u Maṭhuama motor khalh lai rawn sú ringawttu chu chhui chhuak vat turin thu a pe a nghal nghe nghe bawk. Phone kaltlanga mi a biakna azârah thil hriat chhuah zawk ka nei a, Zaii phone number chu ka Dial nghal a, mahse rei pawh a ring hmain ka hmet tawp leh vat thung. Dâr 12 dâwn a ni tawh a, an mut tawh ka rin hnuhnawh avanga chanchin hrilh ṭhulh ta ringawt pawh chu ka ni.

Minute rei lo tê hnuah a hnen aṭangin phone call ka dawng a, a la mu lo a ni ngei ang. Pangngai deuh hian zan rei tawha ka call chhan chu min lo zâwt a, hrilh rih loh law law ka tum ve tak ná a, ka thei thlawt lo. U Maṭhuama chanchin ka sawi chiah chu kan awmna damdawi in hming min zâwt nghal thuai a, dik tak chuan khawvar huna hrilh ka tum kha a ni a, mahse chutia ka hrilh ta chu ka awm a nawm phah sawtin ka hria. Kan inbiak laklawh laiin ka signal a rawn bo thut a, biak tum eng ang mah ila tih ngaihna a awm chuang lo. An lo kal rinna hlirin ka khat a, mahse ruah sûr nasat lai êm chuan lo kal rih lo mah se pawi ka ti miah lo.

Ka awm a nawm loh hlauvin u Maṭhuama ṭhianpa chuan min be deuh reng a, a ṭha phian mai. Ka rilru hah lutuk tur pawh a mi ṭawng thlamuanna chuan tlêmin a tiziaawm a, chu ringawt pawh chu a ṭha lutuk. Rilru hah em em si, ngaihtuahna nû bulh bulh chunga ṭap thei si lovin ka awm a ni ber. Zawhna chi hrang hrang ka zâwt a, a bikin ka pite in kán chhan lam, mahse engmah min chhang ṭha duh lo. U Maṭhuama lo harh huna ka hriat vek tur thu a sawi thung a, thu dik ka hre châk tawh bawk si, ka awm hle hle thei lo a ni ber e. Tin, u Maṭhuama chu a ṭhat ve leh mai a rin thu a sawi bawk a, a ṭhianpa a nih vang nge pawh ka hre lo, a ṭawngkam chuan min thlamuan ru tlat a nih chu!

Darkar chanve hnu velah Zaii leh a nu leh pate hmel kan hmu a, ruah sûr nasat lai mah ni se an lo kal lui tho chu a ni a, min ngaihtuaha min ngaihsak em emtu te kianga ka awm chiah chu ka ṭah a chhuak ru em em a, rilru zawng zawngin u Maṭhuama ka ngaihtuah bawk nen ka insum thei ta ngâng lo. Zaii ṭâng belin ka ṭap khur hlawp hlawp a, tu nge mahni pasalte dinhmun khirh taka an awm laiin ṭap lo thei lo bik ang nì? Zaii nu chuan min rawn kuah ve leh a, a pa pawh a bang chuang lo, a mitmenga min khawngaihna leh min ngaihtuahna lang mawlh mawlh te chuan ka ṭah a tichhuak zual a ni.

Rei fê rilru mumal lo zeta ka awm hnu chuan zawi zawiin ka pangngai ve tial tial a, nau pai lai ka ni bawk nen ka tân chuan rilru haha awm a chî rih lo bur tih ka hria, mahse rilru hah loh a theih ngawt si loh! Zaii pa leh u Maṭhuama ṭhianpa police officer chu an inbe malh malh a, mi dang erawh kan ngawi ṭhap a, mipa pahnih titi thawm chu kan ngaithla kar hlawm a, zep thu cheng lo, lung a zim duh khawp mai. Ka pum lah chu a rawn nâ riai riai leh ta nghal a, a reh ve leh mai a, mahse a rawn nâ leh ṭhin a, ka awm a tinuam lo zual tak zet a ni.

Hun eng emaw zah a liam hnu chuan ka nu leh u Rinzuava te unau pathum hmel kan hmu ta nge nge a, Zaii pain chanchin a hrilh miau a, an lo thlen har ka ring lo hrim hrim. A fapa ngaihtuah zet hian ka nu chu a phí buai em em a, Zaii pa awm lo phei se chuan buaipui a ngai nasa viau ang. Thawm ri nuaih nuaih leh kan boruak tawn engkim chuan min tichau hluah hluah a, ka kham ru tak zet a ni. Ka nu ni se ṭap aw ṭiau hian min demna chi tinreng a chhak chhuak a, ka thiam lohna pakhat mah a awm hauh si lo va, a ngaihah erawh engkim chu ka thiam loh bawk a ni leh ta.

"Kan chhungkuain anchhia mo atâna kan lo nei che hi a pawi tak zet!" ka nu min sawi duh dan leh min ṭawngkhum dan chuan nasa takin min chhun nâ a ni.

"Duh tâwk teh, a rilru buai dan tur te dâwn ve ta che maw le" tia Zaii pa'n a zilh laiin u Rinzauva chuan

"Putea thu sawi kha awih rawh ka nu, nau pai lai a ni leh nghal, rilru hahdam a mamawh dâwn tih hre ta che" a rawn tih zawm ve nghal a, ka nu erawh inbengdaih lam chu a hnai lo mai.

"LALRINZAU! Khatiang khan i nu hi min zilh ve khanglang suh, kan ina Sylvia-i a rawn mo aṭang hian buaina hlir kan la tâwk tih hre chiangtute zinga pakhat i ni, engati nge in ṭan em em hlawm a? Sawi dik loh ka nei em ni?" ka nu aw chu a vin ring ṭha khawp mai.

"Nei chiang e, thil hriat sual tam tak i nei bawk. Kan ina Sylvia-i lo mo vang ni lovin mo atâna i duh hlawl loh vang zâwk alawm kan in chhungah buaina a awm, u Maṭhuama pawh hian a hre vek, Sylvia-i tân buaina i siam lawk loh avangin a en liam mai mai zâwk che a ni. I siam chinah erawh a in danpui tâk daih hí, inen fiah rawh ka nu" a tir lamah ṭawng pawng pawng mah se a tawpah erawh u Rinzauva aw chu a dam viau thung.

"LALRINZAU! I va han ṭawngthei rapthlak tehreng êm!" ti vin hlawk hlawkin ka nu chuan a hmaiah tak a bêng ri sawk a, u Rinzauva pawh a meng rum sâwt hle.

"Thu dik sawi avanga ka ṭawngtheih chhan ka hre lo, inbengdai tawh rawh ka nu. Chuti lo zawng ka nupui hial thununa i ruahmanna tenawm zet i tihtir kha ka sawi chhuak palh mai ang, Sylvia-i tak pawh hian a ngaidam thei lo mai ang che" u Rinzauva aw chu a pangngai viau a, nâ ti hmel pawh a pu lo.

"Sylvia Sylvia ti reng hlawm mai, ka ning lutuk! Ka kham ngawih ngawih, hetiang anchhia ve mai hi eng nge a fel bik vakna!? Kan chhungkaw tân hlawkna pakhat mah a nei lo, rethei si, arsa zuara sa sat mai mai ṭhin kha mi hausa inah a rawn lâwi lut a, zirna ka chhunzawm duh e a ti kual vel leh ta nghal a, engkima in ṭan hlawm reng hi ka kham tawh lutuk" ka nu chuan a ti hmawk hmawk a, ka insum thei bik lo ta nge nge.

"Chutiang taka i mi huat ni tur chuan i lakah eng nge ka tih ka nu? Engati nge min mil loh em em a? Eng ber nge min huatna chhan? Ka retheih vang maw!? Arsa ka sah ṭhin vang maw!? Nge u Maṭhuama nen kan inneih hma aṭang daih tawh khan nu leh pa dik tak ka neih loh avangin min lo duh lo hrim hrim zâwk?" ka aw chu a chang ṭha fak fak khawp mai.

"I zak hlawl lo!" tih chiahin min chhang a, ṭawng zawm lo hian a ngawi zui hmak a, sawi tur dang a hre tawh lo a ni mahna.

"A ṭha e, tunah chuan ka rilru ka thlak tawh e. Thil mawi nia ka hriat loh avangin hrehawm tuar dâwn mah ila inpui lama rawn lêt leh ka ngaihtuah reng ṭhin a, u Maṭhuaman tum tawh lo bur mah se sawi ṭhatpui ka la tum fán a, mahse tunah chuan anchhia tia i ṭawngkum fô hian lo lawi luh leh ka tum tawh bik lo, u Maṭhuama thu thu ni tawh rawh se" ka ti leh charh charh a, thinrim avanga a hmel ling nasa lutuk chu en pawh ka en rei duh lo.

"Mi rapthlaknu!" ti vin tuarha min rawn pan a tum chu Zaii pa'n a lo man bet thuai a, a dar tawn tawnah hmerin a thing nawk nawk a, a thing nasa khawp mai.

"I û hi min tihzah belh tawh suh! Kut ka thlak hreh miah lo che a nia, ka ngaihdan pela i chet leh vaih chuan kut ka thlak tawh ang che, i hria em!?" Zaii pa chuan a ti vin ṭhawt a, a khawk rum rum a, Zaii phei chu a phu uih a, a lo hlau hle a nih ka ring.

Ka nu chu a ngawi ta hle hle a, a rilru a nât hmel viau bawk. Kan ṭhut ngawih ṭhep ṭhawp laiin Doctor pakhat a lo chhuak a, u Maṭhuama an buapui zawh fel tawh thu te, a lûa hliam tih bak hliam dang a neih loh thu ka hriat chuan tlêmin ka hahdam phah deuh a, hahdam pumhlum erawh ka la ni chuang lo. Doctor sawi dan chuan motor aṭangin insawh chhuak lo se chu buaipui a harsat viau a rinawm a, thihna hial pawh thleng thei reng a ni. Doctor kal liam hnu chuan tûma'n kan sawi zawm lem lo va, mahse ka pum chu a hma ang bawkin a rawn nâ leh ta.

"Zai, ka pum hi a nâ lutuk" ka ti thawp raih a, ka thaw a sa phat phat a, ka thlan fim a chhuak nghal zawih zawih tih pawh ka hre thei.

"Awi, i ṭha miah lo Sylvia. Nu, pa, Sylvia-i hi buaipui a ngai, hmanhmawng ang. 'Ka pum a nâ' a ti leh nghal, nau a chhiat palh ang tih ka hlau" hlauthawng aw zeta Zaii ṭawng mawlh mawlh thawm chu ka bengah chuan a zuih ral tial tial a, ka khaw hmuh nen lam a thim zui nghal vek bawk.

Thawk leh khatah ka harh thut a, ka thawm hriat hmasak ber chu ruah sûr buan buan thawm a ni a, mak ka ti ang reng. Tin, ka awmna hmun leh ka mutna khum chu khawi lai nge a nih ka hre lo lawk lo nghe nghe a, damdawi inah kan la awm tih ka hriat chhuah hnuah erawh ka awm dan zawng zawng ka ngaihtuahnaah an rawn lut zut zut a, Zaii leh mi dang hmel ka hmu zui nghal bawk. Ka harh tih an hriat rual chuan min be mawlh mawlh a, ṭawngkâ paw'n ka chhang lo, ka buk khum ringawt. Tukverh lam ka hawi a, zan lam aṭang tawh ruah sûr chuan bân zai a la rêl thei lo niin a lang.

Ka pum nâ leh ka lû hai muai muai pawh a reh fel vek tawh a, dik tak chuan nau chhiat ka hlau hman tak zet. Zaii sawi danin ka taksa hriselna a pan avanga buai leh nâ nei ka lo ni a, Doctor kâ aṭanga a hriat hnu min hrilh a ni mah zâwk ang chu! Cabin-ah pawh awm lovin Ward-a awm kan ni a, khum aṭanga chhuk nghal ngawt ka tum chu min lo buaipui rang hlawm ngei mai. U Maṭhuama ber nâtna khumah a awm a, keia lo mut der der chí niin ka hre thei lo a ni. Ka kal tur te chu Zaii leh a nu'n min pui a, ka kuah titih a, ka pum chu a rit zual tak zet bawk, mahse kal theih lohna khawpa rit a ni chuang lo. A puar lian ve tawh hrim hrim a, rit awm reng pawh a ni.

U Maṭhuama lo harh hun nghakin Cabin chhungah kan awm ṭhap a, tûmah kan ṭawng tawh lo va, ka nu tak ngial paw'n ṭawngkam chhe tak tak a phuh chhuak tawh lo. Ruah lah chuan sûr bán a tum loh hmel em em leh nghal a, zing dâr 4 chu a ri tawh, a la sûr tam miah miah khawp mai. Mitthi ang maia mu u Maṭhuama hmel chu ka thlir tlawk tlawk a, min thihsan ang tih mawlh ka hlau a ni. Darkar a liam zel a, Doctor te'n a harh hun áwma an sawiah pawh a la rawn harh thei ta tlat lo mai, ka va'n hlauthawng zual tak êm. Kei chang ka ni lo, mi dang pawh an hlau thawng vek!

Ka nu phei chu a buai phili tawh hle a, Zaii pa bawkin a ṭawng thlamuan mawlh mawlh a, kei tak pawh u Maṭhuama ṭhianpa leh u Rinzauvan min ṭawng thlamuan nasa hle. Ni e, ṭawng thlamuan ka ngai réng a ni. Chuti lo zawng ka rilru a kal dik lo leh ringawt a, nau pai mêk ka ni tih inhre chang lêk lovin ka awm mai ang tih a hlauhawm. Zing dâr 6 a rik hnuah pawh a la rawn harh thei chuang reng reng lo va, Doctor leh Nurse te'n kan hmuh lai ngeiin an check mial mial a, min thihsan ang tih ka hlau ngawih ngawih tawh, ani leh zelin min thihsan a nih chuan dam chhuak tur ka awm tawh lo ang.

Mak tak mai hian Doctor te'n an buaipui mial mial lai chuan a rawn harh thut a, a mit a men ruala a hmuh hmasak nih loh hlau zetin ka kal phei thuai a, a hmingin ka ko mawlh mawlh a, mahse ka ṭawng hria ang paw'n a awm lo. Ka kut pahnihin a biang tawn tawn chu ka dawm a, ka ko mawlh mawlh a, ka be mawlh mawlh a, meng reng chung si hian min melh run a, min hre lo ang maia a awm avang chuan ka mittui a far ta zawih zawih bawk. A bianga ka mittui a far thlak rual chuan a meng phawk hrâ a, a kut ding lam zâwk chu muangchang hian a chet riai riai a, ka biang a rawn tawh tâkah chuan a âwm bawhin ka ṭap zui nghal hlawp hlawp a, ka insum thei tawh thlawt lo a ni.

"Sylvia" dam lo aw zeta ka hming a lam rual chuan ṭap pur chungin a hmel ka en thuai a, dam ṭha lo mah se a aw chu ka tâna hriat nuam loh a ni chuang lo, ṭawngkam vina min biak tawh loh tur thu a sawi kha a la hre reng a ni mahna.

"U Maṭhuam" ti ṭiauin a chalah te, a biangah te chuan ka fawp kual dân dan a, a hmui ka fawhna a rawn chhang lêt te chu ka lawm a va kim phah si êm.

"Ka ṭha tawh e, min ngaihtuah suh, i ṭha em?" dam lo zâwkin ka ṭhat leh ṭhat loh min zâwt chu a nia, ani tluka ka tâna mipa ṭha hi chu an awm leh thei tawh ngai lo ang ka ring.

"Ka ṭha" ka ti sep a, ka bianga mittui luang ngiai ngiai chu a kut lúm nuam tak chuan min hruk hulsak a, ka hlim lutuk vang nge ni, kan nupa chauha awm angin ka inngai hman hial nghe nghe.

"I pite in kán chhan te, i pa thih chhan thleng khan, engkim kha i nuhrawn; nu Ruati leh a fanu Chhani ruahmanna vek alawm a lo nih Sylvia, an tuhrah chu an sêng ngei ang" min en chunga a tih chuan ka meng phawk nasa mai.

"Dâwt i sawi lo ti raw?" hamhaih aw zet hian ka ti a, ka aw chu a làwi lam lek lek bawk.

"Dáwt ka hrilh ngai lo che tih i hria alawm Sylvia" min chhan dan chuan min deng dawt a, dik tak chuan ka awih loh vang pawh a ni lo, ka mak tih lutuk vang zâwk a ni.

"Maṭhuam, tunah khan ka naute'n min lo hrilh zo chiah a, i nu hi rinhleh zingah a tel tlat mai, a pawi ka ti, min hrethiam rawh" u Maṭhuama ṭhianpa thu rawn sawi phei chuan min ṭhawng lehzual tak zet.

"Ka nu!" u Rinzauvan a tih hluai laiin u Maṭhuama ve thung chuan

"I hruai thei ang, ka nu mah ni se inhnamhnawihna a nei a nih ngat chuan i kutah ka dah nghal e" a lo ti nghet charh thung a, ka nu erawh a tálbuai nasa mai.

"In thil sawi awmzia hi pakhat mah ka hre lo, engmah inhnamhnawihna ka nei lo, tu nge ka inhnamhnawih ve ti?" a ti vin tuarh tuarh a, u Maṭhuama ṭhianpa chuan

"Ka naute hovin nu Ruati an dawpna lamah i hming a lam ri tel tlat si alawm, mi pathum ngawt thihna ah hian rihlelh i kai a ni" tih leh ka nu bána kaih a rual nghal bawk.

"Dâwt, dawt a nih chu a sawi, engmah inhnamhnawihna ka nei lo, ka nei reng reng lo, min thlah nghal rawh!" ka nu chuan ti vin tuarh tuarh mah se u Maṭhuama ṭhianpa erawhin a hruai chhuak lui ta tho.

"Ka nu hian inhnamhnawihna a neih ka ring lo" rawn titu chu u Rinzauva a ni a, a mitmengah chuan hlauhthawnna leh khawngaihna a lang nasa hle.

"Kei paw'n ka ring lo" u Maṭhuama chu ka en vat a, ka nu awm laia a ṭawng dan leh tuna a ṭawng dan chu inperhsan tak a ni.

"Ngaih ṭha deuhin awm rawh u" a ti leh sup a, dam ṭha em em tawh ang mai hian a awm a, a chal intuam vâr lûk te chu nâ a ti tawh lo hrim hrim zâwk emaw ni!

"A nih chuan ngaihdam min dil tawh teh; a nih loh paw'n i tihpalh thu tal pawh" u Rinzauva thu rawn sawi teh daih chu ka hrethiam lo khawp mai.

"Eng vangin?" a nau thu sawi chu u Maṭhuama paw'n a hrethiam bik lo a ni mahna.

"Min hnek vang khan máw le, ka pian tirh ata i kut thlak ka dawn vawi khatna a ni a, taksa lamah nâ nei tawh lo mah ila ka rilru erawh a la nâ lutuk, ka awm a nuam thei lo, i tihpalh thu tal sawi ang che" lungawi lo zeta a rawn tih leh chuan u Maṭhuama zâwk a nui suk a, ṭawng tum hmel pawh a pu tawh lo hrim hrim bawk.

"Min lo ngaihtuah viau em?" u Maṭhuama chu ka lam a rawn hawi daih a, ṭawngkâ paw'n ka chhang lo, ka lo buk khum nghat ringawt.

"Min sutu pawh kha an chhui chhuak thuai ang" ti leh supin a bula mu ve tur chuan min kuai a, mi dang mitmei pawh ka vêng buai duh tawh bik lo, a bulah chuan ngawi rengin ka mu ve ta hle hle.

SYLVIA ROMAWIZUALI

By

Havali Adam

Last Chapter

Doctor-in zan khat tal damdawi ina awm turin min ti a, hnial chî ah pawh ka ngai lo. U Maṭhuama erawh chuan a ṭhat tawh thu a sawi ram hmuk hmuk a, keimah zâwkin damdawi ina awm rih rawt lo ngat ila zawng Doctor thu sawi chu a ngaipawimawh kher lo mai thei a ni. Zaii leh a pate paw'n an ngaihtuah viau a, a naute ho nen lam nilêng deuh thawin an awm kim ṭhap a, u Rinzauva lah chu a lungawi loh hmel nasa mai si, ka nuih a tiza ru letling zâwk. Unau inchhangbung chiah tih takah u Maṭhuama pawh hian a kawm ngeih deuh berin ka hria, mahse a naute pahnih dang a en hran phah chuang lo.

Kan boruak chu a ṭha ka ti dâwn nge a chhia ka ti dâwn pawh ka hre lo, rilru hahna ka nei tawh miah lo va, mahse ka rilru a hahdam em em chuang der bawk si lo. Chawhnu lama u Maṭhuama ṭhianpa thu rawn ken chuan min ṭhawng leh ta zel a, darkar tin thu thin ṭhawng kan dawng mawlh mawlh a ni ber. Khatia a zana zana damdawi in lam kan pan hnu khan kan inah mi tu emaw a lo lut ru chu niin, chutah kan ina lo lut ru chu Chhani hmel hriat pa a la ni zui, kei min tinâ tura a chhawr a nih zâwk mah ang chu! A mak em em ka ti, min itsik reng te, ka hlim ve an phal thlawt lo te chu mak ka ti bâng thei lo.

U Maṭhuama ṭhianpa sawi dan chuan tukin khan an man fel a, Chhani pawh an man nghal a, ka nuhrawn leh ka nu; u Maṭhuama nu thlengin! Thil thlen dan zawng zawng ka ngaihtuah lêt a, ka hmeichhiatpuite tih atân chuan a awihawm lovin rapthlak ka ti tak zet. Chutah kei ve mai, nu leh pa pawh nei tawh lo leh nghal hi min er reng chu a ni si a, kei min hnuaichhiah an tum lutukna lamah sual lam kawng zawh a, a tawpa an chan chu an thil tihsual ang ngeia hremna hmuh a ni. Khami zan, u Maṭhuaman tawh sual a tawh zan khan damdawi inah kan kal lo ang tih ka hlau hnuhnawh tak zet, inah khan lo awm reng ila chuan ka thih loh paw'n ka nâ ngawt ang ka ring.

Thil thlen dan zawng zawng leh ruahmanna an lo neih dan zawng zawng chhui chhuah vek a nih hnuah chuan engkim a chiang ta, a zavaiin ka nuhrawn ruahmanna vek a ni a, Chhanin zep nei hauh lovin a sawi chhuak a, vanneihthlak takin ka nu chuan inhnamhnawihna engmah a nei lo hlauh bawk. Tin, ka pa thihna leh ka pite nupa thihna ah chauh ka nuhrawn chu a inhnamhnawih dâwn emaw ka ti a, a lo la ni chuang lo, u Maṭhuama that turin mi chhawr a lo la nei cheu a nih chu maw le. Thihna erawhin kan chungah ro a rêl lo hlauh zâwk a, ka nuhrawn mawlh chu rapthlak ka ti ngawih ngawih.

Chhui chhuah leh chuang tur pawh awm lova thil thlen dan zawng zawng a fiah vek tâkah chuan ka pa khan a dam laiin lehkha pawimawh a lo dah fel thlap tih kan hre chhuak leh ta zel a, ka ro zawng zawng tur nen lam, mahse ka nuhrawn suahsual lutuk avangin engmah ka lo hre lo chu niin, ka pa inrin loh laia a vaw thlu tih ka hriat nî phei chuan ka ṭap bâng thei lo. Chutah ka pite'n a thuruk an hriat avangin an in hial a halsak leh ta zel a, nu rapthlak tak chu a ni chiang e. Ka rilru a nâ tih hrethiam zet hian Maṭhuaman duat takin min buaipui a, min ṭawng thlamuan reng a, ka pa thih dan te, ka pite nupa thih dan te, engkim kha ruahman lâwkna vek a lo ni si, ka tuar thiam thei thlawt lo a ni.

Ka nuhrawn leh Chhani te pahnih chu tual thahnaa an inhnamhnawih avangin Court chuan dam chhunga lungin tâng turin thutlukna a siam fel ta, mahse beisei loh deuhin thil a thleng thung. Ka nuhrawn zâwk chu rei pawh a tán hmain a lo inawkhlum a, mak ka tih luatah sawi tur leh ngaihtuah zui dan tur pawh ka hre lo. Chhani phei chu mi â a ni ringawt, dik tak chuan ka khawngaih zâwk, eng ang paw'n khawngaih lova en liam mai mai tum mah ila ka thei lo a ni. Hun kal tawh ka dâwn kir a, hlim taka hringnun hmang ho thei reng si kha tunah chuan a ṭhen an thi tawh a, a ṭhenin mi pangngai an pha tawh lo va, a bul ber chu sual inhnehtir vang vek a ni.

Thla thar kan chuangkai a, ka rilru leh taksain hmasawn lam a pan zel a, chutiang bawkin u Maṭhuama pawh a ṭha tawh hle a, nâ nei tawh lo ang mai a ni. Ka ngaihtuah chian pôh leh pasalah ka lo nei lo ang tih ka hlau tawlh tawlh, ka thlakhlelhna a zual zel bawk a, amah avanga nui thei leh hlim thei, buaina leh harsatna tam takin min chiahpiah lai pawha hringnun duhawmna pâr mawi thliak thei turin min siam a, ka tân chuan hlim lohna chi ziazâng a ni lûl lo e! Min duat a, min ngaihven a, kawng engkimah min dah pawimawh hmasa ber zel a, ka pum chhunga nautê pahnih te ai pawhin min ngaipawimawh zâwk ṭhin.

Hun leh nîte a liam zel tâkah chuan ka nau neih hun a hnai tial tial a, u Maṭhuama ber a buai lutuk chu ka khawngaih a ni. Kan in, ka pa'n ka tâna a hnutchhiah chu a hmunhma zawng zawng nen lam sak ṭhat mêk a ni a, engkim u Maṭhuaman a buaipui a, in erawh kan la luah reng tho. A hna lamah a kal a ngai ṭhin bawk si, a buai mawp mawp thei khawp mai. A hna bán apiangin kan in sakna lamah a pêng ziah a, a endik ziah a ni ber ang chu! A nihna takah chuan kan in kan sa ṭha chu pawi ka ti miah lo, ka nuhrawnte nufa awmna hnuhma zawng zawng chu bo vek se ka duh a ni.

U Maṭhuama chu office dawrin kâr tawpah a chhuak deuh ziah bawk a, a dawr chhan pawh keimah vang bawk a ni. Documents felfai tak a awm tawh loh avangin min buaipuisak char char a, ni eng emaw zah a buaipui hnu chuan a tifel thei ta, mahse a duh anga awm ka tum bik teuh lo. Kan in sakna hmun, kan ram chu ka hminga awm tur a ni na meuh mai, mahse tunah chuan pasal ka nei tawh a, chu ram chu ka hming ni lovin ka pasal hming ngeiin awm se ka duh a ni. Tin, ka hminga dah a nih chuan nuam lo tihna leh inthlahrunna a nei ang tih ka hlau hrim hrim bawk a, pumkhat kan nih angin mipa zâwk a ni a, ani tluka mipa rin ka neih loh mai bakah ka tân leh lo piang mai tur kan fate tân ani tluka mipa ṭha hi chu an awm leh tawh kher lo ang.

Ka thutlukna a hriat zan phei chuan min hnial nasa hle a, mahse luhlul ka chhuah lui ve tlat thung. A ngaihah chuan a tlawmthlak viau a ni mahna, ka ngaihah erawh chu tluka thutlukna ṭha chu a awm bik chuang lo ang. A luhlulzia ka hriat ran avangin ka titau der ta tawp a, biak pawh ka be ṭha duh lo va, min ngaihtuah bawk si, ka khawngaih lek lek zâwk a ni. A tawpah erawh a hmingin ram chu kan dah ta nge nge a, dik tak chuan hmangaihna avang ka neih ni lo mah se kan inṭhen tawh dâwn lo tih ka chiang a, duh pawh ka duh satliah tawh lo, ka hmangaih em em tawh zâwk a ni.

"Lo lut rawh" ka ti lang lâng a, kawngka lam pawh ka hawi chuang lo.

"Eng vanga lo kal nge i nih?" u Maṭhuama aw khauh zet avang chuan ka hawi chhuak thuai a, ka ṭhu pangngai vat bawk.

"Haw la a ṭhat zâwk ka ring" u Maṭhuama bawk chuan a ti khauh leh ta hmuk mai, ka nu hmel erawh a zum dûkin ka hria.

"Eng nge i tih dâwn?" a taksa ka nghenna aṭanga awm sawn ka tum rualin a ti bul nghut a, ka nu lo luh laia TV kan lo en dun dan ang ânga awm reng chu a mawi chiah lo a ni.

"Thingpui ka va lúm ang chu ka ti" ka ti sep a, a mitmeng lungawi lohnaa khat chu en rei duh lovin ka nu lam ka hawi zawm ta daih a, ka nu chuan min lo en reng a, ani pawh ka en rei ngam der lo.

"A ṭul lo, heti hian awm hle hle rawh" a aw aṭangin u Maṭhuama chu a la lungawi lo tluang zel tih a hriat hle.

"Lo haw tawh ula Maṭhuam" ka nu chuan inthlahrun hmel deuh hian a rawn ti sep a, ka lo en thuai a, u Maṭhuama paw'n a en ve ngei ka ring.

"Kan chhuah dâwn zan khan ka sawi chian viau tawh kha ka nu" u Maṭhuama aw chu dam thum ruih ruih tak a ni; mak ti deuhin ka en phah hial!

"Kha te chu i thinrim lai a ni a, tunah chuan i rilru i thlak tawh ang chu ka lo ti asin" ka nu chu beidawng hmel zet hi a pu a, hmâna ka pasal nu, ka nu kha a ang tawh miah lo.

"I hre sual angah ngai mai rawh" pakhat lah chuan a lo ti awlsam dap a, ka nu chu ngawi reng hian kan in aṭangin a chhuak zui nghal bawk.

"I ti awm ang lo êm mai u Maṭhuam, thingpui tal kha lûm min phalsak ta che?" ka nu a chhuah tâkah chuan ka ti nghal tan tân a, ka mit taka en run chung hian

"Min nawrh luih tum suh Sylvia, nang leh kan fate himna tur a nih phawt chuan eng pawh ka ti ang, ka thisen zawmpuite chungah ngei pawh!" a ti thum chhal a, ka lo en kal ringawt.

"Ka chhhungkua in ni tawh a, ka tel lo chuan in famkim loh ang bawkin in tel lo chuan ka famkim bik lo, ka tâna pawihmawh ber chu ka chhungkuate hi in ni; a bikin nangmah" a tih zawm leh zat a, a mitah chuan a thutakzia ka hmu thei.

"Eng lo" ka tih laklawh lai chuan ka hmuiah a rawn fawp vang vang a, dawnsawn nuam tak zawng a va'n ni chiang êm, ka chhâng lét lo thei lo.

"Vawiin lam eng nge i lo án? I nuamsam maw?" a taksa khan chiala ka awm hle hle hnu chuan a rawn ti dam dap a, ṭawngkâ paw'n ka chhang lo, ka buk khum nghauh nghauh ringawt.

Ka lo muhil tlang daih a ni ngei ang, ka harh leh chuan khua a lo vâr vek tawh a, khumah ka lo mu fel diam tawh bawk. Ka thinlung zawng zawnga ka hmangaih em em ka pasal lam hawi zawnga inleh zui nghal ka tum a, mahse ka rai tih ka hre chhuak nghal thung. Ka mut dan ngai chuan ka mu ta hle hle a, zing dangah pawh ka ni ziah tho, ka harh tirha a lo la mut run hi chuan a lam ka hawi lo thei lo ṭhin. Ka lo muhil tlang leh daih chu niin, ka harh leh meuh chuan nî a lo chhuak vek tawh a, thil kang ri sur sur thawm ka hre zawm zat bawk.

Pindan aṭang chuan muangchang hian ka kal chhuak chhet chhet a, u Maṭhuama ngei mai chuan ei rawng a lo bâwl a, ka lung a dum hliah hliah a ni. Tukṭhuan kan ei lai chuan keimah ang lo takin awmpui lâk mai ka rawt a, a hah lutuk ka hlauh vang a ni pakhat. Ani lah chuan a lo duh lo nasa mai, ka khawngaih tih thlengin ka rilru zawng zawng a hre tlang vek a, phàt pawh ka phâ hman lo. Awmpui lâk ka duh thu ka sawi char char a, ani'n a duh loh thu leh ṭul a tih loh thu sawiin min hnial zel thung a, a duhna ah chuan a luhlul ve thlawt a ni. Chaw ei lai leh lai loh pawh sawi lovin ka titau ta ringawt a, min thlem leh dûk duk a, ka titau rei lo hle.

Kâr eng emaw zah a ral hnu chuan ka nautê paiin thla 9 hmel a hmu ta, nau hring thei reng dinhmuna ka awm avangin damdawi in lamah kan awm rih a, chu pawh u Maṭhuama ruahmanna vekin. Damdawi ina chaw ni lovin ka pasal siamsak ngei mai chu ka ei ṭhin a, min duat hliah hliah bawk si, ka hahdam ngawih ngawih hi a ni mai. U Rinzauva hmel kan hmu zeuh zeuh a, a rawn kal chhan tak hre ve lo mah ila thil thleng eng emaw tak chu a awmin ka hria. U Maṭhuaman a be hrang daih zel a, ka tân hriat ngawt theih ni hek lo le. Tlai khat chu u Rinzauva bawk a rawn kal leh a, u Maṭhuama chhuah lai tak a ni a, remchangah ka lá nghal vat bawk.

"Thil thleng a awm ti raw u Rinzau" ka ti deuh thâwr a, ka thu sawi awmzia a hre chat a ni ngei ang, min en rang khawp mai.

"Awm lo ve" chu thu chu a kâin sawi mah se a mitmeng leh a awm danah thil thleng a awm chiang tih ka hre thei thung.

"Ka hriat ve chi a ni lo em ni? Ka hriat ve chi a nih chuan ka hre duh, eng thil nge thleng?" ka tih leh chuan min enna ata a mit a lá sawn daih a, ka awm a tinuam lo zual sauh!

"U Maṭhuaman i hriat a phal lo alawm, i hre duh a nih chuan amah zâwt mai rawh" a rawn tih chuan hriat châkna hlirin ka khat nghal.

"Sawi mai la" ka tih paw'n a sawi duh ṭhak lo, a u thu chu a awih hle a ni ang.

Zan lamah chuan chumi chungchang vel chu u Maṭhuama ka sawipui ta ngei a, zawhna chi hrang hrang ka zawh kual fê hnuah min hrilh ve ta chauh a, eng dang a ni lo, ka nu chungchang bawk a ni. A sawi dan chuan kan laka a awm dan avang khan a inchhir a, a dam lo va, mahse damdawi ina awm a duh bawk si lo. U Rinzauva leh a naute hovin an buaipui mawp mawp ta ringawt a, in lama kal chilh turin doctor pawh an ruaisak nghe nghe a, keini pahnih ngaihdam min dil ngam tawh bawk si lo, dik tak chuan ka khawngaih ve reng, u Maṭhuama rilru lah a nghet tlat mai si a, a haw kum khua ang tih ka hlau ber.

Varṭian tak takah nau ka vei a, Doctor leh Nurse te chuan min buaipui zung zung a, u Maṭhuama pawh a che buai khawp mai. Nurse pakhatin a chhuahtir tawp nghe nghe a, Doctor chuan sang turin min ti ta, taksa a va han nâ duh tehreng êm. Nâ ti chung chungin ka sang a, ka theih tawp tak meuh ka chhuah a, pakhat zâwk chu ka sang chhuak thei mai a, mahse a dang a la awm tlat, huphurh tawh tak ka ni. Ka rilruin ka ṭawngṭai mawlh mawlh a, Pathian mai bakah ka nu leh pate puihna ka dil rilru mawlh mawlh a, a tawpa tawpah chuan him dam takin nautê pahnih ka sang chhuak thei ta.

Nautê pahnih te chu puanin an tuam zung zung a, ka ṭângah ngei an bei ve ve tâkah chuan ka lawm bawk si, ka lung a chhe bawk si, ka ṭap tawp ringawt. Nu dinhmun changa hringnun ka hmang chho tur chu ka lawm a, ka hlim piah lamah ka nu leh pa, ka pi leh pute ka ngai tak zet a ni. U Maṭhuaman kei leh kan fate pahnih min hmuh rual chuan kan awmna lam a rawn pan vat a, ka lo ṭah nuih hawk a, harsatna tam tak min paltlangpui hnua nautê duhawm tak pahnih ka hring chhuak thei chu ka hnukulh chhan ber pakhat a ni.

"Hei, i ṭha em? Ka lawm e, fapa duhawm tak pahnih min pek avangin ka lawm e" ngainatawm zeta nui chung hian a ti dam dap a, a chala ka chal a rawn sik rual chuan

"Ṭap tawh lo la Sylvia, kan fate hian mak an ti palh ang e" a ti hniam leh sup a, ka insum hman leh ta pek lo.

"Ka hmangaih che" tiin ka rilrua riak reng cu ka lo sawi chhuak ṭiau a, ka insût zui feih feih a, hlim huna ka ṭah a chhuak tlat chu hrehawm ka ti ru ve reng tho.

"Sawi nawn leh rawh Sylvia, kha thu, min hmangaih thu kha sawi nawn leh lûl teh, ka hre sual lo ti raw?" hamhaihnaa khat aw hian a ti phawlh phawlh a, amah a ang lo zâwk.

"Ka nunna, ka himna, ka hlimna, ka thlamuanna leh ka engkim i ni asin u Maṭhuam" ka ṭawng zawh rual chuan mi tihnât hlau zet si hian min kuah deuh thut a, a mitmenga hlimna dê sawr sawr chu ka hmuh hmaih lo nasa mai.

"Kei ang bawka min lo hmangaih ve hi ka lawm tak zet Sylvia, ka lawm tak zet a ni" a thu rawn sawi chuan min ṭhawng tih piah lam a ni; a hmelah erawh a fiamthu hmel hauh si lo.

"Ka awih lo" men pur chung hian ka lo ti a, min hmangaih ve ang maia a insawi chu ka awih lo a ni.

"Kei chuan kha ni, kan inneih nía kan thutiam kha engtik lai mahin ka sut ngai lo, min hmangaih theih loh ka hlau em em zâwk asin" a tih chuan ka ṭah nuih leh ta hak a, ani erawh a lo nui suk thung.

"Kei min hmangaih avanga ṭap ringawt thei ka nupui hi ka hmangaih em em che tih hre reng rawh" nuih za aw lam lek leka ti thum chhalin ka mittui chu a hru hul a, kan fate pawh a fawp ve ve a, ka hlimna chuan van sâng tak a tawng pha ngei ang.

Doctor te'n min buaipui fel hnu chuan kan chhungte an rawn lut sap sap a, tam lutuk luh erawh an phal lo thung. Nautê chu an en diat diat a, an zingah chuan ka nu erawh a tel ve hauh lo. Mi dang zawng an kim vek laia ka nu hmel ka hmu lo chu nuam lo ti bertu ka nih ka ring, a hun lai kha chuan ka hua a, ka ngei a, mahse tunah zawng hmangaihtu ka nei tih ka hriat tawh mai bakah ka nât hlaua min ngaihtuah em emtu ka nei tih ka hre chiang tawh a, ka laka ka nu lo chet tawh dan avang mai maiin ka hlim lo thei tawh lo a ni. Doctor thuráwn angin damdawi inah chuan zan khat kan riak a, kan fate pahnih mawlh chu an hmelṭha ta a ni.

Mipa ve ve an ni a, u Maṭhuaman a upa zâwk chu 'Lalnunsanga' tiin a hming a sa a, a naupang zâwk pawh 'Lalnunmawia' tiin a hming a sa zui nghal bawk. Damdawi ina zan khat kan riah hnu chuan in lamah kan haw a, Zaiin min awmpui nghal chawt a, kan in luah neitute paw'n min lawmpui thiam khawp mai. Ka nu hmel erawh kan la hmu lo tluang zel a, a taksa hriselna a pan tial tial tih ka hre phei chu ka awm a nuam thei tawh lo. U Maṭhuama hnenah pawh inpuia lén ka rawt ta fô va, ani ren run lah hi ka tân hi chuan fel viau mah se a luhlul mah mah a ni.

Thla a'n vei leh meuh chuan kan fate pahnih pawh an leikang chho ṭan viau a, an hmelṭha dun si, an lawmawm hi a ni tawp mai. U Maṭhuaman a pawm phei hi chuan an inang hlawm lutuk a, thla ka lâksak tawp zel. Tin, Zaii leh a nu leh pa te, u Rinzauva te unau leh ka mo puite pathum thlengin an rawn lêng ṭhin a, u Siami phei chu a ṭawng duh ber ṭhin. U Veni leh u Hlimi te pawh ka laka an awm dan avang khan an inchhir tih ka hrethiam vek, ngaihdam min dil hial réng a, ka lo ngaidam hmiah bawk. Ka nu hmel erawh kan la hmu lo tluang zel a, zan khat chu ngawi reng hian u Maṭhuaman kan nufa thumin min phur chhuak a, motor a tihdin hnu chuan inpuiah, ka nute in ngeiah kan lêng dâwn tih ka hre ve chiah.

U Maṭhuama nen ka nute room-ah kan lut tlang nghal a, Asangtea leh Mawitea erawh u Siami te'n an lo pawm rih a, ka nute room chhungah chuan keini pathum tih loh tûmah an awm lo bawk. Kan nupa hmel a hmuh ruala ka nu hmel chu ka khawngaih tak zet, a hmai a hup a, a ṭap a, hnem dan tur pawh ka hre lo. U Maṭhuama ni se a ngawi run a, ani talin hnem se ka duh a ni. Khuma ṭhut chhoh ka tum chu ka kutah a rawn vuan a, ṭhu mai mai turin min melh tih ka hrethiam nghal bawk.

"Ka nu" a fapa aw a hriat rualin ka nu chu a insut ri feih feih a, hrehawm ka ti ru tak zet.

"Min ngaidam hram teh u" inchhir zet hian a rawn ti thâm chhal a, a hmelah zawng zawng nen lam a inchhirzia chu hmuh hmaih theih a ni mawlh lo.

"Hahdam deuhin awm tawh teh ka nu, kan laka inthiam loh reng pawh a ṭul hran lo, mahse nangmah leh nangmah i inngaidam thei tawh lo mai thei a ni" u Maṭhuama aw chu hriat a nuam viau na a, ka nu ṭah a tichhuak zual sauh thung.

"Ni e, min ngaidam ta pawh ni ula in laka ka awm dan khan min chenchilh reng tawh ang a, keimah zâwk hi ka inngaihdam theih pawh ka ring tawh lo" tiin ka nu chu a insût ri feih a, khawngaih viau mah ila sawi tur leh hnem dan tur ka hre chuang lo.

"Asangtea leh Mawitea te pahnih ka va lá lawk ang e" tih leh ka bula mi chuan thawh a rual nghal a, ka nu nen chauh kan awm ta.

"Min ngaidam rawh aw Sylvia, Maṭhuama khan a lo sawi dik chiah a ni. A tir tê aṭang khan Ruati thu sawi zawng zawng ka lo awih vek ṭhin a, thu dik a nih leh nih loh pawh ka ngaihtuah ngai lo. A hranpa takin huatna che ka nei lo tih leh mo atâna duh lohna che ka nei lo tih min hriatsak hram dâwn nia, min ngaidam thei lo a nih paw'n ka dem miah lo ang che, a hun lai khan ka lo nasa êm mai" ka nu inchhir leh pawi ti hmel chuan min tinâ vawng vawng thei.

"Ngaihdam min dil a ngai lo ka nu, dik tak chuan ngaihdam che harsa ka tih ka ring a, mahse i duh vang renga khatianga che kha i ni hleinem, ṭhian dik lo kawm palh hi a lo pawi êm a nih hi! Ka nuhrawn zia chu ka hre chiang ve alawm, a hun lai khan a tlawn hârh harh che ang a, i rilru a hneh theih nân ṭha tak angin i lakah a awm ang a, chu chu a tih ṭhin dan a ni. U Maṭhuama sawi ang khan inthiam lo duh tawh suh, huatna che kan nei lo va, inngeih tlâng takin awm tawh zâwk ang u" khaihlak miah lova ka tih chuan a rawn thaw chhuak ham ham a, a ṭah a chhuak tih pawh ka hre reng.

"A nih chuan hetah in lo lêt leh tawh dâwn tihna em ni?" beiseina mitmengin min en ran a, a zawhna erawh keia lo chhan chî niin ka hre lo.

"Chu tak chu u Maṭhuama thu thu ni rawh se" ka tih zo hman ṭâwk ang tihah u Maṭhuama leh kan fate an lo inpawm lut a, a túte hmel a hmuh rual chuan ka nu chu hmui hup meuhin a ṭap leh ta nge nge.

"An hmelṭha dun lutuk" ka nu chuan a ti thei hram a, a ṭah zawm leh nghal a, kan fate pahnih erawhin ka nu awm dan chu mak an tih hmel khawp mai.

"Zanin tlai chu hetah chaw kan ei ang a, zanriah ei kham hnu lamah kan haw mai dâwn a nia" u Maṭhuaman a tih chuan ka lo bu nghat a, chutah ka nu bawk chu ṭap titih hian a rawn ṭawng chhuak leh ta.

"In hrang chang lovin lo haw leh tawh ula ka duh ngawt mai Maṭhuam, min ngaidam a nih chuan lo haw leh ngei ang che u" ka nu a ṭawng zawh rualin u Maṭhuama ka en nghal a, a chhan dan tur ka ngaichang a ni ber.

"Heta kan awm leh awm lovin kan ngaihdam leh dam loh che a hril hleinem ka nu, tunah hian kan awmna in tur changtlung zâwka sak mek a ni a, rawn lêt leh kan tum tawh lo, chumi avanga kan inkar a chhiat phah kher ka ring lo bawk" u Maṭhuama chhan dan chu ka ṭawmpui thlap nghal.

"I pa i lo chhún tak zet e, chhún tak i ni. Ni e, ka sawi tawh lo ang, in lo lêt tawh dâwn chuang lo tih ka hre chiang tawh e. Min chhuahsan rih teh u, keimah chiaha awm ka duh" a tih tâkah chuan ka nu chu kan chhuahsan a, khawngaih loh tum mah ila ka thei dâwn chuang lo tih ka hria, ka tum buai duh lo law law a ni.

U Hlimin Asangtea zâwk a pawm a, u Venin Mawitea a pawm thung a, u Siami nen ei rawng kan bâwl dun daih a, kan bâwl dun lohna a rei ve tawh bawk nen sawi tur kan ngah dun khawp mai. Sitting room lamah mipa hovin eng eng emaw ni an sawi ho va, u Rinzauvan lêt tura a sawmna chu ka hre pha reng a, u Maṭhuama rilru erawh lungpui ding nghet tak ang mai a ni. A hnu lawkah tihpalh thu sawi turin a ti leh a, u Maṭhuama paw'n a tawpa tawpah chuan a sawi ve ta nge nge bawk.

Zanriah ei hun a rawn ni a, u Hlimin ka nu a va kai tho va, ka nu pawh zanriah ei turin a lo chhuak ve mai a, a hmel mawlh chu hmâna ka nu ni ṭhin hmel kha a ang tawh lo tak zet. A cher kuam a, a biang a ki sâwt em em bawk a, kan laka a inthiam loh hmel nen lam kei leh u Maṭhuama tân chuan hmuh hmaih theih a ni lo. Zanriah kan ei chhung zawngin Asangtea leh Mawitea te pahnih chu an muhil a, an muhil lo ang tih a hlauhawm zâwk, harh se zawng chaw ka ei tui thei miah lo vang. Chaw ei khamah erawh a hun tak hria ang mai hian an rawn harh ve ve a, Asangtea zâwk a ṭap a, hnutê tui ka pe thuai a, Mawitea erawh u Maṭhuaman a pawm thung.

Zan dâr 9 rik hma hretin kan haw a, kan haw lam chu kan kal lam nen a inang lo ngei mai. Ka rilru a dam huai a, a veng hawk a ni mah zâwk ang chu! In kan thleng a, kan fate pahnih chu an muhil fel leh vek tawh a, nausen tak tak an la ni bawk a, mut an duh miah miah dun khawp mai. Kan fate an muthilh tâkah chuan ka bulah a rawn mu nghal thuai a, min ngaih thu leh min hmangaih thu hi chu a sawi zen zen ngai lo va, mahse tunah chuan a chetzia ah a lantir ṭhin tih ka hre tawh thung. Mi rilru nghet tak a ni a, damdawi in kan awm laia min hmangaih thu a sawi kha dam chhung daih a ni tih ka hre chiang em em tawh bawk.

KUM 1 HNUAH CHUAN

"Vawiin lam eng nge kan án a?" ka pasal hna bâng thu rawn sawi hmasak ber chu min ngaihtuahna thu bawk a ni leh ta, he pa hi chu a danglam thei ngai dâwn lo a nih hi!

"Awi, i inla duat vel ê, thla 4 er awr chauh a la ni a, chuti teh vaka ngaihsak tur pawh a la ni rih lo" keimah ni lovin Zaii zâwkin a lo chhang tan tân a, u Maṭhuama chuan a hmui a pet sawi nasa ngang mai.

"Pathlawi ngaizawng khan min lo chhang suh" Zaii huat tur tâwk chiah hian a rawn ti a, a rukin ka lo nui kur kur ringawt, sawi tur hre ve hek lo.

"Ve a che! Nang ai chuan a ṭha fê zâwk, a pá daih zâwk bawk. A nê pawh i tluk lo, 'pathlawi' tih pawh khan ko tawh bawk suh" duham zet hian Zaii chuan a ti tawn tawn a, u Maṭhuama erawhin engah mah a lo ngai lo thung.

"Pathlawi a ni tlat si alawm, a pa tê si, engtin nge i duh theih zâwk? A áwm tho e, hmelchhe ve ve in induh tal a, a zia alawm" a nghal thiam vel lutuk chuan min tinui dir char char thei.

"Zak teh, i fate pawh hi ka pawm tawh hauh lo vang, ka vel ṭap ziah tawh dâwn" chhan ngaihna hre tawh lovin Zaii chuan a ti ta ringawt.

"Ka zawhna kha i la chhâng miah lo" u Maṭhuama chuan keimah min rawn en ta daih a, ka nui tawp riai riai zui nghal bawk.

"Ka ṭha, Zaii sawi kha a dik reng alawm, thla 4 vel chauh a la ni a, ngaihtuahawm ka ni hran lo" ka lo ti ṭha ve mai a, a office bag nen ka bulah a rawn ṭhu thla chu a ni mai.

"A bulah pawh hian ka awm peih rih lo, ka sawi leh i sawi inang reng si, i sawi kher a awih leh bik tlat ang a, a ngaihtuah bawk che a, ei rawng bâwl miah suh Sylvia, amah kha báwltir vek rawh" ti tawn tawnin Zaii chu a kal sawn a, a la lungawi chiah lo a ni ngei ang.

"Chhaih kawlh kher ṭhin lo la, chuan a ngaihzawngpa chanchin pawh kha sawi tawh suh, a lungawi loh êm kha, i chhuah chhiatsak thei si" ka tih chuan

"A pa tê ém alawm, ka beng pawh a chen lo" a la ti hram a nih chu!

"Pa tê mah se sawi chhiatsak tawh miah suh" ka tih leh chuan a ngawi zui ve mai a, ei rawng bâwl tura thawh ka tum chu min chelh bet leh ta tlat mai.

"Inbual ila" a aw ri chu a dang daih a, min tlawn tih ka hrethiam nghal bawk.

"Nau ka pai leh tawh hi aw, nupa nun hman a chî rih loh" ka lo ti thung a, a rilru te zawng ka hre chiang ve tawh êm mai a!

"Ka mamawh che alawm, i kawr hak inhmeh zet hi ka phelh châk" chu thu a sawi zawh rual chuan nâ vak lo hian ka nam dâk deuh awrh a, a rawn la nui sun sun zui.

"A nih zaninah tal" a ti leh hram a, ka nui tawp ringawt.

"I fel leh fel loh a ni mai" tih chiahin ka chhâng a, ka tho zui nghal daih a, a awm dan vel chuan ka nuih a tiza ru khawp mai.

A inbual zawh hnu chuan ei rawng min bâwlpui mial mial a, a rilrua awm ka hre chiang ropui mai si, Zaii lahin a hrethiam ve der si lo. Chaw eia ka sâwm tlai tak a ni a, tun ṭum chu ka sâwm fuh khawp mai, naupang pahnih pawh a timu daih! Khatia College a Graduate hnu khan Master zir zawm lovin B.Ed a training zawm ta zâwk a, a training zawh veleh hna a hmuh nghal mai ka ring. Kei erawh nu ka ni tawh miau a, lehkha zir zawm tih velin ka rilruah hmun an chang thei tawh lo hrim hrim. Ka pasal leh kan fate bak ngaihtuah ka nei tawh lo va, u Maṭhuama tak phei chuan zir zawm turin min ti leh zauh ṭhin a, ka laka a inthlahrun vang a ni ber e.

Nau ka neih aṭanga kum khat tal tawp chhung zawng khan Pathian malsawmna kan dawng nasa hle a, ka nute nen pawh boruak chhia kan nei tawh lo va, kan inpawh em em tawh zâwk a ni. A changin kan inah an rawn lêng a, a changin keimahni zâwk kan lêng bawk a, engkim chu Pathian malsawmna vang ka ti lo thei lo. Kan awmna in thlengin, ṭha taka sak pumhlum zawh a ni thei chu lawmawm ka ti tak zet. Khang hun lai, kan in an sak lai kha chuan hlauhthawn rukna kha ka nei nasa ṭhin a, min itsiktu an lo awm palh ang tih kha ka hlau ru thei hle a, mahse Pathian zârah tun thlengin buaina leh harsatna kan tâwk ngai tawh lo thung.

Zanriah kan ei kham a, u Maṭhuama chu a phur sârh sarh hle a, a che reng reng chu zan dang a ang hlawl lo. Kan in-check-up nî khan Doctor-in nupa nun hmang zing lo turin min hrilh vek tawh a, kan insum rei ve tawh viau bawk chuan ka hria. Zaii a haw ta maw tihah naupang panih a awi mû nghal a, mak ve tak chu a ruala pawm chung hian a awi mû thei tlat ṭhin; keiin ka theih loh tehreng nen! Kan fate paw'n an ngai réng a, a office bâng te hi thei leh thei lovin an pan ruak ruak a, ka mitah chuan a mawiin a hmuhnawm ṭhin tak zet a ni.

"Muhil ang le" inmamawh tawn taka nupa nun kan hman dun hnu chuan a ti sup a, kan thawk dan pawh a la pangngai chiah lo.

"Kan intifai phawt dâwn na nge?" ka tih chuan

"Tifai lo mai ang" a lo ti ve mai a, a hmel chu ka en reng a, a hmelṭha chiang a ni.

"I hnapthlenga hmul ṭo siar siar hi i inhmeh reuh ê, a dang zawng erawh ziat fai vek rawh, a tilang bawrchhawr dáwn tlat che" ka tih leh niah niah lai chuan a lo nui suk a, kei pawh ka nui ve tho.

"Aw le pi ber, ka nunah hi chuan nang tluka thu hi an awm lo" tiin a âwmah min kuah bei hle hle a, a sawi ang chiahin kei pawh ka nunah ani tluka thu an awm lo va, ani tluka hlu an awm lo bawk.

The End

Aw le, 'SYlVIA ROMAWIZUALI' tih thawnthu chu in zârah kan lo khawr pumhlum ve leh ta reng mai, zan 17 lái min ṭawiawm avangin in zavaia chungah ka lawm em em e.........