SYLVIA ROMAWIZUALI By Havali Adam (Page 1)

Author's Note - Story FB lama mi kha ka Blog-ah hian ka lo suan lut lo tih ka hre chhuak chiah a, ka dah lut nghal hmak e!

Hello Hello...Ka lo kir leh ta e.... 

Chutih rual chuan thawnthu sei lutuk a ni dâwn lo tih lo hre sa phawt ula.......

Tin, hetiang lampang thawnthu hi, Arranged Marriage, ka vawi khat ziahna emaw ka lo ti char char a, mahse a lo ni miah lo. A ṭhen chuan in hriat tawh tho ka ring, kha...'HMINGHLUI' tih thawnthu kha...khami kha hetiang lampang tho hi a ni a, Youtube-ah ngaihthlak tur a awm tawh nghe nghe a, ka Story Group lamah chhiar theihin a awm reng bawk a, mahse Chapter 2 vel lék a ni thung. Ka sawi tum ber chu he thawnthu hi Arranged Marriage lam ka ziah vawi hnihna a ni.

PROLOGUE 

"Awi, tihpalh lutuk" tiin ka tho thuai a, a sutu zawk mah ni la ka mipa sut chu a tlu ve lo nasa mai, a tawlh sawn deuh hrut ringawt.

"Nangmah elo Sylvia? Kei pawh duh aiin ka thleng har, ka hmanhmawh tawh lutuk, kal vat ang" rawn titu chu Zaii lek a lo ni a, min be lo se chuan ka hmu miah lo ang.

"Kan kal nghal mai ang u Maṭhuam" ti leh nghalin a bula mipa ding chu a melh chho vâh a, kei pawh ka hawi ve nghal a, lo su tlu chi ziazâng ka ni lo tih ka hre chhuak chiah, a pa lian ṭha hem hem khawp mai.

"Kal r'u, kei pawh ka'n lét ang e" tiin chupa chuan a lo chhang a, amah a pa lian bawk a, a aw pawh a sin lo reng reng, zaipawla bass part sa tur áwm vel a ni.

Zaii nen chuan step-ah kan kal chho nghal thuai thuai a, first semester chiah kan la nih avangin kan kalna pawh a la rei lo. Kan College hi Hrangbana College a ni a, dik taka sawi chuan a hmunhma vel hi a rem teh chiam lo ka ti, kawngpui a hnaih si. Test tur kan neih avanga hmanhmawh em em kan ni bawk a, Zaii nen hian kan inhriatna a la rei lutuk lo va, mahse inkawm tur tak ka ni te pawh a ni mahna. Kan inhmuh hmasak ber nî aṭangin kan inkawm ngeih nghal em em a, kan thil sawi duhzâwng leh kan thil ngainat zâwng; kan thil ei duhzâwng chenin a inang deuh vek a tih theih a, kan subject core tur a lo inang lehzel bawk nen kâr khat hnuah phei chuan inngaina tawh tak kan ni.

Test chu ka chhang chhe hran lo va, Zaii pawh chuti tho chu! Dar 4 velah in ka thleng a, a lo reh deuh duak a, ka unaunu Chhani a la haw lo tih ka chiang a, ka nu erawh hna a kal loh avangin a awm ngei ka ring, mahse a hmel ka hmu mai lo. Ka pa ve thung chu a lo haw tlai mai thei, zú a rawn rui haw leh ngei bawk ang, ka chiang a ni. Ka room-ah lutin ka inthlak a, ka chhuah leh chuan ka nu hmel ka hmu ta ngei a, bathroom aṭangin a lo chhuak chiah a, in chhung ka luh tirh khan a lo inbual vel mêk a nih hmel. Min be lo va, ka be bik lo va, nufa inngeih tak chu kan ni lo ve chiang a ni. Ka nuhrawn a ni a, chhia leh ṭha ka hriat hnua ka pa nupui a nih vang pawh a ni mai thei, 'ka nu' tiin ko ṭhin mah ila ka naupan laia min thihsantu ka nu dik tak ang khan ka ngaina thei chuang lo. Chung erawh ka pa ka hrilh ngai lo va, amah ka nu hrawn pawh chu ka hrilh ngai chuang lo hei lo va, ka rilruah ka pai tawp a ni mai.

________________________xxxxxx_________________________

A va'n hun lo ém, a hun lo tak zet, hlawhtlin pawh ka la hlawhtling ve hleinem! Engati nge nang lehzelin min kalsan!? Ka pa ruang bawh chuan ka ṭap khur ngawt ngawt a, nu leh pa dik tak nei tawh lo ka ni tih ka inhriatna chuan ka thinlung chhung a chhun ngut ngut a, chuti teh thuta ka pa'n min boralsan chu ka hrethiam thei lo a ni. Ka nu pawh a ṭap nasa hle a, ṭah hla eng eng emaw ni hi a chham mawlh mawlh a, Chhani erawh a hmel ka la hmu miah lo. Kan inah chuan veng chhung mipui an ṭhu khat hnûk a, lusun hla sain an zai dual dual a, ruang awmna lama thingpui an rawn sem te chuan in châkna ka nei rih hlawl lo a ni. Ka neih chhun, ka thisen zawm dik tak awm chhun ni tawh ka pa'n min boralsan leh ta si a, ka nu min thihsan nî ai paw'n ka tuar nâ zâwk! A chhan chu kum ka tling tawh a, nu leh pa chan nâtzia ka hrethiam tawh tlat a ni.

"A pawi êm mai Sylvia Bawihi, engati nge i pa hian min ngaihtuah ve miah lo le, engtin nge a tel lovin awm thei se min tih reng reng?" ka nu chuan min kuah chung hian a ti lawm láwm a, chungte chuan ka ṭah a tichhuak zual.

____________________xxxxxx___________________

"Arsa hi kg 1 eng zat man nge?" aw ri ka hriat rual chuan ka ngaihtuahna aṭangin ka harh chhuak thuai a, ka awm dan chu a mawi lo ka ti rilru hle bawk.

"250 a nia, kg eng zat nge i duh ang ka pi?" aw leh hmel zawng zawng nen nêlawm takin zawhna ka zawt lêt a, ka hmaa ding chu nu valai rual vel a ni a, nui chung hian

"Kg 2 min lo sah mai ta che, a man pawh a laklawh lo deuh ang" a rawn ti a, bu nghatin buk lung bula sa sah chem chu ka ban a, ka sat nghal zung zung a, hnehsawh min tih hmel khawp mai.

Min dawrtunu a kal liam hnu chuan mi dangin min rawn dawr ve leh nghal a, inrinni a nih avangin min dawrtu an ṭhahnem ve ang reng a, inrinni tin hi chu a ni ziah hrim hrim. Bazar pawh an tam pangngai viau a, zing kâr aṭang tawh mipui bazar an inkalpel suau suau a, mahse keini tân chuan mipui veivak an tam pôh leh hlawkna a ni thung. Khua a thim hnai a, Pathian zârhah ka bula mite hralh loh lai paw'n ka inhralh char char a, arsa sah ngai bawk, buk ngai bawk, polythene-a funsak ngai bawk, puitu ka nei bawk si lo, ka indaih lo lek lek zawk a ni. Kâr tluanin arsa ka zuar a, inrinni te hi chuan haw hma ve ka châk ṭhin. Chu bakah inkhawm zan te a ni a, inkhawm hman ila chuan ka inkhawm ngei ang maw le. Khua thim ṭan tawh mahse min dawrtu an awm reng tho va, ka sat zo chiah tihah ka sat leh nghal zel a, mi ṭhenkhat hi chuan min khawngaih vang hrim hrimin min dawr ṭhin tih ka hria. A chhan chu hmeichhia ka ni a, ka bula sa zuarte mipa vek an ni a, ka khawngaihthlak viau te pawh a ni mahna le.

"Lo kal rawh, kg eng zat nge ni ang? Hei, a bawp lai vel hi a ṭha asin, i duh chuan a thla lam pawh a awm tho" en mang lovin min rawn dawr tum nia ka hriat chu ka lo be zung zung a, ka kut tháng vel ka hru fai laklawh êm bawk a ni.

"Nang maw!?" ka hmaa mipa ding hmel ka hmuh rualin ka ti sep a, keima hriat tâwk vel lèka ringin ka ṭawng a, ka thusawi chu a hre pha kher lo mai thei.

"Eng nge i duh ang? Ka sawi awmzia chu kg engzah nge ka sah ang? Eng zat nge i duh?" ka ṭawng hrim hrim chu ka inringtâwk lo tak zet!

"Kg 1 aw ni ang?" a ngawih reng avangin keimah zâwkin ka ti leh a, mi pawh en chuang lo hian a bu nghut a, a bawp lampang chu láin ka sat ve nghal mai bawk.

Cheng 300 hi min pe a, kir tuma pawisa ka lâk lai chuan a lo kal daih chu niin, a chet dan vel chu mak ka ti ru khawp. Arsa sàta ei ka zawn hma kha chuan zingtin deuh thaw kan inhmu ve ṭhin, chu pawh Zaii u a nih avangin, mahse unau dik tak an ni lo. Zaii nu leh a nu unau an ni a, a hming pawh ka la hre ve reng. U Maṭhuama a ni a, sawrkar zêm zenin officer a ni a, Zaii min hrilh dan chuan kum 25 a nih laiin a inziak tling daih tawh a ni áwm e. Chawhmeh leia rawn bazar ṭhin mi hrang hrang; hna sang tak tak thawk te hi ka awt ru ve ṭhin, anni chu an hlawhtling tawh bik a, nun nuam tak an hmang bik a, ka awt ru ngawih ngawih. Kei ve chu ka nu hrawn sual lutuk azârah arsa sata ka inhlawh a ngai a, a fanu; ka unaunu ni bawk Chhani erawh nuam thei ang berin khawvel nun a chen a, mahse ani kher chu ka awt lo khawp mai.

____________________xxxxxx___________________

"Sylvia, pawm tawp mai rawh, sawrkar hna a thawk leh nghal a, a chawm thei dâwn lutuk che. I nu hrawn sual zet sala tán kumkhua i duh zâwk em ni?" ka pi thil sawi chuan ka rilru a tibuai zual, rilru sen ngaihna pawh ka hre lo.

"Duhin ngaina tal ila chuan pawi ka ti lo, mahse duhna chhe tê pawh ka nei si lo alawm ka pi, chu bakah ka ngaihtuah che u alawm" ngaihtuahna hmang ṭha mumal thei lova ka tih chuan

"Keini te chu i pu nen kan ni a, ngaihtuahawm kan ni lo. Nangmah hi, nangmah ber hi i ngaihtuahawm, nakin zelah i la buai dâwn chauh!" a rawn ti a, thaw hakin ka pi chu ka en tlawk tlawk ringawt.

"A cousin pawh kha i ṭhiannu a ni lo'm ni? Hmelhriat sa leh kawm ngeih sa i nei a, i tihsual ka ring lo Sylvia. I nei duh a nih chuan i pasal tur hi nu leh pa thu awih mi tak a nih hmel a, kei chu i tân a ṭhat ber ka ring tawp. Nge ni a, i nu hrawn leh a fanu hmuhsit rawn nih reng i la duh zâwk tho? Pasal i neih chuan i pasal hnathawh avang ringawt paw'n an en hniam mai mai tawh lo ang che, ngaihtuah chiang rawh" a rawn tih zawm leh mawlh mawlh a, ka rilru a va'n buai tak êm, a sawi dik tho bawk si.

"U Maṭhuama ber kher leh nghal, a mi tak ren run si" mit khap fuk fuk pahin ka ti leh hram a, ka pi chu a nui nasa ngang mai, a nuih chhan erawh ka hre lo hrim hrim.

Ka laka ka nu hrawn inlulin nasat dan ngaihtuah chuan pasal neih ka hreh pawh a ni hran lo, mahse pasal lo nei dâwn ta pawh ni ila u Maṭhuam ber kher a ni a, amah a lian si, thim zingah phei chuan a hlauhawm lek lek zawk ang. 

____________________xxxxxx___________________

SYLVIA ROMAWIZUALI

By

Havali Adam

Chapter 1

In chhung ka luh rualin ka nu âng hlak hlak thawm ka hre nghal a, dar zat ka en zeuh a, ei rawng bâwl hun a ni tawh a, mahse ka nu chuan pakhat mah chawhmeh a lo la siam miah lo thung. Ka room-ah lutin ka thawmhnaw hak lai chu ka thlak nghal sawk sawk a, ei rawng bawl turin ka chhuak zui leh nghal bawk. Ka nu bulah chuan ka va phei a, án hla eng eng emaw ni a kâ aṭangin a chhuak char char a, a damsam vak lo bawk nen a âng tui khawp mai. Fridge aṭangin anṭam têl khat ka lá chhuak a, chawhtawlh tê ah tuiin ka sil mial mial a, ka thing per ṭhawt ṭhawt a, chhum hán chi a nih loh avangin kán ka tum sa hrim hrim a, ka nu mood fuh lo phun reng erawh ka hre hne ṭan lek lek tawh. A mizia ka hre chiang a, a phun peih ve thawkhat tih thlengin ka hria, mahse a chang hi chuan ngaia neih a har ka ti ṭhin.

Ka nu hi ka nu dik tak ni lovin ka nuhrawn a ni a, ka pa nen an inneih tirh te kha chuan a fel ve lutuk, kum tam a vei hnuah erawh a mizia dik tak a rawn chhuak ka ti mai. Hmuhmawh a ngah chho tial tial a, a phunchiar tawlh tawlh bawk a, mahse tun thleng hian ka pa nen an la innei ve char char tho. Ka nu ni tura ka pa nuipui a nih ṭan tirh lai kha chuan kum khat tal tawp vel kha chu ka ko duh ngai lo va, ka nêl loh vang leh ka rilru sual vang pawh a ni lo. Kha tih hun lai kha chuan la upa lutuk lo mah ila naupangchhia ka ni tawh lo va, engkim ka hrethiam ve vek tawh a, 'ka nu' tia koh ai chuan mawl biak tawp te kha nuam ka ti zâwk a, ka ngaih a tiṭha zâwk ṭhin bawk. Ani pawh khan min duat em em ṭhin a, ka mawl biak paw'n engtin mah min ti ngai lo, mahse kum 10 chuang kan inhrawn tâkah chuan a mizia dik tak a rawn lang a, tun hnu hian a der vekin min lo duat ṭhin tih ka hrethiam ve chiah.

Tin, ka nu hian fanu a rawn chhawm lut a, nuthlawi fa nei tawh leh pathlawi fa nei tawh an innei a nih ber chu! Ka nu dik tak kha ka ngai ru vawng vawng ṭhin, khawvela a awm chhung kha ka hmu rei lo em em a, a bulah pawh duh ang thâlin hun ka hmang tam hman lo a ni. Kum 9 mi ka nih kumin min thihsan a, khang hun lai kha chuan naupang mai ka la ni a, tawrh dan ka thiam em em lo. Ṭah erawh ka ṭap nasa hle thung a, ka pa'n kum khua leh chatuan pawha ka nu hmel kan hmuh tawh dâwn loh thu min hrilh avang khan ka ṭap nasa a, a thih leh thih loh lam pawh ka ngaihtuah tawh lo, ka nu hmel kan hmu tawh lo vang vang tur kha ka phal thlawt lo a ni ber. Hun liam zel ang bawkin keimahah chhia leh ṭha hriatna a rawn awm chho ṭan a, ka pa'n ngaihzawng neiin tuna ka nu, ka nuhrawn ni mêk chu nupuiah a nei a, a ruka ka nu ka ngaihna erawh a reh thei ngai chuang lo.

Ka vanduai ve hrim hrim ka ti dâwn nge pawh ka hre bik lo, ka pa nu leh pate hi an boral ve ve tawh a, ka pa ni se fapa mal a ni a, ka nu lah fanu mal bawk, mahse ka nu nu leh pate erawh an la dam ve ve thung a, min duat ṭhin khawp mai. Kawng engkimah an theih ang ângin an hmangaihna min vur a, ka pa nen pawh nupui a neih leh hma kha chuan kan lêng ziah ṭhin. Ka thawmhnaw tur te, ka school kalnaa ka chawhmeh pai tur te, thil tê ber aṭanga a lian ber thlengin an ngaihtuah fai vek a, ka pa pawh hian ka tâna an thil tih ṭhin chu a hrethiam ve mai zel bawk. Chu bakah mipa a nihna lai hi a lang lo thei lo va, a fanu hmeichhia ka ni bawk si, ṭhan thi neih hun chho lai vel phei kha chuan ka pi hlirin min rawn buaipui a, phone-in min be reng a, ka taksaa danglamna awm kha ka hriatthiam loh a hlau ni berin ka hria.

Ka nuhrawn nena an inneih hnu aṭang khan engkim a danglam zo va, an inneih tirh lamah kha chuan an innêl ve lutuk, mahse kum a'n vei bek bek a, an inkar a ṭha lo tial tial a, ka nuhrawn paw'n ka pa bula rêl bawng bawng changte a ngah chho ṭan a, ka pa mai ni nâng, a ṭhian kawmte bulah pawh a rêl ṭhin zâwk hial maw le. Lungawi lohna nei hlek se ka pi leh pute a sawi chhuak ziah a, kánkài lohna turah a kángkâi zel a, ka pa erawh a dawhthei ka ti ru viau ṭhin thung. A ngawi mai a, a dawh mai zel a, a lungawi lohna a rel fel hnuah ṭha takin a titipui daih ṭhin. A chang chuan ka pa zâwk hian nupui ṭhen leh a hlau ni berin ka hria, ka nu'n a ánkhum bawrh bawrh te hian dawhthei ka ti lutuk, hmeichhia zâwk leh nghalin a ánkhum hmarh hmarh a, mipa ṭhenkhat chu ni se kut an thlak loh paw'n an ngaithei teuh lo ang.

"Khaw'nge Chhanhimi? A lo haw ve nghal lo lehpek em ni?" ka nu aw chu a hma anga hriat reng ninawm kha a ni tawh lo va, a inâng lûngdam deuh tawh a nih ka ring.

"Ka hre lo reng reng, kan bán lai kha chuan ka hmu ngei a, mahse kan SU nen an inphur daih" ṭha taka ka tih chuan

"I ṭawng dan lah hi mahni unaute ér ran ang mai, pangngai deuh te paw'n a sawi theih alawm, khatiangin mi bulah sawi reng reng suh ang che, lerh lutuk leh pharvar lutukah an ngai mai ang asin" a rawn ti daih a, ka nihna ni lo puiin min ngai leh ta ringawt e.

"Zanin tlai chu nangma'n ei rawng bâwl vek law law mai teh, ka awm a nuam lo riau, ka va mu lawk teh ang" tih leh kal a rual nghal a, ei rawng bâwl ṭhang lutuk angin a insawi ve tak na a, kei ai a bâwl tlém fê zâwk!

Tlai dar 5 rik dâwnah daih Chhanhimi a rawn haw a, a ri phar phar a, ka unaunu mah ni se a chang hi chuan ka ning ṭhin khawp mai. Ei rawng a bâwl ngai lo chu thuhran ni se, a pharvar lutuk leh in chhunga a awm hle hle thei lo hi ka ning ber. In chhunga a awm lah hian engmah tih a tum ngai bawk si lo, ka nu'n a ṭan hlur a, ka pa zilhna te hi dawng khât bik tak a ni. Kei ve thung chu ka pa zilhna aiin ka nu zilhna ka dawng ngun zâwk a, ka dawng zing malh malh ṭhin khawp. Tin, kei ang thovin nula te a ni ve a, in chhungkhura chêt tumna eih a nei lo te hi a mi an loh thlak, che tur chu a ni asin maw le. Keimah hian ka awl hneh hrim hrim zâwk a, thisena inzawmna kan neih loh vang a ni ang kan inan loh em em, ni lo se chu ka pa zilhna aṭang ringawt pawh hian insiamṭhatna tham a tling tawh.

Zanriah ei laiin ka pa a rawn haw ve thung a, chaw ei lai leh lai lo pawh sawi lovin ka nu'n a lo án khum nghal bawrh bawrh a, ka pa ni se zú rui tih takah ṭhutthlenga mut a rual nghal a, zú in tawh lo turin kei ngei pawh hian a fâlin ka hrilh nasa tawh lutuk, mahse awmzia a la awm thei lo tluang zel. Kum 2 liam ta vel lawk aṭang khan zú in a ching ṭan a, a hna bán apiangin a rawn rui haw ta ziah a, ka pi leh pute paw'n an zilh fô va, awmzia erawh a awm tam lo ṭhin khawp mai. Ka nu chuan ṭhutthlenga a mu lai chu a va kal chilh a, chaw ei pahin ka melh ru reng a, ka hma zawna ṭhu Chhanhimi chuan enghelh nei lo zet hian chaw a ei mial mial thung. Ka pa chuan a ning deuh a ni mahna, kal ngil hlei thei lovin an room-ah a luhsan daih a, ka nu chu a la áng zui hram a, chaw ei chhung zawngin a án chhunzawm tluan ṭhak bawk.

"Ka nu bulah engtin nge min lo sawi a? Ka chungchang hi pakhat mah lo sawi ve tawh suh, i thu a awm lo" thleng ka sil laia rawn titu chu en pawh ka en peih lo, tu nge a nih ka hre chiang lutuk.

"Ka fiamthu lo tih hria ang che, kan SU nena kan awm dun thute i lo hrilh vel a, nangmah avang hian min hauh ve phah ziah, engmah sawi tawh suh ang che" mi thàm lo aw zeta a rawn tih leh chuan ka insum thei ta bik lo.

"Ka hmu miau si che u alawm, chu bakah i nu'n min zawt tlat a, ka hmuh ang âng ka sawi a ni mai" ka tih deuh hmak hmak chuan

"I nu a!?" a rawn ti ve leh nghal a, ka ṭawng sual tih ka inhre chhuak thuai a, chutianga thil sawi chu ka tum lo hrim hrim, ka ṭawng sual palh chiang a ni.

"Nu! Lo phei teh, vatin! Romawizuali hian 'ka nu' pawh a ti duh tawh vel che a nia, lo phei vat teh" a fanu kohna a hriat rualin ka nu chu a lo phei ta ngei a, an va han inang nufa tak!

"Chhanhimi sawi hi a dik em?" ka nu chu ka en kar a, eng thu pawh sawi ila a fanu a ṭan leh zâwk dâwn tho tho.

"Dik e" pangngai tak chuan ka ti mai a, an lam ka la hawi lo hrim hrim a, thleng ka sil laklawh miau hek!

"Enga!?" tih leh mi kawih her dâwr a rual nghal a, chutianga a chet thut chu ka ring lo bawk nen ka tluk phah ṭep nghe nghe.

"I va zak lo ve, ka chawmhlawm i nih hi i hria em? Vawi khat mah sawi tawh reng reng suh, i hria em?" a ti vin ṭhawt ṭhawt a, ka en kar lai chuan

"I hria em ka tih chû Romawizual?" tih leh ka hmaia ben rik sawk a rual a, min bêng nâ thawkhat bawk a, ka thle chiang kher mai.

"I pa'n zilh hrep che se la a ṭha ang, fanu suaksual lutuk a nei che hi chu ama tân mai ni lo keini tân pawh a buaithlak zo vek. I duh leh ti khan i pi leh pute han be leh la, han vui kual vel leh la, i pite ve lah khi an rethei si, rawn ngaihven chhen tur che pawh an ni lo" a tih zawm nghal hlawk hlawk a, a va han ṭawng hnem hman tehreng ém.

"Ka thil tih ngai loh leh ka nihna lo pûiin min sawi suh" chu thu chauh chu ka sawi ve hman, min rawn beng thle leh sawk a nih chu!

"Min va zah lo sâwt em em ve le Romawizual, hre rawh, i pa ka hrilh khawp ang. I awm dan chut chut te lah hi, i ngawi ang kur a, dawhtheih hmel tak leh nunném hmel tak te hian i awm vel a, i lerh ru viau lo maw? Nakinah chuan i la rai hial ang ka ring, nangni ang hi chu a rukin an hur duh, mipa paw'n eng atân mah an ti lo" a thusawi zawng zawng chuan ka thaw a tichham mai dâwnin ka hria.

"Ka nu!" ring zet hian ka ti vin vak a, ka rilru nâ lutuk chu ka hmui a khur dat dat a, ka nu ni lo se chu ka thinrim êm avangin ka sual duh hial ang ka ring.

"Khati pawh khan min ko suh, i zak lo lutuk Romawizual, zak lo tak i ni. Min vin lét ngam vel tawh a nia, i pi leh pute bakin an zirtir che pawh ka ring lo. I kal ngun bawk a, nungchang ṭha lo tak tak i rawn hawh phah a nih hi!" a thusawiin mi tithinrim lutuk chu ka kut ka hum ruh vak ringawt.

"Khaw'nge kal i tum?" ka kal sawn tur chu ka bânah a rawn chelh chat a, ka phih thla sawk zui nghal bawk.

"Ka duh dûhna hmunah, thleng kha sil chhunzawm rawh u. Chhani nangma'n sil ang che, i pian tirh ata i sil áwm pawh ka la hre lo" ka ti ve ta salh salh a, Chhani aiin ka nu zâwk a rawn thinrim leh ta.

"I va han zak lo tak ém Romawizual, i pa'n vaw hrep che se la a ṭha ang. I duh leh chhuak daih rawh, i tel lo paw'n kan awm thei chiang em mai" ka nu thusawi chu hre lo ang hmakin ka kal hmawk hmawk a, room-ah lutin bag nen ka chhuak leh nghal a, ka che vel hrim hrim chu min en duh nufa khawp.

Kawngpui ka thlen rual chuan ka ding chawt a, mittui tling pamin ka thaw chhuak ham ham a, ka ṭah chhuak ru viau mah se ka nuhrawn te nufa vang mai maia ṭah ka tum lo bur thung. Kan buaina dan chu ka ngaihtuah lét a, dik lohna ka nei ve tho tih chu ka pawm thlap, mahse ka nu kha a ṭawng nasa ve êm bawk a ni. Ka pa lah a mu tlat bawk si, engmah a hriat ka ring lo. A harh hunah erawh ka nu'n a chhe thei ang berin ka awm dan a hrilh leh ang a, a phuah belh leh ngei bawk ang a, Chhanin a lo tuihnih zel dâwn tih thlengin awm lo mah ila ka hre tlang nghal vek, a chhan chu ka tawng ngun tawh lutuk. Engtin pawh min sawi se ka engah mah a thawk tur a ni lo, ka nu dik tak leh ka unaunu dik pawh an ni hleinem, ka sual lét hman teuh zia kha! Ka nu anga ngaiin zah lo ila chuan ka sual lêt chiang viau ang, chutianga dawhthei tak pawh ka ni bik hleinem.

Kalna ber tur pawh hre lovin ka dinna ngaiah ka ding reng a, ka ngaihtuah ka kawm melh melh a, haw leh ringawt ai chuan ka pite bula kal ka ti tlu tak zâwk bawk. Taxi pharin ka pite vêng lamah kan tlan nghal a, riah erawh ka tum lo va, haw leh ngei ka tum zâwk a ni. Anni thusawi avang mai mai khan ka haw loh phah dâwn teuh lo, thisen zawmpui ka la nei alawm le, mahse ka pa bula ṭhat an chhuah der thiam dun lutuk ṭhin hi a awihawm loh zâwk. Nupui ṭha ber, pasal te ngaihtuah ber leh fanu fel ber ang tak hian an awm thiam tlat a, ka pa mit an dawi â zo hneh ṭhin khawp mai. Ka pite in kawtah chuan ka chhuk a, zawhna min zawt dâwn tih ka hre lâwk vek a, mahse kan boruak ṭha lo tak chu sawi kher ka tum lo, ka pa paw'n nakinah; a harh hunah min rawn biak ve leh mai ka ring.

In chhung ka lut chu min lo en deuh hâw a, an pahnih chiahin an awm a, in lêng an nei lo a nih hmel. Chutah kum 70 ral kai ve ve tawh an ni leh nghal a, mahse an la hrisel ṭha dun khawp. Ka kal chhan chu min zawt ta ngei a, thil dang daih ka sawi a, ka pi'n ka hmai a sen thu a sawi chuan ka phu hman teh e! Darthlalangah ka inen vat a, a lo sen tak tak. Ka nu khan nâ zetin vawi hnih lai min bêng kha a ni a, sen àwm reng pawh a ni. Ka hmai sen chhan lam pawh sawi zui pui duh lovin thil dang ka sawipui a, ka nui lui vel vak vak a, ngaih ṭhat lohna an nei paw'n ka hre ta bik lo. A tirhah kha chuan min en chik dun viau a, thil nih dan dik tak sawi ila chu an thin a rim khawp ang. Ka pa demna ai mahin ka nuhrawn zâwk an sawisel ang a, ka pa hi chu rei pawh an sawisel ngai lo. Thiam lohna em em hi a nei lo ve ṭhin bawk reng a, a fel vek chu ka ti lo, mahse mi sual tak erawh a ni lo hulhual a ni.

Darkar chuang ka awm hnu chuan ka pi'n an ina ka lén thut chhan min zawt nawn leh ta ngat a, thu dik tak erawh ka hrilh duh bik lo. Ka ngaih thu chhuanlamin thil dang sawipui phet ka tum a, min zawt zui lo thei hram bawk. Ka pu chuan riak nghal daih turin min sâwm a, ka 'aw' hmak! Kan in aṭanga ka chhuah lai leh Taxi-a ka chuan chhung khan riah tumna ka nei hran lo, mahse tunah erawh ka phur thut a ni ber. Ka pite inah hi chuan kan in angin mikhual room a awm hranpa lo va, ṭhutthlengah ka mu mai zel a, hrehawm tihna pawh ka nei chuang lo. Kan inah te chuan mikhual room nen lam a awm thlap a, pâwn lam mite tân zawng awhawm tak a ni mai thei, mahse a lan ang ngawt a ni si lo. Kan in ni lo se chu ka nuhrawnte nufa vang ringawt paw'n awm reng ka châk lo, mahse a in neitu dik tak zâwk kan ni miau a, an thuhnuaia kun ka tum lo bur.

Dar 1 velah ka pa'n min rawn be ta ngei a, a harh pangngai tawh a nih ka ring. Ka awmna min zawt a, ka sawi ve mai a, ka nute nen kan intihthiam loh leh loh loh min zawt leh a, ka pite hriat hlau takin kan inchhan deuh thu ka sawi a, a thaw deuh hak a, min hruai tura lo kal a tum thu a sawi nghal bawk. Riah law law ka tum thu ka sawi thuai a, pakhat mah min chhang tawh lo va, sawi tur hre lova ka ngawih reng lai chuan a hmet tawp daih a, a lo kal ngei ka ring. Ka nuhrawnte nufa erawh an mu tawh a ni ang, ka pa nena kan inbiak lai khan an rawn dîk dak lo êm mai. Ni lo, Chhani chu a la muthilh kher ka ring lo, phone khawihin a meng reng zâwk ang. Zingah a tho har leh ang a, buai phili vakin a insiam leh sawk sawk ang a, chutiang vel chu a awm ṭhin dan a ni. Engtin pawh awm rawh se, keia lo ngaihtuah ve vak tur pawh a ni lo.

"Riah ka tum tawh asin" ka pa hmel ka hmuh rualin ka ti nghal a, ngawi reng hian ka bulah a rawn ṭhu a, zú rim a la nám khawp mai.

"I pite an mu tawh em ni?" pangngai deuhin a ṭawng a, a rui a reh fel vek tawh a ang.

"Mu tawh e, chaw i ei tawh em? I harhna a la rei lo ti raw?" ka tih chuan

"Ka ril a ṭam lo" a rawn ti a, mahse ka awih lo, a ril a ṭam ngei ka ring.

"Ka pite hian eng nge an hmeh le, lo kal rawh, chaw ei ka siam ang che" tih leh thawh ka rual a, room aṭangin ka pite nupa an rawn chhuak chiah bawk a, kan thawmah an harh a ni hrim hrim.

"I lo kal elo? Engati nge nangni pahnih hi in lo kal thut ve ve a? In in chhungkhurah buaina a awm em ni?" tiin ka pi chuan ka pa a bia a, ka pa erawh ṭawng tum lo ang maiin a ngawi reng thung.

"Zû i in a ni maw? In tawh suh ka tih che kha Biaka, engati nge i in leh ṭhin?" tia ka pa betu chu ka pu zâwk a ni a, ka pa pawh a inthlahrun hmel ta sawtin ka hria.

"Nia, ka'n lem leh zeuh alawm maw le. Va mu leh r'u, keini pawh kan haw nghal mai ang" ka pa aw chu a dam raih a, eng ang paw'n rui chhe mah se ka pu a zahzia hi chu engtik lai mahin a tilang lo ngam ngai lo.

"Chaw ei te kha in sawi a ni lo'm ni? Nangni pahnih hi chaw in la ei lo ve ve a ni maw?" ka pi zâwk a rawn ṭawng zawm a, ka pa chu a ngawi leh ta daih.

"Ni lo ve ka pi, ka pa hian chaw a la ei lo va, eng nge zaninah in hmeh? Hetah ei mai rawh se, ka va siam ang" tiin choka lamah ka kal nghal a, ka pi chuan chokaa lo luh pah hian

"Sa ṭhing a la awm mai thei, dal chhum a awm bawk ang a, chuti teh lûain chawhmeh a awm hran lo" a ti siam siam a, chawhmeh bêlte chu ka en kual dên den zui nghal bawk.

"Eng buaina nge in neih a Sylvia? I pute hriat loh lai hian min hrilh teh, i nu nen in inhau nge i pa a rui sual zâwk?" ka pi zawhna chu hre lo lui der hmakin thlengah chaw ka khawrh chhuak a, ka bánah a rawn vuan ta chat!

"Sawi teh Sylvia, keini lakah hi chuan zép leh thup nei suh u, engkim ka hre vek duh" a tih leh chuan thawk ka la hak a, zanriah ei laia ka pa lo haw dan te, chaw ei khama kan inchhan buai dan zawng zawng nen lam ka hrilh ta vek a, ka thawl hawkin ka hria.

"Chutiangin nute an chhang pawng pawng ngai hleinem Sylvia, ngawi mai mai ta che" thil thlen dan engkim ka hrilh hnua a thu rawn sawi chuan ka rilru tinâ ru hle.

"Vawi hnih lai min bêng asin, ka diknaah chuan ka chhang zel tawh ang. A hma kha chuan ka chhang ngam ngai lo va, dik vek emaw an intih phah reng bawk a, dik lohna leh ṭhat lohna an ngah lutuk" ka ti ve ta piap piap a, ka aw chu a vin mah mah mai thei a ni.

"Mai mai ṭhin che hian, chhang lêt lovin i pa hrilh mai ta che, i chhan lêt zel chuan in boruak a ṭha lo tulh tulh zâwk ang" ṭawng tawh lovin ka ngawi ta daih a, ka ṭawng a nih chuan ka thinrimna ka thunun thei lo mai ang tih ka hlau a ni.

"Pa, lo phei la, chaw lo ei rawh, ka siam vek tawh" ka tih lang lâng chuan ka pu nen an rawn hawi rual a, rei ṭhu tawh lovin an lo phei ve nghal mai bawk.

"A va tui dâwn ve, hmarcha min lo lâk teh Mate" dawhkan hnuaia ṭhutthleng pawh chhuah pahin ka pa chuan a ti hluai a, a ril a ṭam ru khan ka hre réng a ni.

"Zanin chu hetah riak ve ve mai rawh u, haw kher a ngai tawh lo, a tlai mah mah tawh, khi zing dar 2 a ri hnai mai dâwn, i hria maw Biaka?" ka pu aw chu a dam ruih a, thupe aw paw'n a be lo, en lem lovin ka pa pawh a bu ve nghut tho.

"Kan mutsan ang che u, puan sin tur awmna kha chu in hriat vek kha aw Sylvia, lo inbuaipui mai rawh u, zing ṭawngṭai inkhawm kan la ngai bawk si" min betu kapi ka buk khum nghat nghat hnu chuan an kal sawn a, zan rei a ni bawk a, thawm chu a reh duak tawh.

"Ka ei ve leh si dâwn" ti thutin thleng ka lá a, ka pa chu a lo nui suk a, a nui hmel ka hmuh khât tawhzia ka hre chhuak nghal.

Kan pafa chuan ka pite chaw ei bang zawng zawng leh an chawhmeh ei bang zawng zawng kan ei zo vek a, ei tui dun tak kan ni. Ka pa phei chu puar angin insawi mah se a puar tak tak ka ring lo, kan inah khan zanriah a ei lo leh nghal. Thleng ka sil laiin kan mutna tur ṭhutthleng a lo dawh zawm mial mial a, a siamrem zawh chuan phone khawihin a ṭhu ngawi run zui nghal bawk. Kan in lama awmte pahnih ka ngaihtuah chhuak thut a, ka pa nen kan riak sawn daih tih an hriat hunah chuan an lungawi lo leh mai mai ang chu! A bikin ka nu, ni lo, ka nuhrawn zâwk maw le. Amah khan 'ka nu' tia ka koh pawh a duh lo deuh tlat tak alawm, duh lo na ná na chu ka ko châk vak bik hleinem. Thleng ka sil zawh chuan ka pa chu ka va en zauh a, a lo mu ṭha pangngai tawh a, a mut erawh a chhuah vak ka ring lo.

"Mu tawh la, i mit a chhe mai ang" bawkkhup paha phone ka khawih laiin ka pa chuan a rawn ti thum dap a, ka dah ve nghal mai bawk.

"Zú hi in tawh lo teh pa, a ṭha lo êm mai" kan ngawih dun vang vang hnu chuan ka ti a, che miah lo mah se a la muhil bik lo tih ka chiang.

"Nghei ka tum a, ka in leh zauh ṭhin alawm le" zángthalin kan mu ve ve a, eng nge a rilruah awm ka hre miah lo, kei erawh a inawm pawlh nasa hle.

"I tum tak tak lo a ni ang, tum tak tak la chu i in teuh lo, a hma paw'n i in ngai reng reng hleinem" ka ti deuh charh charh a, ka inhrethiam lo, ka rilru a no ringawt a nih chu!

"Engtin nge i nu nen chuan in lo inchhan a?" ka thusawi mil lo zet hian a rawn ti daih a, min en run tawh bawk.

"Min bêng lo se chu chhan vak pawh ka tum lo, chu bakah ka insum thei tawh bik lo a ni e" ka ti salh salh a, la thinrim ru tak ka ni.

"Thil dang min hrilh loh i la nei em?" a tih leh chuan ka kut ka hum ruh vak a, amah hnungchhawn zawngin ka inlet thawk a, kan rizai sin lai chuan ka inkhuh zui nghal daih bawk.

"Mate" hmána ka pa min duatna awká ka hriat fô ṭhin ang maia ném leh dama min kohna ri chu ka rilru tino zualtu pakhat a ni a, ka insum zo lo tak ngial dâwnin ka hria.

"I lakah i nu hi a sual viau em ni?" tih leh ka dara rawn chelh a rual a, ka ṭap chhuak ta feih feih a, a hriat miah lova kan awm ṭhin dan zawng zawng ka ngaihtuah chhuak hnuhnawh bawk nen ka ṭah chu chhuak zual tak a ni.

"Ṭap lovin min hrilh ṭha la, ka lo ngaithla ang" min be reng lo se ka duh zâwk, hmána ka pa kha a ang si, min duat tak tak emaw ka ti mai dâwn, tunah chuan hun kal tawha mi ang kha a ni tawh si lo.

"Sawi pawh ni ila awmzia a awm chuang lo ang" ti ṭiauin ṭah ka insum ngawt ngawt a, ka hnung lam aṭanga min rawn kuah chiah chu ka puak keh vek ni mai hian ka hria.

"Ka tihpalh Mate" a âwmah min kuah nghet sauh a, insum kàrna nei miah lovin ka ṭap zui nghal hlawp hlawp a, mahse ka ṭap ring tak tak ngam lo thung.

"Ka nu kha ka ngai" ṭap chung chuan ka ti chhuak thei hram a, ani erawh a ngawi reng a, ka ṭah zawh hun a nghak ni berin ka hria.

"Kei pawh hian ka ngai ṭhin asin" rei fê kan ngawih dun vang vang hnuah a rawn ti sup a, a lam hawi zawnga inlet thuaiin a hmel ka en chho vat a, a lungngai hmel lutuk chuan ka mittui a ko chhuak leh ta nge nge.

"I ngai ve ṭhin maw? I ti tak tak em? Dawt i sawi lo ti raw?" ka ti mawlh mawlh a, a âwma mi kuah bet pah hian

"Ngai e, ngai lutuk, ka ngai tak zet, zanin pawh hian ka ngai asin" ka pa aw pawh tunah chuan a dik hlei thei ta bik lo, a ṭah a chhuak te pawh a ni ve mahna.

"Ṭhen mai rawh, ka nuhrawn hi ṭhen mai rawh pa, kan hlim tak tak chuang lo" rilru chhe zet pú ang maiin ka ti ta thlawt a, engmah a rawn sawi leh tawh lo va, ka thil sawi dan hrim hrim chu a mawi lo tih ka hre ve tho, mahse ka pa bul a ni miau a, mawi leh mawi lo ka dâwn hman lo a ni ber.

Phone ri ral ral thawmah ka harh zawk a, ka men chuan khua a lo vâr vek tawh a, ka pa nen inkuah chialin kan lo la mu dun reng a, ka mut chhung zawnga rizai lúm nuam tak sin ang maia ka inhriatna chhan kha ka pa ka kuah vang tih ka hre chhuak nghal bawk. Awm sawn pawh ka tum chuang lo va, ka pa phei chu a la harh lo hrim hrim. Tih harh hlau takin a muhil hmel chu ka en vawng vawng a, a taksa chhungah chuan khawharna meipui alh hluah hlauh awm ang mai hian ka hmu a, mahse chu meipui alh hluah hluah chu tihmit dan ka hre si lo. Ka pe hmel chuan ka ngaihtuahna a tikal thui hle a, zú a in chhan te, engkim chu ka nu ngaia a khawhar vangah ka pu ta ber mai. A che deuh hrut a, a harh dâwna ka hriat avangin muhil ang tak chuan a âwmah ka bei leh hle hle a, phone chu a la ring reng bawk.

"Hello" ka pa aw chu a ṭial hniam ruih a, min la kuah reng a, muhil der tih takah ka mut a chhuak hlei thei tawh miah lo leh nghal.

"Ka dah" tih leh hmeh tawp a rual a, a taksa sia awm reng ka nih avangin rawn betu chu ka hai lo, zing kâr aṭang paw'n án hla a chhak chhuak thei a nia, engtin nge a theih zâwk reng reng ni!

Ka harh leh meuh chuan zing dar 7 a lo pel fel daih tawh a, ka lo muhil leh chu niin, ka pa erawh ka bulah hmuh tur a awm tawh lo thung. Choka lamah a aw ri ang deuh ka hria a, ka hriat chian chuan amah ngei a ni e. Ka pi leh pute nen an pathumin an lo titi a, tukṭhuan kan ei nghal ngei ka ring bawk. Ka pa chuan phone call a dawng deuh reng a, mahse a pick up duh chuang miah lo. Dar 8 pelh hret velah chaw kan ei ta ngei a, kan in létin ka ei tui, ei tui tak ka ni. Chaw ei khamah ka pa nen kan inphur chhuak a, class kal ka ngaih avangin ina haw ka ngai a, ka pa pawh chuti tho, hna kal a ngai a, kan ina haw chu kan hreh ve vein ka hria, ka hre sual mai thei bawk. Kan in kawt kan thleng a, ka pa nen ni lo phei ila chuan luh ka peih lo zual ngawt ang ka ring. In chhung kan lut a, chaw an lo ei mêk a, ka nu chuan min va han melh rum mai mai tak!

"Khaw'nge in kal vel à? I fa bik chu i duat hle mai maw? Kan inneih dâwn khan i en hran loh tur thu i sawi lâwk vek a, mi bum i lo thiam hle mai" a mi biak zâwk ni lo mah ila ka nu thusawi avang chuan za lo zetin ka nui sak ringawt.

"Biaka, ka thusawi i hre miah na nge?" ka nu bawk chuan a rawn ti leh a, ka pa lah ngawi rengin room lam a pan daih si a, kei pawh ka pa ang chiahin ka room-ah ka lut zui nghal.

"Engati nge hetiang hian kan nufa chungah i awm?" college kal tura ka insiam zo ka chhuak chu ka nu ṭap thawm ka hre hmasa ber a, ka pa bán vuanin a ṭap khur ngawt ngawt a, a ṭah tak tak pawh ka ring lo, lemchang a ang ka ti mah zâwk.

"Insiam la, hna i kal dâwn chuan i tlai ang e" ka pa chuan a ti duh lek chauh a, a aw a dam thlup a, huat tur pakhat mah a awm lo, mahse ka nu chuan a haw tlat si.

"Min lo hmangaih ve tak tak miah lo a nih hi! Ka dam ṭha lo tih i hre reng a, min ngaihsakna thumal khat pawh i ká aṭangin a chhuak reng reng lo" a ti hlawk hlawk a, kei chu kawngkapui ka thleng phei der tawh.

"Mate, Chhani lo nghak rawh, in pahnihin ka thlah ang che u" ka pa min biak dan chuan min tihlim ru viau a, ka sual vang nge pawh ka hre lo, ka nu chu chawh ka ti ni maiin ka hria, ka tân zawng a sual se ve êm bawk a ni.

"Chhani, i hman tawh dâwn em? Kan nghak che aw, ka va thlah ang che u" ka pa biakna a hriat rualin Chhani pawh chuan

"Ka hman ṭep, ka insiam mêk, ka hman a ni mai" a rawn ti ṭha pangngai ve mai a, an nufa inan lohna pakhat chu a hun laiin eng ang paw'n thinrim mah se Chhani zâwk hi a thinrim rei lutuk ngai lo ve teh tlat a, chawhma lamah in hmu thiam lo mah ila chawhnu lamah chuan kan inbe ṭha leh viau ṭhin tho.

"Vawiin chu i hna kal lo leh phawt mai rawh, i la pangngai lo êm mai, ka lo haw hma thei kher ang em ka hre lo" tiin ka pa chuan ka nu chu a bia a, a mi biak erawh a lo ṭeu hlar thung.

"I mi ngaihsakna ka mamawh tawp lo ve, i duh leh lo haw hma la, i duh leh lo haw tlai la, i thu thu, nang ka lo nei che hi ka inchhir lutuk" a ti hlawk hlawk a, ka pa chu a ngawi mai mai a, kei pawh pâwnah ka chhuak ta daih.

Rei lo tê hnuah Chhani leh ka pa an lo inzui chhuak a, ka pa chuan a fanute pahnih chu college kawt thleng min thlah ta ngei a, an office lama a tlan liam rualin Chhani chu a kal sawn nghal hmak bawk. Ṭhiante lah hi a nei thei phian lawi a, kan inang lo khawp mai. Kei ve thung chu ṭhian siam harsa chi ka ni thung a, ka sual vang leh ka khirh vang ni paw'n ka hre lo. Tin, ngawichawi leh ṭawng duh lo viaua min ngai hi an tam a, mahse chutiang chu ka nihna a ni bik miah lo. Keima tâwkah te chuan ka ṭawng duh ve lutuk alawm, min be lumlám peih hi an awm tam lo mai zâwk a ni. Chhani che vel hrim hrim chu ka en zui reng a, thisena inzawmna nei lo ni mah ila ka unaunu a ni tlat a, mipa a láwm mah mah ka ti, ka lo hlauthawng ṭhin a ni ber e. Ngaituah zawm vak duh lovin ka inher a, college building chhungah chhoh tumin ka inher zui nghal bawk.

"Awi, tihpalh lutuk" tiin ka tho thuai a, a sutu zawk mah ni la ka mipa sut chu a tlu ve lo nasa mai, a tawlh sawn deuh hrut ringawt.

"Nangmah elo Sylvia? Kei pawh duh aiin ka thleng har, ka hmanhmawh tawh lutuk, kal vat ang" rawn titu chu Zaii lek a lo ni a, min be lo se chuan ka hmu miah lo ang.

"Kan kal nghal mai ang u Maṭhuam" ti leh nghalin a bula mipa ding chu a melh chho vâh a, kei pawh ka hawi ve nghal a, lo su tlu chi ziazâng ka ni lo tih ka hre chhuak chiah, a pa lian ṭha hem hem khawp mai.

"Kal r'u, kei pawh ka'n lét ang e" tiin chupa chuan a lo chhang a, amah a pa lian bawk a, a aw pawh a sin lo reng reng, zaipawla bass part sa tur áwm vel a ni.

Zaii nen chuan step-ah kan kal chho nghal thuai thuai a, first semester chiah kan la nih avangin kan kalna pawh a la rei lo. Kan College hi Hrangbana College a ni a, dik taka sawi chuan a hmunhma vel hi a rem teh chiam lo ka ti, kawngpui a hnaih si. Test tur kan neih avanga hmanhmawh em em kan ni bawk a, Zaii nen hian kan inhriatna a la rei lutuk lo va, mahse inkawm tur tak ka ni te pawh a ni mahna. Kan inhmuh hmasak ber nî aṭangin kan inkawm ngeih nghal em em a, kan thil sawi duhzâwng leh kan thil ngainat zâwng; kan thil ei duhzâwng chenin a inang deuh vek a tih theih a, kan subject core tur a lo inang lehzel bawk nen kâr khat hnuah phei chuan inngaina tawh tak kan ni.

Test chu ka chhang chhe hran lo va, Zaii pawh chuti tho chu! Dar 4 velah in ka thleng a, a lo reh deuh duak a, ka unaunu Chhani a la haw lo tih ka chiang a, ka nu erawh hna a kal loh avangin a awm ngei ka ring, mahse a hmel ka hmu mai lo. Ka pa ve thung chu a lo haw tlai mai thei, zú a rawn rui haw leh ngei bawk ang, ka chiang a ni. Ka room-ah lutin ka inthlak a, ka chhuah leh chuan ka nu hmel ka hmu ta ngei a, bathroom aṭangin a lo chhuak chiah a, in chhung ka luh tirh khan a lo inbual vel mêk a nih hmel. Min be lo va, ka be bik lo va, nufa inngeih tak chu kan ni lo ve chiang a ni. Ka nuhrawn a ni a, chhia leh ṭha ka hriat hnua ka pa nupui a nih vang pawh a ni mai thei, 'ka nu' tiin ko ṭhin mah ila ka naupan laia min thihsantu ka nu dik tak ang khan ka ngaina thei chuang lo. Chung erawh ka pa ka hrilh ngai lo va, amah ka nuhrawn pawh chu ka hrilh ngai chuang hlei lo va, ka rilruah ka pai tawp a ni mai.

Author's Note : Naupang exam lai a nih hlawm avangin ka regular thei rih lo va, min hrethiam hram hram zel mai a ni ang chu! Exam an han zo ang a, third term te a nih ve tawh bawk si a, kan picnic pui leh zuai ang a, chumi zawhah chuan rilru thawl hénháwnin thawnthu lama ka insawrbing theih ka ring.

SYLVIA ROMAWIZUALI

By

Havali Adam

Chapter 2

"Ei rawng bâwl ang che, ka bâwl dâwn lo a nia" ka nu aw chu a kha fák ka ti mai, mahse âng hlawk hlawk ang kha a ni lo tal a, pawi ka ti lo daih zâwk.

"Ka bâwl dâwn alawm, ka'n inbual ve lawk ang e" pangngai deuhin ka ti ve mai a, a ṭawng tawh dâwn lo emaw ka tih lai chuan

"I inbual hma khan bâwl rawh, chaw kan ei tlai lutuk palh ang" a rawn ti leh hmarh a, chhang lêt lovin ka ngawi reng a, inbual erawh ka tum tho.

"Romawizual, ka ṭawng kha i hre miah na nge? Nge i hre lo der zâwk? Min runluih tum duh suh, ka mood a fuh tehchiam lo a nia, ka hrilh ang che khan ti mai rawh" ṭawngkam ṭha taka mi biak a thei thlawt lo a ni mahna le.

"Bàwl ka harsat chuang lo va, ka inbual zawha bâwl mai ka lo tum zâwk asin" ka ti dêk dek a, min melh rum khawp mai.

"A ṭul lo, i inbual zawh hnu chuan cream i inhnawih rimtui kual leh vel emaw ang a, chawhmehah i rim a nam vek ang. Khatiang kha ka duh ve lo, i inbual hmain bâwl zo vek phawt rawh" min ṭawngkhum dan chuan ka lái a khei leh ta zak a, mahse buaina chhuah ai a thusawi zawm chu ka tum ta zâwk.

Fridge hawngin chawhmeh ka en dîat diat a, pârbâwr leh alu chu ka lá chhuak a, kán pawlh ila a tui viau ka ring. Phuihnam ka lá chhuak bawk a, a khá ém lo turah ngai ang. Gas ka rén avangin phuihnam zâwk chu cooker-ah ka phit a, chumi chhung chuan pârbâwr leh alu ka zai mial mial bawk. Ka nu inthlak zo lo chhuak chu ka lo en zawk a, rei lo mah se min melh rum dan chu pui tak a ni. Nizan aṭang tawh a mood a la fuh lo char char a, tun lai chu a mood a fuh lo zual hrim hrim. Ei rawng bawl pah chuan ka en leh zauh ṭhin a, a va han awmawl ve chiang tak. Ṭhutthlengah ṭhuin phone a khawih mai mai a, a chang leh a nui sâk sak a, mi rawn puih pawh a tum eih lo a nih hmel. Phuihnam hmin hnu chuan pârbâwr leh alu ka kán pawlh nghal zung zung a, inbual fai ka châk tawh a ni ber. Ka kawr hák lai te chu thlak ka châk tawh, ka taksa a ban deuh chuap bawk si, inbual ila chuan ka inbual fai zo daih tawh ang maw le.

"Khaw'nge Sampoo ho khá?" bathroom chhung ka luh aṭanga rei lo tê hnuah ka ti nghal a, vawiin tlai ataka a awm lo duak chu mak ka ti a ni.

"Hawihhawmna te hi i nei ve lo emaw ni, mi mawl biak tawp ṭhin suh, Sampoo te chu a zo daih tawh" a phone khawih reng pah hian a rawn ti hlârh hlarh a, ka va han awih lo ber tak!

"A va mak ve, hmanni lawka ka lei kha a ni sia, a zo hma lutuk, ka awih lo" ka tih chuan min rawn melh ta nge nge a, a meng no lo leh hle.

"Chu, min ring lo tihna a ni maw? Eng nge nizanah in pafaa in riah chhuah vel dâw daw ni! A zo tawh ka tih chuan a zo tawh a ni mai, i duh leh dawra mi va lei mai la ti nia"

"Ka ring lo che ka tih miah loh kha maw le, i huat a ho thei êm mai" ka tih chuan

"Enga!?" a lo ti vin ṭhawt a, a mood fuh lo hmachhawn bik reng chu ka ning ru ngawih ngawih.

"I nu hi min zah lo viau ṭhin suh Romawizual, ngawi reng khan inbual hle hle rawh" chhan pawh ka chhang peih tawh lo, awmzia a awm dâwn chuang lo, a duh duhin áng teh se!

"Chaw i la chhum miah na nge?" ka inbual laklawh laia a thu rawn sawi avang chuan chaw ka chhum theihnghilh tih ka hre chhuak nghal a, bathroom kawngka a chum ri dawt dawt a, ka va han hne mai mai ém.

"Ka theihnghilh daih, inbual zawhah ka chhum mai ang" ning ru viau mah ila thinrim awkâ paw'n ka chhang lo, buaina kan nei leh a ni mai.

"Nula ve si, i va han lâktlâk loh ṭhin tak, ṭawp leh lutuk!" ti vawt raihin a kal sawn ve hram a, a án hla ka hre tam lo hlauh, ka pi min hrilh dan takah chhân chhan ai chuan chhan loh a fuh zâwk reng a ni.

Ka inbual zo ka chhuak chu a hmel hmuh tur a awm lo va, ka room lamah lutin ka inthlak mawlh mawlh a, ka hman hnu chuan chaw pawh ka chhum ve leh mai bawk. Ka nu chu an room-a a awm loh leh sitting room-ah a ṭhu ngawi reng a, a phone a bih reng a, TV on ve teh mah se en pawh a en lo hrim hrim. Tlai lutuk lovah Chhani a rawn haw a, ni dang ai a rawn haw hma ka ti khawp. Hman vár var mah se a ngai tê bawkin chet a tum lo leh a, a awm tawp a, a room-ah a tawm char char a, phut enah pawh ka en buai peih lo law law. Phut loh ka tum ziah zâwk a, tam takah hi chuan ka awl hnem réng bawk, mahse hmeichhia a nih ve tho avangin phut ruk chang ka nei leh ṭhin a, awmzia erawh a awm lo ṭhin khawp mai. A awmawl ṭhang tawh lutuk a, ka mitmeia phur rukna ka tih lan paw'n engmah a hrethiam ngai lo.

Ka nu chu phone khawih melh melhin a ṭawng tawh lo hrim hrim a, nuam ka ti daih zâwk, a áng thawm hriat miah loh chu hahdamthlak tak a ni. Chaw ka chhum hmin a, hmarcha leh purunsen ka rawt pawlh zui nghal a, hmarcha ka telh hnem viau bawk. Ka pa hi hmarcha tel lova chaw ei thei lo ang chi hi a ni ve a, ka naupan lai te khan huai ka ti ṭhin. Hmarcha thak hmel tak tak kha a ei hmawk hmawk a, ka nu khan ei hnem lutuk lo turin a hrilh hial ṭhin zâwk a, mahse ka nu thih aṭang khan a ei tam em em ngai tawh lo thung. Ngawi rengin ka che mawlh mawlh a, ka nu leh Chhani te pahnih zâwk chuan ka chawhmeh siam eng emaw tal an sawisel leh ngei ka ring. An sawisel ve ziah, eng pawh siam ila sawisel loh pakhat tal an nei lo ngai lo, mak ve tak chu a ni.

Khaw thim hmain ka pa a rawn haw a, a rui miah lo leh nghal a, ka lawm ru khawp mai. Nizana kan thil sawi dun kha a thawk ni berin ka hria, ka nu meuh paw'n mak a ti, tlai tin rawn rui haw ziah ṭhin kha a rui lo ve teh mial a, chutah tlai dang ang lo takin a lo haw hma phian leh ta zel a, chutiang chuan awm reng thei se ka ti ngawt mai. Ka pa intihfai zawh hnu chuan zanriah ka siam zui nghal a, ka nu leh Chhanite pahnih chu an ui chaw ei mai a, kei leh ka pa erawh hmân aṭang tawha kan tih ṭhan a ni a, ṭawngṭai hmasa lo chuan chaw kan ei ngai lo tawp. Ka ṭawngṭai zo ka meng chu ka nu zâwk chuan min lo en reng a, rei pawh ka en duh lo, eng ber nge a huat tur thil awm lah ka hre hek lo, ka pa hian ṭhen daih se ka ti tak tak, kan inmil lo sâwt ropui si.

Chaw kan ei kham a, a ngai tê bawkin hmeichhe pahnih chu an kal bo nghal hmak a, ka pa erawh ka rin loh lutukin a awm leh ta. Kan chaw eina dawhkan chu ngawi reng hian a tifai a, thleng silna bula dingin ka en tlawk tlawk ringawt. Ka nu leh Chhani erawh an awm bo rih avangin an rawn hmu ve lo va, hmu ve se chu mak an ti ve tho ang. Dawhkan a nawh fai pah chuan min rawn en zawk a, phu deuh zukin ka nui sak a, a hawi sawn ve leh mai a, mahse keimah zâwk ka dik lo thung. A chet dan hrim hrim chuan ka hnuk a tiulh dâwn tlatin ka hria, ka mittui te lah chuan luan chhuah an châk zek zek a, ka insum nasa hle a, ka insum zawh loh ka hlauh avangin ka inher ta ringawt bawk.

"I ṭha em?" dam dapa min betu ka pa chu ka en duh rih lo, ka bul lawkah a rawn ding tawh tih pawh ka hria, ka ṭah a chhuak tih a hmuh chuan min ngaihtuah ang a, ka nu leh Chhani an rawn lang leh nghal ang a, thil thlen dan tur ka hre lâwk vek!

"Ṭha e, ka mitah hian hmarcha them a lutin ka hria, chu vang maw le" dawt ka sawi tawp a nih loh chuan tih ngaihna ka hre tawh lo.

"Ka lo en ang e" tih leh mi kawih her a rual a, ka mit chu ka nuai der vel ta tawp a, min en chiang khawp mai.

"I hmai han phih teh, i kut thakin i mit i khawih zâwk a ni lo maw Mate?" tiin tui min suahsak nghal a, ka hmai chu ka phih ngei a, ka ṭah chhuak lutuk erawh ka thunun hman lo thung.

"Engati nge?" a rawn ti thuai a, min ngaihtuahna awká dam dap te chuan ka ṭah a tichhuak zual a, ka inhrethiam tawh bik lo, thei ngat ila zawng ka ṭap kher lo ang.

"Ka ṭah a chhuak" ka ti ta nge nge a, chal tichuar náng hian min en a, ngunthluk fêa mi en chungin a hmui a chip hmak a, ṭawng a tum tawh lo a nih hmel.

"I awm dan hian ka ṭah a tichhuak alawm, hmâna mi kha i ang lutuk a, ka insum thei thlawt lo a ni" ti lehin ka mittui chu ka hru hul thuai thuai a, ka nu leh Chhani min hmuh ka hlau hnuhnawh a ni ber, an rilru a kal kawi leh nasa dâwn si.

"Hmâna mi kha ka la ni reng emaw ka ti a, ka lo ni tawh awzâwng si lo, i pa hi ka mawl rei ngawt mai" a ti hniam sup a, inkuangkuahin sitting room lam a en char char a, kei pawh ka ṭah chhuak te chu a reh ve leh mai bawk.

"Ka ṭha tawh e, min ngaihtuah suh" ka tih chuan la inkuangkuah reng chung hian min rawn en a, a nui suk a, kei pawh ka nui sak a, a kal sawn mai dâwn emaw ka ti a, thleng ka sil chhung zawng chu ka bulah a ding ve ta reng zâwk.

A tukah chuan a ngai tê bawkin college kan kal leh a, ka pa'n Chhani nen kan pahnihin min thlah leh thlap bawk a, ka nu pawh a zia ta viauin ka hria. A hna lamah a kal tawh a, LDC hna thawkin a buai ve ṭhin hle a, mahse duh ai chuan án a cheh deuh mah mah a ni. A hnathawhna lamah eng emaw tawng hlek se in chhungah a thinrimna zawng zawng a au chhuahpui daih zel a, hei hi chu a sim mai mai theih ka ring lo, a nunpui nghet tawh êm mai. Dik tak chuan min hmangaih se, a fanu ang tak takin min en se chu ka hmangaiha ka ngainat theih ka ring, amah hian a zir lo hmasa tlat a, a lakah ṭhat chhuah hlek ila fel tih ai mi hmuhsit leh en hniam a thlang zâwk zel a, ka pa bulah vuivaina thu thlen ṭhin phei ila chu ka chan a chhe zual ngawt ang.

Thil mak ve tak pakhat chu han ánkhum vak vak ṭhin mah se ka pa hi a zah ru phian lawi a, a thinrim em em lai leh a ṭawng hlawk hlawk lai paw'n a thusawi a ti lo ngai chuang lo. Ka sawi tawh kha, a duhna ah hi chuan lem a chang thiam a ni. Ka pa a tlawn dan te hi ka lo hmu hne ṭhin, ka pa lah hian a dawh mai mai zel bawk si. An inneih aṭangin vawi khat chiah ka pa thinrim ka hria, mahse kha khan rah ṭha a chhuah zâwk thung. A dawhthei ngat ngat bawk a, a thinrim chu hlauhawm tak a ni. Ka nu paw'n a thin tihrim lam hi chu a sim deuh hmak réng a, mahse tun hnai hian a ánkhum hnem mah mah tawh ka ti, ka pa thinrim hmel a hlau leh hle awm tho si. Chu bakah ka pa pawh hi a dik bik lo, zú in a ching khanglang bawk si, a dik lo tih inhriain a dawh mai mai zâwk te pawh a ni mai thei.

Dar 3 pelh hret velah class kan bâng a, ni dang aiin kan bâng hma viau bawk. Bus-in ka haw mai a, Chhani erawh tu tu emaw bike hnungah a rawn chuan haw leh theih mai ka ring. Thui pawh ka chuan hmain traffic a jam a, Aizawl khaw chhung kawng zimzia a lang leh ta. A zim chu thuhran ni se, lirthei kan ngah ta lutuk te hi a buaithlakna pakhat niin ka hria. Lirthei hawl chhuak kan tam pôh leh kawng a chep a, traffic a jam phah nge nge ṭhin. Chhungkaw member azir te hian lirthei nei tamin nei tam lo ila, a ṭha phian mai thei, mahse lirthei lei duh an awm tam pôh leh showroom lam an hlawk ve zel a, inmamawhtawn vek kan ni bawk si, han insawisel viau dâwn pawh ni ila a theih hleih theih tlat lo ṭhin.

"Khatla eng zat nge?" mipa aw thum chhal chu ka hriat hnu a va ang tehreng ém.

"Cheng 15" bus conductor chuan a ti ve mai a, chutah rawn lut thar ni awm taka bus fare zawttu chuan

"Min kir lo mai rawh" a rawn ti leh nghal a, ka rin dan chuan kir lo tura a tih danah cheng 20 emaw a pek ka ring ve ringawt.

"A va lawmawm dâwn ve, saw, driver bul saw a ruak, va ṭhu daih rawh" bus conductor chuan a be ṭha siam siam nghal khawp mai.

Tu nge tih hriat tumin thil chi hrang hrang ka ngaihtuah lêt vang vang a, thil ṭul tak chu a ni miah lo, mahse hriat châknain ka khat tlat si a ni. A awmna lama hawi lêt hû hu erawh ka duh si lo, hre châk tho si, hriat chhuah a va har reuh tak! Ka hre tawh chiang alawm, engtin emaw ni tak a aw kha ka hre tawh a ni. Israel Point kan thleng chho chiah chu mi dang an rawn luh belh ṭeuh a, kan tawt ta viau bawk. Ṭhu lova dingho chu mipa hlang an niin ka hria, ka bulah nu pakhat a ṭhu a, a kila ka ṭhu hlauh chu a vanneihthlak, kan tawt ropui si, ka bula ṭhu chuan hrehawm a tih ruk hmel khawp mai. Bus chu a tlan chhuak a, traffic a jam em em tawh rih lo va, Zodin Bus Stand kan thlen chuan ka bula ṭhunu chu a chhuk ta daih a, a ṭhutna rawn luah nghaltu pawh ka en chuang lo, mahse a ka dar leh a dar a insi thei tlat, a nu lian viau ang le!

"E hê!" ka bula rawn ṭhu hmel ka hmuh rual chuan ka ti thawp sep ringawt a, hmeichhia emaw ka ṭhutpui ka lo tia, mipa lék chu niin.

"Engati nge?" ka biak dan chu a va han mawi lo tak, min chhang lo va, bus chhunga dingho chu ka thlek kual a, mipa hlang vek an lo la ni tho, zirlai naupang an tam khawp mai.

"Khaw'nge i ṭhiannu?" a zawhna awmzia ka ngaihtuah nghal rauh rauh a, Zaii a sawina niin ka hria.

"Ani chu haw hma a ngai a, kan bán hmain a haw daih" ka ti ṭha ve mai a, zawhna dang min zâwt zui tawh lem lo va, bus-a kan chuang dun thut chu mak ka la ti ru hle.

"Eng lo, engati nge bus-ah i rawn chuan ve teh mial a?" ka ti ta nge nge a, mi chhan a tum hmel loh em em zui.

"Ka chuang ve thei lo em ni?" min chhang dâwn lo emaw ka tih tawh hnuah a rawn ṭawng chhuak ve ta chauh a, chutah ka zawhna chhang lovin zawhna min zâwt lêt zâwk leh ta nghal a!

"Chutiang lam pawh a ni lo, car i neiin ka hre sia, ka zâwt mai mai che maw le" ka ti tawi tak a, kan ṭhut dan chu a tawt mah mah ka ti, duh ai chuan a pa lian deuh hlek a ni.

"Mi dangin an hmang a" thum chhal hian a ti sup a, ka bu nghat nghat a, min rawn en chuang hlei lo va, kan ngawi zui ta vang vang.

Treasury Bus Stand kan thleng a, zirlai naupang an chhuk dam dam a, ṭhute pawh a tho sap sap a, kan thawl ta viau bawk. Kan ding rei em em leh nghal a, sawi tur a vâng si. Amah reng reng pawh chu ṭhutna danga insawn daih áwm, ngawi run hian ka bulah a ṭhu reng a, tawt a ti ve lo emaw ni! Keimah zâwk ṭhutna danga ṭhut sawn ka tum lai tak chuan kan tlan chhuak leh ang lawi a, Khatlaah a chhuk dâwn tho bawk nen tawt mah ila ka ṭhu ṭha ta hle hle. Khatla Bus Stand kan thlen rualin a tho tharh a, ka thawl huaiin ka hria. Kei erawh chuang leh hretin Sikulpuikawnah ka chhuk thung a, kan in lam kawnga haw tlang nghal ta mai lo chuan Alu papâwr dawr lamah ka kal lêt leh a, ka ei châk thut vang a ni pakhat.

Dawr kawta ka din lai chuan ka beisei loh deuh ka hmu leh ta, ka mi hmuh chu Zaii u bawk kha a ni. Khatlaah khan a chhuk daih tawhin ka hre sia, ka dinna lama a lo kal danah min hmu miah lo a nih hmel. A kal chak hran lo va, phone a khawih leh zauh ṭhin a, a awm dan leh a lan dan hrim hrim chuan ka mit a la tawp. Officer a ni bawk si a, a hmel erawh officer hmel viau mah se kea a kal chu a inhmeh lo ka ti mai, ka sawi theih a awm miah lo na a, ka mitah chuan a inhmeh lo ve em em ringawt. Min rawn hmu ta nge nge a, chal tichuar náng hian min en a, a va han meng urhsun mai mai tak, en pawh ka en rei duh lo. Chutah ka hnung chetah a rawn la ding zui a, a awm dan vel chu ka hrethiam lo tulh tulh.

Ka hnungah ding reng mah se kan inbe miah lo va, ka hmelhriat chu a ni ngei alawm, ka ṭhian kawm ngeih em em Zaii u a ni tih pawh ka hria, biakna tur leh biak dan tur ka hre lo a ni. Mi kan tam phian a, kan ding rei ang reng viau bawk. Aizawl College Student ni áwm tak tak kan hnungah a intlar ṭhap a, a ṭhenin meizial an zu bawk a, an ṭawng mawlh mawlh hlawm a, kei leh Zaii u erawh ṭawngkam khat paw'n kan inbe lo hrim hrim. Bus-ah te kha chuan loh theih lohna avangin kan inbia kha a ni a, ṭhu dun lo ila zawng kan inbe kher lo mai thei a ni. Ka hmaa mite chuan an lei zo ta maw tihah dawr chhung luh ka rual a, ka siamtir zung zung a, a rimte chuan ka ei châkna a tizual hle bawk.

Ka lei fel hnu chuan kan vêng lam panin ka kal nghal a, ka hawi lêt tawh lo hrim hrim. In ka thleng a, inbual fai hma ka inhnawh puar hmasa tê tê a, chumi hnu chuan kan inbual ta chauh bawk. Ei rawng báwlin min hmuak nghal a, ka nu hmel hmu miah lova ei rawng báwl chu a hahdamthlak ka ti ru viau. Awm se chuan eng emaw tal a sawi leh ka ring, a nih loh paw'n a mood fuh lo hmel min hmuh tal ang. A ngai tê bawkin Chhani chu dar 4 leh a chanve dâwn velah in a rawn thleng a, eng em em nge a tih bik ṭhin ni! Vawiin phei chu kan bâng hma vek a, a duh chuan a haw hma thei reng maw le. Ka nu leh ka pa pawh an lo haw tawh a, ei rawng ka bâwl fel diam tawh bawk a, zanriah kan ei thei reng tawh a, mahse túma'n ei an la rawt lo hrim hrim thung.

Dar 6 pelh hretah zanriah kan kil a, ka pa leh ka nu deuh chauh an ṭawng a, ka nu chu a ṭawng tam mah zâwk a, kei leh Chhani erawh ngawi rengin kan ei mial mial ringawt. Chaw kan ei kham a, ka pa chuan dawhkan tifai turin Chhani a hrilh a, ka rin lâwk ang chiahin ka nu zâwk a meng no lo leh teh e. Chhani ve thung chu peih loh hmel zetin ka pa thusawi a zawm mai a, a har loh tehreng nen, ka nu mawlh chuan a lo tha nátpui tlat a, ka chungah a ṭuan leh ngei ka ring. Chhani chu ka pa bulah a ṭhu nghal tharh a, tih tur a tam lo bawk nen a tizo hma khawp mai. Zak miah lo hian ka pa chu Scooty lei a dil ngam nia maw le, ka thleng sil laklawh lai pawh ka tawp chat a, kei paw'n chutiang thil chu ka la dil ngai miah lo a nia, a dil ngam chu mak ka ti lutuk.

"Ni e paa, nula te an ni ve tawh a, i thlah hman loh chang pawha kal nân a ṭha fû ang chû, nula tân phei chuan bus-a chuan a peihawm loh thei si" ka nu chuan a fanu thusawi chu a lo thlawp rang kher mai.

"Ka ti tak tak a nia pa, haw lamah ni se ka ṭhiante bike-ah hlir ka chuang haw a, ka zak ve tawh em em alawm" inla pangchang aw zet hian Chhani chuan a ti leh a, ei lo tak ka ni.

"Matei pawh bus-in a haw mai zel alawm, nakinah scooty lei lam chu kan la ngaihtuah ṭha dâwn nia" ka pa chhan dan chu fing ka va'n ti tak!

"Mahni fanu thil dil pawh han ngaihsak ṭhat peih loh tawp mai chu! Dil tawh suh Chhani, engmah dil tawh reng reng suh, Romawizuali dil ni se chuan a lei em em ang" ka nu chu a âng leh ta hmarh hmarh ta, ka va peih lo lâwk ém.

"Khatiangin thu la vung vak ṭhin lo teh, 'kan la ngaihtuah ṭha dâwn nia' ka tih vek kha maw le, Matei hi ka fa bik mah ni se Chhani nen hian ka en hrang reng reng lo" ka pa aw chu a nêm ta viau bik lo.

"A nih chuan min lei hram la pa, min lei teh aw, ṭhiante bike hnunga chuan haw reng ka zak ve tawh" Chhanin a tih laiin ka nu chuan

"Dil tawh suh ka ti a ni lo'm ni Chhani, keima'n ka lei ang che. Lo kal rawh, thinrim loh tum pawh hian a zir lo zâwk in ni zel a, a thinrim loh theih loh ṭhin" a ti kha fak fak a, room-ah Chhani chu a kai lut zui nghal daih bawk.

An thusawi engmah hre lo ang maiin thleng ka sil mawlh mawlh a, ka awmna lama lo kal thawm erawh ka bengin a hre chiang khawp mai. Ka pa a ni tih pawh ka hria, thawk a la ri halh a, a dinhmunah ka indah chhin a, ka nu leh Chhani avanga rilru hahna tam dan turzia te, a tuarchhel a ka ti ngawt zâwk a ni. Ka bulah dingin a ngawi reng a, biak ka tum deuh a, mahse ka ṭhulh leh ta zâwk a, ka nu'n kan biak dan vel a lo hre pha a nih chuan vuivaina emaw ánna tur a hre leh ang a, chung zawng zawng chu ka tawng peih lo a ni.

"Scooty chu kan lei mai dâwn em ni ang?" a tawpa tawpah chuan a rawn ṭawng ta nge nge a, a thil sawi erawh ka rin loh lam daih a ni thung.

"Ka hre lo le, i tih dan dan a ni mai" tih chauhin ka chhang a, ka ṭawng ring hran lo, dik tak chuan vawiin lama ka hun hman dan min zâwt dâwn emaw ka ti a, min zâwt lo chiang khawp.

"In inṭawm tur lei ta ila in intihthiam loh ka hlau deuh bawk si a, rilru sén dan tur thiam a har ang reng" a ti sup a, a sawi dik chiah, kan inṭawm tur lei ila chuan intihthiam loh nî kan neih ngun viau ka ring.

"Ama ta tur bik chu leisak mai rawh, kei te chu bus paw'n ka kal thei a, ka haw thei bawk a, engmah chuan hrehna ka nei lo hrim hrim, leisak mai rawh pa" ka tih chuan

"Ni lo ve, ka lei a nih chuan in ta tur ve ve emaw in inṭawm tur ka lei ang, nei lo bik in awm lo ang" a ti deuh hmuk a, min en reng tih ka hria, kei erawh a lam ka hawi chho duh lo hrim hrim.

"Pahnih em em chu lei suh, pawisa a hek mai mai. I lei dâwn rau rau a nih chuan pakhat lei la, kan inṭawm mai ang, a fuh zâwk ka ring" ka ti leh a, thleng chu ka sil zo zui nghal bawk.

"Chu chu a ṭha ber mai thei" ti supin a kal sawn a, min râwn ve thlap te chu ka ngaihtuah nawn a, ka rilru a tinuam veng vengin ka hria.

TV ka en laiin Chhani ṭap thawm ka hria a, a ṭah der bak ka ring lo. Ka nu ni se a âng hlawk hlawk a, ka pa ṭawng ri erawh ka hre miah lo thung. Ka pa chuan an pahnihin sitting room-ah a rawn hruai chhuak a, scooty lei leh lei loh chungchang chu kan sawi ṭha leh a, lei kan ti tlu ta nge nge. Ka nu mawlh chuan min melh leh ral tawh a, a va'n ngainatawm loh ve chiang tak! Zingkâr hma takah Chhani a tho va, a duhna ah chuan a tho hma thei khawp mai. Ka pa'n scooty lei dâwn lo se chu a thawh hma peih pawh ka ring lo, thawm a dim lo bawk si, mi dang pawh kan thawh hma phah vek nghe nghe. Chhani chuan class kal lova scooty lei a rawt a, chu erawh ka pa'n a phal lo chiang hle thung. Engkim a buaipui tur thu a sawi a, ṭha taka class kal turin min chah ve ve bawk.

Tlai lamah chuan ka in kawtah scooty mawi tak a inhûng ta ran mai, ka pa lei a nih ngei ka ring a, Chhani nena kan scooty inṭawm tur a ni tih ka hriat tâkah chuan ka lawm ve tho, mahse ka lawm em em hran lo. Chhani zâwkin a khalh thiam a, keiin ka khalh thiam lo thung a, Chhani chu a ṭhiante inah a lêng nghal vel a nih chu! Ka pa'n han hau dâwn ṭhin mah se ka nu'n a lo ṭan tlat zel bawk si a, buaina chhuah ai chuan ngawih a thlang leh nge nge ṭhin. Ka pa'n scooty khalh min zirtir lai te chuan min lo thik leh tawh a, ka thaw an tiipik ngawih ngawih, an rilru a hrisel lo nufa lutuk chu ka ning ru tak zet tawh, khalh thiam sa ila chuan ka pa zirtir ka ngai hauh lo ang. Chumi nî aṭang chuan ka pa hman chang apiangin scooty khalh ka zir ta ziah a, ka thiam har em em zui.

Kâr khat hnuah inringtâwk lo zetin ka khalh thei sawih sawih a, a kâr hnih hnuah chuan tlémin ka zia deuh a, thla khat hnuah erawh ka khalh thiam pangngai tawh hle. College kal lamah Chhanin a khalh ṭhin a, keiin haw lamah ka khalh ṭhin thung a, tlém chuan kan inpawh phahin ka hre bawk. Tlai khat erawh a ṭhiannu birthday lawmnaa ken a duh thu a sawi a, tih tak zet hian min dil a, ka phal ve mai a, ani angin bus-a chuan haw hreh ila chuan ka phal kher lo mai thei a ni. In chhung ka lut chu a lo reh ṭhiap a, kei aia haw hma tur awm ang chu ka nu a ni mai. Tu nge awm hriat tumin ka en kual a, ṭap thawm ka hriat rualin ka pate room lamah ka kal a, ka thil hmuh chuan min va han ṭhawng chiang kher êm.

"Hmanhmawh rawh Sylvia, Ambulance call vat rawh, meng hram teh u Biak, khawngaihin meng teh!" ka nu chuan a ti mawlh mawlh a, ka rilruah Ambulance call lam reng a lang thei tawh lo.

"Pa!" tih leh tlan phei ka rual nghal a, ka pa lú chu ka châwi a, thisen a pût chhuak zawih zawih a, ka hlauhthawng lutuk chu ka khur vek thei.

"Call vat rawh" ka nu chuan ṭap hawm hawm chung hian a ti leh a, kan thawmah kan ṭhenawmte an lo phei a, Ambulance an call mai bakah police lam an call nghal bawk a, kei chu engmah ka ti hlei thei lo, ka buai vek tlat a tin ni!

Ambulance motor lo thlen rualin ka pa chu Hospital-a hruai nghal vat a ni a, ka nu nen pawh kan kal a, thil thlen dan teh thut chu hriatthiam har ka ti tak zet. Dârkar eng emaw zah doctor te'n an bawihsáwm hnu chuan ka pa thih thu kan hre ta, ka awih lo va, ka che buai vek a, mahse ka pa ruang a tak ngeia ka hmu chiah chu ka mumal thei tawh lo. Ka âwm ka chum a, ka nâ lutuk chu ka ṭap hlei thei lo va, nikhaw hre lovin ka lo tlu a ni mahna, ka harh leh meuh chuan engkim a nih tur ang a lo ni zo vek tawh. Ka pa thih chhan ka zâwt nghal a, a tluk sual vang leh nâ taka a lû a sawh vang thi a ni tih ka hriat te chuan ka nâ ngawih ngawih. Thisen zawmpui dik tak ka neih awmchhun a ni tawh a, ani leh zelin min thihsan ta mai chu ka tuar thiam thlawt lo a ni.

Ka ngaihtuah chian pôh leh tawrh thiam har ka ti tulh tulh a, ka vun zawng zawng pawt hik vek mah se ka rilru nâtna chu a la nasa zawk tho ang, chutiang khawp chuan ka thinlung chhungril a nâ a ni; a nâ ngawih ngawih! Ka pi leh ka pu hmel ka hmuh chuan ka insum thei lo leh ta nge nge a, ka ṭap hawm hawm a, zah reng ka hre tawh lo, ka nâ êm asin. Zaii hmel pawh ka hmu a, min hnem mawlh mawlh a, mahse hahdamna pakhatmah ka nei lo hrim hrim. Ka pa tel lova hringnun ka hmang tur chu ka ngaingam lo, ka zuam hlawl lo a ni. Report-a a lan dan chuan a tluk sualna lamah a lû a tauh ná hle a, chet sual palh vang liau liaua nunna chân a nih thute chu ka hre nawn duh tawh lo, ka nâ zual zel zâwk tlat si a ni.

A va'n hun lo ém, a hun lo tak zet, hlawhtlin pawh ka la hlawhtling ve hleinem! Engati nge nang lehzelin min kalsan!? Ka pa ruang bawh chung chuan ka ṭap khur ngawt ngawt a, nu leh pa dik tak nei tawh lo ka ni tih ka inhriatna chuan ka thinlung chhung a chhun ngut ngut a, chuti teh thuta ka pa'n min boralsan chu ka hrethiam thei lo a ni. Ka nu pawh a ṭap nasa hle a, ṭah hla eng eng emaw ni hi a chham mawlh mawlh a, Chhani erawh a hmel ka la hmu miah lo. Kan inah chuan veng chhung mipui an ṭhu khat hnûk a, lusun hla sain an zai dual dual a, ruang awmna lama thingpui an rawn sem te chuan in châkna ka nei rih hlawl lo a ni. Ka neih chhun, ka thisen zawmpui dik tak awmchhun ni tawh ka pa'n min boralsan leh ta si a, ka nu min thihsan nî ai paw'n ka tuar nâ zâwk! A chhan chu kum ka tling tawh a, nu leh pa chan nâtzia ka hrethiam tawh tlat a ni.

"A pawi êm mai Sylvia Bawihi, engati nge i pa hian min ngaihtuah ve miah lo le, engtin nge a tel lovin awm thei se min tih reng reng?" ka nu chuan min kuah chung hian a ti lawm láwm a, chungte chuan ka ṭah a tichhuak zual.

Ka pa thihna ka tuar nâ lutuk chu kâr khat lai class ka kal lo va, class kal châkna reng ka nei thei lo, ka pa ka ngai lutuk chu ka ṭap leh tawp ṭhin. Kâr khat hnuah pawh ka la pangngai hlei thei lo va, kan in kawta a motor inhûng ka hmuh ringawt paw'n ka ṭah a chhuak zel a, thih ve daih ka châk a ni. Ka pi leh pu hnen aṭangin thlamuanna thu ka dawng awl lo va, kan inah an rawn riak ṭhin nghe nghe a, mahse min ngaihtuahna zawng zawngte chuan ka rilru nâtna a la thawi dâm thei chuang si lo. Ruah chu nasa takin a sur buan buan a, mahni chauhin inah ka awm a, rei lo té hnuah ka pa ngaiin ka ṭap leh ta nge nge. Engmah pawisa lovin kan vêng thlanmual kawngah ka kal a, ruah tui leh ka mittui te chu a inluan pawlh nuaih a, khawpui ri leh kawlphe te chu hlauhna pakhat mah ka nei lo a ni ber.

"Engati nge ruah i do? Lo lut rawh, hmanhmawhin!" min rawn betu chu tu nge a nih ka hre teuh lo, hriat tumin ka hawi lo hrim hrim bawk.

"Ka thusawi i hre miah na nge?" a rawn ti leh a, ka bengin hre vek mah ila ka rilru leh taksa erawh ngai rengin a awm thung.

"Min thlah nghal rawh!" ka kut chelhtu an awm tih ka hriat rualin ka ti vin ṭhawt a, ka kut chu ka phihthla sawk a, a rawn chelh leh rang khawp mai.

"Luhlul chhuah suh, i dam lo ang asin?" ring zet hian min bia a, ka kut a vawnna ata phih chhuak leh ngatin a âwmah ka nam pawp a, rilru nât lai a ni bawk nen chu mihring chu ka ngei hluah hluah.

Ka pa thlan ka thlen rualin ka ṭhu sawp hnâwk a, ka ṭap khur beuh beuh a, ka châk ber chu thih a ni. Ka nu leh pate'n khawvela an fanu min hnutchhiah bik chu ka lung a dam thei lo, an bula kal ve daih ka duh, ka tâna mi hlu em em pahnih te chu ka ngai a ni.

"I dam lo dáwn a nia" min betu chu fiah lo ruaiin ka melh chho ṭawk ṭawk a, keimah chiahin ka awm tawh emaw ka ti a, a lo la kal sawn reng reng lo chu niin.

"Khawi véngah nge in awm?" ti supin ka awm ang âng chuan min pawm a, ka taksa zawi dan chu ka rin phak bak a ni; a awihawm loh zâwk!

"In vêng awmna chu sawi rawh le" ka pa aw ang maia dam thlup ri ka hre chiah chu ka mittui a baw nghal zawih zawih a, fiah lo ruaiin a hmel hmu mah ila ka pa ánna tam tak a nei a ni.

"Pa" ti ṭiauin a âwmah ka bei nghal thuai a, ka ṭap chhuak feih feih a, a hmel chu ka en chho leh ṭawk ṭawk a, ka pa ngei niin ka hria.

"Ka ngai lutuk che, khawngaihin min kalsan tawh suh aw pa" ka ṭap hlawp hlawp zui nghal a, a taksa lúm nuam em em te chu ka pa ngei a ni; Pathianin ka ngaihzia hriain mi nung ramah a rawn tir thla leh a ni mahna, ka va'n lawm tak ém.

End of Chapter 2

SYLVIA ROMAWIZUALI

By

Havali Adam

Chapter 3

"Ka ring reng a ni!" ti bul hmuk ri ah chuan ka harh deuh zawk a, mahse ka meng hlei thei der lo.

"Rilru i tibuai reuh mang e!" ti thum vawt ruihin ka pang a dehna ata a kut chu a lá sawn a, vawt tihna chuan ka taksa a rawn ṭham er er a, ka dam lo ni maiin ka hria.

"I harh em?" a aw chu a hma ai ngawt chuan tlêmin hriat a nuam ta deuh e.

"Khaw'nge ka awm?" zawi tê hian ka ti sep a, ka ṭawng zawi lutuk chu ka bul lawkah awm mah se a hriat phak ka ring lo hial zâwk.

"Ka motor chhungah" meng lui hram hram tih takah fiah lo ruai hian a hmel chu ka en a, ka pa emaw a nih ka la ti fan, inang tak an ni.

"Ka ngaih em em ka pa kha i ni em?" ka ti ta thlawt a, ka mittui te chu a rawn hnai kûarh zui nghal bawk.

"Ṭawng lovin muhil rih zâwk rawh" ti supin ka chal a rawn tawk a, hulhiap hnuai ang chiaha ruahin ka taksa a tihhuh tawh loh danah kan awmna chu motor chhung a ni tih ka hre chiang ta hle.

Ka mit ka chhing vang vang a, ka harh leh zawk ṭhin a, mahse ka taksa chauh lutuk avangin ka meng peih lo thung. Ka taksa chhung lamte chu a ná ngut ngut a, nuamsam rengin ka awm lo, ka dam lo chiang a ni. Ka thawk dan te, ka awm dan hrim hrim chu thil nuam a ni lo, ka hnapthleng thlengin a sa hut hut tawh a, ka ṭah a chhuak em em bawk. Ka lo muhil tlang a ni mahna ka harh pangngai hnu chuan khum dup nuam zet, zau ṭha takah hian ka lo mu thluang zuar a, chu khum chu khawi ina mi nge tih leh tu khum nge tih lam reng ka hre hauh lo leh nghal.

Thawh mai tumin ka innem a, ka lû nâ chuan min tur ut ût a, vawt ka ti em em bawk. Khur beuh beuhin ka puan sin lai chu ka sin ṭha sawt sawt a, ka awm a nuam lo zual tulh tulh a, ka mittui te chu luang ngiai ngiai mah se hru tur paw'n thâ ka nei tawh lo a ni ber. Ka mit leh a vel chu chhung lamah a ná zawk zawk a, a sa hut hut a, men zawnga a thip em avang chuan ka maimitchhing leh ta ringawt bawk.

"Sawi chiang teh" hmeichhe aw vin fiah fak mai chu ka thil hriat leh hmasa ber a ni a, ka mit erawh a hma ang bawkin ka meng peih leh ta chuang lo.

"Ka hre ngei alawm" mipa aw thum chhal ka hre ve leh ta, a aw chu ka hriat hnu a ang ngei mai.

"I hriat si chuan tu nge a nih? A hming tal sawi teh Maṭhuam, i ṭhian a nih leh nih loh ka zawh che lahin 'a ni lo' i ti leh lawi bawk si" a ṭawng dan fek fawk chu ka nuhrawn ka hriat chhuah phah kuar kuar alawm le.

"Amah hi chu ka hria, mahse a hming ka hre lo" mipa aw thum chhah ṭha tak chu ka ngaihtuah chiang a, Zaii u kha a niin ka hria, a ni chiang lutuk, mahse engtin nge kan awm dun theih? Kei hi khawi hmunah chiah nge ka awm? Ka mut mêkna hi tu khum nge ni ta ang?

"A ngai hlirin min chhang bawk si, awmzia a awm lo êm mai. Damdawi chu i pe tawh hrim hrim em?" hmeichhia zâwk chuan a ti leh a, a hmel hmu lo mah ila a biak bawrh bawrh danah a nu a nih ka ring ve ringawt.

"Pe tawh, Zaii a lo kal mêk, a lo thleng ṭep ang" ka thu hriat leh chuan engkim min ngaihtuah chhuahtir zawm zat nghal.

"Eng nge Zaiin a rawn tih dâwn?"

"A ṭhiannu alawm, Zaii ṭhiannu a ni tih chu ka hria, a hming erawh ka hre lo"

"Sawi daih tawh ta che maw le Maṭhuam, ka ngaih i ta ṭha lo hman alawm, kan inah hmelhriat loh hmeichhia i rawn hruai lut ngai bawk si lo"

"Min zâwt hleinem" Zaii u chuan a chhang tawi kher mai.

"Ka zawh loh che paw'n sawi ve mai tur che alawm, i pa i chhun leh lutuk a, buaithlak!" ti deuh hmarh hmarh ri ka hriat aṭanga rei lo tê hnuah kawngka inkhar thawm ka hre zui leh nghal a, meng mai lovin ka muhil der tlang ta law law.

Che hrut hrut thawm ni áwm tak hi ka hre leh a, harh tawh reng sia muthilh der zawng a harsa lam hret chu a ni. Kut lum thar tharin ka hmai a rawn si chiah chu awihawm loh khawpa nasa hian ka mur chuaih a, loh theih lovin ka men a ngai ta, ka biang tawktu nen chuan kan in en chiang ṭha khawp mai, kan inmelh hnai ang reng bawk si.

"I zia deuh em?" a awm dan a la ngai reng a, a kut pawh ka biangah a la nghat reng a, ka thinphu ri te chu a hriat phâk hial ka ring zâwk a ni.

"Khawiah nge ka awm?" a zawhna pawh chhang lovin ka ti sep a, zâm luatah ka ṭawng chu a ring thei lo.

"Ka khumah" a kut lâk sawn pah hian a ti bul nghut a, che leh hrut hian min ṭhut hnaih zual a, ka sa chhuak pup pupin ka hria, chu erawh ka dam loh vang a ni tawh lo tih chu ka hre chiang khawp mai.

"Damdawiin a chhawk che a nih hmel" tih leh ka hmai bul chêta rawn awn riai riai a rual a, awm ngaihna ka hre lo, nghet zeta rizai hmer chungin ka maimitchhing tawp ringawt.

"Meng rawh, i beisei ang kha ka tih ring suh" a tih chuan ka meng thuai a, khum lú bula rawmawl tiat lêk puan inthlep lâk a lo tum chu niin, ka va han zak ru hnuhnawh mai mai tak!

"I awm sawn thei tawh ang em?" zâm ru aw zet hian ka ti ta tawp a, ka aw chu a chhang deuh chhal a, ka thian zui kharh bawk.

"Engati nge?" min en chiang si, nâtna min thlen ang zâwngin awm lo mah se a hrehawm ka ti ru em em tho.

"A lûm" chu thu bak chu sawi tur dang hre hek lo, ka rilru leh taksa a pangngai thei der lo leh nghal.

"Ruah a sur buan buan a, chuti chung chuan lûm i ti maw?" thluk hniam ruih hian a rawn ti thum dap a, mak ti hmel lam lek lek hi a pû a, a mita en ṭha ngam lovin a hnar ngawr ngawr en chung chuan ka bu nghat a, a lûm ka ti miau si a ni.

"Dawt i sawi lo a ni mahna" ti supin rawmawl tiat lêk puan chuan ka hmaia thlan tui rawn bawl chhuak ṭiam ṭiam chu a hru dêp dep a, a awm dan engkim chuan ka rilru leh taksa a tidanglam tak zet.

"I thawh theih chuan ka lawm ngawt ang" zâm lo ang taka lan tum lui hram hrama ka tih chuan ha lang miah lovin a nui nghawr dat a, a hmui sir a tiche zeuh a ni mai a, nui pawh a ang lo, tham lo zeta min nuihsawh a ang ka ti ber.

"A lehpekah chuan ruah do tawh suh ang che" dam ruih si, thupe aw deuh tho si hian a ti bul hmuk a, chhan ka tum tawh lem lo, a thu ka zawmna chhan tur ka hre miah lo bawk.

A ṭhutna khum aṭanga a tho chiah chu ka veng hawkin ka hria, tho tawh mah se a ṭhutna chu a khuar deuh dûk a, a rit thawkhat viau ang tih chu hriat a harsat lo hle a ni. Kei lah chu min hnaih taka a ṭhut laia lúm ti si kha ka rizai sin lai pawh ka hlim leh ta bik chuang hlei lo va, dik tak chuan lúm ka ti tawh miah lo, khaw vawtin ka taksa a rawn ṭham leh er er tawh zâwk. Ani paw'n mak a ti deuh a ni ang min en leh zauh ṭhin a, kan inmelh fuh thei em em leh nghal. Ka la pangngai loh êm avangin khum aṭanga thawh pawh ka tum buai duh rih lo law law a, ka thawh vaih chuan buaipui ka ngaih leh zâwk ka ring. Darkar tlêm tê tal chu mut ka la mamawhin ka hria, ka taksa a la pangngai lo êm mai. A chhuak nghal turah ka ngai a, a teuh lo nasa, room chhungah chuan a awm ve reng ta zâwk a, mahse ṭawngkam khat paw'n kan inbe leh tawh lo hrim hrim.

Tihtur leh sawi tur a awm lo bawk nen room chhung chu ka en kual vel ta ringawt a, ka taksain mamawh mah se mut chhuahna reng ka nei tawh der si lo. Ka harh kur a, ka meng kual ralh ralh a, room chhunga ka awmpuipa erawh dawhkana ṭhu ding titih hian a ding ngawi reng a, a phone khawiah chuan a tlei hmel khawp mai. Room chhung chu rawng êng lam ai a thim lam mah a ni a, mipa room tih a hriat nghal theih mai a, a lo berah rawng dum a ngainat loh paw'n vutbuak rawng tal a ngaina ang. Tin, lemziah ho deuh deuh bangah a intâr kual deuh nual a, room a cheimawi paw'n ka hre miah lo, a neitu tân erawh a cheimawi a ni mahna le. Darkar chanve dâwn chu inbe miah lovin kan awm dun char char a, Zaii rawn lut hlawl lo phei se chu nuam lo ka tih rukna a zual hle ka ring.

Ka damdawi eiin min chhawk ve zel a ni chêk ang chu ka pangngai chho ta viau a, thil thlen dan leh Zaii u laka ka awm dan te, ka ṭawng dan te, ka pa emaw ka tih dan zawng zawngte chu fiah tak hian ka thluakah an rawn lut zut zut a, ka zak hnuhnawh khawp mai. Awm lo ngat se zawng eng dinhmunah nge ka din ang ka sawi thei lo, damdawi in hial luh ka ngai mai thei a ni. Khatiang khawpa nasa khan ruah a sur a, ka rilru kha pangngai ni se chuan kawlphe te, khawpuiri te, thli thaw vûk vuk te kha ka hlauh ngei ka ring, mahse ka taksa leh ka engkim kha pialrala min liamsan ve ve tawhtu ka nu leh pate ka ngaih lûatah ka ngaihthah hmiah chu a nih si kha le. Zaii u khan min rawn hmu hlauh zâwk a, min hawsan daih ta se chuan ka taksa dinhmun a ṭha lo ngawt ang ka ring, ruah lah kha a sur nasa ropui si.

"Inhmelhriatna a ni mai alawm, u Maṭhuama a nih hi, ama tâwkah hian a fel ve ren run lutuk" ngaihsam hmel tak hian Zaii chuan a ti lûam a, a ṭawng danah an innêl thawkhat viau dâwn tih ka hrethiam nghal mai.

"Nang chuan i hre tawhin ka hria, a sut chawrh tawh che khâ" ti lehin a bula mi chu a melh chho ral a, u Maṭhuama ve thung chuan

"A hming ka theihnghilh" a lo ti sup a, Zaii chu za zet hian a nui a, a nuih chhan erawh u Maṭhuama nen chuan kan hriat loh hmel khawp.

"Chu vang a nih chiah chu class lâk laklawh laia i rawn call tluk tluk nì, Sylvia-i a nih hi, hre reng tawh rawh" a rawn ti ṭha ve leh mai bawk a, inchibai tur te'n min ti a, kan inchibai lo chiang teh e!

Tlêmin ruah sur a hán a, haw ka rawt nghal thuai a, u Maṭhuama chuan kan in thleng min va thlah a, Zaii a chuang ve zel a, chu chuan ka áwm a tinuam sawt bawk. In chhung ka luh rualin Chhani hmel ka hmu nghal a, ka nu erawh a lo la haw lo a nih ka ring. Tlai dâr 4 vel a ni tawh a, ruah sur vang nge ni khua chu a tlai nghal ruih a, chhum a zíng nasa ang reng viau a, ka awm a nuam em em rih lo bawk nen room-ah lutin ka mu leh ta daih. Ka harh chuan zan dar 7 a la ri lo deuh a, ka taksa pawh a pangngai tawh viau e. Room aṭanga ka chhuak chu sitting room-a lo ṭhu Chhani bawk ka hmu leh a, ka nu ka la hmu miah lo va, ngaihtuahna erawh a kal thui ta deuh a ni. Choka lamah ka phei a, ei rawng engmah báwl a lo la ni lo a nih chu maw le, a awihawm loh zâwk.

"Chhani, ei rawng bawl i tum miah na nge?" ka ti nghal a, phone khawih reng thei tho si chawhmeh siam tumna pakhat mah a nei lo chu ka ngei ru khawp mai.

"Ka bâwl thiam hleinem" mi pawh a rawn en chuang lo va, a awm dan chu 'em em' ka ti ve ta.

"Nula i nih hi hre ta che, bâwl thiam lo rual pawh i ni tawh lo. Keini pawh a tirah te chuan kan thiam bik reng reng lo, kan tum a, kan inzir chawp a, chhungkuaa hmeichhe chanvo a ni tih hre ranin kan inzir chho bêk bek a, kan thiam ve mai, bâwl tumna reng i nei ngai bawk si lo, insiam ṭha rawh" ka ti deuh hmawk hmawk a, chutah zâmna chhe tê mah nei lo hian

"Intithu viau suh, ka dûh duh danin ka awm ang, min zilh turin engmah i ni bik lo tih hre zâwk rawh" a rawn ti a nih chu!

"LALCHHANHIM!" ka aw a pangngai thei tawh lo, nawm loh ruk sa nen ka thin a rim awlsam zual hle.

"ROMAWIZUAL! Ka hmingpumin min ko lawl lawl suh, i inchhir palh hlauh ang e" a rawn ti fiak fak a, insum theihna tlachham zetin a awmna lamah chuan ka phei a, ani pawh ṭhu tawh lovin a lo ding ve nghal bawk.

"I nihna hre rawh, nula i nihna te, hmeichhia i nihnate hi hre rawh. Tlai tin kan inbâwl chhawk zat zat tawh ang, zanin tlai pawh bâwl ang che, i bâwl loh chuan ka bâwl dâwn teuh lo" ka chhungril lam thinrimna chu ka thunun hram hram a ni.

"A zâwk zamah che hian, i duh leh bâwl malêk la ti nia, ka ril pawh a ṭam reng reng lo. Ka báwl dâwn teuh lo, i duh leh nangma'n bâwl mai rawh, i bâwl peih loh avangin min phút kher bawk suh" kha faka a rawn ti chiah chu ka puak keh ta nge nge.

"LALCHHANHIM!" ti vin tuarhin ka che chhuak nghal a, a samah ka kek bawrh bawrh a, ani paw'n ka sam chu a ṭham tawn tawn a, a rak tuarh tuarh bawk a, insumkarna reng ka nei thei tawh lo, ka thin a rim tawh lutuk tlat!

"Engati buan buan nge? Duh tâwk r'u, duh tâwk teh u, a zahthlâk êm mai, hmeichhia ve ve leh nghal" min rawn ṭhelhtu chu kan ṭhenawmpa pa Engtea a ni a, engkim a nih tur ang ni zo vek tawh mah se keimahah zahna a lo lut nghal zut zut a, kan awm dan chu a mi pangngai loh thlâk ka ti hle bawk.

"Inkhawih tawh suh u ka tih kha maw le" Chhanin min rawn khawih a tum leh rualin pa Engtea bawk chuan a lo dang vat a, min han khawih ná se chu dawh mai mai ka tum teuh lo, ka rualpui leh nghal.

"Nu" Chhani hawina lam chu ka hawi phei nghal a, Chhani chuan ṭap hlawp hlawp chung hian a va kuah thlawp a, ka nu erawh thil thlen dan a hriatthiam loh hmel kher mai.

"Engati nge Bawihte? Engati nge i ṭah ringawt? Ṭhenawmpa chu i lo lêng lut ve teh mial elo? Eng nge ni ta?" a fanu thlem pahin ka nu chuan pa Engtea a biak zawm zat a, Chhani chu rilru nâ lutuk ang maiin a lo ṭap hliam hliam bawk.

"Eng ni lo ve, Sylvia-i leh Chhanite pahnih hi an lo inhmu thiam lo deuh mai chauh maw le. I lo haw ta bawk a, ka va phei leh tawh ang e" tiin pa Engtea chu a chhuak zui nghal daih a, a tân chuan awm reng a nuam miah lo ang.

"Engtin chiah nge in lo awm a? Sawi teh u, ṭhenawmpa lo phei ngai khawp khawpin eng thil nge thleng?" ka nu aw chu a ném ta vak lo.

"Sawi rawh u ka ti a ni lo'm ni? Nge in beng a ngawng zâwk?" a hma aia vin hian a ti leh nghal a, Chhani chu a ngawi dâk a, ka nu lo luh tirha a ṭap vel te kha a ṭap der tih ka hrethiam nghal vek bawk.

"Kan insual" thil thlen dan leh kan awm dan engkim chu zep buai ka tum teuh lo, thiam lo zâwk pawh ka ni hleinem le.

"Enga!? A dik em Chhani? Romawizuali thusawi hi a dik em?" Chhani en ran pah hian a ti vin hlar a, LALCHHANHIMI lah lemchan a thiam nasa mai si.

"Ama'n min kek hmasa alawm, engtin mah ka khawih lo, ka indang tawp ringawt. Ei rawng bâwl turin min ti a, ka thiam loh thu ṭha takin ka hrilh a, a huat pawh ka ring lo, mahse ani chuan ka inrin hma hauhvin min kek bawrh bawrh a, ka tân tih ngaihna a awm lo a ni" ṭap chungin Chhani chuan a ti zuah zuah a, ka nu chu a meng ling sâwt teh e!

"Chhani hi i khawih hmasa nge hmasa lo? Thu dik tak sawi ang che ROMAWIZUAL, dawt i sawi chuan ka thinrimna a zual zâwk ang" ka nu chu ka hma lawkah a rawn ding tawh a, Chhani pawh a hnung titih deuhah a ding a, rilru nâ lutuk tak ang maiin a la insût feih feih bawk.

"Khawih chu ka khawih hmasa ngei alawm, mahse" ka tih laklawh lai chuan hawi sawk khawpa nâ hian min beng ri chawrh nghal a, min hringtunu dik tak ni lo mah se ka nu anga ka ngaih a ni miau a, min bêng bik kher chu ka rilru a nâ tak zet.

"I zak miah na nge ROMAWIZUAL! Inngeih takin awm ta che u, engati nge buaina siam zawnga i khawsak reng ringawt? I hneawm lutuk, kan dawh mai mai ṭhin zâwk che a, i nundan hre chiangtu zingah chuan kan awm rei pui peih ngawt zâwk che a ni" a ti hlak hlak a, a aw a zawi lo bawk nen lemchan thiam LALCHHANHIMI pawh a ngawi ta dâk mai.

"I fanu dik tak ka ni lo tih hre reng chungin zah chea ngainat che ka tum ṭhin asin ka nu, kei chang ni lo mi â nilêng lo chuan an hre vek ang, engati nge min huat em em bik kher a? Thil ka tisual a nih paw'n i fanu ang tak takin min en la, ṭha takin min ka tihsual lai min hrilh thei lo em ni? Engati nge kut min thlâk reng bik? Thinlung nei, rilru nâ thei mihring ve tho ka ni tih hre ta che" ka ṭawng tawp lam chu a pawr ta mah mah a, ka ṭah chhuak ru tet tet mah se ṭah ngawt ka tum bik teuh lo.

"Min vin lêt khanglang suh ROMAWIZUAL! Nangmah zâwk hi a nih hi harsa chu le, i pa ngai lutuk awm fahran hian i awm ve ziah a, class ṭhulh ṭhak ṭhak khawpin inah i awm ziah leh ta nghal a, en hran che ka tum reng reng lo, nangmah zâwk hian i zir hlawl lo a ni" min ti lêt hrep a, ka kut chu ka hum ngawt ngawt a, tunah chuan engtikah mah ka nêl thei dâwn chuang lo tih ka hre chiang ta e.

"Khawiah nge kal i tum? Ka la sawi zo reng reng lo, ding teh!" ka kal sawn ruala min biakna chu ka hre pha vek, hawi lêt emaw chhan tumna ka nei lo hrim hrim.

"ROMAWIZUAL! Inla luhluh viau ṭhin suh, in pahnih hnîh hian ka zilh dâwn che u, chhuah tum reng reng suh ang che" room aṭanga ka chhuak leh chiah chu min lo din chilh ran tawh a, mahse engah mah ka ngai duh lo lui ve tlat.

"Ka pite bulah ka riak dâwn, i ril a ṭam a nih chuan i fanu duat kha i bâwltir dâwn nia, ni leh lo, a bâwl thiam lo tak e, ka awm loh hlanin lo inzirtir nghe nghe ula a ṭha ang" ngeiawm zet hian ka ti ve ta salh salh a, ka bân a chelhna chu ka phih thla nghal sawk bawk.

"ROMAWIZUAL le! I va han rapthlak ngai em, khatiang khan mahni nute an chhang pawng pawng ngai lo, i zak chai lo'm ni?" tih leh ka hnung lam aṭang ka sama rawn keh a rual nghal a, kei pawh ka puak keh leh ta nge nge.

"Min khawih suh!" ti vin tuarhin ka nam pawp a, ka sam tlêm azawng pawt ṭil hlawk khawpin a pai chhawn chhawn a, theihtawp chhuaha nam ka ni bawk a, ná tur chu a ni.

"Chhuak nghal rawh, he in aṭang hian chhuak nghal ang che ROMAWIZUAL! He in chhungah hian pen khat pawh rawn pen lut tawh suh, chhuak vang vang rawh, kan mamawh ther tê lo che, zahna hre lo lutuk hmeichhia kan lo awmpui reng che a nih hi!" a ti hlawk hlawk a, za lo zetin ka nuih khum sak thung.

"I thusawi kha ngaihtuah ṭha leh la a fuh ka ring, he in, kan awmna in hi chu ka pa ta a ni a, a fanu ka ni a, thi tawh mah se ka dam chhung chu ka ta a ni kumkhua tawh ang, in ta a ni miah lo a nia, chhuak kan awm dâwn a nih chuan in nufa kha chhuak tur zâwk chu in ni e" ka thinrimna a zual a, ka ṭawngkam pawh a khá ve ta fak fak mai.

"ROMAWIZUAL!" ring zet hian a ti vin tuarh a, engah mah ngai lovin ka chhuahsan daih a, ka pite bulah kal ila, ka tân a hahdamthlâk zâwk ka ring.

Taxi bawkin ka pite vêngah ka kal a, ka ṭah chhuak zawng zawng a reh fel vek tawh emaw ka tih kha ka pi leh pu hmel ka hmu chiah chu a lo la reh awzâwng lo tih ka hre chawpchilh nghal a, insum tum ngâng mah ila ka thei chuang lo. Ka pi kuah chungin ka ṭap hlawp hlawp a, ka ṭah chhan min zawt ṭhin, ka sawi hlei thei bawk si lo. Rei fê ngawi renga ka awm hnu chuan engkim zep nei miah lovin ka sawi ta nge nge a, min hmangaiha min lo kuangkuahtute an ni kher bawk nen ka sawi laklawh lai te chuan ka ṭap leh ṭhin, ka pu pawh a thin a rim hmel khawp mai. A lák nât ber chu thiam lo hmasa zâwk ni mah ila ka nu'n min beng kher leh ka nuhrawnin chhuak tura min ti chu a lá nâ hle a, ka pi pawh a bang chuang lo.

Keimahin an inah min awmtir a, anni kan inah an kal thung a, a tir chuan dan ka tum a, mahse ka dang leh ta lo zâwk. Ka nuhrawn leh Chhani chuan nu leh pa nei tawh lo mah ila hmangaihtu leh chhantu ka nei tih hria se ka duh vang a ni pakhat a, a bikin ka nu ber chu zilh hrep se ka duh a ni. An thang rei phian a, an inchhan nasat viau ka hlau leh hnuhnawh a, ka pi ka call chhen a, a pick up thei miah lo leh nghal. Dar 8 leh a chanve dâwn velah ka pu zâwk ka call leh ngat ngat a, a vawi thumnaah a pick up chauh a, an lo haw mêk thu a sawi chuan ka awm a nuam huai thei. In an rawn thleng a, ka pi chu thinrim tih hriat zet hian a la âng hlawk hlawk a, an inbiak dan min hrilh a, an inchhan thinrimna lamah ka nuhrawnin a lo nam deuh sawk a ni awm e.

Ka thiam lohna chen tam tak awm mah se ka nuhrawn mawlh chu huai ka ti, ka nu dik tak ni lovin nuhrawn zâwk zâwk leh nghal, ka pi meuh a lo nam ngam hrim hrim chu a mak a ni. Ka pu'n a khap deuh sek hnu chuan ka pi pawh a ṭawng tawp ve thei ta hram a, ka nuhrawn sualzia leh mize ṭhat lohzia sawi tur a ngah viau ka ring, mahse mi â a ni lo va, mi rilru chhe tak a ni lo va, mi chanchin a chhe zawngin a sawi zui ṭeuh ngai lo. Chaw pawh ka ei nghal daih a, riak nghal turin min ti a, mahse ka duh lo tlat thung. Chu bakah hmeichhe nep tak anga awm ka tum tawh lo, eng ang paw'n min ṭawngkhumin an thu hnuaia min dah tum mah se ka awm lo vang. Tin, ka hawna tur chu an in ni lovin kan in a ni a, tunah chuan 'ka in' ti tawh pawh ni ila a sual tampui lo ang e!

"Buaina awm lo thei tur ang berin awm hram hram ang che Sylvia, harsatna i neih chuan min hrilh hreh lo la, harsatna i nei tih ka hre hnuhnawh leh si a nih chuan i nuhrawn chungah mai ni lo i chungah pawh ka lungawi lo hle zâwk ang" tiin ka pu chuan ka haw tur min thlah thlap a, ka bu nghat nghat a, ka pu hi chu dawt hrilh loh a him ber.

Kan in chhung ngeia ka pen lut chu sitting room-a ka nu leh Chhani lo ṭhu ka hmu nghal a, ka thawm an hriat rualin min rawn en a, an va han meng râng mai mai tak! Ka room-ah lut tlang nghalin biak khat paw'n ka be lo hrim hrim a, kan muttui hlawm viau ka ring tehchiam lo a ni. Bathroom ka kal te chu ka nu chuan min en hrek hrek a, zawhtê mit ang mai hian a dê kar a, sakeiin a sa seh tum a chang ran hi a ang ka ti ber. Chhani erawh a phone nen bawk an inkawm leh a, lemchang thiami ka ti mai, rilru nâ hmel pawh a pu tawh lo. Ka nu chuan min tiel deuh tak hian thingpui lûm turin min ti a, ngawi rengin ka room-ah ka lut a, chhung lam aṭangin kawngka chu ka kalh nghal daih bawk.

Mi a rawn ánkhum zui chiam lem lo hlauh a, earphone-in hla ka ngaithla a, muthilh tumin ka maimitchhing zui nghal vang vang a, ka rin loh lutuk ka mitthlaah chuan a la rawn awm zui. Ka rilru leh ngaihtuahna a fim tulh tulh a, ka zak thar tawlh tawlh a, kha pa, u Maṭhuama ngei mai kha, ka pa emaw tiin ka lo kuah vel chial kha a ni a, engtin tak min ngai ang maw!

Amaherawhchu ka pa a ang êm a, a rawn dam leh emaw ka ti hman hial kha a ni a, a taksa lûmnain min ur ham ham te kha ka pa ang ka ti lo thei lo a ni. Ka pa pawh kha a dam lai chuan pangtilûm a ngah em em a, a bula mut nuam ka ti ṭhin hle. Maimitchhing ta lo chuan ka meng kar a, ka mitthlaah u Maṭhuama hmel leh pianzia, a mitmeng rum al thlengin a lang fiah em em vek a, eng nge a chhan ber pawh ka hre tawh bik lo.

Chutia ka mitthla aṭanga u Maṭhuam paih bo ka tum lai tak chuan ka pi hnen aṭangin phone call ka dawng a, ka pick up nghal mai a, kan awm dan chanchin te min rawn zawt a, buaina kan neih loh thute, kan inchhan thinrim loh thute leh ka mut tawh thute ka hrilh a, anni pawh an ngaih a ṭhat hmel viau. Kan inmangṭha hnu chuan muthilh nghal mai ka tum a, ka thei leh ta tlat lo. Kan chhungkaw boruak vang pawh a ni lo, ka ṭhiannu Zaii u, u Maṭhuama hmel ka mitthlaah a awm tlat a tin a ni!

Ka muhil thei lo chuan phone ka khawih hnuhnawh leh vel ta ringawt a, engtin tin emaw ni ka lo muhil a ni ang, ka mit ka men leh chuan khua a lo vâr vek tawh a, phone-ah dar zat ka en a, a la tlai chhe lutuk lo e. Zimar ṭaih ṭaihin ka tho chhuak a, ka nu leh Chhani erawh an la tho lo ve ve a, ha ka nawh zawh chuan chokaah thingpui lúmin ka ṭhu a, kan in chhung chu a khawharthlâk ngawih ngawih hi a ni tawp.

Dar 7 leh a chanve velah ka nu a rawn tho hmasa a, Chhani erawh phût buai lo law law leh rih mai ang, buaina awm ai chuan ka thlang zâwk bawk. Ka nu chu be miah lovin thingpui ka siamsak a, a in ve mai a, rei fê chu ngawi rengin chokaah kan awm dun tlawk tlawk a, ei rawng ka bâwl mial mial laiin ani erawh a ṭhu ngawi tawp a, mi puih a tum lo a nih hmel.

Dar 8 leh a chanve pelh daihah Chhani a rawn tho chhuak ve chauh a, tukṭhuan kan ei nghal a, chaw ei a tui duh lo khawp mai. Nizan lam boruak chuan min la chenchilh ka ti mai, tuipui thuk tak chhung ai mai hian kan ngawi ṭhap a, ṭawng rèng kan awm lo. Chaw ei tui lo zet leh puar lem lo takin ka kham hmasa ber a, ka eina thleng ka sil zui nghal mawlh mawlh bawk. College kal tura ka chhuah lai paw'n an la inbe bik miah lo va, dawhkan khatah erawh inhmatawnin an la ṭhu ngawi reng thung.

Chumi nî aṭang chuan kan chhungkaw boruakin ṭhat lam ai chhiat lam a pan zel a, chhiat lam ka ti mai. Han invin vak vak leh insual tih vel nei tawh ngai lo mah ila kan inbe khât hlawm em em a, an nufa tak chuan an inbe deuh reng zâwk a, mahse keima'n biak ka dawng khât thung ta a ni. Luhlul ka chhuah ve tlat a, dik tak chuan an awm dan aṭang paw'n chhuak daih turin min duh tih ka hrethiam vek, ka pi leh pute bulah awm daih ila an duh lutuk, keimah berin chhuah ka tum der si lo, ka chhuahsan hun an chang a ni ber e. College-ah pawh Chhani nen kan kal dun ngai tawh lo va, kan pahnih inṭawm tura ka pa min leisak ni mah se scooty chu Chhani deuh hlirin a khalh chhuak a, ka khalh chhuak tlêm bik khawp mai.

Ka nu ni se ka chet sual hun leh ka ṭawng sual hun chang ran ang hrim hian a meng ker ker a, mi a en hrek hrek loh leh nin hmel zetin min en thul, hmuh loh der lah a theih ngawt bik si loh, tawrhchhelh a ngai teh e! Ka pi leh pute bulah pawh ka lêng ta ziah a, chaw ei ka ei daih ṭhin nghe nghe a, a kipa kawiin kan chhungkaw boruak erawh ka hrilh duh tawh lo. Min chhan thei si a, buaina a punlun mai mai ka hlau zâwk a ni.

Tin, Chhani nutei te kan inah rawn lên an ching ṭan a, an awm dan chu ka hrethiam lo lek lêk ṭhin, an awm nuamsa ka ti dâwn nge an awm zalen ka ti zâwk dâwn pawh ka hre lo, an leng halh halh ṭhin khawp mai. An fate erawh naupang ngaina chi ka nih avangin ka pawm a, ka láwm peih em em a, anmahni naupangho tak paw'n min ngaina viau a, an nuteho nen erawh kan inngaina lo thung ta a ni.

"Vawiin chu engtin maw kan awm dâwn?" Zaii chuan leh lam aṭangin a rawn ti a, college kan chawlh vek avangin kan tan chuan Holiday a ni mai.

"I lo phei ang chu ka ti, kan véng tawn tirhah ka lo chang ang che" ka lo ti ve nghal a, a hmâ daih aṭang tawh ka kal loh chhunga an note lo lâk tawh zawng zawng min copy pui tura ka sawmna a pawm thlap tawh a, chawlh kan nei bawk nen min copy pui teh se.

"Aw le, ka lo kal dâwn a nia, ka dah mai, nakinah ka lo be ṭha leh ang che" a tih hnu chuan kan inbiakna pawh kan titawp zui nghal a, a vawi khat rawn kalna tur a ni a, kan in awmna tak a hre lo chu a áwm viau tho.

"Scooty saw khalh chhuak suh ang che, ka hmang dâwn a nia, ka chhuak ṭep tawh" Chhani dinna lam chu ka hawi nghal a, a ta bik ang maia en a tum tlat chu thil dik niin ka hre leh ta lo.

"Ka ṭhiannu a lo kal dâwn a, ka va lam lawk ang a, kan lo haw hunah i kal mai dâwn a nia, kan rei lo ang" ṭha deuha ka biakna chuan rah ṭha a va chhuah lo chiang ém.

"Chutiang a ho mai mai, ka ṭhiante'n min nghak vek tawh, ka hmanhmawh a ngai" tih leh chahbi tarna lama kal a rual a, duh ai chuan mi a ngainep mah mah a ni.

"Ka ṭhiannu ka va hruai zawhah i kal mai a ngai ang" a lák hmain chahbi chu ka lâk khalh a, a hmel aṭangin ka ṭawng dan chuan a thin a khei zak tih ka hrethiam nghal bawk.

"Chahbi kha min pe rawh" a ti deuh fak a, ka lakah thuneih a tum vel chu a nia, a thuhnuaiah ka kun lûl lo ang.

"Bengngawng i ni hleinem, ka ṭawng i hriat vek kha maw le. Ka va kal ang e, kan rei ka ring lo, min lo nghak rih lawk mai rawh" tiin pâwn lamah ka chhuak nghal daih a, engtin mah min rawn chhang tawh lo ve teh mial a, ka awm thiam lo lek lek dâwn alawm le.

Minute tam ral hmain Zaii nen chuan kan inhmu a, kan in lama kan tlan chhung zawng ngainatawm zet hian a ṭawng siam siam a, mihring nélawm tak chu a ni ve chiang a ni. In kawt kan thleng a, titau titih deuh hian Chhani chuan scooty chahbi min lâksak hmak a, Zaii mak ti hmel pawh ka hmu lo der ringawt. Chhani a tlan liam ta maw tihah ka nu lah chu a âng zui leh ta zel a, min tihmualpho an tum ka ti mai. Dik tak chuan ka zak ve reng, ka nu ṭawngkam hman duh dan mawlh chu a zahthlâk ka ti, a ṭawng malsawm lo ropui si. Note pawh dar 10 hnu lam aṭang daih kan copy thei chauh a, insuk tur ho ka insuk hmasak tê tê vang a ni pakhat. Kan in chhungah ngei Zaii a awm ve reng bawk si a, ka tân chuan chhang lêt lova a tirhkah ang maia awm a fuh ber a ni.

Chawhnu dâr 3 dâwnah kan ziak zo a, haw nghal mai a tum a, ka phal lo thung. A hmel aṭangte, a hawiher aṭangte, a ṭawng dan leh a mitmeng aṭangte chuan kan chhungkaw boruak nawm lohzia a hrethiam nghal kuarh dâwn tih ka hria, mi â a ni lo va, hawihhawm taka awm dan a thiam ka letling hle zâwk a ni. Kei ni ta ila ka haw vat ka ring, ka ṭhiannu nuhrawn phun thawm ka hre reng peih teuh lo. Dar 3 leh a chanve rik hmain Zaii chu a haw ta nge nge a, ka nu erawh min bia pawh ni lem chuang lo hian a la phun mawlh mawlh reng a, ka ngaihsak duh miah lo ve tlat bawk. Khua a rawn thim ṭan a, ei rawng bawl chu mi dang kuta dah chîa ngai lovin keimah bawk chuan ka ti leh ta nge nge.

Zanah erawh chaw ei kham aṭangin room-ah ka tawm char char thung a, First Semester Exam a hnaih thawkhat tawh avangin lehkha ka zir deuh mawp mawp a, zir loh leh hriat loh ka ngah hman em em a, ka tân chuan zir tur a tam bik khawp mai. Dar 10 thleng chu lehkha ka zir a, a hnu lamah erawh ka awm mai mai thung a, lehkha zir ka kham rih a ni ber. Chumi zan aṭang chuan zan tin lehkha ka zir ta ziah a, eng dang ka rilruah a lut thei tawh lo a ni. Ṭha taka exam chhan ka duh a, chumi tur chuan ka zir ngawrha ka zir hnem a ngai tih ka hria, zelthel hman ka ni lo. Nakinah chuan sawrkar hna ka la thawk ve ngei ang a, mi zahawm tak tak te angin mi chunga lêng ka la ni ve thei mah na, ka tân chuan lehkha zir taimak em em phawt hi a pawimawh hmasa ber a ni.

Thla khat hnuah kan exam nghal a, subject tin chu ka tichhe hran lovin ka hria. Zaii pawh chuti tho chu, mahse kei ai chuan a thiam thei daih zâwk. Topper nih kan tum ve ve a, inelna pawh kan nei chuang lo. Kan note neih ang âng te, exam-na atâna pawimawh tur kan hriat ang angte kan inhrilh ṭhin zâwk a, a bulah hi chuan zep mang pawh ka nei ngai lo. Ṭhian ṭha nge nge chu ka pi leh pute hnena ka sawi duh loh tam tak thlengin ka hrilh ṭhin a, amah paw'n thil tam takah min râwn a, min sawipui a, ka laka ka nuhrawn leh Chhanite pahnih awm dan zawng zawng ka hrilh nî te khan a tiffin pawh ei mang lovin a chek tlak tlak a, a mitmenga min khawngaihnate kha engtikah mah ka theihnghilh thei tawh lo ang, ka nuhrawn leh Chhanite ai chuan min hmangaih zâwk chiang a ni.

"Lo lut la" Car chhung aṭanga min rawn betu chu ka en deuh hû a, chhan nachang pawh ka hre lawk lo.

"I lo lut dâwn nge dâwn lo" a rawn ti leh a, ruah lah chu a sur nasa phian leh nghal.

"Bus lo thlen hun ka nghak zâwk mai ang" ka tih chuan glass up-in a tlan chhuak a, hming kan inhre ve ve tawh na a, kan la inmawl biak tawp zel tho.

Bus lah chu a lo thleng har phian a, nihliap ka keng hlauh zâwk a, keng lo ila chu ka huh vek tawh ngei ang. A thu hrimah tun lai chu ruah a sur leh vak ṭhin a, ruah sur hun lai a ni paw'n ka hre lo. Chanmari Traffic Point kawngpuiah chuan ruah mal lian tak tak te chu a tla per chhiai chhiai a, kawngpui tleuh fai tum ang hrim hian a luang nasa hle bawk a, motor tlan leh mihring veivâk erawh an awm mang miah lo thung.

"Lo lut rawh Sylvia" min rawn betu chu a ngai bawk, mahse engtin nge ka hma zawnah a rawn din leh theih, motor tlan an tam vak si lo va, a rem laiah a inher pawp a ni hrim hrim.

"Eng lo" ka tih lai chuan

"Ka va thlah ang che" a rawn ti leh nghal a, a hma ai thlawt chuan a aw pawh hriat a nuam deuh zâwk a, mahse a thum mah mah ka la ti tho.

"Bus stand-a din reng hi a fuh lo a nia" amah bawk chuan a tih zawm zat a, a awm dan chu ka hrethiam lo lek lek, min mawl biak tawp lo leh ta nghal a, ni dang a ang thlawt lo.

"A nih ka lo chuang mai" tiin Car chhungah chuan ka lut ve ta nge nge a, nihliap chu nawr tawmin ka thlep ṭha mawlh mawlh a, kan tlan chhuak zui nghal chu a ni mai.

"Zaii eng nge a an? A zia deuh tawh em?" ka lakah hawihhawm a chhuah miau a, sawi tur leh zawh tur ka dap chawp a ni ber, ngawih reng tawp zawng dikin ka hre lo tlat a ni.

"Engati nge?" a rawn ti daih a, a lam ka hawi vat a, ani chuan hma lam enin a motor khalh lai chiah a ngaihtuah thung.

"A dam loh khâ, chu vang alawm vawiin pawh class a kal loh, i hre lo a ni mai thei" ka tih chuan

"Ka hre lo a nih dâwn chu!" ti supin a hmui a chip zui hmuk a, sawi tur hre ber ang ziazânga biak reng chu a fuh vak lovin ka hria.

Zaii min hrilh dan takah a naupang zawk zawk tawh lo bawk a, a ṭawngkam leh amah hrim hrim chu a ngainatawm tehchiam loh a ni. Keini, tleirawlte boruak rawn hip thiam tawh lo leh pawh thiam tawh lo ang maiin a awm churh a, a khunkhán ti dâwn ila chuti taka inhmuam ûp a nih ka ring chiah bawk si lo, a tak run ni berin ka hria. Kan vêng thleng min thlah dâwn chu a ni si a, inbe mang lova kan chuan dun tlawk tlawk te ka ring hial e a! A pawina ka hre lem chuang lo, sawi tur hre lo leh inbiakna tur hre lo na nâ na chu inbiak char char thu a awm lo.

(End of Chapter 3)

SYLVIA ROMAWIZUALI

By

Havali Adam

Chapter 4

"In vêng chu ka hria, in in awmna tak erawh ka hre lo" minute eng zat chiah nge inbe lova kan chuan ang, a thil sawi lah chu, a cousin Zaii ṭhiannu ni mah ila keimah lam hrim hrim a ngaihtuah vak lo a nih hmel.

"Kawltheihuan lamah tlan a ngai a, i rin ai a va kual deuh mai thei" ka ti pangngai ve mai a, engtin mah min chhang tawh lem lo.

Inbe lo bawkin kan chuang dun leh ta char char a, Sikulpuikawn kan thlen chuan hmun dang ang lo takin traffic a jam nasa hle a, minute eng emaw zah chu kan ding a, duty te pawh an khawngaihthlâk khawp mai. Ruah a sur nasa si, raincoat ha chung paw'n a huh nûal theih tho ang tih tur khawpa tam ruah a sur a, zawi zawiin kan tlan dêt det a, kan vêng chhung ni tawh mah se han chhuk ringawt chi a ni bawk si lo. Biak in pêng zawn kan thlen chuan tlêmin kawng pawh a thawl ta deuh a, hnung lamah leh hma lamah motor tlan an awm reng a, a tuate pawh chu kan tlan muang em em vek hle.

Mission vêng thlang road leh Theipalingkawh road leh Kaltheihuan road te inṭhenna kan thlen rualin tlanna tur lam ka sawi zauh a, mahse hrilh a ngai hran lo. Hnehsawh taka steering herh kual pah hian a phone êng nghawr dat dat chu a en a, a kut vei lamin a lá kang nghal a, mahse rei pawh en lovin a awmna hmun ngaiah a dah leh daih a nih chu!

Rei lo tê hnuah phone chu a rawn nghawr leh dat dat a, u Maṭhuam erawh engmah hre lo ang maiin a awm mual mual thung. A awm dan vel chuan min intithlahrung zual, phone te chu ngaihsak ṭha hle hle se, call a dawng a nih paw'n pick up ṭha ve mai se, ka tân pawh rilru a hahdam phah daih zâwk ang.

"Buai chung chunga kan in thleng min thlah avangin ka lawm e" aw thian hmasa kharh kharhin ka ti a, kan in kawtah kan ding reng tawh a, ruah pawh a sur mang tawh lo, a sî seng seng a ni mai.

"Ka buai hleinem" ti sup hian min rawn en a, hmelhriat ṭha ang maia ngai thutin ka nui sak a, mahse a hmel nuihzatthlâk loh zet ka hmuh rual chuan ka nui tawp riai riai nghal.

"Ka lawm tho tho e, a nih ka kal phawt mai ang, tluang deuhin in i thleng dâwn a nia" tih leh chhuah ka tum zawm zat a, car kawngka chu ka la hawng thei mai lo zui.

"Ka hawng thei lo, a sak tlat" naupangchhe aw deuh tak hian ka ti hliai a, kawngka chu hawn ka tum leh ṭhin, a ngai tê bawkin a la sak tlat tho.

"A va mak ve" ti hniam supin a che hrut a, min bawh titih hian a rawn ṭhu awn duai a, kawngka min hawnsak paha ka kut leh a kut a insi chiah chu ka phu uih a, ani paw'n hnai tak leh chiang takin min en nghal nghe nghe.

"Ih...eng lo...ka lo chhuk" a sik hlau zeta ṭhu tawm kâk chung chuan ka ti ringawt a, ṭawng pawh ka ṭawng ring lo, kawngka min hawnsak vek tawh a, ka tân chhuah mai a fuh zâwk a ni.

"U Maṭhuam" a hming lam ri meuha ka ṭawng leh tâkah chuan harh chhuak zawk ang mai hian thaw a hip lut vang vang a, kan inen hnai bawk êm a, a hnâra thaw a hip lut ri chu ka hre pha vek nghe nghe.

"Ka lawm e" driver seat lama a ṭhut phei rualin ka ti nghal a, min chhang lo hrim hrim a, kei pawh eng dang sawi tawh lovin ka chhuk nghal thuai thuai bawk.

In chhung ka lut chu ka nu a lo haw tawh a, sitting room-ah thil a chhut mial mial a, ka thawm hre pha vek mah se min rawn en lo va, min rawn be lo bawk a, kei pawh ka room-ah ka lut tlang nghal ta daih. Ka inthlak fel hnu chuan keimahah kim lo riau hi a awm tlat a, ka hre chhuak thei mai bawk si lo, ka rilru a kap ru khawp mai.

Phone-in Zaii chu a chanchinte ka va zâwt a, a ṭhat tawh thu leh thil dang min sawipui luam a, kei paw'n ka sawipui ve ṭeuh tho, mahse u Maṭhuama nena kan haw dun thu erawh ka hrilh lo thung. Zan lamah chuan ruah a sur leh buan buan a, kawlphe leh khawpui ri pawh a tam na rawh e. Exam zo tawh, First Semester exam result nghak mêk ka ni bawk a, lehkha zir lam reng ka rilruah a lang thei rih lo.

A tukah chuan khua a thiang kâk a, van pawl mawi em em kara chhum thianghlim tak te pawh hmuh tur a awm tawh a, khua a ṭha leh tawh dâwn a nih ka ring. College kal dâwnah erawh buaina a awm ta, Scooty-a kal ka tum chu Chhanin a phal lo deuh tlat a, ken a tum thu min sawikhum hmawk hmawk a, za lo zetin ka nui tawp ringawt.

A zak lo ve êm alawm, a ta bik pawh ni hlei lo. Ka pa'n a dam lai khan kan inṭawm tura min leisak a ni a, a ta ang maiin a khalh chhuak zing mah mah tawh zâwk, duh ai chuan ka dawhthei lam hret a ni. Ka nu lah a ngai tê bawk, a fanu a lo ṭan leh hlur tawh. Chutia kan buai nak nak lai chuan kan in kawtah Car pakhat hi a rawn ding a, glass a in-down ruala ka mi hmuh avang chuan mak tihnain min luah khat nghal.

"U Maṭhuama maw!" keima hriat tâwk lek hian ka ti zawi sep a, hmuh ngai loh hmu thut ang maia ka en lai chuan mi a thlek khum zauh a, a motor chhunga chuang turin min duh ni maiin ka hria.

"Thil pek tur che ka nei" che lova ka din tlawng vang a ni mahna, amah zâwkin mi a rawn be hmasa ta nge nge e.

"Thil pek tur maw!" tlêm chuan ka ṭawng ring ta deuh a, ka bula mite pahnihin hre pha mah se u Maṭhuama ber kher chuan a rawn hriat phak ka ring chiah lo.

"Saw pa saw tu nge Sylvia?" zawhna min zâwttu chu ka nu a ni a, an nufaa runluih ka châk thar thut a nih chu!

"Kha la rawh, vawiin chu ka hrethiam hram mai ang che" tih leh scooty chahbi chu Chhani pek ka rual nghal a, u Maṭhuama car inhunna lamah chuan ka kal phei a, a thil min pek tur ngaihtuah rauh rauhin rilru ka sêng ru pah reng bawk.

Kan in kawt aṭanga kan tlan chhuah lai chuan Chhani leh ka nu mawlh chuan min en duh a, min en zui vawng vawng a, mak an ti hle a nih ka ring. Ka nu leh Chhani runluih ka duh avanga ka chuanna motor khalhtu lam chu ka hawi a, a ngawi leh reng tawh, a thil min pek tur lah ka hre der si lo. Glass down-in pâwn lam ka hawi ta daih a, vawiin chu Zaii a la rawn kal dâwn lo va, college kal ka châk lutuk hran lo a ni.

Zarkawt bus stand pelh hretah traffic a jam a, ka hmanhmawh lem lo va, duh ai kan thleng phei hma mah mah zâwk a ni. Darkar chanve dâwn first period ṭan nân hun a la awm a, thleng hma ringawt ila tihtur a awm lo tlat a ni. Ka bula mi che thawm chu ka hre ru reng a, mahse ka hawi lo hrim hrim.

"Kha" a rawn tih chuan ka hawi ta nge nge a, mi pawh en chuang lo hian hma lam a en ngur a, a thil ken mawlh chu mak ka ti.

"I theihnghilh a" min en zawk pah hian a tih zawm zat a, rei lo mah se kan mit a intawng leh chat hman tho va, thil eng emaw ni tak theihnghilh nei khan ka inhre reng a ni.

"Ka lawm e" ti sepin ka nihliap ngei mai chu ka lá a, ka theihnghilh tih pawh ka hre miah lo chu atthlak ka tihnuhnawh khawp mai.

Chanmari Bus Stand piah deuh hlek, kan College canteen zawn velah a ding a, lawmthu sawi lehin ka chhuk a, ani pawh a tlan chhuak zui nghal bawk. Chawhma lamah khua ṭha viau mah se chawhnu lamah erawh ruah a sur leh buan buan a, sur nasa tak a ni. Ruah han fel vek hnuah ka haw ta chauh a, in ka thlen meuh chuan khua a thim titih leh der tawh. Chhani erawh a ngai tê bawkin a la haw lo leh a, ka nu pawh a lo la haw lo va, tlai dang ai a lo haw har deuh dâwn a ni mai thei. Zai ngaithla chungin ei rawng ka bâwl a, ka mood fuh riauna chhan chu ka hre bik chuang lo.

Ka nu ai Chhani a rawn haw hma zâwk a, in chhung a lo luh aṭangin a room-ah a tawm char char a, sawisel enah pawh ka en peih tawh lo. Ka nu a rawn haw ve leh a, kan inbe dâwn chuang lo tih ka hre chiang bawk a, mitmei pawh ka hmuh duh lo hrim hrim. Zanriah ei lai te chuan hrehawm ka tihna a zual, chhungkua kan ni bawk si, inbe miah lova awm chu nuam ka ti thei lo a ni.

Biak luih ka'n tum deuh úk ṭhin a, ka ṭhulh leh lawi a, awmzia a awm ka rin loh vang a ni. Ni e, awmzia a awm tak tak chuang lo ang, min hmu dik lo emaw min ngai kawi leh daih zâwk ang a, min bia te a nih ngawt loh chuan biak tum loh law law a fuh ber a ni.

Hun a kal zel a, thil dang aia ka ngaih pawimawh ber ṭhin kan in chhungkhur chuan chhiat lam a pan zual zel a, ka nu unaunute nen pawh inhmuh thiam lohna kan nei ta fô mai. Ka nu nen pawh tih tawh nak a laiin, anni leh zel nena buaina neih ka duh lo asin maw le. Lam ṭang ka neih awmchhun chu ka pi leh pute pahnih an ni mai a, rilru tipaukhauh lui ngar ngara engkim ka paltlang ṭhin avangin kan in chhunga thil thlen dan boruak zawng zawng ka la hrilh duh lo tluang zel a, hre leh ta si se hauh ka tâwk dâwn tih pawh ka hre chiang khawp mai. Kan inah chuan Chhanin a ṭhiante rawn hruai luh a ching ṭan leh ta zel bawk a, lehkhate hi an zir ve ngai lo emaw ni!

Second semester exam a hnaih leh tawh avangin lehkha zirna hun ka insiam chawp hram hram ṭhin a, exam chhung chu ka pite bula awm rih daih ka tum nghe nghe bawk. Chhani mai ni lo ka nu leh zel paw'n office-a a ṭhiante a rawn hruai haw ṭhin a, zanriah an ei fô va, an bengchheng thei bawk si, ka tân chuan lehkha zirna hun mumal tak tak pawh a awm thei meuh lo.

Ka ning tawpkhawkin bengchheng lo deuh hlek tura ka tih lahin ka nu ber ber chuan min lo khak hlak hlak a, nuhrawn azawnga hrawn hrehawm ber chu a va ni chiang ém. An nufa rilru ka hre chiang ropui bawk si, chhuah ka duh thu sawi ila chuan an lawm ngawt ang, vanram kai tur ang mai an nih ka ring.

Chutih rual erawh chuan kawng tam takah keimah ka puitlin phah a, eng pawh ti ila rilru ka neih phah em em a, ka tum ber chu ka zirna lama hlawhtlin a ni. Ni e, eng ang paw'n ka kawng dal mah se ka hlawhtling ngei tur a ni. Pathian remruat nge ni, Chhani chu ka nu'n duhsakin lehkha a zir ve chhunah ei tur ṭha ṭhâ pe ṭhin mah se exam result erawh a nei chhe thei hle a, test result nen lam a tichhe pâwlah a ṭang ziah a, ka nu erawhin zilhna thu a chhâk chhuak ngai chuang lo. Hmangaih leh duat em emin a ṭawiawm zel a, tunah chuan scooty pawh Chhani ta ang tluk a ni tawh; chu pawh ka nu vang bawkin.

Zan khat chu ka puak keh leh ta nge nge a, ṭawngkam duhawm loh tak tak phuh chhuakin kan inhau hrep a, zan pawh a rei tawh ang reng. Ṭhenawmte ngaih ṭha lo chu an rawn phei hial a, kut êm kan inthlâk hman lo hlauh a, zia tak a la awm zâwk a ni. An haw phei chiah tihah ka nu'n bul a rawn ṭan leh nghal a, chhe tê them paw'n ka hlau der si lo, kutthlak zawnga min khawih a nih vaih chuan ka khawih lêt ve nghal a ni mai.

Anni hi zawng an laka ṭhat chhuah te, dawhtheih te'n awmzia a nei thlawt lo a ni. Ka nu mood a fuh lo zual zel a, a chhan pawh Chhanhimi exam result vang a ni tih chiang takin ka hria, second semester chauh mah ni se subject bâ a nei tam ve êm bawk a ni.

Second semester kan exam chhung khan ka pite inah ka awm chho ṭhin ta ngei a, ka awm loh hlanin lehkha pakhat mah a zir lo a ni mai thei. First semester aṭang tawh subject zawng zawngah a fail vek zel a, a classmate ṭhenkhatte sawi dan phei chuan HOD-in a warning hial a ni awm e. Khawngaih ka tum viau a, mahse ka thei tawh bik lo.

Ka chungah suahsual rawng an bâwl thiam êm a, inzawmna dik tak nei lo mah ila a hminga ka unaunu a ni te chu ka zak letling tawh zâwk, sual min ti mah se pawi tihna ka nei lo. Engtik lai pawha dawhthei reng leh khawngaih reng thei leh hmangaih reng thei ka ni bik lo tlat alawm, tih takah êmah chuan hre chiang se chu kei aia tuar rei peih an awm mang lo hial ang ka ring.

"Duat, zanin chu lo riak mai la, keimah chauhin khumah ka mu ṭhin alawm, buaina a awm lo ang" ka nu thil sawi zet chuan ka beng a verh chiang hle mai.

"Khaw'nge i fate pahnih khá?" a ngaihzawng ni ngei tur chuan a ti thung a, ka room aṭangin an ṭawng thawm ka hre pha vek a, ka nu chhan dan mawlh chu mak ka ti a ni.

"An awm lo ve ve, ka fanu dik tak zâwk kha a ṭhiante inah a riak dâwn a, ka fahrawn kha chu a pite bulah a riak dâwn bawk a, hun nuam tak hman dun ka duh a ni" tiin ka nu chuan dawt muhlum a sawi a nih chu!

Âw, engati nge maw a sual em em mai le? Mihring ve tho chu a ni si a, Pathianin a hrem ang tih ka hlauhpui hial e a! Chhani awm dan tur a sawi kha chu a dik reng, mahse keimah zâwk kha a sawi dik lo hulhûal a ni. Zanriah pawh kan ei dun reng a, room-ah ka awm tih nen lam a hre chiang em em a, mahse engati nge a ngaihzawngpa bulah chuan awm lo ang maia min sawi kher?

"Chutianga hun thawl a nih te chuan ka bawhpelh phal bîk hleinem, hun nuam tak maw!? Hmang tehreng e le, i duh chu ka hria alawm, ka pei ngei bawk ang che" mipa aw ka hriat hnu lawkah pen thawm ka hre zui nghal a, ka nu room lamah an kal niin ka hria.

"Min dim suh aw Duat, ka mamawh lutuk che, ka hmangaih che" zak miah lo hian ka nu chuan a ti huam huam a, ka ten lutuk chu awm dan pawh ka thiam lo.

Nutling pui ni tawh si thawm a chhuah dan te chu zahpuiawm tak a ni; ṭhenawmte'n an lo hre pha palh ang tih ka hlau zâwk e a! Ka nu nuam ti thawm ka hre reng bawk si, ka mitthlaah ka pa a rawn lang a, fam chang tawh mah se ka khawngaih lutukna lamah ka ṭap ta ringawt.

A dam lai kha chuan ka pa tân nupui ṭha ber áwm ziazângin khan a awm a, a tlawn herh herh a, ka pa khan a hmangaih lo tih chu ka hria, mahse pasal leh pa a ni tih a inhre ran a, zú in ṭhin mah se a nupui fanaute kha min ngaihthah ngai lo hrim hrim. Tunah erawh chuan engkim a dang zo ta, ka pa thih aṭang kum khat êm pawh a la vei lo va, ka nu awm dan chu a ten hian ka ten ngawih ngawih.

A thawm chhuah dan te, a ṭe dan hrim hrim chu min runluih tih ka chiang a ni. Room-ah ka awm tih a hre vek a, min runluih duh lo se a ngaihzawngpa bulah khan dawt a sawi hauh lo ang. Earphone vuahin hla ka ngaithla ta ringawt a, ka rilru erawh hun kal tawhah a liam thla leh ta vang vang. Ka nu leh pate ka ngai em em a, hlim taka awmho ka châk a ni.

Ka lo muhil tlang daih a nih ka ring, ka harh leh meuh chuan zing dar 5 a ri vel chiah chiah a, ka zun chhuak viau lo se chu ka harh kher lo mai thei. Ka room aṭanga chhuakin toilet lamah ka kal a, ka lét leh lam chuan ka nute room lo inhawng deuh huau chu en loh theih a ni lo. Mipa pakhat nen hian âwm chin rizaia khuhin an lo mu dun a, zan lama an thawm ka hriat lai te kha ka mitthlaah a rawn lang uarh uarh nghal a, ka ten thar khawp mai.

Muthilh leh tumin maimitchhing mah ila awmzia a awm der lo, ka harh tulh tulh zâwk a, ka mu meng kar ta ringawt a, dar 6 leh a chanve velah ka tho ta nge nge bawk. Chokaa tui lúm ka chhuan lai chuan thawm ri deuh nak nak ka hria a, a hnu lawkah kan in kawt aṭanga motor rum ri leh tlan chhuak ri ka hre zawm zat a, ka hriat sual loh chuan ka nu ngaihzawngpa a ni ngei ang.

Ka nu chu dar 7 pelhah a rawn tho thung a, zing dang ang bawkin a thingpui in tur ka siamsak a, a thu hnuaia ka awm vang pawh a ni lo. Ka pa dam lai aṭang tawh ka zing tin tih dan a ni hrim hrim a, ngaiah ka nei tawh a ni ber e. Ani pawh chuan ngawi reng hian a in ve mai a, a rim erawh ka ngaithei lo ru khawp mai. Ka thingpui in lai pawh ka in zawh peih loh phah a, nizan lawka an hun hman dan zawng zawng ka hre chiang ropui si a, ka hre chhuak zel lo thei lo a ni.

Tukṭhuan pawh ei lovin college ka kal nghal daih a, mahse kan college canteen-ah ka inhnawh puar thung. Nilêngin college-ah hun ka hmang char char a, Zaii nen kan inkawm leh deuh chawt a ni ber e. Vanneihthlâk takin kan result a la chhe lo ve ve a, kan zirtirtute paw'n college tihmingṭha tura inzir turin min fuih nghe nghe a, keini pahnih chauh min fuih hran lo, mi dang pawh an tam mai.

Tlai ka haw in chhung ka lut chu ka nu hian phone-in tu emaw ni a lo be mawlh mawlh a, a changin a vin leh ṭhawt ṭhin a, ngaihsak lem lo takin room chhungah ka lut tlang nghal daih bawk. Ei rawng bâwl tura ka chhuah leh chuan

"Lo kal teh Romawizual" a rawn ti a, engah mah ngai lovin choka lamah ka phei a, chutah amah bawk chuan

"Lo phei teh ka ti a ni lo'm ni? Thil pawimawh ni lo se chu ka be peih teuh lo che tih hre rawh, i hmel pawh kha ka hmu reng peih lo" a tih zawm leh nghal a, ṭawng nâ viau mah se chhang lêt lovin ka phei ve mai bawk.

"Naktuk aṭang chuan i zirna senso zawng zawng hi nangma'n in tum chawp tawh ang che, ka chawm reng thei tawh lo che tihna a nih chu!" ngainatawm loh zet hian a ti hlak hlak a, a thil sawi chu mak ka va ti ngai ém.

"Enga!? Khaw'nge ka pa pawisa zawng zawng khâ? A tam viau a ni lo'm ni? Chu bakah i hlawh ringin lehkha hi ka zir lo hrim hrim, min chawm angah inngai duh suh" ka aw chu a nêm vak bik lem lo khawp.

"I pa pawisa te kha chu a zawhna a rei tawh, mi chhang lêt zawt zawt lovin ka thu sawi engkim hi zawm tum mai ṭhin rawh" a rawn ti hmarh hmarh a, ka la awih thei chuang lo.

"Dawt i sawi chiang mai, vawiinah ka check nghal bawk ang. I hlawh hi itna ka nei ngai lo tih hria la a ṭhat ka ring, ka pa pawisa min hmutchhiah hlirin ka inenkawl zâwk a ni e" ka ti ve ta salh salh a, ka kal sawn tur chu

"I luhlul bawk a, check mawlh teh" a rawn ti leh hram a, ei rawng pawh ka bâwl chhunzawm peih leh ta der lo, ka mood ti-off miau hek!

A tukah chuan College kal pahin ka pa bank account passbook leh ATM Card ka keng chhuak a, a ṭul tê lovah chuan ka hmang ngai lo tluk a ni. Ka check ta ngei a, mahse eng thil nge ka hmuh tâk hi! Ka pa bank account-ah pawisa engmah a lo awm tawh lo. ATM Card chu a dik lo a nih ringin ka tinawn leh ṭhin, result ngai hlir ka hmu a, thinphu a va'n rang duh kher ém.

College pawh kal lovin branch lamah ka kal ta zâwk a, lâk chhuah ka neih ngai loh thu te, pawisa awm zat zawng zawng nen lam ka sawi vek a, mahse ka pa pawisa min hnutchhiah zawng zawng erawh a lo bo fai vek tawh, tih ngaihna a awm tawh lo. 'Ka lá chhuak' ti dâwn ila ka lá chhuak ngai si lo va, ka nu emaw Chhani emaw bak rinhlelh ka nei ta lo e!

Tlaiah chuan an lo haw hun ka chang ran a, sitting room-ah ka ṭhu ngawi reng a, ngaihtuahna pawh a vak kual nasa khawp mai. Branch-a ka zawh fiah khan ka pa thih aṭangin ṭum thum lai lák chhuah a nih tawh thu an lo sawi kha a ni a, a lá chhuaktu chu ka nu a nih loh vek paw'n Lalchhanhimi zâwk a ni ngei ang, a pawi ber chu ka account-a ka lo suan lut thuai thuai lo kha a ni.

Ka mawl, ka mawl tak zet. Ka pa account-a awmtir reng kha him zâwk tlata ngaihna ka nei a, ka mawl man ka hmu a ni. Ka account-ah lo sawn fel vek tawh ila chuan khawih chingpen a ni lo ang a, buaina leh harsatna ka tâwk miah lo bawk ang. Ka nu leh Chhani chu an rawn thleng rual titih a, pawi ka ti lo khawp mai.

"A tu zâwk nge ka pa bank-a pawisa la awm zawng zawng kha lá chhuak che u?" ka aw chu ka thunun hman meuh lo zawng a ni e.

"I buaina a va ho ve le unaunu" Chhani chuan min nuihsawh hmel tak hian a ti a, ka va ngei teh lûl ém.

"Nangmah i ni maw LALCHHANHIM!? Engati nge ka phalna tel miah lovin i lo lák chhuah ve ringawt a? Maw? Sawi rawh, engati nge a ruka râla i lo lâk chhuah vek?" ka ti vin ṭhawt a, a dinna lam chu ka pan ding nghal chat bawk.

"Sawi rawh LALCHHANHIM!" thinrim taka ka tih leh chuan ka nu zâwkin min lo nam sawk a, ka tluk ṭhelh lek lek a ni.

"I zak lo pang pang lutuk ROMAWIZUAL, Chhani ni lovin keima'n ka lá chhuak vek! I suahsual rawng bàwl i sim duh bawk si lo, hre rawh, i la rethei telh telh dâwn, chumi chu a thlen i duh loh chuan he in aṭang hian chhuak mai la a ṭhat zâwk ka ring" ka nu chu ka en tlawk tlawk a, ka mittui pawh ka dang hman ngâng lo.

"Eng vanga lá chhuak nge i nih? Eng atán nge i hman reng reng? Ka pa pawisa a ni asin; ka tân bik liau liaua a dah!" ka ti zuai raih a, ka ṭah a chhuak zual tulh tulh bawk.

"Thil i hre sual leh ta, i tân chauha a dah a ni bik reng reng lo. Ka hmanna i hre duh maw, kan bâ zawng zawng ka tlâk vek, ka awm a nawm huai phah nghe nghe asin. Ka unaunute bâ nen lam ka peksak vek alawm, i rethei tawlh tawlh dâwn ka tih khâ, i pite bulah awm daih mai rawh" ka nu ṭawngkam chuan min chhun ngut ngut a, ka ṭhu sawp hnawk a, chhan pawh ka chhang peih tawh lo.

An kal sawn hnu chuan ka room-ah ka pen lut chhet chhet a, ka eng tih mah a tui tawh lo a ni ber. Kawngka kalhin khumah chuan ka bawk a, lungchhe fê hian ka ṭap feih feih a, ka nu leh pate ka ngai ngawih ngawih. Min hmangaih em emtu ka pi leh pute ka ngaihtuah chhuak bawk a, mahse hrilh ai hrilh loh ka thlang leh ta fan tho.

Ni e, anni chu ka hrilh thei ngâng lo a ni. An nupa chauhin cheng dun mah se ka pu pension hlawh ringin an khawsa dun ve hram hram a, eizawnna mumal an nei lo tih hre reng chunga bawhbuai chu ka ngam thlawt lo a ni. Zan khuain ka muhil lo va, a tukah chuan college kal châkna pawh ka nei thei rih lo. Ka account-a pawisa awm lah a beitham bawk si, hna thawk dâwn ringawt ila thawh ber tur hre si lo, ka ngaihtuahna a vah kual nasat lutuk avangin class pawh ka ṭhulh ta ringawt.

"Hna thawh tur chu zawnsak che i duh em? I duh chuan ka ṭhiante hnenah i inhlawh thei ang?" ka nu min biak dan chu a va'n runthlâk tak êm.

"Kei pawh ka ṭhiante'n insuk tur tih vel an nei mai thei" Chhani min nuihzat hmel chu ka ngaithei leh ta lo, ka rualpui a nih vang a nih ka ring ber tawh.

"In va han zak lo tak! Inthlah nghal r'u! ROMAWIZUAL! Thlah nghal rawh, kek tawh suh, mi sualnu!" LALCHHANHIMI nena kan inkeh bawrh bawrh laiin ka nu chuan min rawn kek dâk âwrh a, pahnih ém chu ka hneh bik lo a ni e.

"Zak thei lo leh lutuk mai!" ti hlakin ka nu bawk chuan ka hmaiah a rawn béng ri leh thlawrh ta, ka pian tirh ata ka thin a la rim ber ang.

"Ka ning lutuk!" ti vin tuarhin ka nu chu ka sual lét a, a rem lai laiah namin ka kek pawp pawp a, ka nu pawh ril tla ang mai, a rak nasa hle.

"Duh tâwk rawh ROMAWIZUAL" tih thu ka hriat hnu lawkah ka lû chu a ri chawrh a, ka ni muai muai a, ka tlu chu a ni zui nghal mai.

"Eng lo, ka tum pawh a ni lo, a ni lo tak tak ka nu, in awm dan ka hmuh khan ka buai vek a, ka hlauthawng êm a ni" tia Chhani ṭawng zawt zawt chu awm deuh chiai chiai hian ka hre thei a, ka lû chhung lam a nâ em em bawk.

"Eng tham mah a ni lo, kal rawh, i room-ah lut rawh, ani hi chu nakinah a rawn harh ve leh mai ang, a suahsual man leh a phû tâwk chiah a hmu a nih hi!" ka nu aw chu ka thil hriat hnuhnun ber a ni zui nghal.

Tukverh inthen chik ri rât rat chuan min tiharh hlawl a, ka khumah ngei puan sin lovin ka lo mu fel diam a, min khawngaihna tlêm tal chu an la nei ve a ni mahna le. Ka lû nâ pawh a zia tawh a, a awm tawh mang lo zâwk a, mahse kawngkapui hawn ka tum chu pâwn lam aṭangin a inkalh ta tlat mai. Hawn buai tum zui lem lovin ei rawng ka inbáwl chawp a, chu in chhung, hremhmun tluk zeta siamtute pahnih an chhuak ve ve tawh tih ka hrethiam mai bawk.

Ka inei puar hnu chuan ka pu ka call a, engkim hrilh hun a ni tawhin ka hria. Ina ka awm thu leh ka pi nena lo kal turin ka chah zawm zat a, min hau dâwn mah se ka laka Chhanite nufa awm dan chu a em em tawh a ni.

Ka pute pawh an rawn thleng har lo va, chabi awmna áwma ka hriat chu ka sawi a, a awm miah lo leh nghal. Ka pu chuan pâwn lam aṭangin a chhu chhia a, an rawn lut zui nghal bawk. Ka nu nena kan insual dan zawng zawng leh ka tâna ka pa pawisa dah zawng zawng an hman ral dan ka hrilh hnu chuan ka pi ai ka pu thin a rim zâwk a, ngawi run hian ṭhutthlengah a ṭhu a, a en ngai a en tlawk tlawk a, ka pi erawh kei min chhan takin a ṭawng char char thung.

Tlai a rawn ni a, ka pu chuan ka nuhrawn chu ngaihno bei tehchiam lo hian a zilh nghal a, a ṭawng reng reng chu a ram hmuk hmuk a, mahse ka nuhrawn zah theih lohzia chu pui tak a ni.

Tham lo fê hian a chhang lêt pawng pâwng a, ka pu insum thei lo chuan a bêng ta nge nge a, a béng nâ thawkhat bawk nen a tlu chiang khawp mai. Chumi tlai aṭang chuan buaina a punlun zel a, nasa taka mei alh kang kâi zel ang mai hian kan in chhungkhur boruak chu ka tehkhin ta ber. Ka pite nupa chuan an bula awm chho turin min sâwm nî tin ṭhin a, mah se buaina a chhuah aṭanga thla hial a liam hnuah pawh ka la hnial zel tho.

Dik tak chuan awm daih ka châk lutuk, tu nge kan hmangaihte leh min hmangaih em em tute bula awm châk lo ang ni? Amaherawhchu, an bulah awm ta ila ka zirna senso zawng zawng min tumsak a ngai dâwn tih ka hria, ka pu pawh ka hrilh tawh nghe nghe. Chu bakah kan in chu mi dang ta ni tura kalsan ka phal teuh lo, mi nasa lutuk pahnih awmna tur atân leh nghal, a teuh lo hi a ni tawp.

Ka pu hnen aṭangin pawisa pek tumna vawi tam ka hre ṭhin a, ka hnar zel a, ka pawisa inkhawl sa chuan 3rd semester pawh min daih tluantling dâwn lo tih ka hria, a bul ber chu pawisa thawh chhuahna tur hna ka hmuh a ngai a ni. Zaii pawh ka ṭhian ṭha ber a nihna angin ka hrilh ve a, min khawngaih khawp mai. A chhungte bulah college kal paha hna thawh tur te min lo zawn kualsak thlap a, mahse an hre bik chuang lo a nih hmel.

Ka nuhrawn chu a inluling telh telh a, keiin ka tûang ka tichhah zual zel thung a, kan in chu min chhuhsak mai loh nân ka awm tlat a ngai a ni. An rilru a chhe si a, a bula awm dan tâwk erawh ka thiam chho ta viau a, engtik lai paw'n ka inring ru reng a ni ber e.

Ni a ral a, thla a liam a, loh theih lohna avangin college chu ka chawl ta nge nge a, ka tlin ngâng lo a ni. College kal chunga hna thawh tur a awm bawk si lo, nilênga thawh tur chu a awm mai zel a, chu vanga chawl ta pawh chu ka ni.

Tichuan hna thawh tur zawngin hun ka hmang ṭan ta a, bazara thlai rah zuar ṭhin nu pakhat nen hian ka tawng fuh hlauh mai a, arsa sah a hlawkzia te, a lákna tur nen lam min hrilh ta duah a, chu chu a fuh dâwnin ka hre nghal bawk.

Engtin tin emaw ni kan inbe rem a, a tir chuan ka ten ve lutuk, a tháng si, chutah sah a la ngai zui, zei lo tak ka ni. Hna thawk lutuk lo mi ka lo ni kher bawk nen ka arsa lákna te paw'n min beidawnpui titih a, mahse thla khat hnuah erawh ka insiamrem thei ṭan a, sa sah dan pawh ka thiam chawp ve zel a, tlém chuan an ngaih a ṭha ta deuh.

Bul ka ṭan tirh kha chuan anmahni kha an heu zâwk nghe nghe a, kei min khawngaih avang khan min tihtir hram hram mai chauh kha a ni a, kei pawh khan nuam lo ka ti ru ve ṭhin. Amaherawhchu, engkim ruattu Pathian a awm a, a ruat sual lo e. Ka nu leh Chhani mawlh chuan min nuihsawh nasa leh a, an va'n sual ve chiang tak!

A phun peih peihah an ṭang a, eng ang paw'n âng nasa ṭhin mah se ka engah mah a thawk buai eih tawh lo. Ka pite nupa paw'n pawisa thawk chhuak zawnga ka awm chu min lawmpui rual rualin min la khawngaih em em tho va, an bula cheng turin min la sâwm reng a, ka ngaihdan erawh a la ngai reng thung.

A kuma kum arsa sata pawisa ka thawh chhuah ṭhin tâkah chuan ka lâkna te nen pawh indawrna mumal tak kan nei a, an fel khawp mai. An fate hnenah ka chungchangte an lo sawi ṭhin hi a ni a, fel min tih thu te, ngaihsanawm min tih thu te, min sawi dan zawng zawng chu ka phú loh thil vek a ni.

Tin, arsa zuarin zirna ka chawlhsan tih hre chiang em emtu Zaii pawh a fel ngaiin a la fel reng a, an chhungte'n sa an lei dâwn apiang hian ka sa zawrh bík kher min rawn leisak vang vang ṭhin a, a chang chuan ka inthlahrung lek lêk ṭhin.

Arsa sat lova dawr vela thawhna tur pawh duh chuan ka hmu tawh reng, mahse keimah berin nuam ka ti hnuhnawh tlat a, ka sawi thiam chiah lo, ka mir ni berin ka hria, ka inhralh thei ve ṭhin khawp mai.

"Arsa hi kg 1 eng zat man nge?" aw ri ka hriat rual chuan ka ngaihtuahna aṭangin ka harh chhuak thuai a, min dawr tumte ngaihsak miah lo anga ka awm chu mawi lo ka ti rilru hle bawk.

"250 a nia, kg eng zat nge i duh ang ka pi?" aw leh hmel zawng zawng nen nêlawm takin zawhna ka zawt lêt a, ka hmaa ding chu nu valai rual vel a ni a, nui chung hian

"Kg 2 min lo sah mai ta che, a man pawh a laklawh lo deuh ang" a rawn ti a, bu nghatin buk lung bula sa sah chem chu ka ban a, ka sat nghal zung zung a, hnehsawh min tih hmel khawp mai.

Min dawrtunu a kal liam hnu chuan mi dangin min rawn dawr ve leh nghal a, inrinni a nih avangin min dawrtu an ṭhahnem ve ang reng a, inrinni tin hi chu a ni ziah hrim hrim. Bazar pawh an tam pangngai viau a, zing kâr aṭang tawh mipui bazar an inkalpel suau suau a, mahse keini tân chuan mipui veivak an tam pôh leh hlawkna a ni thung.

Khua a thim hnai a, Pathian zârhah ka bula mite hralh loh lai paw'n ka inhralh char char a, arsa sah ngai bawk, buk ngai bawk, polythene-a funsak ngai bawk, puitu ka nei bawk si lo, ka indaih lo lek lek zâwk a ni. Kâr tluanin arsa ka zuar a, inrinni te hi chuan haw hma ve ka châk ṭhin. Chu bakah inkhawm zan te a ni a, inkhawm hman ila chuan ka inkhawm ngei ang maw le.

Khua thim ṭan tawh mahse min dawrtu an awm reng tho va, ka sat zo chiah tihah ka sat leh nghal zel a, mi ṭhenkhat hi chuan min khawngaih vang hrim hrimin min dawr ṭhin tih ka hria. A chhan chu hmeichhia ka ni a, ka bula sa zuarte mipa vek an ni a, ka khawngaihthlak viau te pawh a ni mahna le.

"Lo kal rawh, kg eng zat nge ni ang? Kg 1 hi 250 man a nia, hei, a bawp lai vel hi a ṭha asin, i duh chuan a thla lam pawh a awm tho" en mang lovin min rawn dawr tum nia ka hriat chu ka lo be zung zung a, ka kut tháng vel ka hru fai laklawh êm bawk a ni.

"Nang maw!?" ka hmaa mipa ding hmel ka hmuh rualin ka ti sep a, keima hriat tâwk lêk vela ringin ka ṭawng a, ka thusawi chu a hre pha kher lo mai thei.

"Eng nge i duh ang? Ka sawi awmzia chu kg engzah nge ka sah ang? Eng zat nge i duh?" ka ṭawng hrim hrim chu ka inringtâwk lo tak zet!

"Kg 1 aw ni ang?" a ngawih reng avangin keimah zâwkin ka ti leh a, mi pawh en chuang lo hian a bu nghut a, a bawp lampang chu láin ka sat ve nghal mai bawk.

Cheng 300 hi min pe a, kir tuma pawisa ka lâk lai chuan a lo kal daih chu niin, a chet dan vel chu mak ka ti ru khawp. Arsa sàta ei ka zawn hma kha chuan zingtin deuh thaw kan inhmu ve ṭhin, chu pawh Zaii u a nih avangin, mahse unau dik tak an ni lo. Zaii nu leh a nu unau an ni a, a hming pawh ka la hre ve reng. U Maṭhuama a ni a, sawrkar zêm zenin officer a ni a, Zaii min hrilh dan chuan kum 25 a nih laiin a inziak tling daih tawh a ni áwm e.

Chawhmeh leia rawn bazar ṭhin mi hrang hrang; hna sang tak tak thawk te chu ka awt ru ve ṭhin, anni chu an hlawhtling tawh bik a, nun nuam tak an hmang bik a, ka awt ru ngawih ngawih. Kei ve chu ka nuhrawn sual lutuk azârah arsa sata ka inhlawh a ngai a, a fanu; ka unaunu hrawn ni bawk Chhani erawh nuam thei ang berin khawvel nun a chen a, mahse ani kher chu ka awt lo khawp mai.

(End of Chapter 4)

Author's Note : Prologue kan hrû mâm chho tial tial e....

SYLVIA ROMAWIZUALI

By

Havali Adam

Chapter 5

"A rem lai laiah khan i dah leh tawp ang e, a rimchhe si, ka ning teh a nia" in chhung ka luh rualin ka nu ṭawngkam ngainatawm loh zet ka hre nghal a, a thu sawi chu engah mah ka ngai lo, a thu lo ve chiang ém mai.

"Khatah dah tawh suh, a rim tháng khan in chhung zawng zawng a luah khat vek ṭhin, pâwnah dah la a ṭhat ka ring" a rawn ti leh hmarh hmarh a, za lo zetin ka nui hul hak ringawt.

"ROMAWIZUAL!" ka hmingpumin min ko har ka ti ru tawh reng a ni.

"A eng ber chu nge i buaina ni a? Ka silfai dâwn alawm le, a khawihtu zâwk pawh ni hlei lo, i awm áwm khan awm mai mai rawh" ka ti lêt ve ta salh salh a, min ngei hmel teh e!

"A nih chuan pâwnah tal silfai ang che" min tham lo zetin ṭawng mah se a thu sawi hrim hrim chuan ka beng a verh lo a ni ber.

Bathroom-ah lutin ka arsa sahna leh zawrhna hmanrua vel chu ka silfai zui nghal mawlh mawlh a, rimchhia ti hle si kha bathroom kawngka bulah min chik tak hian a rawn ding leh lawi a, ka hmu lo der hmak thung. Tun lai chu Chhani a dam lo ve deuh a, mahse college kal loh phahna tur ém chu a ni hran lo. Inrinni a nih avangin a mu nilêng a, a la rawn tho chhuak lo hrim hrim a, ka nu chuan a ngaihtuah khawp mai. A hmelhriat doctor te pawh a râwn kual nual a, Chhani erawh dam lutuk lo, dam deuh si ang chi hian a la awm reng thung. A tirah chuan a hritlang phawt a, a hnuah a khua a sik chhunzawm a, tun thleng hian a la dam chiang hlei thei lo chu a ni e.

Inkhawm bán fel hnuah chaw ka ei ve ta chauh a, ka nu leh Chhani erawhin an ei tawh thung. Chhani chu a rawn la tho kang peih lo va, ka nu'n a room-ah chaw a barh chilh nghe nghe a, unaunu hrawn mah ni se ngaihtuah loh chu thil harsa tak a ni. Chaw ka ei kham a, ka tifel nghal zung zung a, ka tihtur dang leh chu inbual faia mut der der a ni tawh mai. Thil lawmawm tak pakhat chu ka nu'n tlai tin ei rawng bâwl min awl tawh a, ka tân hman ngaihna awm hek lo. A fanu Chhani erawh chettir a phal ngâng lo a ni mahna, ei rawng bâwl a zirtir áwm pawh ka hre ngai lo. Ka nu'n ei rawng a bâwl ta ziah chu ka tân a hahdamthlâk ang reng viau a, ka haw hi chuan dar 5 emaw dar 5 leh a chanve a ri daih tawh ṭhin.

Zan ka mu chu muthilh mai tum mah ila ka thei der lo, tlaia u Maṭhuam chet dan mawlh khan ka rilru a luah a ni. Cheng 300 min pek ngawt chhan kha ka ngaihtuah rauh rauh a, a mak khawp mai. Ni dangah hi chuan Zaii a nih loh paw'n mi dangin an rawn lei ṭhin a, duhsak takin a sa ṭha lâi lai ka lo sahsak ziah bawk a, min dâwr tura an lo kang vang vang ṭhin chu a taimakthlâk ka ti letling zâwk. U Maṭhuam hmel ber kher chu ka mitthlaah a la châm tlat zui, a chhan lah ka hre bik hauh si lo. College ka kal laia a hmel ang chiah chiah kha a pu tawh lo va, ka hmu fai zualin ka hria. A hma khan a fai lo tihna lam ni lovin, College ka chawlhsan hnua kan inhmuh leh hmasak berna a ni a, hmân ang chiahin tarmit a la vuah reng a, a ngo phian bawk si, a hmel chu officer hliah hliah tak a ni.

"Lo tho teh Mawizual, i va mu rei em em ve, chawhmeh siam tur ka hre lo a nia, engati nge tukin hi i thawh tlai em em?" ka nu awah chuan ka harh zawk a, ka lû bula phone chu hmet êngin ka tho chhuak zui nghal bawk.

"Ka lo tho, chawhmeh kha chu keima'n ka lo siam mai ang" ka ti ve ta thuai thuai a, dar 8 a lo pel fel vek tawh chu niin, thawh ka hai chiang kher mai.

"Siam mai ang tih a hun tawh lo, siam a hun tawh lutuk zâwk! Khi dar 8 leh a chanve a ri dâwn a nia, lo tho vat teh!" ka room pâwn lam aṭang chuan a ti leh mawlh mawlh a, ka tho tawh tho va, ka chhang buai ta lo law law.

Room aṭanga ka chhuak chu a lo phí sek a, a hmanhmawh khu vul chûk ka ti mai. Chhani tak ngial pawh a tho tawh a, duh ai chuan ka mu rei mah mah a ni. Ka inphih fai hnuah arsa ka siam zui nghal mial mial a, ka nu'n purun vâr leh sawhthing a lo rawt pawlh bawk a, a hmanhmawh bawk a ni ang min pui ve thlap. Arsa siamah kher hi chuan min pui ngai miah lo va, Pathianni zing leh tlai hi chu ka ei rawng báwl turah ka ruat hmiah. Kár tluanin min awl miau a, ka tân Pathianni zing leh tlai lek te chu a harsa hran lo. Chhani erawh sitting room-ah phone khawihin a ṭhu ngawi reng a, rizai pakhat hi a sin bawk a, ka en liam ta vel mai mai.

Dâr 9 dâwnah ei rawng chu ka bâwl fel a, chaw pawh kan ei nghal a, mahse zing dang ang bawkin kan inbe tam lo hlawm khawp. Thil eng emaw ni sawi hlek hi chuan a tawpah kan inhnial ziah a, engmah sawipui chî an ni ṭhin lo, ngawih chuh a finthlâk ber zâwk a ni. Inkhawm dâr hmasa a rawn ri ral ral a, thleng ka sil zo vel chiah bawk. Kan inkhawm lai chuan ka mut a chhuak ru hle a, ka muthlu lek lek a, kan thil zirlai te chu hriat mumal ka nei lo. Mut ka kham lo ti dâwn ila thawh hai khawp khawpin ka hmu hnem si, ka chau ni berin ka hria. Ni e, ka chau a ni mahna, arsa sat reng renga hun hman zawng keini ang hmeichhe tha nei tam lo ve tak tân chuan a chauh thlâk lam lek lek ṭhin chu a ni e.

Inkhawm kan bâng a, ka nu leh Chhanite chu an ṭhiante inah an léng kawi ve ve a, keimahin inah ka awm deuh tlawng a, ka mu leh ta daih. Ka harh chuan chawhnu her a lo ni reng tawh a, ka nu leh Chhani hmel erawh hmuh tur a la awm lo, an la léng reng a ni mai thei. Ka rilṭam chuan Waiwai ka chhum ṭawk a, ka va ei tui reuh mai mai tak! Chawhnu inkhawm bán awm velah ka pite nupa an lo lut hlawl a, keimah zâwk an ina lén ka tum rilru sa deuh kha a ni a, mahse an lo lêng chu pawi tihna ka nei hran lo. Ka pite nupa hi chu ka tân an fel em em a, engkima ka engkim tih hial khawpin ka hmangaih a, ka thisen zawmpui dik tak dam chhun ang maia ngaih chang pawh ka ngah ṭhin.

"Kan bula awm chu i la duh lo reng em ni Sylvia? I pu nen pawh kan ngaihtuah nasa ṭhin, mahse nangmah ber hi i luhlul tlat bawk si" min lainat ruk hmel zet hian ka pi chuan a ti a, chhang lovin ka nui ringawt thung.

"Hun a tih hunah leh a inpeih hunah amah zâwkin a rawn sawi mai ang, mi hrang pawh kan ni hleinem" rawn titu chu ka pu a ni a, a lungawi chiah lovin ka hria.

"In bula awm ka châk loh vang a ni lo a nia, he in hi kan in a ni a, mi dang tâna hlan ngawt zawng ka remti thei lo a ni. Ka pa khan documents felfai tak lo nei thlap se chu ka lo awm daih tawh ang, ka nuhrawn leh Chhani pawh hi ka chhuahtir tawh zâwk mai thei bawk" ka tih hnu lawkah ka pi chuan

"I thlirna lam aṭang hi chuan i awm dan hi a dik thlap maw le, mahse kan khawngaih che a nih hî Sylvia, zirna lam te hi chhunzawm i la tum hrim hrim em?" a rawn ti ve nghal a, ka pu erawh a ngawi reng tawh.

"Tum deuh tho e, mahse ka hun neih dan hian a zir lo khawp mai. IGNOU-a Admission tih chu ka tum ngei a, ka zir tak tak hman dâwn bawk si lo nen ka fail mai mai ang tih ka hlauthawng a ni. Hun hi liam leh deuh phawt se, Pathianin ka tân rem a ruat leh mai ang" ka ti ta duah a, an ngawih ve ve lai chuan

"Hetah chaw ei ve nghal r'u aw, zanriah kan ei ho lohna chin pawh a rei ve tawh alawm le, ei ngei ngei r'u aw" tiin ka sâwm zawm zat a, chutah ka pi chuan nui ri hak pah hian

"Kan ina zanriah ei tura sáwm che kan tum zâwk alawm, lo ei zâwk mai ta che, duh leh ei rawng te chu i báwlsak vek tho ang a, ka pui nghe nghe ang che" a lo ti ve nghal a, kan in chhung boruak nuam lo tak kâra chaw ei ai chuan ka pite bula zanriah kil chu thlanáwm tak a ni.

"Ka hre lo le, rawn ei daih chu ka châk tho mai" ka ti sep a, ka chhan dan chuan ka pi a tiphur zual khawp.

"Khawi, an ei tur báwlsak lawk ang, kan pahniha kan chét te chuan rei a ni nâng. Che thuai thuai ila, kan in lamah kan kal daih dâwn a nia" a ti zung zung a, ka pite bula zanriah ei turin ka rilru ka siam fel ta ringawt bawk.

Ka pi nen chuan ei rawng kan bâwl dun a, ka hun hman dan leh harsatna ka neih leh neih loh te min zawt a, hrehawm ka tih leh tih loh thlengin, mahse kei chuan harsatna ka neih loh thu ka sawi thung. Mi pahnih chauh ei tur a ni bawk a, kan bâwl zo har lo khawp. Ka pite in kan thleng chu keimahah hahdam ruk riauna hi a awm a, ka sawi thiam chiah lo, ka awm a nuam sawng sawng tlat a ni. Ei rawng kan bâwl ve leh nghal zung zung a, sa tih vel ai thlai hnah leh thlai rah deuh hlir kan siam a, vawksa rep kan chhum bawk a, chu chu kan sa siam awmchhun a ni deuh mai. Sa ei tam lo nupa an ni a, kei paw'n ka ei tam chuang lo, ei loh aiah kan ei ve ṭawk ti ila a sual tampui lo ang.

Ka pite chuan riakah min sawm zawm zat a, mahse ka hnar ta thung. Ka pite in aṭanga ka haw kan in chhung ka lut chu sitting room light a lo thim ṭhiap tawh a, an pahnih hnîhin an mu tawh a ni ngei ang. Kei pawh ka room-ah ka lut tlang nghal a, mut zai ka rel zui nghal bawk. A tuk aṭang chuan kár tluanin ka eizawnna bulpui ber ni ta, arsa sah leh zawrh chu ka ṭan leh ta mawp mawp a, hnam dangte pawh hian min lo dawr ve ṭhin. Pathian zârah ka lehkha lo zir tawhna te kha ka hmang ṭangkai em em a, Sap ṭawnga biak an ngaih paw'n ka be thei mai zel a, min dawrtute pawh hian dawr nuam min ti ṭhinin ka hria. Ka bula ṭhute chenin a chang chuan ka chhansak ṭhin a, a nihna takah chuan ka bula thil zuar te, kei aia kum tam arsa zuara ei lo zawng tawh te chu kei anga B.A pawh thleng hman lo vek an ni a, an fakawm ka ti ngawt zâwk a ni.

Nilaini tlai a ni a, eng ka hria nge ni, nun hlui leh hun kal tawhin min chen chilh tlat a, ka lung a lêng khawp mai. Ka nu leh pate pahnih bawk ka ngai leh a, min dawrtu lo kal lai te chuan ni dang ka ang thei lo. Ṭha takin ka sahsak vek tho na chu, keimah ber ka dik lo tih ka inhre vek a, ṭawng siam siam tur paw'n rilru leh tha ka thawh lui peih lo a ni ber e. Mi dang tân chuan danglam tih tur awm ang paw'n ka awm em em hran chuang lo, mahse tlêm chuan ka hmelah leh ka chet dan aṭangin an hre mai thei a ni. Ka vanneia siamin ni khatah hian eng emaw zah man ka sat chhuak ve ṭhin a, ni danga ka hlim theih tehreng nen, tun ṭum chu hlim harsa ka ti khawp mai.

"I inhralh hnem tawh em Sylvia? Inrinni khan ka rawn bazar hman ta lo va, tunah ka lo kal hnuhnawh a nih hi!" min betu lam chu ka hawi thuai a, Miss Janet-i lo ni rengin.

"Lo kal rawh Miss, inhralh chu ka inhralh ve nual tawh tho. In bâng tawh em ni? Vawiin chu in bâng hma deuhin ka hria, dar 3 pawh a la ri lo" hawihhawm tak hian ka ṭawng a, ka ṭawng siam siam lui a ni ber zâwk.

"Nia, bâng hma deuh, chu bakah vawiin chu class ka nei tlêm hrim hrim. Kg 2 a ni leh mai aw, a theih chuan a ruh no lai deuh hlek kha min lo sah teh aw Sylvia, ka inthlahrung lo mai ang" a nui hmel chu a ngainatawm tak zet.

"Tehreng mai, min lo dawr ziah hi ka lawm ṭhin asin aw Miss, i fate an dam ṭha maw?" be reng pah chuan arsa ka sat ri chawk chawk a, a duh ang ngeiin a ruh no ka sahsak ṭeuh bawk.

"Dam ṭha chu a ni mai, zirna chawlhsan tawp hi i tum lo ang ti raw Sylvia? Lehkha thiam thei tak i ni a, chawlhsan lo la chu kan college i tihmingṭha ngei ang maw le" min duhsakna awká avang chuan ka nui tawi sak a, chhan erawh ka chhang lo hrim hrim.

"Ka zo e, min lo dawr ṭhin a, ka lawm tak tak a ni Miss" tih leh polythene-a fun fel sa vek tawh arsa chu pek ka rual a, lo lâk pah hian

"Nangte chu kan dawr lo thei nâng che maw le, ka kal nghal mai ang" a rawn ti ve leh a, nui sen senin ka buk khum nghauh nghauh a, ani pawh ṭawng khawmuang tawh lovin a kal sawn zui nghal nal nal.

Hmuh phâk loh chin thleng ka en zui vawng vawng a, kan zirtirtute zingah chuan fel ka ti ta ber mai. Ka pa a thi tih a hriat khan min khawngaih em em a, zirna ka chawlhsan tirh phei kha chuan mak a ti viau nghe nghe. A theihna kawngah min pui ṭhin a, ka arsa zawrh pawh a lei ngun ber te zinga mi a ni. Vawi khat chu a pawisa hmanga zirna chhunzawm turin min ti tawh ngei a, mahse ka duh bik teuh lo. Ka pi leh pute pawisa hman pawh ka duh lo a nia, Miss Janet-i phei chu fel viau mah se thil mawi niin ka hre lo. Tin, rualban lo leh hna thawk thei lo khawpa harsatna nei pawh ka ni lo va, ka hun tawn engkim chu ka chakna tur leh ka chhelna tur zâwk niin ka hre tawh a ni.

"Khaw maw pawisa min lo púktir lawk teh" Chhani chu ka en deuh hâw a, ka rin loh lam daih a rawn sawi.

"Eng vang ngawt chuan maw?" ka en tawh lem lo va, ka phone khawih lai ka khawih zawm mial mial a, a thawm aṭangin ka room chhungah a lo pen lut tih ka hre nghal bawk.

"Ka mamawh, mamawh lo ila ka dil tawp lo ang che" a ti ham ham a, ka room chhungah leh nghal a, a ngampa mah mah a ni.

"Ka room aṭang hian chhuak rawh, pawisa i duh a nih te chuan ka nu va dil ta che, a pe ziah che alawm, eng nge kei min rawn dil daih?" ka aw chu a nêm hran lo khawp.

"A phal loh vang alawm ka lo dil reng che nì, min pe vat mai rawh, tam pawh a ni lo, cheng 1000 khat lêk a ni mai" a thil sawi avang chuan za lo zet hian ka nui hul hak ringawt.

"Ka pek phal che ring suh Chhani, min dil ngam zâwk ka ti, cheng 1000 lêk i ti leh ta nghal a, thawh chhuah harsatzia i hriat hunah chuan cheng 10 mai mai pawh hi a hlutna i man thiam ve mahna" ka tih chuan ner náng hian min en a, púktir ka tum lo bur.

"Min pe vat teh Sylvia, ka mamawh a nia, ka ṭhiannu'n a bâ min rawn ṭhing thut bawk si, ka nu ka hrilh ngam bawk si lo, chuti ni lo se chu tihbuai che ka tum lo hrim hrim" tiin ka khum lamah a rawn pen phei a, a rim tui lem lo tak chuan ka hnâr a verh nghal zar bawk.

"Khatiang khan min tlawn tum suh Chhani, nang hi zú i in chiang ti raw? Engati nge thil ṭha lo hlir hi i tih a? Va intifai rawh, i rim kha a chhe lutuk!" ka ti hlak hlak a, zû rim a nám êm a tin ni!

"Ka mamawh ka ti a ni lo'm ni? Min pe ṭha ve hle hle ta che, mi sualnu!" ti vin tuarhin ka phone ken lai chu a rawn lá thut a, a vawm keh nghal chuaih a, ka thinrimna chu thup zawh rual loh a ni leh ta.

"LALCHHANHIM!" ti ṭhawtin a samah ka kek bu lâwp a, ka thin a rim bawk nen ka khawih nâ khawp mai.

"Engati chiam chiam nge? Awi, i va han zak lo tak! Inthlah r'u, inthlah nghal r'u, eng vanga lo insual leh ringawt nge in nih!?" ka nu chuan min pawt ṭhen thei hram a, ka phone keh darh nuaih chu ka va chhar thuai bawk.

"Eng thil chiah nge thleng Romawizual? Engati nge in insual ve ziah!? Sawi teh, tu nge bulṭan hmasa zâwk che u?" ka nu aw chu a dam tehchiam lo hle.

"LALCHHANHIM le!" thinrim taka ti charhin a din lamah chuan ka pen phei pawk pawk a, ka ban phakah a ding ta maw tihah ka theih tawpa nâin ka beng pawp a, a hawi sawk a, ka nu zâwk chuan min lo nam sawn thuai nghal.

"ROMAWIZUAL!" tia ka lam a rawn pan lai chuan

"I ngam chuan kut min han thlak leh teh ka nu, ka khawih lêt zel tawh dâwn che tih hre rawh! Ka hlau teuh lo che, ka zah der mai zâwk che a ni. Thu kal lam leh haw lam hre map lovin LALCHHANHIMI kha i ṭan leh ringawt a, ka phone hi en ta che, a vawm chhiat a nih hi i hria em? In pahnih khan hre rawh u, ka thinrimna in kaih thawh chuan insumna pakhat mah neih ka tum tawh lo" ka lo ti ṭeuh a, rapthlak min tih hmel zet hian ka nu chu a chek tlak tlak a, min hnaih zawngin a rawn phei chhunzawm ta miah lo bawk.

"I va han zak lo pang pang ve le!" ka nu chuan a ti hmarh hmarh a, ngeiawm zeta nui hul hak chung hian

"Zak teh nâng, nangni paw'n zahna in tlachham bik hleinem" ka ti lêt salh salh a, ka hmuh phâka awm reng tur paw'n ka duh rih lo, ka thin an tirim zual dâwn tlat.

"Ka room aṭang hian chhuak rawh u, i fanu duat khan zû a in tih hre bawk la, a nu dik tak i nih chuan zilh nachangte hria la a ṭhat ka ring" ka ṭawngkam chu a dawngsawngtu tân chuan a kha khawp ang le.

Tur zeta hmin en hnuah ka nu chuan Chhani chu a kai chhuak hmawk hmawk a, ka room kawngka chu ka kalh nghal thuai bawk. Khumah ṭhuin ka phone chu ka en chiang a, a chhe hneh khawp mai, a vawm nâ viau a ni mai thei. Ka hringnun hman mêk chu hrehawmin buarchuar viau mah se beidawna lunghnur mai ka tum awzâwng lo, anni aia sang leh ropui zâwk, chungnung zâwk ka la ni dâwn khawp, ka la ni ngei ang. An duh tâwkin min han hmusit phawt teh se, Chhhani ngat phei chu kei aia a ṭhat bikna ka hre lo, chawmhlawm leh nghal. Infak vang ni lo se kei te chuan pawisa ka thawk chhuak tal a, ka inchawm tal a, ani nena intehkhin chîah pawh ka inngai lo hial zâwk a ni.

A tukah chuan arsa zuar lovin bazar ah ka chhuah phah ta ringawt a, phone lei tur ka ni a, ka phone chhe ta kha a hlui ve tawh mai bakah ka neihna a rei ve tawh bawk nen ka ui em em hran lo. A phone taka chhe mah se thil pawimawh zawng zawng a la him vek a, Chhani lakah erawh ka la lawm lo ru reng thung. Ka rin ai phone a lo to tawh phian a, ṭhat pawh a ṭhat hmel hlawm khawp mai, a zuartute lahin an fak thiam si. Mawi tak leh changkang tak ni si lo, mahse mawi ve tho si, hman tlâk leh tlo tura ka ngaih chu ka lei ve ta nge nge a, ka duh khirh bawk nen ka zawng rei teh e! Bus-a haw ka tum viau na chu, traffic jam a rei hmel lutuk avangin kea haw ka rilruk hnuhnawh leh ta zâwk bawk.

Tlaia ei rawng ka bâwl laiin ka pi hnen aṭang phone call ka dawng a, zana lêng turin min sâwm a, thil pawimawh tak min sawipui a duh thu te a sawi luam a, 'aw' ka pawh nghal ringawt bawk. Rei lo tê hnuah ka nu a rawn haw a, ka hmel a hmu chu mak a tih hmel khawp. A áwm tho mai, an chhuah fel hnuah phone lei turin ka chhuak ve chauh kha a ni a, arsa ka zuar dâwn lo tih hre hek lo. Kan inbe lem hlei lo va, a ṭul tawpkhawk lovah chuan kan inbe ngai lo tluk a ni. Ka phone thar chu ka charge a, ei rawng ka báwlsan mial mial a, phone ka nei tih pawh ka hrilh kher chuang lo. Mahni buai buaiin buai ila, a tua mah inngaihsak em em lo ila, buaina kan nei lo a ni mai.

Zanriah ei hmain Chhani nen bawk kan intithiam lo leh a, tun lai chu hmeichhia si zú in a ching thar a, a awm dan hi ka hrethiam lo, ka nu ni se zilh a hnékin a ṭan hlur a, nakin zelah a la buai phah ka ring. A thu hrimah hmeichhe zú in hi chu mipa paw'n an ngaisang vak lovin ka hria, kan buaina chhan pawh chu sual a rawn chhuah vang a ni. Kan insual ṭep a, ka nu'n min rawn ṭhelh hman hlauh a, zanriah ei kham thlengin kan boruak chu a fuh lo tluang ta zel bawk. Ka pite inah kal ka ngai tih hre chhuak thutin ka insiam a, ka nu chuan min lo en chik ngei mai. Ka phone ka en chu Zaii hnen aṭangin missed call ka dawng ṭeuh a, ka call back nghal a, kan in lam pana an lo kal mêk thu a sawi chuan mak ka ti hle a, a chhan zawh ka tum laiin a off daih leh nghal.

"Riak nghal la a ṭha ang, zanin chu inlêng ka nei dâwn tlat!" phone khawiha ka din ngawih reng lai chuan ka nu a rawn ṭawng chhuak a, ka kal nghal mai lohna chhan pawh Zaii te vang a ni.

"Ka riah ka ring lo, ka lo haw leh ang" a lam ka hawi lo va, ka awm ngaiin ka awm reng a, a chek ri tlak tlak chu ka hre zui nghal zat bawk.

"A nih chuan rawn haw har ang che" a lo ti leh a, a thil sawi dan aṭang chuan eng emaw tih an tum a ni hrim hrim.

"Ka hre lo le" ka ti ṭha pangngai mai a, Chhani hmel hmuh tur leh a thawm hriat tur a awm lo va, a lêng chhuak leh tawh a ni mai thei.

"Aw Zai, eng nge in lo tih dâwn a?" phone call ka pick up rualin ka ti nghal a, tun ang huna an lo kal thut chu mak ka ti a ni.

"In in kawtah kan awm tawh, kan lo lut dâwn a nia" tih leh kan inbiakna tihtawp a rual a, kan in kawngkapui chu ka hawng a, an lo thleng tawh tak tak maw le.

"Eng nge in lo tih dâwn?" veranda-a dingin ka ti ṭha leh a, Zaii hnungah chuan u Maṭhuama a ding ve run a, zan a nih vang nge ni tarmit a vuah miah lo.

"Vawiin hi ka piancham a nia, zaninah kan lawm dâwn a, kan lo sâwm che a nih hi!" nui var var hian Zaii chuan a ti a, a piancham ka lo mangnghilh chiang lutuk chu nuam lo ka ti ru hle a, ka phone chhiat vangah ka puh ta ringawt bawk.

"Awi, ka lo hre tawh miah hleinem, tihpalh lutuk, mahse zanin kher chu ka pite ina kal ka lo tum asin" ka ti ta mawlh mawlh a, tlaiah khan ka pi nen inbe lo ila chuan chutianga ka chhan kher chu ka ring lo.

"Zan dangah i kal thei tho ang chû, zanin te chu ka piancham lawm zan a ni dâwn a, kum khatah vawi khat chiah a thleng leh nghal, min ngaih pawimawhsak zâwk mai rawh Sylvia" Zaii sawi chu a dik reng, ka phone chhe kher lo se chuan ka buai miah lo ang maw le.

"A nih ka pite ka'n be lawk ang e, ka hrilh leh loh chuan ka lêng dâwn emaw an lo ti palh ang" tih leh call ka rual nghal a, thil awmzia ka hrilh zung zung a, ka pi chuan min lo hrethiam khawp mai.

"I la kal na nge? Ka ṭhianpa a lo thleng ṭep a nia, kal vat teh!" ka pi nena kan inbiakna ka tihtawp rualin in chhung lam aṭang chuan ka nu aw nêm tehchiam lo ka hre zawm zat a, Zaii ni lovin u Maṭhuama ka melh chho zawk a, ka hawi sawn leh vat thung.

"Romawizual, pêng a lo thleng tawh a nia, khawmuang lo khan i kalna turah chuan kal thuai teh, hmuhtir che ka duh teuh lo" ka nu bawk chuan a rawn ti leh lang láng a, kan bul lawkah u Maṭhuama a awm ve reng si a, ka zak ru chem chem.

"Kal ang u, kan rei lutuk lo ang ti raw?" pangngai thei ang berin ka ṭawng lui hram hram a, ka zah rukna te chuan ka aw a tilàwi vekin ka hria.

"Rei lutuk lo turah ngai ang" Zaii chuan a lo ti ve mai a, u Maṭhuama Car inhunna lamah kan inzui phei nghal bawk.

Zaii te in pana kan tlan chhung zawng chuan ka rilru a nuam tak tak thei tawh lo, u Maṭhuama awm lai ber khera ka nu min ṭawngkhum dan leh min biak dan khan min tizak a ni. Zaii te chuan ka nu nena kan inmil lohzia a hre vek tawh a, ka nuhrawn a ni tih chenin, u Maṭhuama te chuan a hre tawp náng. College ka kal lai khan vawi khat chu kan in kawtah min rawn lam tawh ngei a, mahse khatah kha chuan ka nu leh Chhani mizia kha a ṭha lo tih a hrethiam nghal kher lo ang, a rei lo lulai ve êm mai. Zaii min biakna chu rilru hlim ang deuhin ka chhang zel a, ka tilui a ni mah zâwk. An in kawt kan thleng a, motor aṭanga kan chhuk fel hnu chuan u Maṭhuama lam ka hawi chho zauh kher alawm le, min lo en chiang lutuk a, ka hawi sawn leh nghal vat!

Zaii piancham lawm chuan zan hun kan hmang a, a nu leh pate pawh an fel khawp mai. Hunserh kan hmang thlap a, a pa'n Pathian thu a chhiar a, a ṭawngṭai bawk a, kei paw'n nuam ka ti phian. Zaii chuan vêng chhunga a ṭhian ṭhate kawm pahin min kawm zel tho va, hmelhriat thar ka neih phah nual nghe nghe. U Maṭhuama hmel erawh ka hmu ta miah lo va, hunserh kan hman lai vel kha chuan ka la hmu ngei a, a haw daih te pawh a ni mahna. Zan dar 10 vel thleng Zaii te ina ka awm hnu chuan haw zai ka rêl ve ta nge nge a, mi dang erawh an haw vek tawh a, Zaiin min titipui a duh avangin ka la awm khawmuang mai chauh a ni. Chutah haw ka tum veleh u Maṭhuama a rawn lang hlawl a, haw ka tum tih a hria emaw ni ka ti hman hial alawm le.

"Keimahin ka va thlah ang, lo kal ve kher tawh lo mai rawh" thla tam tak liam hnua u Maṭhuam aw ka hriat leh hmasak berna a ni a, a mi biak chu kei ni lovin Zaii zâwk a ni.

"Nia, ka lo thlah tawh lo mai ang che aw Sylvia, nangmahin i chuang hreh ang em?" ka ṭhiannu chu ka en thuai a, 'hreh' han tih chi ni tawh hek lo.

"Hreh hran lo e" ka ti ve mai a, ngawi reng hian u Maṭhuama chu pâwn lamah a pen chhuak daih a, keini paw'n kan zui nghal chu a ni mai.

"Muttui le" tiin ka ṭhiannu nen chuan kan inthlah fel a, car chhungah ṭhu ve ve tawh mah ila u Maṭhuama nen erawh kan inbe tawh lo hrim hrim.

Kan véng lamah kan tlan zel a, kan la inbe lo tluang zel bawk. Sawi tur ka hre lo va, ani paw'n a hre bik chuang lo a nih ka ring. Zawi zawiin keimahah zâm rukna leh zahna a rawn awm a, kan kal dâwna ka nu min ṭawngkhum dan zawng zawng kha ka hre chhuak leh ta nge nge. Kan in kawt kan thleng a, mahse ka chhuk mai lo, a chhan chu car chhung aṭang paw'n thinrim taka ka nu ṭawng thawm ka hre pha tlat a ni. Ka rilru thlak thutin ka pite bula riah ka tum hnuhnawh leh a, ka zak lo der ta tawp a ni.

"Ka pite in kawtah min drop zâwk thei ang em le? I hman loh chuan ka tilui chuang lo che a nia, taxi phar tur a la awm ka ring" ngam lutuk lovin a lam ka hawi a, min rawn en ve chiah chu ka hawi sawn nghal thung.

"Khawi vêng nge?" peih lo aw zeta a rawn tih chuan ka sawi ve mai a, ka inthlahrung hnuhnawh ang reng, a aw aṭang ringawt pawh a mut a chhuah tawh hmel si.

"Tun ang zan tlai tawhah hian taxi i phar ṭhin tihna em ni?" ka pite vêng kawnga kan tlaiin a rawn ti a, chuti teh thuta min rawn biak chu ka beisei lo khawp mai.

"A chang zeuh zeuhin" tia ka chhang chu urhsun deuh hian min rawn en a, zám miah lo ang mai hian ka lo melh kál thung a, a hmel chu ka sawi thiam chiah lo.

"Ching tam suh, hmeichhia leh nghal" a ti deuh hluk a, mak ka ti ru ang reng, min ngaihtuah ang taka a ṭawng chu a awihawm loh zâwk, min ngaihtuah loh nasat dâwn tehreng nen.

Ka pite in kawt kan thleng a, lawmthu ka sawi zawh hnu chuan a tlan haw nghal vang vang a, kei pawh pâwna awm reng lovin ka lut zui nghal bawk. Mut dâwna ka pi thil min sawipui erawh ka rin loh lam daih a ni a, min ṭhawng khawp mai. Hlawhtlin tuma ka beih ṭauh ṭauh laiin ka pi chuan pasal nei turin min ti teh thut a, ka hrethiam lo tak zet. A sawi dan chuan a ṭhiannu hmelhriat ṭhate fapa a ni a, sawrkar hna a thawk a, nupui neih hun ve tawh tak a nih hmel. A hmel vawi khat pawh ka la hmu lo a nia, pasala neih phei chu châkna emaw phurna pakhat mah ka nei lo. Min sawipui tawh lo tura ka tih hnu chuan a sawi chhunzawm lo ve mai bawk a, ka tân zawng hlawhtlin baka thil pawimawh a awm rih lo a ni e.

Chumi zan aṭang chuan hmai chhanah leh phone kaltlanga kan inbiak apiang hian a sawi lang ta ziah a, chutah ka beisei loh lutukin thil a la thleng zui. Ka pi sawi ve ziah, pasal atâna nei tura min tih ve ziah chu tu dang ni lovin u Maṭhuama lek a lo ni a, a tirah phei chuan awih lo nasa tak a ni. Ka pi lahin a sawi zel mai bawk si, u Maṭhuama ang ka ti tulh tulh a, a thlalak nen lam ka hmuh tâkah chuan hai rual a ni ta lo, awih loh theih pawh a ni bawk hek lo. Nitin arsa zuara hun ka hman lai paw'n ka rilru kaptu ber a ni tlat lawi a, pasal nei tur chuan ka la inphal thlawt lo a ni e. Zaii pawh ka hrilh tlang hmiah a, u Maṭhuama pain nupui tur a zawnsak thu chu zep awm miah lovin min hrilh fai vek a, kei nena inzawmna neihtir min tum chu ani paw'n mak a ti ve tho.

Ni khat chu arsa ka sah loh lai tak hian pa pakhat hi a lo kal a, a hmel ka en chuan hmuh tawhna nei thánin ka inhre leh nghal. Ka hming a hre leh zel te chu mak ka ti tulh tulh a, u Maṭhuama pa lek chu lo niin, awm dan tur pawh ka thiam lo. Min biak zawngte chuan a nui sun sun a, a hmel a changkang khawp mai. A rul tâwk chiah chiahin ka chhang a, ka rin lâwk ang ngeiin a fapa nupui tur atân bak min lo duh lo e! Chumi ni aṭang chuan a rawn kal ta fô mai a, a awm dan chu ka hrethiam lo lek lek ṭhin. Tin, u Maṭhuama reng reng pawh, a pa thu a awih viau a nih ka ring. Zaii lah khan a tleirawl chhuah ṭan tirh lai vela ngaihzawng a nei tih loh kha chu ngaihzawng lam reng a neih tawh ngai loh thu chiang tak khan min hrilh a, zep lo chuan Zaii pawh khan u Maṭhuama nupui ni turin min duh chiang a ni.

U Maṭhuama pa lah chu a nélawm viau leh nghal a, ka rilru dik tak ka lo hrilh hmiah hmiah a, lehkha zir ka la ngaih thu thlengin ka sawi tlang vek a, chuta chin chu a hmel ka hmu ta miah lo va, a beidawng te pawh a ni mahna. Dik tak chuan mak ka tihna a reh hlei thei lo, nupui pasal tur inzawnsak tawp chu ka vawi khat hriatna a ni a, ka vawi khat tawnna a ni bawk. Zan khat chu Zaiin u Maṭhuama leh an chhungkaw chungchang min rawn sawipui ve ta thung a, a sawi dan chuan an retheih loh hmel khawp mai. Unau pathum an ni a, mipa hlang an ni a, unau zing upa ber u Maṭhuama chiah nupui nei lo a ni tawh a, a kum a lo tam ve tawh tho bawk nen nupui neih lamah an manganpui deuh a ni ber e.

"Sylvia, pawm tawp mai rawh, sawrkar hna a thawk leh nghal a, a chawm thei dâwn lutuk che. I nu hrawn sual zet sala tán kumkhua i duh zâwk em ni?" ka pi thil sawi chuan ka rilru a tibuai zual, rilru sen ngaihna pawh ka hre lo.

"Duhin ngaina tal ila chuan pawi ka ti lo, mahse duhna chhe tê pawh ka nei si lo a ni ka pi, chu bakah ka ngaihtuah che u alawm" ngaihtuahna hmang ṭha mumal thei lova ka tih chuan

"Keini te chu i pu nen kan ni a, ngaihtuahawm kan ni lo. Nangmah hi, nangmah ber hi i ngaihtuahawm, nakin zelah i la buai dâwn chauh!" a rawn ti a, thaw hakin ka pi chu ka en tlawk tlawk ringawt.

"A cousin pawh kha i ṭhiannu a ni lo'm ni? Hmelhriat sa leh kawm ngeih sa i nei a, i tihsual ka ring lo Sylvia. I nei duh a nih chuan i pasal tur hi nu leh pa thu awih mi tak a ni roh a, kei chu i tân a ṭhat ber ka ring tawp. Nge ni a, i nu hrawn leh a fanu hmuhsit rawn nih reng i la duh zâwk tho? Pasal i neih chuan i pasal hnathawh avang ringawt paw'n an en hniam mai mai tawh lo ang che, ngaihtuah chiang rawh" a rawn tih zawm leh mawlh mawlh a, ka rilru a va'n buai tak êm, a sawi dik tho bawk si.

"U Maṭhuama ber kher leh nghal, a mi tak si" mit khap fuk fuk pahin ka ti leh hram a, ka pi chu a nui nasa ngang mai, a nuih chhan erawh ka hre lo hrim hrim.

Ka laka ka nu hrawn inlulin nasat dan ngaihtuah chuan pasal neih ka hreh pawh a ni hran lo, mahse pasal lo nei dâwn ta pawh ni ila u Maṭhuam ber kher a ni a, amah a lian si, thim zingah phei chuan a hlauhawm lek lek zawk ang. Chu bakah a nupui ni turin min duh bik reng reng emaw ni le, a duh bikin ka ring lo a ni.

(End of Chapter 5)

SYLVIA ROMAWIZUALI

By

Havali Adam

Chapter 6

Ka ngaihtuah nasat pôh leh pasal han nei ngawt tur chuan ka inngaingam thei rih thlawt lo, a chang leh pasal neih hreh lohna ka nei thul, chu erawh ka nuhrawn leh Chhani ka ngaihtuah chhuah vang a ni pakhat. Ka pi thu min hrilh zawng zawng ka bengah a ri nawn tluk tluk a, a thlirna lam aṭang chuan dik lo a awm bik miah lo maw le. Ka hma hun a dáwn vang tih ka hria, mahse sawrkâr hna sang tak thawhte ka duh a, hlawhtlin ka duh a, pasal ka nei a nih chuan lehkha zir leh ka nih tum zawng zawng nen lam a ṭhuanawp vek dâwn si a ni. Ka rilru chu nitin zantin a insual a, chutah ka pite inah u Maṭhuama pa a lêng ṭhin tih ka hre leh ta zel zui. Ka pu meuh paw'n pasal nei tur chuan min duh a, ka pi ngaihdan chu a thlâwp viau a, mahse ka pi ang em emin min nawr vak lo thung.

Ka pi sawi dan chuan u Maṭhuama paw'n nupui zawnsak leh kei min neih a lo phur tehchiam bik lo a ni awm e, mahse han duh lo bur leh a pa thu hnial tlat ang kha a ni lo va, nupui neih a la hmanhmawh loh thute ka ral hriat bawk a, a nihna takah chuan kan chhungte ve ve an indawr a ni ber e. Anni chuan innei ta pawh ni ila pawi an ti miah lo ang, mahse a innei tura ber te pahnihin rem kan ti nghal ngawt si lo a ni. Ka hun hman dan a pangngai reng a, ka rilru erawh a pangngai thei lo thung. Kaptu a awm tlat a, chu thil chu eng nge a nih tih lah ka hre chiang bawk si. A tawpa tawpah chuan pasal neih loh ka ti tlu ta nge nge a, ka thei thlawt rih lo a ni.

Ni e, a mizia pawh ka hriat chian miah loh pasala neih ringawt thu a awm lo. Ka rilru dik tak chu ka pite ka hrilh a, min pawmpui lo dun hmel viau a, mahse a neitu tur berin ka duh miau loh chuan tih ngaihna dang awm hek lo. Thil thar pakhat erawh a awm phah a, tlai tin u Maṭhuaman arsa min rawn dawr ta ziah a, a pa tirh emaw a nih ngei ka ring, a hma zawng khan ani ber kher chuan a rawn lei ngai hleinem. Zaii paw'n ka rilru puthmang dik tak a hre tawh a, pasal neih lam hrim hrim chu min sawipui duh lo tawp a, ka lakah a inthlahrung deuh te'n ka hre nghe nghe ṭhin. Arsa rawn lei ziah mah se u Maṭhuama nen chuan kan inbe tam lo thei hle a, min dawrtu a nih angin hawihhawm ka chhuah a, ngainatawm takin ka be siam siam lui hram hram a, ka pite inah a pa a la lén ṭhin tho avangin ka neih duh loh thu pawh an hriat vek tawh ka ring.

Ka beisei loh deuhin ka nuhrawn leh Chhanin ka chanchin an hria a, a tirah chuan 'engtin nge an lo hriat daih theih le' ka ti rilru neuh neuh a, ka hrilh miau bawk si lo a tin ni! A hnua ka hriat dan chuan u Maṭhuama te vênga a ṭhiannu kâ aṭangin a lo hria chu niin, min nuihsawh leh ta khawp mai. Chhani paw'n ngeiawm zeta mi ṭawngkhum a hrat zual phah a, pasal zawnsak ngai khawpa mi chùtah te min chhuah thul. Zan khat phei chu Chhani nen bawk kan intithiam lo leh pek a, kan insual zui nghe nghe a, kan nâ ve vein ka hria. A bikin Chhani zâwk chu kei ai a nâ mah a, ka nu'n a thlavang a hauh nâ hle a, ka pi leh pute'n ka thlavang an hauh ve thung a, ka nuhrawnte nufa nen ber kher hi chuan engtikah mah kan inngeih theih tak tak ka ring tawh lo a ni.

"Hello" phone ka pick up rual chuan ka ti nghal a, number lawng tawp hi a ni a, vawi khatna mai ni lo a vawi hnih lo call-na a ni tawh nghe nghe.

"Inah i awm em?" mipa aw thum chhah ruih mai chu ka hriat hnu a ang ka ti viau a, mahse tu nge ni ang tih ka ring thiam mai lo.

"Awm e, tu nge âw? Min hrethiam la, ka hre mai lo che" chutia chhan tawp loh chu biak zui vak dan ka hre si lo a ni.

"Ka lo kal dâwn" tih leh phone off a rual a, mak ka ti ang reng, phone kaltlang ni lovin a aw pangngai hria ila chuan tu nge a nih ka hriat nghal theih mai ka ring, chutiang khawp chuan min rawn be ringawttu chu ka hre teuh!

Kan ina lo kal tum an awm avangin ka room-ah pawh ka lut ta lo va, sitting room-ah phone khawihin ka ṭhu hle hle ta zâwk a, a hnu lawkah Chhani leh ka nu chu an rawn ṭhu ve a, a tua ma'n TV kan en lo vek va, kan inbe lo hrim hrim bawk. Kan awm dan chu kan inngeih hmel ve hlawm lutuk, kan inmil lo nasa ropui si. Whatsapp-a ka luh rualin number lawng aṭang bawk hian message ka dawng zui nghal zat a, tu nge a nih pawh ka hriat loh chuan kan in kawta a awm tawh thu leh a lo luh dâwn thu hi min lo thawn chu niin, chhan lêt dan tur leh a lo luh huna awm dan tur pawh ka hrethiam chiah rih lo a ni. Door bell a rawn ri a, phone khawih chungin ka nu chuan lut turin a ti lang lâng a, kan in chhunga lo pen lut hmel ka hmu chiah chu mak ka va ti tehreng êm.

"Lo léng rawh, ka hriat hnu i va ang ve le, pi Rinawmi fapa Maṭhuama kha i ni mial em?" ka nu chuan a lo ti nghal zung zung a, engtin nge u Maṭhuam mai bakah a nu thleng thlenga a lo hriat daih theih ka hre leh ta hauh lo mai.

"Ni e" u Maṭhuama chuan a ti mai a, ṭhutna dang awl reng mah se ka ṭhutna ṭhutthlengah tak a rawn ṭhu thla a, ka lo en deuh hâw a, ka lam a lo hawi rual chuan ka hawi sawn rang hle thung.

"Eng nge i lo tih dâwn a Maṭhuam? I nute an dam ṭha maw? I pa hriselna a ṭha zel em?" ka nu ṭawngkam chu ṭha hliah hliah tak a ni; amah a ang lo záwk.

"Nula ka lo rim chu a nih ber hi!" u Maṭhuama chu ka melh kál a, a ṭawngkam hman dan leh a aw zawng zawng nen lam ka number save loh aṭanga min betu kha a ni chiang lutuk, mahse engtin nge ka phone number a neih theih?

"A ni máw, nangni ang tlangval hausa meuhin keini fanu ve mai mai te i rawn rim duh a, a va lawmawm ve" tia a chawlh dat hnuah ka nu bawk chuan

"Chhani, Sylvia, thingpui va lúm rawh u, inléngte chhâwl halin an siam reng ngai lo. Min hrethiam dâwn nia Maṭhuam, an la nau ve ang reng lutuk a, mahse an puitling ve zel turah ngai ang" a rawn tih zawm leh mawlh mawlh a, ngawi rengin ka tho va, ka kalna lamah Chhanin min rawn zui nghal a, thingpui kan siam laia ka nu ṭawng dan vel avang chuan ka nui tawp ringawt!

"Eng nge i nuih kher a?" Chhani chuan a rawn ti ta ngei a, a nu siar a nu siar, lemchan thiam dun lutuk mai.

"I lo la nâ viau elo? Ka nuih a za a ni mai a, buaina i nei em ni?" ka ti lêt salh a, ner sak hian a ngawi zui ve mai bawk.

Thingpui kan lúm zo chu sitting room lamah kan phei nghal a, kan lúm ka ti tak na a, keima'n ka lûm a ni mah zâwk. U Maṭhuama nen chuan kan inbe lo hrim hrim a, ka nu nen hlir an inbia a, chu pawh ka nu biakna leh zawhna a chhang deuh ringawt a ni mai a, a ṭawng tam lem lo khawp. Ka nu ber chuan ka nuih a tiza, a hawihhawmin a nélawm hmel vel lutuk chu amah hre chiangtu tân chuan nuihzat loh theih pawh a ni lo. 'Romawizual' emaw 'Mawizual' tih hlira mi ko ṭhin kha u Maṭhuama hriatah chuan 'Sylvia' tih hlirin min ko thung a, hmaichhana an vawi khat inhmuhna a ni bawk nen u Maṭhuama tân chuan nu ngainatawm tak a ni ngei ang.

"Chhani, kan inlêng hi va thlah ta che maw le, engati nge i ṭhut reng ni?" u Maṭhuaman haw zai a rêl rualin ka nu chuan nui var var hian a ti siam siam a, khawvela nu ngainatawm ber ni mai àwm a ni.

"Sylvia, ka be duh che" u Maṭhuama berin a ti miau si a, ka nu paw'n mak a tih hmel khawp.

Chhani nen chuan kan zui chhuak ta ringawt a, ka nu'n kawngka bul aṭangin min lo thlithlai ru reng tih pawh ka hria, hre lo ang hmakin ka awm thung. A motor húnna zawn kan thlen rualin u Maṭhuama chuan Chhani hnenah a luh theih thu leh kei min biak lawk a duh thu a sawi a, Chhani pawh ngawi rengin a lut ve mai a, kei erawh engmah sawi lovin ka ding deuh tawp a, min biak a duh chhan chu ka hre lo hrim hrim bawk. Motor nghengin a ding awn deuh run a, a kekawr iptê a zen ve ve a, a lam ka hawi chho zeuh a, min lo en reng chu niin, ka mit ka lá sawn rang hle. In chhungah khan min biak a duh thu a sawi ngei a, mahse a la ṭawng miah bawk si lo, awm dan tur min tithiam lo zo vek!

"Zanin aṭang chuan ka hman chang apiangin ka lo lêng ṭhin tawh ang" a thu rawn sawi chuan min va han ṭhawng leh pek êm.

"Engati nge?" mawlmang deuh tak hian ka ti a, a nui ri suk a, mahse a hmui chu a che mang lo hrim hrim.

"Tlangvalin nula a rim ang zawng paw'n a ngaih theih ang" a ṭawng dan vel ber kher chu innêl tak te pawh kan ang alawm le.

"I biak tur ni lo zâwk min biain ka hria, i duh chuan Chhani ka lo hrilh thei tho a nia" pangngai taka ka tih chuan

"Ka biak tur dik tak ka bia e" a rawn ti nghal thung a, ka melh chho thuai a, ani paw'n min lo en chiang khawp mai.

"Ka rilru dik tak in hre vek tawh a ni lo'm ni?" ka ti leh ta nge nge a, an hausak avang maiin min zuam dâwn tlata hriatna ka nei.

"Ka rilru i la hre ve hleinem" min biak dan vel chu a mak hi a ni tawp, a hma zawng khan chutiang chuan ka lakah a ṭawng ngai lo va, a awm ngai lo hrim hrim bawk.

"Va lut rawh" a tih zawm nghal zat a, buk khum zeuhin ka inher a, in chhung ka lut chu ka nu chuan min lo en hrâw a, en lêt rei duh lovin room-ah ka lut tlang nghal ta daih.

A tuk zanah chuan ka duh dan ngeiin u Maṭhuama hmel ka hmu lo va, lo léng tawh miah lo mahse pawi tihna ka nei hran lo. A rawn lên zan aṭanga kâr khat hnuah erawh a hmel kan hmu ta ziah thung a, dik tak chuan nuam ka ti miah lo, sawi tur a vâng thei si. A lo lén chhan chu keimah ka ni leh ta nghal a, mahse ka nu chuan a be ṭha thei khawp mai. Ka sawi thiam chiah lo, a makpa chei nghal em em ti ila a sual tam lo ang. A biak dan te, a ṭawngkam hrim hrim te, engkim mai chu a ṭha vek a, kei erawhin lem a chang tih ka hre chiang ropui thung si, u Maṭhuama tân ngat phei chuan nelawm hliah hliah tak a ni. Chhani pawh tlém chuan a hawihhawm ve ta deuh a, u Maṭhuama lakah leh mi dangte lakah chiah a ni a, ka lakah chuan a la ngai reng, hmán ang tho kha a ni.

Zan khat chu Chhani ni lovin ka nu nen zâwk kan inchhang buai a, thil ho tê ka sawi paw'n a haw hlur zel a, kawng tam takah hi chuan ka dawhthei ve bawk alawm le. Chu bakah chumi zan chu inrinni zan ber kher a ni a, zing kâr aṭanga chhuak ka nih avangin ka che chau ve bawk nen ka thin a rim awlsam khawp mai. Kut ém chu kan inthlak chuang lo va, a ṭawng nasa hle thung. Naupang zâwk tih takah ngawih ka chuh hmasa leh ta nge nge a, arsa sahna chem leh hmanraw dang ka sil lai chuan a lo phun char char a, vanneihthlak takin inléng kan nei ta hlauh a, mahse chu kan inlêng chu tu dang ni lovin u Maṭhuama a ni tlat! Inrinni zan ber kherah hi chuan a lo lêng ngai mang lo, kâr khatah vawi hnih thum bak a lo lêng ngai lo hrim hrim zâwk a ni.

Ka nu mawlh chuan lemchan a va hnehsawh tehreng em, bahhlah miah lo leh fel ber ang ziazáng hian u Maṭhuama chu a lo be sawt sawt thei nghal nia maw le, chutah hniak phawi miah lovin dawt muhlum a la sawi tel cheu zui. U Maṭhuama erawh a ngawi leh reng tawh a, a rul tâwk chiah chiahin ka nu biakna a chhang tih loh chu a ṭawng lo tluk a ni. Ka nu chuan thingpui a siamsak thlap a, Chhani a tir duh miah lo, a mualpho a hlau te pawh a ni mahna. Arsa bukna vel ka silfai lai chuan rim dang ka hria a, chu rim chuan ka hnar a verh zar a, ka hawi chhuah rualin ka bul maia lo ding u Maṭhuama hmel ka hmu nghal a, ka rim dang hriat chu a perfume hman rim a ni tih ka hre chawpchilh nghal bawk.

"Khaw maw" ti supin ka kuta bungbel sil faina atâna kan hman ṭhin nawhfè chu a rawn lá a, ngawi reng hian ka thil sil fai lai min sil chhunzawmsak a nih chu!

"Khawi keima'n ka lo ti ang, ka ti thei alawm" ka tih pawh chuan lâksak a phal ta miah lo va, kan inawm hnaih bawk si, a mi uap a nâ ru hle leh nghal a, ka thaw ṭha thei lo mai dâwnin ka hria.

"A dang sil fai tur a la awm em?" ti ṭhang tak ang mai hian a che vel chu a dik thlup roh a, min tihrilhhai ang reng viau a ni.

"Aih, awm tawh lo, ka lo ti tawh ang, ka ti tak tak, i kut kha sil fai tawh zâwk rawh" tia a thil khawih lai lâksak ka tum leh chu a ngai tê bawk hian a lo phal leh ta tlat lo.

"U Maṭhuam?" a hminga ka koh rualin min rawn en nghal a, chhung ril lam zâm ru er erin ka lo en kál a, mahse a en rei ngam lo zâwkah ka ṭang leh ta nge nge.

"A zo a ni mai lo'm ni?" a nawh fai sawk sawk hnua a rawn tih hniam ruih chuan ka lo bu nghat a, a tho zui nghal a, kei pawh ka ding ve nghal chu a ni mai.

Ka nu chuan min lo melh leh ran tawh a, u Maṭhuama hmuhah erawh zaidam nunnem tak hmel a pu leh lawi a, ka nuih a tiza letling zâwk a ni. Zanriah ka la ei lo va, inbual pawh ka la inbual fai lo va, kan in chhungah u Maṭhuama a ṭhu run bawk si nen ka awm dan tur a tikhaihlak deuh tlat a ni. Tlai danga ka tih ṭhin dan ang lo takin bathroom-ah inthlakna tur thawmhnaw ka keng lut sa vek a, inha sa lova chhuah ka tum teuh lo, u Maṭhuama awm lai leh nghal phei chuan ka ngam lo a ni. Ka intih fai zawh hnuah chaw ka ei ve ta chauh a, ka nu chu a ṭawng leh char char a, u Maṭhuama pawh a tir ang em emin a ngawi run tawh bik lo. A aw ri hriat chu a chang chuan a hahdamthlâk riau ka ti ṭhin, chu bakah a lo lêng fô chu pawi lo tihna ka nei leh ta zel a, a chhan pawh ka nu mood a fuh ziah tlat vang a ni.

Hunin níte a liampui a, u Maṭhuama phone number pawh ka save ve ta nge nge a, phone call-a inbiak kan nei leh zauh ṭhin a, a bâk chu hmaichhanah a ni mai. Whatsapp message hi chuan kan inbe ngai meuh lo thung, chhiar tham lek a ni. Ka pite lamin a rawn lén ṭhin thu a hriat chuan a lo lawm ve em em ringawt a, awmzia a awm thui ka ring chuang lo. A hnu lawkah Zaii paw'n kan ina u Maṭhuama lo lén ṭhin thu a hre ve leh a, a hriat tirh chuan mak a tih hmel viau nghe nghe. U Maṭhuama pawh a danglam ka ti mai, a hma khan ka lo hriat chian tâwk loh vang zâwk nge pawh ka hre lo. Inhmuam up tlat tur leh khunkhan lutuk turah ka lo ruat ngawt kha a ni a, a lo ni bik teuh lo. A ṭawng tam lo chu thuhran ni se, ka rin ai a nelawm ru zek a, thil a hre zau phian a, kei paw'n a hma ang em em chuan a bula awm hrehawm ka ti ta bik lo, ka nel ve deuh tawh vang a ni mai thei.

"Mâwl mawl suh Chhani, ka thu sawi hi zawm tawp mai rawh, nakin zelah pawh i tâna ṭha tur bak a ni lo" ka nu ṭawng hlak hlak thawm chu ka hria a, mahse hriat reng chî ah pawh ka ngai lo.

"Ka duh ringawt hleinem, eng atân mah ka ti lo, duh leh nangma'n nei la ti nia" Chhani aw ka hriat hnu lawkah thil ri sawk ka hre zawm zat a, ka nute room chu ka kal pel thei ta hauh lo mai.

"Eng nge ka sawi zawh chiah kha i hre tawh lo em ni? Maṭhuama hi neih tum ngar ngar ang che, ngaizawng char char la, hmelah pawh Romawizuali ai te chuan i ṭha fê zâwk, i duh loh thu kha sawi kual vel tawh miah suh ang che. Ngaihtuah chiang rawh Chhani, Maṭhuama nen in innei thei hlauh a nih chuan mi chunga lêng kan ni dâwn asin, i nun a hausa ang a, mi hausa chhungkua an ni tih theihnghilh miah suh" titu chu tu dang ni lovin ka nu ngei a ni.

"Ka va'n peih lo tak, kawng dang a awm thlawt lo em ni ka nu?" Chhani aw ka hre leh nghal a, an rilru chhiatzia ka hre thar leh ta, rapthlak ka va ti tehreng ém.

"Kawng ṭha ber zâwk a ni tih hrethiam ta che Chhani, kan lakah pawh Romawizuali hi a inluling ngam tawh dâwn lo tih thlenga hrethiam tur chu i ni tawh maw le. Zanin aṭang hian i rilru siam fel la, Maṭhuama lo lén apiangin i ze ṭha ber chhuah ziah la, ani paw'n a ngaina thuai mai ang che" ka nu ṭawng ri ka hriat hnu chuan room-ah ka lut ta daih a, ka nuhrawnte nufa rilru chu chhia ka ti ngawih ngawih, an pawi ka sawi pawh a ni tawp si lo.

"In chungah ka la lêng dâwn khawp alawm, lo ngai reng rawh u" ti rilru mawlh mawlhin khumah chuan ka ṭhu ngawi reng a, ka rilru pawh a kal ding khawp mai.

Ka nu hrilh ang tak takin Chhani chu a awm a, u Maṭhuama lo lên apiangin a lo be huam huam a, ka nuih a tiza letling zâwk. An awm dan chuan hun kal tawh min ngaihtuah chhuahtir a, ka nuhrawn leh ka pa an innei chhan pawh kha sum vang bak a nih ka ring ta lo e. Ni e, a ni chiang khawp ang, sum um lutuk hi chu a ṭha lo asin lo maw le. Kei erawh Pathian zârah ka inchawm thei hlauh a, zirna lam pawh ka la ngaihtuah reng a, ka inkhawl ngah hunah aw law chhunzawm ka tum ta zâwk mai. U Maṭhuama lo lén loh zan apiangin ka nu chuan a ngaihzawngpa a lo hruai lut ṭhin a, kan in chu nawhchizawrhna hmunah a chhuah mai dâwnin ka hre tawh. A ngaihzawngpa nen vawi tam an mu dun tawh a, an thawmte hi ka hriat loh an hlau ni mai te'n ka hre ṭhin, ka nu ngaihzawngpa paw'n min zah reng thei ta bik lo.

Chhani erawh a lêng bo daih zel a, mak ve tak pakhat chu ka nu hian u Maṭhuama lo lén loh zan leh Chhani lén chhuah zan hi a hre thei em em a, a chang ru ran ti zâwk mai teh ang. Kei ve thung chu ngaihsakna chhe tê mah min nei lo leh lawi a, a fanu tân ṭanghma a haisak char char a, a chhe ber pawh tawng dâwn ila pawi ti miah lo tur ang hian a awm tlat ṭhin. Ṭhenawm khawvéngah sawisep a kai ṭan a, ni lo, ka hriatah an sawi duh lo mai chauh zâwk a ni. Kan ṭhenawmpa, pa Engtea min hrilh dan phei chuan 'sum pâr lawmi' tih te'n a lo thang a ni awm e. A nih vel tak tak ka ring, a ngaihzawngpa pawh hi sum vang baka a kawp ka ring tawh lo, rinhlelh loh theih lovin a nung tlat a tin ni!

Chhani ni se min er ranin a awm a, u Maṭhuama a be ṭha huam huam a, nula zuanzáng ber leh fel ber ang mai hian engkimah a awm a, kei chuan ka en liam vel ta mai mai. U Maṭhuama erawh ka laka a awm angin Chhani lakah a awm ngai miah lo thung a, chu chu ka mak tih pakhat a ni. A chang hi chuan a nin hmel ka ti ṭhin, mahse a rilru dik tak ka va hre chuang lo. Kei ve thung chu ka awm dan a pangngai reng a, min biak chuan ṭha takin ka chhang a, min biak loh chuan ka ngawi mai a, zan tam rawn lêng ve tawh mah se ka la be hmasa ngai miah lo. Ka tum ve dâwn paw'n ka nu emaw Chhanin min biak hmasak khalh zel a, mi khûm an tum ngar ngar bawk a, chumi kawngah ber kher chuan ka khalh hman meuh lo ṭhin chu a ni e.

Ni khat chu ka awm a nuam thei reng reng lo mai a, ka lû a hai leh ṭhin a, arsa pawh ka sat hlei thei lo. Ka inseng fel ta ringawt a, in chhung ka lut chu intifai lovin khumah ka mu nghal thlawp a, nâ chhawkna damdawi ka ei thuai thuai a, ka dam lo tih ka hre nghal bawk. Ka taksa chhung lam leh paw'n lam chu a sa hut hut a, ka nâ chhuak vekin ka hria. Ka lo muhil a ni mahna ka taksa kang deuh lawpah chuan ka harh muai muai a, khua chu a thim thet thet tawh tih ka hre thei bawk.

"I harh em Sylvia? I dam lo a nih hi, damdawi i ei tawh em?" ka hmai chûl paha ti mawlh mawlhtu chu ka hai thei lo, u Maṭhuama ngei a ni.

"I ṭawng peih em?" a rawn ti leh a, min ngaihtuahna awkâ dam tak ka hriat rual chuan ka lung a puam a, ka ṭah chhuak em em zui nghal.

"Nâ chhawkna ka ei tawh" ka ti thei hram a, ka aw chu a chhuak chang chang ni maiin ka hria.

"A ṭhat chu" ti supin min kalpui a, khawiah nge min hruai dâwn tih lam reng ka hre lo.

Lûm tih lutuk avanga ka harh rualin khumah ka mu tih ka hre chawpchilh nghal a, ka awmna hmun chu ka ngaihtuah vang vang a, room chhung awm dan te, engkim chu ka pite room chhung ni tlatin ka hria. Khum aṭanga ka thawh chhuah meuh chuan ka pite in ngei a ni tih ka hre nghal a, sitting room lama ṭawng thum bul bul ri pawh ka hre zawm zat bawk. Room aṭanga ka chhuah rualin ka pu, ka pi leh u Maṭhuama hmel ka hmu nghal a, min lo en rual ṭhap a, rei lo tê chhung chu awm dan tur ka hriat loh phah nghe nghe. Ka pi chuan min rawn ngaihven hmasa ber a, ka puin a dawt a, u Maṭhuama erawh min en reng ringawt. Ka ṭhat tawh thute ka sawi lûam a, mahse ka pi leh ka pute ngaih a la ngam chiah lo thung.

U Maṭhuama chuan kan in thleng min thlah a, a lo léng lut zui nghal bawk a, in chhung kan luh ruala ka nu leh Chhani mitmeng chu a inthlak chiang teh e! Keimahin lut ngat ila zawng min ankhum hrep leh ngei ang, mahse u Maṭhuama nen kan ni hlauh a, mak an tih hmel mai bakah an zia an thup rang dun hle. U Maṭhuama chu an lo be siam siam a, ka dam lo tih hre hek lo. Kei erawh intih faina tur tui lûm chhuang zawkin room-ah ka lut tlang nghal daih a, u Maṭhuaman ka dam loh thu a sawi lang miah lo chu pawi tihna ka nei hran lo, a nihna takah chuan sawi lo law law se ka duh daih zâwk a ni. Tui lûm chuan ka intleuh thuak thuak a, ka dam loh zual ka hlauh avangin ka lû pawh ka su lo va, ka arsa hralh banho erawh ka buaipui ngei a ngai thung.

"Vawiin chu i inhralh ṭha vak na nge Sylvia? A va pawi ve, mahse naktukah pawh a la hralh ṭeuh theih tho alawm ti raw?" ka nu ṭawng dan vel chu min duat ve hmel lutuk, chhan pawh ka chhang lêt lo.

"Ka lo pui ang che" rawn titu u Maṭhuama chu ka en deuh hû a, ka nun nen an titi reng emaw ka ti a, chuti teh thuta a rawn chet chu ka ring lo hrim hrim.

"Ka ti thei tho alawm, a ṭhen hi a uih deuh tawh leh nghal a, in khawih rimchhe lo law law zâwk la a fuh ka ring" ka tih chuan

"Ka ten hleinem" a lo ti mai a, ka nu leh Chhanin min lo en reng bawk nen ka dang buai duh ta bik lo.

U Maṭhuama nen chuan arsa kan khawih mawlh mawlh a, dam lo miah lo ila zawng ka inhralh zo leh vek ang maw le. A rimchhe hman tawh nual a, ka lâkna rate mai bakah ka chawi belh ngei dâwn e. Dar 9 leh a chanve velah kan khawih fel zo ve chiah a, u Maṭhuama lakah pawh chuan ka inthlahrung khawp mai. Ka nu leh Chhani ni se an rawn be deuh chhen a, u Maṭhuama zârah ka nu thingpui siam ka in ve phah nghe nghe a, ngaihtuah chian chuan nuih a za duh ang reng. U Maṭhuama chu rei pawh lêng tawh lovin haw a tum nghal a, pâwn thleng ka thlah ve thlap a, a tlan chhuak nghal mai dâwn emaw ka ti a, mahse haw tum hmel reng a pu leh ta miah lo thung.

"I ṭha deuh tawh em? Naktuk pawh ṭhu lo mai la a va ṭhat hmel ve?" motor nghengin min en reng a, a kekawr iptê a zen leh ran tawh bawk.

"Ka hre lo le" ka ti sep ringawt a, thil dang sawi chhunzawm tur a vâng nghal khawp mai.

"Eng lo, engati nge tarmit kha i vuah tawh ngai loh a?" kan ngawih dun vang vang hnu chuan ka ti deuh tlawng a, hmeichhia zâwk ka nih vang pawh a ni mai thei, ngawi renga awm dun chu harsa ka ti ṭan tawh a ni.

"Engati nge?" a rawn ti thung a, ka lu ka lo thing thuai a, zawh loh tawp tur ka zâwt palh niin ka hria.

"Tunah pawh hian áh chu ka ak reng, i hmuhah ka vuah duh lo mai chauh a ni" amah ang lo tak hian a rawn tih zawm deuh lûam a, kha chen kha tarmit a vuah áwm ka hmu tawh ngai lo va, mahse kei min hmuh dâwn avanga a vuah lo kher chu awih harsa ka ti.

"I awih em?" amah bawk chuan a ti leh nghal zat a, ṭawngkâa chhang lovin ka lu ka lo thin khum a, awih miau hek lo.

"Thu dik alawm ka sawi" tih leh a Leather Jacket chhung aṭang chuan a tarmit vuah ṭhin ngei mai chu a rawn phawrh ta mai a, chutah amah bawk chuan

"I awih tawh em? Dawt ka sawi mai mai ngai hleinem Sylvia, Zaii khan tarmit ka vuah hian ka lang upa zual a ti tlat a, a rilru ang chu i put ka ring deuh tawp a ni ber" a ti leh a, ka bula a ṭawng duh ta viau chu mak ka ti telh telh.

"I upat hmel paw'n ka hre chuang lo" a rilru nawm nâna ka ti chu a lo ka fuh khawp mai.

"Chu, tarmit vuah inhmeh min ti tihna a ni em?" chal tichuar náng hian a ti nghal a, ka dar ka chhin ák a, chhan loh aiah tiin

"Chutiang lam pawh a ni lo, ka sawi ve mai mai" ka ti ve leh mai a, ka ngawi zui leh ta vang vang.

"A nih chuan eng nge min hmuh dan dik tak Sylvia? Tarmit vuah hi ka inhmeh i ti nge ti lo?" a tih chuan ka nui tawi tak a, ka en ṭha ngam leh ta der lo mai.

"Sawi vak dan ka hre lo, i vuah lai kha chuan i lang officer ruihin ka hria, mahse i vuah loh hian i lang fai thung. Eng lo, ka sawi awmzia chu tarmit i vuah lai khan i bal ka tihna pawh a ni chuang lo, ka sawi thiam lo, ka sawi lovah ngai leh si mai rawh" ka ti nawi nawk nawk a, ka rilru dik tak chu sawi chhuah ka tum miah lo asin maw le.

"Ka hrethiam e" thutak hmel tak hian a ti sup a, chu chuan ka awm a tinuam lo zual, a nui hmel emaw tal hmu ila zawng ka awm a nuam deuh mahna.

Kan in kawt aṭanga a tlan chhuah fel meuh chuan dar 10 a pel fel vâr var tawh a, in chhungah ka lut nghal a, Chhani chuan min lo ei lo hmel leh tawh hle. Ka nu chu a phun char char a, eng nge a phun chhan bulpui ber pawh ka hre chuang lo. Ka pi leh ka pute ah a kangkai a, ka ngawi reng thei ta bik lo. Damsam vak lo ka ni kher bawk si a, ka ṭawng hlawk ve khawp mai. A thinrim nasa zâwkah a rawn ṭang hmasa a, kut min thlak a tum a, min tin uaih uaih a, kei lahin ka lo hlau teuh si lo. Ka thin a rim tawlh tawlh a, ka nu leh pate thlengin a sawi kai zel a, ka ṭawng duh tawh lo, ka thinrim lutuk chu ka ngawi reng tawp tawh, ka ṭawng a nih vaih chuan a malsawm lo nasa dâwn lutuk tlat.

Ka nu chuan min rawn nam sawk a, kei lah ka lo inring si lo, ṭhutthleng bánah ka chal ka tauh chawrh a, ka thinrimna up bet sêng tawh lovin ka khawih lêt ve ta nge nge. Chhanin ka nu chu a rawn pui vat a, an nufain min sual rawn a nih chu! Hmeichhia tih takah kan thawm a zawi lo hle a, kan ṭhenawma mite'n min rawn ṭhelh hial a, ka nuhrawnte nufa leh mi dang hmuh lai chuan ka ṭap duh miah lo, ka room chhungah erawh ka ṭap nasa khawp mai. Ka nu leh pate ka ngai a, ka pite pawh thil thleng chu engmah ka la hrilh peih rih lo, intibuai reng renga hun kan hmang chu ka kham hlauh hluah tawh a ni. U Maṭhuama ka ngaihtuah chhuak thut a, ka phone chu muangchang lo fê hian ka phawrh zui nghal bawk.

"Hello" mipa aw thâm ṭuak ka hriat rual chuan

"I nupui ni turin min duh em?" ka ti tlang nghal pawp a, thawm a reh vang vang a, ka nuhrawnte nufa avangin ka thin a rim tawp khawk tawh bawk nen pasala neih chu a fuh berin ka hre tawh a ni.

"U Maṭhuam?" ka ti leh ngat a, ka ṭah chhuak ru viau mah se a hriata ṭah ka tum hauh lo.

"Hmaichhanah kan sawi ṭha dâwn nia, ka lo kal ang" tih leh kan inbiakna hmeh tawp a rual nghal a, khumah bawkin ka ṭap khur feih feih a, ka nu leh pa dik tak te'n min la dampui se chuan chutiang em ema ka hringnun kawng a khirh bik chu ka ring lo, tunah chuan Pathian pawh ka dem lek lek ta.

Minute tam a liam hmain u Maṭhuama hnen aṭang phone call ka dawng a, pâwna a awm thu a sawi chuan ka chhuak nghal a, ka nuhrawnte nufain kei min hnuaichhiah an tumna lamah u Maṭhuama leh zel neih an tum a, chu kawng chu ka titawp hmak thei tih ka hre chiang a, ka titawp ngei bawk ang. Pâwn ka chhuak chu u Maṭhuaman min rawn pan vat a, ka bánah kaiin motor chhungah min ṭhut luhtir a, hmun hran daihah min tlan pui ta vang vang. Kan chuan dun chhung zawng chuan vawi khat mah kan inbe lo va, a tua mah kan ṭawng lo hrim hrim a, min neih a duh phawt chuan a nupui nih ka hreh tawh reng reng lo, a chhan pawh ka nuhrawnte nufa vang a ni.

"Ka nupui nih chu i duh ta em ni?" a tih chuan

"Duh!" ka lo ti nghal thuai a, min rawn en zawk a, a haw sawn ve leh mai bawk.

"A nih chuan kan innei ang" a rawn ti nghet charh a, ngawi reng hian mi a en leh vang vang ṭhin a, thil dik lo a awm tih a hriat ka hlau ru hle.

"Engtika inneih nge i duh?" a ngawih deuh ren rawn hnu chuan a ti leh sup a, min en reng tawh nghe nghe.

"A hma thei ang ber a ni mai" ding taka ka hma zawn en chung chuan ka ti a, motor tirumin a tlan chhuak zui nghal a, a tlan muang lo khawp mai.

"Ka chhungte ka lo hrilh ang" kan in kawta ka chhuk dâwn lai takin a rawn ti a, chhan pawh ka chhang lêt lo hrim hrim, in chhung ka lut lah chu ka nu'n min lo en hrek hrek leh nghal a, ka pite bulah ka kal emaw a ti a ni ngei ang, an rin loh lamah ka chet khalh dâwn thung si.

(End of Chapter 6)

SYLVIA ROMAWIZUALI

By

Havali Adam

Chapter 7

A tukah chuan amah zâwkin min rawn bia a, ka thutluknaa ka chian leh chian loh thu min zâwt nawn leh ngat a, kei lah ka lo chiang ropui mai si. A chhungte chu an lawm viau a ni tak ang; a bikin a pa! U Maṭhuama nena kan inbiak laiin mi a rawn biak zawm hial a, hmán ang tho kha a la ni, a nelawm ngaiin a la nelawm reng. A ṭawng hriat a hahdam a, min tlawn ni miah si lo hian mi a be nêl nghal em em a, a ruk tak chuan ka nêl lo hranpa miah lo, kan chenho hunah phei chuan ka nel thuai ka ring. U Maṭhuama nu, pi Rinawmi nen erawh vawi khat mah kan la inbe lo va, a hmel chu ka hmu tawh ngei, chu pawh ka pa thih hlimchhawl lai vela u Maṭhuaman an ina min hruai ṭum khan a ni a, ka dam lo nghe nghe a nih kha!

Tlai lamah ka pi leh ka pute'n zanriah eiah min sâwm a, thil min sawipui tur an neih thu an sawi bawk a, u Maṭhuama nena kan chungchang a nih ngei ka ring. In ka thlen rualin ka intifai nghal sawk sawk a, ka nu leh Chhani chu engmah ka hrilh lo, ka pite inah chaw ka ei dâwn tih tak ngial pawh. Ka pite in ka thleng chu ka pu zâwkin phone kaltlang tala hrilh turin min ti a, ka hrilh hnuhnawh ve leh mai bawk a, hrilh turin min ti lo se chuan ka hrilh kher lo vang. Nizan lamah khan kan boruak a chhe êm a, an laka ka lungawi lohna a la reh famkim thei lo tlat a ni. An duh dan dânin min ngai mah se pawi tihna pawh ka nei lo, an nufain min sual rawn nghe nghe kha a ni a, tunah chuan an chunga awm vâr var ka tum ber tawh.

"Vawiin khan pu Rama a lo lêng a, Maṭhuama nena inneih i duh thu a sawi a? Chu chu a dik em Sylvia? Keini phei chuan kan awih lutuk ngam rih lo, a fapa nupui atân a awt em em mai che si a, a dik hlel deuh kan ring a ni" min betu ka pi chu ka en chuang lo va, chaw ka bâr mial mial a, ka ei tui ang reng viau leh nghal.

"A dik alawm, inneih ka duh thu nizan khan u Maṭhuama ka hrilh a, a lo hrilh chhawng ve leh a nih dâwn chu!" ngaihsam aw zet hian ka ti mai a, ka pi chuan min en reng thung.

"Eng vanga duh teh thut nge i nih Sylvia? Thil thleng a awm em? I thinrim lungpuamin inneih i duh thut te hi a ni lo maw? Hemi chungchangah hian i nuhrawnte nufa an inrawlh em?" ka pi chuan a rawn hre dik ta chat mai, ka sawi ang nge sawi lo ang tih pawh ka hrethiam rih lo.

"Inrawlh e, anmahni pahnih vang a ni ber zâwk alawm, ka â tawh mai mai bik dâwn lo" ka ti ta nge nge a, an la hre chhuak dâwn thova ka hriat vang a ni.

"Eng nge i sawi awmzia? A chhan bulpui tak sawi chiang teh, in inchhâng buai leh tawh a ni maw? A dik em?" a rawn tih leh chuan

"Ka nuhrawnin a fanu leh u Maṭhuama inneihtir tum miau hek, chu pawh tum nei rán leh nghal. U Maṭhuama te hi an hausa uchuak viau a ni ang, ka nuhrawn hian a ngaisang êm mai. Chhani leh u Maṭhuama an innei a nih chuan ka chan a chhe zual dâwn tih ka chiang a, kei chang ni lo, nangni pahnih thleng hian in tawrh ka ring, mahse chutiang thil chu engtikah mah ka thlentir ngai lo vang" ka ti salh salh a, min sual rawn lai vel ka mitthlaah a lo lang a, ka thin a rim ru thar khawp mai.

"I neih chhan tur chu eng pawh ni se, i tân a ṭhat ber ka ring" rawn titu chu ka pu ve thung a ni a, min en chiang hle bawk.

"Maṭhuama nen hian vawikhat mai ni lo kan inhmu ve fô tawh a, a rilru a puitling viauin ka hria; ka hriat sual loh chuan! Nangma'n i zir phei chuan a duat thiam viau mai thei che, chutiang mi tur chu niin ka hria" a tih zawm leh zat a, ka laka u Maṭhuama awm ṭhin dan vel ngaihtuah lêtin ka ngawi ta reng.

"Ni e Sylvia, Maṭhuama hi a sual ka ring miah lo. A ngaihsak riau chein ka hre bawk, heta a rawn hruai che pawh khan a hmel kha ka lo hmu thiam vek asin, i pu sawi vang pawh a ni lo, a ngaihsak tlat che a ni" ka pi chuan a rawn ti zui ve leh nghal a, kei paw'n an sawi dik ka ring ta tawlh tawlh mai.

"Chaw kha han ei phawt la, kan sawi ṭha leh zâwk dâwn nia" kham paha ka pu'n a tih chuan ka buk khum zeuh a, chaw chu ka bàr zawm leh ta mial mial a, mahse ka rilruah erawh u Maṭhuama chiah a awm char char tawh rih thung.

Zanriah kan ei kham fel a, thleng ka sil nghal a, ka pi'n chaw eina dawhkan a lo tifai ve a, che lo tura ka tih paw'n a duh ṭhak lo. An inah chaw ka ei emaw ka lêng a nih hrim hrim hi chuan a theihna kawng apianga awl ka tum ṭhin a, kum upa lam an ni ve tawh a, ka khawngaih ṭhin a ni. Awmpui la dâwn se an duh dâwn lo tih ka hre chiang si, awmpui lâk lam hi chu ka sawipui ngai lo hrim hrim réng a, Pathian zâra an la hrisel ṭha dun viau zâwk te hi ka lawm a ni. Sitting room-ah ṭhu ṭhapin ka pasal neih dan tur vel te chu kan sawi ṭha leh a, thil kan dâwn thui hlawm khawp mai. Ka pi ka rin loh vang ni lo se, ka pu meuh paw'n pasal atâna u Maṭhuama neih ṭha a ti chu ka rilru a nawm phah deuh a, kei tak paw'n mipa ṭha lo leh sual niin ka hre bik chuang lo.

Hahdam zeta ka ṭhut der der lai chuan u Maṭhuama hnen aṭangin phone call ka dawng a, kan sawi chhuak a ni ber zâwk. Kan ina a awm thu leh min hmuh loh thu te, ka awmna hmun te min rawn zâwt a, ka pite ina zanriah ka ei thu leh haw nghal ka tum thu ka sawi ve mai a, taxi phar lo turin min hrilh a, min rawn hruai a tum thu a sawi zawm nghal zat bawk. U Maṭhuama nena kan inbe zo ka hawi chhuak chu ka pi chuan min lo nuih var var a, za lo zet hian ka nui ve ringawt a, awm dan tur min tihrilhhai lek lek dâwn alawm le. Minute 5 hnu velah u Maṭhuama hmel kan hmu a, kan haw nghal mai dâwn emaw ka ti kha a ni a, ka pu nen an titi dun leh rih a, ka pi nen thingpui kan lo siamsak thung a, darkar 1 vel hnuah kan haw ve ta chauh.

"Arsa hi i zuar tawh lo thei ang em?" kan in kawnga kan tlan lai chuan a rawn ti hniam dam dap a, ka inhrethiam bik chiah lo, a aw ri chu hriat a hahdamthlak ka ti ru khawp mai.

"Engati nge? Min zahpui deuh em ni?" thinrim paw'n ka sawi lo, min zawh chhan dik tak ka hre châk zâwk a ni.

"Zahpui lo ve, ka pui hreh miah lo zâwk che" a rawn ti a, a ṭawng dan chu ka rin loh lam daih.

"A nih engati nge arsa chu zuar tawh lo tura min duh?" kan ṭawngkam chhuak hrim hrim chu a pangngai em em vek a, rilru inpawh tak te pawh kan ang alawm le.

"Ka nupui i ni thuai dâwn a, awm hahdam mai mai la ka duh a ni" a tih chuan a lam ka hawi a, min lo en zawk a, dar chhin ák chung hian

"Sawi dik loh ka nei em ni?" a rawn ti leh a, lu thin khum zeuhin kan chuanna motor hma lam chu ka hawi ve leh mai bawk.

"Thil pakhat sawipui che ka duh a" ka ti deuh tawp a, mi pawh en chuang lo hian

"Sawi la" a rawn ti dam dap a, amah a pa lian roh si a, a zaidam hmel hliah hliah.

"Eng lo a nia, kan inneih hnuah zirna ka chhunzawm thei ang em?" ka thil sawi chu mak a ti deuh a ni mai thei, min rawn en zawk nghal.

"Ka tihna chhan chu BA tal graduate ve ka duh a, engmah min tumsak a ngai lo ang. Keimahin ka intum vek ang, ka zirna tur hi chu ka khawl deuh nual tawh hrim hrim a, remchang hmasa bera zir zawm ka tum bawk a ni" ka tih leh nghat zat a, ka thu sawi tum a hriatthiam loh palh ka rin vang a ni pakhat.

"Ka lo ngaihtuah ang" ngaihtuah zui loh hmel zeta a rawn tih chuan

"I chhungte i râwn phawt dâwn tihna a ni em?" ka lo ti thung a, a ngawi ta reng a, min chhang tawh miah lo.

"Zirna ka chhunzawm theih dâwn loh chuan inneih ka duh leh lo" ka in kawta kan din rual chuan ka ti ta thâwr a, rilru sût leh hma min ti khawp ang le.

"Eng vangin nge zirna chu chhunzawm i duh?" a aw chu a la dam thluam a, mahse a hmel erawh a nelawm tehchiam loh thung.

"A chhan chu hlawhtlin ve ka châk alawm, sawrkar hna sang tak thawh te ka duh ve a, nangni chuan chutiang dinhmun chu in luah lûm reng tawh a, keini rilru hi chu in rawn hrethiam pha tak tak lo mai thei a ni" ka ti deuh duah a, min en chiang ngàng mai.

"Ka lo ngaihtuah ang ka ti lo em ni?" a aw chu a ngainatawm lutuk tawh lo va, a lam ka la hawi phei duh lo hrim hrim bawk.

"Ti e" tih chiahin ka chhang a, chhan dan tur dang hre hek lo.

"A niha hnu" tiin motor kawngka chu a hawng a, a chhuak zui nghal a, ka ṭhutna lamah lo kal kualin kawngka min hawnsak thlap a, a thinrim emaw ka ti hman a, mahse thinrim hmel reng a pu lo, a pangngai hmel viau zâwk.

"Eng lo" ka kuta min kaih rual chuan ka ti deuh thut a, chutianga thil sawi tum pawh ka tum hran lo, min vawnna avang chuan ka taksa a dik lo nasa lutuk a, ka rilru leh taksa ka thunun hman lo a ni ber.

"A ngai leh lo" ka tih zawm ta ringawt a, zawhna min zâwt ang tih ka hlau khawp mai.

Kan in lamah min kai phei a, engmah min zâwt ta lo hlauh e! In chhung kan luh dâwn chuan ka kut a chelhna chu a thlah a, lut hmasa tura min duh ni awm tak hian a awm sawn deuh hlek a, kei pawh ka lut nghal chu a ni mai. Ka nu leh Chhanin kan pahnih hmel an hmu dun chiah chu u Maṭhuama hmuh loh hlanin an meng râng nasa hman leh hle a, mahse lemchang thiam tih takah u Maṭhuama chu an be ṭha hliau hliau leh thei tho thung. Chhani chu u Maṭhuama ṭhutna bul chétah a ṭhu tharh a, kei erawh ṭhutthleng pakhatah thawl zetin ka ṭhu a, ka nu chu a ṭawng char char bawk a, u Maṭhuama chuan an tlawn tih hrethiam ru reng se ka ti ngawt mai. Ani pui ren run hi chu a sual hmel vak bawk si lo va, an thu sawi leh an awm dan engkim a awih vek ang tih ka hlau a ni.

"Tun kâr tawpah palai ka lo tir ang" a haw dâwn chuan a ti sup a, pâwnah kan ding dun reng leh tawh a, kan indin hnaih lo dun khawp mai.

"I va'n hmanhmawh leh si" ka thil sawi dan chu a naupangchhia tih ka hre hnuhnawh leh lawi a, min nuih suk phah ta réng bawk.

"Kei ai chuan i hmanhmawh zâwkin ka hria" a rawn ti khauh a, za lutuk lo hian ka nui ve ta ringawt.

"Ka thil sawi kha aw u Maṭhuam, zirna ka chhunzawm theih dâwn loh chuan ka ti tak tak a nia, kan innei thei lo ang" motor kawngka a pawh hawn lai chuan ka lo ti a, a theihnghilh ka hlau a ni ber.

"Ka hria alawm, chhanna pawh ka pe thuai ang che" tih leh ka lam lo hawi a rual a, lut ta mai lo chuan kawngka chu a nem khar leh lawi a, chutah min rawn pan ta mai.

"A nih mut tui" inhera kal sawn ka tum chiah chu ka dar tawn tawnah a chelh chat a, min hmer nát ka rin tehreng nen a nâ miah lo.

"Min hlau em ni?" thum chhal hian a ti hniam ruih a, kan inawm hnaih telh telh a, kei chu ka buai vek tawh, a huháng nâ zet chuan min ur ham ham ni maiin ka hria.

"Hlau lo e" ka tih chuan ka hmuiah tak a rawn fawp a nih chu!

Ka ding khawng ût a, ka meng kur bawk a, ka beisei loh dan deuha a rawn che thut chu ka hrilhhai tak zet. Engtin emaw ni hian ka taksa chu a danglam tial tial a, ka rilru pawh a awm chiai chiai a, ka meng fiah kâk thei tawh mang miah lo leh nghal. Ka hmui chu mipa hmui nen a la inbawhthuah reng a, chu mipa chu tu dang ni lovin u Maṭhuama ngei a ni a, ka taksa chhung lam te chu a rawn lum chho ta pup pup mai. Ka kutin ka kekawr ka hmer ṭawng ṭawng a, chutih lai tak chuan vawi leh khatah ka thawl hawk a, ka kaw hawk ni mai hian ka hria, mahse chu erawh min fawhna ata u a inlâk hran vang a ni tih chiang takin ka hre chawpchilh zui nghal thung.

"A ṭhat chu" ti sup hian min rawn fawp nawn leh ta, a hmasa zâwk ai letin min fawhna chuan ka rilru leh taksaah nghawng a nei lehzual a, ka inthunun thei tawh lo hrim hrim.

A hmui mawlh chu sik a va nuam tehreng ém! A némin a lûm nuam em em a, ka pian tirh ata mipa ka vawi khat fawhna a nih vang nge ni, chutiang renga thil nuam leh dangdai chu ka la tawng ngai lo. Ka kawnga a rawn chelh chuan ka lo eu titih nghal a, ka mang vek tawh ni maiin ka hria. Ka mipa fawh mêk pa ká chhungah te chuan mumal lo zet hian ka thaw lut ham ham a, ka mit reng ka meng thei tawh lo. Nghet takin ka chhing tlat a, engkim chu ka hre vek thei ngei alawm, thil thleng mêk nen lam, mahse ka taksa chu ka rilruin a phatsan tlat a, chu phatsanna chuan ka rilru a zém â tial tial zui nghal bawk. Ka hmui a fawhna ata a inla hrang chiah chu khaw vawt tak hmachhawn thut ang mai hian ka harhfim nghal kâwk a, a kut pakhatin ka biang chu a nûl thuak thuak a, zahna leh zâmnain keimahah hmun a rawn khuar a, ka petek sawn nghal vat bawk.

"Va haw tawh rawh" ka aw chhuak ri chu a lawi vek a, ka thian zui kharh kharh a, ka la pangngai lo lutuk chu ka tlu lo chauh zâwk a ni.

"Ka nupui ni mai tur hi ka fawp thiang che chuan ka hria" danglam ve miah lo ang mai hian a rawn ti dam ruih a, a hmel pawh ka en ngam tawh lo, hmanhmawh ru zetin ka kal sawn ta nal nal.

In chhung ka luh rualin ka room lam ka pan ding nghal chat a, room chhung ka lut chu kawngka kalhin ka âwm ka dawm vawng vawng a, ka thinphu ranzia chu pui tak a ni. Khumah ka bawk leh tawp a, ka va han zak hnuhnawh tehreng êm. Rizai te chuan ka inkhuh thul, engmah a danglam thei tawh si lo. Ka mitthlaah u Maṭhuama hlir a awm a, kan infawh lai tak phei chu ngaihtuah chhuah loh theih a ni lo.

A nawmzia kha! Ni e, nuam ka ti ru tak zet! Ka zep lo ang, khatiang em em khan infawh a nuam tih ka hre ngai lo, ka la tawng lo hrim hrim bawk. Dik tak chuan hmeichhiate'n mipate an va duh ang chî hian duhna ka nei eih lo va, hmangaih phei chu khawi lamah, mahse min fawp zet kha chu chhia leh ṭha hriatna bo lek lekin ka lo dawngsawng a ni kha! Han zak hnuhnawh viau dâwn pawh ni ila awmzia a awm tawh der si lo, a pawimawh ber zâwk chu a thlen nawn tawh loh nâna inthunun tlat a ni.

Zing ka tho te chu eng ka hria nge ni, ka zâng vah a, ka mood fuh riau chhante chu ka hrethiam rih chiah bik lo, nakinah te chuan ka la hre mahna le. Zing dang ang bawkin ka nu leh Chhanite nen chuan kan inbe lo leh a, tukṭhuan ei lai paw'n kan inbe lo hrim hrim a, Chhani thil sawi erawhin ka beng a verh ru viau mai. U Maṭhuama nen inngaizawng ang maiin a insawi a, a thil sawi dan zawng zawng chu ka chik ru ran a, dawt bak a nih ka ring lo. U Maṭhuama nena an inkuah thu te, innêl taka an titi dun ṭhin thu te chu intihtheih hmel zet hian a sawi a, min sawikhum deuh reuhin ka hre tlat bawk. A thil sawi dan zawng zawng chu a awihawm loh tulh tulh, u Maṭhuama mizia ka ngaihtuah phei chuan ka nui tawp ringawt.

Nilêngin arsa ka sat a, min dawrtute chu ṭha takin ka lo be zel a, ka mood pawh a la fuh cher cher khawp mai. Chawhnu tawntirh lam deuhah u Maṭhuama a lo kal hlawl a, min be chuang hlei lo va, dik tak chuan en pawh ka en ṭha ngam lo a ni. Ngawi reng hian ka bulah a ṭhu run a, a chang leh a phone a khawih mual mual a, ka awm a tinuam lo zo vek dâwnin ka hria. Zan lama thil thleng a ngaihtuah chhuah loh theih bawk si loh, ka thaw leh halh ṭhin ringawt. Darkar chanve dâwn chu a ṭhu tawh ang, a la ṭawng lo hrim hrim a, kan chhaka chawhmeh zuar nu pakhat phei chuan min en duh khawp mai. Kei ka ṭhing si, u Maṭhuama ni se a smart bawk si, kan rimte chu inang lo tak a ni.

"I ṭhu tawh dawn lo emaw ka lo ti asin" rei fê kan ngawih tlawk tlawk hnu chuan ṭawng hmasa zâwkah a ṭang ta nge nge a, mahse min en chuang lo.

"Ka ṭhu lo ringawt thei hleinem" ka ti ve mai a, arsa lei tur pa pakhat hi a lo kal a, ka sahsak nghal sawk sawk a, ka be deuh luam bawk.

"Ka nupui i nih vat a ngai a nih chu!" min dawrtu a kal sawn rualin a rawn ti a, ka sira arsa zuar ve mipate chuan min en reng tih ka hria, ka hre lo der hmak thung.

"I bal ang e aw, kan awmna hi a fai vak lo a nia, a tháng si" ka ti leh ringawt a, sawi tur ka van dapchawp nasa tehreng êm.

"Zaninah ka lo kal ang, nizana i thil min dil pawh kha a chhanna ka pe ang che" tiin a tho uaih a, a kal sawn hlau tak ang mai hian ka lo en thuai a, min lo en chiang em em leh nghal.

"A nih le" ti sepin min hnungchhawn zawnga a kal tur chu ka thlah a, min buk khum hnu chuan kawngpui sira a motor húnna lamah a kal phei ta nul nul.

"Kha pa nen khan in inhria em ni Sylvia?" ka piah lawka arsa zuar ve tho pa Mawia chuan a rawn ti a, ka hriat leh hriat loh chu thuhran ni se, u Maṭhuama hria ang deuha min en deuh hâw chu mak ka ti ang reng.

"Hria e" ka ti ve mai a, u Maṭhuama kalna lam a va thlek dûk duk a, ka hawi ve ringawt phah.

"Ka hmuh tawh hnu a ni tlatin ka hria, ka hmelhriatpa fapa coaching kalpui ṭhin kha a ang khawp mai. Kha pa nen khan in inngaizawng em ni? Nupui tih te kha a sawi riin ka hria, nang hi a rukin pasal tur ṭha deuh i lo hûng réng a ni maw?" a zawhna chuan min tinui sak a, mahse ka nui rei lem lo khawp.

"Han sawi chhin la, i hmelhriatpa fapa coaching kalpui ṭhin chu a lo ni mai thei asin" ka tih chuan

"Ka sawi pa chu MPSC exam-ah Topper a ni a, chu pa chu i ṭhianpa hmel nen khan a inang hle a ni. Ka hriat sual loh chuan a nih ngei ka ring, a chhan chu hmun dangah pawh ka hmu ṭhin tlat alawm, a nih loh paw'n a unaupa tal a ni ang, an inang êm mai" a rawn ti mawlh mawlh a, a thil sawi chu eng pawh ni se, ngaihtuah zui vak dan ka thiam chiah lo a ni.

Tlai dar 5 rik dâwn velah ka haw a, ka inhralh zo hma phian mai. In ka thlen chuan hmanrua ka silfai a, ka inbual zui nghal bawk a, ka nu'n ei rawng a bâwl mial mial a, Chhani erawh a hmel ka la hmu miah lo thung. Ka nu ei rawng báwl zawh aṭanga rei lo tê hnuah zanriah kan ei a, Chhani nen an inbe malh malh a, kei erawh min be lo hrim hrim a, biak ka phut pawh a ni chuang lo. Dar 7 leh a chanve bâwr velah u Maṭhuama hmel kan hmu a, ka lo en chiang khawp mai. Zan dang ang lo takin Tshirt nghawng nei, rawng pawl duk hi a rawn ha a, a hang chhe hran lo bawk nen a kawr hak chuan a vun a kâp ngo zualin ka hria.

Ka nu leh Chhanin an lo be leh char char a, keiin thingpui ka chhuang thung a, u Maṭhuama chu a hnung lam aṭangin ka va en leh zauh ṭhin bawk. Tin, zan dang ai lang fai zuala ka hriatna chhan pakhat chu a lû a met fai vang a, kawlh fai hán hian a bek leh a tukkhum bul lam a met a, a chhip erawh a lu ûm nena inrem tâwk chiahin a zuah thung. Kekawrah Cotton Jeans emaw ni hi a ha a, a pheikhawk chu naran ang deuhin lang mah se a to ruk zêk ka ring. Thingpui ka va sem lai chuan min lo en deuh run a, a chang leh nelawm hmel tak hian a awm a, a chang leh tak run hmel a pu leh lawi a, tun atân chuan a mizia hriatthiam har ka la ti rih khawp mai.

A haw tur chu thlah tumin ka chhuak a, Chhani a lo chhuak ve ringawt bawk a, eng nge a lo tih dâwn erawh ka hre hauh lo. U Maṭhuama min biak khalh zawt zawt tâkah a lo chhuah ve chhan ka hrethiam chiah, a ngampa ka ti ve thlawt a ni. U Maṭhuama erawhin a rul tâwk chiah chiah hian a chhâng a, a nin ruk hmel ka ti, kei paw'n ka ning ru reng, a ṭawngthei zawt zawt ve êm bawk a ni. A lut tur chuan unau inngeih tak ang mai hian lut turin min sawm a, ka zui lo chiang teh e! Ka ding ngawi reng a, in chhung a luh thlengin ka thlir zui a, a nui hmel phenah chuan a rilru chhungril zawng zawng nen lam ka hmu tlang vekin ka hria.

"Zirna chu chhunzawm ta la i hlim ang em?" Chhani a awm tawh lo bawk a, kan thupuiah tak a rawn lut nghal ta chat mai.

"Hlim ang, a chhan chu ka hlawhtlinna kawng tur alawm a nih" ka tih chuan

"I hlim dâwn tih i chiang maw? A tawna tawn hriat phawt ngai thil a awm a nia, mahse zirna chhunzawm i duh tlat chuan ka dang lo ang che" a rawn ti ve nghal a, sawi dik viau mah se BA tal chu graduate ka tum tho tho.

"I phal tihna a ni em?" melh chho kal chung hian ka ti a, ka rilru chhungril chu a hlim ru em em nghal ringawt.

"Pasal nei lai i ni tih theihnghilhin ngaihzawng i nei ang em?" a lo ti daih thung a, ka zawhna leh a zawhna intuha lo lutuk chu ka nui ri hak a, a mitmeng rum deuh al ka hmuh rual chuan ka nui tawp riai riai nghal.

"A teuh lo mai" ka ti hliai a, a zawhna ka lo nuih ngawt pek a, nuih zawm chi vak niin ka hre ta lo, a lung a dam hmel loh êm mai.

"I sawi ve mai mai nge i ti tak tak?" a ti chhumbung hmuk a, mi rin a harsat viau a nih hmel.

"Ka ti tak tak alawm, pasal nei reng chunga ngaihzawng neih te chu khawi lamah, ka rilruah hian hlawhtlin bak a awm lo" ka ti ta duah a, hrilhfiah nawn ngai miau hek le.

"A nih chuan ka phal ni rawh se, zanina i thu sawi zawng zawng erawh i hre reng tur a ni" a rawn tih chuan nui var varin ka buk khum nghauh nghauh a, ka pasal tur berin zirna chhunzawm min remtihsak chu ka lawm a ni.

"Eng lo....MPSC Exam-ah Topper i ni tawh mial ém?" ka rilru chhungril hlim vang nge pawh ka hre lo, pa Mawia thu min hrilh ka hre chhuak kher bawk nen biakna tur hlir ka zawng nghal rinhawt a nih chu!

"Engati nge?" zawhna bawkin min chhang lêt leh ta; chutiang zawhna ho lam lek te chu chhan a harsat loh tehreng nen!

"Engati mah" ka ti deuh hmak a, ka aw aṭang chuan ka rilru tur awm ang a hriatthiam ka hlau leh lawi si a, ka awm dan a tikhaihlak vek a ni ber.

"Ka ni tawh alawm, engtin nge i hriat?" a aw chhuak chu a dam leh ta viau mai, a duh hûn hunah a inthunun thei bik a ni ang.

"Ka bula arsa zuar ve ṭhin khan a lo hria che a, min hrilh a, kei lahin ka hre der si lo. Kan awm dun tâkah chuan ka hre chhuak thut a, ka zawt ta ringawt che a ni" ka ti melh melh a, a lakah lungawi lohna reng ka nei leh tawh miah lo.

"A nih chuan eng ber nge i thlan? MCS nge MPS? Tlin a har ém? Inzir peih a ngai viau lo maw?" ka ti leh zung zung a, inkuangkuah run chung hian

"Inzir peih chu a ngai, a kawnghmang hriaa zir chuan tlin a har hran lo. Ka result a ṭhat avangin duh kha ka thlang thei a, MCS ka thlang zâwk a, mahse ka tui lo a ni ang, ka bán leh tâk daih hi!" a rawn ti ve deuh ṭeuh a, a aw ri hriat a hrehawm bawk si lo va, ka nêl sâwt viauin ka hria.

"I bánna a rei tawh ém?" ka lo ti leh a, ani pawh chuan

"Rei tawh e, i pian hma a ni mai thei" a lo ti ve mai a, a fiamthu tih ka hria, a kum tak sawi lo mah se a bánna chu a rei thawkhat tawh hmel hle.

"Ti daih ila, hetia officer niha hna sang tak thawh hi a nuam ém?" ka zawhna chu a ho sâwt khawp mai.

"Engti zawngin?" a tih chuan

"Engti zawng paw'n" ka lo ti leh a, ngaihtuah zui vang vang hmel hi a pu a, a chhanna nghakin ka chhoh melh ral bawk.

"Nawm chang a awm a, nawm loh chang pawh a awm tho" ti chauhin min chhang a, kan inbiak dan chu zirtirtu leh zirlai naupang te pawh kan ang alawm le.

"A nih ka lut mai dâwn asin, mut tui" tia inher ka tum chu ka kutah a rawn vuan a, min din hnaih sawt nghal bawk.

"Min thlah teh, ka duh tawh miah lo a nia u Maṭhuam" ka ti thuai thuai a, ka kut phih thlak ka tum chu a lo vuan nghet phian a, ka tal chhuak thei der lo.

"Eng maw i duh tawh loh?" ti supin ka kut chu a chelh nghet zual a, min din hnaih tial tial a, Tshirt chiah a ha bawk si a, a taksa chuan min ur nasa zualin ka hria, zâm ru tawh tak ka ni!

"Nizana mi ang kha" ka tih chuan mit hnuai inrin phei kalh hian a nui hmel a lantir a, ha langin nui lo mah se a hmui leh a mit aṭangin a nuih a za tih a hriat em em thung.

"Ka kuah ringawt dâwn che alawm" tih leh min kuah a rual nghal a, a âwm chhah khauh ṭungah chuan ka bei ran a, hneh zetin min kuah khawm vek mah se kuah lêt tumna ka nei lo hrim hrim.

"Va lut rawh le" dam dapa a tih chuan in lamah a tlanin ka tlan phei thuai a, ka awm dan chu a naupangchhia tih pawh ka hre ve reng, mahse thil dang zawng aiin min fawp leh ringawt ang tih ka hlau ber tlat a tin ni!

Nilaithawhṭanni zanah palai hmel kan hmu hlawl a, ka nu leh Chhani mawlh chuan mak an ti ta a ni. Palaite hmuhah chuan ṭha tak hian an ṭawng siam siam a, an awm chhung zawng chu khawvela nu fel ber leh nula fel ber an ni mai. Palaite an haw chiah tihah ka nu a phun zui nghal char char a, Chhanin a lo tuihnih ve leh zauh ṭhin bawk a, an bulah pawh ka awm reng peih lo, room-ah mu turin ka lut ta daih! A tuk zingah erawh zan lam ai an ṭawng nasa zual a, sum duh lutukah te min puh a, an án hla a chhe dun si, min thik ka ti mai, mahse kam khat paw'n ka chhang lêt lo hrim hrim. Ka chhan leh chhan lovin kawngro a su vak tawh lo, a chhan chu u Maṭhuama nen kan innei dâwn tho tho.

U Maṭhuaman palai tirhna tur min zâwt lâwk se chuan ka pute lam ka sawi daih mai thei, ka nu dik tak ni lo mah se ka nuhrawn chu ka nu a ni ve miau a, kan ina palai an lo tir pawh chu áwm ka ti tho, pawi tihna pawh ka nei em em chuang lo. Chutia u Maṭhuama chhungte nen an inbiak fel tâkah chuan inneih hun tur thlengin an rêl nghal a, ka nuhrawn tak chuan 'aw' pawh a pawh ṭha vak duh lovin ka hria. A chhan chu Chhani leh u Maṭhuama inneihtir phet a tum vel kha a ni a, kei lah chuan an rin loh lamah pasal atân ka neih khalh daih dâwn thung si. Kan inneih hma zawng chu u Maṭhuaman rawn lén a ṭhulh chuang lo va, a haw dâwn hian thil ho tê té sawiin kan meng rei phian zel a, a nelawm tawlh tawlhin ka hria leh nghal.

Ni a ral a, man inhlanna te kan nei fel a, ka nu leh Chhani mitmengah chuan thikna leh itsikna ka hmuh hmaih lo chiang khawp a, ka pi leh ka pute erawhin min lawmpui hle a, an hlim viau bawk. Man hlanna kan neih nî zanah pawh u Maṭhuama a lo la lêng tho va, kan inah ni lovin ka pite in lamah zâwk kan awm a, ka pi nen kan titi laiin ka pu nen an titi thung a, kan lêng rei phian leh nghal. Kan haw meuh chuan dar 11 a ri tawh a, riah nghal daih ka châk ang reng viau a, mahse ka riak ta lo law law. In chhung ka lut chu ka nu leh Chhani an lo mu ve ve tawh a, kei pawh mu turin room-ah ka lut zui nghal ve mai bawk.

Thawnṭanni a ni a, kohhranah dan khatna ngeiin u Maṭhuama nen chuan kan innei ta, sawrkar chawlh a nih avangin kan inneihnaa mipui lo kal pawh an tam khawp mai. Min sawi duhtu pawh an tam narawh e, mahse engah mah kan ngai lo ve vein ka hria. Ṭhianah Zaii ka hmang a, a ni lo mi dang hman tur hre hek lo. U Maṭhuama paw'n a ṭhianpa, nupui fanau nei tawh a hmang ve a, hmelhriat a ngah teh e! A zârah chibaitu pawh ka ngah phah hle a, min lawmpui thiam hlawm khawp mai. Zanah chuan After Party kan nei thlap a, keima lam aṭang chuan mi an ṭhahnem hran lo, u Maṭhuama te lam erawh an tam ta a ni. Ka nu leh Chhani pawh After Party thlengin an hmel ka hmu ve zel a, u Maṭhuama nu nen phei chuan an inkawm ngeih hmel khawp, inhre sa ang mai an ni.

"I chau em?" ka pasal ni ta u Maṭhuama chuan a ti sup a, a kamis hak lai a hlip mial mial a, kei erawh chet pawh ka che peih rih lo, ka lo ṭhu der der ringawt.

"Chau ve tho" ka ti sep a, dik tak chuan ka mut a chhuak tawh ang reng, ngaihngam zeta mut hle hle ka châk tawh.

"Kan mu vat dâwn nia" ti leh supin bathroom-ah a lut zui nghal a, dar zat kan en chuan dar 12 a lo ri dâwn tawh reng chu niin.

"Inthlak ve la" thawm reh vang vang laia min rawn betu lam chu ka hawi a, towel chauh hi a lo veng tawh a, kan inawm hlat tehreng nen rin phak baka a taksa mawi tak chuan min tizâm ru er er thei tho maw le.

"Nia" tih bakin ka chhang lo va, khum aṭanga ka tho chu ka la tlu ṭep zui, mi rawn buaipui a tum lai chuan ka kal ngil vat a, dik tak chuan a buaipui ka duh rih teuh lo, ruak deuh thawin a awm leh nghal.

Bathroom chhungah lutin tui lúm chuan ka inphuh ser ser a, ka sam erawh ka su ta lo, tihro a buaithlak dâwn em mai, zan a rei tawh si. Bathroom aṭanga ka chhuak chu Paijama ṭial leh tawnzau vâr ha hian khumah a lo ṭhu thluang duai a, inkuangkuah run hian a en ngai a lo en reng a, ka lam a lo hawi chiah chu ka phu uih thei. Kan tihtur ka hre chiang si, ka zâm ru lâwk tak zet a ni. Ngawi rengin min en run bawk si nen ka zâm zual a, ka che buai vek a, thawmhnaw ha vek tawh mah ila ka ruak vekin ka hria. Bathroom aṭanga ka chhuah hnu chuan a la ṭawng miah lo va, kei lahin sawi tur ka hre bik bawk si lo. Tim dai hian khumah chuan ka chuangkai a, sik hlau tak ang maiin ka ṭhut hlat khawp mai.

"Eng lo...iihhh...kan ti dâwn em?" ka ti deuh phawng a, ka mut chhuak tawh viau mah se mut hmaa tih tur kan nei tlat si a ni.

"Ngawi lawk, ka la inpeih lo" ka lama a rawn chet hrut rualin ka lo ti thuai a, ka ṭhu ngil nghal zawt bawk a, ka thu sawi chu pakhat mah a ngai pawimawh lo a nih chu!

"U Maṭhuam" ka ti sep a, ka chungah a bawk run tawh a, kan inmelh hnai khawp mai, ka zâm lutuk chu ka sa chhuak vekin ka hria.

(End of Chapter 7)

SYLVIA ROMAWIZUAL

By

Havali Adam

Chapter 8

"A ná deuh mai thei" ti supin ka nghawng hnuai chiah, ka âwm bâwr ni pha bawk si lo lai vel chu fawp ni chuang si lo hian a hnim dân dan a, ka thin phu dawt dawt ri te pawh a hriat vek ka ring.

"Eng nge....eng nge i sawi awmzia?" ka ṭawng ṭha hlei thei tawh meuh lo, ka taksa mai ni lo ka rilru lam thlengin ka mumal tawh lo a ni.

"I hre mai ang" tih leh ka hmai zâwna rawn insawn chhoh a rual a, chiang taka ka lo en kal lai chuan min fawp zui nghal bawk.

A kut hlai ṭha zeta ka bek tawn tawn khuapin min fawp ta mial mial a, ka va han dawngsawng thiam lo tehreng êm. Min fawp reng chung hian a che hrut hrut a, kei ve thung chu men pawh ka meng thei tawh lo, min fawhna chuan min zém â vek tawhin ka hria. A lei mawlh chu eng nge a awmzia pawh ka hre lo, a sa ham ham a, ka kâ chhungah chuan zei tak leh lungrun em em si hian a chettir a, min fawh dan leh a chet dan hrim hrim aṭang chuan ka nât a hlau tih a hriat tak zet. Ka rilru te chu a la fim ṭawk ṭawk a, mahse ka taksa danglam tial tial ang chiahin a mumal lo tawlh tawlh thung a, engtin nge a chet zel dâwn pawh ka hre lo, nuam ti ru em emin ka lo dawh tawp a ni mai.

Ni lo, ka dawp tawp bik reng reng lo. Ka hmui leh lei te chu ka thunun pawh ni miah lovin a che ve mawlh mawlh a, thil thlum tui tak fawp dâwk dawk ang chiah hian ka chettir tawn tawn a, engkim mai chu ka rin phâk bak vek a ni. Chiangnial lo zeta ka men chuan kawr reng a lo ha tawh lo, boxer chauh hi a lo ha tawh zâwk a, ka hmui aṭanga insawn thlain ka âwm bâwra awmhmun a khuar chiah chu ka taksa pum a mur chhuak vek a, phat rual lovin a nuam a ni. Ka vái ruai a, ka chawmawlh vek a, a hmui mawlh chuan min va thunun hneh tehreng ém. Ka âwm bâwr chu a hrawm tawn tawn ni mai hian ka hria, a chang leh a ká chhungah a dah a, a chang leh a hmui leh lei hmangin min sawngbawl a, awm ngaihna reng ka hre tawh lo a ni ber.

Thei leh thei lovin ka mit ka meng leh a, ka kawr hak a phelh lai te chu ka hre ngei a, mahse dan tumna pakhat mah ka nei lo thung. A mi tawhna engkim chu ka tâna dawnsawn nuam tak a ni vek a, ka taksa a sawngbawl kual vel dan hrim hrim pawh chuan ka thawk thlengin a tibuai tawh a, ani erawh a chet ngaiin a che mawlh mawlh a, ka kut te chuan vah kualna tur an zawng ruai ruai a ni mah zâwk.

A hmuia ka lái bâwr vel a tawh kual dân dan lai chuan ka thaw kâwk kawk a, ka insum thei tawh thlawt lo. Ka rum chhuak ṭiah ṭiah ta nge nge a, chutianga thawm chhuah tur chuan tum lâwkna ka nei lo va, keimahah a rawn thleng tawp a ni. A kut pakhat zâwk chu ka âwm bâwrah a la chettir reng a, chu kut chu kut satliah a ni mawlh lo, min thunun hnehzia chu pui tak a ni; mihring pangngai anga nunna nei ang mai alawm a nih le!

"U Maṭhuam!" ka ti thâm ṭiak a, ka aw chhuak chu a fiah hlei thei tawh lo, engtin nge chutiang chuan ka chungah a chet theih zâwk reng reng nì.

Ka mal a fawh lai te chuan ka taksa pum a mur chhuak vek a, chutah ka rin loh lutukin a rawn che leh ta. Fiah mang lo hian a che sawk sawk chu ka lo en reng a, a nihna takah chuan maimitchhing tluk ka ni. Ka hmai zawna rawn insawn chhovin min fawp zui nghal mawlh mawlh a, ka inhrethiam tawh bik lo, nuam ti takin ka lo chhang lêt tawn tawn zel a, chu chuan a tiphur nasa zual sauh bawk.

Ka hmeichhiatna chu thil eng emaw ni, lûm ham ham, ruh lutuk si lo, mahse khauh deuh ṭung tho si leh chhah deuh tup bawk si hian a rawn nâwk za mer mer a, ka hriatna chu ka hlauh nawn mawlh mawlh ni maiin ka hria. Ka hmui a fawhna chuan keimahah nghawng a nei tlêm zâwk ta hial a, ka rilru leh taksa zawng zawngte chu ka kawng hnuai lamah an chhuk thla vek a ni ber e.

Vawi leh khatah ka taksa chu a rawn nâ thip vawng vawng a, a nât dan lah chu a namai lo leh nghal. A thip hian a thip ngawih ngawih a, ka taksa nâ chu ka kap lam mah ni se ka pumin ka nâ chhuak vek tho. Ka chhia leh ṭha hriatna zawng zawngte chuan min rawn tuamhlawm nghal a, ka thluakah thil thleng mêk a lo lut nghal zut zut bawk a, ka va han harhfim chiang tehreng êm.

Kha chen ka rilru leh taksa zawng zawng lo thunun tawhtu chu a chet zawm ta rih lo va, ka hmuiah la fawp reng mah se ka kap nâ avang chuan ka taksaah nghawng a nei tlêm sâwt hle. Ka hmui a fawhna aṭanga insawnin ka ir vel chu a fawp leh nghal zat a, ka taksa nâ pawh la reh famkim lo mah se a chet zawm rih miau loh avangin a tir ang em em chuan a nâ tawh lo.

"A nâ em?" aw dam zet hian a rawn ti zawi sup a, ka ir vel chu a la dût kual pah reng a, ka rilru a harhfim vek tawh tih a hria a ni mai thei.

"Nâ lutuk" ka ti ta ringawt a, ka aw erawh a la dik thei chiah lo, thil dawnsawn nuam tak leh dawnsawn nuam chiah lo ka tawng rual tlat a tin ni!

"Ka ring, ka theihtawpin ka dim ang che" tih leh ka hmuia rawn fawh a rual nghal a, hnuai lam chu muangchang hian a chettir zui nghal bawk.

Ka taksa chhunga lo luh leh a tum lai chuan ka lo en reng a, mipa a nihna lai taka thisen kai ser ser chu a thisen ni lovin ka thisen ngei a ni tih ka hre chiang khawp mai. Tin, chutiang fakaua ruangam theuneu lo tak ni si chu engtin nge ka taksa chhungah a lo luh len theih zâwk ka hre lo, a lo luh lai khan ka mit ngeiin ka hmu bawk si lo va, ka awih lo hial a ni. A rawn luh rual chuan ka mit ka lo chhing nghet sauh a, zep thu cheng lo, a nât hian a nâ ngawih ngawih, zawngchhang chí ah pawh ka ngai lo.

Hmanhmawh lo tak hian a che hrut hrut a, min la fawp pah reng a, mahse ka hmuiah a ni tawh lo thung. Ka âwm bâwrah a bur chat a, ka taksa chuan ka nâtna tawrh mêk chu zawi zawiin ngaiah a nei chho tial tial a, mahse a la reh famkim thei mawlh lo a ni e. A chet dan a ngai reng a, a muangchang em em a, min dim tur thu kha a sawi lâwk hrim hrim a, min dim tak tak hle mai. Ka biangte chu a fawp kual deuh chhen a, a kut pakhatin ka âwm bâwr a khál pah reng bawk a, kei erawh ka la harhfim ṭha viau thung.

A chet ngaia a chet tâk reng hnu chuan a hma ai a rawn che rang deuh hret a, ka taksa nâ lutuk pawh a reh ṭanin ka hria. A hma ai a che rang deuh tak na a, a che hmanhmawh em em chuang lo. Ka hmuiah pawh a fawp tawh lo va, ka ir leh ka âwm bâwr pawh a fawp tawh lo hrim hrim a, a bán pahniha innem kangin ka taksa chhungah a lo lut riai riai a, min tihnât a hlau tak zet tih a hriat khawp mai.

Kei ve thung chu ka lo maimitchhing tlat a, nâ la awm zeuh zeuh mah se a hlimchhawn ang em emin a nâ tawh miah lo. A chet dan aṭang chuan min dim tih hai rual a ni lo va, dim ka ngai réng a ni. Chet vut vutna chí a ni rih lo tlat, a nâ ém mai. A hma ai a rawn che rang leh ta deuh sawt a, lûm ka ti ṭan a, ka thaw pawh a sa ṭan khawp, a chhan lah chu ka hre der lo leh nghal.

"A nâ rei tawh lo ang" ti thum sup hian min rawn bawh a, ka hmui bawk chu a fawp leh ta mial mial a, ka bawp pahnih nawr kâu deuh hlekin a insiam rem a, a chet awlsam zawk nâna ti ni maiin ka hria.

Ka hmuia a fawhna chuan keimahah nghawnga a rawn nei langsar leh ṭan a, ka taksa a zut kual dân danna te chuan zawi zawiin ka ngaihtuahna hmun kilkhawr ber thlengin hmun an khuar zel a, lûm ka ti tial tial bawk. Ka taksa chhungah chuan a rawn lut rang sâwt hle a, mahse hmanhmawh tak a la ni chuang lo. Kei erawh ka dik lo tawlh tawlh a, ka rilru leh ngaihtuahna a mumal lo tulh tulh a, a chhan ber chu nuam tih rukna vang a ni tih phat rual a ni ta lo e!

Min fawhna chu thuhran ni se, ka taksa chhunga lut riai riai mêk, thil khauh leh lûm ham ham chuan keimahah awmhmun a khuar zau zel a, nâ te chu la awm ve teh mah se a ngaihdam theih tawh lutuk tlat!

Ka hmui a fawhna aṭanga inla hrangin ka kawngah a rawn chawi a, chiangnial lo zet hian ka lo en ṭawk ṭawk a, tunah chuan a mi fawhna reng ka mamawh tawh lo, a chhan chu thil nuam dangdai lutukin ka taksa pum a luah khat vek tawh a ni. Amah hnaih zawngin a lamah min chawi phei thuai a, ṭhingṭhi titiha ṭhu chung hian ka taksa chhungah a rawn luh zawm ta mial mial mai.

A chet dan muangchang tak kha tunah chuan hriat tur a awm tawh lo va, a che hrim hrim chu a muangchang lo em em tawh zâwk a, ka taksa paw'n a lo dawngsawng ṭha hle bawk. Ni lo, ka taksa mai ni náng, ka rilru lam thlengin a thununna hnuaiah; a âng chhungah ngei ka awm fel thlap a, keimahah chuan nawmna bakin hmun an chang meuh lo a ni.

Ka chhia leh ṭha hriatna te'n min phatsan tial tial a, mu leh mal reng ka nei lo zui nghal a, ka ban phâka thil awm reng reng chu ka hmer tawn tawn a, meng phal lovin ka mit ka chhing tlat bawk. A chang leh a chet dan thlakin muangchang hian ka taksa chhungah a rawn lut riai riai a, a chang leh hmanhmawh fê ang maiin a che leh lawi a, engtin pawh che se ka tân chuan chhia leh ṭha hriatna zawng zawng hlohna tham a ni vek tho tho, danglamna pakhat mah a awm lo.

Vawi leh khatah min rawn bawh deuh thut a, a âwm khauh ṭha tak chuan ka âwm bâwr chu a delh per titih zui nghal a, a kut hrawl leh sa ham ham chu ka hnungzângah a rawn rawlh a, nghet zet hian a bân pahnih chuan min kuah a, a chet dan a thlak chiah chu boruakah kan thlawk dun delh delh ni maiin ka hria.

A hnungzâng chhah tak chu ka ṭham tawn tawn a, a chang leh a chhip samah ka ṭham thul, keimah chu keimah ka ni thei tawh lo. Nawmna vawrtawpin ka thinlung, ka thluak, ka rilru leh ka taksa zawng zawng a rawn luah khat vek a, chu khawvel piah lam ram, vanram tluk zeta hmun nuam aṭang chuan kal chhuah tawh loh hial ka duh rum rum a ni.

Kan âwm bâwr innâwk salh salh te chuan min tiphur zual a, dik tak chuan tui hal lutuk ang mai hian ka mamawh ngawih ngawih a ni ber. Ka áng leh hlawi hlawi ṭhin a, ani erawh ka hmai leh a chhehvel fawp kual dân danin a che mawlh mawlh a, a chet dan engkim chuan ka rin phak baka nawmna vawrtawp awmna hmun lipuiah min hruai lut a, a tawpa tawpah chuan ka tlin ta lo nge nge.

Ka taksa chu a khur ru dar dar a, hlauhthawn vang ni miah si lo hian ka phu leh uih uih ṭhin a, ka thin phu a la rang em em bawk a, mahse ani erawh chu a chet ngaiin a la che mawlh mawlh reng thung. Rei lo tê hnuah a chet dan avang chuan ka awm dan a rawn dik lo leh ṭan a, ka tawn hnu; ka tawn zawh chiah leh ka dawnsawn hnu vek ni mah se awm ngaihna reng ka hre leh ta lo.

Boruak ka hip luh rual te chuan ka thaw ri halh halh a, nawmna vawrtawpin min rawn chim pil leh ta nge nge e! A ngai tê bawkin ka kut te chuan vahna hmun tur ber an hre lo va, a hnungzâng ka ṭham loh leh a chhip sam ka ṭham a, rang taka a rawn luh zawt zawt lai te chuan tui luang tluk zetin ka baw zawih zawih a, ani pawh chu ka taksa chhunga mikhual beisei loh tak a rawn thawn luh ṭhawt ṭhawt vang nge ni, a bawk ta hle hle a, tunah tak chuan zahna leh zâmna tih velin hmun an chang lo chiang khawp mai.

"Intifai lovin mu tlang mai ang" thlan tla phung hian a rawn ti lawi rût a, kei ang bawkin a pangngai bik lo tih ka hria, ka taksa chhung aṭanga a chhuak chiah chu ka thawl hawk ni mai hian ka hre bawk.

"Muhil rawh le" duatna awkâ thlum tui tak chu min barh leh ta siah a, ka tân chuan a thu sawi awih lohna chi a ni lo, hriat a nuamin a hahdamthlâk ngawih ngawih êm mai.

Ka mit ka men leh meuh chuan khua a lo vâr tawh a, ka kawnga bân inkham ruah chu tu bân nge tih ka hai lo chiang khawp. Dik tak chuan ka harh tirh khan ka hnunga mu, ka nghen chhan pa chu rizai lûm nuam tak angin ka chan kha a ni a, zan khat chiah kan la riak dun a, pangtilúm a ngahziah ka hre ta phawt chu a ni a, thil dang tam tak pawh ka la hriat zel ka ring.

A kutzungṭanga kan inneih zungbun ngei mai ka hmuh chuan engtin emaw ni hian ka awm a, nun bul ṭan ṭha leh tur ang maia inngaihna ka nei tlat a, ka rilru chhungril tak chu ka sawifiah thiam si loh hian a hahdam a ni. A bân rek leh a bán puamah chuan tam lutuk lo hian hmul a ṭo diat diat bawk a, mak deuh mai chu ka ten miah lo maw le. Vai chu ni ngat se zawng ka ten hrim hrim ang, TV-a ka hmuh ringawt paw'n ka ten ṭhin a nia, ka pasal bán erawh a dan a dang tlat, inhmeh ka tiru viau zâwkin ka hria.

Chutia a bân leh a kut ka en reng lai chuan a rawn che zeuh a, a harh tih ka hrethiam nghal. A kiua a indo kán rual chuan ka mit ka lo chhing thuai a, ka harh tawh tih a hriat ka hlau ru khawp mai. Ka biangah a rawn fawp zeuh a, ka hnung lam chu a ruak huai nghal a, rizai min sin ṭhattir lai te chuan meng châk tak ka ni. Khum hlat zawnga ke pen thawm ka hriat rualin ka mengdere nghal a, ka thil hmuh chuan min timeng zau kâwk thei.

Ruak ngal ngat hian a lo la awm ve tho va, dik tak chuan hnung lam aṭang paw'n a pian chu mawi ka ti ru tak zet. Mipa dang ka hmuh ṭhin te ang lo takin taksa inphut mawi tâwk lo leh inmil lo lai áwm ka hmu ve lo reng reng, mipa tam zâwk hi chu kawng chung lam leh hnuai lam inmil chiah lo te an ni fur hlawm a, ka pasal taksa erawh a bu ang thlap a ni thung.

Kawngka inkhar thawm chuan mi tiharh zawk a, ka lo muhil leh daih a ni ngei ang. Ka meng tih a hriat rualin ka pasal chu khum lamah a rawn kal phei a, towel vâr thianghlim zet hi a veng a, a kawng hnuai lam chu ka en ṭha ngam teuh lo. A âwm lamah ka mit a bur chho ta daih a, mahse chu pawh chuan min tizâm ru er er thei tho.

A mak lutuk, a âwm bâwr pawng chhah ṭha tak chu en nin har ka ti tlat a nih chu! A dul ni se thep lutuk ni si lo hian a thau chuang lo va, a tihrawl hrim hrim chu khawiha tawh châkawm khawpin a mawi a, a hmuhnawm tel bawk a ni. A inenkawl uluk tih a hriat mai bakah a taksa a sawizawi ṭha tih a hriat em em a, a âwm bawk ka en leh ta reng mai.

Tam vak lo hian a âwm khuar laiah chuan hmul a ṭo siar siar a, eng vanga hmuhnawm tiru em em nge ka nih ka hre hauh lo. A hmel chu ka en chho leh a, nupa kan nih tawh vang a ni mai thei, zâm ru tho mah ila nupa kan nih hma ang em em khan ka zâm tawh bik lo va, a hahdam hmel viau bawk. Ngawi reng hian min en chhuk run a, inbual zo hlim tih hriat takin a sam chu a la hnâwng deuh chap a, a rim chuan ka hnar a verh zar a, sahbawn rim a ni paw'n ka hre lo, Shower Gel rim a nih ka ring.

Rei en ngam lovin a hawi sawn hmasa zâwkah ka ṭang leh ta nge nge a, ngaihtuahna hran daih put ka tum tehreng nen thei der lo leh nghal. Muangchang hian khumah chuan a rawn ṭhu thla a, ka lo ip deuh chawih a, sawi duh nei hmel a pu chuan ka hria, mahse a la ṭawng lo hrim hrim a, kei lahin sawi tur ka hre der si lo, ka hawi sawn leh ta ringawt.

"I duh chen chen mu rawh" a ngawih deuh ren rawn hnua a rawn tih hniam sup chuan chhan pawh ka tum chuang lo, ka ngawi reng a, ka duh chen chen mu thei ka ni lo tih ka hre chiang em em bawk.

"Nizan bak kha chu ka hnen aṭangin taksa nâ i tuar leh tawh lo ang" a thil rawn sawi leh avang chuan ka ip deuh chawih a, kan inen chiang dun si, sawi tur ka hre lo lehzual nasa a ni.

Khum aṭanga thovin wardrope lamah a kal phei a, a towel ven lai a pawt phelh chiah chu ka kâ hau mai, zahna reng a nei lo, nge eng atân mah min ngai lo zâwk? Ka chil ka lem khawlh a, ka rizai sin lai chu ka nghâwng zawn velah ka pawt chho a, ka mit erawh hmun dangah a awm thei rih lo; ka pasal taksa ruak káng tih chauh lovah chuan!

A thawmhnaw hak tur lá chhuakin ka lam hawi zawng hian a rawn inher a, chutah zet zawng ka en rei ngam tawh thlawt lo. Ka thin a phu ri dawt dawt a, a hriat phâk hial ka ring a ni. Ka mit ka chhin hma khan engkim ka hmu hman vek a, nizan ai létin ka hmu chiang a, ka harhfim vek tawh kher bawk nen zâm rukna chuan keimahah awmhmun a rawn khuar leh ṭan ta.

Thawmhnaw inthawlh ri chu ka hre reng a, mahse ka meng ngam tawh rih lo hrim hrim thung. A hnu lawkah kawngka inhawng thawm leh inkhar thawm ka hre leh a, chumi rual chuan a rim hriat tur a awm lo zui nghal bawk a, ka meng ngam ve ta chauh. Room chhung banga sana intâr chu ka en a, dâr 6 leh a chanve chiah chiah a lo ni a, mo thar tuka thawh ka hai lo hlauh chu ka lawm ru khawp mai.

Kan inneih hma khan ka pi'n min hrilh tawh a, mo thar tuka thawh a hai thu leh a zah thute min hrilh kha a ni a, thawh hai ila chuan ka zah viau ka ring. Bathroom chhungah lutin ka intifai mial mial a, ka pasal rim ang chiah Shower Gel chu ka hmang ve ta ringawt a, engkim chu mipa hman ṭhin deuh vek a ni a, a hman ang ka hman mai loh chuan tih ngaihna dang awm hek lo.

In hnuaia ka chhuk chu u Maṭhuama leh ka pa an lo titi a, ka pa chuan min hmuh rualin an awmna lamah min ko phei nghal a, mi dang erawh tûmah ka la hmu lo, an la tho lo hlawm a nih ka ring. Ka pa chuan nui sun sun hian ka mut ṭhat leh ṭhat loh thu te, ka thawh nawm leh nawm loh thute min zâwt luam a, sawi tur chin tâwk hre ran chungin ka chhang a, ka bul lawka min en rengtu chuan min tizâm zual a ni.

Ka mit sirin ka hmu ru reng a, hmun dang a hawi har phian leh nghal. Ka pa zawhna ka chhan zawh rualin ka pasal lam chu ka hawi ta nge nge a, a ngaihna hre lo tak hian ka nui sak ringawt a, mahse ka va han nui rei lo chiang kher ém. Mi nuih lêt pawh a tum lo, a hmui a chip hmuk a, a tho fuh lo ti dâwn ila a thawh fuh loh áwm ka hre bawk si lo, tunah atân chuan a nelawm tehchiam loh khawp mai.

Choka thingpui ka lúm laiin ka nu hmel pawh ka hmu ve ta, min rawn nuih sak a, lái ru zet hian ka lo nuih lêt ve mai bawk a, mi dang pawh an rawn tho har hlawm ta lo. A hma khan ka pasal chhungte hi ka hre chiang lo khawp a, a nu leh a pa kha chiang taka ka hriat awmchhun an ni mai a, a naute erawh man inhlannî khan ka hre ve hlawm chiah a ni.

Unau pali an ni a, mipa vek an ni a, nupui an nei vek tawh bawk. Naupang nen kan ni nawk hlawm a, ka mopui te pawh chuan chokaah min rawn awmpui a, min be nêl sawt sawt nghal hlawm khawp mai. An fate erawh an la rawn tho ve lo va, puitling ṭhah kan ni bawk a, ka zâm zual hle a ni. Thingpui ka thli chhuak te chu ka tibaw phung a, ka uluk pôh leh ka che sual zel zâwk tlat a nih chu!

Gas bula thil hrukna ni áwm tak chuan ka hru fai zung zung a, mi dang hmuh ka hlau bawk si, ka hru muangchang lo kher mai. Tu hmeichhia mahin mo thar tuka chet sual an duh bik ka ring lo, kei ngat phei chuan duh lo tak ka ni. Thingpui ka va sem chu sitting room-ah an lo ṭhu ṭhap a, min en deuh ṭhap bawk a, ka zâm zual tak zet! Che sual miah lova an thingpui tur ṭheuh ka sem kual hnu chuan chhungril lam hahdam huai hian ka kal a, mahse ka beisei loh lutuk thil a thleng ta. Ka tum ni miah si lovin u Maṭhuama khup lawk zet chu ka tauh palh a, a thingpui ken lai chu a kawr hmaah a baw ta duak mai, ka va han zak tehreng êm.

"Awi, ka tum a ni miah lo, ka tihpalh lutuk" ti thuai thuaiin ka buaipui nghal sawk sawk a, ka buaipuina lamah dawhkana a thingpui dah tur chu ka la nghawk buaksak leh ta zel zui, tunah chuan thingpui in tham pawh a nei tawh lo.

"Ka tihpalh, ka siam leh ang, ka va siam leh ang che" rilru buai nuaiha ka tih phawlh phawlh lai chuan

"A pawi lo" a lo ti sup a, pawi a tih loh thu sawi ve teh mah se keimah zâwkin pawi ka ti em em tho.

"Pawi ti reng reng suh Sylvia, mo thar tuk te chuan hmeichhiate hi chu in che sual châwk alawm, i mopui te zawng zawng hi an che sual vek tih hria la, i nu nen lam hian, i nu chet sual tuk kha min hriat chhuahtir rum rum alawm le" ngainatawm zet hian ka pa chuan a rawn ti a, ka zahna a la bo chuang der lo.

"A ngaihawm reuh ngawt mai, an awm dan deuh chiah chiah hian ka awm em khá!? Ni lo, a inang lo hret mai thei. I thingpui in tur kha ka tibuaksak palh ngei che a, Tray khan ka khâwng zui chawrh nghe nghe bawk che a, khami ṭuma ka zahzia kha! Tuna Sylvia-i rilru tur pawh hi ka hrethiam mai, mahse nakinah chuan in la hlimpui zâwk ka ring, a hnua sawi chhuah leh hian a hlimawm duh phian asin" tiin ka nu chu a nui var var a, tlêm chuan ka zahna pawh a reh deuhin ka hria.

"Va inbuaipui rawh u, kan lo sawi zui miah lo ang che u" ka pa bawkin a rawn ti leh a, ring lutuk lo hian a nui hak hak a, mi dang hmelah pawh chuan nuihza hmel ka hmu zui nghal bawk.

U Maṭhuama chu a che deuh hrut a, chu veleh ṭhingṭhi tawh lovin ka ding thuai a, choka lamah kan phei zui nghal chu a ni mai. Tui herh haw ri sur surin a kawr hma chu a phuh tir a, ka va buaipui nghal vat a, min lo kian ve mai bawk. A kawr chu ka'n nuai deuh ṭhin, a bal a reh thei mai lo leh nghal, a rawng a bet dâwn tlatin ka hria.

"Kawr dang min han lâk lawk mai ta che" a tih chuan chhan khalh hlau tak ang hrim hian

"Aw le, eng kawr nge ni ang?" ka lo ti vat a, tui chu ka herh tawp zui nghal bawk.

"I duh duh a ni mai" a ṭawng zawh rualin kan nupa room lam ka pan nghal a, ka pasal lakah chuan ka inthiam lo ru ang reng, ka chet ṭawp luat vek a ni.

Wardrobe chu hawngin Tshirt ka zawng a, ka hmuh hmasak ber rawng eng chu a inkhaina Hanger aṭang chuan ka lá chhuak a, in hnuai lamah ka chhuk thla leh ta vat vat. U Maṭhuama bul ka thlen rualin ka kawr ken chu ka pe a, sawiselna nei miah lo hian a ha nghal mai a, a kawr pakhat zâwk erawh suk turin ka lá nghal daih thung.

"Thingpui in ve phawt rawh" kal sawn ka tum chu ka bân rékah a rawn vuan chat a, a thlah ve leh nghal mai bawk.

"Ka in châk lo" ti sepin kan nupa room lamah ka chho leh a, ka pasal kawr chu suk fai nghal tum mah ila kan nupa room chhungah chuan Washing Mechine hmuh tur reng a awm lo, ka va ngaihtuah kim lo tak!

Room aṭanga chhuakin ka chhuk thla leh ta nge nge a, ka chhungkaw thar te chuan min lo en ṭhap a, a ṭhen an nui sun sun a, a ṭhenin min lo nuih var var bawk a, sawi tur a vâng duh khawp mai. U Maṭhuama chuan a bula ṭhu turin min thlek khum zauh a, a ṭhutna lamah chuan ka phei ve nghal mai a, ka ṭhut ruala ka kut a rawn hum chu ka phu deuh zawk a, mahse zawi zawiin ka zâmna te chuan kian lam an pan thung. Min vawnna chu holam viau angin lang mah se mi a thlamuan ru tlat lawi a, a hnuah phei chuan min vuan lo vang tih ka hlau hnuhnawh ta hial zâwk a ni.

Vanneihthlâk takin chet sualna ka nei leh ta miah lo va, chhungkaw kima tukṭhuan kan ei laih laih lai te chuan ka fimkhur hle a, ka che sual tawh miah lo chu lawm ru tak ka ni. Chaw ei khamah chuan zing lama u Maṭhuama kawr ka tihbalhsak chu ka su nghal a, insuk tur awm ang ângte pawh Washing Machine-in ka nuai nghal vek a, inlâk fela inlâk taimak ka tum vang pawh a ni lo, ka tihtur nia ka hriat vang zâwk a ni. Inlêng ka nei deuh reng a, chung kan inlêngte chu kei leh u Maṭhuama vanga lo lêng an ni deuh tlangpui a, chawhnu lamah phei chuan ka mopui te'n min awmtir hle hle ta nghe nghe.

Tlai nî tlak fel tawh hnuah chuan u Maṭhuama ṭhiante an lo kal thung a, Zaii a lo kal bawk a, min chetpui char char a, thil chi hrang hrang min sawipui nghal melh melh bawk. U Maṭhuama ṭhiante chuan min fiam leh zauh ṭhin a, fiamthu duh tak an ni tih ka hrethiam nghal mai. A ṭhiante an nuih nasata an nuih rin theih hlawm tehreng nen u Maṭhuama erawh a nui thawm pakhat mah ka hre lo, ha lang lovin nui suk suk ve ṭhin tho mah se a ṭhiante lakah chuan nui lo tluk a ni. Mi a rawn en leh zauh ṭhin a, kan mit a intawng fuh thei khawp mai. Che ri deuh hlek ila a lam ka va hawi phei hmasa ber ziah a, ani lah chuan min lo en ve thei zel leh nghal.

Zaii chuan zanriah a ei nghal a, u Maṭhuama chhungte nena an innêl dan chu pui tak a ni. Zanah erawh ka pi leh ka pute an lo léng a, ka nu leh Chhani pawh an lo kal nghe nghe a, an hmel ka hmuh rualin thil hriat chhuah ka nei nghal zawk bawk. Pasal ka neih tawh avangin min namnul mai mai ang tih ka hlau, pasal nei tawh eng ang mah ila ka rilru a la pangngai reng a; a bikin kan in chungchangah! An in ang chiaha an lo cheibawl vaih chuan ka ngaihdan a ni dâwn teuh lo, a neitu dik tak chu keimah ka ni a, kan chhungkuaa dam awmchhun ka ni tawh a, ka dam chhung chu an in a ni thei lo hrim hrim hi a ni tawp!

Dâr 9 leh a chanve thleng ka pi leh ka pute chu an rawn lêng a, u Maṭhuama nen motor-in kan va thlah thlap a, an inah rei lo tê kan ṭhu khawmuang zuaih bawk. Kan lêt leh hnuah pawh ka nuhrawn leh Chhani chu an lo la léng reng a, an ṭawng mawlh mawlh a, mi dang tân hi chuan an va'n ṭha dun hliah hliah tak! Ka nuhrawn leh u Maṭhuama nu chu an inbe char char a, ka pa hmel erawh hmuh tur a awm tawh rih lo, mu turin an room-ah a lut tawh a ni mai thei. Chhani ni se ka mopuite nen an lo inbe nêl thei zel bawk a, ṭhian siam an awlsam lutuk chu mak ka ti ru viau a, mahse lem an chan bak ka ring leh ta lo. Dâr 10 pelh hnuah an haw ve ta hram hram a, an lêng rei nufa dun khawp mai.

"Naktuk tlai chu ka ṭhiante inah chaw kan ei a ngaih hmel" khuma ṭhu thluang duai hian ka pasal chuan a rawn ti a, khum lam chu ka pan ve nghal mai bawk.

"Chaw kan ei chhuak deuh reng mai thei a ni" a rawn ti leh a, chaw eia min sawmtu an awm nual a nih ka ring ve ta ringawt.

"A pawi hleinem" ka lo ti sep a, a dara mi beitir duh ni awm tak hian a bân vei lam chuan min rawn kuah a, nupa kan nihna a la rei lo bawk si nen a chet dan hrim hrim chu ngaiah ka nei thei rih lo a ni e.

"Zirna chhunzawm lam i rilruah la dah rih lo la ka duh, rem ka ti vek tawh tho va, i chhunzawm hun tur hi chu ka thu i ngaihchan thiam mai ka ring" a ṭawngkam chhuak reng reng chu a dik thlup a, a dam ruih bawk.

"Tukin kha ka tihpalh tak tak, i rawn che thut a, ka tum a ni miah lo" ka ti ta daih a, a hmelah chuan a nuih a za tih ka hmu thei nghal.

"Ka nu sawi kha a dik ang, nakin zela kan hlimna tur thil pakhat a la ni mahna" ti leh a awm dan siam rem a rual a, ka en kiau lai chuan min rawn fawp a, ka chhang lêt lawk lo nghe nghe.

"Hlau thawng suh, a nâ tawh lo ang" ti ril ruihin min fawh zawm nghal mial mial a, engtin nge ka hlauthawng ru reng tih a hriat theih zâwk, ka sawi chhuak tawp si lo.

Tun ṭuma a chet dan chu kan inneih zana a chet dan nen a inang miah lo, ka harhfim lai rengin ka thawmhnaw hak lai min phelhsak a, ka pasal ni lo se chuan ka dang chiang khawp ang maw le. Ka hmuia fawp reng chung hian ka Panty chhanah a kut a tiche neuh neuh a, ka thawmhnaw inbel awmchun chu Panty chauh a ni tawh mai.

A hmui leh a leia ka âwm bâwr sawngbawl pah reng hian ka Panty chu zawimuangin a pawt phelh riai riai a, a kut a chettir leh chiah chu ka va han danglam chiang tehreng êm, vawi sang tam tak tawng nawn dâwn mah ila pawi ka tih ka ring lo. Ka âwm aṭanga hnuai lam zawng chu a kut, a hmui leh a leiin a thunun vek a, châkna leh phurna nasa takin min tuamhlawm a, ka zauthau nasat tawhzia chu rin phâk bak a ni.

Ka taksa thununa awp lumtu an awm loh thut rual chuan vawi leh khatah ka ruak huai a, ka meng nghal vat bawk. Ka hmaa kawr leh kekawr phelh sawk sawktu chu tu dang ni lovin ka pasal ngei a ni a, a boxer a phelh ruala ka thil hmuh avang chuan ka mur sung sung thei hial a ni. Khuma a rawn láwn lai te chuan mit là sawn lêk lovin ka lo en reng a, nunna nei hrang ang mai hian a phu uih uih a, ka mitah chuan zan hmasa lama mi ai khan a ruangam chu a ṭhan belh ni maiin ka hria. Ka men kur lai chuan min rawn fawp zeuh a, ka taksaa lo luh tumin ṭanhmun a siam rem zui nghal bawk.

A kut leh a hmui hmanga mi sawngbawl tawh lovin a che ta mial mial a, a tihtur a hai lo chiang hle a, ka phurna leh ka sosanna kiam tawh nia ka hriatte chu an rawn lêt rang khawp mai. Ka kawng fek lai chu a kut pahnihin a dawm a, muangchang lo fê hian ka taksa chhungah a lut ta mawlh mawlh a, keimaha nawmna nasa lutuk inlinglet mup mup chuan hmun tin kil tinah nghawng nei zual zelin ka kâ te chu a thunun zui nghal a, thawm ka chhuah phah leh ta nge nge.

Ani pawh a bang bik chuang lo, ṭial thum ruih hian a rum leh zuah ṭhin a, a che chawl chuang lo hrim hrim bawk. Ka hnungzânga rawn chawiin a âwmah min kuah bêt chial a, ani erawh a la ṭhingṭhi reng a, a malchungah ka ṭhu chu a ni mai a, hnuai lam aṭanga a rawn che leh chiah chu awm ngaihna reng ka hre thei tawh lo, mumal lo tak ka ni.

A kawngah nghet takin ka ke chuan ka kherh bet ngawt ngawt a, nawmna nasa lutuk avangin ka thlan te chu an rawn so chhuak zawih zawih a, chhuah loh an hlau a ni ber zâwk. A nghawng leh a dar inkara khabe nghatin a hnungzâng ka ṭham tawn tawn a, ka mit ka meng phal tawh lo hrim hrim bawk. A vawrtawp thlen châkna hlirin ka khat a, ka thleng thuai dâwn tih pawh ka hria.

Ka phur lutuk leh ka sosang lutuk chu ka si hliam hliam a, eng dang vang a ni lo, ka pasal chu awihawm loh khawpa nasain ka mamawh ngawih ngawih tawh tlat a ni. Ani lah chu ka mamawhna phuhruk tum ang hrim hian ka taksa chhungah a lo lut chho zawt zawt a, thlan tui nena inchiahpiah kan ni bawk a, kan taksa chu a innâwk ri chawk chawk a, ka engkim mai chu ka thunun theih piah lam thil vek a ni.

Vanram tla fual chen duna nawmna vawrtawp kan thlen hnu chuan kan thawk dan a la rang dun hle a, kei phei chu vawi leh khata boruak hip luh ṭeuh tum ang vel ka ni. A taksa aṭanga awm sawn hlau lutuk ang mai hian ka la kuah nghet em em a, kan nupa khum laizawlah ngei chuan min tluk zálpui a, lungkam nei lo zetin kan mu dun ta hle hle.

Ka mit ka chhing tlat a, ka taksa chhung aṭang chuan a la chhuak bik miah lo va, mahse pawi tihna ka nei lo, awm reng se ka duh mah zâwkin ka hria, a chhan chu ka thla a timuangin ka awm a tihahdam tlat a ni. Ka hmuia a rawn fawh zeuh hnu chuan a âwmah min kuah bet hle hle a, dimdawi tak hian ka hnungzáng chu a zût riak riak a, a chet dan chuan ka mut a tichhuak nghal thuai bawk.

(End of Chapter 8)

SYLVIA ROMAWIZUALI

By

Havali Adam

Chapter 9

Thil eng emaw ni ri ral ral chuan min tiharh a, ka mit erawh ka la meng mai rih lo. Thawm chu ka ngaithla chiang a, Alarm ri ngei a ni. Ka phone-a ka Alarm Set ri a ni tih ka hriat chhuah rualin ka meng nghal vat a, ka thil hmuh hmasak ber chu mipa âwm chhah poh ṭha tak a ni a, lumna a pai hnem em em leh nghal.

Alarm ri ral ral chuan min tiharh chiang tulh tulh a, ka nghen chhan pa; a âwma ka bei hle hlena pa chu a rawn che deuh hrut a, Alarm avang chuan a harh ve tho a ni ang. Harh reng tawh mah ila ka la che lo hrim hrim a, chet erawh ka tum hman úk a, mahse amah zâwkin min chet khalh avangin ka awm ngai chuan ka awm ta reng. Alarm chu a va off a, thawh hai palh ka hlauh avanga Set ka ni a, tunah chuan ka hai dâwn lo tih ka hre zawm zat tawh bawk.

Ka hnungzâng ruak káng chu a bán hrawl tak chuan a kuah khawm a, a âwmah min pawm bet nghet zual a, min hmangaiha min thlahlel tak tak te pawh a ang alawm le, mahse chu erawh thil awihawm loh lutuk a ni. Ka ngaih a ngam êm avang chuan ka mit ka chhing leh ta diar diar a, muthilh leh tumna pawh ka nei chuang lo. A pangtilum te chu tawha sik reng mai ka duh, in nuam taka awm der der ang vel ka ni.

Ka hmai chuan a âwm chu ka nâwk deuh salh a, chu veleh eng nge tih pawh ka hriat si loh hian ka kawng chung deuh si; ka dul zawn vel tak chu a rawn kam tial tial a, loh theih lovin ka meng ta nge nge. Fiah kâk hian ka meng kual ralh ralh a, ka dul zawna mi chu eng nge tih hriat tumin ngaihtuahna ka sêng a, chutih lai tak chuan ka pasal chu a rawn che leh ta. Kan rizai sin lai chhungah a kut rawlh lutin ka dul do runtu thil lûm ham ham chu a kuai sawn daih a, ka hahdam sawt dâwn emaw ka ti a, mahse a teuh lo nasa mai!

"I mu tui em?" ka meng tih a hriat rual chuan a ti sup a, ṭawngkâa chhang lovin ka buk khum zeuh a, a ṭawng zawih tehreng nen hriat ṭhat theih loh lai ka nei miah lo, ka hre fiah em em zâwk a ni.

"Ka'n tho ang e, nang chu mu leh rawh, ka Alarm Set avangin i harh phah leh nghal" ti sêp sepa thawh ka tum chu ka darah a rawn vuan a, ka tho ta mai bik lo.

"Engati nge Alarm i Set?" min en deuh run mah se a thinrim tihna a ni lo tih ka hrethiam ve tawh a, a mitmeng ngaihno bei tehchiam lo chu ngaiah ka nei chho ṭan nghal der dâwnin ka hria.

"Thawh hai ka hlau alawm" ka lo ti pangngai ve mai bawk a, a chal chuar deuh nghal tap chuan ka ngaih a tiṭha lo dâwn alawm le.

"Mu leh rawh, i chau awm si" ka ti leh tawp a, ṭawng miah lovin min en bawk si nen sawi tur dang ka hre tawh rih lo, ngawih reng lah dik hek bawk si lo, ka rilrua rawn lang hmasa ber ka sawi chhuak tawp a ni e.

"Ka chauh i ring màw?" thum hniam ruih hian a rawn ti a, a aw ri chuan thluk a nei lek lek a, a mit hnuai vun inrin phei kalh ka hmuh rualin a nuih a za tih ka hre zawm nghal zat bawk.

"Ring e" ka lo ti leh ringawt a, a nui nghawr nghal dat a, a nuih zawng chuan a hnâr aṭangin boruak a rawn chhuak a, thil nuihzat thlak ka sawi áwm ka hre miah lo thung.

"I ring sual mai thei" a nui hmel chuan kiam lam a pan lo va, a hmelah a la chambâng reng a, hmuhnawm ka ti ru leh tlat tawh a nih chu!

"Lawk, eng nge? Eng nge tih i tum?" a kut hlai zeta ka kawng a dawm rual chuan ka lo ti nghal vat a, ka thin phu pawh a rang zawt zawt sâwt khawp mai.

"Fiahna kan nei ang chu ka lo ti asin" ka hmai bul chétah a rawn thaw lum ham ham a, tawlh hnun deuh ka tum lahin a phal tlat lo leh nghal.

"Eng maw? Eng fiahna maw? I thu sawi awmzia hi pakhat mah ka hre lo a nia, min thlah teh u Maṭhuam" ka ti sawk sawk a, ka ṭawng zawi tawh lem lo.

"Ka chauh leh chauh lo maw le" a rawn ti chiah chu ka mur sung sungin ka hria, amah ka ngaihtuah avangin thil sawi tur ka dap chawp ve em em a, chutianga rilru dang daih a put chu ka ring miah lo asin le.

"A nih leh i chau leh lo, ka tho duh tawh" a âwma nam ṭai ṭai pah chuan ka ti zung zung a, chu veleh ha lang meuhin a rawn nui ri ta hawk hawk a nih chu!

"Belhchian i dawl reuh dâwn khawp mai Sylvia" ti thum chhalin a la nui reng a, a ha erawh a hmuiin a hliah khuh leh vek tawh a, rei lo mah se a ha var rualzia erawh ka hmu hman vek tho.

"Awi!" ka tho chhuak chiah chu khuma rizai pawt khawmin ka intuam nghal vat a, ruak vekin ka lo la awm tih hre ngat ila zawng ngaih ṭha zetin ka tho hauh lo ang.

"Awi, eng lo, ka tihpalh, ka tum a ni lo" ti sawkin sawkin khum lûa lukham chu a lamah ka vawm phei nghal vat a, ruak vekin a lo la awm ve tho a nih chu!

"Kan intifai rual dâwn em ni ang?" a zawhna chu a va han ṭul lo lulai tak êm.

"Aih!" ka lo thuai a, kiai suk hian

"I zak em ni?" a rawn ti leh ngat a, ka kum rualpui ni se chuan ka beng thle lâwl tawh ngei ang.

"Va intifai hmasa mai rawh, i intihfai zawh hunah ka lut mai ang" a zawhna pawh chhang chuang lovin ka ti ta zâwk a, ka aw chhuak hrim hrim chu a hmanhmawh em em vek a, a dawngsawngtu tân chuan a pangngai lo viau mai thei a ni.

"A ruala intihfai duh ta tlat ila" a rawn ti leh kher a nih chu maw le, a hmingpuma koh lawl mai ka duh tawh!

"Kal vat teh u Maṭhuam, inlâk eng emaw kual velna hun pawh a ni lo" ka ti ta ringawt a, ner náng hian mi a la en zui.

"Ka lo inlá eng emaw kual vel elo?" ka ṭawngkam ang chiaha min chhan lét avang chuan khumah ka lâwn a, ka inlûkhûp zui nghal hmak bawk.

"Ka rei lo vang" a awah chuan nuihza aw hlir a khat a, fiamthu ka thawh bawk si lo, eng ber nge nuihzat thlâk lai ka hre lo a ni.

Ka boruak hip lai nena inang lo zet rim dang hian ka hnâr chu a rawn verh zar a, eng thil nge a nih ka hre rih mai lo. Harh ṭha mang lovin ka awmna hmun chu ka ngaihtuah a, a lûm nuam phian leh nghal. Ka dulah chuan thil che neuh hi a awm a, kut ni maiin ka hria. Ka ngaihtuah chiang a, ka dul zút riak riaktu chu eng nge a nih ka hre chiang tulh tulh a, ka harhfim zui nghal bawk.

Thawh phat ka tum rualin ka hnunga mu lúmna ngat zet chuan nghet tak hian a âwmah min kuah bet thung a, ka mut réng a chhuak thei tawh lo. Ka'n tâl deuh dâwn ṭhin, ani lah chuan min kuah nghet nasa mai si, a rim aṭangin a intifai vek tawh tih ka hre zui nghal bawk. Ṭawng erawh ka tum tawh rih lo, mi tihzah dan a thiam êm mai. A upa tawh bawk a, zah hre ve miah lo mah se a awm viau tho.

"Thawh i hai ta sa sa, mu hle hle zâwk teh ang" a rawn tih chuan banga Sana intâr ka en vat a, dâr 8 leh a chanve a lo ri daih tawh a nih chu!

"Awi! Min thlah teh, min thlah vat teh u Maṭhuam, engati nge min kaih thawh loh? Ka zak dâwn tih i hre vek sia, min kai tho ve mai ta che" ka ti bawrh bawrh a, ka nu leh pa hmai ka zah ru nghal lutuk chu ka ṭap thei mai dâwnin ka hria.

"A ho êm mai, nang lo che tur mo an tam alawm" a ti duh lek chauh a, ka ngaihdan erawh a ni lo nasa a ni.

"A ho teuh lo, hmeichhia i ni lo va, i hrethiam lo mai mai a nih kha! Min thlah tawh tak tak teh, intihfaia chhuk vat vat ka ngai a nia" ka aw chhuak chu a beidawng aw lek lek tawh zâwk a, min kai tho miah lo chu ka lawm lo tak zet bawk.

"Nuam lo tihna neih phah suh Sylvia" ti supin ka biangah a rawn fawp zeuh a, khum aṭang chuan a chhuk nghal tharh a, kei pawh ka tho chhuak rang hle.

"Min kai tho ni la chuan hetiang em em hian ka buai lo ang maw le" ti niah niahin bathroom lam ka pan a, rizaiin ka la intuam reng a, chu chuan a nuih a tiza leh tawh a ni ngei ang.

"Ka kai tho ngei che alawm, ka sawi dat dat bawk che, mahse i harh lo hrim hrim, a chau zâwk chu kan hriat khawp mai" tawi têa kiai suk hian a rawn ti a, a thil sawi chuan amah ka ngei rukna a va tizual tehreng êm.

"Ka awih thlawt lo" ti nghawng nghawngin bathroom chhungah ka inkeng lut ṭun a, thawmhnaw hak tur ka keng lut nghal vek bawk si a, ka bâwr ang reng viau.

"Lo dah fel tawh mai teh, ka rei lo vang" bathroom kawngka hawng zawka rizai ka theh chhuah hnu chuan ka ti leh zung zung a, ka su nghal dâwn te a nih loh chuan inbualpui chî ni hek lo.

Rilru hmanhmawh zetin ka inbual thuai thuai a, ka che reng reng chu a ri sawk sawk a, ka thawh tirh khan dar 8 leh a chanve a ri tawh a, hun a lo kal duak hman ang tih ka hlau ber a ni. Ka intifai zo bathroom aṭanga ka chhuah chu kan mutna khum a lo siam mial mial a, a chet dan vel chuan ka rilru a tinuam lo zual khawp mai. Pasal te êm khum han siamtir ka duh bik teuh lo, a bânah namin ka siam chhunzawm nghal mawlh mawlh a, ani pawh ngawi rengin a ding ṭha ta hle hle. Khum ka siam zawh chuan ka sam ka hru ro thuak thuak a, in hnuai lama chhuk ka rawt zui nghal thuai bawk.

In hnuai kan thleng thla chu hawi pawh ka hawi chhuak ṭha ngam lo, a zahthlak ve êm a ni. Chutih rual erawh chuan an fel hlawm viau zâwk a, ka nu leh pa chenin min be reng a, u Maṭhuaman ka zak tih a lo hrilh hman a nih ka ring hial, mahse hrilhna hun a nei bikin ka hre si lo. Tukṭhuan ei khamah chuan a hmel ka hmu tawh lo hrim hrim a, a ṭhiante in velah a lêng lawk a nih ka ring.

Ka nu mawlh chu biak a nuam phian a, zep lo chuan a tirah khan ka nêl tehchiam lo, ka pa ai paw'n ka nêl lo ru nghal zâwk kha a ni a, tunah erawh khatiang rilru kha chu keimahah a awm tawh lo tawp a tih theih. Tin, nu ṭawng duh tak a ni a, mual min liamsan ta ka nu dik tak nena inanna lai te pawh an nei deuh reuh ṭhin. A awkâ leh a ṭawng hrim hrim a zawi lo va, a nêm hran lo bawk a, ri ve hlawk hlawk chi a nih hmel.

Chhunah chuan Zaii hmel kan hmu leh a, lo lêng ziah mah se pawi ka ti miah lo. Thil kan sawi dun melh melh a, zingkâra u Maṭhuama nghal ruk reuhzia ka hrilh ta alawm, a nui nasa ngáng mai. In kawta kan awm lai a ni a, tuma'n min rawn thlithlai lo bawk nen kan ṭawng zawi lo khawp. Chu bakah in chhungah lut pawh ni ila tihtur em em a awm rih lo va, chawhnu lamah erawh a awm ka ring.

Zaii chuan hre zawm châk zet hian min zâwt zel a, mahse a zawng zawng ka hrilh duh bik teuh lo, fin ve a ngai tlat! Kan inneih hmaa u Maṭhuama mize ṭhenkhat min hrilh ṭeuh a, kan ina a lo lén ṭhin lai te ka ngaihtuah chhuah phah a, kan inneih hnu nen lam, nghal ru zek mah se a hmel leh a mizia nen inhmeh ka ti ru leh tlat tawh a nih chu!

"Dik tak chuan ka hriat tirh khan a hming hi mak ka'n ti khawp a, Ṭhuampui vêng saw ka hriat chhuah phah ve ziah alawm, amah ren run hi Ṭhuampui véng a nih duh hmel ê" ka tih chuan a lo nui dir char char a, kei pawh ka nuih a za ve deuh reuh tho.

"Awi Sylvia, a hre palh ang e aw, a hnek hrep duh ang che" a nuih loh kâr lakah a rawn ti a, a nuih zawm leh nghal a, za em em lova nui kha ka nuih a za ve ta tulh tulh bawk.

"Sawi chi náng le, ti daih ila, engtik hun velah nge zirna hi chhunzawm ila ṭha i tih deuh? U Maṭhuama chuan a thu ngaichang phawt turin min ti tawh a, ngaihchan ka tum sa hrim hrim a, college pangngai nge IGNOU te hi ṭha ang le? Sawipui tur ka ván thei lutuk a, nangmah hi ka sawipui theih awmchhun chu i ni mai" ka tih leh chuan

"Chutiangte chu ka inrawlhna chî a ni lo ang, u Maṭhuama nen sawi dun zâwk rawh u. In titi dun tam leh in inpawh zual sawt ka ring, in induhtawn vak lo tih chu kan hre vek tho va, mahse a induhtawn theih lutuk tho a nia" a lo ti daih thung a, min chhan dan chuan ka ngaihtuahna a tikal thui nghal khawp mai.

"Nia, engtikah emaw ni sawipui chu ka tum hrim hrim alawm, mahse amah hi titi dunpui a nawm loh hmel ve ê, zawhna ka zawha ka biak te hian mi a chhang fuk fuk zel a, mi a chhang tawi thei si" ka ti niah niah a, min nuih leh ta tet tet a, a nuih chhan tak pawh ka hre lo.

"Nangni pahnih hi in lawmawm dun dâwn riau, a rukin ka zâwt mai mai ang che Sylvia, sawi chhuah leh tawh awih loh! U Maṭhuama hi a zei ém? A upa ve tawh sia, ngaihzawng a neih lohna chin pawh a rei tawh lutuk, a khawr ṭut lo maw? Nge urhsun tâwkin a che deuh thlap?" nui var var hian a rawn ti a, a ṭawng zawi sâwt hle bawk.

"A teuh lo mai" ka'n lo ti ngawt pek alawm le, hriat belh châk hmel zet hian zawhna dang min zawh zawm nghal char char a, thil sawi chî loh ka sawi hman teuhzia chu pui tak a ni!

"Min zâwt tawh suh, ka sawi dâwn chuang lo" ka tih pawh chuan awmzia a awm der lo.

"Ṭhuampui vêng mi a nih duh hmel i tih kha ka sawi chhuak a ni mai, min hrilh loh chuan a lo haw hunah i chan a chhe khawp ang, a duh lo nasa dâwn si" ka ṭhiannu chuan min nawr viau mah se ka la ngawi reng tho va, kan nupa hun hman dan chu sawi chhuah chî pawh va ni suh!

"Min hrilh ṭha hle hle teh Sylvia, ka sawi chhuak dâwn pawh ni hlei lo" nui var var chung hian a rawn ti leh a, ka án zuau lai chuan

"Saw a lo haw a nia, ka hrilh dâwn chiang lutuk, a thin a rim khawp ang le" a ti leh nghal zat a, a hawina lam chu ka hawi phei a, u Maṭhuama hmel ngei ka hmu tak tak leh nghal.

"Fiamthuna chî a ni miah lo a nia Zaii, han sawi vai teh, i lakah ka lungawi lo khawp ang" tih leh thawh ka rual a, u Maṭhuama lah chuan kan awmna lam a rawn la pan zui.

"U Maṭhuam, thil eng emaw ni hrilh duh che ka nei" rum zet hian Zaii chu ka melh vak a, za em em hian a nui char char thung a, chak takin ka kal sawn zui nghal hmawk hmawk bawk.

In chhung ka luh rualin kan nupa room-ah ka chho tlang a, Zaii chuan a lo hrilh tak tak ang tih ka hlau ber tawh. 'A teuh lo mai' tia ka chhang kha dawt chu a ni hran lo, mahse u Maṭhuama hriat leh atâna hrilh ka ni lo a ni. Hun kal tawha ka hmuh dan ka sawi mai kha a ni a, a hria a nih vaih chuan Zaii bak mawhpuh tur an awm lo ang, a chhan chu ani chiahin a hre tlat!

Rilru nuam lo ru zetin room chhungah chuan ka tei sek a, a chang leh khumah ka ṭhu a, a chang leh ka ding a, ka awm hle hle thei tawh lo a ni ber. Tukverh darthlang chhan aṭangin kan in kawt chu ka zu bih dêk dek a, Zaii zâwk a nui var var reng a, u Maṭhuama erawh a nui awzâwng lo, a hre tawh a ni ngei ang.

Chhun thingpui in hun a rawn ni a, in hnuai lamah ka chhuk thla leh ta nge nge a, u Maṭhuama leh Zaii an lo inzui lut ve chiah bawk a, nuam lo ti ru tak ka ni. U Maṭhuama chu ka bul chetah a rawn ding a, min be lo hrim hrim a, biak tumna ka nei bik chuang lo. Zaii dinna lam ka hawi chuan nui var var chung hian a mit kô a sán âk ak a, en rei duh lovin ka mo puite thingpui siam chu ka tihpui ta daih a, u Maṭhuama erawh ka bulah a lo kal ve zel tho.

Chokaa mipa awmchhun chu amah a ni mai a, Zaii leh chhungkaw mo pali te'n thingpui leh a hmeh kan siam mial mial hlawm a, an be leh zauh ṭhin a, a lo awm ve rengna chhan ka hre hauh lo, a tân chuan awm ve reng a nuam lo zâwk ka ring ve ringawt a, mahse amah ber lah chuan chet eih pawh a tum loh hmel ropui si.

Thingpui kan siam lai vel chuan a lam ka hawi leh zauh ṭhin a, a phone tih loh buaipui réng a nei lo a ni mahna. Ke kawkalhin a ding a, ding ngil pap lo mah se a sang viau tho mai. Upa ber a nih vang nge ni, an unau zingah pawh a sang ber a, a pa lian ber a, a ngo ber bawk, mahse ngo hluak ang chi a ni chuang lo.

Kawrah Tshirt dum nghawng nei chî hi a ha a, a bán bul lian zet chuan a kawr bán chu a tâwn mar ṭang a, a hang chhe zawk zawk bawk si lo va, rawng dum a lo ni leh zel bawk nen a bán hrim hrim pawh chu a hnuhnawm tham alawm le. Ka en leh zauh ṭhin tih a hriat ka hlauh avangin a hmel ka en hmasa ber phawt zel a, ka bula mite pawh chuan min rawn chik em em lovin ka hria.

"Kha aw, a sa deuh mai thei" tiin u Maṭhuama chu thingpui leh a hmeh ka pe a, a lo lá ve mai a, a la ṭawng chuang lo hrim hrim.

"Eu....in va induhsak deuh bik ve" u Maṭhuamate naupang ber nupui u Siami chuan a rawn ti a, an lam ka hawi nghal vat a, an lo nui var var hlawm a, ka lái ru ang reng.

"Duhsak bik pawh a ni lo, ka nute ṭhutna lamah ka chawi phei dâwn tho va, ka pe nghal mai" za vak lova nui chung hian ka ti a, Zaii ber chu a nuih a zat hmel hle thung.

"Duhsak bik a ni ang, ka nute ai paw'n i pe hmasa tlat" rawn titu chu u Rinzauva nupui u Hlimi a ni a, min tihláih an tum hrim hrimin ka hria.

"A chet chhiat phah ang e aw u Hlim, saw a hmel te saw a dik lo vek a nia, chhaih tawh lo mai rawh u" min en chunga Zaiin a tih chuan ka nui sak a, a thil sawi chu a awihawm loh ber awm e.

"Nakinah u Maṭhuama nen thil sawi dun tur te an la nei dâwn leh nghal" a thu rawn sawi leh avang chuan ka nui tawp riai riai a, rilru nuam lo ru zetin u Maṭhuama lam ka hawi chho nghal a, min en dâwna ka hriat rualin ka hawi sawn leh nghal vat bawk.

"Ka va kal ang e" ti zawi sepin sitting room lamah chuan ka kal phei thuai a, Zaii mawlh chu ka ngei ru ta a ni.

Thingpui leh a hmeh ka sem zawh hnuah pawh chokaah ka awm rei peih ta lo va, inei puar châkna reng ka nei tawh rih lo a ni e. Kan nupa room-ah ka chho ta daih a, eina leh inna seng fel hun áwm velah erawh chhuk ka tum tho. Thil ka ngaihtuah ngut ngut laiin kan room kawngka a rawn inhawng ri khep a, u Maṭhuama a nih hlau ru zetin ka hawi thuai a, Zaii a lo ni hlauh e!

"U Maṭhuama hriat chu i va'n hlau áwm em em Sylvia?" a tih chuan ka melh deuh hrep a, ka ṭhian ṭha ber mah ni se tun ṭum chu ka ngei ve thlawt a ni.

"Pâwn aṭanga in lo luh hma khan i hrilh tak tak em? Nge engmah i la sawi lo?" ka aw chu ka tikhauh lui ve ngat a, engah mah min la ngai lo zui.

"Hrilh tak tak e le" ngaihsam zet hian a rawn ti a nih chu!

"Hlauthawng viau lo teh Sylvia" tiin a ding hluai a, kei pawh ka ding ve nghal.

"Nang pawh ni la i hlauthawng ve khawp ang, kan la inhre chiang lo dun ropui bawk si, inhre chiang tal ila chuan a thinrim dâwn leh dâwn loh nen lam ka hre vek tawh zâwk ang chu maw le, a thu hrimah engati nge i lo hrilh tak tak a?" ka ti mawlh mawlh a, room aṭanga chhuah a tum chu ka pawt ding vat bawk.

"Hlauthawng duh suh ka tih khâ Sylvia, u Maṭhuama te zawng a kâ pawh zen la a seh lo ang che, mahse a thinrim erawh kaih thawh tawh vek vek chuan nâ tak a ni. Tuna i hlauhthawnna hi chu a nep lutuk, engtin mah a tih che ring lo tawp rawh. Min chelh ding ta sa sa, a zei nge zei lo min hrilh tawh teh?" a rawn ti nghal zawt zawt a, keimah zâwkin room aṭang chuan ka nam chhuak thuai thuai leh lawi a, a nui nasa ngáng mai.

Keimah chauha ka awm hnu chuan tlêmin ka rilru a nuam ta deuh a, Zaii thu sawi zawng zawng kha dik tak tak se ka ti a ni. Chhuk hun nia ka hriat áwm velah in hnuai chhuk turin room aṭang chuan ka chhuak a, mahse u Maṭhuama nen kan intâwk ta chat mai. Room chhunga lut leh lawk tura min duh ni awm hrim hian min thlek khum zauh a, min kal pelh rual chuan ka zui ve nghal mai bawk. Room chhung kan lut chu hmun zim têa awm dun ang maiin ka inngai, ka zám ru er er leh tlat tawh; kan nupa room a zau ṭhat tehreng nen!

"Kan chhuak hma deuh dâwn a nia" a pheikhawk hlip pah hian a rawn ti a, a thu sawi tum ka hrethiam ve nghal mai bawk.

"Khawi vêngah nge kan ei dâwn a?" ka tih chuan

"Mission vêngah, i nute pawh kan tlawh kawi dâwn a nia, i duh chuan i pute pawh kan tlawh hman ka ring" min chhan dan chu a ngaih ṭhat thlak khawp mai.

"Nia, a remchang viau tak ang. Nichin khan khaw'nge i kal a?" zawhna bawkin a tawp ka khar leh a, a pa lian roh si a, a che hrim hrim chu en reng tham lawih a ni.

"Ka chhuak lawk" a tih chuan zawh zawm zel chî a ni lo tih leh ka hriat ve kher ṭul a ti lo tih ka hre chawpchilh zui nghal.

"Ka chhuk mai aw, tihfel tur a awm ka ring" tia kal sawn ka tum lai chuan

"Engati nge i inhnawh puar loh?" a rawn ti a, ka ding deuh chawt a, chhan dan tur ka hre mai rih lo zui.

"I ril a ṭam lo nge thil dang vang zâwk?" wardrobe lam pan paha a tih leh chuan ka aw ka thian kharh a, ka inei puar loh chhan dik tak chu hrilh chî a ni lovin ka hria.

"Tukṭhuan kha ka ei hnem ang reng a, ka la puar deuh maw le" ka aw aṭang chuan dawt ka sawi tih a hriat loh hram ka beisei.

"I lo kal ve duh em?" a ti daih a, a zawhna chu hrethiam lo tak ka ni!

"Khawiah?" en reng chunga ka tih chuan

"Ka bulah" a ti tawi fel át a, min chhan dan chu ka duhthu a sam chiah lo a ni.

"Ka lo kal lo mai ang" ka ti ta nge nge a, kan kalna hmun tur tak pawh ka hre si lo va, ka tân kal ve ngawt thu a awm lo.

"I duh chuan i lo kal ve thei ang, ka rei ka ring lo" tih leh din a rual nghal a, a chhuah hmasak zâwk ang lo takin thawmhnaw a ha a ho ang reng viau a, léng mai mai tur emaw thil ti mai mai tur a nih ka ring ve ta ringawt.

"Tihtur a awm palh ang, chu bakah lo lén daih kha a mawi lo ve a, ka kal dâwn lo ni mai rawh se" ka tih chuan a dar a chhin ák a, room aṭangin a chhuak zui nghal bawk.

A chhuah hnu lawkah room aṭangin ka chhuak a, in hnuai ka thlen thlak chuan tûmah an lo awm lo va; ka nu leh pate pahnih tak ngial pawh! Thil sil tur a awm ringin chokaah ka lut a, a lo insil fai thlap a, a inrem fel thlap bawk. Zaii ka phone ta ringawt a, ani lah chuan dawhkanah phone a hnutchhiah leh ta nghal a, mahni chauha awm chu nuam lo ka ti ru hnuhnawh khawp mai. In chhung a zau ṭha si, kei lo pakhat tal awm se chuan a zia deuh ang maw le. A reh ṭhiap a, thawm hriat theih awmchhun chu thli thaw ri a ni mai. Kan nupa room-a chhoh ka tum lai takin motor ding thawm ka hria a, rei lo tê hnuah u Maṭhuama hmel ngei ka hmu nghal bawk.

"Lo kal rawh le" dam zet hian a ti sup a, ka kutah a chelh zawm zat a, kawngkapui lamah min kai phei a, a chet dan teh thut chu ka hrethiam leh ta hauh lo.

"Khaw'nge kan kal dâwn?" motor chhunga kan awm hnu chuan ka ti a, ka phone a rawn ri ral ral a, number lawng aṭangin a ni a, a chhana pawh nghak lovin ka pick up leh ta zâwk.

"Awi Sylvia, u Maṭhuama nen in chhuak dâwn emaw kan ti char char a, tihpalh lutuk aw, naupang hruai turin kan kal a, mahse ka nute kha chu ṭhenawmte inah khan an kal zawkin ka hria" rawn ti mawlh mawlhtu chu a aw aṭangin u Hlimi a ni tih ka hre nghal mai.

"A pawi lo, a ho lutuk" ka tih laklawh lai chuan

"U Maṭhuaman min rawn be lo se chu a bulah i kal ve emaw kan ti vek alawm, a lungawi lo tlatin ka hria Sylvia. Inah khan a lo haw leh mai thei, min lo hrilhfiahsak mai aw" a lo ti leh zung zung a, ka laka an inthiam lo viau tur chu nuam ka ti bik miah lo.

"Aw le aw le, min ngaihtuah suh u, kan awm dun tawh alawm" ka chuanpui pa lam hawi zeuhin ka ti a, hma lam a lo en ding ngar ngar khawp mai.

"Awi, a ṭhat hlauh chu! Ka dah mai aw Sylvia, naupang an lo chhuak dâwn chiah" tih leh kan inbiakna hmeh tawp a rual a, motor chhungah chuan thawm dang a awm lo zui nghal vang vang bawk.

U Hlimi thil sawi ka ngaihbel vang nge pawh ka hre lo, u Maṭhuama hmel chu lungawi lo a ang khawp mai. A ngawi run a, a rilru zawng zawng a motor khalhah a pe tih hriat tak hian hma lam a en ding hle bawk. Ka aw ka thian ri kharh a, min rawn en thut hlau ang hrimin a lam ka hawi leh a, ani erawh a awm ngaiin a la awm reng thung.

"Eng lo" ti sepin ka chawl dat a, ka aw ka then leh tê tê hnu chuan

"Lungawi lo kher lo la, keimahin ka awm dâwn tih an hre lo palh alawm, keimah chiahin awm ta pawh ni ila pawi ka ti lo hrim hrim" ka tih zawm zat a, ka lam rawn hawi chuang lo hian

"Keiin pawi ka ti alawm" a ti bul hmuk a, a hmel leh a aw aṭang chuan ka mo puite lakah a lungawi lo tih hai rual a ni ta lo.

"A ho lutuk" ka ti sep a, a ngawi mai mai tawh dâwn emaw ka tih laiin

"Ho lo" a rawn ti leh nghut a, ka sawi zawm zel duh ta bik lo, keimah chauha ka awm chu a phal lo ve hle a ni ang.

In pakhat kawtah kan ding a, motor aṭanga a chhuah rualin ka chhuak ve nghal a, tute in nge tih pawh ka hre lo. Ka hma maia inah chuan min luhpui a, a ṭhiante ngei an lo ni e. A ṭhianpa leh a nupui fanau te an lo ni hlawm a, a ṭhianpa nupui chuan min be nghal sawk sawk a, a ṭawng duh par par bawk si a, ka nuih a tiza ang reng. A hnu lawkah naktuka kan zanriah eina hmun tur a ni tih ka hre ta nge nge a, u Maṭhuama zâwk chu a ni; mi hrilh ṭhat ve hle hle mai àwm! A sawi lâwk ang ngeiin kan awm rei hran lo va, darkar khat pawh kan awm tling lo vang ka ring. Kan haw lam erawh kal lam ai chuan tlêmin boruak pawh a zia ta deuh a, ka biakna a chhang ṭha duh phian bawk.

"Zanin tlaia kan chaw eina hmun tur hi chu i nel nghal mai ka ring, ka kal lâwk pui lo ta law law mai che" kan nupa room-ah kan awm dun leh daih tawh a, in kan thlenna erawh a la rei lutuk lo.

"Tu ber kha nge le?" zawhna zawh ka tum pawh a ni chiah lo, chhan loh aiah tiin ka ṭawng ve mai mai a ni.

"Fiam peih deuh che kha a ni mai, a hmel hmu la chuan i hre nghal ang" a rawn ti a, a ṭhianteho lo lén ṭum kha ka ngaihtuah lét a, a sawi pa chu ka hre thànin ka hria.

"Pa tê ve deuh kha a ni em? Kha, ṭawng duh ve deuh kha!?" ka tih chuan a lo bu nghat a, a bula awm kha a nawm hmel phian, an ṭhianho zingah pawh fiamthu thawh peih ber a nih kha maw lé.

"Khumah hian lo awm ve teh, Sakeibaknei ka ni bik lo a nia" min biak dan avang chuan za lo zet hian ka nui ringawt a, mi a thlek khum leh zauh a, ngawi rengin ka phei ve ta nge nge.

"Ṭhuampui vêng ka lo nih duh hmel viau a ni maw?" a rawn ti ta mai, a hmel en tuma ka chet rualin a âwm titih deuh; a dar ni tho bawk si ah chuan min kuah bet a, kei ai ṭuan rang zâwk miau hek!

"Eng lo, kha te chu hmána mi tawh alawm, ka rilru dik tak pawh a ni lo" ka ti nawk nawk a, ka ṭawngkam chhuak hrim hrim chu nawi tak a ni.

"Ka hming hi a ṭhing viau em ni?" a rawn ti leh a, chhan dan tur ka va han baihvai tehreng êm.

"Ṭhing bik kher náng, mahse eng lo, a dangdai" tiin ka inngaihtuah fê hnu chuan ka chhang ve ta chauh a, engtin tak ngai ang maw!

Ka khabe chu a chawi a, kan inen chiang ta khawp mai. Ka mita min en hnu chuan ka hmui lamah a ṭuan a, rawn kun hniamin min fawp zui nghal bawk. Ka hmui a fawhna ata a inlâk hran deuh hlek rualin awm sawn ka tum nghal a, mahse min la chelh bet tlat thung. Che thutin ka taksa chungah a rawn bawk zui nghal a, kan mutna khum dup viau lo se chuan min delh nâ lek lek mai thei a ni.

Chiang zet hian min en reng a, kan inmelh hnai ṭha bawk si, a kutzungchala ka biang leh ka bek a zùt riak riak rual chuan nghet zetin ka mit ka chhing zui nghal ta vat. Min delh nâ dâwnin a hria a ni mahna, a awm dan a siam rem a, a bawp pahniha mi kârcheh pah reng hian ka chungah a la bawk run a, fawh erawh kan infawp tawh rih miah lo thung.

"Ei rawng bawl a hun tawh ka ring" ka ti thawp sep a, ka la maimitchhing reng a, ka biang leh bek a zútna te chu tawp tawh mai se ka duh, ka mumal lo dâwn tlat!

"Tunah hian chawhnu dâr 2 pawh a la ri lo, ei rawng bawl a hun tawh i ring chiah maw?" dam ruih hian a ti thum chhal a, awlsam têa mi thunun dan a thiam ka ti dâwn nge a mi tawhna hrim hrim chu ka dawngsawng thiam lo zâwk pawh ka hre tawh lo.

"Meng teh le" zaidam aw taka min be leh chiah chu ka meng lo thei lo, min tinâ dâwn lo tih a hriat ngawih ngawih a ni.

"Honeymoon kan hman zawhah lehkha chu i zir zawm dâwn nia, a ṭha em?" a tih chuan ka bu zeuh a, a hmuiin ka hmui a rawn bawhthuah zui nghal bawk.

Ka hmuia fawp mial mial reng chung hian min lehpui riai riai a, a taksa chhah ṭha tak chungah chuan min bawhtir a, kan hmui chu nghet taka char beh tlat ang vel a ni. Chhan lét loh tum eng ang mah ila ka thei lo, a hmui leh lei hmang chuan a âng chhunga awm hle hle turin min ngen mawlh mawlh ni berin ka hria. Thil tih theihna chak tak nei ang maiin min zém â a, ka tân chuan vai ruai lohna chî a ni lo, harhfim a harsa lutuk tlat!

Hmangaihna tel lo leh induhtawnna tel miah lova innei ni mah ila kan inhiptawn hle tih erawh hai rual a ni lo, ka rin phai baka a tawhna ka dawngsawng ṭha ṭhin te chu ka tân chuan hriatthiam a har a ni. Tin, thil mak ve tak pakhat chu min fawh dâwn te, ka taksa a sik dâwn te leh nupa nun kan hman dâwn te hian nel loh rukna tam tak ka nei ṭhin a, mahse ka taksa a sik tawh hi chuan awihawm loh khawp nasain ka danglam vat ṭhin thung si a ni.

(End of Chapter 9)

SYLVIA ROMAWIZUALI

By

Havali Adam

Chapter 10

"U Maṭhuam" chiangnial lo zet hian ka ti thâm ṭiak a, ka hmai zawnah a thaw sa ham ham a, a thaw rimtui tak chu ka hip lut chiang hle bawk.

"In hnuaia ka chhuk a hun tawhin ka hria" ka ti thawp leh sep a, ka aw chu tuihal dang châr ang mai alawm a nih le.

"Awm sawn la" ka ṭawng zawh rualin ka hmui a rawn khar hnan zui nghal a, min fawh dan chu thil thlum tui lutuk dût ngawt ngawt ang mai a ni.

A inlâk hran hnu chuan ka mit ka chhing vang vang a, thawh thlahlel zet ang khan ka awm vel a, ka tho leh ta chuang bik der lo. A lam chu ka hawi a, min lo en reng a, nupa inhmangaih em em kan ang tak zet! Hawi sawn hmasa zâwkah ṭangin khum aṭang chuan ka chhuk a, mahse ka kal thui hman lo chiang khawp mai. Min kuai her pawp a, ka biang tawn tawna dawmin ka hmui bawk chu a fawp leh ta mawlh mawlh a, a chet dan hmanhmawh ru zet chu a thlak danglam thuai zui nghal bawk. A kut pakhat zâwka ka kawng a chelh chuan awmsam tak hian ka lo eu zawk a, min tinâ dâwn lo tih ka hriat chian lutuk vang nge ni, hlauhna pakhat mah ka nei lo chiang khawp mai.

Ka hmui a fawhna ata a inla hrang chiah chu ka thaw halh halh a, dik tak chuan ka zauthau ru hle a, chu chu a hria ang tih ka hlau ru hle bawk. Thawchham tluk zeta ka thaw lâk a mumal loh lai chuan ka biang leh chal te chu a rawn chul a, a kut pakhat zâwkin min la kuah reng a, ka thawk dan leh ka thin phut dan a la pangngai thei mawlh lo a ni e. Ka sam chu ka benga a zeh loh leh a hui sawn a, ka kalsan hlau ang mai hian min fawp leh vawng vawng ṭhin bawk. A tawpah erawh ka awm sawn ve thei ta hram a, ani chu khumah a ṭhu zui nghal daih a, min en run lai chuan room aṭangin ka chhuak ta daih.

Kan nupa room aṭanga ka chhuah rual chuan ka âwm ka dawm nghal vang vang a, ka thin phu dawt dawt avangin ka kut chu a che leh zawk zawk ṭhin a, awlsam taka min thunun tlat ṭhin chu ka hrethiam thei dâwn rih lo a nih ka ring ber tawh. In hnuaiah ka chhuk thla ta nge nge a, ka mo puite'n min lo be siam siam nghal a, Zaii pawh a ṭawng duh leh ta khawp mai. Ka nu leh pate hmel pawh ka hmu leh tawh a, naupang nen lam, an lo haw kim vek tawh a nih ka ring. U Maṭhuama naute erawh sawrkar hnathawk vek an nih avangin an lo la haw lo hlawm a, a lo haw hi chuan tlai a ni fel vek tawh ṭhin. Chokaa hmeichhiaho kan titi lai chuan u Maṭhuama a lo lang hlawl a, min rawn en chat leh nghal.

"Han intifai ve la, kan kal a hun ṭep" min en chung hian a ti dam dap a, a inbual zo chiah a ni ngei ang, a rim fai ser sawr chuan ka hnar a verh khawp mai.

"Thingpui i induh em u Maṭhuam?" ka chhan hmaa lo titu chu u Siami a ni a, an boruak a la fuh tehchiam lo bawk nen a tlawn ni berin ka hria.

"Duh lo" pakhat lah chuan a lo ti ve mai a, mi dang en lovin keimah ngawr ngawr min la en reng a, awm dan tur min tihre lo zo vek!

"Han chho la" a tih leh chuan mi dang mitmei pawh ka vêng buai duh tawh ta bik lo law law.

Keimah chauhin ka chho dâwn emaw ka ti a, min lo zui ve zel a, ka mei a ni ringawt alawm le. Hak thlak tur nen bathroom chhungah ka lut a, ka intihfai chhung zawng chuan ngawi reng hian kan nupa khumah a lo ṭhu a, bathroom aṭanga ka chhuah hnuah erawh keimahah bawk a mit a fu leh ta chat mai. Ka inbuaipui mawlh mawlh a, kan ngawi dun reng a, min biak loh hi chuan sawi tur ka hre mai bik lo ṭhin.

Ka hman ta maw tihah a rawn tho chhuak a, ka kutah a vuan chat a, room aṭang chuan min kal chhuahpui zui nghal bawk. Mi dang hmuha ka kut a vuan tlat e, a thlah duh miah lo te chu mak ka ti ru viau a, han zawt ngawt dâwn ila min chhan ṭhat duh ka ring leh chuang bawk si lo, a chang hi chuan a mizia hi a mak a ni. Ṭawng peih lo ang maia ngawih tlat a ching a, a chang leh a aw ri hriat a nuam leh em em lawi a, min ngaihtuah viau angin a lang leh ṭhin bawk a, hun a'n vei ang a, ka la hrethiam chho ve zel mahna le.

Tlai dâr 3 pelh hretah in kan chhuahsan a, Mission vêng lam panin kan tlan zel a, kan inbe leh ta miah lo bawk. Hmeichhia zâwk tih takah ka ngaihtuahna a kal kual nasa hle a, nupa ni ve si inbe mang lova kan awm tlawng ṭhin chu dikin ka hre thei lo a ni. Titi vawrh tumin thil chi hrang hrang sawi tur ka dap kual a, ka be hmasa ta nge nge a, a tir lamah mi chhang tawi deuh hmûk hmuk mah se ka biak reng tâkah chuan a aw pawh a pangngai sâwt khawp mai.

Ka zirna lam min sawipui ta hial a, ka phur nghal em em a, a lakah ka làwm rilru nghal viau bawk. Kan inneih hma khan rem min tihsak tawh ngei a, thu sawi sut leh mai mai chî mipa ni lo hram se ka ti, chutiang mi chu a niin ka hre lo hrim hrim bawk. Mipa puitling a ni a, a naupang chhe zawk zawk tawh lo tih pawh a awm dan, a hawiher leh a ṭawngkam hman danah hai theih a ni lo va, ka tâna innghahna tlak ni lul teh se!

A rilruk dan chuan Paris-a Honeymoon min hmanpui a lo tum reng hi a ni a, Mizoram pâwn mai ni lo India ram pâwn daih daiha min kalpui a tum chu ka awih lo ru viau a, mahse amah berin a sawi miau si a, awih vak lo chungin ka awihsak ve ta ringawt. A ni em em lo ve bawk alawm, Paris daih daiha Honeymoon zu hman thu a awm lo.

Honeymoon lam chu a sawi chhunzawm ta miah lo va, a sawi ve mai maiah ka ngaihsak hmiah bawk. Zawhna ka zawh zel avangin min chhang lo bik chuang lo va, kan vêng kawnga kan tlan lai te chuan ka rilruah sawi tur chi hrang hrang a lo lut zut zut a, sawi tur neih miah loh ai chuan pawi ka ti lo fê zâwk a ni. Mission vêng chin tlan pelin Khatla East lamah kan tlan tlang ta daih a, mak ka ti ru ang reng.

"Mission vêngah a ni lo'm ni kan ei dâwn?" ka tih phah ta nge nge a, ani lah chuan motor khalh reng chung hian

"Ka sawi sual palh a nih kha, Khatla East-ah an lo insawn tawh tak alawm, tun lai chu thil dangin ka rilru a luah hneh lutuk a, ka ngaihtuahna ka hmang ṭha thei meuh lo" a lo ti ve mai a, min en lo hrim hrim bawk.

"A nih chû" tih bakin ka chhang lo va, titi vawrh pawh ka tum tawh bik lo, kan thlen hnaih hmel tawh êm mai.

Minute tam pawh tlan tawh lovin dawr bula in pakhat zawnah kan ding a, a chhuak zui nghal a, a kal vung pawk pawk bawk a, motor kawngka hawn ka tum chu min lo hawnsak hman der a nih chu! In kawngka hmaa kan din rualin door bell a hmet ri ral ral a, a ṭhianpa hmel ngei chu kan hmu ta. A lo nui var var a, pa fiamthu duh tih takah min lo fiam nghal bawrh bawrh a, a nupui zâwkin choka lam aṭangin a rawn khap hial ṭhin. A nupui nen chuan ei rawng kan bâwl dun ta daih a, hun kal tawha u Maṭhuama te nen an awm ṭhin dan chanchin min hrilh luam a, nuihna tur a tam mai bakah nuih insum tho a ngai bawk si, nui reng ang vel ka ni.

"In va hlim áwm ve a?" rawn titu chu a hmel hmu kher lo mah ila tu nge a nih ka hre chiang ve tawh lutuk tlat!

"Hlim ang chu maw le, kan pa'n min rawn ruk a tum zana i chet chhiatna kha ka lo hrilh a, mahse Sylvia-i hi chu a nui ṭha duh vak lo, a hlau che a ni ang" tiin u Maṭhuama ṭhianpa nupui chu hlim zet hian a nui zui har har a, kei pawh za lutuk lovin ka nui ve sek ringawt.

"Chu, min lo rêl a ni maw?" u Maṭhuama chuan min en deuh kher a, ka va han lái ru mai mai tak!

"Awi, khatiang khan awm vel lo teh Maṭhuam, nangmah i ang lo, nge nupui i neih tâk avang hian i inlá lungrun deuh sawt em ni? Vel che hian âw, keimah zâwk hi ka lo zak e a!" a ṭhianpa nuipui bawk chuan a lo ti leh bawrh bawrh a, ka nui chhuak ve ta tawp.

"I sawi ai reng reng a!" tiin u Maṭhuama chuan ka bianga rawn fawh a rual nghal a, phu uih hian ka dar ka lo chhin zawk a, chutiang teh thutin a che dâwn tih hre lâwk bik hek lo.

"Awi, i nghal vel ê, nangmah i ang thlawt lo Vanlalṭhuam, nangpui roh hi i lo inzêp ru reng a nih dâwn hi le! Ni lo se chuan Sylvia-i te ang nula hmelṭha leh vun nalh lutuk hmeichhia hi i chhai thlu thei tawp náng, i hmel aṭang khan ka sawi dik tih ka hre thei" u Maṭhuama ṭhianpa nupui thu sawi chuan min tinui tawp chiang kher mai.

"I sawi ho ṭan tlat" ti supin u Maṭhuama pawh a awm ṭha ta hle hle a, kan inneih dan dik tak leh min chhai thluk lohzia a ngaihtuah chhuak ve tho a nih ka ring.

Rei lo tê hnuah chhungkawpa ber pawh choka lamah a rawn lut a, puitlingho chuan ei rawng kan bâwl ho ta ringawt bawk. U Maṭhuama chu ka chetna lamah hlir a awm a, puih ka ngaihna áwmah min pui zel a, a ṭhianpa chhaih fiamna pawh engah mah a ngai lo. A awm ngaiin a awm reng a, a changin a nui leh suk ṭhin a, a va nui tam lo ve chiang tak! Kei erawh ka nui leh sen sen ṭhin a, fiamthu an duh nupa ve êm bawk a tin ni!

Tlai dâr 4 leh a chanve velah ei rawng kan bâwl fel titih a, mipa pahnih chu khawiah emaw an inzui chhuak leh daih tawh zâwk a, hmeichhe pahnih erawh naupang nen inah kan awm mai mai thung. Dâr 5 leh a chanve pelhah zanriah kan kil ta nge nge a, chawhmeh rim aṭang ringawt paw'n ka ei tui dâwn tih ka chiang a ni. U Maṭhuama ṭhianpa nupui chu chawhmeh a siam thiam ka ti ru viau bawk, a bikin thlai hnah lam a ngaina ve tho a nih hmel.

"Fa neih hma in duh chuan a helin zo artui i hip ni tin zan tin ang a, a dik vek a ni mai" u Maṭhuama ṭhianpa chuan a ti lung lûng a, an titi a kal tluang bawk a, an thu sawi awmzia hrethiam em em chuang lovin ka lo nui ve leh ringawt ṭhin.

"Kha lam kha chu duh tâwk teh ṭhiana" nui suk paha u Maṭhuama biakna chu engah mah a ngai lo nasa mai.

"Fa neih thuai thuai i duh dâwn tih ka hre reng alawm, kan ṭhianho zingah nangmah chiahin fa i la nei lo a nia, rual i awt dâwn hrim hrim" a ṭhianpa chu a nui zui var var a, a nupui chuan nui ri hak chung hian

"Sawi tawh lo teh, hei Sylvia-i pawh a awm ve reng hi, a zak palh ang e" tiin a lo khap ve nghal bawk a, a pasal erawh a nuih a la za em em thung.

"Maṭhuama rilru te zawng ka hre chiang thawkhat ve êm mai, kum kha leh chen kha kan lo tlangval dun ve tawh alawm le. A ngawih run ang hi a ni dâwn lo, fa neih thuai a duh dâwn chiang sa" a rawn ti leh hram a, u Maṭhuama lam ka hawi chuan chaw a lo bâr mial mial a, a ṭhianpa thu sawi chu hre lo ang mai a ni.

"Ei ṭeuh rawh aw Sylvia, i lo inthlahrung reu reu ang e" ka ei tam loh hlau zet hian an nu zâwk chuan a lo ti ve leh nghal a, nui sen sena buk khum nghat nghatin chaw chu ka bâr a, ka chawi a tui tak zet bawk.

Chaw ei kham aṭanga darkar khat liam hnu awm velah kan haw a, mahse kan haw tlang lo thung. Kan inah kan pêng kawi a, ka nuhrawn leh Chhani chu an lo awm ngei a, fel hliau hliau tak an ni. Ka beisei loh deuhin min be nasa em em a, mak ka ti ru lutuk chu chhan nachang pawh ka hre lawk lo ṭhin nghe nghe.

Kan awm rei em em lo va, ka pite in lamah kan inkhalh chhuak zui leh nghal a, ka pite inah erawh kan awm rei ang reng viau thung. Dâr 9 leh a chanve thleng kan lêng a, nuam ka ti khawp mai. Ka pi nen pawh thil chi hrang hrang kan sawi dun ṭeuh a, mipa pahnih an inkawm hrang bawk a, a tirah kha chuan innêl lo viau tur khan ka ngai ṭhin a, mahse a lo ni teuh lo.

In kan thlen aṭanga rei lo tê hnuah mut zai kan rêl zui nghal a, mi dang pawh an mu har lo hlawm khawp mai. Mut hma ka inphih fai leh zuaih a, u Maṭhuama erawh khumah a awm run tawh thung a, sawi tur a vâng leh tawh khawp mai. Khuma ka mut rualin ka hnung lam aṭang min rawn kuah nghal a, ka lo ip deuh chawih a, dik tak chuan ka la nêl em em hlei thei tlat lo a ni.

Min tinâ dâwn lo tih hi chu ka hre chiang tawh a, nêl taka awm pawp pawp ka châk ve tho, a theih ngawt bawk si loh! Ka dul zawnah a kut a tiche neuh neuh a, ka mut lah chu a chhuak der lo leh nghal. A hmuia ka biang a núl thuak thuak rual chuan ka mit ka lo chhing vang vang a, a rilru tur awm ang leh kan thil tih dun tur chu ka hre chiang ta viauin ka hria.

"Tun kâr chho hi ral se, kan zin dâwn nia" ti supin a thil tih lai chu a chawl chuang der lo va, ka mur leh sung sung ṭan der tawh.

"Khawiah?" tih chiahin ka chhang a, ka aw chhuak pawh a mumal lo leh ta hle bawk.

"Paris-ah" a ti thum chhal a, chu chuan tlêmin min tiharhfim zui nghal.

"I ti tak tak elo?" ka tih chuan

"Ti tak tak e" tih leh amah en tura min kawih her a rual a, chil ka lem khawlh a, rei pawh kan inen lo, kan hmui a inbawhthuah leh ta nge nge.

Nupa nun hmanga vanram tla fual kan chen dun hnu chuan kan thaw hle hle a, ruak ngal ngatin kan awm a, a hun laia zah hre miah loh kha engkim a nih tur ang a nih vek tawh hnuah erawh ka zak hnuhnawh leh lawi a, a hun lai kha chuan ka insum hman lo hial ṭhin. Nawmna vawrtawp min tawnpui lai te khan thawm chhuahin ka si hliam hliam zâwk kha a ni a, a mi tawhna te, ka taksa a sawngbawl dan hrim hrim kha ka tân chuan thawm chhuah loh theih lohna vek a ni a, mahse mahni inthiam chawpna te pawh ka nei deuh reuh tho, dik tak chuan tu hmeichhia mahin an dawnsawn thiam bik ka ring lo a ni. Rin phak bak thil vek min tawnpui a, mamawh ngawih ngawiha mi siam a thiam tlat bawk si.

"Mut tui" ti supin ka hmuiah a fawp vang vang a, a awm sawn rual chuan a âwmah nghet em em hian min kuah bet run a, phat rual lovin a taksa sik te, a âng chhunga awm te chu nuam ka ti hliah hliah a ni.

Maimitchhingin suangtuahna ramah ka cheng veng veng a, u Maṭhuama chuan fa neih thuai thuai a duh ang tih ka hlau ru khawp mai. Nupa kan nih tawh miau avangin nupa nun hman loh ringawt a theih dâwn der si lo va, ka rai a nih vaih chuan zirna chhunzawm thei lo tur tlukah ka inngai hmiah, mahse amah berin rem a ti vek tawh a, ka duh dan tak chuan zir zawm thuai thuai ila ka ti tawh a ni. Honeymoon kan la hmang dun tê tê phawt dâwn leh ta nghal a, chutah Paris-ah daih a la ni zui. Sum a sêng hnem lutuk ang tih te ka hlau ve a, mahse ka rilrua thil awm nuai nuai chu sawipui chi a ni lo, tun atân chuan a taksa nghenga mut hle hle baka nuam tih ka nei rih lo tlat.

Zingah chuan thawh ka hai tawh bik lo va, thawhsan ka tum laia min vuan tlat te chu ka hre thiam lo dâwn lek lek a, mi hmangaiha min ngaina tak tak a ang leh thut ṭhin. Ka thawhsan tâkah chuan a muhil tawh bik lem chuang hlei lo va, mi en pawh a nghal leh viau e. Ka inphih fai hnu lawkah a rawn tho chhuak ta nge nge a, a inphih fai ve nghal mai a, in hnuai lamah kan chhuk thla dun zui nghal bawk.

Ka mo puite an lo la tho lo hlawm a, ka nu leh ka pa erawh an lo tho tawh thung. Thingpui ka lúm a, ka siam zui nghal a, tunah chuan ka sem lai paw'n ka che sual tawh bik lo, ka fimkhur mah mah zâwk a ni. Ṭhutthleng khatah u Maṭhuama nen kan ṭhu dun a, ka nu leh ka pa pawh an ṭhu dun bawk a, thil chi hrang hrang kan sawi a, min zâwt a, u Maṭhuama pawh a nu leh pate bul a nih vang nge ni, a ṭawng ve lûam mai.

Nupa tuak thar tih takah u Maṭhuama ṭhiante hnen aṭangin chaw eia sawmna kan dawng awl lo va, ka pite sawmna pawh kan la tihlawhtling thei lo. Ka nuhrawnte nufa paw'n min sâwm ve ngei a, a ruk tak chuan ka ei châk lem lo khawp mai. Kâr tluanin zanriah kan ei chhuak ta ziah a, sâwmtu nei miau hek le!

Chaw eia sâwmtu kan nei tam ang reng lutuk chu ka nu leh pa láwmah a tla a, an sawi deuh chhen a, Zaii te inah tak ngial pawh kan la ei lo. Sâwmna nazawng erawh u Maṭhuaman a hnar zel thung a, pawi ka ti miah lo. Kâr khat hnuah chuan ka pite inah chaw kan ei ve thei ta hram a, chumi zawhah Zaii te inah kan ei leh a, a tawp ber atân tiin ka nuhrawn nufa te min sáwmna kan tihlawhtling bawk.

Kan inneih aṭanga kâr hnih a ral hnu chuan u Maṭhuaman Paris-a Honeymoon kan hman dáwn thu tukṭhuan ei laiin a sawi chhuak ta nge nge a, lawmawm viau mah se nuam lo ka ti ru hle thung. A chhan chu pawisa a sêng tlém dâwn lo tih ka chiang a, kei lahin neih mumal ka nei der bawk si lo. Hna nei emaw pawisa thawh chhuahna pangngai tak nei ila chuan pawi ka ti hran lo, sum sén a ngai a nih paw'n ka sêng hreh bik miah lo ang, mahse tunah rih chuan hmeichhe naran ve mai ka ni tlat si a ni.

Ka inthlahrun rukna chhan ber pawh Maṭhuama pawisa kan hmang hek lutuk ang tih ka hlau vang a ni pakhat bawk a, amah lah chuan thutlukna sawh sawn a tum tawh lo ropui bawk si. Mi dang hriata a sawi chhuah hmain hmun danga kal ka rawt hman nghe nghe kha a ni a, a bikin India ram chhungah, mahse ka thu sawi engah mah a ngai duh lo tlat thung. Chutah ka rilru a la hre chiang em em zui a, pawisa ka ui tih nen lam a hre vek a nih chu!

Kan chhungte chuan phal takin u Maṭhuama thutlukna chu an thlâwp a, ngaihngam taka hun hmang turin min ti zui luam nghe nghe bawk. Kâr thum vel châm tura ruahmanna siam a ni a, engkim chu u Maṭhuaman a buaipui vek a, ngaih a tiṭha khawp mai. Zaiin Paris-ah Honeymoon kan hmang dâwn tih a hre chiah chu u Maṭhuama hnenah kal ve a dil nghal a, kan zavaiin kan nui dar dar a, Zaii lah a uang peih bawk si, u Maṭhuama tak ngial pawh a nui tawp ringawt. Kawr hawnsak turin min chah ṭeuh a, u Maṭhuaman a phal loh thu a lo sawi hluk thung a, innél ta reng reng kha an ni a, hre chiang lo tu tân chuan inhal te pawh an ang mah zâwk a ni.

Hun a thâwl ta ver vawr bawk a, Honeymoon hmang turin u Maṭhuama nen chuan Mizoram kan thlawh chhuahsan ta nge nge a, Mizoram pâwn ringawt pawh hmuhnawm ka tih tehreng nen India ram pâwnah daih hun kan hmang dun dâwn chu a ni si a, inthlahrung deuh tho mah ila ka phur ru em em tho. U Maṭhuama chuan a ngai tê bawkin engkim a buaipui leh vek a, thil tihfel ngai chi hrang hrang kan tihfel hnuah leh Hotel-a zan khat kan riah hnuah India ram kan thlawh chhuahsan ve thei ta chauh a, Mizoram ai chuan tlémin ka tangkhang rei deuh hret chu a ni.

Paris khawpui lam pana hun kan hmang chu thlawhnaah kan chuang tlawk tlawk a ni ber a, a chang leh a dar nghengin ka muhil a, a chang leh kan muhil ve ve a, a changin a harh hmasa zâwkah ka ṭang a, a tawpa tawpah chuan 'Sap ram' tia kan lo ngaihruat leh mitthla fô ṭhin ram chu mit ngeiin ka hmu ta, a ropui dan chu ka sawi thiam lo hial zâwk a ni.

Mizoram ang lo takin a zâwl zau em em a, mita hmuh theih chin chu 'a zâwl phei vek' ti ila a sual lo khawp ang. Chu hmun chu Paris a ni tawh emaw ka ti a, mahse a lo la ni awzâwng lo. Paris khawpui lam pan nghal mai lovin Hotel-ah zan khat kan riak leh phawt a, khum khatah mu dun ṭhin mah ila nupa nun erawh kan hmang tawh rih miah lo, kan chau ve ve a ni mahna.

Thlawhna bawkin France ram kan pan leh ta hna hnâ a, mahse India ram kan chhuahsan lai ang em emin kan chuang rei tawh lo. France ram kan lut chiah chu ropui ka'n ti leh khawp a, France ram chhunga khawpui ber Paris lam kan pan ding nghal chat a, darkar tam a liam hmain kan Honeymoon hmanna hmun tur ngei chu kan thleng a, a engah mah hmain nuam ka ti dâwn tih ka hre chiang nghal em em bawk.

Hotel changkang zet leh chhawng sang zetah kan innghat a, Hotel-a hna thawk zawng zawngte chuan English ṭawng an lo thiam vek miah lo va, mak ka ti ngei mai. Ram ropui leh khawvel ram zingah pawh a langsar pâwl an nih avangin English an thiam fur ka ring zâwk kha a ni a, mahse a lo ni miah lo. Thiam a lawi an awm lo zâwk, a thiam awmchhun chu tlém tê an ni mai.

Ka awm dan leh ka hmel aṭangin u Maṭhuama chuan ka rilru a rawn hria a ni mahna, min hrilhfiah mawlh mawlh a, ram intodelh leh ram changkang apiangin anmahni ṭawng an tihbawrhbang loh ṭhinzia te, ṭawng dang aia an hnam ṭawng ngei hman an intihhmuh tlat zâwk ṭhin thu te leh thil dang tam tak; ka la hriat ngai loh thlengin min hrilh a, zirlai naupang ang mai hian ka lo ngaithla dauh dauh a, a sawi ngaihthlak nawm thiam ve êm a ni.

Min hmuh hniam phah sawt lo turah ka ngai a, chutiang mi chu a ni lovin ka hria. Tin, ani anga lehkha zir sâng ka nih loh avangin thil hriat loh ka ngah a, chu chuan lehkha zira inchhiar zau min tiphur zual hle bawk. Kan thlenna Hotel-a thawkte zingah chuan English ṭawng hmang thei leh hrethiam tlém tê an awm a, engkimah u Maṭhuama ka ring vek a, amahah ka innghat tawp a, beisei a pha vet vet khawp mai.

"Zanin chu kein tei chhuak ang hmiang?" bathroom aṭanga a lo chhuah rual chuan a rawn ti a, kei erawh ka intifai vek tawh thung a, khawl hmangin ka sam ka tiro mêk bawk.

"Aw le, mahse chumi hma chu thil ei phawt ila, ka ril a ṭam ru reng tawh" ka tih chuan

"Ni dâwn tak, ka lo theihnghilh daih alawm le, in hnuaia ei thlak nge kan room-a ei i duh?" a lo ti nghal thuai thuai a, ka rilṭam thu ka lo sawi ta kher kher a, nuam lo ka ti hnuhnawh leh ang reng.

"Room-a ei ka duh daih zâwk" ka ti pangngai ve leh mai a, khum bula phone chu lá kangin a bengah a chuktuah zawm zat a, English ṭawngin ei tur kan room-a dah turin a order zui nghal bawk.

Khawla ka sam ka chhem rotir lai chuan a towel ven lai a pawt phelh a, ka bul lawkah a ding bawk si, ka en ṭha ngam teuh lo. Ngawi reng hian Boxer chu a inthawlh a, ka mit sirin ka hmu ru reng a, zak miah lova a awm pawp pawp chu ka hrilhhai lek lek dâwn alawm le. Tawnzau vâr leh Boxer chauh inbelin khumah a ṭhu a, phone a khawih zawm nghal a, kan inbe leh ta miah lo.

Rei lo tê hnuah pâwn lam aṭangin kan room kawngka chu a rawn inhmet ri ral ral a, u Maṭhuaman a va ngaihven a, hnathawk tih hriat taka uniform ha hian ei tur a rawn nawr lut a, Mizo chaw leh chawhmeh vel ni lo mah se a ang hlawm khawp mai, thlai hnah a tam em em bawk.

"I chau em?" min en chuang lova a tih sup chuan

"Chau lo ve, nuam ka ti viau tawh zâwk" tiin ka lo chhang nghal a, tawi tê hian a kiai suk a, zep lo chuan a nui hmel chu ngainatawm ka ti ru tawh tak zet.

"Ei ila" a rawn ti leh a, khawmuang buai vel tawh lovin ei tur awmna lamah ka phei a, kan ei zui nghal chu a ni mai.

"Mizo chawhmeh a va'n ang hlawm reuh em em" thil ei mial mial paha ka tih chuan min lo nuih suk a, ka be hran lo va, ani paw'n min chhang bik chuang lo.

Kan inei puar hnu chuan hahdam zetin tukverh darthlalang hlai pui bulah ka ding ngawi reng a, ka hnung lam aṭanga min lo kuahtu an awm tih ka hriat rualin u Maṭhuama a ni tih ka hre nghal bawk. Kan hma maiah chuan Eiffel Tower a ding ruah a, a ban leh a ngul chho vel chu a êng chhuak vek a, mawi tak a ni.

Kan awmna Hotel aṭang chuan hnai tak a ni hran lo, mahse a len thawkhat ém avangin a hmuh chian theih a, a lang hnai mai mai a ni. Ka hmu ang tih pawh ka suangtuah ngai loh chu ka mit ngeiin ka hmu a, ka kal theih pawh ka rin ngai lohna hmun Paris khawpuiah ka awm reng tawh chu a ni si a, eng dang vang a ni lo, u Maṭhuama zâr ka zo hliah hliah a ni e.

"Naktukah hnai zâwkin kan va en dâwn a nia" ka kokia khabe nghat hian a rawn ti thum dam dap a, a bán pahnih chuan ka dulah a kuah run bawk.

"Ka rin phak bakin a mawi, engtin nge saw ti ang sawn an siam thiam zâwk le, a ropui thlâwt a ni" ka tih mawlh mawlh lai chuan a hmuiin ka biang a núl thuak thuak a, a tawpah erawh min fawp ta nge nge.

"Insiam ang, nuam i tih ngei ka ring" tih leh min kuahna ata inlâk hran a rual nghal a, thawmhnaw bâwm lam panin ka kal a, a inha zui ta mial mial.

Tshirt a hak dâwn chuan a mitmengin min rawn râwn thlap a, a nghawng nei chî a phawrh tawh chu ka khungsak leh a, a nghawng V ngei mai ha se ka duh zâwk tlat a ni. Ka thu a awih ve mai bawk a, Tshirt hnuaiah tawnzau vâr a hâk hnan a, a taksa hrim hrim chu a dik vel vek a, eng kawr pawh ha se inhmeh loh a neih ka ring lo rum rum a ni.

Kekawr bul vut rawng a ha leh a, pheikhawk pum rawng pawl a bun bawk a, ka inbum thei tawh lo, a hmelṭha chiang a ni. Engtik lai aṭang khan nge hmelṭha ka tiha ka ngainat ruk em em ka hre lo, mahse tunah chuan hai rual lovin hmelṭha ka ti a, ka ngaina tawh bawk a, duhna leh hmangaihna erawh ka rilruah a them paw'n a la awm lo hrim hrim thung.

Kein kan tei kual dun mai mai a, ka kutah a chelh reng a, chu chuan ka thla a timuang ru viau bawk. Mi veivâk an lo awm ve nual a, a phone aṭangin u Maṭhuama chuan eng thil emaw ni hi a en a, kan kalna lam tur ni berin ka hria. Thlai rah leh thlai hnah, sa leh thei chenin, ei tur chi hrang hrang zawrhna hmun pakhatah min kalpui a, zan mah ni se mihring an lo tam khawp mai.

Keini paw'n thei rah kan lei a, Grape leh Apple kan lei a, kawnga kal pahin Apple zâwk chu kan ei dun nghe nghe. Phone bih leh zawk ṭhinin min kal kualpui zel a, kawtthler pakhata ei tur leh in tur zawrhna dawhkan tê ah min chawlhpui leh a, hnathawk pakhat hian in tur an rawn chhawp nghal a, Nimbu tui a lo la ni zui, an siam dan lah chu tui tak a ni.

Hmeichhia zâwk tih takah ka awm mai mai thei leh ta lo, ka phone ka phawrh chhen a, thla ka lá deuh chhen a, a phone ka hmu chiang chiah chu ka phone létin a lo nei ṭha daih zâwk a nih chu! Ngampa taka chhuhsakin a phone hlirin thla ka lá zui nghal mawlh mawlh a, a phone a ni bawk a, a thla pawh ka lâksak ṭeuh nghe nghe.

Tho thutin u Maṭhuama chuan kan piaha hmeichhe pakhat ṭhu ve reng chu a va bia a, English ṭawng a la hmang miah lo zui. Eng emaw ni hi a sawi zeuh a, a va biak nu chu nui var var hian kan ṭhutna lamah a lo phei a, u Maṭhuaman phone pe tura min tih chuan ka lo pe ve nghal mai bawk.

"Eng nge kan tih dâwn?" a hriat tur tâwk vel leka zawhna ka zawh rual chuan

"Thla kan lá dâwn" a lo ti awlsam thán a, a bân vei lama mi rawn kuahin a lamah min pawt hnai salh a, ka awm dan ka siam rem ve nghal a, kan inneih thlalak tih lovah chuan pangngai taka thla kan lák dun vawi khatna a nih hial ka ring.

"Merci (mekh* see = mêk - si)" a phone kengtu kut ata phone lâk pahin u Maṭhuama chuan a ti thum raih a, eng ṭawng nge a nih pawh ka hre lo.

"Eng tihna nge a?" ka bula a rawn ṭhut thlak rualin ka lo ti nghal hliai a, nui suk pah hian

"Kan lawm e tihna a nih kha" a lo ti mai a, meng kuaua ka en lai chuan

"Nichina kan tei lai khan tlêm tê ka inzir hman alawm Sylvia, French ṭawng ka thiam bik lo, min be zui zel se chuan ka bo khawp ang" a rawn ti leh nghal a, ka biang chu a piai zawm zat bawk.

"Mak i va'n ti awm ve?" nuih zat hmel zeta a tih leh chuan ka nui ve ta ringawt.

"Mak ti e, chu bakah i va'n thiam chak, kei ni ta ila ka thiam hman teuh lo, ka en lai chauhin ka hria ang a, a bak chu ka theihnghilh nghal vek a ni mai" naupangchhia deuh hian ka ti mawlh mawlh a, a ṭhutna aṭang chuan a tho deuh thut a, kei pawh ka ding ve nghal chu a ni mai.

"Haw tawh ila, fan kualna hun hi chu a la tam dâwn lutuk" a rawn tih chuan ka lo bu nghat a, ka kut a chelh zui nghal bawk.

Kan thlenna Hotel lam pana kan haw meuh chuan dâr engzat chiah nge a nih pawh kan ngaihven tawh lo, tlai erawh a tlai thawkhat hmel tawh viau thung. Kan room-ah kan lut a, hmai ka phih zo a lam ka hawi phei chu khumah a lo mu thluang duai a, a Tshirt nghawng V mawlh chu a va inhmeh tak, ka hâktir lo vang tih ka hlau zâwk e a!

A âwmin a tâwn mar ṭung bawk si a, ka mitah chuan a lang mawi lo thei lo. Khuma ka chuankai rualin min rawn bawh titih nghal a, nupa nun kan hman ngei ka ring. Zan hnih ngawt kan awl tawh a, hman a duh a nih paw'n dan tumna ka nei lo, ka pasal a ni miau a, a nupui ka nih angin min mamawh a nih chuan a mamawh phuhruksak chu ka tihturah ka ngai ve hmiah tawh a ni.

"I chau lo ti raw?" zawi supa a tih thum ruih chuan ṭawngkâa chhang lovin ka buk khum zeuh a, ám zet hian min fawp zui nghal tawn tawn bawk.

Vawi leh khata awm sawn thutin a thawmhnaw hak lai te chu a hlip zung zung a, kei pawh ka bang bik chuang lo. Min phelh ruak leh vek dâwn tho va, keia lo inhak reng bik thu a awm lo. Ṭum dang aiin a che hmanhmawh zual deuh hrim hrim a, ka hmuiah pawh a fawp rei meuh lo.

A hmui chu ka taksa hmun tinah a vah kualtir a, ka sa leh phât phat tawh a, ka zauthau ṭan a, ka phurin ka sosang ru em em leh tawh bawk. Ka nghawng leh a chheh vel dût kual den den pah hian ka taksa chhungah a rawn lut a, tun ṭum chu a dan a dang khawp mai. Leng lo chung chung lo lut lui hram angin hre mah ila nâ ka tuar tawh lo va, nawmnain min tuamhlawm tawh zâwk thung a ni.

Rei lo tê hnuah awihawm loh khawpa nasain ka danglam a, ka chhia leh ṭha hriatna te chuan min phatsan mawlh mawlh a, kan awmna hmun chu lei vanram angin ka tehkhin ber. A chet dan thlakin amah hmachhawn zawng chuan min mut saisirtir a, ka mal vei lam chu a khel zawn velah hlangkaiin a vuan bet a, hnuai lam aṭanga a rawn lut leh chiah chu ka eu ngawng ngawng zui nghal bawk. Ka mawng bâwra chelh chungin a che mawlh mawlh a, a tihtur a hai lo chiang khawp mai. Rei pawh la ni lovah chuan a mu zángthal thuai a, kei pawh a chungah ka bawk titih nghal a, kan taksa pawh a la inzawm nghet ṭha hle.

Muangchangin ka taksa chhungah a rawn lut leh ta riai riai a, a âwma bawk hle hlein nawmna vawrtawp thlen ka inpeih em em tawh bawk. A chet dan a tirang tial tial a, keiin ka lo kuah nghet tawlh tawlh thung a, ka thaw lâk dan thlengin a dik thei tawh lo. A ke pahnih tawma a rawn che chho leh chiah chu ka taksa pum a mur chhuak vek a, nawmna vawrtawp chu ka pasalin min thlenpui leh ta nge nge a, ka tlin tawh ngang lo a ni e.

Ani pawh a bang bik chuang lo, ka taksa chhung aṭanga chhuak zul zulin a âwmah min kuah bei hle hle a, thlan tui nen inchiahpiah deuh nuaih mah ila kan inten lo ve ve a ni mahna. A âwm poh chhah ṭha tak inkara hmul ṭo siar siar chu ka khawih neuh neuh a, mut chhuak zetin ka meng diar diar a, ka muhil thuai dâwn tih ka hre chiang hle bawk.

(End of Chapter 10)