WAY BACK INTO LOVE By Havali Adam (CHAPTER 12)

WAY BACK INTO LOVE 

By 

Havali Adam

Chapter 12

A tukah chuan hmâ takah thovin Zosiama leh mi dangte lo harh huna an thingpui in tur ka lo siam lâwk diam a, Zosiama a rawn tho chhuak hmasa ber a, inhaw lo tawn zet hian hun kan hmang dun a, ka nu leh pate an rawn thawh ve leh tâkah chuan sitting room-ah a ṭhu phei daih a, ei rawng ka bâwl laiin ka pa nen an chhuak daih leh nghal a, mak ka ti ru hman viau nghe nghe. 

Ka nu'n an chhuah dun lawk thu min hrilh tawh tho mah se ngaihṭha zân lo hian ei rawng chu ka bàwl chhunzawm a, eng thu nge an sawi dun ang tih ngaihtuah reng rengin hun kan hmang a ni ber. 

Ruata a rawn thawh ve leh tâkah chuan ka bulah a awm deuh chawt a, eng eng maw ni ka sawipui melh melh a, tlêmin ka rilru kal ding lutuk pawh a zia ta deuh. Thingpui in paha Ruata ṭawng ve mual mual chu ka en leh reng ṭhin a, unau piang hmun dik tak ang maiin kan innêl lehzual tawh a, kan awm dan chuan min tihlim tak zet! 

"Engtik hun velah nge Zosiama chu haw a tum deuh Terem?" ka nu'n a rawn tih chuan

"Awi, ka zawh theihnghilh daih, ka la zâwt miah lo" ka lo ti thuai a, thil chhûan ka chawh lai pawh chu ka tawp zui hmak bawk. 

"Âw, i va'n ngaihtuah kim lo thei tak, zâwt ve ta che maw lè" ka nu min zilhna awkâ avang chuan mawl ka inti hnuhnawh kher mai. 

"Nia, nakinah ka zâwt tawh mai ang" ka ti ta ringawt a, Zosiama ber lah chu ka pa nen an chhuak daih bawk si, khawiah tak kal ang i maw!

Tukṭhuan ei dâwnah chauh ka pa leh Zosiama chu an lo haw a, koh péna biak hran nghal ka tum viau a, mahse ka insum leh ta rih zâwk, hun remchang dang erawh ka zawng ru nasa hle thung. 

Chaw ei lai te chuan ka hma zawnah tak a ṭhu a, ka nu leh pa'n zawhna an zâwt deuh reng a, Ruata leh kei erawh kan lo ngawi deuh tawp a, sawi ve tur kan hriat loh chu thuhran ni se inrawlhna chî ah kan ngai lo a ni mah zâwk ang chu!

Ka nu chuan haw a tum hun a zâwt ta nge nge a, keimah zâwkin lo zâwt vek tawh tur ka nih teh lûl nen ka tlaw lutuk azârah ka nu'n a zawh phah a, Zosiama pawh chuan chawhnu lama haw a tum thu a lo hrilh ve mai bawk. 

Tin, ka pa nen pawh inbiak leh kan ngai, a chhan chu nimin tlaia a zawhna ka chhán hleih theih loh kha tunah chuan chhánna ṭha tak ka hre tawh a, chu vangin hun remchâng hmasa bera inbiakna neih pui leh ngei ka tum ru hle.

Chaw kan ei kham a, Ruata nen kan che nghal a, thleng ka sil laiin ani'n hmun a phiat thung a, 'u Terem' tia min kohna te chuan min tinui leh ver ver ṭhin. Chaw ei kham aṭanga rei lo tê hnuah inlêng kan nei a, ka pa ṭhiante an ni a, Zosiama pawh chu ka awmna lamah a rawn phei ta daih nghe nghe.

"I chhuak hman ang em?" inkuangkuah run chung hian a ti sup a, ka thleng sil lai chawl chuang lovin ka melh chho nghal ral bawk.

"Vawiinah maw!?" ka tih chuan a lo bu nghut a, min chhuahpui a tum chiang mai!

"Tih tur em em ka neih àwm pawh ka hre lo" ka ti ve leh nghal mai a, hriat nuam dap hian

"Chhuak dun ang hmiang?" a ti ta ngei a, a mi sâwmna chu hnar ka va tum lo chiang mai mai tak! 

"Nia, kan tum dâwn a nia" nuih zeuh paha ka tih chuan

"Zak lo min ti em?" a rawn ti teh daih a, ka en deuh hâw nghal nghe nghe. 

"Eng vang chuan máw?" ka lo ti hliai a, zak lo ka tih chhan tur áwm rèng ka hre lo tlat!

"Ka rawn riak ringawt a, chaw ka rawn ei ringawt bawk a" ti thum bul bula chawl deuh datin

"Ka ngaiin ka hmu châk em che a, chu chu zah pawh dâwn lova ka rawn kal tawp chhan a ni tih erawh i hriatthiam hram ka besei" a tih zawm leh nghal a, a hmelah chuan a thutak tih a hriat hle bawk.

"Ka hria alawm, zak lo ka ti miah lo che a nia Zosiam, i lo kal hi ka lawm em em zâwk asin" a rilru dam nâna sawi pawh ka ni lo, ka rilru dik tak záwk a ni ka sawi ní!

"Eng pawh tâwk dâwn ila, i hlimna thlentu nih hi ka duh ber, nih ngei ka tum bawk" chu thu a sawi lai chuan min en miah lo va, mahse a thinlung taka sawi a ni tih ka hre chiang hle thung. 

"I kum a lo tam ve ta bawk a, hmân ai kha chuan bialnu te bula thu sawi dan pawh i thiam sâwt tawh khawp alawm" ka ti zeuh chu mit hnuai lam inrin lang deuh kalha meng zim sun hian min rawn en chhuk nghal vut a, a va han Zosiama hliah hliah tak! 

"Khatianga min en khan Zosiamlian dik tak kha i la ni reng tih ka hre chhuak leh ṭhin, ka Zosiama ngei kha!" nui var var paha ka tih leh chuan a rawn nui nghawr ve ta dat a, ni danga a tih ṭhin dang ang bawkin ka biang a piai leh zeuh kher bawk.

"Sil zo thuai la" a rawn tih tâkah chuan

"Nangmah vang vek, ka sil rei phah" ti tan tana nui sen sen chung hian thleng chu ka sil zawm mial mial a, rei lovah ka sil zo nghal chu a ni mai.

A hmingin ka nu leh pa chu Zosiama nena kan chhuah lawk tur thu ka hrilh a, an remti dâwn tih ka hre chiang a, dil ngaiah pawh ka ruat lo, ka hrilh satliah khawp mai. Rin ang ngeiin an lo phal ta réng a, Puitei lo lèn tum pawh Zosiama nena kan chhuah tur thu ka hrilh avangin a ṭhulh phah a, zan lamah erawh lo lèn a tum ta tho. 

Zosiama nen chuan bazâr lamah kan inphur chhuak a, Krismas a hnai tawh vet vet bawk nen bazâr tura chhuak mipui pawh an tam mup mup khawp mai. Kan tlan zel a, bawngkawn lamah kan tlan phei char char a, khawiah nge kan kal dâwn pawh ka hre lo va, zawh pawh ka zâwt chuang lo.

A tawp a tawpah chuan Zemabawkah daih kan va ding a, chhûngte a nei ti dâwn ila a neih àwm ka hre bawk si lo. Eng mah zâwt chuang lovin min hruai ang ang chuan ka awm tawp a, in changkang ve deuh pakhatah hian min luhpui a, chuta ka mi hmuh chu ka rin loh lam tak a ni.

"Eng nge in lo tih dâwn?" Zosiama nutei aw chu a chang fak a, hmân ata tawh nêm taka a biak àwm ka la hre lo reng reng. 

"Ka pu'n hei hi pe tur chein min tia" tiin Zosiama chuan a kekawr ipté aṭang hian thil eng emaw ni hi a phawrh zui nghal a, a aw chu a dam viau bawk. 

"A ngai lo ka tih mawlh mawlh khâ, engati nge a tihluih tlat ṭhin nì!" ti deuh hlak hlakin Zosiama nutei chuan a lo là ve mai bawk a, en pawh ka en rei ṭha ngam lo.

"Kan kal leh nghal mai ang" ṭha taka Zosiaman a be zel chu mak ka ti ang reng khawp mai. 

"Aw, kal r'u, lo chûangkâi tam vak duh suh" Zosiama nutei chu ka en kar a, engtin nge chutiang chuan a biak theih zâwk pawh ka hre lo e a!

Ngawi reng hian Zosiama chuan min kai chhuak a, a nutei biak dan hriat nuam lo zet avang khan ka rilru chhungril chu a nâ tlat bawk. Eng mah ka zâwt lo va, zawh ṭul pawh ka ti lo, mahse khatiang khawpa han intham loh kha chu mak ka tih mai bakah ka thà a lo nâ vawng vawng thei. 

"Ka nutei kha a nia, i la hria ti raw?" a rawn tih chuan ka lo buk khum nghat a, rilru nâ hmel a pû ve miah lo te hlei hlei chu ka mak tihna a zual! 

"Pasal a nei tawh a, ka pu hian a ngaihtuah ṭhin bawk si a, buaithlak tih châng ka ngah khawp mai" nui lui suk hian a rawn ti thum leh bul bul a, dâwt a sawi ka ring miah lo, nichin lawka kan thil tawn aṭang pawh khan a hriat theih nghal vek alawm lé. 

"Ti rawh le, i kal ang hmiang, khaw'nge kal i duh deuh?" min ngaihtuah tih hriat taka a rawn tih leh dap chuan

"Khawiah pawh a ni mai, i bul a nih phawt chuan" ka lo ti ve hliai a, lái ru zetin ka nui sâng zui nghal zat bawk.

"Ka duh dûhna ah ka hruai thei che tihna a nih chu!" tih leh ka biang piai a rual a, nui nghawr dat hian bike-ah chuan a chûang zui nghal a, kei pawh ka lâwn kai har lo hle. 

Bazâr lamah kan inphur phei leh ta vang vang a, Zosiama nutei awm dan khan ka rilru luah ang reng viau mah se a tir ang em em kha chu a ni tawh lo. Zosiama nena hun nuam tak hman dun chu ka thupui ber a ni tawp a, chawhnu lamah a haw tawh dâwn bawk si, engkim chu a ṭha thei ang ber leh a nuam thei ang ber ka duh a ni tawp mai. 

Bazâr puia kal ka rawt hnuhnawh a, ani paw'n min hnial bik chuang lo. Mipui tam tak zi nuaih nuaih kârah nghet taka inkai rialin kan kal dun a, a thawmhnaw tur leisak ka ngaihtuah chhuak leh hlawl a, amah tak phei chuan ṭul a ti lo khawp mai, mahse ka leisak dáwn hi a ni hrim hrim!

Thawmhnaw dawr hrang hrangah ka luh kualpui nawk nawk a, naupang thuawih tak ang mai hian min zui kual ve dut dut a, kan inlen hleih ang reng bawk si a, ka bodyguard te pawh a ang lek lek zâwk alawm lè. Dawr pakhata kan lut leh chu ka mit là tak kawr mawi zet hi ka hmu fuh hlauh mai a, lei ka tum ruh nghal hle bawk.

Kawr chu ka hak chhintir vel a, fit pawh a ngai tawh hran lo, a taksa nen a inmilin a inhmeh nghal hle a, ka mitah phei chuan a ṭha hluah hluah hi a ni tawp, pà bawk si. 

Kan inlei fel meuh chuan hun pawh a lo kal ve leh duaih tawh a, kawr ka leisak chu ṭul a tih loh thu a sawi deuh nuah nuah reng a, Krismas present atâna ka leisak thu ka hrilh hnuah erawh tlém chuan a ngaihdan pawh a dang deuhin ka hria.

MC-ah thil kan ei dun leh tê tê a, chumi hnu chuan kan haw ve ta chauh a, mahse kan vêng lamah kan haw tlang nghal dâwn emaw ka tih chu a lo ni hauh lo. Min phur tlang zel a, kan kalna tur ka zawh lahin

"Khawiah emaw ni kal lawk ang" a ti mauh mai bawk si, a duh dùhna ah min hruai teh se ka ti ta tawp mai.

Zampuimâng kan tlan pelh tâkah chuan kawng sir zau laiah min dinpui ve ta nge nge a, motor vei vak pawh a tam lo hle a, thli thaw dawn tur a tamin a hmun hma chu nuam ka ti reuh ta phian a, min hruai chhan tak erawh ka la hre chuang lo. 

Ka kutah chelhin thing daihlim awmna lamah min kai phei a, min kaih ang áng chuan ka awm tawp a, daihlim hnuaia kan awm hnu chuan inhma chhawnin min melh chhuk run a, ka mitmenga zawhna chu a hmuh thiam nghal mai ka ring. 

"Ka hmangaih che tih i hria ti raw?" rin loh deuha a rawn tih chuan ka lo bu nghat a, chutah amah bawk chu ṭawng zawm leh nghalin

"Min ringhlel lo ti raw?" a rawn ti leh a, kei pawh chuan

"Ringhlel nâng, engati nge Zosiam?" ka lo ti ve ta hliai a, ngaih te pawh a tiṭha lo rum rum dâwn alawm lè. 

"Ka nupui i ni duh ang em Terem?" ka kut pahnih chelh chunga a zawhna min zawh teh thut chuan min tibangbo vekin ka hria. 

"Màw?" ka ti deuh hû a, mak tihna hlirin ka khat a ni ber. 

"Ka phû lo che tih ka hria, i mamawh leh thlakhlelh angin ka hmangaihna che pawh ka tilang thiam ngai lo. Chuti chung chuan min hmangaihna a danglam phah lo va, i mi hmangaihna rul lêt theih dan ṭha ber nia ka hriat chu nupuia neih che a, ka tháwk tawp thlenga hmangaih che hi a ni" a tih thum dap dap lai chuan mittui tling pam hian ka melh chho ral a, ka hmu phê ruai bawk. 

"Kei hi pasalah min nei duh ang em Terem?" a rawn ti nawn leh chiah chu ṭah nuih hawk pah hian ka buk khum thuai thuai a, min sâwm nawn tawh loh ka hlau a ni ber. 

"Ka lawm e" nui sun suna a rawn tih chuan

"Zosiam" ti ṭiauin ka kuah nghal thlawp a, ka hlim lutuk chu sawi ngaihna pawh ka hre lo.

"Nupa kan nih hunah chuan i hlim reng ang tih ka tiam thei lo che a, mahse ka hmangaih reng ang che tih erawh ka tiam thung a che" ti dam dapin ka hnung chu a chûl hliau hliau a, rei inkuah lovin min nam hla deuh hlek zawm zat bawk. 

"Kei, sawrkâr hna pawh thawk lo, Mistiri hna thawka inhlawh ve ṭhin mai mai hi min hmangaih avang leh min neih i duh avangin ka lawm e" ti thum chhalin min fawp vang vang a, min fawh laklawh lai chuan ka inlá hrang thut a, mak a ti hmel viau nghe nghe. 

"I hnathawh leh i dinhmun hi ka ngai pawimawh ber lo Zosiam, ka laka i insitna rilru leh min phû lo anga i inngaihna rilru kha paih bo la ka duh" ka ti tan tan a, chutah duh tâwk ta mai lo hian

"Ka hmangaih che a, chu chu i sâwmna chhànna ṭha tâwk tak a ni bawk" ka ti leh hlak hlak a, mahni inhmuh hniamna leh insit rukna nei lo se ka duh lûatah ka thinrim titih chu a ni der mai. 

"Immm....ka hria alawm" ti dam ruihin min rawn fawp nghal tawn tawn a, tun ṭum zet zawng dan zawh rual a ni ta lo e!

Ka kawngah chelhin min châwi kang lawp a, hrilh hranpa ngai lo hian kei pawh chuan a kawngah ka lo kherh ve nghal chial a, che deuh sawk sawk mah ila kan hmui erawh a la inbawhthuah mawlh mawlh reng a, kan awmna hmun ho lam ve tak chu hmun nuam takah kan siam ni mai te'n ka hria.

Kan inthlah fel meuh chuan ka thaw deuh hlawp hlawp a, ka lung phû ni se a rang ṭha dawt dawt bawk si, ka la pangngai lo lutuk chu ka awm ngaiin ka la awm reng ringawt. 

Ka bianga fawp zeuhin dim zet hian leiah min nghat thla a, leia ka din rual chuan ka hma zawnah tak a ṭhingṭhi zui nghal zat a, lo en tlawk tlawk tawp loh chu tih theih dang ka nei rih tlat lo.

Ka kut pakhat zâwk chu dam zeta rawn làin ka kutzungṭangah chuan zungbun, silver rawng ngei mai hi a rawlh lut ta riai riai a, zungbun min bun feltir hnu chuan ka kut chu a fawp zui leh vang vang a, hlim lutuk avangin ka khi ver ver reng a, ka kuah leh tawp ringawt bawk. 

Chutah ka kuah deuh thut chu a lo inring chiah lo nge ni, ka bawh tlu ta rawk rawk a, kan awm dan chuan min va tihlim zualin min va tinui hnem tehreng êm. 

Ani pawh a rawn nui chhuak ve hawk hawk a, thawh nghal mai pawh kan tum chuang lo, ka bawh ang ang chuan min kuah bet run a, tu mitmei mah vêng lovin a mu zangthal ruah a, kei tak paw'n tu mitmei mah ka vêng bik chuang lo.

"Haw leh lo mai la" a chunga bawk ran paha ka tih chuan nui sun sun chung hian

"Ka haw lo tak tak mai tur a nia" a lo ti ve nghal a, ka kut chuan a hmai chu ka zût kual den den ta ringawt. 

"Nupuiah min sâwm hmâ ê, kan inngaihzawn ṭhat lehna pawh a la rei lo ropui si" ka ti niah niah a, ka awmna hmun; a taksa ngei mai chu a hahdamthlak tak zet a ni.

"Ka nei nghal dâwn che tihna a ni hleinem, mahse rei erawh ka rial tawh lo ang" dam dap hian a ti nghet churh churh a, a hmui ka khawih laia a rawn seh deuh thut chu ka phu ngei mai. 

"Zosiamlian!" ti hlakin a hnâr chu ka piaisak vak a, hlim em em hian a nui nghawr dat dat a, chutiang taka a hlim hmel chu ka la hmu ngai lo.

"Hetiang hian kan awm chawhnu ṭhak zâwk mai dâwn emaw ni chu lè, awm mai ang hmiang?" ti thum bul bulin a nui nghawr leh dat dat ṭhin a, ka bula awm nuam a ti ve lutuk te chu ka hlimna belhchhahtu a va ni chiang tak êm.

Kan inkâra hmangaihna chuan kan thinlung hmun tin kil tinah pâr a chhuah a, chu pâr mawi tak chu vul hlen tura Siamtu duan hran bik ang mai hian a rimtuina leh a hmel mawina te chen chuan a zual zel a, mita hmutute ngei tân pawh han tihbawrhban chi ziazâng a ni lûl lo ve! 

Chutia hlim taka kan inhnial bap bap lai chuan motor pakhat hian horn a rawn pe ri vak a, min fiam tih hriat takin a tlan liam zui ve leh nghal mai a, chutin keini pahnih pawh chu kan tho chhuak ve ta nge nge bawk. 

A kawr hnung bal leh a kekawr bal chu ka ben faisak mawlh mawlh a, min chhuk melh run chunga a lo nui leh sun sun ṭhin te chu a tê zâwk mah ni ila ka khak leh hlak ṭhin a, huatah pawh a là chuang lo, kei tak paw'n thinrimin ka khak lo hrim hrim. 

Aizawl khawpui lam pana kan inphurh phei lai te chuan zawi lo tak hian ka ṭawng melh melh reng a, kan hlimna chuan van sâng tak a tawng ngei ka ring. A hnung zâng chhah ṭha taka bei hlei hlein ka nui leh var var ṭhin a, kan in kawt te chu kan thleng hma ka ti ru khawp a, dik tak chuan ani nena hun hman dun ka la kham lo a ni.

In chhung kan lut chu ka pa leh Ruata an lo awm lo va, ka nu chiah a lo awm a, Zosiam pawh a muangchâng fahran tawh lo hle. 

A kal dâwn tak takah chuan ka nu hmuh loh hlanin min fawp leh vang vang a, ka hmuia fawh duh tâwk ta mai lo chuan ka kutzungṭang; zungbun awmna ngei mai chu a fawp leh hram bawk a, inthlahlel tawn em em mah ila kan inthlah liam a ngai tho bawk si, ka ngai nghal vawng vawng te'n ka hria. 

Ka kutzungṭanga zungbun awm ran chu ka en leh veng veng ṭhin a, zungbun to leh mawi a nihna lampang ka ngai pawimawh lo va, min petuin a thinlung leh tih tak zetin min buntir tih ka hria a, chu chu ka ngai hlut em em chhan pawh a ni. 

Hmangaihtu chuan a hmangaih lak aṭangin ho tê anga lang thilpek pawh dawng se, ngaih hlut loh rual a ni lo, a chhan chu a petu pek duhna thinlung kha khawvela thilpek ropui ber te zinga mi a ni tlat a ni!

"Pa" in chhunga ka pa leh Ruata lo lut ka hmuh rual chuan ka ti nghal a, ei rawng ka báwl pah reng bawk. 

"Inbe lawk ila?" ka tih leh chuan a lo bu nghut a, ka ei rawngbáwl lai chu ka kalsan zui nghal daih nghe nghe.

"Eng nge ni ta?" a kawr lûm hak lai hlip mual mual pah hian a ti dam dap a, room chhungah chuan kan pahnih chiahin kan awm a, ka nu pawh khan ka zui luh lai khan ka pa ka biak duh chhan a hria a ni ngei a, rawn luh a tum hmel loh hle a nih kha! 

"Eng lo a nia, kei leh Zosiama chungchang a nia" ka tih chuan

"Han sawi la" a lo ti mai a, a kawr lûm hak lai a hlip fel ta bawk nen min en ta ran mai. 

"Zosiama nen hian kan inhmangaih tih hrilh che ka duh a, chuan i ngaih a ṭha lo ang tih ka hlau bawk" ka ti deuh tawp a, ngawi reng hian min en a, sawi belh zel turin min duh ni berin ka hria. 

"Chuan...ih....eng lo....hlauthawng suh aw pa? Zosiama bulah hi chuan ka him a, ka hahdam a, ka hlim em em bawk. Khawpui tlangvalte angin sawrkâr hna sâng tak thawk lo mah se ka hmangaihna a danglam phah lo va, ani paw'n min hmangaih a, mahse chu kan inhmangaihna chuan i lung a tiawi zo ang em ka hre lo a ni" a tawp lam chu ka ṭawng thawp sap a, Zosiama nena kan awm dun a remti thei lo vang tih mawlh ka hlau!

"I lo puitling ve ta hle mai" ti supin khumah chuan a ṭhu thla a, ṭawng zawm leh nghalin

"Zosiama kha i hmangaih tak tak máw?" a rawn ti leh sup a, a nui miah lo leh nghal. 

"Aw, ka hmangaih alawm pa, chuan ani paw'n min hmangaih" ka lo ti thuai a, ka inring tâwk hle bawk. 

"Ngaihzawng i nei ve ta mai hi ngaiah ka la nei thei rih lo" nui sun suna a rawn tih leh tâkah chuan ka ngaih a ṭha ta deuh huai e! 

"Zosiama hi mipa ṭha tak a ni asin pa, a bulah awm tam la chuan mipa ṭha leh innghahna tlâk a nihzia i hre chiang tawlh tawlh mai ang" a bula ṭhut thlak pah chuan ka ti sap sap a, a darah ka lû ka nghat zui nghal zat bawk. 

"Ka hria alawm" ti dapin ka chal chu a fawp zeuh a, chutah keimah bawk chuan

"A nih i pawm ti raw? Engmah duh lohna i nei lo ti raw?" ka ti leh nghal zung zung a, rilru hahdam taka awm bak thlakhlelh nei hek lo! 

"Immm....pawm e, a tir phat aṭang khan duh lohna ka nei lo hrim hrim, mak kha ka ti viau zâwk a, mahse tunah chuan puitling i lo ni ve tak tak ta tih ka hriat chhuahna hian min tihlim tawh zâwk a ni" a rawn ti dap dap a, ka nu khan a lo sawi dik chiah, 'mak a tih loh chuan a hlim viau ang' a lo ti lâwk daih tawh a nih kha!

"Ka lawm e aw pa" ka ti leh ringawt a, ani pawh a rawi nui hak hak a, ho a ti hle a nih ka ring. 

"Rilru dam takin awm la, kei leh i nu hi chuan i hlim kan duh ber. Zosiama bulah hian i hlim tih kan hria a, a him pawh i him viau bawkin kan hria" ti dap dapin

"I nu va pui tawh rawh le, i awm lo rei ang reng si a, ei rawng a lo bâwl leh daih tawh ang ka ring" a rawn tih zawm zat a, ka pa chu kuah leh vawng vawngin ka chhuahsan ve ta nge nge bawk. 

Room aṭanga ka chhuak te chu ka rilru a zângkhai vah a, engmah enghelh leh rilru kamtu pawh ka nei tawh lo. Ka pa sawi ang ngeiin ka nu chuan ei rawng a lo bâwl malh malh a, ka pui zui nghal chu a ni mai. Kan han awm dun tâkah chuan Zosiama chanchin min zâwt leh zauh ṭhin a, kan ṭawng ring hran lo va, mi dang chuan an lo hriat phâk pawh ka ring chiah lo. 

Zanriah ei khamah Puitei pawh a rawn lêng ta ngei a, chhun lam aṭang tawh lo lén a tum urhsun bawk a, kan han awm dun tâkah chuan an vênga mi duh ruk deuh pakhat a neih thu te chu min hrilh nghal bawrh bawrh a, ka room-a awm hrang daih kan nih avangin a ṭawng zawi lo hle a, ka rin lâwk ang ngeiin Zosiama chungchang a sawi chhuak leh ta nge nge bawk. 

"En la hei" tiin ka kutzungṭanga zungbun awm vàng chu ka hmuh a, ka hlim chu thuhran ni se ka intithei ve deuh hlek a ni ber. 

"Awi, engtika mi nge? Awi le! Zosiama chu a va lo che rang phian ve, i lo haw thlak tirh pawh khan ka hmu miah lo" a ti mawlh mawlh a, chhán pawh ka chhâng chuang lo, ka nui var var ringawt.

"Zosiama nena in chanchin hi pa Rcan a hre ve tawh em?" a rawn tih leh chuan

"Hre tawh e, ani paw'n min pawmpui thlap tawh tak asin! A tirah kha chuan min duhpui lo emaw ka ti hman a, mahse a lo ni hauh lo" tiin ka lo chhâng nghal siam siam a, ka mitthlaah chuan Zosiama hmel a rawn lang chiang hle bawk. 

"A ṭhat hlauh chu! A nih, engtikah nge inneih in tum?" a rawn ti leh a, chhán ngaihna ka hre lo hman ṭep nghe nghe. 

"Ka hre lo le, rei ka rial tawh lo ang a tia, amah ka ring deuh tawp ringawt" ka tih chuan a lo nui var var a, thil dang ka sawipui ta daih a, kan ṭawng duh bawrh bawrh dun khawp mai. 

Rei tak a lêng lo va, scooty-in a inkhalh haw leh mai a, khum ka làwn kài aṭanga rei lo tê hnuah Zosiama hnen aṭangin phone call ka dawng zui zat a, mut hmunah kan inbe melh melh a, ani pawh a sawi dan chuan mu chungin min bia ni ngei tur a ni. 

Kan inbe rei phian a, an khua a thlen tirh khan kan inbe tawh tho nà chu sawi tur kan ngah dun te pawh a ni mah nà, kan inmangṭha meuh chuan hun a lo kal duaih hman tawh a, mut pawh a hun tawh khawp mai.

Kâr lovah Krismas kan thleng ta nge nge a, hun pui a nih ang ngeiin a tua te paw'n nuam kan titlâng hlawm em em a, kei ngat phei chu ka Krismas hman tawh zawng zawngah a la nuam ber hial ang ka ring. Zosiama nen pawh kan inbe zantin ziah a, chhun lamah hi chuan kan inbe zauh zauh chauh ti ila a sual tampui lo ang.

Krismas boruak a zo va, kum tharin a zui nghal a, ruai ṭheh boruak te chu nuam ti hat hat hlawm tak kan ni! A la rei lo viau emaw tih laiin kum thar pawh kan hmang zo chu a ni nghal der a, hun a kal duak duak ni berin ka hria. 

Kar leh maiah hna avanga awm bo leh tawh tur ka ni a, matric exam hma chhawn tur kan ni bawk nen phone kaltlangin kan Head nen pawh kan inbe zeuh zeuh ṭhin nghe nghe. 

Zan khat ka mu chu thil ri deuh rek rek hian min tiharh hlawl a, ke pen thawm a ni tih ka hre chawpchilh nghal mai a, mahse ngaihṭhat lohna pawh ka nei chuang lo, an zung ni turah ka ngai hmiah. 

Amaherawhchu, mut leh mai ka tum lai tak chuan mi pakhat chauh ke pen thawm a ni lo tih thawm aṭang chuan ka hre leh ta zel a, mak ti ru deuh hian ka meng kar a, chutah ka room kawngka zawnah takah chuan ke pen thawm chu a la tawp zui, ka ngaih pawh a ṭha chiah tawh lo. 

"Nu?" ka ti ta ringawt a, chhánna pakhat mah ka dawng lo thung. 

"Pa, Ruata?" ka ti leh a, thawm chu a reh hian a reh tlawk tlawk a, kawngka lam pan chuan ka phei ta nge nge bawk. 

Kawngka hawn ka tum lai tak chuan ring zeta Ruata ṭe thawm ka hre ta thut mai, thawm lah chu a ri chhunzawm nghal mawlh mawlh bawk si, kawngka pawh ka hawng rang teh e! Kawngka ka hawn ruala ka mi hmuh avang chuan khar leh nghal vat ka tum a, mahse ka tlai hman tlat! 

Chemtê keng chungin ka room chhungah hmai tuam pa chu a rawn pen lut thuai a, ka theih tawpa ringin ka nu leh pate ka ko vak vak a, hmai tuam pa lah chuan min rawn pan hnai zel bawk si. 

Khumah lâwn kâi nghal thuai thuaiin lukham chu ka hum ran a, ka nu leh pa ka ko leh vak ṭhin a, ka hlauhthawn dan chu pui tak a ni. Hmai tuam pain min rawn man a tum lai chuan lukhamin ka lo vawm chawrh a, mahse engah mah a ngai lo.

"Terem!?" ka pa aw ka hriat rual chuan

"Pa!" ka lo ti vat a, ka pa pawh chu a rawn pen lut zui nghal a, hmai tuam pain chemtê a keng tih a hmuh rualin hmanrua a dap nghal a, mahse a hmu mai lo. 

"Pa!" ka ti leh tuarh a, hmai tuam pa chuan ka pa chu vih tumin a bei zui nghal a, ka khum lû bul dawhkan têa thil awm remchang apiang chu ka chuh sawk sawk a, ka hlauhthawn luatah ka tha a khur vek nghe nghe. 

Hmai tuam pa chuan ka pa bân chu a zai kak ta duaih mai, vih erawh a la vit lo hlauh a, chutah ka nu rak thawm ka hre leh ta zel a, ngaihtuahna a va'n buai duh tehreng êm! Hmai tuam pain ka pa a bawhbet chiah phei chu awm ngaihna reng ka hre tawh lo. 

Che chhuak thuaiin ka thil ken lai chuan ka va vaw pawp pawp a, hmai tuam pain min vih a tum lai takin ka pa chuan a nghawngah a lo kuai bet a, chhuatah kuai tluin a tauh chawrh chawrh a, thisen chhuak zawih zawih khawpa a tauh hnu chuan hmai tuam pa pawh a zal ta raih mai.

Ka room aṭangin ka pa chu a tlan chhuak nghal vut a, ka nu leh Ruata an ngaihtuahawm bawk si, kei pawh ding ta reng lo chuan ka tlan chhuak ve thuai a, ka pa leh hmai tuam pakhat bawk hi indim lo zet hian an lo insual mêk a, Ruatan ka pa puih a tum chu hmai tuam pa chuan a vit ta sawk mai. 

Ka nu nen kan lo rak nghal tuarh a, Ruata pawh chhuatah a mu vial nghal nawk nawk a, ka pa thinrim lutuk chu khua a hmu zo tawh lo a ni ber.

Plastic chair chu chuh thuaiin hmai tuam pa chu a hlap ri ta pawp pawp a, chair pawh a tliak ri ṭhuaih ṭhuaih a, kei leh ka nu erawhin Ruata kan lo buaipui thung a, kan hun tawn mêk chu a hahthlak ngawih ngawih hi a ni tawp!

Ka pate lam ka va hawi chuan hmai tuam pa zâwk chu chhuatah thisen nen a lo let hlawm reng a, ka pa pawh a rawn phei thuai thuai a, chhuata Ruata mu kawm ngût chu a pawm kang lawp a, chutih lai tak chuan Police an lo thleng a, khatia kan buai luaih luaih lai khan ka nu'n a lo call hman hlauh chu niin, kan ina rawn lut misual pahnih pawh chu an man nghal a, mahse Ruatan hliam nâ tak a tuar hman chu a pawi ta ber.

Hospital lam kan pan lai te chuan ka tha khur a la reh hlei thei lo va, Ruata taksa aṭanga thisen chhuak tam lutuk tur hup behpui a ngai bawk si, ka pangngai hlawl lo a ni. Ruata ni se nâ ti em em hian a chhing sawk sawk a, harh erawh a la harh ṭha pangngai hlauh a, ka pa pawh a hmanhmawh bawk a, tlan muang lo tak a ni. 

Rei tlan lovin Hospital hnai berah Ruata chu ka pa'n a pawm lut thuai thuai a, minute tam a ral hmain patea te ho pawh an lo thleng sap sap a, ka nu'n kan chanchin a hrilh vek tawh hlawm a, keini him pial mah ila Ruata ber chuan rilru a tinuam thei mawlh lo. 

A bikin ka pa, Doctor te'n Ruata hliam an buaipui chhung zawng te chuan a awm hle hle thei lo va, awm ngaihna a hre lo a ni ber. A kawra thisen kâi te, a bâna hliam awm te chu engah mah ngai lovin a tei kual sek a, ka nu paw'n a hliam chu nurse ho enkawltir turin a ti tawh nghe nghe a, mahse awmzia pakhat mah a awm lo thung.

Doctor-in Ruata kah mutna avanga a la muthilh rih thu te, ngaihtuahawm lutuk a ni tawh loh thu te, vanneihthlak taka thihpui tham hliam a neih loh hlauh thu te a sawi dap dap hnu chuan ka awm a nuam huai a, ka nu pawh a ni tho, mahse ka pa ber chu a la pangngai thei chuang lo.

Ruata harh hun nghakin kan meng tlaivar ta ṭhak hlawm a, zing lamah chuan Puitei hmel pawh a rawn lang ve tawh nghe nghe. Tin, ka pa pawh ka nu'n a tih luih tlat avangin a bâna hliam awm chu nurse te'n an tuamsak tawh a, patea te ho erawh an awm kim tawh lo va, lo kal leh tumin a ṭhen chu a va haw zuaih bawk.

Zing dâr 5 velah Ruata chu a rawn harh a, Doctor-in zik huai huai a phal loh avangin Ruata hmu tur chuan kei leh ka nu leh ka pa kan lut a, room chhung kan luh rualin ka pa chuan Ruata chu a pan nghal ruak a, ka nu nen kan lo thlir deuh tawp ringawt.

"Hlauthawng suh aw, i ṭha leh thuai dâwn alawm" ti dam dap dapin ka pa chuan Ruata lû chu a chûl dan dan a, Ruata erawh damdawi vang a ni mai thei, a chhing leh ta daih!

"Muhil rih rawh le" ti supin ka pa chuan Ruata chal chu a fawp vang vang a, a din rualin rilru ipik hmel zet hian a thaw chhuak zui ham ham a, hah tak têin a rilru a hah a ni tih chu a hai theih mawlh loh!

Room chhungah chuan kan awm ta reng a, ka pa pawh a sârhu lai ang em em kha chuan a awm tawh bik lo. Thil buaipui fel ngai a awm avangin a chhuak ta daih a, ka nu nen Ruata chu kan awmpui chawt a, a rawn harh leh meuh chuan dâr 8 a ri dâwn tawh a, ka pa pawh ka nu'n a call thuai a, a lo thleng har lo hle bawk. 

"Ruata" ti dam dapin ka pa chuan Ruata kut chu a hum a, kei leh ka nu erawh ka lo ngawi ran thung. 

"Ka fapa ni mai ta che? I duh ang em? Ka fapa i ni duh ang em?" ka pa zawhna chuan Ruata pawh a ṭhawng ve hle a ni ang, a meng phawk hrâ mai. 

"I duh a nih phawt chuan engkim ka buaipui vek ang" ti lehin ka pa chuan a ṭhut hnaih sauh a, Ruata erawh hmun dang a hawi ta daih!

"Ka tibuai mai mai zâwk ang che u pa Rc, in bula ka awm ringawt pawh hi ka lawm tawh lutuk" Ruata chuan a ti thâm raih a, a hmelah a inthlahrung tih a hriat hle bawk.

"Buai lo ve, engtin mah min tibuai lo, ka fapa ni turin ka duh che Ruata, kan zavai hian kan hmangaih che asin" ka pa chuan a ti leh ta dap dap a, hmangaihna mitmengin Ruata chu a en pah reng a, Ruata erawh a kun deuh ngul thung.

"Kei hi i pa ka ni ang a, i nu Tlani pawh hi i nu a ni tawh ang a, i u Teremi pawh i u tak tak a ni tawh bawk ang a, chutianga awmho chu i duh lo em ni?" ka pa hlauthawng ru hmel chu hmuh hmaih a har khawp mai. 

"Kei te chu..." tia chawl datin Ruata chuan inthlahrung aw tak hian

"Tûma'n min awm rei pui duh tak tak hleinem" a tih zawm ve leh nghal a, ka pa ngaihdan erawh a ni lo nasa hle. 

"Ni lo, kan hmangaih che ka tih tawh khâ, kan hmangaih lutuk che alawm. Aw le, kan fapa i ni ang, chu chu ka thutlukna a ni" insum thei loh hmel deuh hian ka pa chuan a ti nghet charh charh a, dim zetin Ruata chu a kuah zawm zat bawk. 

"Nu leh pa leh unau ka nei ngai lo va, neih pawh ka inbeisei ngai lo, a chhan chu fahrah, nu leh pa pawh hre lo leh nei lova seilian ka ni a, mahse nangni chuan...." ti thawp raihin Ruata chu a ṭap zui feih feih a, ka pa chuan

"I duh tâwkin ṭap rawh, mahse tun bak hi i ṭah ka phal tawh dâwn lo a nia" ti ve leh nghalin Ruata hnung chu a chûl hliau hliau a, chutah ka pa bawk chuan

"Kan fapa nih chu i duh em Ruata?" a ti nawn leh ta ngat a, Ruata paw'n

"Immm....." tih chauhin chhànna a pe ve ta nge nge a, ka pa leh ka unaupa thar Ruata awm dan lungchhiatthlak zet avang chuan ka mittui a parawl kuam a, ka insum thei lo ṭep zâwk chu a ni. 

"A ṭha e, engkim ka buaipui fel nghal vek ang a, tun aṭang chuan nang hi ka fapa dik tak i ni tawh tih i hre reng bawk dâwn a nia" tiin ka pa chuan Ruata mittui chu a hruk hulsak a, hlim avanga ka nu ṭah chhuak pawh a inhup tawp ringawt. 

"Ka lawm e pa Rc" tih leh Ruata chuan ka pa chu nghet taka kuah a rual a, nui sun sun hian ka pa chuan

"Ka hnenah chauh lawm thu sawi mah ta che ka fapa, i nu Tlani bulah leh i u Teremi bulah pawh hian i sawi dâwn a nia" ti ve leh supin Ruata hnung chu nâ lo tê hian a bêng thek thek a, Ruata pawh a rawn ṭah nuih ta hawk mai.

Ni a ral a, Ruata pawh a ṭha chho ve tial tial a, mahse chet erawh a la harsat ang reng. Tin, a sawi tawh ang ngeiin ka pa chuan Ruata chungchangah engkim a buaipui fel vek a, birth certificate pawh nei lo leh mahni piancham pawh hre lo khawpin Ruata chuan hun a lo hmang ṭhin tih kan hre chhuak leh ta zel a, kan lainatin kan hmangaih bawk si, kan lung a chhe tlâng hlawm ṭhin teh e!

End of Chapter 12