WAY BACK INTO LOVE By Havali Adam (CHAPTER 11)

WAY BACK INTO LOVE

By

Havali Adam

Chapter 11

A tuk zing ka tho te chu tu hriatpui si loh hian ka phur ru nghal sârh a, Zosiama lo chhuk dâwn vang tih ka lah ka hai hek lo, mahse mi dang tâna hriatthiam awlsam taka awm ka hlau ru ve hle thung. 

Tukṭhuan kan ei lai chuan ka chhungte bulah sawi ka tum deuh ûk a, mahse ka ṭhulh leh lawi a, Zosiama lo thlen hunah hre chawp ve mai rawh se ka ti ta mai. 

"Vawiin chu i nu hovin va bazâr ula Terem?" ka pa'n a rawn tih chuan

"Nia, ka hre lo le, mahse ina awm mai mai ka lo tum asin" tiin ka riat deuh niah niah a, Zosiama lo hmuah ka tum vei nen kan bazâr daih chuan ka tum dan a ṭhuanawp vek a ni mai.

"Kan rei chuang nâng, Ruata te nen kan pathumin kan va bazâr dâwn a nia" ka nu chuan a rawn ti ve leh ta!

"A kal loh theih ém nu? Ka lo kal lo thei em ka tihna?" ka ti ta tawp a, mahse a chhan tak ka la sawi tlang pawp duh rih lo. 

"Engati máw? Tihtur i nei ém ni?" a rawn tih leh chuan

"Ih...eng lo a nia....ina awm ngei ngei ka ngai a, ka sawi awmzia chu...eng lo...âaaaa.....nakinah in hre dâwn tho, ka sawi leh peih lo" ka ti bah nawk nawk a, ka sawi chhuak teuh lutuk chu ka nui tawp ringawt.

"A eng thil chu nge maw ni reng reng lè? Han sawi la, kan hre ve duh alawm" ka pa'n a lo ti ve leh a, lû ka thin khum vat thung. 

"Ka sawi dâwn rih lo, in hre dâwn tho tho" ka ti deuh tlat a, chutah ka pa bawk chuan nui sun sun chung hian

"A nih le, ka zâwt lui tawh lo mai ang che" a rawn ti ve hram a, kei pawh chu ka nui leh tawp ringawt. 

Chaw kan ei kham a, ka nu chuan ka room lamah min kái lut a, ka rin ang ngein zawhna min zâwt zui nghal zat bawk. A fâlin kan awm ta tho bawk nen ka nu lakah chuan engmah zep nei lovin ka sawi chhuak a, min hmu tura Zosiama a lo chhuk mêk thu ka hrilh lai te chuan min nuih var var a, thil a hrethiam chak khawp mai. 

"A nih chuan zanriah ei ve nghal se a ṭha ang, a va peih mai mai e âw" ti vawng vawngin min nuih leh ṭhin a, ngaihzawng ka neih tâk chinah hian ka nu hi a hlim sawtin ka hria, ka hre sual mai thei bawk. 

Room aṭanga ka nu a chhuah rualin Puitei ka call nghal a, ina ka awm dâwn thu leh lo léng turin ka sâwm a, ka sàwm tirh chuan a phur lem lo, min hmu tura ka bialpa a lo zin thlak mék thu ka sawi hnuah erawh phur mangkheng hian a rawn ṭawng nghal mawlh mawlh a, kei ai paw'n a phur zâwk te'n ka hre ta hial! 

"Paa, ti rawh vawiin chu kan pathumin i va chhuak teh ang u, kan chhuak ho khât êm mai" thleng ka sil laiin ka nu chuan a ti lang lang a, ka pa erawh mak a lo tih hmel viau thung.

"Engati thut maw? Ka hman rei dâwn lo, chawhnu lama chhuah ka ngaih khâ" ti ve teh mah se ka nu chuan

"Ka hria alawm, kan rei dâwn lo a nia, va chhuak lawk ang u. Chu bakah ṭhianho inhmuh khawm tih te mai mai chu ni dangah pawh in la nei thei alawm" a ti zung zung a, ka pa hmel chu ka nuih a tiza ngâng mai. 

"Eng chu nge i hriat teh thut a?" ka pa aw pawh a dik vak tawh lo, ka nu ni se Zosiama lo chhuk thu a hriat ve vek tawh avangin ka pa ina awm tur hruai chhuah a tum mauh mai bawk si. 

"Min chhuahpui peih vak lo a ni maw? A pawi lo, Ruata nen kan va chhuak mai ang, i duh hun hunah i ṭhiante bulah chuan i kal dâwn a nia" ka nu ṭawng dan vel chu lungawi lo tak tak a ang, mi dang hmuh loh hlanin ka lo nui dir cher cher ringawt. 

"Chhuahpui peih lo lam pawh a ni lo, chhuak ta ila, kan rei chuan ka kalna turah ka tlai dâwn asin" tiin ka pa chu ka nu lamah a phei a, thleng pawh ka sil rei phah kher mai.

"Ti rawh le Ruata, i kal thuai teh ang" ka nu'n ka pa rilru a hriat chian dan em em chu nuih loh theih pawh a ni lo, nupa nge nge, an inhre chiang teh e! 

"A nih, khawi, ka'n insiam ang" ti supin ka pa chuan ka nu kal chhuak tur chu a kuah bet run a, Ruata pawh a lo nui var var tawp ringawt.

An chhuah dâwn thlengin ka nu chu titau ang deuh hian a la awm ta zel a, ka pa lahin a thlem nasa mai bawk si, an chhuah fel vek tawh hnuah pawh ka nui leh ṭhin a, keimah avanga ka nu awm dan mawlh chuan ka nuih a tiza! Ka pa tân tak pawh ngaihṭhat ngaihna a awm lo, ni dangah chutiang chuan ka nu a awm ngai lo tlat a tin a ni!

Ka chhungte an chhuah fel tâkah chuan in chhung ka tifel nghal zung zung a, Zosiama rawn thlen huna fel fai taka lo awm hman ka duh vang a ni pakhat. Chutia in ka tihfel lai chuan Puitei a lo lut hlawl a, ka rin ai a lo kal hma ang reng, a phur viau tawh a ni ang. 

A rawn thleng hma bawk a, ka lo chhawr hmak! In chhung tifel dunin Zosiama a hmuh châk tawh thu ringawt chu a sawi chamchî a, a bialnu zâwk paw'n ka sawi reng lo a nia, a bialpa han ni phei se chu engtin tak awm ang maw!

"A thlalak tal min lo hmuh teh" a rawn tih chuan ka nui tawi ta tak mai. 

"Maw!? Khawi maw, a thlalak tal ka hmu lâwk duh" a rawn ti leh a, ka hriat chhuah tâk chu Zosiama nen thlalak dunna pakhat mah kan la nei lo tih a ni. 

"A thlalak ka nei miah lo" ka tih chuan

"Ka awih thlawt lo, khawi maw i phone" tih leh ka phone chu lâk a rual zui nghal a, eng ang paw'n zawng se a hmu dâwn chuang lo tih ka chiang. 

"Kha, nangma'n min han hmuh teh" tiin phone chu min pe lêt leh a, zawn ngaihna a hre lo ni ngei tur a ni. 

"Ka nei lo tak tak, thla kan lâk dun àwm pawh ka la hre lo" ka tih chuan

"Awi, eng nge a awmzia? In inngaizawng ve a ni lo'm ni? Engtin nge thlalak dunna in neih loh theih?" a ti nghal bawrh bawrh a, ka nui tawp ringawt. 

"Kan ngaihsak lo a ni ang, kan inhmu a, kan duh tâwk der" tia ka chháng chu ner sawk hian

"Inngaizawng ve si, thlalak dunna pawh neih loh" a ti deuh tlat a, a hmel pe chhe vel chu ka en reng a, nuih loh hi a har ṭhin. 

Thil dang ka sawipui ta daih a, Zosiama nena kan chungchang pawh a sawi reng tawh bik lo va, mi thawveng chî a ni hrim hrim a, a châng chuan thil a ngai awlsam thei lutuk hi ka awt ṭhin. Ngaihzawng pawh a nei awlsam rèng a, mahse an inṭhen leh hma thei khawp mai. 

Hriat loh kârin hun a lo liam duak a, rilruah Zosiama a awm reng a, tukṭhuan kan ei hma khan a rukin ka bia a, bike-a a rawn tlan chhuah daih tawh thu min hrilh kha a nia, a lo berah dâr 1 hma chuan a lo thlen thlak hman ka ring, bike-in rawn chhuk lo se chu tlai lamah a lo thleng mai thei bawk.

Chhun thil ei laiin Puitei chuan Zosiama chanchin min zâwt leh ta nge nge a, ṭha deuh hian ka chhâng ve mai bawk a, sawi chin tâwk tur erawh ka intuk thlap thung. 

A zawng zawng hrilhna chî ah ka la ngai rih lo, ka nu leh pate chenin, Zosiama mizia, a fel leh fel loh an hre duh a nih chuan an hre chawp ve zel mai ang.

Chawhnu dâr 1 pelh hretah Zosiama hnen aṭangin phone call ka dawng a, Aizawl a rawn thlen tawh thu a sawi chuan hmuh hlan ka nghakhlel zual sauh a, mahse hriatthiam awlsam takin ka awm duh lo thung. 

Kawng laka a bike a chhiat thu te, an siam ṭhat tawh thute leh chumi avanga a lo thlen thlak har thute chu min hrilh ve bul bul a, kan vêng te, kan in awmna te kan inhrilh hnu chuan kan inbiakna pawh kan titawp ve thei ta hram. 

"Ti rawh, a lo thleng hnai a nia, lo va chang ang" tiin Puitei chu ka sâwm a, sâwm nawn a ngai lo chiang khawp mai. 

"Eng ang hmel nge a put ang lè?" tih ringawt chu kal lam chuan a sawi tluan zak a, chhan ngaihna pawh ka hre lo, sawi tawh lo tura ka tih lahin a sawi zel bawk si. 

Rei lo tê hnuah Zosiama hnen aṭangin phone call ka dawng leh a, tlanna lam tur te chu ka hrilh melh melh a, inhmu dâwn tho mah ila ka hmu châk zek zek tawh, eng emaw ni hian min mawlh tlat leh nghal a, Zosiama hmuh châkna rau ni maiin ka hria.

Minute tam ral tawh lovin Zosiama ngei chu kan hmu ta, kan in pênga a rawn tlan lai chuan ka bân ka lo vai lauh lauh a, ka tih ang chiahin Puitei chuan a lo ti ve nghal ringawt bawk. 

Zosiama chu a rawn tlan phei zel a, kan bul lawka a din tâkah chuan ka lo be nghal siam siam a, zep thu cheng lo, ka hlim a ni.

"Puitei ka nia, Teremi cousin, a bestfriend ni bawk" tiin Puitei chuan Zosiama chu a chibai a, a lo thlen hma aṭang tawha hmu châk ngàng kha a ni bawk a, a en chík ngar ngar hle. 

"Zo.." tia Zosiaman a hming sawi ve a tum lai chuan

"Ka hria alawm, i bialnu hian e, a sawi nasa thei lutuk che, hriat loh pawh tum ila a hriat loh theih loh" a lo ti nghal zawt zawt a, ka va han ner khum nasa mai mai tak!

"Awi, i daw êm mai, phuah belh reng reng suh" ti thuaiin Puitei chu ka melh vak a, Zosiama pawh a lo nui suk ringawt.

"Teremi bialpa atân chuan i chhiat lutuk hran loh hi!" Zosiama melh chho pah hian a la rawn ti ta deuh deuh, keimah chu ka lo zak zâwk!

"Lut ang u" tih leh Zosiama kut chu vawn ka rual nghal a, ka kaih ang angin ani pawh chuan min zui ve mai bawk.

In chhung kan lut fel a, thingpui ai thei tui ka chhawp a, ani paw'n a duh zâwk ngei ka ring. A ril a ṭam leh ṭam loh ka zawh chuan kal kawnga a rawn inei puar tawh thuin min chhâng ve mai a, dik tak chuan Puitei ka ṭawng khalh zung zung a ni ber. 

A chhan chu a rawn ṭawng vaih chuan zawh loh tur tûr a zâwt palh ang tih ka hlau, sawi hreh a nei der bawk si lo. 

"Nangni pahnih inngaihzawn dan hi a 'long time no see' reuh ê" ka hlauhthawn ruk ang ngeiin ka ṭawng loh lai tak chuan Puitein a rawn ti a, mitmeiin ka khap nghal vat a, pangngai takin bia se ka duh luatah ka ṭang ṭung mai. 

"Teremi hi i fawp tawh ém?" a ti leh chiah phei chu ka mit ka lo chhing sawk a, Zosiama erawh a nui thum dut thung. 

"A zei lo ngawt ang, kha chen kha nangmah avangin bialpa pawh a nei ngai lo a nia, a fawh awmchhun leh a fawptu awmchhun chu a pa a ni mai; chu pawh a biangah!" a la rawn ti ta zel a, ka mitmei lah chu a hmu lo der hmak leh nghal.

"Haw tawh la Puite" ngeiawm rawngkâi lek lek hian ka ti ta tawp a, ka nui lui sâng kher bawk.

"Hetah chaw ka ei nghal dâwn alawm, nizanah khan nang paw'n min sâwm lâwk vek tawh khâ" a lo ti hmak a nih chu! 

"Awi awi awi LALTHANPUI, dâwt sawi lo mai teh" tiin ka ṭhutna aṭang chuan ka tho zui nghal tharh a, keimah zâwk chu ka zak chem chem thei. 

"Engtin nge ka koh ang che? U Zosiam ka ti dâwn nge? I bialnu koh dan che angin Zosiam ka ti ve tawp dâwn zâwk che?" Zosiama bula Puitei awm nuam ti vel lutuk chu ka lo thik dâwn ringawt. 

"I duh dûh danin min ko mai rawh" Zosiama chuan a lo ti sup a, thei tui chu a in zawm zat bawk. 

Puitei chuan a be deuh char char a, thil chi hrang hrang a zâwt kual a, engtin em em nge chutianga sawi tur chu a hriat zozai pawh ka hre lo. Ka tâna awm nawm lohna tur leh zahthlak tur lam erawh a zâwt ta miah lo thung a, tlêm chuan awm pawh a nuam ta deuh e. 

Ka chhungte rawn hawin Zosiama hmel an han hmu thut chu an hamhaih ang reng hle a, a bikin ka pa phei chuan mak a ti zual hle. Ka nu erawh engkim ka hrilh lâwk vek tawh a, mak a ti lutuk hran lo. 

Ka pa leh Zosiama chu an inchibai a, ka pa chuan hna lam thila rawn  zin a nih leh nih loh te a zâwt a, Zosiama erawhin a rawn zin chhan tak sawi lovin chhuanlam dang a siam daih thung. 

"Awi, enteh Terem, i bialpa saw film a chan duh hmel ê" Puitei chuan ka beng bulah a rawn ti sar sar a, ngaihtuah lem lo zet hian

"Eng film-ah màw?" ka lo ti ve mai a, ka pate thingpui in tur ka siam pah reng bawk. 

"Chinese lampang daih, ka sawi thiam lo, amah saw Kungfu a thiam hmel ka ti, a mitmeng te saw, awi, filmstar ni àwm tak a nih saw, mahse a pá reuh" a rawn ti zet zet a, a thil rawn sawi ber kher chu ka awih lo nasa mai. 

"I duh duh sawi suh!" ka ti deuh hmarh a, engah mah a ngai chuang der lo.

"A ni alawm, saw, en ve mah teh, a mitmeng te reng reng saw, a khawchhak ruih mai" a rawn tih leh chuan

"I sawi ho êm mai" ti hliaiin 

"Eng nge a àn hrim hrim? Eng nge i hmuh dan? Dik takin sawi rawh, i ngaihdan ni miah lo sawi belh lo bawk la" ka tih zawm leh nghal daih a, ani pawh chuan

"A puitlin hmel ka ti, a hmelah saw chuan ka sawi tawh kha, a pá reuh, chuan....ka rin ai in inhmeh daih bawk" a lo ti ṭha ve mai a, ka nui sen sen a, ani berin a rilru dik taka inhmeh min ti chu hriat a nuam ang reng. 

"Engtin nge awm a tum? A riak dâwn èm?" a rawn tih leh chuan

"Ka hre lo le, riak se chu ka duh a, mahse amah zâwk sawn riah a inthlahrun ka ring, zanriah erawh a ei ang" ka lo ti ve mai bawk.

"Riak turin sâwm la a ni mai alawm, i thute chu a awih áwm êm mai a, a bialnu alawm i nih" a rawn tih leh melh melh a, ka nui deuh sak ta ringawt.

Ka pa leh Zosiama chu an inkawm tui ang reng hle a, kan inngaizawng tih erawh ka pa'n a la hre lo va, hriattir lam chu ka nu kutah ka dah tawp. Thingpui a inzawh rualin ka pa chu a chhuak zui nghal a, lo haw leh thuai a tum thu a sawi nghe nghe bawk. 

"I inbual duh em?" tia biain Zosiama chu ka ṭhut hnaih deuh sawt a, sitting room-ah kan pahnih chauhin kan ṭhu tawh a, ṭhenawmte inah ka nu a kal lawk a, Puitei ni se an in lamah a haw lawk bawk a, Ruata erawh a room-ah a awmin ka hria.

"A pawi chuang lo" a rawn tih chuan thawha a inbualna tur siamsak nghal mai ka tum a, mahse ka bán rekah a lo chelh chat thung.

"Eng nge?" ka ti deuh hâ a, ka nui ringawt bawk. 

"Ṭhu dun lawk ila" ti supin ka kut chu a hum zui zat a, kei pawh chuan kal sawn ka tum ta bik lo. 

"Thil ngen duh leh hrilh duh che ka nei a" a rawn ti thum dam leh dap a, thlamuang taka ngheng chung hian

"Sawi la, eng lam nge ni reng reng a?" ka lo ti dam diai a, kan awm dan chu a nuam hi a ni tawp! 

"A remchan hunah kan khuaah lo zin ve ta che, ka pu'n a hmu duh che a" a rawn tih chuan ka en chho hâ a, ka rin loh lam daih a rawn sawi!

"Engati nge? Eng thilah?" ka awah chuan mak tihna a lang tam mah mah ti ila a sual tampui lo ang.

"Ka bialnu hi hmuh che a duh a, zawhna pawh a zâwt nual mai thei che a ni" dam ruiha a rawn tih chuan ka ngaihtuah zui vang vang a, mak ka ti ang reng.

"Ka hre lo le" tih chiahin ka chhâng a, ka lû chu a darah ka nghat zawm zat bawk. 

"I unaunu kha a ṭawng duh hle mai" a rawn tih leh chuan ka nui sak a, Puitei te zawng ṭawng duh tih piah lam a ni tlat a tin a ni! 

"I riak ang ti raw?" tiin a kut hrawl tak chu ka chul den den a, ka kut nen chuan a inlen hleih khawp mai. 

"Ka hre lo le, a sâwmtu azir a ni mai" nui nghawr dat pah hian a ti deuh kher a, kei pawh ka nui ve leh ta ringawt. 

"A nih chuan riak rawh aw" ka tih zawm nghal a, ṭawngkâa mi chhâng lovin min buk khum nghut a, kan awm dan chuan thla a timuang hliah hliah! 

"Eng nge chawhmeh kan siam ang? Eng nge i duh?" ti siam siama ka ṭhu ṭha chiah chu min rawn fawp thut a, chhán lêtna hman pawh a awm lo. 

Min fawh nawn leh tâkah chuan khawizu thlum tui tak in ang mai hian ka lo fawp lêt ve tawn tawn a, a inlâk hran lai te chuan kham lo zet hian ka meng diar diar a, ka harhfim tulh tulh a, ka zak ru hnuhnawh viau leh nghal.

"Zanah kan chhunzawm dâwn a nia" kiai suk hian a rawn ti a, ner khum náng pahin a darah chuan ka chum taih a, a inbualna tur siamsak tumin ka tho zui nghal ta daih bawk. 

Rei rial lovin Zosiama inbualna tur chu ka peih fel thuai a, riah a tum deuh sa hrim hrim nge pawh ka hre lo, towel a rawn keng thlap a, mahse riah tum lovin haw leh nghal tum zâwk ta se chuan ka ngaihtuah leh viau ang. 

A inbual chhung zawng chu tih tur em em a awm rih lo bawk nen ṭhutthlengah ka lo ṭhu ngawi reng deuh tawp a, bathroom aṭanga a lo chhuah chuan kawr a ha vek tawh a, a inbual zawh rualin bathroom chhungah a inthlak nghal a nih ka ring.

Ka nu chhuak pawh a rawn haw ve leh tâkah chuan Zosiama nen sitting room lama ṭhuin an ti melh melh a, kei erawh ei rawng ka bâwl ta daih a, tlai chhe lutuk lovah Puitei pawh a lo thleng ve leh mai bawk. 

Ei rawngbâwl dunin thil kan sawi dun malh malh a, Zosiama chungchang sawi nuam a ti lutuk erawh ka khap leh tawp ṭhin, thil pawi a sawi pawh a ni chuang lo, mahse sawi nuam a ti leh lutuk chu ka thik deuh tlatin ka hria.

Zahpuiawm tak ka ni!

Vawk sa awm tho mah se bawng sa zâwk kan siam a, alu nen tui neiin aieng leh purun vâr te nen ka kàn pawlh a, cooker-ah ka phit a ni mah zâwk! 

Sa hi chu cooker-ah hian han phit ila a hmin hma mai bakah a hmin rual duh hle a, hmanhmawh châng phei chuan thil hmin har deuh hlek ho hi chu kan phit tlangpui ṭhin. 

Anṭam tui hâng neiin kan chhum leh a, Puitein an thil bàwl tui zet a va lá hnuhnawh leh bawk a, kan buai viau nà chu a nuam ang reng phian! 

Zosiaman kan in ngeia zanriah a kil ve dâwn vang nge pawh ka hre lo, chhung leh khatte nena chaw kan ei khawm ṭhin lai ai khan ka phur fê zâwk tlat!

"Terem, inbe lawk ang hmiang?" ei rawng kan bàwl laia ka pa min kohna chuan ka thin phû a tirang nghal dep dep a, ka nu kâ aṭangin Zosiama nena kan inkâr a hre tawh a ni hrim hrim. 

"Aw...aw le" tiin an room-a a lut chu ka zui lut ve nghal mai bawk. 

"Engati nge min va hrilh har ve?" room chhunga kan awm dun hnu chuan a rawn ti ta ngei a, ka lo kun ngal ringawt, nuam lo ka ti ve reng. 

"Nichin mai khan i nu'n min hrilh a, Zosiama nen hian in lo inngaizawng reng a ni màw?" a rawn tih leh chuan ngawih tawp zawng a dikin ka hre ta bik lo. 

"Nia, eng lo, Zosiama nen hi chuan kan inhriatna a rei tawh, ka hrilh vat lo che erawh min hrethiam dâwn a nia pa" ka ti ve ta sep a, awm a nuam duh lo khawp mai. 

"Hmâna thingtlânga kan awm lai khan in lo inngaizawng tawh a ni maw?" a rawn ti leh nghut a, ka tân Zosiama chu a duh lo ni mai te'n ka hria, nge ni a, ka ngaihbel mai mai zâwk!

Ni lo, ni lûl suh se! Ka pa hian a duh lo thiang lo, ka tân Zosiama hi mipa ṭha tak a ni tih a hriatthiam ngei a ngai a ni! 

"Aw" tih chiaha chhângin ka ngawi deuh vang vang a, ani paw'n zawhna dang min zawh belh tawh lo va, chungte hlei hlei chuan ka awm a tinuam lo zual. 

"Ih...eng lo a nia pa, ka hrilh ngam lo che a" inthlahrung aw tak hian ka ti sep a, ani erawh a la ngawi reng thung. 

"High School kan kal laia kan inngaihzawn thu pawh kha ka hrilh ngam lo che a, chuan Zosiama nen hian kun tam tak chhung kan inhmu lo ta char char a, mahse a mak lutuk pa, tum loh deuhin kan inhmu leh a" ka tih zawm leh ta melh melh a, ka ṭawng dan vel chu tlawn ka ang mah zâwk, ani lah a ṭawng duh tawh mai bawk si lo. 

"Zosiama hi ka tân i duh lo em ni pa?" ka ti leh ta nge nge a, chu chu a rilrua awm lian ber a nih ka ring hmiah bawk. 

"Engati nge min hrilh loh?" a rawn ti leh daih a, za lo zet hian ka ṭhen lui sak a, ka pa lungawi chiah lo hmel chuan ka awm a tinuam lo ru tak zet. 

"A chhan chu i duh loh ka hlau a" ka tih chuan

"Eng vangin maw?" a rawn ti nghet leh charh a, tim ru zet hian ka en chho a, min lo en chiang khawp mai. 

"Ih....eng lo....dik tak chuan kan dinhmun ka khaikhin a, keini ai an lo awm thei lo deuh zâwk bawk si a, Zosiama hi min duhpui loh ka hlau êm a ni pa, mahse a lan dan ang hi a ni lo, a fel lutuk, mipa ṭha tak a ni asin pa, keini angin hausa lo mah se" ka tih zawm mawlh mawlh lai chuan

"I hlim em?" a rawn ti khauh a, ka lo buk khum nghat nghat a, ngawi zui ta mai lo chuan

"Ka hmangaih em em bawk pa, ka ngaihzawng neih hmasak ber a ni a, ka mipa hmangaih hmasak ber a ni bawk a, engkimah a tawp ber ni se ka duh bawk a ni" ka ti zui leh zat a, ka ṭawng zo chiah chu ka thaw chhuak hak bawk. 

"A nih a hmangaih ve che em?" a rawn tih chuan

'Aw' tia chhan nghal mai ka tum a, mahse ka ngawi ta daih, a chhan chu ka beng hriatah Zosiama hian min hmangaih thu a la sawi ve lo tlat a tin a ni!

"I hmangaih angin a hmangaih ve che em?" a rawn ti nawn leh ngat a, ṭhen lui sak pah hian

"Ka hre chiang chiah lo" ka ti ta ringawt a, ka chhán dan chu ka pa tân chuan a ngaihṭhatthlak loh ngawt ang ka ring.

"Kal tawh rawh, Puitei a lo buai hman lutuk ang e" thil dang daih a rawn sawi tâkah chuan kei pawh chu room aṭangin ka chhuak ve nghal mai a, ka rilru erawh a kal ding khawp mai.

Ei rawngbáwl pah te chuan Zosiama chu ka en leh reng ṭhin a, ka hmangaih leh hma mah mah emaw ni te ka ti ta rum rum, ani lah chuan min hmangaih tak angin awm tho mah se min hmangaih thu min la hrilh ve hauh si lo. 

Puitei thil sawi te chu ka ngaithla liam vel ta mai mai a, rilruah thil dang a awm thei tawh lo tlat a tin a ni! Ka pa rilru tur ka dâwn a, a fanu tân hian mipa ṭha tak a duh dâwn tih ka hria, keiin Zosiama duh eng ang mah ila ani erawh chuan a pawm lo thei tlat, a chhan chu a zawhna tawp ber kha ka chhâng hlei thei lo tlat alawm, ani tân zawng ngaihṭhatna chî a ni lo hrim hrim.

Zanriah kan ei te chu ka tum ang paw'n ka ei tui lo zo vek a, Zosiama lakah ka pa chu ṭhain be suam suam mah se ka awm a nuam thei lo va, a kham hmasa berah ka ṭang nghe nghe a, Puitei paw'n ka kham hma lutuk chu mak a lo tih hmel khawp mai.

Mi dang chaw ei lai chuan pâwnah ka awm mai mai a, khua a thim fel chauh ná chu arsi an lang de sep sep tawh a, thla pawh a éng ṭha hle. Ka rilru ah ka pa zawhna kha a ri nawn tluk tluk a, Zosiama lakah ka vui nge pawh ka hre lo, ka awm dan chu ka hrethiam bik lo a ni.

Min hmangaih lo chu ka ti dawt ngam lo va, mahse min hmangaih leh hmangaih loh ka hriat chian fak theih lohna lai tak chuan ka rilru a kamki tlat thung lawi si. 

Rilru leh ngaihtuahna chu mal tak mai hian a vák rawlai a, chhánna ka mamawh ang hmu thei tur leh dawng thei tur chuan Zosiama ka zawh a ṭul tih ka hria, mahse zâwt ta ila ka thinlung tikeh sawm vek thei thu ka dawng ang tih ka hlau tho bawk si. 

Van lam chu hawi vang vangin ka maimitchhing zawm zat a, ka pa zawhna mawlh khan ka rilru a luah ngut ngut a, engtia han awm ber tur nge pawh ka hre lo. Ka ṭhutna lam pana lo kal thawm ka hriat rual chuan ka meng zui nghal a, hawi erawh ka hawi lo thung. 

"I ṭha em?" thum dam dapa min rawn betu chu a hmel hmu kher lo mah ila Zosiam a ni tih ka hre thei nghal. 

"Immm....ṭha e" ti sepin ka awm dan pangngai chuan ka awm reng a, ka ngaihtuahna chu a inkawkalh nawk nawk a ni ber. 

"Dâwt sawi lo la" dam thluama a rawn tih leh chuan ka ṭhen sak a, ka awm dan aṭangin a lo hrethiam nghal vek a ni mah nà le!

"Ka rilru a buai deuh mai mai maw le" ka ti leh ta ringawt a, zâwt dâwn ringawt ila hun thawl ṭha zâwk ka melh ru deuh bawk si, amah zâwk chuan min zâwt chhuak ang tih ka hlau ru ta hle. 

"I ei puar maw? I va'n kham hma ve a, mi dang an kham tawh hlawm em?" ka ti leh zung zung a, ani ve thung chuan

"I rilru buai chhan chu min han hrilh la, i àwm a nawm phah mai thei asin" a lo ti daih a, a aw chu hriat a nuam hle bawk.

"Nakinah law law sawi dun zâwk ang, ti rawh lut ila, mi dang an lo kham vek tawh phei chuan tihfel a ngai dâwn a" tih leh thawh ka rual a, ka kut hum chatin a rawn ding ve nghal a, min chhuk melh run pah hian

"Harsatna i neih chuan min hrilh hreh lo la ka duh, i bulah ka awm reng ang, ka tiam a che" thlamuanawm aw tak hian a ti thum hniam ruih a, ka nui ta var var.

"Nakinah ka hrilh ang che, tunah zawng a hun rih lo êm mai" ti siam siamin a kut hrawl zet chu ka bêng thek thek a, ani pawh chuan

"Aw le, mahse theihnghilh awih lo, i theihnghilh a nih paw'n ka hre reng dâwn a nia" a rawn ti ve ta sup a, ka biang chu a piai leh zeuh kher bawk. 

In chhunga kan luh chuan mi dangin chaw an lo la ei mial mial hlawm a, Zosiama ber chu ka en deuh hû ta ringawt, eng vanga kham hma ve ringawt nge a nih lah ka hre der bawk si lo. 

Sitting room-ah kan pahnihin kan ṭhu ta daih a, mi dangho chuan min rawn ngaihsak lutuk lèm lo bawk a, eng eng emaw ni kan sawi dun melh melh a, a chângin ka nui leh sen sen ṭhin a, dik tak chuan a bula awm a hahdamthlak ngawih ngawih ka ti lo thei lo.

A haw hun tur te, Krismas hman a tum dan te chu ka zâwt a, ani paw'n pangngai tak hian min chhâng ve mai zel bawk. 

Mi dangin chaw an ei kham sap sap rualin ka che chhuak nghal a, Putein chaw eina dawhkan a tifel a, keiin thleng ka sil a, mi dang erawh sitting room-ah an ṭhu ṭhap thung a, Ruata pawh ka pa bulah a ṭhu ve ran a, ka pa nen hi chuan an inngaina chiang a ni! 

Puitei chaw eina dawhkan tifel zo chu ka bulah rawn dingin Zosiama chungchang bawk min sawipui leh a, a ṭawng pah chuan Zosiama lam a va hawi phei leh zeuh ṭhin a, han thikna pawh ka nei tawh lem lo, a mizia kha a ni ve hrim hrim bawk a, ngaih khatah ka ngai tawh a ni ber.

"In inhmeh phian ka ti" a ti deuh chhen a, ho viau angin lang mah se chu thu chuan ka rilru a va tihlim ru veng veng si êm. 

"Kan inhmeh lo thei náng" tia ka chhán te chuan a lo ner nawk a, mahse Zosiama nena kan chanchin bawk chu a sawi zawm leh nghal zel tho. 

Thleng ka sil zo va, ka pa chuan thingpui lûm turin min rawn ti a, kei paw'n ka lûm zui ve nghal mai bawk. Thingpui lûmna bulah Puitei nen chuan kan awm leh deuh chawt a, hmeichhe awm dun tih takah sawi tur pawh kan ngahin ka hre leh pek hle. 

Dâr 8 a pelh tâkah chuan Puitei paw'n haw zâi a rel zui chu a ni mai a, in kawt thleng ka thlah a, scooty-a a lo kal avangin a haw awlsam khawp mai. 

Puitei ka thlah zo in chhunga ka lut leh chu sitting room-ah chuan Zosiama chiah a lo ṭhu tawh a, mi dang an lo bo duak chu mak ka ti hman ang reng, Zosiama lah chuan mi rawn panin pâwn lamah min hruai chhuak nghal daih a, mahse pâwna kan awm dun tâkah chuan pawi tihna em em pawh ka nei chuang lo.

"Hetia tei kual mai mai hi a nuam reuh ê, ti raw?" kut inkai riala kan kal dun lai chuan ka ti sep a, thum dam dap hian

"Immm....." a lo ti ve mai a, boruakin a zir bawk si, nuam ti veng veng tak ka ni!

"Min hrilh tawh la?" kan ngawih dun vang vang hnu chuan a rawn ti sup a, 'eng maw' tia zawh lêt ka tum hman úk a, mahse a zawhna awmzia chu ka hrethiam nghal thuai thung. 

"Eng lo a nia Zosiam" ti hmasa tê tê phawtin

"Ka pa nen kan inbia a, i chanchin kan sawi a" ka tih zawm zat a, chutah keimah bawk chuan

"Zawhna pakhat min zâwt a, mahse inring tâwk takin ka chhâng thei lo va" ka ti leh nghal a, a hmel chu ka en chho ran bawk. 

"Eng zawhna màw?" tiin min melh chhuk ve ta run a, nui sak pah hian

"Min hmangaih leh hmangaih loh maw lè?" ka lo ti dam diai a, nui lui chu ni tho mah ila ka pa nen kan inbiak lai ang em em kha chuan ka chhungril lam a tawt ru ṭun tawh hran lo thung. 

"Engtin nge i chhán?" ka dar tawn tawna chelh pah hian a ti sup a, kei pawh chu ka nui tawh miah lo bawk. 

"Ka hriat chian chiah loh thu ka sawi" tih leh hmun dang hawi ka rual a, kan inen reng a nih chuan ka rilru a nât leh ringawt ka hlau, ni lo, a dam zân lo sa reng tawh zâwk chu a ni e.

"Ka hmangaih chein i hria em?" a ti hniam leh ruih a, kan mit pawh a intawng leh ta nge nge.

"Hmangaih chuan ka hria a, mahse i sawi ngai si lo va, ka pa kha inring tâwk takin ka chhâng thei ta lo a ni" ka ti sap a, chu thu ka sawi zo chu a ngawi zui vung vung a, ka awm nuam lo chuan

"Thil dang sawi daih ang, a ho êm mai ti raw" ka ti leh ta ringawt a, min chelhna kut nawr piala inlâk hran mai ka tum chu min chelh nghet khawp mai.

"Ka hmangaih che tih hi i hre lo em ni Terem?" a tih chuan ka ṭhen deuh sak a, kan thil sawi lai nen a inkungkaih bawk nen ka ngaithla liam puat a, mahse thuk leh ril zâwka 

"Ka hmangaih lutuk che" a rawn ti nawn leh chiah chu keimahah danglam a awm nghal a, ka zâm ti dâwn ila ka zâm der si lo, ka tha ni se a khur ru tlat bawk si, ka rilru chu a buai nuaih nuaih ta mai.

"Vawi za tam piang nawn leh dâwn pawh ni ila nang bawk hi ka hmangaih tho ang che, a chhan chu ka tân chuan nang tluka hlu hi ka nunah an awm lo" thinlung fan rawih rawih khawpa fiah leh ngaihthlak nuam hian a ti dam leh dap a, ka hmui ka lo pet fan fan a, ka ṭah chhuah em em chhan chu ka hlim lutuk vang ni berin ka hria.

"Ka lawm e Zosiam" ṭah chhuak aw zet hian ka ti deuh ṭiau a, nui lui ve teh mah ila ka mitmeng aṭang leh ka awm dan aṭang chuan engkim a hrethiam nghal vek dâwn tih ka chiang a ni.

"Kei hian alawm lawmthu hrilh tur zâwk che chu nì, khatiang khawpa thinglung hliam leh nâ khan ka siam che a, mahse nang chuan min hmangaih avangin min pawm leh a nih kha ti raw" ti dam dap dapin ka sam chháwl lêng chu ka bengah a zep a, ṭah chhuak em em hian ka lo melh chho kar ringawt, a bak tih theih dang ka nei rih tlat lo a tin a ni!

"Nang ka hmangaihna che hian kumkhua a daih loh paw'n ka dam hun chhung a daih ang" amah bawk chuan a rawn ti ril leh ruih a, ka insum thei tawh ngâng lo.

"Zosiam" ti ṭiauin ka kuah zui nghal thlawp a, hun kal tawh suangtuah lêtin kan bul ṭan leh dan zawng zawngte nen lam ka mitthlaah a rawn lang zut zut a, hlim lutuk avanga lungchhe lek lek hiala ṭap feih feih chung hian ka kuah nghet zual sauh a, min rawn kuah lêt ve chiah phei chu ka him hliah hliah ni berin ka hria.

"Ka hmangaih che" ti leh ṭiauin a âwmah chuan ka hmai ka nawr nawk nawk a, hlim lutuk avang hian a lo ṭah theih tih ka hre ve chiah!

"Imm....ka hria alawm" ti dam ruihin ka hnung chu a chûl hliau hliau a, ka khabe chawi riai riai pah hian ngawl vei theih khawpa zún nei chuan min fawp zui vang vang bawk a, khawi hmun mah ka thlahlel tawh lo; a kianga awm chauh lo chu!

"I rilru buai ru deuh chu a reh tawh em?" ka bianga mittui la châmbâng ka tuai puat puat lai chuan a rawn ti leh sup a, pà zet hian a kiai suk bawk. 

"Engmah rilru hahna ka nei tawh lo" nui sen sen paha ka tih chuan

"Khawi, keima'n" tiin ka hmai chu a kut hrawl lûm nuam zet chuan a rawn hru hul zui nghal zat a, a mi khawih a dam bawk si, dawnsawn nuam tak zawng chu a ni chiang e. 

"Kan haw tawh dâwn em ni ang, ka chhungte an ngaih a lo ṭha lo palh ang" ka tih tâkah chuan inkuah rialin in lamah kan phei a, kan inbe tam lo nà chu kan rilru erawh a va inthlunzawm hneh si êm! 

In chhung kan luh chuan an room aṭangin ka nu a lo chhuak ve nghal a, Zosiama chu mikhual room-a riak turin a hrilh a, puan sin tur leh engkim a buaipui fel vek tawh thu a sawi nghal nghe nghe bawk. 

Zosiama pawh mikhual room lam pan chuan a kal ve nghal mai a, ngawi renga a phei nul nul ringawt pawh chuan ka mit a va tikham lo chiang tehreng êm, hmangainna hi chu a mak ve ngawt mai! 

End of Chapter 11