WAY BACK INTO LOVE By Havali Adam (CHAPTER 10)

WAY BACK INTO LOVE 

By

Havali Adam

Chapter 10

Min la fawp reng chung hian min châwi deuh lawp a, kei pawh chuan ka kein a kawngah ka lo kherh bet nghal chial a, ka hnunga a kut hrawl tak che vel te chuan thuk takin min fan a, engkim chu a danglamin a nuam ngawih ngawih hi a ni tawp! 

A tukhum sam chu ka ṭham salh salh a, kan hmui ni se a la inbawhthuah mawlh mawlh reng a, dik tak chuan chutiang rénga thil dawnsawn nuam leh ka rilru leh taksa zawng zawng tidanglam vek thei thil chu ka la tawng ngai lo. 

Tunah erawh ka tawng ta a, chu pawh ka hmangaih Zosiama nen ngei a ni a, lungkham reng awm tawh lohna hmun hahdamthlak lutukah ka awm ni maiin ka hria. 

Ka lak ata a inlâk hran hnu chuan ka la thaw deuh halh halh a, thlaler ram rova tuihal dangchar lutuk ang hrimin ka chil chu ka lem leh dawk a, ka thin phû pawh a la rang ṭha dawt dawt khawp mai. 

Ka mitmeng te reng reng chu a la pangngai thei lawk lo leh ta nghal a, min thunun hneh lutuk leh kan thil tih zawh tâk chiah avanga ka danglam nasa lutuk chu a awihawm loh hial zâwk a ni. 

Ka hmai zawnah a thaw lûm ham ham a, chu ringawt pawh chuan keimahah nghawng a nei nasa em em a, a kutzungpuia ka hmui a tuai neuh neuh lai te chuan thin phù dep dep hian ka lo thaw deuh halh halh a, ka bianga rawn fawp leh zeuhin min kuah ta hle hle a, kan inkuah laia a gas off thawm ka hriat rual chuan thil hriat chhuah ka nei zui nghal bawk.

"Awi!" ti hluaiin min kuahna ata chu ka inlà hrang thuai thuai a, engtin nge ka thingpui chhùan lai ka theihnghilh theih zâwk pawh ka hre lo.

"Ka off tawh alawm" a lo ti sup a, chhán pawh ka chhâng lêt tawh lo, ka awm dan avang chuan ka zak hnuhnawh kher mai. 

"Ka'n siam ang e" ka ti lái rât a, nichin lawka kan awm dan avang khan min hmuh hniam sawt loh hram ka beisei. 

"Immm....tui deuhin aw" a lo ti dam thluam ve leh sup a, nui var var chungin thingpui chu ka siam zui nghal mial mial bawk. 

Thingpui ka siam zawh hnu chuan ṭhutthlengah kan ṭhu phei ta daih a, inhnaih lutuk lo, mahse inhnaih deuh tho si hian kan ṭhu dun a, dik tak chuan khan ka châk, a taksa nghenga ṭhut àwn duai chu ka châk, mahse ka nu a lo chhuk thut ka hlau bawk si a ni.

"I lû chu eng nge a àn? A ṭha zel em? A nâ tawh lo em?" ka ti siam siam a, ani pawh chuan

"Ka ṭha tawh e" a lo ti ve mai a, min en chiang ngâng bawk si a, ka lái leh ringawt dâwn a nih chu! 

"I danglam tawh ka ti, chuan hmân ai khan i ṭhang lehzualin ka hria" ka ti leh ta sep sep a, kan pahnih chauha hun kal tawh sawi dun mai mai chu a nuam dâwn riauin ka hria. 

"Chuti maw!?" mi thlek deuh vung vung pah hian a ti thum dut a, en lêt ve ran pah hian

"Aw, i taksa hi a lian zual, chuan i mizia pawh hi a danglam tawh tawp, i ṭawng duh lo sâwt si" ka ti niah niah a, nui nghawr datin a bân ding lam zâwk chuan min rawn kuah a, hahdam hmel taka a nui leh suk ṭhin te chu ka awm a tinuam veng veng thei.

"E...chuan...in khuaah ngaizawngtu che an awm a ni maw? Min han hrilh teh, pa Ngaiha te khan min hrilh vek a nia" ka ti zawm leh ta mawlh mawlh a, ka bân bul tuai zeuh zeuh pah hian

"A ho lutuk" a lo ti sam mai a, kei erawh chuan ho ka ti ve teuh lo. 

"Min hrilh ṭha mai mai teh, ka hre chiang duh, a tak tak a ni em?" titau aw zeta ka tih tan tan lai chuan ka biangah a rawn piai zeuh a, min en ren chung hian a nui leh suk bawk. 

"Phakar suh aw, min hrilh loh chuan ka lungâwi lo khawp ang" tih leh min kuahna a bân hrawl zet chu nawr pial ka rual a, min kuah leh rang khawp mai. 

"Sawi i tum bawk si lo" tia thawh ka tum ut a, min pawt lêt chiang lutuk chu a mal chungah ka ṭhu tharh a, titau rilru zet hian thawh ka tum nawn leh ngat a, mahse ka thei der lo.

"Min thlah teh!" ka ti deuh hmarh chu nuih za aw deuh hian

"I naupangchhia êm mai Terem" a lo ti daih a, meng rum luiin ka melh hrep ringawt. 

"Sawi a har loh loh nen" ka tih leh salh tâkah chuan

"Min ngaizawng a, mahse ka ngaizawng ve hleinem, i thik pawh ka lo ring lo asin" a rawn ti ve ta nge nge a, kei chuan zawhna mitmengin ka lo la melh kal thung. 

"Ngaihzawng pakhat chiah ka la nei, chu ka ngaihzawng kumhlun chu nangmah hi i ni a, i ni reng bawk ang" ti hniam ruihin ka hmuiah a rawn fawp zeuh a, chutianga a chet chu ka lo ring lâwk bawk si lo nen ka meng kiau a, ani pawh a awm ṭha ve leh nghal mai bawk.

"Kan inṭhen chhan kha keimah ka ni a, khang kum liam ta chhung zawng khan engtiang chiahin nge min lo huat ṭhin?" a mal chunga la ṭhu reng chungin a âwmah chuan ka bei thlep a, min kuah nghet sauh pah hian

"Ka thluak chhung aṭang hian paih bo vang vang che ka duh ṭhin, mahse ka thei lo, nep ka inti thei hle bawk" a ti thum bul bul a, ka lo maimitchhing sawk a, ka inthiam lo ru vawng vawng bawk. 

"Hmuh leh che ka inbeisei tawh lo va, hmuh leh che pawh ka duh tawh hek lo, mahse kha mi ni, kan inhmuh leh hmasak ber ni aṭang kha chuan ka rilru ah nâ taka siam lêt ve che a lian ta ber a, nâ takin ka siam ta rèng che a, mahse kha thil kha ka thil tihsual lian ber a ni" a tih zawm leh dap dap a, ka khawngaih ngawih ngawih! 

"Ka tih nât che khan nang lêtin ka nâ zâwk mai thei, ka chapo lûatah ka chân hlen ṭep bawk che a, ka chân hlen lo che erawh khawvela mipa vannei ber ka ni" ti hniam ruihin ka chalah a rawn fawp zeuh a, kei pawh chu ka meng ve leh ta nge nge bawk.

"Engmah hrilh chiang lo chea ka ṭhen tawp che avang khan tihpalh aw, a hun lai kha chuan ka nu leh pate lung ka tiâwi lo ang tih ka hlau êm a tin a ni!" ka ti zawi sap sap a, thlamuanawm zet hian min lo en run a, ka khawngaih thar lutuk chu a hmai ka chûl ta ringawt. 

"Ka tihpalh aw?" ka ti nawn leh sep a, ka ṭah chu a rawn chhuak zek zek a, nui lui ngial mah ila ka mittui chu a rawn tling ta tho. 

"Immmm....kei paw'n thiam lohna tam tak ka nei alawm" dam dap hian a ti thum chhal a, ka thaw chhuak ham ham a, kan inkâr engkim hahdamthlak tawh lutuk te chuan ka ṭah a tichhuak zual dâwn dâwnin ka hria. 

"Ka hmangaih che Zosiam, inṭhen leh ka duh tawh lo" lawm avanga ṭah chhuak em em hian ka ti thawp raih a, zún nei lutuk tak maia min fawh tâkah chuan ka lo chhâng lêt ve tawn tawn a, chal insi riala kan awm hnuah pawh ka thin phû chu a la pangngai hlei thei chuang lo.

Ṭhu ṭhain thil dang kan sawi dun ta melh melh a, an hnathawh leh tur lam te, an thawhna hmun tur thlengin min hrilh ve mual mual a, chutiang taka kan inpawh tawh lutuk chu nuam ka ti tak zet! 

A sawi dan chuan khaw dangah hna an thawk leh dâwn a nih hmel a, ka ngaihtuah rauh rauh a, phone kaltlangin inbe thei dâwn tho mah ila a tak ngeia kan inhmu tam thei lo tur chu ka huphurh ru ang reng khawp mai.

Chutia kan ṭawng melh melh lai chuan ka nu a rawn chhuk a, Zosiama chu a be nghal siam siam a, kan inkâr engkim, hun kal tawha mi leh kan hun tawn mêka mi nen lam thlenga a hriat aṭang khan a nêl lehzualin ka hria, mahse tuna ka rilru tibuai ru bertu pakhat chu ka pa a ni.

Ka tân Zosiama hi a duh lo ang a, kan inngaihzawn pawh a phal lo ang tih ka hlau ru reng a, dam chuan Krismas hmang tura Aizawl kan chhuk hunah Zosiama nena kan inkâr dik tak hrilh ka tum bawk si, harsatna pakhat mah tâwk tawh lo ila ka ti ngawih ngawih, a chhan chu Zosiama nen hian inṭhen thei kan ni tawh lo. 

Ka thinlung zawng zawngin ka hmangaih a, ani paw'n min hmangaih ve ngei chuan ka hria, a kâ aṭang erawh ka la hre miah lo thung. 

A pawi lo, a pawi ka ti lo, min hmangaih tih ka hre tho alawm, hai theih loh khawpa chiangin min hmangaih tih ka hria, ka hre chiang a ni. 

A ṭawng zawnga a hmui che rulh rulh te, naupang chhe zawk zawk a ni tawh lo tih hriat zeta a hmel upa ve ta ruih te, a biang thau lam lek lek te leh a taksa chhah muk ṭha em em te chuan ka mit a titlai hle a, an thusawi ngaithla pah reng hian ka lo en leh veng veng ṭhin a, min rawn melh zauh châng chuan ka lo nui leh sak ṭhin bawk.

Hmangaihtu mitah zawng a hmangaih hmel, che zia leh engkim chu famkim lohna khawvela piang ni ve lo ang hrimin a va hmuh famkim theih si êm!

Ka nu'n thingpui lûm leh tura min tih tâkah chuan ka tho zui ve nghal mai a, gas bula dingin Zosiama chu ka en leh veng veng a, ka thingpui chhùan erawh a hma ang ngawt chuan ka ngaihthah tawh bik lo. 

A hmasa zâwk kha zawng kan boruak khan a zir êm a, engmah hre chang lêk lo khan ka awm a, ka thingpui chhúan lai pawh Zosiama zâwkin a off hial a nih kha!

Thingpui ka va pêk lai chuan kawngka a rawn inhawng deuh thut a, Sir Chhuantea hmel ka hmu hmasa ber a, a hnungah a ṭhiante an lo lut ve nghal bawk. 

An rawn luh dan teh thut chu ngaih te pawh an tiṭha lo dâwn alawm lé, kawngka pawh an kik hmasa lo a nia, mahse eng thil pawi mah a thleng lo turah ngai ang. 

"Lo lêng r'u, thingpui ka lo siam ve nghal ang che u aw" pangngai deuh hian ka lo ti siam siam a, Zosiama hmel ka hmu chiah chu ka inthlahrung nghal rawk rawk thei. 

"Min lo siam nghal mah la a pawi miah lo" Sir Chhuantea chuan a lo ti ve mai a, zan dang ang lo takin rim dang a nàm lo va, a harhfim kâk bawkin ka hria. 

"Meizial zúk in phal em khá?" tiin an zinga pakhat chuan min rawn zâwt a, mahse chhánna pawh kan pêk hma hauhin a ṭan chu a ni nghal der. 

"Zu r'u zu r'u" ka nu chuan a lo ti ṭha ve mai a, mahse a ngaihdan erawh a nih hmel vak lo thung.

"Kha, i rawn kal leh a ni maw?" Sir Chhuantea lam chu ka hawi thuai a, a mi biak pa Zosiama ve thung chuan ngawi reng hian phone a khawih mual mual a, chhán a tum loh hmel khawp mai. 

"Ka biak che chu i hre na nge?" khauh deuh hmuk hian Sir Chhuantea bawk chuan a ti nawn leh siah a, thil a kal dik dâwn lo tlatin ka hria. 

"Tlangval, i va'n ngampa ve a?" ka ṭawng hmain ka nu zâwkin min lo ṭawng khalh hlauh!

"Ngampa pawh a ni lo ka pi" Sir Chhuantea chuan a ti ṭha ve leh mai a, mahse ka nu erawh a hmel aṭangin a ngaihdan a pel tawh tih a hriat hle thung.

"A nih a hnu, mi awm ṭha hle hle lai tihbuai chhen loh tur che alawm" ka nu aw chu a chang fak a, a ṭawngkam pawh a nélawm tehchiam lo hle.

"Ka tibuai pawh a nih loh khâ ka pi" tiin Sir Chhuantea chuan a ti ve leh a, Zosiama leh midangho chu an lo ngawi ṭhap a, kei tak pawh inrawlh ka tum lo hrim hrim.

Sir Chhuantea leh a ṭhiante ho chu thingpui in zawh aṭanga rei lo tê hnuah an chhuak ta dam dam a, ka thaw a veng huai thei. A nihna takah chuan Zosiama nen an inkâr a ṭha lutuk bawk si lo va, buaina a chhuak leh mai ang tih hlau ru reng rengin ka awm reng a, ka nu awm ve hlauh lo phei se chu an inchhâng deuh hmuk hmuk mai thei a ni. 

"Ka'n haw hnai ang e" dâr 9 leh a chanve dâwnah Zosiama paw'n a raw ti ve ta sup a, short cut kawng a hriat thu min hrilh aṭang kha chuan lêng rei ve deuh ṭhin mah se pawi ka ti hran lo, ngaihtuah erawh a nâ duh ṭhin khawp mai.

"Ka lo thlah ang che" tiin kan inzui chhuak a, inhnaih deuh hian kan kal dun a, kan inbe miah lo thung.

"Lut nghal mai rawh, kei pawh ka'n haw nghal ang e" ti supin ka sam chu ka bengah a zep den den a, ka hnâr tawk zeuhin ka biang chu a piai pah zeuh bawk.

"Ka biang hi i piai ve ziah" nui chunga ka tih chuan

"Khawih a nuam êm alawm" fiamthu lo tih hriat deuh tak hian a lo ti thum bul a, ka nui leh tawp ringawt.

"Nang kha!?" thawm lo chhuahna lam chu kan hawi rual ṭhawt a, Sir Chhuantea leh a ṭhianteho lêk chu lo niin! 

"Teremi hi rawn rim tawh suh ka ti che a ni lo'm ni?" khauh hmuk hian Sir Chhuantea bawk chuan a rawn ti leh ngat a, Zosiama lam chu ka hawi chho thuai bawk.

"Engah mah ngai suh" ti supin Zosiama chu bike-ah a chûang zui mai a, Sir Chhuantean a pan hnaih lai chuan lo dang vatin

"Eng nge i hriat a?" a darah ka lo nam a, a rim aṭang chuan zû a in tih ka hre nghal a, mahse a rui hauh lo thung. 

"Lo awm sawn lawk teh!" ti deuh hmuk hian min nam sawn a, awm hla ta mai lova a dâra ka vuan leh chu min nghawk sawk a, ka tlu zui nghal thlawrh nghe nghe.

"I inchhir hlauh ang e!" ti hniam chhurtu Zosiama thinrim aw ka hriat rual chuan ka hawi chhuak vat a, Sir Chhuantea nen an lo indin chilh run tawh a, engtik lai khan nge bike aṭang chuan a lo chhuk ka hre miah lo.

"A ve mai mai che chuan!" tih leh Sir Chhuantea chuan hnek a rual zui nghal a, mahse Zosiama chu a hnek fuh miah lo. 

Hneh zet hian Zosiama chuan a rek bet chawt a, chawi kang deuh lawp pah hian leiah a nghat thla rawp a, dimna tel hauh lova Sir Chhuantea hmai a hnek ri siah siah phei chu hlauhthawnna hlirin ka khat a, ka tha a khur a, tih tur ber pawh ka hre lo, thin pû dawt dawtin an insual lai chu ka thlir tawp ringawt!

Chutah Sir Chhuantea ṭhiante zinga pakhat chu lo inrawlh ve leh nghalin Zosiama lamah chuan a tlan hian a tlan phei a, ka hlauthawng lutuk chu ring zet hian ka lo rak chhuak tuarh a, ka mit ngeiin Sir Chhuantea leh a ṭhiante'n Zosiama an sual rawn lai chu ka thlir tlawk tlawk a, ka tha a khur nasa bawk si, ka hlauthawng bawk si, engmah pawh ka ti thei lo. 

Vanneihthlak takin pa Hneha a rawn chhuak ta hlauh a, ṭhenawm khawveng an lo pung zel a, kan thawm ri nuaih nuaih hriain ka nu meuh pawh a rawn chhuak chho ve ta hial a, chutah pa Hneha chuan insual ho ṭhelh a tumna lamah kut a la tuar zui, Sir Chhuantea leh a ṭhianteho mawlh chu an va han zak lo hrawk hrawk hlawm tak! 

Ṭhenawm khawvengte an rawn pun belh zel tâkah chuan insual pawh an ṭhelh thei ta hram a, vanneihthlak takin Zosiama ber chuan nâ engmah a nei lo hlauh a, Sir Chhuantea leh a ṭhiante erawh an thi phung hlawm a, a bikin Sir Chhuantea ber chu a nâ thawkhat hle a ni ang, kawtlai ah chuan a mu zawi hnuang a, chet pawh a che hlei thei lo. 

Ka bula ding ngawi run pa kut chu nghet zet hian ka hum ran a, nasa takin a la thinrim tih ka hria, a insum nasa hle bawk. Ka in luah lamah Zosiama chu kan chhukpui ta daih a, chutin pa Hneha pawh nâ lutuk a ni lo hlauh a, mahse thinrim erawh a thinrim khawp mai.

In chhung kan lut chu ngaihtuah deuh hian hliam a neih leh neih loh ka en kual zung zung a, ka bul lawka lo awm ve reng ka nu pawh a áng deuh bawrh bawrh a, Zosiama laka Sir Chhuantea leh a ṭhiante awm dan chu a mawi lovin a lungawithlak loh ve êm bawk a ni. 

"Nâ i nei lo tak tak ti raw?" ka ti thawp raih a, hliam àwm rèng ka hmu miah lo chu ka lawm ru hle. 

"Ka ṭha" ti nghutin hmun dang daih a en run a, ka kut chuan a hmaiah ka khawih a, min en ve ta chauh bawk. 

"Haw thuai la a ṭhat ka ring Zosiam, buaina dang i tâwk leh palh ang" ka tih chuan a rawn thaw chhuak ham ham a, zep thu cheng lo, a la thinrim tak zet a ni. 

"Ni e, haw tawh rawh, nang pawh han thlah thuai thuai rawh Terem, keini lah khaw mi leh sa dik tak kan ni bik bawk si lo" ka nu chuan a lo ti ve hlawk hlawk a, Zosiama pawh a tho zui nghal chu a ni mai.

A bike húnna thleng ka thlah a, khawmuang tawh lovin a tlan haw zui nghal nal nal a, dik tak chuan ka hlauthawng a ni. 

Ka nu sawi ang khan keini lah khaw mi leh sa dik tak kan ni si lo va, Zosiama ni se a ni bik bawk si lo, a chungah thil ṭha lo a thleng leh palh ang tih ka hlau ru ngawih ngawih, sawisak rawn a tâwk leh a nih hlauh phei chuan thil pawi tak a thlen hial ka ring a ni. 

An khua a thlen áwm velah ka call a, mahse a lo la thleng lo deuh chu niin, amah zâwkin in a thlen hnuah min rawn call lêt a, ka mi ngaihtuah berin him dam taka in a thleng ta chu ka thaw a veng huai bawk. Mu chungin ka bia a, a ṭawng dan aṭang chuan a thin a rim tawh lutuk lo bawkin ka hria. 

Kan inbe rei ta phian leh nghal a, kan tawp khar dan te chu a lungawithlak hliah hliah! Ngaihṭha deuh hian ka muhil zui ta vang vang a, zinga ka tho te reng reng chu ka zâng vâh a, Zosiama nen kan inngaihzawn ṭhat leh hnu aṭang hian zing thawh nawm loh ka neih áwm pawh ka la hre lo.

Tukṭhuan kan ei laiin ka nu chuan Sir Chhuantea leh a ṭhianteho laka ka fimkhrur a ngaihzia te, Zosiama pawh a fimkhur a ngaihzia te chu min hrilh melh melh a, buaina awm thei laka inthiarfihlim hram hram zel turin min hrilh chamchí bawk. 

A ni lah tak a, buaina nei zawnga inhnamhnawih ka duh reng reng lo, a theih chuan pumpelh hram hram ka tum ṭhin zâwk!

Nizan erawh kha chu loh theih loh thil a ni a, Sir Chhuantea leh a ṭhiante khan bul rawn ṭan hmasa lo se chuan eng buaina mah kan tâwk lo ang ka ring. 

An lo lén lai aṭang tawh khan Zosiama lakah an hel ru tlat a, ka nu phei chuan a lo chhan deuh nghe nghe a nih kha!

Chutah Zosiama haw tur an lo chang leh hram a, engkim kha an thiam loh a ni ka ti lo thei lo. An mi zuam erawh an zuam sual chiang hlein ka hria, awm lo ta ila chuan kha aia nâ leh rapthlak zâwk khan Zosiama kut an tawrh ṭheuh ka ring. 

A nihna takah chuan an sual rawn bawk si a, ka lo hlauthawng em em kha a nia, mahse vanneihthlak takin a chan chhe zâwkah Zosiama a ṭang lo hlauh a, a kutthlak an dáwl lo hlawm viau bawkin ka hria.

School ka thleng chu Sir Chhuantea hmel rèng hmuh tur a awm lo va, a lo kal pawh ka ring chiah lo, nizana thil thleng avang khan a sil thawkhat hle ka ring. Engmah thleng lo ang maiin ka awm hmiah hmiah a, ni dang ai ka ṭawng a kal zual viau bawk. 

Class lâk loh lai chuan kan Head nen kan titi deuh reng a, mi dang erawhin class an lá vek thung a, kan Head kâ aṭang chuan Sir Chhuantea a lo kal dâwn loh thu ka hre nghe nghe bawk.

Ni leh thla a ral zel a, December thla pawh kan chûangkâi ta nge nge a, thlasik boruak dik tak a ni tawh a, kei lah chuan tlâng hrilêng ka la kâi zui! Ka hritlâng hrawk za a reh hlei thei lo va, Aizawlah kan haw thla ṭep tawh tho ti rilru chungin damdawi in pangngaiah pawh ka inentir duh lém lo va, mahse hritlâng damdawi erawh ka ei reng tho.

Tin, Zosiama nena kan inkâr pawh a nghet zual zel a, khaw dang daiha hna an thawh leh tawh avangin a lo lêng khât ang reng hle a, min hrilh dan chuan an hnathawh lai chu an zo thuak tawh a nih hmel. 

An khaw lama haw an tum hun nem lam min hrilh ve thlap a, zan lamah hian kan inbe deuh ber zel a, a hna thawhpuite paw'n kan inngaizawng tih an hre vek tawh nghe nghe.

Khuma ka mut hle hle lai chuan ka nu aw, inlêng chhawn ri chu ka hre liam puat a, ka hritlâng a la reh theih loh avanga pindana awm daih pawh ka ni! Ka nu chuan kan inlêng chu a lo be nghal siam siam a, a nél hmel viau bawk. 

"Teremi a awm na nge?" ti thum bultu aw ka hre chiah chu ka meng fiah deuh kâwk a, Zosiama ngei niin ka hria, mahse natukah an khuaah an haw dâwn chauh khan ka hre bawk si, ka ngaihtuahna chu a buai ta map mai. 

"Awm e, tun lai chu a hritlâng ve deuh a, ka va kai tho ang e" tih leh ka nu chuan pindana lo luh a rual a, ngawi reng hian ka lo en kar ringawt.

"Zosiama a lo lêng a nia" tih chiah sawiin a chhuak zui leh nghal mai a, kei pawh chu thovin pindan aṭang chuan ka chhuak a, kan ṭhutthlenga lo ṭhu run pa chu Zosiama a ni tak tak!

"In hnathawhna khuaah i la awm emaw ka tia?" ka ti thâm ṭiak a, ṭhutthlengah chuan ka ṭhu thla zui zat bawk. 

"Ka rawn haw hma bik ta mai" ti hniam ruihin min nuih suk a, zawhna mitmeng hian ka melh deuh kal a, naktuka haw tur zanina ka hmu teh hlawl chu mak ka ti a ni ber.

"Engati maw?" ka tih chuan

"Ka hmu châk tawh che maw lè" a lo ti ve nghal a, ka nu zawngin ka hawi kual vat a, bathroom-a a awm lai tak a lo ni hlauh! 

"Sawi zawi deuh rawh" ti sar sarin a bânah chuan ka chum taih a, min la kuah deuh thut zui! 

"Heih, ka nu a lo chhuak thut ang e aw" ti tan tana tal chhuah ka tum chu min kuah nghet sauh a, chiang lutuk tak mai hian min fawp zawm zat a, a awm dan aṭang chuan min ngai ve deuh emaw ni!

"Min ngai a ni maw?" intithei rilru taka ka tih chuan

"Immm...ngai e" a lo ti thum dam thluam a, lawm a va kim si êm!

"Ka ring reng a!" tiin ka nui sen sen a, làih loh ka tum tehreng nen ka lai ta tho. 

"A nih nang?" meng zim sun hian a rawn ti ve khauh a, min en deuh run bawk. 

"Ngai nasa mai" uar fahrana ka chhâng chu a lo nui ruh ruh a, ka mitah hi chuan a va han pà ngawih ngawih tak! 

"Kan innang a nih chu!" ti thum bulin min kuah deuh rawk a, ka khan titih nghal chial bawk.

Bathroom kawngka a rawn inhawng thut erawh a rang a rangin ka inlà hrang nghal thuai thuai a, inngaizawng eng ang mah ila ka nu hmuhmawh zawnga awm ka tum teuh lo, ka duh lo hrim hrim bawk. 

Kan inngaizawng tih nen lam hre vek tawh mah se ka awm dan a mawi loh chuan ngaimawh chin a nei dâwn tih ka hria, chu chu thleng lo se ka duh a ni.

Ka nu chu pindanah a lut tlang daih a, Zosiama nen chuan hun min pe ni berin ka hria. Rei lo tê hnuah ka pate nena an inbe thawm ka hre ta thuai a, Zosiama nen pawh chuan kan inṭhut hnaih tawh hle. 

Kuah erawh kan inkuah tawh lém lo va, rei kan ṭhut dun hma chuan thingpui lûm turin ka tho ta daih bawk. 

"Engtikah nge Aizawlah in haw thlak ang?" ti supin thingpui chu a in a, kei pawh chuan

"Kumin atân tun kâr bak School kan kal tawh dâwn rih lo bawk a, kâr leh lamah khian chhuk kan han tum deuh chu a nia, tum angin kan awm thei ang emaw!" ka ti siam siam a, Aizawla kan chhuk hunah phei chuan ka ngai zual ngawt ang ka ring. 

Thil dang sawi chhunzawm daihin dâr 9 leh a chanve vel thleng a léng a, a haw dâwn chuan kawt thleng ka thlah leh thlap a, a tlan liam thlengin ka thlir zui vang vang a, ka ngai ru nghal veng vengin ka hria. In chhunga ka luh leh hnu chuan ka nu leh pate pawh an lo la inbe reng a, an biak dan aṭang chuan kei leh Zosiama ang bawkin an inngai ve hle tih hrilh hranpa ka ngai lo.

Ruata chanchin zâwtin an inbiakna ah chuan ka inrawlh ve ta nge nge a, Ruata fel thu hlir leh thu a awih thu hlir hriat tur awm te chuan min tihlim tak zet a ni. 

A takah ka hmu châk tawh, dam chuan kâr leh maiah chhuk tawh dâwn tho mah ila chhungkaw kima awm khawm chu ka phur sârh tawh a, ka tân chuan chhungkua hi a hlu êm bawk a ni.

Zan khat chu Sir Chhuantea a lo lêng leh hlawl a, Zosiama laka a chet dan avang leh ka laka a chet dan mawi lo zet avang khan ngaihdam min rawn dil a ni ber a, rui lo hai lo na fâm chu a zak tih a hriat hle bawk. 

Kei paw'n a ngaihdam dilna chu ṭha deuh hian ka lo pawm ve mai a, ka nu erawh a lo ṭawng ve vak lo va, a la lungawi lutuk lovin ka hria. Rei pawh lêng lovin Sir Chhuantea chu a haw leh thuai a, pangngai takin lo dawngsawng lo ila chuan nuam lo a ti zual ngawt ang ka ring.

Kâr thar a rawn inher chhuah leh tâkah chuan keini nufa pawh Aizawl lam panin kan chhuk thla ta vang vang a, kawng lakah Zosiama nen kan inbe deuh reng a, eng a hria nge ni, amah zâwk hlirin min rawn be hmasa ṭhin a, min ngaihtuah chu thuhran ni se, min ngai ni berin ka hria. 

Kei tak paw'n ka ngai nghal viau a, Krismas hman pawh min tiphur lo zo vek te'n ka hre hial a ni. 

Kan in kan thleng chiah chu Ruata leh ka pa'n min lo buaipui zung zung a, inkuah liam liamin kan nui ho leh dar dar ṭhin a, Ruata phei chu a zak thar deuh ni te'n a lang. 

Phone-a kan inbiak lai ang em em khan a ṭawng duh leh tawh miah lo, ka pa lahin a fiam nasa thei bawk si, zep thu cheng lo, Ruatan ka pa a nèl tawh dan chu pui tak a ni; hmuh theih khawpin a nêl! 

Zanriah kan ei te chu kan hlim tlâng hle a, ṭawng kan inchuh loh leh kan infiam leh bawrh bawrh ṭhin a, chhungkaw kima kan inhmu khawm leh thei chu a hlimawmin ka lawm tak zet a ni. 

Tin, Puitei paw'n zana an ina lêng turin min sawm lâwk dim diam tawh a, ka lén ngei chu a ngaih hmel. Ka rualin Ruata pawh hruai ka tum nghe nghe a, ani paw'n min hnial ka ring lo, a duh ve ngei ka ring zâwk! 

Ruata fel em emna pakhat chu kan thu a awih tlat hi a ni a, ka pa thu ngat phei chu hnial enah a en lo hrim hrim, awih tak a ni! 'U Terem' min ti mai zel a, chu pawh ka pa'n chutianga ko tur chuan a lo hrilh tawh vang a ni nghe nghe. 

Min han 'u' ta mai te, thisena inzawm leh unau piang hmun ang maia kan awm te hlei hlei chuan ka hlimna a belhchhah a, ka nau dik tak angin ka en tawh ti ila a sual tampui lo ang.

"I va han inla reh thei ngat ngat ve lè Lal Terem?" kan inhmuh rual rualin Puitei chuan a ti nghal bawrh bawrh a, ka nui tawp ringawt! 

"Lo kal teh, thil hrilh tur che ka ngah teh mai a nia" ti leh nghal zatin a room lamah min hruai phei ta daih a, ka ngaihtuah ruk ber Ruata pawh Puitei û te ho nen an inkawmin ka hria. 

"Thingtlâng boruak nge nge chu i thu phah deuhin ka hria?" tiin ka hmai vel chu a en kual a, nui var var pah hian

"Thu ve bawk ang chû, Aizawl nen a inang thei hleinem, thil hrilh tur che ka nei a nia, mahse min hrilh tur ang ang sawi hmasa phawt rawh" ka ti ve ta bawrh bawrh a, ani lah pek chuan

"Aih, sawi hmasa leh si zâwk rawh, ka hre châk tawh a nia, sawi thuai thuai teh" lo ti deuh tlatin min tur lêt ta chhên zâwk za mah a, phur thak ang mai hian a la phur em em zui! 

"Eng lo a nia....ngaihzawng ka nei a" ka ti chiah chu ring leng lawng hian

"Awi! Tu!? Tu nge? Mipa maw!?" a lo ti zung zung a, che chhuak thuaiin a hmui ka hupsak tawp ringawt.

"Mawli! Hmeichhia ka nih hi, mipa ni lo se hmeichhia ka ngaizawng dâwn tihna em ni? Mawl leh lutuk mai, bengchheng miah lova i ngaithla dâwn a nih loh chuan ka sawi tawh dâwn lo" ka ti ve ta tlat a, min tlawn rang khawp mai. 

"Aw le Boss, ka ṭawng ring tawh lo ang. Sawi chiang thuai thuai teh, engtin nge ngaihzawng i neih thu tun thleng thlenga min la hrilh loh theih zâwk!?" ti tan tanin a ṭawng tawp lam phei chu min chhuahchhal titih a, ngaihzawng ka nei ngai lo ve êm bawk a ni. 

"Eng lo a nia....enteh....kha....thingtlânga High School ka kal laia ka bialpa ka tih pa kha i la hria em?" ti hmasa tê têin ka sawi tlang nghal ta lawk lo va, ani pawh chuan

"Hriat te chu hria e, engati nge chutiang daih daih min zawh?" a lo ti ve hliai a, a awm dan leh a hmel aṭang chuan engmah a hrethiam lo tih a hriat hle bawk.

"Tuna ka ngaihzawng, ka bialpa ni mêk hi kha pa kha a nia" ka ti chiah chu

"Enga!? Eng nge i sawi awmzia hî?" a rawn ti chul a, a mak ti lutuk chu ka nui leh tawp ringawt!

"Aw, amah kha a nia, a mak ti raw? Kum tam tak liam hnuah kan intawng leh a, kan inkawp leh dan awlâi viau lo mah se tunah chuan induh tawn takin kan inkawp ṭha leh tawh asin" hlim ru zet hian ka ti siam siam a, ka mitthlaah chuan Zosiama hmel a lang zut zut pah reng bawk. 

"A mak ê" a ti deuh vawng vawng a, kei pawh hian tun thlengin mak ka la ti ve tho, mahse khuanu remruat kan nih ka ring nghet bur tawh thung. 

"I sawi tâkah chuan kha pa, hmâna i bialpa bak kha ngaihzawng emaw bialpa i neih àwm ka hre leh tawh miah lo" ti deuh puat puata chawl datin

"Awi, a mak dawrh dawrh ê Terem, in intawn loh kârin kum a tla nasa tawh ropui bawk si" a tih zawm leh nghal a, mak a ti bâng thei rih lo a ni ber e!

"Nia, a mak ve ngawt mai. Ka hnathawhna khuaah Tanky siamin a ṭhianteho nen hna an rawn thawk a, chuti ni lo se chu kan intawn leh pawh ka ring tawh lo. Chuan, thil mak deuh pakhat alawm, khang kum liam ta chhung zawng khan kei tih loh ngaihzawng dang a lo nei tawh ngai bik lo reng reng" ka ti leh ta zel a, sawi nuam ka tih viau chhan chu ka hlim vangah ka puh tawp!

"A hming kha eng nge kha!? Ka hre tawh miah lo, nang lahin i sawi tawh ngai bawk si lo" min ṭhut hnaih sawt paha a rawn tih chuan

"Zosiama" ka lo ti dam diai a, a hming ka sawi zawng ringawt te chuan ka rilru a luah veng veng thei ni mai te'n ka hria.

"Ni tak e, mahse a hming hi a chiang teh tawp ê Terem, koh duat deuh dan te a awm lo em ni?" nui var var pah hian a rawn ti leh nghal zat zat a, chutah amah bawk chuan

"A hmel ka hmu châk, eng ang hmel pu nge ni ang lè?" a tih zawm leh a, chhán enah pawh ka en lo, Zosiama hmel awm dan ka sawifiah thiam lo hrim hrim bawk. 

"Maw!? Sawi teh, a hmelṭha em? In inhmeh loh vaih chuan ṭhen leh nghal ang che, nangni ang hmeichhe nú zên hi chuan mipa pá tak nei ula in inhmeh tlangpui" a ti leh ta mawlh mawlh a, zawhna min zâwt hnem nghal miah miah khawp mai.

"A ṭha a ni tawp mai, ka sawi thiam lo, a pà bawk si, mahse inhmeh min ti kher ang em ka hre lo, i hmuh hunah i hre chawp ve mai ang" tiin kei pawh chuan ka chháng ve ta nge nge.

"A nih nang ve, eng nge min hrilh i tum chû? Min hrilh tur i nei ṭeuhin ka hria?" ka ti zawm ta daih a, thil dang sawi lovin min hrilh zui nghal melh melh ve mai bawk. 

Rei lutuk awm lovin Ruata nen chuan kan haw rual leh a, bike a lo khalh thiam tawh hlauh bawk nen kal lama kan inphurhna ka pa bike ngei chuan ka inphur haw leh a, naupang tê e ti lo hian thil a thiam chak phian mia. Nge ni a, mipa a nih vang hrim hrim zâwk!

Mipa hi chu awlsam tê hian thil an thiam zung zung bik zel a, ka awt ṭhin. Kei phei chu vawi eng zah nge ka pa'n scooty min leisak a tum tawh ang, ka khalh thiam loh chu thuhran ni se, ka huphurh tlat a, a thlaa thla dâwn khalh ka zir hnuah pawh ka thiam thei chuang lo, ka rilru hian a zuam ngâng lo a ni mah nà!

Nî te chu ral bek bekin kâr lovah Krismas pawh kan hnaih zual zel a, hun pui a nih ang ngeiin ṭhen leh rual, chhung leh khatte pawh an lo haw kim diah diah hlawm khawp mai. 

A ṭhen phai lam aṭang te, a ṭhen chu khaw dang aṭang te an ni nawk hlawm a, keini thlahte ho phei chu Krismas thlen hma hawtin chaw ei khawm kan nei deuh chhen tawh nghe nghe. 

"Aw Hello" tiin Zosiama phone call chu ka chhâng zángkhai vah a, inlêng kan nei bawk nen pâwnah ka chhuak zui ta daih!

"Eng nge i tih a?" thum dam ruiha a rawn tih chuan

"Ka bia che" ka lo ti fiamthu hliai a, ka chhán dan avanga a hmel awm dan tur vel chu ka mitthla zawm zat bawk. 

"I ṭha em?" a awah chuan danglamna pakhat mah a lang lo va, kei angin a nuih a za ve lém lo a nih hmel. 

"Ṭha e, nang zâwk?" ka tih chuan

"Immm.....a nih min ngai em?" a rawn ti ve leh nghal a, hetianga mi biak hi a hrat ṭan dâwn riau niin a lang. 

"Ka sawi duh lo e a!" tiin ka khi var var a, nuih erawh ka nui ri miah lo thung. 

"Sawi teh, min ngaih thu han sawi teh" inlà thu nei deuh taka a rawn tih chuan

"Sawi ta ila eng nge?" ka lo ti ve tlat a, chuti maia sawi ka tum bik lo, chu bakah chutianga han fiam der vel chu nuam ka tih zâwng tak a ni. 

"Sawi la i hre mai dâwn alawm, vawi khat chauh pawh han sawi teh" a rawn ti deuh mawlh mawlh a, ri meuhin ka nui chhuak ta tawp ringawt.

"Eng chu nge i hriat roh lé Zosiam, nge ni a, fiamthu i thawh ve zâwk?" nui sen sen pah hian ka ti hliai a, fiamthu thawh a inhmeh lo lutuk chu ka nuih a tiza zual!

"Min ngai em Terem?" tia ka zawhna nen inperhsan daih thil min rawn zawh leh tâkah chuan

"Ngai ve e, kan inawm hlat rih bawk si, i ngaihawm vung vung lutuk Zosiamlian, min ngaih thu sawi hreh pa, nang paw'n min ngai lutuk tih ka hre vek a nia aw" ka ti ṭha ve ta nge nge a, hlim zet hian ka nui zui hak hak bawk. 

"Dam chuan naktukah kan inhmuh ngei ka beisei" a rawn ti leh daih a, a duh duh a sawi ni maiin ka hria.

"Fiamthu tawh lo teh Zosiam, i inhmeh ve hlawl lo" tiin ka nui dir cher cher a, chutah ka rin loh deuh hian

"Ka fiamthu hleinem, ka ti mai mai lo a nia" a rawn ti thum bul bul a, ka nuihza pawh a reh nghal duak thei. 

"Heih, lo kal i tum tak tak em?" ka tih chuan

"Tum tak tak e" a lo ti sam mai a, mak ka ti tulh tulh!

"Eng ti turin máw? Hna lam thil maw!?" ka ti leh chu nghet churh hian

"Nangmah hmu tur chein" a rawn ti dam ruih a, lo kal a tum tak tak a nih hmel. 

"Dâwt i sawi lo ti raw?" ka ti leh hram a, thui tak ka ngaihtuah thlen hman avanga zâwt nawn leh deuh kher pawh chu ka ni! 

"Sawi lo, hmu tur chea lo kal i remti chiah na nge?" a rawn ti ve leh ta khauh mai. 

"Remtih loh lam pawh a ni lo, lo chhuk tak tak la ka ti zâwk" ring fahran lo hian ka ti zawi sap a, zep lo chuan ka pa nen pangngai taka inhmelhriatna nei se a ṭhat ka ring.

"Chuan....fimkhur hle la aw, rawn tlan chak miah suh ang che" keimah bawk chuan ka ti leh nghal zung zung a, thil dang kan sawi hnuah rei inbe tawh lovin kan inbiakna pawh chu kan titawp zui ta daih bawk.

End of Chapter 10