WAY BACK INTO LOVE By Havali Adam (CHAPTER 9)

WAY BACK INTO LOVE

By

Havali Adam

Chapter 9

"Engati nge nizan khan i kalna hmun tur pawh sawi miah lova i chhuah? Sawi teh Zosiam, ka rilru hi a la nuam thei ngâng lo" kan ngawih dun vang vang hnu chuan ka ti thawp sap sap a, min kuah nghet deuh salh pah hian

"Thingpui kha i in ve bawk si lo va, thil ei châk i neih tâkin ka tia, ei tur lei ka tum maw lé" a ti thum bul bul a, nizan lama thil thleng kha ka ngaihtuah chhuak leh lo thei lo a ni.

"Sawi tal ta che, vawi khat mah khatiang khan awm tawh suh!" ka ti deuh tan tan a, tunah chuan ka ṭah chhuak lutuk pawh tlêmin a zia ta deuh!

"A nih nizan khan eng thil chiah nge thleng?" ka ti leh a, kan awmdan chu a la ngai reng bawk.

"School-a i thawhpuipa nena kan han insual kha a ṭhiante min lo khawih rawn nghal a, chu zawng chu a ni mai" ngaihsam hmel deuh hian a ti hniam sup a, ka rilru chhungril la ipik lutuk chu ka thaw leh hak ṭhin ringawt. 

"I mawl ka ti ngawih ngawih" ka ti leh ta thlâwt a, zep thu cheng lo, ka rilru a hah bawk si, sawi mai tur ka hre tawh bawk si lo a ni.

"Immm.....ka mawl alawm, nang ka neih lêt leh theihna che a nih phawt chuan mawl zel pawh ka inhuam alawm" thum dam dap hian a rawn ti a, ka awm dan siam remin kan inhma chhawn ta ran a, a mitah tak ka en kal bawk. 

"Bul ṭan ṭhat chu i la duh fán em ni?" zuai raih hian ka ti thawp sap a, tihnât belh hlau ang hrim hian ka kutin a hmai chu ka zût den den a, ka mittui pawh a rawn hnai leh kuar tawh! 

"He khawvelah hian nang nena hlim taka awm dun baka duhthusam ka nei lo Terem" thum chhala min chhànna avang chuan ka ṭap nghawr dat dat a, ka biang tawn tawn chu a kutin a rawn khuap nghal thuai bawk.

"A nih chuan min tiam rawh, i laka beiseina nei nawn leh ngam tawh lo tur khawpa nâin min siam tawh lo ang tih min tiam rawh" ṭah chhuak em em hian ka ti ṭiau a, nâ nawn leh tur chuan kir leh ka duh tawh lo a ni. 

"Ka tiam a che" thum hniam ruiha tih leh dam em ema min fawh a rual zui zat a, a inlâk hran lai te chuan ka lo ṭah nuih hak hak ringawt; sawi tur pawh ka hre lo.

Engmah sawi tawh lovin kan inkuah ta hle hle a, nautê ang mai hian min sukpui deuh dalh dalh a, ka thla a va han muang tehreng êm! Min kuah ngheh tluk zetin ka kuah nghet a, kan taksa chu insi lova awmtir kan duh lo ve ve ni berin ka hria. 

Chutia thlamuang taka ka bei hle hle lai chuan thawm dang hi a rawn awm a, thil hriat chhuah ka nei nghal zawk a, mahse ka tlai mah mah tawh! 

Pindan kawngka bula ding ngawi reng hian ka nu chuan min en tawn zak zak a, ka zak bawk si nen insawifiah dan tur ka ngaihtuah nghal char char a, ka nu lah chu engmah sawi lo hian inphih fai turin a phei ta daih leh nghal a, Zosiama ni se engmah sawi a tum bawk si lo, ka nu lakah chuan inthlahrun a nâ duh ngei mai. 

Tih tur hre lo leh sawi tur hre lo zet hian ka sam te chu ka tuai leh puat puat ringawt ṭhin a, ka awm dan chu ka sawi thiam lo, a nuam lo hi a ni tawp! 

Ka nu hmel ka hmuh leh te chuan biak tum deuh ûk, mahse lài ru bawk si hian ka awm a, ani ni se min biak a tum hmel loh bawk si, a va'n nuam lo ru ngawih ngawih tak! 

"Nu" tiin ka ṭawng chhuak hmasa ta nge nge a, Zosiama pawh chuan ka rilru a hriatthiam ngei ka ring. 

"Eng lo a nia, ih...." ka tih deuh nawk lai chuan

"Tukṭhuan ei hunah min hrilh law law dâwn a nia, thingpui in duh ve ve ang ti raw?" a lo ti daih a, a aw chu a zángkhai vah a, ka hrethiam lo hman ang reng hle.

"Aw....aw le, nia, aw, kan duh ve ve ka ring" phuailuai deuh hlek hian ka ti leh ta nawk nawk a, ka ṭawngkam hrim hrim chu a dik hlei thei rih thlawt lo.

"Zosiam, a hâng nge a thlum i duh ang?" a tih leh chuan Zosiama paw'n 

"A hâng ka lo duh ang e" a lo ti ṭha ve mai a, ka nu awmna lama phei pah hian

"Khawi nu, keima'n ka lo siam ang, lo va ṭhu mai mai zâwk rawh" ka ti zung zung a, thingpui chu ka siam zui nghal ta sawk sawk bawk.

"I lû chu eng nge a àn? I tho nuam maw?" tiin ka nu chuan Zosiama chu a biak zawm ta daih a, engmah hre lo ang mai leh pangngai taka a awm deuh tlat te chuan ka awm a tinuam lo zual daih zâwk! 

"Ka ṭha tawh lutuk e, ka tibuai viau mai che u a" Zosiama pawh chuan a lo ti ve mai a, thingpui siam pahin an inbe thawm ka ngaithla reng a, ka nu awm dan ber chu mak ka ti a ni. 

Thingpui ka va pék lai te chuan pangngai deuh hian a ṭawng melh melh reng a, kei min biak dan pawh ni dang nen danglamna pakhat mah a awm lo. 

La hma ang reng viau mah se ei rawng ka bâwl ta daih a, ei rawng ka bàwl laiin pu Hneha a rawn lêng thla hlauh bawk a, tlêm chuan nuam ka ti lo lutuk pawh a zia chho ṭan deuhin ka hria. 

Pu Hneha chu a lêng ta reng a, Zosiama pawh eng eng emaw ni hi a zâwt nual a, nizan lama thil thlen dan kimchang mai bakah hna lam thlengin a sawipui lûam a, a betuin a zir vang nge pawh ka hre lo, Zosiama chu a ṭawng duh ve khawp mai. 

An ṭawng loh kârin ka nu a lo inrawlh ve leh zauh zauh ṭhin bawk a, kei erawh ngawi rengin ei rawng ka bâwl mial mial thung. 

Pu Hneha haw aṭanga rei lo tê hnuah tukṭhuan ei zâi kan rêl zui nghal a, chaw ei lai chuan ka nu chu a ṭawng siam siam a, Aizawla kan chhuk thlak rual tur thute chu a sawi ta zel a, Zosiama pawh a be awl chuang lo.

"Nu, eng lo, thil hrilh tur che ka nei a" a ṭawng loh lai tak chuan ka ti chhuak ta nge nge a, Zosiama chu ka melh pah zeuh bawk.

"Han sawi la, ka ngaithla e" a lo ti sam mai a, zep tur a awm tawh chuang lo tih hre tel ranin

"Zosiama nen hian kan inngaizâwng ṭhin a" ka ti deuh sap a, chutah keimah bawk chuan sawi chhunzawm leh nghalin

"Kha, hmâna an khuaa kan awm lai khan kan inngaizawng tawh a, chuan, kum tam tak liam hnuah kan inhmu leh a, ih...eng lo...kan inngaizawng ṭha leh a" sawi nuam ti lo zet hian ka ti tluan thei hram a, mahni nute bula chutiang thu han sawi tlawng chu a nuam miah lo; hmaichhanah ngat leh nghal!

"Min hrilh daih tawh ta che Terem, in inkârah hian eng thil emaw chu a awmin ka hre rèng a ni" nuihzat hmel lek leka a rawn tih chuan

"Kan inngaizawng leh tawh si lo alawm, tukin khan kan inngaizawng leh chiah" lo ti thuaiin ka ṭawng sual tih ka inhre chhuak zui nghal a, ka chaw ei lai pawh ka tawp hmak! 

"Ka sawi awmzia chu, eng lo, ka....âaaaa....i hrethiam vek tho, ka sawi peih tawh lo" tih leh kham ka rual nghal daih a, ka nu mah ni se ka zak tho tho. 

"Chu Zosiam, tukin aṭang khan ka fanu nen hian in lo inngaizawng ṭha leh a ni màw?" nui var var pah hian ka nu chuan a ti deuh kher a, nur nang hian ka melh vak ringawt. 

"Ngaizawng ṭha leh chu a ni mai" pakhata lah chuan a lo ti sam thán leh ta nghal a, mit tizim sun hian min rawn nuih a, ka lo meng rum nasa mai.

"Naupangchhia viau lo teh Terem, puitling i nih tawh kha maw lè" ka nu min biakna pawh chu chhán ka tum tawh lo hrim hrim, pâwnah ka chhuak ta daih!

Chaw ei kham àwm velah ka lut leh a, ka luh chuan ka nu a lo che malh malh tawh a, ka pui nghal vat bawk. Ka pa hnen aṭangin phone call a dawng a, an inbiak lai chuan Zosiama nena kan chungchang engmah hrilh rih lo turin ka ti deuh sek a, Zosiama ber pawh ka awm dan naupangchhia zet avang chuan a lo nui ve leh suk ṭhin ringawt bawk.

Chaw eina vel ka tihfel hnu chuan ṭhutthlengah ka ṭhu deuh tawp a, nula pumpa ve si ka lái ru deuh tlat a nih chu! 

Zosiama lah ka bulah kher a rawn ṭhu deuh tlat leh ta nghal a, ka nu nen an inbe pah reng a, kei erawh engmah sawi ve tur hre lovin ka ngawi tawp ringawt, chutiang em ema ka làih chu ka inring bik miah lo asin lè.

Zosiama chu haw lo tura chelh ka tum viau ná a, engmah ka sawi leh ta lo law law, haw zâwk se a ṭhat ka ring. Tin, an khaw lamah chhungte a nei a, nizan pawh kha loh theih lohna avangin a riak ringawt a, a chhungte'n an lo ngaihtuah tawh viau mai thei a ni. 

Bike-a bula a din lai chuan ka melh chho ral a, haw kawngah a che sual palh ang tih mawlh ka hlau leh tawh, a lû ah hliam a nei kher bawk si.

"Ka lawm e" dam ruih hian a rawn ti thum chhal a, lawmthu min hrilh chhan erawh ka hre lo nasa mai. 

"Engati maw?" ka lo ti hû ta rèng a, nui suk pah hian

"Nâ taka ka siam hnuah che pawh min pawm leh a, ka lawm e" a rawn ti nawn leh a, hun kal tawh ka mitthla zui nghal zat bawk.

"Kei paw'n nâ takin ka siam ve tho che alawm" ka ti zawi sap a, pâwna kan awm tawh avangin ṭawng fimkhur a ngai viauin ka hria.

"I duh vang rénga min tinâ i ni hleinem, kei chuan nâtna chitin reng pêk che kha ka duh ṭhin asin" a ti thum bul bul a, dâwt sawi hmel pawh pakhat mah a pu lo.

"Sawi tawh rih lo ila, kan awmna a ualau si" ka tih chuan a bu nghut a, a hmel chu a hahdam hmel ngawih ngawih bawk.

"Kan khua ka thlen hun chu ngaihtuah i nâ leh dâwn khawp mai" sawi tum a nei tih ka hria, mahse eng a sawi tum ka hre mai lo.

"A ṭhat chu" ka lo ti deuh tawp a, chhán loh aiah ka ṭawng ve mai mai a ni ber. 

"Eng maw ṭha?" nui nghawr dat hian a rawn ti a, ka ṭawng sual leh tawh tih ka inhre chhuak zui nghal zat bawk.

"I láih hian i duhawm zual" tiin ka biangah a rawn piai zeuh a, ka lái tih a lo hrethiam vek a ni tih chu hai rual a ni lo.

"Haw tawh rawh" ka ti leh tawp a, ani lah chuan runluih aw lek lek hian

"Haw turin min duh chiah máw?" a lo ti thum chhal thung a, min din hnaih deuh sawt bawk. 

"Hetiang hian awm lo teh Zosiam, miin min lo hmu ang e" ka tih leh chuan lungawi hmel zet hian a lo bu nghut a, bandage vârin a lû intuam bur mah se nâ nei hmel reng a pu tawh lo hrim hrim.

"Bul kan ṭan chiah nà chu inngaizawng hlim hlawl ang kan ni tawh lo tih kan hriatthiam ve ve ka ring, a chhan pawh keini pahnih hi chuan hmân aṭang tawh khan inzawmna thutak kan nei tawh tlat a ni" hmel ngainatawm zeta min en chhuk run chung hian a ti dam dap a, ka lo nui sak ringawt.

"Ka sawi dik em?" hnâr tum dat paha a rawn tih leh chuan ka lo bu nghat nghat a, bike-a a chûang lai te chu ka en reng a, ka rilru leh ngaihtuahna zawng zawng luah fai vek ṭhintu nena kan inngaizawng leh thei ta tak tak chu ka lawm a ni.

"Fimkhur la aw" ngaihtuah ru taka ka tih chuan

"Min lo zui haw ve nghal mai ta che" a lo tifiamthu a, ner sak hian ka nuih sen sen a, kan inkâr kan siam ṭhatna la rei lo mah se kan han inngaihzawn leh tâkah chuan a ṭawngmawh lutuk pawh kha a kiam ta deuhin ka hria. 

"A chî nàng" ka lo ti ve mai bawk. 

"Ni e, a chî leh loh!" a rawn ṭawng dan ber kher chu a va han Zosiama ngawih ngawih tak! 

"Kal thuai thuai rawh, i chhungte paw'n an lo ngaihtuah lutuk tawh ang che" ka ti ta daih a, ani lah chuan

"Tukin khan ka pu ka hrilh tawh alawm" a lo ti sam mai a, min han nuih leh suk ṭhin te chu hmâna 'ka Zosiama' ngei kha a la ni reng tih tichiangtu pakhat a va ni chiang êm!

"In inthlah hlei thei meuh na nge?" nui var vara rawn titu ka nu lam chu kan hawi rual ṭhawt a, ka zak ru leh chem chem tawh! 

"Kal thuai rawh ZOSIAMLIAN!" tih leh a dara bén rik thlawrh ka rual nghal a, ka nu lah chu pu Hneha te inah a la lut zui nghal daih zui, ka awm a tinuam lo zo vek!

"A nih chuan ka'n kal ang e, haw thuai thuai turin min duh bawk si" ti deuh kherin a bike chu a tirum vut vut a, chutia a'n haw ta tak tak tur chu ka ui ru hnuhnawh leh ang reng hle lawi si. 

"Fimkhur rawh aw Zosiam, ka ngaihtuah teh mai che a nia" a tlan chhuak tur chu ka ti leh hram a, ani pawh min buk khum nghut hnu chuan a tlan liam zui nghal bawk.

In chhung ka lut chu a reh deuh duakin ka hria, tukverh bul ṭhutthlengah chuan ka ṭhu ngawi ran a, ka mit ka chhing zui vang vang a, ka mipa hmangaih, a hmasa ber leh a tawp ber atâna ka duh Zosiama nena kan inkawp leh thei chu Pathian hnenah lawmthu ka sawi rilru ta mawlh mawlh a, zep thu cheng lo, ka lawm a ni.

In chunga ka nu ṭawng thawm leh pu Hneha te nupa ṭawng thawm hre reng chungin in chhung chu ka tifai ta mial mial a, School kal chî ka ni rih bawk si lo, tun lai chu tih tur a vâng ṭhin khawp mai. Ka nu pawh chu rei awm lovin a rawn chhuk ve leh mai a, hmeichhia tih takah thil kan va han sawi dun hnem tehreng êm!

Ka nu hnenah chuan Zosiama nena kan lo inngaihzawn tawh dan te, a ruka kan inngaihzawn char char ṭhin thu te, engmah hrilh lova ka ṭhen tawp dan te, a rilru ka lo hliam nâtzia te, kan intawn leh hnua min huatna a nasatzia te, kan inkâr siam ṭhat ka duh luata ka awm dan zawng zawngte leh a laka beiseina engmah ka neih ngam tawh lo thu te chenin ka hrilh fai ta vek a, ka sawi lai te chuan ka mittui a rawn hnai kuarh kuarh nghe nghe.

"Hei vang a nih dâwn hi ngaihzawng i neih ngai miah loh?" ka nu chuan a rawn ti a, ka lo bu nghat nghat a, khang kum liam ta chhung zawng khan Zosiama mizia ang nei mipa ka tawn tawh loh avanga ngaihzawng nei ngai lo ka ni réng a ni. 

"I pa'n a hriat hun chu mak a ti ve ngawt ang ka ring" a rawn tih leh chuan

"Engtin nge a ngaih i rin nu?" ka lo ti ve nghal thuai a, an fanu mah ni ila kei lêtin ka pa mizia a hre chiang zâwk a, Zosiama a ngaihdan tur thlengin a hriat tlang nghal vek ka ring a ni. 

"Mak a tih loh chuan a hlim viau ang" min chhan dan chu ka duhthu a va sam lo tak, ka ngaih a tiṭha lo zo vek! 

"Mak a tih chuan Zosiama hi ka tân a duh i ring lo tihna a ni em nu?" ka ti leh ngat a, ani lah chuan

"I ngaihtuah thui nghal mah mah a ni kha maw lè Terem, hahdam deuhin awm phawt rawh" a lo ti sam mai a, ka awm a nuam thei tak tak chuang lo. 

"Min duhpui lo ang tih ka hlau alawm, a nih leh nangma'n eng nge i hmuh dan nu? Zosiama hi ka tân mipa ṭhaah i ngai em?" ka tih zawm leh nghal mawlh mawlh a, min nuih tawp ringawt!

"Sawi teh nu, i ngaihdan dik tak min hrilh teh" ka tih deuh chhen tâkah chuan

"A ṭawng tam lutuk lo ná chu a ṭhat hmel phian dâwnin ka hria" a rawn ti ve ta nge nge. 

"A tlêm lutuk, sawi belh rawh" ka lo ti leh nghal zung zung a, ka duhkhawp chhànna ka la dawng lo tlat a tin a ni!

"Kan inhriatna leh kan inkawmna a la rei lo êm a, rilrua awm han sawi ngawt pawh hi a dik ber rih lo, sual erawh a sual ka ring miah lo, a ngaihtuah thei che êm mai" tun ṭuma min chhán dan chuan ka awm a tinuam ta huai e!

Zosiama chungchang lam sawi zawm tawh lovin thil dang kan sawi ta daih a, zingkâr ang em emin ka nu lakah pawh chuan ka inthlahrung ru ṭûn tawh bik lo. 

Tukin kha chu a ngaihna a awm lo, zah tak tê khan ka zak a, min rawn hmuh dan ber kher lah khan a zir lo viau bawk si, zah lohna chî ah ka ngai lo hrim hrim.

Thei ka bâwl a, ka nu nen chuan titi melh melh pahin kan ei dun a, tih tur dang a vâng bawk si, insuk tur te ka dap kual ta ringawt a, tlêm azawng suk tur a lo awm hlauh a, dik tak chuan awm mai mai ka thiam lo a ni ber. 

Infak vang ni lo se, ka têt tê aṭang hian ka nu kaihhruaina hnuaiah insuk te, ei rawngbáwl te leh in chhungkhur chet chenin zirtir ka ni a, ka puitlin hnu hian a lo ṭhatzia ka hmu thiam ta chauh bawk.

Ka thawmhnaw suk ho chu ka pho leh thlap a, nî pawh a sâ ṭha a, a ro har ka ring lo. Chhun thil ei a rawn hun a, ei tur ka kawl mai loh avangin kan piah lawk dawrah ka va lei chawp a, eng teh lua pawh ka lei chuang lo, thingpui nena hmeh tur a ni mai. 

In lam pana ka haw leh chu khua a lo hniam deuh ruih a, nî la sâ ṭha tho mah se nakin lawka ruah rawn sûr tur ang mai hian a awm thung a, ka ngaihtuahnaah Zosiama a lo lang zui nghal zat bawk. Chaw ei kham hnu fêa chhuak a nih avangin an khua a la thlen a rinawm lo va, a la thleng dâwn lo tih ka chiang viau zâwk! 

In chhung ka lut te chu ka ngaihtuah ru reng a, thingpui ka siam lai paw'n a ni tho. Ka phone phawrhin ka call ta tawp a, mahse a lá thei miah lo, a la tlan laklawh a ni mai thei. 

Ka rin lâwk ang ngeiin rei lo tê hnuah khawpui a rawn ri dur dur a, muangchâng lo tak hian ka insuk pho ho pawh ka seng zung zung a, ruah sùr tum dan lah chu thli a la tel zui, hlauhthawn luatah thli a tleh dâwn ni mai te'n ka hria.

Zosiama chu ka call leh ṭhin a, a ring ral ṭhak ṭhak a, ka ngaihtuah dan a turu tawh lutuk, a lû ah hliam a nei kher bawk si. Vawi thum ka call hnu chuan call chhunzawm reng ka tum ta bik lo va, mahse ka rilru leh ngaihtuahna zawng zawng a va luah hneh si êm!

Thingpui kan in zo fel chiah tihah ruah chu a rawn sûr ta nge nge a, a sùr tirhin tam lèm lo mah se a sûr rei telh telh a, a tam tial tial a, a buak hian a baw hawk hawk a ni ber. 

Rilru hmun kil tinah Zosiam hlir a awm ngawt ngawt a, chhim lam aṭanga ruah a rawn sùr avangin an khaw kawngah pawh a sùr ve ngei tawh ka ring.

"Nu, engati nge ruah hi a sùr ringawt a, a sùr hun pawh a ni tawh tawp si lo" ka ti deuh tawl a, Zosiama ka ngaihtuah lutukna lamah ka awm hle hle thei lo a ni ber.

"Chutiang te ka hre bik nâng, tun laiah te chuan sik leh sa inthlak danglam dan pawh hi hmân ang khan a rin dik thei tawh hleinem" a lo ti ve mai a, ngaih a va'n ṭhat phah loh tak!

"Ka call a, mahse a lá thei miah lo va" ka ti leh ta ringawt a, Zosiama nena kan inkâr a hre vek tawh tho bawk a, ka zawhna chu a hriatthiam ngei ka ring.

"A la tlan laklawh a ni ang chû, ngaihzawng neih i pe nâ reuh hle mai ka ti, i pa ka hrilh châk tawh" tiin a nui zui hak hak a, nui hul ve hakin a mal chungah chuan ka mu ta ringawt bawk.

"Ka pa hian min duhpui lo ang tih mawlh ka hlau" ka tih chuan ka sam zût riak riak pah hian

"A duhpui mai thei che asin, a hma paw'n Zosiama nen te chuan an inhriat tawh khâ, mahse mak a tih ve viau ka ring" a lo ti siam siam a, chutah amah bawk chu ṭawng zawm leh nghalin

"A chhan chu ngaihzawng i neih àwm a hre ngai bawk si lo va, a tân chuan mak tih loh theih pawh a ni lo hrim hrim" a ti zui leh sap sap a, ka pa rilru tur ka dâwn a, ka nu sawi chu a dik hmel khawp mai.

"Engtik thleng nge School in kal dâwn?" a rawn tih tâk daihah chuan

"December thla tir vel thleng niin ka hria" ka lo ti ve mai a, Krismas a hnaih leh tawhzia te, kan chhuk hun tur te thleng chuan a sawi melh melh a, kei erawh ngaihtuahna kawmin ka lo ngawi reng thung.

Tlémin ruah chuan hàn lam a hnaih a, mahse do chî ziazâng a la ni lo, a la sûr tam ṭha pangngai khawp mai. Khawpui a rik loh leh kâwl a phe leh zawk zawk ṭhin a, rilru hahdam deuha mut mai mai a châkawm tehlûl nen ka thei der bawk si lo. 

Tukverh darthlalanga ruah mal per chhawk chhawk ka en reng lai chuan ka phone a rawn ri thut a, Zosiama hming ka hmuh rualin ka là nghal vat bawk. 

"I missed call a lo awm nual a?" aw zângkhai vah, thum dam em em tho si hian a rawn ti sup a, kei erawh chuan

"I thleng tawh em?" ka ti nghal thuai thung a, ka aw aṭang chuan ka ngaihtuah hle a ni tih hriat a har lo khawp ang ka ring.

"Thleng chiah lo deuh, mahse khaw bul maiah ka awm tawh e" a lo ti ve mai a, tlém chuan ka awm pawh a nuam ta deuh!

"A nih i lû kha eng nge a àn? A la nâ viau em? Bike i khalh ṭhat theih loh phah em?" ka ti leh ta zung zung a, khua chhe kher lo se chuan chutiang em ema ka ngaihtuah chûk chûk chu ka ring lo. 

"Ka ṭha e" a lo ti tawi sup a, zawhna ka zawh chhawn nasat nen min chhâng tawi kher mai.

"I ṭha tak tak maw?" ka ti leh hram a, ka ṭawng ring tawh hran lo va, pindan lama ka nu muhil chu tihharh ka hlau hnuhnawh hle bawk.

"Imm....ka ṭha alawm, min ngai nghal a va ang ve?" a rawn ti thum bul bul a, a nuih a za deuh te'n ka hria.

"Fiamthuna chî a ni miah lo a nia Zosiam" ka ti ta hlak a, ka tum ai ka aw chu a vin daih nghe nghe.

"Ka hrethiam che alawm, min ngaihtuah lutuk suh, i rilru tihrehawm loh bawk la" thlamuan aw zeta a rawn tih chuan ka thaw chhuak hak a, keimah leh keimah pawh chu ka inawih lo hial zâwk, engati nge ka ngaihtuah em em mai lè, a chungah thil ṭha lo a thleng ang tih mawlh ka hlau a ni.

"Nia, a nih, ka dah mai aw" ka ti ta ringawt a, an khua a thleng ṭep tawh tih leh harsatna a tâwk lo tih ka hriatna hrim hrim chuan ka awm a tinuam tho tho e.

"Zanah ka rawn bia ang che" a tih hnu chuan keimah zâwkin kan inbiakna chu ka hmet tawp zui nghal zat bawk.

Tlai thlengin ruah chu a tla cher cher reng a, a hán thei lo a ni ber. Khaw thim fel hnuah pawh a la sûr reng a, chaw ei khamah sir Chhuantea a lo lêng lut a, a lo lêng hrim hrim pawh tih tawh nâk a laiin khaw chhiat lai laia a lo lêng chu a peih ka ti, lo lêng tawh miah lo pawh ni se pawi ka ti lo khawp mai. 

Zan dang ang lo takin zû rim a nâm lo ve tehmial a, mahse thil dang rim nâ deuh rim a nàm thung, eng rim nge a nam pawh ka hre chuang lo. 

A ṭawng duh ber leh a ṭawng hnem berah a ṭang leh ta nghal a, inlêngte an ni ve bawk sia tiin thingpui ka lûmsak a, chutih lai chuan Zosiama hnen aṭangin phone call ka dawng a, min rawn biak a tum thu min hrilh kha a theihnghilh lo a ni ngei ang.

"Aw hello" zângkhai vah hian ka ti a, kan inngaihzawn ṭhat leh tâkah chuan a hma zawnga min kam ru ṭun ṭhin ang kha a awm tawh miah lo, ka thawl huai ni berin ka hria. 

"Immm....." a rawn ti ringawt a, a ngaihna hre lo zet hian

"Eng nge 'immmm...' chû?" ka ti ve leh nghal a, pà zeta a nui thum hak ri chu ka hre zui nghal zat bawk. 

"I aw ka hria a, sawi tur ka hre lo" a rawn ti thum dut a, ka va ner nasa mai mai tak!

"Ka awih thlawt lo" tiin gas chu ka off a, ka awih loh thu sawi zo chiah mah ila a thu rawn sawi chuan min tihlim hnuhnawh leh viau lawi si. 

"Eng nge i tih a?" pangngai deuh hian a rawn ti leh a, a aw dam thluam te chu hriat a va'n khamawm loh ṭhin ngawih ngawih tak, a bul chu hmangaihna vang ka ti lo thei lo. 

"Thingpui ka siam mêk a" ka tih chuan

"Inléng i nei em ni?" a lo ti ve leh nghal zat a, ka nu leh sir Chhuantea te lam chu ka hawi phei zeuh a, min ngaihsak lo dun khawp mai. 

"Nei e, sir Chhuantea a lo lêng a" ka ti ṭha ve mai bawk. 

"Kha pa kha a hnawk riau, fimkhur ang che, thawkho ni mah ula nêl miah suh!" a rawn ti deuh chhur chhur a, tun ṭum chu a aw hriat nuam deuh ang kha a bo daih!

"Kha lamah khan ruah a sûr ve tho ém? Keini chu vawiin aṭang tawh a la sûr char char, a sûr zankhua dâwn a ni ang" tiin thu dangah ka pakâi ta daih a, thingpui pawh ka siam zui nghal chu a ni mai. 

"Sûr ve reng e" tih chiah hian min chhâng a, sir Chhuantea a lo lêng tih a hriat aṭang khan a ṭawng dan te chu a dang nghal vekin ka hria. 

"Zanin chu mut a tui duh dâwn a nih hmel" nui hak paha ka tih leh chuan

"Fimkhur ang che Terem" a rawn ti daih thung a, a awah chuan min ngaihtuah a ni tih a hriat hle bawk. 

"Nia, ka fimkhur sa hrim hrim alawm" ka ti ve leh ta nge nge a, ngaihṭha taka a awm ka ring a, mahse ani erawh a reh zui vung vung thung.

"Zosiam" ka tih chuan

"Imm..." a lo ti thum dut a, inbe reng mah ila hmun dang daihah a rilru a awm a nih ka ring. 

"I ṭha em?" ka ti ta ringawt a, ka thingpui siam lai pawh chu ka ngaihsak em em tawh lo.

"Naktuk zanah ka lo kal ang" tia min chhánna chuan thil tum a nei tih a tilang chiang viau!

"Lo kal a ngai rih lo, i hliam kha enkawl dam phawt zâwk rawh, a dam hunah te chuan duh tâwkin i lo lêng thei zâwk dâwn alawm" ka ti thuai thuai a, chutia ka ti vat lo a nih chuan a lo kal leh tak tak mai ang. 

"Ka thu awih rawh aw?" dam deuh zâwka ka tih leh chuan

"Ka hre lo" a rawn ti nghut a, eng thu mah a sawi belh tawh lo hrim hrim bawk. 

"Luhlul tlat ṭhin lo teh, i luhlul hian min timangang zual ziah a nia, ka mangan i duh em ni?" ka ti leh ta thlâwt a, chhánna ka dawn loh avangin ka inbiakna chu ka hmet tawp ta daih! 

Sir Chhhuantea leh ka nu thingpui ka pêk laiin phone call ka dawng leh a, Zosiama bak a nih ka ring lo. Thil dang ka tihsan hmiah hmiah a, nuam erawh ka ti bik chuang miah lo. 

Pindana ka luh lai chuan a hnen aṭang bawk phone ka dawng leh a, mahse ka la chhâng duh ta lo cheu, a vawi thum rawn call-na ah erawh ka là ta nge nge a, bathroom-ah ka lut zui nghal daih bawk. 

"Hello" pangngai deuh hian ka ti a, lungawi lohna pawh ka nei tawh lo hrim hrim.

"Nichin kha chu" a rawn tih lai chuan

"Ka hria alawm" ka lo ti khalh vat a, ruah a tla ri reng bawk nen ka ṭawng zawi hran lo hle.

"Aw le, a nih chuan kâr lehah ka lo kal ang" a rawn ti ta nge nge a, rilru hahna nei ang hrimin a thaw ri zui ham ham bawk.

"Kha mai tur kha alawm, i taksa khan hahdam a mamawh tih hre reng rawh. Kei te chu ka fimkhur ve lutuk, min ngaihtuah suh, chu bakah ka nu nen kan ni tawh a, thil ṭha lo a thleng nawn tawh lo turah ngai ang" ka ti deuh duah a, tunah rih chuan dam var var se ka duh a ni.

"Phone kaltlang paw'n kan inbe thei reng tho alawm" a ngaih ṭhat nân ka ti zui leh sap a, chutah ani pawh chuan

"Ni e" a lo ti ve ta sup a, thil dang daih sawi chhunzawmin kan inbe rei ang reng phian a, bathroom aṭanga ka chhuah meuh chuan sir Chhuantea pawh a lo haw daih tawh nghe nghe.

"Tu nge bathroom-ah khan i biak char char a?" ka nu chuan a rawn ti ta ngei a, ngaihsam zet hian

"Zosiama" ka lo ti ve mai a, mahse ka nu chuan

"Khatiang khan awm tawh miah suh Terem, a mawi lo teh a nia, inléng i nei reng a, mi dang biaksan daih kha a hawihhawm loh thlak lutuk, nang phei chu lehkha zir sâng i ni leh nghal" tiin min zilh ta hlak hlak a, ka ngaihtuah chiang a, sawi dik loh a neih àwm ka hre lo. 

Ka ngaihtuahna kawmin ka mu meng kar a, ka nu thusawi chu ka bengah a ri nawn tluk tluk a, zir sán ringawt hi zahawmna te, felna te, nungchang mawi neihna te a va'n lo ni lo chiang tak! 

Zanina ka awm dan te kha keini ang Master lai zir thleng chin tân ngat phei chuan tih loh tawp tur zâwk asin le, sir Chhuantea tân tak pawh khan a nuam lo ngawt ang, min zuam ka hlauh luatah ka pumpelh tawp a nih kha!

Eng pawh ni se fimkhur tluk a awm lo, fing tak leh fimkhur em em chungin a hawihhawm theih tho alawm le, ka ngaihdan ka lo kalpui nasa hman lutuk a ni e. Ṭha taka min biak chuan ṭha takin ka chhâng ang a, mi dang tâna awm nuam lo thei tur khawpin ka awm tur a ni lo. 

Chutiang ni lova pumpelh dan hlir ka zawng nghal ringawt a nih chuan min zuam sawt thei zâwk tlat, ka nu min zilhna azârah thil pawimawi tak ka hre chhuak hlauh chu ka lawm hnuhnawh ang reng.

Kâr thar kan chûangkâi a, kei pawh ka taksa lamah nâ em em a awm tawh loh avangin School ka kal leh tawh a, kan Head tih loh mi dangho zawng chu ka lakah an danglam hlawm sàwt em em a, mahse kei erawh ka awm dan pangngai rengin ka awm thung. 

Chhun chawlh neih lai paw'n a hmaa nui ho dar dar ṭhin kha kan reh deuh ṭhiap tawh a, a ṭhenin office piahah meizial an zu daih zel bawk a, dik tak chuan an bula awm nuam ka ti ta lo khawp mai. 

Ruata ka puih aṭang khan an awm dan a danglam tih leh min en dan a danglam tih ka hai bik lo va, mahse thil sual ka tih áwm ka hre hauh si lo. 

Chutin Zosiama pawh an khaw lama hna ṭul a neih avangin tum lâwk ang paw'n a rawn lêng thei lawk lo va, phone kaltlangin kan inbe zan tin ziah thung a, kan inbe rei lutuk ngai lo nà chu a nuam veng veng ṭhin khawp mai. Hmeichhia zâwk tih takah ka ṭawng hnem zâwk ziah a, ani erawh sawi tur tlachham ve thei tak a ni! 

Kâr a ral leh meuh chuan a rawn léng leh ta nge nge a, inngaizawng kan ni tawh bawk a, engkim chu a dik vel vekin ka hria. Ka nu lah chuan 'chance' min pe ve khanglang emaw ni, in chungah min la lèn chhohsan daih zui! 

Zosiama ni se a bul chêtah min ṭhuttir deuh tlat a, a duhna lamah chuan a thu a duh ren run ṭhin khawp mai. 

"Thingpui ka va siam ang aw" tia thawh nghal mai ka tum chu ka darah a rawn kuah a, ka lo en kiau ringawt. 

"Kan pahnihin" tih leh min thawhpui a rual zui nghal a, hmui pawrh târha ka ner khum sawk chu ka biangah a rawn piai zeuh a, ka bianga a piai kher ṭhin hi a inhmeh lo ka ti thei tawp, mahse a inhmeh lohna tak ka hre chuang bawk si lo.

"Heih, awm ṭha mai mai teh, ka nu khi lo chhuk thut thei dinhmunah a ding reng a nia" ka dul zawna a kut chu ṭham chatin ka ti a, hneh zet hian ka hnung lam aṭang min kuah run a, kan awm dan chu nupa te pawh kan ang alawm lè. 

"A lo chhuk mai lo ang, a la ṭawng tui bawrh bawrh êm mai" a lo ti thum dut a, ka rimtui leh tui loh hre duh ni àwm fahran hian ka sam chu a hnim deuh den den pah reng bawk. 

"Zosiam?" ka dara a khabe a nghah rual chuan ka lo ti thluk awn duai nghal thuai a, zep thu cheng lo, ka taksa chhung lam chu a dik tlat lo a tin a ni! 

"Immm..." ti thum bulin ka beng chu a hmui chuan a rawn tawk a, ka mur sung sung theiin ka hria.

"Awm ṭha la" chiangnial lo zet hian ka ti thawp raih a, engtin nge chutiang em ema ka danglam theih pawh chu ka hre lo, a mak tak zet!

"Zosiam?" ngenngawl aw tak hian ka ti zawi leh raih ṭhin a, a hmui lûm vung vunga ka nghawng a fawp chiah phei chu ka sâ chhuak pup pup a, thingpui lam réngin ka rilru a luah thei tawh lo.

Gas lam hawia ka ding chu a lamah min kuai her a, ka dar tawn tawna chelhin ka mitah tak min en a, ka zam ru lutuk chu ka chil ka lem ri dawk dawk a, ka mit a enna ata a mit là sawna ka âwm bâwr a en thla leh chiah phei chu namén lovin ka zàm a, ka thin phû pawh a rang ṭha dawt dawt tawh hle.

Ka biang tawn tawn chu dimdawi taka khuapin min melh chhuk run a, kan indin hnaih bawk si, a mi uap a nâ hem hem bawk si, awm dan tur mai bakah sawi tur pawh ka hre tawh lo. 

Ka chil ka lem zawnga ka hmui ka tihchet zeuh rual chuan min rawn fawp a, inring hman lo tih hriat tak hian ka lo chhoh melh kiau a, dam lutuk tak maia min han fawp nawn leh chiah chu lo chhán lêt loh phal chî rêng a ni tawh lo, chutah rin phâk baka dawnsawn nuam a la ni cheu zui!

End of Chapter 9