WAY BACK INTO LOVE By Havali Adam (CHAPTER 8)

WAY BACK INTO LOVE 

By

Havali Adam

Chapter 8

Minute eng emaw chen chu ngawi rengin kan awm a, kei ang lo takin a ngawi rei thei phian bawk si, ka tlin lo leh lék lek ṭhin. Phone khawihin khumah ka ṭhu mu a, ani ka bul lawkah a ṭhu thung a, tun ṭum chu ani paw'n Phone a khawih ve mual mual tawh a, mahni tlei tleiin kan tlei a ni ber. Chutah a ṭhutna aṭanga tho deuh thutin a Phone chu a ak ṭha zui nghal daih a, kei paw'n a awm dan teh thut avang chuan ka lo en rang hle bawk.

"Khaw'nge i kal dâwn?" engmah sawi lova kal mai a tum chu a be hmasa zâwkah ka ṭang leh ta nge nge e! 

"Ka kalsan dâwn lo che, hlauthawng suh" tih leh chhuah a rual zui nghal a, min chhán dan ber kher chuan ka thin a va han tirim ru reuh tak!

Min kalsan dâwn leh dâwn loh lam ka zâwt pawh a ni tawp si lo, a duh dûhna ah kal teh se! Keia lo ngaihtuah ve vak a ṭul hlawl lo, engati nge ka lo zawh kher kher le, ka mawl hle mai. Ka tân engmah a ni tawh lo chu ka ti dawt ngam rih lo va, mahse engmah nihtir loh ka tum tawh a, ka hlawhtlin ngei ka ring bawk. 

A rawn lut leh chu thingpui leh chhang hi a lo châwi lut a, engtin nge ka ril a ṭam tih leh thingpui ka in châk tih a hriat theih zâwk lè. A nihna takah chuan ka harh hnu khan ka ril a ṭam ru reng tawh a, han sawi chî lah kha a ni bawk si lo, mahse chutia ama chhia leh ṭha hriatna hmanga ei tur a rawn keng lut ta chu ka lawm ru tho mai.

"In thawt thawt suh, a sâ ṭha a nia" ka hmui leh Dispo no chu a insi ṭep tawh a, min rawn be lo se chuan ka in hman tawh ngei ang. 

"Ka hre ve reng" ti hmakin thingpui chu ka chhêm hliau hliau a, rei chhêm lova ka'n in nghal ngawt chu ka va tisual chiang èm! 

"Ka sawi zo chiah a ni lo'm ni? Khawi maw, luhlul viau ṭhin lo teh Terem" tih leh ka ken lai Dispo no rawn lâk chu a rual nghal zat a, ka hmui ka hup vang vang a, ka lei a kang chiang lutuk! 

"Kha le, a zia deuh tawh ang" Minute khat dâwn a chhêm vang vang hnu chuan min rawn pe a, ngawi reng hian ka lo ban ve mai bawk. 

"Chhang pawh hi ei tel rawh, a tui phian a nia" ti leh supin amah zâwk chuan chhang chu min pek zawm zat a, engkim buaipuisak ngai naupangte pawh ka ang zâwk alawm lè.

"Enteh Zosiam, ṭha deuhin ka zâwt nawn leh ang che, engati nge min ngaihtuah em em ang hian i awm leh lawi si a?" ka ti chul deuh raih a, amah pawh ka en chuang lo. 

"Thinrimna ka nei tawh lo a nia, han thinrim khum tur che pawh ka ni tawh lo hrim hrim, pangngai taka min chhán ka beisei" ka tih zawm leh zat a, za em em lo hian ka ṭhen deuh sak bawk.

"A chhan chu min mamawh alawm" a rawn tih hniam sup chuan kan inen chiang nghal hle. 

"Ka rilru dik tak ka hrilh ang che aw Zosiam, nang leh kei hi a hma kha chuan kan lo inngaizawng tawh ṭhin a, kan inṭhen chhan pawh kha ka tleirawl ât lai leh ka ngaihtuah thui tâwk loh vang a ni tih ka pawm thlap, mahse tunah chuan kan puitling ve ve tawh a" ka tih mial mial lai chuan

"Hun kal tawh sawi chhuah fô hi a ṭulna a awm lo" a lo ti deuh sup a, kei erawhin nui chung hian ka lû ka thin khum zeuh thung.

"Sawi chhuak lo thei lovin min siam tlat si a nih hî, ni lo se chu ka sawi chhuak fô tawp náng" tia aw thian kharhin

"Nang paw'n i hriat ve vek kha, kum tam tak hnua kan inhmuh leh hmasak ber aṭang khan kan inkâr siam ṭhat duhna thinlung ka pu nghal kha a ni a, hnaih leh che kha ka châk a, ka lo la hmangaih reng che tih thlengin ka hre chhuak ta hial a, mahse khang thil zawng zawng; nang ka hnaih duh che avanga hmeichhe nungchang ni àwm lo tak tak nei ang maia ka awm ṭhinna te, ka mizia ni lo pui pui anga ka awm ṭhinna te, zak em em chunga ka tih luih ve ṭang ṭangna te kha, engmah lo mai, rah ṭha chhuah thei ngai lo tur tih ka hrethiam tawh a ni. 

Kha zan, in haw dâwn zana ka la hmangaih reng che thu ka hrilh lai che pawh khan ka zak ve tho asin, mahse nang chu i ngawi tlat a nih kha ti raw?" ka tih zawm leh duah a, ka aw chu a zawiin a dam hle bawk.

"Ka rilru kha a insual nasa ém a ni" ti thum chhalin ka kut chu a rawn hum zui zat a, tal chhuah pawh ka lo tum lém lo. 

"Min hmuh ang leh min hriat ang hian kei chuan ṭhian ang chauha en che ka tum hlen tawh a, nang paw'n i theih ve ngei ka ring" ka tih leh chuan a ngawi ngul a, ka kut a hum lai chu a en reng bawk. 

"Engmah tih theih ka nei tawh lo i tihna em ni?" a rawn tih chuan rilru nâ lo hmel pu lui hram hrama nui chung hian ka lo bu nghat a, ka nui lui tih a hriat loh hram ka beisei. 

"A ṭha e, chu chu i ngaihdan a ni a, i thutlukna chu ka pawmpui a che" a tih lai chuan ka mit ka chhing sawk a, ka inchhirna te, ka chapona te, ka tlàwm lâkna te hi awm lo ta se chu ka la pawm thei mah nà, mahse chutiang rilru ka pu tawh hauh si lo. 

"Amaherawhchu, keini pahnih hian bul kan ṭan ṭha leh ang" a rawn ti leh chiah chu ka en nghal kawk a, ani paw'n min lo en chiang khawp mai.

"Ni lo, a theih tawh loh!" ka lo ti khauh fak a, ngaihsam hmel deuh hian

"Kan inkâr siam ṭhat dan ṭha ber chu bul ṭan ṭhat leh a ni" a lo ti thum chhal a, ka mihring tawhah a la luhlul ber àwm e! 

"Enteh Zosiam, engati nge i hriatthiam theih miah lo va?" ti vang vangin ceiling chu ka en tlawk tlawk a, light inchhí êng chuan ka ngaihtuahna a rawn luah zui zat bawk. 

"Bulb khi chhe ta se chuan kan awmna hi a thim ngei ang, a chhan chu a chhe miau a, hman nawn theih a ni tawh loh. Chutiang bawk chuan ka thinlunga nang ka hmangaih ngawih ngawihna che kha a keh chhe tawh a, i lam hnaih zawnga awm leh pawh ka tum tawh lo. I lakah hian beiseina pakhat mah ka nei duh tawh lo va, nang nena inzawmna neih ka duh tawh lo bawk" chung thu ka sawi zo chu ka thaw chhuak ham ham a, a awm dan engkim chuan ka rilru a tibuai pha tlat a ni.

"Bulb a chhiat leh a thar lei a ni mai, engkim, a tir tê aṭangin, a thar hlakin bul ṭan ṭha ang" a la rawn ti hram a nih chu! 

"ZOSIAMLIAN!" ka aw chu ring hran lo mah se a vin fiah hlur thung.

"I thutlukna ka hre tawh a, ka thutlukna erawh bul ṭan ṭhat leh a ni" nghet churh hian a rawn ti leh sup a, ka kut a humna ata chu ka pawt chhuak rang nghal hle bawk.

"Engati nge a harsa zawng leh buaithlak zawng hlir hian i awm tlat a ZOSIAMLIAN!? Zahawmna te ka nei ve asin, hetiang tak hian a ni maw min lo tham loh?" aw nêm lo zetin ka ti ta hlak hlak a, ka insum buai peih tawh teuh lo.

"Eng pawh sawi rawh, engtiang pawhin min haw rawh, ka thutlukna erawh bul ṭan ṭhat leh a ni a, engtikah mah ka sawhsawn ngai lo bawk ang" chu thu a sawi zawh rual chuan

"ZOSIAMLIAN!" ka ti vin ṭhawt a, ka vin hrep tak nà chu huat hmel pawh a pu lo hrim hrim.

"Eng nge i hriat a? Maw!? Engati nge hetiang hian i awm luih tlat!? Min hua a ni lo'm ni?" ka tih vin tuarh tuarh lai chuan khauh hmuk hian

"A dik, ka haw ṭhin ngei che alawm, ka haw hluah hluah ṭhin che, mahse engtik lai mahin ka theihnghilh ngai lo che" a rawn ti ve ta chhur chhur mai.

"Zosiam?" ka ti chuai raih a, ka aw aṭang chuan a ngenin ka ngen a ni mah tawh zâwk! 

"I lakah hian beiseina ka nei tawh lo, ni lo, ka nei duh tawh lo hrim hrim, chu vangin inhmu tawh lo ang, kan pahnih hian" sawi chhunzawm thei lovin ka kun ngul a, ṭah ka tum reng reng lo, mahse ka mittui te chuan chhuah an châk zek zek thung si. 

"Ka tihpalh" dam dap hian a ti sup a, a âwma min kuah bei chiah chu ka insum thei tawh ngâng lo. 

Ka mittui chu ka biangah a baw zawih zawih a, ka inhnit ri feih feih pah reng bawk. Ani erawh chuan hneh zet hian a âwm chhah ṭha takah min kuah bet hle hle a, a kut pakhat zâwkin ka hnung a chûl hliau hliau a, a leh lam chuan ka nghawngah a kuah run bawk.

Ka duh tâwkin ka ṭap hawm hawm a, zah pawh dâwn lo leh mi dang mitmei pawh dâwn lova ka lo awm tawh dan te chu ka ngaihtuah chhuak zut zut a, ka ṭap lo thei lo a ni.

"I ngaihdamna ka phùt lo va, mahse ka tihpalh tih hi chu hria la ka duh" thutak deuha min biakna chuan chawp leh chilhin ka ngaihtuahna a tiharh a, min kuahna ata chu ka inla hrang zui nghal bawk.

"Ṭhu ṭha tawh rawh, min ngaihtuah suh" tiin ka bianga mittui chu ka hru hul zung zung a, ani pawh ka sawi ang chuan a ṭhu ṭha ve mai a, mahse min en reng thung.

Chumi hnu chuan kan inbe lo leh ta char char a, a tawpah erawh keimah zâwkin ka be hmasa leh a, a hna lam chanchin te, khawi hmunah nge hna an thawh leh dâwn tih lam te chu ka zâwt ta daih a, ṭhian pangngai angin ka be lui hram hram a ni ber.

Ka nu leh pate hmel kan hmuh tâkah chuan kan boruak pawh a dang ta daih a, ka pa'n Doctor a hmuh laiin ka nu leh Zosiama chu an titi dun char char a, ka nu zâwkin zawhna a zâwt char char a ni ber a, ka lo en leh reng ṭhin a, mahse ka en tih a hre lovin ka hria.

Damdawi in aṭanga kan chhuah fel rualin khaw lamah kan inphur phei nghal a, Zosiama pawh an khaw lamah a haw tlang nghal bawk. A haw dâwn khan ka pa'n ka in luaha zanriah ei turin a sâwm kha a ni a, mahse a hnial ta hlauh a, a haw dâwn tak takah kha chuan kei paw'n lawm thu ka hrilh nawn leh a, ani erawhin min buk khum ringawt thung.

Chutia in kan han thleng ta chu ṭhenawm khawvengte an lo lêng lut sap sap a, pu Hneha te nupa paw'n min lo buaipui nghal khawp mai. Ei rawngbàwl hah ngai miah lovin in chungah zanriah kan kil nghal nghe nghe a, kan hlimin nuam kan ti dar dar leh ta hle. 

"I ṭhianpa kha a fel phian khâ?" ka nu chu ka en zawk a, mahse ka hawi sawn leh vat thung. 

"In lo inngaizawng deuh hi a ni lo máw?" ka mala beng thek thek pah hian a rawn ti leh a, ka nui ta ringawt. 

"A lo ni ang e, a ruk hian ngaihzawng i lo nei reng a ni lo maw?" nui sun sun paha ka pa'n a rawn ti ve leh tâkah chuan

"Ngaizawng lo ve, ka ṭhianpa a nih kha" ka lo ti ṭha ve mai a, kan inngaizawng tawh lo tlat a tin a ni!

"A ngaihtuah hmel thei lutuk che a, chu vang mai mai maw le, ṭhian ṭha tak i nei a nih kha" ngaihtuah zui tawh chuang lo hian ka nu chuan a rawn ti a, ka chhâng buai duh tawh lo ta law law, zawhna dang a neih phah palh ang. 

Damdawi in kan chhuahsan aṭanga ni hnih a ral leh hnu chuan kei pawh ka zia chho ta viau a, School erawh ka la kal leh rih ta lo va, rilru a nuam lo duh khawp mai. Zirtirtu hna thawk ve si School kal thei lova ka awm ringawt chu hrehawm ka ti a, mahse ka hun tawnin a zir lo miau bawk si a ni. 

Zan lamah Sir Chhuantea a lo lêng deuh ziah a, a chângin kan Principal te leh mi dangte pawh an lo lêng lut ve leh zuk ṭhin a, dam lo kanin an lo kal a ni ber a, mahse Sir Chhuantea chu ka duh ai a lo lang tam mah mah ṭan tawh! Zú rim nam deuh ther thera lo lèn cháng a nei ṭhin bawk si, ka nu leh pate paw'n an chik ru deuh reng ṭhinin ka hria.

Kâr a ral leh meuh chuan ka lû pawh tuam ngai tawh lovin a dam ve zel a, mahse dam var var chu a la ni chuang lo. Ruata a ngaihtuah avangin ka pa chu Aizawlah a chhuk tawh a, ka nu erawh min la awmpui reng thung a, min awmpui char char mah se pawi ka ti miah lo, mahni chauha awm leh nute awmpui zawng a innawm hleih êm mai!

Zan khat chu dawhkan têa thil ka ziah laiin Phone Call ka dawng a, min rawn Call-tu mawlh chuan ka mit a va han là tehreng êm, engtik lai khan nge chutiang chuan ka lo a phone number ka lo save hman pawh ka hre lo, ni lo, ka save awzawng lo, ama'n a lo save a ni ngei ang.

"Eng nge?" phone lâk ruala ka tih chuan

"I mood a va fuh loh hmel ve?" a lo ti nghal thung a, ka aw a nêm vak bawk si lo nen a demawm hran loh!

"Ka buai a nia, i sawi duh chu sawi vat rawh" ka aw chu a la ngai reng a, ka nu a awm ve reng tih ka hriat chhuah tâkah chuan tlêmin ka ṭawng dan ka thlak ta deuh.

"Eng nge ni ta?" ka ti ṭha leh a, pindan lamah ka nu'n thil a phiar ve reng a, lungawi lo aw deuha biakna chî ni tawh hek lo.

"I aw ka hre duh a, ka lo be lawk che" a rawn tih chuan

"A ho" ka lo ti deuh tawp a, ani erawh a lo nui thum dut thung.

"Naktuk zanah ka lo kal ang, ka lo hrilh lâwk che ah ngai mai rawh" a thusawi chuan ka rilru a hruai péng chiang kher mai. 

"Eng nge i lo tih ringawt dâwn?" ka ti nghal vat a, dik tak chuan ka phal loh thu hrilh tlang nghal mai ka duh, mahse ka nu a awm ve tlat bawk si a ni.

"Nula ina tlangval a lénin eng nge a tih ṭhin?" a zawhna chuan min tidang chiang teh e!

"I ṭha zel em? I lû chu eng nge a an tawh?" amah bawk chuan a rawn ti leh a, ka ngawi rei ve bawk êm a ni. 

"Ka ṭha ve zel e, a tuamna kan phel tawh a, tuam pawh a ngai tawh lo" tih leh pâwn lam pan ka rual a, in chhunga biak reng zawng a dikin ka hre lo tlat!

"A ṭhat chu" a rawn ti zo chiah chu

"Naktuk zan chu lo kal lo ang che" ka lo ti nghal pang a, pâwnah ka ding vàng tawh bawk. 

"Engati maw?" ngaihsam aw deuh hian a rawn ti sup a, hmaichhanah inbia ila chuan ka melh hrep loh paw'n ka vin hrep tawh ngei ang.

"Ka nu nen kan awm a, chu bakah inlêng ka nei dâwn" tiin dâwt ka sawi ta tawp a, lo kal a ṭhulh theih nân chhuanlam ka dap chawp a ni ber. 

"A va ṭha ve, ka lo lén ngei ngei a ngai zâwk a nih chu" a la rawn ti ta deuh deuh! 

"Enteh Zosiam, ka lâka i chet dan ang khan ka awm ve duh miah lo a nia, i lo kal chuan nuam lo ti mai mai zâwk ang, ṭha takin ka hrilh lâwk che a nih hi, hriatthiam tum teh" ka ti hluai a, ani pawh a reh zui ta vang vang mai. 

"Ka tihna chhan chu a tawna han tawn meuh chuan a hrehawm êm a, khatiang thil, ka lo tawn hnu kha chu rawn tawng ve lo la ka duh, i rilru a nât thlawn loh nân min pumpelh hram hram zâwk mai rawh" ti lehin ka thaw huai a, vâna arsi êng de sep sep te chu ka en tlawk tlawk a, rilru leh ngaihtuahna erawh hmun dang daihah a awm thung si.

"A kalkawng a harsat pôh leh ka beih nasat zual a ngai a ni mai" a rawn tih chuan

"I luhlul ve ê" ka ti ta thlâwt a, sawi ngaihna pawh ka hre tawh lo.

"Ka phone number hi delete lo ang che, kei min huat avangin delete ta pawh ni la awmzia a awm chuang lo a nia" a rawn ti leh daih a, ka lo thaw deuh hak ringawt. 

"Aizawla in hnathawh tur chu in la thawk ṭan lo em ni?" ka ti ta daih a, ṭhian pangngai ang takin be law law ila tlémin ka rilru pawh a zia deuh ka ring. 

"Immm...la thawk chiah lo, ka ngaihtuah tlat che bawk si a, kan khaw lama thawh tur hi ka thawh zawhpui law law phawt ang" dam dap hian a rawn ti thum chhal a, eng pawh sawi se kei nena inzawmna nei hlirin a sawi zel bawk si, ṭhian anga biak tawp hi chu a har ve a ni. 

"Ka dah mai dâwn asin" ka tih chuan min ngaihtuah hmel tak hian

"Aw le, meng rei lutuk lo la, i taksa enkawl ṭha ang che, mut tui le" a rawn ti zung zung a, amah zâwkin kan inbiakna chu a hmet tawp zui nghal ta daih bawk. 

In chhunga lut ta mai lovin ka phone chu ka en vang vang a, engtik lai khan nge 'Ka Zosiama' tia amah leh amah a lo in-save hman reng reng ni! Hun kal tawh ngaihtuah chhuakin ka nui sak a, ka ngaihtuah chhuah chu amah Zosiama nena kan awm dun lai bawk a ni leh tawh!

Kan inngaihzawn ve lai khan ṭum khat chu a lung a awi chiah lo va, chu pawh ka ṭhian pakhat nen an insual vang kha a ni a, a rilru tihhlim nân khan 'nangte chu Ka Zosiama alawm i nih, thik duh suh' tiin ka thlem ṭhin a, a tirah chuan a lungawi lohna kha a reh mai lo va, mahse a tawpah erawh hlim takin kan awm dun leh ta tho kha a nia, hun kal tawh ngaihtuah chhuah hi chuan a hlimawm a, mahse kan tun hun erawh a danglam nasa tawh ropui bawk si.

A reng reng thu ah a hre rei ka ti, kum eng zat chiah nge liam tawh ang, khatianga ka koh ṭhinna te kha a lo la hre ve reng chu a ni sia, a hmâ zawng khan min hnung chhawn tlat lo se chu hlim takin kan awm dun leh ang a, kan inkâr khi zau tawh tak pawh kan siam ṭha leh a ni mai tur. 

Tunah lèm kan inkâr siam ṭhat a duh leh lawi a, mahse a tlai mah mah tawh, a chhan chu kei hian a lakah beiseina neih ka tum tawh reng reng lo. 

A sawi lâwk ang ngeiin a tuk zanah chuan a rawn lêng ta ngei a, kei nen erawh kan inbe lo tluk a ni a, ka nu nen zâwk an inbe char char a, chutah ka rin loh deuhin Sir Chhuantea a lo lêng tak tak zui! 

Zan hmasa lamah khan Zosiama a lo kal ka duh loh luatah a lo lèn tur thu hrilhin dâwt ka sawi tawp kha a nia, chutia Sir Chhuantea a lo lêng tak tak chu mak ka ti ru ang reng.

"Riak ve law law mai ta che, i hawna tur a hla bawk si" tiin ka nu chuan Zosiama chu mawihnai deuh hian a sâwm a, mahse a lo hnial hlauh! 

"A taimakthlak ngawt mai" meinei deuh hian Sir Chhuantea chuan a lo ti ve leh a, nuam ti zàn lo hian ka lo ip chawih a, Zosiama erawh Sir Chhuantea thusawi chu hria ang paw'n a awm eih lo.

"Terem, thingpui va lûm tawh la, an lo in châk tawh reng ang e, i ti ho thei lutuk" ka nu'n a rawn tih leh tâkah chuan ka tho zui nghal a, thingpui lûm pahin Zosiama leh Sir Chhuantea chu ka melh tawn sek a, haw har zâwk nih an tum ve ve berin ka hria.

Thingpui ka lûm zo ka va pêk lai te chuan Sir Chhuantea chu a ṭawng suam suam a, Zosiama erawh ṭawngmawh ta reng reng kha a nia, ka nu'n a bia te a nih ngawt loh chuan a ṭawng tlêm khawp mai. 

Sir Chhuantea thil sawi duh dan ber kher lah chu Zosiama tâna hriat nuam lutuk loh deuh vek a ni leh nghal a, ka nu paw'n a en leh vang vang ṭhin ringawt. 

Thingpui inna no ka sil fai lai paw'n Sir Chhuantea chu a la ṭawng par par a, in chhung a lo luh tirh khan zû a in tih ka hre nghal a, ka nu paw'n a lo hriatthiam ve ngei ka ring. A thil sawi duh dan engkim chu a chapo ngawih ngawih ka ti mai, a insawithei pah zel bawk si, chutiang em ema a mizia a danglam ta dâwrh chu a awihawm loh lehling zâwk; kan inhriat tirha a fel tehreng nen khân!

"Ka'n haw hnai ang e" tiin Zosiama chuan thawh a rual zui nghal a, haw lohna chî pawh a ni tawh lo, dâr 9 leh a chanve a ri tawh a nia, a hawna tur a la hla ropui bawk si. 

"Terem, han thlah ta che, engati nge khatah khan i din reng?" mawl tih hmel deuh hian ka nu chuan min rawn ti zêk a, chhán pawh ka chhâng lêt lo. 

"Kei pawh ka zu haw tawh ang e, in mu hma duh ang" Sir Chhuantea chu a tho zui nghal ve leh lawi a, eng nge an hriat pawh ka hre lo, an innêl lo tih erawh a chiang khawp mai.

"I va peih ṭang ṭang ve a?" ngeiawm zeta nui hak hak pah hian Sir Chhuantea chuan a ti deuh kher a, ami biak Zosiama erawh a ngawi run thung.

"Inenkawl ṭha ang che" tiin Zosiama chuan min rawn be daih a, ka lo buk khum nghat ringawt. 

"Ka hrilh tlang tawp ang che, Teremi hi lo beisei buai tawh lo law law rawh, ka bialnu ni mai tur a nih hi!" Sir Chhuantea chu ka melh nghal kawk a, chutiang thu chu a sawi rinna pakhat mah ka nei lo. 

"Haw tawh rawh nang pawh Sir Chhuante, i rui mah mah a nih kha!" ti thuai thuaiin ka en deuh ngur a, duh ai chuan a ṭawng tam tawh mah mahin ka hria. 

"Haw dâwn e, mahse he mikhualpa hi haw phawt rawh se, a tlan liam hnuah ka haw ve chauh ang" nui hek hek paha a rawn tih chuan ka ngaithei ta bik lo. 

"I awm dan hi a mawi lo khawp mai Sir Chhuante, hetiang hian thawhpuite bulah an awm ngai lo" ka ti salh salh a, hmeichhia mah ni ila zahawmna ka nei ve a, min zah miah lotu mihring chu ṭawngkam ṭhaa biak chî ah pawh ka ngai lo, haw thuai thuai se ka ti tawh tak zet!

"Nangin i tih tlat te chuan le! Nang mikhualpa kha, hre reng rawh, Teremi hi nakin lawka ka ta tur a nih hi!" ti leh hramin a bike-ah chuan a chûang zui nghal a, zak thei lo ka va han ti mai mai tak!

"Mut tui aw Terem, naktuk zanah lo lèn leh ka tum dâwn a nia" tia min biakna pawh chu chhán pawh ka chhâng buai peih tawh lo. 

"Nang pawh haw tawh rawh, chuan lo kal tawh bawk suh" Zosiama melh chho râm pah chuan ka ti hmarh hmarh a, ka kal sawn tur chu ka bânah a rawn chelh ta chat mai. 

"Eng nge? Min thlah teh!" tiin min vawnna chu ka thing thla deuh sawk a, mood chhiat tawh sa nen Sir Chhuantea awm dan vel khan ka mood a tichhe zualin ka hria. 

"I him miah lo" a rawn ti thum nghet churh a, a hmel chu a tak ngul bawk. 

"Lo kal tawh lo la ka him a ni mai, lo kal tawh lo tak tak rawh Zosiam, awmzia a awm tawh chuang lo ang" ka ṭawng tir lam chu vin ang reng viau mah se a tawp lamah erawh ngenna aw a ri hnem tawh mah zâwk a tih theih! 

"Ka thei lo tih chu i hria alawm" a rawn tih chuan

"Ni lo, i thei, a hmâ zawng paw'n i thei a, tuna taka theih loh ngawt thu a awm lo" ka lo ti nghal vat a, luhsan hmak mai ka duh, mahse luhsan ringawt dâwn ila a haw lo ang tih ka hlau bawk si. 

"Haw tawh rawh Zosiam, i tlanna tur kawng a la thui ropui bawk si" ka ti leh ta thlâwt a, dik tak chuan ngaihtuah loh tawp zawng a harsa a ni. 

"Short Cut kawng ka hria alawm" a lo ti sam mai a, sawi tur hre tawh lo zetin ka thaw chhuak hak ta ringawt. 

"Bul ṭan ṭhat leh i inpeih hun hi engtianga rei pawh nghah ngai dâwn se ka nghak tho ang che Terem, ka tisual tawh a, ka tisual nawn leh thiang tawh lo" dam dap hian a rawn ti leh sup a, min din hnaih sauh zui nghal bawk. 

"Kei paw'n ka tisual tawh a, ka tisual nawn tawh dâwn hleinem" ka ṭawng ring lo nà chu ka thutak viau thung. 

"Ka hria alawm" ti hniam ruihin min rawn kuah a, tal chhuah pawh ka tum chuang lo; chutiang bawkin lo kuah lêt pawh! 

"Zanin aṭang chuan ka lo kal zen zen hman tawh lo mai thei, mahse eng thil mah a danglam phah dâwn lo a nia" tih leh inlâk hran a rual a, ka mittui tling pam chu chiang taka a hmuh ka ring.

"Chhuk tawh rawh le, ka lo en ang che" ti dam leh dapin ka sam chu ka bengah a zep a, ka ngawi reng thei ta lo. 

"I awm dan hian ka rilru a tihah zual tak zet Zosiam, ka hrilh tawh che khâ, i hre tawh lo em ni? I lakah hian eng beiseina mah neih ka duh tawh lo, ka tum tawh reng reng lo bawk" ka ti thawp sap sap a, ka mittui chu a rawn baw ta nge nge bawk.

"I rilru ka lo hliam thuk hman hle tih ka hria, mahse" a tih laklawh lai chuan

"Harsatna min siam belh tawh lo hram rawh Zosiam, khawngaihin takin, aw? Engkim hi a tlai vel vek tawh tih hrethiam la ka duh, kei paw'n ka hrethiam tawh, ka nât ang khan nâ ve lo la ka duh bawk, kan inkâr siam ṭhat i tumna hian eng kawng ro mah a sû tawh chuang lo ang" ka lo tih zawm thuai thuai a, ka ṭah rik feih feih loh nân ka insum nasa hle bawk.

"Min la hmangaih tlat si alawm" chu thu a sawi zo chiah chu ka lû ka thing nawk nawk a, a hmelah chuan inchhirna ka hmu theiin ka hria, mahse a tlai tawh, a tlai vek tawh a ni.

"I hre sual, ka hmangaih tawh lo che. Ni e, a hmâ te kha chuan ka hmangaih ṭhin che alawm, mahse tunah erawh ka hmangaih tawh lo che. Ka hmangaih ngam tawh lo che a, ka hmangaih duh tawh bawk hek lo che" engkim chu ka sawi satliah lo, thinlung leh tih tak zetin ka sawi a, ka rilru chhungril a nâ vawng vawng bawk.

"Haw tawh rawh" ti lehin ka hmai chu ka tûai puat a, a hmuha ṭap reng tur pawh hi ka ni lo asin le, mahse a harsa chu a nih si hi!

"In chhung lut fel phawt la ka haw ang" a kekawr iptê zen paha a rawn tih chuan eng thu dang mah sawi belh tawh lovin ka kal sawn nghal nal nal a, a thu ka awih vang pawh a ni chiah lo, a luhlul tih ka hriat vang zâwk a ni ber.

Kawngka ka hawn rualin a bike tlan chhuak thawm ka hre zui nghal a, in chhung ka lut chu ka nu'n min lo en chiang em em zui! Zahzelah tiin bathroom lam ka pan ta daih a, ka ṭap tih a hriat loh nân ka hmai te chu ka phih sawk sawk a, bathroom aṭanga ka chhuah hnuah erawh min en chík em em tawh paw'n ka hre lo.

Mut hmain ka pate nen kan inbia a, Ruata pawh a ṭawng duh ve sâwt khawp chuan ka hria. Tin, a tua te pawh min nêl ve tawh hle a, ka pa nen ngat phei chuan an inkawm deuh chawt ṭhin a nih hmel. Mut hmuna ka nu nen kan titi paw'n Ruata chungchang hlir kan sawi a, kan sawi bâng thei lo a ni ber e. 

Tin, ka in luaha min rawn kal chilh ngata min sawisatu pa pawh kha Jail a táng fel tawh a, a tàn hun chhung pawh a tawi lo hle. Hlauhthawn pakhat erawh ka la nei cheu a, chu chu Sir Chhuantea hi a ni. Zanina a awm dan te kha a va'n zahthlak tak, Zosiama a ṭawngkhum dan te kha, lo lêng fô tur paw'n ka duh tawh lo.

"I muhil thei na nge?" lehhawi zawkin ka nu chu ka en a, khum khatah kan mu dun a, ka che deuh sek bawk nen ka muhil thei lo tih a lo hrethiam ni ngei tur a ni.

"Thil ka ngaihtuah kual mai mai a, ka muhil ve mai ang, muhil tawh zâwk rawh nu" a lam pawh hawi chuang lo hian ka ti a, chutah ani chuan

"Thil min hrilh duh i nei em?" a rawn ti ta khauh mai, ka meng fiah nghal kawk thei alawm lé.

"Nei hran lo ve" tia ka chhâng liam puat chu

"I nei lo tak tak maw?" a lo ti leh ngat a, Zosiama nena kan chanchin hrilh ka tum deuh ùk hman a, mahse hriat tir loh law law a fuh zâwkin ka hria.

Tui taka ka nu a mut hnuah pawh kei chu ka la mu meng kar a, ngaihtuah tur a tam bawk nen tlaivâr ṭhak paw'n ka rilru ka kawm theih ka ring. Zosiama nena kan inkâr ngaihtuah kài loh theih a ni lo va, chu chu ka rilru leh ngaihtuahna tibuaitu ber pakhat a ni réng bawk.

A tukah chuan dâr 8 leh a chanve dâwnah ka tho ve chauh a, ka muttui hle ni tur a ni. Ka thawh ve meuh chuan ka nu'n ei rawng a lo bâwl fel vek tawh a, nute awmpui zawng a nuamin a hahdamthlak bik kher mai. Chaw ei pawh mahni chauha ei ngawt ai chuan a tui sawt a, chutiang bawkin chawhmeh pawh! 

Chawlhkâr kan hmang ral a, Zosiama hmel pawh kan hmu khât ta hle bawk. A sawi lâwk tawh hrim hrim a, mahse chutia a hmel ka'n hmu lo leh vang vang ta chu awm dan ka thiam chiah lo, nuam lo ka ti pawh a ni bawk si lo, ngaihtuahna ah erawh a awm reng thung. Ngaihtuah miah loh ka tum pawh hian ka thei tlat lo ṭhin, he mi luhlul pa ren run hi chu a mak ve a ni. 

Zan lamah hian mi rawn biak châng a nei leh zauh ṭhin a, kan inbe rei ngai chuang lém hlei lo va, inbiak hrim hrim thu ah chuan kan inbe khât khawp mai. Chutih rualin Sir Chhuantea pawh a rawn léng chhunzawm zel a, hmaichhanah ngei ngaihzawng neih ka bansan rih thu mawihnai takin ka hrilh tawh a, mahse a la beidawng duh chuang lo.

A hnuah phei chuan ka mipa duh chî a nih loh thu ka hrilh tlang ta tawp a, chutianga ka sawi a nih loh chuan min bansan a tum lo tlat a tin a ni! Ka thusawi hrethiamin a nung chho tawh turah ka ngai a, mahse a lo ni teuh lo. 

Zan lamah a rawn léng awl ngai lo va, dik tak chuan ka hlau ru deuh reuh bawk nen hmâna ka nêl ve em em ṭhinna te kha chu a bo vek tawh!

Ka nu paw'n ka rilru a hrethiam a ni chêk ang chu, a haw dâwnah pawh kawt thleng thlah turin min ti tawh ngai lo va, in chhung aṭangin ṭawngkain ka thlah liam mai zel a, a lo lén chánga zú rim a rawn nam lut ṭhin te hi ka ngaithei lo zual, ka ngaina ta lo lutuk te hi mak pawh ka ti tawh lo, ama'n a zir lo ve ém bawk a ni. 

Thla a liam a, ka nu chuan min la awmpui char char a, ka pate nen pawh zan lamah kan inbe deuh ziah a, Ruata nen an ni tawh bawk a, a khua pawh a har lo deuh sawtin ka hria. Tin, boruak chu a thlasik ruih tawh a, Krismas pawh kan hnaih ve ta viau e!

Zan khat chu Zosiama a rawn lêng teh hlawl a, a hmel hmuh ka inbeisei loh lai tak a ni nghe nghe. Ka nu lah chu eng a hria nge ni, in chungah a lêng chho daih leh ta nghal a, Zosiama nen chiah han awm dun tâkah chuan sawi tur a vâng ngei mai. 

Ani lah ṭawng tam lo chî a ni bawk si, a hnathawh lam ka zâwt tih loh chu biak dan tur a vâng khawp mai.

"Thingpui ka'n lûm ang e" tih leh thawh ka rual a, min en zui reng tih pawh ka hria, mahse kei chuan ka hmu lo der hmak thung.

Gas bulah dingin ka thil chhùan lai chu ka vil ta reng a, chutia ka din ngawih reng lai chuan ka hnung lam aṭang hian min rawn kuah ta thut mai! Tal chhuah tumin ṭan ka khawh nghal phat a, ani lah chuan min la kuah nghet sauh zui! 

"Awm sawn teh Zosiam!" mi dang hriat hlau zeta ka ti pawh chuan a awm ngaiin a awm reng a, ka dawhtheihnain a tlin lo leh ṭep tawh! 

"ZOSIAMLIAN!" ngaihnobei fahran lo hian ka ti vin fiah leh fak a, ani ve thung chuan

"Rei lo té" a lo ti sup a, min kuahna chu a tinghet zual sauh a, min hnim ni berin ka hria. 

"Ka nu a lo chhuk thut ang e, awm sawn thuai teh, min ringhlel palh ang" tiin a kut chu ka sik vak a, nâ ti hmel paw'n a awm lo hrim hrim. 

"Zosiam!?" ka tih leh hlak tâkah chuan a awm sawn ve ta hram!

"Eng nge i hriat a?" melh chho ran pah hian ka ti zui leh nghal hlak a, ka aw aṭang chuan ka lung a âwi loh tih hai theih chî ziazâng a ni lo.

"Tihpalh" mawlmang deuh hian a ti deuh tawp a, a hmelah chuan a inthiam lo tak takin ka hria. 

"Ṭhutthlengah sawn lo va ṭhu rawh" dam deuh zâwk hian ka ti leh a, a inthiam lo hmel chu ka hmu rei thei lo, keimahah hian hrehawm tihna a awm tlat! 

Ani ren run pawh chu ka sawi ang chuan a phei ṭha ve leh mai a, naupang lian deuh te pawh a ang alawm lè, ka thu lah chu a awih phian leh nghal. 

Thingpui ka va pek lai chuan ka nu in chunga lêng pawh a lo chhuk thla tawh a, Zosiama chu a be nghal siam siam a, zep thu cheng lo, ka nu hi chuan a ngaina chiang a ni.

"Ka'n chhuak lawk, ka rei lo ang" tiin Zosiama chu a ding hluai a, ka nu chuan

"Khawiah maw?" a lo ti nghal thuai a, kei tak paw'n a awm dan teh thut chu mak ka ti ru ang reng.

"Ka rei lo ang" tih chauha chhângin in aṭang chuan a chhuak zui nghal a, ka nu chu a nui tawp ringawt.

"I ṭhianpa Zosiama hi chu engtin tin emaw ni hian a ngainatawm roh a, a mizia te hi a mak ka ti, a luhlul zêk lo maw Terem?" tiin ka nu chu a nui zui hak hak a, kei pawh chuan

"Luhlul ve tho" ka lo ti ve mai a, Zosiama thingpui inna no chu ka seng zui nghal ta daih bawk.

Thingpui inna no ka sil zawh hnuah pawh Zosiama chu a lo la lêt leh lo va, khawiah nge a kal dâwn kan hre bawk si lo, a rei loh tur thu kha a sawi a ni mai a, a bak erawh kan hriat ve a duh lo ni tur a ni. 

Ka nu nen chuan kan titi melh melh a, a tih ṭhin dan ang bawkin kawr a phiar pah reng a, kei erawh ka rilru kil khatah Zosiama a awm reng thung a, a lo lêt leh har phian bawk si, ngaihtuah miah loh ka tum paw'n ka thei der lo. 

Dârkâr a ral a, Zosiama lah chu a reh hian a reh tlawk tlawk a, khawiah tak kal ang maw!? Ka phone chu hmet êngin call ka tum deuh ùk ṭhin a, mahse ṭul ka ti leh chiah bawk si lo, ka ngaihtuah ru tho bawk si, mi tihbuai dan hi chu a thiam chiang alawm, ngaihtuah loh theih loh hian a awm ve ziah!

Chutia thil ngaihtuah múk deuha ka awm lai chuan in chung lam aṭangin pu Hnehan min rawn ko lauh lauh a, pi Muani aw ka hre zui zat a, kei pawh chu ka cho ve nghal mai bawk. 

"I ṭhianpa kha zaninah a lo léng em?" pu Hneha zawhna teh daih chu ka beisei loh lam tak a ni. 

"Aw léng e, engati nge?" pangngai taka ka tih chuan

"Kan khaw tlangval ho nena insual khu a ni mial ang em âw ka ti mai mai maw lè? Veng thlang lamah khuan insual an awm a, an sual rawn pa khu mikhual chu a ni ngei an tia, mahse i ṭhianpa kha chu a ni lo turah ngai ang, ngaihsak lovin ka lo haw tlang daih a, chung vel mai mai chu maw lè" a rawn ti luam a, ka va han hlauthawng tehreng êm! 

"A lo ni reng ang e âw, ka chhuak lawk dâwn a ti kha a lo lêt har tawh lutuk, khawi laiah tak nge tlangvalho chu an insual a?" ka ti nghal zung zung a, in aṭanga kal chhuah nghal mai ka tum chu

"Ka zu hruai ang che, min lo nghak rawh, mahse i ṭhianpa kha chu a ni lo mai thei asin"  a rawn ti ve leh a, ka ngaihtuahna a buai zo vek tawh, Zosiama a nih rinna hlirin ka khat tawh bawk. 

Pu Hneha chuan Scooty-in veng thlang lamah min phur thla ta ngei a, kawngpuia mi lo punkhawm luaih luaihna hmun kan thlen rual chuan ka chhuk nghal tharh a, Zosiama hmel ka zawng thuai thuai a, Zosiama ni lovin Sir Chhuantea ka hmu ta zâwk a, mahse a piah lawka an lo kil laih laih mipa pakhat lo mu zangthal ruah ka hmu chiah chu ka pan hnai nghal sawk sawk a, chutah chu pa chu Zosiama ngei a lo la ni zui!

"Engati nge a!? Eng thil nge thleng!?" tiin Zosiama lo buaipuitute chu zawhna ka zâwt zung zung a, pu Hneha pawh a lo thleng phei har lo hle.

Sir Chhuantea leh a ṭhiante nena an insual thu te, an sual rawn thute chu mi kâ aṭangin ka hre ta mawlh mawlh a, Zosiama ber chuan ka thluak a timang vek thei. A lû a thi hnuang a, a chau tih lah hai rual a ni lo. 

Vanneihthlak takin nikhaw hre lo tawp erawh a ni lo hlauh a, mahse a hliam chu a nâ thawkhat a nih ka ring, a che hlei thei hauh lo thung. 

Health Sub-Centre-ah kan kalpui nghal thuai thuai a, a lûa hliam awm te, a hmui kak te, a hmai thi deuh hnuang te chuan ka ṭah a tichhuak ngawih ngawih! 

Ani erawh ngawi reng hian a en ngai a en run a, a rilruah eng nge awm pawh ka hre lo. Ka be lo va, ani paw'n min be lo va, a hliam chu an tuamsak mial mial a, nâ ti hmel pawh a pu tawh lo hrim hrim.

An khaw lama haw thei chî ziazâng a nih loh avangin kan inah a riak ta tawp a, zan khuain mut pawh ka muhil thei lo. Nâ a neih hlau reng rengin ka mu meng kar a, a châng leh a mutna chhuat bula ṭhutthlengah chuan ka va ṭhu thul, a châng leh insum thei lovin ka ṭap leh tawp ṭhin bawk.

Amah vil chawtin ka ṭhu tlaivâr ta hial a, a rawn harh chuan varṭian tak tak a la ni a, ka nu pawh a la rawn tho chhuak lo hrim hrim. Kei min hmuh rualin Zosiama chu ngawi reng hian chu a rawn inbeng kang nghal ṭuah ṭuah a, chutianga a che vel chu mittui tling pam hian ka lo en reng a, ṭah hawm hawm mai ka duh! 

"Terem" min kohna chu hria ang paw'n ka awm lo, amah ka en ngawt ngawt a, ka mittui a tlin nasat lutukna lamah ka hmu phe vek bawk.

"I ṭha em?" hliam nâ tak tuartu hnen aṭanga ngaihsakna leh ngaihtuahna ka dawng te hlei hlei chuan ka ṭah a ti chhuak zual tak zet a ni. 

"Terem" ti thum leh chhalin ka kun ngul chu min rawn kuah a, ka insum theihna zawng zawng a kehchhe nghal vek bawk.

"Engati nge i chhuah kher? Maw!? Engati nge i kalna tur pawh sawi lova i chhuah? Ka mangan hmanzia kha i hria em? Min ngaihtuah ve miah lo em ni ZOSIAMLIAN!?" ti ṭiauin ka ṭap khur dat dat a, min kuahna chu a tinghet zual sauh a, insum kârna reng ka nei thei tawh lo a ni ber. 

"Ka tihpalh" min ngaihtuah aw taka a rawn ti dam thluam chu

"I ti ve ziah, nang hian min ngaihtuah tak tak lo, min ngaihtuah ni la chuan mangangin min siam hauh lo ang!" ka lo ti tawn tawn a, ka ṭawng zawi lo hle bawk. 

"Ni lo, ka ngaihtuah che alawm, ka tihpalh a ni e Terem, a thleng nawn tawh miah lo ang" ti supin ka hnung chu a chûl hliau hliau a, chungte hlei hlei chuan ka ṭah a tichhuak zual!

"Mi tihnât i thiam êm mai Zosiam" ṭah chhuak bawk si, beidawng bawk si leh rilru nâ tel bawk si hian ka ti chuai raih a, ka aw chu a zawi ta hle bawk.

"Ka tiam a che, nizana mi ang kha chu a thleng nawn tawh lo ang" ti supin min kuai dâk a, ka bianga mittui luang thla ngiai ngiai te chu dim zet hian a hru hul den den a, chutah amah bawk chuan

"Ṭap tawh suh le" a rawn ti dam leh dap a, ka insum theihna zawng zawng chu a keh chhe leh ta nge nge! 

A kal hlat phal tawh lo ang maia nghet hian ka kuah vawn vawn a, ani paw'n a mal chungah mi ṭhuttirin min lo kuah lêt ve nghal thuai a, kei lah chuan awmhmun sawhrem tum ang hrimin ka hmai chuan a nghawng chu ka nâwk deuh talh talh bawk a, ka kut pawh a awm hle hle thei lo. A hnung chhah hlai ṭha zet chu ka kuah kual chhen a, ka mit ka chhing zui nghal vang vang bawk.

End of Chapter 8