WAY BACK INTO LOVE By Havali Adam (CHAPTER 7)

WAY BACK INTO LOVE 

By

Havali Adam

Chapter 7

"Terem?" rawn ti thum leh nghutin kawngka chu nam hawn tum tih hriat zet hian a khawih chik rât rat a, ka thinlung chuan tu dang a lam thei tawh lo; Zosiama chauh lo chu! 

"I awm em?" kawngka hawn tum pah hian min rawn be leh ṭhin a, a hma aiin a ṭawng pawh a ring sâwt ta viau bawk. 

"Min hmu duh lo a nih paw'n kawngka em hi chu kalh suh!" mittui tla zawih zawihin min biakna chu ka ngaithla a, chu lo tih theih dang ka nei thlawt si lo a tin a ni! 

"I la mu miah lo ti raw?" rawn ti lehin kawngka chu nam hawn a tum leh ṭhin a, mahse chhung lamah a inkalh tlat bawk si. 

Ka rilru chuan ka ṭawngṭai mawlh mawlh a, ka taksa chaurau tawh tak delh beta ka kâ hup bet tlattu chu ka en ṭawk ṭawk a, ka lû a nâin ka hmai a nâ bawk nen ka tlin dâwn lo tak ngialin ka hre ta! 

Tal chhuah leh thawm chhuah tur paw'n tha réng ka nei tawh lo va, ka mitthlaah ka nu leh pa, Ruata leh Zosiama chenin an rawn lang zut zut a, ka thi dâwn ni mai te'n ka hre tawh a ni.

Ka rilru leh taksa chu a zawi hnûang a, ka mit pawh ka meng hlei thei tawh lo. Chutia sual lêt lo leh tal chhuah pawh tum tawh lova ka awm chiah chu ka hmui a hup behna kut a pit deuh thut a, ka hmai bul lawk chhuat nem ri deuh dawtin a ke chu a phiat ri zui nghal bawk a, chu veleh min tiharh zawk thei tur khawpa chiang hian Zosiama aw ka hre leh ta!

"Terem?" tia min koh leh kawngka rawn nam rik hrawk a rual nghal a, chumi hnu lawkah nâ zeta kawngka inhawng pawp ri ka hre zawm leh nghal zat bawk. 

"Tu phiangsen nge i nih teh hrep!?" ka taksa chunga awm run pa chuan a lo ti hrawk a, fiah lo ruai hian Zosiama hmel chu ka en ṭawk ṭawk a, phe ruaiin hmu mah ila a mitmeng aṭang chuan mak a tiin a hlauthawng hle tih ka hre thei.

Thawm chu a rik sawk sawk loh leh a ri thum dawt dawt a, chhuara ka bungbêl dah te pawh an tla ri phawk phawk a, hai rual lovin an insual tih chu a chiang khawp mai. 

Chutia thawm bengchheng ngaihṭhatthlak loh tak a rik rum rum tâkah chuan in chung lam aṭangin pu Hneha aw ka hre thuai a, ka hming a lam tih pawh ka hria, mahse chhâng thei chî ziazâng ka ni lo a ni.

"Terem! I ṭha em?" ka tukhum dawm pah hian Zosiama chuan a rawn ti thuai thuai a, ka hnung zânga kuah chungin a mal chungah chuan min nghat zui nghal sawk sawk bawk. 

"Min en teh! I la harh ti raw!? Min en teh Terem?" a rawn ti leh a, thei leh thei lo hian ka en ṭawk ṭawk a, a aw aṭang chuan a hlauthawng tih a hriat ngawih ngawih!

"Engati buan buan nge a Terem?" tia pu Hneha aw nghet deuh charh ka hriat rualin

"Awi! Engati nge? Eng thil nge thleng!? I ṭha em Terem!?" ti thuai thuaitu pi Muani aw ka hre zui ve leh nghal zat a, an hmel erawh ka en lui thei tawh ngâng lo.

"Eng ang mihring teh hrep nge in nih!? Engtin nge in in hnuai luahtu hi mi sualin a sawisa hlum lo chauh tih in hriat loh theih zâwk!? In beng a chhet em ni!?" thinrim lutuk tak maia Zosiama ṭawng khawk rum rum chu ka hre hla telh telh a, engkim chu a thim mup mup zui nghal bawk.

Ka harh leh meuh chuan khaw'nge ka awm chiah pawh ka hre lo, ka beng lah chu a kiu deuh vawng vawng leh ta nghal a, zawi zawia thawm ri va ka hriat chhoh zel tâkah chuan ka harh chiang telh telh a, khumah ka mu tih thlengin ka hre ta! 

Ka chhia leh ṭha hriatna paw'n ngai a rawn awh chho ta zel a, ka mit la meng chiah lo mah ila ngaihruatna hmangin damdawi inah ka awm tih chiang takin ka hre thei ta bawk. 

A chhan pawh ka hmui leh ka hnar khuhtu chu Doctor te'n dam lo te Oxygen an hiptir ṭhinna a nih ngei ka ring nghet bur a, ka ring sual lovin ka hre ngei bawk.

Muangchâng hian ka mit chu ka meng diar diar a, ka mit lah chu a inchar ni mai te'n ka hria. Ka meng zau tial tial a, ka meng fiah tawlh tawlh a, nâ engmah ka nei tawh miah lo te chu mak ka ti ru ang reng, nge ni a, kei hi ka thi tawh zâwk!?

Ka hawina zawna sana bân inkhawng ri kharh kharh chu ka en ngawt ngawt a, thil awm dan aṭang chuan ka la thi hauh si lo, ka la dam ngei e! 

Mit khap deuh fuk fukin ka ding lamah chuan ka thle hret a, ka kawng zawn vela mipa taksa ruangam lian zet lo kun ngul chu ka hmu zawm zat a, chu mihring chu Zosiama nge ka pa zâwk tih ka hre thei mai lo.

Ka awm dan ngawt ngawt chu ka ning nghal der a, chet sawn tuma tha ka'n chhuah ve ringawt chu ka lû a rawn nâ zawk zawk a, a nât dan chu pui tak a ni! 

A bikin a chhungrilah a nâ ngut ngut a, a inkher zawk zawk ni mai te'n ka hria. Ka kut ka tih chet leh rual chuan ka bul lawka bawk run chu a rawn hawi chhuak a, Zosiama ngei a lo ni e!

Min ngaihtuah tih hriai zet hian min ṭhut hnaih nghal thuai a, ka kut ding lam zâwk hum lûm vung vung chung hian min en reng a, amah ang chiahin kei paw'n ka lo en lêt ve kal a, thil sawi tum nei hmel hi a pu deuh run a, mahse engmah a sawi chuang miah lo.

Dimdawi tak hian ka sam chu a chul den den a, ka chal leh ka hmai leh ka mit a en tawn deuh zak zak bawk. Oxygen hipna phelh ka tum chu ka kut a rawn chelh chat a, ka la harh chiang chiah lo zâwk nge pawh ka hre lo, ka ni deuh huihin ka inhria, ngai ka la awh famkim chiah lo te pawh a ni mai thei a ni.

"Doctor ka va ko ang" ti thum dupin a ṭhutna aṭang chuan a tho zui nghal a, a kal chhuah hnu thlengin ka en zui vawng vawng bawk. 

A rawn luh leh chuan amah maia lo lut tawh lovin Doctor pakhat nen hian an lo lut a, Doctor chuan min en dik mial mial a, ka Oxygen hipna pawh a phelh ta daih a, ka ning tawh rèng a ni! 

Chutia Doctor-in min buaipui chhung zawng chuan Zosiama chu a lo ṭhu ngawi run a, a mit ni se keimahah a fu chawt a, en ve leh zauh ṭhin mah ila min lo en reng avang chuan a hawisawn hmasa zâwkah ka ṭang leh nge nge ṭhin.

"I ṭha tawh lutuk a nia, hlauthawng miah suh aw, mahse damdawi i la rui deuh mai thei" hriat nuam zet hian Doctor chuan min bia a, ka chhàn hma hauhin Zosiama zâwk chuan

"Kan lawm e Doctor" min lo tih khalh thuai a, Doctor pawh chuan

"Mu leh rih se a ṭha ang, a taksain hahdam a mamawh" ti dam leh dapin a chhuak zui nghal ve mai bawk.

"Engati nge ka bulah hian i awm a? Engati nge damdawi in thleng thlenga min buaipui?" kan ngawih dun vang vang hnu chuan ka ti chhuak ta nge nge a, min en rang khawp mai. 

"Muhil rih rawh, Doctor paw'n hahdam i mamawh a tih kha" a rawn ti daih thung.

"Ka mut a chhuak lo" ka ti deuh tawp a, ka kut a rawn hum rual chuan ka pawt chhuak nghal vat bawk.

"Terem" hniam ruiha a rawn ti leh chu

"Ni lo, sawi suh, engmah ka ngaithla peih rih lo. Min sawisatu lak ata min chhan avang leh damdawi ina min awmpui avang hian ka lawm, mahse hei hi kan inbuaipui tawpna ni rawh se" ka lo tih zawm nghal zung zung a, ka harhfim tawh mai bakah ka chhia leh ṭha hriatna ka nei lêt vek tawh bawk nen ka aw chu a ném lo khawp mai.

"Ngaithla lawk teh" thinrim awkâ ni miah lova a rawn tih leh ngat chuan

"Zosiam!" ka lo ti hluai a, ka ṭah a chhuak ru et et a, ka beiseina zawng zawng engmah lova chantirtu mipa lakah hian eng beiseina mah neih leh ka duh tawh lo a ni.

"Hetianga min buaipui chhan pawh hi hun kal tawha kan lo inhmelhriat ve tawh vang a nih ngei ka ring" hmui khur dar darin ka thaw chhuak hap a, chu thu, ka sawi zawh chiah chu ama sawi ngei kha a ni a, ani paw'n a la hre reng ang.

"Muhil tawh rawh le" dam thluam hian a rawn ti daih a, eng nge a chhan pawh ka hre lo, ṭawngkhum fak faktu zâwk mah ni ila a thirim zâwkah ka ṭang ta daih! 

"Ka mut a chhuak lo ka tih tawh khâ...." nêm fahran lo hian ka ti hluai a, ka lû chhungril chu a rawn nâ zawk nghe nghe.

"Aizawl aṭangin i nu leh pa an lo kal mêk a, an lo thleng har tawh lo ang" ti supin a ngawi zui ta vang vang a, kei pawh ka ngaihtuahna a kal ding nghal hle. 

Sana chu ka en a, zing lam dâr 3 leh a chanve a ri tawh a, khatia sawisak ka tawh hun lai kha zan dâr 8 bâwr vel a ni mai thei, ka ngaihtuah neuh neuh tâkah chuan damdawi inah dârkâr eng emaw zah ka awm tawh tih ka hre chhuak chawpchilh zui nghal bawk. 

"Khaw'nge pu Hneha te?" ka ti deuh tawl a, ani lah chuan awlsam te hian

"Ka hre lo, sawisatu che kha an buaipui a nih ka ring" a lo ti thum dup a, ner khum sak pah hian ka hawi sawn ta daih a, mi en a nghal ren run lutuk te chu ka ngei ru hluah hluah a ni ber.

Ka lo muhil leh daih chu niin, zing lam dâr 5 leh a chanve vela ka harh leh chuan ka nu leh pa hmel ka hmu tawh a, pu Hneha leh pi Muani te pahnih pawh ka hmu tel tawh nghe nghe bawk. 

Chutih rual chuan Zosiama erawh a awm ve tawh miah lo thung a, ka ngaihtuah zui lèm lo va, ngaihtuah zui ngaiah pawh ka ruat lo.

"A pawi ngawt mai, keini tlaw lutuk azârah Teremin mi kut a tuar phah a, a nunna a chân lo chauh a, a ṭhianpa kha awm lo phei se chu Teremi dinhmun hi a ṭha lo viau ang, a bul ber chu ka thiam loh a ni" pu Hneha hmelah chuan inthiam lohna hlir a khat a, ka khawngaih lehling zâwk! 

"Ni em em bik lo ve, kan fanu chungah hian vanduaina a thleng palh a nih hi! Inthiam lo duh lutuk suh u, hei, amah Teremi ber pawh a rawn harh ṭha tawh alawm" ka pa chuan a ti ve ta dap dap a, pu Hneha te nupa erawh an rilru a nawm phah loh hmel hle thung. 

"Tunah hian Teremi sawisatu kha khawtlang Police lamin an kawl tawh a, nangni paw'n FIR theh lut ngei ula ka duh, a Case pawh a hniam lo khawp ang. Ani kha chu dam chhungin lung inah tâng mah se a pawi lo, tu tân pawh a hlauhawm tlat!" thinrim seh chilh deuh nawk nawk hian pu Hneha chu a rawn ṭawng ve leh a, ka pa pawh a inngaihtuah mûk hmel ta viau! 

"Kan ngaihtuah ṭha dâwn a nia, tunah rih hi chuan ka fanu ka khawngaihna leh a laka pawi khawihtu ka huatna hi a nasa êm a, thinrim lai ni lovin ka rilru a pangngai hunah zâwk thutlukna ka siam ang, rei erawh ka rial ka ring lo" ka pa chuan a ti sup sup a, min rawn en zawm zat bawk.

"I ṭhianpa kha a lo va lut har tawh ve, biak ka duh asin" tiin ka pa chu ka bul chetah a rawn ṭhu thla zui nghal a, a sawi tâkah chuan eng emaw kim lo riaua ka hriat kha Zosiama awm loh vang a ni tih ka hrethiam chiah! 

"Khawiah emaw ni a kal a ni ang" tih chauhin ka chhâng a, ka harh hmasak zâwk ai thlawt  chuan ka lû nâ pawh a zia ta deuh hlekin ka hria.

"Kei zawng ka ngaih a ṭha thei tawh lo, kan tluang lo êm mai, i hnathawh lai hi bansan mai ta che Terem?" ka nu mitmengah chuan hlauhthawnna hlir a khat a, a rilru àwm ang tur pawh ka hriatthiampui khawp mai. 

"A hmasa zâwka buaina in tawh aṭang tawh khan ka ngaih a ṭha thei tawh reng reng lo, min hnial suh ang che Terem, i hnathawh lai hi basan la, kan bulah, Aizawlah lo awm leh tawh ang che" a rawn ti leh nghal zat a, min ngaihtuah luatah leh a hlauhthawn luatah a aw te chu a khur vekin ka hria.

"Nu, ka ṭhat tawh hi, ka dam ṭha leh vat dâwn alawm, a thu hrimah khaw'nge Ruata? In lo hruai ve na nge? Engtin nge a awm?" ka ti ta daih a, hmun dang hawiin mi pawh a chhâng lo hrim hrim, a rilru a buai hle ni tur a ni.

"I patea te bulah kan awmtir rih ta mai, Puitei te ho nen an inkawm ngeih tho bawk a, hrehawm a ti lo turah ngai ang" ka pa zâwk chuan a rawn ti dam thluam a, chutah pu Hneha chu lo ṭawng chhunzawm ve leh nghalin

"Nangni zawng in fel chhungkua ngawt mai, tûma buaipui ṭhat peih loh kha in awmpui chu a ni si a, kan tluk lo hle mai che u, nakin zelah Pathian malsawmna pawh in la dawn zel ka ring, ka duhsak hle bawk che u" a rawn ti dap dap a, ka pa pawh chuan nuam tih hmel deuh hian

"Kan fel vang pawh a ni hran lo a nia, kan chhungkua kan tlêm tho bawk si a, Ruatan min rawn fin hi kan nupa pawh kan hlim phah teh asin, naupang fel tak a ni" tiin a nui deuh sun sun a, a hmel aṭang chuan a hlim tih a hriat hle bawk. 

"Sawi leh ṭhin ila, i ṭhianpa a lo awm hlauh chu a tizia ngawt mai Terem, keini, i chung lawka awm zâwk paw'n thawm engmah kan hre lo kha a nia, tlêma tlêmah a chhe ber kan tâwk lo hlauh zâwk a, a pawi kan ti tak zet" tia pi Muani min biakna chu chhâng lêt nghalin

"A ho lutuk pi Muan, inthiam lo lutuk duh reng reng suh u! Ka pa sawi ang khan vanduaina ka tâwk palh ve a ni mai, chu bakah min sawisatu khan thawm a dim thiam êm a, nangni tân pawh hriat ngaihna a awm lo alawm" ka ti siam siam a, ka nui deuh sâng bawk. 

"Ni e, inthiam lo lutuk suh u, Pathian zârah nunna êm chân kan awm hleinem, a reng reng thu ah khaw'nge kan lo luh tirha lo awmpuitu che i ṭhianpa pawh kha a kal hman lè, a lo lut ve leh mai turah ka ngai a, ka rin ai a bo rei ta phian mai" ka pa chuan a tih zawm nuah nuah a, kei tak paw'n khaw'nge a awm ka hre bik miah lo. 

"A haw a ni lo maw?" ka nu'n a rawn tih chuan

"A haw ka ring lo" ka lo ti vat a, chutah ka nu bawk chuan

"Engati maw?" a lo ti ve leh nghal zat a, ka chhànna nghakin min en ta ṭhap mai. 

"A chhan chu hemi khua hi a ni lo, ani chu khaw hran daiha mi alawm a nih" ka tih lai takin kawngka chu a rawn inhawng ri rak a, Zosiama hmel kan hmu zawm zat bawk. 

"Hei, a lo lut ve ta nge nge alawm, i hming eng nge Vala?" tiin ka pa chuan a lo be nghal suam suam a, kei paw'n Zosiam hmel chu ka lo en chik hle. 

"Zosiama" pangngai tak hian a lo ti ve mai a, ka pa chuan a kut a lèk kang nghal a, an inchibai zui zat a, ka mit chu hmun dangah a awm thei rih lo a ni ber e.

"Kan fanu i lo chhan avang hian engtin nge lawmthu ka sawi ang? Kan lawm lutuk hi sawi dan tur pawh kan hre lo, kan lawm tak zet a ni" ka pa chuan a ti leh mawlh mawlh a, Zosiama erawhin keimah min lo en daih thung. 

"Khawi khua maw i nih a Zosiam? Teremi hian hemi khaw mi leh sa hi i ni lo tih min lo hrilh zo chiah a?" rawn titu chu ka nu ve thung a ni. 

"A dik alawm, hemi khua hi ka ni hleinem" tiin an khaw hming chu a sawi zawm nghal a, chu veleh ka pa chuan phur aw deuh hian

"Hna thil avanga kan lo awm ve tawhna khua a lo nih reng chu à, kum 5 lai chu kan rawn awm ve hman asin!" a ti ta hluai a, Zosiama erawh mak ti hmel pawh a pu eih lo, a áwm ve tho mai, ani te chuan min hre sa vek alawm; ka nu leh pa chenin!

"Engtin nge Teremi nen hian in inhriat a?" ka nu zawhna chu ṭul ka va'n ti lo ber kher êm, Zosiama lah chuan chhán a la tum zui! 

"High School kan kal ho ṭhin alawm" tiin Zosiama chu ka ṭawng khalh thuai a, ani paw'n a hmui a chip ve leh mai a, dik tak chuan kan inngaihzawn ṭhin thu a sawi chhuah ka hlau a ni.

"A nih chu maw le" tiin ka nu chuan engmah a zawh zawm ta lo hlauh, lawm ru tak ka ni! 

Ka pa chuan Zosiama chu a be deuh char char a, eng nge a tih ṭhin tih te nen lam a zâwt nual a, ka nu leh pu Hneha te nupa pawh an titi reng bawk a, kei ve thung chuan Zosiama ngawr ngawr ka lo en tlawk tlawk ringawt. Ka pa lah chuan biak nuam a tih hmel mai si a, thil ṭul lo deuh deuh a zâwt chhuak palh ang tih ka hlau ru hle.

Chutih rualin Zosiama lakah chuan thinlung leh tih tak zetin ka lawm thung a, lawm lohna chî niin ka hre lo. Thil thlen lai khan lo kal se zawng nunna hial ka chàn ka ring, min sawisatu pa lah khan min thah a hreh loh hmel nasa mai bawk si a, chutah thawm te reng reng kha a la dim thiam em em zui!

Ka rilruin Zosiama lakah chuan lawmthu ka sawi mawlh mawlh a, ṭawngkâa sawi pawh ka duh, mahse tunah rih chuan sawina hun a ni chiah lo. Nakinah, kan awm fàl deuh hunah emaw mi dang awm ve loh hunah ka sawi ang. 

Mi sual laka min chhan avang te, a laka ka lawm avang te hian a kianga lét leh tumna rilru ka put phah lo va, dik tak chuan ṭhian satliah leh hmelhriat satliah ang maia en ka tum lui ngar ngar tawh zâwk a ni.

Khami zan, an khuaa an haw dâwn zan khan zah pawh dâwn lo leh mi dang mitmei pawh zah zo lo khawpa mualphothlakin ka hmangaih thu te, ka inthiam loh thu te, ka tihpalh thu te kha ka sawi a, mahse ani chuan eng thu mah sawi lovin a ngaithla liam mai mai a nih kha! 

Tun hnua min rawn hmu leh ṭhin hi a chhan ka hre lo va, hriat pawh ka tum hek lo. A chhan chu eng pawh ni se, ka tân ṭangkaina a awm tawh lo a ni. 

Ka rilru leh ngaihtuahna aṭangin ka la paih bo hlen thei lo tih chu ka pha lo va, mahse engtik ni ah emaw chuan amah ka hmangaihna te, ka thlakhlelhna te, ka ngaih ruk veng vengna te hi a la kiam ang a, a la reh hlen ve ngei ang ka ring.

Ka lo muhil leh daih chu niin, ka harh leh chuan khua a lo êng vek tawh a, ni pawh a kang sâng tawh hle bawk. Ka bulah ka nu leh Zosiama an lo awm reng a, ka pa leh mi dang erawh ka hmu tawh lo thung.

Ka harh tih a hriat rualin ka nu chuan FIR theh lut tura ka pa a kal thu te, engkim a buaipui fel tur thu te leh lungngai miah lo tur te'n min hrilh nghal siam siam a, ṭawngkâa chhâng lovin ka lo buk khum nghat ringawt. 

Ka lû pawh a zia tawh viau a, nâ a awm máng paw'n ka hre tawh lo, ka hmai erawh a vûng nasa hle tih ka hre thei. 

"Nu, i peih chuan ei tur min lo lei teh a, ka ril a ṭam ang reng ê" thâm chhala ka tih lai chuan Zosiama zâwk chu chet a tum nghal ut a, mahse ka duh ang ngeiin ka mitmei a hmu thiam hlauh!

"Tehreng mai, eng nge i ei duh ang? Zosiam, nang pawh ka lo lâk kep dâwn che a nia, eng nge in ei ang?" ding uaih paha ka nu'n a rawn tih chuan

"I duh dúh kha a ni mai nu" tiin ka lo chhâng a, ani pawh chu a kal chhuak zui nghal chu a ni mai. 

"Eng thil nge tih i tum?" aw thum ṭha zeta min betu Zosiama chu ka melh ral a, nuih luih ka tum ngial a, ka thei lo. 

"Inbiak lawk ka duh a" ka tih chuan

"Eng thil chungchangah?" a lo ti nghal a, en reng lovin ka hawi sawn ta daih! 

"Mi sual laka min chhan avang khan ka lawm e, i chungah hian thinlung takin ka lawm, awm lo la chuan ka thih ka ring" ka ti thawp sep sep a, ka thaw zui hak bawk. 

"Chuan, lo kal tawh lo la ka duh, min rawn hmu tawh lo la ka duh a ni" ka tih leh chuan

"Terem" ti dam dap hian min ṭhut hnaih nghal ruak a, kei erawh a lam ka la hawi leh lo tluang zel.

"I thusawi kha i la hria em? Nang hnaih zawng chea ka awm lui zel a nih chuan ka nâ zel dâwn i tih tawh khà, i la hria ang ti raw?" dam diai hian ka ti sep a, ṭawng pawh ka ṭawng ring lo.

"I dam loh lai chuan hetiang thu hi sawi dun rih lo ang, i dam hunah kan sawi ṭha dâwn a nia" a rawn tih chuan ka nui sak a, ka nuih erawh a za lo hle. 

"Ka dam hunah chuan tun ang hian kan sawi dun tawh dâwn hleinem, lo kal tawh lo la, i hnathawhna lamah ṭha takin thawk la, fimkhur bawk la, engkimah i hlim theih nân duhsakna ka hlan a che" ka ti ta duah a, ka thin chu a sâ pup pup a, ka ṭah a chhuak ru nghal em em bawk. 

"Tunah rih chuan engmah sawipui che ka tum lo, i dam ṭhat hun ka nghak ang" a la rawn ti hram a nih chu! 

"Zosiam!" beidawng aw lek lek hian ka ti thluk awn duai a, harsa ti zetin ka thaw chhuak ham ham a, ka kut a rawn hum chiah phei chu ka ṭah a chhuak zual tak zet!

"Engati nge hetiang hian i awm tlat mai lé?" ngawi renga kan awm hnu chuan ka ti leh ta thlawt a, vanneihthlak takin ka nu a rawn lut hlauh a, ni lo se chu ka ṭah ngei ka ring.

Ka nu ei tur lei chu ka ei mial mial a, ka ril a ṭam ang reng bawk nen ka ei tui khawp mai. Ka nu pawh ṭawng siam siam pahin a ei mial mial a, Zosiama erawh a kutah ei tur awm ve teh mah se pakhat mah a la ei paw'n ka hre lo. 

Chutia thil kan ei lai chuan ka pa hnen aṭangin ka nu'n Phone Call a dawng a, thil ei pahin an inbe mawlh mawlh a, kei lah chuan ka ei tur chu ka la ei zo rang em em zui!

"Kha, ei belh rawh" tiin Zosiama chuan ei tur min rawn pêk belh a, ka hnial ve nasa hle a, mahse awmzia erawh a awm lém lo.

"Ei ve ta che" ka tih lahin

"Ka ril a ṭam ve hleinem" a lo ti mai bawk si, a rilṭam loh thu a sawi miau avang chuan ei tur paw'n ka tilui duh tawh ta bik lo.

Nilêngin ka nu leh Zosiama chuan min awmpui deuh chawt a, tlai lamah ka pa pawh a rawn kal ve leh a, Doctor te nen thil pawimawh sawiin an inbe nghe nghein ka hria. 

Zan khat riah hnua chhuak tur angin an inbe fel a, keimah tak phei chuan in lama inenkawl ka duh daih tawh zâwk, damdawi in rim chu ka ning! 

Zan a rawn ni a, a tam berah mi pahnih chauhin dam lo an awmpui thei a, Zosiama lah chuan min riahpui a tum ruh nasa mai bawk si, keiin ṭul ka ti bawk si lo. 

Haw tura ka tih lahin sawi loh ang velin a awm tlat a, ka nu leh pa'n ei tur an lâk lai phei chuan ka vin deuh hrep nghe nghe. 

"Zan hmasa lamah i lo awmpui tawh bawk si a, zanin chu a nu nen kan han awmpui ve ang e, hahdam ve tawh rawh Zosiam, i chau lutuk palh ang" ka pa'n a tih chuan

"Zanin chiah a ni tawh tho bawk a, in remtih chuan ka lo riahpui law law ang, va awm hahdam zâwk rawh u, remti hram ula chu ka ti hle bawk" tiin a lo chhâng lêt thàn a, ka pa pawh a ngawi deuh vung vung ta ringawt.

"A va inthlahrunawm duh àwm ve" ka pa'n a tih leh pawh chuan

"Inthlahrunawm lo ve..." a lo ti mai zel bawk si, a tawp a tawpah chu ka nu leh pate pawh an haw ta nge nge a, awlsam taka Zosiama an ring erawh mak ka ti ru ve reng, mi sual laka min chhan vang kha a ni mai thei.

Ka pate haw fel hnu chuan inbe lovin kan awm dun tlawk tlawk a, zan a rei telh telh a, thawm a reh tial tial a, sana bán inkhawng pawh a ri ringin a langsar ta khawp mai. Ka mut lah chu a chhuak der bawk si lo nen Phone ka khawihsan ta daih a, ani erawh a ṭhut ngaiin a ṭhu reng a, a ngawi run bawk.

Phone khawih e ti lo chuan a awm dan ka chìk ru pah reng a, ka Phone khawih lai chu ka ngaihsak lèm lo khawp mai. Eng emaw chen kan ngawih dun vang vang hnu chuan min en zawng hian a rawn hawi a, ka lo en lai tak a ni kher bawk nen kan mit chu a intawng chat a, mahse keimah zâwk ka hawi sawn nghal vat thung.

"Engtikah nge haw i tum?" ka ti ta nge nge a, be hmasatu zâwk nih ka tum loh teh lûl nen, ka be hmasa leh ta nge nge chu a nia!

"Damdawi in aṭanga i chhuah hnuah" a lo ti dam dup a, awkâ dam taka min be ta daih te chu mak ka ti, a hma te kha chuan min ning ngawih ngawih a, min haw hluah hluah bawk ṭhin a nih kha lè.

"Aw le, mahse min lo hmu tawh suh aw, ka sawi tawh kha, min hmu turin lo kal tawh lo la ka duh, ngaihtuah pawh ka ngai tawh lo" ka tih leh chuan

"Ka hria alawm" a lo ti sup a, tukverh lam hawi zawm nghal daih pah hian

"I hriat chuan min hmu tura i lo kal tawh lo ngei ka beisei" ka ti ve leh sep a, hmangaih viau mah ila ani nen hi chuan khuanu ruat kan ni lo tih ka hre chiang tawh a ni. 

"Ka theih ka ring lo" a rawn ti chiah chu rang zet hian a lam ka hawi vat a, ka thin a rim nghal em em bawk. 

"Ka duh loh zawngin awm lui lo hram teh Zosiam, ka tân chuan hmelhriat satliah mai i ni tawh, chutiang bawkin i tân pawh hmelhriat satliah chauh ka ni tawh" thinrim insum deuh hian ka ti dam diai a, ka kut pawh ka hum ruh nasa hle.

"I tân hmelhriat satliah ka ni lo tih chu kei tlukin i hre chiang alawm" min chhàn lêt dan engkim chuan ka thin a tirim zual tak zet! 

"Kha chu hun kal tawh alawm a nih, tunah chuan ka danglam tawh, nang paw'n i sawi ṭhin khâ, kan danglam ve ve tawh!" ka ti deuh salh salh a, ṭawngkam ṭhaa biak chî ah pawh ka ngai tawh lo.

"Kan rilru ber a la danglam hleinem" a rawn tih leh chuan

"ZOSIAMLIAN!" ka ti vin hlak a, min palzam mah mah lutuk chu ka ngaitheih zawng a ni hauh lo mai.

"Muhil tawh rawh le" dam thluam hian a rawn ti leh daih a, thinrim zeta ka melh rawm rawm te chu engah mah a la ngai lo zui! 

"Ka mut a chhuak bawk lo" ka ti vin hlar a, ka ṭah lah chu a chhuak ru em em leh nghal.

"A nih chuan thil dang sawi ang" ngunthluk fe hian ka en vang vang a, chutia ka enna chu ngaipawimawh lo tih hriat zet hian

"Zirtirtu nih chu a nuam em?" a tih zawm leh nghal dap a, kan awm dan engkim khaihlak lutuk chuan min tihah hluah hluah a ni.

"Aw le, engkim kan sawi fel ang" ti hluaiin

"Ka bansan tawh che tih i hrethiam vek a ni lo'm ni?" ka ti zui zat a, chiang zet hian a hmel chu ka en kal bawk.

"I dam ṭhat hunah kan sawi zâwk dâwn a nia" ngenngawl aw dam taka a rawn ti chiah chu

"Aih! Tunah, tunah law law kan sawi fel ang" ka lo ti nghal hmawk hmawk a, min hnaih tak hian a rawn ṭhu hnai sauh a, min ngaihven tak anga a lang te chu ka awih thlawt lo. 

"A ṭha e, sawi la, ka lo ngaithla ang" a rawn ti ṭha ve ta nge nge a, min en chiang ta hle bawk. 

"Engati nge hetiang hian ka lakah i awm leh si? Engati nge min rawn ngaihven leh em em si? Maw!? Engati nge!? Sawi rawh, ka hnaih che kha i duh lo viau a ni lo'm ni? Min hua a, min ngaithei lo bawk a ni lo'm ni?" ti bawrh bawrhin

"Sawi rawh, ka lakah hian eng thil chiah nge i duh?" ka ti zui leh hlawk hlawk a, ka ṭawng pawh a zawi lo hle. 

"Hriat sual i nei" a rawn tih chuan

"Eng chu maw? Eng nge ka hriat sual!?" ka lo ti vin nghal thuai a, ka thin chhung chu a sâ deuh pup pup bawk. 

"Ka rilru dik tak i hre lo" tih leh ka kut rawn vawn a rual a, ka tal chhuak rang teh e!

"Tun aia thinlung nâ leh hrehawm hian min awmtir i la duh cheu a ni maw Zosiam? Min tihnât ngawih ngawih i lo duh hle tih ka hrethiam ta chiah e, i duh tâwkin phuba chu i là thei ang" tia chawl deuh datin

"A pawi lo, ka pawm vek, i duh tâwkin min tinâ rawh, a chhan chu ka thiam loh a ni miau alawm ti raw?" ka ti zuai ta raih a, a tawp lam phei chu ka aw a chhuak chang chang a, ka mittui pawh a parawl kuam tawh nghe nghe.

"Ni lo, i hre dik lo" ti supin ka kut chu a hum lûm vung vung a, tal chhuah pawh ka tum tawh lo. 

"Kan inkâr hi siam ṭhat a ngai tih kan hre ve ve" a rawn tih leh chuan

"Ni lo ve, siam ṭhat a ngai tawh hleinem, zanin aṭang chuan ṭhian satliah, hmelhriat satliah chiah kan ni tih i hre reng tawh dâwn a nia" ka lo ti thung a, ka ṭawng ring lo sâwt ta khawp mai. 

"Chuan, naktuk aṭang chuan lo kal tawh suh aw, nge ni a, ṭhingṭhia ka ngen kher che a ngai zâwk?" ka tih zawm nghal dep dep a, ka awah chuan beidawnna hlir a khat tih hai theih a ni mawlh lo. 

"Ka thei lo ang" chu thu a sawi lai chuan mittui tling pam hian ka lo en reng a, a hmuh laia ṭah erawh ka tum lo bur. 

Ka mut dan siam remin zawimuang hian amah hnung chhawn zawng chuan ka mu ta riai riai a, ka hnung chhawn chiah chu ka biangah ka mittui a rawn baw zawih a, hruk hul pawh ka tum chuang lo.

Ka mit ka chhing vang vang a, thawm reh ṭhiap chuan suangtuahna leh mitthla a tifiah zual em em a, eng thu mah sawi châkna rèng ka nei tawh lo bawk.

Ka thil nghenchhan lûm nuam zet chu ka nâwk deuh talh talh a, thlamuang taka khan ar arin ka mit pawh ka meng peih rih lo, ka khuma mu ang maia alawm ka nih lè. 

Ka bân pahnih chu tawm leh chawihin ka mu ṭha sauh a, mahse tui taka mut chhunzawm ka tum laia ka thil hriat chuan min va tiharh chiang si êm! 

Ka mit ka men rualin tukverha nî êng lo lut chu ka hmu hmasa ber a, ka la meng phak chûap a, ka thil nghenchhan lûm nuam zet chuan ka rilru leh ngaihtuahna zawng zawng a rawn luah zui nghal bawk. 

Ka mitmeng pawh a fiah zau telh telh a, ka taksa si chêta mu ruah, pangti lûm ngah em em chu Zosiama a nih loh hram ka beisei lui fàn a, mahse amah bak ni thei an awm bawk si lo.

Meng fiah kiaua mit khap fuk fukin ka mu ngawi ta reng a, ka harh chiang tulh tulh a, ani erawh a harh nge harh lo pawh ka hre lo. 

Chutia ngaihtuahna kawma ka mut men kar lai chuan a bân hrawl zet chu ka kawng zawnah a rawn kham ta ruah mai, ka la muhil tui hle emaw a ti a ni ngei ang. 

Ka harh chiang tawh tho bawk nen inher riai riaiin a lam chu ka hawi a, a lo mu meng ve reng tawh chu niin, kan inen chiang khawp mai. 

"Engati nge i lo mut ve ringawt a?" ka aw chu tho phang aw zet hian a ṭial deuh ruai a, ka thian zui nghal kharh bawk. 

"I tla dâwn ṭhin a, ka rawn mu ve ta tawp a nih hi!" a awah chuan tho phang aw pakhat mah a lang ve hauh lo, a harhna a rei tawh a ni mai thei.

"Ka awih lo" ka tih chuan hnâr tum dat hian a nui thum dut a, mak ti deuhin ka melh cho kiau ta ringawt. 

"I muttui em?" dam dapa a rawn tih leh chuan chhâng lovin ka tho zui nghal daih a, ka thluak chhungah zawhna chi hrang hrang a la châmbâng nasa hle bawk.

"Sawi chiang teh, engati nge ka bulah i lo mut ringawt?" ka ti nawn leh ngat a, khum aṭanga tho chhuak ṭuah ṭuah pah hian

"Ka sawi tawh khá, i muttui lutuk a, i tla dâwn dâwn ṭhin a, i tlâk hlauvin ka vil zan khua zâwk che asin" a rawn ti thum bul bul a, ani leh ni lo takin a insawifiah ve nasa khawp mai.

"Ka awih chuang lo e a! Chu bakah chutiang em ema mangchhia ka ni ngai lo, dâwt i sawi chiang ti raw?" ka tih leh chuan

"Mutpui lo che ila chuan khum aṭang hian i tla thum dawt dawt zâwk ang, mahse ka taksa nghenga i mut tâk chinah kha chuan i hnâr nghal bawrh bawrh lo chauh alawm" a rawn ti fiamthu emaw ka ti hman a, mahse a hmelah erawh fiamthu hmel pakhat mah a lang lo thung.

"I ngaihdan mai mai a nih chu!" ti hlakin tukverh bulah ka phei ta daih a, thawm aṭang chuan a rawn phei ve nghal tih ka hre ru reng bawk.

"Kan ngaihdan hi alawm a tak emaw kan tih fô ṭhin, mahse a châng chuan a lo ni vek ngai lo" thum chhal hian a ti sup a, ka hnungah a ding run tih ka hria, mahse a lam hawi ka tum eih lo hrim hrim. 

"Zing kâr aṭanga inhnial ka peih lo a nia, vawiinah ka chhuak tawh dâwn bawk a, in khaw lamah haw tlang nghal ang che" nêm tehchiam lo hian ka ti hlak hlak a, khum lam ka pansan leh nghal ta daih bawk.

End of Chapter 7