LOVING YOU A MILLION TIMES By Havali Adam (CHAPTER 7)

LOVING YOU A MILLION TIMES

By

Havali Adam

Chapter 7

"Chhuak rawh ka ti a ni lo'm ni?" u Hruaia aw chu a vin khauh hrâk a, kimkit chawih bak tih theih ka nei rih lo a ni ber.

"Khatiang khan mahni pa an be ngai lo, insum teh!" chu thu ka hriat rual chuan ka khawng deuh ut a, chu pa chu u Hruaia pa a nih rin ngaihna ka hre lo hrim hrim. 

"Eng nge i lo tih dâwn?" u Hruaia chuan a rawn ti ṭha leh ngat a, a awkâ chhuak engkim chu nélawm loh tak a ni. 

"Thil sawipui che ka duh" u Hruaia pa aw chu a dam ta deuh a, zam hmel emaw inkiltawih hmel erawh a pu hauh lo thung. 

"Engmah sawi dun tur kan nei lo, haw zawk la a ṭhat ka ring" an inkâr hre ve vek tawh tho mah ila chutiang tak chuan u Hruaian a pa a ngaithei lo ang tih ka beisei lo hrim hrim. 

"Ni lo, sawi dun tur kan ngah mai" tia u Hruaia pa ṭawng laiin u Hruaia phone zâwk a rawn ri a, muangchâng lo fê hian a pick up zui nghal bawk.

"Kal e, a ṭul lo khawp mai, biakna tur engmah ka nei lo" a ngawih deuh vung vung hnuah u Hruaia chuan a ti chhuak hluai a, a pa a enna mit chu a là sawn eih lo va, a haw ngawih ngawih tih a hriat tak zet.

"I thu thu le" tih leh a phone chu hmeh tawp a rual nghal a, ka awm dan a lái bawk si, haw daih ka duh ta rum rum. 

"Min chhuahsan theih chuan a lawmawm khawp ang" khauh vin hrawk ni tawh lo mah se u Hruaia aw chu a nghet charh a, kei ni ta ila chuan ka tlan haw vang vang tawh ang.

"Hei hi tu nge?" tiin a pa chuan min melh ta chat a, a hmai a bawl deuh ṭuam bawk si nen a hmel chu a nélawm hlawl loh!

"I hriat a ṭul lo ve!" ti nghutin u Hruaia chuan min ṭawng khalh a, a pa erawh min en reng thung. 

"Tu nge i nih?" a rawn ti chiah chu ka thin phu a rang zual sauh a, ka kut chu ka hum ruh em em ringawt. 

"Eng lo, u Hruaia" ka tih laklawh lai chuan kawngka a rawn inhawng a, hmeichhe tleirawl pakhat hi a lo lut tharh a, a tlângnèl hmel viau zui! 

"E hê, eng nge i tih a pa?" chu tleirawl thusawi chuan min ṭhawng leh ta, ka awm lohna hmun turah ka awm ni berin ka hre tawh. 

"Ka kal mai mai maw le" u Hruaia pa aw chu a dam dap a, a fapa a biak lai nen kha chuan inang lo tak a ni. 

"Awi, u Nunui chu a takah ka hmu ta che alawm, i va'n sâng em em" u Hruaia nau Hannah-i ni ngei tur chuan a rawn ti deuh tawp a, chhan dan tur ka bo leh ta vek! 

"In inhria em ni?" tiin a pa chu a lo ṭawng zawm zat a, u Hruaia nau lah chuan

"U Nunui te chu u Tea bialnu alawm, i hre ve na nge pa, anu paw'n a hria asin" a la rawn ti ta deuh deuh!

"Ka lo la hre ve lo a nih dâwn chu!" ti supin u Hruaia pa chuan thawk a la huai a, kei erawh ṭawngthei lo ang maiin ka ding ngawi tlawng ringawt. 

"Haw i duh em? Ka va thlah ang che chù?" ka kut rawn vuana min betu lam chu hawi nghalin

"Ka hre chuang lo, i tih dan dan a ni mai" ka lo ti sep a, ngaih ṭha taka awm tura min duh hmel tak hian

"Helmet ka va lá lawk ang e, ka rei lo ang" tih leh kal sawn a rual a, chutia a'n kal sawn ta chiah chu a pa leh a nau chuan min en rawn a ni ber e. 

"Haw i tum ringawt maw u Nunu? Kawm pawh kan la inkawm hman hleinem" u Hruaia  nau chuan a rawn ti a, chhuanlam tur ka baihvai em em bik ta lo e!

"Tih tur ka nei a, ka va haw tawh mai ang" pangngai tak hian ka ti a, a pa erawh u Hruaia bialnu ka ni tih a hriat aṭang khan a ṭawng tlêm sâwt hle.

"A nih, inhmu leh ang aw?" u Hruaia nau chuan a rawn ti leh hram a, nui lui zeuhin ka buk khum ta ringawt. 

Kan vêng lama u Hruaian min phur haw lai chuan ka ngaihtuahna a kal kual nasa em em a, a pa hmel leh an biak dan zawng zawng te kha ngaihtuah lêt loh theih pawh a ni lo. 

U Hruaia hnungah chuan bei thlepin a dul zawnah ka kut ka suih zawm zat bawk a, ka mit ka chhing vang vang a, kan tlan chhuah aṭang tawh kan la inbe miah lo va, kan ngaihtuahna kan kawm ve ve a ni mahna. 

Rei tlan lovin kan in kawt min thlenpui thuai a, bike aṭanga ka chhuk lai chuan min lo en reng a, kei erawhin ka en rei duh lem lo thung.

"A zia lo ngawt mai" a rawn ti sup a, a thusawi awmzia ka man thiam nghal vek bawk nen nuih sen sen chung hian

"A ho lutuk, va haw leh nghal mai rawh, i pa thusawipui tur che kha a pawimawh hmel si" ka ti deuh luam a, a pa ka sawi rik tâkah chuan a hmel a rum nghal ùlin ka hria.

"In in saw a inkalh" a rawn ti daih a, kan in kawngka lam ka hawi phei chu a lo inkalh tak tak a, class ka kal lo tih ka inhre chhuak zawm zat bawk. 

"Nia, eng lo, class kal lova awmpui che ka tum thu ka chhungte ka hrilh lo va, dawrah an awm a ni ang, Lawmtea a lo bâng ṭep tawh ang ka ring" chuti teh duaha thil sawi chu ka tum a ni lo hrim hrim. 

"Ka lo lut kawi lawk ang" a rawn tih chuan

"A ngai lo!" ka lo ti thuai a, min en chiang teh e!

"Ka sawi awmzia chu va haw zâwk rawh u Hruai, i pa leh i nau khan an nghak rei lutuk palh ang che" ka ti mawlh mawlh a, ani lah chuan

"Ka haw châk rih vak lo" a lo ti sam mai leh nghal a, mahse haw turin ka nawr lui ta tho. 

"Zanah lo lêng la, i peih chuan, i peih loh paw'n a pawi chuang lo" ka ti ta daih a, ka rilru a hrethiam tih hriat zet hian a hnâr a tum dat a, a kiai zui suk bawk. 

"I hmel ang chiahin i thluak pawh a ṭha a va nih hmel ve" awmze nei taka a rawn tih chuan ka lài nghal ringawt a nih chu! 

"Kal rawh, va haw tawh rawh" ka ti leh ta ringawt a, pà deuh hian a rawn nui ri hak a, ka mood a tiṭha vek te'n ka hria. 

"A nih ka va haw phawt ang e, zanah ka lo kal ang" tih leh a bike tihrum a rual a, an vêng lam panin a tlan chhuak zui nghal nal nal bawk. 

In chhung ka lut chiah chu ṭhutthlengah ka mu thluang duai a, u Hruaia leh a pa mawlh chuan ka rilru an luah a ni. A ngaina lo tih chu ka hre vek tawh a, a chhan tak erawh ka hre kim chuang lo, mahse khatiang tak khan a ni maw a pa dik tak a lo huat ni!? Eng nge a chhan? Eng vang nge ni ang? 

Duhsangi vang ngawt kha chu a nih ka ring lo, thil eng emaw tak chu a la awm chiang alawm, mahse ka tán amah zawh tawp lo chuan hriat theih dan kawng a awm lo. 

Ani lahin min hrilh ṭhat duh ka ring bawk si lo, eng pawh ni se ka zâwt chhin hrim hrim ang a, min hrilh ṭha duh lo a nih leh min hrilh hun a la nei em em tho ang, kei hi ka hmanhmawh deuh mah mah a ni.

Tlaia ka chhungte rawn hawin ei rawng ka lo bâwl fel vek tawh tih an hmu chu mak an ti hman viau a, kan bán hma thu hrilhin dâwt ka sawi ta ringawt a, duh ber te tân chuan dâwt sawi pawh a lo harsat loh theih khawp mai. 

Khua a thim fel hnu chuan zanriah kan ei zui nghal a, zanriah ei kham aṭang rei lo tê hnuah u Hruaia a rawn léng a, a thusawi tawha a ding nghet thei lutuk hi a mak ve ngawt mai. 

A bikin kan pahniha kan awm dun theih nân hian hun a insiam chawp nasa thei hle tih ka hria, a hna lamah a buai ṭhin tih nen lam ka hre chiang ve thawkhat tawh hle a, ka tân hi chuan mipa ṭha leh innghahna tlâk tak a ni chiang a ni. 

Zan dang ai haw a rawt hma a, a haw tur chu pâwnah ka zui chhuak a, a rawn lén apiang hian pâwn thleng ka thlah ziah ṭhin a, ka chhungte paw'n min rawn ngaihven em em ngai lo. A pa nena an inbiak dan leh thil dang zawh belh tum ranin a bulah chuan ka ding a, dam lo hmel pawh a pu tawh lo.

"Engtin nge ni ta?" ka tih chuan min en deuh hû a, ka zawhna chu a hrethiam chiah lo a ni ngei ang. 

"I pa nen chuan in sawi dun thei maw?" ka tih nawn leh tâkah chuan sawi zui duh lo deuh hmel hi a pû a, min chhâng mai lo bawk.

"Min hrilh ve dâwn miah na nge? Kei paw'n engkim ka hrilh ṭhin che khâ?" tur titih hian ka ti leh ta nge nge a, chutianga kamki loh chuan sawi a tum loh hmel tlat a tin a ni!

"Hre lo law law la a ṭha zâwkin ka hria" a rawn tih chuan ka lung a âwi lutuk lo. 

"Engati maw?" ka luhlul lui ve tlat dâwn, a bialnu alawm ka nih lè. 

"A ṭul rih lo, hun ka tih hunah ka hrilh ang che" a ti deuh hmuk a, ka rilru a kal thui khawp mai. 

"Aw le" tlâwm aw zet hian ka ti zawi sep a, min hrilh ve mai ka ring kha a ni a, mahse min hrilh dâwn lo niin a lang. 

"Ka lut a nia" kan ngawih dun vang vang hnu chuan ka ti leh a, min en reng a, thu erawh engmah a sawi chuang lo.

"Muttui" ti leh hramin in lamah ka kal phei sawk sawk a, dik tak chuan ka lungawi lo ve thlawt a ni. 

In chhung ka lut chu ka room lam ka pan ding nghal a, khumah ka mu bawk thlawp a, ka meng kar bawk. Ka luh aṭanga rei lutuk lovah bike rum thawm ka hre chiah chu tu nge a nih zawh hranpa ka ngai hauh lo, ka luhsan lai khan a la haw lo va, ka lungâwi lo tih pawh a hriat vek ka ring. A bike rum thawm hla tial tial chuan ka lung a tiâwi lo zual hle leh nghal a, dik tak chuan min hrilh ṭha ve hle hle se ni mai tur! 

A tuk zinga ka tho te chu ka rit bûr a, zan lamah ka muhil har bawk a, mut ka kham lo teh e! Adeline-i nena Bus kan chan dun lai te chuan ka la ni muai muai a, ka chau rawih ni mai te'n ka hria. Bus-a kan chùan hnu chuan ka mutthlu zui ta nge nge a, MZU Campus kan thlen dâwnah ka harh ve chauh a, tlém chuan ka mitmeng pawh a zia ta deuh! 

Adeline-i chuan u Hruaia chanchin min zâwt a, nimin lawk khan class kal lovin ka lo awmpui ve tingtang tawh bawk si nen a dam tawh leh tawh loh min zâwt a ni ber. U Hruaia lakah ka lung a âwi lo tih a hriatthiam theih loh dan tur berin u Hruaia ṭhat tawh thu chu ka hrilh ve mai bawk a, min zâwt thui ang tih erawh ka hlau khawp mai. 

Zing kâr aṭanga mood fuh lo sa ka ni bawk a, zirtirtute thil sawi tam tak pawh ka rilru ah a lut hlei thei lo va, thinlung lama mawlhtu leh lungawi lohna a awm miau chuan mood a dik tak tak thei lo. Haw tura Bus chan hun a rawn inher chhuak a, chutah ṭhutna kan la chang lo leh ta zui a, ka nî hman chu a nuam hlawl lo a ni. 

Bus chhunga kan din laiin Adeline-i chuan min nghawk zeuh a, a hawina lam chu ka hawi nghal a, ka mi hmuh chu tu dang ni lovin u Hruaia ngei a ni. ATM booth bulah dingin MZU park lam chu a hawi phei a, min zawng a nih ngei ka ring. 

"I pick up dâwn na nge?" phone ring tawp dâwn tawhah Adeline-i chuan a rawn ti a, min call eng ang mah se ka pick up dâwn lo, a lakah ka lungawi lo tih hre mawlh teh se!

"Engati nge a?" phone a rik tawp rualin ka ṭhiani bawk chuan a rawn ti leh nghal a, chhan loh aiah tiin

"Nakinah ka hrilh ang che" ka ti liam puat a, kan inkârah felhlel a awm tih chu a hriatthiam ve nghal mai ka ring. 

"Vawiin hi i dik lo ka ti reng a ni" ti sepin engmah min zawh zawm ta bik lo va, min zâwt ta pawh ni se ka chhâng kher lo ang. 

U Hruaia chuan vawi thum lai min call tawh a, kan hmuh phakah awm reng mah se va biak emaw va pan emaw pawh ka tum lo hrim hrim. Ka phone a rawn rik leh rual chuan ka switch off ta daih a, a mak ti hmel leh a bangbo hmel chu ka khawngaih ru viau leh lawi a, mahse a bul erawh ama thiam loh a ni miau bawk si a ni. 

A bike chu hûng ṭha tê têin min zawng zui zat a, haw daih se ka ti, min rawn hmu ang tih ka hlau, min hmuh vaih chuan bus aṭangin min chhuktir phet a tum lo ang tih pawh a sawi theih loh. 

Min zàwn min zawn hnu pawha min hmuh tâk ngàng loh hnu chuan a beidawng ta a ni ang, bike tirumin a tlan haw zui vang vang a, ka ti mah mah ang tih erawh ka hlau ru viau tho.

Kan chûan haw danin a zir lo bawk nen Adeline-i chu engmah ka hrilh rih ta lo law law a, in ka thleng te chu ka awm a nuam chuang bik miah lo. Ka phone switch off ka switch on rual chuan missed call vawi 10 chuang zet a lo awm tuarh a, u Hruaia hnen aṭang vek a ni a, whatsapp message erawh a hnutchhiah tam lutuk lo thung. 

Ka ngaihtuah chiang a, a pa nena an inbiak dan lo hriat ve zel kher chu a ṭul emaw ni le te ka ti hnuhnawh leh lawi a, dik tak chuan ka inthiam lo ṭan nghal der a ni ber e. Ka mitthlaah lah kei min zawn hmuh loh avanga a bangbo hmel te kha a châm reng bawk si, keimah hian kan inkâr ka tichhe zual mai mai ang tih ka hlau ta ber.

'A lo call leh hûn hunah ka pick up tawh ang' tia rilru siam felin ngaih ṭha taka awm chu ka tum ta ngar ngar a, ka thei der lo zui! Khaw thim thlengin a hnen aṭang phone call ka dawng ta miah lo va, ka lakah a lungâwi chiah bik lo a nih ngei ka ring. 

Zanriah kan ei kham a, a thawm a reh vung vung a, dik tak chuan a lo kal ka ring a, mahse a lo kal hauh lo. Dâr 9 thleng chu engmah ti mumal lovin ka awm tawp a, ka lo nghak ti ila a sual tampui lo ang. 

Chutia ka ṭhut ngawih vung vung lai chuan phone call ka dawng a, rang zet hian ka en vat a, mahse min lo call-tu erawh Adeline-i a ni thung. Fun kim em em lovin u Hruaia nena kan intihthiam loh deuh thu chu ka hrilh mial mial a, ka ṭhian ṭha ber mah ni se a zawng zawng hrilh chî ah ka ngai rih lo, hrilh hun erawh a la awm mahna.

Ka phone ri nghawr dat dat chuan min tiharh vuai vuai a, tukverh lam ka hawi riai riai a, zing kâr a lo la ni miah lo. Min rawn call-tu lah chu u Hruaia a la ni zui, ka harh chiang rang teh e! Phone call pick up lawk lovin dâr zat ka en tê tê phawt a, tlai chhe lutuk la ni lo mah se mut hun erawh a ni tawh viau mai, kei ngei pawh ka lo muhil daih hman tak alawm! 

"Eng vang teh hrepa ka phone call pick up duh miah lo nge i nih?" nghet charh hian a rawn ti khur khur a, pangngai taka biak ka tum vei nen a rawn ṭawng dan chuan ka mood a tidanglam chiang khawp mai. 

"Ka mu tawh a nia" ngaihno bei fahran lo hian ka ti ve hmak a, zan hmasaa ka lungawi loh ang chiah khan ka lungawi lo thar leh a ni ber.

"Thil sawi fel kan ngai, ka lo kal dâwn" aw dam deuh zâwka a rawn tih chuan

"Ngai lo, lo kal tawh lo law law mai rawh, kan mu vek tawh" ka lo ti thuai a, mahse ka thusawi chu engah mah zu han ngai lova maw lè.

"Ka lo kal" tih leh kan inbiakna hmeh tawp a rual nghal a, a sawi ang ngeia a lo kal ka ring bawk. 

Thawm dim thei ang berin in aṭang chuan ka chhuak a, ka chhuah lâwk vat chhan pawh in chhunga min rawn luh chilh ka hlauh vang a ni pakhat! Pâwnah chuan ka ding ta reng a, kan in kawt piah deuh fê ah a ni nghe nghe a, chutia ka din tâk reng hnu chuan u Hruaia hmel pawh ka hmu har lo hle. 

"Engati nge ka phone call i pick up duh miah loh? Engati nge i phone i switch off tlat?" ka dar tawn tawn hmera min thing titih chung hian a ti nghet charh charh a, lungâwi hmel reng a pu lo. 

"Nunu!?" a awkâ chhuak chu a la dam chuang lo, kei lah sawi tur hre lo ang maiin ka ngawi tlat bawk si.

"Nizan vang kha em ni?" a rawn ti leh a, tun ṭum erawh a aw a dam ta deuh.

Ka melh chho kiau lai tak chuan rawn che thutin ka hmuiah a rawn fawp tawn tawn a, a tirah chuan nam sawn tumin ka bei nasa viau a, mahse min fawh dan a thlak chinah erawh a ṭânga beiin ka fawp let ve mial mial a, ka thinlung chhung lungawi famkim lohnaa khat te chu a hmui hmang chuan a thunun hneh em em a, engkim a chhawk mai bakah a chawk dai vek ni maiin ka hria.

"Hetiang hian ka lakah awm tawh suh" thum chhal hian a rawn ti hniam ruih a, kan chal chu a insi chial bawk. 

"Dik tak chuan" ka tih laklawh laiin

"Ka hria" a lo ti sup a, ka khabe chawi kâng pah hian min fawp leh zeuh a, a rim pà tak ka hip leh thei te chuan min tihahdam siai siaiin ka hria.

"Ka ngaih hmanzia che hi i hrethiam pha kher lo ang" ti thum hniam ruihin a âwmah min kuah bei hle hle a, kei tak paw'n ka ngai em em hman chiang alawm, ka sawi duh lo mai mai zâwk a ni. 

"I pa i huat em em chhan hi min hrilh teh u Hruai?" ka ti ta nge nge a, ngaihngam zet hian a âwmah chuan ka la bei reng bawk.

"Ka tân chuan pa a ni ngai lo" tih chauha min chhanna chuan engkim a tifiah vekin ka hria, zawh nawn leh ngaiah pawh ka ruat tawh lo.

"Engati ka lakah hian lungâwi lohna i neih? Eng vang nge? Nizan vang kha em ni?" min melh chhuk run pah hian amah bawk chuan a rawn ti leh a, ka lo buk khum nghat ringawt.

"Thil ho tak a ni!" ti supin thawk a lá deuh ham ham a, a hahdam huai hmel hmuh nuam zet chuan kei ngei pawh min tihahdam sawng sawng thei.

"Dik tak chuan ṭha taka min hrilh ve mai kha ka ring a, mahse nang lah sawi a hnêkin 'hun ka tih hunah ka hrilh ang che' i ti deuh tlat bawk si a, ka tân chuan a tha nât thlak ve alawm" vui aw lek lek hian ka ti ve ta tan tan a, ka ṭawng dan vel chu a naupangchhia ang reng viau bawk.

"Hei leh chen hi kan inzui ve tawh a, a zawng zawng chu ni lo mah se i bulah hi chuan dâwt ka sawi ngai lo va, thil tam tak ka hrilh ṭhin bawk che" ka tih zawm leh mial mial a, ani erawh a lo ngawi reng thung. 

"I pa nena in inkâr pawh hi" ka tih laklawh lai chuan

"Ka hria" tiin min lo pawtchat ve ta nge nge.

"Ka ngaihtuah tluk zet chea min lo ngaihtuah ve tih ka hriatna hian min tihlim a, mahse nang ka ngaihtuahna che hi a nasat zâwk mah ka ring" kiai suk pah hian a rawn ti thum dut a, fiamthu a thawh ve tihna em ni!?

"Awi, i va'n ihmeh lo" nui chungin ka ti hliai ringawt.

"Eng chu maw?" a lo ti nghal a, ka rin lâwk ang chiah! 

"Khatianga ṭawng vel kha maw le" ka tih chuan a nui nghawr dat a, a hmel hmuh nawmzia chu a hre ve kher lo ang ka ring. 

"I hlim tawh em?" dam thluam hian a rawn ti thawp sup a, ka lo bu nghauh nghauh a, ani paw'n min kuah nghet sauh zui nghal. 

"Thupha chawina ni pah fàwmin naktuk chu ka thlah che ang a, ka lo lam leh bawk ang che" a rawn ti leh chuan ka lo nui sen sen a, ka lài a ni mah zâwk!

"Eng nge i nuih?" tih leh ka hmai bul cheta rawn kun hniam a rual nghal a, kan infawp lo chauh a ni. 

"Engmah" ka tih chuan

"Ka awih lo" nghal aw zet hian a rawn ti dut a, ṭawng tuma ka án zuau lai chuan min fawp nghal chat bawk.

In chhunga ka luh hnu chuan ka khi sak a, ka mood fuh lo zawng zawng kha tunah chuan vawm bo ang vek a ni tawh! Mut hmunah kan awm dan ka suangtuah lêt a, a vawi khatna atân kan inhmu thiam lo ve zuaih kha a ni a, tunah erawh ka va hlim leh tawh si êm. 

Ka muttui êm avangin zingah pawh thawh ka hai phah hial a, u Hruaia nena kan inkâr a ṭhat vek tawh vang tih ka hre chiang a, hetiang em em hian ka nunah mipain hmun an luah hneh ka ring ngai lo, mahse a thleng mêk miau bawk si a ni. 

Zan lama a sawi lâwk tawh ang ngeiin MZU-a ka kal tur chu min rawn hruai thlap a, Adeline-i pawh ka hrilhfiah ta ringawt, zawhna a la ngah em em zui. U Hruaia nena kan ṭhat leh tawh thute chu ka hrilh ve ta luam bawk a, kan inhmuh thiam loh chhan tak erawh ka hrilh leh lo ta law law mai. 

Kan department building kawt kan thlen thlak hnu chuan tawi khawmuang tawh lovin a tlan haw leh nghal a, haw hunah bus-a haw lo turin min hrilh chiang viau bawk. 

Kei paw'n min rawm hruai dâwn avang chuan haw ka tum em em bik chuang lo, Adeline-i erawh engmah ka la hrilh lo, hrilh pawh ni ila min lo hriatthiam leh mai ka ring. 

Kâr a ral a, kan nî hman dan chu ngai pât lovin a danglam reng a, mahse hrehawm a ni chuang lo. Ka zirna lam pawh ngaihzawng ka neih avangin ka ngaihthah phah lo va, dik tak chuan tih ṭhat ka tum em em ṭhin zâwk! 

U Hruaia nena kan inzui hnu aṭang phei kha chuan ka bei nasa ve thei em em a, ngaihzawng neih avang mai maia zirna lam tihbahlah ka tum lo a ni ber e.

Ni khat chu a ina lêng turin min sâwm a, keini lah kan bán hma ni tak a ni kher bawk nen a remchang viauin ka hria. Bus-a kan haw tawh avangin Zodinah a bike nen min lo chang a, kan hmuh hnu chuan an vêng lamah min phur zui nghal bawk. In chhung kan luh aṭanga rei lo tê hnuah a nau Hannah-i a rawn lut hlawl a, a ṭawng duhin min be tuitam hle a, ka ngaina nghal ringawtin ka hria. 

"Ka lo kal ang" u Hruaia lam chu ka hawi vut a, tu tak bia ni maw!

"Lo chhuah miah suh u, ka rei lo ang" tih leh a phone chu hmeh tawp rual a, ka mita zawhna a hmuh rual chuan

"School-ah kal lawk a ngai, rukru an lo lut a ni awm e" tiin ka rilrua zawhna chu a rawn chhang nghal zung zung a, a chet danah a hmanhmawh tih a hriat hle bawk.

"Awi, tute nge a? An va'n sual em em, kan lo kal ve dâwn em u Te?" u Hruaia nau Hannah-i chuan a lo ti thuai a, a mitmeng aṭang pawh a hlauthawng tih hai rual a ni lo. 

"Hetah hian lo awm zâwk rawh u" tih bak sawi tawh lovin u Hruaia chu a chhuak zui nghal a, thil pawi a thlen loh hram ka besei tawp ringawt.

"U Tea hi chu a buai thei ê, i ti ve em?" Hannah-i chuan a rawn ti a, amah pawh en chuang lo hian

"Nia, a buai thei khawp mai" ka ti satliah ve mai a, chutah Hannah-i bawk chuan

"Ka pa nen an inkâr a ṭha vak lo tih a hrilh vek tawh ang che ti raw?" a rawn ti leh a, a thil sawi chuan ka beng a verh ru ta viau bawk.

"A hma chuan u Tea hi thinrim hmel a pu reng ṭhin asin, i awih em? Ni lo, i awih chiah lo ang, a chhan chu i bulah chuan thinrim hmel a pu ngai lo, a hahdam hmel ngawih ngawih ṭhin zâwk tlat a tin a ni!" chhâng lova ka ngawih reng laiin a rawn ti leh a, hriat belh zel ka châk tawlh tawlh!

"Chutiang a nih pawh ka lo hre hleinem" ka tih chuan

"A ni alawm, in inzui tirh pawh khan ka nu a hrilh thlap, kei pawh min hrilh tho, kha mi nîa a hlim hmel ka hmuh khan a bialnu thar chu hmeichhe ṭha lo a nih ka ring lo nghal tawp bawk" a rawn ti leh ta zel a, min chhuah fel mah mah dâwnin ka hria. 

"Dik tak chuan ka pa hian a ngaina lo bik lutuk a, pafa dik tak, thisena inzawm mah ni se kei lêtin ka pa hian u Tea hi chu a ngaina lo daih záwk!" a thusawi chuan ka beng a verh zual zar mai. 

"Engati nge a?" ka lo ti nghal thuai a, ka hriat duh chin min hrilh vek theih ka ring ringawt bawk. 

"Sawi dâwn chuan sawi tur a tam mai, a châng chuan u Tea hi ka khawngaih ṭhin. Ka pa duh ang ngeiin MPSC Exam-ah a inziak tling a, a tuina erawh Photography lam daih a ni thung. Chuti chung chuan ka pa thu a awih hram hram a, a awih lui a ni mah zâwk ang chu! 

Chutah ka pa bawk chuan nupui atân a ṭhianpa fanu u Duhsangi neihtir a tum leh ta zel a, chu chu kan lak ata a awm hran chhan a ni ta chiah a, u Tea hi chuan a haw kum khua tawh ang ka ring" a ṭawng tawp lamah chuan khawngaihna leh beidawnnaa khat aw ri a tel a, kei ngei pawh u Hruaia thil lo tawn tawh zawng zawng tur dâwn chungin ka rilru a nâ vawng vawng thei.

"Hetia hlim taka a awm hi ka lawm tak zet, ka nu pawh a lawm a, ka pa pawh a lawm tho chuan ka hria, mahse ani chu a rilru ka hre chiang vak lo" ti lehin engmah a sawi zawm tawh lo va, ka tân sawi zui tur a vâng khawp mai.

"Thingpui ka'n siam ang e" ti daihin ka tho zui nghal a, ka kal hlat hma chuan

"Engati nge maw u Tea chanchin ka hrilh vak mai che le, i hmelah lah khan ka sawi zawng zawng kha i vawi khat hriatna a ni tih a lang vek bawk si" a rawn ti a, chhan ngaihna hre lovin ka nuih ringawt. 

Thingpui ka siam lai chuan u Hruaia a lo haw a, school lam chanchin ka zâwt nghal thuai a, Hannah-i pawh a bang bik chuang lo, vanneihthlak takin engmah an lo ru bo hman lo a ni awm e. 

School rawk tumtu te Police Station lama an hruai nghal thu a sawi lai te chuan ka lo en reng a, hun kal tawha a thil lo paltlang tawh ka hre zo chiah bawk nen namên lovin ka khawngaih thar tak zet a ni. 

"A va tui dâwn ve" ti supin ka bul chêtah a rawn ding a, a nui deuh suk bawk. 

"Kha le, a in theih chiah" tiin thingpui chu ka pe a, là kangin a in zui nghal a, a in zawh ruala min buk khum nghut danah tui a ti tih ka ring thiam nghal mai. 

"Zanin tlai chu chaw ka lo ei dâwn a nia u Te?" ṭhutthlenga bawk mu ar ar chunga phone khawih pah hian Hannah-i chuan a rawn ti lang lang a, kan dinna lam pawh a rawn hawi chuang lo. 

"A ṭul lo, va haw tawh zâwk rawh" hriat nuam lo ni chuang si lo hian u Hruaia chuan a lo hnial thung a, kei erawh ka tih theih tâwk chu thingpui lo in a ni mai. 

"Ṭul e, ei rawng pawh ka bâwl vek ang, ka ti tak tak a nia u Te, chaw ka lo ei dâwn" a nau chuan a ti deuh tlat a, haw a tum loh hmel viau bawk. 

"Eitir mai la" ka ti ve ta sep a, ka ṭawng ring hran lo hle. 

"Zanin tlai chu chaw lo ei ta che?" tiin min sâwm lêt zâwk daih a nih chu!

"Ei lo ang, haw ka duh tawh zâwk, thingpui in zawhah min va thlah la, i hman loh paw'n a pawi chuang lo" ka ti zung zung a, ani erawhin 

"Ka lakah hian inthlahrung ṭhin suh Nunu" a lo ti deuh charh thung a, ka nuih ta ringawt bawk. 

"Ka va thlah dâwn che a nia" aw dam deuh zâwka a rawn tih leh chuan

"Aw le" ka lo ti ve mai a, thingpui in pahin ṭhutthlenga bawk ar ar a nau chu a en leh reng ṭhin a, mahni chauha chaw ei ai chuan ei dun tak tak se a ṭhat ka ring.

Thingpui inna no vel ka sil fai zawh hnu chuan kan inphur chhuak zui nghal chu a ni mai a, khua a hniam ṭan tawh a, office hna bán lai tak a ni bawk nen motor vei vâk leh insul pel an tam khawp mai. Minute tam a liam hmain kan vêng kan thleng der a, ani pawh a tlan lêt zui nghal a, zana a rawn lén dâwn leh dâwn loh thu min hrilh miah lo bawk. 

Hannah-i thu min hrilh zawng zawng ngaihtuah lêt roh roh chungin ei rawng ka bâwl melh melh a, u Hruaia bawk chuan ka ngaihtuahna a tikal thui a ni. A pa a ngainat lohzia hriaa hmutu ka ni a, Hannah-i sawi dan aṭang phei kha chuan haw àwm ngawih ngawih pawh a ni. 

Amaherawhchu, a pa a ni miau a, eng ang paw'n a lakah suah sual rawng bâwl mah se a pa a ni tho tho. Ka rilruah thil pakhat a rawn lang a, chu thil chu tihhlawhtlin ngei ka duh, mahse a kawng a awlsam dâwn lo tih ka hre lâwk sa vek thung, ka hlawhtling kher lo mai thei bawk.

End of Chapter 7