LOVING YOU A MILLION TIMES By Havali Adam (CHAPTER 6)

LOVING YOU A MILLION TIMES

By

Havali Adam

Chapter 6

A hming hnuai chiaha 'typing' tih lang hring kalh chuan ka thin phû a ti rang dep dep a, eng nge a rawn sawia a rawn thawn dâwn ka hre der bawk si lo. Ngaichâng ranin a message lo thlen hun chu ka nghak ta reng a, mahse 'typing' a in ti char char a, sawi tur a ngah viau te pawh a ni mahna lè. 

Tunah zan dâr 10 leh a chanve a pel var var tawh a, dârkâr tam tak inbe lo leh hmel inhmu miah lova kan awm avangin sawi tur ngah tak pawh ni se a demawm loh, kei tak paw'n sawi tur ka ngah a, zawh tur lah ka ngah hle. 

Chutah rin loh dan deuhin thil a la kal zui, a hming hnuaiah chuan 'typing' tih a lang tawh lo va, a hnen aṭangin phone call ka dawng zui nghal zat bawk. 

"Pâwnah lo awm rawh, ka lo kal dâwn" phone ka pick up rualin a rawn ti a, ka ṭawng ve hmain a hmet tawp daih a, a awm dan chuan min tibangbo tak zet!

Khumah chuan ka ṭhu tung deuh ût a, dâr zat ka en leh hram a, dâr 11 a lo ri thuak tawh a, ka chhungte phei chu an muhil vek tawhin ka hria. Thawm dim thei ang berin ka room aṭang chuan ka chhuak dê dé a, kawngkapui ka hawng te chu thawm dim zual tak ka ni! 

Pâwn erawh han chhuah tâkah chuan a lo vawt deuh sùk a, kawr lûm ka ha chhuak lo ve ngawt a, a vawt lam lek lek chu a ni. Kan in kawt tûal zâwlah chuan u Hruaia nghakin ka inkuangkuah deuh thàn a, boruak lêng vel hrim hrim chu a hit mem mem a, duh ber leh thlakhlelh ber te tân chuan vawt pawh kan sawi thei lo a ni hawt e!

Chung lam thlirin van thim chhah mup chu ka thlek dauh dauh a, arsi pakhatmah a lang lo va, ruah a sûr leh dâwn te pawh a ni mahna. 

Chutia u Hruaia lo thlen hun tlum tê thlira ka thlir awl loh lai chuan ka mi hmuh duh ber leh ka hmuh châk em em pa chu a rawn thleng ta ngei a, a hmel leh taksa nena hmuh kawp nuam ka tih em em ṭhin leather jacket rawng dum a rawn ha leh ta. 

Ama ta tur bika siam ang maiin a inhmeh leh pek hle a, a hnuaiah tshirt vâr thianghlim zet a ha bawk a, a ṭhi te nen lam chuan en nin a har ka ti ru ngawih ngawih a, ka bul a rawn thlen tâkah chuan ka hawi sawn ve ta hram.

"Engati nge tun ang zan rei tawhah i lo kal leh lawi si?" tia zawhna ka zâwt zo chiah chu a rawn che thut a, a hmui lûm thar thar leh ka hmui pawh an inbawhthuah zui nghal bawk. 

Ka biang tawn tawna dawmin min fawp vang vang a, min fawh dan engkim; ka hmui thununa a hmui a tihchet kual dan vel chu a thukin a ril em em a, thil tam tak min hrilh mawlh mawlh ni mai te'n ka hre hial a, mahse ka chiang bik lo, ka chhia leh ṭha hriatna zawng zawngte bo êm lo mah se ka engkim thunun bet vek thei khawpa min fawhna chuan ka rilru a tifim lo a ni. 

Nuam ti ru em em, mahse harhfim chuang bawk si lo ang hian ka awm a ni ber. Zawimûanga a inlâk hran riai riai lai chuan ka heh ka lo kau tiar a, a mi fawhna chu ka dawng kham mawlh lo ti ila a sual lo ang.

"Nang tluka min luah hnehtu hi an awm leh theih pawh ka ring lo" ti ril ruiha min han fawp leh chiah chu awm ngaihna réng ka hre zo tawh lo. 

Min fawpa ka hmui dut ngut ngut pah hian min chawi kang lawp a, kei paw'n muangchang lo fahranin ka ke ka lo chet ve nghal sawk sawk a, a kawnga kherh betin a tel lova awm thei lo ang maia ka thlakhlelh em em chu ka fawp lêt tawn tawn a, kan duham dun lutuk erawh hum sual dai palh a hlauhawm hial a ni. 

Ka hmuia fawh duh tâwk mai lovin ka ir leh ka nghawng vel chu a hmui hman thiam zet chuan a fang kual chawl lo va, ka bân pahniha a nghawng chelh bet ranin ka lo dâk awn awn a, ka laka a chet dan engkim dawnsawn nuam lutuk avang chuan men pawh ka meng phal tawh lo.

"Engati nge ka phone call pakhatmah i chhan loh? Message pawh i view har si, engati nge?" ngawi renga kan inkuah hle hle hnu chuan ka ti chhuak hap a, min la pawm kang reng a, kei paw'n ka la kuah nghet em em bawk.

"U Hruai?" ti leh sepin ka kuah nghet zual sauh a, a dara beiin naupangchhia zet hian ka thle ngîal a, kan awm dan chu a hahdamthlak rualin ka rilru kaptu erawh a awm reng tho.

"Sorry" a ti thum ruih a, a hmel en tuma ka awm dan ka siam rem vel chu min lo en chiang khawp mai. 

"Min hrilh dâwn lo em ni?" thawp sepa ka tih chuan a ngawi run a, a mitmeng chu ka chhiar thiam hauh lo bawk. 

"Engmah a ni lo" a rawn ti daih a, ka ngaih erawh a ṭha zàn lo hle.

"Ka chhuk duh" ka tih chuan min dah thla ve mai a, a âwm ngheng turin min kuah zawm zat thung. 

"Hetia awm tlaivàr ṭhak hi ka hreh miah lo" a rawn tih chuan ka lo khi sak a, kan boruak ṭha lai chu tihchhiat duh lovin zawhna pawh ka zâwt sî sê zawm zel kher duh ta bik lo law law mai.

"A chî nâng" tia ka chhan chuan a nui nghawr dat a, a bula awm hi chu a hahdamthlak ngawih ngawih! 

"Naktuk chu khawiah emaw ni léng ila?" tih leh rawn kun hniam a rual a, a khabe chu ka dar, ka nghawng bul chêtah a nghat zui zat bawk.

"Khawiah?" ka tih chuan

"I duh dûhna ah a ni mai" a lo ti ve leh nghal a, ka dul zawnah a bân pahnih hrawl zet chu suihin a kham ruah a, a taksa lûmna chuan min ur hiam hiam ni mai te'n ka hria. 

"Kalna tur pawh ka hre lo, i hre zâwk ang chû?" ka ti ta ringawt a, kan awm dan chu nuam ka ti tak zet. 

"A nih chuan in-date ila?" a thusawi chu ka nuihpui hak a, a hmel hmu kher lo mah ila ani pawh a nui tih ka hre thei. 

"In-date chu i duh em?" a rawn ti nawn leh sup a, ka lài tlat pek a nih chu! 

"Ka chhungte ka lo dil ang, a chhan chu inrinni hi chuan dawra awm chhawk ka duh ve ṭhin a" ka tih chuan

"Keima'n ka lo dil ang, i tân pawh a nawm deuh zâwk ka ring, kalna tur ṭha deuh ka ngaihtuah chhuak thut" a rawn ti ve luam a, keia hre châk leh zek zek tawh chuan

"Khawiah?" ka lo ti vat a, rem leh rem lova a hmel en tumin ka thlek chho hâ bawk. 

"Naktukah le" tih leh ka bianga fawh zeuh a rual a, ka hmuia ṭuan leh nghal zatin min kuah nghet salh a, a inlák hran tâkah chuan melh chho kal chungin ka nuih ver ver ta ringawt.

"Dâr engzat nge ni tawh reng reng lé?" tia ka phone ka hmet êng chu

"Ehê" ka ti nghal hluai a, ka rin phak bakin hun chu a lo kal chak daih! 

"Awi, dâr 12 a pel tawh maw lé, a va'n mak em em" ka ti niah niah a, kan awm dun aṭang khan hun tam a la liam paw'n ka hre hauh si lo. 

"Duh berte bula awm chuan hun a kal chak duh alawm" dam thlup hian a lo ti sup a, a sawi dik mahna le! 

Min kuah vawng vawng hnu chuan a haw tur kan invai liam thei ta hram a, awm dun reng duh mah ila a theih rih si loh a ni. Kei pawh thawm dim thei ang berin in chhungah ka lut a, ka room lam ka pan ding nghal a, khum ka thleng chu lawm lovin ka nui ver ver a, lawm lova min tinui theitu awmchhun a ni. 

Ka kawra u Hruaia rim pá tak nam chem chem te chu ka hnim nawm vang vang a, maimitchhingin a hmel ka mitthla zui vawng vawng pah bawk a, ka mut a tui sawt dâwn tih pawh ka chiang khawp mai. Rizai chu ka kapkâra kârchehin ka kuah hlùn a, muthilh tumin ka chhing zui ta siai siai bawk. 

A tuk zínga ka harh chu thawh tirh phat aṭangin ka mood a fuh nghal hle a, u Hruaia nena kan in-date tur vel chuan min tihlim ru veng veng ti ila a sual lo ang. Ear phone-a hla ngaithla pahin ei rawng ka bâwl mial mial a, zep thu cheng lo, ka hlim a ni. 

Tukṭhuan kan ei lai chuan u Hruaia nena kan chhuah dâwn thu ka sawi a, kan rei ka rin loh thute ka sawi lûam tak nà a, kan rei dâwn leh dâwn loh erawh ka hre hauh si lo. Ka nu leh pa chuan an lo phal ve mai a, mahse haw har lo turin min chah thung. 

Dâr 9 leh a chanve velah u Hruaia chu min lam turin a lo kal a, ka chhungte ka dil tawh thu leh dawra an kal vek tawh thu ka hrilh a, in-date tura chhuakin kan in chahbi pawh kan dawrah kan dah kawi zuaih pah bawk. 

U Hruaia chuan Durtlâng lamah min tlan chhohpui mual mual a, kan boruak nuam nghal viau mah se khaw awm dan erawhin rei lo tê hnua rawn chhe thuai tur hmel a pu thung. 

A thu hrimah Durltâng lam daih daiha min tlan chhohpui nul nul chu ka hrethiam chiah lo, khua duk deuh ruih mah se nî erawh a sâ reng tho va, ruah a sûr a nih paw'n chawhnu lamah a sûr ka ring.

"ATC-ah min kalpui i tum a ni chiang mai?" fiamthua ka tih chuan

"Chuti ngawtin duh duh a kal theih ringawt hleinem" a lo ti ve mai a, a nui nghawr dat bawk.

"Khawiah nge min hruai i tum tak tak a?" ka tih leh chuan

"Khawiah vak mah, thing daihlim hnuaiah kan awm mai mai ang chu ka lo ti" a lo ti sam thán a, a sawi tâkah chuan a nuam phian tak ang.

Min hruai a tumna hmun kan thleng chu a sawi ang ngeiin thing a lo intlar ṭhup a, kawngpui chu thing leh hnim hring sâng lutuk lova ṭo sep sep ho hian a hual vel a, kan awmna lai tak chu kawngpui sir a ni ber e. 

Thing buk hnuaia awm zet zawng a hahdamthlakin a dai nuam em em a, chutah dawn ninawm loh táwk chiah hian thli fim a thaw heuh heuh zui leh ta nghal a, engkim chu a nuam vel vek! 

Kawngpui sira ṭhutna tê lo awmah chuan inhlat lo takin kan ṭhu dun a, kan ei tur lei lâwk sa ho pawh ṭhutthlengah chuan kan dah a, hmun changkang leh ropui tak taka kal aiin chu lai hmun tê; inngaizawngte tâna siam ni mai àwma hmun rem leh nuama kal chu ka zawngchhang dâwn tlatin ka hria.

"Tukin i tho nuam em?" ka kut hum lûm vung vung paha a rawn tih chuan

"Nuam tak a ni!" ka lo ti ve hliai a, min nuih suk pah hian

"A chhan ka hria" a rawn tih zawm nghal a, chutah amah bawk chuan

"A chhan chu kan in-date dâwn miau a" a rawn ti leh a, hlim si, lái ru deuh bawk siin ka nuih sen sen ta ringawt. 

"A nuam reuh ê, a hmun hi a rem reuh bawk si, engtin nge i hriat a?" ka tih chuan

"Ka ṭhianpa hi ATC-a B.D zir chhuak a nia, a châng hian ka thlah chho ve leh zauh ṭhin a, khang vel aṭang khan a niin ka hria, kan in-date apiangin kan kal ziah dâwn a nia" a lo ti ve deuh duah a, rilru zalen zet hian ka ngheng ar ar a, ani lah chuan hrehawm a lo ti bik lo nasa mai.

"A nih maw, thil ka zâwt mai mai ang che aw?" ka tih chuan a lo bu nghut a, a hmel pá hrak chu en nin a har thlawt a ni. 

"Eng lo, i chhungte nena in inzawmna hi siam ṭhat i tum ém? Ka sawi awmzia chu thisen zawmpuite nena inngeih lova awm reng hi a dik miah lo a nia, huatah lá chuang lo la" indaikhalh zung zunga ka tih chuan a hmel lan dan a danglam lo hrim hrim a, a ngaihtuahna erawh a kal thui hmel hle thung.

"Sawipui i duh lo tih chu ka hria alawm, mahse a ṭha miah lo a nia u Hruai, chu bakah i inhmeh lo, sual deuh i ang" ka ti leh siam siam a, tun ṭum chu sawipui hun tak niin ka hre tlat! 

"Ka hre rih lo" tih chauhin min chhâng a, a la inngaihtuah nasa a ni mahna. 

"Chhungkua hi chu a lo mak khawp a, han inhauin inhmu thiam lo ve teh ṭhin mah ila chhungkua; thisena inzawm kan nihna hi a lang leh nge nge ṭhin asin. Nang pawh u Hruai, i chhungte hi i haw viau a, i thinlung chhungril tak erawh chuan huatna i neih ka ring miah lo" ka ti ta lûam a, ka thil sawi engkim chu lungawi loh nân a hmang dâwn lo tih ka hriat vang nge ni, venthawn ka nei lem lo hle.

"Ka pa tih loh chu ka haw hran lo" a rawn ti deuh charh a, a dik ang ka ring. 

A nu leh a nau chanchin min hrilh tawh kha ka hre chhuak zawk a, anni nen chuan an inhmu zauh zauh ṭhin nghe nghe.

"Thil dang sawi tawh ang" dam deuh zâwk hian a rawn ti leh a, kei paw'n a chhungte lam engmah ka sawi zui pui duh ta bik lo.

Hun nuam zet kan hmang dun a, thil kan ei lai te chuan ka ṭawng siam siam a, hun lah chu a kal chak zung zung viau leh nghal. Ka rin lâwk ang ngeiin chawhnu lamah chuan khawpui a ri dur dur a, khua paw a duk ṭha tawh hle bawk. 

Rei lo tê hnuah ruah chu a rawn tla cher cher a, nihliap kan lo keng bawk si lo nen u Hruaia chuan a leather jacket hak lai chu phelhin ka lû ah min rawn khumtir a, ani erawh tshirt nen chauh a awm thung a, a kawr huh deuh hnuang chuan a tihrawl chhah ṭha tak chu a tilang chiang zual hle a, hmuhnawm ka lo ti leh tlat tawh a nih chu! 

Bike-a inphurin kan tlan haw ta vang vang a, ruah a sûr hnem tak tak hmaa haw vat chu a fuh zâwk kan ring vang a ni. Ani huh vek tawh mah se kei erawh ka huh lutuk lo thung a, a leather jacket khumin a taksa chhah lûm ṭha zet hnungah chûang lo ila zawng ka huh nual tawh ka ring. 

Bawngkawn kan thlen thlak lai chuan tlêmin ruah sûr a han deuh hlek a, mahse rei erawh a ni lo. A súr tam tial tial a, kan vêng lam kawnga tlan lovin ama awmna lamah kan tlan zel a, kan in lam pan ringawt dâwn ila dawra chabi lam tê tê a ngaih avangin buaithlakna chen a awm a, chu vanga ama in luah lam pan ta ringawt pawh chu kan ni! 

In chhung kan luh rual rualin amah inbuaipui hmasa lo hian min buaipui nghal sawk sawk a, a kawr phelh tura ka tih hnuah a inbuaipui ve ta chauh a, ruah do hnem zâwk a ni a, a dam lo ringawt ang tih chu ka hlau ru ang reng. 

Ngawi renga che ruk ruk hian gas awmna hnuai chu a hawng a, Heater hi a rawn là chhuak hlawl a, plug-ah vuahin a tinung zui nghal zung zung bawk. 

"Inâi lûm rawh" a rawn tih chuan ka lo buk khum nghauh a, amah paw'n inài lûm te chu a mamawh ve tho ang chu maw lè. 

"Khaw'nge i kal dâwn?" ding uaiha a kal sawn daih chu mak ka ti ang reng hle a, inái lûm tura sáwm ka tumna pawh ka ṭhulh phah ta ringawt bawk. 

"Ka inbual lawk dâwn, ka rei lo ang" tih leh a room lam pan a rual a, rei lo tê hnuah a rawn chhuak leh a, bathroom-a a luh lai thleng chuan ka lo thlir reng a, ani erawh ka en zui tih pawh hre lo ang maiin a awm thung. 

A sawi lâwk ang ngeiin a inbual chu a rei lo hle a, a rim fai ser sawr nen ka bula a rawn ṭhut tâkah chuan ka thlâ a muang leh nghal ringawtin ka hria. Ka thlâ a timuang ru tlat zel hi a chhan ka hre bik lo, min uap hneh thei bawk si. Heater âiin thil chi hrang hrang ka sawi sep sep a, a hoodie hak leh amah chu ka en tawn leh zauh ṭhin a, a inhmeh thlawt a ni. 

A aw ri hriat hrim hrim te chu a nuam a, ani ang em ema mipa duh hi ka la nei lo. Ka ngainat theih turin a awm lui ngai lo va, tlang takin; min ngaihtuahna leh min ngaihsakna a tilang mai zel a, chu chuan ngaina lo thei lovin min siam ta réng a, keimah hian bû a khuar nghet hle tawh bawk. 

Rei fê a sûr cher cher hnu chuan ruah pawh a han ve ta hram a, ruah súr vang tih hriat tak hian chhum a zíng chiai chiai a, u Hruaia bulah chuan haw ka rawt zui nghal bawk. 

Kan in kawt thleng min thlah leh thlap a, ṭawng tlêm tak ni lo mah se ṭawng duh tak a ni miah lo lawi a, a ṭawngkam mai ni lo a chet phung reng reng hi a 'gentleman' hliah hliah bik ti ila a sual tam lo ang. 

Rawn lut kawi tawh lovin a haw tlang nghal a, in chhung ka lut chu ka chhungte an lo awm kim ṭhap a, dawra ka pén kawi loh chhan ka nu'n min zawh chuan ṭha takin ka sawi ve mai a, thil dang erawh min zâwt zui tawh lo. 

Zan a rawn ni a, u Hruaia chuan a nawmsam vak loh thu leh a dam lo deuha a hriat thu phone kaltlangin min rawn hrilh a, lo lén a tum loh law law thu a sawi tlang nghal bawk. 

Chutia a dam lo tih ka hre chiah chu awm ngaihna hre lo ang mai hian ka phî cheng a, chhun lama ruah a do avanga dam lo a ni tih ka chianna chuan inthiam lohna min neihtir zui nghal zat a, ruah do lo se zawng a dam lo miah lo ang. 

Damdawi a kawl leh kawl loh te ka zâwt a, min chhâng ṭha peih lo em em leh nghal. U Rosanga inhruaitira va kal chilh mai te chu ka duh rum rum a, mahse thil mawi niin ka hre chiah bawk si lo.

"Min ngaihtuah lutuk suh, ka ṭha mai ang" a tih lai te chuan ka ngaihtuah zual sauh a, mahse a thil rawn sawi leh avang chuan ka rilru a kal pêng chiang hle. 

"Hei, Duhsangi a lo kal hlauh e" tih tê hi a rawn sawi a, engtin emaw ni hian ka awm nghal a, ka taksa chhûng lam chu a sa deuh pup pupin ka hria.

"Min ngaihtuah suh Nunu, ka ṭha a nia" u Hruaia aw chu hre ve teh mah ila ka rilru leh ngaihtuahna erawh hmun dang daihah a awm tawh thung. 

"Damdawi kha ei ang che" zawi ang reng tak hian ka ti sep a, kan inbiakna chu ka hmet tawp zui nghal daih bawk. 

"Duhsangi" tiin ka phun sep a, phat rûal lovin ka thik a ni; ka thik tak zet! 

Khumah chuan ka ṭhu ngawi tlawk tlawk a, an awm dun vel ai mah chuan u Hruaia dam loh lai leh a mamawh hun taka ka awmpui thei lo chu hrehawm ka ti a, kei ni lova Duhsangi zâwkin a mamawh pea a buaipui vel tur chu ka thik a ni. Ka thik satliah lo, u Hruaian a lakah eng rilru mah a pu lo tih hre reng chungin ngaihṭha taka awm tum teh mah ila ka thei chuang lo. 

Ka kut chu ka insualtir nawk nawk a, a châng leh khumah chuan ka mû a, a châng leh ka tei kual sek bawk a, ka awm a nuam hlawl lo a ni. Dâr 10 rik dâwn tawhah u Hruaia hnen aṭang chuan phone call ka dawng a, amah ngaihtuaha muhil thei lo tih takah ka lo pick up rang khawp mai. 

"Hello" tiin phone call chu ka chhâng a, leh lam aṭanga rawn ṭawng erawh u Hruaia a ni hauh lo mai. 

"Lo ngaihtuah lutuk suh aw Nunu, hei a muhil mék a, nichin khan a tlun nasa lutuk a, kei pawh a rawn harh hunah ka haw mai ang" Duhsangi ngei chuan a rawn ti zung zung a, u Hruaia tlun nasat thu chu ka bengah a ri ring bik hle. 

"A va'n zia lo tak!" tih bak sawi tur pawh ka hre lo. 

"Nge ni a, ka riahpui law law zâwk mai dâwn emaw ni le, a pawi em? I ngaih lo tihṭhat loh phah suh aw?" a rawn tih leh chuan

"I tih dan dân a ni mai" ka lo ti sep a, tunah tak chuan Duhsangi thik lam reng a lang tawh lo, u Hruai awm dan mawlh chuan ka rilru a luah tawh zâwk a ni.

"A nih chuan ka'n riahpui mai ang e, mahni chauha awm a ni bawk si a, hawsan ringawt zawng a chî loh êm mai, a ṭul tâk leh a rawn harh hûn hunah ka haw mai ang" dam diai hian a rawn ti leh sep sep a, pawi ka tih loh thu chu ka sawi ve ta ringawt bawk. 

Rei inbe chhunzawm tawh lovin amah zâwk chuan kan inbiakna chu a hmet tawp a, khumah ka mu meng kar a, tih theih ka nei bawk si lo, ka rilru a nuam zân lo chu a ni e. Ni lo, nuam zân lo pawh a ni lo, kaptu a awm reng zâwk! 

A tawpah chuan Pathian hnenah u Hruaia tân ka ṭawngṭai tawp a, ka dam loh laia min ngaihtuah tluk zeta ngaihtuaha ngaihsak lêt ve ka duh a, amah tak paw'n min phút ru reng thei bawk. 

Ka rilru chu a khingbai tak zet, mut pawh ka muhil thei lo nghe nghe a, mu mang lovin u Hruaia ngaihtuah chuan zing thleng hun ka hmang ral a ni hawt e!

Zing kâr aṭangin chhuna u Hruaia awmpui chu ka tum nghal bur a, ka chhungte erawh ka hrilh sî sê duh ta lo law law mai. Adeline-i pawh MZU bus kan chán dun laiin u Hruaia dam loh thu leh class kal lova awmpui ka tum thu chu ka hrilh ve ta chauh a, a lo hrethiam khawp mai. 

MZU bus-a chûang ta lo chuan City bus pangngaiah ka chûang ta zâwk a, u Hruaia te vêng lam pana kan tlan lai te chuan ka thaw leh hap ṭhin a, zing kâr aṭang khan ka phone call a la pick up miah lo va, a taksa dinhmun a lo ṭha lo zual viau ang tih ka hlau tak zet a ni. 

U Hruaia te vêng kan thlen chuan kein ka kal hnak hnak a, a awmna bâwr vel hi bus tlan luh lohna a ni a, motor dang erawh an tlan zut zut tho. U Hruaia in luah building kawtah chuan ka ding ta ran a, building chhawng thumna chu ka thlek chho dauh dauh a, rei pawh khawmuang buai tawh lovin ka kal chho zui nghal bawk. 

Kawngka zawn ka thlen hnu chuan door bell hmet kher lovin ka nam hawng mai a, dawhkan bula Duhsangi lo che mial mial hmel ka hmu chiah chu ka ding deuh chawt a, a piah lawka lo ṭhu u Hruaia zâwkin min rawn hmuh hman tawh avangin ka awm dan chu ka siam ṭha nghal vat bawk. 

"I lo kal elo? Class i kal na nge Nunu?" u Hruaia min biakna chu chhângin 

"Kal ta lo mai, ih....eng lo....rawn awmpui che ka tum deuh a" ka ti pangngai ve mai a, Duhsangi zâwk chuan

"A ṭhat hlauh chu! Kei pawh hi ka awm rei tawh mah mah a, ei rawng ka báwlsak zawh hunah ka haw ang ka lo tia, i lo kal hlauh chu a tizia hle mai" a lo ti zung zung a, mak tak maiin ka chhûng lam chu a veng deuh hawk ringawt bawk. 

"A va lawmawm dâwn ve chú, vawiin chu awmtu ṭha deuh ka nei dâwn a va nih hmel ve" tiin u Hruaia chuan min nuih sun sun a, ka lo nuih lêt seih a, chutah Duhsangi zâwk bawk chuan

"Ka bâwl zo chu a ni mai, ka va haw tawh mai ang e" tih leh chet a rual nghal a, ka awm ve tâk avangin a inthlahrung ta riauin ka hria. 

"Duhsang" kawngka bul a thleng phei tawh chu u Hruaian a ko ding a, kei erawh ka luh tirh aṭang tawh ka la ṭawng tlêm ang reng khawp mai. 

"Nizana min riahpui avang leh tukina ei rawng min bâwlsak avang hian ka lawm e" u Hruaia aw chu a dam ruih a, Duhsangi pawh chuan nui sâng chung hian

"A ho lutuk" a lo ti sam mai a, kawngka lama inherin a chhuak zui ta nal nal bawk. 

"Lo hnai teh, ka ngai che a nia" rawn ti tu lam chu hawiin ka nui sen sen a, a ban phaka ka ding chiah chu min kuah chawt a, inlâk hrana a hmel en ka tum paw'n ka âwmah a hmai a phum deuh tlat a, min hnim ni mai te'n ka hria.

"I ṭha tawh em? Nâ te i la nei em? I hritlâng em?" kuah lêt pahin ka ti zung zung a, a sam buk lutuk lo chu ṭham titih deuh hian ka zût pah reng a, a awm dan ngaia awm reng chung hian

"Ka ṭha tawh, min awm dâwn leh nghal a, ka dam chak ngawt ang ka ring" a rawn ti fiamthu lûam a, ka nui zui hak hak a, a thu sawi dan ber kher chu nuih loh theih pawh a ni lo.

"Chaw i la ei lo a ni lo'm ni? Ei tawh rawh, khi dâr 9 a ri dâwn" ka tih chuan min en reng a, a hmel chu hmuh a nuam khawp mai, dam lo pawh a ang lo. 

"U Hruai" ka ti thluk deuh vang vang a, nui suk pah hian

"Min lo siam" a rawn ti zauh a, min kuah a tum nghal ringawt chu a chalah ka lo nam chat a, a awm dan naupangchhia zet chuan min tihlim ru ngei mai.

"A nih, ei ṭeuh ang che" ka ti ta nge nge a, ka chetna apiangah nui sun sun chung hian min zui kual dat dat a, ka tih ngaihna hre lo chuan ka en leh râwm ráwm ṭhin a, ka nui leh ringawt zel bawk. 

"Engati nge tukina ka rawn phone-na che kha pakhatmah i pick up loh a?" ka lo theihnghilh thuak hman tawh hre chhuaka ka tih leh chuan

"Ka hre lo reng reng, i sawi tâkah chuan khumah a la awm a ni mai thei. Nizan aṭang khan phone ka khawih mang lo, i sawia ka hre chhuak chiah" tiin a room lam a pan ding nghal a, dâwt a sawi paw'n ka hre lo e a! 

A chaw ei chhung a bulah ṭhuin ka ṭawng siam siam a, ani paw'n ka zawhna chhângin nizan lama a awm dan leh a dam loh dan te chu kimchang deuh zâwkin min hrilh ve sûp sùp a, loh theih lovin Duhsangi sawi lan a ngai a, dik tak chuan ka tluk loh mai bakah u Hruaia laka ka inthiam lohna chu a la reh famkim thei chiah lo. 

Tin, Duhsangi thikna ka nei tawh lo hrim hrim bawk a, nizan kha chuan a sâr hu lai a nih vang a ni mahna, u Hruaia a buaipui vel tur leh an awm dun tur kha thiknain ka khat a, mahse ka thik rei chuang hauh lo chu a nih kha! 

U Hruaia chaw ei kham hnu chuan a chet hah ngai miah lovin ka tifel zung zung a, min puih a tum chu phal lovin ka vin titih hial a, hmeichhia zâwk awm reng laia mipa zâwkin lo ti ve phet a tum chu ka ngaihdan a ni lo a ni. 

Indaih lo leh chetna tur tam tak te chu ni se pawi tihna ka nei hran lo, mahse thil tih harsa a ni lo va, chutah a dam lo mêk zui a, lo chet ve sek a tum chu a tih hian a tih chî loh hrim hrim. 

Ka chet a kal tluang bawk a, a room zawng zawng nen lam ka en chhuak vek a, bal leh bal lo te, awmpui ang mai hian in chhung chu ka tihfaisak ta vek a, ka che zo chu dâr 12 a lo ri dâwn der tawh a, hun ka hmang ṭha viau chuan ka hria.

"I phone a ri a nia u Hruai?" thil ei chungin ka ti lang lâng a, u Hruaia erawh toilet-ah a la awm thung a, ka ṭawng chu a hre pha lo a ni ngei ang. 

"Ka pick up mai dâwn asin" ka tih leh pawh chuan min rawn chhâng chuang miah lo va, Caller ID ka en chu 'Hannah Sister' a lo inti heu mai.

"Hello" ti zàng vahin phone call chu ka pick up ta nge nge a, leh lama mi ve thung chuan

"E hê, u Tea a ni na nge?" a rawn ti hâ a, sawi tur ka ván ru ta hle mai. 

"Hello?" amah bawk chuan a rawn ti leh a, ka aw thian hmasa tê tê phawtin

"Aw, nia, eng lo, ka, eng lo" ka ti bah deuh nawk nawk a, insawi dan tur ka hre rih lo tlat a tin a ni!

"Tu nge i nih a?" hre châk aw deuh hian a rawn ti leh a, phone ka lo pick up chu ka inchhir ru hnuhnawh ta kher mai. 

"Eng lo, Nunui ka nia" la insawi chiang duh chuang lovin ka ti ta ringawt a, u Hruaia nau ve thung chuan

"E hê, u Nunui maw!? Awi, u Tea nen inawm dun a ni maw? A awm hnai em? Ka be lawk duh a, nang chuan min hre lo ang a?" a rawn ti zung zung reuh a, engtin nge min hriat pawh ka hre lo e a!

"Hria e, ka hria che alawm" hawihhawm takin ka ti lêt ve nghal thuai a, a nihna takah chuan tun maia hre chauh ka ni.

"E saw, u Hruaia a lo kal" tih zawm leh nghalin u Hruai melh ral chung chuan

"I nau a nia" ka ti zui zat a, ani paw'n ka phone pek chu a lo ban ve mai bawk.

Kan chhun thil eina tifelin ka che ta daih a, bawlhhlawh paih tura kawngkapui lam ka pan chu kawngka a rawn inhawng deuh hlawl a, ka hmaah chuan pa pakhat, kum 50 ral kâi tawh hmel deuh mai hi a lo ding a, min en dan aṭang chuan a hmuh tum loh deuh min hmu tih hai chî ziazâng a ni lo. Kei tak paw'n mak ka ti ve tho, ka en deuh hû mai. 

"Eng nge rawn tih i tum?" u Hruaia aw khauh ṭha zet chuan min tiphu uih a, chutiang taka nèlawm lova a ṭawng chu ka vawi khat hriatna a ni. 

"Chhuak rawh" nêm fahran lo hian a tih zawm leh nghal hmuk a, kei min be lo tih leh ka hmaa pa pakhat ding chu a bia a tih ka hrethiam nghal a, mahse ka hmaa ding pa erawh chet sawn tum hmel pawh a pu eih lo hrim hrim thung.

End of Chapter 6