LOVING YOU A MILLION TIMES By Havali Adam (CHAPTER 5)

LOVING YOU A MILLION TIMES

By

Havali Adam

Chapter 

"Ṭhut khawmuan nge haw nghal i duh?" ka hma taka ding chung hian a rawn ti a, a la kiai deuh suk zui, a va han pà chiang tak! 

"I lo kal dâwn tih ka hre miah lo" ka lo ti teh tawp a, ni dangah chuan mi hrilh lâwk hmasa ṭhin miau hek le! 

"Ka hmu châk che a" nui sun suna a tih chuan lài ru zet hian ka nui ve sak a, ka hawi sawn nghal daih bawk. 

"Khaw'nge i ṭhiannu khâ?" ti lehin ka bul chêtah a rawn ṭhu thla a, a mi uap a nâ leh teh e! 

"An bâng hma a, ani chu chawhma lamah khan a haw daih tawh" ka lo ti ṭha ve mai a, chutia ka ṭawng zo chu a bân ding lamin ka darah a rawn kuah titih a, ka lo en deuh hâ nghal.

"Eng nge?" ka ti ringawt a, kan inen chiangin kan inhnaihchilh khawp mai.

"Hmuh i nuam" ti chauh a sawi tak nà a, ka awm dan zawng zawng a danglam vek thei tho. 

"Awi, i sawi ho ê" tih leh hawi sawn ka rual a, ka ṭhu hla deuh hlek zawm nghal zat bawk.

"Ho hleinem, tun lai chu ka hmu ṭha zual che, ka ngaih vang che a ni mahna" a ti leh lek phei chu ka hlim ru bawk si, ka lài ru bawk si, awm dan tur pawh ka hre lo lek lek alawm lè.

"Mi vei vâk te sawn min rawn en leh zauh zauh ṭhin a nia, a nuam lo ê" hawi kual paha ka tih leh chuan

"A pawi hleinem, kan inngaizawng alawm, ka bialnu i ni a, i bialpa ka ni a, an buaina tur a awmin ka hre lo" dam deuh si, nghet charh tho bawk si hian a ti thum chhal a, a ṭawng ring miah lo bawk.

"Vawiin lam tê, hun i hmang nuam em?" dam dap hian a rawn tih zawm daih a, nui tih hriat zeta hmui tisawi chung hian

"Nuam a ni mai" ka lo ti ṭha ve mai a, zawhna dang min zawh belh lova a ngawih deuh vung vung lai chuan

"Haw daih ila, khua hi a hniam ṭan riauin ka hria" ka ti leh nghal zat a, min buk khum zauh a, kan tho zui nghal chu a ni mai. 

Inhnaih zetin a bike hùnna lamah kan kal phei dun a, kan inbe miah lo nà chu hrehawm tihna pakhat mah ka nei lo. Miho lah chuan min en deuh zauh zauh hlawm leh nghal a, min thik a ni mahna lè! 

Ni e, min thik pawh ni se a àwm lutuk, thik tham alawm ka nih, u Hruaia te ang mipa hi chu tu hmeichhia mahin an hnar theih ka ring lo. 

Kan kum a inthlau tih chu hai rual a ni lo va, kan khawvel thlir dan pawh a inang lo, mahse engkima kan inmil em em vek si hian ka rilru a tihlim a, inlâk zei vel pawh a tum lo, a nih ang âng hian ka bulah a awm ṭhin. 

A ṭawngkam hman eng pawh hi ka tân chuan a thlum em em vek ni mai te'n ka hre hial a, chutah mi tlang tak a ni leh zel a, amahah hian ka mipa duh zawng ang chî a awm kim vek ti ila a sual lo hial ang ka ring. 

Thla khat èrh àwrh chauh la inzuia la inngaizawng si hi ka hmuh loh hlek leh ka hlata a awm hlek chuan ka ngai ru thei em em a, mahse ka ngaih thu erawh a beng hriatah ka sawi khât hle thung. 

Ani chuan tlang takin a sawi mai zel a, min ngaih thu a sawi lai te hian ka lo en kar zel a, dâwt sawi hmel a pu ngai lo hrim hrim, chu chuan ka pawn lam lan dan mai ni lo ka thinlung chhungril thleng hian a tihlim em em ṭhin rèng bawk.

"Awi, a sûr ṭan nghal ringawt a nia, nihliap ka keng miah lo leh nghal" a kawr pawt ṭai paha ka tih chuan

"Ka'n tlan chak deuh ang e, hlauh phah chuang lo la" a rawn ti a, engmah ka sawi zui tawh lem lo va, ruah erawh ka rin ai a rawn sûr hma daih!

Muangchang lo fê hian u Hruaia chuan min tlanpui zel a, Ramrikawn kan thlen laia sûr ṭan chauh mah ni se thui pawh kan tlan tak tak hmaiin ruah chu a rawn sûr hnem nghal tlawk tlawk khawp mai. 

Nihliap ka keng bawk si lo, u Hruaia lahin raincoat a lo keng bik lo zui, mahse ruah han do dun vel chu nuam ka ti ru tlat lawi a nih chu! 

Luangmual kan thlen chhoh dâwn lai vel chuan kawng sira ding deuh datin chawlh a rawt ta hial a, min rawn râwn a nih mah zâwk, kei lahin tlan tlang turin ka lo hrilh daih thung a, a chhan min zawh chuan nui sen sen pah hian

"A nuam ka ti, ka sawi awmzia chu ruah do dun hi a nuam reuh e, a romantic tawp, movie-ah pawh ka hmu ṭhin" ka lo ti duah a, mak a tih hmel teh e!

"Enga!?" a rawn ti ta rèng a, ka nui hmel chuan a mak ti hmel chu a thlak danglam har lo hle bawk.

"Tlan law law ang" nui chunga ka tih leh tâkah chuan

"I dam lo palh ang" a rawn ti ve nghal a, kei lah pek chuan

"Dam lo lo vang, ti rawh tlan leh vat ang, ruah hi a hàn hman ang e" ka la ti ta deuh deuh a, ani pawh a lo nui suk ringawt.

"Chutia nang berin i tih tlat te chuan kal ila a ni mai alawm" tih leh a bike tih rum vut vut a rual nghal a, kan tlan chhuak te chu muangchâng lo tak kan ni!

Ruah do chunga maimitchhing vang vangin u Hruaia kawr chu ka pawt ṭai a, a dul zawnah ka kut ka suih a ni ber e. Kâwlphe leh khawpui ri tih vel a awm lo hrim hrim a, ruah a sûr deuh tawp a, chu vangte pawh chu a ni mahna ruah do nuam ka tih tlat nì! 

Amah u Hruaia pawh chuan nuam a ti ve thovin ka hria, a khalh chak ngaiin a khalh mawp mawp a, Vaivakawn te chu tlan pelh chho rang tak kan ni! 

Chu bakah traffic a jam lo ve teh mial a, Zodin pawh kan thleng chho har lo hle. Kan vêng kan thlen hnu chuan a tlan muang ta deuh a, ruah paw'n hàn lam a hnai tawh a, a hma zawnga duh ngai hauh si lo kha u Hruaia nen a nih tâkah chuan ruah do dun chu nuam ka ti thar ta riau bawk. 

"Inbual fai la, inha lûm nghal ang che" a tlan chhuah dâwn chuan a ti sup a, naupang thuawih zet ang mai hian ka lo bu nghat nghat a, ka bianga a rawn piai zeuh lai te chuan ka lo nui ver ver ringawt. 

"Ka kal a nia, zanah ka lo lêng ang" tih leh tlan chhuah a rual zui nghal a, hmuh phak loh china a tlan liam thlengin ka thlir dauh dauh a, ka hlata a awm chiah chu rilruah a châm leh ta veng veng mai. 

"Awi Nunu, i va han huh nasa em em ve le? Ruah i rawn do haw elo?" huh zuara kan in chhung ka luh laiin ka nu chuan a rawn ti thuai a, ka chhan hma hmain amah zâwk chuan

"Va inthlak thuai rawh, i dam lo mai ang asin, tun lai ruah phei chu do chî a ni reng reng hleinem" a rawn ti leh nghal zung zung a, ka room-ah inthlak turin ka lut zui ve nghal mai bawk.

U Hruaia min hrilh ang chiahin ka inbual fai hnu chuan ka inha lûm nghal a, ka nu paw'n min hrilh tho a, mahse ka rilruah leh ka bengah u Hruaia thusawi kha a ri ring daih zâwk! 

Room aṭanga chhuakin ei rawng ka bâwl zui nghal a, ka nu chuan dawra ka pa a awm thu leh in lam a ngaihtuah avanga ani a haw hma thung thu min hrilh mial mial a, u Rosanga pawh dawra a pen haw leh ngei ka ring. Lawmtea erawh school a bâng tawh a, a room-ah a muhil daihin ka hria, khaw awm dan chuan mut a chawh êm bawk.

Chawhmeh chhùan ka vil lai chuan ka ke a rawl deuh ṭhûm a, a chhan ka hre miah lo leh nghal. Ka taksa hrim hrim chu a nuam lo ru hle a, dawhkan lam pana ka kal te chu ka lû a rit em em a, nuam lo ru zetin ei rawng erawh ka bâwl zo thei hram a, ka nu bulah chuan ka mut zàl lawk tur thu sawiin room-ah ka lut ta daih nghe nghe. 

Rei pawh ka mu hman lo ang, ka taksa chu vawtin a rawn hmer a, a hit mem mem a, ka mitmu leh ka hmai bâwr vel chu a kham ngawih ngawih a, ka rizai sin lai chuan min tilûm zo hlawl lo a ni ber.

"I nuamsam na nge Nunu?" ka nu aw chu hre teh mah ila ka meng hlei thei tlat lo.

"I khua a sik a nih hî" a ti leh hluai a, a sawi dik ang ka ring, ka awm a nuam lo êm mai.

"Kha le, damdawi hi ei rawh, engati nge maw ruah i rawn do haw reng reng ni!" tiin ka nu chuan damdawi min eitir thuai thuai a, ka ṭhu te reng reng chu ka ni chhuih a, ka chiang lo tak zet a ni.

"Rizai ka'n lâk belh ang e" ti leh zung zungin ka nu chuan min buaipui mawlh mawlh a, nu te nge nge fate ngaihtuah a pe nâ khawp mai. 

Ka taksa damsam lo zet chuan ka rilru lam thlengin a nghawng a, ngaihtuah loh tur tûr te ka ngaihtuah phah hial bawk. Thawsat avanga ka mit ka meng chu ka pangngai ang reng fû a, zanriah ei lovin ka lo muhil tlang daih tih ka hre chhuak zawm zat a, dâr zat ka en chuan a lo tlai ang reng tawh hle bawk. 

Khum lûa lukham dahin ka ṭhu tung deuh ût a, rei pawh ka ṭhut hmain ka room kawngka chu a rawn inhawng ri khep a, u Hruaia hmel ngei ka hmui zui nghal zat bawk. Ni tak e, tlaiah khan zana a lo lén tur thur a sawi tak alawm, mahse ka lo dam lo ta kher erawh a hun lo ka ti ang reng.

"I zia deuh tawh em?" a aw thum dam dap chu hriat a nuam leh teh e! 

"Imm...zia a ni mai" tiin ka lo chhâng ṭiak a, ka aw pawh a chhuak pangngai viau. 

"Haw ka lo tum tawh a, mahse i rawn harh tâk si ah chuan ka haw leh rih lo ang" tih leh ka khum tlânga rawn ṭhut a rual a, ka kut chu a hum lúm vung vung zawm zat bawk.

"Min ngaihtuah lutuk a ni lo maw?" nui tawi tak paha ka tih chuan

"Ngaihtuah i ngai alawm" a lo ti mai a, chutia a ṭawng zo chu ka lo nui tak ná a, ani erawh a nui ve hauh lo thung.

"Ngaihtuah ka ngai lutuk hleinem, ka ṭha vek tawh a nia" ka ti leh ta ringawt a, ka kut a vawn lai chu chawi kang zeuhin a fawp zauh a, chu ringawt pawh chuan keimahah nghawng zu nei thei nia maw lè. 

"Chhuak ila" ka tih leh chuan

"Ka lo pui ang che" a lo ti dam thlup a, keimahin tho thei reng mah ila ka kuah châk vel tlat pek a, ani lah chuan min lo chawi kang zo nasa mai bawk si. 

"Min thlah tawh la, ka kal thei tawh ang" ka room kawngka bul kan thlen tâkah chuan ka ti leh hliai a, nâtna benvawn vêia dam lo pawh ka ni lo va, ka chhungte hmuh atâna inkuah chhuah êm chu mawi ka ti lo a ni.

U Hruaia chuan min thlah ve mai bawk a, room aṭanga kan chhuak min lo hmuh rualin ka nu chuan min be nghal siam siam a, ka ṭhat tawh thu ka sawi hnuah pawh ka pang a rawn dek deuh thlap a, chaw ei min siam a tum leh ta zel a, mahse chung em em chu ka inbuaipui theih tawh avangin ka hnial tlat thung. 

Ka nu hi chuan a fateho hi min ngaihtuah thei em em a, a rilru a buai tawh phei hi chuan a phî chung zel a ni ber a, mahse chutianga a awm ṭhinna chhan chu keini a fate min hmangaihna vang bak a ni lo.

Chaw ka ei chhung zawng chuan u Hruaia pawh haw mai lovin sitting room-ah a lo la ṭhu ve reng a, ka pa nen bawk an inbe leh mual mual a, a changin u Rosanga a ṭawng ve leh zauh ṭhin bawk. Ka nu erawh hmun danga rilru dah lovin a Korean Serial en lai ngawr ngawr a ngaihven leh daih tawh a, keimah ber pawh chu ka ṭha ta phian bawk. 

Chaw ka ei kham hnuah phei chuan ka harh deuh kawk a, u Hruaia haw tur pawh ka thlah thlap a, mahse thui ka thlah lo. Kan in kawngkapui thleng bak pel lo turin amah zâwkin min ti deuh tlat a, a duhna ah hi chuan awlsam têa mi thunun a thiam maw lè.

Zan khuain harsatna ka tâwk lo hlauh a, zingah erawh ka hritlâng em em thung a, ka hnâr a ping ṭun a, ka ṭawng te reng reng chu a dik hlei thei lo. Dâr 8 bâwr velah u Hruaian min lo call a, MZU-a kal lo mai turin min rawn chah thlap a, min ngaihtuah tih ka hriatna chuan ka awm a tinuam tak zet! 

Ka hritlan thu chu ka hrilh ngai lovin amah zâwkin ka aw aṭang a lo hrethiam nghal vek a, chumi hnu phei chuan ina awm mai mai turin min chah thutak sâwt nghal hle. Ka kal ta lo law law réng a, keimah avanga Bus nang hman lo Adeline-i erawh ka khawngaih ve reng, hrilh theihnghilh lo ila chu a dik a ni mai túr.

"Aw Hello" tiin phone call chu ka pick up a, leh lam aṭangin Adeline-i chuan

"Enteh Nunu, i û hi lo hrilh ve teh, ka hmanhmawh tawh bawk si a, MZU-a min thlah thla lawk tura ka tih paw'n a duh tlat lo a nih chu!" a rawn ti nghal buan buan a, u Rosanga hna kal tur nen an inhmu a ni hrim hrim.

"Khaw maw ka lo bia ang" ka ti ve mai a, chutia an awm dun tâk rau rau chuan MZU thleng zu thlah lawk se a ṭha tak ang. 

"Eng nge?" u Rosanga chuan a rawn ti bul deuh hmuk a, a mood a fuh loh hmel khawp mai. 

"Zu thlah lawk mai la, keimah avangin Bus a nang hman lo leh nghal" ka tih chuan peih lo aw zet hian

"He nu hian min tibuai hnem mah mah, a duh leh kal lo mai rawh se" a rawn ti a, Adeline-i lah chuan

"A theih ringawt loh, vawiinah kan test dâwn, min zu hruai lawk mai rawh" a lo ti lang láng a, phone aṭang pawhin a ṭawng zawi lo tih a hriat hle.

"Chhen che hian!" u Rosanga chuan a ti hluk a, kan inbe dâwn emaw tih nâk a laiin an inhnial zui nghal leh ta daih mai.

"Hming pathlawi" pakhatin a tih laiin pakhat zâwkin

"Hmai bawl" a ti ve leh a, phone chu hmet tawpin u Rosanga zâwk ka call ṭha ta ringawt bawk. 

"Zu hruai lawk mai la, vawiina an test dâwn phei chuan a kal loh chî miah lo ang" phone a pick up rualin ka ti nghal zung zung a, ani erawh a lo thaw deuh ham ham a, a kham hmel tak zet.

"Ninawm!" a rawn tih chuan

"Ning lo mai rawh" ka lo ti vat a, Adeline-i aw erawh ka hre leh tawh miah lo. 

"Tun bak chu ka hruai peih der lo che a nia, rawn chûang rawh" ngaihno bei fahran lo hian Adeline-i chu a bia a, kan inbiakna pawh amah zâwkin a hmet tawp zui nghal daih bawk. 

"I û sualzia hi!" tih message chu rei lo tê hnuah Adeline-i hnen aṭangin ka dawng zui zat a, an inphur fel diam tawh a ni ngei ang.

"Chhaih kawlh lo la a ni mai" tih chu nui chungin ka thawn lêt ve nghal a, in chhaih kawlh a chí hauh lo ang le!

"Awi, hei ka ṭi dêk mai, sakeibaknei bula awm ang vel ka ni!" a message ka hmuh rual chuan ka nui zui ver ver a, nuih loh theih pawh a ni lo. 

"A mawiah lawmthu te kha i hrilh ve dâwn a nia, i hrilh theihnghilh hlauh ang e" tia ka thawn hnu lawkah

"Awi, chu chu alawm ka peih lo" tih chu a rawn thawn lêt zawm zat a, thil dang engmah kan sawi belh tawh lo va, inhnial miah lova MZU thleng an inphurh thlak theih chuan a lawmawm khawp ang.

Nilêngin inah ka awm ta mai mai a, u Hruaian min rawn biak ka rin tehreng nen min rawh be leh tawh miah lo va, a buai a nih ka ring ve tawp. Hritlâng ber chu ka buaina a ni tawh a, khawsik tih vel pawh ka nei tawh lo hrim hrim. 

Chawhnu lamah phei chuan ka dam ṭha vek tawh emaw tiin kan dawrah ka kal daih nghe nghe a, ina awm tlawng zawng a ninawm ve êm bawk a ni. Tlai khua a lo ngui ṭan a, ei rawng bàwl a ngaih avangin ka nute ai ka haw hmasa a, in ka thlen chuan Lawmtea a lo haw ve chiah bawk. 

Ei rawng ka báwl laiin u Hruaian min rawn be ta ngei a, ka chang ru rei ngat ngat tawh bawk a, ka mood fuh lutuk lo pawh chutia a aw ngei mai ka hriat tâkah chuan ka pangngai sawt sawtin ka hria. 

Min ngaihtuahna awkâ hriat te, ṭawngkam mai ni lova a chetzia thlenga min ngaihven tih ka hriat te hian ka hlim ru veng veng zel, ka laka a awm dan hrim hrim hi vei zui a awl hliah hliah bawk. 

Zana lo lén a tum thu a sawi hnu chuan kan inbiakna pawh kan titawp zui nghal chu a ni mai a, ei rawng ka báwl zawm mial mial lai chuan u Rosanga a lo haw a, vawiin chu dawrah a pêng kawi lo a nih hmel. 

"I mood a va fuh hmel ve a" tia ka lo fiam zauh chu min melh rum teh e! 

"Eng nge?" nui chungin ka ti duai a, ner sâwnga min enna te chuan ka nuih a tiza zual hle.

"Tak tak a, lawmthute a hrilh ve che em?" pangngai zâwka ka tih leh tâkah chuan ṭha deuh hian

"Hrilh ve khanglang" a lo ti ve mai a, lawmthu ém a hrilh chu a beisei lo ve hle ni ngei tur a ni.

"A ṭhat chu, inngeih zir teh u" ka thusawi tawp zâwk chuan a beng a verh khawp mai.

"A teuh lo, ka buaipui peih tawh lo a nia, ṭawngthei ropui si" a rawn ti nghal hmuk a, a lo inhnial leh hram a nih ka ring ta rum rum.

"En liam mai mai teh u Rosang, a thu hrimah engati nge ka ṭhian ṭha ber hi i mil loh em em a? Ani phei chu têt tê aṭanga ka kawm a ni a, nang paw'n i hriatna a rei tawh a, inngeih loh reng zawng a zia lo êm mai" ka ti deuh duah a, a ngawih vung vung hnu chuan

"Ka hre bik lo" ti supin a room lam a pan zawm daih a, inhaw kumhlun chuang miah si lova an inngeih lo em em tho bawk si hi thil mak ve tak chu a ni.

Zanah chuan u Hruaia hmel kan hmu har lo hle a, ka hriat chhuah tâk chu mipa rilru nghet tak a ni. 'Ka lo kal ang' a tih tawh hi chuan rawn kal loh a nei ngai lo va, MZU thleng kal ngai pawh ni se a rawn kal zat zat ṭhin. 

A hmel chu thuhran ni ta se, a mizia ringawt pawh hi vei ngut ngut tham leh ngaihzawn tham a ni chiang alawm, ka tuiral lo chauh a ni. 

Chutih rual chuan a chhungte chanchin erawh kha chu engmah ka la zawh belh lo tluang zel a, mahse engtik nî ah emaw chuan a ṭhen azâr tal min hrilh turin ka nawr luih leh ngei chu a ngai ang ka ring.

Zan hun a ral a, ni thar duhawm takin a rawn zawm nghal zat a, kei pawh ka dam var var tawh ni mai te'n ka inhria a, ka hritlâng a la reh famkim chiah lo tih mai loh chu harsatna dang ka nei tawh lem lo. 

MZU bus-a kan chùan lâiin Adeline-i chuan u Rosanga nena an inhnial dan a sawi ta alawm, engkim min hrilh tâkah chuan u Rosanga rawn lungawi lo haw pawh kha a demawm ta hauh lo mai. 

Temple pêng aṭangin MZU thleng an inhnial thla tluan zak a nih chu! 

A êm êm hi ka ti ve thlawt! 

An inhnialna leh an inhnial chhan lah a ho ropui bawk si, he mite pahnih hi chu ṭawngṭaisak hial an ngâiin ka hria. 

Hun leh nî te chu chawl lovin an liam zel a, hriat loh kârin kei leh u Hruaia pawh thla lî chuang chu kan lo inzui ve ta reng mai. Han sawiselna tur leh a mize ngai theih loh viau ka neih áwm pawh ka la hre lo va, kan inkâr chu a tluangin a kawng a mâm ṭha em em a, ka duhna leh ka thlakhlelhna a zual tulh tulh bawk. 

Ni tin mai hian rilru leh ngaihtuahna a chenchilh reng a, kan inhmu ngai lo pawh a ni chuang lo, ka hmuh phâka a awm loh hlek hi chuan ka ngaihtuahna a luah nghal zel a ni ber. Ka chhungte tak paw'n an ngaina zual zel a, a lo lén zan te hian kan chhungkaw boruak a nuamin kan hlim dar dar thei hle. 

"Engtikah emaw ni chaw lo ei leh la?" u Hruaia message chu ka chhiar khi heu a, min lo hmutu awm se chuan mi â emaw min ti ngei ang. 

"Nia" tih chauhin ka chhâng lêt a, rei lo tê hnuah phone call ka dawng zui nghal. 

"Engati nge i lo call ringawt a?" ka mut dan siam rem paha ka tih chuan

"I aw ka hre duh" a lo ti sam mai a, a sawi hoh tehreng nen a thusawi chuan min tihlim viau tho. 

"Sawi tur ka hre hleinem" tiin a hmel awm dan tur ka mitthla zawm zat a, a takah hmu ta ila chuan a nuih suk ka ring.

"I duh duh sawi tawp rawh" a rawn ti deuh tlat a, sawi tur ka ngaihtuah zui nghal ve mai bawk.

Eng eng nge ka sawi kual duah pawh ka hre sêng tawh lo, dârkâr khat dâwn chu kan inbia a, ka mut chhuakin ka lo muthilhsan daih chu niin, zingah zana ka awm dan ka hre chhuak hnuhnawh chauh a, zia lo tak a ni. 

U Hruaia lah chuan huatah pawh là lovin mi fiam nân tak a hmang leh ta nghal a, ka lo muthilhsan daih thei chu mak ka ti ang reng, hah taka hna thawk leh chau chhe em em pawh ka ni der bawk si lo.

Friday chawhnu a ni a, khua chu a thiang nuam hle a, u Hruaia hnungah ka bet leh ta ran mai. Kan tlan zel a, kâr tawp a nih avangin an ina pêng kawi zuaihah min sâwm a, ka hnial lem lo va, haw lama Adeline-i ka phatsan ta fô erawh nuam ka ti chiah lo ṭhin thung. Ani lah hian engah teh vak mah a ngai bawk si lo, u Hruaian min hruai dâwna a hriat tawh chuan a lo inthiarfihlim daih zel. 

U Hruaia tak pawh hi nakinah ka la hrilh ṭha ang, ṭul fê lovah chuan min lo hruai tawh lo mah se a pawi loh zâwk ka ring, Adeline-i laka inthlahrun a nâ duh thei êm mai.

"Eng nge i rawn tih?" u Hruaia aw chu a nêm hauh lo va, kan hma maia ding hmeichhe hmelṭha zet erawh ṭawngkam thlum tak dawng ang maiin a nui sâng thung.

"Ka lo kal lawk mai mai, i dam ṭha maw?" u Hruaia zawhna a chhan vel dan chuan tu nge a nih min tihre chiang châk hle. 

"Dam ṭha e, haw la a ṭhat ka ring" u Hruaia aw chu a chang bul a, a mi biak nu leh amah chu ka en tawn zak zak ta ringawt. 

"Ka lo lut kawi zuaih ang chu ka lo ti asin" tiin a nui lui sak a, a hmel chu lo en chík ru tak ka ni! 

"Lut ang" ti bul hmukin u Hruaia chuan ka kutah a rawn chelh a, kawngka hawngin in chhung lamah min luh pui zui nghal bawk.

"Khaw'nge he laia i thil târ ṭhin khâ, i târ tawh na nge?" ka hmelhriat ngai loh nu leh ka vawi khat hmuhna nu bawk chuan a rawn ti leh a, u Hruaian haw tura a hrilh chang rût hnua a lo lut ngam tho chu mak ka ti ang reng.

"Ka târ tawh lo" melh deuh run hian u Hruaia chuan a ti ṭha ve mai bawk a, kei erawh in chhunga kan luh aṭang tawh ka la ngawi reng thung.

"Ei rawng báwlsak i ngai em?" dam diaia a rawn tih leh chuan engtin emaw ni hian ka awm a, ka thik a ni ber. 

"Ngai lo, eng vanga lo kal nge i nih?" u Hruaia chuan a ti chang leh ta bawl mai. 

"Eng lo a nia, ka hmu châk che a" chu thu ka hriat rual chuan ka kut ka hum ruh nghal a, ka rilruah thil dang daih a rawn luh zawm nghal zat bawk. 

"Dâwt sawi suh Duhsang, ka pa'n a rawn tir che tih ka hrethiam mai" u Hruaian a tih leh chuan ka kut a vawnna atâ chu ka pawt chhuak zal zâl a, ka ngaih a ṭha thei tawh thlawt lo.

"Nia, a dik alawm" u Hruaia biak nu Duhsangi chuan a ti ta sep a, a ṭawng dan hrim hrim chu a zia a zawih hmel kher mai.

"Waiwai chu i bâwl dâwn em?" tiin u Hruaia chuan min biak zawm daih a, mit khap fuk fuk pah hian ka lo bu nghat nghat ringawt. 

"Tu nge a? Kha kha em ni i bialnu chu?" Duhsangi lam chu ka hawi thuai a, keimahah a mit a lo fu chat a, ka hawi sawn leh rang viau.

"A nih hi!" u Hruaia pawh chuan a lo ti sam mai a, a aw chu a hmâ angin a chang rût tawh miah lo bawk.

"Kan bâwl zui nghal mai dâwn em ni ang?" ti leh zatin u Hruaia chuan min chhuk melh run a, ka buk khum leh ta ringawt a, ka awm dan aṭang chuan ka rilruah thil tam tak a inawm pawlh nawk nawk tih a hriatthiam vek ka ring.

"Hi, Duhsangi ka nia, Hruaia ṭhiannu" nui sen sen hian Duhsangi chuan ka lamah a kut a rawn phar a, ka lo chibai ve mai a, ka hming erawh ka sawi ve ta lem lo.

"I ngaih tiṭha lo duh suh" Duhsangi bawk chuan a rawn tih zawm zat a, a lo berah kan inrual loh paw'n kei aia a upat hret ka ring.

"Chutiang lam pawh a ni lo" ka ti ve ta sep a, Waiwai chu ka hawng ri rawk rawk zui nghal bawk. 

"I buai deuh chu a nih khâ" dam thlup hian u Hruaia zâwkin a lo ti a, za lo zetin ka nuih lêt sak ringawt. 

"Zikhlum i kawl mial em?" ka ti daih a, u Hruaia chuan min buk khum zeuh pah hian Fridge-a mi a va lá nghal a, Duhsangi erawhin kan che vel chu a lo en kar thung.

"Ka kal leh nghal mai ang" tiin Duhsangi chuan kawngka lam pan a rual a, ka en zui deuh vang vang a, u Hruaia erawh biak loh ang vel a ni.

"Tu nge a?" a kal liam ta maw tihah u Hruaia chu ka zâwt chik ta nge nge a, Waiwai ka siam pah reng bawk. 

"A hminga ka nupui hual a nih kha!" a rawn ti ta mai, chutah a awm dan leh a hmel pakhat mah a danglam eih lo leh nghal.

"I va meng buai ve?" amah bawk chuan a rawn ti leh a, chhan nachâng pawh ka hre rih lo.

"Hlau thawng suh, kan inkâr a buai phah dâwn lo" min en chunga a tih leh chuan

"Min hrilh chiang teh, ka ngaih a ṭha miah lo a nia u Hruai" ka lo ti deuh hluai a, ani paw'n min en chîk ta hle.

"Ka pa remruatna holam zet vang maw le, thil ṭul lo leh ho tak a ni" a ti deuh hluk hluk a, hriat belh zel ka châkna a zual sauh thung.

Ka duh ang ngeiin engkim a sawi fai ta vek a, tun ṭum ang em ema ka laka thil a sawi hnem hi a la awm lo. A thil tawn zozai ngaihtuah chuan a khawngaih thlak thlawt ka ti, ka khawngaih tak zet! A pa remruatna angin awm se chu Duhsangi nen khan nupa an ni tawh ngei ang a, kei nen hian kan intawng miah lo bawk ang. 

Amaherawhchu a pa remruat dan hnialin a pa hnawh chhuah a tawh pha hial a, tun thlenga a chhungte nena an inpawh loh em em chhan ka hrethiam ta chiah chu ka nghilh deuh dup a, a bikin u Hruaia chu khawngaihna hlirin ka khat a ni ber. 

A sawi zel dan chuan Duhsangi pawh khan a duh em em bik chuang lo, mahse a pa leh u Hruaia pa an inṭhian ṭhat êm avangin u Hruaia pa thu zawm mai chauh a ni a, vanduai thlak takin Duhsangi khan thisen zawmpui dik tak a nei tawh lo va, thihnain an chhungkaw chungah ro a rél a ni ber. 

Chu mi avang chuan u Hruaia pa'n lo khawngaihin nupui atân u Hruaia neihtir a tum ruh ta bur a, mahse u Hruaia erawhin a lo duh awzâwng bik si lo. Engkim ka hre fiah ta vek chu ka hlauhthawn rukna zawng zawng a kiam duak a, Duhsangi thlengin ka khawngaih ta hial bawk.

Waiwai bawl kan ei dun lai te chuan kan inbe tam lem lo hle a, mahse kan inkârah intihthiam lohna emaw lungawi lohna pawh a awm chuang lo. 

Kan in thleng min thlah leh thlap a, a haw dâwn chuan zana a rawn lén tur thu a sawi miah lo va, a sawi ka rin laia a sawi loh avang chuan ngaihtuahnaah thil dang a rawn lut zui nghal zat bawk. 

A sawi láwk loh ang ngeiin zanah pawh a hmel ka hmu ta miah lo va, ka call a pick up miah lo bawk a, message-in lo lén a tum leh tum loh thu ka zâwt hram a, mahse chu pawh chu a view chuang lo ta cheu! 

Chumi zan chuan a reh hian a reh tlawk tlawk a, ka call reng duh ta bik lo va, ngaihtuah erawh a nâ duh khawp mai. 'Engtin nge a awm ang' tih leh 'Eng nge a tih ang' tih lam ngaihtuah reng rengin hun ka khawh ral a, ka message tal reply se chu ka ngaih a ṭha deuh ang maw lè. 

Kan inkâr a buai phah dâwn loh thu kha chiang takin min hrilh a, ngaih ṭha taka awm ka tum a, mahse a awm dan teh thut chuan hlauhthawnna min neihtir lo thei bawk si lo. 

Ka phone chu ka hmet êng leh ṭhin a, message a view tawh leh tawh loh ka check chhen a ni ber a, chutia ka phone ka en reng laia ka message thawn a rawn in-double blue tick thut chu ka harh deuh kâwkin ka hria. 

End of Chapter 5