LOVING YOU A MILLION TIMES By Havali Adam (CHAPTER 4)

LOVING A MILLION TIMES

By

Havali Adam

Chapter 4

"Ka va haw ang e, lut tawh rawh" a rawn ti daih a, ka zawhna a chhâng miah lo chu ka awm a tinuam lo ang reng. 

"Lut rawh le" ti leh supin min rawn din hnaih a, kei erawh ka la ngawi kar a, ṭawng pawh ka ṭawng loh ang bawkin chet pawh ka che chuang lo. 

"Nunu" ka kut vuan pah hian a ti thum dam leh dap a, ka hmuia a rawn fawh tâkah chuan mit chhing vang vangin ka lo chhâng lêt ve nghal a, chhan lêt ka tum em em pawh a ni lo, min thunun leh vek tawh ni berin ka hria.

"Lut rawh le, ka lo en ang che" tia ngaihthlak nuam zeta min biak leh chuan ngawi rengin ka inher a, ka lung la dam zân lo mah se luh mai chu a fuh zâwka hriatna ka nei a, min chhâng dâwn chuang lova ka hriat vang a ni pakhat. 

Kan in kawngka bul ka thlen chuan ka hawi lêt a, a bike nghenga min lo en reng chung hian a nui suk a, hnâra thaw chhuak ham hamin ka lut ta nge nge bawk. 

Mut hmunah chuan ka ngaihtuahnaah a chhungte an awm reng a, tun ṭum chu eng emaw tak hian min mawlh a, mahse ka thil hriat châk ber lah hriat hleih theih a ni bawk si lo. 

Ka phone chu ka ban a, biaka zawh leh mai te ka duh rum rum a, biak erawh ka be chuang lem hlei lo va! Mut chhuak lo zetin ka mu meng kar ngawt ngawt a, dâr 12 dâwn ni tawh mah se ka la muhil thei chuang lo.

Ka phone chu ban lehin a hming ka hmet chhuak a, ka call ta nge nge a, mahse ka off leh rang khawp mai. A tlai tawh tih lam pakhat mah ngaihtuah lovin ka call thawr ringawt a, ka rilru ka lo kawm tui lutuk vang a ni ber e. 

Khum sirah ka phone chu ka dah ta daih a, muthilh tumin ka mit ka chhing zui nghal vang vang a, ka mitthlaah u Hruaia hmel a rawn lang nghal zat bawk. 

Chutia thawm a reh tlawk tlawk lai chuan khum sira ka phone dah chu a rawn ri ral ral a, ka chhungte tih harh hlau zeta ban nghal vatin ka hmet reh zui nghal thuai bawk. 

"Hello" ka ti sep a, ka lo call hman thawt thawt kha ṭul lo ka ti hnuhnawh kher mai. 

"I hmet sual palh nge min lo call i tum hrim hrim?" a rawn ṭawng dan vel chu detective ang mai alawm a nih lè.

"Ka hmet sual palh a nih kha!" ka lo ti thuai a, ka ṭawng ring ngam lo hle bawk. 

"Dâwt i sawi" a rawn ti daih thung a, engtin nge a hriat dik chat theih pawh ka hre lo.

"Dâwt ka sawi lo e a!" tia ka ṭan ve pawh chuan

"Min ngai tih ka hria alawm" ti deuh tlatin thum hniam zawi ang reng tak hian a nui ri dut a, sawi tur hre tawh lo ang maia ka ngawih lai chuan

"Kei paw'n ka ngai che" a rawn tih zawm leh nghal zat a, ka àwm a nuam nghal veng veng thei tlat a nih chu! 

"Ka lo kal dâwn asin" a tih leh chuan

"Ka mu tawh, lo kal tawh lo mai rawh, naktukah inhmu tawh zâwk mai ang" ka lo ti thuai thuai a, a lo kal leh duh tak tak ang tih ka hlau khawp mai, zan a rei tawh bawk si. 

"Ka ngai che alawm" a aw aṭang chuan dâwt a sawi lo tih ka hre chiang hle a, a thil sawi lah chuan engtin emaw ni hian min awmtir tlat leh nghal a, a thusawi chu hriat a nuam ka ti ru veng veng ni berin ka hria. 

"Ka lo kal ang" dam deuh, mahse nghet charh tho si hian a rawn ti leh a, kan inbiakna chu amah zâwkin a hmet tawp zui nghal daih bawk. 

Ṭhu chungin thâwk ka la huai a, a lo kal tak tak dâwn tih lah ka hre chiang ropui si. Khumah chuan ka ṭhu ngawi reng ringawt a, zan a rei ve tawh bawk nen sana bân inkhâwng ri pawh a ring ṭha tawh hle. 

Minute tam a liam hmain bike ri vut vut thawm ka hre thuai a, a rik dan aṭang chuan kan in kawt a ni tih ka hre nghal a, tu dang ni lovin u Hruaia ngei a nih ka ring. 

Thawm dim thei ang berin ka room aṭang chuan ka chhuak a, kawngkapui ka hawn lai te chuan thawm dim tak ka ni! Ka chhungte an rawn harh thut ang tih mawlh ka hlau, an harh hlauh chuan a chî dâwn loh lutuk!

"Engati nge i lo kal tak tak?" ti deuh pang pangin a lamah chuan ka kal phei a, a lo nui suk ringawt. 

"Ka ngai che ka ti lo em ni?" tih leh a taksa si chèta min pawh a rual nghal a, kan inmelh hnai nghal hle bawk. 

"Khaw maw min thlah teh" tia chet ka tum chu min vuan nghet zual sauh a, a hmui lûm thar thar chuan min rawn fawp zui nghal a, thanga tâng ang mai ka ni! 

Zei lutuk tak mai hian min fawp mial mial a, kei lahin ka lo dawngsawng ṭha nasa mai bawk si. Ka thiam ang tawkin ka chhâng lêt ve mawlh mawlh a, kan hmui mawlh chu a va inbawhthuah nasa tehreng èm. 

A châng leh ka hmui chung lamah a ṭuan a, a châng leh ka hmui hnuai lamah a ṭuan thla hle a, a lei ni se a hmang thiam bawk si, ka tân zawng chhan lêt loh theih a ni mawlh lo e! 

Chal insi riala kan awm hnu chuan min fawp leh vang vang a, benga hriat theihin engmah sawi tawh lo mah se a chetzia hmang chuan min ngaihzia a tilang nasa hle.

"Dik tak chuan ka muhil thei lo a" ti sepin a taksa chu ka ngheng chial a, ani erawh a bike seat ṭhut titihin a ding awn duai thung. 

"Min ngaihtuah tih ka hria alawm; i thluak chhungah ka awm reng tih nen lam" inring tâwk lutuk tak mai hian a rawn ti sup a, a hre dik thei phian leh nghal. 

"Ngaihtuah e, mahse ka ngaihtuah dan che erawh a dan a dang. Min hrilh teh u Hruai, engati nge i chhungte chanchin hi engmah min hrilh ngai loh? Hrilh chî ah min ngai lo zâwk em ni? Kei chuan tlang takin engkim ka hrilh che a, nang erawh ka zawhna pawh i chhâng duh lo va, thil dang hlir i sawi zel a, ka ngaih i tiṭha lo zual" ka ti ta duah a, thawm chu a reh zui nghal vawng vawng bawk. 

"Naktuk zîngah ka zin dâwn" a taksa hlata awm ka tum lai chuan hniam cherh churh hian a rawn ti a, ka kal sawn phal lo ang maiin min la kuah bet run zui. 

"A nih chû, tluang deuhin i kal dâwn a nia" tih leh chet ka rual nghal tharh a, ka tal chhuak lo chiang teh e! 

"I lungàwi loh hian ka rilru a nuam miah lo a nia Nunu" a rawn tih chuan

"Lungâwi lova min siamtu chu nangmah alawm i nih" ka lo ti deuh salh a, ka lungàwi lohna chu a àwm ve viau chuan ka hria.

"Naktuk tlaiah ka lo haw leh hman ka ring, ka inah ngei zanriah min kilpui la ka duh, chutah chuan ka hrilhfiah ang che" a ngai te bawkin thil dang daih a rawn sawi leh ta, ka lakah sual hran lo mah se a luhlul tih erawh ka hre chiang ve ta viau e. 

"Haw tawh rawh, zíngah i kal dâwn bawk si, i mu tlêm lutuk palh ang" ka ti ve ta daih a, a kut chu kuai sawn deuh sawkin ka tal chhuak ta nge nge bawk. 

"Ka tiam a che, naktukah ka hrilhfiah ang che Nunu, rilru hlim takin min thlah la ka duh" ka bân reka rawn hmer leh chat pah hian a ti deuh hluai a, en pawh min en chiang khawp mai. 

"Aw le, kal tawh rawh, ka lo en liam ang che" ka ti ve leh ta nge nge a, a bula ka thinrim rei thei tak tak miah lo hi a chhan ka hre lo. 

"Eng nge ka lo hawn ang che?" a tih chuan ka ṭhen sak a, sawi tur pawh ka hre lo, ka rilru inthlak danglam chak lutuk te chu a mak zâwk!

"Keimah hi ka rawn inhawn mai ang che" a rawn tih leh chuan nui chungin ka lo bu nghat a, ka khabe chawi zeuh pah hian min fawp leh vang vang a, ka la zâwt miah lo nà chu bialnu a neih ṭeuh tawh ka ring, infawh a zei êm mai.

"Muttui le" tiin a tawp a tawpah chuan kan inthlah fel ve thei ta hram a, ka rilru pawh a hma ang kha a ni tawh lem lo va, ka thil hriat châk ber min hrilh dâwn tih ka hriatna chuan ka ngaih a ti ṭha vek tawh ti ila a sual lo ang.

Zing ka harh hnua phone ka khawih chu a message a lo awm vàng a, tluang deuha zin turin leh dam taka lo lêt leh thuai turin ka reply ve nghal zat a, mahse message min rawn thawn hun leh ka chhan lêt hun chu a inang lo khawp mai. 

Mood fuh zeta zi marin khum aṭang chuan ka tho chhuak a, hma lutuk a ni tawh lo va, ka intifai zung zung a, ka nu ei rawng bâwl ka pui zui nghal bawk. Tukṭhuan kan ei te reng reng chu ka ei tui em em leh nghal a, thawh tirh phat aṭanga ka mood a fuh vang te pawh a ni mahna. 

"I û hi lo zilh ve teh, ka ning lutuk" Adeline-i chuan a ti deuh hlawk hlawk a, bus seat hnung berah kan pahnih chauhin kan ṭhu a, vawiin chu zirlai naupang chûang an tlêm riau.

"Eng nge ni leh ta?" ka tih chuan

"Khaw laiah 'Adik, Adik' min ti ziah a, ka zak ve tho, lo hrilh ngei ngei rawh, ka ngei a nia!" a rawn ti nghal hmawk hmawk a, a lung dam nâna hnem vak ngaihna pawh ka hre lo.

"Âw, haw lo ve mai la, i haw zel a nih khâ" ka ti chiah chu

"Nang pawh ni la i haw khawp ang, chu bakah Adika ber kher min chhaih ziah hi ka hne, ṭawngmawh ang deuh hian a lang vel a, a ṭawngthei ropui si" a ti leh nghal bawrh bawrh a, ka lo nui chhuak tawp ringawt. 

"Lo nui ziah suh" a rawn ti ta réng a, nuih loh theih pawh a ni ṭhin lo. 

MZU lam pana kan tlan chhung zawng chuan a lungawi lohna min hrilh tluan zak a, kei lahin hnem dan ka thiam der si lo. A châng leh ka nui leh hak ṭhin a, a châng leh nuih ka insum thul, u Rosanga leh ani hi chuan inremna thuthlung sign hial se a ṭha ang. 

Muang marin MZU kan thleng thla a, kan department ve ve lamah kan inṭhen hrang zui nghal a, kawnga ka kal thlak hnek hnek lai te chuan u Hruaia nena kan intawn dan kha ka hre chhuak uaih uaih a, Mizoram pâwnah a awm daih rih bawk nen ka ngai veng veng a ni ber e.

Kâr lovah hun chu a liam zung zung a, ka mood fuh lutuk vang nge pawh ka hre lo, nî chu a rei lo ka ti ang reng. Tlai dâr 4 velah u Hruaia hnen aṭangin Lengpui Airport-a a awm tawh thu message ka dawng a, kei erawh inah awm tawhin ei rawng ka bâwl mêk thung a, chaw ka ei chhuah dâwn avanga ei rawng bâwl zung zung ka ni bawk. 

Chutia u Hruaia berin Mizoram a rawn thlen tâkah chuan ei rawng bàwl pahin ka pa zâwk chu ka call a, a ring ral dâwn emaw ka tih laiin a pick up ve ta hram.

"Aw, Nunu?" dam dap hian a rawn ti a, chutih lai mêk chuan u Rosanga hna bâng a rawn haw thleng ve chiah bawk. 

"In buai em?" ka ti hmasa tê tê phawt a, an buai loh thu a rawn sawi hnu chuan

"Eng lo a nia pa, zanin tlai hi chaw ka ei chhuak thei ang em lè?" ka ti zui nghal a, aw thian kharh pah hian

"Khawi hmunah?" a rawn ti ve mai a, phone-ah chuan ka nu ṭawng thawm leh thawm dang ri laih laih ka hre pha vek bawk. 

"U Hruaian chaw eiah min sâwm a, ka lo remti ve tawp a" ka ti ta sep a, engtin tak mi rawn chhang ang maw!

"Khawi vêngah nge?" a tih leh chuan ka sawi ve nghal mai a, a aw chu a dang ta daih bawkin ka hria.

"I ngaihzawng mah ni se a zuam lutuk theih tur zawngin awm suh ang che Nunu, mipate hi kan inang lo hlawm teh a nia" hriat nuam deuh si hian a rawn ti charh charh a, a ṭawng danah chuan min ngaihtuah tih a hriat khawp mai.

"Nia" tih chauhin ka chhâng lêt a, ka bai chhuan lâi chu ka chawk pah reng bawk. 

"Zanriah ei chhuah chu i phal èm pa?" keimah zâwk chuan ka ti leh a, phal se chu ka ti reng maw le, mahse a phal lo a nih leh ka ei chhuak lo mai ang. 

"Tui takin in ei dun dâwn a nia, lo haw har la ang che" a rawn tih tâkah chuan hlim aw zet hian

"Ka lawm e pa, ka dah nghal mai aw, ei rawng bàwl chawp a la ngai dâwn sia" ka tih zawm nghal mawlh mawlh a, haw har lo tura min chah nawn leh hnu chuan kan inbiakna kan ti tawp zui nghal bawk. 

Chhuak tura ka insiam lai takin u Hruaian min rawn call a, insiam pah chuan ka chhâng ve nghal mai a, min rawn lam tur thu a sawi lai te chuan ka khi ver ver a, eng dang a ni lo, a hmel pá tak leh fresh zet kha ka hmu leh châk tawh a ni ber. 

Ka insiam zawh aṭanga rei lo tê hnuah a rawn thleng ta ngei a, a hmingin u Rosanga hnenah chaw ka ei chhuah dâwn thu ka hrilh bawk. Ka pa ber ka hrilh tawh miau a, ka nu'n a hre tawh turah ka ngai hmiah bawk a, ka ngaih a ṭha khawp mai. 

Bike-in u Hruaia nen chuan kan inphur chhuak a, a dul zawna ka kut suihin a hnung chhah ṭha takah chuan ka bei thlep a, chutianga awm chu châk tlat hek! 

Ruah a sûr dâwn hnai a ni ngei ang, chhum a zíng deuh chûk a, khua pawh a thiang kâk lo hrim hrim a, fur ruah tui tlak tam lai a ni chho ṭan tawh bawk nen thlasik ni lo mah se chhuahvah dâwn chuan kawr lûm hak a fuh ṭhin khawp mai. 

Kan tlan zel a, boruak chu a vawt deuh súk tawh a, a in luah changkang leh to hmel zet kan thlen chuan ei rawng kan bâwl dun nghal a, ani'n chaw a chhum a, kei eiin chawhmeh lam ka siam thung a, kan awm dan vel chu a hlimawmin a nuam ka ti tak zet. 

A inbual lawk tur thu sawiin bathroom lamah a lut zui nghal a, rei pawh a inbual lo. Ka bulah a awm chawt a, nêl leh ngai ru zet hian ka be siam siam a, dam dap hian min chhâng ve zel bawk a, hmeichhe dang pawh ni se a bula awm chu nuam an tih ve vek tho ka ring. 

Ka sawi thiam chiah lo, a hahdamthlak ni maiin ka hria. A Tshirt vâr hak chuan a tilang fai zual em em a, inbual zo hlim tih hriat taka a sam hnâwng chap te, a rim te thleng chuan a tui veng veng a, ka che vel min en chik ngar ngar lutuk chu ka lài ringawt bawk.

"Heih" ka hnunga ding chunga ka kawng a rawn kuah rual chuan ka ti deuh halh a, nuam erawh ka ti ru viau thung.

"A va tui dâwn ve" ti supin ka chhip chu a fawp zeuh a, a hnim vang vang ni mai te'n ka hria.

"A tui ang emaw!" ka lo ti ve hliai a, ka nui deuh sak bawk. 

"Tui ang" tih leh ka bianga rawn fawh a rual a, chutah ka koki ah a khabe a la nghat zawm zat zui!

"Heih, awm ṭha mai mai teh" ka tih pawh chuan a awm ngaiin a awm reng a, kan inngaihzawnna la rei lo mah se kum tam tak lo inngaizawng tawh ang mai kan niin ka hria.

Door bell a rawn ri chiah chu ka phu deuh zuk a, rem leh rem lovin ka nam sawn thuai a, u Hruaia pawh kawngka lamah a phei ve nghal mai bawk. Kawngka a va hawng chu a thil chah a lo thleng hi a lo ni a, a thil chah chu thlalak tarna tur frame ni maiin ka hria. 

Ka bula rawn phei a tum lai tak chuan a phone a rik zawm zat a, veranda thlang lamah chhuk zui nghalin a ṭawng hniam sup sup a, chawhmeh siam reng pah chuan ka en leh zauh zauh ṭhin a, a biak mêk chu hna lam thil a nih ka ring ve tawp ringawt bawk.

Chutia ei rawng ka báwl mial mial lai chuan ruah a rawn tla ser ser ṭan a, kâwl a phe deuh zuk zuk zawm zat a, current pawh a awm lo har lo hle. U Hruaia chuan inverter a on nghal a, in ṭha leh changkang tih takah mamawh a awm kim khawp mai. 

Êng ber a awm leh tâk si ah chuan ei rawng ka báwl chhunzawm leh ta mial mial a, bàwl tur a tam tawh lo va, salad siam chauh a ni tawh mai. Ka bulah u Hruaia chu a ṭhu a, kei ka ṭawng siam siam a, ka zawhna a chhang zauh zauh tih loh chu a ṭawng mang lo. A phone a khawih mual mual a, hna lam thil bawk a nih ka ring.

"I chhungte chanchin chu min hrilh tawh la?" zanriah kan ei dun lai chuan ka ti leh ta nge nge a, min hrilh tur thu kha a sawi lâwk vek tawh a, sawi mai lova a ngawih deuh run lai te chuan ka lo hre châk zek zek tawh hle.

"Ka pa'n min hnawt chhuak a, kum 5 lâi chu keimahin ka awm hrang tawh" a rawn ti ta mai, ka thil ei lai chu ka va tawp chiang tehreng êm.

"Engati nge?" hriat belh zel châk aw zeta ka tih chuan ani paw'n chaw a bar zawm ta bik lo.

"A thu a duh lutuk a" tih chauhin min chhâng tawh a, zawh zawm zel chî a ni nge ni lo tih hriatthiam a har tawh khawp mai. 

"A va'n zia lo ê" ka ti thluk awn deuh vang vang a, rilru pe lo zetin chaw chu ka ei zawm ta ringawt bawk.

"Sawi tawh lo ang, tui taka chaw ei i tum zâwk teh ang" a rawn tih chuan ka lo ngawi kar a, kan thil sawi zawh chiah khan boruak a thlak danglam vek ni mai te'n ka hria.

"I zinna chu a nuam em?" ka ti ta daih a, thil dang sawipui a hun tawh réng a ni.

"Nuam hran lo, ka zin leh hun chu lo kal ve tawh nghe nghe la a ṭha ang" a rawn ti ve luam a, hmel hmuh nuam zet hian a nui deuh suk bawk.

"Ka rawn kal ve tak tak mai tur a nia" ka ti fiamthu chu a lo là thutak nasa mai. 

"Zin a ngaih leh hun hmasa berah ka hruai tawh ang che" a ti deuh charh a, ka fiamthu a ni tih ka hrilh tan tan lai te chuan luhlul a chhuah tlat a nih chu! 

Zanriah kan ei kham fel a, ka eina ka seng fel zui nghal mial mial a, u Hruaia pawh chuan min lo pui ve mai a, kan boruak tawn mêk chu a nuam ka ti tak zet, kan inpawh bawk si. Ka rilru kil khatah erawh a chhungte an awm ru reng thung a, zawh zawm zel leh hriat belh zel duh teh mah ila a hun rih lova ka hriat avangin a chhungte chungchang lam reng reng pakhatmah ka chhak chhuak tawh lo. 

Hun a tih hunah min la hrilh vek ve mahna. A che mual mual ka en lai te chuan khawngaih ruk riauna ka nei a, kum eng emaw zah chhung mahnia in a luah hrang thei hi a pachang ka ti ang reng hle bawk. 

Ruah lah chu hàn lam hnaih ai a sûr belh tlawrh tlawrh ta zâwk a, current erawh a awm ve leh tawh a, sofa-ah inkhan chialin kan ṭhu dun a, a taksa lûm nuam tak chu sik a ninawm loh chiang kher mai. 

A pa lianin a sei thlurh bawk si nen a taksaah chuan ka leng hle a, sawi tawh ang khan Mizo hmeichhiaah chuan tê chhe zawk zawk ka ni lo va, mahse u Hruaia hi chu ka la tiat lo hle thung. 

A tua ma'n phone kan khawih lo ve ve bawk a, ka dul zâwna ka kut chu a kut hrawl zet chuan a hum ran a, ani ang em ema mipa vei leh duh leh thlakhlelh hi ka la nei ngai lo, ka ngaihzawng lo neih ve tawh te nen kha chuan inang lo tak an ni. 

Zirna lam kan sawi dun ta daih a, tlângnêl leh ngampâ tih hriat tak hian Ma'am Ranjini-i class-a awm ka nin ṭhinzia te chu ka hrilh melh melh a, ka ṭawng a kal khawp mai. A bula ka awm hi chuan ka inthununna te pawh hi ka hloh vek ṭhin ni mai te'n ka hre ta, chu chu thil nih dan a ni tlat rèng a ni. 

Tin, kan inngaihzawn tak tak hma lo duh ru reng tawh mah ni ila, hetiang em em hian ka duhna leh ka ngainatna a pung zual zel ang tih rin ngaihna pawh ka nei lo. Mipa ṭawngmawh tak a ni lo va, kei létin upa daih zâwk mah se ka lakah a inhmuam up run lo bawk.

Engtik laiin nge ka lo muthilh pawh ka hre lo, ka harh meuh chuan dâr 10 dâwn a lo ni duai tawh a, u Hruaia taksa ka nghenna ata ka tho nghal vat a, chu chuan u Hruaia pawh chu a tiharh ve nghal a, chuti teh thuta ka che nghal sawk sawk chu mak a tih hmel khawp mai. 

Ruah erawh hán lovin a lo la súr reng a, tho phang ve ve kan ni bawk a, ṭawngkam khat paw'n kan inbe lo hrim hrim. Dawhkan têa ka phone chu ka ban nghal thuai a, signal pakhat mah a lo la awm lo zui, ka chhungte chuan min ngaihtuah ru tawh ngawt ang ka ring.

"Ruah hi nghak hàn deuh phawt ila?" dam dap hian u Hruaia chuan a rawn ti a, haw nghal ka duh tih ka chet dan aṭang leh ka hmel aṭangin a hrethiam nghal vek a ni ngei ang. 

"A chí tawh loh, a tlai tawh lutuk, ka haw ngei ngei a ngai" ka ti deuh zung zung a, u Hruaia pawh chu a rawn tho chhuak ve ta mai bawk.

"Min lo nghak lawk rawh, ka rei lo ang" tih leh nihliap nen pâwn lam pan a rual nghal a, a rawn lut leh chu raincoat hi a lo keng lut a, bike seat hnuaia mi a va là tih ka hrethiam nghal mai. 

"Hei hi ha la, ka thlah haw dâwn che a nia" a tih chuan a thu awih takin raincoat chu ka ha zui nghal mial mial a, hmanhmawh ru tawh tak ka ni! 

"I hmanhmawh leh lutuk a nih khâ" a rawn tih phah ta réng a, dik tak chuan ka awm rei bawk si a, ka lakah ka chhungte'n ngaihtuahna ṭha lo an pû ang tih ka hlau êm a ni. 

"Ka hman" ka insiam zawh rual chuan ka ti deuh tawp a, ani pawh lo bu nghutin pâwn lam min panpui ve nghal mai bawk. 

"Lawk lawk lawk! Engati nge raincoat i hâk ve loh?" ti hnuhnawh lehin kawngka pui kan thleng chu ka pawt ding a, ruah a la tla reng bawk si a, raincoat hâk loh ringawt zawng a ṭha lo ang. 

"Pakhat chiah alawm ka neih, min ngaihtuah suh, kal ang le" tia min kaih kal a tum chu ka pawt deuh tlat a, mak a tih hmel em em leh nghal.

"Ruah do ringawt chu a chî loh u Hruai, nihliap tal keng ang, i tlan muang deuh ang a, ka zawn char char mai ang che" ka ti zung zung a, ṭul a ti vak lo nge ni, min en chhuk run ringawt. 

"Khaw'nge nihliap kha i dah?" tih zawm leh nghalin nihliap chu ka zawng zui zat a, chaw ei dawhkan chungah a lo dah chu niin ka là nghal hmak bawk. 

Pâwn kan thleng chu ruah a rawn sûr tam zual sauh leh ta zui a, kan ṭhutna tur pawh kan hru hul buai lo law law a, kei chu ka huh em em pawh a ni lo, u Hruaia zâwk a huh nûal tawh a, ka nihliap kahparh chuan awmzia a nei tam lo khawp mai. Muangchâng hian a tlan chhuak riai riai a, kâwl a phet mai bakah khawpui a ri dur dur a, ka hlau ru ang reng hle. 

U Hruaia chu ṭhut hnaih sawtin ka kuah titih a, ka kut ding lama nihliap kengin ka zawn pah reng bawk. Muang marin kan tlan zel a, ruah sûr tam viau mah se u Hruaia bike khalh erawh ṭum dang ang bawkin a dam em em tho. 

Kâr lovah kan in kawt kan thleng a, kan veranda-a ka inphelh sawk sawk lai chuan ka nu a rawn chhuak a, in chhunga lut turin min hrilh zui nghal bawk. Ka chhungte chu an lo la meng kim ṭhap a, mahni in lûm ngei mai han thlen tâkah chuan ngaih a ṭha duh khawp. 

Ka pa chuan thingpui lûm turin min ti nghal zat a, thingpui lûma hun ka hman chhung zawngin u Hruaia leh ka nu leh pate chu an lo titi mial mial a, thingpui ka va pek lei te chuan ka pa chu a la ṭawng tui khawp a, eng nge an sawi tak hre ve lo mah ila an awm dan chu hmuh a nuam ka ti ru hle.

Dâr 11 rik dâwnah daih ruah chu a sûr han ve ta hram a, u Hruaia pawh a duh aia rei a awm phahin ka hria. Raincoat nena haw mai a tum lai khan ruah a la sûr nasa em em a, ka nu'n haw rih lo mai turin a hrilh phah rèng bawk a, ruah sûr a hán tâkah chuan a tlan haw rang hle thung. 

Mut hmain kan inbe leh hram a, a hmel hmu lo leh a bula ka awm loh hlek hi chuan ka ngai nghal veng veng zel mai zawng a ni e. Rei erawh kan inbe tawh lo va, ka muthilh lai pawh ka hre lo. Ka mit ka men leh chuan khua a lo vâr diam tawh zâwk a, motor tlan thawmin min tiharh a ni ber e. 

"Eng nge?" MZU kal tura insiam mawlh mawlh pahin u Rosanga chu ka en deuh hâw a, a rawn lut teh thut chu thuhran ni se, ka phone a la khawih chat zui! 

"Eng nge i tih?" ka tih leh pawh chuan ka zawhna a chhâng chuang hlei lo va, eng tak chu duh ni maw!

"A tâwk e, engmah" a chhuah dâwnah a ti ve hram a, engah mah ka ngai tawh bik chuang hlei lo va, a hmuh atâna ṭha lo tur ka phone-ah a awm lo ve chiang êm mai.

Dârkâr chanve dâwn a liam hnu chuan MZU bus changin Adeline-i nen kan ding leh vàng tawh a, boruak awm dan aṭang chuan rei lo tê hnuah khua a rawn chhe leh dâwn a nih hmel. Rei nghak lovin bus chu a lo thleng ve mai a, a hnung ber seat kil kan chuh chat a, a hnung kil hi chu kal lamah chuan kan seat a ni tawp! 

MZU kawnga tlan zelin zirlai dang kan lam phei zeuh zeuh a, Adeline-i ṭawng ka ngaithla pah reng bawk. Nizan lama a mut ṭhat loh thu te, tukṭhuan ei ṭha mumal hman lo khawpa thawh a hai thu te chu a sawi zuah zuah a, nepnawi thil a la ei ṭun ṭun zui, he nu hi chu a thawveng ve chiang a ni. 

"Awi, ka ning!" Tanhril kan thlen thlak laiin Adeline-i chuan a rawn ti deuh thut a, a ṭawng zawi tehchiam bawk si lo nen ka en hâw nghe nghe. 

"Eng nge ni leh ringawt ta?" ṭhian leh ṭhian inkârah hi chuan ṭawngkam ṭha leh mawi kan phuh chhuak hman lo a ni ber e. 

"Hming pathlawia hi, ka ning zozai lutuk, engtin nge hetiang thlalak te hi a lo neih daih theih, i pe chiang mai Nunu, i pe ti raw?" duham zeta a rawn tih duah chuan ka lo en reng ringawt.

"Sawi rawh Hmangaihsang" a tih leh chuan

"A teuh lo mai, ka pe reng reng lo, engtin nge a neih theih lah ka hre hek lo" ka lo ti ve ta thuai a, u Rosangan Adeline-i hmai bawl hmelchhe lutuk lai a lo nei daih chu mak ka ti ve tho. 

"Ka awih lo, nang lo chuan he thlalak hi an nei lo hrim hrim, ka ning ê hming pathlawia hi chu!" a tih niah niah lai chuan a phone chu ka lâksak a, ka tum loh deuh ka hmu zawm zat bawk. 

"Nang paw'n a thlalak chhe deuh deuh i thawn ṭeuh tho hì, in inrul tâwk chiahah ngai mai rawh! A thu hrimah eng nge i huat teh vak a, haw lo la, i laka a awm dan hi a reh ve mai ang" ka tih chuan

"Huat loh ka tum ve tho, mahse ka haw zel si alawm, nghal ropui si, mi tihthinrim dan a thiam thlawt, mipa chu ni ila e, ka kut tum hi vawi duai lo a dawng tawh ang" a ti zuah zuah a, kan bula mite pawh an lo nui ṭhâw ringawt. 

"In buai buaiin buai teh u, in hahthlak dun êm mai" ka tihsan ta daih a, zinga u Rosanga ka room-a a lo kal teh thut leh ka phone a khawih mual mual kha mak ka ti réng a ni. 

Ka sawi zui pui duh tâk lovah chuan Adeline-i pawh lungàwi lo deuhin a lungâwi ve leh mai bawk a, kan department ka thleng chiah chu ruah a rawn sûr nghal buan buan a, tun lai zet zawng khua a chhe duh ngei mai. Zirtirtu te'n class an lák lai te chuan ka mut a chhuak ru em em a, khaw awm danin a zir bawk si, kei chang ka ni lo, mi dangho pawh an mut a chhuak ve vek tho. 

Ma'am Ranjini-i lah chuan kan mood hrethiam lêk lovin min zirtir miah miah mai bawk si a, rilruah a lut duh lo teh e! Chawhnu lamah erawh ruah a sûr tawh lo va, khua chu a la dur deuh khup thung a, a sûr har dáwn lo tih pawh a hriat hle.

Bus changin MZU park ṭhutthleng tê ah chuan ka ṭhu ngawi ran a, ka thurualpui ṭhin ber Adeline-i erawh an bàn hma avangin a haw daih tawh a, tun ṭum chu an bâng hma uchuak a, min hawsan mah se pawi ka ti ta lo mai. Chutia mahnia ka ṭhut ngawih reng lai chuan ka tum loh deuh ka hmu hlawl a, u Hruaia ngei a ni. 

Mak ti ru zetin ka en reng a, MZU gate bul sirah dingin a phone a phawrh zui nghal a, min rawn call zawm zat bawk. A phone call pick up-in park-a ka ṭhut thu ka hrilh chuan a rawn hawi nghal vut a, helmet keng reng chunga a lo pen phei chu en nin har ka ti ngawih ngawih. A pà bawk si, a fai bawk si, ka mood a on nghal vek ni mai te'n ka hre hial a ni. 

End of Chapter 4