LOVING YOU A MILLION TIMES By Havali Adam (CHAPTER 10)

LOVING YOU A MILLION TIMES

By

Havali Adam

Chapter 10

"Class in ṭan har dâwn tho si a, lo chho ve daih la" putea nupui min sâwmna chu ka ngaihtuah vang vang a, a ṭha phian tak ang. 

"Nia, ka hre lo le, ka nute ka'n dil ve chhin hrim hrim ang e" tiin in chhungah ka lut a, naktuk mai khi kum thar a ni tawh dâwn a, Lunglei lama kum thar hman duh tlat lo se chu an haw kher ka ring lo. 

"Nu, pa, putea te bulah kum thar chu ka han hmang teh ang" ka nu leh pa chuan min rawn en rual ṭhawt a, chutah ka nu zâwk chuan

"A tlai khawhnu tawh êm mai, hmang lo law law mai rawh" a lo ti a, vawiinah an haw chho tawh dâwn a, ka sawi tlai mah mah deuh chu a ni. 

"Hei, kan la kal chuang hleinem, lo chho ve mah se pawi kan ti miah lo a nia" putea nupui chuan a lo ti ve vat bawk a, chhoh leh chhoh loh chu ka nute thu thu a ni tawh mai. 

"I chho châk em ni?" ka pa'n a rawn tih chuan ka buk khum nghat nghat a, chhoh phal tak tak se ka ti, tunah rih hi chuan boruak dang daih hip ka mamawh a ni. 

"A buaithlak lo ang maw?" tiin ka pa bawk chuan putea lam a hawi a, putea paw'n a harsatna a awm loh thuin a lo chhâng ve nghal mai bawk. 

"A nih chuan va insiam rawh, i nu'n han insiampui che rawh se" ka pa phalna zàna ka zin tur chu ka lawm kher mai. 

"Hmanhmawh lutuk suh u, i rawn tel dâwn rau rau chuan kan chhuak tlai deuh dâwn a nia" putea min biakna chu chhàn pawh ka chhâng lo, ka nu nen room-ah kan lut nghal daih a, ka rilruah insiam zawh thuai thuai chiah a awm tawh!

Inken hmaih palh a awm loh nán ka ken tur ka inkhung fel hnuah pawh ka check nawn leh thlap a, ka hman meuh chuan dârkâr chanve dâwn a lo liam tawh a, mahse tlai chhe lutuk erawh a la ni lo. Aizawl kan chhuahsan hnu chuan Adeline-i ka call a, Lunglei lama kum thar ka hman dâwn thute chu ka hrilh melh melh a, mak a lo ti ngâng mai. 

"I sawi lâwk hauh si lo a!" a ti chiah réng a, keimah ber pawh hian ka zin thut dâwn tih ka hre lâwk bik teuh lo. 

"Nia, ka kal thut a ni ber. Class ṭan hma zawng ka awm ka ring, i mark lo tiṭha hle ang che" ka tih chuan

"Awi en teh Nunu, hming pathlawia hi a zei reuh lutuk, ka rin phâk bakin a zei, nang paw'n i awih lo zâwk ang" a rawn ti ham ham a, a la nui har har zui! 

"Heih, thil ṭha lo te kha in lo ti hman ang e aw, a chí miah lo a nia" ka ti ve nghal zat a, a thil rawn sawi zawh chiah avang chuan kei pawh ka khi heu mai. 

"Awi, chutiang lama zei a ni lo, hei...eng lo, a awm dan hi bialnu a ngah tawh hmel tawp! I ngaihtuahnaa awm ang pawh kha a zei mai thei, a awm dan vel hi!" a rawn tih leh chuan

"Ṭhingi" ka lo ti ṭhawt a, a nui thawm chuan min tinui chhunzawm ve leh nghal bawk.

"Ka dah dâwn, nakinah kan thlen hunah ka lo bia ang che" tiin kan inthlah a, ka rui dâwn tlatin ka hria. 

"Engati nge? I nuam na nge?" putea nupui u Mami chuan a rawn ti a, putea nupui mah ni se kumah kan inthlau lutuk lo bawk a, ka û ta mai, amah paw'n a duh daih zâwk nghe nghe.

"Motor ruih hi ka chíng leh zauh ṭhin a" ka tih chuan

"Damdawi ka kawl asin, kei pawh ka rui ṭhin alawm, ruih lohna damdawi ei la, a zia mai ang" ti zung zungin a bag aṭang chuan damdawi strip khat hi a rawn phawrh a, eng khaw sawi set set lovin mum khat chu ka hmawm ve nghal mai bawk.

Kawng tluanin ka rui ta miah lo va, phone erawh ka khawih chhunzawm tawh miah lo thung. U Mami nen chuan kan ṭawng dun char char a, kan titi a kal tluang hle a, a chângin putea pawh a lo ṭawng ve leh zauh ṭhin a, mahse a inrawlh tam lo hle. 

Dârkâr eng emaw zah kan tlan hnu chuan in ei puar turin kan ding a, ka nute kan thlen chin hrilh nghal ka tum a, mahse signal pakhat mah a awm reng reng lo. Putea phone-in ka hrilh ta ringawt a, biak pawh kan inbe rei lo. 

Kan chawlhnaah chuan chaw kan ei a, ka va han ei tui mai mai tak! Kei ang chiahin u Mami paw'n a ei ṭeuh a, mipa chaw ei zat zet kan ei te'n ka hria, a inzat loh paw'n a teuh ngawt ang. U Mami chuan thei a lei nual bawk a, motor chhungah kan ei dun rak rak a, hmeichhia tih takah sawi tur kan ngah dun leh teh e! 

Kilometer 150 chuang kan tlan hnu chuan mut chhuakin min zem chiai chiai a, ṭawng pawh ka ṭawng peih tawh lo. Ka mit ka chhing vang vang a, a hnungah keimah chauhin ka chûang bawk nen a mutin ka mu ta daih a, u Mami leh putea erawh eng eng emaw ni sawiin an nui dun leh hak hak ṭhin a, an awm dan leh an thawm ri và chuan u Hruaia nena kan inngaihzawn lai te kha min tihre chhuak lo thei lo leh ta.

A hmel ka hmuh hnuhnun ber khan biak khat pawh kan inbe lo hrim hrim a, en erawh kan inen chiang viau thung a nih kha! Ka thinlungah hnawksak min tih thu mawlh chu a ri nawn tluk tluk a, tawrh thiam a har bawk si, ka lo hmangaih hman kher kher chu pawi ti eng ang mah ila awlsam taka lâk lêt theih lah a ni tawh hauh si lo. 

Ka mit ka chhin rualin ka mitthlaah a hmel leh kan nun hlui a rawn lang zut zut a, ka menin ka mitin a zawng ruai bawk a, hmangaihnain mihringte min lo tihnât theihzia ka hrethiam ve ta chiah e! Hmangaihte nen inṭhen avanga an dam lo ṭhin te, an mu thei lo ṭhin te, chaw an ei hlei thei lo ṭhin te hi ka dem ta miah lo, a lo nâ êm a tin a ni!

Ka taksa che dawtah chuan thawh phan awm miah lo hian ka harh a, nî en dan pawh a lo chawhnu her raih tawh a, phone-a dâr zat ka en chuan tlai dâr 3 leh a chanve a lo ri der tawh nghe nghe. Aizawl kan chhuahsan khan dâr 9 leh a chanve a la ri lo deuh a, kan tlan damin kan tlan chak lutuk lo bawk nen kan thleng har phian mai.

"Engtin nge i awm? Engati nge?" putea hlauthawng aw chuan min tiharh chiang zual hle. 

"Ka luak a chhuak, ding mai teh, ka luak dâwn" inhup titih chung hian u Mami chuan a ti mawlh mawlh a, motor a rui a ni hrim hrim.

Putean motor a tih din rualin kawngka a hawng thuai thuai a, motor aṭang a chhuak chiah tihaha a luak zui nghal bawrh bawrh a, a uak ṭhawt ṭhawt bawk a, mahse a thawm a rin ang hùin luak a lawi a nei miah lo thung. Putea chuan a chalah a dawmsak a, a kut leh lamin tui bottle a hum ran bawk. 

"A mak hle mai, damdawi kha ka ei vek sia" u Mami chuan a ti niah niah a, kei erawh an bulah ka lo ding ngawi reng ringawt.

"Nunu, damdawi kha lo laksak leh teh, ei leh se a zia deuh mai ang" putean a rawn tih chuan che chhuak nghalin u Mami bag-a ruih lohna damdawi chu ka lá a, u Mami pawh a lo la uak nasa mai.

Putea chuan damdawi chu a eitir a, a luak chhuak zualpui a reh hnuah kan tlan chhuak leh ta chauh a, mahse u Mami chu a la dik hlei thei chuang lo. 

"Lunglei kan thlen veleh dawmdawi inah kan kal dâwn a nia" hma lam en ding ngur pah hian putea chuan a tidam thlup a, u Mami tân pawh a thlamuanthlak ngawt ang ka ring. 

Muangchâng lo fê hian kan tlan ta char char a, u Mami ber a ṭawng ṭhat peih tâk lovah chuan motor chhung chu a reh khawp mai. Kan tlan zel a, dâr 4 leh a chanve pelhah Lunglei khaw chhung kan thleng a, damdawi in lam kawngah kan tlan zui nghal a, u Mami erawh a rawn ṭha leh ta phian thung a, mahse putean damdawi ina kal a tih tlat avangin damdawi in lamah chuan kan kal ta tho.

"Eng nge chanchin? U Mam i ṭha maw?" doctor room aṭanga an lo chhuah rual chuan ka lo ti a, a lo dam lo ringawt ang tih ka hlau. 

"Nunu, i putea hi pa ka ni tawh dâwn asin" putea thil sawi zet chuan min va tihlim si êm.

"A ni maw! Awi, i lo rai reng elo u Mam?" hlim zet hian ka ti zung zung a, ka thinlung takin ka lawmpui bawk.

An vêng lam pana kan tlan chhung zawng chuan u Mami nen ka ṭawng bawrh bawrh a, nautê chungchang bakah a thawmhnaw hak tur chenin kan sawi lâwk nasa nghal hle a, a chángin kan nui leh ringawt ṭhin bawk. An in compound kan thleng a, a hmun a zâwl zau nuam bawk nen Aizawl boruak nen chuan a inang lo hle. 

Putea hi sawrkâr hna sâng ve pangngai tak thawk a ni a, sawrkârin awmna tur quarter a pe thlap a, khawi district-ah pawh awm se awmna tur hi chu an buai lo ang tih theih a ni. In chhung kan luh tirh phat aṭangin nautê chanchin bawk kan sawi chhunzawm leh nghal siam siam a, putea pawh a lo nui vur vur tawp zel ringawt.

Zanriah kan ei kham a, u Mami rai thu chu ka nute lam kan hrilh nghal a, anni pawh an lo lawm ve khawp mai. Putea leh u Mami ber chu an lawm a, putea paw'n duat a tum nghal viauin ka hria. 

Khual khua aṭanga lo zin leh riak an neih zauh zauh ṭhin avangin an nupa room mai bakah room pakhat an lo siam belh tawh hi a lo ni a, a hma kha chuan chhuatah kan mu dul zel mai a, tunah erawh mikhual room-ah ka riak dâwn niin a lang.

"Aw Hello" tiin phone call chu ka pick up a, leh lama mi chuan

"Kan thlen veleh ka lo bia ang che kha i ti sia, min rawn be leh mang si lo" a rawn ti a, kan thlen tawh thu ka hrilh theih nghilh tih ka hre chhuak chiah! 

"Awi ni tak, eng lo a nia" tih leh u Mami rai thu te, damdawi ina kan kala kan buai deuh laih laih thu te chu ka sawi ta luam a, ani paw'n a rawn lawmpui ve khawp mai. 

"Enteh Nunu, hming pathlawia hian 'Rs' min ti rawh zu han ti tlat a maw le, mi thunun tum nghal lutuk mai, lo hau teh" a tih leh daih tâkah chuan ka nui sak a, an awm dan tur ka ngaihruat zawm zat bawk. 

"A duh miau te chuan ko ve mai la, eng nge harsa?" ka ti lêt ta zék a, a lungâwi lo nasa mai. 

"I û a nih avangin ṭan vel kher suh, ka dah dáwn" tih leh kan inbiakna tihtawp a rual nghal a, mahniin ka nui chhuak ta hak hak.

Chutia ka'n nui chu, ka ngaihtuahnaah thil dang daih a rawn lut a, ka nui tawp chiang nghal hle bawk. Eng dang a ni lo, u Hruaia bawk a ni. Amah ai mahin a nau nen kan inbe tam ta zâwk a, dik tak chuan kan inṭhen dan kha a lungáwithlak hlawl loh, kha ti teh thuta kan inṭhen kha rin ngaihna pawh ka hre lo. 

A message ka dawng tawh ngai lo va, phone call lek phei chu khawi lamah, kei tak paw'n ka be tawh ngai bik lo, a phone number erawh ka la save reng thung a, delete hun a la awm ngei ka ring. Ni e, nakinah chuan kan kâr a la hla tial tial ang a, kan intheihnghilh tawn ve zel mai ang, tuna lo buai vak ai chuan hun hian engkim her liampui zâwk rawh se! 

Kum thar pawh nuam takin kan hmang a, February thla daiha class ṭan tur kan nih avangin January thla chhung zawng chu Lunglei lamah awm rih ka tum ta ringawt bawk. Ka nute pawh ka hrilh vek tawh a, an lo phal ve mai a, Adeline-i erawhin haw thuai turin min duh thung. 

"A rei tawh lo ang" ka message dawn chu vawi tam chhiar nawnin ka en tlawk tlawk a, eng vanga chu thu chu rawn thawn nge a nih ka hre hauh lo. 

Notification bar aṭanga ka hmuh theih vek avangin ka open duh ta lo law law a, zep thu cheng lo, a message ho tê paw'n ka thin phû la zu ti rang thei nia maw lé. 

Kan inṭhen aṭang khan thla khat leh a chanve vel a liam tawh a, theihnghilh tum nghal teh mah ila ka thei lo a chhâ chu a ni e. Ani paw'n min theihngilh nghal ngawt ka ring chiah bik lo, ka hre lo le, kei ang lo takin min theihnghilh hmin ṭhak tawh zâwk mai thei a ni.

A message chu ni thum hnuah ka open ta nge nge a, reply erawh ka tum bau lo. Ka rilruah hnawksak min tih thu mawlh kha a ri ring em em a, chu chuan ka mittui a ko chhuak leh nge nge ṭhin bawk. 

Kan inkâr hla viau tawh mah se a zún chuan min la phuar nghet em em a, chutak chu a ni ka chak lohna, theih se chu ka thinlung hliama tinâtu hi ka hrereng hauh lo ang. 

Kâr te chu an liam zung zung a, Aizawl lama ka chhuk a lo hun leh ta reng mai. Putea leh u Mami chuan Sumo Counter thleng min thlah thlap a, putean ṭul ka ti lo chung pawisa min pai bawk a, keini unau tân hi chuan sawiselbo khawpin a fel ka ti lo thei lo. 

Motor chùan hmain ruih lohna damdawi ka ei lâwk diam a, chu chuan ka awm a tinuam khawp mai. Kawng tluanin ka rui lo va, Aizawl pawh kan thleng thla har lutuk lo hle.

"U Nunu" min kotu lam chu ka hawi a, Hannah-i hmel ka hmu zui nghal zat bawk. 

"Nang elo, eng nge i rawn tih?" ka ti ve nghal mai a, MZU daih daiha kan inhmu chu mak ka ti ang reng. 

"Eng vak mah, ka ṭhiante'n kal mai mai ang u an tia" nui paha a tih chuan an rawn kal chhan ka hrethiam nghal mai. 

Rei pawh inbe lovin a ṭhiante bulah a phei leh ta daih a, MZU Campus an rawn fang vel a ni ber. Keini erawh Bus kan chang leh ṭhap tawh a, tun ṭum chu seat ka chang lo leh hlauh a, ka din ngei a ngaih ka ring. Adeline-i ve thung chu u Rosangan a phur haw daih tawh a, an inko 'Rsa' ta nge nge bawk. 

MZU Gate-a Royal enfield bike rawn tlan lut ka hmuh rual chuan mi hriat chhuah ka nei nghal zawk a, mahse amah a ni lo tih ka hre chiang hle thung. Chuti mai chuan ka theihnghilh thei dâwn lo niin a lang, bike rum ri te hian amah bawk min hriat chhuahtir leh nge nge ṭhin a, ka lo hmangaih hman lutuk tawh te pawh a ni ang e.

Hannah-i hnen aṭangin a pa dinhmun pawh a ṭha chho ve zel tih ka hria a, Hannah-i awm dan aṭang hi chuan u Hruaian engmah a la sawi lo tluang zel tih a chiang a, keimah zâwk hian hrilh mai ka duh rum rum ṭhin. Hannah-i lah hian min nêl bawk si a, a mize ngainatawm tak avanga hrilh lo leh nge nge ka ni réng bawk. Nu Bec-i pawh a bang chuang lo, chutiang bawkin ka chhungte pawh!

Thla a liam leh meuh chuan zirlai lamah ka insâwrbing zual hle a, u Hruaia ka ngaihna leh ka hmangaihna erawh kiam nî a awm thei lo thung. Ni tin a zual zel zâwk a, a message ka dawn hnuhnun ber chu ka chhiar nawn leh ṭhin a, chu chauh pawh chuan amah thlahlel ru em em chungin min tinâ vawng vawng thei a ni.

Ka nâ a, theihnghilh ka duh a, ka ngaihtuahna ata vawm bo vang vang pawh ka duh, mahse ka thinlungah hian amah ka hmangaihna a ri lian ber thung si a ni. 

Ni khat chu Hannah-i nen bazârah kan inhmu leh hlawl a, a pa chanchin ka zawh chuan a ṭhat tawh thu leh a ṭawng pawh a rik chhuah ve leh theih ṭan tawh thu min hrilh a, thihpui tham cancer a lo ni hman lo hlauh chu vanneihthlak ka tih pui khawp mai.

"Lo lut rawh" ka nu chuan a ti lang lang a, kan in chhunga lo pen lut mêk u Hruaia hmel ka hmu chiah chu ka thin a phû rang nghal dawt dawt hle. 

"I va'n vâng ve le Hruaia, hna lamah i buai ṭhin viau a ni maw?" ka nu chu ka dem hran lo, kan inṭhen tawh tih hre ve miau hek lo.

"Immm.....tun lai chu hna lam mai bakah buaina ka ngah khawp mai" awmze nei deuh hian a ti sup a, kan ina a rawn lêng ngam leh hrim hrim te chu zak lo ka ti ngei mai.

"Ti khan Nunui nen lo inkawm rawh u" tih leh ka nu chuan thawh a rual a, kan pahnih chauhin sitting room-ah kan awm ta.

Zan dâr 8 leh a chanve a ri tawh a, Lawmtea a room lamah a awm a, ka nu leh pa an room-ah an awm bawk a, u Rosanga erawh a la léng thung a, u Hruaia mawlh chuan ka thin a tirim ru kher mai. A zak lo ka ti, kan inṭhen tawh tih kei tlukin a hre chiang a, biak pawh ka be peih lo. 

"Lunglei chu a nuam em?" amah zâwk a rawn ṭawng chhuak ta nge nge e, mahse engtin nge ka zin tih a lo hriat reng reng ni!?

"Nunu?" a zawhna pawh chhâng lova ka ngawih reng lai chuan a rawn ti leh a, chhan ngaiah pawh ka dah lo hrim hrim.

"Ka lakah i lungâwi lo tih ka hria" a thusawi dan chuan ka rilru a tinâ zual mai mai dâwnin ka hria. 

"I kal lohna turah i rawn kal palh niin a lang" ka ti deuh salh a, ka ṭawng dan chu mi â ni lêng tân lo chuan haw vang vangna tham a ni.

"Enteh Nunu" ding uaiha min rawn pan a tum chu

"Min hnaih miah suh, haw rawh, ka lo thlah ang che" ka ti hmawk hmawk a, mi dangin an lo hriat phâk ka hlauh avangin ka ṭawng ring lo hle. 

Ding chunga min en vung vung lai chuan ka tho tharh a, kawngka lam panin pâwnah ka chhuak a, ani pawh a rawn chhuak ve nghal mai bawk. Pâwna kan awm ve ve hnu chuan luh leh nghal mai ka tum a, ka bânah a lo chelh chat a, rang zet hian ka phih deuh sawk a, a awm dan chuan ka thin a tirim zual tak zet! 

"I awm dan hi ka hrethiam hauh lo" min en run chung hian a ti sup a, chu thu chu ka sawi tur ni àwm zâwk tak a ni asin maw le.

"Kan tawp tawh tih i hai der lui a ni mahna, nge ni a, keini pahnih inkârah hian engmah a awm tawh lo tih ka hrilh nawn kher zâwk dâwn che?" ka ti hlak hlak a, kan awm dan chu ka kham hluah hluah. 

"Ni lo, i hre sual, kan la tawp reng reng lo, tu thuin nge kan lo tawp ringawt a?" min rawn din hnaih sauh a, kei ka lo tawlh hla thuai thung.

"Hetiang em em hi chu i nih ka ring lo asin le, a ṭha e. Ka'n hrilh ṭha leh ang che, kan inṭhen tawh, chu vangin lo kal tawh suh, ka hmu duh tawh lo che" ka ti leh ta tawn tawn a, ka dar tawn tawna a rawn hmer chiah chu ka sa pup pupin ka hria. 

"Khang thla kal ta chhunga ka awm dan kha dik ka ti bik miah lo, i lakah lék phei chuan, mahse kan inṭhen tihna erawh a ni lo. Inngaihtuah ka ngai a, inngaihtuah nân hun ka hmang ral mai chauh zâwk a ni" vin hauh si lo hian a ti nghet charh charh a, a mi vawnna ata chu ka tal chhuak rang nghal hle. 

"I tân chuan ka hnawksak mah mah" tia inher ka tum chu ka bân rekah tak chelhin min kuai her lâwp a, min kuah chu a ni nghal der. 

"Min thlah rang rawh!" tal chhuah ka tum nasat pôh leh min kuahna a ti nghet zual a, ka mittui chu a rawn hnâm ṭiam ṭiam a, a hmuh laia ṭah erawh ka hlau hle thung.

"U Hruai!?" ṭah chhuak aw ṭiau hian ka ti vak a, ka tal chhuak thei bawk si lo, ka thinlung chhung a nâ bawk si, awm ngaihna ka hre lo a ni ber. 

"Ka thiam loh tam tak a awm tih ka hria, mahse nang leh kei hi kan la inṭhen reng reng lo" dam thluama a rawn tih chuan a bân puamah ka seh ta tawp a, chuti lo zawng ka tal chhuak thei hauh lo ang.

"Mi tihnât i lo thiam hle mai, hetiang hian ka nâ leh si dâwn tih hria ila chuan ka hnaih miah lo ang che" ka ti ta thlawt a, zawhna mitmeng nena min rawn pan leh a tum chu

"Khawngaihin haw rawh" ka lo ti thuai a, ani pawh a ding deuh chat bawk. 

"Kha zan, i tâna ka hnawksak ṭhin thu i sawi zan aṭang kha chuan nang hnaih leh che hi ka duh tawh ngai lo, chu vangin haw la, min rawn hmuh tum tawh lo la, kan kawng ve ve zawh tawh zâwk ang" mittui tling pama ka tih leh chuan mak tih hmel tak hian min en a, ka ṭah a chhuak lutuk chu ka nui lui hak ringawt. 

"Chutiang thu chu vawi khat mah ka sawi áwm ka hre lo, i hre sual a ni ngei ang" ka mittui a baw ta nge nge, engtin nge hmaichhanah ngei dâwt chiang lutuk a sawi theih zâwk!? 

"Ngaithla teh, khami zan khan ka rilru a hah êm avangin zû ka lem sek a, ka lo kâi deuh a ni mai thei" ṭawng tuma ka án zuau lai chuan a rawn ti ta mawlh mawlh mai. 

"Va haw tawh rawh, insawifiah hranpa a ngai tawh lo e" ka aw chu a chhuak chang chang a, min rawn din hnaih deuh sawt tih hmuin hre vek mah ila lo dan pawh ka tum tawh lo. 

"Ni lo, kan inkâr hi sawi fel a ngai" a kut hrawl taka ka biang tawn tawn khuap chungin a ti hniam sup a, ka mittui a rawn luang chhuak leh ta nge nge.

"Eng thil chu nge sawi fel i la duh cheu a? A chiang viau tawh lo em ni?" beidawng aw zet hian ka ti sep a, min rawn fawh a tum chu ka tal leh ta phat!

"Ka hua che, ka haw lutuk che! Haw rawh, min rawn hmu tawh ngai suh!" ka ti vin tuarh tuarh a, ka thinrim lutuk chu tu mitmei leh beng mah ka zah zo tawh lo.

"Zanin atân chuan tâwk phawt rawh se, ni dangah kan sawi ṭha leh ang, engkim kan sawifel ang" a aw chu a khauh sâwt ta viau mai. 

"A teuh lo, engmah sawi fel tur a awm tawh lo" ti hlawk hlawkin kan in lamah ka pen phei pâwk páwk a, ṭah ka insum nasa lutuk chu ka tawt vekin ka hria. 

Room-ah lutin khumah chuan ka bawk zui nghal thlawrh a, a tlan chhuak thawm ka hre chiah phei chu lukhamin ka beng ka hup vak a, min tinâ tur bawka min rawn pan chilh ngat chu ka haw ngawih ngawih! 

A tir tê aṭang khan lo hre lâwk ila chuan ka hnaih lo ang a, kan inngaizawng lo ang a, a tân pawh hnawksak ka ni lo ang a, ka hmangaih miah lo bawk ang.

Ka mittui chu a sûr chawl lo va, a thusawi zawng zawng ngaihtuah lêtin ka thinlung a rum a, a nâ nawn awn awn a, thinlung leh tih tak zetin hmangaih hman lo ila chuan hetiang em em hian ka nâ lo ang maw lè. 

Ka chhungte'n ka thawm an hriat palh hlau zetin thawm chu ka dim hle a, 'engati nge zanin khan kan inṭhen tawh thu ka lo hrilh tlang vek law law loh le?' te ka ti rilru hnuhnawh bawk a, tunah chuan hrilh tlang vek a ṭhain ka hre tawh! 

A tuka MZU bus Adeline-i nen kan chan dun lai chuan kan bul lawkah a bike nen a rawn ding a, min bia a, min thlah a tum thu a sawi bawk a, mahse engtin mah ka chhâng lo. 

Adeline-i phei chuan mak a ti nasa, a en phawk hrâ a, Bus lo thlen rual rualin rang zet hian ka lut nghal thuai a, u Hruaia lam reng ka ngaihsak tawh lo, ngaihsak a phû paw'n ka hre lo.

Adeline-i bulah pawh nizana a lo kal thu leh kan inbiak dan engkim ka hrilh vek a, min tha nâtpui ve khawp mai. U Rosanga bulah erawh sawi rih lo turin ka hrilh thlap thung a, a hriat ka duh lo pawh a ni lo, hre rih lo se ka duh vang zâwk a ni. 

Chawlh kâr kan hmang zo va, kan ina u Hruaia a rawn chùan kâi tâk fovah chuan u Rosanga paw'n mak a ti deuh a, min la zawt dawt lo nà chu kan inkawp rem leh tawhah a ngai ni maiin ka hria. 

Hmaichhan mai bakah phone kaltlang paw'n u Hruaia chu lo kal tawh lo turin ka ti a, min hmu tawh lo turin ka ti bawk a, mahse awmzia a awm tam lo hle thung. 

A sawi tam ber ṭhin chu insawifiahna aiin 'ka tihpalh' tih a ni a, kan inṭhen hnua a rawn lén hmasak ber zan kha tih lovah chuan kei ai a ṭawng tlêm zâwkah a ṭang ta ngar ngar a, kei erawh ka rilru a la dam thei lo tluang zel a, kum lamah a naupang zâwk mah ni ila zah miah lova ṭawngkhum pawng pawng châng ka ngah a, inthiam lohna pawh ka nei chuang lo, a phû tâwk chiahah ka ngai hmiah!

Thla a liam a, kan semester exam result pawh a chhuak ta! Ka rin ai ka lo tiṭha daih a, ownword ti tiha chhâng kha ka ni a, mi dang aia ka tih chhiat hle ka rin tehreng nen ka result chuan min tihlim lehling hle. Adeline-i pawh a pass ve a, u Rosanga nen an han lawm dun vel ngei leh ta nghal a, ṭul lo ti tak ka ni!

"U Nunu, i buai em?" phone call ka pick up rualin Hannah-i chuan a rawn ti a, eng thil tak sawi leh ang maw!

"Buai em em lo ve, eng nge ni ta?" pangngai deuh hian ka ti ṭha ve mai a, ei rawng ka bâwl zo chiah a, ka awl lai tak a ni nghe nghe.

"Eng lo a nia, ka pa'n a hmu lawk duh che a, tunah hian in in kawtah kan awm mêk a, i buai loh chuan i lo chhuak zawk thei ang em le?" inthlahrun hmel deuh hian a rawn ti a, chháng lawk lovin ka ngawi deuh vang vang a, dik tak chuan u Hruaia leh a chhungte nena inhmuh zen zen chu ka phur fahran lo a ni. 

"I buai chuan kan ti lui miah lo che a nia aw, ni dangah a ni mai" Hannah-i chuan a rawn ti leh a, min tihbuai a hlauh hmel hle bawk.

"Ka lo kal ang, mahse ka rei hman ka ring lo" ka ti ve ta nge nge a, pa Dinga ber kherin min hmuh duh lo se chu ka kal miah lo ang. 

"Aw le, kan lo nghak ang che" a rawn ti thuai a, a aw aṭang chuan a thaw a ven huai hmel hle.

"I ngaihzawngpa kha em ni?" tiin ka chhuak tur chu u Rosangan min lo be ding a, min en chik ngar ngar hle bawk.

"Ni lo ve, ka rei lo ang" tih leh chhuah ka rual nghal a, pâwn ka thlen chuan Hannah-in a bân min lo vai khum lauh lauh a, car seat hma lamah chuan pa Dinga pawh a lo ṭhu ngei e.

Kan in aṭanga hmun hla vak lo leh hmun fianrial deuh hlekah hian min kalpui a, driver leh Hannah-i chu car chhungah an ṭhu a, kei leh pa Dinga erawh inbe turin kan kal hrang thung. Dam ṭhat hmel viau tawh mah se a la lang cher ang reng hle a, a hriselna pawh a la pan ruk viau ka ring.

"Engkim hi ka thiam loh vek a ni asin, chu vangin ka fapa hi dem lo hram la ka duh" ri chang chang hian a rawn ti a, a aw chu a thâm deuh chhal bawk. 

"A têt lai aṭang tawh ka tiduhdah thei em em a, zû ka ruih apiangin ka vuak loh leh ka bêng a, Tea tân hi chuan 'pa' tia sawi tlâk leh ngaih tlâk ka ni ngai lo, min hua pawh hi demna tur ka hre lo" muang ban charh hian a rawn ti leh dap dap a, a awm dan aṭang chuan ṭawng rik a la harsat rih deuh mah mah chu a ni e.

"I dam ṭhat hunah kan sawi thei tho a nia" ka tih phah ta réng a, amah ka ngaihtuah vang a ni pakhat. 

"Tunah hian in inkâr a ṭha lo hle tih ka lo hria a, a nu leh a nau hi chuan an la hre chiah lo. In inkâr buai chhanah hian min puh theihna tur a tam tehreng nen min puhna awkâ pakhat mah a chhhak chhuak lo va, mangang leh talbuaia ka siam avangin thla khat chuang a awm bo tawp a, rilru siam fel tawh a duh a ni ber" a thu rawn sawi leh chuan u Hruaia min ngaihtuah chhuahtir zui nghal zat!

"Dam lo leh bawihsáwm ngaia ka awm lai khan ka thinlung chuan a mamawh a, mahse ka kâ hian ka mamawh thu a chhak chhuak ngam lo thung a, a laka ka lo chet ṭhin dan zawng zawng ngaihtuah phei chuan phut ngam tur ka ni lo hrim hrim" tia chawl deuh vang vangin

"Khatia zai hial ka ngaih lai khan engkim, ka mamawh zawng zawng, a ṭul zawng zawng leh tihfel ngai zawng zawng a buaipui vek a, chiang takin ka hre lo ná chu nang nena in inkawp hnu hian a mizia a danglam nasa hle a, min buaipui chhanah pawh khan eng thil emaw ni tak chu i tih ka ring" a tih zawm leh a, kei erawh sawi tur ka bangbo rih khawp mai.

"A hriat lovin ka enthla ru reng zel a, a ngai pawimawh hle chein ka hria; keini a chhungte ai paw'n" chutiang êm chu a nih ka ring chiah lo. 

"U Hruaia nen hian kan inṭhen fel tawh alawm, ka hrilh tlang law law mai ang che" ka tih chuan min rawn en nghal vut a, mak a tih hmel ang reng hle bawk.

"Keimah avang hian mahni inrintâwkna a tlachham a, mi rin pawh a harsat hle. Thil a tih dâwn reng rengin a ngaihtuah lâwk phawt a, mi pangngai chung fê ni tur kha chutiang mî ah chuan ka chher chhuak ta thung a, mahse a nuna i lo lan hnu hi chuan zawimuangin a danglam ka ti lo thei lo" ka thusawi nena inzawmna nei miah lo chu a rawn sawi zawm leh a, ka lo ngaithlaksak tawp ringawt.

"Ka hrilh duh che chu, ni lo, ka ngen duh che chu ti zâwk teh ang. Ih e...a mizia leh a chak lohna zawng zawng hre chunga ka fapa hi i hmangaih a nih chuan ṭhen hlen lo la, mahse i thinlungah khan Tea i hmangaihna a la piang lo a nih thung chuan ṭhen hlen law law zâwk ang che" chu thu zet zawng chhung ril lam thlenga min fan rawih rawih thei a va ni chiang êm.

Ka en ngai en reng chungin ka ngawi tlawk tlawk a, a hma khan sawi tur ka hre vak lo kha a ni a, tunah lék phei chuan hre lo lehzual tak ka ni, ka rilru leh ngaihtuahna pawh a ruak vekin ka hria. Car inhùnna lama phei a rawt a, ṭawng thei lo ang mai hian ka zui phei a, car chhunga kan chùan luh hnuah pawh ka la ṭawng chuang lo. 

Tlai boruak dai deuh raih chu zanin a rawn luah lan a, zanriah kan ei lai te chuan ka ngaihtuahna ka kawm nasa hle a, ka chaw ei pawh a tui thei lo. Ka kham hmasa ber ta réng a, zan dâr 7 leh a chanve pelh hret velah u Hruaia a lo lêng a, ka pa nena an titi dun lai te chuan ka en reng a, ka rilru a insualin a inbuk nasa kher mai. 

Pa Dinga min ngenna kha ka bengah mai ni lo ka thinlungah nen lam a châm reng a, a inthum nawn tluk tluk a, chu chuan ngaihtuahna chi hrang hrang min puttir bawk. Zanin la lá hian sawifel vek ila a ṭha ang, rilru buai reng renga ni tin hun hman hi ka kham tawh, ka kham tawh tak zet!

End of Chapter 10