LOVING YOU A MILLION TIMES By Havali Adam (CHAPTER 3)

LOVING YOU A MILLION TIMES

By 

Havali Adam

Chapter 3

"Friday zanah eng nge i tih ang?" thum chhal hian a ti hniam ruih a, thin phu dep dep chungin ka melh chho rál a, min lo en chiang khawp mai.

"Ka...eng lo...ka hre lo" ka ti bah deuh nawk a, kan indin hnaih ṭha bawk si nen ka zâm lutuk chu ka awm dan aṭang paw'n a hriatthiam vek ka ring. 

"Khawiah emaw min chhuahpui duh ang em?" a tih lêk phei chuan ka buai zual a, ka kut a chelhna tal chu thlah tawh se a zia tur, a thlah duh der bawk si lo. 

"Ka hre lo" tleirawl zakzum lutuk leh ṭawngkam thiam lo lutuk ang mai hian ka aw chhuak reng reng chu a rualrem lo em em a, a bul ber chu ka zâm êm a tin a ni! 

"Thil hrilh tur che ka nei a, mahse zaninah ni lo, chumi zanah chuan ka hrilh zâwk ang che" a tih lai te chuan a lam ka hawi chho duh tawh lo, ka en ṭha ngam tak tak chuang lo.

"Va lut tawh rawh le" duat aw zeta min biak leh chuan ka melh chho thuak a, rei en ngam lo mah ila a mitmeng aṭang chuan a nui deuh suk tih ka hrethiam nghal vek!

"Mut tui aw?" ka kut a thlah fel hnua a tih leh chuan ṭawngkâa chhâng tawh lovin ka buk khum zeuh ringawt a, ka kal sawn zui nghal ta nal nal bawk. 

In chhung ka lut chu ka room-ah ka tlang nghal a, ka thin phut dan pawh a la pangngai lo hle. Ka kut chu ka en leh vang vang ṭhin a, u Hruaia kut hrawl leh lûm nuam zet tawhna kha a la châm reng ni mai te'n ka hria. 

Alu papâwr ka ei lai te chuan ka rilru leh ngaihtuahnaah thil dang a leng tawh lo, u Hruaia ngawt ngawt ka mitthla a, ka ngaihtuah bawk a, a va han pà hliah hliah tak! A thawmhnaw hak te kha a inhmeh bawk si, a ta bik liau liaua siam ang mai alawm le a nih le.

Khumah mu meng karin u Hruaia nena kan awm dan leh kan inbiak dan chu ka ngaihtuah leh neuh neuh a, ka suangtuahna vak vel chuan mut pawh min timuhil thei lo. Dâr 11 vela muhil fel diam tawh ṭhin kha dâr 12 ka meng thleng ta hial a, eng dang vang a ni lo; u Hruaia vang a ni. 

Chu bakah a thil sawi khan ka ngaihtuahna a chen chilh reng a, 'eng thil nge min hrilh a duh chu ni ang le?' tih ngaihtuah reng reng minute tin ka hmang ral a, hriat loh kârin hun a lo liam chak duh khawp. Friday zan mawlh chuan ka rilru a luah ta ber a, hun lo la thleng tur ngaihtuahin ka men rei phah ta zêk bawk. 

A tuka ka class kal te chu ka lû a rit bûr a, Adeline-i ṭawng zet zet ri te chu ka hne lek lek ṭhin. Zirtirtu te'n class an rawn lâk lai paw'n ka muthlu lo chauh a, mut ka kham thlawt lo a ni ber e. Kan haw lamah erawh tlêmin ka harh ta deuh a, mahse ni dang chu la pha lo tak ka ni! 

Kan in ka thlen rualin ka mu nghal daih a, chhin sek ka tum kha a ni a, ka lo muhil tlang daih chu niin, zanriah ei dâwnah ka nu'n min rawn kai tho lo se chu ka muthilh tlang vang vang ka ring. Ka chhungte chuan ka dam lo emaw an ti phah leh nghal a, pangngai takin mut ka kham loh thu chu ka hrilh ta ringawt bawk. 

Thursday kan hmang ral a, chhun leh zan a ral hnu chuan Friday pawh a rawn thleng chhunzawm nghal zat a, mahse u Hruaia hnen aṭangin engmah ka hre leh tawh lo thung a, phone number kan innei tawn bawk si lo nen hmaichhana kan inhmu leh te a nih ngawt loh chuan tih ngaihna vak a awm lo hle. 

Nilêngin ka rilruah zan lama kan awm dan tur mawlh chu a awm reng a, min hrilh lâwk tawh miau avangin beiseina chhe tê tal a neih loh theih loh a tin a ni! Ngaihtuah ngawt ngawt erawh ka duh bik chuang lo, inhmelhriat satliah mai chauh kan ni a, han duh ru viau teh mah ila atân engmah ka nih loh bakah ka tân engmah a ni bik chuang lo tlat. 

Friday a nih ang ngeiin chawhnu class kan nei lo va, kan haw hma hle a, Adeline-i nen chuan bazârah, kan dawrah kan pêng kawi nghe nghe a, u Rosanga hna bâng a rawn pêng kawi bawk a, enga mah hmain ka ṭhiani leh ka û chu an inhnial leh nghal ringawt tawh! 

A tawpah phei chuan Adeline-i zâwkin haw a rawt ta hial a, ka hawpui tawp ringawt bawk, kan awmho reng a nih chuan an inchhâng thinrim leh tak tak thei mai ang ka ring. 

Kan vêng kan thleng a, Adeline-i chu rawn lut kawi tawh lovin a haw tlang nghal a, kei erawh kan in kawta lo ding pa avang chuan ka ding chiang ngei mai.

"Ka lo kal a" a ti tawi dut a, a aw chu hriat a nuamin a dam viau bawk. 

"Zanin chu engtin nge ni ang?" nui suk pah hian a tih zawm leh nghal zat a, min rawn din hnaih sauh leh nghal.

"Eng nge kan tih ber dâwn a?" melh chho kiau paha ka tih chuan

"Dinner min eipui turin ka duh che Nunu" a rawn ti ta mai, chutiang thu a sawi chu ka beisei lo hrim hrim, ka beisei lo tak zet a ni. 

"Âaaa" sawi tur hre em em chuang lo hian ka ti deuh vawng vawng a, amah pawh ka en tawh lo. 

"Engati nge? I duh lo em ni?" a rawn ti nghal thuai a, kan mit chu a intawng nghal zat bawk. 

"Chutiang pawh a ni lo, eng lo, ka zak e a!" ka ṭhiante bia ang mai hian ka ti ta ringawt a, a nihna takah chuan ka zak miau alawm le, mahse min haw lo tih ka hriatna chuan ka thin phut dan a tidanglamin min tihlim ru viau lawi bawk si.

"Dâr 5 leh a chanve velah ka lo kal ang, ka lo lam dáwn che a nia" a ti tlang nghal leh ta riap mai. 

"Zahna tur a awm lo" ṭawng tuma ka àn zuau laiin a rawn tih zawm leh nghal a, ka rilru leh ka sawi tum a hria a ni chêk ang chu! 

"Âaaaaaa" ka ti leh vawng vawng ringawt a, chhan dan tur ka baihvai tawh tak zet a ni. 

"Hlauthawng suh Nunu, engmah i tâna thil pawi a thleng lo ang, min ring tawp rawh" ka kuta vuan chung hian a rawn ti sup a, a mi vawnna chuan ka taksa a khawih danglam hneh leh khawp mai.

"Ka lo lam ang che" ti dam leh dapin ka kut a vawnna chu a thlah a, a nui zui suk a, za lo zet hian ka lo nuih lêt ve ringawt a, a bike a tih rum vut vut lai te chuan ka en reng a, hmun dangah ka mit a fu thei rih lo a ni ber e. 

"A nih aw" a tlan chhuah dâwna a rawn tih chuan ka lo buk khum nghat a, a tlan liam thlengin ka en zui vawng vawng a, ka hlim nge hlim lo pawh ka hrethiam rih lo. 

Khua a thim det det ang tih àwm velah min lam turin a rawn kal ta ngei a, tun ṭum chu kan in chhûngah ngei a rawn pen lut ve tawh a, ka chhungte hmai chu zah ru tak ka ni! 

Ka ngaihzawng emaw an ti nghal vek tih an mitmeng aṭangin ka chhiar thiam nghal a, hawihhawm tak leh phal loh theih ni miah si lo hian u Hruaia chuan ka nu le pa hnenah min chhuahpui a dil thlap a, ka lo zak ru chem chem thei. 

Ani erawh zak miah lo ang mai hian a awm thung a, chhuak tura ka insiam lai te chuan kawr hak tur ber pawh ka hre lo, mawi loh ka hlau si, mahse inchei lutuk leh nalh tum lutuk anga ka lan ka hlau leh bawk si a, ka insiam rei phah hle bawk.

A bike-a min phurh lai te chuan thil dang daih ngaihtuahin 'khawiah nge min hruai a tum lé' tih ringawt chu ka rilruah a awm a, a mipa rim nam chêk chek hip reng chu a nuamin a ngaihṭhatthlak ka ti ru viau bawk. 

A bike khalh te reng reng chu a dam em em a, a nghet churh a, han insawh dawt emaw pawh a awm lo hrim hrim a, ṭum dang ang lo takin leather jacket a ha miah lo bawk. 

Boruak a uap deuh churh bawk nen T-shirt nghawng nei, a pawl dal rawng, mahse rawng duma inrin ṭial si hi a ha a, a thawmhnaw inbel chuan a taksa lenzia leh chhah ṭhatzia a tilang chiang zual hlein ka hria.

Bazâr tlan pelin Chanmari lamah min tlan phei pui zel a, khua a la thim famkim chiah lo nâ chu kawng sira dawr te chuan light an chhi êng fur tawh hlawm a, motor vei vâk leh insul pel pawh kan tam viau mai. 

Muang mara kan tlan char char hnu chuan Hotel Regency zawnah min dinpui a, a bike rih hmel zet a hùn ṭhat lai chuan hmun dang hawi sawn lêk lovin ka lo thlir reng a, a che vel vel hrim hrim chu a hmuhnawm ka ti dâwn nge pawh ka hre lo, en loh a har ti ila a sual lo ber ang. 

"Lo kal rawh le" ti dam dapin min rawn en a, inhnaih zet hian kan kal dun a, Mizo hmeichhiaah chuan a zahpuiawm loh tâwk vela sâng ka ni na chungin u Hruaia erawh ka la chen lo nasa mai, feet 6 a tlin loh paw'n a tling ṭep ang ka ring.

Hotel Regency chhunga Restaurant pakhat, changkan hmel zetah chuan dinner ei dun turin ṭhuthmun kan siam fel a, engkim chu a lo ruahman lâwk vek a, ei tur erawh ka ei duh zawng a hriat loh avangin kan chah deuh thlap a, ka zirlai lam min zâwt tih loh chu kan inbe mang lo a tih theih ang. 

A châng leh kan mit intawngin kan innuih leh ringawt ṭhin a, kan inhaw lo ve ve tih ka hriatna chuan engtin emaw ni hian ka àwm dan a tizângkhai viau bawk. 

Tin, a hmel, a rim leh a inthuam dan mawlh chuan a tilang ṭha zual ngawih ngawih ka ti lo thei lo. Hmui hmul leh khabe hmul nei mah se mi dangte anga buk chhep chhup leh balh hmel zet a ni ve hauh lo va, a fai em em zâwk a, chu tak chu ka mit làtu pakhat a ni. Kan ei tur chah lo thlen hmâ zawng chuan a tua ma'n phone kan inkhawihsan lo ve ve a, biak erawh kan inbe tam lem lo rih khawp mai. 

Sawi tur ván leh ván loh chu thuhran ni ta se, ka zak em em pawh a ni lo, ka lài ru tlat a, ka ṭawng sual palh ang tih ka hlau a ni ber. Minute tam a liam hmain kan thil ei tur pawh an rawn dah ta, a tui hmel hlawm em em leh nghal. 

"Ei ṭeuh rawh, zak lo la, ka bulah chuan zah a ngai lo" tia min biakna chuan ka rilru a dek thla vawng vawng a, he pa hian awlsam taka mi thunun theihna hi chu a nei chiang alawm! 

"Nang pawh ei ṭeuh rawh" ka tih chuan a lo bu nghut a, ka aw ka thian zui kharh a, ka hmaa ei tur tui hmel zet zet te chu rei pawh en lovin ka ei zui nghal bawk.

"A tui em?" kan thil ei laia a rawn tih chuan

"Tui lutuk" ka lo ti hliai a, a tui mai bakah ka mood chu a fuh vel vek a, dik tak chuan ka hlim a ni. 

"A ṭhat chu" ti supin ani pawh chuan a ei zawm ve leh ta mual mual a, a zawhna min zawh apiang chu ṭha takin ka chhâng zel a, kei paw'n zawhna ka zâwt lêt ve nûal ta hial bawk. 

Thil chi hrang hrang kan han inzawh chhoh zel tâkah chuan Mizoram School Of Photography neitu a nih thu chu ka hre leh ta zel a, camera a lawm danah ni àwm reng pawh a lo ni e. 

A tira inbe lumlâm vak si lo kha thil kan ei dun tâkah chuan kan inbe tam ta viau a, a ṭawngkam hman dan te, a chet dan phung leh tawi têa a vei nui suk ṭhin te chu a hmuhnawm ka ti thlawt, zep thu cheng lo, a bula awm chu nuam ka ti tak zet a ni. 

A hnathawh ni se va hriatthiampui pha chiah lo mah ila a dangdai ka ti a, a ṭhat leh ṭhat loh pawh ka hre em em chuang lo, a awm dan zahawm khup lo leh nèlawm tak taka min biakna te chuan min tinêlin min titlângnél zual niin ka hre ta ber mai. 

Dinner kan ei zawh meuh chuan ṭhian inkawm ngeih tak te pawh kan ang tawh zâwk, a bikin ka ṭawng duh sâwt em em a, ani chu a ngai reng. A nèlawm a, hmeichhia zâwk na nâ na chu ka ṭawng duh par par ta khawp mai. 

Kan awm dan tê chu a hlimawm reuh ka tih mai bakah a bula awm hrim hrim chu a thawventhlak a, ka záng vah ni mai te'n ka hre hial bawk. Kan vêng lamah kan inphur haw leh ta hna hna a, kan inbe leh tawh miah lo va, inbiakna hun pawh a ni chiah lo. 

A hriat hlau zetin a taksa chu ka hnaih tial tial a, a kawr rim pà tak ka hnim rual chuan ka nui ver ver a, ka thil tih leh ka awm dan chu rawn hria se zawng mawl min ti ngawt ang, mahse  bike a khalh tlat a, a rawn hriat ka ring lem lo. 

Kan in kawt kan thleng a, a haw nghal daih dâwn emaw ka tih laiin in chhung lamah min zui lut thung a, mahse pawi ka ti miah lo. Ka chhungte nen pawh an titi thei viau a, thingpui ka lùm lai te chuan u Hruaia chu ka en leh veng veng ṭhin, a pà chiang a ni! 

Mipa hmelṭha tak han tih tur chî chu a ni hran lo, mahse mitthlaa châm zui vawng vawng thei hmel a nei tlat lawi a, a lam ka hawi loh lai paw'n ka mitthlaah amah tho a awm a, dik tak chuan ngaihtuah loh theih pawh a ni lo. Thingpui ka sem chu ka'n che sual teuh em em leh nghal a, insiam ṭha vat hman lo ila chuan ka che chhe duai ngei ang ka ring.

"Zanina ka chhuahpuina chhan che kha i hria em?" pâwna kan awm dun hnua u Hruaia zawhna chu ka bo deuh hû mai. 

"Hre miah lo" ka lo ti ve mai a, a bike bulah kan ding reng tawh na chu haw a la tum chiah lo a nih hmel.

"Chhan a awm alawm, ka sawi hmain i phone ka lo hmang lawk ang chù?" a rawn tih zawm teh daih a, ka phone chu ka pe ve nghal mai bawk. 

"Kha lè" tiin ngawi renga a khawih mual mual hnu chuan ka phone chu min rawn pe lêt a, eng thil nge a tih pawh ka hre lo e a! 

"Eng nge?" ka kut lák sawn zui nghal mai ka tum laia a vawn beh deuh tlat avang chuan hamhaih aw lek lek hian ka ti thawr a, min la din hnaih sauh zui!

"Min haw lo tih ka hria" inring tâwk taka a tih chuan a hmel ka enna ata ka mit chu ka là sawn rang hle a, ka zak chem chem a ni ber.

"Chutiang bawkin kei paw'n ka haw lo che a, ka hmeichhe duh chî tak i ni bawk" a tih zawm leh nghal zat phei chu ka thin a phu dep dep a, kan mit pawh a intawng leh ta nge nge.

"Ka hmuh nî aṭang che khan ka thluak chhungah hian i awm nî tin alawm Nunu" nghet charh hian a rawn ti leh a, a aw a nghet viau e ti lo chuan a dam ruih tho bawk si. 

"Min en teh le" duat hliah hliah ni mai àwma min biak leh chuan ka hawi chho hâ a, ka zâm dan chu pui tak a ni. 

"Vêi loh theih loh ang mai hian ka vêi che" ti thum chhalin a rawn kun hniam tial tial a, a thil tih tum chu ka hre chiang alawm, mahse dan tumna pakhat mah ka nei hauh lo thung. 

A hmui lûm thar tharin ka hmui a rawn si chiah chu engtin emaw ni hian ka awm nghal uaih a, ka kut ka hum ruh em em ringawt. Inla hrang deuh datin a hmaa aia chiang leh dangdai zâwk hian min rawn fawp leh ngat a, mipa ka vawi khat fawhna ni tawh miah lo mah se ka vawi khat fawhna ang maiin ka awm dan chu a khawr vekin ka hria. 

Ka hmui bawhthuah zawnga a hmui lûm ham ham a chettir lai te chuan engkim chu a reh duk te'n ka hre hial a, chutiang taka dawnsawn dan thiam hleih theih loh khawpa dangdai leh danglam chu ka nunah ka la tawng ngai lo.

"Ka suangtuah ṭhin dan ang ngei a ni" ka hmui bul cheta thaw lum ham ham chung hian a ti hniam ruih a, ka zâm lutuk vang nge pawh ka hre lo, ka tha a khur der der thei nia maw lè.

"I ṭha em?" ka dar tawn tawna chelh run pahin a ti leh sup a, ka awm dan chu a lo hrethiam nghal vek a nih ka ring.

"Immm...ka...ka ṭha" ka lo ti bah nawk nawk a, kan indin hnaih lutuk chu ka thawk dan thlengin a buai phah a, ka taksa chhung lam leh pâwn lam pawh a sa deuh hat hat bawk.

 

"Ka lut dâwn" ka ti leh ringawt a, mi â nilêng tân lo chuan ka zak tih chu hai rual a ni mawlh lo.

"Ka lo bia ang che" a rawn tih lai chuan ka kal sawn nal nal tawh, in chhung pawh ka lut har lo hle.

Ka room-ah ka lut tlang nghal a, ka âwm chu ka dawm vang vang a, ka mipa duh ruk em em nena kan infawp ta mai chu lawm tur nge lungngaih tur pawh ka hre rih lo, ka rilru leh taksain ngai a la awh theih loh vang a ni mahna! Khuma ṭhu thla deuh dawtin ka hmui chu ka khawih den den a, ka en ngai ka en tlawk tlawk a, ka rilru chu hmun hran daihah a awm thung. 

Min fawh a tum lai khan duh chuan ka dang thei reng a, mahse ka dang miah lo kha a ni a, dik tak chuan mipa dang chu ni se ka huat loh leh ka ten ngawt ang ka ring, mahse ani chu u Hruaia a ni tlat a, chutah min duh thu a la sawi zui, ka la pangngai thei rih thlawt lo a ni e.

A sawi lâwk ang ngeiin min rawn be ta ngei a, ka phone a khawih mual mual lai khan engkim a lo khawih fel hman vek tih ka hre chhuak hnuhnawh ve leh chiah bawk. Rei tak kan inbe lo va, hmaichhan êm a nih tawh loh avangin ka thin phu pawh a pangngai chho ta tial tial a, mahse ka la lài ru em em tho. 

Ka rilruah min fawh lai ringawt kha a awm tlat leh nghal a, kan inbiak laia a thusawi ṭhenkhat phei chu ka ngaithla liam puat puat a, ka lakah huangtau sâwt viau mah se amah duhtu tân chuan lo huat theih ni hek lo.

Min vêi thute kha a sawi leh ta nghal a, ka awih chiah bawk si lo, awih lo phal leh chuang bawk si lo ang chî hian ka awm a, dik tak chuan ka duh ve thlawt alawm, a eng lai ber nge ka duh chhan pawh ka hre chuang lo. 'A hmelṭha êm alawm' ti dâwn ila chutianga han hmelṭha uchuak tak a ni chuang hauh si lo, pà erawh pà rem rem tak a ni. 

A khabe hmul leh a hmui hmulin a tilang pà zual a, ka sawi thiam dan ber chuan Action Movie vela a changtupate ang chî hi a ni mai, kan la inhre chiang lutuk lo nà chu insual a thiam hmel em em bawk.

Chumi zan aṭang chuan hmaichhana kan inhmuh kher loh paw'n phone kaltlangin kan inbe chho ṭan ta zeuh zeuh a, amah hlirin min rawn be hmasa ṭhin a, ka mipa duh ruk em emin min lo duh lêt ve tih hriat te, min lo be ṭhin te chu ka hun hman dan tinuamtu leh min tihlimtute zinga pakhat a ni.

Dinner kan ei dun aṭanga kâr khat kan inbiak hnuah hmaichhanah ngei min duh thu a sawi leh a, zawhna min zâwt nghe nghe a, ka tân ani mipa lo hnar chu thil har tak a ni. A laka ka rilru puthmang a hre chiah chu ngaihṭhat hmel deuh hian a awm a, a danglam phah em em chuang paw'n ka hre lo; kei ka danglam nasat tehreng nen! 

U Hruaia nena kan inzui tâkah chuan Adeline-i pawh ka hrilh ve ta nge nge a, a awih duh lawk lo nghe nghe a, u Rosanga a zâwt vel chîam kher a, a zâwt fuh lo khawp mai. 

An han inhnial leh tak tak chu e, nuih loh theih a ni ṭhin lo. Pakhat a ṭawng sei thei si, pakhat lah a ṭawng deuh hmuk hmuk ná a, Adeline-i tân a kha fak zel thung a, hemi te pahnih hi chu kum khua leh chatuan paw'n an inngeih dáwn lo a nih ka ring tawh! 

Awm dun hlek se an inhnial nghal zel a, an incho tâwk dun bawk si, a châng chuan Adeline-i zâwk hian a ngam mah mah ṭhin ka ti ru ve tho, mahse u Rosanga pawh a nghal thiam ve bawk êm a ni.

Zan khat u Hruaia nena kan inbia chu a ṭawng dan a dang hle a, zû rui teh pawh a ang lek lek a, mahse zû a in ngaiin ka hre bawk si lo. 'A bialnu alawm le ka nih tawh le' tia infuihpawrh chawpin ka dawp kual vak a, ka ngaihtuah ru viau nghal a ni ber. 

Chutia zû a in leh in loh ka zawh tâkah chuan zep nei miah lo hian zû a in thu leh tam a in loh thu min hrilh tlang nghal rawk a, dawt sawi lova min hrilh tlang pawp chu a ṭhat tho rualin zû a in tih hriat erawh ka tân a nuam miah lo. Zan dang ai a ṭawng tlêm viau leh nghal a, rei pawh kan inbe lo, a chhan chu ka lungâwi chiah lo tlat a tin a ni! 

Zing kârah erawh a hnen aṭangin morning wish message ka dawng thlap a, message chu ka open ringawt a, ka reply lem chuang lo va, ka lungâwi lo tih hria se ka duh vang a ni pakhat. 

A hrethiam lo nge ni, message emaw phone call pawh a hnen aṭangin ka dawng lo ta vang vang a, zep lo chuan keimah zâwkin dawn inbeisei ru tak chungin ka phone chu ka check chhen a, mahse lungàwi lohna tizualtu mai a ni. 

'Ka duh tih a hriat tawh avangin min ngai pawimawh lo nghal ringawt emaw ni le' tih te chu ka ngaihtuah chhuak ta hial a, thla khat pawh kan la inngaizawng lo nà chungin kan inkârah lungàwi lohna a awm nghal ringawt chu a ni si a, ngaih a ṭha duh lo khawp!

"Hello" ti sepin u Hruaia hnen aṭanga phone call lo lut chu ka chháng a, Lunch Break a ni daih tawh a, ka be châk tehchiam rih lo. 

"Ka lo kal a, thil ei dun ang aw" a aw chu a zàngkhai viau a, a pangngai vek tawh tih ka hrethiam nghal mai bawk. 

"Ka ṭhiante nen kan ei dâwn chiah a, haw leh zâwk mai rawh" ka tih chuan

"Ka lo kal laklawh tawh, in department lamah ka lo tlan mêk, ka lo lam ang che" a rawn ti zung zung a, nizan aṭang tawh a laka lungawi loh sa nen a ṭawng dan chuan ka lung a tidam lo zual kher mai. 

"A ngai lo" ka tih laklawh lai chuan kan inbiakna chu a tawp daih a, mi â ang maiin ka en reng ringawt. 

Call ka tum deuh uk a, ka ṭhulh leh ang lawi a, a rawn kal mêka ka hriat avangin ka ṭhiante sâwmna pawh chu ka hnar ta ringawt bawk. Rei rial lovin u Hruaia chu ka hmu ta ngei a, tarmit dum hi a vuah a, a va han pá leh pek ém, mahse tun ṭum chu nui hmela lo chhawn pawh ka tum eih lo thung. 

Ka kutah a rawn chelh chat a, ngaihṭhat hmel zet hian min en a, a awm dan hrim hrim chu nizan lama thil thleng kan inbiak dan zawng zawng kha hre tawh lo ang mai alawm a nih le. Six Miles-ah min chawlhpui a, kan ei man zawng zawng pek a tum chu ka phal lo va, pek ve ka tum ringawt a, kei lêtin a lo phal lo nasa daih zâwk!

"Zû i in ṭhin tih ka lo hre miah lo" MZU park-a kan ṭhut dun tâkah chuan ka ti ta nge nge a, ka sawi chhuak loh a nih chuan ka rilru a nuam thei dâwnin ka hre tlat lo. 

"Ka in zeuh zeuh chauh alawm" a rawn ti chu ka là nâ em em ringawt a nih chu!

"Nizan pawh i ruih hmel hle kha lè" ka ti deuh salh a, a in tawh miah loh tur thute a sawi ka ring ve a nia, a sawi lo nasa mai bawk si. 

"Nizan kha chu ka thil tawnin a zir lo alawm, i  lung a âwi na nge?" a tih chuan dam deuh zâwk hian

"Âwi náng, enteh u Hruai, zû in mi hrim hrim hi ka ngaina lo a nia, in tawh lo la ka duh" ka ti leh ngat a, a ngawi vung vung a, a en ngai a en reng bawk.

"Engtik thleng nge class i neih dâwn?" kan ngawih vang vang hnu chuan a rawn ti ta daih a, ka rilru erawh a la dam zân lo a ni. 

"Kan bâng har leh ang" tih chauhin ka chhâng a, rei pawh kan inngaihzawn hmâa kan buai dâwn nghal ringawt chu hrehawm ti ru tak ka ni! 

"Ka lo lam ang che, kan haw rual dâwn a nia" a rawn tih chuan

"Ngai lo, bus-in ka haw thei alawm" ka lo ti thuai a, a awm dan aṭang chuan min rawn lam leh tak tak duh dâwnin ka hria. 

"Ka bialnu i ni tawh a, bus-in i haw tawh mai mai dâwn lo" a ti deuh tlat a, nuihza hmel a pu deuh roh leh nghal a, a fiamthu ve emaw ni! 

"Eng nge bus-a chúan chu a pawi vak nà? Ka chûang zak hleinem, chûang zak turin mi lar pawh ka ni lo" ka aw chu a ri deuh hmawk hmawk a, ani erawh a nuih a za zual ting emaw tih turin a awm lo thung. 

"Mipa dangin an melh nasa lutuk palh ang che" thikthu chhiat hmel zeta a tih chuan ka hmui ka lo ti pawrh târh a, a thil sawi chu ka awih thlawt lo.

"I duhawm ngawt mai" ti leh supin a rawn che deuh thut a, ka hmuiah tak a rawn fawp zauh leh nghal, kan awm hrang chiah chu hawi kual nasa tak ka ni!

"Heih! Khatiang khan ti tawp tawh suh, kan awmna a ualau si" ka ti ta ringawt a, nui nghawr dat hian a bân ding lam chuan min kuah zui nghal zat bawk. 

"Ka hria e, i lungâwi lo ti raw?" a rawn tih leh chuan

"Imm...." ka lo ti ve mai a, lungàwi lo miau hek! 

"Aw le, zû hi ka in tawh lo ang chu ka ti dawt thei rih lo, mahse ka tum thei alawm, a ni lo'm ni?" min en run paha a tih chuan ka lo bu nghat a, tlêm chuan ka awm a nuam ta deuh sawt bawk.

"Eng lo, haw hun chu min rawn lam a ngai kher lo tak tak a nia, i tân a buaithlak mai mai" ka tih chuan

"Ka lo lam ang che" a ti deuh tlat a, sawi sawiin awmzia a nei dâwn chuang lova ka hriat avangin ka sawi zui duh tawh ta bik lo.

Lunch break a zawh hnaih tâkah chuan kan department building thleng min thlah leh thlap a, ka rilru pawh kap ru rengtu a awm tawh lo va, ka mood thlengin a pangngai tawh viau bawk. Class kan bán hnu chuan Adeline-i ka hrilh vat a, a lo phal nasa em em leh nghal a, mahse nuam ka ti chiah bik lo. 

U Hruaia pawh hi ka bialpa mah ni se inhruaitir zen zen chî ah ka ngai lo, Adeline-i a bang zel dâwn tlat! Tun ṭum chu min rawn lam a tum laklawh tawh bawk si a, a duh angin ka awm phawt ang a, a dawt lehah erawh ka hnial tawh ngei ngei ang.

Dâr 4 leh a chanve a rik chuan seat chan loh hlauin zirlai naupang chu an phu leh mur mur tawh a, u Hruaia hmel pawh kan hmu har lo hle bawk. 'Min kuah rawh' a tih deuh tlat avangin bike-a kan inphur hnu chuan a kawrah ka vuan ṭai a, kan tlan chhung zawng chuan kuah ni chiah si lo, kuah titih deuh bawk si hian ka vuan char char a, kan in kawt kan thleng chu ka chhuk nghal tharh a, ani erawhin a bike rum ri vut vuta la ṭhu run pah hian min en deuh vang vang a, min tilài chhe ringawt dâwn alawm le.

"Zanah ka lo lêng ang" a tih chuan ka lo bu nghat a, a kut mi vai khum zeuhin kawngpui lam a hawi a, a tlan chhuak zui nghal bawk.

In chhung ka luh hnu chuan ei rawng bâwlin ka buai zawm nghal mawlh mawlh a, ka nu leh pa dawr aṭangin an lo la haw lo bawk nen ei rawng bàwl chu ka tih turah ka ngai hmiah hrim hrim. 

Khaw thim dâwn hnaihah u Rosanga leh ka nu leh pate chu an lo haw rual a, dawr lamah hian buai châng a awm lo thei lo va, tun ṭum pawh an buai deuh a nih ka ring. Lawmtea erawh a lo la haw lo thung a, a ṭhiante nen inkhel turin an chhuak daih a, ka pa'n ko haw tawh turin min ti nghal nghe nghe. 

Zanriah ei kham aṭanga rei lo tê hnuah u Hruaia chu a lo lêng ta ngei a, kan ina min rawn lèn chilh hian nawm dan riau a nei ka ti tlat pek a, amah a puitling sa bawk nen kan inngaihzawn dan chu a famkim bik riau te'n ka hre hial! 

A hmaa ka ngaihzawng lo neih tawh te nen khan khawvel hran hlaka piang ang maiin an danglam a, khang hun lai kha chuan ka rilru a la puitling bik lo hrim hrim a, kan ina min rawn lèn chilh áwm pawh ka hre lo. 

Phone kaltlanga kan inbiak loh leh school-ah emaw college-ah emaw khan kan inhmu mai zel a, tleirawl lai tak tak ang kha a ni a, tun hnu hian ngaihzawng neih intihhmuh chhoh hun lai vel a nih avanga nei ve ringawt ta ka ni te'n ka hre hnuhnawh a, là thutak lo ve tak chu ka ni!

"Ti daih ila, i chhungte hi ka la hmuh àwm pawh ka hre miah lo" u Hruaia nen pâwna kan din dun lai chuan ka ti sep a, ka la hmu miah lo tak tak! 

"Nangmahin in i luah hrang deuh tlat bawk si a, Aizawl mi leh sa dik tak in ni lo zâwk em ni?" ka tih zawm leh zat a, khaw danga a chhungte an awm ka rin vang a ni pakhat. 

"Ni e, Aizawl khaw mi leh sa dik tak alawm kan nih, naktuk chu ka lo hruai hman lo mai thei che, zin thut ka ngai mai thei" a rawn ti ta daih a, mahse kei chuan a chhungte chungchang ka hriat belh châk tlat thung si.

"A nih chuan engati nge nangmaha in i luah hran kher a?" ka tih chuan a ngawi deuh run a, mood chhe nghal vek ang mai hian a hmel chu a la dur khup zui! 

Thla khat dâwn kan inngaizawng ve tawh nà chungin a chanchin hi hriat a mumal ka nei mang lo va, zawh tum ka neih pawh hian kan han awm dun chiah hi chu ka sawi tur zawng zawng a bo duak zel a, a mi hipna ngah lutuk vang leh a bula awm nuam ka tih lutuk vangah ka puh ringawt bawk. 

Tun ṭum erawh kan in chhung a rawn luh tirh phat aṭanga ka rilruaa lo awm ru ran tawh ka záwt thei ta hram a, mahnia in changkang tak luah hrang thei khawpa inchawm zo ni mah se a chhungte ka la hmu miah lo hi ka rilru kaptu pakhat a ni a, amah lah hian a sawi ngai bawk si lo. 

End of Chapter 3