LOVING YOU A MILLION TIMES By Havali Adam (CHAPTER 9)

LOVING YOU A MILLION TIMES 

By 

Havali Adam

Chapter 9

In chhungah lutin Adeline-i chu ka call leh ngat a, a ring ral ṭhak ṭhak a, a pick up duh lo lui a nih hmel. An ina va kal chilha engkim va zawh chian mai te ka duh rum rum a, mahse ka insum leh rih ta zâwk! 

A thu hrimah u Rosanga reng reng pawh engtia duh ringawt nge maw a nih le, a mil lo viau khan ka hre si a, eng emaw tak a awm ka ring, chuti mai chuan a duh nghal tawp lo ang. Adeline-i chu ka call leh ta tluk tluk a, a tawp a tawpah chuan a pick up ve ta hram e.

"Engati nge ka phone call i pick up duh loh luih vel kher a?" ka ti nghal bawrh bawrh a, ani lah chuan

"I sawi tur ka hre sa vek alawm, ka chhâng peih rih lo che" min rawn tih khalh hmak a, hmaichhan êm ni tawh lo mah se zawh chhuah ka tum tho tho. 

"U Rosanga hi i duh ve reng reng em ni?" ka tih leh chuan

"Duh bawk lo, ama'n min duh ringawt a nih khâ" a rawn ti niah niah a, ka nui chhuak teuh kher mai. 

"Awi, nang paw'n i duh ve chiang mai, phâ lo mai teh" tiin ka kamki char char a, a thawk ṭha phian leh nghal. 

"A ni bawk lo aw, hming pathlawia hi ka duh ringawt lo, ka ning, ka dah dâwn!" a rawn ti hlak hlak a, kan inbiakna titawp lo turin ka ti vat bawk. 

"A nih engtin nge in lo awm a? Ka awih lo viau a, mahse in inkârah hian eng thil emaw ni tak chu a awm tawh bawk si, hmaichhana min hrilh loh manah phone kaltlang talin engkim min hrilh vek rawh, chuti lo chu kan inkawm tawh miah lo ang" ka ti ta duah a, tunah chuan mak tihna pawh ka nei tawh lo, a rukin ka hlim viau tawh zâwk a ni.

"Min vau vel suh, ka hrilh peih rih lo che" a rawn tih pawh chuan

"Ka ti tak tak a nia, min hriat chian kha!" ka ti deuh tlat a, thâwk a lá ham ham a, a sawi hreh ve hle a ni mahna.

"A nih, ka sawi ang, mahse theihnghilh leh nghal ang  che" a rawn tih chuan ri lovin ka nui dir cher cher a, theihnghilh nghal tak chu ka theih ka ring lo. 

"Tehreng mai" tih bak ka sawi thei lo, chu pawh chu nuihza aw lek lek hian ka sawi leh nghal a, mahse a hre lo hlauh!

"Bathroom-ah emaw toilet-ah emaw khan lut phawt teh, mi dang hriat ve ka hlau teh a nia" sawi ta mai lo chuan a rawn ti leh tê tê a, ka thil hriat duh tak min hrilh dâwn miau a, a thu ka zawm lo thei lo.

"Sawi tawh rawh" toilet ka luh ruala ka tih chuan

"Sawi chhuak miah lo ang che" ti leh phawtin

"A bialnu nen kan insual a, awi a zahthlak zâwk! Vawi khat MZU-a min hruai ṭum khan min lo hmu fuh a ni àwm a, awi en teh Nunu, a bialnu rapthlakzia chu pui tak a ni! Ni lo lôvin min puh nasa bawk si a, hming pathlawia awm lai rengin kan insual phah ringawt alawm, a chak lo zâwkah a la ṭang zui" a tih zawm nghal bawrh bawrh a, ka nuih a za ru bawk si, mak ka ti tho bawk si, insum a har lam lek lek chu a ni. 

"Engtin nge chutiang thil te ka lakah i zep theih zâwk?" ka aw chu ka tinghet lui a, ka nuih a za tih a hriat vaih chuan engmah a sawi zawm duh tawh dâwn lo tih ka chiang. 

"A zahthlak ve êm alawm, khami nî aṭang khan hming pathlawia nena kan inkâr hi a dik thei tawh lo, a nghal ropui si" a rawn tih leh chuan a thil sawi chu ka ngaihtuah zui rauh rauh a, thil ni thei tak pawh a ni. 

"Tichuan i lo duh ru ve ta em em a" ka ti chiah chu

"A teuh lo, ka duh bawk lo, Adik min ti ziah leh nghal, ngei tak ka ni!" ti hmawk hmawkin kan inbiakna a hmet tawp zui nghal a, ka nui chhuak hak hak a, a pawimawh chin ka hre hman tho va, pawi ka ti tawh lo.

Ka pa in tur thingpui chhùan pahin choka ah ka awm ta reng a, u Rosanga lo haw hun ka ngâichâng ru pah reng bawk. Ka pa chuan a phone a khawih mual mual a, a bul chêtah Lawmtea a ṭhu chial bawk a, ka nu erawh a en duh chî tak a chhuak mêk a, khaw dang a hawi sawn thei rih lo. Kawngka inhawng ri lam ka hawi chuan u Rosanga ka hmu zawm zat a, a room lam pana a kal chu ka zui phei nghal bawk.

"Eng nge?" min hnung chhawn zawngin ding mah se a room-ah ka lut tih a hria a nih hmel.

"Eng lém mah, tak tak a! In lo va'n inthup thei êm ém?" ka tih chuan min bia pawh ni chuang lo hian

"A lo inpuang fai leh vek tawh a ni maw?" a ti sup a, ani pawh hi eng emaw chu ka zawh a ngai, Adeline-i sawi dan kha chuan a duh hmasatu zâwk a ni leh nghal. 

"Engtin nge i duh teh thut a? Awih harsa ka la ti fán mai, i mil loh theih tehreng nen" a kawr lûm hak lai chu a hlip mual mual a, a bialnu hmasa zâwk chanchin pawh kha ka zâwt dâwn khawp!

"Ka duh a ni mai, hriat ve phet tum suh" a rawn ti hluk a, min chhan dan leh a awm dan chuan min tiphur zual sauh thung. 

"A nih engati nge a hmaa i bialnu kha i ṭhen daih a?" ka ti leh chu min melh rum teh e! 

"I hre vek tawh tih ka hria, chhuak mai teh" tih bakin min chhâng lo.

"In mak reuh ê, hetiang teh thut hian thil a thlen ka beisei miah hleinem, mahse a ṭha tho e!" ka tih chuan

"Engtin nge thil i lo sawipui reng reng? A la zak ka tih tawh kha, ka nu leh pate pawh a hrilh chí rih lo ang; Lawmtea chenin" a rawn ti ve leh mai a, khumah a mu zui nghal daih bawk.

"Chutiangin eng thu vak mah ka sawipui lo, a duh loh thu che a sawi hlur a, i duh hmasak zâwk thu a sawi bawk a" ka tih laklawh lai chuan nui suk pah hian

"Nia, ka duh hmasa ngei alawm, nakinah chuan vannei a la inti dâwn lutuk" a lo ti dut a, thil dang daih ngaihtuah hmel hi a pû a, chutah harh chhuak zawk ni áwm fahran hian

"Chhuak tawh rawh, ka mu duh, kawngka kha khar nghet ṭha ang che" a tih zawm leh nghal zung zung a, ani pawh hi a dik bik chiah lo chu a ni e.

"I bialnu hmasa zâwk nen khan an insual tak tak elo?" chhuak ta mai lovin ka ti leh hram a, ka hriat duh ka hriat hmâ chu chhuah ka tum bik teuh lo.

"Sual e, ka hmuh lai ngeiin maw le, khami nî aṭang khan alawm ka duh, a tâwk em? Chhuak rawh le, i ṭhiannu kha lo va ṭawng thlamuan bawk la" a rawn tih chuan

"Ṭawng thlamuan a ngaihna ka hre lo, a ṭul leh nangma'n ti mai rawh, i bialnu a ni tawh tho" ka lo ti ve tlat a, a room aṭanga ka chhuak tur chu

"Ṭawng ring suh Nunu, ka pate'n an lo hria ang e" a rawn ti leh hram a, ngeiawm zet hian ka nuih khum sak a, ka chhuak zui nghal daih bawk. 

Ka room chhunga ka awm chiah chu ka khi ver ver a, an inhmeh phian dâwnin ka hria. Ka phone khawihin u Hruaia hrilh ve nghal mai ka tum a, mahse a buai ka rin avangin ka ṭhulh leh ta zâwk a, ka mut dâwn thlengin u Rosanga leh Adeline-i chuan min tinui a, an inhnial bawrh bawrh ṭhin lai ngaihtuah chhuah tel phei chuan nuih loh theih pawh a ni lo. 

U Rosanga lah chuan 'ka duh' a ti miau bawk si a, mipa rilru nghet tak a ni tih ka hria, ka ṭhiani hi a ṭhen leh mai mai ka ring tawh lo. A bialnu hmasa zâwk kha chu an inngaihzawn lai pawh khan a thutak vak lem lo va, an inzui rei ka ring lo hrim hrim bawk. 

Tuna a bialnu thar erawh ka ṭhian ṭha ber a ni a, an mizia ka hre chiang ve ve bawk a, inngeih loh hmel deuha lang si hian an inmil phian ka ring tlat a ni.

Ni hnuah u Hruaia pawh a phâi zin a rawn haw a, a lo haw zan chuan kan ina lo lêng lovin min lén chhuahpui a, hun nuam tak kan hmang dun a, a pa nena an inkâr pawh ka sawi ri leh zauh ṭhin a, chhanna erawh duhthusam ang ka hmu lo ṭhin hle thung. 

A châng hi chuan min ning ang tih leh ka ti mah mah ang tih ka hlau ve ṭhin tho, mahse a chhungril nun hlim tluantling lo hi ka hmu chiang si a, chu vanga a pa nen an inkâr siam ṭhatsak duh em em pawh chu ka ni! 

Kan inhriat hma fê aṭanga lo inngaina lo leh lo chengho tawh an ni tih ka hai lo, u Hruaia hian kei aiin a pa hi a hre chiang fê zâwk dâwn tih pawh ka hria, mahse an pafaa inhaw kumkhua tur chuan ka ngaingam ngâng lo a ni.

Ni khat chu Hannah-in min rawn call hlawl a, min hmuh a duh thu a sawi nghal zung zung bawk a, ni tin dawra ka kal ṭhin avangin bazâr lama lo kal mai turin ka hrilh a, engtin nge ka phone number a neih pawh ka hre lo. 

U Hruaian a pè ti dâwn ila a pêk a rinawm si loh, a nih lo paw'n u Hruaia phone aṭangin a là ru tal a ni ang. Hannah-i chuan kan dawrah min rawn kal chilh a, a pawimawh thawkhat hle ni turah ka ngai hmiah!

"Hmun dangah kan inbe thei ang em u Nunu?" a tih chuan dawr aṭangin ka chhuahpui ve mai a, ka chhungte hriat chî loh thil a awm a ni mahna.

"En teh u Nunu, u Tea i be tlang thei ém? Nimin aṭang tawh kan be tlang thei miah lo va, tunah hian Ebenezer Hospital-ah ka pa a awm mêk a, a serious ang reng" a tawp lam chu mittui a parawl kuam hian a sawi a, u Hruaia ni lovin a pa zâwk chuan ka rilru a luah hneh rih kher mai. 

"Engati nge i pa chû? Eng nâ nge? A va'n zia lo ve le, in indah luhna a rei tawh em?" ka ti ta zung zung a, ka mitmeng a danglam a nghal vek bawk. 

"A zû in hnathawh a nia, nâtna a ngah lutuk! Doctor sawi dan chuan a BP a sáng hle a, a thin a ṭhat tawh loh mai bakah a lung lam pawh zûin a lo khawih chhe hman nual tawh a, a hrawk a cancer mêk bawk" a thil en ngai en tlawk tlawk chung hian a ti dul raih a, ka mitthlaah u Hruaia pa, pa Dinga chu a rawn lang nghal zut zut a; a fapa ṭhen tura min hrilh lai thleng khan!

"Awi, a va'n zia lo ê, cancer ber chu a la zai dam theih ang em?" ka ti ta ringawt a, a stage a lo sán tawh phei chuan thihna bak hmachhawn tur a awm lo tlat a tin a ni! 

"Ka hre lo, ka hre chiang chiah lo, u Hruaia lah hian rilru a tihah zual si, khawngaihin lo hawtir hram teh u Nunu, i thu chu a awih ka ring" ka kutah a rawn chelh a, ngen tak tê hian min ngen a, ka khawngaih khawp mai. 

"Ka lo be dâwn a nia, nizanah pawh khan kan inbe reng alawm, pa Dinga chanchin hi a hre tawh hrim hrim em?" ka tih chuan lunngâi tih hriat zet hian

"A hriat ka ring chiah lo, ka pa chanchin reng reng hi chu kum tam liam ta aṭang khan a ngaihven ngai tawh hleinem" a ti zawi raih a, hnem dan tur ka va'n hre lo êm, ka tih theih erawh u Hruaia biak a ni. 

"Lo hlauthawng lo la, u Hruaia chu ka lo bia ang, a inah a awm lo em ni? In va kal chilh tawh hrim hrim em?" ka tih leh chuan

"A awm loh vang alawm kan rilru a tihah zual em em, a zin ti dâwn ila a zin dâwn hi chuan phone kaltlangin ka nu a rawn hrilh thlap zel a, mahse tun ṭum hi chu a ngaihna kan hre bik lo" tiin min chhâng nghal zung zung a, a hmela hlauhthawnna leh lungngaihna inlan chhawk zak zak chu hmuh hmaih theih a ni mawlh lo.

Rilru dam deuha awm turin Hannah-i chu ka thlah a, mahse a rilru a nawm phah ka ring chuang lo. U Hruaia vang ni lo ta pawh ni se, tunah a pa Hospital-ah a awm mêk a, kei ni ta ila thlamuang taka ka awm theih ka ring bik lo. Kan dawr lam pan nghal ta mai lo chuan u Hruaia ka call a, a ring ral ṭhak tawh dâwn emaw ka tih hnuah a pick up ve ta hram! 

"Khaw'nge i awm?" ka ti nghal thawr a, leh lama mi erawh a reh vung vung thung. 

"U Hruai?" lungawi chiah lo aw zeta ka ti leh chuan

"Ka zin" a rawn ti dut a, tun ṭum chu kei ngei pawh a zin thu min hrilh lo a nih hmel. 

"Engati nge i zin? Khawiah nge i zin? I pa chanchin kha i hre tawh em?" ka ti nghal mawlh mawlh a, keimah zâwkin kan inbiakna chu ka la hmet tawp palh zui. 

Ka call ṭha leh nghal a, a pick up nghal mai ka rin tehreng nen a ring ral dâwn tê ah bawk a pick up chauh a, a awm dan chuan ka lung a tiâwi rih thlawt lo. 

"Min chhâng teh u Hruai, engati nge i zin reng reng a? Hna thil vang em ni?" ka tih chuan

"Ni lo" tih chauhin min rawn chhâng a, min chhán dan chu duhthu a va sam lo kher êm.

"A nih chuan engati nge? Engati nge engmah i sawi loh, nizana i lo lén loh chhan pawh kha a ni chiang mai. I chhungte an mangang asin, tunah hian i pa" ka tih laklawh lai chuan

"Sawi suh!" a rawn ti bul hmuk a, ka ngawi chiang teh e!

Chutia ka ngawih lai tak chuan kan inbiakna chu amah zâwkin a rawn hmet tawp daih a, call nawn erawh ka tum tawh rih lo. Zan lama biak ṭhatah ka dah a, engkim, thu dik tak min hrilh ngei pawh ka ring. Dawr nghah lam reng ka rilruah a awm thei tawh lo va, chawhnu lamah phei chuan ka haw daih nghe nghe. 

Khua a thim a, zan a ni zui nghal a, zanriah ei kham aṭanga rei vak lovah u Hruaia chu ka call leh a, mahse a pick up duh tawh hauh lo. A mak ka ti, nizan te kha chuan ṭha takin kan inbe reng si a, tunah erawh mi hrang hlak ang maiin ka lakah a awm leh lawi a, eng rilru pûa zin nge a nih reng reng le, hna vanga zin a ni hauh si lo. 

Ka call nawn leh ngat a, a la pick up duh lo tluang zel a, a zinna hmun takngial pawh ka hre si lo, dik tak chuan tawhsual a tâwk palh ang tih ka hlau ru khawp mai. A vawi ngana atân ka call leh ta nge nge a, rei lo tê a ring hnuah a pick up a, mahse ka ṭawng hma chu engmah a rawn sawi lo, a reh tlawk tlawk ringawt.

"Engati nge hetiang hian i awm?" ka ti thawp sep a, pâwnah dingin van lam chu ka thlir pah reng bawk. 

"Tunah hian i pa damdawi inah a awm mêk asin" ka ti leh a, chhan pakhatmah ka la dawng lo tluang zel.

"A hrawk a lo cancer reng a, i hre tawh em?" ka tih leh pawh chuan a la ngawi reng a, a awm dan chuan ka ṭah a tichhuak ru tak zet.

"U Hruai?" tiin ka thaw chhuak ham ham a, ka mittui chu a rawn parawl kuam zui nghal bawk.

"Ka hria" a rawn ti ve ta nge nge. 

"I pa chanchin hi i hre vek ti raw?" ka tih chuan

"Ka pa chanchin sawi tur chauha min rawn bia i nih chuan kan duhtâwk dâwn em ni ang?" a rawn ti daih a, a danglam teh thut lutuk hi a mak zâwk!

"Hnawksak min tihhmel ngawt mai" dam diai hian ka ti thawp sep a, min chhan dan chuan min va ṭhawng chiang tehreng êm.

"A châng chuan hnawksak ti ṭhin e" a rawn ti a nih chu! 

"A ni ang, i sawi dik ang, i tân hian ka lo hnawksak ṭhin viau tak ka ring" ka mittui chu ka biangah a rawn baw zawîh a, hruk hul pawh ka tum lo.

"Inbe tawh rih lo teh ang" a thusawi engkim chuan min chhun zawk zawk a, a ṭawngkam aṭangin inṭhen a duh tih hai rual a ni ta lo e!

"Aw le, kan inbe tawh dâwn lo a nia, ka rawn be chhen ṭhin che hi ka tipalh ni rawh se" ṭah ka insum nasatzia hria se zawng min khawngaih hnuhnawh hial ka ring a ni.

"Muttui" a rawn tih chuan

"Mangṭha" tiin ka lo chhâng thung a, amah zâwkin kan inbiakna chu a hmet tawp zui nghal bawk. 

Ka phone hum ranin pâwnah chuan ka ding ngawi reng a, thawm ri vel a tam lo bawk si nen ka khua a har nghal ngawih ngawih a, zan khat thil thua u Hruaia nen kan inṭhen ringawt chu mak ka ti a, ngaihtuahna sen dan tur pawh ka thiam rih lo. 

Hun kal tawha kan hun hman dun dan zawng zawng suangtuah lêt loh theih a ni lo va, ka lo hmangaih hman hle tawh tih ka hre chhuak chawpchilh zui nghal bawk.

Ni e, ka hmangaih alawm, ka mipa hmangaih hmasa ber a ni nghe nghe asin! Tunah erawh nâtnain ka thinlung a tuam mêk a, a lak ata bo tura ka inngaihtuah chhuah apiang leh ka bula awm tawh lo tura ka ngaihtuah chhuah apiangin ka nâ nawn awn awn a, zan mut chhin chu khawi lamah, a har hian a har ngawih ngawih!

Chumi zan, u Hruaia nena kan inṭhen zan chuan chhin khat pawh ka chhing lo va, ka mittui a tling awl lo va, ṭah erawh ka ṭap ri hauh lo thung, hmun fianrialah awm te chu ni ila ka ṭap ri hawm hawm mahna. Ka chhungte pawh hrilh ka tum chuang lo, pangngai thei ang bera awm ka tum a, mahse a va harsa si êm. 

Ni khat chu Hannah-in min rawn be leh a, u Hruaia lo haw thu a sawi chuan ka dawr nghak ṭhu mai mai lai pawh ka ṭhu ngil nghal zawt a, inṭhen fel vek tawh mah ila keimahah nghawng a la nei nasa hle tih hai rual a ni lo. 

A pa hrawk an zai tur thute min hrilh zawm melh melh a, mawihnai takin ka chhâng ve zel a, a u nen kan inṭhen tawh tih a la hre lo a ni mai thei.

Nî a ral a, kâr a ral a, hun chuan chhun leh zan a her liampui zel a, Krismas nî pawh ni khat chauhin a dang ta. December ni 24 a ni a, Adeline-i leh u Rosanga pawh an inhau leh hlak hlak ṭhin tih lovah chuan an inngeih phian a, u Rosanga lo sawi lâwk tawh kha a thleng dik chiah bawk. 

Adeline-i ber chuan nuam a ti leh lawi a, khawiah pawh kal dâwn se u Rosanga a pun zel a, hnai tê pawh ni se bike-in an inphur chhuak ta fo va, ka lakah pawh a zak em em tawh lo. A hma ang chiah khan a awm leh tawh zâwk a, chutia an inngeih ta viau chu ka lawmpui khawp mai. 

Kei leh u Hruaia inkâr erawh a zau telh telh thung a, Pathian remruat dan hi chu a mak ve ngawt mai. Thu dang sawi belh leh tawh miah lovin zan khat thil thu ah kan inṭhen tawp kha a ni a, ka rin phâk bakin ka thinlung chhungril a nâ a, ka hawina lam apiangah a hmel ka mitthla a, ka ngai a, ka thlahlel a, mahse ani leh kei inkârah chuan ramri a inkham tlat tawh thung.

Ngaihdam dila lo lêt leh duh tur chî a ni lo tih ka hriat chian em emna te chuan ka rilru leh ngaihtuahna an tizim zual a, kan inṭhen chhanah khan 'tu thiam loh zâwk nge' tih sawi dâwn ta ila, sawi tur ka hre lo, keimah zâwk hi ka ni mai thei. 

A pa nen an inngaina lo tih hre reng chungin ka nawr lui char char ṭhin kha a ni a, a kâ aṭang hnawksak min tih thu ka hriat phah ta réng bawk a, ka phû tâwk chiah a ni.

"Tun lai chu Hruaia hi a va reh ve? A zin leh tawh a ni maw?" ei rawng kan báwl dun laiin ka nu chuan a rawn ti a, thu dik ka hrilh ang nge hrilh lo ang tihah ka rilru a insual buai nasa khawp mai.

"Nia" tih chauhin ka chhâng ta ringawt a, chutah ka nu bawk chuan

"Naktuk mai khi Krismas a ni tawh a, kum thar hmain chaw lo ei se a ṭha ang" a la rawn ti ta deuh deuh a, chhán dan tur pawh ka hre tawh lo. 

"A duh i ring vak na nge?" pangngai zet hian a rawn ti leh a, ka ngawi rei mah mah tih ka inhre chhuak zui nghal bawk. 

"Ka hre lo le" tih bakin ka chhâng ta lo, a chhan chu kan inṭhen fel tawh tlat! 

"Ti daih ila, i û hian bialnu a nei thar em ni? Tun lai chu a hlim hmel tlat, amahin a nui vur vur reng mai" a rawn tih leh tâkah chuan

"Nei thar a ni ang, ka hriatpui lo, amah zâwt mai la" ka lo ti ve mai a, mipate ai hmeichhiate hian thil kan hrethiam chak zâwk a nih dâwn hi!

"I putea te pawh an lo thleng ṭep tawh ang, an awm chhung chu Lawmtea nen mu dun mai rawh u" a tih chuan ka lo bu nghat a, putea te nupain Lunglei lam aṭangin Krismas an lo hmang dâwn a, ka room ka ken mai a ngaih hmel.

Tlai dâr 4 leh a chanve velah putea nupa pawh an lo thleng a, a nupui nen hian kum khat dâwn chu an innei ve tawh a, mahse fa erawh an la nei rih lo thung. Putea hi ka nu nau chiah a ni a, upa tak a la ni lo va, ka pa phei chu a û deuh thlap zel nghe nghe. Fa nei tawh phei se chu a nuam dâwn asin le, putea ngat phei chu min duat thei si, a nupui pawh a felin a zia a nù zên a, nupa inhmeh tak an ni. 

"Tun lai hi i va'n dâng ve, dark circle i nei leh nghal, i mu ṭha lo a ni maw?" Adeline-i chuan min en chung hian a ti melh melh a, ṭawngkâa chhâng lovin ka lo nuih ringawt thung. 

"Ka ti tak tak a nia Nunu" a rawn ti leh a, hrilh mai a fuh tawhin ka hria, ka zep rei ve tawh bawk alawm le.

"Eng lo a nia, u Hruaia nen kan inṭhen a" ka tih chuan thutak zet hian min en a, chutiang thu ka sawi chu a beisei lo a ni ngei ang. 

"Min ngaihtuah suh, ka nâ lo a nia" ka ti ve tak ná a, ka nâtzia ka thup hram hram a ni. 

"Ka awih lo" a ti deuh tawp a, a hmel aṭang chuan a awih lo tak tak niin a lang. 

"A ni alawm, tun kâr hi a ral chuan kan inṭhen aṭangin kâr thum a liam chiah ang" ka ti leh a, awih hmel erawh a la pû chuang lo.

"Engtin nge a nih theih? In inṭhen tak tak em Nunu?" mak tih hmel zet hian min la en reng a, nâ miah lo anga lan ka duh si, a harsa bawk si, a buaithlak teh e!

"Tak tak e" ka tih chuan 

"A nih eng nge in inṭhen chhan?" a rawn ti nghal zat a, hmun dang hawi pah hian

"Hnawksak min ti a" ka ti ve leh mai a, ka chhungril lam chu kan inṭhen zan ang chiah khan a rawn nâ nawn zawk zawk a, ka mittui a tlâk mai loh nân ka mit ka khap nasa hle bawk. 

"Chu pa mai mai chu! A va'n zak lo ve le, lem a lo chang char char a ni maw?" a ti hmarh hmarh a, chutah amah bawk chuan

"Ka lo be ve reng reng teh ang, in inṭhen tawh tho, kei ai upa fê zâwk mah se zilh hlak ka duh!" a tih zawm leh nghal hmawk hmawk a, a biak erawh ṭul ka ti hran lo.

"A ho mai mai, kan inṭhen fel tawh a, engmah sawi a ngai tawh lo" pangngai deuh hian ka ti a, a lung a la ni lo nasa mai. 

"Kimchang zâwkin min han hrilh chiang teh" tiin min ṭhut hnaih sauh a, kan pahnih chauhin kan awm bawk a, u Hruaia nena kan inṭhen dan chu ka hrilh ta vek a, a tawp lamah phei chuan ka mittui a tling pam nghe nghe.

"A ṭha viau dâwn emaw ka lo ti hman a, mahse mipa nep leh lâktlâk loh tak a ni. Lungngai reng reng suh, ani ai ṭha mipa an tam êm mai" min hnemna awkâ chuan ka thinlung nâ a chhawk paw'n ka hre lo, ka nâ zual zel zâwkin ka hria.

"Ka va haw tawh ang e, zanin chu mut hma ka duh" ka thawh rualin a lo tho ve nghal a, kan in pêng thleng min thlah a, ka pian tirh ata Krismas boruak azawngah a la nuam lo ber ang. 

Zing khua a lo vâr a, Krismas tuk tih hriat zet hian boruak chu a awm a, putea te nupa leh ka nu leh pate chu an tho hma hlawm ang reng. Ka thawh ve meuh chuan ei rawng an lo bâwl sap sap tawh a, putea nupui nen pawh ei rawng báwl pahin thil kan sawi dun melh melh a, u Rosanga leh Lawmtea erawh an la rawn tho lo ve ve thung.

Chutia ei rawng kan bâwl zo ka phone ka khawih chu Hannah-i hnen aṭangin missed call vawi thum lai a lo awm a, min call chhan ka ngaihtuah rauh rauh a, u Hruaia nen kan inṭhen thu pawh an hriat ve vek tawh ka ring nghe nghe. Nge ni a, Hruaia hian a la hrilh miah lo zâwk? Ni lo, a hrilh tawh ang, hrilh loh a hun tawh lo. 

"Aw u Nunu, i buai em?" phone call a pick up rualin Hannah-i chuan a ti deuh sawk sawk a, ka buai tawh loh thu ka hrilh ve nghal mai bawk. 

"Eng lo a nia, ka pa'n a hmu duh che a" a rawn tih leh chuan ka meng kual ralh ralh a, pa Dinga teh daihin min hmu duh chu mak tih loh theih pawh a ni lo. 

"A ni màw, eng thilah nge min hmuh duh a?" ka ti ṭha ve mai a, pâwnah ka chhuak zui ta daih! 

"Ka hre lo, a hmu duh tawp che, chu bak engmah min hrilh lo" a thusawi chu ka ngaithla liam puat a, ka ngaihtuahna erawh hmun dang daihah a awm tawh thung. 

"A nih chû, mahse vawiin chuan ka va'n hman àwm lo ve Hannah, Krismas te a ni bawk si a, ni dangah" ka tih mial mial lai chuan

"Zaninah tal i lo kal thei ang em? Ni lo, keima'n ka lo hruai mai ang che, dik tak chuan....." tiin a ngawi zui vang vang a, eng thil nge min hrilh a tum ka hre hauh lo ná chu a pawimawh hle a nih ka ring. 

"Hun i insiam thei ang ti raw?" a rawn tih zawm leh tâkah chuan

"Ka hre lo le, inkhawm bán lamah ka hman theih ka ring" ka ti ve ta nge nge a, chuti fakauva min hmu duh a nih chuan hmuh ngei a ngai a ni mai.

"Ka lawm e aw u Nunu, zanin inkhawm bánah ka lo lam dâwn che a nia" tiin kan inbiakna chu kan titawp a, rilruah eng dang a awm thei leh ta lo. 

Eng thilah nge, eng chungchangah nge pa Dinga chuan min hmuh duh reng reng le? Hmaichhanah ngei a fapa ṭhen turin min ti kha a ni a, u Hruaia nen kan inṭhen hnu aṭang phei kha chuan u Hruaia mai bakah an chhungkaw chanchin engmah ka hre zawm ta lo va, ngaihtuah erawh ka ngaihtuah ru reng ṭhin tho, mahse inzawmna kan neih tawh loh avangin ka thenthawngah ka thawh loh luihtir tlat ṭhin thung.

In chhunga ka lut leh chu putea nupuiin min lo ko péng a, a lam pan chuan ka phei ve nghal mai a, putea nen an inneihtir aṭang tawh a la nélawm rengin ka hria. Tukṭhuan ei khamah chuan inkhawm turin kan insiam sap sap a, Krismas nî a ni bawk a, inkhawm kan tlêm ka ring lo, biak in chhunga ṭhutna chan duh phei chuan kal hma a ngaih hial ka ring. 

Chhun nî a ral a, keimahah kim lo a awm miau avangin ka hun hman dan chu ho ka ti hle a, mahse ka bulah Adeline-i leh u Rosanga an awm deuh chawt a, anni pahnih hian ka khawhar lutuk tur pawh an tiziaawm deuhin ka hria. 

U Rosanga paw'n u Hruaia nena kan inṭhen thu a hre tawh a, Adeline-in a hrilh a nih ka ring. Engmah min zâwt lo va, min zâwt pawh ni se chhan ngaihna vak ka hre lo, kan inṭhen a ni tawp mai.

Ka chhungte beng erawh a la thleng lo tluang zel a, an hriat hunah engtin tak ngai ang maw! Zanah chuan kan zavaiin kan inkhawm leh ṭhap a, u Rosanga leh Adeline-i chu an ṭhu dun nghe nghe a, mi dang chuan rinhlelh nachâng pawh an hre lo. Inkhawm kan bâng a, Hannah-i chuan min rawn hruai ta ngei a, tun bak hi chu an chhungkaw hnaih zawnga ke ka pen leh ka ring tawh lo.

An in chhunga kan lut chu tum loh deuhin u Hruaia ka hmu hlawl mai, ani paw'n chiang zet hian min lo en a, danglam loh ka tum tehreng nen ka thin phut dan a dik lo nghal a, rei pawh ka en duh lo. Hannah-i chuan room pakhatah hian min kai lut a, pa Dinga ngei mai chu khumah a lo mu thluang zuar a, a la hriselna a pan hmel tak zet! 

"Pa, u Nunui a lo thleng a nia" tiin Hannah-i chu a pa hnaih deuh hian a kun hniam a, pa Dinga chuan min rawn en nghal chat bawk.

Khum bula notebook leh pen chu láin eng emaw ni hi a ziak nghal mual mual a, kan kal lamah khan a hrawk cancer inṭan mêk an zai dam thu Hannah-in min hrilh tawh a, a awm dan aṭang chuan an zaina avangin a la ṭawng ri chhuak thei rih lo a ni hmel.

"I laka ka thil lo sawi kha min theihnghilhsak theih chuan ka lawm ngawt ang, kha thu ka sawi avang khan min hrethiam hram dâwn a nia, ka suah sual man ka hmu mêk zel chu a nih hi!" tih hi a lo ziak a, lungngaih hmel fê hian min en a, ngawih reng zawng a dikin ka hre ta lo. 

"I ṭha chho ve zel mai ang, ka haw leh nghal mai ang e, lo dam zel rawh" tiin room aṭang chuan ka pen chhuak a, Hannah-in min lo zui ve reng chu niin! 

"U Te, nangma'n va thlah ve tawh thung la" ka hnung lam aṭanga a rawn ti chiah chu

"A ngai lo, a ngai lo ang, Taxi-in ka haw thei tawh alawm" ka ti nghal thuai thuai a, a chhungte awm dan aṭang chuan kan inṭhen thu a lo la hrilh miah lo tih ka hrethiam nghal vek, mahse 'engati nge a la hrilh miah loh' tihah ka buai ta thung.

"Awi Nunu, kan pa chuan eng thu chiah nge a lo hrilh che a?" inthlahrun hmel deuha min en chung hian nu Bec-i chuan a rawn ti a, an hre lo ta sa sa, hre lo law law zâwk se a ṭha ang.

"A ho lutuk, ka va haw ang e" tia nui lui sakin pâwn lam ka pan a, chutah Hannah-i bawk chuan

"A nih keima'n ka va thlah ang che" a rawn ti leh a, ka hnial ta lo mai.

Haw kawngah chuan chawlh kâr thum dâwn phâia an awm thu te, nizan maia Aizawl an lo thlen thu te leh thil chi hrang hrang; u Hruaian a pa a buaipui dan zawng zawng thleng chuan min hrilh melh melh a, ka lawm hnuhnawh ang reng. 

Kan inngaihzawn lai aṭang tawha ka tihhlawhtlin duh kha a ni a, tunah erawh kan inṭhen tawh a, mahse a pa nen an inkâr a ṭha hlauh thung a, lungngaihna kâra thu lawmawm lam hriat chu a ṭha hrim hrim e!

End of Chapter 9