LOVING YOU A MILLION TIMES By Havali Adam (CHAPTER 8)

LOVING YOU A MILLION TIMES

By

Havali Adam

Chapter 8

"Tun lai hi i va'n reh em em?" tiin Adeline-i chu message ka va thawn a, message a hmuh hnu lawkah a lo call nghal a, tun lai chu a reh tak tak a ni. 

"Eng nge ni ta?" ni dang ang lo deuhin a aw a dam diai a, a nuamsam vak lo zâwk emaw ni!

"I dam ṭha na nge? Ni 2 lâi class a i off tawh bawk a, chu bakah kan inbe khât tawp" ka tih chuan

"Nia" tih chauhin min rawn chhâng a, chaw ei dawhkan tihfai pah chuan

"Vawiin chu inah keimahin ka awm dâwn asin, lo lêng la, nge ka lo lêng phei zâwk ang?" ka tih zawm leh nghal a, sawi khalh hlau ni àwm fahran hian

"Ka chhuak lawk dâwn a, ka hman ka ring chiah lo Nunu, ni dangah ka lo lêng mai ang" a rawn ti thuai a, chhuahpuia min sâwm miah lo chu mak ka ti ru hle bawk. 

"Kalpui i ngai em? Ka hman reng a nia, i duh chuan sawi rawh" ka ti leh nghal zat a, ani erawhin a ngaih loh thu a lo sawi vat thung. 

Tukṭhuan ei kham hlim hlawl a la ni a, biak pawh kan inbe rei lem lo. Room aṭangin u Rosanga a rawn chhuak a, ani pawh a chhuak dâwn tak e! Chaw ei lai khan a sawi tak alawm, ka nu leh pa leh Lawmtea erawh dawr lamah an liam phei tawh a, ka pa phei chu zing kâr aṭang khan a awm daih tawh zâwk maw lè. 

"Khaw'nge i kal dâwn a?" tiin u Rosanga chhuak tur chu ka bia, chaw ei lai khan a chhuahna tur a sawi paw'n ka hre lo e a! 

"Ka chhuak lawk dâwn" tih bakin min chhang ṭha duh miah lo leh nghal.

Mahni chauhin inah chuan ka awm a, chetna tur awm ang âng chu ka ti nghal zung zung a, chet zawhah mut hahdam mai mai ka duh vang a ni pakhat. Chutia mahni chauha han awm tâkah chuan u Hruaia bawk ka ngaihtuah chhuak leh a, a pa nena an inkâr ṭha lo em em ka hriat nî aṭang khan thla dâwn a liam leh tawh a, mahse ka ngaihtuah chhuah apiang hian ka khawngaih lo thei lo.

Kan inhmuh te hian ka kuah leh ringawt ṭhin a, amah paw'n mak a ti deuh hû ṭhinin ka hria. A pa reng reng pawh demawm ka ti, mahni fapa han tihduhdah em em mai chu thil dik ni theiin ka hre lo. A nu leh a nau erawh u Hruaia tân an ṭha em em thung a, kawng engkimah an thlâwp a, u Hruaia tak pawh hian an lakah chuan zep a nei buai vak lo bawkin ka hria.

A nî télin Hannah-i nen pawh kan inngaina zual zel a, a ṭawng duh reuh bawk si, min nêl bawk si, ngainat loh theih pawh a ni lo. U Hruaia nu nen erawh vawi hnih khat chauh kan la inhmu a, chu pawh u Hruaia in luahah a ni a, Hannah-in a rawn hruai nghe nghe a, ngaihzawngte nu hmaah chuan a chet làih theih khawp mai. 

U Hruaia pa ve thung erawh kan inhmuh hmasak ber tih loh kha chu kan inhmu leh ta miah lo va, hmuh ka châk hran lo, u Hruaia thlavang hauhin ka haw ve em em ringawt a ni ber.

"I lo va haw hma leh si ve, dawrah i pêng kawi na nge?" chawhnu her pawh la ni lova u Rosanga hmel ka hmu hlawl chu mak ka ti ang reng. 

"Pêng kawi ta lo law law mai" tih leh a room lam pan a rual a, ka en zui vawng vawng a, tun lai chu ani pawh hi a dik chiah lovin ka hria, mahse dam lo han tih tur êm chu a ni bawk si lo. 

"Thil i ei tawh em?" a room-a va kal chilh kher lovin ka ti deuh lang lâng a, ei tur siam ka tum lai tak a ni bawk a, a la ei loh chuan siam kep nghal ila a ṭha ang. 

"Ei lo" a rawn ti deuh hluk a, a mood ti off thei thil a va tawng a nih ka ring hmiah. 

"A nih chuan ka'n siam kep ang che" tiin ka che zui nghal a, min rawn chhâng tawh lo hrim hrim.

"Adeline-i hi a haw tawh ang em lé, kan call chhin" ti sepin ka ṭhianu chu ka call zawm zat a, phone call a pick up rual chuan

"I haw tawh em?" ka ti nghal a, a haw tawh thu a lo sawi ve mai bawk. 

"Lo phei la, ei tur tui tâwk ka siam a nia, lo phei rawh" ka tih leh chuan

"Ka lo phei lo mai ang, mut ka duh riau" tiin min hnial thung a, amahah eng emaw thil dik lo a awm tlatin ka hria. 

"Lo phei mai mai teh, a hma zawnga kan in nuam i tih theih tehreng nen" aw nêm vak lo hian ka tur lui ve tlat a, a peih loh thu a rawn sawi ta tho. 

"Ka lo kal dâwn, ka rawn hruai dâwn che, thil zawh tur che pawh ka nei" ka ti leh mawlh mawlh a, a rawn ṭawng leh hmain kan inbiakna chu ka hmet tawp daih bawk. 

Chhun thil ei tur ka siam zawh hnu chuan u Rosanga pawh hrilh tawh lem chuang lovin ka chhuak zui nghal a, Adeline-i te in hi kan in aṭang hla lutuk a ni lo va, mahse a hnai em em hran lo. An in ka va thleng chu amah tê chauhin a lo awm a, a hma te kha chuan amaha a awm apiangin a lo lêng phei ziah kha a ni ṭhin si a, tun lai chu a mizia hi a dang riau alawm, hai theih a ni lo. 

"Ka peih lo tak tak a nia Nunu" ti teh mah se kan in lamah ka hruai lui ta tho va, a awm dan avang chuan zawh tur ka ngah zual sauh bawk. 

Kan in kan thleng chu a hawi kual deuh zuk zuk a, hmuh hreh nei ang mai hian a awm a, mak ka ti ru ang reng. Tin, a mizia hrim hrim chu ni dang a ang hlawl lo, ka bulah pawh a ni tho. 

A kimki ka ti dâwn nge a inthlahrung zâwk, mahse chutiang turin a lakah engtin mah ka awm lo va, kei leh ka chhungte lakah pawh a inthlahrung ngai lo hrim hrim kha a ni si a, tun hnaia a awm dan erawh hi chu a mak tih bakin sawifiah vak ngaihna ka hre lo.

Ka chhang kan zawh hlim hmin thar sàr leh thingpui chu ka chhawp a, u Rosanga pawh ka ko zui lang lâng a, a rawn chhuak har lo hle bawk. Thingpui in lai chuan ka ṭawng siam siam a, Adeline-i chu ka be awl lo va, ani erawh ka ṭawng ngaihsak lo tih hriat zet hian a awm thung a, a nui lui hmel te chu ka hai lo nasa mai. 

"Eng nge i awmzia nang hi?" ka ti ta nge nge a, ka zàwt rih lo vang ka ti rilru hnuhnawh zet ná chu zawh a ṭha zâwkin ka hria. 

"Eng nge?" a rawn ti deuh tawp a, ka lo ner khum sak zui nghal. 

"Tun hnaia i mize inthlak dâwrh hi ka hriat loh ring reng reng suh, a chhan eng nge?" ka tih leh tâkah chuan a meng buai deuh nàkin ka hria. 

"Awihawm loh, ka pangngai reng" a rawn ti satliah zui zat a, a ṭawng dan thlengin a lo danglam hman a nih dâwn hi! 

"Dâwt min hrilh tum suh, ka hre chiang thawkhat che a nia" ka tih chuan kei ni lovin u Rosanga zâwk a melh zeuh a, a enna lam chu ka hawi zui ve nghal bawk. 

"Ka puar" tih leh u Rosanga chuan thawh a rual a, ani pawh hi nichin lawk aṭang khan a awm dan a inthlak thutin ka hria, chu bakah Adeline-i nen an la inhau miah lo te hi a mak ka ti tawlh tawlh.

"I va puar hma ve" tia ka biakna pawh chu min rawn chhâng zui lem hlei lo va, biak loh ang vel a ni.

"Kei pawh ka haw leh nghal mai ang Nunu, ka nute lo haw har an tum loh hmel si a, ka awm rei lo mai ang" Adeline-i chu chik zet hian ka en reng a, thingpui pawh a in zo har lo teh e! 

"Ka rilru i kam reuh mang e, a nih haw phawt mai rawh, mahse ni dangah ka zâwt chhuak dâwn tho tho che a nia" ka tih chuan nui chung hian

"Chutianga inzawh chhuah tur engmah a awm hleinem, ka va haw phawt ang e" tiin a kal chhuak nghal sawk sawk a, a rawn lehhawi tawh lo hrim hrim bawk. 

Zai rat rat pahin tihfel ngai ka tifel mial mial a, u Rosanga erawh a room-ah a awm leh chawt tawh a, minute tam a liam hnu chuan ka pate an rawn haw khawm a, khua pawh a thim har lo hle. Zanriah ei kham hnu lawkah u Hruaia a lo lêng a, ani pawh tun hnai hi ka hmu bawrchhawr ṭhin riau mai, a meng rei emaw hna a thawk rim a ni mai thei. 

Ka nu leh pate nen an titi lûam a, inkawm ngeih tâwk tura ka rin ber u Rosanga nen hi chuan innêl lo ni chuang si lo hian an inbe tam lutuk lo va, an inmil lo pawh a ni lo, an inbe tam lo ve tawp! 

U Hruaia haw tur thlah tuma pâwn kan chhuah dun laiin u Rosanga lêng chhuak a lo haw ve chiah a, a mood a fuh loh hmel em em zui, eng tak va tawng ang maw!

"Thil sawipui duh che ka nei a" u Hruaia kut hrawl lûm vung vung chu ka khàl niap niap a, a lam pawh ka hawi chho chuang lo. 

"Eng lam maw?" tiin a kut leh lam chuan ka khabe a rawn châwi a, lungawi hmel tak hian min melh chhuk run bawk nen ka làih phah dâwn ringawt alawm le. 

"I hmelṭha ngawt mai" ṭawng tuma ka àn zuau laiin a rawn ti thum chhal a, ka thinlung chhung a fan thla hneh leh pek hle. 

"I phakar, ka sawi duh min sawitir phawt rawh" tiin ka nêk tálh tálh a, dik tak chuan ka lái ru ve reng tho.

"Ka phakar àwm pawh ka lo hre hleinem, ka hmaa hmeichhe ding mêk hi" a tih laklawh lai chuan

"A tâwk, over suh aw, ka sawi phawt dâwn" tiin ka ṭawng khalh tan tan a, nui sun sun pah hian

"A nih han sawi la" a ti dam thluam a, aw thian hmasa leh kharhin

"Eng lo" ka ti hman dêk dék a, ka inrin hma hauha rawn che thutin min fawp a nih chu!

"Ka châkna a rei tawh" tiin a inla hrang hlek a, mahse a rei lo, kan hmui chu a inbawhthuah zui nghal leh ta mawlh mawlh.

"Tuna i sawi lo a nih chuan sawi hman lêk lova hun hmanpui dan che ka hria a nia" melh chho kal chunga chil ka lem dawk lai chuan thu pe aw zet hian a rawn ti a, ka biang tawn tawn chu a dawm run bawk. 

"Eng lo a nia, i ngaihdan chu ka hre lo a, mahse i pa nen hian inngeih taka awm turin ka duh che u, a chhan chu nakin zelah buaina kan la tawh phah ang tih ka hlau" ka tih chuan a hmelah danglam a awm nghal a, a sa huat lai takah khawihsak ang mai a ni.

"Chutiang lam ngaihtuah buai duh suh, eng buaina mah kan tâwk lo ang" a ti nghet charhin a awm hla deuh nghal a, a aw aṭang chuan a inring tâwk tih a hriat hle. 

"Ka ngaihtuah lo thei lo alawm, nangmahah hian kim lo a awm u Hruai" tiin a kut pahnih chu ka vuan ve ve a, a chhanna nghakin ka ngawi ta reng. 

"Eng pawh ni se lo hlauthawng lo phawt rawh" tih chauhin min chhâng a, chu bak engmah a sawi chhunzawm tawh lo. 

"Sunday tlai i hman ang em?" kan ngawih dun deuh vang vang hnu chuan a rawn ti a, a aw pawh a dam pangngai ta viau. 

"Ka hre lo le, engati nge?" ka lo ti ṭha ve mai bawk.

"Khawiah emaw hruai duhna che ka nei a, i hman ang ti raw?" a ṭawngkam leh a hmel lan dan chu a pa ka sawi rik lai nen kha chuan inang lo leh tawh tak a ni.

"Hman mai ang" ka tih chuan thawk là deuh ham hamin a âwmah min kuah bet a, a taksa khana awm hi chu a hahdamthlak ṭhin maw le.

Thu tam sawi tawh lovin a tlan liam thleng ka thlir zui dauh dauh a, a pa nen an inkâr a ṭhat theih nân bul ka ṭan ta phawt chu a ni a, hma erawh sawn a har viau dâwn niin a lang. Ka tâna mipa pawimawh tak a nihna hian amah ngaihtuah lo thei lo leh buaipui lo thei lovin min siam tlat a, a hlim hmel phena lungngaihna lo êng det det ṭhin tireha nuai bosak tur hian ka theihtawp chhuah ka tum a ni.

Sunday tlaiah chuan a sawi ang ngeiin min rawn lam a, ka nute bulah kan chhuah lawk tur thu ka hrilh a, u Hruaia nen kan nih dâwn hi chuan an ngaih a ngam ve tawh khawp chuan ka hria. Ka rin loh deuhin an inah min hruai a, ka beisei loh lam tak a ni chiang khawp mai. Hannah-i leh a nu an lo awm a, a pa erawh khaw'nge a awm ka hre lo, kan inhmu lo hrim hrim.

Ni danga kan inhmuha a awm dan ang bawkin Hannah-i chuan min lo be siam siam a, min nêl tih hi chu hai rual a ni lo. Kei ai a naupang zâwk a, mahse a naupanna a tam lo hle. Tunah hian Pachhunga University College-ah a kal mêk a, a rilrua awm awm min hrilh pawp pawp ni berin ka hria. Tin, u Hruaiate in chu ka rin ai a changkang daih a, chhungkaw pa ber sum lak luhna a ṭhat viau ka ring nghal tawp ringawt bawk.

"U Te, vawi khat tal chu u Nunui te inah hian min hruai ve chhin teh, ka hmu châk thei teh mai a nia" ṭhutthlenga kan ṭhut ṭhap laiin Hannah-i chuan a rawn ti phawng a, u Hruaia erawhin eng teh lua ah a ngaih loh hmel hle. 

"Tea, Nunui hian zanriah ei ve nghal mai rawh se" u Hruaia nu, nu Bec-i chuan a rawn ti ve leh a, tlêmin u Hruaia hmel pawh a thutak ta deuh!

"Zanriah êm ei chhuak turin a chhungte bulah engmah ka sawi lâwk si lo va, kan va haw hnai zâwk ang e" u Hruaia chuan a ti thung a, a sawi dik reng, ka chhungte engmah hrilh lova chaw ei chhuah ringawt chu a tih chî loh lutuk! 

"Âw, a hrilh chawp theih tho alawm" nu Bec-i chuan a la rawn ti hram a, min ngainain kei paw'n ngaina nghal viau mah ila a sâwmna chu pawm chî ah ka ngai rih lo. 

"Ni dangah ni zâwk rawh se" tiin u Hruaia chu a ding a, ka ṭhutna aṭangin ka tho zui ve nghal.

"A nih u aw nu Bec" u Hruaian min chhuahpui dâwn lai chuan ka ti a, hmel nélawm zet hian min lo nuih lêt a, pâwn kan chhuak chu u Hruaia pa lo haw nen kan intâwk ta chat mai.

"Eng nge in rawn tih?" u Hruaia pa chuan a ti deuh khur a, zû rim a namin ka hria. 

"LALHRUAITLUANG!" amah kal pel zawnga u Hruaian min kaih kal lai chuan a rawn ti leh a, a din dan leh a rim aṭangin zû a rui tih hai rual a ni ta lo. 

"I chhungkua ngaihsak rawh" u Hruaia aw chu a dam viau ná a, a nghet charh thung.

"LALHRUAITLUANG!" a pa chuan a rawn ti vin hrawk a, kawngkapui lamah Hannah-i leh nu Bec-i hmel pawh kan hmu zui nghal. 

"Kha hmeichhia kha ṭhen vat ang che" kei min rawn sawi tel chiah chu ka ip deuh chawih a, ka thin phû pawh a rang dawt dawt hle. 

"Ka nunah leh ka kawppui chungchangah hian lo inrawlh lo la a ṭhat ka ring" tiin u Hruaia chuan min kal sawn pui a, a bike-a kan inphur chhuah hnu thlengin ka awm dan chu a la dik hlei thei lo.

Kan vêng lam pana kan tlan lai chuan kan inbe lo ve ve a, kan rilru kan kawm ve ve a ni mahna. A pa thil sawi mawlh khan ka thluak chhung a luah hneh em em a, min duh lo hle a nih ka ring, nge ni a, a zû ruih lai a ni a, a ṭawng sual mai mai zâwk? 

Ka ngaihtuahna ka lo kawm tui deuh a ni ngei ang, kan in kawt zâwl zau lai kan thlen lai pawh ka hre lo. Bike aṭang chuan ka chhuk a, a hmel ena biak ka tum lai takin amah zâwk chuan

"A zia lo ngawt mai" a rawn ti sup a, a mitmengah chuan min ngaihtuah tih a hriat hle. 

"A ho lutuk, min ngaihtuah suh" tiin ka nuih sen sen a, ani erawh a nui eih lo thung.

"Ka va haw ang e" ti leh supin a bike chu a tinung vut vut a, ka buk khum zeuh hnu chuan a tlan haw zui nghal bawk.

Hun a kal bek bek emaw tih lai hun leh níte chu an liam duak duak a, thla pawh kan hmang ral chak thei hle. Fur ruah tui tlâk tam lai ang ni tawh lovin khua chuan thlasik lam rawng a kai leh daih tawh a, Krismas pawh kan hnaih ve zel bawk. Ni tin MZU-ah kan kal a, Semester exam a hnaih tawh avangin zirna lamah kan ṭang tlâng hle a, u Hruaia paw'n min hrethiam thei hle. 

Kan inkâr a ngai reng a, lén erawh a rawn lêng tam ta lo viau thung, semester exam kan nei hnai tih a hriat vang a ni ngei ang. Thla tam kan inngaizawng ve tawh a, han inhnial deuh bap bap chângte chu awm ve tho mah se awlsam tê hian kan intilungâwi leh mai ṭhin a, kawng engkima kan inhrethiam tawn zel thei te hi kan inpawhna tizualtu niin ka hria. 

Amaherawhchu tun hnai hi a hma ai a reh zual deuh hlek a, phone kaltlang paw'n kan inbe tam lem lo hle. Exihibition neiin phâi lamah a zin kual deuh reng bawk a, School lam a buaipui tel leh zel bawk nen a buai ve ṭhin khawp mai. 

A châng chuan ka message reply loh leh view lawk loh te a nei ṭhin a, mahse a hma ang khan lungáwi lohna ka nei tut tut tawh ngai lo, hna lamah a buai ni turah ka ngai tawp zel.

"Nang maw!?" ka mi hmuh teh thut avang chuan keima hriat tâwk lek hian ka a ti sep a, ka ding chiang hle bawk. 

"Inbe lawk teh ang" a rawn tih chuan ka ngawi kar a, sawi ve tur pawh ka hre lo.

"Motor chhungah i duh kher em?" a rawn ti leh a, ka lû ka lo thing vat ringawt. 

"A nih chuan hetah hian kan sawi tlang nghal mai ang, ka fapa hi ṭhen ang che. Ani chuan kei min huat avang hrim hrim paw'n a ṭhen dâwn lo chiang che a, mahse nang erawhin i ṭhen thei tih ka hria" a ti khauh ta charh charh mai. 

"Ka thusawi awmzia hi i hriatthiam mai ka ring" u Hruaia pa thil sawi dawnsawn nuam lo zet chu ka bengah a ri nawn tluk tluk a, a kal sawn thawm hre vek mah ila ka hawi sawn eih lo hrim hrim thung.

Rei fê chu ka dinna ngaiah ka ding ngawi reng a, khuain hniam lam a pan ṭan tawh a, chutianga u Hruaia pa'n a rilru dik tak min rawn hrilh hmiah mai chu a tha nâtthlak ka ti, chutah kan in bul lawkah leh nghal. 

U Hruaian a hriatpui ka ring chiah lo va, hre ve ngat se zawng kei ai a là nâ zâwk mai thei a ni. Muang ban charhin kan in chhungah ka pen lut a, ka room lamah ka lut tlang zui nghal bawk. 

Ka phone chu hmet êngin ka check kual a, u Hruaia hnen aṭang phone call ka la dawng lo va, mesaage pawh ka la dawng chuang lo. Ka thil hriat zawh chiah khan ka rilru a luah hneh rih bawk nen ka ṭah a chhuakin ka thil ngaihtuah a tawi tup a, u Hruaia nena han inṭhen tur êm chuan ka indah phal lo a ni. 

Zana lehkha ka zir lai chuan U Hruaia pa thil sawi ringawt khan ka beng, ka rilru leh ngaihtuahna a luah awl lo va, thil thleng lo tura ka duh te nen lam ka ngaihtuah chhuah phah hial bawk. 

Phone chu ka check deuh chhen a, tun ṭum chu ka rilru a buai ru tak zet a ni. U Hruaia hnen aṭang message leh phone call ka la dawng bawk si lo nen keimah zâwkin ka call ta tawp a, a la pick up thei lo zui!

Rilru khingbai zetin ka mu ta tawp a, ka muttui phian leh lawi si ni tur a ni. Zinga ka harh chuan ní a lo chhuak diam tawh a, u Hruaia hnen aṭang missed call ka dawng bawk a, zan lam ai ngawt chuan tlêmin rilru a nuam ta deuh! 

Call back duh mai lovin ka inphih fai hmasa tê tê a, ka nu ei rawng ka bàwl fel pui hnuah ka call back ta chauh a, a lo pick up rang khawp mai.

"Nizan kha chu sorry aw, party tê nau an huaihawt thut a, i phone call ka lo hre lo palh a ni e" a rawn ti nghal zung zung a, dâwt a sawi ka ring miah lo.

"A nih chû, message leh phone call engmah a awm bawk si lo va, ka ngaih a ṭha lo deuh a" ka ti ve ta sep a, nui thum dut pah hian

"Min ngai lutuk a ni lo maw?" a rawn ti ve nghal a, ri lovin ka nui var var ringawt. 

"A dik em?" a tih leh chuan ka sawi zak deuh tlat a nih chu! 

"Ka dah mai dâwn asin, Bus chan te ka la ngai dâwn a" ka ti ta daih a, ka rilru a hrethiam ni ngei tur a ni. 

"Ka ngai che, ka hmu châk tawh hle bawk che, min ngaih thu sawi ve teh Nunu" a rawn ti zung zung a, ri meuhin ka nui chhuak ta nge nge. 

"I hre vek tho alawm" ka tih pawh chuan sawi turin min ti tlat a, sawi loh theih ni hek lo. 

"Immm....kei paw'n ka ngai che alawm, nizan phei kha chu ka rilruah i awm reng a, mahse nang chuan min ngaihtuah loh hmel khawp mai, i lo party daih a nia" ka ti ta duah a, vui aw pû lek lek hian a tawp ka khar a, ka rilru erawh a dam viau thung. 

"Nizan kha chu ka sawifiah tawh khâ, nang hi!?" ka fiam tih hre chhuak thutin a rawn ti hluk a, a chek zui tlak tlak bawk. 

"Ka lo haw hun chu i châk lo ang" a ti fiamthu ve leh nghal zat a, kan inbiak dan tê chu a nuam dangdai reuh tawp!

"A nâ awm lo taih taih êm mai" ka tih chuan

"Lo accpet rawh" a rawn ti nghal a, video call a lo luh zawm zat bawk.

"I chalah khan ka pen dáwn chiang a nia, mahse ka pen nâ phal lo mai thei che" hmel langa kan inbiak tâkah chuan a kut nen lam a thawh a, a tshirt hak inhmehzia te nen lam ka lo hmu kim hman vek!

"Lo haw thuai mai teh" ka tih chuan a nui vur vur a, rei tak kan inbe lo va, kan inbiakna kan tihtawp dâwn chuan ṭha takin kan inthlah thlap bawk.

MZU Bus changa ka din lai chuan Adeline-i hnen aṭangin phone call ka dawng a, Bus-a a kal dâwn loh thu a rawn sawi a, a ṭhiante'n an phur dâwn a nih ka ring nghal hmiah! 

Kan inbiak zawh hnu chuan Bus lo thleng leh hmasa berah ka chûang lut zui nghal daih a, khaw awm dan leh boruak hrim hrim chu a Krismas boruak tawh hle bawk. 

Phone khawihin Whatsapp-ah ka lut a, u Hruaia hnen aṭang 'class kal nuam' tih tê hi ka lo dawng reng chu niin, ka nui nghal var var a, a message ho tê pawh hian min tihlim thei hle chu a ni e. 

Kâr a ral a, kan exam nî pawh a rawn thleng chawpchilh nghal a, kâr hnih chhung ngawt kan exam a, ka zir nasat ang húin ka chhâng ṭha paw'n ka hre lo. Fail erawh ka fail êm bik lo ang a, mahse ka tiṭha viau lo thung ang ka ring. 

Department dangte nen kan in-exam hun a inang deuh fur hlawm a, Adeline-i te department hi exam zo hmasa pâwl an ni a, ani pawh a chhâng chhe hran lovin ka hria.

December thla kan chûang kâi a, hmun tin kil tinah Krismas hla a ri chuah chuah a, a hun lai a ni bawk a, tu tân mah bengchheng leh ninawm a ni lo va, tute paw'n kan hlimpui em em zâwk a ni. 

Adeline-i nen pawh kan inlén chilh awl lo va, an inah ka va lêng tam mah zâwk a, ka lakah thil zep a nei tih ka hre chiang tawh a, zawh chhuah ka la tum fán bawk. 

"Nunu, ei tur va lam lawk mai ta che, an buai a ni ang, an rawn dah har ém mai" damdawi bâwm rem fel pah hian ka pa chuan a rawn ti a, ka kal chhuak zui ve nghal mai. 

Kan dawr piah lawkah hian restaurant a awm a, ei duh kan neih chuan kan order mai zel a, tun ṭum erawh an buai zual deuh tak tak a ni ang, order an rawn dah har tlat! Tun lai chu MZU kal a ngai tawh rih lo bawk nen dawr lamah ka awm ni tin deuh chawt a ni ber a, ka nu leh pa pawh an hahdam phah viauin ka hria. 

Chutia ngaihtuahna kawm paha restaurant lam ka pan lai chuan Adeline-i ka hmu hlawl a, bike-a phurtu lah chu ka rin loh baksak a la ni zui. Adeline-i hmel zâwk chu ka en zui vawng vawng a, lungawi lo deuh hmel hi a pû a, ngaihtuah zui dan pawh ka thiam rih lo, ka rilru chu a buai nuaih mai. 

An tlan liam fê hnuah call nachâng ka hre chhuak hnuhnawh chauh a, phone call lah chu a pick up miah lo leh ta nghal a, a phone ring ri a hre lo ni ngei tur a ni.

Ei tur order ka lâk fel hnuah pawh Adeline-i te pahnih mawlh chuan ka rilru an tikal thui ang reng hle a, tlaia u Rosanga hna bâng dawra a lo pêng lut pawh chu ka lo en chik ngar ngar hle. Ka rilrua zawhna riak reng chu zawh nghal mai ka tum a, mahse ka ngawi leh ta rih zâwk, amah ni lovin Adeline-i zawh a fuh zâwk ka ring. 

An pahnih hnih hian tun hnai hi an awm dan a danglam a, chawhma lamah bike-a an inphur lai ka hmu fuh leh zel kher bawk nen ka rilruah zawhna a piang hnem ngei mai. 

Zanriah ei khamah Adeline-i chu ka be ta ngei a, inhmuh ka duh thu leh kan in kawta ka lo nghah tur thu ṭha takin ka hrilh a, ani paw'n pangngai deuhin lo kal a tum thu a sawi ve mai bawk. 

U Rosanga erawh engmah ka hrilh lem lo va, a hriat ve a ṭul pawh ka ti hran lo. Rei din ngai lovin Adeline-i chu a lo thleng thuai a, zawhna pai ru ṭûn sa ka ni bawk a, zawh hmaih neih ka tum teuh lo.

"Vawiin eng nge i tih? I chhuak lo em ni?" engmah hre lo ang deuhin ka ti a, ani pawh chuan

"Nia, ka chhuak lo ta law law, inah ka awm mai mai" a rawn ti a, dâwt chiangbal min hrilh avang chuan hmâna ka ṭhiannu kha a ni ta lo emaw ka ti hman hial!

"Eng chen nge ka lakah hian thil zep neih i tum a? Vawiin khan ka hmu reng che alawm, i ṭhian, i thuruk hrilh ngamna ka ni ta lo em ni?" ka ti ta riap mai, insum thei tawh hek lo. 

"Nunu!" mit khap fuk fuk hian a rawn ti a, ka lung a la dam thei lo. 

"I ṭhian ṭha berah min ngai tawh lo a ni mahna le" ti salha inher ka tum chu ka bânah a rawn chelh a, a inthiam lo hmel pawh hmuh  hmaih rual a ni lo.

"Eng lo a nia....ka...." a tih laklawh lai chuan

"U Rosanga nena in inphur mak ka tih hmanzia kha!" ka ti leh ta nge nge a, ka bân a vawnna chu thlahin thâwk a la vang vang a, rilru hah deuh hmel a pû zawm zat bawk.

"Dik tak chuan" tia a ṭawng laiin phone call a dawng a, rang zet hian a pick up a, chutah aw ngaihno bei lo fê hian

"Lo kal suh!" a ti deuh thawr a, a hmet tawp zui nghal sawk a, tu nge a biak hre chiah lo mah ila a dawngsawngtu tân chuan hriat a manhla lo khawp ang le! 

"Eng lo, i u hian...ka...eng lo...nâaa...." a ti bah nawk nawk a, kei erawhin chik zet leh hriat belh châk zetin ka lo en kar thung.

"Saw, a lo kal a nia, ka haw dâwn" tih leh chet a rual a, mahse a bânah ka chelh hman hlauh! 

Adeline-i hawina lam chu ka hawi phei a, u Rosanga lêng chhuak tur ni áwm tak hi ka va hmu a, ani paw'n kawta kan ding chu min rawn hmu har lo hle. A bike-a chûang ta lo chuan kan dinna lamah a rawn phei a, Adeline-i lah chu a lo tal ve sek leh nghal. U Rosanga chu a rawn kal hnai tial tial a, a hmelah chuan mak tihna a lang zuaih a, mahse a lang rei lo hle thung. 

"Eng nge in tih a? In chhungah va lut ta che u?" u Rosanga chuan min en tawn zak zak a, a bikin Adeline-i chu a en ngun ngar ngar hle.

"Min thlah teh Nunu, ka haw duh a nia" tia Adeline-i rawn ṭawng chu

"Engmah ka la zâwt hleinem che" tiin ka lo hnial fithla nghal thuai a, ani lah chuan

"Hming pathlawia hian engkim a hre vek tho, i duh leh zâwt mai rawh" a rawn ti hlawl a, u Rosanga lam chu ka hawi chho rang teh e! 

"Min thlah tawh teh" tia a tal pit tawh chu u Rosanga zâwkin a lo man hman leh hram a, thil thleng mêk chu ka beisei loh lam hlir a ni. 

"Nakin lawkah i la hre dâwn tho tho bawk a, he nu tê reuh nen hian kan inngaizawng mêk, chu chu i hriat duh engkim chhanna a nih ka ring" u Rosanga chuan a rawn ti ta mai, ka âng phuau ringawt! 

"I dawthei!" ti vakin Adeline-i chuan a chum pawp a, chum leh a tum chu u Rosangan a lo man bet hmak thung. 

"Puitling zia pu rawh, ka duh che ka tih tawh khâ, nang paw'n min duh" u Rosanga bawk chuan a ti leh charh a, engkim chu ka rin phâk bak thil vek a ni. 

"Ka duh ve bawk lo che!" Adeline-i chuan a ti vin hlar a, a kut man behsak tlat lo se chu kut a thawh nasa tawh viau ang ka ring. 

"Min duh thu i ruih laiin i sawi vek tawh kha maw le" ngeiawm zet hian u Rosanga chu a kiai suk a, ka inrawlh vat loh chuan a ṭha dâwn lo tlatin ka hria.

"Nangni pahnih hi in lo inngaizawng ru reng elo?" ka mak tihna chu thup hram hram ka tum a, mahse ka thei lo a chhà chu a ni e. 

"Aih" pakhatin a rawn tih laiin pakhat zâwk lah chuan

"Aw" a rawn ti tlat mai bawk si, chutah min la chhâng rual em em zui.

"Min thlah hram teh hming pathlawi" ngen tak meuh hian Adeline-i chuan a ngen a, u Rosanga paw'n a thlah ve ta mai bawk. 

"Kal ringawt suh" ti ve teh mah se Adeline-i chu a tlan haw vang vang daih tawh a, ka thil tawn mêk avang chuan mak tihna hlirin ka khat a ni ber. 

"Ka ṭhiani nen khan in inngaizawng tak tak em?" ka ti leh ngat a, u Rosanga lah chu a nui tawi tuk duh lek chauh leh nghal.

"Maw?" ka ti nawn leh tâkah chuan

"La ingaizawng chiah lo, inngaizawng ang chu kan ni mai. A zak tlat a, a bikin nang leh ka nu leh pa lakah" a rawn ti ṭha ve mai bawk a, thu dik tak mah ni se min la ṭhawng tho tho. 

"Engtin nge? Engtik aṭang kha nge? Ka awih lo ê, i duh tak tak em ni?" ka tih leh pawh chuan

"Duh ka tih tawh kha maw le, lo bia ang che, a la zak rih a, nakin lawkah kei nena kan inngaizawng hi nuam a tih leh hle si dáwn tih pawh ka hre lâwk vek, lo be ngei ngei rawh" a rawn ti ta zel mai, awmze nei lo zetin ka nui ri hak ringawt.

"Nuihzatthlak a awm lo a nia, a mize danglam aṭangte hian hrethiam daih tawh tur che i ni asin maw le" zilh aw rawng kâi deuh reuh hian a ti leh nghut a, a bike hùnna lamah pheiin a tlan chhuak zui nghal ta daih bawk. 

'Engtin nge an lo inngaihzawn daih theih?' tih ringawt chu ka rilruah a ri nawn tluk tluk a, a mak êm a ni. Khatiang khawpa inhal leh inngeih lo si kha tunah erawh an inngaizawng titih tawh lawi a, u Rosanga sawi zawng zawng kha a dik vek a nih phei chuan khang thla kal ta chhunga Adeline-i mize danglam thut chhan kha a ni ngei ang, tunah tak hi chuan mak ka ti bâng thei rih lo.

End of Chapter 8