LOVING YOU A MILLION TIMES By Havali Adam (CHAPTER 2)

LOVING YOU A MILLION TIMES

By

Havali Adam

Chapter 2

Hun leh nî te chu liam zelin thla thar kan chûang kâi thuai a, u Hruaia hmel erawh ka hmu leh ta miah lo. Kha mi nî, kan inhmuh nî aṭang khan kâr hnih a liam tawh a, a rawmawl min pek kha ka la kawl reng a, ani paw'n ka rawmawl kha a la kawl ve reng ka ring, a paih tawh mai thei bawk. 

A suk fai hnua min pek tur thu kha a sawi ngei a, mahse tun thlengin kan la inhmu leh ta lo zel a, hmuh loh tâkah chuan rilruah pawh a awm reng thei bik lo. Adeline-i erawhin min la chhaih char char thung a, ka chhungte beng hial a thleng a, ka chhungte'n min han zâwt chiang vel chu sawi dan tur a vâng duh khawp mai.

Nilaithawhṭanni a ni a, Holiday a ni nghe nghe a, inah pawh awm lovin kan dawrah ka awm char char a, dawr ka ngah lai chuan royal enfield bike pakhat hi kan dawr tlan pel zawngin a rawn tlan a, mî hriat chhuah ka nei nghal zawk a, mahse ka ngaihtuah thui zui lem chuang lo. 

Chawhnu lamah u Rosanga leh Lawmtea an lo kal a, ka nu leh pate inah an haw ve thung a, school chawlh a ni emaw sawrkâr chawlh a nih hi chuan dawrah kan kal dual ṭhin hrim hrim a, Holiday a nih ang ngeiin bazâr chhuak pawh an tlêm lo hle bawk.

"Inah i awm na nge?" phone call ka pick up rualin Adeline-i chuan a rawn ti nghal a, kan inah a lo va kal ni ngei tur a ni.

"Awm nâng, hei dawrah ka awm daih, lo phei ve rawh" tia ka sàwm chuan

"Bazâr lamah ka lo kal dâwn hrim hrim alawm, khawiah emaw ni kalpuiah sàwm che ka tum a, ka lo phei ang" a lo ti zung zung a, khawiah tak mi hruai leh ang i maw!

"Nakinah Adeline-i ka chhuahpui lawk dâwn a nia, kan rei ka ring lo" kan inbiakna kan tihtawp rualin u Rosanga chu ka chhuah tur thu ka hrilh zawm zat a, min ngaihsak lo ngei mai. 

Minute tam a ral hmain Adeline-i pawh a rawn thleng thuai a, a ṭawng nghal mawlh mawlh a, u Rosanga nen an la inkhak lo ve teh mial a, pakhatin a phone a khawih mual mual a, pakhat zâwk a ṭawng char char bawk a, nakin lawkah engtin emaw ni taka an inhnial erawh ka ring ru reng tho. 

Adeline-i chuan a rilṭam thu a sawi bakah momo leisak turin Lawmtea chu a hrilh zui zat a, keiniho unau bulah hi chuan a tlângnêl ve chiang alawm, keini paw'n a awm dan hi huat enah pawh kan en chuang lo.

"Kal tawh ila, kan tlai lutuk palh ang" a inei puar fel hnua ka tih chuan a lo bu ve mai a, kak turin ka ding zui nghal bawk. 

"Nang ber i kal daih te'n tu nge dawrah hian lo ṭhu ang a?" u Rosanga lam chu kan hawi rual ṭhawt a, ka chhuah a phal lo tihna em ni!?

"Âw, nangmah i lo ṭhu mai ang chû?" Adeline-i chuan min ṭawng khalh thuai a, kei paw'n u Rosanga chu ka en reng ringawt! 

"Nunui tel lo paw'n i kal thei reng" u Rosanga chuan a ti deuh hluk a, a fiamthu emaw tiin a hmel chu ka en thuak a, a fiamthu miah lo leh nghal.

"Kal theih te chu kal thei e, mahse kalpui ka duh alawm, ka sâwm vek tawh bawk" Adeline-i leh u Rosanga chu ka en tawn zak zak a, an inhnial leh ngei dâwn e!

"I awm loh chuan customer lo buaipui dan ka thiam vak lo a nia, amah tê hian va kal mai rawh se" min en chunga u Rosangan a rawn tih leh chuan ka bu zeuh a, a sawi dik reng, customer te lo làwma lo be vel turin ṭawngkam bungrua a nei ṭha vak lo. 

"A harsat loh chuan nangmahin va kal leh si mai la?" tlawn titih deuh hian Adeline-i chu ka bia a, a lungawi loh hmel teh e! 

"Awi, eng nge i nau lakah hian i inlâk strict vel viau a, kan inbe lâwk vek tawh, keimahin ka kal peih teuh lo mai" Adeline-i chuan a ti ta hlak hlak a, a lungawi lo pawh chu a àwm ve reng tho.

"Nangmaha i kal peih lo viau a nih chuan ka kalpui mai ang che, mahse ka phur tehchiam lo tih hre tel ve reng reng la" u Rosanga chhan dan avang chuan ka nui thut a, nuih ka tum em em pawh a ni lo. 

"Awi, ka kalpui peih teuh lo che" Adeline-i ṭawng dan chu ka rin tâwk chiah, a peih ka ring lo reng a ni!

"Ka va kalpui lawk ang a?" ka tih pawh chuan u Rosanga chu a ngawi ngul a, ka chhuah a phal lo tih ka hre chiang viau bawk. 

"A nih, i bike-in kan kal ang, ninawm!" lungni lo zet hian Adeline-i chuan a ti leh ta nge nge a, a inngaihtuah rei bawk a, a rilru dik tak a rawn sawi chhuak a nih ka ring.

"Ke ngatin kan kal ang chu maw lé" u Rosanga chu a ṭawng dan aṭang chuan a fiamthu tih ka man thiam tawh, ka ṭhiani erawh a thinrim nasa mai. 

"In la khirh vel viau suh hming pathlawi!" a ti hlak hlak a, u Rosanga lah ṭawngkam thiam lo viau e ti lo chuan a ngawi duh bik ṭhak lo.

"Adika a nih mai chu a!" a lo ti zauh a, chu tê pawh chu Adeline-i huat tâwk a tling em em bawk si.

"A ṭha e, tûma kalpui ka ngai lo" ti hmarh hmarhin a bag chu a ak tau sawk sawk a, u Rosanga nuihza insum hmel chuan min tinui chhuak teuh ngei mai. 

"Kalpui i tum lo tak tak elo?" Adeline-i chhuah  fel hnua ka tih chuan

"Tum loh pawh a awm lo, a kal thui dâwn lo, a lo lêt hrim hrim ang" tiin min chhang mai a, a ngai awlsam ka ti ang reng. 

Minute khat a liam vel ṭâwk ang tihah u Rosanga sawi lâwk ang ngeiin Adeline-i chu kan dawrah bawk a lo lêt leh a, keimah zâwk min hau ta hrep a, a thin a rim bawk si, kei ka nuih a za ru bawk si, a va nuam duh lo tak! 

"Min kalpui i tum thu kha i sawi a ni lo'm ni nang pawh, min lo zui ta reng che" u Rosanga a biak zawm nghal hmawk hmawk a, a mi biak pa pawh a ṭhutna aṭanga thovin a ding zui ve nghal mai bawk.

"Kal ang" tiin u Rosanga chuan a kal pel vut a, Adeline-i paw'n a zui chhuak ve nghal.

"Ke in ka kal peih lo tak tak a nia" a ti thawm te chu dawr chhung aṭangin ka la hre pha hram a, a luruh hi chu a ring ve chiang a ni. 

U Rosanga chhanna erawh ka hre pha tawh lo, an inhruai thleng thei turah ngai phawt mai teh ang. Kan têt lai aṭang tawh u Rosanga leh ka ṭhiani hi chu an in chu kha vak ngai lo hrim hrim a, an awm dun tam chuan a tawpah an inhnial ngei ngei ṭhin. 

Adeline-i lah hian a ngam phian bawk si, u Rosanga ni se a tlawm duh bik der si lo, anni pahnih hi chu ui leh kel thlun pawlh ang vel an ni. Dârkâr chuang hun a liam meuh chuan inbe miah lo hian dawr chhungah an lo lut a, an intithiam lo leh tawh a ni ngei ang. 

"Hming pathlawia hi vawi khat mah ka chhuahpui tawh dâwn lo" lungawi lo zet hian Adeline-i chuan a rawn ti lut nghal tawn tawn a, eng tak chu ni leh ang i maw! 

"Ka tum a ni bik lo ka tih tawh kha maw le" tia u Rosanga ṭawng zawh rual chuan

"Engati nge? Eng nge thleng a?" ka lo ti ve thuai a, Adeline-i zâwk chu ka bualah a rawn ṭhu thla nghal chat bawk. 

"Awi, ka zak lutuk hi a ni tawp! Ka thil lei tur ka en laiin ka bulah a lo ding a, thil ni lo lô a lo khawih vel a, ka hmaiah tak powder tam tâwk a tibua a nih chu! A ruka a lo lerhzia ka hre ve chiah, pawisa ka la chawi ṭeuh zui" tiin a âng ta hlak hlak a, u Rosanga chuan hnar tum dat pah hian

"Ka ler bawk lo" a lo ti ve nghal nghut a, nuih loh theih pawh hi a ni ṭhin lo.

"I lerh i lerh, lerh lo ni la powder kha i lo hawng kual vel tawp lo ang, chuan i powder tihbuak avanga ka pawisa chawi kha min lo gpay lèt nghal bawk ang che" a ti leh ta mawlh mawlh a, a lungawi hlawl lo a ni e. 

"Enteh hei, a bûr pawh hi a tê miah lo, a chanve dâwn min tihbuak a nih chu!" sawi tawp mai lovin a tihzawm leh nghal a, powder bûr chu ka en ve mai a, a tibaw hnem thawkhat tih ka hrethiam nghal bawk. 

"Fimkhur ta che" u Rosanga lam hawi pahin ka ti ve ta hliai a, ka mi biak ber lah chuan engah mah a lo la ngai lo zui!

"Ka zak ngawih ngawih, ka kal nawn ngam pawh ka ring tawh lo" Adeline-i chuan indawm kun ngal chung hian a rawn ti zuai raih a, a zahthlak viau tak ang. 

"A ho lutuk" tiin ka hnem ve tak na a, awmzia a awm lo nasa mai.

"Ka haw dâwn" tih leh thawh a rual a, chutia a che vel chu u Rosangan a lo melh reng ni tur a ni. 

"Khatiang pawh khan min en suh hming pathlawi, pawisa kha min lo gpay lêt leh lo a nih vaih chuan a pung a awm ang" a ti zui leh hlak hlak a, nui ri ngam si lova nui ver ver chungin ka zui chhuak a, kan inthlah fel dâwn thleng paw'n a lungawi loh thu a la sawi char char a, hnem dan tur lah ka ván bawk si. 

Rei lo tê hnuah khua chu a rawn thim hnai a, haw zâi kan rél ve nghal mai a, in kan thlen chuan phone khawihin ka ṭhu hahdam der der a, Adeline-i hnen aṭangin message ka dawng hnem ngang mai. Open duh rih lovin ka inbualsan ta daih a, tun atân chuan lungawi lo viau mah se a rei leh dâwn chuang lo tih ka hre chiang hle bawk. 

Chumi zan chuan a lungawi lo tluan ṭhak a, a bikin u Rosanga lakah, lungawi lo tur chu a ni ve a ni. A tukah erawh mi hran hlak ang maiin a mood a dik leh vel tawh thung a, u Rosanga chanchin pawh a sawi lang leh tawh chuang lo.

Kâr tawp kan thleng a, inrinni zingah chuan ka nu nen chawhmeh leiin kan bazâr a, zíng dâr 7 leh a chanve vel a ni a, khua chu a thiang ṭha hle bawk. Chawhmeh erawh ṭum dang ang lo takin a to phian hlawm a, phai lam thlai a tam mai bakah Mizo thlai ván lai a ni chho tawh a, changkhate phei chu to tak a ni. 

Kawngpui sirah chuan a ṭhen an lo zai bawk a, mihring vek mah ni ila kan va inang lo hlawm tak. Ka nu chawhmeh lei chu bazàr bag-ah ka lo ak zel a, chutia ka nu chawhmeh en lai chuan en bik pawh nei lovin ka hawi kual vel a, ka tum loh deuh ka hmu hlawl mai.

Rei pawh en duh lovin ka hawi sawn thuai a, ka thin phu lah chu a rawn rang zui em em leh nghal a, ka mi hmuh vang a ni tih ka hre chiang khawp mai. A hmuh hlau ru zetin a lam chu ka hawi phei leh dêk dêk a, lukhum hma thlâwk dum hi a khum a, camera a awrh deuh thlap bawk a, a hmui hmul leh a khabe hmul vel aṭangin chhinchhiah lo ila chuan amah a ni tih ka hre kher lo mai thei a ni. 

Tin, bazâr tur pawh a ang lo, thlâ a lá kual zauh zauh a, ka nu min biakna ngaithla pah rengin a lam chu ka hawi leh zawk ṭhin a, dik tak chuan chutiang hunah leh chutiang hmuna ka inhmuh chu ka beisei lo hrim hrim a ni.

Ka nu ngaihven pah renga ka hawi phei leh zeuh chu kan mit a intawng ta chat a, ka hawi sawn muangchâng lo khawp mai. Ka nu chu ka en ta daih a, ani lah chuan ka awm dan hrethiam map lo hian bawkbawn a thlang mial mial a, zep thu cheng lo, hlauh neih vang ni hauh lovin ka taksa chhung chu a khur ru der derin ka hria. 

Ngampa lo leh ṭi tih hriat zet hian ka hawi nawn leh dêk dèk a, a camera ken lai chuan min lo tin vàng a nih chu maw le. Ka mak ti lutuk chu ka en deuh ren ràwn a, hawi sawn nachâng pawh ka hre lawk lo nghe nghe. Chutah kan awmna lamah a la rawn phei leh ta zel a, 'engtin nge ka lo biak ang' tih ringawt ka rilruah a awm tawh! 

"I ṭha maw?" a aw chu a zàng vah nà chungin a ring hran lo va, a thum deuh chhal bawk. 

"Immm...ṭha e" ka lo ti ve mai a, rawmawl chungchang kha sawi lan ka tum deuh uk a, mahse ka ngawi leh rih ta zâwk! 

"Khawi vêngah nge in awm?" a rawn tih leh chuan mak ti ru deuh hian ka ngawi deuh vang vang phawt a, ka awm dan aṭangin a hrethiam a ni chêk ang.

"Min hrilh i phal chuan?" a tih zawm leh nghal zat a, aw thian hmasa kharh kharhin kan vêng chu ka hrilh ve ta mai bawk. 

"Kan kal mai dâwn em ni ang?" tih leh ka nu chuan rawn thawh a rual a, a bawkbawn lei chu ka bazàr bag-ah chuan a khung nghal bawk a, ka bul lawka ding mipa a en chhoh deuh hâ lai chuan

"U Hruaia a nih hi" ka lo ti ringawt a, ka ṭhianpa a nih thu sawi dâwn ila ka ṭhian a ni chiah bawk si lo va, hmelhriattir dan tur ka ván khawp mai. 

"A nih chu maw le, kha i bazâr ve nge? I va inawrh bâwr ve?" ka nu chuan a ti nghal siam siam a, sawi tur leh zawh tur a hre bik teh e! 

"Bazâr chiah lo, ka tei kual vel mai mai a nih hi! In la bazâr dâwn chauh nge in haw tawh zâwk dâwn?" u Hruaia leh ka nu inbiakna chu ka ngaithla kar a, u Hruaia mawlh chu mak ka ti, a ṭawng duh loh hmel tehreng nen! 

"Kan haw hnai tawh zâwk, chingit kan lei leh ang a, kan haw thei chu a ni mai. Ti teh Nunu, i zu lei thuai teh ang, ka rin ai hun a kal chak tlat" ka nu chuan a ti leh ta zung zung a, u Hruaia mit leh ka mit chu a intawng leh ta chat mai. 

"A nih kan kal mai" ka ti sep ringawt a, ani pawh chuan min lo buk khum nghauh a, ka nu phei chu a kal sawn daih tawh nghe nghe. 

Ka nu chawhmeh en kual vel lai chuan u Hruaia lam chu ka hawi chho leh zauh ṭhin a, ka hmu tawh miah lo leh nghal. Zawng ruai ang mai hian ka hawi kual chhen a, a mak teh thut êm bawk a ni. Ka hawi sek tâkah chuana ka hmu leh ta nge nge a, Traffic point bula chawhmeh zuar bulah a lo han awm daih tawh chu niin, a camera chuan thla a là kual char char a, thlalak lam a tui a nih ka ring ve nghal tawp ringawt. 

Haw a ngaih tawh miau avangin ka ngaihven chhunzawm zel duh ta bik lo va, rawmawl chungchang pawh kha a sawi lang miah lo va, a theihnghilh tawh te pawh a ni mahna le.

Nilêngin inah ka tawm char char a, Adeline-in an ina lêng turin min sâwm viau na a, ka chhuak peih thlawt lo a ni. Inah ka awm e ti lo chuan chetna tur a awm nual thung a, in chhung ka tifai vek a, ka awm awl mai mai chuang hauh lo. Mite angin awmpui kan chhawr ve lem lo va, nula ka awm chhung chu ka pa hian chhawr a tum lo bur. 

A pawi lohna chen a awm ve a, tunlai ṭhang thar leh zual zâwk te hi chu a ṭhen azâr fel em em tho mah se engmah ti ṭha peih lo an ni fur hlawm tawh a, ka tleirawl chhuah aṭanga tun thleng hian han thawh peih lo emaw tih hreh ngawih ngawih ang chî ka neih loh phah nghe nghe a, hmeichhe tân phei hi chuan in chhungkhur fel fai leh fel fai loh hi kan mawhphurna ah ka ngai hmiah bawk. 

Zanah chuan kan zavaiin kan inkhawm kim ṭhap a, inkhawm bánah Adeline-i a lo pêng kawi a, an ina léng turin min sâwm zui nghal a, chhun lama min sâwmna ka hnar fithla ṭhak tawh bawk nen ka zui chhuak ve ta nge nge. 

Ka lén tur thu chu ka chhungte'n an hre vek a, ka lénna tur a hla hran lo bawk a, min ngaihtuah lem lo khawp mai. Adeline-i leh u Rosanga erawh an lo inbauh leh hman hram a, eng ber nge an sawi pawh hi ka hre ṭhin lo, an lo inhau hman ve ziah! 

Adeline-i te in kan thleng phei chu a chhungte'n min lo be siam siam a, anni chhungkua hi keini ai an hausa zâwk daih a, pa ber hi sawrkâr hnathawk niin department pakhata director a ni a, nu ber ni se UDC hna a thawk bawk a, an che thei khawp mai. 

Adeline-i pawh hian a thil duh zawng a nei zung zung thei rèng a, mahse sum làwm vak a niin ka hre lo thung. A nih ang âng hian a ni tlang tawp a, hmeichhe harhvang tak leh hlim thei tak a ni a, sawi tawh ang khan a thinrim paw'n a thinrim rei lo thei hle.

Rei pawh lêng lovin ka haw leh thuai a, ka mu zui nghal chu a ni mai. Ka'n muttui em em leh nghal a, kham lo zetin zîngah chuan ka tho va, inkhawm lai te chuan ka muthlu lo chauh a, chutiang em ema ka mut a chhuah chhan pawh chu ka hre lo. 

Pathianni chawhma inkhawm kan bâng a, chawhnu herin a rawn zawm nghal a, chawhnu tawn tirhah chuan tlaia thova ei rawng bâwl hman turin ka mu siai siai a, ka muttui leh pek khawp mai. Tlai dâr 3 leh a chanve velah ka harh chauh a, ei rawng bàwl erawh ka tlai lutuk phah chuang lo.

Thawhṭanni tûk a ni a, a ngai tê bawkin MZU lamah kan liam thla leh a, fur a inṭan chho tawh bawk nen khua a ṭha lo leh hle a, ruah erawh a la sûr hran lo va, khaw awm dan leh chhum zìn chûk chùk dan aṭang chuan a sùr thuai a rinawm hle thung. 

Bus pawh chang buai lo law lawin kan department lamah chuan kein ka chhuk thla hnak hnak a, duh ai ka tlai mah mah tawh a, zirtirtu te'n class an lâk mawlh mawlh tawh ka ring nghe nghe. Kan department building ka thleng thla chu ka rin loh deuh ka hmu leh ta, tu dang ni lovin u Hruaia ngei kha a ni! 

"Eng nge i tih a?" ka ti hliai ringawt a, biak dan tur vak ka hre lem lo hle.

"Ka lo nghak che" a tawp lam chu a thluk hniam ruih a, min lo nghah chhan erawh ka hre lo nasa mai. 

"Engati maw?" ka tih hû chuan

"I rawmawl hi ka lo la kawl reng a, ka lo theihnghilh daih alawm le" ti supin ka rawmawl ngei mai chu a rawn keng lang a, ka lo buk khum ringawt thung. 

"Eng lo, i rawmawl kha ka lo keng ve miah lo a nia, a hma kha chuan ka keng ṭhin a, mahse kan inhmu leh ta mai bawk si lo" nêl zet ang mai hian ka ṭawng chu a dik vei thlap a, ka dang a nal a ni ber zâwk ang chu! 

"A pawi lo, Exihibition neiin ka zin daih alawm le, ni lo se chuan ka rawn kal ngei ang" a ti deuh dap dap a, rawmawl chu kan inpe fel zui nghal bawk. 

"A nih ka kal phawt mai ang, ka tlai tawh mah mah zâwk a" tia kal sawn nghal ka tum lai chuan

"Lawk!" a rawn ti hluai a, ka ding deuh dat a, a hmelah chuan sawi duh a nei tih a lang chiang hle.

"I in thleng thlah haw dâwn ta che ila pawi i ti ém lo ang chu máw?" a ti dam thlup a, chhan dan tur hre lo zet hian

"I tân a buaithlak mai mai, bus-in ka haw zâwk mai ang" ka ti ta ringawt a, ani ve thung chuan

"Buaithlak loh, in in awmna pawh hriat ka duh hrim hrim, kal tawh rawh, i tlai lutuk ang e" a rawn ti zung zung a, chhâng buai tawh lovin ka kal sawn zui nghal nal nal bawk. 

Min thlah ka remti tihna lam ni lovin ka chhâng lêt ta lo mai chauh a ni a, ka rilru tak chuan bus-a haw ka la tum zâwk tho. Nge ni a, ani hian ka haw hran lo tih a hrethiam zâwk!? Min zûam nghal ringawt a nih chuan a tifuh vak lo ang, hmeichhe dang ang ka ni lo. Dik tak chuan a hmel chhe miah lo, ka 'pá' tih chî tak a ni bawk. 

A bula ka awm khan engtin emaw ni ka awm a, ka thin phu a rang a, ka duh nghal ringawt tihna lam ni lovin ka awm a tinuam lo lek lek zâwk ṭhin. Han duh nghal mai tur chuan tu nge a nih tih leh eng ang mi nge a nih tih pawh ka la hre chiang lo va, fimkhur tluk a awm lo tih ka hre ve ran bawk.

Dâr 3 rik hmain class kan bâng fel der a, chawhma lamah khan khua a chhiat hmel viau na a, chawhnu a nih meuh chuan khua pawh a éng leh ta kuar mai. Ka rin ruk ang ngeiin u Hruaia hmel ka hmu ta ngei a, a royal enfield bike chungah a lo ṭhu run a, min lo nghak reng tawh chu niin, awm zel dan tur min tibangbo ngei mai. 

Ka ṭhiante chuan scooty-a chûang chung hian min thlah sap sap a, u Hruaia chu ka en leh zawk ṭhin a, min thlah haw a tum hmel ropui bawk si, sawi tur a vâng tak zet.

"I hmanhmawh vak na nge?" a rawn ti hmasa ta nge nge a, kan inawm hnaih lutuk lo na chungin min uap hneh mah mahin ka hria. 

"Hmanhmawh ve tho e" ka ti thawp sep ringawt a, sawi tur chu vâng tak a ni! 

"A nih chuan lo chûang la" a rawn ti ve leh mai a, ka thin phut dan chu a rang ru leh dawt dawt tawh hle bawk. 

"Min hlau suh Nunu" a tih leh chuan ka thin phu a rang zual sauh a, ka hming a lo la theihnghilh hmin ṭhak bik tawp lo a nih hmel.

"A nih tlan chak miah suh ang che" ka ti ve ta nge nge a, awlsam têa mi thunun dan a thiam phian leh nghal. 

MZU gate lama kan inphurh chhoh tâkah chuan a tlan chak bik hran lo va, ka ṭhut hlat em em leh nghal a, sik ka hlau pawh a ni chuang lo, ka ṭhut hlat satliah ve tawp! Khawiah mah pêng khawmuang lovin min phur tlang ta zel a, Adeline-i a kal lo hlauh zâwk a, awm se chu ka inphur hawtir kherin ka ring lo. 

U Hruaia nen chuan inbe lovin kan chûang dun ta char char a, inbiak theih pawh a ni chiah lo. Ani'n a khalh a, kei a hnungah ka chûang ngawi ran a, bike rum ri lah a zawi lo bawk si, bia pawh ni ila ka ṭawng a hre ṭha thei kher lo ang.

Kan tlan zel a, a tlan chak miah lo nà chu kan  tlan tluang hle thung a, tlai danga traffic jam ziahna ṭhin kha Vaivakawn chho velah pawh kan tâng lo tluk a ni a, kan tlang zung zung a ni ber. A rim lah chu engtin emaw ni hian a rimtui ru riau leh nghal a, amah nen chuan a inchawih vel vek a, a mipa rim bik ka ti mai. 

Nam vul chûk ni si lo hian a rimtui hman rim chu hip a nuam tâwk em em a, leather jacket dum a ha deuh thlap bawk a, ka hmuh tirh ata tawh leather jacket deuh hlir a la ha a, a ngaina ve hle a ni ang ka ring. 

Kâr lovah kan vêng kan thleng der a, tlai dâr 4 a la ri lo hret a, ka chhungte paw'n haw hma min ti khawp mai. U Hruaia erawh a haw leh nghal daih a, chu bakah lut tur paw'n ka sâwm lo hrim hrim a, ngaihtuah chian tâkah chuan mawl ka inti hnuhnawh leh ang reng viau bawk. 

Chumi tlai lah chu eng ka hria nge ni, ka mitthlaah a châm reng leh ta nghal a, a rim zawng zawng nen lam ka bulah awm miah lo mah se ka hre thei hial te'n ka hria. Zana Adeline-i nen kan inbiak lai chuan u Hruaia min thlah chungchang vel chu sawi chhuah ka tum deuh uk a, mahse sawi a hun rih lova ka hriat avangin ka ngawi leh ta zâwk!

Chumi nî aṭang chuan kan inhmu zing ta deuh hlek a, hmuh ka tum em em pawh a ni lo, kan inhmu fuh thei tawp! Inrinni zingah ni se camera nen ka hmu deuh ziah a, inhmu ngun ta na nâ na chu kan inbe ve ta ziah bawk a, ka hriat loh hlanin ka lo en zui leh vawng vawng ṭhin a, mawl ka inti hnuhnawh thei hle bawk. 

Tin, MZU lamah hian ka hmu leh zauh zauh a, eng hna tak nge a thawh ka hre lo va, hre tur paw'n kan la inhnaih lutuk lo a ni ber. Inbiak ngun tâkah chuan a mizia awm ang tur ka hrethiam chawpchilh ve nghal mai a, a hawihhawmin a awkâ a záng vah a, sawi tur chin tâwk a hre hle bawk.

Inrinni zîngah hian kan inhmu zing deuh ber a, ka hmuh ngun tâkah chuan a sual lo tih thlengin ka hre chawpchilh ve zel a, mahse a duh loh lamah chuan a ngêng chî a nih duh hmel khawp mai. 

Ka nu nen pawh an inbe thei fû a, tuk khat ka nu tel lova ka bazâr chu ṭum dang ang bawkin kan inhmu leh a, kan inbia a, kan nui dun vel ta hial a, engtik lai aṭang khan nge a bula awm nuam ka tih pawh ka hre chhuak thei map lo, ka rilrua awm erawh hrilh chî ah ka ngai lo thung. 

A hmel hmuh a nuam em em a, mipa dang chu ni se ka ten chî a ni zâwk mai thei a ni. A chhan chu hmui hmul leh biang hmul nei hi ka ngaina ngai meuh lo va, fai vawng se hmuh an nuam ka ti zâwk ṭhin. U Hruaia erawh inhmeh ka ti tlat lawi a, a vun fai taka hmul ṭo siar siar te chuan a tilang pà zual hle a, a mitmeng ni se a tak nghulh a, a rukin ka duh tawh chu a ni der mai. 

Ni e, ka duh chiang alawm, a rawmawl min pek pawh kha pe lêt duh lovin ka la kawl ṭha reng a, suk fai pawh ka su fai duh rih lo, a chhan chu a mipa rim nam chek chek kha a bo daih ka hlau a ni.

Bullet bike rum ri ka hriat apiang lah hian amah emaw tiin ka beng ka chhi vat zel leh nghal a, suangtuahna mai mah ni se ka ni hman a tinuam ve tlat ṭhin. Inrinni zíng apiangin hmuh ka inbeisei ta ziah a, tuk khat chu ka hmu ta hauh lo mai. 

A chhan lah ka hre der si lo, MZU lamah pawh ka hmu ngai tawh lo va, a hmel hmuh tumin ka hawi kual leh ruai ruai ṭhin, a hnuah erawh a zin leh a nih ka ring hmiah! A hma pawh khan a zin daih thu min hrilh tawh tak alawm, eng hna chiah nge a thawh le?

Hun te chu an liam zel a, zep thu cheng lo, ka vei tulh tulh a, kan inhmuh lohna chin pawh thla dâwn a ni ta. Ngaihtuah loh ka tum pôh leh ka ngaihtuahna a luah khat ting a, ka lehkha zir thlengin a nghawng ta hial a, zir mang lova suangtuahna kawm melh melh châng ka ngah chho ta khawp mai. 

A mak ka ti zâwk, hetiang hian ka awm ngai miah lo; a bikin mipa lakah phei chuan! U Hruaia laka ka luangliam hma leh lutuk chu awihawm loh ka ti hle a, ka mipa vèi zui em em a ni bawk a, a hmasa ber a ni hial ang. A hmaa ka ngaihzawngte tak ngial pawh kha ka vêi zui lutuk ngai lo, mahse u Hruaia ve thung hi chu a dan a dang tlat alawm; kan inhriatna a la rei loh tehreng nen! 

Nilaini zan a ni a, lehkha ka zir melh melh lai chuan ka ril a rawn ṭâm deuh riai riai a, ei tur ka ngaihtuah chhuak zui nghal bawk. Dâr zat ka en hmasa tê tê phawt a, a la tlai lutuk hran lo. Kan vênga alu papawr an zawrhna dawra kal tumin ka insiam a, ka chhuah dâwn chuan ka pa zâwk ka hrilh thuak bawk. 

Dawr ka thleng chu dawr nghaktu'n min lo be siam siam a, alu papawr min siamsak mial mial pah reng bawk a, a fel mai bakah hmeichhe lû zo ve vah vah tak chu a ni. Amah hi nula naupangchhe zawk zawk tawh lo a ni a, customer te lo welcome dan pawh a thiam na rawh e!

"Nunu" min kotu aw ka hriat rual chuan ding deuh datin ka lehhawi a, tu nge a nih ka hre thei mai lo.

"Eng nge i tih a?" tiin min lo kotu chu ka lamah a rawn kal hnai zel a, street light-in chung lam aṭanga a chhun avanga a hmel hmuh chian theih loh ka hmu chiang chiah chu ka thin a phu dep dep nghal.

"Eng nge kan vêngah i lo tih a?" ka ti deuh tawp ringawt a, ka biak dan chu a hawihhawm lo khawp mai, mahse chutiang ka ngaihtuah sî sê hman tawh lo zâwk a ni.

"Saw, ka ṭhiante sawn tih tur an nei a, ka lo kalpui zawk, i mut tawh ka ring a, mahse i lo la mu lo chu a nih hmel" a ṭhiante lam hawi zauh pah hian a ti a, a ṭawng tawp lamah chuan a nui suk bawk. 

"A nih chû" tih chauhin ka chhâng a, a kut pahniha kawng dawm meuh hian min melh chhuk run a, a bân a kau zâwnga a rim pà tak rawn nám chhuak chêk chèk chu rimtui ka tih em em kha a la ni reng.

"Lo kal rawh, ka va thlah ang che" min din hnaih zual sauh a, kei erawh ka thin a phu rang tawlh tawlh thung a, nuam ti chiah lo, ti deuh tho bawk si ang chî hian ka awm ni berin ka hria.

"A ngai kher lo, i ṭhiante bulah sawn va kal leh tawh zâwk rawh" tia ka hnialna pawh chu engah mah a ngai lo va, dik tak chuan hawihhawm ka chhuah satliah a ni mah zâwk, min thlah mah se pawi tihna ka nei lo hrim hrim. 

"Hmeichhia mahni chauha chhuah a him lo, zanah leh nghal" u Rosanga min zilh ṭhin dan ang chiah hian min ti lêt daih a, meng kual ralh ralh pahin ka kal sawn a, ani pawh chuan min lo zui ve mai bawk. 

Kan in lama kan kal dun lai chuan engtin mah kan inbe leh tawh chuang lo va, mahse nuam ka ti ru veng vengin ka hria. A bula awm hrim hrim chu a hahdamthlak ka ti, ka veng hawk ni mai hian ka hre ṭhin. 

Ṭum danga ka hmuh ṭhin dan ang bawkin leather jacket bawk a ha leh tawh a, mahse tun ṭum chu rawn dum ni lovin rawng uk buang thak a ni thung. 

A dum ai khan a inhmeh zâwk emaw tih theih tur khawp hian a inthuam dan chuan ka mit a là zual a, kekawrah Jean kekawr pawl tak ṭha lutuk lo hi a ha bawk a, a pheikhawk erawh eng company nge a nih ka hre chiah lo, en chîk dâwn ila min lo hmuh ruk reng ka hlau ve tho bawk si.

"A nih aw" kan in kawt kan thlen ruala kal sawn mai ka tum chu

"Nunu" tiin ka kutah a rawn chelh chat a, chawp leh chilhin ka taksa chhung chu a sa hat hat nghal a, a chet dan chuan min tibangbo hle bawk.

Ka kut a vawnna chu a thlah ve leh mai dâwn emaw ka tih laiin a kut pahnihin a rawn hum leh ta nghal a, ka alu papâwr ken lohna lam a ni kher bawk nen ka kut chu a hum bo hneh hle. A hmel pà zet mawlh chuan min tizâm ru er er a, ani lahin thlamuan hmel tak hian min melh chhuk run bawk si. 

Ka chil lem te chu a ri dawk hian ka hre ta hial a, thawm a reh ṭhiap bawk nen kan boruak chu dawnsawn ngaihna ka hre lo hle a ni. Ka kut ni se thlah a hnekin nâ ni si lo hian a hum nghet sauh leh ta nghal a, min din hnaih leh zual tâkah phei chuan ka thawk dan a buai a, ka thaw ṭha thei lo mai dâwnin ka hria. 

End of Chapter 2