LOVING YOU A MILLION TIMES By Havali Adam (CHAPTER 1)

LOVING YOU A MILLION TIMES

By

Havali Adam

Chapter 1

'Dâr 4 leh a chanve chhuak Bus-ah haw mai ang, min lo nghak rawh, kan bâng ṭep' Ma'am Ranjini class lâk laiin ka ṭhiannu chu a ruk thei ang ber hian message ka thawn a, min lo hmu reng lawi si ang tih ka hlau khawp mai. 

'Awi, ka va peih lo tak!' tih chu rei lo tê hnuah ka ṭhiannu Adeline-i hnen aṭangin ka dawng nghal zat a, ka view ringawt a, reply erawh ka reply tawh lo, Ma'am Ranjini-in min hmuh vaih chuan a pawi thui dâwn lutuk.

Ma'am Ranjini hi South India lama mi a ni a, Mizoram University-ah hian kum eng emaw zah chu a lo thawk tawh a, Mizo ṭawng erawh tlêm tê a hre ṭawk a, mahse anni tân chuan MZU Campus quarter-ah an awm daih bawk nen Mizo ṭawng thiam a pawimawh tehchiam lo a nih hmel. Zirna lamah hian a khirh ve hle a, Vai a nihna a hriat hle bawk a, class te hi a là duham thei tawp! A thiamna erawh a sâng viau a, University ṭha tak aṭanga zir chhuak a ni a, zirlai te hmaa zirtirna pek leh seminar-a thil sawi vel pawh a hnehsawh miah miah hle. 

Class a lâk chhung zawng chuan dâr zat ka en chhen a, dârkàr khat dâwn a là tawh a, a la duh tâwk miah lo chu a hneawm lek lek tawh zâwk a ni. Ani lah a la tui bawk si, a tua te pawh chuan kan ning vek tawh a, ngaithla ṭha pawh kan awm mang tawh lovin ka hria. 

Dârkar khat leh tlêm class a lâk hnu chuan a duh tâwk thei ve ta hram a, hmanhmawh zet hian ka kal thuai thuai nghal a, Adeline-in min lo nghak rei tawh dâwn bawk si a, muangchanna chî niin ka hre tawh lo. Kan ṭhianpa Hriattean Bus Terminal lamah a bike-in min phur chho hlauh zâwk a, chuti ni lo phei se chu ka thlen chhoh hma vak a rinawm loh!

"Vainu bawk khan em ni last period lá?" a bul ka thlen rualin Adeline-i chuan a lo ti nghal a, ner sak hian ka lo bu nghat a, Ma'am Ranjini hi chu ka nin êm avangin a bulah pawh hian ka sawi fô va, ani paw'n a lo ngei ve em em ringawt zel. 

"I bag kha bus-ah va dah rawh, lehkhabuin i ṭhutna tur ka hauhsak che a nia, inhauhsak an phal vak tawh lo leh nghal a, mahse ka hauhsak lui ta tho che" a tih zawm leh hmarh hmarh a, hmeichhe nunnêm zaidam tak hi chu a ni lo ve chiang a ni. 

"Min lo kalpui rawh, dahna tur pawh ka hre lo" ka tih chuan

"Seat hmasa ber dawttu ah sawn va dah tawp rawh, ka bag bulah khan a ni mai, ka kal phei peih tawh rih lo" a lo ti zung zung a, a bânah pawtin ka kai phei lui ta tho. 

"Ka ning!" a ti hlak hlak a, haw hma a duh tehreng nen keimah avangin a haw tlai phah vek a, ka best ni lo se chu min nghak hram turin ka nawr lui ngam teuh lo ang.

"I ril a ṭam em? Pa Lala dawrah sawn thil va ei ila?" seat-a bag kan dah fel hnu chuan ka ti siam siam a, a peih loh hmel teh e!

"Min tlawn suh" a lo ti hlak a, ka nui tawp ringawt. 

"Nang hi chu âw, i va'n fel tak" tiin ka kuah chung chung vel a, kei ai a tawi zâwk bawk nen min nam sawn a tum rual chuan ka kuah nghet sauh thung. 

"Awm sawn thuai teh HMANGAIHSANG!" fiah faka a tih chuan ka awm sawn ve ta hram a, MZU park-ah luhpui daihin thla te kan là dun a, thlalak ber kher hi chu engtik lai paw'n a inpeih at reng thei.

Tlai dâr 4 leh a chanve a ri hnai a, bus ṭhenkhat chu MZU park kawtah an rawn inhung ṭha sap sap a, chu chu seat la chang ve lo te'n an lo bawr nghal luai luai bawk a, keini erawh seat kan chan vek tawh avangin lung a muang hliah hliah khawp mai. Mipaho chuan hmeichheho chu seat an kian sap sap bawk a, hei hi Mizo nih nawmna pakhat chu a ni. 

Aizawl leh MZU inkâr ringawt pawh hi a hla tham ve a, hmeichhiate tân an ṭhutna dah awla Aizawl thleng ding tlang ṭhin mipate hi ka fak ve thlawt, eng mi pawh ni se, hnam dang mipa tam tak tih theih loh tur leh tih peih loh tur niin ka hria.

Bus a tlan chhuah dâwn tâkah chuan keini pawh kan lut ve ta nge nge a, bus chhungah chuan mipa an ding tlar ṭhap a, kawngka bulah a ṭhen an ding bawk a, kan chep mah mah tih theih tur a ni. 

Tin, MZU lam pawh hian bus hi Hire belh mai se ka ti, zirlai naupang kan ṭhahnem ang reng si a, ṭhutna chang lo kan tam mai bakah hrehawm taka chûang kan kat nuk a, mahni lirtheia haw ṭhinte an rawn chùan ve phei hi chuan tawt zual ṭhin tak kan ni!

MZU Gate kan tlan pel fel a, tukverh chu hawngin thli thaw kan dawng zui nghal a, khaw lúm laia chutiang thli thaw dawn nuam lutuk han dawn chu duhthusamin a nuam! Tanhril leh MZU inkâra kan tlan lai chuan chak zetin bike pakhat hian min rawn tlan pel fua a, a tlan chak mai a ni lo, a bike rum ri chu a bengchheng ruah ruah lutuk! Bus chhunga chûangte chuan kan en zui vawng vawng hlawm a, Royal Enfield Bike a ni leh nghal a, tu nge a nih pawh hre chuang lovin ka ngei ru em em ringawt. 

Tanhril pêng tlan pelin Ramrikawn kan thleng phei a, a ruka ka ngei em em pa chuan kawngpui sira ding chung hian eng drinks emaw ni hi a lo in a, en pawh ka en rei peih lo. A inthuam dan, a lan dan leh a awm dan vel hrim hrim chu ka ngei a ni tawp, a chhan tak ka hre bik chuang lo, a tlan chak vut vut lutuk vang kha a ni mai thei. Hma lam ka hawi ta daih a, bus chhunga hmeichhe ṭhenkhat chuan

"Awi, a pàzia khu!" an ti laih laih a, an mi sawi mêk lam ka hawi chuan kha pa, ka ngei ruk pa lek kha a lo ni a, nuihsawh zet hian ka khi sak a, nungchang ṭha tak a neih ka ring hlawl lo a ni. 

Adeline-i chu biak tumin a lam ka hawi phei a, a lo muhil daih chu niin, a lakah ka inthlahrung hnuhnawh ang reng hle. Haw hma thei reng kha keimah avangin a haw tlai phah a, chutah tih tur a la nei leh ta nghal a, a hun insiam dan a buai phah vek dâwn tih lah haider theih pawh va ni suh! 

Adeline-i nen hian vêng khatah awmin têt tê aṭanga inkawm tawh kan ni a, a châng leh kan inthinrimkhum a, a châng leh kan nui dun vak vak a, inngei chângte pawh nei ve ṭhin mah ila kan inngei rei tak tak thei lo a ni ber. A chhungte nen pawh kan inpawh em em a, an in chhunga ka tlângnèl ang bawkin kan inah a tlângnêl a, ka u nen phei chuan inngam tak an ni! 

Luangmual kan thleng chho va, Vaivakawn traffic jam-ah kan la tâng zui a, mut a tichhuak zual duh khawp mai. Meng ṭha peih tawh lovin ka maimitchhing ta daih a, ka lo muhil hman a ni chêk ang chu, ka harh leh meuh chuan Treasury Square kan lo thleng daih tawh a, Adeline-a pawh a lo harh fel vek tawh bawk. 

Bus chhung chu a thâwl deuh huau tawh a, mahse mipa ding erawh an la awm nual tho. Kan vêng lam panin bus chu a tlan zel a, khua pawh a hniam tial tial a, zan dâr 6 a ri dâwn der mai.

Kan in ka thlen fel meuh chuan dâr 6 a pel fel diam tawh a, inthlak lovin zanriah ka kil ve nghal a, bán tlai hi chuan engkimah ka tlai phah vek ṭhin. Ka nu chu a ṭawng siam siam a, u Rosangan a lo tuihnih zauh zauh a, ka pa a ṭawng ve leh dut dut ṭhin bawk a, kei erawhin sawi tur ka hre hran lo hle. 

Zanriah kan ei zawh chuan ka nu'n min awl a tum thu leh inbual fai nghal turin min ti a, ka inbual zui nghal ta daih a, thleng erawh sil lo turin ka hrilh tho va, inbual zawha sil mai ka tum vang a ni pakhat, mahse a lo sil leh diam tho ka ring. Ka nu hi chu a che peih ve ang reng a, a tih theih loh àwma ka ngaih tam tak pawh tih theih a la ngah a, Pathian zârah a hriselna chen hian a la ṭha pangngai viau chuan ka hria. 

Ka pa erawh nâ neuh neuh a nei deuh reng thung a, ka nu ai hian kum 10 dâwnin a upa zâwk leh nghal a, an pahniha an awm dun tawh hi chuan khawvela thlir ninawm loh ber ka hmu ṭhin. An inhmangaih a, an induat tawn thiam em em bawk a, ngaihzawng emaw pasal emaw pawh nei ve dâwn ta ila chuan ka pa ang hi ka duh, a famkim chu ka ti lo, mahse kawng engkimah ka nu hriatthiamnaa ngah em em a, chu chu hmangaihna rah a ni. 

Zanah chuan assignment buaipuiin ka buai char char a, Adeline-i nen kan in-video call pah reng bawk a, ka thil tih lai chu ka ṭhulh phah chuang der lo. Adeline-i hi chu Mizo depaetment lam daih a ni a, ka subject nen chuan inang lo nasa tak a ni. 

An Professor pakhat a star em em thu a sawi chamchî a, tun ṭum chu a star ve tak tak tawh a ni ang, a sawi ngun tawh tlat! Ngaihzawng lam ngaihsak reng reng lo chî hi a ni a, kei erawh a hmingin pahnih chu ka nei ve tawh a, mahse Higher kan kal lai leh College kan kal laia mi daih a ni tawh thung. 

Chutia inbe reng paha assignment ka ziah mial mial lai chuan u Rosanga a lo lut a, engmah a sawi lem lo va, ani hi chu a duh hun hunah a rawn lut tawp zel hrim hrim a, hnawksak pawh ka ti chuang lo. Ka room-a a rawn luh danah a léng chhuak dâwn lo a nih ka ring, min be miah lovin a phone chu a khawih mual mual ringawt. 

Adeline-i chu a rawn nui thler leh duai duai ṭhin a, kei pawh ka nui zawi tehchiam chuang lo. Kan thil sawi duh zawng sawi char chara kan nuih dun kar kar lai chuan u Rosanga a lo ṭawng ve thut a, Adeline-i chu a ngawi chiang hle.

"Chu pa chu a hmelchhe leh áwm?" u Rosanga ṭawngkhum dan ber kher chuan ka nuih a tiza tawp!

"Awi, tu ringawt nge a? I u kha elo?" Adeline-i chuan a rawn ti lang lang a, phone kaltlang paw'n a ṭawng zawi lo a nia, a bulah awm phei ila chuan a ṭawng ring teh ang chu!

"Adika i star a nih mai chu!?" ngeiawm zet hian u Rosanga chuan a fiam leh hluk a, Adeline-i ngei tâwk a tling chiang khawp mai. 

"Awi, kha pa kha sawi ve ziah suh, i hming ṭhin ṭhin nen, i hming aṭang hi chuan nupui pathum vel nei tawh i ang" thinrim lungni lo zet hian Adeline-i chu a ṭawng pang pang a, hmân aṭang tawh u Rosanga hming hi ṭhing a ti thei tawp a, tunah pawh a la ti reng tho.

"I ṭawngthei zêk leh nghal a, Adika a nih mai chu!" u Rosanga leh ka ṭhiannu inchhan dan vel chuan engmah min tih sâwttir thei meuh lo. 

"Hming pathlawi" pakhatin a tih laiin pakhat ve thung chuan

"Adik" tih hlirin a chhâng lèt a, Adika hi kan vênga mi niin tlêma huihphâi deuh a ni a, Adeline-i a star thei em em leh nghal a, ka ṭhiani lah hian a duh teuh si lo, chu chu hre ranin u Rosanga hian a chhaih ta ṭhin a ni. 

"Duh tâwk teh u, in intithinrim tak tak mai dâwn" nui paha ka tih tâkah chuan u Rosanga zâwk chu a ngawi ve mai a, Adeline-i erawh a la lungawi lo nasa mai. 

"I nau room-ah pawh khan awm tawh suh, bialnu i nei a ni lo'm ni? Lêng ta che hming pathlawi, eng nge kha tah khan i tih ve reng?" Adeline-i chuan a lo la ti bawrh bawrh a, nuih loh theih pawh a ni lo. 

"Kan inhmuh hun chu ka kuk lawlh ang che, ṭawngthei zit zet lutuk mai" ti supin u Rosanga chu a chhuak ta daih a, an va han inngam dun miah miah tak!

Dâr 10 dâwn thleng Adeline-i nen chuan inbe chhunzawm char charin kan inmangṭha ve thei ta hram a, thil tam tak sawi ṭeuh tawh mah se kan inhmuh hunah sawi tur a ngah leh em em tho ang. Assignment ka tih zawh hnu chuan ka mu nghal daih a, tun lai chu zir tur leh ziah tur neuh neuh a tam ṭhin lutuk a, a chauh thlak lam mah mah a ni. 

A tukah chuan ka tho hma lo hle a, dâr 8 dâwnah daih ka harh a, ka muttui miah miah khawp mai. Tukṭhuan ei khamah class kal turin ka insiam zui nghal a, Adeline-i paw'n min rawn call-in bus a chan tawh thu a sawi nghe nghe a, chu chuan min tihmanhmawh zual hle bawk.

Ni tin class kalin hun chu kan hmang ral bek bek a, rin ai hun a liam chak zêk leh nghal. Thla khat a ral meuh chuan Adeline-i paw'n an professor a star leh tawh lo va, amah ber berin fiamthuah láin sawi nuam a ti leh ta nghal a, a va nuihzatthlak thei tak! 

Kan ina a lo kal lahin u Rosanga nen an inhnial hlum lo chauh bawk a, u Rosanga lêng chhuak tur pawh lungawi lo fêa kaltir a ngah a, kei leh ka chhang chiah Lawmtea ve thung chu kan lo nui kur kur a, ka nu leh pate paw'n u Rosanga leh Adeline-i hi chu ngaih khatah an ngai hmiah tawh, khap enah pawh an en lo. 

Hun rei lo tê hnuah semester exam kan nei chho nghal a, ka zir ngawrh ve deuh bawk nen ka tichhe hran lovin ka hria. Kan department hi a dinna a la rei lutuk hran lo va, professor pangngai hi pakhat neiin a dang erawh assistant professor pathum leh guest lecturer pathum an ni mai a, kan zirtirtute zingah hnam dang pakhat chiah a awm bawk. 

Nipui lâi tih takah khua chu a lûm thei em em a, thlan a chhuak ṭha duh ṭhin khawp mai. Semester exam kan neih zawh hnu chuan kâr khat chawlh kan nei a, ina ka awm der der loh leh kan dawra kal a ni mai. 

Ka nu leh pa hian damdawi dawr changtlung tak an enkawl a, ni tinin an pahnih hian an kal mai ṭhin a, kei leh Lawmtea erawh zirlai kan la ni thung a, u Rosanga hi sawrkâr hna pakhatah inziak tlingin kum 5 dâwn chu a thawk ve tawh bawk. 

Kan chhungkua hi rethei lutuk lo, mahse hausa em em chuang si lo ang chî hi kan ni a, mite angin sum tam tak lâk luh huau huauna nei lo mah ila keimahni tâwkah kan hlim ve em em a, mi chhungkua awtin kan awm khât khawp ti ila a sual tam pui lo ang.

Nilaini a ni a, khaw lûm lai e ti lo chuan zing kâr phat aṭangin khua a chhe ang reng hle a, khua a lûm bawk nen ruah sûr chu pawi ka ti hran lo. MZU Campus kan luh lai te chuan nasa lutuk lo hian chhum a zíng a, ruah erawh a sûr tawh lo va, boruak chu a hit dai nuam hle bawk. 

MZU Auditorium zawn kan thlen chuan Adeline-i chu an department lamah a pêng a, kei erawh kal fê a la ngai thung a, bus lo tlan huna chùan mai ka rilruk tehreng nen bus lah chu a vâng pharh leh nghal. Kan department kawngah hian bus a tlan leh zauh ṭhin a, chûang tur chuan nan fuh a ngai ṭhin khawp mai. 

"Awi!" kawng sira ka kal ṭha hle hle lai bike pakhatin min chil per sawk avang chuan ka ṭe chhuak nghal ṭhawt a, bike pawh chu a ding zui ve nghal mai bawk. 

"I va'n mawl ve le? Ka kal tih i hre reng lo em ni?" ti deuh hlak hlakin ka kekawr leh kawra chirh kâi deuh nuaih chu ka rawmawl chuan ka hru hliau hliau a, lungawi lo tak ka ni!

"A laklawh lutuk alawm le" aw dam zet hian chu pa chuan a rawn ti a, a helmet chu full-face-in a khum tlat a, ka hauh hrep a hlau te pawh a ni mahna!

"Pawi lo mai, i kalna turah kal tawh rawh, ka inbuaipui thei mai ang" ka tih chuan ngawi reng hian a kal sawn a, a tlan zui nghal mai dâwn emaw ka tih chu a ni teuh lo. 

"Kha, hei hian leih huh zeuh zeuh la, i hru reh awlsam zâwk ang" tiin tui bottle hi min rawn pe a, ngampa em em lo hian ka lo ban ve mai bawk.

"Khaw maw, keima'n ka lo tihsak ang che" tih leh ka rawmawl hum lai chu rawn lâk a rual zawm zat a, a chet dan hrim hrim chuan a ruka ka lungawi lohna pawh a chawk dai vekin ka hria.

"Kal tawh rawh, ka inbuaipui thei tak tak a nia" ka tih leh pawh chuan ka rawmawl hmangin min la hru mawlh mawlh a, engtin emaw ni hian ka awm reuh leh nghal a, ka àwm a tinuam lo lek lek dâwn alawm le.

"Heih" tia ka rawmawl laksak ka tum chu a kut zâwk ka zu hmer fuh palh a, ka thlah leh rang teh e!

"A tâwk tawh" ka ti leh ringawt a, min hnaih zet hian a rawn ding zui nghal a, Mizo hmeichhiaah chuan a sâng pâwl ka ni ve a, he pa hi a tê chhe zawk zawk miah lo. 

"I rawmawl pawh keimah avangin a bal vek a ni màw?" hniam dam ruih hian a ti a, a hmel chu chiang taka hmuh ka châk et et leh nghal.

"Kha, hei hi lá la, keiin hei hi ka hawn ang a, ka suk fai hunah ka pe leh dâwn che a nia" ti zung zungin a rawmawl chu ka kutah a rawn hmehbel chawt a, ani'n ka rawmawl a ak ṭha hmak thung a, engmah pawh ka sawi ve hman lo. 

"Heih!" bike-a a ṭhut kài lai chuan ka ti deuh thâwr a, a helmet full-face chu nawr chho zeuh pah hian a rawn hawi a, a mitmeng chu ka rin loh lam daih, ka hmuh tawh hnu a ang ka ti hle bawk. 

"Ka hria alawm" ti supin a bike chu a ti rum vut vut a, hnehsawh zet hian ka dinna lamah a rawn tlan chho va, a chet dan vel chu ka beisei loh lam hlir a ni. 

"Lo chûang rawh le" inhre sa ang mai hian min rawn be leh a, kei erawh mak tih avangin ka lo ding khawng ût ringawt. 

"Dâr eng zatah nge class i neih?" a tih leh chuan aw thian kharh kharh pah hian

"Dâr 10-ah" ka lo ti pangngai ve mai a, ka rin ai ka chhâng awlsam ang reng.

"Chu leh nghal, dâr 10 rik nân minute tam a awm tawh lo a nia, lo chûang rawh le" a ṭawngkam chhuak reng reng chu a záng vah a, mahse a ṭawng ring chuang miah lo. 

"A nih, i khalh thiam em?" ka zawhna avang chuan a mitmeng aṭang paw'n a nuih a za tih ka hmu thiam nghal vek!

"Ka khalh thiam i ring na nge?" a rawn tih chuan

"Ring vak nàng, kawnga ka kal ṭha hle hle lai pawh min chil per alawm" nêl deuh ang mai hian ka lo ti ve hmak a, ka ṭawng dan vel chu kei ngei paw'n ka inhrethiam bik chiah rih lo.

"Lo chûang mai mai teh" ngeiawm ni miah si lova a rawn tih chuan ka chûang ve ta ringawt a, ka hmelhriat ngai pawh ni lo ka inphurtir ringawt chu a nia, a mak a ni! 

"Tlan chak suh" kawng kual kan tlan lai chuan ka ti hluai a, royal enfield bike ni lo hlauh phei se chu ka chûang nuam hauh lo ang ka ring. 

"Eng department nge?" bike khalh paha a rawn tih chuan ka hrilh ve mai a, ka sawi vang nge ni, a khalh dam ta viau bawk.

Inbe miah lovin kan chuang dun ta char char a, amah sik hrim hrim chu ka hreh bawk nen bike hnung ka vuan ṭung a, kawng khuar lai deuhah te chuan kan insawh leh dawt ṭhin a, mahse a khalh chak loh avangin kan insawh nâ hran lo. 

Kan department thlen thlak hma kawi thumna vel kan tlan lai chuan ruah a rawn sûr thut a, ka unlukcy day a ni ringawt alawm le. A hma zawnga duh miah si lo khan tlan chak turin ka ti leh lawi a, ani pawh a phit ta khawp mai. Ka hlau viau dâwn emaw ka ti a, ka hlau miah lo leh nghal.

Kan department building-a parking zau ṭha zetah chuan min tlan luhpui a, a helmet khum lai lá thla chuang lo hian bike seat chu a hawng mial mial a, raincoat a zawng ni ngei tur a ni. Ka rin ang ngeiin bike seat aṭang chuan raincoat a rawn phawrh chhuak a, kalsan daih ka tum vei nen mawi ka ti leh chiah lo a ni ber. 

Min en miah lo hian ama chet chetin a che mawlh mawlh a, kei erawhin ka en kar thung a, raincoat a hâk dâwn tâkah chuan a helmet a phelh ta, ka rin phak bakin a hmel a lang upa daih!

A nihna takah chuan ka hmuh tirh aṭang khan zirlai ve tho a nih ka ring a, mahse a hmel ka hmu chiang chiah chu kum 30 a pelh tawh loh paw'n kum 30 vel chiah chiah a ni ang ka ring. A mitmeng chu a zau hran lo va, mitval a nei paw'n ka hre lo. A hnap thlengah chuan tam uchuak lo hian hmul a ,o siar siar a, a khabe velah pawh hmul a ṭo thluah bawk a, a inzuah buk chher chhur viau ná chu inhmeh ka ti ru phian lawi a, chutianga lo ngaihtuah chet chet chîam tur pawh ka ni lo tih ka inhre reng, mahse ka ngaihtuah tho bawk si. 

"I hming min hrilh thei ang em?" a raincoat hâk lai zip ṭha mawlh mawlh pah hian a rawn ti zawi sup a, min la en chuang miah lo bawk. 

"Nunui" ka lo ti ve mai a, ka hming ka sawi hnu chuan min rawn en ve ta nge nge. 

"Hruaia" tih leh a kut chu ka lama phar a rual zui zat a, a polite phian!

"Kal tawh rawh, ka ngaihtuahawm loh" kan inchibai zawh hnu chuan a rawn ti zawm nghal a, ka rilru a hre tlang vek emaw ka ti hman alawm le.

"A nih ka kal mai" ti sepin ka inher a, ka tukhum lah chu a za mer mer leh nghal a, a chhan ka la hre lo em em zui! 

Classroom-a ka awm lai te chuan ka ngaihtuahna chu hmun dang daihah a awm a, kan zirtirtu thil sawi pawh ka thluakah a lut tak tak thei lo. Tu nge a nih pawh ka hriat loh pa nen kan inchibai laia ka awm dan kha mak ka ti bâng thei lo va, ka kut a hmer laia ka lum deuh pup pup chhan te kha ka hre lo hle a, ka zâm ruk er erna chhan pawh kha ka hre chuang lo. Amah lah kha ka hmuh tawh hnu a ang ka ti em em ringawt a, ka hmuh tawhna áwm ka hre chhuak thei mai bawk si lo.

Rilru pe lo zetin zirtirtu thusawi chu ka ngaithla liam puat puat a, ka kuta ka rawmawl ni miah lo awm ran te chuan ka ngaihtuahna a tikal thui zual hle a, ani lah khan ka rawmawl a kawl daih zui! Hawi kual zuk zuk hmasa tê tê phawtin rawmawl chu ka hnim chhin a, a rim chiah chiah kha a ni. 

Ka mitthlaah a hmel kha a rawn lang nghal uar uar a, a mitmeng leh a bianga hmul ṭo dan zawng zawngte nen lam a taka hmu ang mai hian ka mitthlaah chuan a lang chiang em em a, ka ngaihtuah zui reng chhan hre lo mah ila ngaihtuah zui chu a hahdamthlak ka ti ru viau lawi a, a mak teh thlawt e!

Tlai lamah chuan khua a la ṭha lo tluang zel a, Adeline-i nen pawh bus nghakin kan ṭhu leh vàng tawh a, chutia ṭhu chunga kan titi melh melh lai chuan ka mit là tak bike pakhat hi a rawn tlan a, chawhma lama ka thil tawn kha ka ngaihtuah chhuak nghal bawk. 

A khalhtupa chu ka en zui ru reng a, Gate bulah a bike chu a tiding a, rei pawh indap lovin a iptê aṭang chuan wallet a phawrh a, Gate bul lawka ATM boot-ah chuan a lut zui nghal bawk. A helmet khum chu a mit chin lang theiin a dah a, kan awmna a hla deuh bawk nen chawhmaa mi kha chu a ni leh lo te'n ka hre hnuhnawh leh a, thil ṭul lo ngaituah reng tur ka ni miah lo maw lè. 

"Eng nge i en reng a?" ka ṭhiannu min biakna chuan min tiharh nghal zawk a, chhan pawh ka chhâng chuang lo.

"Maw!?" a rawn tih leh ngat a, MZU gate bula ATM boot lam chu ka thlek khum zeuh a, chutih lai tak chuan kan mi en reng pa chu a rawn chhuak ve chiah bawk. 

"Eng nge?" hriatthiam loh hmel zet hian ka ṭhiannu chuan a ti hniam sap a, hrethiam lo àwm rèng pawh a ni! 

"Eng lo" ka tih laiin ka mi en ruk reng pa chuan a helmet khum chu a phelh a, amah ngei kha a ni tih ka hre zui nghal.

"Saw pa sawn tui bal deuh min chil per avangin kan department thleng min phur thla a, en teh Adeline, i hriat hnu a ang i ti ve em, ka hmuh hnu a ang tawp!" ka tih zawm nghal sep sep a, ka ṭawng hre pha ang hrim hian chu pa, Hruaia inti lah chuan min rawn la en zui. 

"Hre teh nàng, chu i va luck bik ve?" ka ṭhiannu min chhaihna chu ka ngai pawimawh lo teh e! 

"Saw a lo kal phei a nia, a la hria che a nih hmel" a ti leh nghal a, ka ṭhiannu sawi ang tak takin a rawn kal a nih chu! 

MZU park-a a rawn pen luh hma aṭang ringawt pawh ka sa deuh pup pup nghal ringawt a, ka kut chu a rukin ka hum vak ringawt bawk a, a rawn thleng hnai telh telh a, ka zâm ru tawh tak zet a ni. Phula a rawn kal phei lai chuan kan sira hmeichhe ṭhenkhat chu an lo phun sep sep a, eng tak hria ni hlawm maw! 

"Phur haw i ngai em?" kan hma lawka dingin min rawn mawl biak tawp a, ka hming ka hrilh kha a theihnghilh tawh a ni mai thei. 

"Ngai lo ve" ka tih laiin Adeline-i chuan

"Duh leh chûang haw daih rawh, kei chu keimah paw'n ka lo chûang haw thei" a lo ti sawk sawk a, a awm dan teh thut ka hrethiam lo lutuk chu ka en hû ringawt. 

"Lo chûang la, kal nghal mai ka duh asin" pangngai zet hian Hruaia inti pa chuan a rawn ti ve nghal zat a, chhan dan tur ka baihvai teh e! 

"Ka" tia ka ṭawng laklawh laiin ka ṭhiannu bawk chuan

"Va kal rawh, bike-a i chuan haw te chúan in i thleng hma daih zâwk dâwn alawm" a lo ti leh zung zung a, za lo zet hian ka nui hul hak a, a awm dan vel chu mak ti tak ka ni! 

"Ka lo chûang lo mai ang u Hruai" ka inngaihtuah veng veng hnu chuan ka ti ta tawp a, û ka tum miah lo kha a ni a, mahse a hmel han en reng reng paw'n û loh chî a ni lovin ka hre leh ta zâwk a ni. 

"Chuti maw, a nih ka phei ang e, ka hmanhmawh deuh tlat" tih leh kal sawn a rual nghal a, kan inhriatna a la rei lo lulâi bawk nen han inphur hawtir ringawt chu a dikin ka hre rih lo a tin a ni!

"U Hruaia maw!? Eu...a va ṭha dâwn ve, a hmel pawh kha a chhe miah lo" min nek tâlh tàlh palh hian Adeline-i chuan a rawn ti zui zat a, ka hmui ka tihsawih khum vak ringawt. 

"Min hrilh chiang dâwn miah na nge a?" ngawi hle hle thei lo zet hian a rawn ti leh a, a la nui ver ver zui! 

"I ho êm mai a! Ka sawi vek tawh khâ, thil dang engmah a awm lo" ka tih chuan

"Ka awih teuh lo mai, vawiinah in inhre chauh a, mahse a hming i lo hre hman vel a, chutah i la û zui a, awi, kei chu thil kal dan hi a dik vel dâwn riauin ka hria" a lo tih zawm nghal mial mial a, thil ni lo lô a ngaihtuah thleng leh nghal ringawt dâwn a nih hmel. 

"I zak lo" chhan dan tur hre lo zeta ka tih chuan a rawn nui nasa mai.

"I ninawm, min chhaih nghal ringawt suh! A hmingte chu ka hriat ve bawk lovin, amah khan min hrilh alawm, kei paw'n ka hrilh ve tho, nui tawh suh" ka tih lai te chuan a nui nasa tulh tulh thung a, hrilh pawh ka hrilhfiah buai vel peih tawh lo.

Bus-a kan chùan haw chhung zawngin u Hruaia chanchin hlir min sawipui a, a chanchin ka hriat tlêm tehreng nen detective ang mai hian zawhna chhán sen loh min zâwt awl lo va, ka nin thu ka hrilh paw'n awmzia a awm chuang lo. Zana kan inbiak thlengin a sawi chhunzawm char char a, a sawi dik pakhat erawh u Hruaia kha a hmelchhe miah lo. 

Ni e, mipa hmelchhe zawk zawk a ni lo, mahse hmelṭha lutuk a ni hran lo va, a hmel kha a pá ka ti ru viau bawk. A ruk tak chuan hmuh leh ka châk a, pangngai taka inbiak ka châk bawk, chu chu ka rilru dik tak a ni. Mahni leh mahni inbum rual ka ni tawh lo va, mahse ka hmuh leh châk chhan ber erawh ka hre bik chuang lo thung. 

End of Chapter 1

(Bul kan han ṭan ta nge nge chu a ni a, eng tak ang i maw!)