MARÂWNA By Havali Adam (LAST CHAPTER 4)

                                        MARÂWNA

                                               By

                                      Havali Adam

                                    Last Chapter 4

Zanriah ei kham dâr 7 velah Alex-a a lo lêng a, sitting room-a ka chhuah chuan Dindini leh Alex-a chiah an lo awm a, u Dawngzeli hmel rèng hmuh tur a lo awm tawh lo. Ka mitmeng aṭang ka rilrua awm hrethiam zet hian Dindini chuan u Dawngzeli a lèn chhuah lawk thu min lo hrilh thuai a, rei lo tê hnuah u Marâwna hmel kan hmu zui zat bawk a, u Dawngzelin sawi fô lo mah se tunah chuan mipa luhlul tak a ni tih ka hre chiang ve tawh a, mahse ka zahawmna tichhe zawng leh ka duh loh zawnga chet a nei ngai miah lo, chu tak chu ka duhna leh ka hmangaih zualna chhan pakhat a tih theih ang.

"Sawm, kan chhuak lawk dâwn aw, kan rei lo ang, ei tur kan lo hawn dâwn a nia, u Dawngzeli rawn haw hmâin kan lo haw leh hman ka ring" ding uaih pah hian Dindini chuan min rawn bia a, ka lo buk khum nghat nghat ve mai bawk.

"Khaw'nge i u Dawngzeli hi?" Dindini te an chhuak fel ta maw tihah u Maráwna chuan min zâwt nghal chat a, zan dangah a hmu deuh ziah ṭhin si a, a hmu lo thut chu mak a ti deuh a ni mai thei. 

"Ka hre lo, thil zawh duh che ka nei u Marâwn" ka tih chuan

"Sawi la" a lo ti dam thluam a, a bân hrawl khauh ṭha tak chuan a dara bei turin min kuah titih nghal bawk. 

"Eng lo, dik takin min chhang rawh aw" ka ti hmasa leh tê tê phawt a, ka thil zawh tur avang chuan a lungawi loh phah ang tih ka hlau ru khawp mai.

"Chhang ê le" a lo ti sam mai a, min en deuh vang vang a, ka hmel aṭang chuan thil vei ngut ngut ka nei tih a hriatthiam mai ka ring. 

"I nupui nena in inṭhen chhan kha keimah vang em ni?" ka tih chuan ngawi reng hian min en a, inlâk hran ka tum rual chuan min kuah nghet sauh thung. 

"A nih theihna lai a awm, mahse a bul ber erawh a ni lo" a ti ram deuh hmuk a, a aw aṭang ringawt pawh a lungawi lo tih hai rual a ni lo.

"Ka thluak chhunga i awm reng thu leh i laka inthiam lo ru renga ka awm ṭhin thu ka hrilh tawh che kha i la hria em?" a tih chuan ka lo bu nghat a, sawi zawm nghal mai lovin thawk a là hmasa leh phawt bawk. 

"Zan khat chu ka mumangah ka hmu che a, i hming ka lo lam chhuak palh a ni awm e. Chu chu ka nupui khan a lo hre si a, a thik ta em em che a, kan inkâr pawh thla khat chhung vel chu a ṭha lo, mahse kan inṭhen chhan erawh thil dang daih a ni" a tih chuan ka ngaihtuahna a kal thui khawp mai.

"A nih chuan eng nge i inṭhen chhan dik tak?" ka ti leh ngat a, a sawi duh chiah pawh ka ring lo.

"Nakinah i la hre mai ang" tih chiahin min chhang a, ka zâwt zui zel duh ta bik lo, mi â nilêng tân lo chuan a sawi duh lo tih hriatthiam loh chî pawh va ni suh!

Dindini leh Alex-a te an lo haw leh tâkah chuan kan ṭhut dan leh kan awm dan kan tidanglam a, inngaizawng eng ang mah ila a lang a paua inkuah leh innghen tih vel hi chu a mawi ka ti chiah lo, nupa te hi chu thuhran ni se! Thil kan ei laiin u Dawngzeli leh u Thiangpuia te pawh an lo thleng a, u Dawngzeli chu ka en lo lui char char a, a lungawi lo hmel ka hmu châk rih lo ti ila a sual lo ang.

U Marâwna nena thla khat leh a chanve vel kan inngaihzawn tâkah chuan ka nu leh pate paw'n an hre ta nge nge a, ka rin lâwk ang chiahin min hau miah lo, mahse an ṭawng dan aṭang chuan an lungawi lo tih erawh ka hre thung. U Dawngzeli kâ aṭanga hria ni lovin khaw chhunga kan inngaihzawn thu a than tawh vang zâwk a ni a, khuaah awm lo mah ila a nuam lo duh khawp mai. A tam zâwk chuan zak lo min ti a, min sel a, engkim u Marâwna paw'n a hre vek a, engah mah ngai lo turin min fuih nasa hle a, dik tak chuan ka rilru a dam thei lo a ni. 

U Dawngzeli hnen aṭangin zilhna thu ka dawng ni tin ṭhin a, min ngaihtuah tih chu ka hria, mahse a ti lutuk ang tih erawh ka hlau ru viau thung. Hmangaih ka nei a, chu ka mipa hmangaih nen chuan kum tam tak hnuah kan inngaizawng ve chauh a, thil pawi vakah ka ngai hran lo. Ni e, u Marâwna hi nupui nei tawh, ṭhen leh tawh a ni tih ka hai bik reng reng lo. A hma zawnga min duh miah lo leh a nupui nen an inṭhen hnua min rawn duh hnuhnawh ta hi ka chhungte tân chuan a tha nât thlak dâwn tih ka hai lo, mahse keimah ber hian ka hmangaih miau si a ni.

Thlate chu an liam zel a, kei leh u Marâwna pawh kan nghet tulh tulh a, a chhungte leh ka chhungte paw'n min en liam tawp tawh a, u Dawngzeli phei chuan engmah a sawi peih tawh lo. Ka laka u Marâwna awm dan chu a lungawi thlak hliah hliah a, a nupui hlui nen pawh an chanchin a reh fel ta hmak a, kan inngaihzawn aṭanga thla thumna velah kha chuan an la buai deuh nak nak kha a ni a, tunah erawh tûma'n an sawi tawh ngai lo; u Marâwna nena kan inngaihzawn thu thlengin! 

A kuma kum kan inzui hnu chuan kan thil training pawh kan zo fel ta, ṭha takin ka training zo a, ka result pawh a chhe hran lo. U Marâwna paw'n min lawmpui hle a, kei chang ni lovin Dindini pawh a lawmpui ve khawp mai. Thil dang ngaihtuah tawh lovin hna ka dap kual nghal a, zirtirtu hnaruak neuh neuh chu a zavaiin ka dil vek a, pakhat tala ka tlin theih hlauh chuan a ṭha dâwn lutuk tlat! Kan inngaihzawn tirh lai ang em emin ka chhungte paw'n u Marâwna chu an mil lo em em tawh bik lo va, kei erawh a chhungte chuan min be ṭha thei viau thung.

"Lo lut rawh" dam diai hian ka ti lang lang a, kawngka bula ding ka hmeichhe hmuh hmel chu ka rin loh lam daih a ni.

"In awm hlauh a, a va tizia ve, vawiin khan ka lo kal thlawn tawh leh nghal" a ṭawng dan aṭang chuan a zak miah lo tih a hriat khawp mai. 

"Eng nge i duh a?" u Dawngzeli aw pawh a nêm bik miah lo. 

"Eng duh lo ve, i nau zâwk hi maw le, thu thlum tui tak fah tur ka nei a, chu vanga lo kal chu ka ni!" a tih chuan

"Eng thil nge ni ta?" ka lo ti ve mai a, engtin nge kan in awmna te hi a lo hriat reng reng ni!

"Ka pum puar luah hi i hmu em? A chhunga nautê awm mêk hi Marâwna fa a nia, chu vang chuan ka pasal Marâwna hi lo hnaih tum buai tawh suh, zar chhen lo la chu a rawn pan che ka ring hauh lo" u Marâwna nupui hlui chuan a ti ta riap mai le! 

"Eng nge i thil sawi awmzia hi? In inṭhen fel vek tawh a ni lo'm ni?" lungawi lo ru taka ka tih chuan

"A teh nâng, a lo bum char char che a nih dâwn chu! I hriat lovin ni tin zan tin min buaipui reng ṭhin alawm, kârah fa a awm tawh dâwn bawk a, kan inhruai leh ngei dâwn tih ka lo hrilh mai mai che, a hrilh ai che chuan ka hrilh che hian i nâ lo deuh ang" a ti ta mawlh mawlh mai, ka thin phu chu rang dawt dawt tak a ni.

"Ngawi hmak rawh zak thei lo nu, khatiang khan ka nau hi ṭawngkhum reng reng suh aw!" vin hlar hian u Dawngzeli chuan a ti ṭhawt a, u Marâwna nupui hlui erawh ngeiawm zet hian a lo nui sak duh lek chauh! 

"Khawngaihthlak reuh lutuk" min en ral chung hian a ti kher a, a ṭawng dan chu u Dawngzeli thinin a tuar ta ngâng lo. 

"Kan in aṭang hian chhuak nghal rawh, i pasal LALRAWNKIMA pawh chu ka nau rawn beisei buai tawh lo turin hrilh nghal bawk ang che!" a bèn hawi sawk hnu chuan a ti vin hrawk a, ka rilru nâ lutuk chu ka âwm ka dawm tawp ringawt.

"In rapthlak unau hle mai" tih leh chhuah a rual a, min chhuahsan chiah chu ka ṭhu hnawk a, a nât hian ka nâ ngawih ngawih a ni.

Zanriah ei khama u Marâwna hmel kan hmu chiah phei chu u Dawngzeli a ṭawng nasa hle a, engtin mah ka khap lo, a duh tâwkin ṭawngkhum bawrh bawrh rawh se. Kum khat chhung teh meuh min lo bum char char a ni awm si a, ka rilru a nâ bawk si nen ka tih ngaihna hre lo chu za lo zetin ka nui leh tawp ringawt ṭhin. U Marâwnan thil awmzia min zawh chuan ṭawngkâa chhang lovin a hmaiah ka bêng ri sawk a, ka mittui a tling pam bawk a, a hmel hmuh leh ka duh tawh loh thu àm takin ka hrilh phiar phiar bawk. 

U Dawngzeli thusawi zawng zawng kha a awih lo a ni mahna, kan in aṭanga chhuak ta mai lo chuan Dindini a zâwt leh ngat a, Dindini paw'n lungawi lo tak hian engkim, a nupui hlui lo kal thu leh min ṭawngkhum dan zawng zawng a hrilh vek a, ka thlavang hauh zet hian a dem thu a chhak chhuak mawlh mawlh bawk a, chutah zet zawng u Marâwna chu kan in aṭangin a chhuak rang khawp mai. A ni leh zel a awm lo chiah phei chu e, awm ngaihna pawh ka hre lo, a nât hian ka nâ ngawih ngawih a ni. 

Ni tin zan tin min biak tum leh min hmuh tumin u Marâwna chu a lo kal ziah a, u Dawngzelin a lo phal lo zel a, kei tak paw'n hmuh ka châk hlawl lo. Inah ka inkhung tlawk tlawk a, a chang chuan kan khuaa haw daih te ka duh rum rum ṭhin, mahse ka haw a nih chuan ka mualpho nasa dâwn si, kei chang ni lovin ka nu leh pate tân pawh a zahthlak zozai tawh lutuk! Zan khat erawh u Dawngzeli paw'n a dang thei ta ngâng bik lo, u Marâwna chu a rawn lut nghal thuai a, tu hmai mah zah lovin room-ah a lo lut tlang nghal hmiah bawk. 

"Engkim ka sawifiah ang, min ngaithla hram teh" a ti dek dek a, ka ngaithla peih lo chuan

"Khawngaih takin min rawn ngaihven tawh suh u Marâwn, i thusawi engmah ka ngaithla peih lo, ka hmu duh tawh lo che a, ka ring tawh lo bawk che" tiin a ṭawng lai chu ka pawt chat hmak a, ka ṭah a chhuak ru em em bawk. 

"Ni lo, ka thei lo, kalsan tur che chuan ka hmangaih tawh lutuk che" a rawn ti chiah chu

"Dawt! Dawt min hrilh tawh suh u Marâwn, keimaha nâ thei lai zawng zawng hi a nâ vek tawh asin, engtiang fakaua min tihnât belh nge i la tum ṭalh a?" ti ṭiauin ka ṭap chhuak hawk a, ka insum hman tawh ngâng lo a ni. 

"Tihnât che ka tum lo" a tih laklawh lai chuan

"Kei nena inngaizawng reng chungin i lo la buaipui reng a, ka duh che tih leh ka hmangaih che tih i hriat hnehsawh em avangin khang kum khat chhung khan min lo bum char char a, ka chhungte thu ka lo awih lo kha tunah chuan ka inchhir ta khawp mai" tiin ka lo pawt chat hmawk hmawk a, ka thin a rim bawk si, ka ṭah a chhuak bawk si, hrehawm ti tak ka ni! 

"Hre tura ka duh che chu ka nupui hlui rai chhan hi keimah ka ni lo, ka fa a ni thei lo hrim hrim" a ti nghet charh charh a, kan ṭawng zawi lo bawk nen kan ṭawng zawng zawng chu Dindini leh u Dawngzelin an lo hriat ve vek ka ring.

"I duh chuan nautê a hrin chhuah veleh DNA Test ka ti nghal ang, ka fa a ni lo tih hi i hriat ngei ngei a ngai" a tih zawm leh nghal a, ka thinrim lutuk chu a samah ka kek pawp pawp ringawt. 

"Ka fa a ni lo i ti a, i buaipui reng tho a ni lo'm ni?" ka ti buan buan a, nghet zet hian a âwmah min kuah bet a, ka ṭap chhuak hawk hawk bawk. 

"Ka tihpalh, ka tihpalh tak zet. Ka nupui hlui a nih vang chauha buapui ka ni, chu pawh vawi hnih chauh! Ka hrilh loh che avangin ka tihpalh, hetiang hi a thleng dâwn tih hria ila chuan i thik lutuk kha hlau lovin ka hrilh ngei ang che maw le" dam dap hian a ti a, ka ṭah a chhuak zual em em thung. 

"Min ring hram teh, min uiresantu hnenah hian ka lêt leh duh i ring em ni? A teuh lo, ka hmangaih che asin, ka hmangaih tak zet che" ka bianga muttui luang ngiai ngiai hru hul pah hian a ti dap dap a, ka lû ka thin khum laia a hmel chu khawngaihthlak tak a ni; mahse lemchan bak a nih ka ring tawh lo.

"Ka lawm e" nui sen sen hian ka tih zawm daih a, mak a ti ngáng mai!

"Eng vang chuan?" a ngaihna hre lo hmel chu khawngaih chî ah pawh ka ngai tawh lo.

"Rei ni lo mah se hlim taka min siam hman hrim hrim avangin ka lawm e, kan tawpna erawh heti hi a ni a, min rawn ngaihven tawh lo la, kei pawh ka danglam tawh tak tak ang" ka tih chuan a hlauthawng hmel ka hmu nghal.

"Lo kal rawh, ka va thlah ang che" tiin khum aṭang chuan ka chhuk leh ta zel a, ka chet dan chuan a ṭhawng hle a nih ka ring, a ṭawng eih lo hrim hrim.

"Lo kal rawh le" ti nawn lehin a kutah chuan ka kai a, ngawi reng hian ka kaih ang âng chuan min zui tawp a, kan awm dan chu u Dawngzeli leh Dindini chuan mak an lo tih hmel hle a, hmu lo derin pâwn lamah ka hruai chhuak lui ta tho.

"Theihnghilh che ka tum lo va, tum che pawh ni ila ka thei dâwn chuang lo, mahse kan inkâr erawh zan in aṭang chuan engmah lo mai a ni tawh a, inhmelhriat pangngai anga kan awm zel ka beisei, ka huat phah lo che tih i hre bawk dâwn a nia" a Car bula kan din rual chuan ka ti mawlh mawlh a, ṭah insum nasa tak ka ni!

"Thu dik i hriat hnuah chuan i rilru a dam deuh mah na, tunah zawng i rilru a nâ rih êm mai, ka va haw phawt ang e" tia kal sawn a tum chuan

"Ni lo ve, thu dik ka hria emaw hre lo emaw kan inngaizawng leh tawh ngai lo ang, min rawn beisei tawh suh u Marâwn, ka â rei lutuk tawh mah mah a ni" ka ti sap sap a, a kal sawn lo chiang khawp mai.

"Hetiang hian awm suh, i mizia nen a inhmeh lo" a ti daih a, ka lo nui hak thung.

"Hetianga awm tura min siamtu chu tu dang ni lovin nangmah alawm i nih" ka tih chuan lunngaih hmel zet hian min thlek vung vung a, mittui tling pama chhoh melh ralin ka nui lui sak bawk.

"Mangṭha le" ti leh sapa inherin ka hnungchhawn ta nal nal a, theih ni se a kianga awm tluka châk ka nei lo, mahse a tir tê aṭang tawh kan awm dun rem ngâng a lo ni e.

Chumi zan chuan chhin khat pawh ka chhing eih lo va, mahse ka ṭap tawh miah lo thung. Ani pawh a muhil thei bik lo a ni ang, zing lam dâr 3 pelh hretah 'ka hmangaih che' tih message a lo thawn a, ka ṭap lo va, ka nui lo va, mahse ka lungngai em em. Khaw vâr rualin ka tho tharh a, tui lum chhuangin Gas bulah ka ding ngawi reng a, tunah chuan nun thara ka nun tak tak a hun ta e. Rem ni se zawng Pathian paw'n kan awm dun theih nân rem min ruatsak ang a, hlim takin kan awm dun ngei ang, mahse chutiang chu engmah a thleng lo tlat!

Kâr khat a liam a, u Marâwna a reh ta vang vang a, zep lo chuan ka ngai tak zet, ngai tak ka ni; mahse ka awm dan tihlan emaw ka bula mite hriatthiam theih tur zawnga awm ka tum tawh lo. Ka hna dil result pawh a rawn chhuak ta, ka en thuai thuai a, ka tling lo nghal pang a, a hnu kâr khat hnu leha result lo chhuakah erawh zirtirtu hna ka dilah ka lo tling ve hlauh mai a, Mamit District-a Higher Secondary School pakhat-a zirtirtu ni turin ka lo tling ve chu niin, ka lawm tak tak a ni. B.Ed training zo hlim hlawl ka ni a, tun laiah hna hmuh a awlai tawh lo tehreng nen insawipuina tel miah lova ka tling thei chu a lawmawm tak zet.

Dindini erawh a hna dilna lam te'n result an la tichhuak lo deuh a, eng emaw berah tling ve se ka ti khawp mai. Thla thara hna zawm turin ka inpuahchah nghal zung zung a, kawng tam takah u Thiangpuian min pui a, u Dawngzeli nen thla leh maiah khian an innei tawh dâwn leh nghal a, Mamitah daih hna nei mah ila an inneih ni na nâ na chu ka haw chho chiang khawp ang. Palai nen lam tirh fel vek a ni tawh a, an hmabak chu man leh mual tihfel leh inneih chauh a ni tawh mai.

Thla thar kan chuangkai a, Dindini pawh LDC hna thawk turin a lo inziak tling ve hlauh a, mahse amah tak chuan a phur em em lo. A châk ber chu zirtirtu hna thawh a ni a, zirtirtu hna a hmuh hma chu a thawk rih phawt dâwn a nih hmel. Chutin u Dawngzeli leh u Thiangpuia te pawh an innei ta ngei a, hna ka zawm hman tawh bawk nen Mamit aṭangin Aizawlah ka haw chho vang vang a, kan khaw mi leh sa ka hmu nual a, a ṭhenin min bia a, a ṭhenin min rêl nghal ringawt bawk a, ka thengthawngah ka thawhtir miah lo thung.

U Dawngzeli te inneih ni chuan ka thinlung chhungrila riak bâng thei lo u Marâwna pawh ka hmu a, ani paw'n min hmu a, mahse kan inbe lo hrim hrim. Chu bakah kan inawm hlat êm a, han biak kha a fuh tehchiam lo a ni.  Kan khuaah tlang chho zuaihin a tukah Matmit lam panin ka chhuk thla leh nghal a, hna neih tawh chuan hun hman thiam a ngaihzia kan hre kuar kuar alawm le. Chauh pawh sawi lovin ka thlen thlak tuk aṭangin school-ah ka kal leh nghal a, B.Ed kan training laia kan professor pakhat te in hnuai luaha mahnia awm ka ni a, ka chhungte paw'n min rawn ngaihtuah ṭhin khawp mai.

"I dam em?" zirlai naupang lehkha chhiar rik malh malh laia ka message dâwn chu open kher lovin ka en vang vang a, number lawng chauh ni mah se tu nge a nih ka hre chiang em em tho.

Open lovin Whatsapp aṭang chuan ka chhuak a, ka hmet thim zui nghal daih bawk. Tunah chuan thla thum lai zirtirtu hna ka thawk ve leh reng tawh a, khang thla thum liam ta chhung khan thil chi hrang hrang ka tawng a, a chang chuan ka hlim a, a changin ka hlim lo leh a, ka Sim Card pawh u Marâwnan min rawn biak ka hlauh avangin ka thlak daih a, mahse Whatsapp kaltlangin min rawn be ṭhin ta tho va, engtin nge ka number a neih pawh ka hre lo, ka ngaihven zui ngai lem lo hrim hrim bawk.

Thla a vei zel a, kei pawh ka hna lamah ka thawk rim em em a, ka nuam tih chî tak a ni bawk a, Dindini nen pawh tunah chuan phone kaltlang chauhin kan inbe thei ta. Mahnia in luah ni mah ila harsatna leh buaina ka tâwk ngai lo va, ka in luah neitu kan professor te chhungkua hi an fel ve hrim hrim a, hmeichhia ka lo ni kher bawk nen kawng engkimah min ngaihtuah a, Gas a lo thlen te hian school-a ka awm lai a nih chuan min lo lâk kep mai zel a, an fel tak tak a ni.

Ni khat chu ruah a tla cher cher a, sawrkâr chawlh a nih avangin School pawh kan chawl a, tukverh bulah ṭhuin aw thâm mawi em em leh zaithiam ka tih em em Michael Bolton-a sak 'A Love So Beautiful' tih hla chu ka ngaithla pah a, khaw awm dan zawng zawng leh ka hla play inchawih lutuk chuan ka lung min lèn a, ka hmangaih ka ngâi a, ka thlahlel a, a kianga awm ka châk a, mahse ani leh kei chu khuanu remruat kan ni si lo.

Kik hmasak pawh awm miah lova kawngka rawn inhawng ri khep lam chu ka hawi lawk lo va, ka rilru ka kawm tui êm vang a ni pakhat. Kawngka chu inkharin ke pen thawmin a zui zat a, ka mit mengin kawngka lam chu ka hawi phei a, ka mi hmuh avang chuan ka ṭhutna aṭangin ka ding nghal hluai a, hamhaih zetin ka melh kal bawk.

"Eng chen nge ka phone call pick up lo leh ka message thawn zawng zawng che kha open lova i awm dâwn?" a zawhna chu chhang lovin ka ngawi ran a, ka thin phu ran dawt dawtzia chu pui tak a ni.

"I hlim em?" a ti leh sup a, ruah a rawn do tih hriat tak hian a taksa leh a kawr zawng zawng chu a huh vek a, buaipui ka tum viau a, mahse ka la insum hram hram a ni.

"I hlim em ka hmangaih?" min koh dan chuan chawp leh chilhin ka ṭah a tichhuak nghal a, a hmuh laiin ka ṭap mai ang tih ka hlau.

"Hlim e" tluangtlam lo zet hian ka ti a, ani erawh chuan a lu a lo thing thuai thung.

"Ni lo, i hlim lo, kei ang bawkin i hlim bik lo, a chhan chu min hmangaih tlat a ni" a tih chuan tukverh lam ka hawi daih a, ka bianga mittui rawn baw zawih chu ka hru nghal thuai bawk.

"Eng nge i lo tih hrim hrim a? Hna thil em ni?" a lam hawi lêt tawh chuang lova ka tih chuan a ngawi reng a, rei fê kan ngawih vang vang hnuah erawh ka hawi lêt leh ta nge nge.

"I inhru hul duh em?" pangngai tak hian ka bia a, ṭha taka min chhan ve mai ka ring a, mahse chutiang chu a ni hauh lo.

"Engkim, DNA test zawng zawng tihfel a ni tawh, ka fa a ni lo, ka fa a ni ngai lo bawk ang. Fa ka nei dâwn a nih chuan nang nen, ka hmangaih nena fa neih ka duh, hmeichhe dang ka duh lo" a ti dam hniam sup sup a, ka mittui chu a rawn tling leh nghal ringawt tawh!

"Min ngaidam thei tawh ang em?" a rawn ti leh chuan

"Ngaihdam i ngai hleinem u Marâwn" ka lo ti liam puat thung a, a hma zawnga a dinna ngaia ding reng kha min rawn din hnaih ta viau bawk.

"Khawngaihin?" tih leh ka kut chu chelh a rual nghal a, a kut vawt lutuk chuan eng dang mah min ngaihtuahtir thei tawh lo.

"Awi, i kut a va han vawt em em ve le, inhru hul thuai rawh, vatin, i dam lo mai ang asin" ti sawk sawka towel lâk ka tum chu a âwm hnawng chapah chuan min kuah bei thlawp a, a kawr leh a taksa zawng zawng huh vek mah se a taksa erawh a sa ham ham thung.

"Min thlah teh u Marâwn, i dam lo mai ang?" ka tih pawh chuan min thlah a tum lo hrim hrim a, ka vin deuh hlak hlak paw'n engtin mah a awm chuang lo.

"Engtik lai pawha i kianga awm ka duh, ka ngai che, ka ngai lutuk che ka hmangaih" ti hniam ruih hian min kuah nghet sauh a, hmui pet fan fanin ka kuah lêt ve ta nge nge.

"Mi â pa, i dam lo thei tih i hre lo em ni? Engati nge ruah i do? Maw? Mawla, engati nge min rawn umzui zel?" ṭah chhuak zeta ka  tih chuan ka dar tawn tawnah a chelh rang khawp mai.

"Ka hmangaih che" tih leh ka hmuia rawn fawh zeuh a rual a, mahse a inlá hrang rei lo hle thung.

Duhthaw zet hian min fawp tawn tawn a, kei paw'n ka inthun theihna zawng zawng ka hloh fai vek tawh! Ka hmuiah mai ni lo ka biangah te, ka khabe ah te, ka irah te chuan min fawp kual mawlh mawlh a, ka hlim nge ka lungchhe zâwk pawh ka hre lo, ka thinlung zawng zawngin ka hmangaih tih erawh ka hre chiang em em thung. A mal chungah min ṭhuttir rual chuan ṭhutthlengah a ṭhu tawh tih ka hre ve chiah a, hun rei lo tê chhung kha chu mu leh mal engmah ka hre lo a ni ber e.

"I pang hi a sâ lutuk, i dam lo chiang a nia u Marâwn" a mal chung aṭang chhuk ka tum nghal a, a lo phal lo nasa mai.

"Min ngaidam tawh lul teh, a tir tê aṭangin ka thiam loh a ni fai vek tih ka hria, mahse min ngaihdama kei nen awm dun kumkhua tura thutlukna i siam a nih ngat chuan khawvela hmeichhe hlim berah ka siam ang che" ngenngawl lutuk mitmeng hian min en chho diar diar a, a dam lo tih hai theih a ni mawlh lo.

"Kan intinâ tawn mai mai zâwk ang u Marâwn, keini pahnih hi chu khuanu samsuih kan ni ngâng lo alawm, ni ila chuan harsatna a awm lo ang" khawngaih ru taka ka tih chuan

"Ni lo, khuanu remruat ngei kan ni! Kei paw'n kan ni lo emaw tih châng ka nei rum rum a, mahse thil atthlak tak a ni! Ka ta tura Pathian siam i ni a, kei pawh i ta tura siam ka ni!" a ti nghet charh charh a, a aw khauh ṭha viau mah se a mit erawh a meng lui hram hram thung.

"Eng pawh ni se damdawi ei phawt rawh" tih leh a mal chunga chhuk ka rual nghal a, a tha zawi viau tawh lo se chu min kuahna aang chuan ka chhuk thei leh chuang miah lo ang.

Room-ah lutin damdawi chu ka phawrh sawk sawk a, tui nen pan nghal thuai thuaiin damdawi chu ka eitir a, a pang chu ka dep den den a, a sa ṭha vawr vawr khawp mai. Meng mang lo hian a thawmhnaw huh hnawng chap chu a phelh mual mual a, a thil tih tum hrethiam lo zetin ka en reng ringawt. A pheikhawk a hlilh hnu chuan a kekawr a phelh zawm nghal a, boxer chauh hain a ṭhu ta run mai.

"Khaw'nge khum?" ti supin a tho ṭuah ṭuah a, a ke a pen rual chuan ka lo pui vat a, khum ka thlenpui ta mawh tihah

"Min mut lûmpui rawh" a ti ṭial ruih a, rizai sinin a sawi ang chuan ka mutpui ve nghal mai bawk.

Nghet zetin a âwmah min kuah bet a, a taksa ruak lumnaa khat chuan min ur ham ham a, a âwm mawlh chu a lian zualin ka hria, a lawnga ka vawi khat hmuhna a nih avangte pawh a ni mai thei bawk. Rei lo tê hnuah a rawn thaw ri suk suk a, a khabe leh a pang chu ka deh tawn sek a, la sa ṭha ham ham tak a ni. A âwma ka bek nghatin ka mit ka chhing vang vang a, zawi zawi hian ka mut chu a rawn chhuak riai riai a, ka harh leh meuh chuan khua a lo thim fel vek tawh a, ka awmna erawh a lûm ngaiin a lo la lûm reng a, u Marâwna âwm ngei a ni bawk.

"Kan mut tui maw?" a lam ka hawi chhoh rual chuan nui sun sun hian a lo ti dam thluam a, ka nui tawi tak ringawt.

"Luhlul pa" ka tih chuan ka chalah a rawn fawp zauh a, a pang sâ pawh a dai vek tawh a, damdawiin a chhawk a nih hmel.

"Ka luhlulna lam hi rah ṭha chhuah lo a la awm miah lo" inringtâwk zeta a tih chuan ka ner khum nang a, a rawn nui chhuak ta hawk hawk.

"A lum tawh ê" ti niah niahin kan rizai sin lai chu ka hlim sawk a, mahse ka thil hmuh avang chuan tho chiang tak ka ni!

"I thawmhnaw ha tawh rawh!" ka ti vin ṭhawt ta ringawt a, che sawn miah lova a mu ngawi reng chu tur zetin ka melh hrep bawk.

"A ho êm mai, ka bulah hian lo mu mai mai teh" tiin a âwmah chuan min pawt bet thlawp a, a kap lam erawh ka melh ngam tawh lo nasa!

"I thu sawi kha ka la hre reng a nia" a tih chuan

"Eng maw?" ka lo ti hâ a, eng ber nge a hriat reng ka hre hauh lo.

"Kan inngaihzawn tawh loh tur thu kha maw le" a tih chuah ka bing deuh mup a, ka hnual nghal rawih thei.

"Min en teh le" tiin ka khabe ah a rawn dàwm a, hlim hmel zeta min en chung hian

"Keini pahnih hi engtikah mah kan inngaizawng tawh dâwn reng reng lo, a chhan chu maw kei hian nang hi nupuiah ka nei dâwn che a ni" a ti leh nghal a, ka meng lian kawk ringawt.

"I lawm em?" nui sun sun hian ka biangah a rawn piai pah zeuh a, ka mak tihna chu hlim lutuk avanga ṭah chhuahnain a rawn luah lan nghal.

"I ti tak tak em u Marâwn? Maw? Dawt a ni lo ti raw? Nge engkim hi ka mumamg vek zâwk?" ka ti mawlh mawlh a, ka mittui chu ka biangah a baw thla zawih bawk.

"Tak tak ê le ka hmangaih, a rang thei ang berin ka nei dâwn che alawm, engkim ka kutah dah tawp rawh" ngainatawm zeta min en chung hian a ti dam dap a, ka inthunun zo lo leh ta nge nge.

"Ka hmangaih che" tia ṭap ṭiauin a hmuiah chuan ka fawp a, ka fawhna chu chhang lêt zeuhin a âwmah min kuah bei a, ka chhipah a khabe a nghat zui nghal bawk.

"Ka mumang ni lûl suh se" ti leh hramin ka mit ka chhing vang a, a taksa hlai chhah ṭha tak chu ka kuah nghet sauh a, hriat nuam zeta nui chung hian

"A ni hleinem, a tak ngei alawm a nih, hlauthawng reng reng suh, Pathian chauh lo chuan keini pahnih hi min ṭhen hrang mai mai tawh lo ang" a ti thum hniam ruih a, ngawi rengin a âwmah chuan ka bawk hle a, khawvela ka mipa hmangaih ber u Marâwna nupui ka ni mai tawh tur chuan lawm a va tikim hliah hliah tak èm.

The End

Aw le, dam lohnain min tlâkbuak avangin duh ang paw'n ka rawn khawrpum thei lawk lo va, min lo hriatthiam hram hram hlawm avangin ka lawm e, story thar in lo chang ṭheuh dâwn a nia u!

.