MARÂWNA By Havali Adam (CHAPTER 3)

                                       MARÂWNA

                                             By

                                    Havali Adam

                                       Chapter 3

Krismas leh kum thar boruak vuakvet ah chuan u Marâwna nen kan inhmu ta fô mai a, inbiak erawh kan inbe ngai mang lo thung. Min biak châk hmel deuh leh sawi tur nei hmel deuha min en châng a ngah ṭhin, mahse keimah zâwkin ka pehhel zel a, min biak hmain ka kal sawn daih zel a, a nupui nen an inkâr a la ṭha lutuk lovin ka hre bawk. An nupa chanchin chu hriat loh pawh tum mah ila sawi neuh neuh a awm reng avangin a ṭhen azâr chu hriat loh theih pawh a ni lo, chutah a ṭha lo lam hlir a la ni zui!

An sawi dan chuan Aizawl lamah u Marâwna nupui a haw daih a, a dik ka ring, a chhan chu a hmel ka hmu khât lutuk, haw lo se chuan vawi khat tal kan haw hnu hian ka hmuh ka ring, khaw khata awm leh nghal. U Marâwna erawh kan khuaah a awm daih lawi a, inṭhen ni chiah bawk si lo, mahse awm dun bawk si lovin an awm a ni ber a, a bikin u Marâwna chu ka khawngaih leh tlat tawh, danglam viau tawh e ti lo chuan a chan a chhiat lai leh a hlim loh laia ka khawngaih ṭhinna erawh a la bo chuang lo.

Zirna avanga Aizawla kan chhuk thlak dâwn tuk chuan kan inhmu leh a, a ṭhiante nen inbiain min rawn ral thlir ngar ngar a, a hawi sawn hmasa zâwkah ka ṭang leh ta nge nge bawk. Sumo-a kan chuan chhung zawng chuan ka tum pawh ni miah lovin ka rilruah u Marâwn hlir a awm tlat a, Mami Vârte hla 'Dam lai pâr' kan ngaihthlak lai phei chuan hun kal tawh ka ngaihtuah chhuak a, lungléng ru zet hian hun liam tawha ka lo awm ṭhin dan chuan min tinui sak a, tunah chuan u Marâwna ka duha ka hmangaih bur hun lai kha hman lai an chang zo ta!

Chawhnu lamah Aizawl kan thleng thla a, kan in luahah kan innghat fel nghal zung zung bawk a, thingtlâng leh khawpui boruak chu a inang lo vet vet khawp mai. Kan khaw lamah kha chuan a la vawt ang reng viau a, thlasik kan la hmang zo ṭhaṭhum lo hrim hrim a, mahse khawpuiah erawh sik leh sa a lo pangngai viau tawh thung. A lum lo va, a vawt lutuk lo bawk a, a tâwk vel chiah a, kan thlen thlak lâi leh bungrua kan dah luh vel lâi chuan kan in luah neitu te paw'n min lo be siam siam bawk.

"Lo lut rawh" kawngka inkik thawm ka hriat rualin ka chhawn nghal a, kan in kawngka hawnga lo lut erawh ka beisei loh lutuk mihring a ni thung.

"Nang elo?" Dindini zâwkin a lo ti hliai a, a aw aṭang chuan mak a ti ve tho tih hai theih pawh va ni suh!

"Lo kal rawh, lo ṭhu rawh" ka ti hnuhnawh nawk nawk a, Dindini nen chuan kan inmelh zeuh a, kan mitmengin kan inbia a ni ber.

"Eng nge i lo tih dâwn a?" ṭhutthlenga a ṭhut fel hnu chuan ka ti leh ta nge nge a, signal nasa viau mah ila Dindini chu a ṭawng ṭha duh der lo leh nghal.

"Ka lo kal lawk" tih chauh hian min chhang tawi sup a, room aṭangin u Dawngzeli a rawn chhuak ve chiah bawk.

"Ehê, teh hlawl che chuan, pangngai taka inhmuh a va khât ve, eng nge i lo tih dâwn a?" u Dawngzeli chuan a ti nghal luam a, High School an kal ho hman tlat a, chutianga a be nghal sawt sawt pawh chu a àwm viau mai.

"Ka lo kal mai mai, in awmna hi ka theihnghilh hman ṭhelh alawm le" tia a ṭawng lai chuan ka lo thlir reng a, min rawn en tâkah chuan ka hawi sawn chiang teh e!

"Thingpui te lùm ta che maw le Sawmi, inlêng neih chuan an ṭhu ngawi reng ngai lo" u Dawngzeli chu mak ti zet hian ka en hâw a, thingpui lùm turin ka tho zui nghal ta ringawt bawk.

"Eng nge a awmzia? Engati nge u Marâwna hi a lo kal thut a?" thingpui chhuanna bula kan awm rualin Dindini chuan a ti nghal sar sar a, ka lû ka lo thin khum ringawt thung.

"Ka awih lo, i hre hrim hrim! A hma zawng paw'n a lo kal ngai hleinem, tuna taka lo kal ngawtna chhan tur a awm lo, in inkârah hian eng thil chiah nge awm?" Dindini chu ka melh vak a, duh ai chuan a rin dan a kal thui pui mah mah a ni.

"A teuh lo, khuaah khan kan inhmu ṭhin a, chu zawng chu a ni mai" ka tih chuan

"In lo inhmu ṭhin maw!?" a lo ti nghal vat a, sawi sual ka nei tih ka inhre chhuak nghal bawk.

"Inhmu ṭhin tih lemah kan inhmu zeuh zeuh, hmuh pawh ka tum em em lo, amah zâwk saw alawm, ka hmuh turin a lo inlan zel a, ka tân chuan hmuh loh a harsa a ni" ka ti ta duah a, ka thil sawi dan kalhmangah chuan u Marâwna bul hnaiha awm ka duh lo tih a hriatthiam hram ka beisei.

"Awi, i va'n lo zep thei em em?" a tih chuan

"Sawi ta ila min ringhlel dâwn asin!" ka lo ti hmak a, kan mit chu u Dawngzeli leh u Marâwna te pahnihah a fu char char a ni ber.

"Ni ve tho, ka ringnghel ngei ang che ka ring, mahse engati nge a rawn kal thut a?" ṭawngkâa chhang lovin ka dar ka chhin khum àk ringawt.

"A mak ê, in inkârah engmah a awm hmel bawk si lo" amah bawk chuan a ti leh niah niah a, dik tak chuan kei ngei paw'n mak ka ti, a rawn luh tirh khan u Thiangpuia zâwk a ni dâwn emaw ka ti hman tak tak!

Kan thil chhuan a so rik ser ser tâkah chuan thingpui ka siam zui nghal a, mahse 'a sen hângin nge a sen thlumin nge a paw thlumin nge a paw hângin ka siam ang' tihah ka buai ta tlat mai. Sitting room lam chu ka va hawi phei vual vual a, u Marâwna zâwk chuan min lo en ve chat a, ka lehhawi rang khawp mai. 'Engtin pawh siam ila in tawp mai rawh se' tih rilru pu chungin thingpui chu a paw thlumin ka siam ta nge nge a, a duh lo a nih leh a duh lo a ni tawh mai.

Thingpui a in lai te chuan awm dan tur ka baihvai vek a, ṭawng dâwn ila a fuh chiahin ka hre bawk si lo, mahse ka awm dan erawh an hrethiam ang tih ka hlau ru em em thung. Vanneih thlak takin u Dawngzeli nen an inkawm char char a, u Marâwna chuan min rawn en leh zauh ṭhin a, room-a luhsan daih mai ka duh rum rum a, mahse a mawi ka ti bawk si lo. Dindini lah chu bathroom-ah a kal daih leh ta nghal a, awm a va nuam duh lo mai mai tak!

"Engtikah maw B.Ed chu in training zawh dâwn?" phu deuh zukin u Marâwna chu ka en nghal vat a, min biak ka ring lo hrim hrim.

"Eng lo, kum khat a la ngai" tih chiahin ka chhang a, zawhna dang min zawh belh tawh lovin a lo bu nghut a, bathroom aṭangin Dindini chu a rawn chhuak chiah bawk.

"In nu a ṭha zel màw? Krismas leh kum thar khan ka hmuh àwm ka hre miah lo, a dam lo zâwk em ni?" u Dawngzeli zawhna avang chuan ka lo ip deuh chawih a, mei nei taka thil zawh a ṭul hran miah lo maw lè.

"Ṭha a ni mai" tih bakin u Marâwna chuan a chhang lo réng a, han sawi vek chî ni hek lo, an nu nena an chanchinte chu tlâng hriat alawm a nih tawh!

"Rohlua a lo lêng dâwn em Sawmi?" u Dawngzeli chu mak ka ti tulh tulh a, a mipa hming rawn sawi lah chuan min tihamhaih nasa zual ngei mai.

"Lêng dâwn a ti tlatin ka hria" keimah ni lovin Dindini zâwk chuan a lo ti thuai a, an thil tum ka hrethiam chiah, mahse u Marâwna mitmeng danglam zawk chu ka khawngaih leh tlat tawh!

"Khawi, no kha ka lo seng daih ang" tih leh tho paha u Marâwna thingpui inna no chu lâk ka rual a, ka tukhum chu a za mer mer a, min en zui a ni hrim hrim.

U Dawngzeli chuan u Marâwna chu a ngam sarh sarh ang reng hle a, u Marâwna erawh a inthlahrun hmel ta viau mai. Fiamthu deuh reuh, mei nei tak tho si hian u Dawngzeli chuan a be reng a, u Thiangpuia a lo lén hnu phei chuan u Marâwna chu a tho va, a haw ta daih a, thlah ka tum deuh ûk a, mahse ka ngam leh chiah bawk si lo, ka awm dan chu a lai kual vel vek ti ila a sual lo ang. Nula ka ni a, inlêngte kan in kawt thleng tal thlah lova hawtir ringawt chu a mawi chiah lo ka ti hnuhnawh hle bawk.

"Ka hlauh ang chiahin thil a thleng mêk, fimkhur ang che Sawmi" u Dawngzeli chu ka en kal a, a thil sawi tum pawh ka hre chiang khawp mai.

"Hlauthawng duh suh, ngaihngam deuh khan awm rawh" a rilru dam nâna ka tih chuan

"Chutiangin ka awm thei teuh lo, u Marâwna hian a beisei chiang che alawm, a nupui nen hian an inṭhen tih a awm dan aṭang khan ka hre tlang nghal vek bawk" a lo ti hmawk hmawk a, a rilru tur chu ka hrethiam khawp mai.

"Fimkhur ang che Sawmi, i lo nêm hlauh ang e!" ti deuh hmaka chawl datin

"I rin ai a mizia ka hre chiang ang, a luhlulzia thlengin, chu vang alawm ka hlauhthawn nghal em em, khatiang khawpa nasaa i duh tih hre reng chunga nupui a neihsan hnuah che a rawn hel che a, i lo nêm duai duai vel vaih chuan a zahthlak khawp ang" a tih zawm leh ta mawlh mawlh a, sawi dik lo a nei chuang miah lo.

"Nang pawh Dindin, i ṭhiannu hi lo veng tlat teh, tuna a awm dan aṭang hi chuan ka hlauhthawn ang hi a thlen dik theihna chance a sâng lutuk" tiin Dindini a biak zawm zat bawk a, thaw là hmasa ham ham hian

"Hman ang kha ka ni tawh bik lo u Dawngzel, i hlauthawn luatah min khuahkhirh i tum lutuk ang e. Tunah chuan ka danglam tawh alawm, ni lo se zawng a hmel ka hmuh rual khan ka ṭah loha ka pil bo daih loh i ring em ni?" ka ti ve ta ngat a, Dindini chuan lo tuihnih nghal vatin

"Nia u Dawngzel, i hlauthawng mah mah a nih khâ, Sawmi hi hman ang kha a ni tawh bik lo, chu bakah ani ang nula hleitling te chuan pathlawi a duh teuh lo mai" a lo ti ve siam siam a, u  Dawngzeli chu a rilru a dam hmel ta deuh hlek bawk.

Mut hmunah ka ngaihtuah zui rauh rauh a, zanriah ei kham hlim hlawlah a rawn lêng kha a ni a, u Dawngzeli hlauhthawnna pawh a áwm ka ti, a sawi zawng zawng kha a dik vek bawk. Kum kha leh chen kha ka lo duh a, ka lo hmangaih hman hial a, mahse a tân chuan engmah ka nih loh avangin nupui min neihsan a, dem theih pawh a ni chuang lo. A chhan chu inngaihzawnna kan nei lo miau a, mahse tun hnuah; hmasawnna rahbi kailawna ka awm mêk laiin a lo lang leh a, u Dawngzeli chang ni lo, min hre chiangtu tân chuan min hlauhthawnpui loh theih loh pawh a ni lo ang.

Class kalin ni tin kan chhuak a, zirlai pawh a tam chho ṭan viau a, presentation leh practical neuh neuh thlengin tihtur a awm nual a, mahse nuam ka ti phian! Amaherawhchu, u Marâwna hmel ka hmu zing ta malh malh hle a, zanah pawh a rawn lêng ta fô mai a, ka zawt dawt ngam lo na chu a nupui nen an inṭhen tih hai rual a ni ta lo. Inngaihzawnna lam hawi zawnga min biak ngai loh avangin min biak apiang chuan ṭha takin ka chhang a, ka laka a awm dan chu ka hrethiam chiah lo ṭhin.

Lunch Break apiang hian kan Institution Campus-ah a lo chhuk thla ziah bawk a, chutiang chuan kâr tam tak a awm tawh, Dindini paw'n min ringhlel dâwn dâwn ṭhin a, mahse a tawpah min ring leh nge nge ṭhin thung. Ṭum khat phei chu kan inbiak lai takin a rawn kal a, u Marâwna nen chuan min en tawn zak zak a, dik tak chuan pangngai taka min betu laka lo inkharkhip tlat ka thei lo a ni. Chumi ṭum phei chuan min ringhlel zual a, ka insawifiah nasa khawp mai.

"U Marâwna nen in inkârah hian eng emaw chu a awm chiang ti raw?" u Dawngzelin a tih lai tak chuan kawngka a lo inkik ri karh karh a, Dindinin lut tura a chhawn hnu lawkah u Marâwna hmel kan hmu zui nghal bawk.

"Ka tibuai che u em?" hawihhawm zet hian u Marâwna chuan a rawn ti a, lû ka lo thin khum thuai a, u Dawngzeli erawh ṭawng tum tawh lo ang mai a ni.

"Lo ṭhu rawh u Marâwn" Dindini chuan a lo ti ve nghal bawk.

U Dawngzeli chu u Thiangpuia biain a lêng chhuak ta daih a, mahse a pawi lo daih zâwk, u Marâwna avangin a thin a rim laklawh tawh bawk si, a awm ve reng a nih chuan a ṭawngkhum vak ang tih ka hlau. U Marâwna chu a lêng rei ang reng viau a, sawi tur erawh a ván ang bawkin kei paw'n ka vàn, a nupui chanchin zâwt dâwn ila a tih chî bawk si lo, sawi tur a vâng hi a ni tawp! Dâr 9 leh a chanve velah haw zâi a rêl a, u Dawngzeli erawh a lo la haw lo thung. U Thiangpuian a lo thlah leh thlap dâwn tho va, ka hlauthawng em em hran lo.

"I haw dâwn lo em ni?" Car chhunga lut lovin a ding ngawi reng a, han luhsan ringawt lah a tih chî chiah bawk si lo, awm dan tur ka baihvai ang reng khawp.

"Haw dâwn e, mahse hetia awm hi nuam ka ti rih" a tih chuan ka melh chho zawk a, min rawn en dâwna ka hriat rualin ka hawi sawn leh nghal.

"Tunah hian ngaihzawng i nei em?" a zawhna avang chuan ka phu uih thei, min la en chiang em em zui.

"Aw" ka ti thawp sep a, ka kut chu ka hum ruh vak bawk.

"Rohlua chu em ni?" min en chhuk run chung hian a rawn ti leh a, a lam ka hawi duh tawh lo, dâwt ka sawi tih a hre palh ang.

"Aw ni e, kum 2 chu kan inzui ve tawh" aw pangngai tak hian ka ti a, a lo nui suk a nih chu!

"Dâwt sawi i inhmeh lo hle mai" a rawn ti chiah chu meng phawk tak ka ni!

"Min hriat chian ang ém chuan ka hre chiang lo mai thei che, mahse i dâwt sawi hmel erawh hai theih a ni lo" a tih leh chuan ka khawng awt a, thil pawi lutuk tisual ang maiin ka zak chem chem bawk.

"Mut tui, ka lut mai" tia ka inher chu ka bânah a rawn chelh chat a, dim deuh hian min pawt lêt a, kan awm dan chu a ṭha lo tak zet!

"Min thlah rawh u Marâwn" ka tih chuan

"Ka laka i rilru puthmang hi hmán ang tho kha a la ni em?" a lo ti daih a, ka kut a vawnna phelh ka tum chuan a lo la vuan nghet khawp mai.

"Min ngaizawng em ni u Marâwn?" zep neih ka duh tawh bik lo, a awm dan chuan ka awm a tinuam lo zual em em bawk.

"Ngaizawng e, ka lo mawl rei lutuk mah mah a ni. Ka thluak chhungah hian i awm reng ṭhin asin, khang hun liam ta chhung zawng khan a chhan ka hriat si loh hian i lakah ka inthiam thei miah lo bawk"

"Min ngaizawng suh, ngaihzawng ka nei mêk" tiin ka tal leh phat a, hneh zet hian a âwmah min kuah bet thut a nih chu!

"Dâwt sawi i inhmeh lo tih i hre lo em ni?" ka dar tawn tawnah chelhin ka hmel a en theih tur hian min nam hla deuh hlek a, ka zâm lutuk chu melh pawh ka melh ngam lo.

"Min en teh le" dam dapa ti leh supin ka khabe chu a rawn chawi a, a mi tawhna avang chuan ka sa chhuak pup pup bawk.

"Ka duh che tih hi hria la ka duh" tiin a rawn kun hniam tial tial a, ka hmuiah tak a rawn fawp a nih chu!

Ka meng lian kawk a, engkim chu a reh dup a, ka lungphu ri bak ka hriat àwm pawh ka hre lo. Ka mak ti lutuk leh hamhaih lutuk chu engmah tih nachang ka hre lo va, ka ding khawng ût ringawt a, ka hmuia thil lûm ham ham che hrut chuan min tiharh chhuak zawk a, nâ zet hian u Marâwna chu ka nam nghal pawp a, a tawlh hnung dâwrh zui nghal bawk.

"Min thlah thuai rawh u Marâwn!" ka ti vin deuh ṭhat a, ka ban a vawnna ka phih leh sawk tâkah chuan a hmasa zâwk ang lo takin a lo thlah ve mai a, mahse kal sawn ka tum rual chuan ka darah a lo chelh leh nghal thung.

"Kan inhmu leh dâwn a nia, mut tui phawt le" tiin amah zâwk chu Car chhungah a ṭhu lut a, a tlan chhuak zui nghal chu a ni mai.

"I va'n rei reuh" in chhunga ka luh rualin Dindini chuan min en ral chung hian a lo ti a, chhan mai dan tur pawh ka hre lawk lo.

"Nia" tih chiahin ka chhang a, room-ah ka lut zui nghal ta daih bawk.

"Sawi chiang teh Sawm, thil zep i nei ti raw?" tiin room-ah a lo lut ve nghal a, ka awm danah a hre tlang nghal vek a nih ka ring.

"Dik tak chuan..." chawl datin ka ngawi leh ta daih a, sawi chî a ni em ka hre rih lo.

"Eng nge 'dik tak chuan'? Sawi zawm rawh, u Dawngzeli hriat chî a nih loh paw'n kei tal chu min hrilh rawh, i ṭhian alawm ka nih" a lo ti hliai a, u Dawngzeli tak chu hrilh chî ah ka ngai lo tawp.

"Ih...eng lo...nichin khan u Marâwna min fawp a" ka ti chiah chu

"Enga!?" a lo ti thuai a, sawi zawm leh nghalin

"Ka inrin loh lai a nia min fawh thut, i ngaih ang kha a ni lo a nia" ka ti leh thuai a, ani ve thung chuan

"U Marâwna hian a duh che tih ka hre daih tawh alawm Sawm, mahse hetiang em ema a kal chak hi ka ring lo" a lo ti daih a, ngaihtuahna sêngin ka ngawi zui vang vang a, tunah tak chuan u Marâwna nena kan awm dan kha u Dawngzeli hriat ka hlau ber, a bak ka rilruah a awm thei rih lo.

Dâr 10 pel hretah u Dawngzeli a lo haw a, a chhuah tirh ang ngawt chuan a mood pawh a chhe hran tawh lo. U Thiangpuia a lo lut kawi zuaih bawk a, thingpui a in tê tê hnuah a haw ve ta chauh a, ka laka u Marâwna awm dan zawng zawng chu u Dawngzelin a hre hnuhnawh ang tih ka hlau khawp mai. A mu nghal daih a, Dindini pawh a muhil har lo hle a, kei erawh nghatê rep ang maiin ka meng kar thung a, ka thil ngaihtuahin a zir lutuk vang nge ni, ka mut a chhuak lo khawp mai. 

Earphone vuahin hla ka ngaithla ta daih a, ka mit ka chhing vang vang a, ka rilru leh ngaihtuahna chu a vak kual nasa hle bawk. A bikin ka laka u Marâwna awm dan chuan ka rilru a luah hneh hle a, min fawp ringawt leh nghal a, ka hamhaih lutuk luatah a nawm leh nawm loh pawh ka hre thei lo kha a ni a, engkim kha a reh dup tih bak hriat ka nei mang lo hial a nih kha! Chutah min duh thu a sawi leh ta nghal a, hmân ang khan a laka ka rilru puthmang la ngai reng se chuan lawmin ka zuang a, ka pawm ngei bawk ang, mahse tunah chuan ka danglam tawh tlat si a ni.

Ni a liam zel a, u Marâwna chu zan lamah a lo lêng ṭhin a, mahse zan tin em em chuan a lo lêng ngai lo thung. Kâr khatah vawi hnih te, a chang chuan vawi khat chauh te a rawn lêng ṭhin a, min ngaihzawng tih leh min duh tih nen lam ka hre vek tawh a, ka beng hriatah sawi nawn leh tawh miah lo mah se a che ziaah a lantir mawlh mawlh reng a, kan inkâr chu sawifiah fak theih ni si lo, thil awm deuh reuh tho si ang chî hi a ni berin ka hria.

A thlaa thla kan inhmuh fô tâkah chuan zawi zawiin ka rilru a danglam leh ta tial tial a, hmangaihtu rilru hi zawng a hmangaih lakah chuan a danglam rei thei tak tak a ni mahna! Ni e, hman ang chiah khan ka la hmangaih reng a, ka la duh reng a, ka tâna ruat ni lova ka hriat avangin ka rilru chhungril dik tak ka sawi chhuak ngai lo mai chauh a ni. Ka pehhela a hmel ka hmuh loh tâk zelah kha chuan ngaihtuah chhuah loh lai ka ngah ṭhin a, mahse a lèna min rawn lèn chilh tâk hnuah erawh zawng ka inkharkhip reng thei tawh bik lo a ni e.

"Ka lo kal dâwn asin, lehkha i zir em?" u Marâwna message chu ka en deuh vang vang a, ka reply lawk lo nghe nghe. 

"Lehkha i zir em?" tih bawk hi a rawn thawn nawn leh nghal zat a, thawk ka la hap a, lehkha ka zir thu sawi ta ila chuan lo lén a ṭhulh ka ring.

"Zir lo e" tih chu ka thawn lêt ve ta nge nge a, ka zir lo miau a, zir theih pawh a ni lo hrim hrim, u Thiangpuia leh Alex-a te pahnih an lo lêng a, kan hlim dar dar viau zâwk a ni.

"Ka lo kal" a message chu ka open zuaih a, ka chhuak leh nghal a, ka lehkha zir loh thu ka hrilh tawh bawk a, a lo kal ka ring sa hrim hrim.

Rei pawh rial lovin u Marâwna chu a lo thleng thuai a, u Dawngzeli lakah chuan ka inthlahrung khawp mai. A chhan chu a lo en deuh râm a, min hnaih loh se a duh tehreng nen u Marâwna erawhin min hnaih tulh tulh mai bawk si. Chu bakah nupui ṭhen hlim hlawl a ni leh nghal a, kan khuaah pawh a nupui nena an inṭhen thu a thang leh chiam tawh a, an inneih rei loh thu chu mite sawi duh chî tak a ni chek ang, khaw chhungah an lar vet vet khawp mai. Zan dang ang bawkin haw zâi a rel thuai a, a chang chuan u Dawngzeli leh Dindini lakah a inthlahrung ni mai te'n ka hre ṭhin.

"La lut lo teh, thil sawi dun lawk ang" in chhunga ka lut tur chu ka bânah a rawn chelh chat a, a lo lèn tlai ngaihtuah chuan a haw leh hma ang reng, mahse hei hi chu a tih fô dan a ni tlat!

"Eng thil máw?" ka ti ve mai bawk a, ani chuan min din hnaih sauh thung. 

"Ka lakah hian eng rilru chiah nge i put? Nang chuan min hre chiang a, i laka ka rilru puthmang nen lam, nang erawh ka hre chiang ve thei lo che, ni àwma ka ngaih hi a lem mai chauh a lo ni ang tih ka hlau" a tih chuan ka ngawi kar ringawt. 

"Min la duh ti raw? Hmân ang chiah khan min la duh, a dik em?" a rawn ti leh nghal zat a, ka zâm ru nghal er er bawk. 

"I hre sual a nih chu!" ti deuh hmakin ka hawi sawn thuai a, ka awm dan chu a lài kual vel vek a ni ber. 

"A nih chuan ka mita en chung hian min duh tawh loh thu sawi rawh le" dam dap hian a ti a, ka darah a chelh ran bawk a, ka thin phu chu rang dawt dawt tawh tak a ni.

"Mut tui le" tia kal sawn luih ka tum chu min chelh nghet nasa mai.

"Sawi rawh le" ngenngawl deuha min en chhuk run chung hian a ti thum chhal a, a aw chu zàwi ang reng viau mah se ka hre chiang em em tho. 

"Engati nge hetiang hian ka chungah i awm tlat a u Marâwn?" ka ti hluai a, ka ṭah chu a chhuak ru et et ringawt bawk. 

"A chhan chu ka duh che alawm, ka taa siam che ka duh, tihsual nawn leh ka duh tawh lo" a thusawi chuan ka awm a tihnawm phah teuh lo. 

"Min la duh reng ti raw?" ka biang tawn tawn khuapin a ti leh sup a, ka zep peih tawh bik lo, a nih nih kan ni mai a ni ang chu! 

"Duh e, mahse ka la duh reng che avang hian kan inkawp thei tihna a ni kher lo" ka ti zo hman ṭawk ang tihah min rawn fawp nghal chawt a, hamhaih tak ka ni!

"Min ring tawp rawh" ti dam ruih hian min fawh zawm leh nghal a, ka taksa pum timur chhuak vek thei khawpa a hmui lûm ham ham tawhna chu ka tân chuan dawnsawn ṭhat lohna ngaihna a awm lo. 

Ka tum em em pawh ni miah lo hian ka hmui chu ka chet ve a, min fawp duhthaw sawt nghal hle a, min thunun vek ni maiin ka hria, mahse ka chhia leh ṭha hriatna te chu an kal bo chuang der bawk si lo. A kut lehlamin ka kawngah a chelh a, a kut pakhat zâwk chuan ka khabe a chawi titih bawk a, amah a lo ni kher bawk nen a mi fawhna chu sawiselbo khawpin dawnsawn a nuam a ni. Ka hmui zawna thaw chhuak ham hamin min fawp leh vawng vawng a, ka chal chu a chalin a rawn sik zawm zat bawk a, kan thaw a ringin kan inmelh hnai ṭha khawp mai.

"Naktuk aṭang chuan in ṭhian dunin ka thlah ziah che u ang a, ka rawn lam leh thlap bawk ang che u" a aw hniam dam ruih chu hriat a nuam tak zet. 

"A ṭul kher lo, keimahni paw'n kan kal thei reng alawm" ka ti thawp sep a, ka thin phut dan a la pangngai chiah lo va, kan chal chu a la insi reng bawk.

"I zak a ni maw?" a tih chuan

"Chu lam a ni lo, hna i nei a, keini vang mai maia hna i thawh ṭhat loh ka duh lo, i duh chuan zanah i lo lêng thei tho alawm" ka lo ti nghal pang pang a, chutianga ṭawng chu ka tum a ni miah lo. 

"I ṭawng danah chuan sâwmna a nih rualin kan pangchang nghal viau dâwn a va ang ve" kiai suka a tih chuan ka inla hrang vat nghal.

"Chutiang lam a ni ziah lo, va haw tawh rawh" ka ti deuh hmak a, a nuih a zat hmel zualin ka hria. 

"Ka haw tak tak hmain i bialpa thar hi min fawp dâwn na nge?" nui sun suna a tih chuan lai chhe hnehsawh tak ka ni! 

"Haw thuai teh u Marâwn, tleirawl ang maia fiamthu rual pawh i ni tawh lo, nge ka luhsan zâwk dâwn che" ka ti leh ta pang pang a, ka ṭawngkhum dan chu a huat ka rin tehreng nen a haw lo nasa mai. 

"Ka fiamthu hleinem" tih leh min din hnaih a rual nghal a, ka biangah fawp zeuhin min nuih leh suk a, dik tak chuan hmân ai lêt khan a hmelṭha zual chiang a ni. 

"Mut tui le, naktuk aṭang chuan zantin min hmuh i inbeisei tawh dâwn a nia" tiin a Car chhungah chuan a ṭhu lut ta nge nge a, a tlan liam zui nghal bawk. 

A sawi ang tak takin a tuk zan aṭang chuan a rawn lêng zantin ta ziah a, u Dawngzeli hmai a zah hran tawh lo va, ka nu leh pate hmai erawh a zah em em thung. Chhunah hian inhmuh kan nei ngai lo tluk a, zan lamah erawh kan inhmu ziah a, ka mipa duh leh hmangaih em em nen kan inngaizawng mêk chu a ni si a, amah avanga 'zan ni thuai thuai se' tih châng ka ngah ta khawp mai. Dindini paw'n min hriatthiam mai bakah min lawmpui thiam hle a, ani hi chu ka ṭhian ṭha ber a nih angin ka hlimna bak a duh dâwn lo tih ka chiang.

U Dawngzeli a tawrhhlelhawm ta ber a, a hmelah leh a che zia ah u Marâwna a duh lohzia a tilang hreh hauh lo va, ka en liam tawp zel. Vanneihthlak takin ka nu leh pa'n u Marâwna nena kan inngaihzawn thu an la hre lo hlauh a, a nihna takah chuan hre tur chu an ni tawh, mahse keimah ber hian ka la hrilh ngam lo, ka inthlahrun mai bakah min hau hrep ang tih ka hlau a ni. Min hau dâwn lo tih erawh ka hre chiang em em lawi a, a bul ber chu an lakah inthlahrun tak têin ka inthlahrung a ni e.

"U Marâwna hi ṭhen ang che, a zah pawh i zak miah lo em ni?" zanriah kan ei laiin u Dawngzeli chuan a ti ta riap mai le! 

"Ka nute ka la hrilh duh lo mai mai zâwk a, kan khuaah in thang ṭan a nia, an hriat thuai ka ring" a tih leh chuan ka hlauthawng nghal khawp mai. 

"Mawl suh Sawmi, i duh chuan mipa ṭha tak i tawng thei reng, in kal thui tak tak hmain u Marâwna hi ṭhen fel a, pasal tlâk mipa ṭha tak ngaihven tawh zâwk rawh; i kum a tam lutuk hma hian" a ti bawrh bawrh a, Dindini erawh a ngawi kar thung. 

"Ka mipa duh tak nena inngaizawn hi ka phu hliah hliah i ti zâwk lo em ni?" ka tih chuan

"I hlim phah chuang em ni? I hlim tak tak em? Sawisel kai hlau reng rengin i awm zâwk lo maw?" a lo ti vin deuh hlar a, ka chaw ei châkna zawng zawng a bo nghal vek!

"Mi sawi dan phei chuan a nupui nena an inṭhen chhan pawh kha nangmah hi i ni asin" a rawn tih zawm leh nghal a, chu kher chu ka awih thlawt lo.

"Engtin nge a nih theih? An nupa inkâr tibuai zawngin engtin mah ka awm ngai hleinem, awihawm loh lutuk!" ka aw chu a nêm bik tawh lo khawp mai. 

"I duh leh i bialpa, pathlawi, i u Marâwna kha a lo lén leh hunah zâwt la ti nia, a luhlul rapthlak si" a ti hmawk hmawk a, unaunu ang chiaha kan en Dindini hmai pawh a zahawm tawh zâwk alawm le.

"Ka chaw ei i titui lo zo vek!" tih leh chaw thleng chawia thawh ka rual daih a, ka rilru chu a bing mup mup a, room-ah ka lut tlang nghal daih bawk. 

(End of Chapter 3)