MALTEI (Short Story) By Havali Adam

                                        MALTEI

                        (Mizo Romantic Short Story)

                                            By

                                    Havali Adam

Ka ṭawng mawlh mawlh laiin ka phone chu a rawn nghawr dat dat a, thil ka sawi laklawh bawk si nen phawrh pawh phawrh lovin ka iptê chu ka zen a, volume button ka hmeh zeuh hnu chuan a reh ta hmak bawk. Rei pawh a ral hmain a rawn nghawr leh dat dat nghal a, thil tih laklawk lai ni lo se chu ka pick up chiang viau ang, mahse tun ṭum chu phone call pick up hun a ni rih lo. Ka thil sawi lai ka la sawi chhunzawm zel a, seminar kan neih mêk avangin ka thil sawi chu an ngaithla ṭha hlawm hle a, a ṭhen hnam dang an ni a, a ṭhen Mizo an ni a, hnam dang an tam mah zâwkin ka hria.

Seminar kan zawh fel hnu chuan lunch kan ei zawm nghal a, min betu neuh neuh an lo awm ve zel bawk nen ka phone pawh ka la phawrh hman lo hrim hrim a ni ber e. Ka thawhpuite paw'n sawi ṭha min ti viau a, kan professor phei chuan nui chungin ka sawi ṭhat thu min hrilh hial a, ani ang mi khirh lutuk hnen aṭanga chutiang thu dâwn chu ka inbeisei loh bakah amah hnam dang a ni leh nghal a, a mi fakna chu a lawmawm rualin mak ka ti mah zâwk! Amaherawhchu hnam dang mah ni se a sual hran lo va, zirna lamah a khirh hle a, chu chu zirlai naupangte paw'n an nêl lohna chhan ber pakhat a ni.

"Hello" phone call a pick up hnua a aw ka hriat rual chuan

"Engati nge min lo call char char?" ka ti deuh nghal nghut a, ka aw chu a dam tehchiam lo bawk. 

"Eng lo a nia, gas hi a zo a, chuan...ka..." a ti bah deuh nawk nawk a, a laka lungawi loh sa nen a thil sawi dan chu ka ngainat zâwng a ni lo khawp mai.

"Chuan engtin? Engtin nge i tih?" ka lo tih zawm zung zung a, ka aw chu a vin mah mah mai thei, mahse ka insum hman tawh lo. 

"Engtin mah ka ti lo, ka khawih thiam tawh lo. Eng lo, a pipe hi ka phâwi daih a, ka vuah thiam leh tawh si lo va, a puak lo ang ti raw?" a rawn ti ta phuang phuang mai, a va buaithlak ṭhin tak!

"Ka nute i be tawh em? Biak han tum chhin teh, nge ka lo be zâwk mai dâwn em ni?" ka ti ve ta ringawt a, han lungawi loh khum vak chî pawh a ni lo. 

"Ka pa nen biak ka tum ve ve tawh, mahse an pick up thei lo ve ve a, gas hi a puak lo ang ti raw?" a aw aṭang chuan a hlauthawng tih phat rual a ni lo va, a sawi tum pawh ka man nghal mai. 

"Puak lo ang, ka lo haw hman ṭep, ka nute chu be lo law law mai ang" hriat nuam deuh zâwka ka tih chuan

"Awi, a ṭhat hlauh chu! Lo haw thuai thuai teh, gas ber hian ka rilru a timangang" a lo ti hliai a, a thil sawi zawng zawng chu ka buai laia min lo call chhen chhan kha a ni ngei awm si a, ho ka va ti tak! 

"Ka dah a nia" ka tih chua

"Aw le, tluang deuhin i lo haw dâwn a nia" a lo ti ve mai a, kan inbiakna chu ka hmet tawp zui nghal bawk.

Ka hman ver vawr hnu chuan university campus chu ka chhuahsan ta vang vang a, vaivakawn chho ah traffic a la jam zui a, ina awm der der ka châk tawh khawp mai. Khaw awm dan chuan hun kal tawh min ngaihtuah chhuah tir a, Car chhungah chuan mawi taka Lalnunsanga hla sak 'Di Hlui' chu ka play zui zat a, khaw dur dan leh ruah tlak sep sep dan te nen chuan inrem tak a ni. Ka tleirawl chhuah hlim hlawl aṭanga ka bialnu nghet Hlimpuii kha engtin awm zel ang maw!? Ani nen kha chuan kawng engkimah kan inlungrual a, nupuia neih ngei pawh ka tum a, mahse keia tumna ve mai chu ka pa'n a ṭhiat hnehsawh em em thung si.

Kan in kawt ka thlen chuan ruah a sûr nasa tawh hle a, tun lai chu chawhma lamah khua ṭha viau mah se chawhnu lam erawh a chhe thei hle a, rin loh lai taka ruah rawn súr a ching khawp mai. Kan in kawtah ding reng tawh mah ila ruah a sùr nasat em avangin ka chhuak lo va, ka tâng chu a ni der. Kan in chhunga awm ka nupui Maltei chu vawi hnih lai ka call tawh a, a ring ral ṭhak ṭhak leh ta nghal a, phone ring ri a hre lo a nih hmel. Mahni hriat tâwk leka phun deuh supin car chhungah chuan ka ṭhu ngawi ta reng a, ka nupui lah chuan in kawtah ka awm tawh tih a hre der bawk si lo.

A vawi thum nân ka call leh a, a pick up ve thei ta hram a, hmanhmawh zet hian nihliap nen a lo chhuak a, car bul a rawn thleng chiah chu a zangthal zawngin a tlu thlawrh a, puih nachang pawh hre lawk ko khawpin ka nui dir char char a, amah nen a inhmeh lutuk chu ka nui lo thei lo a ni. A tho lawk lo leh ta nghal a, 'ka huh tho a ngai dâwn a nih hi!' ti rilru nuah nuah chungin car aṭang chuan ka chhuak a, a kiu a lo tauh thi chu niin, ka pawm kang vat a, a nihliap rawn ken chhuah pawh a delh tliak nual a, kap parh pawh ni ila 'a khum tlâk tawh lo ang' tih tur àwm vel a ni.

"Min nuih lo teh, a nâ teh mai a nia" a ti deuh tan tan a, ka nuihza hmel erawh thlak danglam ka tum chuang lo.

"Huh ka hlauh tehreng nen" fiamthu titih deuha ka tih chuan

"Nang ai huh ka hlau daih zâwk, ruah sûr loh hunah ka tlukna lai saw ka tifai dâwn chiang khawp mai, ka tlu tawh hauh lo ang" a lo tih zawm mawlh mawlh a, in chhung kan luh rualin a kiu thi ser ser chu buaipuisak ka tum deuh uk a, mahse amahin a inbuaipui nghal mial mial a, ka inbualsan ta daih! 

Ka nupui nen hian kum 1 zenzàwn kan innei ve tawh a, kan inneih dan leh a chhan erawh thil ho tak a ni! Zan khat ka ṭhianpa birthday party neihnaa ka kal ṭumin kan intawng a, khang hun lai kha chuan tu nge a nih pawh ka hre lo va, mahse ka ruih deuh hlek avangin ka bialnu nghet Hlimpuii emaw ka ti tlat a, sex hial kan hmang ta a, a sosan pawh kan sosang dun teh e! Zingah erawh ka thil tihsual ka hre chhuak a, ka inchhir a, pawi ka ti a, ka zak em em bawk a, mahse engkim chu se bo hnua se kawng khar ang mai a ni tawh bawk si. 

Hlimpuii zin lo hawin amah ni lo hmeichhe dang ka lo mutpui tih a hriat tâkah chuan a thin a rim em em a, ka chungah pawh a lungawi lo hle a, mahse kan inṭhen phah chuang lo. Hlimpuii nen hian higher kan kal lai aṭang tawh hna ka neih thlengin kan inzui chawt a, min hre chiangtu tam tak phei chuan 'an inṭhen tawh lo ang' te an ti hial ṭhin a, mahse hma hun kan va hre si lo êm. Hmeichhe rilru ṭha tak leh nunnêm em em mai hi a ni a, duhna leh hmangaihna pawh awm miah lova ka nupui ni ta ringawt Maltei mizia nen hi chuan inperhsan tak a ni. 

Maltei ve thung erawh hi chu a la â phuang a, a kum pawh a la tam lo, huai erawh a huai viau thung. Khami zan, kan chetsual dun zan aṭanga thla hnih hnuah min rawn zawng chhuak hmiah a, a rai thu min rawn hrilh mai a nih chu! Ka nu leh pa hauh ka tâwk nghal a, ka û hauh ka tâwk bawk a, ani Maltei lah chu a sawi tur a sawi zo tê tê a, a haw daih leh nghal. Chumi zan la lâ chuan ka pa'n thutlukna a siam zui nghal a, Maltei chu nupuia nei ngei turin min hrilh a, a thinrim laklawh bawk nen in dang nghal turin min hrilh hial a, tun thleng hian kan la in dang ve ta char char bawk. 

Kan inneih nî te khan kan va phur lo dun tak, Maltein min duh lo ang bawkin ka duh bik lo va, ka fa pai lo se zawng ka va han nei dâwn lo chiang tak! Ka hmangaih Hlimpuii rilru nâ lutuk chuan min tinâ ve vek bawk a, kan inneih zan pawh chuan phone kaltlangin ka hnem nasa viau a, mahse awmzia a awm tam lo hle. Ka awm dan chu ka ning a, ka hne a, chep ka ti a, mahse tumah dem thei ka ni bawk si lo, a chhan bulpui ber chu a tir tê aṭangin ka thiam loh vek alawm a nih! 

"Min û suh, ka upat hmel lutuk" ka tih lah hian

"Kei ai i upa miau alawm, eng nge ka û loh ang che?" a ti tlat zel mai bawk si a, a kuma kum kan inneih ve tâkah chuan ngaiah ka nei thei ve ta mai.

Rilru leh ngaihtuahnaah erawh Hlimpuii a châm reng a, nupui nei reng tawh chung siin ka rilru a uire ni tin zan tin a, ka hmangaih Hlimpuii ber lah chuan phai lamah min liamsan daih tawh leh nghal. Kan nupa hi chu kan chhungte ve vein min hrem a ni ber a, nupa ni si ah chuan inhnimhnai lo ve tak chu kan ni! Vanduaithlak ka ti dâwn nge vanneihthlak ka ti dâwn zâwk pawh ka hre lo, Thla ruk liam ta khan Maltei hian nau a chhiat hlauh mai a, mahse tun thlengin kan la innei chhunzawm zel ta thung a, kan awm zel dan tur pawh ka ngaihtuah buai peih rih lo, kan awm àwmin awm tawp ila kan hlim berin ka hria.

"Gas chu min lo vuah ṭhatsak tawh la, ar sa ka siam duh a" thawmhnaw ka hak mial mial laiin Maltei chuan a lo ti a, chhang lem lovin ka kal ve nghal mai bawk. 

"Va inbual rawh, i dam lo ringawt ang e" gas bur khawih paha ka tih chuan

"Ar sa ka siam phawt ang a, ka inbual ang" a lo ti ve nghal a, ka thusawi a hnial avang chuan ka thinrim dâwn ringawt a nih chu!

"Va inbual phawt zâwk rawh, i inbual zawhah ar sa te chu i siam thei reng alawm, kal rawh" ka ti leh ngat a, min chhan tuma a kâ a àn zuau lai chuan

"Min hnial suh Malte" ka tih khalh hmuk a, mit khap fuk fuka min en deuh reng hnuah a kal sawn ve ta hram! 

Gas ka buaipui zawh hnu chuan kan nupa room-ah ka lut a, ka phone chu ka khàl nuap nuap a, mahse rei pawh ka khawih thei lo, Hlimpuii ka ngai tak zet a ni. Ruah sûr chuan hlim taka ruah kan do dun ṭum te kha min hriat chhuahtir a, ka mitthlaah a hmel hlim tak kha a la châm reng a, ka paih bo theih pawh ka ring lo, ka phal lo bawk. Lukham chu ka âwmah kuah bet runin ka ngaihtuahna ka kawm mial mial a, chutia ka awm veng veng lai chuan kan nupa room kawngka chu a lo inhawng a, rawn pen lut mêk chu tu dang ni lovin Maltei ngei a ni.

"Awi! Min tiphu alawm, chokaah i awm dawn emaw tia" ti hluaiin a âwm bâwr chu a hup deuh ṭat a, ka hawi sawn ta daih!

"I lung a va'n lén hmel em em" a rawn ti leh reuh a, he nu tê reuh hi chu ṭawng lo hian a awm rei thei tak tak lo.

"Lêng e" tih chauhin ka chhang a, chhan loh aiah ka ṭawng vel mai mai a ni. 

"Ar sa ni lo eng chawhmeh dang nge kan siam ang?" sawi tur a hre thei lutuk hi chu a chang chuan ka ning lek lek ṭhin.

"Ka hre lo" ka ti deuh hmuk a, ka aw ah chuan ṭawng ka châk lo tih a hriat hle bawk.

"Sawi la, ka lo siam ang" a rawn ti leh chiah chu

"Ka hre lo ka tih chu maw le" ka lo ti deuh hluk a, ani pawh a reh ta hmak a, ngawi rengin kan nupa room aṭang chuan a chhuak ta daih a, ka inthiam lo leh ta nge nge. 

A la naupanna hi ka lo theihnghilh leh ṭhin a, ka nu phei chuan 'i nau ang chiahin dawm rawh' min ti fô ṭhin. A rai avang chauha innei e ti lo chuan ka chhungteah a tla nâ phian reuh leh nghal a, thik chang pawh ka ngah mai. Ka pa'n a nêl a, ka nu'n a ngaihtuahin a nêl em em bawk a, ka u lehzel pawh a bang chuang lo. Chutah a nupui leh a fate pathum chenin Maltei an nêl em em vek a, a la ni phuang phuang ṭhin leh zep nei si se lova a ṭawng phawng phawng ṭhin hi an ngainatna chhan berah ka ngai tawp, thil dang vak ka hre lo. Kei erawhin ka nêl em em ka hre lo va, ka haw chuang lo bawk a, a awm âwmin ka en liam tawp a ni ber.

Tin, ka'n thinrim khum deuh pawh hian a hnuah ka inthiam lo leh ziah a, ka pawi a sawi pawh a ni lo, min zawh ngai miah lova ka hriat min zawt thlap thlap kher hi a chang chuan ka ning ṭhin a ni. A chhungte pawh hian an rawn lén chilh fô va, unau pathum an ni a, hmeichhia vek an ni leh nghal a, ka awm loh laiin an lo lêng ṭhin kher bawk nen min rèl ṭhin ka ring, mahse Maltei tân chuan sual han tih theih vak ka ni bik lo, a rilru tinâ zawngin ka la awm lo tlat, ka ṭawngkhum leh hluk ṭhin tih erawh a sawi lan duh chuan a sawi lang thei reng. A chhungte lah hian min nêl phian leh nghal a, rin loh lam takin min makpa chei viau bawk.

"Ei rawng ka bawl lai khan ka nu'n min lo call a, zanin chu va lêng phei ila, ka lêng châk ê" zanriah kan ei lai chuan nuapangchhia zet hian a ti siam siam a, ṭawngkâa chhang lova ka bu nghut ringawt chu

"Min chhang ve la, 'aw' nge 'aih' tih talin" a rawn tih zawm leh nghal zat a, a lo lungawi lo ve ngei ni tur a ni.

"Kan va lêng dâwn a nia" ka ti ve ta sup a, tui ti em emin chaw chu ka ei ṭeuh a, ei rawng bawl lamah hi chuan ka nu leh ka u nupui paw'n an tluk lo chiang e! 

"A nih naktuk eng nge i tih ang?" ka ngawih vung vung laia a rawn tih leh chuan

"University-ah ka kal ang chu maw le" ka lo ti sam mai a, thil ngaihtuah tih hriat taka meng núr deuh náng chung hian

"Nia, a ngai leh lo mai" a ti zuai deuh raih a, a ṭawng dan avang chuan thil dang hriat belh ka châk phah ringawt leh nghal. 

"Eng nge naktuk chu?" tia ka zawh chuan

"Engmah maw le, a ngai leh lo" a lo ti deuh tlat thung a, thil thup a nei deuh tlata hriatna nei mah ila ka zâwt lui zui zel duh ta lo law law.

"A nih leh naktuk zan eng nge i tih ang?" a rawn ti leh daih a, thil eng emaw tak chu a awm chiang a ni!

"Ka chhuah ka ring, kan ṭhian pakhat birthday a nia, i duh chuan i lo kal ve thei ang, ni lo, i lo kal ve ngei ang chu maw lé" ka tih zawm duah a, ani ve thung chuan

"Ka duh lo e a!" a lo ti thuai a, min chhang rang lutuk chu a duh lo tak tak a nih hmel. 

"Engati nge?" a mita en reng chungin ka ti hniam sup a, a inngaihtuah hmel vel chuan ka nuih a tiza ru hle bawk. 

"Naktuk zan chu kan inah ka lêng lawk duh a, i chhuak dâwn tho va, ka lo va lêng daih ang. I haw pahin min lo lam leh ang a, ka lo kal ve peih lo tak tak" min ngen titih hian a duh dan chu a sawi melh melh a, ka nui chhuak hawk ringawt.

"Engati nge i peih lo?" nui chunga ka tih chuan

"Ka peih lo a ni mai, hetiang vel hi ka ngaina lo" a lo ti deuh tan tan reuh a, min chhan dan engkim chuan min tiphur a, ka nghal châk hle bawk.

"Nuam i tih ka lo ring asin, kan inhriatna pawh kha birthday party tho alawm a nih" a hmel en duh miah lovin ka ti a, engtin tak min chhang ang maw!

"Awi awi awi! Kha zan ka lo kal kha tun thleng hian ka la inchhir, tum loh deuhin ka awm phah vek leh nghal. Hetiang hi a ni dâwn tih hre lâwk ila chuan ka ṭhiannu min sáwmna kha ka hnar chiang khawp ang, engkim a nih tur ang a ni vek tawh bawk si" a melh ngai melh renga a tih tawn tawn lai chuan ka lo nui suk ringawt.

"Kei min nei hi nuam i ti viau emaw ka tia?" ka ti liam puat a, eng vanga chhaih kawlh châk tlat nge ka nih pawh ka hre lo e a!

"Nuam i tih lo ang bawkin nuam ka ti bik hleinem, mahse a chang chuan nuam ka ti deuh tho, lehkha zir miah lova awm mai mai hi a nuam" dam diai hian a rawn ti daih a, a thinrim ka rin tehreng nen a thinrim miah lo.

"Ka sawi awmzia chu lehkha hi ka zir ning thei tawp a, ka rilru a chak lo si, ka thiam thei lo bawk si, class 12 ka pass te kha a mak zâwk! Ka zir peih loh chu thuhran ni se, a thiam thei lo chî ka la ni zui, nang pawh ni la i ning ve tho ang" a tih zawm leh mial mial a, a lo zir ning thei tak tak hle a ni mah na.

"Kham ang, i thlengah chaw engmah a awm tawh lo. Kan lêng dâwn bawk si, kan tlai lutuk palh ang e" ka tih chuan nui sen sen hian

"Nia, ka puar, puar hnua titi dun hi a lo va'n nuam reuh" a rawn ti a, ka inen chiang bawk nen a hawi sawn rang hle a, a nui tawp nghal thuai bawk.

Inpui lam kan pan lai chuan a ṭawng melh melh reng a, hmeichhia hi chu an ṭawng duh vekin ka hria, chung zingah chuan Maltei hi a ṭawng duh zual pawl a nih ngei ka ring bawk. Inpui kan thlen hnu lawkah ruah a rawn sûr buan buan a, a sûr rei phian leh nghal a, kan haw dâwnah pawh a la sûr reng a, sûr duh miah miah tak a ni. Kan in kan thleng chu mu turin kan insiam nghal a, nupa nih tawh chuan khum khata mut a ngai ṭhin si a, mut hi ka ning ber ṭhin, a dang hi chu ka ti thei mai zel! 

Rei pawh kan mut hmain Maltei chu a muhil nghal sek sek a, zanriah ei lai khan kei min neih hnua nuam tih chang a neih thute kha a sawi a, mahse ka awih chiah lo, a hah phah viauin ka hre zâwk! Kan nupui a nih hnu hi chuan a zirlai a chawlhsan hmak a, ni tin inah awmin a insu a, in chhungkhura chet ngai zawng zawng a che vek bawk a, kum naupangtê si hian kawng ṭhenkhatah chuan a puitling phian lawi a, ka ṭhiante an lo lén chângte hian a lo be tlângnêl thiam reuh em em a, ka ṭhiante zingah ngaina lo an awm àwm pawh ka hre lo, an ngaina vekin ka hria. 

A muhil hmel chu ka en reng a, chiang takin a hmel hi ka en ngai lem lo va, mahse hmelchhe zawk zawk a ni lo tih erawh ka hre tho. A hmelah chuan a la upa lo tih a hriat em em a, a vun ni se a nalh mâm phian leh nghal a, tun lai hmeichhiate angin make-up a hmang over ve lo va, a lan dan chu a natural tawp a, chutiang chu ka ngainat chî tak a ni bawk. 'I nupui a ni a, sik pawh i si ngam na nge? Nep a, i nep hle mai' tih thu chu ka rilruah a ri tluk tluk a, min tur sek ni berin ka hria. Ka rilru chu ka hrethiam lo, hmun hnihah inṭhenin an inhnial ni mai te'n ka hre ta hial a, ka rin loh dan deuhin ka awm phah ringawt bawk.

Ka nupui muhil thaw ri sek sek chu thlir rengin a lamah ka tawlh hnai tial tial a, kan chetsual zan tih loh kha chu khum khatah mu ṭhin mah ila kan insi ngai lo tluk a ni a, tun ṭum erawh a dan a dang tlat, boruak lah chu a lûm ta viauin ka hre leh nghal. Ka nupui taksa chu ka hnaih tial tial a, a taksa rimtui chêk chuan ka hnâr a verh nghal zar a, hmeichhe rim dik tak a ni. A taksa ka si chiah chu ka lûm deuh pup pup a, hmun dang hawi sawn thei tawh lo ang mai hian a hmel chu ka en reng a, a hmai zawnah chuan ka kun hniam tial tial a, ka awm dan engkim chu ka hre vek, mahse inthunun tumna pawh ka nei chuang lo.

A chalah chuan ka fawp zeuh a, ka awm dan ka siam ṭhat hnuah pawh mit lá lêk lo hian a hmel chu ka thlir dauh dauh a, che sual lo ila chuan mipa ṭha tak a tawng ngei ang maw lè. Ka kiua inbèng kangin ka nuipui hmel chu vawi duai lo ka en nawn ta sek a, ka hmu hmelṭha zual tak zet a ni. Chutia ka en reng lai chuan chawp leh chilhin ka mitthlaah Hlimpuii hmel a rawn lang teh hlawl a, chu chuan engkim a thlak danglam nghal vek a, ka thil tih zawh chiah te chu ka ngaihtuah lêt a, nêp ka va han inti tak! Ka nupui hnungchhawn zawng chuan ka mu meng kur a, ngaihtuahna a vâk kual nasa kher mai.

Thawm ri neuh neuh chuan min tiharh a, ka men rualin zing a lo ni der tawh tih ka hre zawm zat bawk. Khum aṭang chuan ka tho ṭuah ṭuah a, ka zik mar fel vek hnuah room aṭangin ka chhuak a, ei rawng bâwl pah hian Maltei chu a lo zai rât rat a, nizana thil thleng leh ka awm dan zawng zawng kha chu hrilh chî ah ka ngai lo. Min hmuh rualin thingpui min siam nghal a, a chet vel dan aṭang chuan a mood a fuh hmel cher cher khawp mai. A chang leh rap titih deuh hian a zai a, hmeichhe ze zawi tak hi chu a ni lo ve chiang e! 

Ka hna kal tur te chu min thlah thlap reuh a, a awm dan chuan min tihamhaih lek lek dâwn alawm le, ni dangah a awm ngai bawk si lo. Nihliap min kentir a tum chuan ṭul lo ka ti hle a, ni a sa vur bawk si nen ken ngaiah pawh ka ruat lo. Ani erawhin chawhnu lama ruah a sur leh thut a hlau thung a, kan in kawta ka tán reng a lo hlau tel bawk chu niin, ka ken phah ta ringawt. University ka thlen hnua ka message dawn chuan ka rilru leh taksa zawng zawng a tidanglam vek a, ka message dawn chu eng dang ni lovin Hlimpuii lo haw thu ngei a ni.

Ka tih tur ti reng chungin Hlimpuii ringawt ka ngaihtuah a, ka ṭhianpa message lo thawn zel dan phei chuan birthday party-naah a lo kal ve dâwn a nih hmel a, eng pawh ni se hmuh ngei ka tum, ka hmu leh châk a ni. Khatiang teh tawp khan kan tawp a, loh theih lohnain min nangching lo ngat se zawng ka nupui a ni chiang khawp ang. Chawhnu lama ka haw chu ruah a rawn sûr leh ta ngei a, nihliap ka ken lâwk diam avangin ka buai hran lo. Ka rilruah Hlimpuii hmuh hlir a awm tawh avangin zana chhuak tur chuan ka inpeih hma hle a, kei ang bawkin Maltei pawh a insiam peih hma khawp mai.

Zanriah ei khamah chuan kan chhuak rual a, an in thleng ka va thlah a, haw huna ka lam tur thu ka hrilh lâwk sa thlap bawk. Khawmuang tawh lovin ka ṭhianpa te in lam chu ka pan zui nghal a, rei pawh kan titi hmaa Hlimpuii hmel ngei a taka ka hmu leh chiah chu ka awm dan pawh ka hre lo. Hmán ai létin a hmelṭha zual zâwk tawh a, a polite ngaiin a la polite reng bawk a, kan inbiak dan erawh a dan a dang tawh em em thung. Ṭhian ang maiin kan inbia a, min kuah lai te chuan a kal sawn phal tawh lo ang hrima kuah beh tlat ka nãp rum rum a, mahse chutiang tih chu a rem tawh si lo.

"I lo danglam tawh hle mai, hmân ai khan i thau tawh zâwk bawkin ka hria" ngainat awm zeta nui chung hian a ti siam siam a, chhan mai nachang pawh ka hre lo, ka en reng ringawt. 

"Ti rawh, hmun dangah awm daih ang, kan awmna hi chu a ualau êm mai" tiin min kal sawnpui ta daih a, cold drinks chu a lâ zeuh bawk a, a engkim chuan ka mit a lâ a ni ber e.

"In nu nen in ṭha zel maw?" kan pahnih chauha kan awm hnua a tih chuan ṭawngkâa chhang lovin ka bu zauh a, a lo hrethiam ve nghal mai bawk.

"Ngaihzawng ka nei leh tawh asin" rilru zau tak pu chunga a tih leh chuan ka mitmeng a danglam nghal vek thei!

"Min ngâi ve ṭhin em?" tlang takin ka ti hmiah a, ka zawhna avang chuan a nui lui hak a, a rilru nâ hmel chu thup tum viau mah se ka hmu vek tho.

"Min chhang ta che" nem fahran lova ka tih leh chuan

"I zawhna hian awmzia a nei lo êm mai" a rawn ti daih a, in chhung lamah a lut nghal daih bawk.

Hlimpuii bulah chuan ka awm deuh chawt a, engtin pawh che se ka mit a lá em em vek a, mahse thil mak tak pakhat chu ka beisei ang hùin ka hlim chuang miah lo. A awm loh vang vang aṭang khan amah ngaiin ka kùr a, ngaihtuah chhuah loh changte chu nei ve zeuh zeuh tho mah ila ka rilru leh ngaihtuahna luah tam bertu chu amah tho a ni. Hlimpuii awm dan leh min mitmei dan aṭang chuan ka lakah eng thil emaw beisei nei ang tlata hriatna ka nei leh ta nghal a, ka rin dan chu a tak ni se ka ti, ka hmeichhe hmangaih nena awm dun tluka châk ka nei tlat lo a tin a ni!

A haw dâwnah a ngaihzawng ni ngei tur mipa pakhat hian a rawn lam a, rilru pangngai tak pu chunga ka en liam ringawt chu ka thinrim hnuhnawh a, ka thik hnuhnawh lawi bawk a, a hun laia engmah ti mang si lo. Ka puzawnte vêng lama ka tlan lai te chuan Hlimpuii ngawr ngawr ka ngaihtuah a, bialpa nei eng ang tawh mah se kei hian ka la hmangaih tlat bawk si, kum tam tak inzuia ka lo hmangaih tawh chu awlsam têin ka hmangaih lo nghal ringawt thei lo ni e. Ka puzawnte in kawt ka thlen chuan chhuak nghal mai lovin car chhungah ka ṭhu ngawi reng phawt a, minute eng emaw zah hnuah ka chhuak ve ta chauh!

"Hei Nunthara pawh a lo thleng tawh alawm, cake kha va lá rawh Malte, ani ber i barh ve loh te chuan a dik náng" in chhung ka luh rualin Maltei nu chuan a lo ti siam siam a, a thusawi erawh ka hrethiam lo kher mai.

"Zanin chu hna lampang a laklawh hle a ni maw?" pangngai deuh hian Maltei pa zâwk chuan a lo ti ve leh a, ka hrethiam lo tulh tulh. 

"Nia" hrilhhai ru zet hian ka ti ringawt a, Maltei chu zawhna mitmengin ka melh a, a hawi sawn daih leh nghal. 

"Va la thuai ta che maw le Malte" a nu bawk chuan a ti leh a, Maltei pawh chu tho nghalin fridge chhung aṭang chuan cake hi a rawn là chhuak a, ka lo en reng ringawt.

"Kha le, âng rawh le" cake min barh tum pah hian a nui lui ver ver a, tlang taka thil sawi ṭhin leh zep nei ngai hauh lo ka nupui hmelah chuan thil thup a nei tih ka hmu chiang hle. 

"Âng la" nui lui sen sena a tih leh chuan en reng chungin ka âng ve mai a, a awm dan engkim chu ka en zui zel a, ka puzawn leh pizawnte min biakna pawh ka chhang ṭha mang lo, Maltei awm dan chuan ka rilru a tikal thui khawp mai.

"Zanin kha eng nge a awmzia? Engmah kha ka hrethiam lo?" car chhunga kan chuan dun hnu chuan ka ti ta nge nge a, ani erawh a ngawi reng thung.

"Malte?" ka tih leh chuan min en rawn zeuh a, a nui lui sen sen zel chu ka hmu kham, tlang takin awm leh se a bula awm nuam ka ti zâwk!

"A ho lutuk" tih chauh hian min chhang a, min chhan dan chu ka duhkhawp lo teh e! 

"A ho lo, min hrilh tlang rawh" ka ti leh ngat a, a rawn thaw chhuak ham ham a, vei deuh nei hmel a pu reng bawkin ka hria. 

"Eng lo a nia, vawiin hi ka birthday a nia, mahse a ho lutuk, ka hrilh lo law law mai che a nih kha!" a tih tâkah chuan

"Engati nge min hrilh loh?" ka lo ti nghal vat a, ka inhrethiam lo, ka thinrim ru ṭun ringawt.

"Engati maw? Engati nge ka hrilh ang che?" min en deuh hâ chung hian a rawn ti a, ka kâ chu ka vêng hman lo chiang hle. 

"Ka nupui alawm i nih" ka ti hluk a, ka aw aṭang chuan ka lung a awi lo tih a hriatthiam nghal vek ka ring.

"Sawi tawh lo ila" dam diaia a tih chuan

"I pasal ka nih angin i chungchang engkim hre tur ka ni, a leh pekah chuan min hrilh zat zat tawh ang che" ka ti nghet charh charh a, ka mit sirin min rawn en reng tih ka hria, mahse a lam chu ka hawi lo hrim hrim.

In kan thlen hnu chuan room-ah a lut tlang nghal a, a lungawi lo deuhin ka hria. A ngai tê bawkin ka inthiam lo leh ta nge nge a, ka nupui birthday pawh hre lova ka awm chu nep ka inti leh lawi a, ka ṭhiante'n an hre reu reu ang tih ka hlau hle bawk. Room-a ka luh chuan khumah a lo mu fel diam tawh a, car chhungah khan ka lo ṭawngkhum nâ mah mah emaw ni le te ka ti ta rum rum a, a lakah chuan ka inthiam hlei thei tlat lo. Kawngka bula car chabi chu lâin ka inkhalh chhuak zui nghal a, ka nupui a ni a, tlai khawhnu viau tawh mah se eng emaw tal ka tihsak ve a ṭul a ni.

Kawngpui sira ar sa bawp hem hmin sa vur leh momo tui hmel tak tak te chu ka lei haw ṭeuh a, drinks atân sprite bûr khat ke lei haw bawk a, in ka thleng chu a lo tlai duai tawh a, mahse tlai chhe lutuk erawh a la ni lo. Room chhunga ka luh chuan a saisir zawng hian a lo mu kawm ngul a, kaih thawh chawp ngai lovin a lo mu meng kar a, a ngaihtuahna a kal ding hmel hle bawk. Ka thawm leh ka che vel chu a hre vek a, mahse hria ang paw'n a awm eih lo. A awm dan chuan ka awm a tinuam lo zual a, a lakah ka inthlahrung zual sauh a ni ber.

"Lo kal rawh, thil ei ang" a hma zawna ṭhu thla chungin ka ti hniam sup a, kan mit chu a intawng nghal chat bawk. 

"Lo kal rawh le" ka tih leh dap chuan a lo tho ve mai a, a lungawi chiah lo hmel kha tunah chuan mak tihnain a thlak ta thungin ka hria.

"Heng hi eng nge a? Nichina i chhuah khan i va lei a ni maw?" dawhkan têa ka thil lei ho a hmuh rual chuan a ti nghal hliai a, a hnungah dingin ka nui suk ringawt. 

"I birthday ka lo theihngilh daih avangin min hrethiam dâwn a nia, a la tlai lutuk lo bawk a, ei zo vek ang aw?" nui chunga ka tih chuan

"Awi, ar sa bawp hi a tui hmel lutuk, mahse ka la puar deuh reuh ê" a ti niah niah a, a mood chu a pangngai leh vek tawhin ka hria.

"Dâwt sawi tawh suh aw, i inhmeh ve lo" tui ti zeta a ei mial mial lai chuan ka ti a, ka thil sawi hrethiam chiah lo ang hrim hian

"Eng dâwt maw?" a lo ti ve nghal a, thil dang ngaihtuah leh tawh chuang lovin ar sa chu a ei tuam tuam zui nghal zat bawk.

"I chhungte bulah dâwt sawi tawh suh, ka bulah pawh, hna thila ka chhuak anga i sawi kha a nia ka tih" ka tih leh chuan ka sawi awmzia a hriat hmel ta deuh! 

"Nia, sawi tawh lo ang, mahse chhuanlam tur dang a vâng lutuk a" a tih chuan

"Min hrilh thei reng alawm, i birthday a ni tih min hrilh la chuan dâwt i sawi a ngai miah lo ang" tiin ka lo pawt chat thuai a, ṭawng zawm tawh lovin a ngawi ta hle hle. 

"A tui em?" ka ti leh ta ringawt a, zanin chu a birthday a ni bawk si a, a ṭawng tam zâwka ka ṭan a ngai te pawh a ni mahna.

"Tui lutuk, ei ve ta che, ka barh kher i phut deuh êm ni?" nui var var pah hian a ti a, min en chuang hlei lo va, a thil ei lai bak ngaihtuah ang paw'n a awm lo. 

"Duh deuh mai thei" eng rilru pûin nge chutiang thu chu ka sawi pawh ka hre lo, kan awm dan ni se a hlimawm reuh phian leh nghal.

"A nih kha, âng rawh" tih leh min barh a rual a, ka lo âng ve mai bawk a, a lungawi lo hmel ai thlawt chuan a hlim hmel chu hmuh a nuam tak zet. 

"Ka puar ulin ka hria" tia thawh a tum chu a ke chhep sual palhin a tlu dâwn ta mai, a bânah leh a kawngah ka chelh vat a, ka rin ai a rit zêk leh nghal. 

A zangthal zawnga chhuat a tauh chawrh tur chu kuai sawkin keimah zâwkin chhuat ka thleng hmasa a, ka chungah a bawk ran a, chiang zet hian min en a, a tim deuh dai bawk. Ka thin phu chu a rang dawt dawt a, ani pawh kei ang thovin a thin phut dan a rang tih ka hre thei. Thawh tuma a chet rual chuan a bânah ka hmer nghet zual sauh a, kan boruak a danglam ta hle bawk. A ṭang ṭung a, a tum pawh ni miah lova min rawn bawh titih chuan eng thil nge keimahah rawn thawk pawh ka hre tawh bik lo, ka che thut a ni ber.

A tukhumah chelhin a hmui nem zet chu ka fawp zeuh a, duh tâwk mai ka tum a, ka thei teuh lo. A hma aia uar zâwk mah hian ka fawp vawng vawng a, ani paw'n min hnar lo hrim hrim a, ka hmui ka tih chet ruala a hmui lo che ve ṭhin chuan min tiphur zual a, engkim chu a dangdaiin a mak vel vek a ni ber e. Ka taksa a lum pup pup a, chutiang taka hmui fawh nuam leh min tiphur thei chu ka tawn áwm ka la hre lo, danglam tak a ni! Ka harhfim meuh chuan ka thil tih lai chu ka tawp chat a, ani pawh hmai sen ṭawn ṭawn hian ka taksa a delhna ata a tho kang thuai a, che hmanhmawh zung zung tak a ni.

"I muhil thei lo ve tho èm?" rei fê ngawi renga khuma kan mut hnu chuan a rawn ti ta phawng mai, a lo la muhil bik reng reng lo a nih hmel. 

"Engati nge nichin khan min fawh ringawt a?" ka lam hawi zawnga inlet tharhin a rawn ti leh a, a zawhna teh thut chuan ka nuih a tiza ang reng.

"Ka hre bik lo" ka ti ringawt a, chutiang bak chuan chhan dan tur ka hre lo a tin a ni!

"I nuih a va'n zat hmel, i lái elo?" a rawn ti leh reuh a, ka nuihza chu a bo chiang khawp mai. 

"Saw lam hawi la, mu hle hle rawh" ka tih deuh nghut chuan

"Ka muhil thei hleinem, nichina kan awm dan kha ka ngaihtuah ngut ngut a, i ni ve tho em?" a ti zung zung a, kei erawhin thawk ka lo là ham ham thung a, ka ner deuh sung bawk. 

"A nih chuan lo hnai teh" ka ti leh ta ringawt a, ka awm dan chu keimah ngei paw'n ka hrethiam bik chuang lo.

"Eng nge kan tih dáwn?" a tih laklawh lai chuan ka lamah ka pawt phei dâwrh a, ka âwma ka kuah bet chiah chu amah mai ni lo keimah ngei pawh ka danglam chiang a ni.

"Heti hian mu hle hle ang" ti supin ka ngawi run a, ani pawh a reh ta vang vang. 

Zinga ka harh chuan ka âwm khan chial hian a lo la muhil bam a, mahse zan lam ang lo takin min hnungchhawn tawh thung. Ka harh hma hle a, zingkâr aṭangin khua chu a chhe ringawt leh nghal a, ka tho peih ta lo law law mai. Ruah a tla ri ser ser a, chu chuan ka mut a tichhuak zual a, hna kal pawh a peihawm loh rum rum dâwn alawm le. Kan awm dan chu engtin emaw tak hian a hahdamthlak ka ti ang reng hle a, ka rilru kaptu a awm lo va, ka awm a nuam veng veng bawk. Ka nupui biang chu ka fawp leh zeuh a, a bula ka awm tawh hi chuan ka tum loh deuh deuhin ka awm ṭhin a ni ber e.

Chumi zing aṭang chuan kan nupa boruak a ṭha chho ta viau a, a chhan tak pawh ka hre chuang lo. A awm dan chu a ngai reng a, keimah zâwk ka danglam tawlh tawlh ni maiin ka hria. Hna kal tura ka chhuah dâwn apiangin nihliap min kentir ziah a, ka keng sual ngai miah lo bawk. Tin, Hlimpuii nen pawh kan inhmu ta fô va, ka duhna leh ka hmangaihna a la ngai reng a, chu chu amah ngei paw'n a hria, mahse ka hlata awm hram hram a tum ṭhin. A bialpa nen pawh a inkawp rei ta fû a, ka thik rualin ka thik lutuk lo te'n ka hre leh lawi a, nupui ka neih tawh vangte pawh a ni mai thei, hmangaihin duh reng mah ila ka hnaih ṭha ngam tawh tlat lo.

Thlate chu an liam zung zung a, phat rual lovin ka nungchang, ka awm dan, ka thil ngaihtuah leh ka nupui laka ka rilru puthmang chu a danglam nasa tawh hle tih ka hre chhuak ve ta. Ka ngaina ngei a, a bula awm pawh nuam ka ti, a bula ka awm hi chuan ka hlim veng veng zelin ka hria, mahse ka hmangaih Hlimpuii êm tluk zo tur chuan ka la ngai chuang lo. Khaikhin chhen tur pawh hi ka ni lo maw le, mahse ka khaikhin lo thei ṭhin bawk si lo. 

Zan khat chu ka ṭhiante an rawn lêng huk a, Hlimpuii pawh a tel ve nghe nghe a, a bialpa erawh a rawn kal ve miah lo thung. Maltei lakah ka inthlahrung deuh a, mahse Hlimpuii nen chuan an inkawm thei phian a, ei tur leh thingpui te an lùm dun ta hial a, ka beisei loh dan deuha thil a kal chu mak ka ti khawp mai. Kum kha leh chen lo inngaizawng tawh ṭhin kan nih avangin Hlimpuii hi chu ka ṭhiante paw'n an ṭhian en vek tawh a, Maltei ber zâwk hian a hrethiam lo ang tih ka hlau a, mahse chutiang eng mah a thleng bawk si lo. An awm dan chu ka mitmei ru leh zauh ṭhin a, an inkawm ngeih hmel khawp mai. 

"Ṭhiana chu, Hlimpuii a lo haw tawh bawk a, i rilru a dang mai lo'ng maw?" fiamthu titih hian Kima chuan a rawn ti a, a mit ko kan euh euhin a nui sak bawk.

"Ni e, a lo haw tirha in inhmuh hmasak ber zan pawh khan i danglam chiang alawm" Rina chuan a lo ti ve leh zat a, duh ai an sawi thui dâwn tlatin ka hria.

"In thil sawi a ho êm mai, anmahni an awm ve reng saw, an hre pha reu reu ang e" tiin Dikan min ṭawng khalh hman hlauh lo se chu ka khap ngei ang. 

Rei lo tê hnuah Maltei leh Hlimpuii te pahnih chu thingpui leh ei tur nen sitting room lamah an lo inchâwi phei a, Maltei zâwk chuan thingpui a sem kual a, Hlimpuii erawh ka ṭhutna bul chêtah a ṭhu tharh thung a, Maltei thingpui sem zo, ka bula ṭhut tum ni áwm taka min rawn en chu a hawi sawn leh vat a, a awm dan avang chuan a lakah ka inthlahrung ru em em nghal ringawt bawk. Ka ṭhutna ber kher lah chu pahnih chauh ṭhut lenna a ni leh nghal a, ka ṭhiante paw'n Hlimpuii awm dan teh thut chu mak an ti ve tho tih an hmel aṭangin ka hre tlang nghal vek! 

Maltei chu ka en chik deuh reng a, hawi pawh hawi chhuak ṭha ngam lo ang mai hian a kun deuh ngul a, a changin ka ṭhiante biakna chu a chhawn a, an fiamthu a nuihpui leh zeuh ṭhin tih loh chu a inthlahrung hmel ngawih ngawih a, amah a ang lo ka ti hle bawk. Thingpui a in zawh chuan choka lamah a phei ta daih a, Hlimpuiin min be deuh reng bawk nen rei pawh ka en zui ta lo. Ka ṭhianteho haw tur thlah tuma pâwn kan chhuah hnu chuan ka ṭhiante chu fiamthu thawhin an nui hak hak a, Hlimpuii chuan ka kuta rawn chelh chat chung hian

"Min va thlah la, zanin chu ka bialpa'n min lo lam hman lo leh thut a" a rawn ti a, ni dang chu ni se ka 'aw' chiang dâwn tehrehg nen tun ṭum erawh ka chhang lawk thei hauh lo. 

"Maw?" ngenngawl tak hian a ti leh a, ka ngawih deuh vang vang hnuah thlah tur thu ka hrilh ta ringawt bawk. 

A duh chuan ka ṭhiante motor-ah a chuang haw thei reng tih ka hria, mahse a chuang haw lo va, ka thlah kher a phut a, a awmzia chu ka laka a rilru puthmang a la danglam lo hrim hrim tihna a ni. An vêng lam pana kan tlan chhung zawng chuan ka rilru leh mitthlaah Maltei hlir a awm tlat a, ka hmangaih Hlimpuii bula ka awm chung pawha hmeichhe dang daih ka ngaihtuah thei chu mak ka inti tawlh tawlh. Min biakna chu ka chhang liam puat puat a ni ber a, a lungawi chiah lo ni tur a ni!

"I danglam sawt ê Nunthar" a ti ta hial a, ṭawngkâa chhang chuang lovin ka nuih ringawt a, ka nuih erawh a za lo khawp mai. 

"Thla leh khi i birthday a nih kha aw" an in kawt kan thlen lai chuan a rawn ti leh a, ka buk khum zauh a, Hlimpuii bula awm ka thlakhlelhna ṭhin zawng zawng kha chawp leh chilhin a bo ta duak ni berin ka hria. 

"Mut tui aw" car aṭanga chhuk paha a tih chuan

"Mut tui le" ka lo ti ve mai a, inherin kan in lamah ka tlan chhuak zui nghal bawk.

Kan in ka thlen chuan hun a lo kal duai tawh a, Maltein thingpui no leh kan thil eina vel a lo silfai mêk bawk a, ka lut thawm pawh a hre reng tawh, mahse hria ang paw'n a awm duh miah lo. A awm dan aṭang chuan a lung a awi vak lo tih ka hrethiam nghal a, áwm lo pawh ka ti chuang lo, kei ni ve ta ila ka lungawi bik kher lo ang ka ring. A thleng sil zawh hun nghak chuan a hnung lawkah ka ding ngawi reng a, a sil rei lui te'n ka hre hial a, ka awm a tinuam lo zual ru khawp mai. 

"A hmelṭhat khá" min hmuh rualin a ti dam diai a, Hlimpuii a sawina a ni tih ka hrethiam nghal mai bawk.

"I lungawi chiah lo ti raw?" ka ti tlang riap a, sawi tur vak hre hek lo.

"Ka lo tluk lo hle a nih kha" ti deuh hmakin kan nupa room lam a pan daih a, a thinrim tak takin ka hria. 

"In inang hleinem" room chhung luh paha ka tih chuan min lo en thuai a, a hriatthiam theih dan tura sawi ka ni a, mahse a hmelah chuan hriatthiam hmel ai rilru nâ hmel ka hmu hnem daih zâwk thung. 

"Nia, kan inang lo khawp mai" ti deuh hmakin khumah chuan a mu zui nghal a, sawi tur ka hre tawh der lo.

Chumi zan aṭang chuan a hmaa kan nupa boruak hlimawm leh chhe miah lo kha a danglam ta dâwrh a, min hlat sawt ka ti mai. Hlimpuii ni se a bialpa nen an inṭhen a, kan ina rawn chuankai a ngah ta viau bawk. Ka hriat chhuah tâk chu hmâng ang khan ka thlahlel ngawih ngawih tawh miah lo, mahse hmangaih erawh ka la hmangaih reng thovin ka hria. Zirlai naupangte zirtirna ka pek lai paw'n Maltei ngawr ngawrin ka rilru a luah ta reng a, ka hrethiam tawh bik lo. Nuih duh em em leh zep nei hauh lova ṭawng phawng phawng ṭhin Maltei kha tunah chuan mi hran hlak ang mai a ni tawh a, a chhan tak hria ila chuan ka siam ṭha ngei ang maw lè.

Zan khat ka léng chhuak ka haw chu a hmel ka hmu ta reng reng lo mai, ka phone phawrh vatin ka call nghal a, rei lo tê a ring hman a, a  hmet tawp daih a, ka laka a awm dan chu hrethiam lo tak ka ni! Ka call tâk fô hnuah phei chuan call tlang theih lovin a dah daih a, loh theih lohna avangin ka puzawn ka call phah ta ringawt. Ka puzawn, Maltei pa chuan an ina a awm thu leh ka lam haw a nghah thu a rawn sawi teh daih a, ka nupuiin dâwt a sawi kual vel chu ka lungawi bik ta chiah lo. Rilru kaptu nei ranin ka va hruai haw a, in kan thlen hnuah kan inhau deuh nghe nghe a, hauh pawh ka tum lo, zilh ka tum mai zâwk a ni.

Thla a thar a, Hlimpuii hmel ka hmu ngun tulh tulh a, a bialpa nen khan an inzui leh tawh nghe nghe a, hmâna ka Hlimpuii hriat ṭhin ang kha a ni ta lo lutuk leh a chiangnial ta lo lutuk chu ka mak tih pakhat a ni. Ama bulah pawh ka sawi tlang rawk tawh a, mahse ani chuan amah ni lova kei ka danglam nasat tawh thu a sawi daih thung. A sawi chu a dikna chen a awm tho, kei ngei pawh hian ka danglamzia ka hria, a bikin Maltei bula ka awmin ka nunphung leh ka nungchang ka hlauh ṭhin. Ani lah chuan min hlat tial tial mai si a, ka biak paw'n a rul tâwk chiah chiahin min chhang a, tih vak ngaihna pawh ka hre tawh bik lo.

Zirtawpni zan a ni a, ka birthday a ni nghe nghe bawk a, kan nupa inkâr a mumal rih loh êm avangin ka chhuak a, Hlimpuiin birthday present min pek a tum bawk nen Maltei hnenah pawh ka chhuah tur thu chauh ka sawi a, ka birthday a ni tih pawh hre lotu bula hun hman reng chu ka peih bik lo a tin a ni! A birthday ka hriat miah loh ṭum kha ka hre chhuak hial a, rilru a nât ruk duhzia ka hrethiam ve chiah! Hlimpuii te in ka thleng chu a nau mipa nen chauh an lo awm a, a nau chuan min lo be luam a, a fel ngaiin a lo la fel rengin ka hria. Hlimpuii lah chuan birthday present mai ni lovin birthday cake nen lam min lo order-sak a, rei lo tê hnuah kan ṭhiante an lo thleng khawm sap sap bawk a, an thil tih dan chuan min tihlim ang reng khawp mai. 

"Hello" Maltei hnen aṭangin phone call ka dâwng tih ka hmuh rual chuan ka pick up nghal a, min rawn call chhan erawh ka hre hauh lo.

"I buai em u Nunthar?" hawihhawm zet hian a rawn ti a, Maltei dik tak kha a ni leh tawh ni mai te'n ka hria.

"Buai lutuk lo ve, eng nge ni ta?" ka tih lai chuan Hlimpuii leh ka ṭhiante'n min lo ko chhen a, mahse Maltei nena kan inbiakna erawh ka tih tawp phah chuang der lo.

"Zanin chu lo haw hma la; i theih chuan" inthlahrung aw zet hian a rawn ti a, ka inngaihtuah vung vung a, ka haw hma thei kher ang em ka hre lo a ni.

"Ka lo tum dâwn a nia, mahse ka lo haw hma thei kher lo mai thei" ka ti ta ringawt a, ka ṭhiante chuan min lo ko zing malh malh tawh hle bawk.

"Âaaa....a ngai leh lo mai, i buai a nih kha, lo haw hma duh suh, hlim deuhin hun i hmang dâwn a nia" a tih chuan ka hrethiam lo ang reng, a lungawi chiah lo leh tawh a ni ngei ang. 

"Ka dah aw" ṭawng ka tum lai takin a rawn ti leh a, a hmet tawp zui ta daih bawk. 

Thil dang ngaihtuah buai tawh lovin ka ṭhiante bulah chuan ka phei thuai a, happy birthday song chu min saksak dual dual a, an sak zawh chuan cake kan zai a, ka barh kual den den a, ka hlim khawp mai. Hlimpuii chet dan erawh ka mit tikham ru deuh thil a tam ang reng hle a, ka thlahlel ta lo lutuk leh ka ngainatna a tla hniam chak lutuk hi ka thil hriatthiam loh ber te zinga pakhat a ni. 'Ka bialpa nen khan kan inzui leh tawh' ti reng chung si hian ka lakah a huangtau em em a, a bialpa mitmei ka lo vêng ru ṭhin a ni ber.

Dâr 10 leh a chanve velah ka haw a, in chhung ka lut chu a lo reh ṭhiap tawh a, dawhkana ka thil hmuh erawh chuan ka ngaihtuahna a tikal thui nghal hle bawk. Bati inchhi êng vât vat chu a lo alh ral ṭep tawh a, ka hming inziahna ngei mai birthday cake-ah chuan ka kum zat nen lam a lo inziak lang kulh a, tu tih nge ngaihtuah ka ngai lo. Ka tawt deuh up up a, room-ah lutin Maltei chu biak nghal mai ka tum a, a lo awm miah lo leh nghal. A hming lamin ka ko lawng lawng a, kan in chhungah chuan ka aw chu a khawk rum rum a, an in lamah a phei leh tawh a nih ka ring nghal hmiah bawk.

An in ka va thleng chu ka va han tisual chiang tak, min rinhlelh theih tur tâwk lekin thil ka va sawi a, Maltei a lo va haw phei reng reng lo chu niin, mahse khawiah nge a awm tâk ang? Kan inpui lamah ka phei leh thuai nghal a, chutah pawh a lo la awm chuang lo, ka rilru a tibuai tak zet a ni. Maltei zawng tura chhuah leh nghal mai ka tum chu ka pa'n min ko ding a, chipchiar deuh hian Maltei awm loh chhan min zâwt a, loh theih lovin ka ṭhiante nen ka birthday kan lawm thu chu ka sawi a, in ka haw hnua ka thil hmuh zawng zawng nen lam ka sawi ta vek a, ka inrin loh lai takin ka û chuan

"LALNUNTHAR!" ti ṭhawtin min hnek thal tawp a, a va han nâ mai mai tak! 

"Mipa pawh i lo nih tawp loh hi a! Nep leh lutuk mai!" a ti bul hmuk hmuk a, ka kawr âwmah ṭhamin min hnek leh chiah chu ka thin a rim ve ta phat!

"Kut min thlak tawh suh, ka insum thei lo palh ang e" ka tih chuan

"Khanglang a!" ti hrawkin min hnek leh nghal a, kan insual chu a ni nghal der. 

"In va han zak lo mai mai tak!" tiin ka pa chuan mau keh rawp rawp khawp hian min hlap ri ṭhuai ṭhuai a, kan inthlah thei ve ta hram. 

"Engati nge hetiang hian i awm LALNUNTHAR? I nungchang a ṭhat theih nân tiin ka in dantir che u a, rah ṭha chhuah a hnekin i sual zual leh ta nghal a, eng vanga hetianga awm hi nge i nih sawi nghal rawh!" ka pa chuan a ti hrawk hrawk a, chhan ka tum lai takin Maltei hnen aṭang phone call ka dawng hlawl a, ka pick up nghal thuai bawk.

"Hello, hemi phone neitu chhungte hi in ni mial em âw?" hmeichhe dang daih awin a rawn tih chuan

"A pasal ka nia" ka lo ti nghal a, mi dangin ka nupui phone kaltlanga min rawn be ringawt chu ka hrethiam lo kher mai.

"A ṭhat hlauh chu, tunah hian i nupui hi damdawi inah a awm mêk a, hmanhmawhin lo kal r'u aw" chu thu ka hre chiah chu engkim a reh duk ni maiin ka hria. 

"Eng vangin? Engati nge Maltei chu? Engtin nge ka nupui chu a awm?" ka ti nghal sawk sawk a, ka ṭawng dan chuan ka bula mite rilru a tiphili zui nghal hle bawk.

"Bike-in a su palh a, tunah hian nikhaw hre lovin a awm mêk a" tiin a awmna damdawi in hmingte chu a sawi zawm nghal a, ka rilru ah chuan thil dang reng a awm thei tawh lo. 

Speed muang fahran lovin damdawi in lamah chuan ka inkhalh chhuak nghal a, ka chhungte min kohna pawh ka ngaihsak thei tawh lo. Ka nupui Maltei chan ka hlau lutuk chu ka mittui a rawn hnâm ṭiam ṭiam a, ngaihtuah nawn ngai lovin ka rilru dik tak chu ka hre chiang ta khawp mai. A laka ka nélawm lohzia te, ka fel lohzia te, a rilru ka tih nât hnem dan turzia te ngaihtuah chhuak zut zutin ka bianga mittui baw zawih chu hruk pawh ka tum buai lo va, min kalsan a nih ngat chuan engtikah mah ka inngaidam thei tawh lo ang. Damdawi in ka thlen rualin ka phe buai nghal vat vat a, mitthi ang maia Maltei muhil bam ka hmuh rual chuan ka rilru a buai nasa hle a, drip an khâi leh nghal a, a thi mai ang tih mawlh ka hlau tawh a ni.

Ka chhungte pawh an lo thleng har lo hle a, min lo zui char char tih ka hre chhuak chiah bawk. Ka pa chuan Maltei chhungte lam a phone nghal zung zung a, ka va han zak ngawih ngawih tak, ka nupui pawh ka ngaisak ṭha mumal lo a nia! Chutia ka indawm kun ngul lai chuan mipa pakhat hian Maltei a sut palh thu leh a tihpalh a nih thu a rawn sawi a, harh chiang tak ka ni! Insumkarna nei hauh lovin chu pa chu ka hnek thal tawp a, Maltei chan ka hlau lutukna chuan min timangang vek tawh a ni ber. Ka ûin min man bet hlauh lo phei se chu kut thlak zel ka hreh teuh lo, ka inthunun hlei thei lo bawk nen mi awm laiin ka pa'n min bêng ri sawk bawk a, Maltei nu leh pate ka hmu chiah phei chu ka zak ngawih ngawih.

Maltei buaipui mawlh mawlhtu doctor chuan hliam nâ lutuk a neih loh thu leh a taksa a chak loh thu a sawi a, engkim chu ka thiam loh vek a ni! Zan khuain a bulah ka ṭhu ngawt ngawt a, Maltei nu leh pate paw'n hahdam deuha awm turin min hrilh a, mahse ka thei teuh lo. Ka nupui kut chu ka vuan a, keimah avanga drip hial khaisak a ngai chu ka inthiam lo êm em a, enkawl ṭhain a bulah awm tam ila chuan harsatna engmah a tâwk miah lo ang maw lé. A kut chu dim téa hmer vang vang ka fawp leh zauh ṭhin a, ka mittui êm tla tawh lo mahse ka rilru erawh a nâ tak zet a ni. 

"I ṭha em? Eng nge i an?" zing kâra a harh hmel ka hmuh rual chuan ka ti nghal zung zung a, ani paw'n min en chiang khawp mai.

"Engati nge? Nâ i nei em ni Malte?" ṭah chhuak hmel zeta min en reng tâkah chuan ka ti leh zung zung a, a bianga mittui luang thla ngiai ngiai ka hmu phei chu ka nâ vawng vawng a, buaipui vak dan ka hre chuang bawk si lo.

"Ka tihpalh, ka tihpalh lutuk" ka ti ta ringawt a, ṭap chung hian

"Inṭhen ang aw, inṭhen tawh mai ang, a tua mah kan hlim tak tak chuang lo" a rawn ti ṭiau a, ka lung phu chu rang dawt dawt tak a ni!

"Inṭhen lo ang" ka tih laklawh lai chuan

"Ka mawl si, ka â si, ka la naupang bawk si, u Hlimpuii nen awm dun tawh zâwk rawh u. Ka dip rei tawh che u êm mai, nangmah paw'n min ṭhen i tum thu a bulah i sawi vek tawh tho va, heti hian tawp ang aw, i hlim zâwk ka ring" min tih khalh zung zung a, a thil sawi chuan min tibangbo teh e! 

"Hlimpuii bulah kan inṭhen tur thu vawi khat pawh ka la sawi lo" ka tih chuan nasa vak lo hian a lu a lo thing thuai a, a mittui chu a dang zo lo a ni ber.

"Dâwt sawi duh suh u Nunthar, u Hlimpuii khan min hrilh vek tawh alawm, i la hmangaih reng thu thlengin! Ka ngainatna che leh ka thlakhlelhna che a nasat tawh êm avangin ka rilru a nâ ta réng a, hlat theih dan che ka zawng a, ka dap kual nasa em em a, mahse nuam ka ti chuang si lo. Ka pasal i nih miau avangin min ngaina miah lo mah la i birthday tal lawmsak che ka tum a, mahse nang chuan i ṭhiante bula hun hman i thlang zâwk a, ka dem lo che u Nunthar, tunah chuan min ngaina hlawl lo tih ka hre chiang tawh a, kan inkâr engkim hi tih tawp a ṭha berin ka hria" duhthaw zet hian a rawn tih zawm leh mawlh mawlh a, a ṭap zui hak bawk.

"Eng pawh ni se khawiah emaw kal lawkna tur ka nei, ka lo lêt leh hunah engkim ka hrilhfiah ang che" tih leh thawh ka rual nghal a, ka nupui ber a rawn harh ṭha tawh tho bawk nen tun atân chuan Hlimpuii hmuh baka thil ṭul a awm rih tlat lo a ni e. 

Hlimpuii te in kawt ka thlen chuan hawihhawmna chhe tê mah nei hauh lovin an kawngka chu ka chum ri dawt dawt a, a nu aw ka hre hmasa ber a, a hnuah a pa aw ka hre ve leh a, kawngka min hawnsak rualin ka lut zui nghal a, zingkâr kâra min hmu hlawl chu mak an ti hlawm teh e! Hlimpuii ber a rawn thawh ve tâkah chuan mawihawih pawh zawng lovin ka zilh ta hrep a, Maltei chunga dâwt a sawi dan zawng zawng ka hriat vek thu ka hrilh lai chuan a lo kimki chawih a, mi â niléng tân lo chuan zah lohna chî ni hek lo. A laka eng rilru mah ka put tawh loh thu leh nupui nei lai ka nih thu hrilhin a tawp ka khar a, an in ka chhuahsan hnua damdawi in lam ka pan leh chu ka thawveng hawk ni berin ka hria. 

Damdawi in ka va thlen leh chuan mi dang pawh an lo awm nual tawh a, zing dâr 6 leh tih vel a ni a, a zingkâr lutuk tawh lo. Maltei bulah chuan ka ṭhu thla nghal a, a kut vawn ka tum chu a lo lá sawn vat a, min en ṭha duh miah lo bawk. A awm dan chuan ka rilru a tih nât mai bakah ka inthiam lohna a tizual em em a, a laka insawifiah leh engkim hrilhfiah ka bat rualin sawi mai dan tur ka hre bawk si lo. Thawk ka lá vang vang a, a kut chu ka hum lui salh a, là kanga ka fawh rual chuan ka lam a lo hawi rang kher mai.

"Ka hmangaih che Malte" ka ti ta tawp a, sawi tur dang ka hre thlawt lo a tin a ni!

"Dâwt sawi kher suh" ṭap titih, thinrim deuh bawk sia a rawn tih chuan

"Dâwt ka sawi hleinem, ka hmangaih tak tak che alawm" ka ti nawn leh ngat a, thawm chu a reh ṭhuap tawh bawk.

"U Hlimpuii alawm i hmangaih te chu" men pur hian a rawn ti a, a ṭap lai hmel pawh a hmelṭha chiang e!

"Ka hmangaih ṭhin alawm, mahse ani kha chu hun kal tawha mi a ni a, nang erawh ka hun hman mêk leh hun lo la awm zel tura ka hmeichhe hmangaih i ni" ka tih chuan maimitchhing chung hian a ṭap khur dat dat a, tih nât belh hlau zetin ka kuah thuai bawk.

"Ka hmangaih che duhawmnu, hmelṭhanu, lawmawmnu, i ṭah hian i duhawm zual" ka tih duah lai chuan ka pa aw ngei mai hian

"An pahnih hian awm rih teh se" a lo ti a, a chhuah rualin mi dangho chu an chhuak ve nghal sap sap a, ka rilru chhungril chu hlim tawh tak a ni.

"Min hmangaih ve nghal turin ka phut lo che a, ka tur lo bawk che, mahse engtik ni ah emaw chuan min la hmangaih ve ngei ka beisei" nui suka ka tih leh chuan

"Ka hmangaih daih tawh che, i hre lo mai mai alawm" a lo ti heu mai, mak tih avanga ka nui tawp riai riai chu min nuih sen sen bawk.

"Min hmangaih a nih te chuan sawi daih tawh ta che" lungawi lo aw lek lek hian ka ti a, min va han ei loh hmel tak! 

"Hmangaih dang i nei tih hre reng chungin ka sawi duh i ring reng reng emaw ni le, tunah pawh hian min hmangaih thu sawi lo la chuan sawi chhuah ka tum teuh lo, ka pai ṭawih ṭhak a ni mai" thutak deuh hian ti a, kei erawh ka nui lo thei lo. 

"I ṭawngkam maksak tak tak te pawh hi ka hmangaih vek tawh" nui put put chunga ka tih chuan a lo nui ver ver a, inhmangaih ngai miah lo nupa ni ṭhin kha tunah chuan hlim tawh tak kan ni! 

Thil zep nei thiam lo tih takah ka zawhna chi hrang hrang chhang zelin accident a tawh dan te chu min hrilh siam siam a, an ina a haw phei tur bike-in a lo su palh chu niin, keimah bawk ka inthiam lo leh a, engkim chu ka thiam loh vek ni hek! Ani erawh chuan rilru nâ hmel leh hlim lo hmel a pu leh tawh miah lo va, a rilru thianghlim tak te chu amah ka hmangaihna tizualtu a ni a, tunah chuan ka tâna a hlutzia ka hre chiang em em tawh bawk. 

                                         The End