KA KALSAN NGAI LO ANG CHE By Havali Adam

                  KA KALSAN NGAI LO ANG CHE

                                             By

                                      Havali Adam

"Anu, apa ka hrilh dâwn aw?" ka fanu hlim hmel ṭha zet chuan ka ngaihtuahna ata min hruai chhuak thuai a, ka nui zui nghal ver ver bawk. 

"Aw le Bawihte, va hrilh rawh, va hrilh rawh" tiin ka fanu biang chum puar duhawm em emah chu ka piai pah zeuh a, inhera a tlan ter ter lai chuan

"I tlu ang e aw Bawihte, hmanhmawh lutuk lo la" ka ti lang lâng a, naupang tih takah ka thusawi eng mah a rawn ngaihven tawh lem lo.

Chutia khuma ka ṭhut lai chuan ruah a rawn tla ri ser ser a, thil dang pawh ngaihtuah hman lova tho nghal vatin pâwnah ka tlan chhuak thuai thuai a, a rawn surna a la rei loh tehreng nen ruah chu a lo tla hnem hman tawh khawp mai. Insuk la ro chiang lo ho chu ka seng zung zung a, in chhunga ka luh rualin ka fanu chuan

"Anu, ruah a sûr a" a lo ti ve vat vat reuh a, a pi leh pute'n léng tura min sâwm laia a hmel hlim zet kha tunah chuan a bo vek tawh. 

"Nia Bawihte, pâwnah a chhuah chí miah loh aw, i dam lo a ni mai" ka tih chuan a bu nghat nghat a, chhuah tum tih hriat taka a pa insiam chu a en chho hâ zawm zat bawk.

"Apa khawiah nge i kal dâwn a?" Bawihtei chuan a ti ta ngei a, ruah sur lai em ema chhuah luih phet a tum a nih chuan mak ka ti khawp ang.

"Ka chhuak lâwk dâwn a Bawihte, ka lo haw leh thuai ang aw" a kawnghren hrêng ri nak nak pah hian ka pasal chuan a ti a, ka ngaihdan a lo ni lo nasa mai!

"Ruah a sur hi Samu, chhuak lo mai la" thawmhnaw pho ro tur keng ṭuna ka tih chuan min rawn en nghal chat a, a chet a tawp chuang lo hrim hrim.

"Car a awm alawm" ngaihsam hmel zet hian a la ti hram a nih chu!

"Ka ṭhian hlui pakhat US aṭangin a lo haw a, kan ṭhianho kan inhmu khawm lâwk dâwn, ka rei lo ang" amah vek chuan a tih zawm leh nghal a, kei erawh ka ngawi ta daih!

"Apa, api leh apute inah kan lêng dâwn lo mi? Lêng turin min sâwm a, lên ka châk e apa?" tia a fanu ngenna pawh chu a tihlawhtling zo chuang lo. 

"Naktuk zanah kan lêng dâwn a nia aw Bawihte, zanin chu ka hman lo va, chu bakah ruah a sûr nasa êm mai" tiin a fanu chu a thlem ve tak na a, Bawihtei lungawi chiah lo hmel chu a nu leh pa tân zawng hmuh hmaih theih pawh va ni suh!

"In chhungah em em hi chuan zâr tawh lo teh, a hnawk êm mai, thaw a tiipik" ngaithei lo aw tak hian ka insuk zàr lai chu min vin deuh hluk a, a ṭangkaizia a man pha tlat lo a tin a ni! 

Engtin mah ka chhang lêt lo va, ani pawh thil dang sawi tawh lovin a chhuak zui nghal ta nal nal. Insuk ka zâr zo va, ka fanu bulah chuan ka tal nghal chawt a, lungawi lo deuha a awm hmain thil lem ka ziahpui ta daih bawk. Kum 6-a upa chauh a la ni a, thil ziah leh thil colour vel a tui em em a, a kum rualpuiah chuan a thiam pawh a thiam viau.

Ka fanu thil ziah melh melh lai chuan thil dang daih ka ngaihtuah a, hunin mihringte min thlak danglam nasat theihzia chu kan nupa dinhmun ni mêk chuan min hriat fiahtir ka ti lo thei lo. Inhmangaiha inngâi em em ṭhin kha tunah chuan engkim a danglam zo tawh a, mahni pasal ngei te nen inbiak miah lo châng pawh kan ngah ta khawp mai.

"Anu, ka mut a chhuak" tih ri ka hriat hnu lawkah ka fanu chu ka pawm a, room-ah pawm lutin ka zuntir tê tê phawt a, ka mutpui zui nghal bawk. 

"Anu, apa hi a lo haw har tawh e" mut chhuak deuha a tih chuan ka ngawi reng a, hnem dan tur pawh ka hre lo. 

Room banga sana intâr ka en chuan dâr 9 a lo pel fel dim diam tawh a, a chhuah dâwnah khan a rei loh tur thu a sawi lâwk vek tak na a, zan dang ang bawkin a lo haw tlai leh dâwn a nih hmel. Zan tin deuh thaw a lêng chhuak ziah a, tun hmâ ang lo taka a danglam ta lutuk hi ka hrethiam lo. A chhan ka zawh lahin a sawi ṭha duh bawk si lo, ka tân chuan tih ngaihna vâng tak a ni.

Ka lo muhil a ni ngei ang, kawngka inkalh ri khepah chuan ka harh a, ka meng chhuak nghal a, kan room kawngka a rawn inhawn dâwn lai tak chuan ka maimitchhing daih a, a rim aṭang leh a chet dan aṭang chuan ka pasal a ni tih ka hre tlang nghal vek bawk. Kan mutna khum chu a rawn hniam suai suai a, ka pasalin kan fanu bianga a chuk ri zeuh ka hriat rual chuan ka ṭang nghal ṭeu a, ka ṭah a chhuak ru nghal em em bawk.

A inthlak thawm ka hriat tâkah chuan ka meng chhuak ta nge nge a, min hnungchhawn zawng hian a lo inthlak malh malh a, a chhip sam chu a la hnâwng deuh chap bawk. Mittui tling pam hian ka pasal chu ka en tlawk tlawk a, dik tak chuan kan fanu biang a fawh ang chiah khan ka biang fawp ve se ka ti, ka thlahlel a ni. Hmân ang chiah khan duat takin min kuah se, min pawm se, min chhaih lài leh se ka duh, mahse tunah chuan khatiang mizia kha amahah pakhat mah a awm tawh lo.

"Khaw'nge i kal dâwn?" khum aṭanga ka thawh kàn rual chuan a lo ti a, chhan enah ka en lo hrim hrim. 

"Khawiah nge i kal dâwn? I chhuak dâwn em ni?" a rawn tih leh pawh chuan ka la chhang chuang lo, min ngaihtuah ve tak tak te pawh a ang alawm le.

"Mariana" a tih chuan ka lehhawi ta nge nge a, ka hminga min koh khât tawhzia ka hre chhuak zui nghal.

"Khawiah mah" tih chauhin ka chhang a, a kiua inbeng kang meuh hian min en reng a, ka rilru tawt mup mup avang chuan ka ṭap chhuak palh ang tih ka hlau hle bawk.

Choka ah kalin chaw bel leh thleng ka là a, ka ril ṭam viau lo se chu ka muhil tlang thei mai ang ka ring. Tlai chaw ei ṭha mumal lo ka ni bawk a, chaw chu ei tui tak ka ni! Thla eng zat nge ka pasal lo haw hun nghaka a ruala chaw ei ka tum pawh ka hre meuh tawh lo, ka rilru tinâin a mizia danglam tawh em em mah se ka pasal a la ni reng tho va, ka hmangaihna pawh a kiam chuang hek lo, kan nupa inkâr erawh a danglam ta hle thung.

Mu tura room chhung ka luh leh chuan kan fanu kuahin tui zet hian a lo muhil tawh a, ka lakah danglam ta viau mah se kan fanu tân erawh khawvela pa ṭha ber a la ni reng a, kan fanu paw'n a ngai ṭhin réng a, a pa hmel a hmuh loh hlek chuan a awmna min zâwt deuh reng ṭhin. Ngawi rengin khumah chuan ka mu saisir a, ka pasal leh Bawihtei inkuah chiala mu chu ka thlir reng a, ka mit aṭang chuan mittui a rawn luang chhuak ta nge nge bawk.

Zinga ka harh chuan keimah chiahin ka lo mu tawh a, puan ka lo sin thlap tawh bawk a, mahse nizana ka mut kha chuan puan ka sin miah lo. Min sintir tu ka hre chiang a, ka pasal hnen aṭanga ngaihsakna tlêm azawng ka la dawng pha ve hrim hrim chu a lawmawm lamah ngai ang. Tho chhuakin khum chu ka siam ta mial mial a, ka siam zawh chuan room aṭanga chhuakin ei rawng ka bâwl zui nghal a, Bawihtei leh a pa erawhin min rawn ngaihven lem lo. 

"Duh ai nizan kha ka lo haw har leh ta phian a, Bawihtein thil sawi a nei em?" hna kal tura a insiam laiin ka pasal chuan a rawn ti a, dar chhin àk hian

"Nei hran lem lo ve, mahse haw har chu a ti deuh che" ka lo ti ve mai a, thil dang zawha sawi zawm pawh ka tum tawh chuang lo.

"Tun lai hi i va cher ve?" a rawn ti daih a, a lam ka hawi rang khawp mai. 

"Ka ṭha" tih leh kan nupa room aṭanga chhuah ka rual a, ka pasal mah ni se a lakah hi chuan beisei ka nei ngam tawh lo law law, ni lo, ka nei duh tawh lo zâwk a ni. 

A nupui min nei reng chung siin ngaihzawng a nei tih ka hre vek a, chu a ngaihzawng pawh chu nizana a chhuah luih hram chhan kha a ni tih ka hre chiang em em bawk. Zâwt ta ila chuan 'ka ṭhiannu' a ti mai ang a, mahse a ni lo tih ka hre chiang lutuk tlat! Ngaihzawng a nei tih ka hria tih pawh hi a hriat tho ka ring, hre lo ang deuha awm ka tum buai vel lem lo va, mahse ngaihzawng min neihsan avangin vawi khat mah thinrim awkâ vin paw'n ka la be lo hrim hrim thung. 

Ka hriat hriatin ka hre tawp a, ka rinhlelh tirh khan vawi khat chu ka zâwt fiah ve ngei a, a ṭhiannu ang bakin min hrilh lo va, a hnuah engkim ka hre leh vek si. Ka laka thuruk a neih aṭang kha chuan rilru dam nî ka nei tawh ngai lo, keimahin nâ ka tuar ngawt ngawt a, ngawi renga tuar ai chuan sawipui a ṭha tih chu ka hre ve tho, mahse sawipui dâwn pawh ni ila sawi tawh ang khan a ṭhiannu ang bakin min hrilh dâwn chuang lo tih ka hre chiang em em a ni.

Keima tâwkah ka luhlul ve em em a, ngawi renga luhlul chî ka ni a, min biak loh theih chhung chu biak loh ngat ngat ka tum ve ngar ngar ṭhin. A tawpah erawh a rilru nâ zâwkah ka ṭang leh nge nge zel a, ka chhungte'n kan nupa inkâr dik tak hi hria se chu min hruai haw daih duh mai thei a ni. Engmah ka sawi ngai lo va, an rawn lèn emaw keimahni zâwk kan lên châng paw'n an lungngaihna tur thil engmah ka sawi chhuak ngai lo.

Tlaiah chuan a ngai tê bawkin a lo haw tlai leh a, chaw eiah ka lo nghak ngar ngar a, Bawihtei erawh a inei puar diam tawh thung. A châng hi chuan nghak lova eisan mai ka duh ve ṭhin tho, mahse a bula ka ei loh hi chuan ka chaw ei a tui em em ngai lo; ka ril a ṭam tawpkhawk te a nih ngawt loh chuan! Kan inneih tirh aṭang tawh chaw ei dun char char ṭhin kan ni a, tun hnu hian ani'n ka tel lova hun hman leh inei puar thei tawh mah se kei chuan ka thei ve tlat lo, ka piangsual deuh te pawh a ni mahna.

"Inbual la, chaw ei ka lo siam ang" in chhunga a lo pen lut ka hmuh rualin ka ti nghal a, rei pawh min en lo hian

"Ka inei puar tawh" a ti deuh hmuk a, Bawihtei TV en lai chu a va ṭhutchilh daih bawk. 

"I inei puar tawh tak tak em?" ka ti leh ngat a, dawt sawi ang tlata hriat ka nei a tin a ni! 

"Ka puar tawh ka tih chu maw le!" hniam khauh zet hian a rawn ti ram deuh hmuk a, min melh rum hle bawk. 

"Aw le" ti sepin thlengah chuan chaw ka khawrh chhuak ta tho va, chu erawh ka ei tur a ni thung.

Chaw chu tui lo zet hian ka ei lui a, miute khat pawh ka ei tling lo ang. Ka kham ta daih a, zan rilṭam ka nei phah leh ngei ka ring. Chaw eina thleng ka sil zawh hnu chuan room-ah ka lut a, ka inngaihtuah nasa khawp mai. Ka pasal mize danglam tâk em em chhan chu keimah ka ni mai ang em te ka ti rilru rauh rauh a, luhlul ka chhuahna te hian buaina a tipunlun ni mai te'n ka hre ta bawk. A nupui ka ni tih inhre ranin room aṭang chuan ka chhuak a, min chhan lêt beisei tak hian

"Inbual la Samu, i inbual zawhah ka inbual mai ang" ka ti dam diai a, hmangaihtu tân chuan tlâwm zâwka ṭan a ngai leh lawp lawp ṭhin a ni ber e. 

"Inbual hmasa rawh" a aw chu a la dam tehchiam lo va, mahse a hma ang em ema khauh hmuk a ni tawh lo.

"Inbual hmasa zâwk rawh" ka ti ve tlat a, nin hmel zeta min en chung hian min rawn kal pel a, a mita lo en reng chu thil nuam zawk zawk a ni lo chiang khawp!

"Zû i in elo Samu?" min kal pel titih tawh chu a bâna chelh chungin ka ti leh thuai a, a bân ka vawnna chu a kut lehlamin a nawr pial zui nghal bawk. 

"Samu?" ka aw ah chuan amah ngaihtuahna hlir a ri chhuak a, zû in ngai miah lovin zû rim a rawn nam haw chu mak ka ti lo thei lo.

"Tlêm tê ka in" tih leh kan nupa room-a luh a rual a, ka zui lut ve nghal thuai bawk.

"Bawihtei lo va awmpui rawh" room chhungah ka awm ve tih a hriat rual chuan awki pangngai deuh hian a ti a, a sawi angin ka awm lo hrim hrim. 

"Engati nge hetiang hian i awm reng mai le Samu? A rei i ti ve em em tawh lo em ni?" thawm a reh ṭhiap lai chuan ka ti zuai raih a, min rawn en nghal vut a, mahse a hawi sawn leh nghal thung. 

"Eng nge tihsual ka neih? Insiam ṭhat ka ngaihna lai a awm a nih chuan min hrilh rawh, insiam ṭhat ka hreh reng reng lo" ka ti zawm leh zat a, ani erawh a la ngawi reng tho.

"Aw le, ka be tawh rih lo ang che. Inbual la, i inbual zawha i thingpui in tur ka lo va lûm ang e" mittui tling pama ka tih chuan min rawn en a, ngawi rengin ka chhuak ta nal nal. 

A inbual zawh hnuah pawh chuan kan inbe leh ta miah lo va, thingpui ka pek lai paw'n engmah a sawi chuang lo. Thil dang tikawi tawh lovin ka inbual ta daih a, bathroom aṭanga ka chhuak chu kan room lamah Bawihtei a lo pawm lut vel chiah a, nupa inbe lo thei tak chu kan va ni chiang ém. Ka inthlak chhung zawng chuan khumah a ṭhu ngawi run a, thinrim hmel erawh a pu miah lo thung. Thil ngaihtuah ding zet hmel hi a pu zâwk mah a, a thluak chhunga awm erawh engmah ka hre lo, a àwm ang tur tal pawh ka ring thiam chuang lo.

Khuma ka mut tâkah chuan min en chuang lo hian a mu ve zâl ve nghal mai a, mut a chhuak lo em em leh nghal. Kan ngaihtuahna kan kawm ve ve ni àwm tak hian kan ngawi dun tlawk tlawk a, biak chu ka duh reng, mahse a lung ka tiawi lo leh ringawt ang tih ka hlau. Zanin phei chu zû rim a rawn nam haw leh nghal a, a lo haw tirh phat aṭangin a mood a dik lo em em a, a mood tichhe zual zawnga awm phei chu a chî loh, pangngai hmel viau tawh mah se biak loh law law a fuh zâwk ka ring.

Rei pawh kan mut hmain a rawn thaw ri suk suk a, Bawihtei a kuah run bawk a, ka ngaihtuahna ka lo kawm nasa lutuk nge ni, Bawihtei a kuah lai chu ka hre miah lo, ka hmu miah lo bawk. Muthilh tumin ka mit ka chhing vang vang a, ka harh tulh tulh lawi a, a hnuah phei chuan ka tho ta ringawt. Tih tur ber pawh hre chuang lovin in chhungah chuan ka tei kual a, a châng leh tui ka in ringawt a, a hnuah phei chuan kawngkapui hawngin pâwnah ka chhuak ta daih a, zan boruak chu a lo thiang nuam khawp mai.

Pâwnah chuan ka awm deuh vang vang a, thil chi hrang hrang ka ngaihtuah kual a; a bikin kan nupa inkâr! Hmân anga hlim taka inbiak leh inchhaih kan nei ngai tawh lo va, tunah chuan inhre ngai reng reng lo inneih luihtir te pawh kan ang tawh zâwk! Kum 8 lai chu kan innei tling ve tawh a, kan inneih aṭanga kum 2-na ah Bawihtei a piang a, fa dang erawh kan nei belh leh tawh rih lo tluang zel a, a hmâ chuan fa kan nei tawh loh avanga danglam ta em em a nih ka ring rum rum ṭhin a, mahse a lo ni hauh si lo.

Thawm ka hriat rualin ka hawi lêt nghal vat a, ka pasal chu kawngkapui bulah a lo ding reng chu niin, min tiphu ang reng hle bawk. En rei lem chuang lovin ka hawi lêt leh a, thli chu a thaw heuh heuh a, chutiang thli fim dawn nuam tak chu ka hip khât khawp mai. Arsi ni se an pe tuarh a, an eng sep sep hlawm a, van lam thlira dakin ka lama ke pen thawm rawn hnai zel chu ka bengkhawn lo lui ngar ngar a, a ruk tak chuan in chhungah lut se, muhil hle hle se ka ti daih zâwk!

"Eng nge i tih a?" dam ruih hian a rawn ti a, a lam hawi chhoh ka tum zet na a, mahse ka hawi chho ta lo. 

"Ka muhil thei lo mai mai maw le" ka ti ve mai bawk a, ka bulah chuan a ding ve ta reng a, sawi tur erawh a váng khawp mai.

"Lut tawh ila" dârkâr dâwn pâwna kan din hnu chuan a ti sup a, ṭawngkâa chhang lovin ka buk khum ve mai bawk.

Room kan thlen chuan khumah lâwnin ka mu zui nghal a, ani erawh Bawihtei mutna lama mu phei lovin ka hnungah a rawn mu hlawl a nih chu! Mak ti zetin ka meng kual ralh ralh a, a awm dan chu ka hrethiam lo lek lek zâwk a ni! Ka dul zâwnah a bân a rawn kham leh ta zel a, ka taksa si zawngin min mut hnaih sauh bawk a, a rilrua awm ka hre châk tak zet. A thawk dan aṭanga a muhil tih ka hriat hnu chuan tihharh hlau zet hian a lamah ka inher a, kan inhmachhawn ta ran mai. 

A hnâr aṭanga boruak rawn thaw chhuak suk suk chuan ka hmai leh a vel a tidai sawng sawng a, ka pasal mah ni se ka va'n hnaih ngam ta si lo êm. A khabe pawng poh bial deuh àrha hmul ṭo siar siar te chuan hmâna mi kha a ni tawh lohzia a ti chiang a, a chhan pawh hmul nei ngai lo tluk ang thawthangin a khabe hmul a ziat fai vek ṭhin, chu chu ka dun dan ber a ni ṭhin bawk. Tunah erawh a inmet fai ṭha peih tawh lo va, a taksaah danglamna awm tam lutuk lo mah se a rilru a danglam nasa tawh em em thung si a ni.

Zinga ka harh chuan kan mut ngai ngaiin kan lo la mu hlawm a, ka tho duh ta bik lo. Bawihtei pawh a lo la muhil bâm reuh a, ka pasal taksa nghen nuam zet ka ngheng leh thei ta te chu ka rilru tihahdamtu pakhat a ni. A chet deuh hrut rualin ka mit ka chhing nghal vat a, a thawk danah a harh tawh tih ka hre mai. A kut lum vung vungin ka biang chu a chûl riak riak a, a hmui ngeia ka chal a fawp phei chu men ka châk zek zek a, mahse thil a kal dik lo vek ang tih ka hlau bawk si.

"Kan tho tawh dâwn em ni ang?" a tih chuan ka thin a phu dawt dawt a, ka harh tawh tih a hre tlang vek a nih hmel. 

"Mariana?" ti leh supin ka sam bawk chu a zût den den a, ka zak ru ve deuh tho bawk si nen nghet zeta kuahin a âwmah chuan ka bei thlawp ta ringawt. 

"Mut i la duh rih tihna em ni?" min biak dan chu a dam em em vek a, chu chuan ka lung a tipuam ru hle bawk. 

"Min chhang la?" hahdam aw zeta a tih chuan nâ vak lova a âwm tauh dat datin ka bu ngauh ngauh a, engmah sawi tawh lovin min kuah ta hle hle.

Dâr 7 pelhah kan tho ta daih a, ka mood pawh a fuh cher cher khawp mai. Bawihtei leh a pa an infiam nuih ar ar laiin ei rawng ka lo bâwl mial mial a, tukin chu tuk dang ang lo takin ka tho nuam tak zet a ni. Bawihtei a biak dan leh a chhaih dan awkî chuan min tihlim zual a, a hmelah pawh a hlim tak tak tih a hriat khawp mai. Tukṭhuan ei khamah Bawihtei school kal tur a thlah leh thlap a, hei hi chu a office kal hmaa a thil tih ziah a ni a, an school bàn hun àwm velah amah vekin a lam leh thlap ṭhin bawk.

Chumi nî aṭang chuan tlêmin a mizia a danglam deuh a, ka lo beisei sâng nghal lutuk nge ni, hmân ang em em kha chu a la ni chuang lo. Awkâ vinin min be tawh ngai lo va, an office bàn hun dik takah a rawn haw tlang ta ziah bawk a, a hma khan khawiah nge a pèn kawi ṭhin ang tih leh eng nge a tih ṭhin ka hre ngai lo hrim hrim. A rawn haw hma ziah tâk avang chuan chhungkuaa zanriah kilho pawh kan nei chho ṭan leh ta a, Bawihtei mawlh chuan nuam a ti a ni. 

Chutiang zelin ka pasal pawh zana chhuah a nei khât ta deuh a, a chhuak emaw chhuak lo emaw ka sawisel ngai lo hrim hrim thung. A mizia avang chuan a lakah beiseina ka nei sâng tual tual a, mahse a hmâ ang pha tura han beisei nghal vak chî niin ka hre leh ta lo. Office aṭang rawn haw hmaiin in chhungah awm tam tawh mah se kan nupa inkâr ber erawh hma a sawn mawh hle a, engtia han tih chî nge ka hre bawk si lo. Ngaihzawng a la nei reng a, an inbe ṭhin tih pawh ka hria, ka thik rual rualin a hnenah ka thik thu ka sawi ngai lo thung.

Ni khat chu ka pasal hnen aṭangin phone call ka dawng hlawl a, min phone khàtzia ka hre chhuak nghal bawk. Thla eng emaw zah chu phone kaltlangin kan inbe tawh ngai lo va, chu vanga mak ti ru viau pawh chu ka ni! Phone chu sawi loh, hmichhanah pawh kan inbe mang lo ṭhin a nia, kârah fa awm lo phei se chu min mà duh hial ka ring, a chhan chu ka laka a awm danin a zir tlat a tin a ni! 

"Hello" tiin phone call chu ka pick up a, eng tak rawn sawi ang maw!

"Vawiin chu Bawihtei lo hruai mai ta che" a rawn tih chuan a buai deuh a nih ka ring thiam nghal mai.

"Ka lo hruai dâwn a nia, lo ngaihtuah lutuk duh suh" pangngai tak hian ka ti sap a, han sawi zawm mai tur ka hre leh ta hauh lo.

"A ṭhat chu, ka dah" tia a ngawih deuh vang vang hnu chuan kan inbiakna a hmet tawp a, za lo zetin ka nui lui sak a, hmân ang khan nupa hlim tak nih ka châk leh tawh tak zet! 

Sana ka en chuan dâr 12 pawh a lo la ri lo va, Bawihtei te hi dâr 1-a school bâng ṭhin an ni a, kan in aṭangin an school awmna a hla lutuk lo va, kea kal mai theih mah ni se a pa hi chuan bike-in a thlah thlap ṭhin. Kei erawh a school kal tur hruai leh a school bâng làm lamah hi chuan ka inhnamhnawih tam lo hle a, ka peih loh vang pawh a ni lo, ka pasalin min awl hneh lutuk vang zâwk a ni. 

Dâr 12 leh a chanve a rik tâkah chuan Bawihtei hruai turin ka insiam a, pâwn ka chhuak chu khua a lo dur khup tawh a, khaw awm dan leh chhum zin dan aṭang chuan ruah a sur har a rinawm loh hle. Taxi pawh hmang buai lovin kein ka kal mai a, nihliap pahnih ka keng bawk a, in kan thlen hmaa ruah a sur ka hlauh vang a ni ber. School ka thlen hma chua ruah a rawn sur ṭan ta mai, a sur tam phian leh nghal a, naupang hruai tura kal ve mi dangte nen chuan school veranda hulhiapah kan ding ṭhup ta ringawt bawk.

"An bâng tawh a, an chhuah erawh kan la phal lo deuh a, mahse rawn hruai tumte'n nihliap in rawn ken chuan a hruai haw theih tho" zitirtu ni awm tak hmeichhe pakhat chuan a ti lang lang a, nihliap keng ho chu kan che chhuak sap sap zui nghal.

Chutia Bawihtei hruai tuma ka kal lai tak chuan ka pasal hmel ka hmu hlawl a, raincoat hain ruah chu a do miah miah a, thil awmzia ka hrethiam miah lo. Kan din khawmna lam a rawn pan chuan a biru deuh zawngin ka ding sawn thuai a, lo biaa lo pan hnai nghal chawt tur ka nih vei nen chutiang thil chu engmah ka ti hauh lo. Mi dang chu thil awmzia zawtin an rual chuan a kal chhuak leh nghal a, Bawihtei hruai a tum hnuhnawh leh si a ni mai thei.

Ka pasal chu ka en zui reng a, Bawihtei nghaka a din lai chuan a hnungah hmeichhe pakhat, ka rualpui àwm vel hian a kheuh zeuh a, chu nu chuan nihliap a khum a, naupang hruai turah ka ngai hmiah a, ka pasal leh chu nu awm dan chuan ka mit a là ta khawp mai. Hmun dang hawi sawn lek lovin ka en ta ngar ngar a, ka pasal leh chu nu chu innèl hmel zet hian an inbia a, ka thin chu a thip vawng vawng a, a nupui pawh ni lo hnena a nêlawm bik lutuk chu ka thik a, ka nâ vawng vawng bawk.

Naupangho chu a rawn chhuak ta sap sap a, ka pasal chuan Bawihtei chu a buaipui zung zung nghal a, ka rin ang ngeiin a bula hmeichhia pawh chuan a fapa ni ngei tur hi a buai ve mawlh mawlh a, ka pasalin chu mipa naupang bianga a pia ka hmu phei chu ka âwm ka dawm tawp a, ka thawk a rawn buai nghal a, boruak tlachham zetin ka thaw kawk kawk a, ka thawk zawng chuan ka hrawk chu a thip hriam hraih bawk. Ka awm dan a dik lo tawlh tawlh a, ka natna neih thaw hah chu a rawn chhuak leh tih ka hre chiang ta khawp mai.

"Awi, ka pi, engtin nge i awm?" ka thawk dan a buai vek tawh avangin nula pakhat min biakna pawh chu ka chhang thei lo.

"Min lo pui teh u, ka pi hi a ṭha miah lo a nia" a ti lawm lawm zui nghal a, kei erawh ka taksa zawng zawng a zawi vek tawh a, ka thi ngei dâwnin ka hria. 

Ka mit ka men leh meuh chuan khâwl hmanga oxygen hipin damdawi in khumah ka lo mu fel diam tawh a, ka bulah hmeichhe pakhat hi a lo ṭhu ngawi ran bawk a, chu nu chu ka thaw hah a rawn chhuah laia min buaipuitu kha a ni tih ka hre nghal. Ka ngaihtuahna ah ka pasal leh ka fanu an rawn lang zui zat a, mahse ani hmel erawh hmuh tur pakhat mah a awm lo. Ka hmaia khâwl invuah hlih ka tum rualin ka bula hmeichhe lo ṭhu chuan

"I lo harh tawh elo ka pi? Heih, phelh ringawt suh, doctor ka va ko ang e" a lo ti zung zung a, room aṭang chuan a tlan chhuak zui nghal thuai bawk.

Rei lo tê hnuah doctor leh min ṭanpuitu nu chu an lo lut leh a, doctor chuan fimkhur tur te'n min chah nasa hle a, inhaler ka neih leh neih loh te min zâwt a, pangngai takin ka chhang a, ka ṭha tawh tih a hriat chuan ka haw theih thu a sawi nghal bawk. Min puitu nu chuan kan in thleng min thlah a tum leh a, mahse ka hnial ta thung. Lawmthu sawi nân pawisa pek ka tum a, a là duh miah lo leh nghal a, lawmthu ka hrilh chamchî ta ringawt. 

Bus-in ka haw a, ruah chu a la sur reng a, mahse a hmâ ang em emin a sur hnem tawh lo. Kan in chhunga ka luh chuan Bawihtei ṭap thawm ka hre hmasa ber a, ka fanu ṭap thawm chuan ka thinlung a fan khawp mai. Room lam panin ka pen nghal pawk pawk a, ka pasal chuan Bawihtei chu a lo pawm a, a awi titih bawk a, Bawihtei erawh a la ṭap bâng chuang der lo. Kawngka bulah chuan ka ding ngawi reng a, ka pasalin ka hmel a hmuh rual chuan

"Khawiah nge i lo kal bo hman? Bawihtei hi i ngaihtuah ve miah lo em ni?" a rawn ti deuh hrawk a, ka rilru chu nâ tak a ni!

"Mariana!?" ka ngawih reng avang chuan a rawn ti leh ngat a, pan pheiin Bawihtei chu ka pawm zui nghal daih bawk. 

"Ruah i do elo? Khawiah nge i kal?" tlêmin ka pasal aw chu a khauh lo ta deuh a, chhang lovin ka ngawi reng a, ka chhang châk hlawl lo a ni. 

"Bawihtei nen kan lo haw lai khan khaw'nge i lo awm hrim hrim?" a tih chuan ka awmna hmun dik tak sawi ka châk ngei mai. 

"Ruahin min dang a?" ka ti ta daih a, chik zeta min en chung hian

"Nihliap i keng lo em ni?" a ti ram deuh hmuk a, ka lû ka buk khum lai chuan dâwt ka sawi tih a hriat ka hlau hle.

"I phone i keng bawk si lo, ka hruai hman thu ka rawn hrilh leh dâwn che a, in aṭangin i chhuak hman tawh a nih ka ring" a tih zui leh sup chuan ka thil hmuh zawng zawng kha thinrim taka au chhuahpui buan buan ka châk tak zet.

"Nia" tih chiahin ka chhang a, ka fanu pawh ka ṭânga a bei tâk chinah chuan a ṭap bâng ve mai bawk. 

A school bán apiang hian a hmuh turin inah ka lo awm ziah ṭhin a, ka awm loh chuan a ṭap a ni mai. Vawiin erawh loh theih lohna avangin ina a lo haw laiin ka awm thei lo va, ka pasal hnen aṭanga lungawi lohna thu ka dawng leh zel chu ka rilru a nâ ngawih ngawih. Ṭah hawm hawm ka châk a, mahse chuti maiin ka ṭap thei der bawk si lo. Bawihtei chu tui lûmin ka bual a, inbual zawhah ka mutpui nghal daih a, a muhil har lo hle.

"Engati nge ruah i do?" ka pasal aw chu a dam ruih tawh a, chhan erawh ka tum lo hrim hrim.

"Min chhang teh Mariana, ka ngaihtuah che a nia, thil thleng a awm em?" a tih chuan min rawn awm hnaih ta hle tih ka hre zui nghal. 

"Nihliap ka keng lo ka tih tawh khâ?" peih lo aw zeta ka tih chuan

"Ni lo, dâwt i sawi, i mitmengah hian ka hre thei, eng thil nge thleng?" a ti nghet charh a, kan inen chiang ta hle bawk. 

"Nihliap ken theihngilh tur mi i ni lo tih ka hria a nia Mariana, ka lakah zep nei hauh suh" a tih leh lek phei chuan ka thil hmuh zawng zawng kha sawi chhuah mai ka duh tawh! 

"Ka tlu a" ka tih chuan

"Khawiah? Eng vangin?" a lo ti nghal thuai a, min ngaihtuah tak tak emaw ka ti hman alawm le. 

"Ka thaw hah a rawn chhuak thut a, mahse ka ṭha tawh e" tiin a ṭhen azâr chu ka hrilh ta nge nge a, a ṭawng hma chuan

"Ka va intifai lawk ang e" ka tih zawm leh nghal zat a, ka chhuak zui nghal daih bawk.

Ka inbual zo bathroom aṭanga ka chhuah chuan thingpui min lo siam a, mak ti zetin ka en hû a, thingpui min siamsak lohna chin hi a rei tawh lutuk tlat. Ka kâah phei chuan a thingpui siam tluka tui tih ka nei ngai lo, mahse tun hnuah erawh inhre ngai lo ang maiin kan awm tawh a, engkim a danglam zo tawh a ni. Kan mit a tawng dâwna ka hriat rualin ka hawi sawn daih a, room-ah lutin ka inthlak mial mial a, Bawihtei bula mut zál mai mai chu ka tum zui nghal. 

"Thingpui hi in phawt la, i duh chuan i mu dâwn a nia, damdawi i ei tawh hrim hrim em?" room-a thingpui lo keng lut pah hian ka pasal chuan min bia a, min ngaihtuah hmel pu lo law law se ka ti, ka ṭah a chhuak ru et et zel bawk si.

"In rawh le" duat aw taka min biak leh chuan ka taksa chhung sa pup pupin ka en ral a, ṭah insum nasa tak ka ni! 

"Mariana" a tih leh chuan thingpui no chu ka ban a, ka in zui nghal khawlh khawlh a, a sâ phian zui leh nghal.

"In hmanhmawh lutuk suh" tiin ka kutah a rawn vuan a, ka no dawm lai chu min dawm pui zawm zat bawk. 

"Eng vanga tlu nge i nih i la sawi miah lo a nia?" a ti leh sup a, min en hnai ṭha khawp mai. 

"Ka mu lawk dâwn a, dâr 4 velah min kai tho dâwn a nia, zanin tlai chu bâwl har deuh mai ang" ka ti ta daih a, rizai làin Bawihtei bulah chuan ka mu zui nghal a, a ngawih reng danah min en a ni ngei ang.

Mumang hial neiin ka mu tui hle a, ka harh chuan khua a lo thim fel vek tawh a, tlai erawh a la tlai chhe lutuk lo, khua a thim hma a nih hmel. Bawihtei muhil bám en reng chungin ka mu meng kar a, a hmelah chuan a pa hlir a lang a, hmelah na na na hi chuan kei lètin a pa chhun zâwk! Ei rawng ka la bâwl lo tih hre chhuakin ka tho thuai a, mahse chokaa ka pasal ei rawng bâwl ka hmuh chuan ka ṭah a chhuak leh tlat tawh.

Chutia ka thlir lai chuan ka pum chung, ka âwm han ni pha chiah bawk si lo lai vel chu a rawn ná riai riai a, nâ lutuk erawh a ni hran lo. Ni dangah pawh ka tawrh fô avangin a reh ve leh mai dâwn emaw ka ti a, a nâ tulh tulh thung. Taksaa hmarcha thak ṭha zet tah ang mai hian ka pum chhung chu a nâ sa hiam hiam a, a thip vawng vawng a, ka lû a haiin ka luak a chhuak nghal em em bawk. Ka pum dawm chung chuan bathroom lam ka pan chhet chhet a, eng nge tih ber tur pawh ka hriat loh laiin ka luak a rawn chhuak zual a, ka luak ta bawrh bawrh a, thawm dim lam ka rilruah a lang thei tawh lo.

"I ṭha em Mariana?" ka pasal aw ka hriat rual chuan intihharh luih hram ka tum a, harsa tak a ni! 

"I ṭha miah lo" tiin ka chal a rawn dawm a, ka luak leh ta bawrh bawrh a, ka luak hnem lutuk chu ka chau vek thei.

"Engtin nge i awm Mariana?" ka biang tawn tawn chu a chelh a, engkim ka hmu fiah lo vek a, ka chau tawngkhawng tawh a ni mahna. 

Ka taksa kang deuh lawp chu ka thil hriat hnuhnun ber a ni a, taksa nã nei miah lova ka harh leh chuan damdawi inah ka lo mu daih tawh thung. Ka pasal chuan ka kut vuan chung hian min en tlawk tlawk a, min khawngaih hmel lutuk chu ka ṭah tichhuak ru em em tu pakhat a ni zui nghal. Bawihtei pawh ka bul lawkah a lo ṭhu ve ran reuh a, mahse naupang tih takah engmah a hrethiam lo a nih hmel. 

"I mut tui em anu?" a tih chuan nui lui var var pah hian

"Mut tui lutuk Bawihte" ka ti ve nghal a, ka pasal chuan

"Ka pute pawh an lo thleng ṭep ang" a lo ti zawm zat bawk a, ka pate lehzelin chutianga ka awm an hria chu ṭul ka ti hran lo maw lè.

Chutia kan chhungkaw bil têa kan awm lai chuan doctor a lo lut a, ka pasal chuan ka taksa dinhmun dik tak a lo zâwt nghal thuai a, doctor-in ka pumpui a ulcer thu leh a nasat tawh thu a sawi chiah chu ka thin a phu rang dawt dawt hle. Ka zun kawng nen lam a ṭhat loh thu ka hriat belh leh ta zel a, ngaihngam taka awm turin min hrilh mah se a thusawi engkim chuan min tihlauthawng lo thei lo. Ka pumpui a ulcer nasat tawh chuan cancer thei reng dinhmunah ka awm mêk tih ka hre chiang em em a, chu tak chu ka hlauhthawn chhan a ni.

Ka chhungte an lo thleng a, ka pasal chhungte an lo thleng bawk a, mahse ka taksa dinhmun dik tak erawh hrilh ka duh lo thung. Thaw hah ka nei ṭhin tih hi chu an hre vek a, chumi chu chhuan lamah hmang zaihin damdawi ina kan luh rawk rawk chhan chu ka sawi liam puat puat a, kan chhuah theih nghal thu nen lam ka sawi a, rinhlelhna min neih loh laiin ka pasal mitmeng erawh hmuh hmaih theih loh khawpa nasain a danglam thung.

"Engtik aṭang khan nge dâwt sawi i lo awlsam tâk em em?" kan in chhung kan luh hnua ka pasal zawhna chuan ka ngaihtuahna a tikal thui khawp mai.

"I mizia zawng zawng a danglam nî aṭang khan" ka ti ve ta hmak a, ka duh ai ka aw chu a chhuak hriam daih!

"Kan nupa inkâr hi siam ṭha tawh teh ang, hetiang ringawt zawng a dik lo a ni" a tih chuan

"Siam ṭhat a ṭulna a awm lo" tiin ka lo pawtchat a, a lungnih loh hmel hle bawk.

"Eng vangin nge i hriselna a ṭhat loh thu hi min hrilh loh? Eng vanga ka laka zep kher nge i nih?" a tih chuan chhang lovin ka ngawi reng a, Bawihtei ka ngaihven zui ta daih bawk.

Bawihtei chu a chaw ei tur ka siamsak a, a bulah ṭhuin kei paw'n chaw ka ei ve nghal a, ka pasal ei tur pawh ka khawrh vek a, mahse ei lovin kan sirah a ding reng thung. Bawihtei a inei puar hnu chuan a pa chu infiampuiah leh thil ziahpui ah a sâwm a, pangngai taka awm ka tum nasat tehreng nen ka thei hauh lo leh nghal. Chaw ka ei kham a, ka pasal chaw ei tur pawh ka seng ta daih a, a duh a nih leh amahin insiam tawh mai rawh se, tun ṭum zawng ka dik lo kual vel laklawh êm mai. 

"Inbe lawk teh ang" thawm reh ṭhiap laia a rawn tih chuan

"Ka'n mu zâwk ang e, ka mut a chhuak tawh a" ka lo ti thung a, àm zet hian a thaw chhuak ri ham ham a, ka bânah chelhin room aṭang chuan min kai chhuak zui nghal bawk.

"Engati nge engmah min hrilh loh?" sitting room-a ka ṭhut hnu chuan a ti leh ngat a, chhang peih lo tak ka ni! 

"Min ngaihtuah suh, ka ṭha" zawi fahrana ka tih chuan

"I ṭha lo tih chu kan hre ve ve alawm" a ti nghet charh a, sawi belh vak tur hre tawh lovin ka thil en ngai ka en reng ta ringawt. 

"Min en teh Mariana" tiin ka lû chu a lamah a kuai her a, ka mittui tling pam a hmuh rual chuan ipik hmel zet hian a thaw zui hak bawk.

"I laka ka awm danin a zir lo tih ka hria, mahse engati nge hetiang em ema thil serious te hi chu min hrilh loh? I thi daih thei asin, thih i duh zâwk em ni?" vin hauh si lo, nghet charh tho sia a tih chuan ka mittui ka dang hman thlawt lo. 

"Ka la thi dâwn tho tho alawm" ka tih chuan

"Eng nge i sawi awmzia?" a lo ti nghal a, nui lui sakin a kut chu ka pawt thla a, ka mit hnawng chap chu ka kutin ka tawk hul den den a, ka chet dan chuan a mit a là khawp mai. 

"Nakinah chuan ka la cancer dâwn alawm, ka hre tlang nghal vek! Pumpui ulcer reng reng chu a tawpah an cancer ṭhin, kei phei chu a nasa tawh em em leh nghal" ka thawh rual chuan ka ti sap sap a, a lam hawi thla pah hian

"Min ngaihtuah suh, Bawihtei chiah ngaihtuah rawh" ka tih zawm leh nghal a, ka kal sawn tur chu ka bân rekah a lo vuan nghal vat bawk. 

"Hetianga ka awm chhan hi i hre duh ti raw?" ti thawp raihin ka pasal chu ka en kal a, ṭawng tuma a àn zuau lai chuan

"Tun ṭum chu min ngaithla tawp rawh, eng pawh sawi la ka rilru i tinâ zual mai mai" ka lo ti thuai a, beidawn hmel zeta min enna te chuan ka lâi a chhun nâ ngawih ngawih.

"Doctor khan ka thil ei dan a mumal loh vang a ti a, a sawi dik ang, hunbi neiin thil ka ei ngai lo. A chhan chu ka pasal lo haw hun nghakin hun ka hmang ni tin ṭhin a, a ruala chaw ei thlahlel zetin ka nghak thlawn fô va, ani lah chuan min melh duh ṭâwk thung si. Khatianga hunbi mumal lo taka chaw ka ei hnuhnawh ṭhinna khan ka pum a tichhia ang a, ka pumpui a ulcer chhan pawh hi a nih ka ring" a hriatthiam loh hlau ang hrima ka tih mawlh mawlh chuan

"Mariana" a lo ti hniam ruih a, lungngaih hmel viau mah se a lungngaih tak tak ka ring thei tawh rih lo.

"Thi ta ila chuan i hlim zâwk viau ang chu ti raw? Kha i ngaihzawngnu nen khan hun in nei tam thei ang a, i hlim ang a, Bawihtei pawh hi i thlahthlam thuai ka ring. Bawihtei hi awm lo se chuan keini pahnih hi kan inṭhen tawh ngei ang, nu leh pa kâra seilentir ka duh tlat a, chu vanga tuar char char chu ka ni" ka tih chuan

"Ngaihzawng ka nei reng reng lo Mariana, i hre sual chhiava a ni" a lo ti thuai a, za lo zet hian ka nui lui sak a, chutah amah bawk chuan

"Ngaithla teh, ngaihzawng ka nei lo, nang ka nupui i nih chhung chuan ngaihzawng ka nei ngai lo bawk ang" a ti nghet leh charh a, awih chu ka duh lutuk, mahse ka thei thlawt lo a ni e. 

"A hmâ ang khan awm leh tawh rawh Samu, min ngaihtuah lo la, min be lo la, melh pawh min melh ṭha duh lo la, kan fanu tân khawvela pa ṭha ber ni bawk la, chu chu ka duhthusam a ni tawh, kei chuan i lakah hian beisei ka nei ngam tawh lo" ka tih lai chuan ka biangah mittui a luang zawih zawih a, a hmuha ṭah duh lo em em ṭhin kha tunah zet zawng a ṭah loh theih loh.

"Eng thil pawi nge ka tih tâk!" indawm kun ngula ti hniam ruihin a hmelah chuan hlauhthawnna te, lungngaihna te, min khawngaihna te leh inchhirna ni àwm tak te chu a lang chhuak zut zut a, a ṭhutna aṭanga thova min din hnaih a tum rual chuan

"Ni lo Samu, i tihpalh thu sawi miah suh, i sawi tur a ni lo" tiin ka tawlh hla thuai a, a hmel aṭang chuan a sawi tum áwm ang a hriat theih vek a, ṭawng khalh lo ila zawng a inthiam loh thu min hrilh ngei ka ring.

Chumi zan aṭang chuan a hma zawng ai a ṭawng duh lo zual a, mahse pawi ka ti lo daih záwk! A mizia pawh a danglam chak em em a, Bawihtei nena an awm dun laia a hmel te chu hmân kha a ang tawh lo lehzual, lemchang thiam tak ang mai a ni. A office bâng ni se a lo haw hma thei ta viau a, khaw thim hmain in a rawn thleng zat zat a, a awm dan chuan min tihlim chuang teuh lo. 

Ṭum khat phei chu ka hriat miah loh leh min râwn miah lo hian damdawi inah a lo va kal a, ka damdawi ei tur mai bakah ka taksa tâna ṭha tur ei chî thil chi hrang hrang a lo lei haw ṭeuh a, Bawihtei awm loh lai a ni kher bawk nen thinrim zetin ka hrawk hrep a, ka ṭawngkhum tuar tuar a, rilru nât lutuk avangin a tawpah ka ṭap zui bawk a, min kuah a tum te chuan duh lo nasa tak ka ni.

A hna bâng rawn haw hi ei rawng ka bâwl lai tak a lo ni kher ṭhin bawk nen Bawihtei a awmpui hnuah min rawn pui ta ziah bawk a, inbiak erawh kan inbe ngai miah lo thung. Zan laia ka harh châng te hian khum sirah, ka bul chêtah a lo ṭhu ngawi reng ṭhin a, a awm dan chuan a hma ai a lêt tam takin ka rilru a tinâ zual a, amah ngaihtuah lo thei lovin min siam ta hial bawk. Ka biak hmasak loh chuan min be ngai meuh lo va, ka biak lahin a rul tâwk tê tê baka chhanna ka dawng ngai lo leh ta zel a, engkim chu ka hne ngawih ngawih. 

Zan khat chu ka pum a rawn nâ leh vak a, nât tak tê hian a nâ a, damdawi ka ei paw'n awmzia pakhat mah a awm lo. Ka pasal chuan min buaipui vat a, a rang thei ang berin damdawi in lam min panpui thuai thuai a, damdawi in kan thlen hnuah pawh ka pum nâ chu a la reh ta chuang lo va, doctor chuan kah mutna damdawiin min kap mu ta ringawt a, tih theih dang awm hek lo. Ka harh leh hnuah erawh ka ṭha phian lawi a, mahse ka pasal chuan haw nghal a remti lo thung.

"Engati nge hetiang hian i awm? Min ngaihtuah suh ka ti a ni lo'm ni?" ka ti thawp sep a, ka kut chu a hum lûm vung vung a, ka ṭawng hre lo ang mai hian en pawh min en lo. 

"Engtikah mah min ngaidam thei tawh dâwn lo mah la min kalsan suh, min kalsan ngai suh Mariana, chu chu khawvela ka thil duh ber a ni" a ngawih vang vang hnua a tih chuan ka ṭah a chhuak nghal khawp mai. 

"Ka thih miau chuan ka kalsan ngei che a ngaih ka ring" ṭap aw lek lek hian ka ti thâm chhal a, ka ṭah a chhuak tih hria ni àwm fahran hian min rawn en rang hle bawk. 

"I thi dâwn lo, i pumpui hi a ulcer a ni mahna, i thi dâwn tihna erawh a ni lo hulhûal! Damdawi i ei ṭha ang a, ka theih tawpa ṭhain ka enkawl bawk che ang a, i taksa hi a hma ang chiah khan a ṭha leh ang, i cancer dâwn reng reng lo, ka phal bawk lo" a tih mawlh mawlh lai chuan

"Duh tâwk rawh!" ka ti vin tuarh a, insum thei tawh lovin ka ṭap zui feih feih nghal.

"Hetiang hian awm suh Samu, ka rilru i tinâ zual mai mai, i lakah beiseina ka nei leh palh mai ang" ṭap ṭiaua ka tih chuan

"A pawi ngawt mai, khang thla kal ta chhung zawnga ka awm dan kha ka hrethiam lo, sualin min luhchilh a ni ber. A chhan sawi fak tur awm si lovin i lakah ka hel tlat kha a ni a, ka pehhel che a, ka be ṭha duh lo ṭhin che tih pawh ka hria, ka hai bik lo. Ka awm dan kha nuam tihna ka nei lo va, nuam lo tihna pawh ka nei chuang lo, ka awm âwm khan ka awm tawp a ni" a ti duah a, kei erawh ka lo ṭah nuih hak thung. 

"A chhan chu kei min hmangaihna kha ruah tui tlen fai thei lêka pan leh nghet lo alawm a nih, min hmangaih tak tak hleinem Samu!" ka tih chuan ṭawng tumin a âng zuau a, ka khap nghal vat bawk. 

"Ka sawi tawh khâ, kan fanu Bawihtei tân hian pa ṭha tak ni la, kei chu nakin lawkah ka la thi dâwn tho tho va, min ngaihtuah lo law law zâwk rawh" ka tih zawm leh tâkah chuan

"Ni lo, i thi dâwn reng reng lo, engati nge thi tur anga i inngaih tlat mai lè? I thi dâwn lo Mariana, hlauthawng suh" a lo ti ve ta nge nge a, ka hmai bul chêtah a rawn kun hniam a, mittui avangin a hmel chu hmuh pawh ka hmu fiah thei lo.

"Nâtna pakhat lêk pawh an thihpui sup sup laiin kei chuan pathum lâi ka nei asin, chuti chung chuan 'i thi dâwn lo' i la ti màw? Ka thaw hah avang ringawt pawh hian ka thi thut thei asin, ka pumpui a ṭhat loh mai bakah ka zun kawng a ṭha lo leh zel a" ka tih mawlh mawlh hnu chuan a âwmah min kuah bei thuai a, uar zetin ka ṭap chhuak hawm hawm zui nghal bawk.

"I thi dâwn lo, ka phal lo" a tih lai te chuan ka ṭap uar sauh a, hun rei tak ka lo upbeh tawh ka rilru nâtna zawng zawngte chu ka bun chhuak hawk hawk a, chutiang em em chuan ka ṭap nasa ang tih ka ngaihtuah pha ngai lo. 

"Ka hlauthawng êm a ni Samu" ka ṭah chhuak zualpui a reh deuh hnu chuan ka ti thâm ṭiak a, ka aw chu a chhuak chang chang ti ila a sual lo ang. 

"Hmeichhe hlim thei tak leh rilru zau em em kha keimah avangin tunah chuan i danglam zo ta chu a ni si a, kan nupa inkâr a ṭha emaw a chhia emaw engtikah mah keimah leh keimah zâwk hi ka inngaidam thei tawh ngai lo ang" ti dam dap dapin ka hnung chu a chûl hliau hliau a, ka chhip samah a fawp vang vang zui zat bawk.

Chumi zan chuan a âwmah beiin ka ṭap tlaivâr titih a, ka mit a bui vek a, kan chhungte paw'n ka lan dan chu mak an ti khawp mai. Damdawi inah pakhat chiahin min riahpui theih avangin ka pasal chuan awmpui chawt a, ei tur chi hrang hrang min leisak nual a, ka ei duh zawng a lo la theihnghilh hmin ṭhak bik reng reng lo. Ward-a awm ve mi dangte chu ka pe nual a, ka pasal tak chuan ṭul a ti lem lo khawp mai. 

Ni thum hnuah damdawi in aṭang chuan kan chhuak a, a ni telin ka pasal hnen aṭang ngaihsakna leh ngaihvenna ka dawng zual zel a, min buaipui mawp mawp a, ni eng emaw zah chu office a kal tawh lo nghe nghe. Ka rilru erawh a la pangngai reng a, min hmangaih ber ang ziazânga a awm ṭhin chu ka ngei tlat a, ka haw hlur a, ka ánkhum loh leh ka vin hrawk hrawk a, ani erawh chuan engtin mah min chhang lêt ngai lo va, min khawih lêt ngai lo hrim hrim bawk. 

Thla a ral a, ka taksa dinhmun leh ka hriselna paw'n hmasawn lam a pan ve zel a, Pathian zârah pum nâ ka nei tawh rih miah lo bawk. Tukṭhuan ei khamah leh zanriah ei khamah damdawi ka ei ziah a, chu chu ka dam ṭhat zelna chhan pakhat a ni. Damdawi mai bakah taksa tâna ṭha ei tur chi hrang hrang ka ei ziah a, hunbi nei hlirin thil ka ei ta ziah bawk a, engkim chu ka pasal vang ka ti lo thei lo. A hun taka thil ka ei theihnghilh hlauin office aṭang paw'n min rawn be awl lo va, mize hran hlak a pu tawh a, mahse ka rilru chhungril tak chuan ka la ring famkim thei chuang lo.

A ngaihzawng anga ka ngaih nu nen khan an lo inngaizawng tak tak miah lo leh nghal a, engkim felfai thlap angin lang mah se kan nupa inkâr chu a la buarchuar ru em em tho si. Engtik lai paw'n a mitmengah lungngaihna leh khawharna hmuh tur a awm reng a, kei paw'n chutiang hmel hmuh reng chu nuam ka ti bik chuang lo. Kei min buaipuiin min enkawl ṭha hle mah se amah a inenkawl ṭha lo nasa hle thung a, zan a mu ṭha ngai lo tih a mitmeng aṭangin a hriat thei em em a, khatiang khawpa khawhar leh rilru nâ khan min siam tawh mah se ka tawn ang a rawn tawn ve tâkah chuan ka khawngaih lo thei lo. 

Zan khat chu a lêng chhuak a, lêng lo tur leh Bawihtei thil ziahpui tura ka tih paw'n a lêng chhuak lui ta tho va, a lo haw dan erawh a chhuah dan nen a inang lo khawp mai. Rui zet hian a rawn haw a, a hmai chu a thi neuh neuh bakah a khem nual bawk. A ṭhianpa'n a rawn hruai haw nghe nghe a, chutianga ka pasal hmel ka hmu chiah chu hlauthawng tak ka ni! Rilru hah zetin ka buaipui zung zung a, zan khuain ka muhil lo va, ka pasal nun dan leh a thil tawn te chu ka ngaihtuah chet chet a, ka rilru a hah zual tak zet!

"I ṭha em?" a harh ruala a thusawi hmasak ber chuan ka taksa chhung a tisa pup pup a, nâ nei zâwkin ka ṭhat leh ṭhat loh min zâwt chu min ti awm thiam lo. 

"Eng nge i an?" a zawhna pawh chhang lovin ka ti lêt ve ta zâwk a, che ṭuah ṭuah hian a mutna sawnin ka hnungah a rawn mu saisir zui nghal daih bawk.

"Nizana ka lo haw laiin engtin nge i awm? I buai phah em?" a zawhna ka chhan loh ang bawkin ka zawhna chhan a tum bik lo a nih hmel.

"Khatiang khan lo haw tawh suh, ka ngaina lo" ka tih chuan

"Ka lo haw tawh lo ang, ka tiam e" a lo ti ve nghal mai bawk a, min kuah nghet sauh a, a awm dan chu nâ nei pawh a ang tawh lo. 

"Chance min pe leh thei ang em Mariana? Min ring leh la ka duh, min ring leh thei a nih ngat chuan engtikah mah kei min rinna tichhe zawngin ka awm leh tawh ngai lo ang" dam deuh si hian a ti nghet charh charh a, chhan dan tur hre lo zetin ka lo thaw halh thung.

"Ring ta che ila?" ka ti ve ta nge nge a, a rilru hah hmel leh a lungngai hmel hmuh reng tluka hmuh hrehawm tih ka nei bik chuang bawk si lo nen rin leh mai chu a ṭhain ka hria. 

"Ka kalsan ngai lo ang che, a chhan chu ka thinlung zawng zawngin ka hmangaih che Mariana" a bianga mittui luang thla ngiai ngiai pawh ngaihven lova min chhan dan chuan min tiṭap lo thei lo. 

"I tiam em?" ṭap ṭiaua ka tih chuan

"Tiam e, engtikah mah ka kalsan ngai lo ang che, ka nunah hian nang leh Bawihtei tluka hmeichhe pawimawh in awm lo" tiin rem leh rem lo hian ka hmuiah a rawn fawp vang vang a, min fawh dan chu chhan lêt loh phal chî reng a ni mawlh lo.

"Bawihtei pawh hi ka thik lek lek ṭhin" kan piah lawka kan fanu muhil bâm chu ka en pah reng a, ka pasal erawh ka thil sawi avang chuan a nui thum dut thung.

"Ka hria alawm, i awm dan leh i ṭawng dan aṭang hian hai theih a ni lo, ka tihtur ka hre chiang hle bawk" a tih chuan ka lo ner nâng a, ka biangah rawn fawp zeuhin min kuah ṭha ta hle hle a, ngaihdamna leh rinna te hi hmangaihna avanga lo piang an ni tih ka hre chhuak chawpchilh zui nghal bawk.

Ka dam loh lai leh ka rilru a ipik ṭun lai khan thi dâwn tlata inhriatna kha ka nei a, dik tak chuan ka cancer ngei ngei dâwn emaw ka ti a nih kha! Tunah erawh ka pasal min ṭawng thlamuanna engkim chu ka ring a, ka awih a, rilru hahna nei tawh lovin ka hah a dam sawng sawng a, ka taksa a chak ṭhat theih nâna theihtawp a chhuah ang bawkin kei paw'n ka theihtawp ka chhuah ngei ang. Ka pasal tân, kan fanu tân leh kan chhungkaw tân hian ka dam ṭha leh ngei dâwn a ni.

                                       The End