BELINDA (Short Story) By Havali Adam

                                         BELINDA

                        (Mizo Romantic Short Story)

                                              By

                                      Havali Adam

Fur tih takah khua chu a chhe cher cher hle a, hna pawh thawk lovin inah kan awm ṭhap a, thawh theih ni hek lo. Ruah sur dan lah chu thli a tel leh ta nghal a, kâwl phet dan leh khawpui rik hum hum dan pawh tu tân mah hnathawk tura chhuah chî a ni hlawl lo. Khaw awm danin a zir bawk a, pindanah lutin ka mu ta daih a, muthilh pawh ka tum chuang lo, ka mu zâl vel mai mai a ni.

"E, i lo mu daih elo? I chhuak emaw ka tia, mu daih tak rawh, khua a chhe êm mai" ka pute nupui pitei chuan khuma ka mû min hmuh rualin a ti a, mahni lû zo vehvawh leh nu valai tak hi a ni a, 'pite' tiin ka ko mai ṭhin.

Min biakna chu ka chhang lem lo va, ka mut ngaiin ka mu reng a, ani pawh pindan aṭang chuan a chhuak ve leh mai bawk. In chhungah chuan pitei nen chauh kan awm a, mut zàl mai mai tum kha ka lo muhil tlang daih chu niin, ka harh leh chuan naupang an lo haw kim vek tawh a, putea pawh a lo haw tawh nghe nghe. Putea hi kan khaw middle school-ah zirtirtu niin a hnathawh hi kei leh a chhungte min chawmna ber a ni a, pitei nen fapa pahnih leh fanu pahnih an nei a, kei nen kan zavaiin pasarih kan ni tihna a nih chu! 

Ka nu chhungtea dam awmchhun a ni tawh a, vanduaithlak takin ka nu hian ka pian tirhin min boralsan nghal a, putea min hrilh dan chuan a taksain a zo lo a ni ber. Ka pi leh pute ni se ka la naupan zual laiin mual min liamsan tawh bawk a, thisen zawmpui ka neih chhun chu putea hi a ni mai. Ni lo, ka pa a la awm, mahse vawi khat pawh ka pa dik tak hmel ka la hmu miah lo thung. Putea paw'n tu nge a nih a hre bik lo va, ka nu khan tu nge a nih tih leh khawi khuaah nge an awm tih tal kha lo hrilh hman se a ṭha tur!

Nu leh pa kâra seilian lovin hringnun ka hmang chho va, ka tân chuan putea tluka mi hlu hi an awm tawh kher lo ang. School ka kal hma zawng khan ka pi leh pute thlazar hnuaiah ka tal a, anni an boral tâkah chuan putea hian min buaipui zui nghal a, a nupui neih hnuah pawh tun thlengin min la enkawl chhunzawm ta zel a, a chang chuan a lakah pawh hian ka inthlahrung hial ṭhin. Ka school kalna fee, ka thawmhnaw, ka mamawh engkim min buaipuisak vek a, amah mai ni lo pite pawh hi ka tân chuan fel tak a ni.

An fate ni se u dik tak ang chiahin min en vek hlawm a, min ngainat ang bawkin ka ngaina em em a, ka kalna apianga kal tum châng pawh an ngah mai. Min u mai a, kei paw'n ka thisen zawmpui dik tak te ni lo mah se ka nau en vek a, ka chhan thei hle bawk. Tumah school-a hruai ngai an ni tawh lo va, anmahni ṭheuhin an kal thei vek tawh a, an tet lai kha chuan kan inhruai nasa ve ṭhin. 

"Maian a sih theih tawh ang chu máw, naktuk chu khua a chhia emaw a ṭha emaw, ka kal lui dâwn, ka ei châk êm mai" zanriah ei laiin pitei chuan a ti siam siam a, a chaw chu a bàr zawm leh mial mial bawk. 

"Ka lo thlithlai chhin dâwn a nia, a harsa hleinem" ka tih chuan

"Kan kal rual dâwn a nia, naktuk chu rama kal ka tum sa hrim hrim" a lo ti ve leh zat a, putea zâwk chuan

"Chawhmeh en tur hrim hrimin han kal dun rawh u, thil dang engmah tih a ngai lo" a tih zawm zat bawk. 

Zanriah kan ei kham a, ruah a la sur deuh cher cher a, inah kan tawm ta hle hle. Rei lo tê hnuah ṭhianpa Vala a lo lêng lut a, ka rin ang ngeiin lêng turin min sâwm a, mahse ka chhuak peih lo laklawh bawk nen ka hnial ta mai. Putea test paper check chu ka check pui ta zâwk a, lehkha zir sâng ka nih loh avang hian lehkhathiam nih ka châk ve thei em em a, pâwl sawm bak zir thleng lo ka ni a, putea hi chuan zir zel turin min duh a, mahse keimah zâwkin ka duh lo va, an fate zirna senso tur nen lo tihbuai ve chhen kha ka tân thil nuam a ni lo a tin a ni!

Putea bula exam paper leh test paper ka check pui hian nasa takin hma ka sâwn phah a, sap ṭawng pawh ka hriat tam phah em em a, amah ber pawh hian min hrilh hreh lo va, ka zâwt hreh bik chuang lo. Pitei ni se engkimah putea a thlawp a, an nupa tluka nu leh pa nih tling leh fate duata enkawl thiam hi ka la hre lo, ka hmuh tam tâwk loh vangte pawh a ni mai thei, mahse putea leh pitei te pahnih ang hi chu an vâng pharh ang ka ring. 

"I mut a chhuak der elo?" putea min biakna thawm chuan min timeng fiah kawk a, ka mut a chhuak deuh chu a ni e. 

"Va mu rawh, ka zo hman ang" zozial pak khu laih laih pah hian a ti leh a, chhang chuang lovin ka tho zui ve nghal mai bawk. 

Sawi leh sawi hnu, putea hi pa ṭha tak a ni a, mei a zuk paw'n a fate hmuh laiin a zu ngai lo va, ramah a nih loh leh school-ah a zu tam ber a, a theih hram chuan a zu tlem lui ṭhin hial bawk. Pa inchengvawng tak tih tur ang chî hi a ni a, a hmel pawh a chhe hran lo. Chutiang bawkin pitei pawh kum 40 ral kai tawh mah se a la hmelṭha em em a, hna a thawk nasa lo pawh a ni chuang lo. Hna thawh lamah chuan thawk nasa tak a ni; thawh hreh a nei ngai lo zâwk. 

Kan khuaah damdawi dawr a hawng a, mahse ram lam hna thawh a ṭhulh phah chuang der lo. A ṭul chuan hlo a thlo a, huan thlengin min sampu loh leh lò min vahpui pawh a hreh ngai lo va, chuti chung chuan a hmel a la ṭha reng tho va, hmelṭha tur chî a ni ka ti mai. A chhungte pawh hian an rawn ngaihven viau ṭhin a, thingtlângah kan awm bawk si a, an rawn ngaihven pawh chu a àwm lo hran lo. Pitei hi Lunglei khaw chhuak dik tak a ni a, putea erawh thingtlâng khaw pakhata mi ve mai chauh a ni thung a, mahse nupa inkawpchawi tak chu an va ni chiang êm.

A châng chuan ka nu ka ngaihtuah chhuak fó ṭhin a, la dam ve se zawng min duat thei ngawt ang ka ring. Khawvel êng ka hmuh theih nân a nun a hlan a, a taka a hmel hmuh châkin ka tuihal a, mahse chutiang chu engtikah mah a thleng dâwn si lo. A thlalak tih chauh loh chu a hmel hmuh dan dang a awm lo va, pitei ang maiin a hmelṭha a, a takah hmu phei ila chu a hmelṭha zual ngawt ang ka ring. Nu neih ve ka châk a, pa neih ve ka châk bawk a, putea leh pitei te'n an fate ang chiahin min duat em em mah se ka rilru a puitling tial tial a, nu leh pa hi chu ka la awt dâwn chauhin ka hria. 

"Pastor fanu kha a lo haw asin" ṭhianpa Vala thusawi chuan ka beng a verh lem lo khawp mai. 

"Naktuk chu pi Ramite thing ka thiarsak dâwn a, lo tel ve ta che, hlawh pawh a chhe lo ang ka ring" ka ti daih a, a peih lo hmel ka hmuh chuan ka nui deuh suk bawk. 

"Pi Ramite ber kher, a khirh ve ang reng si, ka peih lo ni teh se" a rawn ti ta ngei a, thil dang sawi zawm leh nghalin

"Pastor fanu lo haw chu a chhe lo tawh lutuk, khawpui a ngeih hle a ni ang" a ti leh ngat a, a thawa zû ṭhing rim nam chem chem ka hriat rual chuan

"Nizana i chhuah hnu khan zû i in leh a ni maw?" ka ti nghal a, a lungawi loh hmel teh e! 

"Hmeichhe lam sawipui dâwn che hian i ngaihsak lo daih ṭhin a, a buaithlak! Ngaihven ve tawh rawh, kum 30 i tling mai dâwn, a hun ve tawh lutuk" a ti deuh lang lang a, a ṭawng ring ang reng si a, kan chhehvelah mi dang an awm ang tih te pawh a hlauhawm zâwk alawm le. 

"Thil dang ngaihpawimawh ka nei tih i hriat ve vek khâ" ka tih chuan

"Engtin nge i pa chu zawn hmuh theih i la inbeisei ṭalh a Zira? Zawng hmu lo la ka duh vang pawh a ni lo, kum 28 chhung teh meuh a hmel hmu lo leh a chanchin hre lovin i awm tawh a, zawn hmuh tum buai lo law law mai teh" a ti deuh fak fak a, ṭhian leh ṭhian inkârah hi chuan thinrim deuhin inṭawngkhum mah ila a huat tak tak theih loh a nih dâwn hi!

"Han tum loh ngawt chî pawh a ni lo, a thi tawh nge a la dam tih tal ka hriat ve a ngai alawm, ti teh, i kal teh ang, khua hi a hniam chak riau mai" tia ka kal sawn chu min lo zui ve nghal mai bawk.

Lò kan thleng a, kan tih tur ang áng kan ti nghal zung zung a, haw harpui pawh ka tum lem lo. Tum dan tak phei chuan pitei a lo kal ve tura ngaih a ni a, mahse damdawi lei belh a ngaih avangin a zin leh ta zâwk a, ṭhianpa Vala ka sâwm hnuhnawh ta ringawt a ni. Khua lah chu ruah sur chuang si lo hian a hniam ruih a, chhum a rawn zing ṭan nghal ringawt bawk a, mahse han chet vel nân chuan a nuam phian tho. Beisei ruk ang ngeiin rei lo tê hnuah ruah a rawn súr ta nge nge a, kan thil tih lai chu kan chawl a, thlâmah kan lut zui nghal bawk. 

Fanghma chu kan vel a, kan ei a, thil eng eng emaw kan sawi dun a, a chang leh kan nui a, a chang leh kan inhnial a, a chang leh kan inhau bawk a, inhre chiangin kan inkawmna rei tawh viau lo se chu kan inhmuthiam lo ngun khawp ang. Ruah chu a sur duham ta zel a, kan piaha tlâng zawng zawng hmuh theih loh khawpin chhum chuan a zìn hnan bawk a, kan tih theih tâwk chu thlâm chhunga awm a ni mai. Tlêma ruah sur a hàn deuh hnu chuan thlai hnah sik tur leh thlai rah lo turin kan che chhuak nghal a, kan che muang lo dun khawp mai. 

Chawhnu lamah erawh khua chu a rawn êng leh ang lawi a, nî hial a rawn lang leh a, mahse kan haw tlang ta tho. Short cut kawng aṭanga kan haw avangin khaw chhung kan pawh har lo hle a, khaw chhung tower bul kan thlen lai chuan mitthi kan neih thu information mic aṭangin an rawn puang a, Aizawl lam aṭanga an lo phur chhoh mêk avangin zanina lumen a ngaih tur thute chu an rawn puang ta zel a, a zia lo tak tak a ni. 

"Awi! Rul! Rul! Rul!" tia hmeichhe râk chul lam chu rang zeta hawi loh theih pawh a ni lo. 

"Saw tah sawn rul a awm a nia, thing hnuaiah sawn" ka hmel a hmuh rual chuan a ti nghal mawlh mawlh a, thing chu ka'n hûng sawn deuh a, a lo awm ngei e!

"Rultuha a nih hi" ti supin ka chem ka phawrh a, min chuk tum àwm hrim a rawn din arh arh lai chuan ka chhawk hmawk a, ka hnunga hmeichhia chu a lo ṭe nasa mai. 

A lam ka hawi rual chuan a hmui a lo hup chawih a, ngaihven tawh lem lovin kan in lam ka pansan ta daih a, kan in chhung ka lut chu thlai hnah leh thlai rah ka phawrh zui nghal a, Vala ka hawntir nual tawh na chungin a la tam tham ve reuh khawp mai. Tlaia putea rawn haw paw'n tam a tih thu a sawi nghe nghe a, pitei lo zin haw pawh a bang chuang lo. Maian chu kan bai nghal a, a bial chîin fanghma kan zai lêp a, a ṭhenin a lawngin behhlawi rah an seh tel bawk a, maitê rah chhum hmin te chu tui ti hlawm tak kan ni! 

Zan a rawn ni a, khawhar ina kal hmain Vala chu kan inah a rawn lêng reng a, putea fateho chuan a bula awm nuam an ti leh khawp mai. Vala hi fiamthu duh ve tak a ni a, putea fate chuan a thil sawi apiang chu a tak tak emaw an ti zel a, an zawh belh loh leh zawhna chi hrang hrang an zâwt a, ani Vala lah chuan tawng tawh ang maiin a lui kalnaa ramhuai nen an inhmuh thute chu a la sawi ta deuh deuh a, amah hre chiangtu tân chuan a lo nuih loh theih loh ṭhin. 

Dâr 11 leh a chanve velah khawhar ina kal turin kan chhuak a, kan va thlen chuan mi an lo tam ang reng tawh hle a, ṭhutna pawh kan chang ṭha meuh lo. Kawngka bula YMA ṭhutthleng awl pakhatah chuan kan ṭhu a, hla sain kan zâi dual dual a, chumi kârah chuan ṭap thawm hriat tur a awm reng bawk. Rei pawh kan zai hmain ṭhalai hovin thingpui an rawn sem a, chutia thingpui ina kan chawlh ṭhuap lai chuan kan ṭhutna hnung aṭangin thil rimtui chêk hi a rawn nam a, ka hriat sual loh chuan hmeichhe rim ngei a ni. 

"In thlenna a rei tawh em u Val?" kan ṭhutna hnung lam aṭanga Vala rawn betu chu Nunmawii ni thànin ka hria, ka hawi lêt a, a lo ni ngei bawk.

"Rei lutuk lo ve" Vala chuan a lo ti ve mai a, Nunmawii chuan a nuih sen sen a, Nunmawii hian Vala hi a duh ve bur a, Vala tak hi chuan engah mah a ngai lem lo. 

"U Zira chu i ṭah a va chhuah hmel ve a" tia min rawn fiam zeuh chuan nui chuang lo hian a lam ka haw leh a, mahse ka hnung chiaha ṭhu, rimtui chêk hmel chu ka hmu châk ta tlat mai. 

"Ehê, nangmah elo?" a hmel en tuma ka hawi rual chuan a lo ti nghal phawng a, kei paw'n amah a nih ka ring teuh lo, a mitmengah chuan mak tihna a langsar hle bawk. 

"Eng lo, tlaiah khan ka pa ka hrilh a" a tih chuan chal tichuar nang hian ka lo meng urhsun run a, a sawi tum chu a mual bovin ka bo tlat a tin a ni!

"Ka sawi awmzia chu ka lawm e aw, tlaiah khan ka sawi hman lo va, ni lo, ka sawi theihnghilh zâwk! Ka pa'n min zâwt a, mahse tu nge i nih ka sawi thei bawk si lo va, a zia lo tak tak a ni" naupangchhe aw zeta a ti niah niah lai chu ka en reng a, engtin emaw ni lawmawm ruk riau dan a nei roh leh nghal.

"In inhria elo u Zir?" Nunmawii lam chu ka hawi zawm zat a, ka hnunga mi zâwk chuan

"Hria pawh a ni chiah lo, tlaiah khan rul min thahsak a, ka hlauh tehreng nen a hlau ve miah lo maw le" a lo ti zung zung a, tawi têa a nui hmel chu en reng dâwn pawh ni ila ka hnial lo mai thei a ni. 

"U Zira maw i nih a, Belinda-i ka nia" tih leh ka lama a kut no nalh tak chu rawn phar a rual a, ka lo chibai ve mai a, rei lo mah se a kut nèmzia erawh ka hre hman vek tho.

"Nang pa hi eng nge i hriat a?" Vala chuan a lo ti deuh hmuk a, hmui tisawiin ka dar ka chhin khum àk ringawt. 

"I sawi ṭha duh lo ve khanglang emaw ni" a ti ti leh hluk a, kan hnunga mite pahnih chu a ngaihtuah tawh lo a nih hmel. 

"I thingpui kha in mai mai teh" tiin ka tho zui daih a, mei zuk ka tum vang a ni pakhat. 

"Min lo nghak teh" tih leh lo thawh ve nghal a rual a, hmun thim laia zozial kan pak khuk laih laih hnu chuan

"Belinda-i saw lawm ka sawi khâ, kan pastor fanu ka tih kha a nia, mahse in lo inhre daih a, engtin chiah nge tlaiah chuan in lo awm vel a?" a ti nghal mawlh mawlh a, chhang mai lova ka ngawih reng avang chuan

"Sawi mai mai teh Zira?" a ti leh hluk a, eng a hria ni maw!

"Ama'n a sawi vek tawh kha maw le, rul a hlau a, ka thahsak a, chu chu a ni mai" ka ti ve ta nge nge a, sawi zui reng chu ka phur lem lo, ka rilru ah tak phei chuan thil dang daih a awm tawh!

"Ka va awih lo e aw" a la ti hram a, ka melh deuh hrawk nghal bawk.

"A nih leh Belinda-i saw a chhe lo i ti ve em?" a tih chuan

"Nunmawii saw chhe lo i ti em?" ka lo ti ve khauh a, za lo zet hian ka nui ri hak a, amah hian duh se chu Nunmawi hi chuan a duh sa reng maw le.

"Ngawi reng anga lang si hian mi hnialna tur i hre thei zêk leh nghal a, i pa bak i ngaihtuah leh tawh pawh ka ring lo e a!" lungawi lo zeta a tih chuan

"I ring dik a nih chu!" ka lo ti deuh hmak a, a sawi dik reng bawk. 

Khawiah pawh awm ila, eng pawh ti ila, vawi khat pawh a hmel ka la hmuh loh leh tu nge a nih tih takngial pawh ka la hriat loh ka pa hi ka ngaihtuahnaah a awm reng ṭhin a, pafa chetla dun vel ka hmuh phei hi chuan ka pa ka ngaihtuah chhuak lo thei lo ṭhin. Ka nunah hi chuan ka pa dik tak zawn chhuah baka thil tum lian ka nei lo va, engtik ní ah emaw chuan ka la zawng chhuak ngei ang ka ring. Tu nge a nih ka la hre ve ngei ang a, tu nge ka nih a la hre ve ngei bawk ang a, a lo thi tawh a nih paw'n ka zawn chhuah tawh hrim hrim avangin hlim ka tum tho ang.

"Belinda-i nen sawn in inhre tawh hrim hrim em Zira?" Vala chu ka en zawk a, a sawi awmzia ka hre map lo. 

"Hre sa nàng, engati nge?" ka tih chuan

"A rawn hawi chhen saw, i hmu ve miah lo em ni?" a ti deuh pung pung a, kan khaw pastor fanu Belinda-i te ṭhutna lam chu ka hawi va hawi phei a, a lo hawi ve chiah bawk a, kan mit chu a intawng chiang khawp mai.

"Kha maw, ka sawi reng khà, a lo hawi leh zawk ṭhin alawm, hre tawh che a ang ka ti, nichinah pawh khan a nêl nghal viau chein ka hria" ka hawi sawn ve ve hnu chuan Valan a rawn ti nghal chat a, ngaihzawng nei tura min duh lutuk hi a châng chuan a buaithlak, hriat a hneawm!

Zan a rei tulh tulh a, tlêma kum upa lam deuh chu an ṭin sap sap a, nu leh tlangval kan lut khawm thung a, keini ho pawh a chhungah kan ṭhu ve ta. Ṭhutthleng pakhatah Belinda-i te nen chuan kan ṭhu ho va, a sir berah ka ṭhu a, ani pawh a sir berah a ṭhu a, inhnaih lem lo takin a laiah Vala leh Nunmawii te pahnih an ṭhu bawk. Dâr 1 velah ṭhalaiho chuan sawhchiar an rawn sem a, in chhungah pawh ei lovin pâwnah ka chhuak daih a, mi dang erawh an ṭhut ngaiin an ṭhu reng thung.

Pâwna ka awm vang vang hnu chuan Belinda-i rawn chhuak chu ka lo hmu chat a, thil zawn nei ni awm tak hian a hawi kual a, Vala leh Nunmawii te an lo chhuah ve mai ka rin tehreng nen an lo chhuak lawk lo leh nghal. Ka iptê aṭangin zozial chu ka phawrh a, ka ṭan zui nghal a, Belinda-i che vel mawlh chuan ka mit a là ru ta a ni. Mei zu chungin ka en reng a, a hmel, a pian leh a vunah chuan pastor fanu a ni tih a hriat mai bakah khawpui boruak dawng ṭhang tih a hriat khawp mai.

"U Zir" ka hmel a hmuh rual chuan a ti hluai a, ka lamah a rawn pen phei pawk pawk zui nghal bawk. 

"Eng lo, ka zun a chhuak lutuk a, zunna tur ka hre mai bawk si lo" min chhoh melh ral chung hian a ti reuh a, ka nuih a tiza ang reng. 

"I hriat chuan min hrilh vat teh, ka zun a chhuak tawh a nia" a ṭawng tan tan hmel leh a lungawi lo hmel chu lawmawm zual tak a ni!

"Min lo zui rawh" ti supin ka kal sawn a, min lo zui ve nghal mai bawk. 

Ka hmelhriatte inah ka luhpui a, kan inbiak laiin Belinda-i chu a lo va zung a, a chhuak tawh hle a nih ka ring. Bathroom aṭanga a lo chhuah hnu chuan an lo be sap sap a, kei tih loh mi dang chuan an hre hlawm hle a, biak pawh an be nêl thiam khawp mai. Mak ka tih deuh pakhat chu khaw khatah kan awm reng si a, hmana kan pastor fanu kha a ni paw'n ka hre tawh lo, a ṭhang danglam ta lutuk zâwk nge ni! Chu bakah hmeichhia hi chu ka en liam vel mai mai ṭhin kha a ni a, mahse tun ṭum erawh hman ang kha ka ni hauh lo.

"Ka lawm e aw, kan ina haw dâwnin a hla deuh bawk si a, ka tibuai viau lo che ti raw?" khawhar in lam pana kan kal lai chuan a rawn ti a, a hmel chhe lem lo tak en chung chuan

"Buai lo ve, a harsa hleimem, mahse engati nge Nunmawiin a kalpui loh che?" ka tih zawm ta daih a, nui sen sen pah hian

"I ṭhianpa bulah khan awm nuam a ti lutuk a, chu bakah zunna tur ka hmuh mai ka ring a, ka rin ang erawh a ni lo khawp mai" a ti siam siam reuh a, a ṭawng laia a hmui che vel te chu hmuh a nuam vel vekin ka hria.

"E, chuan u Zir, ka hrilh theihnghilh ṭep che a, eng lo, tlaiah khan mitthi thing leh buhfai kan rawn khawn a, in awm si lo va, pâwna in thing dah kha kan la tawp aw" nui chunga a tih zawm leh nghal mawlh mawlh lai chuan ka lo nuih suk a, a hmuh erawh ka hlau ru viau thung. 

"Thil pawi a ni hleinem, kawm thlanga ka kal lai a nih dâwn chu!" ka lo ti liam puat a, engmah kan sawi zui tawh lem lo bawk.

Chumi zan, kan tlaivar zan aṭang chuan ka rilru a dik thei ta reng reng lo mai a, a dik lo tih lemah rilru sual ka pu tihna lam ni lovin, Belinda-i laka ka rilru put dan zâwk chu a ni. A hmel hmuh a nuam ka ti a, phat rual lovin ka hmeichhe hmelṭha tih chî tak a ni bawk, mahse chu erawh keimah bak hria an awm lo, Vala takngial pawh, a hriat chuan min fiam leh nasa dâwn êm mai. Ka ngaihzawng neih hmasak ber nena kan inngaihzawn lai pawh khan khawlaiah min chhaih vak vak a, tun hnu thleng pawh hian a la sawi chhuak zauh zauh ṭhin.

A ni telin Belinda-i hmel chu ka hmu ṭha zual zel a, eng nge a chhan pawh ka hre bik lo, hnaih erawh ka hnaih ngam lo hulhual! Hnawl nih ka zak a, mualpho ka hlau bawk. Chu bakah anni te zawng keini tân chuan a sâng mah mah, kei phei chu nu leh pa nei lo tluk ka ni leh nghal a, hnaih loh law law a fuh zâwkin ka hria. Rama ka kal tur kan inhmuh châng leh khawlaia kan inhmuh chângte hian min be hmasa zâwk ziah a, ngaihtuah zui veng veng ngei ngei tur ang hrim hian a nui hmel mawi tak min hnutchhiah ziah bawk. Zan khat phei chu ka mumangah ka hmu leh nghal a, inthiam lo tak ka ni! 

Vala leh Nunmawii kâ aṭanga ka hriat danin exam zo rawn haw a ni a, B.A Final Year result nghak mêk a ni nghe nghe a, mipa mah ni ila zirna lamah chuan ka tluk lo vet vet khawp mai. Pastor fanu tih takah a che reng reng chu a dik thlap a, a hawihhawm mai bakah a nungchang chu a zahawm ru em em bawk. Khatia rei lo tê chhung ngaihzawng ka neih hnu kha chuan hmeichhe lam hi ka ngaihsak ta vak lo va, mahse Belinda-i hi zawng a danglam chiang a ni. Ka mitah chuan a ni tluka hmeichhe hmelṭha leh nun mawi hi an la awm lo, hnaih phah erawh ka tum hauh lo thung.

Ni khat chu KṬP hnatlâng a awm a, biak in thlang lawka pu Manzuala te huan sam hnatlâng kan nei a, hnatlâng a ni na chu, KṬP kan inhlawh a ni mah zâwk! Kal kan ṭhahnem phian a, chung zingah chuan Belinda-i pawh a tel ve a, a taima reuh lutuk chu ka mit a là leh tlat tawh! Eng a hria nge ni, ka bulah a awm chawt a, kei lahin han biak ngaihna ka hre der bawk si lo. Kan KṬP hruaitute chuan an be deuh reng a, a zirlai piah lam thlengin an zâwt a, Belinda-i chuan ning hmel pu hauh lo hian a chhang ve zel bawk.

"Awi! Ka ke! Ka kea awm khu eng nge u Zir!?" hlau lutuka Belinda-i rawn ṭawng thut chuan min tiphu dâwn alawm le.

"Vangvat a ni em!?" ti leh tuarhin a ke chu a khai kang a, a kut a hum ruh vak bawk a, a awm danah chuan a hlau tih hai rual a ni lo.

"A nih khu" tih leh a kea vangvat sei ṭial tê lem lo zet chu pawh thlak ka rual a, a ke no tak aṭang chuan thisen a rawn put chhuak zawih zawih a, a lo awmna a rei tawh a ni mahna, vangvat chu a puar lian ṭha khawp mai.

"Hlau tawh suh, a awm tawh hleinem" ka tih paw'n khur dat dat hian a la ṭhu ngawi reng a, a hawi kual leh zuk ṭhin a, mi dang hovin an deuh hrek hrek bawk nen a zak a nih ka ring.

"Ka haw mai dâwn asin u Zir, ka awm a nuam thei lo, a pawi em?" a rawn tih chuan

"Pawi lo e, han haw rawh, i kai leh palh ang, i hlau ropui si" ka lo ti ve mai a, kun ngul hian a kal ta nal nal a, a huat tura sawi ka ni miah lo na chungin a kal dâwn chuan a lungawi loh hmel khawp mai. 

Kan hnatlâng zo ka haw chu ka ngaihtuahna ah Belinda-i bawk a awm leh ta reng a, a hlau hmel te kha ka mitah chuan a ṭha vel vek a ni ber. Ka dik lo tih ka hria, a laka chutiang rilru pu thei ka ni lo tih nen lam, mahse ka hmeichhe ngainat chí leh ka hriat chian duh chî tak a ni tlat bawk si. Ka inbual fai lai leh a hnu lam thlengin ka ngaihtuah zui reng a, a ṭha lova ka hriat avangin tihtur ṭul ang âng ka ti daih a, tlêm chuan a zia deuh, ka ngaihtuah ngut ngut tawh bik lo.

Zanah erawh a ngai tê bawkin a hmel ka mitthla leh a, zep thu cheng lo, ka mitah chuan a ṭha chiang a ni. Valan lêng tura min lo sáwm chuan ka lo 'aw' ve mai a, Belinda-i ngaihtuah reng lova awm ka duh vang a ni pakhat. Vala chuan vêng chhak lamah min lènpui a, kan lènna ah chuan mikhual nula a lo awm a, chu chu min lènpui chhan a ni tih ka hre hnuhnawh ve chauh bawk. Mikhual nula Apuii chu a fel ang reng hle a, mi biangbiak a thiamin a hawihhawm khawp mai. Kan vawi khat inhmuhna chauh mah ni se kan lakah a nèlawm nghal viau a, inlêng a dawngsawng ṭhang a nih ka ring.

"Thingpui ka va siam ang e" tiin Apuii chu a tho nalh a, min kal pelh dâwn lai tak chuan ka melh zeuh a, nui sen sen hian min lo en ve chiah bawk a, ka nuih lêt ve hman lo, min kal pel hman daih!

"Eng nge a an?" Vala chuan ka beng bulah a rawn ti sar sar a, a zawhna chu ka hrethiam lawk lo leh nghal. 

"A fel hmel" tih chauhin ka chhang a, a nui nghal vur vur a, thil hlimawm ka sawi áwm ka hre tawp si lo. 

"Thingpui hi a sen hângin ka siam mai asin, mahse kurtai ka lo chhawp tel tho ang" Apuii chuan a rawn ti lang lang a, Vala zâwkin a lo chhawn thuai bawk.

Kan thingpui in tur dawhkana a rawn hùn lai chuan Apuii kut chu ka lo en deuh reng a, Belinda-i kut nen ka khaikhin rilru nauh nauh a, Belinda-i kut ang em chuan no nalh lo mah se hmeichhe vun nalh tak chu a ni tho mai. Sawi tur hre lutuk lo tih takah ka ngawi deuh reng a, Vala zâwk chu a ṭawng bawrh bawrh a, Apuii paw'n min rawn be leh zauh ṭhin a, a che vel leh a ṭawngkam hrim hrim chu inlêng nei ṭhang tih a hriat ngawih ngawih; a la upat lutuk hmel loh tehreng nen!

Chutia kan lén lai chuan khawpui a rawn ri dur dur a, kawl a phe zawk zawk zui nghal bawk. Ruah sur hmaa haw ka rawt a, kan haw zui nghal chu a ni mai. Kan haw dâwnah pawh Apuii chuan paw'n thleng min rawn thlah thlap a, a fel ang reng ka ti khawp mai, mahse ka mitah erawh Belinda-i tluk an awm chuang lo. In kan thlen hmain ruah chu a rawn sur ṭan nghal der a, a tlanin kan tlan haw ta hial a, huh erawh kan huh hnem hman vak hran lo. In chhung ka luh hnu lawkah ruah chu a rawn baw hawk hawk a, sur hnem miah miah tak a ni. 

Mut hmunah chuan 'engtin nge ka pa hi ka zawn hmuh ang le' tih ringawt ka ngaihtuah a, tun ṭum chu Belinda-i lam reng ka rilruah a lang thei rih lo. Ka pa zawn chhuah hi ka dam chhan ni berah ka ngai a, ka zawn chhuah hmain ka thi daih ang tih ka hlau em em bawk. Putea leh pitei pawh hian ka rilru an hre chiang a, min puih an hreh lo hrim hrim, mahse a tua te ma'n engtia hmalak tur nge a nih tih lam kan hre bawk si lo a ni. Ka tih theih awmchhun leh ka tih hnem ber chu ṭawngṭai a ni mai a, Pathian hnenah a hun taka ka pa ka zawn hmuh theih nân ka dil tawp ṭhin.

"U Zir" min rawn kotu lam chu ka hawi phei nghal vut a, Apuii lek chu lo niin!

"Khawiah nge i kal dâwn a?" a tih chuan

"Huanah ka han kal lawk ang e" ka lo ti ve mai a, min nuih sen sen a, nuih lêt nachang pawh ka hre lo. 

"I haw hunah lo pêng kawi la, thingpui ka lo lùm dâwn che a nia" a ti siam siam a, a ṭawng zawi lutuk bawk si lo va, nuam lo ka ti ang reng. 

"Nia, ka hre lo" tih chiahin ka chhang a, meizial lei tura dawra ka lut chu Belinda-i ka hmu hlawl a, min lo en reng a, ka phu deuh zuk nghe nghe. 

"Kan vêng lam aṭanga i kal dâwn tho chuan chho rual ila" Apuiin min rawn be leh lo se chu ka hawi sawn thei lawk lo mai thei a ni. 

"Kan chho rual dâwn a nia, eng nge i rawn tih hrim hrim?" a lam hawi paha ka tih chuan

"Kan véng dawrah thleng silna an lo nei tawh lo va, lei turin ka lo chhuk thla vang vang a nih hi! Ka rei lo ang, min lo nghak lawk rawh" tiin a che nghal zung zung a, ka mit chu Belinda-i lamah a fu zawm nghal zat bawk.

Min lo en rengna ata a mit chu la sawnin min kal pel zawng hian dawr aṭang chuan a lo chhuak a, chiang taka a hmel en reng chungin

"I ṭha maw?" ka lo ti sup a, min chhang lo reng reng, a kal tlang daih, eng nge a chhan ka hre miah lo; ni danga a hawihhawm theih tehreng nen!

Rama hna ka thawh lai thlengin ka laka Belinda-i awm dan chu ka ngaihtuah zui char char, a awm dan kha ka hrethiam pha lo, dik tak chuan nui sen sena min chhan ka ring kha a ni a, mahse chutiang engmah a thleng si lo. Haw lamah chuan Apuii te inah ka pêng kawi zawk a, ani pawh hian min nêl viau chuan ka hria. Thingpui ka in kawi zawh hnu chuan ka haw ve leh nghal mai a, kan in ka thlen thlak hmain ruah a rawn sur ringawt a, khua a dur em em pawh a ni lo, a sur dan teh thut chu mak ka ti khawp mai. 

"Belinda?" a hmel ka hmuh rual chuan ka ti nghal a, mipa zun ina a lo din teh hlawl danah ruahin a dang ve tho a nih hmel. 

"Eng nge i tih?" a bul ka thlen phei hnu chuan ka ti leh a, min chhang lo hrim hrim a, a awm dan chu ka hriat ṭhin Belinda-i kha a ang tawh lo zâwk alawm le.

"Ti rawh, kan inah chhuk ang, nihliapin i haw chho mai dâwn a nia" rei fê kan ngawih dun vang vang hnu chuan ka ti leh a, min melh chho deuh ral a, kei pawh hmun dang ka hawi sawn bik chuang der lo.

"Ka haw thei alawm, ruah hi a tla tlêm deuhin ka hria, ka'n tlan haw mai ang e" tih leh chet a rual a, a tlan tur chu ka pawt ding chiang khawp mai.

"A ná! Min thlah rawh, ruah han lai hian ka haw thuai duh a nia" a ti deuh pang pang a, a hmel chu a nur deuh nâng a, ka vuan nâ tak tak a ni mai thei. 

"Ruah sur hi a hàn reng reng lo, a sur dan a ngai reng, ruah do suh, i dam lo mai ang" ka tih chuan

"Min thlah rawh" ti deuh fak hian ka kut a rawn sik a, ka thlah ve mai bawk. 

"Kal lui suh Belinda" ngawi renga tlan a tum lai chuan ka pawt ding leh a, chutiang chuan ka awm ang tih rin ngaihna pawh ka hre lo, chutah kan khaw pastor fanu lakah leh nghal.

"Eng nge i hriat a u Zir?" ti deuh hapin min chhoh en ran a, a bân ka vawnna chu thlah pawh ka tum chuang lo. 

"Engati nge min ngaihtuah?" a ti nawn leh chuan a laka ka awm dan mawi lo zet chu ka hre chhuak a, a zawhna pawh chhang lovin ka ngawi daih ringawt. 

Chutia ngawi renga kan din dun lai chuan khawpui a rawn ri dur dur a, kâwl a phe nghal zawk zawk bawk a, ram aṭanga ka haw tirh nen kha chuan khaw awm dan chu inang tawh lo tak a ni. Kâwl a phet apiangin Belinda-i chu a tawm deuh chawih ṭhin a, a hlau tih ka hrethiam nghal mai bawk. Tlan haw duh ta pawh ni se chelh ka tum tawh lem lo va, mahse a tlan haw leh chuang bik miah lo, chu chuan ka ngaih a tiṭha ru em em thung. Ruah chu a rawn sur tam sauh a, ka chet a hun tain ka hria.

"Hetah hian lo awm la, lo kal sawn miah suh ang che. Nihliap ka zu la lawk ang a, ka lo kal leh ang" ka tih chuan a lo bu nghat a, inherin ka tlan zui nghal bawk. 

Huh hnuanga kan in chhung ka luh rualin nihliap ka zawng nghal thuai thuai a, Belinda-i chu ngaihtuah tak tê hian ka ngaihtuah a, a dam loh te ka hlau ru ta hial a, chutiang thleng thleng ngaihtuah a ṭul lo tih ka hria, mahse ka inkhap dài hman tawh lo a ni ber. Nihliap pakhat khumin pakhat ka keng bawk a, zun in ka thlen chuan ka sawi angin a lo la ding reng a, nihliap pakhat chu ka pe zui nghal a, a hnungah kalin ka en reng a, ka awm dan aṭang chuan a laka ka rilru puthmang dik tak a hriatthiam loh hram ka beisei.

"Ka lawm e aw" an in veranda-a kan din hnu chuan a rawn ti a, tun ṭum chu a nui hmel ṭha zet min hmuh leh ta, ka thlir ning thei mawlh lo. 

"A ho lutuk" tih chiahin ka chhang a, kal leh nghal mai ka tum lai chuan

"Lo lut kawi la, thingpui ka lo lûm ang che" a lo ti leh a, a mood a ṭha tawh a nih hmel. 

"Ka lo lut lo mai ang, hawa inbual fai te ka duh riau mai" tiin ka hnar ta hram a, zak lo deuh ni ila chuan ka lut chiang khawp ang maw le. 

"Ni dâwn tak, nia, i dam lo palh ang, zu haw zâwk rawh" min ngaihtuah ni àwm fahrana a tih chuan buk khum zauhin ka inher a, ka kal zui nghal bawk.

Chumi nî aṭang chuan kan inhmu zing telh telh a, a rukin ka ngaizawng nasa tulh tulh a, ka mitthla leh ka rilrua awm loh lai pawh a nei mang tawh lo a ni ber. Ka phu lo tih ka hria, ka ngaizawng ru reng tih hre phei se chu min be duh tawh lo hial mai thei a ni. Ka hmeichhe hmuh tawhah chuan a la hmelṭha ber a, a nun a zahawm mai bakah a bula awm a nuam em em a, ka mitah chuan angel hi a ni ringawt, mahse pastor fanu a nihna leh kan dinhmun inthlauhna chuan a lakah min intithlahrung tlat bawk si a ni.

Hun chu a liam ve bek bek a, Belinda-i te BA result pawh a chhuak fel ta! A pass ṭha hle a, mi hrang hrangin an lawmpui sap sap a, kei paw'n lawmpui ve chu ka duh ngei a, mahse mi hmuha han lawmpui vel chu ka zak tlat, ka inkiltawih a ni deuh ber ang chu! Lawmpuina thil pek chi hrang hrang a dawng nual bawk a, a hlim hmel chu ral aṭanga thlir rengin ka lo nui ve leh suk ṭhin a, rama ka kal dâwn apiang hian an in lam ka hawi ngei ngei ṭhin bawk. 'Lawmpuina thu sawin nân hun remchang a la awm ve mai ang' tih rilru pu chungin ni tin hun ka hmang ral a, remchang awm tak ang maw!

Ni khat ka feh tur pastor quarter lam ka hawi chu veranda-ah Belinda-i a rawn chhuak a, kal sawn ta mai lo chuan ka thlir reng a, an in kawtah chuan a pa motor inhûng pawh ka hmu miah lo. Ka inngaihtuah vang vang a, lawmpuina thu hrilh hun ṭha berah ka ngai hmiah mai. Pastor quarter lam pan chuan ka kal thauh thauh a, a awm danah Belinda-i chuan min rawn la hmu miah lo a nih hmel. Veranda chu hmunphiah hian a phiat fai a, Pathian hla a sa rat rat bawk a, a zaithiam phian leh nghal. 

"Belinda" ring vak lova ka tih chuan a rawn lehhawi riai riai a, chiang taka a hmel ka hmuh tâkah chuan ka danglam leh ta vek!

"U Zir" tih leh nuih a rual a, a hmelṭha chiang a ni. 

"I ṭha maw?" sawi tur ka haihchham vek a, ka lungphu te lah chu eng vang nge pawh ka hre lo, a rang dawt dawt em em leh nghal.

"Ṭha e, i feh dâwn elo?" a ti siam siam a, a hmun phiah lai chu a chawl daih bawk. 

"Ka han kal zuaih ang e, i lo kal ve duh em?" ka thusawi hnuhnung zâwk avang chuan ka inthiam lo ru hnuhnawh leh nghal a, sâwm tur ka ni miah lo asin le.

"Eng lo, ka va'n hre mai lo, mahse ka chhungte an zin vek a, mahni tlawnga awm ai chuan ka lo kal châk deuh tho" a ti niah niah reuh a, ka ngaih a ṭha ta huai mai.

"A nih chuan insiam la, ka lo nghak ang che, kan haw har dâwn lo a nia" nuih suka ka tih chuan insiam turin in chhungah a lut nghal a, ka thil sawi tum ber ka sawi lo tih ka inhre chhuak hnuhnawh zawm zat bawk.

Ram lam pana kan kal lai chuan 'engtin nge ka lawmpui ang? Eng nge ka pek ang?' tih chu ka ngaihtuah char char a, a mipa zâwk si ka zàm ru deuh tlat a nih chu! Ani erawh ka rilrua awm hrethiam lo zet hian a ṭawng siam siam a, a awkî rin zâwng te chu ka bengah chuan hriat a nuam em em vek a, nilêng paw'n ngaithla dâwn ila ka hne ka ring lo. Short cut kawnga ka kalpui avangin kan thleng har lo hle a, thlâmah ka awmtir tawp a, ka bula rawn kal ve ṭalh a tum chu ka phal lo nasa mai. 

"Ka lo pui ang che u Zir?" ngenngawl deuha a rawn tih pawh chuan ka phal lo zel a, a chhungte hriat lovin ka hruai a, hna a thawh hah leh zel phei chuan amah mai ni lo a chhungte lakah pawh ka inthlahrung lutuk palh ang.

"Ka lo phei ṭep" maian sih zawk zawk paha ka tih chuan a ngawi ve ta hle hle a, a bula awm nuam em em mah se ka lo hruai ta kher kher chu ka inthlahrung thar khawp mai.

"Hei hi lo vel la" thlâm chhunga ka luh rual chuan fanghma no tui hmel zet chu ka pe a, a lo ban ve nghal mai bawk.

"A na!" a ṭe deuh ṭhat ri ka hriat chuan a lam ka hawi nghal thuai a, a inzai palh a ni ngei ang. 

"Ka lo ti ang" tiin chempui ken lai leh fanghma chu ka laksak vat a, inthiam loh hmel deuh hian

"Chempui tak hian ka la vel ngai lo va, chemtê chu ni se ka vel thiam reng" a rawn ti a, a thusawi chu ka ngaihsak lem lo, a kut tih chauh lo chu! 

"Tuam hrim hrim ang aw" ti supin a kut chu tuiin ka tleuh fai hmasa tê tê phawt a, thi chhuak tur dan nân hrim hrim ka kawr chu zai thlerin ka tuam zui nghal bawk. 

"Belinda!" ka awah chuan mak tihna hlir a khat a, a kut ka tuam fel zawh ruala min rawn kuah thut chu ka hrethiam lo tak zet!

"Min hrethiam hram teh u Zir, Pathian hnenah pawh ka zawt nasa tawh lutuk, mahse ka ngaihtuahna aṭang hian i bo thei chuang si lo" a thu rawn sawi teh daih chuan min tihamhaih zual kher mai.

"Belinda" ti hniam supa nam hlat ka tum chu min kuah nghet sauh a, ka thin a phu rang nghal dawt dawt hle bawk. 

"Ka tihpalh u Zir, i laka ka awm dan hi a mawi lo tih ka hria alawm, mahse nang tluka mipa vei hi ka la nei lo" ti sep sepin a bek chu ka âwmah a nghat a, ka nam sawn lo thei tawh lo. 

"Min huat phah em? Min huat phah suh aw?" min chhoh melh ral paha a tih lai chuan inthununna tlachham zet hian ka fawp vawng vawng a, mahse ka harhfim rualin ka inlahrang leh vat thung.

"Ni lo, hetiang hian awm lo teh ang Belinda" tiin ka awm dan chu ka siam ṭha zung zung a, rilru a mumal hlei thei lo a ni ber e.

"Engah mah min ngai lo tih ka hria alawm, a pawi lo" a ti lai hmel chuan ka lái a chhun zawk a, a rilru nâ hmel chu ka hmu thei thlawt lo. 

"Chutiang lam a ni lo Belinda, ka tân chuan i sâng lutuk mah mah a ni! Nichina thil thleng kha chu thleng lo anga ngaih i tum hram dâwn a nia, min hrethiam rawh" vin khauh lam lek leka ka tih chuan

"Ka theih ka ring lo, ka hriat reng ka ring zâwk!" a lo ti hmak a, a awki ah chuan a lungawi lo tih a hriat hle bawk.

"Enteh Belinda, mipa ka ni a, ka zep lo ang. Ka mitah chuan nang tluka duhawm an awm lo, mahse kei leh nang hi chu kan hrang hlak, kan dinhmun a inthlau lutuk!" a hma ai maha khauhin ka ti deuh hmuk hmuk a, a mittui parawl ṭiau ka hmuh rual chuan ka inthiam lo nghal thung. 

"Ka hrethiam e" ti sepin a ṭhutna aṭang chuan a tho va, a chet dan chu ka hrethiam leh ta hauh lo.

"Khawiah nge kal i tum?" aw dam deuh zâwka ka tih chuan

"Ka haw mai ang chu ka lo ti asin, min ngaihtuah suh" tih leh thlâm aṭanga chhuah chu a tum zui nghal a, ding thuaiin a hnung lam aṭang chuan ka kuah ve ta nge nge. 

"I laka ka rilru puthmang zawng zawng hi min inpuantir kher tum suh Belinda, ka mualphona mai mai tur a niin ka hria" ka tih lai te chuan a ngawi reng a, tal chhuah pawh a tum chuang lo.

"Aw le, a ṭha e, ka lakah hian eng thil chiah nge i duh?" ngawi renga kan awm vang vang hnu chuan ka ti leh ta nge nge. 

"Veng chhak mikhualnu bula i awm dan ang khan ka lakah awm ve rawh" a lo ti daih a, hrethiam lo zet hian

"Engtin nge ka awm a?" ka lo ti tawi sup a, a thil sawi chu ka hrethiam lo tak tak!

"Ani kha chu i ngaina alawm, kei chu min ngaina ve hleinem, ka pass pawh min la lawmpui lo hrim hrim" min en chho ran chung hian a ti khauh fak a, a sawi tum ka hrethiam ve ta chiah e!

"Nang tluka hmeichhe ngainat leh hnaih châk hi ka nei lo asin, kan dinhmun a inthlau êm a.." tia ka ṭawng laklawh lai chuan ka hmui a rawn hup a, a lu a thing zui nghal bawk.

"Ka chhungte bulah pawh ka sawi vek tawh, ka pa phei chuan a hmu châk che a, mahse tu nge i nih ka la sawi duh bik chuang lo. Dinhmun lam chu ngaihtuah suh u Zir, engmah a ni lo, hmangaihna hi alawm pawimawh ber" mit hnawng chapa nui chung hian a rawn ti fel thàn a, a nui hmel min hmuh leh daih chu mak ka ti leh ta. 

"A nih chuan min hmangaih tihna em ni?" ka ti thawr a, a hmel chu ka en chiang hle bawk. 

"Tunah hi chuan ka hre rih lo, mahse ka hmangaih theih che ka ring" nui sen sena a tih chuan ka insum thei tawh ngâng lo.

A biang tawn tawna chelhin ka fawp tawn tawn a, ani paw'n min tiphur tâwk chiah hian min lo chhang lêt ve tan tan reuh a, a mipa fawh hmasak ber ka ni tih hrilh ka ngai hran lo, ka hre tlang nghal vek! Thil dang pawh ti tawh lovin thlâm chhungah chuan kan ṭhu dun ta hle hle a, mikhual Apuii a thik thu mawlh chu a sawi nasa zual a, a ṭawng tan tan hmel te chu e, ṭha ngawih ngawih tak a ni! Ni e, eng pawh ni se dinhmun ai chuan hmangaihna alawm pawimawh, tunah rih chuan ngainatna chauh la ni mah se kei pawh hian ka la hmangaih thuai ka ring a ni.

Chumi ni aṭang chuan a ruk titih deuh, thup em em chuang lovin kan inngaizawng chho ṭan ta a, a chhungte bulah min lo sawi ṭhin tak tak chu niin, a pa lakah phei chuan ka inthlahrung khawp mai. Kei erawh ka chhungte ka la hrilh miah lo thung a, an hriat hriatin hria se ka ti ta mai. Belinda-i nena kâr khat kan inngaihzawn hnuah Vala pawh ka hrilh ve chauh a, a enga mah hmain a phur nghal em em ringawt a, khawlaia min chhaih lo tur leh mi dang bula sawi vak lo turin ka vau lâwk nasa hle bawk.

A ni telin Belinda-i zun chuan min phuar a, an ina han lèn zauh pawh ka nei chho ṭan a, mahse ka lêng tam ngam lutuk rih lo, kan inzuina a la rei lo bawk si. Tlai khawhnuah a pass ka lawmpuina thu ka hrilh a, ramah hruaiin thlai rah leh thlai hnah ka hawntir ṭeuh a, a lawm thiam khawp mai. Mi nêl deuh si hian a nungchang chu a zahawm ru em em reuh a, ka bialnu a nih tawh avanga han pâwng zuam vak dan pawh a awm mang lo, a duhawmna, a hmelṭhatna leh a rilru thianghlimna te chuan min zèm â a ni tawh ber.

Thla hnih a liam hnu chuan zawl khawpui lamah zirna chhunzawm turin Belinda-i chu a liam a ngai ta tlat mai. A bulah sawi chhuak dawt lo mah ila ka huphurh ru em em a, a tel lova nî vui liam chu a hreh hian ka hreh ngawih ngawih a ni. Kan khua a chhuahsan dâwn zan chuan hun rei tak kan hmang dun a, ka lakah rinawmna thu tiam hran lo mah se a nun chuan a rinawm reng dâwn tih min hriat chiantir em em thung. Fiamthu ti tak deuh hian hmeichhe dang melh miah lo tur te'n min hrilh ve tan tan reuh a, a duhawmin a lawmawm tak zet a ni.

Tin, ka pa zawn chhuah ka tum thu a hre ve vek tawh a, ka chhungte leh ṭhianpa Vala tih lovah chuan a hria awmchhun a ni nghe nghe. Mi tam zâwk hi chuan nu leh pa kâra sei lian ka ni lo tih hre fur hlawm mah se ka pa zawn chhuah ka tum tih erawh an hre mang lo va, a hria awmchhun chu tlêm tê chauh an ni. Ka pa zawn chhuah ka tum tih a hriat nî aṭang khan a ṭawngṭaina ah ka zawn hmuh ngei theih nân min lo dilsak ziah ṭhin a, sâwt em em rih lo mah se ka thla a timuang thei ṭhin khawp mai.

"Pastor fanu Belinda-i nen khian in lo inngaizawng reng elo?" pitei chu ka nuih suk a, ka chhang lem chuang hlei lo a!

"Kei pawh hman ni khan ka hre hlawl a, ka hriat tirh chuan mak ka ti ang reng" tiin putea chuan a lo tuihnih nghal a, ka hrilh kher ngai lova an hria chu a ṭha phian zâwkin ka hria.

"Tak a! Vawiin chu school-ah vanglaini ka chhiar a, Aizawl lama Department pakhatah hna ruak 10 lâi a awm a, dil ve la a ṭha ang Zira. Hetia ram hna thawh reng ringawt zawng i tân pawh a hneawm ang. Chu bakah i pa zawn chhuah i duh leh nghal a, heti ringawt hi chuan engtikah mah i zawn hmuh theih ka ring lo" putea chuan a ti leh dap dap a, a sawi chu dik ka ti viau mai. 

"Pâwl 10 bak ka zir thleng si lo va, keini dil phak a ni dâwn em ni?" hriat belh duh nei zeta ka tih chuan

"Ni tehreng ê le, pâwl 10 pass leh pâwl 12 pass te hi alawm an duh hlei hlei nì!" a lo ti ham ham a, a hmelah chuan dil ngei ila min duhzia a lang chiang hle bawk.

"A nih he lam" ka tih laklawh lai chuan

"Ngaihtuah suh, nang angin mir lo mah ila kan lo enkawl thei em em ang. Nakinah nupuite i la nei ve duh ngei ang a, chumi huna chhungkaw chawmna tur hna nghet i neih theih nân bul i ṭan a hun tawh Zira. Ka tlaw a, lo ngaihtuah hma deuh ila chuan hmâna hmanah khan ka tihtir tawh ang che maw le" tiin min lo pawtchat nghal thuai a, pitei pawh chuan

"Ni e Zira, Aizawla i awm chuan i pa pawh i zawng hmu awlsam thei zâwk mai thei asin, keini lah kan ṭangkai lo nupa ropui bawk si" a lo ti ve siam siam a, ka tâna an ṭha dun lutuk hi chu engtikah mah ka theihnghilh thei tawh lo ang ka ring.

"Ni lo, in ṭangkai alawm le. Inthiam lo miah suh u, ka duh lo a nia, tih tak êmah chuan in zârah alawm hei leh chen ka dam nì" ka tih laia putea hmel chu ka en reng a, a rilru a kal thui hmel khawp mai.

A tuk aṭangin putea chuan hmâ min lâkpui nghal char char a, ka awmna tur atân Aizawla a ṭhiante min biaksak bawk a, annin ka hmakhua ngaiin min phurpui viau mah se ka phur lem lo hle thung. A nihna takah chuan kum kha leh chen kha kan lo awmho ve tawh a, hnathawh tur neih duh avang leh ka pa zawn chhuah phet ka duh avanga ka bawrhsawm lai leh hlim lai pawha ka tâna awm reng ṭhinte han kalsan ngawt chu ka phur viau lo a ni. Putea sawi erawh a dikna chen a tam a, ka tân mai bakah Belinda-i tân pawh a ṭha dâwnin ka hria.

Ni e, Belinda-i hi kei chuan ka nupui atân ka duh a, neih ka tum ruh em em a, amah tak phei chuan engmah a la hre lo. A sawi kha a dik chiah, chhungkaw dinhmun lam ni lovin hmangaihna hi a lo pawimawh ber a ni. Ka hmangaih a, ka thinlung leh tih tak zetin ka hmangaih a, ani pawh hian min ngaina em em tih ka hria, min hmangaih leh hmangaih loh erawh ka la hre chiah lo thung. Min hmangaih theih a inring kha a ni a, chu ringawt pawh chu ka tân chuan lawmna tham a tling tawh a ni.

Aizawla ka zin dâwn nî chuan phone kaltlangin ka hrilh hmasa thlap a, min lo hmuah a tum thu a sawi nghe nghe a, a hmel hmuh ka châk tawhzia chu pui tak a ni. Aizawl ka thleng chu putea ṭhianpa'n min buaipui nghal char char a, ka hmangaih Belinda-i nen pawh kan inhmu ta ngei a, kan khuaa a awm lai aiin ka hmu hmelṭha zual a, kei lah thingtlâng tlangval satliah ve mai ka ni bawk si, ka inzahpui rum rum dâwn alawm le. Ani lah chuan min zahpui hauh lo hian ka bânah a vuan chawt a, nui ver ver chungin min be siam siam a, zah pawh a sawi theih tawh loh, ka kuah tawp ringawt. 

Aizawla kâr khat ka awm hnu chuan hna pawh ka dil fel zo ta, putea ṭhianpa zârah engkim kan tlingtla zo thei a, a chungah pawh ka lawm khawp mai. Kan khaw lama haw leh nghal mai ka tum nî chuan ka hna dila ka tlin thu ka hre hlawl a, mak ka tih dan chu pui tak a ni. A chhan chu hna làtu te'n hna lampang zawhna min zawh khan chhan theih mumal pawh ka nei lo va, ka tlin ka inbeisei lo hrim hrim, mahse ka hna dilah chuan ka lo tling ve reng si, a mak a ni; a mak tih bak sawi tur ka hre lo. 

Belinda-i ber chuan min lawmpui thiam em em a, putea te chhungkua paw'n min lawmpui hle bawk. Hna ṭan hmain kan khuaah ka haw leh phawt a, Aizawla ka chhuk leh dan erawh a dan a dang ta. Mahniaa in luahin ka hna thar chu ka thawk mawp mawp a, ka theih ang tâwkin ka inzir ru reng ṭhin a, thintlânga awm ṭhang tân chuan hriat loh a ngah theih khawp mai. Pitei leh putea te nen pawh ṭuanna tlâng dang tawh mah se phone-in kan inbe fô va, ka thil tihna kawng engkimah fimkhur turin min chah awl lo va, ka tân hi chuan nu leh pa an ni ringawt.

Mahni chauha in luah ni mah ila Belinda-i nen ni tin kan inhmuh theih tawh avangin ka hlim em em thung a, ka in luaha chaw rawn ei châng te pawh a ngah a, ei rawng min bawlsak chang pawh a tam mai. Tlai khat phei chu kan induhna a sosan nasat lutuk tawh avangin kan che sual ṭep nghe nghe a, chumi tlai aṭang chuan a rawn pêng kawi khât ta deuh a, a lakah pawh ka inthlahrung ru khawp mai. Kan awm dun leh paw'n fimkhur takin ka awm tawh a, ka hmangaih a, ka nupui a nih hmâ chu a thianghlimna pâr thliahsak ka phal lo a ni.

A zirna lam tihbuai ka hlauh avangin duh ang paw'n a awmna ah ka lén chilh tam ngai lo va, biak erawh kan inbe reng ṭhin tho. A mut dâwn àwm velah ka be ziah a, a châng chuan ka biak lai renga lo muthilh daih te a ching reuh a, engtin pawh awm se ka tân chuan a ṭha chungchuang em em vek a ni. A thinrim deuhin a hmelṭhatna a bo lo va, lungawi lovin han ṭawng ve tan tan ṭhin mah se a lawmawm reuh ka ti daih a, a hlimin ka nun a hlim a, amah avangin thla eng emaw zah chu mei ka zu tawh ngai miah lo nghe nghe. 

"I taksa tâna ṭha lo thil i tih reng chuan ka be duh tawh miah lo ang che" tiin min vau ṭhin reuh a, a fiamthu tih hrethiam vek mah ila hmangaihtu chuan a hmangaih thusawi chu ka awih em em tho.

Ṭum khat a ṭhianpa nena ka hmu dun zet chu ka thin a sa phat a, ka thik a ni ber. Belinda-i lah chuan ka rilru a lo hre chiang reuh em em leh nghal a, ka awm dan aṭangin ka thik tih nen lam a lo hrethiam vek chu niin, awlsam tê hian min tihlim leh lawi a, a bulah hi chuan mi dang hlak ka ang ṭhin. Chutiang khawp chuan ka nunah hmun a khuar nghet tawh a, a aw hre lo leh a hmel hmu lovin nî ka vui liam thei tawh lo a ni ber e. Ka tâna mi hlu tak a ni a, a pawimawh em em bawk. 

Aizawla kum 2 dâwn hna ka thawh hnu chuan vanneihthlak lutuk tak maiin ka pa dik tak ka zawng chhuak ta nge nge a, pafa ang taka kan inhmuh hmasak ber ni chuan ka ṭap tawp a, mipa mah ni ila ka insum thei thlawt lo a ni. Amah ka pa ngei pawh a ṭap a, min kuah a, ka ṭah tichhuak zual em emtu chu kan hnathawhna hmuna thu ber, kan pu ni bawk chu ka pa a lo ni reng a, engkim chuan ka hnuk a tiulh lo thei lo a ni. Ka pa a ni tih ka hriat chhuah dan pawh a wallet ka chharsak ṭumin a ni a, a wallet-a ka nu nulat lai thlalak ngei mai ka hmu chiah kha chu awm ngaihna ka hre meuh lo. 

Vanduaithlak takin a nupui nen fa an nei thei lo va, chutah a nupui chuan kum 3 liam ta khan a boralsan tawh zui leh nghal a, a tirah rinhlelhna hlirin khat ru reng mah ila a tawpah erawh ka pa ngei a ni tih ka pawm thlap a, DNA nen lam test kan nei fel vek a, sawiselbo khawpin pafa dik tak kan lo ni ngei e. Pafa kan ni tih kan hriat chhuah nî chuan lungchhe em emin kan inkuah a, putea leh pitei te ka hrilh nghal thuai bawk a, Aizawla an lo chhuk thuai tur thu an sawi zui nghal bawk. An sawi ang ngeiin an lo thleng thla thuai a, putea chuan hamhaih si, lawm bawk si hian ka pa chu a chibai a, sawi tur ber pawh a hre bik lo.

Ka pa chuan a thil tawn leh a chanchin, ka nu nena an intawn dan thlengin a sawi ta vek a, ka nu nen khan rei pawh inzui lovin an che sual thuai a, chu chu kei ka lo pian ve chhan a ni bawk. Ka pa chuan hun liam tawh ngaihtuah lêt vawng vawng hmel pu hian ka nu a zawn nasat thu te, kâr khat an inzui hnua a chet sualpui nghal ringawt avanga ngaihdam dil a duh thute a sawi chhuak ta hial a, a hun tawn chu a khirh ve viau dâwn tih ka hriatthiampui khawp mai. A sawi zel dan phei chuan ka nu thlalak a hmuh apiangin a laka a inthiam lohna a zual ṭhin a, a nupui hmangaih em emin a thihsan chhan te, fa an neih theih miah lo chhante chu ka nu laka a thil tihsual rahah a ngai hmiah a, khawngaihna hlira khatin ka kuah vawng vawng a, hnem dan tur pawh ka hre bik chuang lo. 

Ka pa chhungte'n a fapa ka la dam reng tih an hriat hnua min rawn hmu chu mak ti hmel an pu vek a, a áwm lutuk, mak ti àwm pawh an ni. Kum 30 dâwn a ni tawh a, kei ngei paw'n mak ka la ti ru reng tho. Ka awih loh dâwnin a tak ngei a ni tih ka hre chiang bawk si, ka hlim tho na chu ka hlim dan a la famkim chiah lo a ni ber. Ka pa chuan ka hnathawh lai thawk tawh lova hna dang thawh tur min pek a tiam a, a bula cheng turin min sáwm zui mawlh mawlh nghal bawk a, dik tak chuan chen duna inkawm hlim te ka châk, mahse putea leh pitei te ka ngaihtuah lo thei lo a ni.

Kan khuaa ka haw leh nî chuan ka pa'n min zui haw nghe nghe a, min kuah vawng vawng loh leh min nuih sun sun a, ka bula awm chu nuam a ti tak zet tih ka hria, kei paw'n a bula awm chu nuam ka ti lutuk tho. Ka nél loh hlau ni awm fahran hian min be deuh chhen a, a bula ka chen loh a hlau lutuk chu a khawngaihthlak lehling zâwk! Putea te nen engkim kan rêl fel a, putea te nupa chuan min hmangaih loh vang ni hauh si lo hian ka pa bula cheng tawh turin min ti a, ka lawm bawk si, an lakah ka inthlahrung ru bawk si, sawi tur ber pawh ka hre lo. Ka pa chuan mamawh an neih apianga pun tawp turin putea te chu a chah mawlh mawlh a, putea te nupa pawh hlim zetin an nui tawp ringawt. 

Hun a'n vei leh deuh hret hnu chuan ka pa nen kan cheng dun ta ngei a, Belinda-i paw'n kan chanchin a hre vek tawh a, min lawmpui lutuk chu ka lawmna leh ka hlimna tizualtu pakhat a ni. Ka hnathawh tura ka pa min hmuhsak erawh ka thawk duh tlat lo va, ka duh loh chu thuhran ni se ka hmangaih Belinda-i paw'n min duhpui bik lo va, a chhan chu thiamna mumal nei hauh lova thawh ka duh lo, kei aia thawk thei an tam zâwk ka ring tlat a ni. Min râwn hmasa lovin ka pa chuan ka tân liau liau dawr min siamsak leh ta rup mai, chumi ṭum chuan

"Ka pa, sum emaw khawvel nawmsakna chi hrang hrang hmanga duat ka ngai hran lo a nia, min hmangaih tawp zâwk rawh" ka ti nghe nghe a, rilru kal thui hmel deuh hian min en a, a dawr min siamsak erawh lawm takin ka pawm ta thung.

Ka pa nen kan chen dun aṭanga kum 1 hnuah chuan ka hmangaih Belinda-i ngei mai chu nupui atân ka sâwm ta nge nge a, hlim zeta min neih a duh thu a sawi zawh rual chuan pawm kangin ka fawp vawng vawng a, hmangaihna biahthu kan inhlan mawlh mawlh a, kan hlimna chuan van sâng tak a tawng loh paw'n a teuh ngawt ang ka ring. Rei pawh a rial hmain man leh mual kan tifel a zung zung a, ka pa chu a phur ber berah a lo ṭang bawk a, kan hlim tlãng hlawm teh e! Kan khua, thingtlâng khua ngeia inneih ka ti tlat a, ka pa paw'n engtin mah min sawisel lo va, a duh ber chu a bula ka awm tam leh ka hlim a ni. 

Belinda-i nena kan inneih nî chuan a khaw nawtin kan innei min hriatpuitu an awm a, Aizawl lam aṭang ka pa ṭhiante leh a chhungte an lo kal ve bawk a, chumi ni chu ka nuna ka hlim ber ṭum ti ila a sual lo ang. Ka mitthlaah ka nu a rawn lang a, ka pa nena kan inhmu ta leh kan cheng dun tawh tih te chu hre ve se zawng a hlim loh ka ring bik lo. Eng dang zawng aiin ka hmangaih Belinda-i mawlh chuan min tihlim a, a pa'n min inkutsuihtir thlap a, ngaih a ṭha duh hliah hliah khawp mai. Lawiṭhat zan kan hman dãwn chuan kan ṭawngṭai thlap a, chu chu Belinda-i rawt a ni nghe nghe bawk. 

"Kan khua ka ngai ê" ka nupui lam chu ka hawi vut a, a awm dan te reuh chuan ka nuih a tiza ru khawp mai.

"Khawi in khua ber màw?" ka ti deuh kher a, a pa pastor a nih avangin khaw hran hranah an insawn kual ṭhin a, chu vanga fiam kher pawh chu ka ni!

"Kan khua ka tih chuan ka pasal pian leh murna khua a ni mai alawm, i nghal sâwt êm mai u Zir" a rawn ti tan tan reuh a, tun lai chu a duhzawm zual tak zet. 

"Kei chu ka nupui hi engtik lai paw'n ka ngai" tiin a ṭhut ang âng chuan a hnung lam aṭangin ka kuah a, a taksa rimtui tak chu ka hip lut vawng vawng zui nghal bawk. 

"Mipa nge hmeichhia a nih ang le?" a rawn ti daih a, nui sukin a dul chu ka chûl a, a hahdam siai siai hmel khawp mai.

Kâr hmasa mai khan a rai tih kan hria a, kan inneih aṭangin thla 3 pawh a la liam lo va, mi ṭhenkhat phei chuan puk lâwk emaw te min ti hial a, mahse chutiang engmah a ni si lo, keini chuan Pathian malsawmna ah kan ngai hmiah.

 

"Mipa a ni emaw hmeichhia pawh ni se ka duat ngawt ang" ka tih chuan a lo nui nghawr dat a, chutah sawi zawm leh nghalin

"Mahse a nu ang êm hi chuan ka duat lo ang" ka ti deuh kher a, hmui tipawrh vakin min melh a, ka lo fawp chat thung a, a zaka ka khawih zeuh te chuan nui nasa tak a ni.

"A za a nia u Zir" tia nui vak vakin a tal a, kei lah ka tawp duh bik der si lo, a nui hmel chu hmuh reng ka duh vang a ni ber e.

"Nang hi awm lo la chuan tun ang hian ka hlim miah lo ang a, ka pa nen pawh kan cheng dun miah lo ang maw le" kan inkuah hle hle hnu chuan ka ti thum dap a, ka biang chu a rawn chûl nghal den den bawk. 

"I pa i zawn hmuhna chhan hi chu i tum ruh vang alawm" a tih chuan

"Ka beidawn laia min fuih phurtu chu nangmah alawm i nih, chu vangin a bul ber chu nangmah i ni Belinda, ka hmangaih che" ti zawm duahin ka en ran a, hmangaihna mitmenga min melh ral pah hian

"Kei paw'n ka hmangaih che u Zir, ka tawng che hi ka lawm em em bawk" tiin a nui ver ver a, ka âwma a hmai phûmin a tal chûng chung reuh a, eng tak hria ni maw!

"I lài khanglang elo nang tê hi!?" nuihza aw lek leka ka tih chuan

"Min en chiang vel êm a nih khâ" a rawn ti ve pang pang a, nui hawk hawkin ka âwmah chuan ka kuah bei nghet sauh a, ka nun bul ṭan dan hlimawm loh mah se a tawp lam erawh a va lungngawithlak hliah hliah tak êm.

                                      The End