MARÂWNA By Havali Adam (CHAPTER 2)

                                      MARÂWNA

                                              By

                                     Havali Adam

                                       Chapter 2

"Engati nge a? Eng nge thleng? I va hmanhmawh em em ve maw lè?" in chhung ka luh rualin u Dawngzeli chuan a lo ti thuai a, ka che hrim hrim chu ka hmanhmawh êm bawk a ni.

"Sawmi?" a rawn ti leh ngat a, khuma ka ṭhu thla chu damsam vak lo tih hriat tak hian Dindini paw'n min lo en reng a, zawhna erawh engmah min zâwt ve lo thung.

 

"Engati vak vak nge khatiang khan i rawn tlan luh Sawmi? Uiin an um che em ni? Nge thil dang vang zâwk?" min din chilh tith mêk tu u Dawngzeli chu ka melh chho zeuh a, ka thin phu pawh a la rang dawt dawt khawp mai.

"Mi hmuh ka nei a" ka âwm dawm hmasa tê têin ka ti ve ta nge nge a, ka thin phut chhan erawh ka hah vang ni tho mah se u Marâwna vang a ni ber.

"Tu nge i hmuh chú?" a lo ti nghal chat a, u Dawngzeli ang lo takin Dindini chu a la ngawi reng thung.

"U Marâwna" ka ti sep a, u Dawnzeli lam hawi chho zeuhin ka hawi sawn leh nghal a, engah mah ngai lo tih hriat zet hian a dar a lo chhin àk ringawt.

"Chutiang a ho lutuk, khati vak vak khan lo tlan lut tawh suh, min tihlauthawng hman alawm" a sawi ang ngawta awlsam chu ni thei se ka ti khawp mai!

"Min rawn um zui ka hlau alawm, kan in luah awmna te hi a hria ang tih ka hlau bawk" ka ti ve deuh hlak a, ka tum ai ka aw chu a vin daih!

"A ho êm mai Sawmi, hmu che pawh ni se a pawina a awm lo, kan awmna hria pawh ni se a pawina a awm lo hrim hrim, khawi lai takah nge i hmuh reng reng?" a ti duah a, keimah a ni lo miau a, kan rilru a innang thei ngai dâwn chuang lo.

"Ka tihna chhan chu kei paw'n ka hmu ṭhin alawm, he lamah hian ṭhian a nei a ni ang, thla hmasa vel aṭang khan ka hmu ngun ang reng" a rawn tih zawm leh nghal zat a, a thil sawi chu ka rin loh lam tak a ni.

"I hmu ṭhin maw!?" mak ti zeta en chungin ka ti ta réng a, ngaihsam hmel deuh hian a nui sak ringawt.

"Hmu ṭhin e, kei chauhin ka hmu lo, amah paw'n min hmu ṭhin a, kan inbe ṭhin nghe nghe" a la ti ta deuh deuh a, thil hlauhthawn ka nei nghal.

"A nih kan awmna hi a hria em?" ka tih chuan

"A hriat ka ring, min zawh zan khan ka hrilh ngei a, a hriat loh leh a hre lo a ni mai" a lo ti awlsam ét a, sawi ber tur pawh ka hre tawh rih lo.

"Kei paw'n ka hmu ṭhin alawm Sawm, mahse ka hrilh duh ngai lo che a, i rilruah awm tawh lo se, engah mah ngai tawh lo la ka duh vang a ni" Dindini chu ka melh kal a, ani leh zel paw'n a lo hmu ṭhin a nih chu!

"Sawi tawh lo ang, ka hre duh tawh rih lo. Theihnghilh hlen vang vang ka duh tawh, ka tum bawk. Ka hre lo, ka thei dâwn em ka hre lo, khawngaihin sawi tawh suh u" mi â ang mai hian ka ti phawlh phawlh a, hamhaih taka min en ve ve lai chuan

"Ka tum ve tho alawm, in hre lo mai mai a ni. Ka theihnghilh hlei thei bawk si lo, dik tak chuan ka awm dan hi in hrethiam kher lo ang, a chhan chu in tawng ve lo tlat alawm, sawi chhunzawm tawh lo hram ang u" ka tih zawm leh nghal mawlh mawlh a, bathroom-ah ka lut zui ta daih bawk.

Ka ṭhu ngawi reng a, ka ngaihtuahna chu a vâk kual nasa em em a, ka mittui pawh a rawn far leh ta nge nge e! Bathroom chhunga ka awm chhung zawng chuan engtin mah min rawn ngaihven lo va, mahse pawi ka ti lo daih zâwk! Ka chhuah hnuah erawh min be ta thung a, u Dawngzeli chuan thil dang daih min sawipui a, Dindini pawh a bang chuang lo. Zawi zawiin ka rilru chu a pangngai ve leh mai a, u Marâwna nen kan inhmuh avanga ka awm dan te, u Dawngzeli leh Dindini ka awm khum dan te chu ka ngaihtuah lét chet chet a, atthlak ka ti hnuhnawh ang reng.

Zanriah kan ei kham hnu chuan lehkha ka zir nghal daih a, ka rilru kawih pèn ka duh vang a ni ber. Engmah ti lova ka awm a nih chuan ngaihtuah loh tur ka ngaihtuah leh ngei ang a, chutiang chu ka thlentir duh lo, ka awm dan aṭangin u Dawngzeli leh Dindini paw'n min hriatthiam vek ka ring. Lehkha ka zir laiin u Dawngzeli zâwkin thingpui min siamsak a, Dindini erawh khumah a mu hahdam mai mai thung. Chutia lehkha ka zir lai chuan u Thiangpuia a rawn lêng a, u Dawngzeli nen eng eng emaw ni an sawi dun a, min rawn fiam leh zuk ṭhin a, chu chuan ka rilru a là pêng viau bawk.

Dâr 10 leh a chanve vel thleng u Thiangpuia chu a lêng a, a lo lêng lo ang tih a hlauhawm zâwk e a! Zan tir lamah kha chuan lehkha ka zir ve ngei a, mahse u Dawngzeli leh u Thiangpuia te pahnih titiin ka beng a verh theih êm avangin dâr 9 pawh ka zir thleng peih lo. Dindini pawh a rawn tho chhuak hial a, beisei loh deuhin ka zan hun hman chu a nuam ta phian! Mut dâwna ka ṭawngṭainaah chuan

"Lalpa, u Marâwna hi nupui nei tawh a nih angin hmangaih em em mah ila ka hmangaih phâk a ni tawh lo va, keia lo ngaihzawn ruk reng pawh hi a mawi tawh hek lo. Chu vang chuan khawngaih takin amah ngaihtuah lova nun dan ka thiam theih nân min kaihruai la, engkim i kutah ka dah e" tiin Pathian hnenah ka dil ta tawp a, mak tak mai hian ka hah a dam sawng sawng a, hlim taka hringnun hman ka phu ve tawh chuan ka inhria a ni.

Ni a ral a, kâr a ral a, thla hial a ral leh ta! B.Ed pawh kum khat dâwn chu kan lo training ve ta reng mai, ka rin phak bakin hmasawnna ka chhar a; a bikin ka zirna lamah! Tin, tunah chuan Dindini leh kan professor fapa Alex-a pawh an inngaizawng tawh nghe nghe a, tlangval ngeng deuh tura kan ngaih kha han hmuh fô tâkah chuan a lo ni bik miah lo. Keini ai tlémin upa hret mah se a puitling ru phian a, a mipa nihna a hriat ka ti mai, ka sawi thiam chiah lo.

Ka ṭhiannu ang lo takin kei erawh chu a ngai tê bawkin ka rilruah ngaihzawng neih lam reng a la lang thei leh ta chuang lo va, u Marâwna vang em em pawh a ni tawh lo. 'A ni lo' han tih dawt dâwn chuan a la dik famkim chiah lo ang a, mahse amah vang ngawr ngawra ngaihzawng nei lo ka ni tawh lo thung. Keimahah hian phurna emaw ngaihzawng neih châkna a awm lo hrim hrim a, Dindini paw'n u Dawngzeli awm loh laiin min sawipui leh zauh ṭhin a, ka thengthawngah a thawk lo ṭhin khawp mai.

Ṭawngṭainaah nen lam ka telh ziah tâkah chuan u Marâwna ngaihtuah chhuah loh châng ka ngah ta viau a, zan reia mittui sen pawh ka nei ngai mang tawh lo va, mahse 'ka theihnghilh hmin ṭhak' chu ka la ti thei bik chuang lo. A nihna takah chuan theihnghilh ka hreh, ka hringnunah hian awm ve reng se, tel ve reng se, hmangaihna hrui khat vuanin awm dun thei lo kumkhua dâwn mah ila ka hringnun tikimtu atân hriatreng ka duh zâwk ni berin ka inhre tawh!

A châng chuan han ngaih veng veng chângte ka nei leh ṭhin a, mahse nui chungin ka ngai veng veng thei tawh thung a ni. A hma kha chuan sawi chhuah chî a nih loh avangin a nupui nen lam ka thik ru thei em em kha a ni a, amah ngei pawh hmangaih reng chungin ka ngei leh thut ṭhin kha a ni a, tunah erawh zawi zawiin ka danglam ve zel a, danglam zel pawh ka duh; ngai renga awm ngawt zawng a hmasawn lo zia êm mai.

Tlai khat chu hmuh ka inrin ruk ang chiahin ka hmu leh ta ngei a, ani erawh chuan min hnung chhawn tlat avangin min hmu lo thung. Kawngpui chhak lamah mipa pakhat nen hian an inbia a, a ṭhianpa a nih ngei ka ring. Hman anga a hmuh hlau deuh ang kha ka ni tawh bik lo va, chutia ka hmuh ta pawh chu keimahah danglam la awm tho mah se hmân ang em em kha ka ni tawh bik lo, chu tak chu ka danglamna leh hmâ ka sâwnna lâi chu a ni.

"Zanin tlai chu zanriah i ei hmâ teh ang u, inkhawm in ngaih hmel si" chaw ei siam melh melh pah hian u Dawngzeli chuan a ti muang ban charh a, mak ka ti ang reng, thawhṭanni zanah kan inkhawm ngai der si lo.

"Kan inkhawm dâwn hleinem" ka tih chuan

"Inkhawm rawh u, Zothanan a rawn sâwm dâwn che u" a rawn ti ringawt a, Dindini nen chuan kan inmelh nghal vat!

"U Zothanan min rawn sáwm dâwn chuan inkhawm ngei ngei kan ngai a nih chû" nui var vara titu Dindini chu ka melh deuh râm a, u Dawngzeli chaw ei siam pui turin a la tho zui nghal daih zui!

"Ka inkhawm peih lo e a! Chu bakah thawhṭanni zan te chu ka inkhawm ngai reng reng lo, duh leh u Zothana chu Dindini nen kal dun mai rawh se!" ka ti niah niah a, u Dawngzeli chuan

"Chaw hi lo ei la, inkhawm turin in insiam zui nghal dâwn a nia, Dindini ni lovin nangmah alawm lo sáwm a tum chhan ber che u" a rawn ti charh charh a, Dindini chuan thlawp hmel zet hian

"Dik chiah!" a lo tih zawm zat bawk a, za lo zeta nui chungin chaw ei dawhkan lam chu ka pan ta ringawt bawk.

Zanriah kan ei kham fel èr áwr tihah u Zothana chuan inkhawm turin min lo sâwm ta ngei a, peih lo ru zeta ka insiam lai chuan Dindinin min lo nuih tet tet a, ṭhalai mah ni ila KṬP inkhawm zan hi chu ka inkhawm ngai miah lo, kan khuaah erawh ka inkhawm ṭhin thung. Biak in kan thleng a, hmeichhe ṭhenkhat chuan min lo en duh hlawm teh e! A bikin keimah min en chik zualin ka hria, a àwm tho mai, a hmâ zawnga inkhawm ngai hlei lo kha ka inkhawm thut a tin a ni!

Thil mak ve tak pakhat chu KṬP inkhawm zan kan tih mai, thawhṭanni zanah hian ka inkhawm ngai meuh lo va, Aizawlah hi chuan inkhawm lo tluk ka ni! Pathianni chawhma leh zan erawh ruah sùr lai pawh ni se ka inkhawm ziah thung a, nilaini zan hi ka inkhawm leh zauh ṭhin bawk a, ka ti ṭhang laklawh a ni ber e. Sawi tawh ang khan kan khuaa ka awm lai chuan ka inkhawm ziah thung a, ṭuanna tlâng a dang vang nge ni, Aizawla kan awm hnu hi chuan KṬP inkhawm zanah ka inkhawm tawh ngai meuh lo chu a ni e.

Inkhawm kan bâng a, u Zothana chuan a Car-in min thlah leh thlap a, hmaichhanah min hrilh dawt lo mah se min biak dan leh ka laka a awm dan aṭang hian min duh tih chu ka hriatna a rei tawh! Zana rawn lèn châng pawh a nei zauh zauh ṭhin nghe nghe a, mi â tân lo chuan hai theih a ni bik lo. Keimah zâwk hian ka ngaihsak lo êm a, a hming chauhin ka be ṭha vel mai mai a, ngaihzawng neih lam ka rilruah lang tawh ngat se zawng kan inngaihzawn fel dim diam tawh ka ring.

Tlangval fel tak a ni a, a hawihhawm mai bakah a changkang a, a ṭawng duhin mi biak nél a thiam em em a, nêl lo tawp chu ka ni bik miah lo, mahse ngaihzawng neih hrim hrim ka la tum lo bur a ni ber. Eng hna nge a thawh tak ka hre chiah lo va, u Dawngzeli kâ aṭanga ka hriat dan chuan hna hniam a thawk lovin ka hre thung. A hma chuan district dangah a thawk ṭhin a ni awm e, Aizawla a rawn lêtna pawh a la rei lutuk lo, ngaihven em em lo mah ila u Dawngzelin a sawi ṭhin miau si a, tlém azawng tal chu a hriat loh theih loh!

Zan khat chu inkhawm turin min lo sâwm leh a, nilaini zan a ni a, ka inkhawm ṭhin tih a hre thut emaw ni, min lo sâwm chu mak ka ti ru ang reng khawp. Kan pahnih chauha kal dun ka duh loh avangin Dindini inkhawm puiah ka sâwm hnuhnawh a, anih lah chuan min lo hnial fithla ṭhak leh nghal a, tih theih dang awm hek lo. U Zothana nen chuan inphurin biak in lam kan pan dun ta nge nge a, nèlawm zet hian min be reng a, a sir zâwnga a lan dan chuan tu emaw ni min tihre chhuak zawk a, hriat chhuah ka tum pawh a ni lo.

A hmuh hlau ru zetin u Zothana chu ka en nawn leh ngat a, u Marâwna nen an inang tak zet! An biang awm dan te, an khabe poh dan te, an chal leh an hmai thleng hrim hrim chu a inan mai bakah an mizia pawh a ṭhen azâr a inang tel tih ka chhut chhuak neuh neuh a, a tawpa ka mitthlaa lo lang chu u Marâwna hmel bawk a ni. 'Engtin nge an awm zel ang le' tih thlengin ka ngaihtuah zui rauh rauh a, motor ding riai riaiah harh chhuak lo ila chuan ka ngaihtuahna kawmin ka ṭhu ngawi reng thei ang ka ring.

Dâr 8 rik hma hretin inkhawm kan bâng a, u Zothana chuan kan in thleng min thlah leh thlap a, kan laka hawihhawm chhuah rengtu te bula hawihhawm lêt loh zawng thil har tak a ni. Thingpui in kawi tura ka sâwm chuan mawihnai tak si hian a lo remti ve mai a, in chhung kan luh laia Dindinin min lo en laih a tum lutuk chu ka nui chhuak tawp a, u Zothana chuan ka nuih chhan a hre ve bawk si lo nen a ngaihna a hre lo teh e! U Thiangpuia a lo lêng bawk a, ei tur te siamin kan ri laih laih a, a nuam ang reng phian!

Mut hmunah chuan thil ka ngaihtuah chet chet a, a bikin u Zothana, a chhan chu tun hnu hian u Marâwna nen inanna riau an nei tih ka hre ve chiah! A hma kha chuan ka en chik ngai lem lo va, min ngaihven tih hre ru reng mah ila ka uksak teh ual ngai lo kha a ni a, an mizia pawh inanna chen a tam mai. U Zothana avangin u Marâwna ka hre chhuak leh ta nge nge chu a ni si a, Pathian hian ka kawngah engtin chiah nge ruahmanna a siam dâwn ka hrethiam tawh lo, hma erawh ka sáwn ve tawh viau chuan ka hria.

Zan khat chu u Zothana a rawn lêng leh a, Alex-a leh u Thiangpuia an lo lêng teh hlawl bawk a, kan inkawp kim ṭhap ṭhap hlawm khawp mai. Kan hlim dar dar viau a, mahse kei chu ka hlim famkim tak tak thei lo thung. Ka ngaihtuahna a kal ding hle a, u Zothana chu engkim hrilh tlang tawp mai ka duh tawh, chuti lo zawng a rilru ka tinâ mai mai dâwnin ka hre tlat! Min huat phah ka hlau a, ka duh dan tak phei chuan ṭhian inkawm ngeih tak ni ila ka duh zâwk; inngaihzawn tih vel lam ni lovin!

Alex-a a haw hmasa ber a, a hnu lawkah u Zothanan haw zâi a rel ve leh nghal a, u Thiangpuia erawh a la lêng thung a, ani hi chu riak pawh ni se a tua te ma'n ngaihṭhat lohna kan nei tawh lo ang. Chutiang khawp chuan kan innêl a, a bulah chuan kan ngaih a ngam tawh a ni ber e. U Zothana hnungah chuan ka kal chhet chhet a, min be leh zauh ṭhin tih loh chu kan inbe tam lo khawp mai. Ka rilru kap rengtu chu hrilh tlang vek law law ka tum bur a, min huat phah ang tih erawh ka hlau ru em em thung.

"Naktuk eng nge i tih dâwn?" a Car chhunga lut ta mai lo hian a rawn ti a, min en chiang hle bawk.

"Class ka kal ang ka ring, nang zâwk?" ka ti ṭha ve mai a, ka zawhna chu a ho ang reng ka ti, a mawlmang bawk si, ani pawh a lo nui ringawt.

"Office a ni mai" min en reng chung hian a ti a, ka aw ka then kharh kharh hnu chuan

"U Zothan, eng lo... thil sawipui che ka duh a" ka tih zawm nghal a, a hmel nelawm tak chu a kiam lo hrim hrim.

 

"Eng lam nge ni a?" tiin min din hnaih deuh a, a awm dan avang chuan ka sawi tum ka sawi hreh phah rum rum dâwn alawm le.

"Ka ngaizawng che tih hi i hrethiam ti raw Sawmi?" amah zâwk chuan a rawn ti hlawl mai, hamhaih zetin ka lo bu nghat ringawt.

"Dik tak chuan ngaihzawng neih lam hi ka rilruah a awm thei lo u Zothan, min hrethiam rawh. Ṭhian ni zâwk mai ang, ka sawi awmzia chu min huat phah lo la ka duh a ni" ka ti ve ta nge nge a, a hmel nelawm tak hmuh tur la awm reng mah se a lung a dam zan lo tih erawh ka hrethiam vek!

"Eng lo, ka duh lo che pawh a ni lo, ka duh che pawh a ni chuang lo, ka ngainat dan che hi maw ṭhian ang bak a ni thei lo ni berin ka hria. Eng lo a nia, mi dang hriat chhuah ka nei zel bawk si" ka chawlh dat hnu chuan ka tih zawm leh nghal a, min en chiang sawt khawp mai.

"I hriat chhuah ṭhin chu i ṭhiannu min hrilh in khuaa mi kha em ni? Nupui nei tawh kha?" a rawn ti ve ta chat a, amah pawh en lovin ka buk khum zeuh a, ka ngawi zui ta daih bawk.

"Nuam lo ti duh suh Sawmi, ka hrethiam che alawm, ka huat phah lo che a nia" dam dapa a tih leh chuan a nui sun sun hmel ka hmu zui nghal a, rilru chu nuam lo duh tak a ni.

"Ka va haw ang e, ngaihngam deuh khan awm la" tia a Car kawngka a hawn lai chuan

"Ka lawm e aw u Zothan, nuam ka ti bik miah lo, min hrethiam hram dâwn a nia" ka ti thuai a, lo lehhawiin a nui tawi suk a, engtin mah min chhang tawh lo va, a Car-ah chuan ṭhu lut zui nghalin a tlan haw ta vang vang bawk.

Mi â nilêng tân lo chuan mawihnai takin ka hnar tih hriatthiam loh chî ziazâng a ni lo va, ka khawngaih ve reng, kei ni ta ila hrehawm ka ti ngawt ang, mahse nakin zelah a rilru ka tinâ thlawn mai mai ang tih ka hlau bawk si a ni. In chhung ka luh hnu thlengin u Zothana chu ka ngaihtuah zui a, min huat loh tur thu sawi mah se mim hua ang tih leh min be duh lo ta sawt ang tih ka hlau tak zet a ni. Sitting room-ah pawh ṭhu rei peih lovin khumah ka mu ta daih a, mahse chuti mai chuan ka muhil nghal teuh lo mai.

Chumi zan aṭang chuan u Zothana chu a lo lêng khât ta deuh a, lo lêng ngai tawh lo tawp erawh a ni chuang lo. Kan awm dan aṭangin u Dawngzeli chuan a lo man thiam vek a ni mahna, u Zothana nen kan inkâra thil awm dik tak min zâwt a, kei paw'n zep nei hauh lovin ka hrilh ve mai a, a hmelah erawh beidawng hmel ka hmu thung. A àwm ka tihpui lutuk, a nau hi ka mawl si, mipa ṭha tak tak ka hnar zel a ni ber. Chutih rual erawh chuan inthiam loh tum viau mah ila ka inthiam chawp leh nge nge ṭhin, a chhan chu kan thinlungah hmangaih ber te an awm tlat chuan ngaihzawng neih vang mai maia reh hlen tur chí ah ka ngai lo a ni.

Thla khat hnuah phei chuan u Zothana hmel hmuh tur a vâng ta pharh a, Chanmari nula nen an inngaizawng te'n ka hre ta bawk a, chu chuan ka awm a tinuam huai thei nia maw lè. Keimah ber hi chuan ṭhian ang bakin ka en lo va, ngainat pawh ka ngaina reng, mahse ṭhian ang bakin ka ngaina lo thung. Chanmari nula nen an inngaizawng tih ka hriat thawi aṭanga kâr hnih hnu àwm velah an inngaihzawng ngei tih ka hre chiang ta a, a Whatsapp status aṭangin a ni nghe nghe a, ka lawmpui khawp mai.

Chawl lovin hun te chu an kal zel a, B.Ed pawh kum khat kan training tling titih chu a ni der mai! Thlasik thla a nih angin boruak chu a vawt sùk a, Boney M hla pawh hmun tin kil tinah an play ri chuah chuah a, kan khaw lama haw a châkawm tawh khawp mai. Hna lamah u Dawngzeli a la kal ni tin ṭhin a, chu chu kan haw rih loh chhan a ni ber. Kei leh Dindini pawh class kal tawh lo mah ila kan awm awl chuang lo, dawr pakhatah thawkin kan inhlawh ṭhin a, a hahthlak hran lo bawk nen nuam kan ti dun viau!

Kâr khat a ral hnu chuan u Dawngzeli te pawh an chawl ve ta, kan khuaa haw nghal mai lovin kan bazar tê tê phawt a, keini pawh dawrah kan thawk tawh lo va, kan thawh rei loh ngaihtuah chuan kan hlawh ṭha hman ang reng phian! Kan bazar fel ta maw tihah khaw lam panin kan haw a, kan khua chu Aizawl ai a lo vawt daih zâwk leh nghal a, inhâk lùm a ngai ṭhin khawp mai. A chhun a zanin sikri kan âi a, thlasikah hi chuan nî a tla hma tawh bawk si, kan khua ngat phei chu tlâng kâra awm a ni leh nghal a, nî kan hmu rei lo thei hle.

Tuk khat chu kan veranda-a ka ṭhut hle hle laiin u Marâwna ka hmu hlawl a, R15 rawng pâwl dak zar mai hi a khalh a, a nupui a phur miah lo leh nghal. Kan in a tlan pelh hnu thleng chuan ka en zui dauh dauh a, za lo zet hian ka nui sak a, thla eng emaw zah chhung kha chu amah ngaihtuah miah lovin hun ka hmang ral ve kha a ni a, a awih awm loh rualin ka tum nasat dan ngaihtuah chuan a àwm lutuk tho. Ka chan phak a ni lo tih ka hre chiang tawh a, ngaihven zui reng loh ka thlang zâwk fô ṭhin bawk.

Huana kan kal tur kawngpui kan chhuah chhoh lai chuan u Marâwna bawk chu ka hmu leh a, chutah erawh kei chauh ni lovin ka chhungte pathum paw'n an hmu ve tawh a, u Marâwna chuan ka chhungte a en zauh hnuah min rawn en ta chat a, keiin mit là sawn lek lovin ka lo en ve reng bawk a, mahse tun ṭum chu a hawisawn hmasa zâwkah a ṭang thung. Hun liam ta, khatia nupui a neih hmaa a tlangval lai kha chuan kan inhmuh ní khuaah leh kan mit a intawn ṭum te khan ka lài a, ka zak a, ka hawisawn thuai ṭhin kha a ni a, tunah zawng thil ka danglam ta a ni ang e!

"Marâwna chu Aizawl lamah Krismas a hmang dâwn emaw tia!?" ka nu chuan a ti nang nâng a, ngaihtuah zui pawh ka tum lem lo.

"Nu!?" tia u Dawngzelin khapna mitmenga ka nu a melh ral chuan thil thup an nei tlata hriatna ka nei!

"Âw...ni tak, mahse Sawmi hi chuan ngaihzawng a nei tawh tho a ni lo'm ni? Hria pawh ni se pawi turah ka lo ngai tawh lo asin!" ka nu thusawi chu ka hrethiam lo kher mai.

"Eng chu maw ka nu? Eng thil nge ka hriat pawi lo tur chu ni a?" ka tih chuan

"Marâwna chanchin maw le, ti daih ila i ngaihzawngpa chu a fel em?" tiin thil dang sawi daih a tum tih ka hre ran a, ka lakah thil thup chu an nei chiang a ni.

"U Marâwna chu engtin nge?" ka ti ve ta tlat a, ngaihzawng ka neih loh thu sawi ka tum zet na a, mahse tunah chuan u Marâwna chanchin lamin ka rilru a luah rih tlat!

"Âw a! I lo la ngaihven reng a ni maw Sawmi? Eng vak a ni lo, a nupui kha a tlan titih deuh a, chung vel mai mai chu maw le" a rawn tih chuan thil dang hriat belh ka châk sauh thung.

"Engati nge a tlan a? An intithiam lo em ni? An inneihna a la rei loh nen, a va'n mak ve" ka ti hliai a, mak ka ti tak tak!

"Mi sawi dan chuan a nupui khan in dan a duh a ni awm e, Marâwna chhungte'n an lo phal mai bawk si lo va, Marâwna tak paw'n a duh lo an ti, mahse a nupui erawh a luhlul phian a ni ang, ka rin ang a lo ni lo reuh khawp mai" tia chawl datin ka nu chuan

"A sawi uar phei chuan khawpuimi a nihna chhuangin in chhungkhur sekrek a khawih peih mang lo an ti leh nghal a, a tlan thu hi vawi hnih lai chu ka hre ve tawh, a tlan tak tak a nih ka ring. Chu bakah a nupui hi a mizia a ṭhat vak ka ring lo, tlawn hmasak phawt ngai chî niin a lang" a tih zawm leh zat a, u Marâwna nupui hmel mitthlain ka ngawi kar ringawt.

"Tuna a nupui nen hian lo inṭhen ta se, a rawn hel leh si ang che tih ka hlau ber" u Dawngzeli chu ka en thuai a, ani paw'n min lo en chiang khawp mai.

"A!! I ti awm ang lo em mai a! Kum khat vel chauh alawm an la inneih, an inṭhen te lo rin reng reng. Chu bakah u Marâwna hi ka engah mah a thawk tawh lo, chu vangin" ka tih laklawh laiin u Dawngzeli bawk chuan

"Sawi lo teh, kan ngaih a ṭhat nân i sawi ve mai mai a nih kha! Chaltlânga in inhmuh ṭum paw'n i rawn buai haw vek a nih kha le, tuna a nupui nena an chanchin kan hrilh che pawh hi i ngaihtuah zui leh reng ka ring hial e a!" a lo ti duah a, chhang lèt tawh lovin ka ngawi ta hle hle.

"Sawi tawh s'u, a ho êm mai" ka pa chuan a lo ti ve dut a, ka nu leh u Dawngzeli pawh an ngawi zui ve nghal mai bawk.

Huan kan thleng a, ka rin ai a lo fai ṭha daih, ka pa'n a sam fai ngun a ni ang ka ring. Kan huan hi a hma chuan serthlum leh theihai huan a ni ṭhin a, thei chi hrang hrang pawh a awm nual a, khua aṭanga a hlat loh mai bakah kawng kam maia awm a ni a, thei rah lo ru tâwk an awm châwk ṭhin rèng a, mahse mak ve deuh chu ka pa hian a hau ngai miah lo. An lo ru lai a phawk paw'n an ei tur a lawh tir mai zel a, mahse hau hrep ni chuang lovin tinawn tawh lo turin a zilh ṭhin thung.

Tunah erawh hmana kan thei huan ang em em kha a ni tawh lo va, thlai chin nân kan hmang ta ber zâwk a, a hnaivai bawk nen chawhmeh han lâk lawk pawh a awlsam phah ṭhin khawp mai. Thlâm hial kan sa tawh a, thei lam ai thlai a tam tawh zâwk bawk. Tin, kan huan hi a hmunhma a fuhin dai a tam phian a, chu tak chu ka nu leh pate'n remchangah hmangin thlasik thlai an tih mai; thlai hnah leh thlai rah tlêm azawng tuha enkawl nân an hmang ta daih a, keini lam thlengin chawhmeh min rawn thawn theih phah ṭhin.

Anṭam tawi tê tê kâra hnim ṭo sep sep te chu ka pawt fai melh melh a, ka thil tih lai chawl miah lovin ka ngaihtuahna erawh hmun dangah a vák kual nasa em em thung a, u Dawngzeli khan a sawi dik chiah, u Marâwna leh a nupui ngawr ngawr ka ngaihtuah leh reng tawh! A thu hrimah u Marâwna te nupa pawh an induhin an inhmangaih viau khan ka hre si a, chutianga khawtlânga an thang ta mai chu mak ka ti ru khawp mai. Ka rilru chhungril tak chuan u Marâwna zâwk ka ṭan ru leh âr tawh a, thiam lohna a neih ve tho chu ka ring, mahse ka ṭan ru em em tho.

Tlai dâr 2 leh a chanve bâwr velah kan haw a, naupang ber tih takah kan thingpui in tur ka chhuang nghal a, u Dawngzeli awm ve reng mah se ani hi chu kawng tam taka awl ka duh ṭhin. Kan inbual fel hnu chuan ka nu'n chhangban hertir turin min tir a, sawi tawh ang khan khawpui kan hlat lutuk loh avangin kan khua hi chu thingtlâng ni tho mah se tunah chuan a thingtlâng khua em em tawh lo va, kan naupan zual lai tak tak kha chuan kut den ngei chhangban kan ei ṭhin kha a ni a, tunah erawh khawl her dip sa hlir kan ei ta thung a, a intui hleihin ka hre nghe nghe.

"Engati nge ka call i pick up theih miah lo a? I mu a ni maw?" kan inhmuh rualin Dindini chuan a lo ti nghal pawng pawng a, zan pawh a la ni lo va, mu tura min ngai ringawt chu a ti àwm ang lo, a ṭawng ring bawk si.

"A teuh lo mai, kan vaiin huanah kan kal daih alawm, ka phone ka la ken theihnghilh zui" tia chawl deuh datin

"Enteh Din, thil hrilh tur che ka nei a nia, i hriat hunah chuan mak i ti ve ngawt ang" ka tih zawm zat a, a hriat châk hmel khawp mai.

 

"Eng thil? Lo kal teh, min hrilh teh, eng thil nge chu chu?" min kaih sawn nghal ringawt a tum chu ka lo dang tlat thung.

"Nakinah ka hrilh law law ang che, tunah chuan a chí rih lo, kan awmna hi a khawlai si" tia ka hnial lai chuan hmun danga min kalpui phet a tum tho a nih chu!

"Saw, ka chhang her hun a thleng ṭep a nia, min thlah teh! Haw vat ka duh, i hriat duh chuan zanah lo lêng la ka hrilh ang che" ka kut a vawnna nam pial paha ka tih chuan

"Lo lêng zâwk rawh, ka chhungte an chhuak vek dâwn, kan pahnih chiahin kan awm dâwn a nia" a lo ti thung a, ka ner khum náng a, ka dâra beng ri thlawp pah hian

"Ka ti tak tak alawm, keimah chiahin ka awm dáwn, lo lêng ang che" a ti leh deuh hmak a, ka nui tawp ringawt.

"A nih chuan min lo sâwm ang che" ka ti ve ta tlat a, ei loh hmel zeta min enna chuan ka nuih a tiza zual khawp mai.

"I hre duh tak tak a nih chuan zanriah ei khamah min lo sâwm ang che, buhin âr a pan ngai lo tih hre rawh" ka tih leh chuan

"Awi awi awi" tia min chum ṭawk a tum a, kut min thlak hmain chhangban her dipna khawl ri vut vut lam chu ka pansan ta daih!

Chhangban chu her diptir zung zungin ka haw tlang nghal daih a, ka awm reng a nih chuan min zâwt chhuak vek mai ang, a dilchhut thei si. A hre châk ngâng a ni mahna, zanriah kan ei laiin a lo kal a, chaw a ei hman reng reng emaw ni! Ka nute bulah chuan Dindini te ina ka lèn tur thu ka sawi a, an phal ve mai bawk a, mahse lêng rei lo turin min chah thung. An in chhung kan luh rual chuan ṭhutthlengah min pawt ṭhu nghal a, zawhna min zâwt nghal zawt zawt bawk.

"U Marâwna nupui saw a tlan tih thawm ka lo hria a, mak ka ti tak tak a ni" tiin a thil hriat châk ber chu ka sawi chhuak ta nge nge a, ani erawhin ka thil sawi chu ho a tih hmel viau!

"Chu chu em ni min hrilh tur i neih chû?" a tih chuan

"Ni e, mak i ti ve miah lo em ni? Nupa inkawpchawi tak an nih ka lo rin tehreng nen, ka rin loh lam daihin an awm, chutah an inneihna a la rei lo bawk si" ka ti luam a, ka hrilh nu ber lah chuan min ngei hmel em em leh nghal.

"I va han sawi ho tak, Aizawla kan awm lai pawh khan ka hre daih tawh! Thil dang daih i sawi dâwn emaw tia, ka hriat châk ve tehreng nen!" a tih chuan mak ka ti kher mai.

"Chuti chu an nupa chanchin hi i hre tawh maw!? A nih i hriat tawh si chuan engati nge engmah min hrilh ve miah lo a? Mi hrilh ve tur che alawm, min hrilh la chuan tun ang hian mak ka ti miah lo ang" ka ti pang pang a, ani erawh a tho tharh thung.

"Hrilh ta che ila zirlai ngaihsak ṭha thei lo khawpin i ngaihtuah leh emaw kha a ni ang a, ka hrilh lo che kha lawm hle zâwk rawh" tih leh choka lama phei a rual a, gas on-in thingpui tur a chhûang zui nghal bawk.

"Chhangban ei pahin Alex-a kan be mai mai dâwn a nia, min lo biak a tum a" thu dangah a rawn pakai ta daih a, u Marâwna te lampang ngaihtuah zui loh hmel deuhin ka awm ve tak na a, ka ngaihtuah ru reng tho.

"Ngaihzawng i inla nei vel ê?" ka tih chuan

"Duh la chu nang paw'n i nei ve thei reng alawm, heti hian ka hnen aṭangin ngaihzawng neih zir la, neih châk em em la, chu chu i tân a ṭha ber rih" a ti deuh duah a, ngaihzawng ka neih theih nâna ṭan a la nasa lutuk hi a inthlahrunawm lehling zâwk tawh e a!

"Enteh thil danga kan pakai tak tak hmain, u Marâwna nupui hi a ṭha vak lo em ni? I lo hre vek tawh bawk si, kei ai i hriat hnem ka ring tlat, ka nu paw'n in dan a duh thute min hrilh a, khawtlânga an chanchin thang tur khawp chuan ka ring miah lo, ka beisei lo bawk" ka ti leh ngat a, hre châk miau hek le.

"I ngaihtuah a ho êm mai a! Ka sawi chuan i ngaihtuah zui leh vak ang a, a thiam leh thiam loh lam chhut lovin i ṭan leh nghal ringawt bawk ang a, ka hre chiang ve che êm mai Sawmi" min zilh titiha a tih chuan ner sawkin ka nui ri hak ringawt.

 

"I hriat ang ang chu min hrilh ṭha mai mai teh, hman ang em em kha ka ni tawh bik hleinem" ka la ti fan a, eng lai ber nge ka hriat châk pawh ka hre bik chuang lo.

"I ninawm a! An inneih hma aṭang daih tawh khan kei chuan hmeichhe ṭha tak a nih ka ring lo hrim hrim, mahse nang angin ka ngaihtuah zui vak ve lo va, an awm awmin ka awmtir tawp! U Dawngzeli paw'n a hre ṭeuh ang chû, zâwt ve mai la, ka nu sawi dan phei chuan khaw chhungah hian an lar lutuk a ni àwm e, an nupa inkâr a ṭha vak lo" a ngawi deuh vang vang phawt a, chutah amah bawk chuan

"Kei chu maw Sawm, u Marâwna te ina mo ni kumkhua tur leh kan khuaa awm kumkhua tur êm chuan an hausa mah mahin ka hria, hausa zawng zawng ka hmer telna lam ni lo se. Dinhmun leh khawsak a inan loh chuan insiam rem zung zung a har ṭhin si a, chu chu an buaina ni berin a lang. Hmeichhia phei chu mo nih chiah hian kan mawhphurhna a sâng sàwt em em a, chu tak chu u Marâwna nupui pawh hian a zo lo a ni mai thei. In dan a duh thu mai bakah u Marâwnan rem a tih vak loh thu a awm neuh neuh bawk si a, hre chiang em em lo mah ila hmeichhe ṭha tak a nih ka ring lo ve tawp!" tiin a sawi zawm leh a, ka ngaihtuahna a tikal thui khawp mai.

"U Marâwna chu ka va'n khawngaih reuh" ka phun sep ri chuan ka ṭhiani beng a thleng pha rang teh e!

"Kha kha kha, ka rin tâwk chiah, i khawngaih leh kha ka ring reng a ni! Thiam lohna pawh a nei ve tho ang chu maw le, a nupui ringawt dem chi a ni chuang lo" tiin min zilh leh ta hlak hlak a, kei lah ka ngawi duh bik der si lo.

"Ka khawngaih tlat si alawm, mahse hman anga han ṭahpui rawih rawih tur ang kha chu ka ni tawh bik miah lo tak tak a nia, hma ka sâwn ve tawh lutuk tih i hriat ve vek tho ka ring, u Zothana nen pawh kan inngaihzawn hman ṭep khâ" ka tih chuan duham zet hian

"Awi sawi lo teh, 'ṭep' tih mai mai, 'ṭep' pawh in pha lo, u Marâwna te nupa lampang ka sawipui peih tawh lo che, ninawm, i duh leh u Dawngzeli zâwt ve tawh mai rawh" a ti mawlh mawlh a, a thil chhuan lai so khu vut vut chu a suan zui nghal bawk.

"Ka sawi peih tawh bik reng reng lo" tiel deuh taka ka tih chuan a chek ri tlak tlak a, insum zo lovin ka nui ta chiam a, ani pawh a bang bik chuang lo.

Kan in ang maia ngaiin sitting room-ah ka phei a, TV ka on zui zat a, mahse ka en ṭha peih leh chuang der lo. Khawvel a danglam chak tawh lutuk a, tun laiah chuan kan naupan lai angin TV en peih pawh kan awm mumal tawh lo a ni ber e. Ngawi renga phone ka khawih lai chuan thingpui nen a rawn phei a, phone call a dawng chiah bawk a, rawn call-tu chu tu dang ni lovin Alex-a ngei a ni. Pick up sakin Loudspeaker-ah ka dah zui nghal a, a rawn ṭawng zei vel reuh lutuk chu keimah ber ka lài leh ta daih!

Dâr 9 vel thleng ka lêng a, ka nu'n haw har lo turin min hrilh lâwk sa diam bawk nen zan dang ai ka lêng rei lo khawp mai. Pâwn boruak chu vawt uchuak tak ni lo mah se kan thaw khu ham ham tho va, a vawt thawkhat tih erawh a hriat hle a ni. Kan in pêng thleng min thlah a, chak tawk hian a tlan haw nal nal a, keimahin ka nui ṭiah ṭiah ringawt. Chutia mahnia ka kal hnak hnak lai chuan kan in thlen hma hret kawng sir thim laiah chuan thil che deuh dat a rawn awm a, êngin a chhun phâk china mihring lo ding lang thut hmel ka hmuh rual chuan ka phu teh e!

"Nang maw!?" ka ti hliai a, ka thin chu phu rang zawt zawt tak a ni.

"I phu viau elo?" min biak dan dam ruih avang chuan engtin emaw ni ka awm leh nghal.

"Phu ve e, eng nge kha laiah khan i tih reng reng a? Aizawlah i chhuk emaw ka tia?" pangngai taka ka ṭawng chhuak thei chu kei ngei paw'n mak ka ti hnuhnawh viau!

"Ka sawi awmzia chu eng nge khatah khan i tih a?" keimah bawk chuan ka tih zawm leh nghal a, ka awm dan chu ka hrethiam chiah lo, ka zâng vek ni berin ka hria.

"Mi nghah ka nei a" ti supin ka dinna hnaih zâwng hian a rawn pen chhuak a, ka lo tawlh hnung dat thung.

 

"Min hlau suh, ka tinâ lo ang che" ka awm dan a hmuh ruala a tih leh chuan ka hit deuh mem mem a, ka thin phu pawh a rang sawt a, mahse chung zawng zawng chu vawt ka tih vang a ni lo tih ka hre chiang hle thung.

"I dam ṭha em?" min biak dan chuan ka awm a tinuam lo tulh tulh, ka hmuh tirha zâng vah ang kha chu ni tawh lo chiang tak ka ni!

"Sawmi" tih leh chet hrut a rual a, phawk zet hian ka melh chho kal nghal bawk.

"U Marâwn!" ka beisei loh deuha ka bán rek a rawn chelh thuak lai chuan ka lo ti ṭhawt a, ka tawlh hnung nghal dâwrh a, a mitmeng chu ka sawi thiam lo, thil tam tak min hrilh tur nei a ang ka ti, mahse chutiang chu a ni dâwn lo tih ka hre chiang si.

"Sawmi" tia min kohna chu amah hnung chhawn zawngin tlan haw hlawk hlawk tawh mah ila ka hre pha reng, mahse hawi lêt chí ah ka ngai tawh lo a ni.

(End of Chapter 2)