KA TIHPALH By Havali Adam

                                   KA TIHPALH

                      (Mizo Romantic Short Story)

                                           By

                                    Havali Adam

"Eng nge i tih a?" ka nu aw avang chuan ka phu chiang teh e! 

"Malte?" ka nu aw bawk a ni. 

"Ka lo chhuak" tih chauh sawiin bathroom kawngka chu ka hawng nghal a, ka nu chuan min lo en chik khawp mai. 

"I va awm rei em em ve le?" a zawhna chu ka chhang ang nge chhang lo vang ka hrethiam rih lo. 

"Eng nge i tih?" a ti leh a, ka kuta ka thil ken a hmuh rualin hnung lamah ka thukru titih nghal bawk.

"I awm dan hi a va mak teh thut ve Malte, thil thleng a awm em ni?" lu ka ka thing ringawt a, ka thil ken lai rawn lâk a tum chuan ka phal ta tlat lo, a mak ti hmel pawh ka hmu zui nghal.

"Eng thil nge i thuhruk kha!? Min hrilh teh Mali, eng nge?" a rawn tih leh chuan khumah ka ṭhu hnawk a, ka indawm kun ngul a, ka thil ken erawh ka la pe duh chuang lo.

"Ka rai" keima hriat tâwk lek awm vela ring hian ka ti sep a, mahse a lo hre pha vek tho. 

"Enga!?" tih leh ka bula rawn ṭhut thlak a rual a, ka kuta Pregnancy Test Kit pawh chu lá sawkin a en zui nghal bawk. 

"I rai tak tak a nih hi" ti hluaiin Test Kit dang chu a en diat diat a, a inang vek dâwn tih ka chiang a, ngaihtuah pawh ka ngaihtuah buai peih tawh lo. 

"Ruatsanga hrilh i tum em?" a zawhna avang chuan lû ka thing nawk nawk nghal. 

"I tum lo tak tak em?"

"Tum lo, nang paw'n hrilh miah suh ang che" ka aw chu a nêm hran lo va, mahse chang tak erawh a ni chuang lo, ka mood dik loh vang a ni ber.

"Hrilh loh ngawt zawng a dik lo ang, hriat chhuah hun a la nei dâwn tho tho" ka nu chu ka melh kal a, ka rai thu Ruatsanga hrilh tum awm ang ziazânga a awm leh a ṭawng tlat chu mak ka ti a ni.

"A hriat ve a ṭulna pakhat mah a awm lo" ka vin mah mah a ni mahna ka nu chuan min en nghal zawk a, ka mittui lah chu a rawn tling ringawt leh nghal. 

"Eng pawh ni se mi dang ka va hrilh ang e" tih leh ka room aṭanga chhuah a rual a, kei erawh khumah ka bawk mu nghal thlawp thung.

Ka mit ka chhing vang vang a, hun kal tawh ka ngaihtuah kir lo thei lo. A chhan chu tunah chuan ka pum chhungah nautê a awm tawh tlat a, chu nautê chu ka pasal hlui ni ta LALRUATSANGA fa ngei a la ni zui, dik tak chuan lawm tur nge lawm loh tur pawh ka hrethiam rih lo a ni. Ka lawm lo ni si lovin ka lawm em em chuang bawk si lo va, Ruatsanga ka haw thar ngawih ngawih bawk. Tin, ka tân buaina a awm ang tih ka hlau, eng ang paw'n a fa ni mah se hrilh ka tum lo bur. Kan inṭhen tawh a, ka nunah thuneihna a rawn nei thei tawh lo, ka pum chhunga ka fa pawh hi a hriat ai chuan a hriat loh a fuh zâwk ka ring.

"I nu thu sawi saw a dik em Malte?" tia ka room chhunga lo lut chu ka pa a ni a, ka nu chuan a lo va hrilh vek tawh a nih hmel.

"Aw" ka ti sep a, rei lo tê hnuah ka u leh naute hmel pawh ka hmu zui nghal bawk.

"Ti teh u, zanriah i va ei phawt ang u, chaw ei khamah muang marin kan sawi ṭha dâwn a nia" ka pa chuan a ti a, ka room aṭangin kan chhuak zui nghal chu a ni mai.

Zanriah kan ei lai chuan ka pa'n Ruatsanga ka hrilh dâwn leh dâwn loh min záwt a, ka hrilh loh tur thuin ka chhang a, a awih loh hmel khawp. Ka nu bawk chuan hrilh ṭha a lo ti leh tawh a, lungawi lo ru zetin chaw ka ei a, ka kham har lo hle bawk. Chaw ei khamah ka pa chuan min sawipui leh a, ka nu pawh a tel nghe nghe, mahse ka rilru erawh sawh sawn ka tum lo nasa a ni. A hria a nih leh ama hriat hriatin hre tawp rawh se, a nupui pawh min ring zo lotu laka tláwm ka tum tawh teuh lo. Nupa kan nih lai kha chuan ka lo tlâwm ṭhin a ni mahna, mahse tunah chuan a nupui ka ni tawh lo tlat!

Ka nu leh pa chu an chhuak ve leh mai a, eng ang paw'n min sawipui chîam tum mah se a sâwt lo ve êm bawk a ni. Zan ka mu te chu ka mut a chhuak eih lo va, hun kal tawh; Ruatsanga nena nupa kan nih lai bawkin ka rilru leh ngaihtuahna a rawn luah leh ta. Khatiang khawpa ka hmangaih leh ka nunna hiala ka ngaih mipa khan ka thu sawi pakhat mah a ring duh lo kha a ni a, kan tawpna chu nupa inṭhennain kan khar ta nge nge a, kan inneih nîa kan thutiam zawng zawng kha tunah chuan engmah lo mai a ni tawh a, dik tak chuan kan inṭhenna a la rei lutuk lo bawk nen ka ngai ṭhin, mahse ani chu ka ngaih theih a ni tawh lo.

Kum 2 zénzáwn inngaizawngin a kum thumna turah kan innei a, nupa kan nih hnu chuan vanduai thlak takin fa kan nei thei lawk lo va, kum lî lai a ral hnuah pawh ka la rai thei chuang lo. Tichuan kan nupa inkarah a hma zawnga buaina awm ngai hauh lo kha buaina a rawn awm ṭan a, hmuh mawh a ngah sâwt em em a, kei paw'n ka ngah ve tho, mahse amah ang em em ka ni lo thung. College kan kal lai aṭang tawha ka ṭhianpa ni tawh Isaac-a a thik tlat a, kan ina a lo kal emaw a lo lén te hian biak pawh a lo be ṭha ngai lo va, chu mai a ni lo, zû in a ching chho ta zeuh zeuh bawk a, zû berin kan nupa nun a rawn luhchilh tâkah chuan buaina a awm lo thei lo a ni.

Zû in a ching ta bawk nen mi hrâwk leh mi vin a hrat chho ṭan em em bawk a, ka pasal, min hmangaih em emtu kha a ang lo tial tial a, kan nupa inkar chu chhe chak tak a ni. In hrang kan chang khanglang tawh bawk si nen zana a rawn haw tlai changte khan hrehawm ka ti ru ṭhin, a bul ber chu fa ka neih lawk loh vang ni berin ka hre ta a, a dik ngei bawk. Amah tak chuan a sawi chiang fak lo na a, a awm dan leh a mitmeng aṭangin ka hre thei thung. Fa ka neih theih rih loh avanga chutianga a awm ta mai chu ka rilru a nâ em em a, nuam lo tih sa tawh nen a laka ka lo inthlahrunna chu thinrimna leh lungawi lohnain a luahlán a, kan hmabak chu inhauh a ni mai.

Zû a in loh hi chuan pangngai deuh hian a awm a, zû a in tak hian a buaithlak ṭhin a ni. Ka nu leh pate han hrilh ngawt dâwn ila mo tuarzuau lutuk nih ka hlawh daih thei tih ka hre ve ran bawk si, sawi loh leh hrilh loh ka ngah phah ta réng a, ka chhungte bulah pawh Ruatsanga awm dan chu ka sawi ngai lo hrim hrim. Nupa inngeih leh inhmangaih tak ni turah min ngai vek a, khang kum hmasa lamah te kha chuan kan ni ṭhin ngei a, hlim pawh kan hlim ṭhin, mahse mihringte hi kan lo inthlak danglam harsa lo êm a ni e. Ni tura ka phal loh leh ka rin ngai loh angin a awm zel a, mahse chutiang chu zû a in lai bawkin a ni thung, zû a in loh hi chuan ka lakah lungawi chiah lo mah se a sual ngai hran lo. 

A ruih laia min bén zan khan ka thinin a tuar ta bik lo va, rilru nâ zetin kan inah ka haw a, ka nu leh pa; Ruatsanga nu leh pate phei chuan ka haw tih an hre lawk lo nghe nghe. Kan nupa chungchang sawiin ka chhungte va lêng phei lo se chu an hre har mai thei, a chhan chu Ruatsangan engmah a lo hrilh reng reng hleinem. A nu leh pate chuan min hruai turin an nawr ve ngei a, mahse thla hnih a liam hnuah pawh tun thleng hian min rawn hruai a la tum lo hrim hrim. Min hruai haw leh tum ta pawh ni se ka lêt peih tawh kher lo ang ka ring, ka bungrua an lák lai paw'n a awm reng a, engmah a sawi lo va, ka nau hnen aṭangin engkim ka hre leh vek a, ka rilru a nâ ve thlawt a ni. 

Kan inṭhen aṭanga kâr khat hnuah ngaih namên lovin ka ngai a, zan khat phei chu ka ṭap tawp ringawt! Ka chhungte erawhin ka ṭap tih an hre lo hlauh a, hria se chu min khawngaih emaw kha a ni leh ang a, an hmuhah khawngaih thlak tak anga awm ka duh lo a ni. Kâr hnih hnuah pawh ka ngaihna leh ka thlakhlelhna a la bo thei chuang lo va, thla khat hnuah erawh tlémin a zia ta deuh. Ka rai tih pawh hre lo khawpa hun ka hmang chu mak ka ti a, a hmate kha chuan rai ka châk em em a, eng emaw hlek ka taksaah dik lo emaw danglam awm se rai turah ka inngai thuai thuai ṭhin a, mahse tunah ve thung chuan ka rai tih pawh ka inhre lo a nia, eng dang vang a ni lo, Ruatsanga nena kan inṭhen vang a ni e.

Ka rai tih kan hriat tâkah chuan ka nu nen damdawi in lamah kan va in-check-up nghal a, Ruatsanga bawk ka hre chhuak leh tawh, he pa hi chu a mak a ni. Khati khawp khan ka rilru a tinâ a, mahse ka hmangaihna leh ka thlakhlelhna erawh a bo thei chuang si lo. Amaherawhchu, ka la hmangaih reng avang ngawtin ka lêt leh dâwn tihna a ni lo va, min sâwm eng ang pawh ni se lét leh ka tum tawh lo hrim hrim zâwk a ni. Tin, a fa, ka fa ni mai tur, ka pum chhunga awm mêk pawh hi a buaipui leh ngaihsak ka phùt lo va, a tel lo paw'n ka enkawl thei dâwn tih ka chiang em em bawk. 

"Malte" min kotu lam chu ka hawi nghal a, Isaac-a lek chu lo niin.

"Nang elo? Khaw'nge i kal dâwn a?" ka ti nghal lûam a, tun ang huna ka hmu teh thut chu mak ka ti ang reng. 

"Ka chhuak lawk dâwn a, khaw'nge i kal zâwk dâwn? Lo kal rawh, ka lo phur ang che" a ti zung zung a, ka ṭhianpa a ni bawk a, a sâwmna chu hnár ka tum lo hrim hrim. 

"Ka pa Office-ah ka kal lawk dâwn maw le, documents a theihnghilh a, hmanhmawh deuh teh aw" tia hma lam hawi ka tum chu mi hmuh ka nei ta tlat mai.

Ka hawi kán tawhna lam chu ka hawi lêt leh ngat a, ka hmu sual lo, amah Ruatsanga ngei a ni. Eng nge kan vêngah a rawn tih reng reng? Rawn kal chhan tur a nei lo hrim hrim, nge kan ina lo kal a tum zâwk? Bike-a ka chuan chhung zawng chuan ka rilruah thil dang a awm thei tawh lo, Ruatsanga mawlh chu mak ka ti, a Car te kha a la ngai vek, mahse a hmel erawh kha chu a tla deuhin ka hria, ka hre sual mai thei bawk. Kan inah a lo kal ang em tih te ka ngaihtuah kual vak a, Isaac-a min biakna tam tak pawh ka chhang ṭha mumal lo, ka tihtur ka zawh fel hnua ka haw leh te chu ka zâm ru er er thei nia maw le, dik tak chuan kan ina Ruatsanga lo kal ka hlauh mai bakah ka haw laiin a lo awm ang tih ka hlau a ni.

Kan in chhung ka lut chu ka thin a phu dep dep a, ka nu chuan amahin ei tur a lo siam melh melh a, Ruatsanga hmel ka hmu miah lo bawk. Ka nu chu ka pui zui nghal a, ka rilru erawh hmun dang daihah a awm thung. Thla hnih hnua ka hmuh leh hmasak berna a nih vang nge ni, Ruatsanga hmel khan ka mitthla a luah tlat a, a châm tlat a, ka ngaihtuah chian poh leh a hma aiin a cher tih ka hre thei. A nih loh paw'n zû a in nasa a ni ang, a duh dûh danin awm teh se, keia lo sawi tur a awm tawh hleinem. A duh leh zû in vak vak se, a duh leh rui vak vak se, pawi tih loh te, en liam thiam te ka zir a ngai a ni mai. 

"Ruatsanga a lo kal teh hlawl a" ka nu lam chu ka hawi vat a, ka phu deuh uih bawk. 

"Eng nge a lo tih?" ka ti nghal a, ka nu ve thung chuan

"Eng vak mah, a lo kal tawp, awm pawh a awm rei lo" a lo ti mai a, ka ngaihtuahna a kal thui leh ta hle.

"Ka rai thu hi a hria em? I lo hrilh em ka nu?" chu thil chu ka zawh duh tak leh a hrilh ka hlauh em em thil pakhat a ni. 

"Hrilh ta ila engati nge?" ka nu min chhan dan chuan ka ngaih a tiṭha lo zual!

"Ka duh lo ka tih vek tawh khá, a hriat ve a ṭul lo, hre tlâk pawh a ni lo" ka ti deuh hlawk hlawk a, ka lung lah chu a puam nghal ringawt zui.

"A la hre dâwn tho alawm" a tih laklawh lai chuan

"Hre dâwn lo" ka lo ti vung fak a, ka room-ah ka lut zui nghal hmak a, ka ṭah a chhuah et et chhan chu ka hrethiam lo a ni.

"Ka hrilh lo a nia, engmah ka sawi lo" ka nu awah chuan inthiam lohna leh min ngaihtuahna a lang tam hle a, nu a ni a, ka awm dan chu a hriatthiam ka ring tawp ringawt. 

"Ka zawhna leh ka biakna pawh a chhang lo, a ngawi ngul a, a chhuak leh nghal daih, a cher deuh bawkin ka hria" a rawn ti leh a, rei lo tê hnuah ka room aṭang chuan a chhuak a, kei pawh room chhungah ka awm rei leh ta bik chuang lo.

Ka hun tawnin a zir lo laklawh bawk nen ka ni hman, ka zan hun hman dan leh ka hun hman dan hrim hrim chu a nuam lo vel vek a, zan lama Ruatsanga Car ngei mai kan in kawta a inhûng ṭhin te hlei hlei chuan ka awm a tinuam lo zual. Ka rai tih a hria ti dâwn ila ka chhungte'n an hrilh bawk si lo, ka chhungte chauhin ka rai thu an la hria a, mi dang erawh hrilh hunah ka la ruat chiah lo a ni. Mut ṭhat theih ngai loh sa nen kan in bula Car inhûng ṭhin chuan ka ngaihtuahna a lá pêng leh ta nge nge a, zan tam a awmna ngai hlira ka hmuh fô tâkah chuan Ruatsanga ngei niin ka hre ta bawk.

"Chu tu nge? Va hawnsak mai teh u, a kikna a rei tawh êm mai" ka nu ṭawng ri lang láng chu ka ngaithla kar a, ka room aṭangin ka pen chhuak nghal a, kawngka hawn tuma ka pa kal pawh ka hmu zui nghal. 

"Tun ang zan rei tawhah te eng nge i lo tih dâwn Ruatsang? A va mak teh thut ve, zû i a ni maw? Khaw maw lo lut teh, zû in tawh suh ka tih che kha maw le" ka pa chuan a ti nghal mawlh mawlh a, ka rin ruk ang ngeiin Ruatsanga a lo ni e.

"Maltei ka hmu thei ang em ka pu?" fiah lo ruai hian Ruatsanga chu a rawn ṭawng chhuak a, ka room kawngka bula dingin ka lo ner sawk ringawt.

"Va haw zâwk rawh, khi zan a rei tawh, ka va hruai haw lawk zâwk dâwn che em ni ang? Motor i khalh thei ang maw?" ka pa chuan a ti ta daih a, Ruatsanga erawhin thil dang sawi a tum lo a nih hmel.

"Ka hmu châk êm mai, ka hmuh min phalsak hram rawh ka pu" a ti deuh tlat a, ka pa chu ka lam a rawn hawi a, a lo pen phei zui nghal bawk. 

"Saw, va inbuaipui rawh u, haw turin hrilh nghal bawk la, a inkhalh haw theih loh chuan min lo ko ang che" tiin ka pa chuan min kal pel a, an room-ah min luhsan daih a, kei pawh chu sitting room lamah ka phei ve ta nge nge.

"Malte" ka hmel a hmuh rualin Ruatsanga chuan a rawn ti nghal a, zû chu a in ngei a, mahse rui chhe lutuk niin ka hre lo.

"Engati nge tun ang hunah i lo kal? Lo kal tur pawh i ni lo, eng vanga lo kal ringawt nge i nih? I zak lo'm ni?" ka aw chu a nêm lo khawp mai.

"A chhan chu ka ngai che alawm" a rawn tih chuan ka kut ka hum ruh ngawt ngawt a, a thil sawi chu a ruih vang bak a nih ka ring lo.

"Haw rawh, kan inah hian lo kal tawh suh" ka tih laklawh laiin ka kut a rawn chelh a, chutah ngenngawl deuha mi en zuai ruih chung hian

"Ka rualin i lo haw ve ang em?" a rawn ti a nih chu!

"A teuh lo mai!" ti hlakin a kut chu ka phih thla sawk a, ka tho zui nghal bawk.

"Haw rawh" ka ti leh salh a, a ṭhutna aṭangin a tho ṭuah ṭuah a, ka inrin hma hauhvin min rawn kuah leh ta ringawt!

"Ruatsang!" nam sawn tum paha ka tih lai chuan

"Ka ngai che, ka ngai lutuk che Malte, ka bulah lo haw tawh rawh" a lo ti thuai thung a, sawi khalh hlau te pawh a ang mah zâwk!

"Ni lo, ka lo lêt tawh dâwn reng reng lo" tih leh nam vak ka rual a, a awm sawn thei ve ta hram bawk. 

"Va haw tawh rawh, i chhungte paw'n an ngaihtuah tawh ang che" ka tih chuan a thaw ri hawk a, inchhir hmel zet hian min en chhuk run a, a mit chu ka en ṭha ngam lo, ka khawngaih dâwn tlatin ka hria. 

"Ka chhungte bulah ka awm lo" ti hniam supin a inher a, a chhuak zui nghal a, a thu min hrilh zawh chiah chuan ka ngaihtuahna a luah leh ta ber mai.

Kan inṭhen aṭangin thla hnih a liam tawh a, a chhungte bula a la lêt lo a nih chuan nupa kan nih laia kan inah khan a la awm reng tihna a nih hmel a, mahse eng vanga la lêt lo nge a nih ang? A haw hnu thleng chuan ka ngaihtuah zui char char a, zing dár li thleng rilru séngin ka meng nghe nghe a, a hnu lamah erawh ka hre tawh lo. Ka harh leh meuh chuan khua a lo vâr vek tawh a, nî a lo kang sâng vâh tawh bawk. Tukṭhuan ei laiin ka pa chuan zan lama Ruatsanga haw dan chungchang min zâwt a, chhanna mumal pawh ka pe thei lo, nizana a haw dâwn khan en pawh ka en zui lo hrim hrim a, tluang taka a haw ka ring ve tawp ringawt.

Zan lama rawn lén a nei ta zauh zauh a, chhun lamah erawh office a kal ṭhin bawk nen a hmel kan hmu ngai lo. Harhfim hlirin ka hmu tawh a, zû rim pawh a nam tawh ngai lo va, mak ka ti ang reng viau bawk. Chuti teh thuta zû rim a nam tawh ngai lo leh min rawn hmu ta fô mai chu ka tân chuan mak tih loh theih a ni lo, ka chhungte pawh an bang chuang lo, a rawn lén apiangin pangngai tak hian an lo be ziah a, Ruatsanga ni se a rui tawh ngai bawk si lo, awm dan tur min tihrilhhai lek lek chu a ni e. Zan khat a rawn lêng chu

"Lo kal tawh suh" ka ti ta nge nge a, ka nau nen chauha kan awm lai a ni a, mi dang erawh mitthi inah an kal vek thung. 

"Eng vangin?" min en chiang hle a, ka ṭawng dan avang chuan a lawm hmel tehchíam lo bawk.

"I lo lang zing mah mah, kan inṭhen tawh tih hria la, min rawn ngaihven tawh miah suh" ka ti salh salh a, a nui suk duh lek chauh a nih chu!

"A teuh lo" ti hlukin min ṭhut hnaih sauh leh ta nghal a, inring ranin ka awm a, min kuah thut ka hlau a ni ber. 

"I zak lo!" ka aw chu a pangngai lo sâwt hle a, ani erawh chuan engah mah a ngai lo thung. 

"Haw rawh, lo kal tawh ngai suh" ka tih zawm zat a, a lu a thing nawk nawk a, ka thin a tirim ru tawh tak zet a ni. 

"Engtikah nge min hrilh i tum?" ka en nghal hau a, a zawhna chu ka hrethiam lo hle bawk. 

"Ka fa i pai thu hi engtikah nge min hrilh i tum?" a rawn tih leh tâkah chuan a thu sawi awmzia ka hrethiam ve ta chiah!

"I fa a ni lo" ti hmakin ka meng ling hlar a, ka beisei loh lutuka a lo hria chu thinrim tak ka ni! 

"Ni chiang e le, eng vanga min hrilh tum miah lo nge i nih?" aw kâ vinin min be miah lo na a, a ṭawng dan chuan ka thin a khei em em tho. 

"LALRUATSANG!" tia ham ka tum chu ka bán rekah a lo chelh chat a, min chelh hneh riap riap khawp mai. 

"Min thlah nghal rawh!" ti vin fiah fakin ka tal a, mahse ka tal chhuak lo nasa!

"Engati nge min tihbuai reng a? I buaipui leh i ngaihven ka phút em ni? Nauté pawh hi i rawn ngaihtuah a ngai lo, keimahin ka enkawl thei, min rawn hmu tawh suh" ka ti leh ta nge nge a, a âwma min kuah beh rual chuan ka ṭah a chhuak ru nghal em em bawk.

"Ka tihpalh" tih chauh a sawi a, tal chhuah ka tum ngial a, mahse a ngai tê bawkin ka thei leh ta lo. 

"Engkim avang khan" ti leh supin min kuah nghet sauh a, insum thei tawh lovin ka ṭap chhuak ta nge nge.

"Ka laka i rilru puthmang a pangngai leh theih nân hian eng nge ka tih ang ka hre lo a ni" a ngawih vang vanh hnuah a rawn ti leh a, ka che thut a, a inrin loh lai a ni mahna, ka tal chhuak thei ta hlauh mai.

"Engmah tih a ngai lo, a chhan chu i bula rawn lêt ka tum tawh reng reng lo" ti hlak hlakin ka tho zui nghal a, a mitmeng aṭang chuan a inchhir tih ka hre thei, mahse a sáwt tawh si lo.

"Ka va haw phawt ang e, mamawh i neih phawt chuan min hrilh hreh lo ang che. Nangmah chiah inngaihtuah tawh lo la, i pum chhungah kan fa tur a awm tawh tih hre reng ang che" a tih dap dap hnu chuan min chhuahsan zui nghal a, ka chhang buai vel peih ta lo law law.

Ka rai tih ka nu'n a lo hrilh tih ka hre hnuhnawh chu ka lungawi lo khawp mai, hrilh miah lo tur khan ka ti lâwk vek a, mahse a hrilh chhan a sawi tâkah chuan dem chí vakah ka ngai leh ta lo. Kâr a'n ral leh meuh chuan Ruatsanga chhungte lam paw'n ka rai tih an hre ve ta nge nge a, an rawn lêng nghe nghe a, min be ṭha viau mah se an fapa nena inzawmna neih erawh ka tum tawh lo bur. Ka hmangaih loh vang a ni lo va, ka hmangaih em em zâwk, mahse ngaihdam min dil pawh a tum miah lo a nia, chuta kâra a zuam theih tura lo awm leh vel chu ka tân a tlawm thlak lutuk, tunah chuan nupa kan nih lai ang kha ka ni tawh bik lo. 

Ruatsanga chu zan lamah rawn léng ṭhin tho mah se a rawn kal tlêm ta deuh a, ka sawi vang kha nge ni, ka chanchin leh nautê lampang engmah min zâwt tawh ngai lo. Amaherawhchu, ka chhungte nen an inbe daih zel a, kan inngaihzawn lai aṭang tawh an innêl em em ṭhin kha a ni a, sawi tur an hre thei khawp mai. Ka pa a kawm thiam mai bakah ka nu leh zel pawh a kawm thiam a, ka chhungte laka a awm dan vel chu ka ngei ru leh tlat tawh! Kei erawh ka chhungte ang lo takin ka awm ngul a, biak pawh ka be ngai lo, amah paw'n min be em em chuang lo va, mahse min en leh zawk ṭhin tih chu ka hre ru reng zel tho.

"Engati nge Malte? I ṭha em?" ka nu aw chu ka hre reng a, mahse ka chhang peih thlawt rih lo. 

"Engtin nge i awm?" ka bul chêta dinga a rawn tih leh chuan

"Ka pum a nâ" ka lo ti sep a, ka thlan tui a bawl ṭiam ṭiam a, a nât dan chu namai lo tak a ni. 

"Engtin nge a nât a? I tauh palh em ni?" min ngaihtuah zeta a tih chuan ka lu ka lo thing thuai a, ka pa leh ka unau dangte pawh an lo thleng phei har lo hle. 

"I awm dan hi a ṭha miah lo a nia, Hospital lam i pan thuai teh ang u" titu chu ka nu bawk a ni a, a reh ve leh mai ka ring kha a ni a, mahse ka pum nât dan erawh a zual zel thung si.

"Ruatsang, nang pawh lo kal ve nghal rawh" ka pa mi biak pa chu ka en ṭawk ṭawk a, kan ina rawn lêng turin a lo thleng vel chiah a nih hmel.

"Engati nge!?" hlauhthawn hmel zet hian min en nghal a, ka chhang chiah chuan 

"A pum a nâ thut a" tiin a lo chhang a, kei erawh ka pa min pawm ang ângin ka awm zawi hnuang a, thil ka hre vek bawk si, ka pum chu nâ tawh tak a ni. 

"Khawi ka lo pawm ang ka pu" tia min rawn pawm a tum chu ka pa chuan min pawm tlang law law tur thu a lo hrilh ta zâwk a, motor chhungah min dah lut zui nghal thuai thuai bawk. 

Hospital lam kan pan lai te chuan ka nun min ṭawng thlamuan char char a, ka pum ber chu ka ngaihtuah, nau ka chhiat ang tih mawlh ka hlau a ni. Kan hnungah Ruatsanga a lo tlan ve reng tih pawh ka hria, mahse ka pum nâ chuan keimahah hmun an chang hnem lutuk tlat, thil dang ka ngaihtuah thei lo, chutah nau ka chhiat a nih ngat phei chuan a pawi khawp ang. Kum a vei fê hnuah a vawi khatna atân nau ka pai ve thei hram a ni a, ka chhiat a nih ngat chuan ka tuar nâ dâwn tih ka chiang. Hospital kawt kan thlen rual chuan ka kang nghal lawp a, mahse min pawmtu chu ka pa ni lovin Ruatsanga ngei a ni tawh thung.

"Hlauthawng suh aw, i ṭha leh thuai ang" tiin min be pah reng a, ka pum a nâ bawk nen ka ṭap ta ringawt a, min ngaihtuah zual hmel nghal hle bawk.

Doctor-in min endik lai chuan engkim ka hre vek a, thil ei sual ka lo nei chu niin, damdawi min eitir nghal zung zung a, vanneih thlak takin nautêin engmah a tuar lo hlauh a, ka lawm tak zet. Ka pum nâ a reh fel hnu chuan kan in lamah kan inphur haw ve leh mai a, duh aiin ei in lamah ka fimkhur lo lam hret chu a ni. Ruatsanga pawh a lêng ta reng a, min ngaihtuah hle a, mahse a laka ka rilru puthmang erawh a la ngai reng thung. A duh hûn huna koh haw theih nih ka tum tawh lo va, zahawmna leh chapona ka nei ve a ni tih hria se ka duh bawk. Zan dang ang lo takin ka thlah ngai lovin a haw a, zan dangah hi chuan veranda thleng ka thlah ṭhin a, mahse chu erawh thil mawi nia ka hriat vang chauh a ni thung.

Thla a liam a, ka dul pawh a puar langsar ṭan a, ka chhungte'n min ngaihtuah mai bakah Ruatsanga leh a chhungte hnen aṭangin ngaihsakna ka dawng awl lo va, dik tak chuan nuam lo ka tihna a zual tulh tulh zâwkin ka hria. Min rawn ngaihven buai lo law law se, a bikin Ruatsanga, lo kal tawh lo se a ṭhat zâwk ka ring, mahse chu chu ka thil duh ber a ni chiah em ka hre chuang lo. A tlâwm mawh lutuk leh ngaihdam min dil a tum miah lo chu ka tha tinâtu ber a ni tawh a, ka hmuh phakah awmin min rawn ngaihsak reng ṭhin bawk nen ka tân chuan huat reng a harsa a, mahse huat ka duh bawk si, awm dan tur pawh ka hrethiam tawh lo.

Ka pum chhunga nautêin thla 5 a tlin hnu phei chuan Ruatsanga hnen aṭangin eng eng emaw ni ka dawng ta fô va, amah pawh ka hrilh tawh nghe nge, thil min lei tawh lo turin; mahse awmzia pakhat mah a awm chuang der lo. Zan khat erawh ka thinrim a kal tluang bawk nen ka ṭawngkhum hrep a, ka âng bawrh bawrh a, hun kal tawh nen lam ka sawi chhuak hmawk hmawk a, a ngawi reng thung a, mi chhan lêt pawh a tum lo. Ka pa min khap ngai hial khawpin ka ṭawng nasa a, ka ṭap bawk a, Ruatsanga mitah chuan rilru nâtna leh inchhirna tam tak ka hmu ngei a, mahse ngaihdam min dil a la tum chuang lo a nih hmel, ngaihdam indilna thu engmah a kâ aṭangin a chhak chhuak lo hrim hrim.

Chumi zan aṭang chuan a rawn lêng khât ta deuh a, mahse rawn lêng tawh ngai lo tawp chu a ni lo. Isaac-a pawh a hmel kan hmu zauh zauh a, mipa mah ni se ka ṭhian ṭha ber te zinga mi a ni a, sawi tur a hre thei si, min tihlim thei khawp mai. Ṭum khat chu a rawn lén laiin Ruatsanga a lo lut teh hlawl a, zan dangah hi chuan rawn kal ṭhin mah se Isaac-a nen an inhmu ngai lo va, an rawn lén zan a inang ngai lo a ni ber. Thil mak tak pakhat leh bawk chu Ruatsanga chuan thikna mitmeng paw'n a melh tawh lo va, a hmu mawh tawh lo ti ila a sual lo ang ka ring. Chu tak chu ka mak tih a ni thung a, a hmate kha chuan a thik em em ṭhin kha a ni a, a inthlak danglam ta lutuk chu a mak a ni.

"Kha" tia lehkha min petu Isaac-a lam chu hawiin

"Eng nge?" ka lo ti ve nghal a, a thil min pek ka en chiang chiah chu mak ti tak ka ni!

"Nang hi!" ka ti hluai a, ani erawh a lo nui put put thung. 

"He thil hi a lem nge a tak?" ka ti leh ngat a, ka beisei loh lutuka Wedding Invitation Card ka dawng hlawl chu a mak a ni; chutah ani ber kher!

"Min va han ring lo awm ve le, Surprise che ka tumna a rei tawh, ka rin ang ngeiin mak i ti chiang e" tiin a nui zui hak hak a, ka hamhaih lutuk chu a lûah ka nam sawk ta ringawt.

"A mak ê" ka ti leh ṭhin a, ngaihzawng a neih áwm pawh ka hre ngai lo tlat a tin ni! 

"In inzuina a rei tawh em?" ka tih chuan

"Kum 1 leh a chanve vel chu a ni tawh ang" a lo ti ṭha ve mai a, a tira mak ti em em khan thu dik a ni tih ka hriat tâkah chuan ka lawmpui hnuhnawh leh si khawp mai.

Ka chhungte erawh Invitation Card pe lovin a hrilh pangngai a, ka chhungte pawh chuan mak an ti ve tho. Ka rilru kil khata riak reng Ruatsanga ve thung chu a reh ta hmak a, a zawnin zan thum ngawt a hmel ka hmu tawh lo, dik tak chuan ka ngai ru ngawih ngawih, ka thlahlel em em bawk. A chhan chu ka hmangaih tlat a, inṭhen eng ang mah ila ka la hmangaih miau mai si a, chu thil chu ka thunun theih piah lam thil a ni tlat si a ni. Kâr tam a ral hmain Isaac-a chuan nupui duhawm leh hmelṭha zet mai a nei ta ngei a, amah ai kum 6 dâwnin a naupang zâwk leh nghal a, an inhmeh khawp mai. 

Ni khat chu ka nu nen in-check-up turin Hospital-ah kan kal a, kan haw lama ka thil hmuh erawh chuan ka rilru a tinâ khawp mai. Tu dang ni lovin Ruatsanga a ni a, hmeichhe pakhat nen hian a Car chhungah an awm dun a, ka hmu chiang si, a hmeichhia zâwk lah chuan a nêl hmel em em a, Ruatsanga paw'n a huat loh hmel khawp mai. A beka mit nei ang mai hian kan awmna lam a rawn hawi thut a, ka hawi sawn thuai a, rilru nâ ru zetin haw thuai thuai ka rawt ta ringawt a, ka nu lah chuan ka thil hmuh ang a hmu ve der bawk si lo, ka awm dan teh thut chu mak a tih hmel hle. Zanah chuan Ruatsanga hmel kan hmu ta ngei a, kâr khat chhung ngawt a hmel ka hmu tawh lo va, a lo kal chhan chu chhun lama ka thil hmuh vang bak a nih ka ring lo.

"Malte" min ko tih hre reng mah ila a lam hawi ka tum lo bur, ka ngei êm a tin ni!

"I ngaih ang kha a ni lo a nia" a rawn ti leh a, ka rilrua awm a hre chiang hle a nih hmel. 

"Ha! Insawi fiah tum buai duh suh, a ṭul hran lo" ka tih chuan 

"Insawi fiah ka tum hleinem" a lo ti hmuk a, a aw aṭang chuan a thinrim ve emaw ni!

"Hetiang mi hi i nih ka ring ngai lo, mahse a pawi lo, inzawmna kan nei tawh chuang hleinem, i duh dûh danin awm rawh. I duh leh ngaihzawng nei la, nupui nei leh la, kei leh ka fa hi chu a them paw'n min rawn ngaihtuah suh" ka ti ta duah a, ka rilru a nâ ru em em bawk. 

"Luhlul tlat lo teh, thil ni lo lô ngaihtuah lo bawk la" a rawn tih chuan ka melh kal a, ani paw'n min en chiang khawp mai. 

"Haw rawh" ka ti leh tawp a, sawi tur hre tawh hek lo.

"Teuh lo, zaninah hian engkim kan sawi fel ang a, a nih tur ang a ni vek bawk ang" tiin min ṭhut hnaih a rual a, ka bânah a rawn chelh zui nghal. 

"Min thlah rawh Ruatsang, ka thin tirim zawngin awm suh" tia ka ṭawngkhumna pawh chu engah mah a ngai eih lo. 

"A rei tawh mah mah a ni" ti supin min pawt tho va, ka inrin hma hauhvin min pawm kang nghal lâwp bawk.

"Min dah thla rawh!" tiin ka tal vak vak a, a Car chhunga min dah luh lai te chuan a samah ka kek vak vak a, engah mah a ngai lo hrim hrim thung.

Car chhunga a rawn ṭhut luh aṭanga rei lo tê hnuah kan tlan chhuak zui nghal a, nupa kan nih ve laia kan in ni ṭhin awmna lamah chuan kan tlan zel a, rilru nât avangin ka ṭap leh ta nge nge. In kawt kan thlen rualin min pawm chhuak zui nghal a, tal emaw a chet dan dal zawnga awm ka tum buai ta lo law law, awmzia a awm dâwn chuang lo tih ka chiang! Chu bakah mipa a ni a, tharum zawng chuan ka hneh ngâng lo a ni. Kan nupa room ni ṭhin ngeiah chuan min luhpui a, rilru nâ zetin a tih ang âng chuan ka awm tawp a, khuma min nghah thlak hnu chuan ka hma takah a rawn ṭhingṭhi ta, a thil tih tum leh a awm dan chu ka hrethiam lo tak zet.

"Khawngaihin ka bula awm hlen turin lo lêt leh tawh rawh Malte" dam dapa a tih chuan ka melh kar a, a mitmengah chuan lungngaihna tam tak ka hmuh mai bakah khawharna nasa tak ka hmu thei.

"Ngaihzawng nei bulah hian lêt leh ka tum tawh lo" ka lo ti vin fiah fak a, chutah nin hmel zet hian

"Ngaihzawng ka nei lo, i hre sual a ni" a rawn ti hluai a, zû rui ngat se zawng min vin hrawk ka ring. 

"Ngaithla teh, ka dik lo tih ka hria, kan inṭhen chhan pawh hi ka thiam loh a ni" tia a ṭawng laklawh lai chuan

"I hre lo a ni ang, i chapo bawk a, ngaihdam mi dil pawh i tum reng reng hleinem" ka lo ti hmak a, thinrim avangin ka hmui chu a khur dat dat bawk. 

"Ka tihpalh ka tih vek tawh kha maw le" tihsual nei lo ang mai hian min en a, chu chu ka rún hle thung. 

"Tihpalh tih kha ngaihdam indilna a ni lo, sawi tawh lo teh ang. Min hruai haw rawh, i bula awm reng pawh hi ka tân leh ka nautê tân hian a ṭha lo" ka tih leh chuan a ngawi deuh vang vang a, ka ṭawng dan chu a lá nâ a ni mahna.

"Ka hmangaih che" ka khup pahnih dawm paha a rawn ti chiah chu a hmel ka en rang khawp mai. 

"Ka thinlung zawng zawngin ka hmangaih che Malte" a ti nawn leh sup a, min melh ran a, kei erawh chuan ka hmui ka pet fan fan a, ṭah ka hlau hle bawk.

"Ka ngai che a, ka thlahlel che a, ka bula awm reng turin ka duh che Malte" a ṭawngkam leh a hmelah chuan a tlawmzia ka hmu thei a, ka laka a inphah hniamzia ka hmu thei a, chu tak chuan ka ṭah a tichhuak leh tlat lawi si a ni.

"Chuti si engati nge khami zan khan min ben?" ṭah chhuak aw zet hian ka ti ṭuau a, min kuah nghal thuai a, insum thei lovin ka ṭap chhuak ta nge nge.

"Kha thil avang khan ka tihpalh tak zet, ka ruih lai ni lo se chu kut thlak che ka tum ngai lo. Ka tiam a che, vawi khat mah kut ka thlak tawh lo che ang a, zû ka in leh tawh ngai lo bawk ang" inthiam lo aw zet hian a ti mawlh mawlh a, kei erawh ka lung a la dam famkim thei chuang lo.

"Ka haw hnuah pawh mi rawn hruai i tum reng reng lo a nih kha, min hmangaih ve tak tak pawh ka ring lo Ruatsang! Ka ngai em em che a, mutmu thlengin ka tuah ṭha ngai lo asin, mahse nang chu i reh tlawk tlawk a, tunah; tlai khawhnuah i rawn lang chauh a, i bula lêt leh tur pawh hian min duh tak tak ka ring lo a ni" ka ti zuah zuah a, ka la ṭap pur pah reng bawk.

"Ni lo, i hre sual, ka bula awm kumkhua turin ka duh che. Min ngaidam lûl teh Malte, i chunga ka chet dan avang khan ka tihpalh tak zet, min ngaidam thei ang ti raw? Sawi teh ka hmangaih, min ngaihdam thu sawi hram teh" ka khabea rawn chawiin a ti dam dap a, a hmelah chuan a inchhir ve tak zet tih ka hmu thei. 

"Mi sualpa" tiin ka ṭah nuih hawk a, chu veleh ka hmuia rawn fawh vawng vawng a rual nghal a, ka ngaidam a ni tih leh ka la hmangaih reng a ni tih chu ṭawngkâ ni lovin ka hrilh ta zâwk a, ani paw'n a hriat thiam ngei ka ring.

"Ka tiam a che, ka tisual leh tawh lo vang" a ṭawng zawh rual chuan min fawp leh a, ka mittui te chu a hru hul hliau hliau a, ka chapona zawng zawng chu hmangaihnain a luah khat ta vek bawk.

"Heti hian riak nghal la, kan inhruai chu ni nghal mai rawh se" a tih chuan a âwm ka chum taih a, a nui nghawr nghal dat dat a, thla eng emaw hnua a nui ri ka hre leh thei te chu ka mood zawng zawng a dik phah vekin ka hria, hmangaih ber te bula awm zawng a dan a dang a ni e.

                                       The End