𝐂𝐇𝐀𝐖𝐍𝐆𝐒𝐀𝐈𝐋𝐎𝐕𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦

CHAWNGSAILOVA

(Mizo Romantic Short Story)

By

Havali Adam

Thlasik boruak chu her liamin ní zung chuan hun bî thar a rawn én chhuahpui a, pangpârte paw'n an mawina leh rimtuina an pár chhuahpui ve chûk bawk a, Siamtu thil siam reng rengte chu an mawiin mit an titlai hlawm mang e!

Motor chhunga chuang mêk pafate chu an ri nak nak a, chu erawh an hlim thawm a ni. Pa ber Chawngsailova, 'CS' tia an koh bawk chuan a fate pahnih hlim taka infiam nui har har ri chu lungkham nei lo zet hian a ngaithla a, motor chhung darthlalang tê aṭanga en pah hian ṭawngkamin a han fiam leh zauh ṭhin a, mahse motor khalh lai a nih avangin a rilrua hmun tam zâwk chu a fate'n an chang lo thung. A hmaah amahin a ṭhu a, a hnungah a fate pahnih; kum 10 leh kum 7 mi an ṭhu a, Lunglei lam panin an tlan mêk bawk.

CS-a chuan motor-a Tape chu on-in Lalsangzuali Sailo hla phuah ngei mai, 'Enchim Loh Aw Vau Thla' tih hla chu a zaitir rât rat a, enghelh nei lo zeta a fate an infiam lai chuan ani erawh a rilru a kal pêng nasa nghal hle thung. Hun kal tawh leh liam tawh te'n a ngaihtuahna an rawn luah lúm a, loh theih lovin famta a nupui; a dam lai pawha duat chi tinrenga a duat ṭhin, hmangaih leh dimdawi taka a enkawl ṭhin chu a hre chhuak a, a mittui a rawn hnâm nghal sawk bawk a, a lungchhe thar thut a ni ber e. 

Lei pakhat an zawh dâwn lai tak chuan kham panga farṭuah leh vaube pâr inchawih mawi tak mai a hmu a, chu lei an zawh mêk chu one-way a ni kher bawk nen a motor khalh lai pawh a ngaihsak ṭha mumal meuh lo zawng a ni. Muangchanga tlanin a thil hmuh chu a en tlawk tlawk a, chu ṭuangṭuah pâr leh vaube pâr mawi tak, rawng inang miah si lo, mahse inchawih em em si chu a thlir ning thei lo tih tur khawpin a en vawng vawng a, lei an zawh zo chiah chu chiang zâwka en tumin motor a tiding ta ringawt bawk.

"Apa, eng nge kan tih dâwn?" a fapa naupang zâwk Gabriel-a biakna chu a hre liam mai mai a, chhan pawh a chhang lo hrim hrim.

"Pa, ka zung lawk dâwn aw" rawn titu chu a fapa upa zâwk Kevin-a ve thung a ni a, CS-a erawh ngawi reng hian a ding a, a ngaihtuahnaah thil dang a awm thei rih lo a ni. 

"Ka ngai lutuk che ka hmangaih" ama hriat tâwk leka phun sup hian CS-a chuan a ti hniam ruih a, mittui tling pamin a thil thlir lai chu a en tlawk tlawk a, a nupui a ngai tak zet bawk.

Farṭuah pâr sen leh Vaube pâr vâr páw chiai te chu an nupaah a inchan a, a hun taka pâra an inchawih mawi em em te chu a thik hialin a hria a ni. Ni e, thik pawh ni se a áwm lutuk, a fate nu, a nunna hiala a ngaih a nupui chuan mual a liamsan tawh bik tlat a, theih ni se zawng thihnain a ṭhen hran loh nân eng pawh tih a huam ngei ang. A mittui tla tur chu a khap lét sawk sawk a, suangtuahna khawvel ata zuang chhuakin a fate nui thawm a hre zawm zat bawk a, chutia awm khawmuan reng chu dikin a hre ta bik lo.

"Lut r'u le, kal leh tawh ang aw, api leh a patea khan an hmu châk tawh che u a nia" aw dam zeta tiin CS-a chuan a fate pahnih chu motor chhungah a ṭhut luhtir a, ani pawh driver seat lamah a ṭhu lut zui ve nghal bawk.

Buangpui leh Ramlaitui an tlan pelh chuan naupang pahnih muhil chu an rawn harh a, an ril a ṭam thu an sawi nghal zat bawk a, pa ber chuan an ei tur ken chu pein a rem laia chawlhpui a tum ran a, amah pawh chu a ril a ṭam ve tawh tho mai. Mualṭhuamah chuan inhnawh puar turin a fate a chawlhpui ta tawp a, Lunglei thleng nân Haulawng leh Mausen deuh chauh paltlang an ngai tawh tih a hriat chuan a rilruah Lunglei-a an chhung leh khatte a ngaihtuah zawm nghal a, an thlen hunah chuan lawm taka an lo dawngsawn ngei a ring a ni.

An inei puar fel ta maw tihah CS-a chuan Lunglei lam panin a tlan chhuahpui leh nghal a, Mausen leh Pukpui inkar an tlan laiin a fate pahnih chuan an ning ru tawh hle a, an sawi chhuak nghe nghe a, CS-a erawh lunglei mi leh sa dik tak, a pian leh murna a nih avangin chu lai kawng chu a hre chiang em em a, thui tih vakna pawh a nei hran lo. A fate pahnih chu thil dang a sawipui daih a, a fate pawh ning lo ang mai hian an awm ve leh mai bawk a, Pukpui an thlen dâwn hnaihah phei chuan a hma seat-ah an rawn chuang ve ve nghe nghe a, Kevin-an a nau a pawm a, CS-a pawh a fate awm dan chuan a tihlim ru khawp mai.

Darkar tam tlan tawh lovin Lunglei khaw chhung chu an lut ta, naupang pahnih chuan zawhna chi hrang hrang an zawt mawlh mawlh a, an naupan zual lai deuha an zin tih loh kha chu an kal leh tawh lo va, Lunglei khaw chhungah danglamna leh hmasawnnain hmun a lo khuar nasa tawh bawk nen CS-a chuan a fate dilchhut viau pawh chu áwm lo a ti hran lo. An zawhna apiang chu ṭha tak hian a chhang zel a, Kevin-a te unau chuan Auto Rickshaw an hmu ringawt te chu mak an ti em em a, Aizawl lamah hmu ngai hek lo. JCB-in lei a lo lái zâwl te, kawngpui kawngkam maia naupangho ball pêt te, engkim mai chu mak an ti vek a, chutiang thil chu an hmu ngai lo tlat a tin ni! In pakhat kawtah hian an ding a, chu in chu CS-a te in ngei a ni.

"Awi, in lo thleng tawh a ni maw, engati nge min rawn biak mai loh? Lo kal teh u ka tu hmelṭha em em pahnih te u, i va han lian tawh ve le" CS-a nu, pi Chhuani chuan a lo ti zung zung a, a fapa leh a tute a hmu chiah chu a hlim kher mai.

"Khaw'nge mi dang hi ka nu? Thianga hi a la rawn báng na nge? Khaw'nge Puii pawh hi a awm hrim hrim?" tiin CS-a chuan tui vawt a in khawlh khawlh zui nghal a, a fate pahnihin an lo duh ve nghal bawk. 

"Thianga tak chu a lo bâng har deuh mai thei, khaw'nge maw Puii kha a kal hman le, insuk a seng a ni lo maw" a nu chuan a rawn ti a, a hmela hlimna chu thup sen rual a ni mawlh lo.

"A nih leh kan lo zin thu hi ka pa nen chiah ti raw in hriat? Mi dang in la hrilh lo ti raw?" CS-a bawk chuan a ti leh a, an zin hma daih aṭang tawh a naute pahnih ṭhawn thut kha a tum sa hrim hrim a ni.

"Hrilh bik teh nâng maw le, keimah ber hian ka hrilh châk ṭhin, mahse i pa'n min khap zel zâwk a, ni lo se chu ka hrilh tawh ngei ngei ang" pi Chhuani chuan a ti siam siam a, a nui var var bawk. 

"U Mam!" hmeichhe aw lo chhuahna lam hawi nghalin CS-a chu a inher a, amah rawn kotu chu tu dang ni lovin a nau Puii ngei a ni. 

"Awi, eng nge awmzia? In lo zin maw!? Engati nge engmah min hrilh loh?" vui aw lek lek hian Puii chu a ṭawng a, a hma maia bán phar chunga ding a u chu a va kuah thlawp a, CS-a paw'n a lo kuah lêt nghet hle.

"Engtikah nge in exam zawh dâwn kha? Kan lo zin ringawt bawk si a, kan tibuai êm lo ang che chu máw" a nau kuah hlun hlun pah hian CS-a chuan a ti dam ruih a, a nau tân chuan unaupa ngainatawm tak a va ni chiang êm. 

"Tibuai teuh lo mai, awi, Kevin-a leh Gabriel-a te pahnih pawh hi ka ngai lutuk" tiin Puii chu a tal chhuak zawm zat a, Kevin-a te unau pawh chuan an lo pan ve nghal mai bawk. 

Puii leh Kevin-a te unau an inkawm melh melh laiin CS-a leh a nu an lo titi thung a, an awm zel dan tur thlengin an sawi kai nghe nghe. Chhungkawpa ber pu Chhunga erawh a zin bo lai tak a ni a, a lo haw nî tur a ni chiah bawk a, mahse zanriah ei kham fel hnu daihah lo chuan a lo thlen hman a rinawm loh a ni. Ní éng a hniam zel a, CS-a chhang chiah Thianga pawh in a rawn thleng ve ta. Beisei loh taka a û a hmu teh thut chu a hamhaih hman hle a, CS-a pawh a nau hmela mak tihna langsar tak avang chuan a nui tawi suk ringawt. Mipa ve ve mah ni se unau inkawm ngeih tak leh inngai tak an ni a, Thianga chuan a va kuah nghal a, Kevin-a te unau pawh a kuah nghal mawlh mawlh a, anni paw'n an pate chu an lo ngaina nghal hle.

"Ka chhuak lawk a nia, ka rei lo ang" tiin CS-a chu in aṭangin a chhuak a, a fate pahnihin an ngen lo hrim hrim a, an tlei viau a ni mahna le. 

CS-a chu khaw pâwn lamah a tlan zel a, an naupan laia an ló hluite pawh a hmu a, a lung a léng thar khawp mai. Kawng pêng zau laiah chuan motor tidingin thlang lam tlâng lang thla ruah chu kawng dawm meuh hian a thlir vawng vawng a, chutah a hmangaih em em, a nupui thi ta a hriat chhuah ngei ngei theihna tur thil a hmu leh ta, chu chu eng dang ni lovin Vaube leh Farṭuah pâr bawk a ni. Farṭuah pâr zâwk chu Tlaiberh hian a zû dâwtin a zârah a fu deuh chawt a, engkim mai chuan lunglenna ruamah a hruai lut a, ngaiin a hmel hmuh leh thlahlel em em mah se fam ta a nupui erawh koh kir ni reng a awm thei tawh ngai dâwn si lo a ni.

Mahni chauha awm a ni bawk a, a mittui chu a dang buai duh lo ta law law a, a bulah a fate emaw mi dang awm ve ngat se zawng a ṭah kher a rinawm loh. Mipa luhlul leh tuarchhel ve tak kha a nupui avangin mittui a sêng ta fô mai a, hmangaih ber te chan zawng a lo nâ ngâng a ni ang e! A dinna phul ṭo sep sepah chuan motor nghengin a ṭhu ta hial a, a mit a chhing vang vang a, a mitthlaah a nupui hmel a hmu zawm zat a, suangtuahna ramah chengin a mit a meng phal tawh meuh lo. A nui leh suk ṭhin a, a awm dan lo hmutu tân chuan mi â te pawh a ang hial zâwk ang, mahse a át vang a ni hauh si lo, a nupui a ngaih em vang zâwk a ni. A ngaih piah lamah a lung a chhe tel bawk a, mitthla mai chauh a chan tâwk ni tawh chu a lung tichhe zualtu ber a tih theih awm e.

A kekawr iptê chhunga phone nghawr dat dat chuan a tiharh zawk a, a phone a han bih chu a nu leh a naute hnen aṭangin missed call a lo dawng nual hi a ni a, eng khaw sawi set lovin a nu phone call chu a chhang nghal thuai bawk. 

"Khawiah nge i awm? Engati nge phone call i lák theih miah loh a? Hei, Gabriel-a a ṭap nasa tawh lutuk, lo haw thuai rawh" a nu chuan a ti charh charh a, CS-a chu a inthiam lo khawp mai. 

"A thu hrimah i rei loh tur thu kha i sawi vek si a, i rawn haw har ta zêk lawi a, Kevin-a hi chu buaipui ngai a ni hran lo, Gabriel-a zâwk hi kan thlem tlei hlei thei tlat lo a ni" a nu bawk chuan a rawn tih zawm leh bawrh bawrh a, thinrim ang takin ṭawng mah se a thinrim hran lo, a tupa a khawih vang zâwk a ni.

"Ka lo haw nghal e, Gabriel-a chu lo hrilh rawh, ka lo thleng thuai ang" tiin CS-a chuan an inbiakna a hmet tawp a, motor chhungah lutin khaw chhung lam pan chuan a tlan chhuak ta vat bawk.

A awm dan chu a ngaihtuah chiang a, pâ tih awm loh tak niin a hre hnuhnawh a, a fapa te pahnih hre chang lek lova suangtuahna ram a lo dai hman chu a inthiam lo tak zet! Khaw chhung a lut chiah tih áwm velah a nau Thianga hnen aṭangin phone call a dawng leh a, an thu khel erawh a ngai tê bawk a ni. Gabriel-a khawngaihna hlirin a khat a, tun thlaah kum 8 a tling dâwn chauh a, chutiang khawpa la naupang leh buaipui ngai si, ngaihsam zeta a kalsan ringawt chu a inthiam lo khawp mai. In kawt a thlen chuan motor thawm hriain Kevin-a záwk a lo tlan chhuak thuai a, a pa hnena a thu sawi hmasa ber pawh

"Pa, Gabriel-a a ṭap a" tih a ni. 

CS-a chu a fapa naupang zâwk ngaihtuah zetin in chhungah a lut thuai thuai a, a nau Thiangan a lo pawm a, a tlei nân ti ni áwm fahran hian eng eng emaw ni hi a lo sawipui mial mial a, Gabriel-a hmel erawh mittui nen a la inchiahpiah nuaih thung. 

"Pa" a pa hmel a hmuh rualin Gabriel-a chuan a lo ko vat a, a ṭah a chhuak zual a, a pa âng chhunga awm thlahlel zet hian a ṭap hliam hliam zui nghal bawk.

"Khawi ka lo pawm ang" tiin CS-a chuan Thianga pawmna ata a lâksak a, nghet takin Gabriel-a chuan a lo kuah nghal thuai a, a ṭap uar sâwt hle. 

"Ṭap tawh suh le, ka tihpalh a ni" thlemna thu aw dam takin fah mawlh mawlh mah se Gabriel-a erawh a la ṭap báng thei chuang lo. 

"I ṭah reng chuan api leh anitei te hian pá lo an ti mai ang che, naktuk tûk lehah kum 8 i tling dâwn leh nghal, ṭap tawh suh le ka fapa"  a tih leh chuan tlémin a fapa pawh a ṭap zawi ta deuh a, CS-a chuan hmangaih taka pawm chung hian a awi hliau hliau a, a fapa biang leh chal vel chu a fawp leh zauh ṭhin bawk.

"Pa, nichin khan khaw'nge i kal daih a, kan zawng che a" tia rawn betu chu a fapa upa zâwk Kevin-a a ni a, Gabriel-a pawh a ṭap báng ve tial tial a, zawi téin a la ṭap feih feih tih mai chauh a ni tawh.

"Khawiah emaw ni ka kal lawk a, ka tihpalh a ni e, hrilh lawk lovin ka kalsan tawh lo ang che u, lo kal teh" tiin CS-a chuan a fapa chu a hui a, Gabriel-a a pawm lohna lamin a kuah bet a, upa zâwk a nih vang a ni mai thei, Kevin-a chu a ṭap ve lo hrim hrim.

"Ka kalnaah chuan sava te ka hmu asin, in hmu ve duh em? A hmu duh chu ṭah tawh awih loh, in ṭah chuan en turin kan kal miah lo ang" a fate rilru lák pén tum tak hian a tih zawm leh ta mawlh mawlh a, a fate chuan an rawn ngaihven nghal hle. 

"Eng sava nge pa? Kan zirlaibua mi ang kha a ni em?" Kevin-an a rawn tih laiin Gabriel-a ve thung chuan

"Ka hmu ve duh pa, min hruai ve rawh, ka ṭap tawh miah lo ang" a lo ti thuai a, nui sun sun hian a fate chu a chhuahpui a, a nu leh a unaute paw'n ngaihven enah an en ta lo. 

An fate nen thinga sava fu an meuh chu an hlim tlâng teh e! Tlaiberh mai bakah sava chi hrang hrang an hmu ṭeuh a, CS-a chuan zawhna a dawng zing malh malh khawp mai. Darkar eng emaw zah chu khawpui pâwnah an kal kual a, naupang tih takah Kevin-a te unau pawh mutchhuak hmel an pu ṭan ta deuh a, mahse haw an la duh miah lo thung. Pa ber chuan an awm dan engkim a hmu tlang vek a, motor an chuang chau bawk nen haw a rawt a, in an thlen chuan inbual faiin naupang pahnih chu an mu nghal daih a, CS-a pawh a nu'n mu hahdam rih turin a ti a, khumah chuan a mu ve mai a, mahse a muhil chuang lo.

Gabriel-a hmelah chuan a nupui thi ta hmel chiang tak hian a hmu a, an unau ah a nu a chhun zâwk hrim hrim a, Kevin-an a pa hmel lam a áwn deuh bawk a, khawharna chuan a thinlung kilkhawr ber thleng a rawn luah leh ta nge nge. Hmuh tur awm bawk si lo, khawih theih bawk si loh, a rim tal hnutchhiah se zawng chutiang em em chuan a nupui a ngai bik kher lo ang maw le. Nupui sun hlim hlawl tih takah a ngai ngawih ngawih ṭhin a, a thinlunga thu tam tak te chu han au chhuahpui ngawt lah thil dik leh mawi a ni si lo, a nupui ngaih nî reng a bâng thei rih lo a ni e.

Hun kal tawh dâwn kirin a mit a chhing vang vang a, a nupui bawkin a mitthlaah hmun a rawn chang leh ta. A insuk seng tur chet sual dan te, hliam tuar lova a thih zui nghal dan te, doctor te'n a thih thu an hrilh lai te, engkim chu fiah tak leh chiang tak hian a hmu nawn leh ni maiin a hria. Kha ní, a nupui chet sual nî khan office a kal a, a nupui khan haw hma turin a ti nghe nghe a, ani pawh phur takin office a kal kha a ni a, mahse in a thlen hma hmain a nupui chet sual thu a hre ta kha a ni a, damdawi in a va thlen te khan a nupui chu mi nung rama lo kir leh tawh ngai lo turin a lo thi daih tawh si.

Pindan kawngka chik ri ret ret chu a hre reng a, an mutna lam pana pen thawm pawh a hre vek a, muhil ang maiin a meng duh miah lo thung. 

"Heti hian in pafain in inenkawl dâwn chu a ni si a, ka va'n lainat reuh tak che u ém áw" ti vawng vawngtu chu a nu a ni tih a hre nghal a, rei pawh awm lovin pi Chhuani chu pindan aṭang chuan a chhuak ve leh mai a, CS-a pawh a meng zui nghal bawk.

A fate pahnih tui taka muhil thaw ri sek sek lam chu a hawi a, za lo zet hian a nui tawi tak a, hmeichhiate anga fa enkawl thiam dâwn lo mah se a theih tawp chhuah a tum bur a, a thiam lo a nih paw'n inzir hrehna pakhat mah a nei lo. A dam chhan ber chu a fate pahnih chauh an ni a, a engkima engkim an ni bawk. An bianga fawp ve vein khum aṭang chuan a thawh a tum a, Kevin-a kut zâwk chuan muhil reng chung si hian a kutzungchal chu a lo vuan bet tlat reuh a, CS-a pawh a thil hmuh avang chuan a tho ta mai lo. A thinlung zawng zawnga a hmangaihte pahnih chu thlir dauh dauhin an biangah a fawp nawn leh ngat a, chumi hnu chuan a tho chhuak ve ta chauh a ni.

Zanriah an ei lai te chuan an hlim dar dar hle a, naupang pahnih tân artui chhum ei tur a awm ṭeuh a, puitling hovin vawksa an hmeh bawk a, hlim viau mah se an hlimna a la famkim rih tlat lo. Chhungkawpa ber a lo la thleng ve lo miau a, pu Chhunga lah chu kawngah an la thang mêk a, a lo berah zan dar 8 hnu lam baka an lo thlen a rinawm loh leh ta zel a, an tih theih awmchhun chu ngaih ṭha taka lo nghah tawp a ni mai. Zanriah ei kham a han ni a, thla a êng em em a, Thianga chuan Guitar lá chhuakin CS-a kutah chuan a hlan chawt a, perh thiam zâwk miau hek le. 

"Zai teh ang u Mam" Thiangan a tih miau tâk si ah chuan Guitar chu a'n thai ri a, a ri a dik nghal em em a, Thianga chuan a key milin hla a lo sak zawm nghal a, nu ber thlengin veranda-ah an rawn chhuak a, Pathian hla sain an zai ṭhap ṭhap a, pu Chhunga nghah pah ni fawma an hun hman ral dan chu pawisaa lei theih chi ziazâng a ni lo.

Dar 8 leh a chanve rik hma hretin pu Chhunga chuan in a rawn thleng ve ta nge nge a, motor chu driver a side feltir nghal zung zung a, Kevin-a te unau pawh an pu lam pan chuan an tlan phei nghal thuai a, naupang hlim bawk, an pi leh pute hlim bawk, an boruak tawn mêk chu hip nuam tak zawng a va ni chiang êm. Hmeichhe pahnih leh naupang pahnih inkawm hran laiin pu Chhungate pafa thum chuan thil an rêl mawlh mawlh thung a, a fapa naupang zâwk Thiangan nupui neih a ngen titih tlat mai si a, chu chu CS-a te pafa zin chhan pakhat a ni nghe nghe. A chhan dang lehah chuan nupui sûn hlim hlawl a nih angin chawlh a lá rih a, a fate pahnihin exam an zo chiah bawk nen 'a rem riau mai' tiin Lunglei lama zin phei a titlu ta bawk a ni.

Thianga nupui neih dan tur vel leh palai tirh dan tur vel chu an han rêl nak nak a, pu Chhunga chuan pi Chhuani chu a ko phei hnuhnawh ta bawk a, nu ber tel lo chuan a kim lo tlat a tin ni! Tlaia an mut vang nge ni, Kevin-a te unau chu an harh ṭha khawp mai a, mutchhuak hmel reng an pu lo hrim hrim. An pa CS-a erawh a chau ve deuh a ni mahna, a mut a chhuak riau a, rei pawh a meng peih der lo. Dar 9 leh a chanve velah chuan an mutna tur pindan lamah lutin mut zai a rêl ta mai a, naupang pahnih pawh mutchhuak hran lo mah se an mu ve nghal chu a ni mai. A fate inbe thawm leh che thawmah CS-a chu a harh leh zawk ṭhin a, naupang mai an la ni a, mutchhuakin meng diar diar mah se khap enah pawh a en lo, a ngawih liampui mai a, mutmu erawh a tuah ṭha thei meuh lo zawng a ni e.

"Mu tawh u la Kevin, kha apa pawh a mut a chhuak tawh alawm, vawiinah motor inchuang chau awm si, muhil daih r'u le" Puiin a fate a biakna thawmah a harh leh zâwk a, a fate'n an rawn kuah zui nghal bawk.

"Pa, a laiah mu la" Kevin-a aw a hriat rualin meng mang lo hian a che ṭuah ṭuah a, a laiah chuan a mu zângthal ve mai bawk a, fate tâna innghahna tlâk pa a ni ve chiang a ni. 

Zing khua a lo vâr a, an chau tlâng bawk a ni ang, CS-a te pafa chu dâr 8 hnu lamah daih an harh a, mahse mi hrang in ni lovin an in pakhat zâwk kha a ni miau a, inthlahrunna pawh an nei chuang lo. Tukṭhuan an ei kham fel hnu chuan naupang lén chhuahpuiin CS-a chu a inkhalh chhuak a, a naupan lai aṭang tawha a kawm ṭhin a ṭhian ṭhenkhatte inah an lêng kual a, a ṭhiante paw'n nupui fanau an lo nei thliah thluah tawh hlawm a, hnemna ṭawngkam mawi mah ni se a nupui thi tawh hming an lam ri ve ziah chu a tân hriat fô a nuam tehchiam lo a ni. Naupang pahnih paw'n chutia han lén kual vel chu nuam an ti hle a, an haw lam thlengin sawi tur an ngah dun em em a, in chhung an lut te chu an pi leh pute hnenah thil chi hrang hrang an sawi nghal a, pu Chhungate nupa lahin ngaihnawm tih hmel tak hian an lo ngaihthlaksak zel bawk a, Kevin-a te unau chuan ṭawng an chuh hial ṭhin.

Kâr khar erh awrh Lungleia an chám hnu chuan CS-a te pafa pawh Aizawl lamah an inkhalh haw leh ta hna hnâ a, sawrkar hnathawk a ni a, chawl reng thei ni miau hek lo le. Lungleia an châm chhung khan hlim takin Gabriel-a piancham an lawm hman a, a chhang chiah Thianga nupui neih dan tur leh palai tirh dan tur vel an rel fel vek hman bawk a, zin hlawk viau chuan a inhria a ni. Aizawl an thlen aṭanga ni tam ral hmain CS-a pawh a office leh ta zak zak a, kum lamah la upa lutuk lo mah se Department pakhata pu ber nihna chelhtu a ni ve a, a fate chu office-ah a hruai mai ṭhin a, a changin a puzawnte lamin an lo awmsak ṭhin bawk a, chutiang vel chuan nî tin hun a hmang chho leh ṭan ta a ni.

Zan khat chu mut hnu vek tawhah thawm ri ṭet ṭetin a tiharh hlawl a, naupang nen khum khatah an mut dal lai a ni a, a tirhah chuan ngaih ṭhat lohna pawh a nei chuang lo. Zing lam dar 1 a pelh tawh hial a, thawm lah chu a  ri chawl mai bawk si lo. Ngawi rengin thawm chu a ngaichang a, mihring ke pen thawm ni tlatin a hre ta. A rilruah a chhe ber thlenga thil thleng thei a rawn awm nghal a, a ngaih a ṭha thei ta reng reng lo va, a fate pahnih muhil bam tawh mah se ani erawh a meng fiah kak thung. A ngaithla chiang a, a thawm hriat chu mihring bak a nih a ring ta lo e! Fimkhur tak hian an mutna room kawngka chu a hawng dêk dek a, a thil hmuh chuan a va ṭhawng mai mai tak ém. 

"Tu nge i nih? Eng vangin kan inah hian i lo luh ringawt?" khauh tak hian a ti nghal a, a hma maia thil ruk tum ni awm taka hmai tuam chu hlauhna chhe té mah a nei lo hrim hrim a ni. 

"Lo ding teh!" tukverh aṭanga chhuah a tum laiin CS-a chuan a kawrah a va pawt hman hlauh a, mahse a chan loh khanah a nák chu a rawn thip nâ ta zâwr mai, an in chhungah mi pahnih an lo lut tih reng a hre lo a tin ni! 

"Thlah rawh, thlah nghal rawh!" ti vin ṭhawtin hmai tuam pakhat hian a pumah a rawn vit leh nghal zat a, a bekah tak a chhir nghal pawp bawk a, CS-a tân chuan a thil vawn lai chu thlah loh theih a ni ta lo.

"Apa!" pindan kawngka bula ding chunga rawn titu chu Kevin-a ngei a ni. 

"Khawngaihin naupang chu tinâ suh" thei leh thei lovin CS-a chuan a ti ṭawk ṭawk a, a kut ding lamin hmai tuam pa ke chu a vuan a, a vei lamin a nâk nâ zet chu a dawm hram hram bawk. 

"Hmanhmawh ang, muangchan a hun tawh lo, lo kal vat rawh, Mawla! Eng nge i la tih reng?" a ṭhianpa ni ngei tur chuan a rawn ti hriam hraih a, chu veleh hmai tuam pakhat zâwk chuan CS-a vawnna phih lêng lawpin a ṭhianpa lamah chuan a kal vat a, hmai tuam pahnihin in chhung chhuahsan vang vang tawh mah se CS-a erawh a hliam nâ tak chu a tuar zo lo mai dâwnin a hria. 

"I pite call rawh" tih chauh chu a fapa hriata a thil sawi theih awmchhun a ni a, a hliam a nât thawkhat êm avangin a bâk thil dang reng a hre mumal thei tawh lo a ni.

Thawm ri nuaih nuaih chuan a tiharh leh zawk ṭhin a, naupang ṭap ri te a hre leh zauh ṭhin bawk a, a taksa mai ni lo a rilru lam thlengin a buai vek a, a thi mai dâwn ni te'n a hre tawh a ni. A thil hriat hnuhnun ber chu a taksa kang deuh lawp a ni a, patling ṭawng thawm chu a hre tel hman hram bawk!

"Ka duh thei lo, engtin nge an awm ang le? Kei zawng tlan thlak nghal mai ka duh, ka khawngaih êm mai" pi Chhuani chuan ṭap chung hian a ti mawlh mawlh a, CS-a te thil tawn zawng zawng an hre vek tawh a, CS-a nupui chhungte lamin lo hrilh lo se chu an hre kher lo mai thei a ni. 

"Inbengdai rawh Nui, khua han vâr deuh phawt se kan chhuk nghal dâwn a nia" tiin pu Chhunga chuan a nupui chu a hnem ve tak na a, awmzia a awm tam lo hle. 

"Engtin nge Kevin-a te unau ni ang? Engtin nge an awm ang? An pa leh zelin a thihsan vaih chuan a pawi dâwn lutuk, engati nge maw an vanduai bîk em em mai le" pi Chhuani chuan a ti leh ṭhin a, a rilruah eng dang a awm thei rih lo a ni ber e. 

"Kevin-a te unau chu an him tih kan hriat vek kha maw le Nui, hlauthawng lutuk lo phawt teh. Ti teh u, i chhuk mai ang u, kei pawh ka awm a nuam thei bík chuang lo. Zing khawvar han nghak deuh phawt ila ka ti kha a ni a, a chhe ber thlengin thil a thleng thei tlat! Thianga insiam r'u, Puii nang pawh kawr lum va hak thuah rawh, i nu rawn lák kep nghal bawk la" pu Chhunga chuan a ti ve ta nge nge a, a nupui erawh a la ṭap tawp thei rih mai lo. 

Pu Chhungate chu a zana zanin Aizawl lam pan chuan an inkhalh thla ta a, an speed pawh a hniam hran lo khawp mai. Phone kaltlangin an fapa CS-a chanchin an hre thei zel a, engkim chu CS-a nupui chhungte aṭang vekin an hria a, Gabriel-a ṭap thawm a hriat phei chuan pi Chhuani chu a insum thei lo zual a, a túte pahnih a khawngaih luatah a mittui a dang sêng lo leh ta nge nge. Darkar eng emaw zah hnuah chuan an ngawi ṭhap a, ṭap pawh an awm tawh lo. Pi Chhuani chuan a rilru a kawm char char a, Pathian hnenah a fapa nunna zuahsak hram turin a ngen ru mawlh mawlh a, a rilru leh ngaihtuahna a kal ding khawp mai.

Aizawl lama mite pawh an buai tlâng hle a, pi Chhuani ang bawkin CS-a pizawn chu a ṭap deuh reng a, khawngaihna vang a ni ber. Kevin-a te unau an awmpui nghal chawt a, Gabriel-a ber chu an manganna tizualtu pakhat a ni. A pa taksa aṭanga thisen chhuak lai a lo hmu ve vek bawk si a, a hlauthawng a, a pi leh pute'n an thlem paw'n awmzia a awm thei chuang lo. A ṭah nasat êm avangin a u zâwk Kevin-a pawh a tihlauthawng hial a, a hnuah phei chuan an unauin an ṭap ta rawih rawih a, an nutei te pawh an rilru a buai khawp mai. An han thlem ṭhin, thlemin awmzia a nei bawk si lo. Kevin-a chu rei lo tê hnuah a ṭap bâng mai a, Gabriel-a erawh a ṭap muhil thung. 

CS-a chhungte nen an han inhmu khawm chiah chu puitling ṭhah tih takah an inhnem tawn thiam em em a, a tua mah naupangchhia taka che an awm meuh lo. Nu ber pahnih chu an insum thei lo leh thut ṭhin a, mi dang erawh an rilru a fim pangngai khawp. Darkar tam fê hnuah CS-a a harh tawh thu doctor hnen aṭangin an hria a, zi huai huai lo tur te paw'n an inchah mawlh mawlh a, nung danga CS-a hmel an hmu leh chiah chu pi Chhuani bawk a insum thei leh ta lo. A fapa biang chu a fawp mawlh mawlh a, a ṭap pur reng bawk a, a pasal fanau te paw'n buaipui ngaiah an dah lo hrim hrim.

"Khaw'nge ka fate?" CS-a chuan a ti thâm ṭuak a, hmai tuam pahnih khan an thah leh thah lo a hre mumal hman bawk si lo va, a hlauthawng tak zet a ni.

"An lo kal mék e, nikhua i hriat loh lai khan an ṭap nasa lutuk a, Gabriel-a phei chu a ṭap muhil tawp asin. Kan inah a nutei te'n an awmpui rih a, an lo thlen hunah chuan pachang takin lo awm hram rawh aw CS" a pizawn chuan a rawn ti a, a aw leh a hmelah a ṭah a chhuak tih a hriat hle bawk.

"Ka ṭha tawh lutuk alawm ka pi, min ngaihtuah suh u" CS-a chuan a lo ti ve mai a, a taksa hliam chu thuhran ni se, a fate pahnih hmel a nung chunga a hmuh hmâ chu a rilru a la hahdam thei lo a ni.

Minute tam pawh a ral hmain an awmna pindan kawngka a rawn inhawng a, a fate hmel ngei mai chu a hmu ta. A fate pahnih pawh chuan tlan meuhin a lam an rawn pan nghal a, CS-a chu lawm lutuk avangin a mittui a hnám sawk mai. 

"I thi dâwn lo ti raw pa? Thi suh aw pa?" ti lawm lawmtu a fapa upa zâwk Kevin-a chu a âwm ding lamah a kuah bei a, vei lamah Gabriel-a a kuah bei bawk a, a fate pahnih ṭap bai bai chuan a tiṭap ve ta nge nge. 

"Ka thi dâwn hleinem fate u, ṭap tawh s'u le" tiin a fate pahnih chu hmangaih tak hian a kuah a, a taksa la nâ mah se a rilru erawh a hahdam em em tawh thung. 

Kâr a ral a, thla a liam a, CS-a pawh a taksain hmasawn lam a pan ve zel a, a zia ve tawh khawp mai. Amah vita rawk tumtu te chenin man an ni tawh a, dan ang thlapin hrem an ni bawk a, thihna êm a thleng hman lo chu vanneihthlâk a ti hle. Tin, dam kawr mai chauh a la nih avangin awmpui pakhat a chhawr ta nge nge a, a nihna takah chuan awmpui lâk a duh ngai lo. A chhan chu mipa a nih avanga fa enkawl thiam lo nih a tum bau lo va, hmeichhe tam tak tluk dâwn lo mah se a fate tâna nu leh pa nih kawp chu a tum ber a ni ṭhin. Amaherawhchu, engkim a duh danin a kal vek thei bik lo va, mi kut a lo tuar kher bawk nen awmpui an neih a ngai ta a ni. Chu pawh ama zawn a ni lo leh ta zel a, a pizawn te lamin an lo zawnsak thlap a, a chhungte'n awmpui neih an lo remti bawk a, an thu a awih ve ta mai chauh zâwk a ni.

Thla tam a'n vei meuh chuan awmpui neih chu a hahdamthlâk a ti letling ru viau a, mahse tûma hnenah a rilru dik tak a sawi chhuak ngai lo thung. A puzawnte lam aṭang leh a chhungte lam aṭangin ngaihsakna an dawng awl lo va, an awmpuinu Abigail-i thleng paw'n an rawn ngaihsak em em ṭhin. Tin, Abigail-i nungchang chu a rin phâk bakin a ṭha a, awmpui atân chhawr fuh a inti hle bawk. Hlawh pawh a pe ṭha reng a, a duhthusam bak baka ṭha hian a che tlat a, Nurse a lo ni tawh ṭhin kher bawk nen a awm loh hlana a fate a enkawl danah pawh a lungawi ṭhin khawp mai. Abigail-i pawn a pu chu a zah thiam em em a, a thil sawi reng reng a tihhmaih ngai lo va, a theih tawpa ṭhaa thawh a tum ṭhin.

Awmpui hna a thawh ṭan tirh lai velin pu CS-a chuan a chanchin a zawt nual a, Nurse a nih tawh thute, a chet sual palh avanga a bán thute, dam lo hrim hrim enkawl a huphurh tâk thute leh an chhungkaw chanchin ngaihnawm loh zet thlengin a hrilh fai vek a, engkim a hrilh tlang nghal vekna chhan chu a hre bik lo. A hnuah a inchhir leh nghe nghe a, pu CS-a chuan a hmu dik lo vek ang tih a hlau hnuhnawh em em a, mahse lánga awmpui ni turin a chhawr ta tho va, a thawh tâk chinah chuan pu CS-a a zah ru em em tih chauh loh chu hrehawm tihna pawh a nei lem lo. Kum lamah chuan a la naupang ve em em a, kum 25 pawh a la tling lo va, a hlawhin a nu a chawm a, fa mal a ni kher bawk nen a tân chuan eng hna pawh thawk se chhel a ngai ṭhin khawp mai.

A nu leh pate an la dam ve ve a, mahse a pa záwk chuan zû in a ching tlat a, zû ngawlvei dik tak ang chí hi a ni a, sawrkar hna chhe tê a nei a, a hlawh erawh zû in nân a hmang ral vek ṭhin. Chu vang chuan Abigail-i paw'n a nu deuh ngawr ngawr pawisa a pe ṭhin a, a nu ni se a hriselna a pan em em leh ta zel a, a pa zu ngawlvei a ni bawk nen nun beidawn chang a ngah thei khawp. A bul ber chu Nurse a nihna aṭanga a bâng kha a ni a, tha leh sum tam tak sênga a zirna rah chu engmah lo mai a ni ta si a, a pa lungawi lovin chawm tumna a nei tawh si lo, an buai chho ta nuaih a ni ber e. A nutei te leh a patea te lamin puih an tum lahin pa ber chuan a phal ngai si lo, zû inah a ṭuan a, an chhungkaw boruak a chhe chho ta zel a ni.

Nurse hna a thawh lai kha chuan an hlim ve thei lutuk, mahse a bán ngei a ngai si. A bán chhan dik tak pawh a thawhpui te vang a ni ber a, an pute chen khan zilhna a dawng fô va, a che ṭawp pawh a ni lo. A thawhpuite zinga pakhatin a er tlat a, a ngaihzawn ruk em em doctor pakhat nen an inngaizawng emaw a ti tlat a, a ngaihtuahna ṭha lo chu zawm zelin Abigail-i hma hun a tichhe ta vek a ni. Chipchiar taka han sawi dâwn chuan a thui lutuk a, mi nazawng bulah a sawi duh lo hrim hrim. A thil tawn engkim hriatpuitu chu a nu a ni mai a, a nu paw'n a khawngaihin a lainat ṭhin khawp mai, mahse tih theih vak a nei bik chuang der si lo; a rilru dam nâna ṭawng thlamuan tih mai loh chu!

Ni khat chu zai rât rat chung hian in a tifai a, naupang pahnih in kawtah an infiam bawk a, pindan tifaia luh a tum chu bathroom lamah thawm ri sur sur hi a hre tlat mai a, Kevin-a te unauin tui an off theihnghilh a nih bak a ring lo. Bathroom kawngka a va hawng chiah chu a ṭe chhuak ṭhawt a, a mit a chhing nghal vat bawk a, a zak lutuk chu awm ngaihna reng a hre lo.

"Ka tihpalh, ka tihpalh lutuk ka pu, ka....eng lo....Kevin-a te'n an off theihnghilh emaw ka tia, ka tihpalh" a ti mawlh mawlh a, a rilru leh tih tak zetin a inthiam lo a ni. 

Pindan pawh tifai ta lo chuan sitting room lamah a phei ta daih a, pindan tih loh a tifai vek tawh si, a chang leh choka ah a phei thul, zahna namên loh chu amahah a châm reng a, a thil hmuh mawlh chuan a tizak a ni. A awm ngaihna hre lo chu pâwnah a chhuak tawp a, chawhma lama a hmuh reng reng loh pu CS-a motor ngei mai chu in kawtah a lo inhûng reng tawh a, a lo haw lai a hre der si lo, mak a tih dan chu pui tak a ni. Chu bakah chawhnu dar 2 pawh a la ri lo va, chutiang hunah a lo haw ngai bawk si lo, Abigail-i rilru chu a buai khawp mai. A'n ngaihtuah ṭhin, pu CS-a lo haw lai áwm reng a hre thei miah lo leh nghal. Vawi tam a ngaihtuah nawn hnu chuan choka a tihfai laia lo haw a nih a ring ta ber a, sitting a tihfai lai ni se chuan a hmuh ngei a rinawm tlat a ni.

"Kevin, i pa lo hawna hi a rei tawh em?" tiin pu CS-a fapa upa zâwk chu a zâwt ta thawr a, Kevin-a lah chuan

"Rei ve tawh tho, pa, ball pet ila?" a rawn ti ta mai, Abigail-i chu a hawi lêt vat a, a hnungah pu CS-a a lo ding ngawi reng chu niin, a va han zak zual tehreng ém. 

"Eng lo...ka tihpalh" a ti leh ringawt a, kawng en mang hlei lo hian a kal hmawk hmawk a, kawngkapui inkhar zâwk chu a su ri chawrh a, a tlu chiang teh e! 

"Khaw maw ka lo en" ti supin pu CS-a chuan Abigail-i chal chu a ensak a, Abigail-i lah meng ngam tawh hek lo, an inawm hnaih em em leh ta nghal a, a maimitchhing ta ringawt.

"A pawng mai thei, nâ lutuk chu a ni lo ang" pu CS-a thil sawi chu a rilruah a lut chiah em tih pawh a hre thei tawh lo, a zâm a, a zak a, a duh ber chu a hmuh phâka awm loh a ni. 

"Ka ṭha mai ang" a ti ve ta sep a, a aw khurh nasatzia ngaihtuah chuan nâ ti te pawh a ang alawm le, chu erawh a ni hauh si lo. 

In chhung a luh rual rualin hmai a phih nghal sawk sawk a, a phih zo a inher chu kawngkapui bul aṭang hian pu CS-a chuan a lo en reng a, a sa chhuak vek ni mai te'n a hria a ni. Hmai phih vek tawh si kha inhruk pawh inhru hul lovin a phi nawn leh sawk sawk a, tui te chuan dep eng ang mah se a hmai leh a taksa chhung sa hut hut erawh a reh thei chuang der si lo. A hmai phih zo chu tim dai hian kawngkapui lam a hawi a, pu CS-a hmel hmuh tur a awm tawh lo hlauh e. Pindan a la tifai lo tih hre chhuakin pindan lamah a kal nghal thuai a, a tifelfai zung zung a, a hlauh ber chu pu CS-an a rawn hmu leh thut palh ang tih a ni.

A tihtur a tih zawh hnu chuan a chhuak thuai thuai a, ei rawng a bâwl zui nghal a, mahse tlai dang ang lo takin a che reng reng a dik thei ta tlat lo. Plate pakhat phei chu a thlauh keh ta hial a, hrehawm tiru bawk si, pu CS-a hlau ru bawk si, a ṭah a chhuak tet tet a, chutiang renga chet chhiat chu a la nei ngai miah lo asin maw le. A nihna takah chuan a che fel thlip thlep em em zâwk a, ei rawng bawl thlengin sawiselna tur a awm ngai lo, mahse tun ṭum chu a che sual nasa rum rum hle a ni. Pu CS-a leh a fate lo lut a hmuh chuan a inthlahrung zual a, tlai danga a tih ṭhin ang bawkin pu CS-a thingpui tur siam a tum chu no a thlauh keh leh ta, a che sual ngun mawlh mawlh lutuk chu ṭah tawp mai a duh tawh.

"I kut lawngin khawi suh" pu CS-a aw a hriat rualin a kut a pawt lêt nghal zawk a, pawisa a thawh chhuah theih nâna chhawrtu, a pu zâwkin no keh them vel a chhar fai mial mial chu a ni si a, hrehawm a tiru ngawih ngawih. 

"I dam lo em?" pu CS-a biakna chu chhan pawh a chhang thei lo, a kâ a chilh vek ni maiin a hria.

"Abigail?" ti lehin pu CS-a chuan a kutin a chal a rawn tawk a, a taksa chhung lam leh pâwn lam chu u a mur nghal uaih a, engmah a hrethiam tawh lo, a zakin a zâm em em ringawt.

"I dam lo nge i dam ṭha Abigail?" pu CS-a bawk chuan zawhna a zâwt leh ta, chutah erawh chhan loh a mawi tawh lo a ni.

"Ka dam ṭha" a ti thawp raih a, pu CS-a nena an mit intawng tur chu duh lovin a maimitchhing leh ta ngawt a, a awm dan chu átthlak a ti hle bawk. 

"Vawiin chu i haw hma dâwn nia" tih leh pu CS-a pawh chuan thawh a rual zui zat a, no keh nawi chu bawlhhlawh bâwmah a paih nghal a, Abigail-i erawh a awm ngaiin a la awm reng thung.

Pu CS-a a kal liam ta maw tihah Abigail-i pawh a tho chhuak ve ta nge nge a, ei rawng a bâwl lai te chuan thil dang rengin a rilru a luah thei tawh lo. Pu CS-an a chal a tawh lai khan eng vanga mur chhuak vek nge a nih a hre thei si lo, a chhan hriat a duh si, a ngaihtuah nasat lutukna lamah chaw a chhum ut ṭep leh ta nghal a, a dik hlawl lo a ni. A haw dâwnah pu CS-a chuan a ko ding a, a thla khat hlawh a pe a, ngawi reng hian a lo lá ve mai a, a chhuak zui ta nal nal bawk. In a thlen hnuah pawh tlaia a thil tawn zawng zawng chu a ngaihtuahnaah a awm ngut ngut a, chutah a thluak aṭanga paih chhuah a duh ber pu CS-a inbual a va hmu lai tak chu a paih chhuak thei der lo leh nghal. A hmuh lai khan a lo hnung chhawn hlauh zâwk a, hma chhawn phei se chu a va han zak dâwn rua êm.

Chuta chin chu pu CS-a pehhel dan hlir a ngaihtuah a, an inhmu dâwna a hriat chuan a pumpelh vat ṭhin. Zawi zawiin a che pawh a dik chho leh ṭan a, mahse pu CS-a bul hnaiha a awm apianga a zâm ru em em zel chu a chhan a la hre hlei thei tlat lo. Awmpuinu leh a pu kha an ni miau a, an inbe tam lem lo va, chu chu Abigail-i tân tak pawh a ṭhat zâwkna chen a tam mai. Pu CS-a fate nen erawh an boruak a la ṭha tluang zel a, naupang paw'n an ngaina ang reng hle a, an ṭhian kawm hmiah hmiah a, Abigail-i lah naupang nena inkawm nuam ti chi a lo ni bawk nen an awmho tawh hi chuan an nui nasa thei khawp.

Zan khat chu pu CS-a ṭhiante'n zanriah rawn ei an tum hlauh mai a, mipa pathum leh hmeichhe pathum an ni dâwn a nih hmel a, tlai aṭang tawh pu CS-a berin chaw ei nghal tura a tih miau avangin ei mai chu pawi a ti bik ta lo va, mahse chawhmeh a suah lai chuan a che sual leh ta tlat mai.

"I va han ṭhing tak! Min hmu miah na nge? I mit a del zâwk em ni?" pu CS-a thawhpuite zinga hmeichhe pakhat chuan a ti hlak hlak a, Abigail-i erawh chhang lêt lovin a ngawi tawp ringawt. 

"In awmpuinu chu a hawihhawm lo hle mai a CS, aia upate ngaihdam dilna chang pawh a hre hleinem le" an zinga hmeichhe pakhat chuan a lo ti ve leh nghal a, Abigail-i pawh a harh chhuak ta zawk!

"Ka tihpalh lutuk" a ti sep a, chutah a ngaihdam dilna nu lah chuan

"I mawl ém mai, ka chaw ei châkna zawng zawng i tibo vek dâwn alawm le, kal sawn thuai zâwk teh!" a ti hmarh hmarh a, Abigail-i chu a kal sawn ta vat reng a, a zak ru tak zet bawk.

Zanriah ei chhung zawng chuan buh fang khat pawh a kâ chhungah a lut lo va, a chaw ei tur erawh a hmaah an inhûng reng thung. Kevin-a leh Gabriel-a te pahnih chu a buaipui pah reng a, chaw ei châkna a nei hlawl lo a ni. Mi dang kham tak tak hmain a thleng chu a châwi nawlh a, garbage bag-ah a vawm lut sawk sawk a, mi dang hmuh a hlauh tehreng nen pu CS-a takin a chaw paih lai chu a rawn hmu leh ta chat mai. A awm dan a laklawh tawh ém avangin phawrh chhuah theih ni tawh hek lo, hrehawm ti lo ang deuh hian a awm lui a, a chhungril lam erawh a buai nuaih nuaih thung si. Chaw an ei kham a, chaw eina a tifel zung zung a, dar zat a en pah reng a, duh ai chuan a tlai tawh mah mah a ni.

"Ka lo thlah dâwn che em ni ang?" pu CS-a biak dan chu mak a ti leh teh e! 

"Aih" tiin a lo chhang lêt deuh tawp a, nuam lo ti hnuhnawh lehin

"Ka sawi awmzia chu a ngai lo mai, ka haw thei ang, mut tui u" a tih zawm nghal zat a, chak zet hian a kal sawn zui hmawk hmawk a, a ṭhiante an la awm ṭhap bawk si a, lo inthlahtir daih chu thil mawi niin a hre tlat lo.

Kawngpui sirah dingin Taxi lo tlan a chang ngawt ngawt a, minute 15 lai chu a nghak tawh, mahse pakhat pawh a la hmu lo. Chutah mipa pahnih hi a lam pan zawngin an lo la phei zui, biruk a tum deuh úk a, a ṭhulh leh a, a che hman lo a ni mah zâwk. Chu mite lah chu a bulah tak an rawng ding a, zep lo chuan a hlau a ni. Taxi lo tlan vat se a ti rilru mawlh mawlh a, a bula mite pahnih biakna pawh chu a chhang lo hrim hrim. Vawi leh khatah a petek dâwrh a, a kut chu kut hrawl zet hian a rawn chelh zui nghal zat bawk a, a kuta kai mêktu chu pu CS-a ngei a nih tih a hriat chuan zah pawh a zak thei tawh rih lo, a lawm rilru em em zâwk a ni. 

"Tu chu nge maw i nih le? Eng vanga kan hmeichhe awmpui lai lo hruai hrang ringawt nge i nih?" a ṭawng zawh rualin pu CS-a chuan chu pa chu a hnek thal nghal tawp a, Abigail-i tân thil mak a va ni chiang êm.

"Ka ṭhianpa i hnek ngam ve khanglang a maw!?" pakhat zâwk chuan a rawn ti vin ve leh tuarh a, thawm chhuahin a inhrosa nasa hle a, mahse pu CS-a kutthlak an dawl lo dun lutuk chu Abigail-i paw'n a awih lo hial zâwk a ni.

"Lut rawh, min hnial suh ang che" pu CS-a chuan a ti khauh hmuk a, motor chhungah a nem lut titih a, ani pawh driver seat lamah a lo lut nghal chu a ni mai.

"Ka lawm e" inthiam lo ru zetin Abigail-i chuan a ti sep a, pu CS-a erawh thinrim hmel zet hian a ngawi run a, a thlah kha lo duh ṭha hle hle se chuan chutiang thil chu a tawng kher lo ang maw le.

"In in awmna lai i sawi dâwn nge kan ina riak turin ka phur haw leh dâwn zâwk che?" rei fê an ngawih dun vang vang hnua pu CS-a ṭawng ram deuh hmuk avang chuan an in awmna a lo sawi nghal thuai a, pu CS-a chu a lakah a lungawi lo ni berin a hre tawh. 

"La chhuk lo teh" pu CS-a chuan a chhuk tur chu a bânah a chelh tlat a, Abigail-i chu a zâm ru tak zet bawk.

"Chawl hahdam rih la a ṭha ang" a tih zawm leh nghal chuan Abigail-i ngaih a ṭha thei ta lo.

"Min bán tihna em ni ka pu? Khawngaihin min bán suh, ka che sual tawh lo ang, ka tiam a che" a ti mawlh mawlh a, a hna aṭanga bán a hlau lutuk chu a mittui a parawl kûng thei hial a ni.

"Chutiang lam sawi ka tum lo, i dam ṭha lo a ni Abigail, chawlh hahdam rih i mamawh" a tih pawh chuan Abigail-i chu a ṭap titi tawh a, mahni inthiam lohna hlirin a khat a, pu CS-a ṭhiante awm laia a che sual kher kha pawi a ti hnuhnawh zual tak zet.

"Khawngaihin min bán suh ka pu, ṭha takin ka thawk tawh ang. Ka hun hmasa lamah hmingchhiatna ka lo nei tawh si a, min bán a nih chuan hnathawh tur ka hmu zo lo mai ang" ti ṭiauin Abigail-i chu a ṭap chhuak ta nge nge a, pu CS-an a âwma a kuah beh rual chuan a ṭah a chhuak zual sauh bawk.

"Ṭap lo teh, awm dan tur ka thiam lo a nia Abigail. Aw le, a ṭha e, ka bán lo ang che, bán che ka tum reng reng hleinem, i taksa hahdam deuh se ka duh mai chauh a ni" awm dam taka pu CS-a biakna chuan zawi zawiin a thla a timuang a, a hahdam siai siai ni maiin a hria. 

"Ka tihpalh, min hrethiam dâwn nia" tih leh pu CS-a kuahna ata awm sawn thuai a rual nghal a, pu CS-a pawh chuan a lo thlah ve mai bawk. 

"Kan in kawt thleng min thlah avangin ka lawm e" ti sepin motor kawngka chu a hawng a, a chhuak zui nghal a, a ngaihtuah chian pôh leh pu CS-a laka a awm dan chu mawi lo a va ti tehreng ém.

"Lo ding leh lawk" pu CS-a aw a hriat rualin a ding chawt a, a hawi lêt nghal a, a bul lawkah pu CS-a chu a lo ding reng tawh chu niin.

"Eng nge ni ta ka pu?" a ṭawng zo hman ṭâwk ang tihah pu CS-a chuan a hmuiah tak a rawn fawp ta thut mai, a meng kawk a, a theih tawpa nâin a nam sawn vat bawk. 

"Min hrethiam teh Abigail, ka ngaihtuahna i luah tlat si a ni" pu CS-a thil sawi chu ngaihthlak reng pawh a duh tawh lo, an awm dan nen lam a dik lo tih a hre chiang em em a, hmanhmawh takin in chhungah a lut thuai thuai zui nghal.

CS-a chuan a thil tih zawh chiah chu átthlak a ti hnuhnawh viau a, mahse engkim a nih tur ang a ni zo vek tawh si. In lama a inkhalh haw chhung zawng chuan a ngaihtuahna leh mitthlaah Abigail-i bawk a awm leh ngut ngut tawh a, chu thil chu thla eng emaw zah a thup tawh a, sawi chhuah chí ah pawh a ruat lo. A nupui thi ta lakah a inthiam lo ṭhin em em a, hmeichhe dang ngaih melh a nei ringawt pawh chu thiang lovah a ruat hmiah a, mahse a awm dan tur leh a hma hun engmah a hre si lo a ni. In a thlen thlengin Abigail-i a fawp ringawt chu a inthiam thei lo va, a nihna nen pawh a inmil lo tih a hre chhuak zut zut a, mahse a rilru aṭangin Abigail-i chu a paih chhuak thei chuang si lo, a rilru a buai mawp mawp a ni ber e.

A tuk aṭang chuan Abigail-i leh CS-a te chu an inpehhel dun ta char char a, CS-a paw'n a hmel hmuh loh law law a thlang ta zâwk a ni. A hmel a hmu a nih chuan awlsam takin a danglam mai zel si a, a hnuah a nupui thi ta lakah a inthiam lo leh ziah a, a fate nu ni lo hmeichhe dang hmangaih neih a tum reng reng lo. Chutiang bawkin Abigail-i pawh a hringnun kawng a bumboh chho sâwt hle a, a ngaihtuahna aṭangin pu CS-a hmel te, a fawh lai te, amah hrim hrim chu a thai bo thei ta hauh lo mai. Kâr tluana pu CS-a hmel hmuh loh chang a nei ta fô va, a pu ni bawk, pu CS-a chuan a thinlungah hmun a khuar nghet ta hle a, a dan theih ni se chuan a dang ngei ang.

Pu CS-a awm loh hlan te chuan an nupa thlalak a en leh dauh dauh ṭhin a, pu CS-a mawlh chu hmelṭha a ti tak zet a ni. Pu CS-a chu pathlawi, fa pahnih lai nei tawh a ni tih a hai lo va, duha ngainat enah pawh a en ngai lo, mahse a fawh zan aṭang khan engkim a danglam zo ta a ni ber. Abigail-i chuan phat rual lovin a ngaizawng tih a inhre chhuak ta, a vei ngut ngut a, pu CS-a hmel lah a hmu tawh ngai bawk si lo. Pu CS-a ni lovin a nupui thi ta unaute'n Kevin-a te pahnih chu zanriah an eipui ta fô va, Abigail-i rilru erawh a nuam lo tulh tulh thung. Eng anga zing kârah pawh kal se pu CS-a hmel reng a hmu tawh ngai lo va, a thinlung chu thupa thunun a tum ṭhin, a thei ngáng si lo, a hnuah phei chuan a hmangaih tih a hre chhuak ta hial bawk.

Ni e, a phu loh mipa mah ni se pu CS-a chu a hmangaih tlat tawh a, a thinlung zawng zawngin a hmangaih a, a ngai a, zahpuiawm pawh a inti ve tho, mahse hmangaihnain a bual â zo tawh tlat a, pu CS-a zun chu a phur zo meuh lo zawng a ni e. Ni khat chu pindan tukverh darthlalang a tifai melh melh a, pâwn lam nawh fai a ngaih avangin a ṭhutna a siam rem a, chair-ah dingin rah chhan tur chu a va rap pha ṭawk ṭawk a, a awmna chu tlak hlauhawmah pawh a ngai lo. Amaherawhchu, kawngka lam aṭangin pu CS-a ngei mai chuan aw vin khauh fiah hrak hian

"Chhuk nghal rawh Abigail" a rawn ti a, a phu zawk nghe nghe a, pu CS-a chuan a dar tawn tawna chelhin a pawm thla vat a, a hlauthawng tak zet a ni. 

"Vawi khat mah láwn tawh suh, i hria em? I hria em ka tih chu Abigail? I tla ang asin? Thluak i nei lo em ni? Tla ta la engtin nge awm se min tih?" awm nêm fahran lo hian pu CS-a chuan a tih zawm mawlh mawlh a, Abigail-i erawh a hlauhthawn em avangin chhan nachang pawh a hre lo, a ngawi tawp ringawt.

"Ngaithla teh, pindan darthlalang hi vawi khat pawh tifai tawh suh ang che, tihfai a ngai a nih chuan keima'n ka tifai mai ang" pu CS-a aw khauh charh charh chu ngawi rengin a ngaithla a, a thinphu a rang zawt zawt hle a, a tha thlengin a la khur der der bawk.

"En teh Abigail, ka thinrim vang a ni lo, ka ngaihtuah êm vang zâwk che a ni asin, min hlau hmel tak khan awm lo la ka duh, min hlau suh, ka thusawi awmzia i hrethiam em?" a khabea chawiin pu CS-a bawk chuan a tidam thluam a, Abigail-i erawh a mittui a tling pam thung. 

"Ka hlau che alawm" ti ṭiau hian a ṭap chhuak ta feih feih a, a hlauhthawnna a la reh hlei thei lo a ni e.

"Ka tihpalh Abigail, min en teh le, khawngaihin min en rawh" a rawn tih chuan pu CS-a chu muangchang hian a en a, a mittui pawh a la tling nasa khawp mai. 

"I nát ka phal lo, ka tiná ngai lo ang che, min hlau suh" ti dam dapin pu CS-a chuan nghet tak hian a kuah vawng vawng a, Abigail-i pawh a insum thei ta ngâng bik lo.

"Ka hmangaih che ka pu" a ti ta thlawt a, naupangchhia ang mai hian a ṭap zui hawm hawm a, pu CS-a erawh a thisen luang lai tawp chat ang mai hian a khawng at thung.

"Sawi nawn leh teh Abigail, sawi nawn mawlh teh, ka hre leh duh a ni" pu CS-a chuan a ti thuai thuai a, a sawi nawn vat loh chuan thi mai thei dinhmuna ding te pawh a ang zâwk hial alawm le. 

"Ka thinlung zawng zawngin ka hmangaih che" Abigail-i kâ ngei aṭanga hmangaihna thu a hre nawn leh chiah chu insum kârna reng a nei tawh lo.

A pawm kang nawlh a, khumah bawh betin a fawp zui nghal mawlh mawlh a, a thiam ang tâwkin Abigail-i pawh chuan a lo fawp lêt ve tan tân a, pu CS-a ni se a phur em em vek tawh mai si. A hmui chu Abigail-i taksa hmun hrang hrangah a vah kualtir a, hmangaihna chen dun dâwn mah se an phur dun em em tih hai theih rual a ni lo. Thawk leh khatah pu CS-a zâwk chu a harh chhuak thut a, a rilruah a nupui thi ta rawn lang lo se chu a tawp thei kher lo vang. A awm dan a siam ṭha a, Abigail-i chu a pawt tho nghal bawk.

"Ka tihpalh ka pu, hmangaih ngam tur che ka ni lo tih ka hai lo va, ngaina ngam tur che ka ni lo tih lah ka hai hek lo, mahse ka thinlung chhunga mi hi ka thup thei tawh lo va, ka hmangaih thu che tal hi chu inthlahrung tak chungin hriattir che ka duh tlat si a ni. Engtin paw'n min ngai dâwn mah la pawi ka ti lo, ka pawm vek, mahse ka hna aṭang hian min bán phah lo hram la ka duh, a chhan chu ka nu ka chawm theihna a ni a, ka sawi theih chu a awm miah lo, ni lo, i duh phawt chuan min bán thei tho. Tunah chuan i laka ka rilru puthmang dik tak ka hrilh tawh che a, zahpuiawm pawh ka inti, tun bak hi chu ka sawi chhuak leh tawh ngai lo ang, ka tihpalh tak zet" zep awm hauh lova a rilru dik tak a sawi hnu chuan Abigail-i chu ngawi reng hian a tho va, kawngka lamah a kal phei zui nghal bawk.

"Ka thu sawi tur i ngaithla ve dâwn lo em ni?" tiin pu CS-a chuan a hnung lam aṭang a rawn kuah a, a kuah nghet em em leh nghal. 

"Kei pawh hian ka hmangaih che asin Abigail, min hmangaih aia nasain ka hmangaih hial che ka ring a ni. Mualpho ka hlauh avangin i laka ka rilru puthmang ka hrilh duh ngai lo che a, i hmel ka hmuh chuan ka rilru a danglam zel si a, thla tam tak chhung chu theihnghilh che tumin keimah leh keimah ka inti hrehawm asin, mahse ka hmangaihna che erawh chhe tê mahin a kiam lo hrim hrim. Ka nupui ni ta che Abigail, ka fate nu i ni duh ang em?" pu CS-a sawmna avang chuan a kun ngul a, a mipa hmangaih em emin a lo hmangaih ve reng tih a hria chu a lawm rualin a lung a chhe thar thut a, a ṭap leh ta feih feih mai.

"Ka phû lo ém mai che ka pu, kei ve mai min hmangaih pawh hi ka lawm tawh lutuk, i nupui niha i fate nu nih zawng ka tlin lo ang" tia kal sawn a tum chu pu CS-a chuan a kuah nghet sauh a, Abigail-i pawh a tál chhuak thei ta bik lo.

"Keimah zâwk hian asin phû lo che Abigail, ka khawharna te hi min hriatthiampui la, ka hmeichhe hmangaih i ni a, nangin min hmangaih bawk a, nupa ni thei phei ila chu duhthusam a ni" dam zet hian pu CS-a chuan a ti ta sûp sup a, Abigail-i ve thung chuan

"I nupui leh i fate nu ni tur ém chuan ka hniam mah mah a ni" a lo ti tlat thung. 

"Kan inkarah hian chhungkaw dinhmun san leh san loh lamin hmun an chang tur a ni lo, hmangaihna chauhin hmun a chang zâwk tur a ni" pu CS-a chuan kuai herin a fawp zui ta mial mial a, Abigail-i pawh a awm hle hle thei leh ta bik chuang lo. 

Rei fe an titi dun hnu chuan inneih thuthlung chham dun turin an inlungrual ta nge nge a, hlimna leh hmangaihnain an thinlung chu a luah khat a, naupang school báng hruai theihnghilh ṭhak khawpin an titi melh melh a, an hriat chhuah meuh chuan an nui dun ta ringawt. CS-a chuan Abigail-i nena an chanchin chu a chhungte a hrilh hmasa ber a, a chhungte chuan mak an tih rualin an lawmpui viau a, nupui a nei leh tawh lo mai ang tih an hlauhpui ru em em zâwk hi a lo a ni a, a puzawnte lam a hrilh ve leh nghal a, a hrilh dâwn te chuan huphurh ru tak a ni. Amaherawhchu, a huphurh leh hlauhthawn ang húin a puzawnte chu an lo awm hauh lo mai. Nupui nei leh ngei turin an duhsak em em zâwk a, CS-a tân chuan kawng a kaw vek ni maiin a lang, a hlim em em bawk. 

Buaina pakhat erawh a la awm ta tlat mai, chu chu Abigail-i pa a ni. A fanu chu pasal neihtir a tum lo bur a, pu CS-a nen an inngaizawng tih a hriatin kut te a thlak ta hial a, pu CS-a paw'n hum vak ngaihna a hre bik lo. Abigail-i ni se a taksa a chak lo zual em em a, a pa berin hna thawh a phal tawh miau loh avangin pu CS-a te inah pawh a kal tawh ngai lo va, a manganthlak ṭhin khawp. Tichuan a pa hlawh chu an inchawmna ber a lo ni ta a, a thawhna ṭhin pu CS-an pawisa pe ṭhin mah se a pa'n a hman ralsak vek ṭhin a, chung zawng zawng chu CS-an a lo hre leh vek si a, a thinrim luatah khua a hmu lo ṭep a ni. Abigail-i hringnun chu a buaithlak tial tial a, a ṭap leh tawp ṭhin. CS-a nen an inhmu khât tawlh tawlh a, an inhmangaihna hrui erawh a fei tial tial thung.

Thla a ral a, Abigail-i pa chu an Bialtu Pastor-in Revival Camping-a lut turin a sawm hlauh mai a, vanneihthlák takin Abigail-i pa chu a piangthar zui leh ta nghal a, a fanu leh a nupui laka a lo chet ṭhin dan zawng zawng avang chuan a inchhir em em a, Abigail-i hringnun paw'n hmasawn lam a rawn pan ve leh ta. Lawm avangin an biangah mittui a luang awl lo va, CS-a pawh tunah chuan a hah a dam ta huai mai. Abigail-i nena an inneih thuai theih nân hma a lâ ta zung zung a, palai pawh a tir rang hle a, Abigail-i nena an inneih theih loh a hlau ém a tin ni! Kár eng emaw zah a liam hnu chuan nupa an ni ta nge nge a, Kevin-a leh Gabriel-a paw'n Abigail-i chu an ngaina em em a, 'nu' an ti deuh chhen mai a, an awm dan engkim chuan chhungkawpa ber CS-a lung a tiawi tak zet a ni.

A kuma kum nupa an nih tâkah chuan Abigail-i paw'n fanu a hring ta a, CS-a pawh a lawm khawp mai. Kevin-a te unau chenin a piantirh ata an fanu chu an duat rawn em em a, keh thei dawmin an dawm bawk a, chhungkaw hlim tak chu an va ni chiang em. CS-a leh Abigail-i te inhmangaihna chu a pung zel a, a zual zel a, CS-a mawlh chu a hlim a ni. A nupui hmasa zâwkin a thihsan hnu khan hmeichhe dang melha a hmangaih leh theih a ring tawh lo kha a ni a, Abigail-i te ang hmeichhe nunnem leh rilru thianghlim tawng lo se chu hmangaihna lipuiah a zuang lut leh thei tawh lo mai thei a ni.

"Vawiin lam te eng nge kan án a? Ka fapa tur hi a lo harh leh em? A ute lah chu in kawtah ball an pet reng mai si a, ani pawh hi a lo chhuah hunah chuan a tel ve ziah ngei ang" nui sun sun hian CS-a chuan a nupui dul puar úl chu a fawp zeuh a, a piah lawka lo muhil bam a fanu biang chu a fawp zui nghal bawk a, chu chu hna bán apianga a tih ṭhin dan a ni a, mahse a nupui Abigail-i erawhin ngaiah a nei thei der lo. 

"Ti leh teh, a nuam" Abigail-i chuan nui ver ver hian a lo ti hliai a, CS-a pawh a nui suk ringawt.

"Nangmah phawt" tiin a nupui, a tâna fa palina tur pai mêktu chu lungchim zet hian a fawp vawng vawng a, chumi hnu chuan a nupui duh ang ngeiin a pum pawng al chu a fawhsak leh ta chauh.

"Awm sawn ve em em tawh la, ei rawng ka va báwl ang e" tia a nupui thawh tum chu CS-a chuan a dang vat a, amah a tho ta zâwk a, eng dang vang a ni lo, pa ber ni mah se ei rawng báwl a ngai tlat a ni. 

"Min duat mah mah lo maw?" nui sen sen hian Abigail-i chuan a ti leh lang lâng a, pindan kawngka lam pana kal phei mêk a pasal chu a en pah reng bawk. 

"Ka duat hlum lo chauh dâwn che" tiin CS-a chuan a lo chhang ve nghal zat a, rilru hlim zetin a nui zui suk a, nupuite rai lai chuan pa ber paw'n ei rawng a bâwl a ngai ṭhin reng a ni.

The End