THIS I PROMISE YOU By Havali Adam

                              THIS I PROMISE YOU

          (Valentine's Day Special Romantic Novel)

                                             By 

                                     Havali Adam

- Hmangaihna hlate zinga i hla duh ber kha ngaithla pah la a fuh ka ring ❤

"Mi zawng zawngin an sawi vek, in awm dan zawng zawng nen lam an hre vek che u. Hla zirnaah ni se ka zir loh zanah chuan sawi sep in kâi ngei ngei a, engati nge kumin hi i danglam em em?" ka ti tawn tawn a, ka bialpa Hmingtea chuan min en run thung. 

"Nang hian min lo kawp tak tak em ni? Kha nu, rawn awm thar ve mai kha i duh chiang ti raw?" ka ti leh hmawk hmawk a, ka ngawi mai mai thei lo a ni e.

"Khatiang khan mi chanchin sawi bawl bawl suh, i sawi ngai loh kha!" a aw chu hriat a nuam hran lo va, a hawi sawn zui nghal daih bawk.

"A hma chuan ka sawi ngai lo pawh a ni thei, mahse tunah erawh engmah zah ka nei tawh lo, a chhan chu nangmah vang vek hi! Sawi rawh, kei aiin i duh zâwk em? Kei hi min hne tawh tihna a ni em? Sawi tlang nghal law law rawh, ka vawi khat hriatna pawh a ni tawh lo" min chhan dan chuan min tithirim êm a, ka ṭawng chhuak chu a vin sâwt khawp mai.

"I va mak teh ṭalh e âw, khatiang lam zawng khan ngai tlat lo teh! Eng pawh ni se haw phawt ang, ngaih ṭhat lohna tur engmah a awm lo tih hre bawk la" rawn ti mah se ka ngaih ṭhat lohna a zual tulh tulh zâwk!

"Hmân aṭang tawh i insawifiah ka phut ngai lo che a, a chhan pawh ka duha ka rin êm ṭhin vang che a ni; mahse tun ṭum chu i insawifiahna ka hriat ngei ngei a ngai tawh, hmeichhia pawh i ni lo, tuai pawh i ni lo, mipa dik tak i ni a, mipa takin i sawifiah tur a ni" ka ti nghet salh salh a, a hnarin a thaw chhuak ham ham a, a hmel ka lo en reng lai chuan min rawn chhuk melh ve leh ta nge nge.

"I sawi hreh viau em ni?" keimah zâwk chuan ka ti leh ta thlawt a, ka mipa rin em em leh ka bialpa ni bawkin insawifiah tumna nei hmel a pu miah lo chu ka tha a nâ a ni.

"Chutianga duhna ka neih áwm pawh ka hre lo, mahse a ngainatawm reuh, a nu hnâp a, min biak ṭhat reng chuan ka tân lo biak chhiat emaw lo chhan duh loh ringawt kha a mawi lo" tiin a rilru dik tak chu a rawn sawi ta.

"Min lo ning ru tawh ngawt ang ti raw? A ṭha e, inṭhen i duh tih ka hrethiam mai, kan inṭhen ang. Hei erawh hre reng rawh, engtin pawh awm ila chhetê them paw'n min rawn ngaihven tawh hauh suh ang che" tih leh kal sawn ka rual a, mahse ka kal thui hman lo chiang hle. 

"Inṭhen ka duh thu engmah ka sawi loh kha maw le, ka sawifiah i phut a, ka sawifiah mai chauh a ni. Eng kan sawi kaw rih dâwn chuang lo, haw ang" ka bânah kaiin a bike hunna lamah min pheipui a, ngawi rengin a hnungah ka chuang a, ka ṭhu tung ût chu amah bawh tura min duh ni àwm tak hian

"Khatiang khan ṭhu suh, ni dangah i ṭhu ngai mang si lo" a rawn ti bul deuh hmuk a, thinrim aw paw'n min be chuang lovin ka hria.

"Khaw maw i kut, min kuah loh chuan ka tlan chak viau ang" tih leh nghalin amah zâwk a rawn che a, chhang lêt lo chuan ka kuah ve mai bawk a, ka rilru erawh hmun dang daihah a awm thung.

Kan in lam pana kan tlan chhung zawng chuan ka rilru a kal kual nasa hle a, ka laka ka bialpa awm dan leh a thil sawi chu ka tân lungawithlak viau lo mah se thinrimna em em ka nei leh tawh chuang bik lo. A rilru dik tak a sawi niin ka ngai hmiah, dawt a sawi ngai lo tlat a tin ni! Synod High School ka kal lai aṭangin kan inngaizawng tawh a, kum engzat chiah nge liam tawh ang, kan inzui rei ve ngar ngar tawh khawp. Khang kum liam ta chhung zawng zawng khan nasa taka han lungawi lohna tur ka tawng ngai lo va, keimah ang thovin ani pawh a thik thu a chhe lo va, min dawm thiam ṭhin hle zâwk. Kan inngaihzawn tirh aṭangin chhut neuh neuh ta ila chuan kum 15 a tling ṭep tawh ang ka ring, mahse ka ning ngai eih lo. A tirah kha chuan tleirawl kan nih avangin ka duh tak tak paw'n ka hre lo, amah zâwk khan min duat thiam a, min ngaihven thiam a, zawi zawiin ka duh chho ve tial tial mai bawk. 

Pawl 9 ka nihin kan inhre ṭan a, ani chu pawl 12 a ni thung a, amah avangin chawhnu tlan bo kha ka ngah phah ṭhin. A tirah duh vak lo mah ila thla te a'n vei a, kalpui tura min sawmna apiangah khan ka kal ve zel a, a ṭhiante nena meizial an zukna hmunah te khan ka tal tam hman ang reng. A ṭhiante bulah a bialnu ka nih thu a sawi mai zel a, khang hun lai aṭang daih tawh khan meizial zu ṭhin mah se zú erawh a in áwm ka hre miah lo; tun thleng hian! Ka rin ai a rinawm phian a, pawl 12 ka chhuah hma zawng khan a duh chuan bialnu a nei ru thei reng ang, min kawp thei reng, mahse keimahah a lungawi tâwk ka ti mai, hmeichhe dangah a rilru a pek ngai pawh ka hre lo. Kei lah kha Synod Girls Hostel-ah ka awm daih bawk si a, pawl 12 a pass chhuah hnua kan inhmuh ṭhin dan chu kan school bân kha a ni deuh mai. 

Gate pâwnah min lo chang ziah a, zirtirtute hmuh a hlau ve ṭhin tho bawk nen a ruk tak meuh khan inhmuhna hun kan insiam a, amah aṭangin infawh ka thiam bawk. Ka mipa fawh hmasak ber a ni a, kan infawh tawh hi chuan eng dang ka ngaihtuah thei ngai lo. Kei nena kan inngaihzawn hmain ngaihzawng pali panga vel chu a lo nei tawh bik a, a zei chhan pawh chu chu a nih ka ring hmiah. Chu bakah ngaihzawng nei lovin awm ta se chu a inhmeh lo zâwk ang, a hmelchhe hran lo tlat! Mipa hmelṭha lutuk a ni lo va, hmeichhe tâna 'pà' tih chi a ni zâwk a, chu chu ka duhna chhan bulpui ber a ni bawk. Pá ka tih avangin ka ngaina chho ṭan a, a hnuah hmelṭha ka ti leh a, a mizia leh a hmel, a awm dan leh a chezia hrim hrim a inhmeh vel vek a, a kuma kum fê kan inzui ngar ngar tâkah chuan ka rilruah hmangaihna a rawn piang ta nge nge bawk.

"I chhuk dâwn nge kan inah ka phur phei daih dâwn che?" hawi vual vualin kan awmna chu kan in kawt a ni tih ka hre chhuak thut a, a nui thawm ka hriat rual chuan a helmet-ah ka chum a, a nui ring zual sauh thung.

"Inṭhen ka sawi e te i ti kual vel a, keini pahnih hi chu kan inṭhen thei lo tih hre tawp rawh" bike hnung aṭanga ka chhuk lai chuan a ti dap dap a, hmui tisawi vakin ka ner khum ta ringawt. 

"Kha nu kha kei ai i duh zâwk em?" ka tih chuan a nui hawk a, mahse nuihzat avanga nui a ni paw'n ka hre lo. 

"Kha nu ti ziah suh, hming a nei ve reng alawm, nang paw'n i hre reng, ni lo'm ni?" thik tawh sa nák a laiin ṭan ang taka a'n sawi vel chu le. 

"Aw le, kan inṭhen ni rawh se" ti hmakin ka inher a, ka pen sawn zui nghal hmawk hmawk a, min rawn kuai her chiang lutuk chu min tinâ lek lek zâwk. 

"Inṭhen lam sawi ziah suh Isabela, kan inṭhen ngai dâwn chuang lo" a tih chuan

"Ka zawhna kha chhang reng ta che, chhan harsa viau pawh ni hlei lo, i danglam ta lutuk hian ka rilru i tinâ a nih ber hî" ka ti pang pang a, ka ṭawng zawi lo hle bawk. 

"Sawi kher lo pawh ni ila ka duh lo tih te chu i hre sa vek tho alawm, eng nge ka sawi kher chu i phut?" 

"Hre sa vek lo, inhnial reng hi ka ning a nia Hmingte, min thlah la, ka lut duh tawh" ka aw chu a hma ang lo takin a zuai ta raih mai. 

"Ngaihthla teh, Zorin kha ka duh lo, duh chîah pawh ka ngai lo, chu bakah a naupang mah mah, ti khan a tâwk em? Zorini laka ka rilru puthmang chu i hre chiang tawh em?" min vin titih deuha a ṭawng kher chu la nâ tak ka ni.

"Chiang lo" ka ti sep a, ka ṭawng ring peih tawh thlawt rih lo, in chhunga luha mut vang vang ka châk tawh lutuk! 

"Isabela!" a vin deuh hrawk a, ka mittui a rawn parawl nghal bawk.

"Engati nge maw nang tê reuh hi hrilfiah i harsat reuh em em ni!? Ka duh lo, ka duh chu nangmah, hmeichhe dang thik buai tawh reng reng suh" aw dam deuh zawkin a rawn tih zawm zat a, kei erawh ka mittui a tling hnem hman hle thung.

"Ṭah tum ringawt lo teh Isabela, kan buaina hi a ho lulai lutuk" a kut pahnihin ka biang tawn tawn a khuap a, ka mittui chu a baw ta zawih mai. 

"Aw le, ka tihpalh, ka vin tawh lo ang che" tiin a kutzungpui chuan ka bianga mittui luang thla ngiai ngiai chu a hru zeuh zeuh a, a hmui leh ka hmui a inbawhthuah zui nghal bawk.

"I lung a awi tawh em?" ám zeta kan infawh zawh hnu chuan a rawn ti hniam ruih a, ṭawngkâa chhang lovin ka lo bu nghat a, min fawh tirh kha chuan rilru nâ ru takin ka chhang lêt a, kan tawp dan erawh duhthusam a ni.

"Lo fawp daih tawh tur che ka ni asin maw le" ka beng vun nêm lai khál neuh neuh paha a tih leh chuan ka hmui ka tih sawih khum vak ringawt.

"Va lut rawh le, han titau na teh, i châk lo ang" a thusawi avang chuan ka nui hak a, tunah chuan ka rilru a pangngai leh vek tawh. 

"I sawi tâkah chuan ka titau dâwn khawp, i hna chu min thlem a ni mai, hre reng rawh" ka ṭawng zawh rualin ka tlan nghal a, ka tlan sawn vat lo a nih chuan min pawt ding hman leh dâwn tih ka chiang.

"Ni mai teh se, mut tui le" kawngka bul ka thlen chuan a rawn ti lang lâng a, hawi lêt zeuhin a nui var var hmel ka hmu nghal a, kan awm dan chu nuam ka ti ru viau; a tira kan lungawi loh dun tehreng nen.

Khuma ka mut hnu thleng chuan ka nui reng mai, ka hlim chiang a ni. Ka rilru nât laia min fawp kha a ṭha ka ti phian, ti ziah se a ṭha tak ang, mahse zei deuh khan min fawp lo ta se chu ka lungawi lohna leh ka rilru nâtna hotê te kha a bo kher lo mai thei. Ngaihzawng nei ṭhang a ni bawk a, infawh hi chu a zei ve thawkhat a ni. Kan inngaihzawn tirha kan infawh hmasak ber kha chuan min fawp mawl tawp a, a hmui nêm tak kha ka feel theih awmchhun a ni tlawng mai. A thlaa thla kan inngaihzawn hnuah erawh min fawh dan a tidanglam a, a lei mawlh kha a va hmang thiam ṭhin tak, tunah pawh a la ni reng, chu vanga zei ti pawh ka ni réng! Kawngka hawng dêk dêk ang mai hian ka kâ chhungah a rawn tilut thiam tlat ṭhin a, mipa dang hian thiam ve tak ang maw, kei chuan mipa dang ka mamawh lo khawp mai.

A tukah chuan min rawn bia a, ka titau ta ngei a, a nuam ve hrim hrim, a bula han pangchan kual vel leh han tihtauh khum vel hi a nuam ka ti, mahse ka rilru erawh a pangngai vek tawh thung. Kan vênga rawn awm thar Zorini ka lo thik ve em em te chu mawl ka inti hnuhnawh, kum 10 chuang fê ka bialpa ni tawh leh ka mipa hmangaih em em hian ngaihzawng dang min neihsan dâwn lo tih hrethiam tur ka ni asin maw le, a chhan chu Hmingtea hian kei ang bawkin min hmangaih tlat a ni. Ka hnenah a la sawi miah lo na chu, min hmangaih tih ka hre thei. Min ngaihtuah a, min ngaihven a, a nau zâwk leh a hmeichhia zâwk ka nihna hre ránin min dawm a, ka mood a ṭhat loh laia mi tihhlim dan te hi a thiam ṭhin, kei hian ka tluk lo zâwk a ni. A thusawi avanga ka mood a dik theih loh chuan min dek a, a tirah ka ning a, a tawpah erawh ka nui uarh uarh a, ka hlim leh nge nge ṭhin.

Ka mitah hi chuan mihring a nih avanga famkim lohna tam tak nei mah ni se a ni tluka mipa famkim hi ka hre bik chuang lo, Sap pa hmelṭha tak tak te ai pawha ka hmangaih zâwk a ni tho tho. A mizia tê hi a ngainatawm ka ti ṭhin bawk, mipa harhvang leh ṭawng zawt zawt chi a ni hran lo va, mahse ṭawngmawh ùnkhán lutuk an tih ang chi hi chu a ni chuang lo. Ṭawng hun a hria a, ngawih hun a hria a, a tâwk chiah a hre khawp mai. Tin, ka chhuanna em em pakhat chu kohhran leh KṬP-a inhmang reng chu si hian a khawsak dan a buai phah miah lo va, engkimah Pathian a dah hmasa ber zel a, kan inngaihzawn ṭan tirh lai vel kha chuan a ni bik lo. B.A ka kal lai vel kha a niin ka hria, a fel thut a, a mizia pawh a thlak danglam nual a, meizial erawh zu tam lo mah se tun thleng hian a la nghei thei bik chuang lo. Nghei tur paw'n ka ti ngai lo va, amah zâwkin nghei hun a tihah chuan a nghei mai ka ring tawp.

Kei ve thung hi chu a buaithlak chi vek ka ni a, kawng engkimah ka buaithlak a ni mai. Ka pa ka chhun khanglang a, rilru butut ka la nei zui, Hmingtea hian min dawhthei viau ṭhin lo se chu kan inzui rei teuh lo. Zep thu cheng lo, ka hmel hi chu a ṭha ve pangngai reng, kei pawh hian ka inhria. Chapona lam ni lo se ka hmai fang a dik a, hmeichhe tam tak ai ka vun a nalh bawk a, mahse ka pian a nalh teh chiam lo thung. Hmingtea hi feet 6 chiah chiah a ni a, pheikhawk sang nen a koki ka thleng chiah chiah a, san zawngah hi chuan ka nu ka chhun leh lawi a, ka pa zâwk chhun ila chuan Hmingtea koki pawh ka pelh var var ka ring. Unau zinga hmeichhe awm chhun ka ni a, mipa pali leh hmeichhe pakhat kan ni a, kan upa ber dawttu leh Hmingtea an inrual chiah a, a mi lâi ka ni a, ka naute pahnih mipa an ni ve leh a, ka pianpui unaute zawng zawng mipa an nih avangin ka nu leh pa'n min buaipui nasat phah ṭhin hle bawk.

Hmeichhia e ti lo chuan mipaa piang tur ang chiah chiahin ka rilru a mipa a, kan naupan laia kan ṭhenawm naupangte nen kan insual ṭhin te kha ka la hre reng. Ka kawlh ṭhin si a, ka kum rualpui hmeichhiate kha chuan min kawm ngam ngai lo. Min kawm ngam loh vang pawh a ni em em lo, an nu leh pate khan kei min kawm tur kha an phal lo zâwk a  ni. Mipa zun te khan ka zung mai zel a, engah mah ka la ngai lo zui. School-ah ni se mipa nen bawk ka inkawm leh a, a changin kan insual thul, mahse tûma'n min hneh ngai lo, ka chak ber zel. Class 4 thleng kha chuan insual ka hrat em em a, ka kawlh bawk si, ka nu leh pa'n in lamah min zilh ziah a, mahse ka nihna ni miah lova nu leh pa dangte'n min lo khak ve ringawt chuan min chhan thei em em thung. Kan school-a naupang pakhat pa paw'n fiamthu thawh nân min lo hmang ve ringawt a, ka pa nen an insual phah a, an bul lawka ka awm leh awm loh pawh sawi lovin a hnek thi hnuang a, ka pa kha chak ka va'n ti thei tak, hmeichhia mah ni ila amah àn kha ka thil nih châk ber ṭhin.

Chutiang khawpa mipa rilru pu leh mipa nih châk ṭhin kha ka ṭhang chho zel a, mite paw'n ka hriat lai ngeiin mipaa piang tur hmeichhiaa ka pian thute min sawi khum hial a, huat enah pawh ka en chuang lo. Middle school kan chuangkái a, tlêm chuan ka zia deuh, ka naupan lai ang em emin ka kawlh tawh bik lo. Hmeichhe dangte nen inkawmin ṭhian ka nei chho ṭan a, ka rilru a danglam vang a ni mahna, ka insiamrem thei ve zel mai a, ka nihna dik tak ka hre fiah tulh tulh a, hmeichhe nih chu hrehawm tihna em em pawh ka nei chuang lo, mahse a ruk chuan ka la pá ru tho. Ka mizia pá ṭhin viau mah se ka hmeichhiatpui ngaizawng chî ka ni lo hulhual a, chu bakah ka pa'n a phal teuh lo, min vaw er zawt zawt a ni mai, ka pa vuak hlau khan kan van tlan chhe nasa thei tak; kan upa ber thleng khân! 

High School ka rap chiah chu a dan a dang ta zar mai, hmelṭha min titu chu an tam, mahse ka mizia an duh lo zel a, pâ min ti tlat a, mipa duh ruk tih vel pawh ka hriat chhoh tak tak hmain Hmingtea nen kan tawng a, min biak hmasa ber nî te khan ka hawi hû ringawt, hrethiam lo tak ka ni. A nihna takah chuan a luck ve thawkhat a, Senior-Most kha a ni miau a, ka ṭhiante zawng zawng paw'n an star rawn luaih luaih a, mahse kei ber kher, thengthawnga ngaihzawng lam thawk reng reng lo leh patil deuh reuh ber kha min rawn be ta tlat mai si a, ka tân kha chuan a hriatthiam nghal ringawt theih bik loh a ni. Kâr khat vel kan inhmu ziah hnuah min duh thu a sawi piap a, ka nui ringawt a, ka engah mah a thawk eih lo, a beidawng duh ṭhak lo leh nghal. Kan han inngaizawng chiah chu school-ah kan lar vak a, mahse chutih hun lai vel pawh chuan duhna ka neih áwm ka hre lo, ka unaute paw'n mak an ti a, an awih lo va, min nuih ṭiah ṭiah ringawt.

Kum a thar a, kan school-ah Hmingtea hmel nitina hmuh tur a awm ta miah lo chu ka awm thiam lo va, ka lo duh ve hle tawh tih ka hre chhuak a, kan inṭhen emaw tiin ka ṭap nghe nghe a, khang hun lai khan ka va'n lo mawl thei tak! Hmingtean kei ber kher min duh miau avangin ṭhiante thik rawn ka hlawh phah a, ngaihzawng neih awmzia ka hre chho ve zel bawk a, Hostel-a kan awm lai te khan ngai thei tak ka ni. A bikin Synod School phei chu an strict ang reng si a, zana inhmuh kan tum paw'n kan thei mang lo ṭhin. Ani pawh khan min hmu châk ve ṭhin tho va, gate-a rawn lawn liam te kha a nei zing khawp a, kei lah a ruka chhuah ruk phet tum bawk, kan inhmuh tâkah kha chuan kan nui dun a, kan inkuah a, kan infawp a, a bak eng dang vak mah a thleng ngai lo, nuam kan ti ve em em ṭhin tho. Ka ṭhian kawm ngeih zual te puihna azârah inrinni bazar laiin kan inhmu thei ṭhin bawk a, ka ṭhiante bazar laiin Hmingtea bulah ka awm daih zel a, haw a ngaih hunah ka haw ve leh mai a, khang hun lai kha a ngaihawm.

Tin, Hmingtea nen hian kan vêng a inang lehzel a, pawl 12 ka zir Iaiin ka chhungte'n kan inngaizawng tih an hria a, a hma kha chuan an hre thawi deuh a, ka neih tak tak an rin loh avangin ka unaute paw'n min nuih nghe nghe a nih kha! Pawl 12 pass hmaa ngaihzawng ka lo nei thawt thawt kha ka nu leh pa berin rem an ti vak lo va, mahse phal lo bur an ni chuang lo. Tichuan a ruk deuh si, ruk chiah si lovin Hmingtea nen kan inzui chho zel a, pawl 12 ka pass thu pawh ka hrilh hmasa ber a, a hnuah ka chhungte ka hrilh a, Hmingtea ber khan min lawmpui thiam a ni. Ka chhungte'n Distinction emaw First division-a ka pass an rin laiin Second division-ah ka pass thung a, kha tak kha ka chhungte lungawi vak loh chhan pawh a ni réng. Ka chhungte ang lo takin Hmingtean ka rilru zawng zawng a thlak a, an college hluia ka luh ngei theih nân engkim min buapuisak vek a, mahse ka pass ṭhat lutuk loh avangin hmun dangah admission kan tifel thung.

Hmingtea nen inhriain inngaizawng lo ta ila chuan Distinction-ah emaw First-ah ka pass ngei ngei ka ring, exam lai te khan Hmingtea hlirin ka rilru a luah tlat a, zir mang lova Second division-a ka la pass thei te kha tun hnu hian mak ka ti letling zâwk. College ka kal ṭan chiah a, ani erawh phai lamah zirna avangin a liam thla daih thung a, ka va'n ngai vawng vawng thei tak. Zantin phone kaltlangin kan inbe ziah a, zû in miah lo tur te khan ka chah nasa ve ṭhin. A lo haw apiangin thil min lo hawn ziah a, a thil min rawn hawn chu a ho emaw ho lo emaw ka pawm vek a, a tak ngeia kan inhmu ṭhin chu ka lawm ber zâwk. Hmingtea te hi rethei an ni lo va, kan vêngah pawh a hausa pawl an ni a, vêng chhung mite'n kan inngaizawng nghet tih an hriat chinah phei chuan thiktu pawh ka nei tawh ngai lo, a nuam ru ang reng.

Kum 2 hnuah hlawhtling takin a rawn haw a, Mizoramah hna a hmu nghal a, a hna hmuh zan chuan kan lawm nghe nghe. Mizoramah a awm leh ta bawk a, KṬP-ah a inhmang pangngai ṭan a, min va han khalh ngil chiang tak! Ka ri phuak phuak te, ka ṭawng leh ṭeuh ṭhin te, mi dang rel leh an chanchin sawi ka chinna zawng zawngte chu min siamṭha vek a, mahse mi dang rêl na nâ na hi chu hmeichhia tawh phawtah chuan a bet ka ti mai, a ṭawng duh chi nih phei chuan a rêl loh theih loh. Mi chanchin sawi lo tawp chu ka ni lo va, mahse ka sawi tlêm em em tawh thung. Group Secretary-ah te an ruat a, a hnuah Branch Committee member-ah an ruat leh a, a sual hran lo bawk nen kohhran thlengin nilai zan ṭantu atân an ruat chho zel a, a ṭan zan apiangin ka inkhawm ve ziah bawk. Zirlai nih chuan inkhawm zan apianga inkhawm a theih reng bik lo va, he lam kawngah hi chuan ani paw'n min hrethiam ṭhin khawp. 

B.A ka final semester kumah kohhran zaipawl conductor atân an ruat a, amah avang hrim hrim paw'n hla ka zir hnem phah ṭhin. Han ṭawng lawng lawng chi a ni lem lo va, ring deuha ṭawng ai chuan microphone a hmang mai zel a, mi dang erawh microphone tel lovin an ṭawng ṭhin thung. B.A ka graduate a, ka zir zawm peih tawh der lo. Puan ṭhui lam ka tui thar a, Hmingtea tak hi chuan engtin pawh awm ila min thlawp zel a, ka chhungte zâwk hi an buaithlak leh thut ṭhin, mahse min ngaihtuah vang a ni tih ka hria, zilhna thu dawng fô mah ila ka haw ngai lo. Ka zir zawm peih tawh miau loh avangin puan ṭhui lamah ka kal ta nge nge a, thawmhnaw design neuh neuh ka uar a, ka thiam ve ang reng a, rei lo tê hnuah thawhna tur dawr ka hmu thuai a, chuta ṭang chuan ka thawk ta char char a, hna sang tak ni lo mah se zahawmna tâwk hna ka nei hrim hrim chu ka lawm a ni.

"En teh, saw saw saw, a duh chiang alawm Isabela, an rawn awmna a la rei loh tehreng nen a zak lo hawr hawr ka ti, u Hmingtea lah sawn a ngai pawimawh lo mai sia!" ka ṭhiannu thusawi chu a dik chiah, Zorini hian a duh chiang a ni.

"A ho êm mai, duh pawh ni se Hmingtean a duh ve chuang hleinem" rilru dam hmel zetin ka ti tak na a, Zorini awm dan chuan ka mit a tikham khawp mai. 

"A inla hmelṭha vel sia maw, awi kei chu a awm dan vel saw ka ngei tawp, a la naupan tehreng nen, a thar hma mah mah a ni" ka ṭhiannu chu ka nuih ringawt a, ka nuih erawh a za em em lo. 

"Sawi tawh lo ang" tiin ka ngawi zui nghal daih a, hla zir lai êma mi dang lo rél vel chu ka châk teh chiam lo, Hmingtean min hmuh ruk reng ka ring e a! 

Dar 10 dâwnah kohhran zaipawl hla zir kan bâng a, mahni in lam ṭheuh panin kan haw dam dam a, Zorini awm dan bawk chuan ka mit a tikham a ni. Hmingtea nen kan haw rual a, Zorini chu a ṭhiante nen kan hmaah an kal a, an nui thler duaih duaih kher a, min runluih a ni mah zâwkin ka hria. An rawn hawi lêt lai tak chuan Hmingtea bânah ka kuah thut a, inti tatu zetin a kut ka zu chelh zui nghal bawk a, Hmingtea ber chuan a hriatthiam loh hmel khawp. Zorini leh a ṭhiante pawh an kal liam a, kan pahnih chauha kan kal tâkah chuan ka awm pangngai ve leh mai a, kan in lamah kan kal zel a, vêng khata awm ni mah ila vêng tawp ve vea awm ang kan ni a, kan in awmna inkar a inhlat ve ang reng a, hla ka zir hi chuan min thlah kawi hmasa ziah ṭhin. 

"Naktuk i office dâwn em?" kan in kawtah kan ding tawh a, ka lut nghal mai lo va, pâwn boruak hipa titi dun mai mai chu ka châk rih tlat. 

"Office ka ring, thil sawi dun lawk teh ang, a remchang riau" a tih chuan

"Eng lam?" ka lo ti nghal a, ka kut chu humin ka hma zawnah a ding a, a sawi tur awm ang ka hre lo hrim hrim. 

"Inneih lam hi ngaihtuah ve tawh ila, kum 15 chu kan inzui tling tawh dâwn a nia, nupuiah ka nei duh tawh che" a rawn ti hlawl a, mak ka ti lutuk chu ka nui tawi tak ringawt. 

"Hun chu a hun ve tawh tho" ka ti sep a, inzui rei ve tawh tak chu kan ni.

"Sawi teh, innei ang aw?" a rawn tih leh chuan

"Teh tawp a che, Sapho ang hian min propose i tum na nge?" ka lo ti hliai a, a nui nghawr dat a, ngaihtuah chian chuan min sawm dan chu a RAW ve ê. 

"Min neih i duh leh duh loh sawi phawt teh" 

"Ka sawi te'n awmzia a awm náng" ka ti ve tlat.

"Propose che chu i lo phut ru hle a ni maw? I duh dan chuan ni rawh se, heti ang lam i ngaihtuah vak ka rin loh vang zâwk a nia ka tih loh, nachang ka hriat loh vang pawh a ni lo" a rawn ti deuh luam a, a insawi thiam ve emaw ni!

"Ka lut mai dâwn asin, nang pawh kal rawh, haw tawh rawh, naktuk i office dâwn kha" ka tih chuan

"I romantic lo ve bawk si, phur hmel deuh te'n min en ta che, ka tân pawh propose che a phurawm sawt dâwn alawm" a rawn ti mai a le, ka chum ri nghal pawp. 

"Romantic lo min ti bik ziah suh" tiin ka chum leh nghal zat a, a bengah ka pawt bawk a, nui huah huah chung hian min dawh mai mai a, ka sawisa rei peih leh ta bik chuang lo.

"Nupa kan nih hunah chuan ngaihzawng ka nei chhin ang" ka thin tirim tur tâwk vela ṭawng hi chu a thiam a ni. 

"Chuti chu kan inneih loh mai a va ngaih hmel ve" ka tih chuan

"I sawisa lai ka hmu chhin châk, i kutthlak a nâ si a, hmeichhe tam tak chuan an hneh teuh lo ang che" a rawn ti daih a nih chu! 

"I sawi ho, ka lut dâwn" tia kal sawn ka tum chu min chelh vat a, a âwm bul chêtah ka ding titih nghal der.

"Ka fawh phawt loh che chuan i lut thei lo tih i hre na nge?" ka chala mi nam dâk zeuh pah hian a ti a, a la nui sun sun zui. 

"Ngawi lawk, hawi kual phawt teh, kan kawm chhak te khi an la mengin ka hria, min lo hmu ru reng ang e aw" a rawn kun hniam lai chuan ka ti thuai a, ani pawh a hawi kual ve mai bawk. 

"Tuma'n min hmu lo ang, a ho lutuk" tih leh min fawh a rual nghal a, a ngai te bawkin a zei leh ta, a nuam ṭhin lutuk hi suangtuahna ramah ka cheng daih zelin ka hria.

A kal mai dâwn emaw ka tih laiin min kuah leh vawng vawng lawi a, mahse nuam ka ti viau tho. Kan inthlah fel meuh chuan dar 10 leh a chanve a pel fel der tawh a, rei meng tawh lovin ka mu zui nghal daih bawk. A tukah chuan dawrah ka kal a, ani office a kal a, office bánah min rawn lam leh thlap a, kan bán hma chu min nghak char char a, eng ang paw'n bâng har mah ila hmán ata tawh min nghak tluan ṭhak zel a, haw mai tura ka tih paw'n awmzia a awm ngai chuang lo. Dar 4 leh a chanve velah kan bâng a, monday zan a ni bawk a, zan inkhawm turin min sawm nghal zat a, kei paw'n ka 'aw' ve mai. Inkhawm tum reng si kha ka awm a rawn nuam lo riai riai a, ka hnar a rawn ping nghal viau bawk a, hritlâng ka kâi a ni mai thei. Hmingtean min rawn sâwm ta ngei a, mahse ka inkhawm lo law law, ka awm a nuam hlei thei tlat lo a ni.

"Kha, hei hi han ei teh le, engati nge maw hetia i awm ringawt mai le" ka nu aw pawh chu ka hre mumal lo, chiang lo ruai hian ka hria a, damdawi min eitir lai te chuan ka meng peih lo hrim hrim. 

"Awi, i khua a sik nasa lutuk, paa, lo phei teh, hei a khua a sik a nia" ti lawng lâwngtu chu ka nu bawk a ni a, a sawi dik ka ring, ka nuam lo êm mai, ka taksa chhung lam leh pâwn lam zawng zawng nen a nâ chhuak vekin ka hria.

Ka harh pangngai meuh chuan damdawi inah ka lo awm daih tawh a, drip hial kan lo khai reng chu niin, ka harh tirh phei chuan ka hrethiam lo hman ang reng viau. Ka bulah ka chhungte an lo ṭhu ṭhap a, ka awmna chu ward ni lovin cabin a ni tih ka hrethiam chawpchilh nghal mai bawk. Doctor a rawn lut a, eng eng emaw ni hi a sawi a, a thusawi ka hre chiang thei leh tlat tawh lo. Ka sa pup pup a, ka thawk chhuah zawng ringawt paw'n ka hnap thleng a sâ vek a, hrehawm tak a ni. Chiangnial lo zetin ka thaw leh halh ṭhin a, ka hriat awm chhun chu ka nu aw a ni mai. Ka chala a rawn khawih lai ka hre zauh zauh bawk a, ka awm dan hrehawm zet chu kiam vat se ka ti ngawih ngawih. Ka mit ka men rual chuan Hmingtea hmel ka hmu tel tawh a, ka ṭah a chhuak nghal em em a, ani tal chuan ka taksa nâ lutuk tihdam dan chu hria se ka ti. Ni e, a hre em em ang, a hma zawng paw'n ka nawm loh changa hrehawm ka tih lohna tur a hre ṭhin alawm, tunah pawh a hre leh tur a ni.

                                  HMINGTEA POV

"Engtik aṭang khan nge? Engati nge min rawn call mai loh?" ka aw chu a ném viau lo, nâtna tuar mêk ka hmaa hmeichhe muhil bam chuan awm ngaihna min tihre lo hial dâwnin ka hria. 

"Zanriah ei kham bâwr vel aṭang khan a nia, ka hrethiam bik lo. Hritlâng leh dam lo satliah a ni dâwn emaw ka ti mai a, rawn hrilh nachang che pawh kan hre lo a ni" ka hmeichhe hmangaih em em muhil lai thlir reng pahin a nu thusawi chu ka ngaithla ran a, Branch Committee ṭhutfual zawhah tlawh kawi ka tum hrim hrim kha a nia, rin phak bakin thil a thleng ta si.

"Doctor-in engtin nge a sawi? Nâtna a lo nei réng em ni?" a hmaa ai hriat nuam deuh zâwk chuan ka ti leh sup a, ka hmangaih em em kut chu ka chelh ran bawk. 

"Result kan nghak mêk, rin dan pawh a nei bik rih lo, a pawi ber chu dam lo satliah emaw ka ti kha a ni" beidawng aw zet hian a nu chuan a rawn ti sep a, mi dang erawh in lama an haw lawk avangin an awm lo thung. 

"Hre hma tur ka ni asin maw le" ka ti hniam ruih a, ka chhungte hnen aṭangin phone call ka dawng zui nghal a, in ka thleng har tawh an ti a ni mai thei. 

"Aw ka nu, zanin ka lo haw ka ring lo, min lo mutsan mai r'u" phone call pick up rualin ka ti nghal a, ka bul lawkah Isabeala-i a muhil bawk si a, ka ṭawng ring hran lo.

"Engati teh thut nge? Khawiah nge i kal?" a rawn tih chuan Isabela-i damdawi ina ka awmpui thu ka hrilh ve mai a, a chanchinte min zawt zui nghal a, a ngaihtuah hmel viau bawk.

"Lungmuang deuh khan mu rawh u, eng a thleng lo turah ngai phawt ang" ka tih hnu chuan kan inmangṭha a, cabin chhungah Isabela-i unaute leh a pa an rawn lut chiah a, tam tak awm an phal loh avangin an haw ṭhen leh tho ka ring.

Isabela-i chu ka ṭhut chilh deuh tawp a ni ber a, chiang mang lova rawn harh a nei leh ṭhin a, ka va'n khawngaih tak! A hmel zawng zawng a danglam chak em em a, doctor-in thisen chaw a khaisak reng bawk a, Result-a a lan dan chuan khawsikpuiin a tlâk buak mêk hi a lo ni a, kan inngaihzawn chhung zawng khan damdawi in luh ngai khawpa dam lohna a nei ngai lo va, chu vanga hlauhthawng zual em em pawh chu ka ni. Doctor chuan a ṭhat ve leh mai a ring a, kei paw'n ka ring. Zan dar 12 rik dâwn hnaih velah a rawn buai deuh thut a, a kaih a, buaipui ka châk lutuk, mahse keia chinchâng hre zâwk Doctor leh Nurse te'n an buaipui mawlh mawlh a, ka tân chuan an chetna dip zâwnga awm loh a finthlak zâwk si. A kaih hmel mawlh chuan ka lâi a chhun, ka khawngaih lutuk tak zet, tih theih ka nei mang bawk si lo, tun atâna ka duhthusam ber chu dam ṭha ver vawrin awm se tih a ni. 

"I ṭha em?" a rawn harh rualin ka lo ti vat a, zing lam dar 4 bâwr vel a ni tawh a, chhin khat pawh ka la chhing eih lo. 

"I lo kal a?" a ti thawp sep a, tawi tê hian a nui lui zeuh bawk. 

"Kal chiang e maw le, ka lo kal loh te'n a dik nâng, min lo ngai lutuk palh ang" ka nui lui ve suk a, a chau hmel chu hmuh reng hrehawm ka ti, ka ti tak zet!

"Ka ngai tak tak che" ti zuai raihin a mit a chhing zui daih a, muthilh a duh zâwk a ni mai thei.

"Tui tak khan han mu siai siai teh le, ka lo awm reng ang" ka tih chuan a rawn meng leh lawi a, a kut a chet neuh neuh a, ka hum nghal vat bawk.

"Min ngaihtuah lutuk suh aw, tunah dar engzat nge ni tawh?" a rawn harh tirh ang em emin a aw pawh a zuai ta lo e!

"Zing dar 4 leh a chanve a ri dâwn" ka ti ve mai a, a vei lama ṭhu ngawi reng a nu chu a en a, ka lam rawn hawi lehin

"I office a ngai áwm sia, va haw zâwk rawh, hei ka nu pawh a awm reng alawm" a ti sep a, ka lu ka lo thing vat thung. 

"Office ka tum hleinem, kha lam kha chu ngaihtuah buai rih suh le" tiin a kut ka lá kang a, ka fawp vang vang a, a chal chu duat takin ka chul hliau hliau a, ani paw'n a mit a chhing leh ta vang vang.

Zing dar 7 velah pangngai deuhin a rawn harh a, a tho kang ṭha khawp mai. Chau hmel lutuk ang chi kha a pu tawh lo va, a nui sen sen hmel ka hmu leh thei ta zâwk a, a nu paw'n a hawsan rih hial a, la dam ṭha em em rih lo mah se zan lam ai chuan hma a sawn khawpin ka hria. Thil kan sawi dun a, a changin a nui vak vak a, a chang leh ka hnar a rawn piai vak thul, amah chiah chiah a ni leh tawh e. Office kal turin min nawr lui ngar ngar a, kei lah ka tum tawh lo nasa mai si. Office ka kal lo erawh nuam ti ber berah a ṭang leh lawi a, min kuah chung chung vel a, ka va hmangaih hliah hliah reuh tak! Kan infawh laia Doctor lo lut thut erawh a fuh chiah lo, a che nen lam a lai ṭutin ka hria, min nuih leh ringawt ṭhin a, Isabela-i ber chu a zak ru ta a ni.

Doctor chuan a pangngai ṭan tawh thu leh zan 2 vel riah hnua kan hawpui theih mai a rin thu a sawi a, ka awm a nuam huai thei. Nilêngin kan awm dun char char a, a chhungte an rawn lang zauh zauh a, ka chhungte leh vêng chhunga a ṭhiante pawh an lo kal nghe nghe a, ani lah chu dam lo e ti lo chuan a ṭawng duh leh a nui ring ber berah a ṭang leh lawi a, a ṭhianteho lah an bang bik chuang lo, an thil sawi a ho hlawm si. Isabela-i chuan haw tur te'n min hrilh a, haw ka tum chuang der lo. Ka hriat theih chinah damdawi in luh ngai khawpa a dam loh vawi khatna a ni a, chuti maia hawsan ringawt zawng ka rilruin a zuam lo, ka thei lo hrim hrim bawk. Ka haw hlanin a lo dam lo leh vak ang tih te ka hlau a, chuti taka bal ka ni lo bawk nen a chhuah hma chu awmpui char char ka tum nghet bur zâwk a ni.

Kâr khat a ral a, Isabela-i pawh in lamah kan hawpui tawh a, mahse a la dam hlei thei chiah lo thung. Office bán apiangin kan in ka luh hma ka tlawh kawi ziah a, a chang chuan an inah chaw te pawh ka ei hial a, a chhungte nen kan inhre chiang thawkhat tawh bawk a, inngaizawng hlìm ang maiin ka inthlahrung dûk tawh teuh lo. Isabela-i pawh hmasawn lam pan em em lo mah se chhiat lam a pan chuang lo va, a ngai reng a, a la dam lo reng a, a dam har mah mah tawh a ni. Kâr hnihna a ral a, a zia ta viau a, zirtawpni phei chu an dawrah a kal nghe nghe a, office bán rualin an dawrah ka nghak a, dawr neitunu chuan haw hma tur te'n a ti a, kan haw hma daih bawk. A dam ṭhat ver vawr huna propose ka tum ru rán a, ka thil tum chu a lo hre ru kar ang tih ka hlau, thil lah hi a hre thei zêk leh nghal. 

Propose hi chu ka tum daih tawh, mahse amah zâwkin ka propose a lo phut ru reng tih ka hriat zan aṭang khan ka inthlah dul leh deuh a, propose lam reng a ngaihtuah loh laia ṭhawn thut ka duh a ni ber. Kum 15 dâwn chu kan inzui ve tawh a, inngaihzawn nuam kan ti dun lutuk a, kan la innei thei lo mai chauh a ni. Keimah tak hi chuan kum dangah pawh ka sawi ri zauh tawh ṭhin a, amah zâwk hian inngaihzawn nuam a ti zual a, lén dun te, chhuah dun te leh bazar dun te hi a la kham lo ni berin ka hria. A áwm ve reng tho; hmeichhe thlirna aṭang chuan! Hmeichhiate hi chu mo an han ni a, pasalte in a nih tawh avangin hna an ngah sawt a, chhuah dun duh viau mah se hun siam chawp hram hram an ngai tawh a, chung vel chu a peih rih lo a ni mahna le. 

Amah lah hi a romantic lo ve ang reng si a, tun hnua romantic lampang a hriat chinah hi chuan inngaihzawn a la kham ngâng lo a ni; kei tak paw'n nuam ka ti em em tho. Kan inngaihzawn tirh lai vel phei kha chuan ka ṭhiante'n min nuih ṭhin a, patil ka ngaizawng emaw te kha an ti a, mahse patil a ni der si lo. Tun hnu hian ka ṭhiante zingah pawh min awt hnuhnawhtu an awm nual a, keini pahnih lah chu kan inṭhen dâwn der si lo. A tir kha chuan ka chhungte ngei paw'n min duhpui lem lo va, a pá kha an ti tlat a, keiin a rilru thianghlimzia te, a hmelṭhatzia te, a duhawmziate, engkim mai kha ka hmu chiang em em vek thung si. A kuma kum kan inngaihzawn hnuah ka chhungte paw'n ngaiah an nei mai a, sawiselna lam engmah an sawi ri tawh ngai lo va, ka nupui tura ka duh ang chiahin min duhpui tawh zâwkin ka hria.

"Hmingte, office i bâng tawh em? I bán tawh chuan lo phei thuai teh, Isabela-i awm dan hi a dik miah lo" nu Chhuani thil sawi avang chuan ka tlan chak zual sawt a, kan haw mêk thu pawh ka hrilh ta lo. 

An in ka thlen chuan nu Chhuani chu a lo mangang hle a, Isabela-i ni se khumah a mu tawm kak a, a dam chiang har tawh lutuk chu ka hne ru ngawih ngawih! A pang ka dek vat a, sat namen lovin a lo sa vur a, tun hnai te chu a zia deuh khan ka hre si a, a awm dan teh thut chuan min ṭhawng a ni. Nu Chhuani chuan a pa hna bâng a la rawn haw loh thute, mi dang an lo la haw loh thute, a rilru buaizia thu te chu min hrilh mawlh mawlh a, ngawi rengin Isabela-i chu ka buaipui thung a, damdawi ina kalpui mai a ṭha zâwka ka hriat avangin ka pawm láwp a, nu Chhuani pawh chuan min dan tumna a nei lo hrim hrim. Taxi ka phar a, Hospital hnai berah ka pawm lut a, ka tlanpui dawt dawt a, ka pawm mêk erawh a zawi hnuang a, engmah hre tawh lo ang mai a ni. Doctor te bula ka hlan dâwn lai tak chuan a rawn harh a, min en ṭawk ṭawk chung hian

"A nâ lutuk, ka lu a nâ lutuk, ka luak a chhuak" a rawn ti thâm ṭiak a, chhan pawh ka chhang hman lo. 

Doctor te'n an buaipui zawm nghal mial mial a, nu Chhuanin a chhungte a be mawlh mawlh reng a, hlauthawng zetin a ṭap titih nghe nghe bawk. Kei pawh awm dan thiam har ka ti, rilru fim ka pu hlei thei lo. Doctor pakhat a rawn chhuak a, a thluaka khawsikpui lut thei dinhmuna a awm thu a sawi chiah chu ka hamhaih lutukna lamah thil dang sawi nachang pawh ka hre lo, ka ding khawng tawp a, nu Chhuani lah a mangang nasa mai si. Ka ni huîh a, ka hmangaih em em chuan min thihsan mai ang tih ka hlau ta ber. Nurse pakhat lo chhuak chu nu Chhuanin chanchin a lo zawt leh a, Isabela-i a luah nasat thu te, thil a hriat mumal tawh loh thu te, a taksa chak lohzia te, a khawsik a reh theih loh thute a sawi zung zung a, nu Chhuanin thinrim titihin zawt lui lo se chu a sawi duh kher ka ring lo.

A muthilh thu kan hriat hnu chuan ka lut hmasa ber a, kan awm kim deuh ṭhap tawh a, ka hmangaih hmel ka hmu leh chiah chu maw ka nâ lutuk, ka nâ lutuk tak zet. Ka hmangaih Isabela-i ang lo takin a hmai te chu a cher kuam a, chuti ang em em chuan a taksa a danglam hman ka ring lo. Dam ṭha hlei thei lo a nih avangin a cher chu a cher sa ngei a, mahse a cher belh chiang a ni. Awmpui ka tum thu ka sawi a, tûma'n min hnial lo va, min hnial ta pawh ni se ka awmpui tho ang. Zan lai pelh tawhah a rawn harh hlawl a, mahse engmah a hre mumal lo. Kan awmna hmun chu a hai a, a lu a nât thu a sawi leh a, doctor ka ko vat a, ka mit ngeia a buai lai hmuh zet zawng hmangaihtu tân chuan thlir reng a va'n hrehawm duh tehreng êm.

Chumi zan aṭang chuan hmasawn lam ai chhiat lam a pan ta char char a, a harh chang lahin a harh rei lo thei si. Thisen chaw khaisak reng a ni a, Pathian hnenah pawh ka ṭawngṭai tam a, ka hmangaih chuan min kalsan ka hlau ngawih ngawih, hlau tak ka ni. Zan khat chu a harh ṭha phian a, kan pahnih chiahin kan awm a, lungchim takin kan infawp a, kan inkuah a, a rilru tihlim zawng hlirin thil ka sawipui a, cher viau mah se a nui hmel te chu ṭha ka hliah hliah tho. 

"Nakinah chuan i benga ka pawt ṭhin te, i hnara ka piai vak ṭhin te, i bâna ka hnek pawp ṭhin te, kan pahniha kan hun hman dun zawng zawngte kha kei min hriat rengna tur thil leh mitthla mai a ni tawh dâwn si a, chu hun chu ka huphurh a ni" a thil sawi avang chuan a hmel ka en vat a, beidawng hmel a pu chu ka thil duh lo ber te zinga mi a ni.

"Khatiang thu kha sawi suh, sawi tawh miah suh, thi tur ang khan in sawi tawh suh Isabela" ka aw chu thunun ka tum tehreng nen ka thei der lo, a tân chuan hriat a nuam vak lo mai thei. 

"Ka thi dâwn tlatin ka hria alawm, ka dam lohna a rei tawh si, ka dam har bawk si" hmui khur dat dat hian a ti a, a ṭap zui nghal feih feih a, ka che chhuak vat bawk. 

"Lo hnai teh, ṭap tawh suh le. I thih ka phal i ring reng reng em ni? A teuh lo, a teuh lo mai, i thi dâwn lo, doctor te'n an enkawl dam thuai dâwn che, hlauthawng lo la, thi tur ang paw"n inngai suh" ti mawlh mawlhin ka âwmah ka kuah bet a, ani erawh a la ṭap feih feih tho.

"Min en teh le Isabela, ka hmangaih che, ka hmangaih lutuk che. I dam ṭhat hunah kan innei nghal ang, i hria em? I dam ṭhat veleh kan innei ang a, nupa hlim tak kan ni ang a, fate kan nei ang a, chu hun chu ka nghakhel tawh asin" a khabea chawi pahin ka ti dam dap a, a ṭap uar sauh thung.

"Kei paw'n ka hmangaih che alawm, mahse maw ka awm dan hi a hrehawm êm mai Hmingte, dam ṭhat ka châk tawh lutuk" a la ṭap feih feih reng a, a rilru nawm nâna ka hmangaih thu hrilh kha ka ni a, awmzia a awm paw'n ka hre lo.

"I dam thuai dâwn alawm, lungngai reng reng suh, i dam em em ang, doctor te kaltlangin Pathianin a tidam dawn che" ka tih chuan a ngawi ta reng a, a theih tawpin min kuah ve ṭai mah se min kuah nghet lem lo, tha a nei lo ve bawk êm a ni.

"Nâ ila nei em? I neih chuan sawi vat la, keima'n ka buaipui vek ang che" hriat nuam tur taka ka ti leh chuan mittui tling pam hian ka lam a rawn hawi a, tum lui tih hriat zetin a nui sak a, chutah ka benga pawt zeuh pah hian

"Min propose har si, min propose lo law law mai rawh, mahse min hmangaih thu i kâ ngei aṭangin ka hre tawh a, ka hlim tho, in-propose vel ai chuan ka hlim daih zâwkin ka hria" a rawn ti luam a, a ṭawng thui lui tih ka hria, ka va'n khawngaih ru tak êm.

"Ka hmangaih em emnu, dam ṭha thuai la, nupuiah ka nei nghal dâwn chiang lutuk che. Inngaihzawn kham loh i chhuanlam thei tawh lo vang, eng ang paw'n min hnial mah la ka nei tho tho ang che" ka ṭawng lai chuan ka beng a la pawt reng a, pawh erawh a pawt nâ hran lo.

"Ka pawm e, ka hmangaih che" nui var vara a tih rualin ka fawp nghal vawng vawng a, rei lo tê inla hrang zawkin ka fawp nawn leh ṭhin a, chutianga ka ti reng chu a ning deuh te pawh a ni mahna ka chala nam chung hian

"Ka rim chhia a nia, damdawi rim hlir ka nám, keimah paw'n ka inhre thei vek, min fawp tawh suh" a ti hluai a, kei erawh a thu angin ka awm lo nasa mai. 

"Rim chhia engmah ka hre lo" ka ti deuh tlat a, damdawi rim hlir hre mah ila ka hre lo der hmak, hmangaihna avangin ka hre lo der a ni mah zâwk.

"Zanin hi i harh ṭha riau, i dam tawh dâwn a ni ang" ka tih leh chuan

"A ni ang, ka ṭah pawh a chhuak tawh lo" a rawn ti ve nghal a, chu tak chu remchangah ka lo lá nghal zaih bawk. 

"Ṭap tawh reng reng suh, ṭah i inhmeh ve lo, ṭap tur chuan i pá mah mah!" ka ti deuh kher a, a haw ngei mai. 

"Pá mah ila min duh tho, min hmangaih tho" tih leh ka beng leh hnar pawh a rual a, ka nui suk a, fawh ka tum chu a lo thle sawn hmak a, a titau der tih ka hre chiang ropui si. 

"I sawi dik" tiin a biangah chuan ka fawp lui ta tho va, a hmuiah erawh ka fawp lui duh ta lo law law. 

"Mu ve daih la, i âwm nghengin ka mu duh" rem leh rem lova ka ṭhu awn duai chu a ning deuh te pawh a ni mahna le. 

"Min ngai chiang?" ka tih chuan

"Ngai e" a ti deuh hmak a, a va han lawmawm chiang tak, hmeichhe dangte anga zep si se a nei miah lo te hi ka duhna leh ka hmangaihna tizualtu pakhat a ni.

"Hetiang hian awm reng ang aw?" kan ngawih dun vang vang hnu chuan rilru no aw zet hian a rawn ti thâm ṭiak a, ka inbéng kang vat nghal. 

"I lu a nâ em ni? Nâ i nei em? Sawi teh Isabela, nâ i nei em?" ka ti zung zung a, a rawn ṭap ri ta nge nge.

"Thih ka hlau alawm, thihsan che ka duh lo, i nupui nih te ka châk ve a, mite'n pá min ti mah se pasal neih ka duh, ka pasal atân chuan nangmah chiah, nangmah chiah ka duh che Hmingte" ṭap chung hian a ti hlawp hlawp a, thlem dan tur ka va'n ván si êm. 

"I thi dâwn lo ka tih tawh khâ ka hmangaih, i thi lo vang, i dam leh thuai dâwn, i dam ṭhat veleh kan innei nghal bawk ang" ka tih laklawh lai chuan

"Ka hre ve vek alawm, ka dam loh dan hi a serious tih ka hre ve vek! A chhan chu thil hriat loh ka ngah lutuk, min thlah miah suh aw?" a tir lamah ṭawng tawn tâwn mah se a tawp khar dan erawh a zuai ta raih mai. 

"Tehreng mai, engtikah mah ka thlah lo ang che, ka thlah miah lo ang che" ti supin a bianga mittui luang ngiai te chu ka fawp hul a, ani erawh a maimitchhing tlat thung.

Ka mu ṭha ve leh mai a, a ṭawng tawh lo va, a reh zui vang vang a, minute 5 hnu vela a hmel ka en leh chuan a lo muhil fel der tawh a, a ṭap muhil a nih ka ring. A biangah fawp zeuhin ka mut dan ka siam rem a, duat taka kuah chungin ka mit ka chhing vang vang a, Pathian hnenah ka ṭawngṭai rilru mawlh mawlh a, ka hmeichhe hmangaih em em chu tidam thuai se, nupuia neih ka duh tawh a ni. Zing dar 6 velah ka harh a, chu pawh a chet deuh zuk zuk vang a ni a, mahse a khau a sik tawh rih lo va, ka lawm tak tak a ni. Ka ngaih a ṭhat hman tehreng nen rei lo tê hnuah a khua a rawn sik leh ṭan ta mai, khawsik ser ser a nih avangin ka ngaichang deuh phawt a, mahse a tâl a tàl tâkah chuan ka ngaih a ṭha thei tawh lo. Tho vatin nurse ka ko va, engtin tin emaw ni hian a buaipui a, Isabela-i chu a luak leh ta ṭeuh mai. Chutiang zat zat a luak chhuak thei te chu a mak zâwk, tih tham thil ei a nei mang si lo. 

Ka hlauthawng lutuk chu ka tlan chhuak vat a, doctor ka hmuh hmasak ber ka ko nghal a, hmeichhia a ni a, chu nu chu Isabela-i enkawltu pawh a ni lo. Khawl thil hmangin an endik mial mial a, chutah darkar 1 dâwn an inbuaipui hnu chuan ka hmangaih chu a khum chawpin an nawr chhhuak ta mai. A chhan ka zawt vat a, ICU-a dah a ngaih thut thu ka hre chiah chu ka tliak hnáwpin ka hria. Ka rilru a fim thei lo va, ka mumal lo va, ka buai vek a, eng nge tih hmasak ber tur pawh ka hre lo. Ka ngaihtuahna a pangngai deuh hnu chuan nu Chhuani te ka call vat a, ICU-a an dah luh thut thu ka hrilh nghal mawlh mawlh a, chu bak thil dang ka sawi thei rih lo. Ka off hmak a, mahse nu Chhuani te chu an lo thlen har ka ring lo. Cabin chhungah lungngai zetin ka lut leh tawp a, Isabela-i mutna khum ruak hán chu ka en tlawk tlawk a, min thihsan mai ang tih ka hlau tak zet tawh a ni. 

Ka ṭhingṭhi rawp a, Pathian hnenah kut suih meuhin ka ṭawngṭai a, tunah zet chuan mipa pawh ka mipa thei ta bik lo. Ka mittui a tling pam a, rei lo tê hnuah ka mittui te chu ka biangah a luang zawih zawih a, mahse Isabela-i hmuh laiin ka ṭap lo tal a, a zia ka la ti tho. A hmuh laia ka ṭah phei chuan a ngaih a ṭha lo zual ang a, a lung a chhe mai mai, chu chu ka duh lo a ni. Hmangaihna avangin ka mittui a parawl leh ṭhin a, ka hmeichhe hmangaih em em chu Pathian hnenah tidam turin ka ngen mawlh mawlh a, a bak sawi tur dang ka hre thlawt lo, ka tân a pawimawh êm asin, ka nunna tluk zetin a pawimawh a ni. Cabin aṭanga ka chhuah rualin nu Chhuani te pawh an lo thleng chiah a, thil thlen dan min zawt nghal zung zung a, kei paw'n ka hrilh ve mai bawk. Nu Chhuani ber chuan ṭah a insum thei lo va, a ṭap deuh reng a, Isabela-i pa'n a hnem paw'n awmzia a awm lo. 

Chanchin ngaihchan ka duh avangin office lamah pawh ka kal lo tlang law law a, Isabela-i dinhmun lah chu a chhe lam hlir a la ni zui. Ka rilru hah lutuk leh mangang ru lutuk chu thawk lâk dan tak ngial pawh ka thiam lo, ka thaw ri leh hawk ṭhin a, tûma'n min be lo va, min bia pawh ni se ka chhang kher lo vang. Chawhma lama kan thu hriat zet chuan min tikhawng vek thei, a mar an hmu lo zeuh zeuh a, a chang leh an hmu a, awm dan ka thiam tawh lo. Ṭhutthlengte chu hnek chawrh chawrh ka châk, ka chhia leh ṭha hriatnain min la thunun hram hram a ni. Chawhnu lamah erawh a pangngai thu leh oxygen pek a nih thu kan hria a, ICU kawngka bulah kan ṭhu ṭhap a, tlêm chuan ka ngaih pawh a ṭha deuh, mahse a ṭha tak tak thei tawh lo. Thil hre chhuak zawkin ka che thut a, ka pen pâwk pawk laia min kohna ri te chu ka hre vek, ka chhang eih lo hrim hrim.

Kan vêng lamah chak zetin ka tlan a, kan in kawta ding lovin Pastor Quater awmna ka tinzawn chat a, Pastor in kawt ka thlen chuan ka chhuk muangchang lo hle bawk. Pastor hnenah ka hun tawn mêk chu zep awm hauh lovin ka hrilh mawlh mawlh a, zep lo chuan thinlung rum avangin ka ṭah a chhuak ru tet tet reng a, ka insum nasa em em thung. Ka sawi lai te chuan ka aw a dik hlei thei lo va, Pastor chuan chik zet hian a lo ngai thla ran a, a bula a nuipui ṭhu paw'n min lainat hmel khawp. Thutlukna kan siam fel hnu chuan phone number te kan inpe tawn a, kei pawh damdawi in lamah ka tlan lêt leh nghal vat a, Isabela-i harh laia awm hman ka duh a ni. Ka awm lo a nih chuan min zawng ngei ang tih ka chiang, a chhan chu kalsan ngai lo tur khan ka hrilh tawh tlat a tin ni! Damdawi in ka thlen chuan a lo la harh lo va, ka kalsan laia a awm dan ngai chiah chiahin oxygen a lo la hip reng a, ka va'n khawngaih tak êm.

Ni e, pastor biak mai loh kha chu ngaihdan dang ka nei tawh rih lo a ni. Nizan khan ka nupui nih a châk thu kha a sawi ngei a, a thi dâwn a nih paw'n ka nupui a ni hman ngei tur a ni. Pastor hnenah khan a lo harh leh huna min inkut suihtir turin ka ngen tawp kha a ni a, ka sawi tirh kha chuan mak a ti hle a, mahse kan dinhmun zawng zawng a hriat chinah erawh min khawngaih a, min ṭawngṭaisak thlap a, Isabela-i tâna a ṭawngṭai lai te khan ka ṭap lo chauh! A lo harh huna inneihna thuthlung kan chham theih nâna inbiakremna kan neih hnuah ka kal ta kha a ni a, Pathian paw'n min dem bik ka ring lo. Amah Isabela-i berin thi dâwn tlata a inhriat lai te khan ka insum hram hram a, dik tak chuan a thih thut ka ring ve tho, mahse ka phal si lo. A thih ka rinna chhan pawh a dam loh chhan leh a dam loh dan zawng zawng phone-ah ka zawng kual vek tawh a, chutah a awm dan engkim chu a serious em em vek leh ta nghal a, ka inngahna awmchhun pawh Pathian chauh a ni tawh.

"Beisei loh deuhin a harh a, a taksa dinhmun a ṭha rih viau e. A dam ṭha tawh dâwn a ni ang, in duh chuan rei lo tê chhung chu pakhat in lut thei ang" doctor thusawi chuan min tiding ngil zawt a, tumah ka zah zo hman lo, ka lut nghal vat a, ngawi renga ceiling entu ka hmangaih hmel ka hmu zawm zat bawk.

"Isabela" ka aw a hriat rualin ka lam a rawn hawi a, hlim zetin ka nui a, ani erawh chuan mak a tih hmel viau thung. 

"Hlauthawng miah suh aw ka hmangaih, i bulah ka awm reng a nia, innei tawh mai ang aw" ka tih chuan

"Hmingte" a rawn ti sep a, a kut vuanin ka awm hnai thuai a, a mamawh laia awm hlat ka tum reng reng lo. 

"Khaw'nge ka awm a?" a hawi kual ralh ralh a, a awmna hmun dik tak ka sawi chuan a hlauhthawn ka hlau si, sawi loh ka thlang ta zâwk mai.

"Cabin-ah kan la awm reng alawm, i ṭha tawh lutuk a nia, doctor te sawi dan chuan kan haw thei ṭep tawh bawk" hmangaihna avangin dawt ka sawi a ngai tlat si, hrehawm ka va'n ti ru tak ém. 

"A ni maw!?" a ṭawng hrim hrim chu a chhuak chang chang vek a, oxygen hiptir a la ni reng bawk nen a ṭawng hriat a har lam lek lek a ni. 

"Lo la meng reng rawh aw ka hmangaih, pâwnah ka kal lawk ang a, ka lo lut leh nghal ang" tih leh thawh ka rual a, min en loh lai tak a ni a, ka tân chuan muangchan chi a ni tawh lo.

Pâwn ka chhuah rualin pastor ka call nghal a, lo kal vat turin ka ti a, a rang thei ang bera lo kal a tum thu a sawi hnuah inbiakna kan titawp a, ka chhungte leh Isabela-i chhungte chuan an hrethiam lo kher mai. Ka tum dan zawng zawng chu ka hrilh fai vek a, nu Chhuani a rawn ṭap hmasa ber a, ka nu a ṭap zui nghal bawk a, kei pawh ka mittui a tling a, a tling lo thei lo a ni. Pastor rawn thlen rualin doctor kan be nghal sawk sawk a, ṭhingṭhia dil ngai dâwn mah se ka hreh teuh lo, eng dang zawng aiin Isabela-i chu ka nupui a ni hman lo ang tih ka hlau ber tawh. Doctor chuan a lo phal lutuk lo va, ṭha rih viau mah se a buai leh thut ang tih a hlau a, a thlirna lam aṭang chuan a dik ve reng, mahse maw hmangaihtu hian ka nupui a nih hman loh ka hlau êm a ni. Ka ṭhingṭhi ta nge nge a, doctor chuan min kai tho vat a, a phal thu leh kan bula a rawn awm ve tur thu a sawi ta, ka va han lawm tehreng êm.

Isabela-i mutna room-ah chuan kei leh pastor leh doctor chu kan lut a, Isabela-i ber chuan mak a lo tih hmel khawp mai. Ka luh hmasak lai ang lo takin thil a hre pangngai vek a, a nute awmna te min zawt a, páwna an awm thu ka hrilh ve mai a, doctor chuan a lo buaipui reng bawk. Oxygen an hiptirna chu dim tê hian a hlihsak a, pastor pawh chuan a tih tur a hai lo hle. 

"Eng nge kan tih dâwn Hmingte? Engati nge hetiang hian kan awm?" pastor nen min en tawn zak zak a, dawt sawi hun niin ka hre tawh lo. 

"Kan innei dâwn alawm, tun darkarah ngei hian ka nupui i ni ang a, i pasal ka ni ang a, nupa kan ni tawh dâwn alawm ka hmangaih" ka ti dam thlup a, a kut ka chelhna ata a pawt chhuak rang khawp mai. 

"Ka thi dâwn ti raw? Kei hi ka thi dâwn ti raw Hmingte? Ni lo, inneih ka duh lo, ka thi dâwn chiang a ni" hmui khur dat dat hian a rawn ti phawlh phawlh a, hrehawm ka ti lutuk chu ka nâ vekin ka hria.

"I thi dâwn reng reng lo Isabela" tiin ka hnem hram hram a, thu tam pawh ka sawi hlei thei lo, a va'n hrehawm tak êm. 

"Le.....invuan r'u le" pastor-in a rawn tih chuan ka vuan nghal a, ka hmangaih mitmeng chu mittuiin a luah khat vek a, kei erawh hlim tak angin ka awm thung. 

"Ka thihsan leh si che chuan pathlawi i ni dâwn asin, innei kher lo mai ang Hmingte" pastor thusawi laklawh laiin a rawn ti ṭiau a, ka kuah thuai a, kuah chung chuan a kut ka la chelh reng bawk.

"Pathlawi nih ka zak hleinem, ka hmangaih che a, ka hmangaih em em che a, ka nupui i ni tawh tur hi ka hlim tak zet zâwk" ka tih chuan a ṭah nuih hak a, Pathian zârah buaina kan la nei lo tluang rih zel e.

"A nih, ka lo thihsan che a nih chuan nupui nei leh rawh aw, min tiam rawh, i nei leh ang ti raw?" a rawn ti ṭiau a, a zawhna chuan nuih a va tiza lo kher ém.

"Ni lo ve, ka nei tawh lo ang. Ka tiam a che, nang chauh hi ka nupui i ni dâwn a, i dam loh lai emaw i dam ṭhat hunah pawh ka nupui i ni reng ang a, i pasal ka ni kumkhua bawk ang a, chu chu ka tiam zâwk a che Isabela" a ṭap nghal feih feih a, kan bula awm te pawh zah zo lovin fawp vawng vawng a, a ṭap bang ve leh mai bawk.

"Aw le, ka nei ang che, ka hmangaih che Hmingte" nui lui hram hram chunga a tih tâkah chuan ka thla a muang ngawih ngawih, hlim tak ka ni. 

Pastor chuan Pathian thu chhiarin hun tam pawh a hmang lo va, hmanna chí a ni lo hrim hrim a, kan inneih zungbun tur ka lei lâwk sa diam tawh chu ka pe a, thu tawi tê a chham leh hnu chuan zungbun kan inbuntir fel ta. Ka hlimna chuan hmuh phak baka sang a tawng a, ka hmangaih pawh lungchhe fê hian a ṭap khur beuh beuh a, mahse a hlim ru ve tho tih ka hria, ka hre thei tlat a ni. Kan inneih dan chu dan ang thlap a ni lo tih ka hai lo, mahse ka tân a ropuiin a thianghlim em em tho. Doctor leh pastor chuan min chhuahsan a, nupa tuak tharte erawh ICU room chhungah inhmangaih takin kan awm dun a, kan nui dun a, oxygen pawh a hip leh tawh a, zep thu cheng lo, kan hlim a ni. Rai a châk tawh thu a sawi deuh reng a, keiin ka lo sawi phurpui bawk a, ka nuih a tiza khawp mai. Doctor khan a ṭhat chhunzawm zel chuan cabin lama a sawn vat theih a ring a, beidawnna karah beiseina éng a rawn dê vâ va ni maiin ka hria.

A muthilh rih avangin pâwnah ka chhuahsan a, pastor leh doctor khan engkim an lo hrilh vek tawh a ni mahna, nu Chhuani leh a pasal fanaute chuan min chibai sap sap a, a ṭhen an lo ṭap bawk a, chutih lai tak chuan khawvela ka thil duh loh ber a rawn thleng ta. Isabela-i chu a buai thut a, doctor leh nurse an lut thuai thuai a, engkim chu a rang teh thut lutuk a, ka hrethiam hman meuh lo. Darkar khat zenzawn a ral hnu chuan Isabela-i thih thu kan hre ta, ka chawmawlh vek a, ka beng a ngawng vek ni mai te'n ka hria. Kan hlim dâwn chauh emaw ka tih laiin min kalsan ta si, Pathian ka dem rilru mawlh mawlh a, ṭah pawh ka ṭap thei lo. Mi â ang maiin ka kal a, damdawi in kawt ka thlen te chuan ka ngawng vek a, ka nâ lutuk chu thih ve daih mai te ka duh rum rum a ni. Chumi zan, zan dar 6 leh minute 45 chu ka hriatna ka hloh te a nih ngawt loh chuan ka theihnghilh tawh lo ang; engtikah mah! 

Ka hmangaih em em, ka thinlung zawng zawnga ka hmangaih ruang chu kan kil ṭhap a, mi dang ṭap hawm hawm hlawm mah se kei chu ka la ṭep thei lo cheu. A tukah chhun dar 11-ah pastor-in a vui a, ICU-a kan awm dan leh kan inneih dan chanchin te a sawi a, amah ber pawh sawi mumal hlei thei lovin a hnuk a ulh titih nghe nghe a, ngawi rengin ka mittui a baw zawih zawih a, chutiang baka nâtna tawrh hrehawm chu ka la hre lo va, ka la tawng ngai lo bawk. Thlanmuala ruang phûm tura kan kal lai te chuan ka ṭhiante'n min chelh hial a, ka pangngai lo tak zet a ni. Darkar pawh a liam hmain khawvela ka hmeichhe hmangaih ber chu lei hnuaiah zalh a ni ta, mipa mah ni ila ka mittui a baw reng ringawt a, mahse ka zak teuh lo, mipa pawh hi maw hmangaihna avang chuan a lo ṭah theih lutuk, zah réng a hriat theih tawh loh!

Isabela-in min kalsan aṭanga kâr khat hnuah chuan amah ka ngaihna a zual a, ka khawharna a zual a, ka ṭhîa a zungbun awm chu ka en tlawk tlawk a, a ruang kan kil lai khan ka laksak a, a zungbun tal min hnutchhiah se, amah ka ngaih apianga ka hmuh theih turin ka taksaah bet reng se ka duh a, lei hnuaia phúm hnan atân chuan ka phal ngâng lo a ni e. Kan thlalak hlui te enin ka mittui a baw leh zawih zawih ṭhin a, engkim chu ka thiam loh vek zâwk a ni. Ni e, ka thiam loh vek! Hun ka ngah tehreng nen, engati nge nupuiah ka neih vat loh? A dam loh lai te khan nupa ni tawh ila chuan ka buaipui zung zung thei ang a, a dam lo rei miah lo vang. Ka mawl, ka mawl tak zet a ni. Ka hmangaih em em chuan min kalsan tawh si, hun liam tawh te kha her lêt thei ngat ila zawng engkim ka siam ṭha chiang khawp ang, kei ang mipa láktlâk loh lutuk min lo tawng kher kha a vanduai phah ta a ni.

Hun leh nîte a liam zel a, tunah chuan Isabela-i thih aṭangin kum 2 ngawt a lo vei ve leh ta reng mai. Kum khat tal tawp kha chu mahni inthiam lohnain ka khat a, KṬP lamah pawh ka inkhawm tam duh rih lo nghe nghe. Mi mawl ang maiin mite min biakna lah ka chhang ṭha peih bawk si lo, mahse ka ṭhi awrha zungbun ka en apiangin Isabela-i hmel ka mitthlaah a rawn lang a, chu chu ka hlimna thlentu a ni ṭhin bawk. February ni 14 a ni a, ka hmangaih thlan hmaah chuan ka ding ngawi reng a, ka kutah rose pâr mawi tak a awm ran bawk. Valentine's Day a ni a, hemi ni hi chuan eng ang paw'n buai mah ila Isabela-i ka ngaihthah ngai lo. A dam lai pawh khan an dawrah ka kal chilh ngat ngat a, ka len chhuahpui daih zel. Tunah erawh amah ka biak theihna awmchhun chu thlan lung chauh a ni tawh a, chu chuan min tinâ ṭhin mah se ka nâtna aiin amah ka ngaihna a zual zâwk si.

"Ka lo kal asin" ti ṭial ruihin thlan lung bulah chuan ka ṭhu a, rose pâr chu a hmuh theih tâk mialin ti ni áwm fahran hian a hmaah ka dah a, ni lo, a hmuh theih ka ring tak tak, hmu thei se, keimah pawh min hmu thei se ka ti bawk. 

"I lo sawi dik chiah Isabela, ka beng i pawh ṭhin lai te, ka hnar i piai ṭhin lai te, ka bân i hnek ṭhin lai te kha maw ka ngai lutuk, ka theihnghilh thei lo, ka mitthlaah a châm reng asin. Ka ngai lutuk che, ka ngai tak zet che, nang lah chu i ngawi tlat bawk si" hnuk ulh ṭûnin ka ti thâm ṭuak a, ka ngai êm a ni. 

"Happy Valentine's Day aw ka hmangaih, min kalsan hma khan nupui nei leh turin min ti a ti raw, kei chuan ka theih loh tur thu ka hrilh che a nih kha! Ni e, ka thei lo, a chhan chu maw ka thinlung hi i tân chauh a ni a, nang berin mi nung ram i chhuansan tâk si ah chuan tu hmeichhia mah ka hmangaih thei tawh dâwn lo tih ka chiang asin; nang chauh lo chu!" tih leh mit khap ka rual a, ka mittui a baw nghal zawih bawk.

"Zanin chu hetah hian ka riak dâwn aw Isabela, ka hmangaih, ka ngai êm mai che, suangtuahna ramah tal intawng ang aw ka hmangaih" thlan lung ngheng pah chuan ka ti hniam ruih a, ṭhu thluang duaiin ka maimitchhing zui nghal a, chhun pachang la ni rih mah se a tuk thleng ka ṭhu tlawk tlawk mai a ni ang chu! A pawi lo, engmah pawi ka ti lo, a chhan chu ka hmangaih nen suangtuahna ramah kan lêng dun dâwn tlat a tin ni!

Author's Note : Khiti khian a tawp chu a ni mai a, in duhthu erawh a sam chiah lo mai thei, khitianga tawp lo tur khian ngaihtuahna ka sêng ve ngei a, mahse an thawnthu tawp dan tur a ni miau bawk si. Nimin zing ka tho chu hmâna kan movie en nasat em em ṭhin, DVD player lar lai; CD rawlh luh hmasak tê tê phawt hnua kan en chauh ṭhin 'A WALK TO REMEMBER' ngei mai kha ka rilruah a rawn awm tluk tluk a, Landon-a leh Jamie-i te kha inhmangaih hle mah se thihna chuan duhsak bik a nei si lo chu a nih kha ti r'u! 

Tichuan le, a ṭobul sawi deuh reuh ang aw, tawi tê talin. He thawnthu 'THIS I PROMISE YOU' lo chhuah chhan hi Landon-a leh Jamie-i te vang kha a ni a, ka thiamna leh ka theihna a beitham tih ka hria, chu chu ka thawnthu ziah in lo chhiar apianga ka insit ṭhinna a ni. Mizo rilrem zawng taka ziah ka duh si, ka thiamnain a tlin lo tih ka hre chiang si, sawiselna neuh neuh a awm dâwn ti hre reng chungin ka rawn ziak lui ta tho chu a nih ber hi! Tin, he thawnthu ka ziah lai hian Landon-a leh Jamie-i te pahnih rilruah an lo lang pah reng a, Hmingtea ber hi ka khawngaih a ni. A thinlung zawng zawnga a hmangaih a chân a, a hmangaih thihna chu a thiam loh emaw te a ti lehzel a, thiam lohna pakhat mah a nei si lo. 

Aw le, chhiartu duhtak! 

Nupui fanau nei tawh i nih chuan i chhungkua kha i Valentine te an ni a ❤ chutiang zelin pasal fanau nei tawh i nih chuan i chhungkua kha i Valentine te an ni ve leh mai bawk a ❤ mahse fa nei lo; nupa tuak thar emaw vanduai avanga la nei rih lo in nih erawh chuan i pasal kha han Valentine bur phawt mai teh ❤ Ngaihzawng nei lai i nih chuan i bialnu emaw i bialpa kha i duh thu emaw i hmangaih thu tal han hlan hnáp la, thu ril tak sawi kher pawh a ngai lo, hmangaihtu thinlungah chuan a hmangaih ṭawngkam chu mi dang tân kha viau mah se a tân erawh a thlum vek tho tho ❤ Chutin single ho kha, lungngai reng reng s'u, ngaihzawng nei lo an tam lutuk, in nei lo tih pakhat mah tûma'n an hre tak tak lo 😂

A Wholesale-in, ka thawnthu ziah chhiar zawng zawngte Happy Valentine's Day vek u, Valentine ka neih leh neih loh zawhna awm lo bawk se a ṭha ang 😄

                                             ✨