PU MUANAWMA By Havali Adam (LAST CHAPTER 7)

                                   PU MUANAWMA

                                      (Dear Crush)

                                             By

                                     Havali Adam

                                    Last Chapter 7

"Rei lo tê chhung chu" a tih laklawh lai chuan

"Engati nge? Engati teh thut nge heti ang hian i awm?" ka lo ti nghal thuai a, ka aw chhuak chu a pangngai lo hle a, ka mittui avangin ka hmu phe deuh ruai bawk.

"Thla khat vel chhung chu Saron-i ka awmpui a ngai, thla khat ai paw'n a rei mai thei" a thusawi chuan min kher zawk zawk ni berin ka hria.

"Kan tawp chhan tur chu hmeichhe dang vang maw!? Chutah kha Saron-i kha, kan inzui hma aṭang tawha ngaizawng em emtu che avang khan maw!?" ka aw chu a vin fiah fak a, ka thunun hman tawh thlawt lo. 

"Huat hmel tak khan a chanchin sawi lo teh, i ngaina lo tih chu ka hria, mahse tunah hian" a tih laklawh lai chuan ṭawng tawh lo turin ka kut ka lék khum a, a ngawi zui hmak te chuan ka thin a va tirim ru si êm.

"A ṭha e, ka hrethiam tawh e; tunah chuan ka hrethiam tawh. Vawiin nilênga ka call zawng zawng i chhan duh loh chhan te, MZU-a i lo kal loh chhan te, nizana i lo lén hman loh chhan te, engkim hi Saron-i vang vek kha a ni tih ka hrethiam ta, ka lo mawl hle mai, ka mawl tak zet" ka ti phawlh phawlh a, ka ṭah a chhuak ru bawk si, ka tawt up upin ka hria. 

"I sawi ang khan kan tawp ang, kan tawp em em ang. Min duh ve tak tak emaw ka ti che asin, mahse tunah chuan ka ṭhiante khan an lo sawi dik tih ka hre ta. Ka nât hlauvin min hrilh ṭawk ṭawk a, kei erawh nang ka duh luatah che an thu pawh zawm lovin min bum i tumna thangah ka inawk tâng ta nge nge a, zanin aṭang chuan kan inkarah engmah a awm tawh lo e" ka tih zawm leh nghal a, ka ṭawng tawp lam phei chu zuai tawh tak a ni.

"I ngaih ang ngawt kha thil nih dan a ni lo, ka thusawi tur hi ngaithla la, i rilru pawh a danglam deuh mahna" a tih chuan a âwmah ka theih tâwpa náin ka nam pawp a, chet erawh a che eih loh thung. 

"Haw rawh, i kâ aṭanga thu chhuak reng reng engmah ka hre duh tawh lo" ka ti hlawk hlawk a, chuti ang em ema thinrim chu ka la nei ngai lo.

"Tunah hian engkim sawifiah vek sén a ni rih lo va, awih pawh i awih kher lo ang. I rilru a nâ dâwn tih nen lam ka hre vek, chu vangin sawifiah tehchiam ka tum lo, nakinah i rilru pawh a dam ve leh mai ang" a tih leh chuan za lo zetin ka nui hak a, ṭah ka la insum hram hram tih a hriat ka hlau hle bawk.

"Sawifiah buai a ṭul tawh hleinem, a chiang thawkhat viau e. Kei ang chiah hian hmeichhe dang rilru i lo tinâ tawh ṭhin awm sia ti raw? Ka rin ang i ni lo lutuk leh ka rinna zawng zawng ka lo hlan hman che kha ka inchhir tak zet, a nih le" tih leh kal sawn ka rual a, ka hnung chhawn chiah chu ka mittui a baw nghal zawih a, hawi lêt ka tum tawh lo hrim hrim.

Ka room chhunga ka luh chuan kawngka ka kalh nghal a, khumah bawkin ka ṭap khur tlawk tlawk a, ka thinlung nâ lutuk chu a puak keh mai dâwnin ka hria. Ni khat thil thua kan tawp thut chuan min tinât rualin a chhan ber, Saron-i vanga kan inzawmna chhut chah a duhna zawk chuan min tiná zual em em a, tawrh dan thiam a har ngawih ngawih. Ka ṭah chhuak zualpui a reh fel a, rilru nâtnain min luah khat nghal thung a, ṭap leh thei zawk ila ka ti ngawt mai. Dar 3 pelh tawhah pawh ka la meng reng a, khum lûah lukham nghengin ka ṭhu awn duai a, muthilh ka tum buai duh lo law law, ka thei dâwn chuang lo. Mu lovin ka ṭhu tlaivâr ta ṭhak a, ka rilru a kal thui em em thung a, ngaihzawng ṭhen vang mai maia indawm kun tlawk tlawk ka tum lo bur a, a tel lo pawha ka nun theihzia lantir ka duh zawk a ni.

Zing khua a rawn vâr a, zing dang ang bawkin hna kal tur chuan ka insiam leh malh malh a, ka va lungngai ru si êm. Scooty ka khalh lai te chuan ka rilru ka pe thlawt lo, Ramrikawn Traffic Point kawiah ka tlu ṭep nghe nghe a, Traffic Police duty loh lai tak a ni hlauh zawk a, ni lo se chu eng eng emaw min zawt turin min hruai hrang ngei ngei ang.  Department building kawt ka thleng a, u Muanawma car a la awm lo va, a la thleng lo emaw a kal dâwn lo leh pek a ni mahna. Eng pawh ni se a kal emaw kal lo emaw ka lo ngaihtuah buai vak a ngai tawh lo, a hma kha chuan ka ngaihtuah ṭhin ngei a, a zin chhung te khan a car hún ṭhinna lam ka en ziah a, a tel lova ni khat lék awm pawh kha hrehawm ka ti ru ṭhin kha a nia, mahse tunah chuan kan inkarah engmah a awm tawh lo va, ka tân ani ngaihtuah zui reng zawng a theih tawh lo, ka rilruah a awm a nih paw'n paih chhuah zel tum a ni mai.

Kâr khat chhung chu a hmel ka hmu ta lo vang vang a, a hnuah erawh kan hnathawhna a inan miau avangin kan inhmu leh ta nge nge a, mahse kan inbe tawh ngai lo hrim hrim. Kan thawhpuite chuan ka inṭhen tih an hria ang tih ka hlau zawk, ka zak ru ngawih ngawih a, mi sawi sep kai hmanin kan inzui tingtang te chu ka rilru tihah zualtu pakhat a ni a, tûma'n kan ingngaizawng tih leh kan inṭhen tih hre lo se ka duh ber a, mahse chu zawng thil theih loh hulhual a ni thung si. Ngaihzawng ṭhen ka tuar nâ bik lutuk te chu keimah leh keimah ka inhaw hluah hluah a, ka thluak chhung aṭang u Muanawma chu paih chhuah vawng vawng ka duh ṭhin, mahse ka thei si lo, amah hrim hrim chu ka hua a ni tawp! Ka hna lam thlengin a nghawng a, zirtirna pawh ka pe ṭha hlei thei lo. Hun liam tawh avanga ṭah chhuah thut chang ka ngah a, ṭah loh hram ka tum ṭhin a, mahse a va harsa ṭhin si êm.

Thla khat a liam hnu chuan ka ṭhiante zingah Nunuin u Muanawma nen kan inṭhen thu a hre hmasa ber a, ka hrilh pawh a ni lo, mi dangin an lo hrilh a ni chêk ang chu! Hlim ang tak leh engah mah ngai lo anga lan tumin keimah leh keimah ka inthunun nasa em em a, ka ṭhiannu erawh chuan ka awm dan zawng zawng, ka danglam dan leh ka tawrh nât dan thlengin a lo hrethiam vek a, a tawpa tawpah chuan kei pawh ka inthup buai duh ta bik lo. Kuah chungin ka ṭap feih feih a, ani'n ṭawng thlamuanna thu ni pah fáwmin fuihna thu min hrilh melh melh thung a, hmeichhe chak lo tak chu ka va'n ni chiang êm. Chak tak anga lan a, inringtâwk taka awm te ka tum lui ve ngar ngar a, ka thei thlawt lo. Ka tum pôh leh ka theih lohna a zual zel ni maiin ka hre hial a, mahse Nunui min ṭawng thlamuanna ṭhin chu dik ka tiin ka pawm khawp mai.

"I vawi khat ngaihzawng neihna a nih bakah i ṭhen vawi khatna a ni a, chu vanga tuar nâ mai mai chu alawm i nih, nakinah a reh ve leh mai ang. Tik tak êmah chuan i hmel chhe lo va, i hnathawh a sâng a, i zahawm a, ani ni lo mipa ṭha tak tak nangmah duhtu che an tam áwm êm mai" tiin Nunui chuan min hrilh a, ka vawi khatna a nih avanga ka tuar nâ tih a sawi tak chu dik ka ti a ni.

Nunuin u Muanawma nena kan inṭhen thu a hriat aṭanga ni hnih hnuah ka ṭhiante zawng zawng chuan an hre ta vek a, Ngaihawmi leh Esther-i ber chu ka thlavang hauh zawngin an ṭawng nasa em em a, u Muanawma biak te an tum thul, ka phal lo hlauh zawk a, chuti ni lo se chu an be duh tak tak ang. An awm dan chuan ka nuih a tiza letling phian a, mahse ka hlim sawt tihna erawh a ni chuang lo. Ke zep lo ang, u Muanawma nena kan inṭhen aṭang chuan engtik lai mahin hlim tak tak ní ka nei tawh ngai lo zawkin ka hria. Hawihhawmna avang leh rilru chhungril ipik ṭûn thup duh avanga han nuih luih chang te chu ka ngah tho va, kan thawhpuite bulah pawh pangngai thei ang berin ka awm lui ngar ngar a, ka chauh ruk ṭhinzia an rawn hre ve tawh der si lo.

U Muanawma pawh kan inah a lo léng tawh ngai lo va, rawn lêng ngam tur a ni paw'n ka hre lo. Saron-i nena an thlalak ka dawng leh nawlh ṭhin a, ka mit a tikham ṭhin khawp mai. Ka ṭhiante erawh chu lam chu engmah ka hrilh duh ngai lo va, ka hrilh a nih chuan an nasa dâwn lutuk tih ka chiang a ni. Ka thlavang an hauh lutukna lamah thil ni lo lô a thlen belh ang tih a hlauhawm zawk, chu vanga hrilh duh miah lo pawh chu ka ni. Ka chhungte chénin u Muanawma nena kan inṭhen thu an hre ta nge nge a, u Mapuii leh u Chhani chuan min la uipui em em zui. Ka rilru ka tipaukhauh lui zel a, khawharna leh lungngaihna ruam ata tál chhuah tumin nitin zantin ka rilru chuan râl a bei a, a râl beih chu a na mai lo hle leh nghal. A paltlang tawh emaw a tih te'n an rawn umpha leh zel ṭhin a, ka taksa chu keimah ni lovin mi hrang hlak ni se, thunun thei bawk ila, hmun nuam leh thlamuanthlak takah ka rilru chu ka dah daih châk, mahse chung zawng zawng chu suangtuahna vak vel mai chauh a ni. 

Ni khat chu Botany Canteen-ah thil ei turin ka chhuk a, ka thlen thlak aṭanga rei lo tê hnuah u Muanawma a rawn lut hlawl a, kan inen chiang hle a, mahse kan inen rei lo thung. Dawhkanah thil chah a rawn dah a, ei ka tum ngial a, ka thei leh ta pek lo. U Muanawma bul hnaiha awm hrim hrim chu ka duh tawh lo bur a, a hmuh phaka awm ngat phei chu duh lo tak ka ni. Kan hnathawhna hmun erawh hnathawhna hmun a ni miau a, kan inhmu lo thei lo va, chuti ang ni lo hmun hrana inhmuh vel chu ka duh tawh teuh lo. Ka thil chah pawh chu ei chuang lo chuan ka tho tharh a, pawisa ka pe fel nghal zung zung a, a hmuh phaka awm reng ai chuan rilṭama awm pawh ka thlan miau zawk avangin canteen chu ka chhuahsan ta vang vang. Ka pum a dik dâwn lova ka hriat avangin Main Gate bula dawrah ka han ei daih nghe nghe a, chutah hlir chuan ei ka tum zui nghal bawk.

Kan inṭhen aṭangin thla 2 a ral a, kei pawh a tir ang em em chuan ka lá nâ tawh lo va, mahse ka ngai em em ṭhin thung. A pawi ber chu ka lo hmangaih hman kher kher a, chu ka hmangaihna chuan hmangaihna zawng zawngin hlimna a thlen kher lohzia min hriattir a, pawm thiam tumin bei ve ṭhin mah ila ka hlawhchham zing khawp mai. A phone number ka delete vek tawh a, kan thlalak dunna ṭhenkhat erawh ka delete phal thlawt lo. Amah ka ngaih changin ka en a, hun kal tawhah suangtuahna nen kirin ka hun tawn mêk chu theihnghilh ka tum zawk fo va, engkim chu mitthla leh suangtuahna ram mai chauh a ni thung si. Ka chhia leh ṭha hriatna a lo kir apiangin ka nâ nawn awn âwn a, ka hmangaih ka chân ni berin ka hria. Ka hmangaih erawh ṭâng dang belin nun thar a hmang mêk a, kei lah chuan hmasawnna kalkawngah ke ka pen zau thei si lo.

Hnathawhna hmun inang ta na ná na chu inbiak chang kan nei chho ṭan ta zauh zauh a, hmelhriat satliah ang mai hian kan inbia a, mi dang bula nui sun sun thei reng si kha ka bulah chuan nui ngai lo ang maiin a awm thung a, a ngainatawm loh tawh tak zet, mahse ka thinlung chhunga hmangaihna zawng zawng neitu a ni tlat lawi si. Kan thawhpuiteho paw'n kan inṭhen tih an hre vek tawh a, mak an ti hran lo va, an lo rin ruk dan tâwk vel chiah a nih zawk hmel. Seminar neuh neuh buaipui ngai a awm deuh mawlh mawlh a, professor chin phei chu a hranga meeting kan ngah si, rilru a kal pêng duh ṭhin khawp mai. Thu a sawi lai te hian ka lo en leh veng veng ṭhin a, a hmelṭha tak te, a hmel pá ru tak te, a hmui mawi tak te, a hnap thlenga hmul ṭo siar siar te, engkim chu hmânah kha chuan ka ta tih theih tur khawpin ka hnaihchilh a, ka hmu ngun a, hmuh nin tih nî reng ka nei ngai lo ṭhin. Tunah pawh a la ni reng tho va, mahse hmân ang lo takin tunah chuan engkim a danglam zo tawh a ni. 

"Fimkhur ve deuh la" aw lo chhuahna lam chu ka hawi phei nghal a, a aw aṭang ringawt pawh ka hai loh tehreng nen a lam ka hawi hman thawt thawt chu ka inchhir hnuhnawh ang reng. 

"Khawi keima'n kan lo ti ang" tih leh ka Scooty chu rawn vawn a rual nghal a, ngawi rengin ka lo en thung a, mipa nge nge ka scooty tlu chu a tuding hneh khawp mai. 

"Main Stand i tum em ni?" min en chuang lo hian a rawn ti a, chhan loh aiah tiin

"Aw" ka ti ve mai a, ka Scooty chu húng ṭha hmasa tê tê phawtin a Main Stand zawm zat a, chutah chiang kelh kawlha min en chung hian

"Helmet kha seat hnuaiah i dah dâwn em? I dah dâwn chuan min lo pe la, ka lo dah lut nghal ang" a rawn ti leh a, a aw chu a zângkhai vah a, kan inbiak hmasak ber ṭuma a aw ngaihnawm zet ang mai kha a ni. 

"Kha" ti deuh tawpin Helmet chu ka pe a, seat hnuai hawngin a dah lut a, a rem ṭhat mial mial hnu chuan chahbi min pe zui nghal bawk. 

"Engati nge Botany Canteen-ah thil i ei ngai tawh loh?" amah zawk chuan min rawn be leh ta, eng vanga min be deuh chhen nge a nih ka hre lo. 

"Keimah vang a ni em?" zawhna dang ka dawng zawm zat a, hun kal tawha kan lo awm dun ṭhin dan zawng zawng theihnghilh vek tawh ang maiin ka melh chho ve ta kar. 

"Ni lo ve, a tui ta lo êm a, chu vang mai mai chu maw le" ka nui lui sak a, hmanhmawh fahran lo hian kan kal pah reng a, a ngawi zui mai dâwn emaw ka tih lai chuan

"Keimah vang a nih chuan ka chhuk tawh lo ang, zalen deuhin i ei thei, kal tawh loh ka lo tum dâwn nia" a rawn ti leh sup a, ṭawng ring miah lo mah se a thusawi chu ka hre chiang khawp mai.

"Nangmah vang a ni teuh lo a nia Sir, ka hmuh hreh che i lo ring palh hlauh ang e, ka tân chuan engmah i ni tawh chuang hleinem" ka ti hliai a, dawt ka sawi chiang lutuk chu ka awm thiam lo, ani paw'n mak a ti deuh a ni ang min rawn en vut a, a hawi sawn ve leh mai bawk. 

"Lift-in i chho dâwn nge step-ah i chho dâwn?" tiin thu dangah a pakai ta daih a, mahse a pawi lo zawk, hun kal tawh hriat reng chu a nuam tehchiam lo tlat. 

"Step-ah hian ka'n chho mai ang e, a nih le" kal nghal ka tum ruala a thusawi chuan min tihawi phawk hman ang reng.

"Kei pawh Step-ah ka kal dâwn alawm, kan kal dun dâwn avangin Lift-ah i va chuang chho leh kher lo ang chu máw" a nui zui suk a, engati nge hmâna mi ang mai khan a nui hmel te, a chet dan leh a ṭawng dan hrim hrim te chu a inthlak thut le, ka hrethiam lo a ni.

"Teuh nâng, chho ila" ka ti lêt ve salh a, ka ṭawng chhuak chu a vin deuh mah mah a ni mahna

"I thinrim ringawt elo?" a rawn ti nghal thung a, nuih insum hmel pu deuh hian min melh chhuk run a, rei pawh en lovin ka hawi sawn daih thung.

"Min be reng lo thei em?" ka ti ta tawp a, Step-ah chuan ka pen chho zui nghal a, a lam chu ka hawi buai peih lo, a nui tih ka hre vek!

"Ka hre lo le, thawkho kan ni a, kan inbe ve bawk ang chû maw le. I mood a fuh loh hmel riau, tukinah thawh i hai leh tawh zawk em ni?" ka va'n hne ru tak, thawh hai ila chuan tun ang hunah ka thleng teuh lo ang.

"Ka chhang lo mai ang che" ka ti deuh hmak a, chutah ṭawng khalh hlau ni áwm fahran hian

"Min chhan reng khá" a rawn ti hniam sup a, ka thin tihrim dan a thiam lutuk chu han tih lêt vak ngaihna a awm chuang bawk si lo, ka bag ka hmer nâ em em ringawt.

"Engati nge heti ang hian i awm?" ding meuhin ka ti ta nge nge a, ka mood chu a fuh tehchiam lo hle bawk. 

"Engtin nge ka awm a?" tih leh min hnaih sawt a rual a, bângah min din chilh titih nghal a, ka thawk dan chu a rang nghal vekin ka hria.

"Min ngai ti raw? A dik em?" amah bawk chuan a rawn ti leh a, a mi uap nât dan chu pui tak a ni. 

"I hre dik lo" ka ṭawng zo hman ṭawk ang tihah chiang zet hian min fawp thut a, theihtawp chhuahin a âwmah ka nám vak nghal a, a inlâk hran rual chuan

"Zep duh suh, ka hre chiang lutuk che" a rawn ti nghet charh a, insum thei tawh lovin a hmaiah ka beng ri sawk a, a nât thawkhat viau ka ring.

"I duhna ah chuan i lo kawlh zêk hi le" tiin a nui duh lek chauh a, ben leh ka tum chu ka bân rekah a man chat a, phih thlak ka tum ve tak na a, a lo chelh nghet hle thung.

"A vawi khatna kha chu ka hrethiam, min ben i tum leh chhan erawh ka hre hauh lo" ka laka thuneitu ang maiin a ṭawng chu a khauh hmuk hmuk a, tal chhuah ka tum paw'n min chelh bet tlat si bawk nen ka mittui a rawn hnâm ta nge nge. 

"Thil sawipui duh che ka nei a, tlaiah kan inhmu dâwn nia" ti leh supin ka bân a vawnna chu a thlah a, bâng nghengin ka ṭhu tawm nghal hnâwk a, ka awm dan chu mak a tih hmel khawp.

"Kal rawh, ka nunah hian lo inrawlh tawh suh, thil sawi dun tur engmah kan nei lo" ka ti thawp sep a, amah pawh ka en chuang lo, mittui tling pamin ka hma zawn chu ka en ngawt ngawt a, ka hmu phe ruai tawh bawk.

"Khati anga i awm lai kha student te hmuh i duh loh chuan tho la, min lo zui rawh" a ṭawng zawh hnua a kal sawn zui nghal thawm chu ka hre reng a, mahse ka en chuang lo.

Ka bianga mittui luang hru tawkin ka tho riai riai a, ka thawmhnaw chu ka beng fai thek thek a, tunah chuan thingzâr ro tawh tliak hma tak ang maia hmeichhe chak lo ka nihzia a hmu ta bawk a, min ngainep sawt ngei ang. Ka laka a chet dan avang chuan ka hun hman a dik lo chho vek a, ka thluakah zirlai lam reng a lut hlei thei thlawt lo a ni ber. Lunch Break a rawn ni a, chawhnuah class lâk tur pakhat ka la nei a, mahse ka bântir daih a, keimah tak paw'n hawa mut hle hle ka châk a ni. Ka awm dan chu a zirtirtuzia lo ka ti ve tho, engkim chu ka ning hluah hluah a ni ber e. Office-ah lutin thil pawimawh chu bag chhungah ka khung mawlh mawlh a, ka chhuah hnu chuan common room-ah pawh ka lut kawi tawh lo. Scooty inhúnna ka thleng thla a, tirúma tlan chhuah ka tum chu ka thei ta hauh lo, a hnung lam aṭanga lo pawt ding tlattu an awm chu niin, chutah a pawttu chu ka mihring hmuh châk loh ber te zinga mi a la ni zui.

"Chawhma lamah khan thil sawipui che ka duh thu ka sawi a ni lo'm ni?" a aw chu vin em em lo mah se a khauh deuh hmuk a, kei lah mood off tawh sa nen ka insum thei leh ta bik lo.

"Engtin nge i thusawi chu ka rin theih i la rin zâwk? Thil sawipui maw! A teuh lo mai! Thlah rawh, ka haw duh" ka ti hmarh hmarh a, ani ve thung chuan thlah a tum lo nasa mai. 

"Ka thusawi i rin leh rin loh lam ka ngai pawimawh rih lo" ti bul hmukin a lamah ka scooty chawp chuan min pawt tawlh a, awlsam tê hian scooty chu a off a, chahbi a lâ zui nghal hmak bawk.

"Lo kal rawh le, nge mi dang hmuha inbiak kher i duh zâwk?" tih lehin a car húnna lamah min kai phei dawr dâwr a, ka rilru ngaichang ang takin zawhna min zawt mah se a thu baka min awmtir a tum lo chiang khawp. 

"Min thlah teh, min thlah nghal rawh!" ka ti vin phiar phiar a, ka bân a vawnna chu ka kut lehlamin ka chum pawp pawp a, a la thlah duh der chuang lo.

"Khawngaihin min thlah rawh, khawngaih takin" ka beidawng aw chu a ri chhuak chang chang a, khap lêt nasa viau mah ila ka mittuite pawh chu a rawn parawl ta tho. 

"U Muanawm" a ngenin ka ngen a ni ber tawh, ani pawh a ding ta chawt a, ka lam a rawn hawi zui nghal bawk.

"Engkim sawi fel tawh ang Amte" min ngaihtuah hmel zet hian min en chhuk run a, ka kut a vawnna a la thlah lo va, kan dinna chu a reh ruih bawk. 

"I rilru ka tinâ tak zet tih ka hria, Saron-i bula thla 2 tal tawp ka awm chhan chu thil dang vang a ni lo. Tunah hian ICU-ah a awm mêk a, a hun tawp lamah a bula awm turin a chhungte'n min ngen miau si a, mitthi ni mai tur duhthusam chu ka tihhlawhtlinsak lo thei lo a ni" dam dap hian a rawn tih zawm leh nghal a, a thusawi chuan min ṭhawng hran lo. 

"A dam lo tih chu ka hria alawm, in thlalak nen lam ka dawng ziah, sawi tawh lo ang, sawi ka duh tawh lo" ka ti sep a, ngawi rengin a carah min ṭhut luhtir a, ani pawh a rawn ṭhut lut zui ve nghal. 

"A dam lo tih i hriat tho chuan engati nge sawifiah ka tum zan khan ngawi tura min tih si?" kan ngawih dun vang vang hnu chuan a rawn ti a, a sawi dik chiah, khami zan kha chu rilru nát avangin ka rilru a buai nghal vek kha a ni a, a sawi dik miau a, chhan pawh ka tum chuang lo. 

"Bulṭan ṭha leh ang Amte" amah bawkin a rawn tih zawm zat a, za lem lo tak hian ka nui tawi tak a, min en reng tih pawh ka hria. 

"Ka ring che asin, ka tâna a hmasa ber i nih avangin ka ring em em che asin u Muanawm, mahse nang chuan vawi khat mah min rawn biak i tum ngai lo a nih kha! Ni e, tawp i duh thu i sawi zan kha chu dik ka inti bik chuang lo, ka pawm thlap. A hnuah erawh i reh hmak a, i tel lova nun hman kha harsa ka ti ṭhin. Hun kal tawhin min chenchilh reng a, vawi khat tal sawifiah tum leh la chu ka ngaithla ngei ang che" tiin ka chawl dat a, thawk ka lâ hak bawk.

"Ka thil hriat chhuah pakhat chu maw hmangaih ka tawng a, mahse chu pa chu nangmah i ni lo, ani chu ka mipa hmuh tawh azawnga hmelṭha ber, a ruka kum 2 lâi ka duh ruk, hmel ngainatawm tak pu reng ṭhin pu Muanawma ngei kha a ni. Kha pa kha i ni reng emaw ka ti ṭhin a, mahse i ni lo, nang chu i danglam. Ani kha chu a ruka ka duh kumkhua tur niin ka hria, a pawi lo zawk, ngaihzawng neih chu nâtna mai a ni e" ka thusawi chuan a tihamhaih viau a ni ang min en chiang sáwt hle.

"Khang thla liam ta chhung khan Saron-i nena in thlalak ka dawng fô va, a dam lo tih pawh ka hrethiam nghal mai. Tun bak hi heti ang lam kan sawi dun a rinawm tawh lo bawk a, ka zep lo ang. A vawi khatna a nih vang a ni mahna, ka tuar nâ tak zet, mahse nang chuan eng teh vakah i ngai dâwn lo tih ka chiang, a chhan chu min duhna tak tak thinlung i pu ve lo tlat a, ngaihzawng i neih rei ngai loh thu ka ṭhiante'n min hrilh lawm lâwm lai khan lo hrethiam daih tawh tur ka ni asin maw le" mittui tling pamin ka nui zui hak a, ka nuih erawh a za lem lo khawp.

"Ka thiam lohna tam tak a awm tih chu ka pha lo, ka pawm vek, mahse bulṭan ṭhat leh ka duh a ni. Ni áwma min ngaih tam tak ang kha ka ni lo, i hre sual, nang tluka hmeichhe duh hi ka la nei lo, nupui atâna ka duh awmchhun i ni asin" tiin a rawn ṭawng chhuak ve ta sup a, a thil sawi avang chuan ka nui leh ringawt.

"Dawt bawk maw, thang i kam thiam ṭhin e. Hmeichhe dang ang thovin min bum thei bawk si a, i lawm em? I hlim ngawt ang ti raw?" rilru nâ zetin ka en ran a, ani erawh chuan thawk a la ham ham thung. 

"I rilru chaponain a luah khat hneh tawh mah mah che a ni" a rawn ti sup a, hmân ang bawkin a sawi dik leh ta chiah e, tunah chuan ka chapo tawh lutuk tlat. 

"Hrilh che ka tum tho va, tunah hian ka hrilh tlang nghal law law mai ang che. Contract pawh thla 2 hnuah chuan a zo ang a, phai lamah offer neuh neuh ka hmu a, ka insawn ka ring" ka ti salh salh a, min eng rang khawp mai. 

"I tak tak lo ti raw?" a rawn ti nghal vat a, hlauthawn hmel taka a meng buai deuh nak chu lemchan bak a nih ka ring lo, ani te chuan eng atân mah min ti hleinem.

"Ti tak tak e, Shillong-ah leh Delhi lamah offer ka hmu a, contract-in thawk ṭan dâwn mah ila a ngheh thuai ka ring" ka ṭawngkam chu hriat a nuam lo mah mah mai thei a ni.

"Chuti chu a ngheta thawh i duh tawh a ni máw? A ṭha e, hetah a nghetin i thawk tawh ang. Contract hi zo law law se, a ngheta i thawh theih nân hma ka lá nghal ang" a rawn tih chuan

"Ni lo ve, chuti ang i tih a ṭul lo. Khawngaihin ka duh loh zawnga awm tum suh ang che, kei chuan i tel lova nun hman ka thiam ṭan tawh a, ka thiam zel bawk ang" ka ti nghal mawlh mawlh a, chutih lai tak chuan phone call a dawng a, a en ngai en reng chung hian

"Ka lo kal ang, ka rei ka ring lo" a ti sup a, phone chu a hmet tawp zui nghal bawk. 

"Saron-i marphu an hmu tawh lo a nih chu, tunah hian ka kal nghal a ngai, remchang hmasa berah kan sawi chhunzawm dâwn nia" a tih chuan ka meng kual ralh ralh a, a che sawk sawk a, a muangchang fahran lo hle.

"Eng natna nge ni hrim hrim?" ka zawt lo thei lo, Saron-a hmel ka mitthlaah a lang zut zut a, thi mai tur atân chuan a la naupang mah mah a ni.

"Cancer Stage 4" tih leh car tih rum a rual nghal a, hun kal tawh bawkin ka ngaihtuahna a rawn luah a, u Muanawma nena an thlalak dunna zawng zawngah khan puan emaw ni a khum deuh vek a, khatia a lo khumna chhan kha ka hrethiam ve chiah! 

"I duh chuan ka rualin Hospital-ah i lo kal ve thei ang" a tih chuan ka ngaihtuahna ata ka harh chhuak zawk a, kal ai chuan kal loh ka duh zawk, ka kalin awmzia a nei hleinem.

"Nangmahin kal zawk rawh" tiin car aṭang chuan ka chhuk a, ka chhuk fel chiah tihah hmanhmawh deuh hian a tlan chhuak nghal a, Saron-i ber chuan ka rilru a luah ta reng mai. 

Scooty bula ka din hnu chuan chahbi min pe lo tih hre chhuakin ka indap a, ka bag-ah a lo awm reng tawh thung a, min pek lai áwm réng ka hre lo hrim hrim. Aizawl lam pana ka tlan chhung zawngin ka rilru ka kawm chho melh melh a, ka nui leh sak ṭhin bawk. Ni e, tunah chuan kan rem lo laklawh ni berin ka hre tawh. Keimah tak pawh ka inthiam lo ve tho, a bikin Saron-i lakah, a dam lo tih hre ru reng tho si khan ka thik em em ṭhin a, mahse dam rei tawh lo tur a nih erawh ka hre miah lo thung. Eng pawh ni se a liam vek tawh a, engmah siam ṭhat theih a ni tawh lo, chu vangin ngaihtuah buai reng a sâwt lo a ni. Zanah chuan number lawng aṭang hian

"Saron-i a boral" tih deuh tawp hi message ka dawng a, number lawng mah ni se rawn thawntu chu tu nge a nih ka hre chiang em em tho.

"A pawi hle mai" tiin ka chhang lêt ve a, pawi ka ti tak tak, a chhan chu a la naupang ve êm a, a ṭhat lai hun pawh a la hmang zo lo va, a uiawm ka ti a ni ber. 

Chumi zan aṭang chuan kâr hnih chhung vel ngawt chu u Muanawma hmel ka hmu lo char char a, office pawh a rawn kal ngai lo va, a chinchâng tûma'n kan hre lo. Miss Ruth-i chenin, kei paw'n vawi khat chu ka call nghe nghe a, mahse a pick up lo chiang hle. An ina han kal chilh erawh ka ti ta lem lo, a rukin a chanchin ka hre châk em em ringawt. Thla khat hnuah daih a hmel kan hmu leh a, a awm dan chu ka hrethiam lo. Kan inhriat tirh ang mai khan a ngainatawm em em a, min duh ang paw'n a lang tawh lo. Hmân ang chiah khan, a ruka ka duh em em hun lai ang chiah khan engkim chu a awm a, a rim te, a nui hmel a, a luhmeh dan te, a kawr hak rawng te, a mizia hrim hrim te chu keimaha sulhnu a hnutchhiah tawh ang vek a ni a, inkawm ngei tak ang hian min be ṭhin a, ka tân chuan ṭha taka chhan loh a har thlawt.

Saron-i thih aṭang khan inthiam loh rukna tam tak ka nei ve tho va, u Remzela bulah pawh ka sawi nghe nghe a, mahse engkim kha ka pawm thiam vek tawh thung. U Muanawma te zawng ka tân chuan ka ngaihzawng ni lo se, ka kawppui ni lo se, ka ralkhat Star ni char char zawk se keimah pawh ka hlim zawk ang. Ka mipa hmangaih hmasa ber a ni a, kan inngaihzawn chhung khan thinlung leh tih tak zetin ka duh a, ka hmangaih hman hial a, kan tawpna erawh duhthu a sam chiah lo mai chauh a ni. Ni e, ani chu ka tâna pâr lo tur pangpâr a nih ka ring, nupui ṭha tak nei se, hlim takin awm se, kei chuan hmangaih em em mah ila dawnsawn dan ka thiam zel tawh zawk a ni. Ngaihzawng neih tumna rilru pawh ka pu tawh lo, Ruata a lo lêng zauh zauh a, min la duh reng a, kei lahin ngaihzawng tih vel lam ka ngaihsak tawh lo nasa ropui si.

Ka kum ngaihtuah chuan pasal nei rual ka ni vâr var tawh a, ka rilruah erawh pasal neih lam reng a lang ngai lo. Kâr khat chhung chawlh lâin Shillong-ah leh Delhi-ah ka kal a, thla leh maiah ka contract a zo dâwn a, ka hnathawh tumna chu ka lo inhmakhua ve deuh a ni. Shillong ai chuan Delhi-a thawh ka châk zawk a, a chhan pawh staff te zingah ka hmelhriat an awm nual a, hmelhriat sa an awm chuan thawhho a nawm ka ring zawk a ni. Delhi ka zu thleng te chu min lo welcome em em a, Mizoram House-ah pawh thleng lovin an inah ka innghat nghe nghe a, engkim chu ka tâna hmasawnna rahbi thar vek a ni. Ka thawhna tur University ni se duhthusamin a ṭha a, a hmunhma a nuam a, kâr khat chhungin interview leh tihfel ngai neuh neuh ka ti zo a, ka tling chiang khawp mai. Thla thara zawm turin kan inbe fel ta nghal bawk a, Shillong aiin ka thlang zawk a nih ber chu!

Mizoramah ka haw leh a, ka hna dil vel chungchang chu ka chhungte tih loh tûmah ka la hrilh lo va, ka ṭhiante paw'n an la hre lo. MZU-ah erawh ka la thawk pah reng a, contract a la zo lo miau a, ka thawh a ngai tlat a ni. U Muanawma nen pawh kan HOD mah ni se ṭhian ṭha tak ang maiin kan innêl chho leh ṭan a, kan titi a, inngaizawng ngai lo ang takin thil te kan sawi dun a, ani paw'n ka hna hmuh vel chungchang chu a hre bik chuang lo. A chang chuan hmangaih taka kuah vawng vawng te, a hmui nêm leh lûm nuam tak fawh te, a âng chhunga awm hle hle te chu ka châk leh thut ṭhin, mahse chung zawng zawng chu a rem tawh si lo. Thla thar kan chuankai aṭanga kâr khat hnuah chuan Nunuin u Muanawma nena an inbiak ṭhin thu te, ka chanchin a zawh ṭhin thu leh an inbiak ṭhin dan chi hrang hrang min hrilh a, mak ka ti ang reng, Nunui thusawi ber chu mak ka ti a ni.

"Pu Muanawma hian a duh ve tak tak chein ka hria Amte, in inṭhen chhan dik tak te kha ka lo zawt a, pangngai deuhin a sawi ve mai a, in awm dan hi in khawngaihthlak ka ti, inhmangaih reng si in awm hrang tlat hi!" a ti charh charh a, chu thu min hrilh nî phei chuan min ngei a ang mah zawk a, u Muanawman min hmangaih anga a sawi erawh ka awih lo hle. 

Ka ngawih liampui mai mai a, mahse thil dang a thleng leh ta tlat. Nitin ka office-ah pangpâr leh letter ka dawng ziah a, letter-ah chuan eng vak pawh a inziak hran lo. Hun nuam tak hmang tur leh ka thinlung duhzawng lam kawng zawh tura min duhna thu tawi fel takin a inziak a, tu hnen aṭanga ka dawn nge ka hre ngai lo va, hriat pawh ka tum chuang lo. Ka hun hman dan pawh a pangngai chho ṭan a, mahse ka hlim hlawl lo a ni. Mi dang bula ka awm chuan hlim tak angin ka awm a, rilru hlim lohna nei lo ang maiin ka awm a, ka chhungril nun erawh a ngui ru em em thung si. Shillong aia Delhi ka thlanna chhan pawh u Muanawma hlat thei ang bera awm zel ka duh vang a ni ber a, awlsam têin kan nun hlui ka hre chhuak zel bawk si a, ka tân chuan hlim tak tak a harsa ngawih ngawih.

Ni khat chu MZU main gate zawnah min rawn tlan pel a, a thil ken mawlh chuan ka mit a lá ta a ni. Nitin ka office dawhkana ka hmuh ṭhin pangpâr ang chiah chiah hi car khalh pahin a hnim vang vang a, a nui zui suk bawk a, ka rilru a va tikal thui tak êm. Ni e, amah ngei a ni. Ka dawhkana pangpâr lo dah ziahtu chu amah a ni tih ka hre tawh, mahse engati nge ka lakah chuti anga a chet leh hnuhnawh si? Office chhung ka luh chuan pangpâr a lo awm váng a, a bulah letter a awm bawk a, insum thei lovin ka ṭap leh ta nge nge. Pangpâr kuang chu ka hnim dén den a, ama rim chiah chiah a ni; u Muanawma rim chiah chiah! Ka ṭap khur ngawt ngawt a, amah ka hmangaihna chu chhe tê paw'n a kiam lo va, hmangaih em em mah ila kan rem thei ngai dâwn lova ka inhriatna te chuan min tinâ zual a ni.

Thla kan hmang ral a, tunah chuan MZU-a ka contract pawh a tawp fel ta. Delhi University lam paw'n min rawn be leh ṭan a, hna zawm turin min rawn hriattir a ni ber. Ka ṭhiante paw'n ka hna hmuh chungchang an hre vek tawh a, keimah zawkin ka hrilh nghe nghe. Nilaini a ni a, luggage-ah ka thawmhnaw ka khung fel vek tawh bawk a, kan kal thei chu a ni mai. U Maruata leh ka nu'n Airport lamah min hruai a, mi dang erawh an hman lo thung. Lengpui Airport kawnga kan tlan lai chuan car pakhat hian chak zetin min rawn tlan pel fua a, ri hrawk khawpin kan hmaah tak a ding thut a, a váng zawng kherin a ding leh ta nghal a, kawng a zau lutuk hran lo bawk nen keini tân chuan tlan tlang theih loh tluk a ni. U Maruata chu a phun sup sup a, ka nu pawh a bang chuang lo. Kan hmaa car inhûng aṭang chuan u Muanawma a rawn chhuak hlawl a, chiang lehzuala enin ka ṭhu káng deuh áwk a, chuti anga a chet chhan chu pakhat mah ka hrethiam lo.

"Saw chu i ṭhianpa kha a nih sâw" ka nu chu a aw aṭang paw'n mak a ti ve hle tih ka hai lo chiang hle.

"Eng nge tih a tum sâw?" titu chu u Maruata ve thung a ni. 

"Ka hre lo" ka ti sep a, u Muanawma chuan car chhung aṭangin paper hlai zet hi a lá chhuak a, kan lam hawi zawnga rawn keng zui nghalin

'KA HMANGAIH CHE AMTE, KHAWNGAIHIN KAL SUH' tih inziak chu a âwm zawn velah a vuan bet a, awm dan tur min tithiam lo kher mai.

"Chhuk la, va inbe rawh u" ti supin u Maruata chuan motor rum nghawr dat dat chu a off a, kei pawh chu ka chhuk nghal ringawt bawk.

Paper hlai tak kenga a dinna lam chu ka pan phei zel a, a bul ka va thlen chuan ngainatawm zet hian a lo nui suk a, ka ngainat leh inhmeh ka tih em em ṭhin Kamis vâr hán ngei mai hi a ha a, a paper ken chu ka en leh ṭhin, a chet dan teh thut chuan min la ṭhawng mah mah a ni.

"Ka hmangaih che" inhmachhawna kan din hnu chuan a rawn ti ta, khawvela ka thu hriat châk ber mah ni se dawnsawn dan ka va thiam lo si êm. 

"Min ring lo a nih chuan min rin theih nân eng pawh ka ti ang, ka thinlung zawng zawngin ka hmangaih che Amte" ṭawng tuma ka án zuau laiin a rawn ti leh nghal a, ka hmui ka pet fan fân a, lawm avangin ka mittui a rawn tling nghal pam bawk. 

"I kal lo vang ti raw? I hna thar chu zawm lo la, hetah, ka bulah, kan pahniha awm kumkhua turin ka nupui ni zawk mai ta che? Min nei duh ang em?" dam dapa a rawn tih leh chuan ka ṭah nuih hak a, ani erawh a lo nui sun sun thung. 

"Sawi tur dang i la nei em?" ka bianga mittui luang hui kiang zeuh zeuh paha ka tih chuan

"Nei tehreng mai, mahse chumi hma chuan eng emaw chian ka duh, min kalsan dâwn lo ti raw?" a rawn ti ve nghal a, ka buk khum nghat nghat a, chawp leh chilhin ka rilru nâtna te, ka khawhar rukna zawng zawngte chu a bo nghal vek a, kei ngei paw'n mak ka ti. 

"Mi mawlnu" tih leh a thil vawn lai chu thlah a rual a, nghet zet hian min kuah sawk sawk a, kei pawh ka bang chuang lo, ka kuah let ve nghal vat.

"I lakah ka rilru dik tak ka thup, ka thup hram hram ṭhin a, mahse min kalsan dâwn tak taka ka hriat hnuah erawh ka thei tawh lo, ka hmangaih che tih hi ka thup theih piah lam thil a ni tawh, a chhan chu chân che ka hlau a ni" a kut hlai zeta ka biang tawn tawn khuapin min fawp zui nghal a, ka tân chuan chhan lêt loh chu thil theih loh tluk a ni.

"Ka hmangaih che" ka hmai zawna thaw lúm ham hamin a ti sup a, ka ngawi reng thei ta bik lo, tu hmeichhia mah chuti ang hunah chuan an ngawih reng theih ka ring lo. 

"Kei paw'n ka hmangaih lutuk che" tih leh keimah zawkin dingdihlip âk ák chunga fawh ka rual a, min chhang lêt ṭha khawp mai. 

"Ka ngai che, i rim te, i ṭawng ri te, i vun no tak te, i hmui thlum tui tak te, i engkim hi ka ngai em em vek a ni" hmangaihna mitmenga min en pahin ka biang te, ka nghawng te, ka ir te, ka âwm chung lam khawi lai pawh chu a fawp kual mawlh mawlh a, ka va'n hlim si êm.

"Kan awmna hi kawngpui a nih hi aw" ka tih chuan thaw hakin a tawp ve thei ta hram a, a ding pangngai mai dâwn emaw ka ti tawh zawk, ka âwma hmai phumin min hnim leh vang vang phawt a, chumi hnu chuan a ding ṭha pangngai ve ta chauh. 

Car-ah min ṭhut luhtir a, ani pawh a rawn lut nghal a, u Maruata leh ka nute pahnih awmna ka hawi chuan hmuh tur an lo awm tawh reng reng lo, an haw daih a nih ka ring. Hmeichhia zawk si ka mipa hmangaih em em laka ka lo chapo lutuk te chu ka inchhir hnuhnawh a, a lakah pawh ka inthiam lo ru viau a, dawhthei takin a thusawi tur kha ngaithla hle hle ila chuan kan buai kher lo mai thei a ni.

"Zaninah palai ka rawn tir nghal ang" Aizawl lam pana kan tlan lai chuan a ti a, ka lo 'ê' nasa viau thung. 

"Em em a che" tia ka chhan lêt rual chuan

"Ka kum te hi ngaihtuah ve la, nupui neih vat ka duh alawm, chutah ka nupui tur chu nangmah i la ni dâwn zui, kei chu ka phur sârh tawh zawk asin" a rawn ti ve leh nghal a, a nui sun sun bawk. 

"Nupa kan nih hunah chuan fa panga vel kan nei ang a, ka duat ṭhin dâwn che sia, nangin min duat ve dâwn em?" a hlim bawk a ni ang a ṭawng duh khawp mai.

"Duat lo thei nâng" nui ver verin ka ti ve ta nge nge a, ka kut chu lá kangin a fawp a, a hnim leh vang vang ṭhin a, hma lam erawh a en pah reng tho. 

"Tun darkar aṭang chuan i tan 'pu Muanawma' ka ni kumkhua tawh ang a, 'u Muanawma' ka ni kumkhua tawh bawk ang a, i duh leh 'Muanawm' pawh min ti thei tho ang. Engkim ka pawm vek, a chhan chu hmangaihna nen i thusawi engkim ka lo ngaithla ṭhin tawh zawk dâwn a ni" a thil sawi chuan min tihlim lutuk tak zet.

"Kamis vâr inhmehpa, ka pasal i nih hunah pawh 'pu Muanawm' ka ti tho mai thei che a ni" nui sen sena ka tih chuan a rawn nui hawk hawk a, kan hlimna chuan van sâng tak a tawng phak hial ka ring. 

The End

Author's Note : Happy Ending loh in hlau hlawm bawk a, hlauthawng deuha siam che u kha ka tum sa hrim hrim a 😏 comment te pawh in tam phah sawt a 😂 Tin, pu Muanawma lerh ti ho kha, in hre dik lo aw 😂 A chang leh Tar Hot-a in tehkhin a, a chang leh pa Rinchhana, kei chu pu Muanawma hi ka ṭan ru reuh a nia 😄

Next story-ah chuan heti ang lam ni lo hi kan ti ve leh tawh thung ang. ❤