PU MUANAWMA By Havali Adam (CHAPTER 6)

                                   PU MUANAWMA 

                                       (Dear Crush)

                                              By

                                      Havali Adam

                                         Chapter 6

"I ngaihzawngpa chu a naupang zawk zawk tawh lo hle mai a, i u Maruata ai paw'n a upa alawm le, mahse ani pui roh kha a ṭhat hmel ka ti tho" zanriah ei laiin ka nu chuan a rawn ti hlawl a, ka pa'n min en vat bawk. 

"Ngaihzawng i lo nei ve reng tak tak elo?" ka pa mitmengah chuan zawhna hlir a khat a, chhang lovin ka nui ringawt. 

"Âw, nizanah pawh a lo kal khâ, kha pa nen khan an lo inngaizawng ve reng chu niin, khawvel pawh a danglam zo ta e, kan fanu meuhin ngaihzawng a nei ve tawh a nia" ka nu min sawi dan ber kher chu michut lutuk te pawh ka ang alawm le. 

"Han sawi zau ve deuh la maw le, eng ang mizia nge ni hrim hrim tih te, kan fanu neih chhun i ni a, ka khirh dâwn teh mai a nia" rawn titu ka pa chu a nui miah lo leh nghal. 

"Eng lo, amah khan kan HOD a nia, a hma chuan Central YMA President te a lo ni ve tawh ṭhin a, Cháltlâng vêng an ni bawk" tiin ka hriat ang ang chu ka sawi a, kan la inngaizawng rei lo êm a, sawi vak tur ka hre rih lo a ni. 

"Kei chu Ruata zawk kha emaw ka lo ti dâwn a, sawi tâkah chuan Ruata nen hian in inzui hman em? Nge ṭhian pangngai?" u Remzelan a rawn tih chuan

"Ṭhian pangngai a ni mai, chuti angin engmah kan inkarah a awm lo" ka lo ti ve nghal a, min zawt tawh miah lo mah se pawi ka ti lo maw lé.

"Sawi zel teh Amte, tuna i bialpa hi i duh ve reng reng em ni a?" u Chhani zawhna mai mai chu a va holam tak, a la nui ver ver zui.

"In ninawm, duh lo ila kan inngaizawng náng, ka chhang peih tawh lo che u, zawhna min zawt tawh s'u" tih leh chaw ka bar zawm nghal a, min nuih tet tet tih chu ka hre reng, mahse hre lo ang hmakin ka awm thung.

"Kum lamah chuan a phanchang tawh viau a, mahse a inlâk tunlai hmel ka lo tia, ti raw Maruat? Nang ai a upa zawk leh nghal a, tlangval a la nih vang a ni ang, a taksa kha a sawizawi ṭhat hmel fû ka ti" rawn titu chu u Mapuii ve thung a ni. 

"I ngaihtuah thui ṭhin bik lutuk" u Maruata chuan a ti duh lek chauh a, ngawi ngul hian awm ṭhin mah se u Maruata hi chu a nghal thiam ve ṭhin alawm, a mizia a ni ve hrim hrim bawk.

"Sawipuia han râwn der ve che lah hian awmzia a awm thui ṭhin lo bawk sia maw, ṭha taka mi sawipui ve ṭhin mai áwm" u Mapuii chu a titau lek lek a, mahse a titau rei leh tawp lo ang.

Zanriah kan ei kham a, kei leh u Chhani leh u Mapuii kan che nghal a, mahse rin loh deuhin Ruata hmel kan hmu hlawl mai. Zanin chu pu Muanawma a lo lén dâwn avangin engmah ka ti lo ang tiin rilru ka lo siam lâwk ve vek tawh a, Ruata zawk a lo lang hmasa chu mak ka ti ang reng viau. Ṭhutthlenga a ṭhut thlak rual chuan min rawn nuih a, ka lo nuih lêt ve mai a, dar 7 pelh hretah pu Muanawma a rawn thleng ve leh ta, Ruata hmel a hmuh rualin ka lam a lo hawi zawm nghal a, mahse rei min en chuang lo. Ruata zawk chu a ṭawng deuh char char a, ka nu nen an titi mawlh mawlh a, ka pa leh pu Muanawma erawh an inbe zauh zauh a, zanin chu an inbe tam lo rih khawp. Thingpui ka chawi phei a, a hângin ka siam a, kurtai ka chhawp tel thung a, pu Muanawma chuan min lo en chik ang reng. A mitmeng chu ka chhiar thiam lo hle nghal a, a chhan ber hre si lovin ka inthlahrung ru ve em em ringawt.

Thingpui inna no vel ka sil laiin u Mapuii leh u Chhani chu sitting room bang phen deuhah an lo ding lang a, nui ver ver hian Thums Up te min rawn hmul vel a, ka nuih a va za ru tak! Pasal fanau nei ve ve tawh an ni na a, ngaihzawng ka neih avanga an phur lutuk chu an naupangchhia ve thlawt, no sil pahin ka nui reng ringawt. U Mapuii ber chu u Maruatan rawn hmu reuh se ka ti, an inkhak leh hlak emaw a ni ang a, u Mapuii ni se a'n titau ve leh bawk ang a, mutnaah erawh inhmangaih em emin an inkuah leh hlun emaw kha a ni leh lawi ang a, nuih hi an va tiza dun thei tak. Ka ute pahnih nupa hi chu an awhawm ka ti ve ṭhin, inhauh loh tawp chu an nei ngai bik lo va, an pahnih hnih hian, u Remzela te hi an thawm a reh deuh hlek a, u Chhani a zezawi chi a ni bawk a, u Mapuiite nupa nen chuan an inbengchhen hleih ṭhin khawp. U Maruata leh u Mapuii te pahnih ve thung hi chu inmil lo deuh tura ngaih, mahse inmil em em leh inhmangaih ru em em si ang chî hi an niin ka hre ber.

Darkar a liam a, dar 10 a ri thuak tawh a, kan inlêng te pahnih chu ka hrethiam lo, haw hmasa zawk nih an tum lo ve ve ni maiin ka hria. Ka nu leh pate an room-ah an lut tawh a, sitting room-ah chuan kan pathum chiahin kan ṭhu a, ṭhutthleng hrang ṭheuhah kan ṭhu bawk. A nuam tehchiam lo, sawi tur a vâng si, ṭawng awmchhun leh titi vawrh ber chu Ruata a ni mai a, keiin ka tuihnih zauh zauh bawk a, pu Muanawma erawh ṭawng lo tluk a ni. Ka pa tal la meng se, ṭhu dun leh se, sawi tur a hre ve leh deuh mahna. A hmel chu ka en leh zauh ṭhin a, a lungawi vak lo ni maiin ka hre tawh. Kei ni lovin Ruata zawk chu a en leh run ṭhin a, Ruata lah chuan a hmu ve der bawk si lo. Dar 11 dâwnah Ruata zawkin haw a rawt hmasa ta nge nge a, pâwn thleng ka thlah a, in chhunga ka luh leh chuan min lo en reng a, ka ṭhutna bulah a rawn insawn phei nghal thuai bawk.

"I ṭhianpa hawihhawm lo zet kha kawm tawh suh" a ti deuh tawp a, chhang lovin ka nui ringawt thung. 

"A en dan che lah kha!" ti leh supin a ngawi zui daih a, a lungawi lo hmel chu ka làwm reuh lutuk a, he pa hi chu engtin pawh awm se a hmelṭha a nih dâwn hi! 

"Lo lêng tur paw'n ka sâwm lo hrim hrim a nia, amah zawk kha a lo lang thut a, a lo luh tirh phei chuan nangmah i ni dâwn emaw ka ti alawm" ka ti ve ta sep a, a nui hmel ka la hmu miah lo va, hmuh ka châk tawh a ni. 

"A lo kal leh hunah emaw in inhmuh leh hunah chuan bialpa i neih thu hrilh tlang tawh ang che, i bialpa ka nih thu sawi rawh ka tihna a nih chu!" a aw chu a la pangngai hlei thei meuh lo a ni e.

"Aw le" tiin ka nuih sen sen a, ani ve thung chu a la nui duh miah lo zui. 

"Eng lo, a nuam lo a nia, i lungawi loh hmel si" kan ngawih dun vang vang hnu chuan ka ti sep a, a ban ding lamin min kuai a, a darah ka bei titih nghal bawk. 

"Min lo hrethiam teh u, ka zun a chhuak lutuk a" aw lo chhuahna lam chu hawi rual ṭhawtin ka ṭhu ngil deuh zawt a, u Mapuii lek chu niin, bathroom lamah a tlan phei a, an room-ah zunin a awm reng sia, min enthla leh tawh a ni hrim hrim. 

"Ka va haw ang e, khi dar 11 a pel vâr var tawh" tiin ka bula mi chuan thawh a rual nghal a, ka buk khum nghauh a, pâwna kan inzui chhuah dâwn lai tak chuan u Mapuii nen kan inen chat a, a nu ver ver a, a hmel aṭang chuan min enthla tih ka hre nghal mai.

"A nih aw, mut tui le" car bula kan din rualin ka ti a, pu Muanawma erawh a meng nur nasa hle thung. 

"Khati ringawt khan em ni min thlah i tum a?" nuih insum hmel a pu deuhin ka hria. 

"En teh maw, ka rualpui koh theih che pawh ka ring leh lo. A chhan chu a mawi dawn lo lutuk, kumah kan inthlau ve tho sia, mite'n min sawi duh lutuk palh ang. Chu bakah mi hriat i hlawh ang reng bawk si, ka chhungte paw'n mawi" ka ṭawng laklawg laia min rawn fawh thut avang chuan ka ṭawng tawp chiang hle. 

"Ṭawng duh reuh lutuk mai" ti supin rei pawh a inla hrang lo va, a hma aia dam zawk leh zun nei zawk fê hian mian fawp leh nghal a, thil zawngchhang chî tak chu a va ni chiang êm.

"In mote pahnih khan min lo bihthla leh lo ang chu máw" kan awm hran hnu chuan a ti sup a, ngainatawm tak hian a nui tawi suk bawk. 

"Awi, nizan khan i lo hmu vek bik elo? Kei chu anmahni zawkin min hrilh a, nuih hi an tiza thei a nia, nichin u Mapuii zung tura lo chhuak pawh kha maw min enthlak a duh vang bak a nih ka ring lo" ka tum ai ka ṭawng hnem daih, ka thluakah sawi tur a rawn lut zut zut ni berin ka hria. 

"Ka'n haw ang e, zing thawh i hai leh phah ang" a bân puamah ka chum nghal taih a, kal mai ta lo chuan min kuah leh ang lawi a, ka chala a fawh vang vang hnuah a haw ve ta hram.

A tuka tukṭhuan kan ei lai chuan u Chhani leh u Mapuiin nizan lam chanchin ngawr ngawr an sawi a, kan infawh thute an sawi chhuak vel a, min tizak dâwn hial a, mahse ka chhungte vek an ni hlauh zawk a, ka zak buai duh ta lo. A thu hrimah inngaizawngte chu an infawp ve bawk ang chu le, anni pawh u Maruata leh u Remzela te nen an infawp ve awm tho êm mai, kan danglamna ka hre bik lo, ngaihzawng ka nei chu mak an ti a, min sawi zui peih mai mai a ni. Pu Muanawma nena kan chanchin lam an sawi paw'n engah mah ka ngai duh tawh lo, ka nuih liam pui ringawt zel. Pu Muanawma chuan min rawn sâwm leh thlap a, kei pawh thawh ka hai tawh bik lo e. Motor chhunga kan chuan dun hnu chuan ka ṭawng melh melh a, ka ṭawng duh ta lutuk leh sawi tur ka hre ta lutuk chu mak ka ti ve tho. Thupui fun tak pawh ka sawi chuang lo, ka thutak lem lo va, titi pangngai satliah ang mai mai a ni zawk a, dawhthei tak hian min ngaithla a, a changin a rawn tui hnih a, kan nui dun leh hak hak ṭhin bawk.

Kâr khat kan han inngaihzawng tling a, a hminga koh te a ngai ve ṭhin bawk si a, ka 'u' ta nge nge. A tir chuan ka thiam viau lo, ka lái deuh ṭut a, mahse amah berin a pawm thlap lawi a, 'pu' ai chuan kei paw'n ṭha ka ti zawk zawk tho tho. A bula awm a nuam a, a hawihhawm mai bakah min ngaihtuah thiam em em a, ka Thesis buaipui lam thlengin min puih a hreh ngai lo. Tin, ka buai deuha a hriat chuan rawn lên ai lên loh a thlang zawk fo va, phone-a inbiak a duh tâwk mai ṭhin a, kan inbiak loh hlek te hian ka ngai ru hman em em zel tawh a, a kuma kum ka lo vei ruk ngar ngar mipa kha a ni miau a, kan inngaizawng ta bawk nen ka rilru, mitthla leh thinlung a luah hneh ta khawp mai. Amaha ka tlâk nát dan erawh ka hre chiah lo va, ka zawt ngai hran lo bawk a, mahse ka laka a awm dan aṭang hi chuan min duh satliah mai lovin min duh ve tak tak zawk a ang, chu thil chu ka duhthusam tak pakhat a ni bawk. 

Nîte chu hunin a liampui a, a liam zel a, keini pahnih pawh tunah chuan thla 5 chuang kan inzui ve ta reng mai. Khang thla kal ta chhung zawng khan buaina chu kan tâwk ngei a, mahse buaina lian tham tak a ni ngai lo thung. Vawi khat phei chu Education Department-a an professor Hmingtei bawk khan kan inkar tihchhiat a tum deuh reuh a, a tum ka ti mai. Phaia ka awm laia ka Vai ṭhiante nena kan thalak chi hrang hrang a lo zawng chhuak a, number dang daih aṭangin u Muanawma a lo va thawn ṭeuh a, ka chungchang mak tak takin a sawi bawk a, a chet dan chu a va'n professor lo ve tak! U Muanawma erawh chiaia thinrim nghal mai lovin ṭha tak hian min zawt thlap a, thlalak te chu kan pahnihin kan en dun nghe nghe a, a hun lai nen lam ka sawifiah vek bawk. Ka thusawi engkim a ring a, kei tak pawh hian amah hi ka ring a ni. Mipa rinawm tak a nih bakah rilru nghet ru tak a ni a, Professor Hmingtei chet dan zawng zawng chu a hre chhuak leh vek a, ngaihdam an indil hnuhnawh nghe nghein ka hria.

"Ka pate an zin rih a, keimah chiahin ka awm dâwn a, zanin chu kan inah hun hmang dun teh ang" a tih chuan aw tih nân ka bu ve mai a, an inah hian vawi hnih chu ka kal ve tawh.

"Mahse i patea fateho kha an lo lêng leh lo máw, chu bakah ka chhungte ka lo dil chhin hrim hrim ang" ka tih chuan nui suk chungin

"I chhungte chu ka dil mai ang, ka patea fate erawh an lo kal ka ring chiah lo, exam an nei hnai hlawm ém mai" a rawn ti a, tlêm chuan ka ngaih a ṭha deuh, thla eng emaw zah inngaizawng tawh mah ila an ina chuangkái hnem lutuk anga lán ka hlau a ni ber.

"I zo châk tawh em?" min en lovin a tih zawm leh nghal a, ka Thesis buaipui mêk chungchang a sawi tih ka hrethiam nghal mai bawk. 

"Châk tawh tak ka ni, ka zawh hunah leh Degree ka neih hunah chuan ka inla awl viau ang. Hri lêng avang khan thil tih tur pending neuh neuh a tam sia, ka duh ai ka zo har tawh, mahse final presentation hi ka pe chhe viau ang tih chu a hlauhawm khawp" ka ti deuh luam a, a bulah hi chuan ka tlangnêl mah mah tawh zawk a ni.

"Hun a'n kal leh deuh ang a, i zo ve mai ang" tih leh ka bianga rawn piai zeuh a rual a, min en chuang miah lo leh nghal. 

"Eng nge?" nuihza insum ru taka ka tih chuan

"Eng nge?" a rawn ti ve leh nghal a, kei anga insum buai vel ve lovin a nui sun sun a, a sir zawng paw'n a va hmelṭha hliah hliah bik tak!

"Engati nge min piai kher a?" hmui tisawi vak chungin ka ti a, min rawn en zawk a, hma lam a hawi leh nghal a, a lu a thing zeuh bawk.

"Kan inneih hunah phei chuan ka piai nasa thei ngawt ang che" tiin min rawn piai nawn leh a, nupa ni tawh tur ang maia min sawi hian engtin emaw ni ka awm ṭhin, mumang a ang ka ti.

"I piai nasat atân ka inphal teuh lo" ka chhan lêt dan chuan a tihlim hle ni tur a ni; a nui hawk hawk a, kei pawh a nui hmelṭha tak chuan min tinui ve leh ta sen sen. 

Kan in kawt kan thlen chuan a hawi kual hmasa tê tê phawt a, chumi hnuah ka biangah a rawn fawp zeuh a, min thlah haw apiang hian awlsam takin min chhuahtir ngai lo reng reng, inngaihzawn kawngah hi chuan a zei thawkhat ve chiang a ni. Mi thunun theih dan riaute hi a nei tlat a, a khirhin thu a duh pawh a ni chuang lo, awlsam te hian min thunun riai riai zel niin ka hre ṭhin. Zanriah kan ei laiin zana ka chhuah dawn thu sawi ka tum zet tak na a, ngawih ka chuh leh rih ta zawk. U Muanawma lo thleng se, ama'n ka chhungte dil thlap se, ka chhungte paw'n an phal zawk ka ring. Ka lo sawi lâwk a nih chuan eng eng emaw ni an sawi kai ang a, thil a kal kual thui mai mai.

Dar 7 rik dâwn hnaihah u Muanawma hmel kan hmu ta ngei a, ka pa'n thingpui lum turin min ti nghal a, mahse u Muanawma zawkin min rawn signal a, min chhuahpui lawk a duh thu ka pa a hrilh nghal bawk. Ka rin ang chiahin ka pa chuan a lo phal awlsam phian a, kei pawh ka room-ah lutin ka insiam nghal chu a ni mai. Kan chhuah dâwnah erawh rei lutuk lo turin min chah thung a, pa berin a phal bawk a, mi dang tumah an lo ṭawng ve lo hrim hrim. Cháltlâng lam pana kan tlan lai chuan kawng pêngah a ding a, arsa hem hmin leh momo tih vel te, ei tur dang neuh neuh a lei deuh ṭeuh a, momo chu car chhungah kan ei nghe nghe a, an ina kan ei tur atân a lei a nih ka ring ve tawp.

Minute 15 vel kan tlan leh hnu chuan an in kawt kan thleng a, Cháltlâng hi chu Aizawl khaw chhungah pawh vêng hlun kha a ni hrim hrim a, kan véng nen chuan a zau zawng leh a sei zawngah pawh inang lo tak a ni. In luah man te hi a to hlawm phian a, mahse a hmun hma a ṭha thung a, ka hmelhriat pakhat phei chuan sing chuang man daih a luah a, a ṭha ang reng viau, in pangngai tam tak ai a ṭha daih zawk, a to bawk a, a man nen a hen khawpin ka hria. In chhung kan luh chuan light a on nghal a, kan in lêtin a zau ṭha daih zawk a, chu bakah in chhung rawng vel hrim hrim chu a mawi ka tih chi tak a ni. Kan thil lei ṭhenkhat kan tilúm a, arsa hem hmin sa chu ka rin ai kan lo lei tam daih. Momo pawh kan chhuang lum leh thlap a, eng nge kan tih dâwn pawh ka hre chuang lo.

"I duh duh sawi la, kan search chawp ang a, kan en dâwn nia" tiin dawhkan tê chu a pawt hnai a, ṭhutthlengah kan ṭhu ve ve tawh a, kan bul lawkah ei tur a awm thlap tawh bawk.

"Duh pawh ka nei chuang lo" ka tih chuan ngawi reng hian a room-ah a va kal a, puan sin tur hi a rawn keng chhuak a, a âwm ngheng turin min kuai mu a, puan chu kan sin dun rial a, nuam ka ti ru em em leh nghal.

"I en châk zâwng kha search tawp rawh, Korean Serial lam chu ka en peih miah lo thung" Laptop awmna dawhkan tê chu a pawt hnai leh a, ka awm dan siamṭha hmasa tê têin kan movie en tur chu ka search ve ta nge nge. 

"Engati nge Korean Serial i en peih loh?" laptop-a thil chhu mawlh mawlh pahin ka ti a, en duh tak pawh ka nei bik chuang lo. 

"Ka nu hian a en nitin zantin ṭhin a, a hneawm ka ti, a chang leh Turkish a ti thul, nang pawh i nute an ni ve tho em?" puitling pui tawh si chuti anga a rawn ṭawng chu ka nuih a tiza khawp mai. 

"Ni ve tho e, ka nu phei chu Turkish ho a atchilh tawp, kan mote pahnihin Korean an atchilh thung a, an inen chhawk ṭhin" ka tih chuan 

"Nang ve?" tih leh ka nghawnga fawh zeuh a rual a, a ṭhu ṭha ve leh mai bawk. 

"A enga mah, mahse Horror lam hi hmuhnawm ka ti thung, ka atchilh thei tawp" ka nui zui hak a, ka thil zawn ber lah chu ka la hmu thei lawk lo zui.

"Kei chuan nangmah hi ka atchilh che" rem leh rem lovin a lam ka hawi a, ka nuih a zat ruk tehreng nen a nui duh miah lo leh nghal.

"I inla zei vel em mai a!" nêl taka ṭawngin laptop lam ka hawi ve leh mai a, ka nui zui nghal sen sen a, hnung chhawn zawngin ṭhu mah ila ka nui tih a hriat theih tho ka ring.

"Chu, ka zei lo i tihna em ni?" a rawn ti leh ngat a, a âwm ngheng turin min kuai mu a, tun ṭum chu ka thawh a phal tawh der lo. 

"Zei e, i zei vang alawm i inla zei vel ka tih, chu lovah zei rual chu i ni ve tawh alawm, tak a! Kan intawn hma khan bialnu engzat nge i lo neih hman? Ka zawt ang che ka ti ṭhin a, ka theihnghilh leh ziah" ka tih chuan a rawn nui tawi suk a, ka hmuiah a fawp zui nghal bawk.

"I hmui hi a thlum dêp depin ka hria" tih leh fawh nawn a rual a, infawh hi chu a hnen aṭang hian ka thiam vek tawh, mipa dang fawp thut ta pawh ni ila ka zahpuiawm ka ring tawh bik lo.

"Phakar suh aw, ka zawhna kha pehhel lovin han sawi hrim hrim teh, ka sawi chhuak miah lo vang" ka ti leh ngat a, a bialnu neih tawh zat chu ka hre châk hrim hrim a ni.

"I va ho reuh tak, ka bialnu neih tawh te zingah chuan ka la duh ber che, a tawp ber i ni bawk ang" a rawn ti daih a, a duh hunah hi chuan a phakar thiam ve ṭhin a nia!

"I nui hmel duhawm zet te hi ka mitthlaah a châm reng ṭhin" tih zawm leh nghalin min fawp vang vang a, ka khel do runtu chu ka zu tawk palh fuh alawm le, tawk satliah mai ni lovin ka khawih a ni mah zawk a, zah lutuk avangin ka sa chhuak vek thei. 

"Eng lo, ṭhu dun tawh rih lo ang" ka ti ringawt a, ka awm dan siam remin ka ṭhu ṭha thuai a, a hnuah phei chuan ka ding daih nghe nghe.

"Hlauthawng duh suh, engmah a thleng lo vang" awlsam takin a thusawi chu ka ring nghal vek a, keimah ngei paw'n mak ka ti ru ang reng.

"Ka bulah hian lo ṭhu leh rawh le" tiin ka bánah a vuan a, min pawt ṭhu chu a ni nghal mai. 

"Min do run a" a âwm ka nghen rual chuan ka ti deuh phawng a, ka va zak hnuhnawh leh si êm.

"Ka hria alawm, hlauhthawn phah lo la, thleng tur anga i suangtuah kha kan inneih hma chu a thleng ngai dâwn lo tih hre tawp rawh. I thianghlimna pâr hi chu kan inneih zanah ngei, thianghlim takin ka la thliahsak zawk dâwn che, a pâr zawng zawng ka thliak kawlh vek ang" a bânah ka chum nghal zawt a, ani erawh a nuih a za em em thung.

"A va'n awm pangngai hle hle har êm em" tleirawl chhuak hlim hlawl; thil chinchang engmah la hre lo ang mai chuan ka ti leh thâwr a, amah ka nghen dan leh ka ṭhut dan hrim hrim chu a rem tehchiam lo tlat a tin ni!

"Nakinah a pangngai ve mai ang, hlau deuh ang khan awm suh, si pawp pawp rawh" nuihza aw zeta a tih chuan 

"Ka duh teuh lo mai" ka lo ti vat a, a nui zui nghal hawk hawk a, kan thil sawi chu a va han ho lulai dun tak!

"A daih leh hmain ei tur hi ei teh ang" a rawn tih tâkah chuan ei tur lamah ka rilru a pêng nghal a, pawlh tur neuh neuh pawlhin momo chu ka ei tuam tuam a, a tui khawp mai, car chhunga kan ei ai khan ka ei tui zualin ka hria.

Ka rin ruk ang ngeiin dar 9 rik dâwn velah a patea fate an lo lut a, kan thil ei bang chu an ei zo vek a, kei pawh min be ve luam hlawm a, kum lamah kei ai naupang mah se an fel sap sap hlawm khawp. Dar 9 leh a chanve velah kan inphur chhuak a, car chhungah chuan sap hla a zaitir ral ral a, kan mood a fuh dun cher cher hle. A tlan muang hrim hrim a, kan in kawt pawh kan thleng thla har ang reng. Ka kut chu lá kangin a fawp zeuh a, ka taksa khawi lai pawh hi a fawh tawh hi chuan dawnsawn dan ka la thiam chiah lo, a mak a ni. Kawngkapui ka hawn lai thleng chuan min lo thlir reng a, tlan chhuak tawh tura ka signal hnuah a tlan haw ve ta chauh a, zan hun nuam tak min hman pui avang chuan ka lawm tak zet bawk. 

Krismas pawh thla rei lo tê hnuah kan thleng der a, kan chhungte ve vein kan inngaizawng tih an hre tawh tho bawk nen ruai ṭheh tlai chuan kan lêng chhuak a, a bula ka awm hi chuan hun nuam tak a ni zel ringawt. Ka ṭhiante paw'n engtin mah an sawi duh tawh lo, ka luhlul ve ang reng sia, an thusawi ka awih dâwn chuang lo tih an hrethiam a ni mahna. A thu hrimah min duhpui ve mai dâwn emaw ka ti a, Nunui chenin min duhpui lutuk lo hlawm vek a, keimah berin ka duh chuan a tâwk ka ti mai. Kan inṭhian ṭhatna erawh engmah a buai phah lo va, pangngai takin kan inkawm reng a, zanah kan in-video call leh zauh ṭhin a, mahse kei leh u Muanawma chungchang engmah kan sawi ri tawh ngai lo thung. Mipa pahnih hi chuan min duhpui lo em em pawh a ni chuang lo, an sawi tam vak lo hrim hrim a, hmeichhe pathum ho hian min duhpui em em lo zawk a ni. A chhan ka zawh lahin ka tân a ṭhat tâwk loh thu an sawi mai zel bawk si, u Muanawma an sawi dan ṭhenkhat hi chu ngaih khatah ka nei tawp tawh.

Kum a thar aṭanga thla tam ral hmain Doctorate degree ka nei ve ta nge nge a, final presentation ka pek nî te chuan u Muanawman min kalpui thlap a, ka pek chhungin kan department lamah ka class lâk tur min lo zu lâksak a, ka tân hi chuan inpe zo ve tak a ni. Kan thawhpuite paw'n kan inngaizawng tih an hre vek tawh a, mi ṭhenkhat hian an hre deuh fur tawh bawk. Thla hnih chhung vel kha chu kan thup thei mai a, mahse kan thup rei thei lo chiang hle. Sawi zui ka hlawh phah em em a, a ṭhen chuan kan inngaihzawn rei tak tak pawh an ring lo va, keiin ka ring thung a, min zeldin nasa ṭhin khawp mai. Doctorate degree ka nei ta bawk a, ka awm a nuam huai thei. Rilru hahna ka nei tawh lo va, phai lamah offer te pawh ka hmu nual a, hna dil tur chenin, phaia ka ṭhiante chuan Shillong lama thawk tur te'n min duh a, kei erawh ka mipa duh em em nena hun kan hman dun theihna Mizoram ngeia awm chu ka thlak zawk si.

Doctorate Degree ka neih tûk tlaiah chuan kan chhuak dun a, inrinni a ni hrim hrim a, an inah kan kal a, a nu leh pate paw'n min lo lawmpui thiam khawp mai. U Muanawma hi fa mal a ni a, unau nei lo mah se a pa unau fate ho an chuangkai zing em em thung a, an in chu inpui anga an ngaih a ni ve a, sawrkar hnathawk tam zawk mah ila keini ai an hausak zawk ka ring. Chutih rual erawh chuan hausak leh hausak loh lam ka ngaihven hran lo va, amah ka ngainatna leh ka duhna chu ka dah pawimawh ber zawk. Mi ṭhenkhat sawi dan chuan sum vanga ngaizawng ang te'n min chhuah a, a ni lo nasa mai si. Chapo vang ni lo se ka inchawmna tur sum chu ka thawk chhuak ve thei alawm, mahse sum hian zahawmna a lo keng tel tak tak miah lo. Eng ang paw'n Assistant Professor ni mah ila ka nun dan leh ka khawsak dan a zahawm loh chuan awmzia a awm chuang der lo, chu chu ka chiang a ni. Tin, ka inluling ang tih te hi ka hlau ṭhin, ka theihtawpin ka inthunun hram hram zel a, chu vangte pawh chu a ni mahna mi dang lakah sual taka ka awm áwm ka la hre lo reng reng. 

"Zanin chu ka lo lên hman ka ring lo" a message chuan min ti down nghal vekin ka hria, zan khat a lo lêng dawn lo ringawt pawh keimahah chuan a thawk nâ em em tawh a ni ber. 

"I va buai awm ve?" ka message a seen rualin min rawn call a, kan inngaihzawn tâk aṭang khan mesaage a type peih vak ngai lo va, phone call-in kan inbe hnem zawk ṭhin. 

"Chhuah lawk ka ngai a, ka hman chuan ka lo pêng kawi tho ang" a aw chu a zuai deuh ruih a, a chauh hmelin ka hria. 

"I hman loh chuan a pawi lo a nia, naktuk pawh keimahin ka kal theih ka ring, ka Scooty tlan nî alawm" ka aw chu a zâng vah a, a pangngai hle bawk.

"Ka dah lawk mai, ka kalna turte hian min lo call ngun tawh lutuk" tih leh tihtawp a rual nghal a, zanin chu a buai a nih ka ring.

Mak tak mai hian zan ka mu chu ka muhil thei reng reng lo mai a, a ruk tak chuan a lo pên kawi hram ka ring kha a nia, mahse dar 11 pelhah pawh a hmel ka hmu ta chuang lo. Ka mutsan a, muthilh mai ka tum a, ka muhil thei der lo leh nghal. Dar 2 dâwn thleng chu muhil thei lovin ka awm char char a, ka nilêng hun hman dan a nghawng dâwn tih pawh ka hre vek, mahse ka muhil thei si lo a ni. Zingah erawh ka harh hma em em thung a, a bul ber chu ka muhil nghet hlawl lo. Thawm ri hlekah ka harh zel a, Degree ka neih hnua ka mut ṭhat loh ber ṭum a ni ang. A hma kha chuan Thesis buaipuiin zan men rei chang kha ka ngah ṭhin a, thawh ka hai lek lek ṭhin. Tunah erawh khati ang ka tih kha a ngai tawh lo va, tui takin ka muhil siai siai ṭhin tawh zawk tlangpui.

Hna kal tura ka insiam lai chuan ka phone-ah message ka dawng mawlh mawlh a, en pawh ka en nghal lo. Kan ṭhianho group bak a nih ka ring lo hrim hrim a, Ngaihawmi leh Esther-i hian sticker inthawn an ching ṭhin a, an lo inthawn leh vak tawh a nih ka ring ber. Ka phone chu ka charge daih a, tukṭhuan ei khamah ka khawih ve ta chauh a, mahse ka message dâwn chu ka rin loh lam daih a ni. Number lawng aṭangin thlalak ka dawng nual a, chung thlalak zawng zawng chu u Muanawma leh Saron-i thlalak vek a ni a, an inkuah lai a la tam em em zui. Engah mah ngaih loh ka tum a, mahse professor Hmingtei ai khan ka thik fê zawk. Eng pawh ni se u Muanawma ber zawt fiah ila, a dik vek mai ang. Saron-i hi chuan a duh tih ka hre daih tawh a, u Muanawma zawk hian a uksak lem lo va, mahse an thlalak ka hmu chiah chu ka thik ru tak zet. 

Ka insiam zawh chuan u Muanawma ka call a, a la thei miah lo, a in-ring ral ṭhak! Saron-i nena an thlalak chungchang sawipui ka tum nghal pawh a ni lo, Scooty-a ka kal dâwn thu hrilh nawn leh ka tum zawk, a chhan chu min rawn lam leh nulh si ang tih kha a hlauhawm ve a, a tân hun leh tha sen thlawnna mai a ni dâwn si. Ka call nawn leh a, a la pick up thei chuang lo va, message-in scooty-a ka kal thu ka hnutchhiah leh hram a, a hmuh hun hunah hmu mai teh se! MZU pana ka tlan chhung zawng chuan u Muanawma hlirin ka rilru a luah a, kil khatah Saron-i a rawn lang tel ve zel bawk a, thik loh ka tum ngial a, ka thei thlawt lo. A bikin Saron-i hi a graduate tawh a, graduate tawh mah se MZU-ah a rawn kal ngun hle a, ka hmeichhiatpui a nih angin ka bialpa u Muanawma a melh dan leh a biak dan aṭang hi chuan a duh tih hai theih a ni mawlh lo.

Nilêngin u Muanawma hmel ka hmu lo va, ka call lahin a pick up thei ngai bawk si lo, a kal loh tur thu tal hre lâwk ila chuan ka ngaihtuah buai em em miah lo ang. Haw lamah chuan an vênga pên kawi zawk ka duh rum rum a, ani hi a lo dam lo ang a, min hrilh duh lo a nih te ka ring hial a, mahse ka pêng kawi ta chuang lo. Zan a rawn ni a, vawi engzat chiah nge ka call tawh ang, ka rilru a tibuai ru tawh tak zet a ni. Number lawng aṭang hian thlalak ka dawng leh nual a, chung thlalakho chu a ngai bawk a ni; u Muanawma leh Saron-i awm dun lai bawk! Tunah chuan thik satliah paw'n ka thik tawh lo, thik tak têin ka thik tawh zawk a, u Muanawma ber chuan ka lung a tiawi lo a ni. A phone check se chu ka hnen aṭanga missed call a dawn hnem tawhzia a hmu chiang khawp ang, tun thlenga min la rawn call back miah lo te chu ka thin a rim thar em em a, chutah Saron-i nen an la awm dun zui. A tawp nân tiin ka call leh hram a, beisei loh lutukin a lo pick up hlawl mai. 

"In in kawtah ka awm, lo chhuak lawk teh a" a aw chu a dam hniam ruih a, a chauh hmel viauin ka hre bawk.

Ka phone chu off nghalin kawr lûm pan tê mai hi ka hâk thuah a, ka mi hmuh duh ber leh ka biak duh berin in kawtah min nghak a, ka che hrim hrim chu muangchang lo tak ka ni. Pâwn ka chhuah rualin a hmel hmuh tum chuan ka mit ka lén nghal ruai a, vawiin a kal loh chhan te, Saron-i nena an thlalak dun chi hrang hrang te, engkim chu ka thluakah a inawm pawlh nawk nawk a, zawhna ka ngah lutuk a, zawh hmasak ber tur pawh ka hre lo hial ang ka ring. Car bul ka thlen chuan a rawn chhuak a, a hmel ka hmu chiang chiah chu mut a kham loh hmel tak zet. Tin, a lakah ka lungawi lo viau khan ka hre sia, hmaichhan ngeia kan inhmuh tâkah chuan ka thinrim em em paw'n ka hre leh tawh chuang lo.

"Keini pahnih hi tawp lawk ang hmiang?" aw dam dapa a thu rawn sawi hmasak ber chuan min deng chawrh ni berin ka hria, ka nghilh dup a, chhan ngaihna hre lovin ka meng buai nak a, chawp leh chilhin ka mittui a rawn tling nghal pam ringawt bawk. 

Author's Note : A story thupui khi chhiar chiang r'u aw, 'Dear Crush' tih a nih khi, happy ending dâwn em ka hre bik lo. Next-ah chuan a hmawr kan bâwk fel tawh mai thei, fel lo mai thei bawk.

(End of Chapter 6)