PU MUANAWMA By Havali Adam (CHAPTER 5)

                                  PU MUANAWMA 

                                     (Dear Crush)

                                             By 

                                      Havali Adam

                                         Chapter 5

A lei sa ham ham chu ka ká chhungah a nawr lut riai riai a, ka thiam ang tâwkin ka lo fawp lêt ve tawn tawn a, khawvela ka thil tawn tawhah chuan a la nuam ber ang. Eng emaw ni ka nghen deuh chawrh avang chuan chiang nial lo zet hian ka meng thei hram a, ka taksa engkim thunun mêktu; ka vawi khat hmuhna aṭanga ka duh ruk nghal em em pu Muanawma chuan ka engkim, a khawi lai pawh, a kipa kawiin a luah khat vek a, ka taksa a sikna aṭanga a inlâk hran rual chuan ka hit deuh sung sûng a, kan awmna chu car bul tih leh car nghengin min nam bet tih ka hre ve chiah bawk. Ka hmai zawna thaw lum ham hamin ka hmuiah a rawn fawp leh ngawng ngawng ṭhin a, ka thaw a chham thei hial dâwnin ka hria, a nuam tho bawk si.

"Nang hian min duh ve ti raw? A dik em? Ni lo se chu min chhang lêt tawp lo ang, i taksa ka sik laia i danglam nasatzia thleng hian min duh ve tih ka hre thei" hniam fiah ruih hian a ti sup a, kei erawh ka la meng ṭha hlei thei lo. 

"Pangngai takin thil sawi dun teh ang; zep awm miah lovin" a tih leh chuan ka meng ve ta nge nge a, kan inmelh hnai ang reng hle bawk. 

"Kum hnih chhung ngawt chu ngaihzawng ka nei tawh lo asin, hmeichhe dang melh a hnékin ka mitah chuan nang tluka duhawm leh ṭha; nang khum zo tur che hmeichhia réng ka hmu tawh lo. A chhan chu ka hmuh tirh phat aṭang che khan ka vei zui vawng vawng che a, ka ta ni la ka duh nghal em em a, hri kha lêng lo se chu tun ai hian chêt ka lák ran zawk ka ring" a aw chhuak chu a nghet charh vek a, min lo duh ru ve reng tih hriat erawh ka tân chuan dawnsawn nuam tak a ni.

"Min thlah tawh la" ka tih sep chuan kiai suk hian ka dar tawn tawn a chelhna chu a thlah a, ka kawngah rawn kuah leh nghal zatin a taksa nâwk chawrh tur ang hrim hian min pawt phei a, ka meng buai hman ang reng. 

"I duhawm lutuk tak zet a ni Amte" ti leh supin ka hmuiah a fawp zui nghal vawng vawng a, chhan lêt loh harsa khawpa nuam leh dangdaiin min fawp zel bawk si a, ka tân chuan hnar theih a ni lo tih ka pawm thiam tawh.

"Keimah avanga ngaihzawng nei lo tawp chu i nih ka ring chiah lo" ka tih chuan a hnarin a rawn thaw chhuak ham ham a, vei lama a hmui tiche zeuhin a kut pakhat zawk chuan ka biang a nul thuak thuak a, engtin nge min chhan lêt dâwn ka hre hauh lo. 

"Ka sawi tawh a, sawi nawn kher ṭulin ka hre lo, a pawimawh ber zawk chu min duh ve em tih hi a ni. Min han hrilh teh, zep nei miah lovin, tleirawl ngaihzawng nei hlim ang maiin ka rilru zawng zawng ka hrilh fai vek tawh che a, ka laka i rilru puthmang ka hriat ve a ngai a ni" a ṭawng zawh hnu chuan ka ngawi deuh vang vang a, ka rilru dik tak hrilh tur êm chuan hlauhthawnna ka la nei tlat si a ni.

"Eng lo" chhan lêt dan tur ka hriat lawk loh avangin ka ti sep a, min en hnai ṭha bawk si, ka zâm ru leh er er tawh. 

"Eng lo chu eng tihna nge? Ka kum i ngaihtuah em ni? Ka upa tawh tih chu ka hria, min duh nghal lo mah la sawi inthlahrung suh, engah mah ka ngai lo. Ka duh ang chiah chea min duh lêt ve theih nân leh kan inkawp ngei theih nân ṭan ka lá mai ang, sawi rawh le" a tih leh tâkah chuan sawi mai chu a ṭhain ka hre ta zawk. 

"Duh chu ka duh ngei che alawm" ka sawi zawh rualin min en chik sawt a, ka hawi sawn daih thung. 

"Tak zet em? Sawi leh teh Amte, nang hian min lo duh ve reng maw!?" ṭawngkâa chhang tawh lovin ka buk khum zeuh a, a âwmah min pawm bet nghal thlawp bawk.

"Sawi ta che, min hrilh thei reng asin" min la kuah bet reng a, ka hnung a chul hauh hauh lai chuan

"Ka zak alawm, tu hmeichhia mahin an mipa duh hnenah an duh thu an hrilh tawp ngai lo" ka lo ti ve vat a, a nui nghawr dat a, ka awm sawn hlau ang mai hian min la kuah bet run a, a bulah ngei ka inpuang ta ringawt chu a nia le!

"I sawi dik lo, hmeichhe ṭhenkhat hi chuan an mipa duh hnenah zep nei hauh lovin an sawi ṭhin, kei pawh hian ka tawng tawh alawm, mahse nang erawh ka duha ka vei em em thu ka sawina awm chhun hmeichhia i ni" a tawpa a thil sawi zet chu dawnsawn dan ka thiam lo, engtin emaw ni ka awmin ka hria.

"Ka duh che tih i hre tawh a, mahse ka inngaizawng dâwn tihna a ni lo a nia, haw tawh la a ṭhat ka ring" ka tih chuan ka inhmachhawn a ni nghal mai. 

"I lerh an ti, an sawi vek, ka ṭhiante paw'n an zavaiin i lerh thu leh ngaihzawng i neih rei ngai loh thu an sawi vek, chu vangin ṭhian ni zawk mai ang" ṭawngkam mawlmang zet hian ka tih zawm leh nghal zat a, ka rin loh lutukin ani chu a lo nui daih thung. 

"Ka lerh em em vang pawh a ni hleinem Amte, ka duh tak ka hmuh loh vang zawk alawm ngaihzawng ka neih rei ngai loh" a la nui pah reng a, nui mawi tak hi chu a va'n ni ve chiang em. 

"Lerh lo la chu pakhatah i lungawi em em ang" ka ti leh hram a, thinrim hmel pu miah lova min en zel te chu sawi tur ka hriat loh phah, kei ni ila ka thin a rim daih tawh ang ka ring. 

"I khirh reuh zêk dâwn a nih hi!" nui sun suna a tih chuan kal sawn tumin ka che a, min chelh ding rang khawp mai. 

"Aw le, a ṭha e. Min fiah thei ang, zanin aṭang chuan ka bialnu i ni tawh aw, hre reng rawh" tih zawm leh nghalin min rawn fawp tawk a, ka inring hman reng reng lo.

"Naktukah ka lo lam ang che, kan kal rual dâwn a nia, mahse mi dang hriat i duh rih lo a nih chuan ka pawm vek" thunei taka min ṭawngkhum ni miah si lo hian min thunun tlat lawiin ka hre ṭhin. 

"Scooty ka nei reng alawm, chuan eng lo, bul kan ṭan tak tak hma hian inngaizawng leh lo mai ang" sawi tur baihvaih luatah ka ti hnuhnawh leh ta ringawt. 

"A chi náng lé, keini pahnih tluka inkawp rem tur hi khawvelah an awm bik kher lo vang, engkim ka kutah dah tawp rawh" ka bianga piai zeuhin a ti sup a, a car chhungah a lut nghal daih bawk. 

"Mut tui aw ka bialnu thar duhawmtê, keimah vanga i mut thei loh ka hlau ngawt mai, kei chu ka mu tui dâwn em em thung si" ngainatawm taka nui chung hian a rawn ti leh a, min buk khum zeuh hnu chuan a tlan haw ta vang vang. 

In chhungah lut nghal mai lovin a thusawi engkim leh ka laka a chet dan engkim chu ka ngaihtuah nawn leh vek a, ka rilru dik tak kha sawi chhuah ka tum em em pawh a ni lo, mahse a bulah kha chuan ka inthunun thei meuh lo zawng chu a nih kha! Ka duh chuan ka hnar thei reng alawm, ka phal thlawt lo a ni. Ka mipa duh ruk em em, ka pian tirh ata ka mipa duh hmasak ber leh ka vei ngawih ngawih kha a ni miau a, min duh thu chiang lutuk taka min hrilh nawn leh siah phei kha chuan hlim avangin ka zuang tawr tawr lo chauh zawk a ni. Ka ṭhiante chuan duh leh min hau mai rawh se, an hlauh ang ngeiin inngaizawng ang chu kan ni der tawh bawk si. Anni pawh ni se an theih ka ring bik lo, an mipa duh em emin lo duh ru ve reng se, kawppui atân sawm bawk se, an hnar reng thei bik hauh lo ang, ka chiang a ni. 

Minute 15 hnu velah ka lut a, dar zat ka en chuan ka rin ai a lo tlai tawh khawp. Inthlah tura kan chhuah lai khan dar 9 vel chiah chiah kha a nia, in chhung ka lut leh chu dar 10 a lo ri daih tawh thung. Ka nu leh pa chuan TV an lo la en a, mi dang erawh anmahni room ṭheuhah an awm hlawm tawh a nih ka ring. Ka room-a ka lut tur chu min lo pawt thuttu an awm avangin ka petek deuh dâwr a, u Mapuii lek chu niin, a chet dan chuan min tihamhaih ang reng. U Mapuii chuan an room-ah min kai lut sawk sawk a, kan hnungah u Chhanin min lo zui lut bawk a, an awm dan teh thut chu ka hrethiam lo tulh tulh. U Maruata paw'n min lo en deuh hû a, an fa naupang zawk a lo paw muhil mêk a, a û zawk erawh a muhil bam tawh thung.

"Thingpui siam lai khan ka hre lo te i ti vel a, sawi ṭha ve mai ta che, nichina in awm dan zawng zawng kha kan hmu vek che u, Chhani nen phei chuan ngaihzawng i neih pawh kan ring lo, mak kan ti tawp" u Mapuii thusawi mai mai chu le! Min va tizak tak! 

"Dik chiah, mahse a ṭhat phian ka ring Amte, a senior ve fû tawh tih mai loh chu!" u Chhani chu a nui zui har har a, chhan dan tur pawh ka hre rih lo, za lo zetin ka nui tawi tak ringawt.

"In va ho dun e âw, naupang an muhil tawh a nia, a room-ah va sawipui zawk rawh u" u Maruatan a lo tih chuan u Mapuii zawkin

"Enteh Maruat, i nau hian ngaihzawng a neih kan ring lo êm alawm, a hmel phú lovin a nei ṭha fû leh nghal" a tih zawm nghal a, a nêk deuh ṭalh ṭalh a, u Maruata erawhin a ei loh hmel khawp.

"A duh leh nei ang hmiang, hmeichhia ve tho alawm a nih, an pahnih hian hruai phei teh Ami" u Maruata awm dan leh ṭawng dan chuan ka nuih a tiza ta ber mai. 

"Awi, ti hian hre châk lo ang deuh leh ngaihven lo ang deuhin i awm vel a, nakinah mi zawt leh dûk dúk awm tho si, mut hunah min zawt miah suh ang che" melh chho ral chung hian u Mapuii chuan a ti a, u Chhani nena kan dinna lamah a rawn inher zui nghal bawk.

"I room-ah phei ang u" a rawn tih leh rualin

"Aih, sawi zawm ka peih tawh lo, nakinah ka hrilh ṭha vek ang che u, ka phei mai, mut tui u" ka lo ti zung zung a, u Maruata te room aṭang chuan tlan chhuak rang tak ka ni. 

Ka room chhunga ka lut chu kawngka nghengin ka âwm ka dawm vang vang a, ka mit chhing zui nghalin thil thleng zo chiah chuan ka mitthlaah hmun a rawn chang nghal a, a mak ka la ti reng. Khumah bawk zâlin ka inngaihtuah vang vang a, tunah chuan pu Muanawma nen kan inngaizawng chu a ni ve tawh mai si a, rei erawh a la rei hran lo, nichin lawk aṭang khan a ni. Chutah min hrilh lawk ang ngeiin ka mu thei miah lo zui, ka ngaihtuahna a luah hneh lutuk avangin mut luih pawh tum ngial ila ka thei lo, ka mitthlaah a rawn lang zel a, a hmel leh ka laka a chet dan; kan infawh dan zawng zawng nen lam chiang takin ka hmu nawn leh ni maiin ka hria. 

Dar 3-ah pawh ka la meng kar a, mu thei lo na ná na chu zángthalin chung lam ka en tlawk tlawk ringawt. Ka ni hman dan a fuh dâwn lova ka hriat avangin ka mit ka chhing lui leh ngar ngar a, dar 4 a ri dâwn tak ngial tawh a, ka muhil lo a nih chuan keimah zawkin ka zo dâwn lo tih ka hria. Ka muhil ta nge nge a ni ang motor tlan thawmah ka harh a, zing dar 9 a lo ri thuak tawh hial a, phone ka en chuan pu Muanawma hnen aṭangin missed call vawi 2 lai a lo awm nghe nghe.

"Amte, lo tho teh, i va mu rei em em ve, nizana mi kha a lo kal a nia, kha, Central YMA President ni tawh pa kha?" u Chhani aw ka hriat rualin ka inperh tho zawk a, duh ai ka mu rei mah mah a ni. 

Inphih fai sawk sawkin room aṭang chuan a tlan hian ka tlan chhuak thuai thuai a, thui pawh kal hman lovin ka lut leh a, ka insiam theihnghilh tih ka hre chhuak lo teuh kher mai. Mawi taka insiam hman pawh ka ni tawh lo, ka inthuam dan chu awmhmun kawr hak loh aiah tih ang vel a ni. Sitting room ka thlen chuan pu Muanawma hmel ka hmu nghal a, min lo en chik khawp. A hnuah erawh a nui deuh suk a, pâwn lamah ka kal zui nghal a, chaw pawh ka ei tawh lo mai ang, a tlai mah mah tawh a ni. Car bula ka din lai chuan a lo phei mêk thung a, kawngka bul aṭangin u Chhanin min nuih var var a, u Mapuii pawh a bang chuang lo. Ka nu thlengin maw le, pu Muanawma nena kan inphur chhuah dâwn lai tak te chuan min en ṭhap a, min ti awm thiam lo zo vek zâwk!

"Tukin chu thawh i hai nge zing dangah pawh i tho tlai ṭhin hrim hrim?" ner nángin a lam ka hawi a, kan hma zawn en reng chung hian a nui tih ka hre thei.

"Nizan ka mu hlei thei hleinem, zing dangah te chuan ka tho hma ve ṭhin reng e a!" ka ti vat a, a rawn kal nî ber khera thawh ka hai chiang lutuk chu a fuh lo tak zet.

"Keimah vang a ni chiang mai" min nuih suk a, hma lam a hawi zawm leh nghal a, han hnial ka tum zet tak na a, a sawi dik tho bawk si. 

"Ka ring dik a ni máw" a rawn ti leh a, min en dâwna ka hriat rualin pâwn lam ka hawi daih a, a nu ri hak zui nghal a, kei pawh ka nui ve tho, mahse ka la zak deuh, nizan mai khan kan inngaizawng ṭan chiah a, amah avangin ka muhil thei lo nghal ringawt chu a zakthlak ka ti.

"Eng nge kan tih dâwn?" 6 Miles dawr kawtah kan din chuan ka ti a, ka en deuh hû a, a chhuak daih a, mi pawh a chhang chuang lo. 

"Lo kal rawh le, kan kal hma khan engmah i ei hleinem" tih leh min kaih chhuah a rual nghal a, dawr chhung kan luh chuan min lo en duh hlawm ang reng.

Hnathawk pakhat kovin ei tur min chahsak a, a chah ang ang ka ei tawp a, biak pawh kan inbe lutuk tawh lo. Ka ei mial mial laiin phone a khawih a, ka hma zawnah a ṭhu run a, ka ngaihtuahnaah erawh ka ei zawh hun tur a awm daih thung. Ka thil ei man chu pek a tum leh ringawt ang tih ka hlau, ni lo, a pek hmain ka pek khalh tur a ni. Chutia kan awm dun lai chuan hmeichhe pakhat hi kan bulah a rawn ṭhu chat a, kan bulah ka ti tak na a, pu Muanawma bul chêtah a ni mah zawk. A hmel ka en chian chuan kha nu, Education department-a an professor bawk kha a ni. Hai rual lovin kei ai a upa fê tawh a, a ṭawngkam, a hawiher leh pu Muanawma bula a awm dan hrim hrim chu a leng halh halh khawp mai. Ka hmu hne ru ṭan viau a, a ṭawng ri chu ka hre hne bawk. Ngawi rengin ka tho tharh a, pu Muanawma chet hmain ei man ka pe a, pâwnah ka chhuak zui nghal daih bawk.

"Haw lam chu ka ring mai dawn che asin, hawna tur ka nei dâwn lo a" chu nu chuan a rawn la ti chhuak har har a, ka thik tâwk a va tling tak! 

"Hawpui tur ka lo nei tawh a" pu Muanawma chu ka en reng a, ani erawh ka awmna lam a la rawn hawi lo hrim hrim. 

"Ka leng ve mai ang chû? Chu bakah i zirlai naupang nen sawn in haw rual ka ring ringawt a, lo chuang ta pawh ni ila kan chep tawp nâng" a ti ham ham a, awm ngaihna vak ka hre lo, zak lo ka ti em em ringawt. 

"A nih le, kan lo lam chho dâwn che a nia" pu Muanawman a tih tâkah chuan nui ver ver hian kan piah lawka bike inhûnna lamah a phei a, bike-ah chuan mipa pakhat a lo ṭhu run bawk. 

Kan department kawnga kan tlan chhung zawng chuan ka ngawi char char a, ṭawng châkna ka nei rih hlawl lo. Hmeichhe dang ka thik chu thuhran ni se, a zirlai anga min ngaitu hnena ka nihna dik tak a sawi lo leh kan inzawmna engmah a sawi ri duh miah lo kha ka lâi tinâtu pakhat a ni. A zawng zawng chuan kan inzawmna leh kan inkar thu hriattir ka duh pawh a ni lo, mahse khati ang khawpa hmeichhe zak thei lo hnenah kha chuan a bialnu ka ni tih hre mah se pawi tihno pakhatna ka nei lo thung. Amah pu Muanawma ber lah ka duh dan angin pakhat mah a ṭawng chhuak bawk si lo, zep lo chuan a lakah ka lungawi lo a ni. Department Building kawt kan thleng a, car chu a park ṭha nghal a, amah pawh ngaichang lovin ka chhohsan daih a, ka office lam ka pan lai chuan min pawt ding chiang hle thung.

"Thik buai duh suh, ka tân engmah a ni lo, eng ang paw'n min lêm kual mah se ka engah mah a thawk lo tih hre tawp rawh" hriat nuam loh ni miah si lo hian a ti a, ka rilru a hre chiang khawp a ni mahna. 

"Min thlah la, mi dangin min lo hmu palh ang e" tia ka kut pawh thlak ka tum chu a hma ai a vuan nghet a, min din hnaih sauh bawk.

"I rilru a nawm tawh thu sawi phawt la" hmel uang miah lova a tih chuan ka hawi sawn daih a, dik tak chuan ka rilru a nuam reng reng lo.

"Ka office-ah kan phei dâwn nge i office-ah hian kan lut dâwn?" a zawhna avang chuan ka meng buai nghal nak!

"Màw!?" ka ti deuh hú a, mi dang hmuh hlauh nak a lai a! Office khata awm dun maw!? A chi teuh lo mai!

"Sawi fel lawk ang" tih leh a office lama min kaih phei a rual nghal a, ka kut phih thlak ka tum a, ani lah chuan min chelh nghet bawk si, hawi kual zawk zawkin ka zui dat dat a, common room ber chu ka pál tlang hreh a ni. 

"Min thlah teh, keimah paw'n ka kal thei" ṭawng rin hlau tak leh a hriat loh hlau em em si chuan ka ti a, min nuih suk duh lek chauh a nih chu!

"Hlauthawng suh, Guest lecturer pakhat bak a la kal lo" tiin common room chu min kal tlangpui a, vanneih thlak takin min hmutu an awm lo hlauh.

"Eng nge tih i tum?" lungawi lo tak hian ka ti deuh hmak a, chhung lam aṭangin kawngka a kalh zui nghal a, thu a duh viau dâwnin ka hre thar ta bawk.

"Eng nge ti se min tih a? Sawi rawh le, i lungawi lohna zawng zawng chu han sawi teh. Nizan aṭangin kan inkawp ṭan chauh a, kan bulṭanna ah hian buaina awm lo se ka duh" dam dapa a tih chuan ka inher a, tukverh lamah ka phei a, ka lungawi lohna chu a ho viau emaw ni le te ka ti hnuhnawh leh ta ringawt. 

"Sawi teh le Amte, ka lo ngaithla ang" ka hnung lam aṭanga min rawn kuah chung hian a ti dam leh dap a, a taksa ka ngheng chiah chu ka hahdam sawng sawngin ka hria. 

"Dik tak chuan ka hlauthawng a ni; a chhan chu a hmasa ber i ni a, ka tân chuan a vawi khatna a ni bawk. Ka zep lo ang, hmeichhe dang nena inhaw lo tih hriat taka in awm khan maw ka rilru hi a lo nâ vawng vawng asin, i bialnu ka nih thu pawh i sawi lo va, khati ang hmeichhe zak vak lo lakah kha chuan sawi mah la pawi ka tih loh tehreng nen. Ka inhrethiam rih bik lo, a hma kha chuan a rukin, a ruk tak meuhin ka duh em em che a, ka vei em em che a, mahse tunah erawh kan inngaizawng tawh miau a, chu vangte pawh chu a nih ka ring; hmeichhe dang ka thik hma em em chhan hi!" ka sawi zawh rualin thawk ka la vang vang a, hmeichhe dang ka thik thu mai bakah ka rilrua hlauhthawnna awm zawng zawng nen lam ka hrilh vek ta law law.

"Ka lawm e" ti supin min kuah nghet sauh a, chutah amah bawk chuan 

"Ka tân ve thung chuan nang ang lo takin a hmasa ber i ni lo va, min hriatthiam ngei ka beisei, mahse a tawp ber erawh i ni dâwn tih ka chiang a ni. Nang tluka hmeichhe duh leh ngaihven hi ka la nei ngai lo, ka thinlung hian a pawh nghal em em che a, ka dawhtheihnate hi a pung sawt sawt ni berin ka hria" ti leh nghalin min kuai her a, tunah chuan kan inmelh chiang ta hle. 

"Engkimah min ring tawp la ka duh, i hlim phah ang a, kei pawh ka hlim phah bawk ang, ka sawi awmzia i hrethiam em?" a kutzungpuia ka biang nul thuak thuak pah hian a ti leh sup a, ṭawngkâa chhang tawh lovin ka lo bu nghat thung.

"Thophang hmelṭhanu" ka hmuiah a rawn fawp zui nghal a, ka thiam ang tâwkin ka lo chhang lêt ve a, min fan chhuak vek thei tura nuam tâwk chiahin ka hmui chu a pet a ni mah zawk, danglam nasa leh tawh tak ka ni. 

"Sir, i kalh elo?" hmeichhe aw kan hriat rualin kan awm hrang nghal a, chu aw chu kan Guest lecturer aw ngei kha a ni a, keini pahnih min hmu dun a nih vaih chuan a chi loh khawp ang. 

"Va hawnsak vat rawh, Almirah phenah hian ka lo biru mai ang" ti sawk sawkin ka nam phei titih a, ner nàng hian min nuih suk a, kawngka chu a va hawng ve mai bawk.

"Eng lo a nia Sir, miss Ruth-i a lo la kal theih loh hmel bawk sia, documents print tura i tih kha a la print lo va, chu chu tihsak turin min chah a, i dawhkanah a awm a tia, lo lák ka tum maw le" almirah phen aṭangin an ṭawng chu ka hre pha reng a, thawm erawh ka nei miah lo thung. 

"Awi, min hmuh teuhzia kha! Heta awm reng thei pawh hi ka ni lo, ka va phei vat ang e" documents an inpêk fel hnu chuan ka ti chhuak nghal a, nui chung hian min rawn pan a, min kuah leh ringawt tawh.

"Ka va phei vat zawk ang, a mawi lo em mai" ka tih leh laiin ka biangah a rawn fawp zeuh a, min kuahna a tithâwl a, rang takin ka pit chhuak zui nghal.

Ka office ngeia ka luh tâkah chuan ka thaw a veng huai mai, ka kal phei lai te khan mi dang hmuh ka hlauhzia kha! Chawhma chhung zawng chu zirtirna hna kan thawk malh malh hlawm a, miss Ruth-i erawh pasal nei hlim hlawl a ni bawk a, HOD berin thla khat lâi chawlh a pe nghe nghe a, a lo lêt har rih viau ang. Lunch break-ah chuan ka office-ah pu Muanawma a lo phei a, min kai chhuak leh ringawt a, mi dang hmuh ka la duh vak rih lo tih a hrethiam tawh a ni mahna lift-ah min chuanpui daih a, ka kal ṭhinna Botany Canteen lamah min chhukpui a, ka kut pawh a vuan reng tawh bik lo. Beef Clear Soup chu plate hnih a chah a, ka rin ai a duh phian, kei tak paw'n ka duh tho, a tui ve êm bawk a ni. Thil kan ei dun hi chuan kan inbe tam lo hrim hrim a, ei tawp a ni mai. Hri lén hnua kan ei dun lehna hmasa ber a ni a, a dan a dang riauin ka hria.

Kan haw lamah chuan Education Department chhak lawk kawngpuiah kan ding a, kan mi nghah pawh a tawpa tawpah chuan kan nghak chhuak ve ta nge nge. Nui var var hian a ṭawng bawrh bawrh a, nula senior a nih ngei tawh ka ring. A hming pawh pu Muanawma khan 'Hmingtei' a nih thu min hrilh tawh tak alawm, a lo berah pu Muanawma nen chuan an inrual thuak ang. A hmaah kan pahnihin kan ṭhu a, ani a hnungah a mal ṭhut thung a, enghelh neih loh hmel zetin ṭawng siam siam mah se nuam a ti hran lo tih ka hria. Ka hawi lêt duh lêm lo va, a hnung lam aṭangin pu Muanawma a rawn bawh thuak thuak a, professor ve si manner a hre thlawt lo ka ti mai, nge a zak lo hrim hrim zawk!?

"I student hi thlah kual hmasa phawt ila, chumi hnuah min thlah thung ang a, a ṭha mai em?" thu ber ang ziazângin ro rawn rel a tum vel a nih chu!

"Ka student a ni hleinem" ka bula mi chuan a lo ti ṭha ve mai a, a hma zawn a en ding ngar a, chutah kan hnung lama mi bawk chuan 

"Ka hmu zing riau tawh chein ka hria, khawi vêngah nge in awm a?" tiin min rawn bia a, zak lo ka va'n ti ru ngawih ngawih tak! 

"Ani hi chu ka bialnu, nakin lawka ka nupui ni mai tur a nih hi Hmingte" ka chhan hmain pu Muanawma zawk chu a lo ṭawng chhuak leh nghal a, awká dam dapin ṭawng mahse a thil sawi dan chuan min va ṭhawng si êm.

"Fiamthu hi i duh ve sia maw, i sawi tâkah chuan nupuite hi neih i tum lo em ni? Heltu che kan tam tehreng nen i ngaihven loh hmel bawk si, i senior lutuk chuan fa thlengin i nei thei lo mai ang" zahna nei miah lo hian a la ti ham ham nia maw lé.

"Ka nupui tur ber hi han inpeih phawt se, nupui chu ka nei ang, ni lo'm ni?" tih leh ka bula mi chuan ka kut rawn chelh a rual nghal a, lá kangin a fawp zeuh bawk a, a awm dan vel chu a lawmawm reuh lutuk. 

"Nia" ka ṭawng lai chuan ka nui lui sak a, ka hnunga mi erawh a ngawi ta vang vang.

"Hetah hian kan ti mai dâwn em ni ang Hmingte? Amtei hi thlah kawi ka la ngai a, i duh ṭalh chuan in in kawt thleng kan tlan thei tho" tiin pu Muanawma chuan kawng sirah motor a tiding riai riai a, kan hnunga mi chu a lawm hmel vak loh khawp. 

"A ngai lo" ti deuh hmakin titau ang mai hian a chhuk nghawng nghawng a, pu Muanawma ber paw'n a be lo va, keia lo biak ve ringawt na chhan tur a awmin ka hre lo.

Muangchangin kan vêng lamah kan tlan a, ka mut chu a chhuak ru em em bawk. Khua a thim hnai ṭan tawh a, nî pawh a tla fel vek tawh a, vêng ṭhenkhatah phei chuan street light an on tawh nghe nghe. Kan tlan zel a, ka ṭhut dan siam remin ka mit ka chhing vang vang a, muthilh erawh ka tum hran lo, maimitchhin hrim hrim chu ka duh a ni. Thli thaw te chuan ka mit an tithip lek lek a, chu vanga meng reng peih lo chu ka ni. Zanah Thesis buaipuiin Laptop ka en nasa ṭhin si a, duh ai chuan ka mit ka hmang rim mah mah a ni. Ka lo muhil a ni ngei ang ka men leh chuan khua a lo thim fel vek tawh a, kan in kawtah kan lo awm reng tawh a, mahse motor chhungah kan la awm reng thung. Pu Muanawma lam ka hawi phei a, lungawi hmel zet hian min lo thlir reng a, ka awm dan chu ka siamṭha rang khawp mai.

"Sorry lutuk" ti sepin ka kawrte ka chul mar thuak thuak a, ngawi reng hian min la en  reng a, ka che vel chu hmuhnawm a tih hmel tawp, mahse a hmuhnawm ka ring chiah lo.

"Zaninah ka lo lêng ang aw, i buai ang em? I duh chuan Thesis pawh ka tihpui ang che, i chau mah mahin ka hria" a awm dan a la ngai reng a, chhuak ta mai lovin a lam ka hawi a, engtikah mah a hmelṭha lutuk hi chu ka hmuh hne theih ka ring lo hial tawh. 

"Ka zo ṭep tawh alawm, tihpui ka ngai hleinem, chuan eng lo, engtin nge ka koh dâwn che, ka hrethiam rih lo" lái ru zetin ka nui zui nghal a, ani erawh a rawn nui nghawr dat thung. 

"Ni ngawt mai, ka upa ve tawh ang reng sia ti raw, i duh dan tak khan min ko mai teh, i mi kohna a nih phawt chuan ka eih lo phal náng" nui sun sun hian a ti a, a ruk têa a huhâng nâ tak si chu ka zo lo lek lek ṭhin.

"Chu tak chu ka hre lo alawm, han 'u' dâwn che ila mawi ka ti si lo, 'pu' dâwn che ila i duh dâwn lo nasa bawk si. Lunch Break-a thil kan ei dun chhung zawng khan ka ngaihtuah char char alawm, eng lo, pawi i tih loh chuan ka rualpui koh tawp mai ang che?" ka duh dan chu a duh dan a lo ni ve hauh lo ang tih ka hlau. 

"Kha lam kha chu i thu thu, mahse min 'pu' êm lo la chu ka duh" a nui zui nghal hawk hawk a, a ha vâr rual mawi em em te chu a tân chuan thil ho tak a ni awm si a, ka tân erawh thil ho lo tak a nih mai bakah a nui hmel hrim hrim chuan ka mood a ti-on ṭhin a ni. 

"A tir phat aṭangin ka duh em em nghal che chu a nia, a mak ve ngawt mai, Hmingtei awm laia ka thil sawi kha ka ti tak tak tih hre reng la ka duh bawk. Kan inngaihzawnna a la rei loh lutuk avang hian awm ang lo pawh i ti mai thei, mahse ka thinlungah hi chuan i hmin hneh tawh lutuk tlat" a rawn ti leh nghal a, ka lái lutuk chu ka bag ka hmer vak ringawt. 

"Nangnu tê hi i lái reuh elo? Khaw maw min han en teh, hmelṭhanu" ka khabe chu a dawm zawm zat a, amah en turin min kuai her a, a mitah pawh ka en ṭha ngam lo. 

"I sawi deuh tawp zel a, awm dan min tithiam lo, ṭhat thuah te chuan kei ai i hmelṭha daih zawk" tum lâwkna awm miah lovin a hmelṭhat thu hmaichhanah ngei ka hrilh ta nge nge e!

"Ka hmelṭha máw, han sawi nawn leh teh" min nuih sun sun a, sawi nawn leh chîah pawh ka ngai lo.

"Zanah chuan i lo léng dâwn nia, eng lo, ka sawi awmzia chu ka hman ang ka ring. Ni lo, ka hre lo, i thu thu, lo lêng lo mah la a pawi chuang lo" laih lutuk avangin ka ṭawng bah nuaih a, ka kum ngaihtuah chuan chuti ang em ema lái rual chu ka ni tawh lo maw le. 

"A va mak nawk nawk ve, ka lo lên i duh nge duh lo?"

"Eng lo" ka tih laklawh lai chuan a rawn che thut a, a hmui lúm nuam em em leh keia hmui ve mai; mipa pakhat chiah la fawp hmui ve mai chu a inbawhthuah zui nghal mawlh mawlh a, ṭum dang ang bawkin dawnsawn a nuam leh pek hle. 

"Ka lo lêng ang" a aw chu amah ang lo tak hian a phelh ve phang a, a dam em em lo bawk, a thum hniam mah mah zawk.

"Lut rawh le, ka lo en ang che" a tih leh chuan naupang thuawih tak ang maiin ka che chhuak a, kan in kawngka bul ka thlen chuan ka hawi lét a, nui sukin min lo buk khum zeuh a, kei pawh chu inherin in chhungah ka lut zui ve nghal mai bawk. 

(End of Chapter 5)