PU MUANAWMA By Havali Adam (CHAPTER 4)

                                 PU MUANAWMA

                                    (Dear Crush)

                                            By

                                     Havali Adam

                                        Chapter 4

Hun leh nîte a liam a, kum a'n vei meuh tâkah chuan khawvelin hri damdawi hmuh chhuah kawngah hma a sâwn ve zel a, vaccine lâk tur te a awm chho ṭan a, hri lêng reng mah se in-lockdown reng thei kan nih loh avangin mi tin chuan kan hna leh kan tihtur ṭul ang ang kan ti mawlh mawlh hlawm a, vaccine a awm tawh tlat a, a tua te pawh chuan hri kai kan hlau ta lo deuhin ka hria. A ni ve réng bawk a, a pawimawh zawka ka hriat chu kan chhuak vâk a nih paw'n fimkhur em em zel ila, kan kâi zut zut lo ang ka ring. Zawi zawiin hri paw'n kiam lan a pan chho ṭan a, ka lawm tak tak a ni. Khang kum liam ta chhung kha chuan a tihdamna a awm thei dawn lo emaw tihna kan nei fur a, mihring a suat nasat bawk si a, khati ang rilru kha a put loh theih loh. Amaherawhchu vaccine ka'n han lâ ta sup sup a, taksaah a thawk nâ viau a, hri erawh kan kai har phah ta hle thung. 

Kei pawh a hun lai kha chuan ka kai ve hman nghe nghe a, u Maruata aṭangin kan chhungkua kan inkáichhawng a, Home Isolation te ka nei a, mi tlawh pawh theih lova awm kha a nuam em em lo. Kei ngei pawh thla khat leh a chanve chhung deuh thaw hna lam ka ṭhulh phah a, ka thawhpuite paw'n min ngaihtuah hlawm hle a, pu Muanawma pawh a bang chuang lo. Kan hun tawnin a zir loh vang a ni mahna kum dang zawng ai kum kan hmang ral chakin ka hria, mahse ka rilru erawh hun leh nîte chuan liampuiin a danglam phah der si lo. Danglam a hnékin pu Muanawma ka duhna a nasa tulh tulh zawk a, ka ngaihzawng ni hran lo mah se ka hringnun tihlimtu pakhat chu a ni ve chiang a ni. A hmelṭhat ngaiin a la hmelṭha reng a, mi sawi dan chuan MZU-a professor tho pakhat nen an inngaizawngin ka hre bawk.

Tunah chuan kum 2 zénzâwn a liam tawh a, session thar kan chuangkai leh chiah a ni a, kan student thar te chu kum danga mite an pha lo lehzual khawp mai. A ṭhen thiam tak tak an awm tho rualin a tam zawk erawh thiam lutuk lo leh zir ṭha peih lo an ni hlawm a, hri lêng avanga kan buai rei lutuk vangah ka puh ta ber mai. Online hlirin class kha kan lá ṭhin bawk si a, offline-a kal leh thut chu an zo lo ka ti dâwn nge an la in-adjust thei rih lo ka ti dâwn zawk pawh ka hre lo. Kum hmasaa mite phei kha chu Master atâna an tih tur Dissertation pawh kan tihpui nual a, field study vel nei turin pâwn chhuah khap leh kal phal lohna hmun a tam bawk si, a kalhmang an hriat loh mai bakah kan khawvel awm danin a zir lo leh zel a, ka Group ho phei kha chu a chanve aia tam daih ka tihsak hlawm nghe nghe.

Thawhlehnî a ni a, Miss Ruth-i pasal neih nî a nih avangin student te tih loh chu a thawhpuiteho kan kal kim ṭhap a, pu Muanawma pawh a mawi lehpek hle. Chuti teh luaa inchei a ni lo va, necktie awrh lovin kamis vâr chungah coat pawl duk thim lam hi a ha a, a kekawr zuih dan leh chhin dan te chu a mawi tâwk em em a, tun lai deuh hian a chhing lam hret a, a smart shoe chenin inhmeh hliah hliah tak a ni. A lu a met tawh leh nghal a, a bek sam ṭuak deuh hlek te chu amah tilang ṭha zualtu ni maiin ka hre tawh, a fai vek vuk bawk si. Education Department-a mi professor, pu Muanawma nen inngaizawng anga an sawi ve ziah ṭhin erawh ka hmu miah lo va, a lo kal ka ring ve ringawt kha a nia, kal pui a rawn neih loh tâk si ah chuan ka ngaihtuah zui em em chuang lo.

"I mawi hle mai" Ruata chu ka nuih sen sen a, tun hnai hian kan ina rawn chuankái zauh zauh a ching a, miss Ruth-i ṭhianpa nau a lo ni leh zel a, miss Ruth-i nen tak phei chuan an innêl hle. 

"Mo ai pawh sâwn i mawi daih zawk" a ti leh a, a ban bulah ná vak lovin ka chum taih a, hman ni lawk khan AAO-ah a inziak tling thar a, kei paw'n ka lawmpui ve khawp. 

"Haw hun chu ka ring mai che aw" kan hma lawka nupa tuak thar thla la mêk en paha ka tih chuan

"Min rin mai loh te'n le, ka ṭhiante inah kan lêng kawi lawk dawn a nia, mahse kan rei lo ang" a lo ti ve mai a, ka bu nghat a, min duh tih hi chu min mitmei danah leh ka laka a awm danah ka hrethiam ve tawh a, mahse keimah zawk hian mi dang duh ka nei tlat lawi si. 

"Saw saw pu Muanawma elo?" a hawina lam chu ka hawi phei a, pu Muanawma chuan ngainatawm tak hmel pu chung hian a rualpui áwm vel hmeichhiaho a lo titipui a, hmeichhe dang nen inngaihnattawn hmel taka an awm ka hmu chu hmán ang chiah kha ka la ni, ka lo thik ve leh ringawt tawh a nih chu! 

"A nih saw, kan thawkho alawm, miss Ruth-i nen phei hi chuan chanchinte an lo neih ve tawh khâ, i hre lo em ni?" ka ti ve nghal a, a lo nui nghawr dat thung.

"Ka hre leh si, hmanah khan an inzui ve tawh tak alawm, ka'n theihnghilh ringawt chu le" a ti nuah nuah a, eng kan sawi zui tawh lem chuang lo. 

Chawhnu lamah chuan inneih ruai kan ṭheh a, mipui pawh kan tam khawp mai. Chaw ka dawh lai chuan ka ṭawng melh melh a, mahse ka hnungah Ruata a ding reng emaw ka tih laiin pu Muanawma zawk lek a lo ni a, a hmel hmu lo ila chuan ka la ṭawng char char ang ka ring. Min nuih suk a, nuih lêt zeuhin Ruata hmel ka zawng ru deuh a, ka hmu mai lo zui. Chaw nen ka inkeng bâwr ṭûn tawh si a, mi kalna ka dip dâwn bawk nen ka kal sawn ta ringawt a, pu Muanawma chuan a kalna lamah min thlek khum zeuh a, zui turin min signal tih pawh ka hria. Ding reng thei ka ni bawk si lo, a ṭhutna bulah ka ṭhu ve ta ringawt a, kan la inbe miah lo thung. Ngawi rengin chaw chu kan ei dun mial mial a, ka ei tui phian leh nghal.

"Nangni engtik nge in tih ve dâwn a?" min en miah lo va, a thlenga chaw chu a bâr zawm zat bawk.

"I sawi awmzia ka hre miah lo Sir" a zawhna chuan min tibo hû tak tak.

"In inneih ve hun tur maw le" a tih leh tâkah chuan ka hrethiam ve chiah.

"Chuti ang engmah a awm hleinem, nangni zawk Sir? Education Department-a mi nen khan ka ring ve ringawt a, mahse nang chu i luck lutuk a" nêl tak chuan ka ti a, kum 2 leh tih kan thawkho ve tawh a, nêl tur pawh ka ni ve tawh alawm le. 

"Nupui ka neih hun chu mak i ti ngawt ang" min en chung hian a ti ve mai a, a nui tawi suk a, a bula awm chu nuam ka va ti ru si ém.

"Thlah i ngai ang em? Nge i ṭhianpa khan a thlah dawn che?" chaw kan ei kham ve ve tawh a, kut kan sil dun a, ei tur siam ho chuan pu Muanawma an rawn en leh zawk zawk ṭhin a, an rilru awm ang tur ka hre nghal. 

"Min thlah tur kha chuan ka ti ngei a, khaw'nge maw a awm le, min thlah tur thu amah paw'n a sawi ngei alawm" ka tih chuan

"Ka thlah thei reng che a nia, phur tur ka nei lo" a rawn ti nghal a, a kut thing zeuh zeuhin a kekawr iptê aṭang chuan rawmawl a phawrh a, kei pawh chuti tho. 

"Ngai lo mai rawh se Sir" ka ṭawng zawh rualin a bu nghat a, a inher zui nghal a, a car dahna lamah a kal phei ta nal nal.

Ruata chu ka ngaichang deuh vang vang a, vawi hnih lai chu ka call tawh, mahse a ring ral ṭhak ṭhak a, ka hrethiam lo kher mai. Ka hawsan chuan min lo zawng leh si ang tih ka hlau deuh tho bawk si, awm dan tur min tihre lo khawp. Dar zat ka en a, dar 4 leh a chanve a ri dâwn tawh a, two wheeler taxi emaw taxi pangngai hman mai chu ka duh ta zawk a ni. Ruata lakah chuan ka lungawi lo ve reng, a hnathawh ngaihtuah phei chuan a hawihhawm lo lam hret chu a ni. Min hruai haw a tum thu kha a sawi lâwk vek bawk si a, a hman leh lo thut pawh ni ta se phone a awm reng a, min hrilh thei reng alawm, mahse ka phone pawh a lá thei lo. Ka bialpa chu a ni miah lo, ka ṭhianpa ve mai a ni a, kan inah pawh zanah a rawn lêng ṭhin, chuti ang khawp chuan kan innêl ve tawh a, mahse tun ṭum zet chu a lakah ka lungawi lo tak zet.

"Lo lut la" kawngpui sir ka din laiin ka bul lawkah car vâr hi a rawn ding a, a chhung aṭanga min rawn betu chu pu Muanawma a ni a, mak ka ti ang reng, a haw daih tawh emaw ka ti zawk. 

"I la haw na nge Sir?" ka tih chuan

"Min hnial lovin lo lut rawh" a tih zawm daih thung a, luh loh hram ka tum deuh ren rawn a, mahse ka lut ta tho. 

"Ka lawm e" ka ṭhut luh hnu chuan ka ti sep a, tlan chhuak nghal mai lo hian min rawn en a, awm dan tur hriat a har, min en rei phian bawk si. 

"I ṭhianpa chu a va tiho ve le" tih leh hawi sawn a rual a, engmah ka la sawi miah si lo va, engtin nge Ruata awm dan chu a hriat theih ka hre lo. 

"A buai a ni ang ka ring, i haw daih tawh emaw ka tia Sir, tihtur dang i nei thut em ni?" ka tih chuan

"Haw ka tum kha a nia, mahse ka haw thei lo chu a nih hi!" a ti sup a, a aw dam dap ṭhin kha hriat tur a awm rih lo va, hriat nuam lo erawh a ni chuang lo, ka bengah chuan a pangngai khawp.

"A nih chû" chu thu bak chu sawi tur vak ka hre lo, ani lah a ngawi reng tawh bawk si a, kan in kawt thleng min thlah ngei ka ring. 

Inbe miah lovin kan chuang char char a, traffic a jam zeuh zeuh a, Ruata laka ka lungawi loh rukna pawh a reh tial tial a, pu Muanawma bula ka awm vang a ni ang, ni lo se chu Ruata awm dan teh thut avang chuan tu hmeichhia mah an lungawi theih bik a rinawm loh, ka ring lo a ni. Sawi tur awm lo lutuk chu ka phone ka khawih ta ringawt a, pu Muanawma erawh motor khalh zawk a ni a, a rilru a pe viau a ni mahna le. Tin, ni dang a ang lo ka ti, mi ṭawngmawh ni miah si lo kha mi ṭawngmawh tak ang maiin a ngawi run a, lungawi lohna nei hmel a puin ka hre hial. Sikulpuikawn kan thleng a, traffic a lo jam nasa ang reng viau a, kan chuan tirh ata tawh inbe mang lova kan awm tlawk tlawk chu ka awm thiam lo, hrehawm ti em em lo mah ila nuam erawh ka ti bawk chuang si lo. A lam ka hawi phei leh zauh ṭhin a, titi vawrh tur ka hre mai bik si lo va, kan vêng kan tlan luh lai te chuan kan la inbe chuang lo cheu a nih chu! 

"Ka lawm hle mai Sir, a nih ka chhuk phawt mai ang, mut tui le" kan in kawtah kan ding tawh a, chhuk tuma ka chet rual chuan

"La kal rih lo lawk teh" tiin ka bânah a rawn chelh a, ka hawi lêt rang khawp mai. 

"Ka thup rei tawh mah mah a ni" a ngawih vang hnua a thu rawn sawi awmzia chu pakhat mah ka hre lo. 

"Ngaihzawng i neih leh neih loh min hrilh chiang teh" a ti leh ringawt a, a awm dan chuan min tihamhaih vel vek. 

"Sir" ti sepin a hmel chu ka en chiang hle a, mahse ka zâm ru em em thung. 

"Ka zawhna kha han chhang teh le" dam dap hian a ti leh ang lawi a, ka hrethiam lo tulh tulh, ka bân a chelhna te chuan min tizâm zual lutuk a, ka thisen kal lai te chu a ding mai dâwnin ka hria. 

"Eng lo...engati nge?" chuti anga ṭawng chhuah chu ka tum hauh lo, chutah min la rawn ṭhut hnaih sauh zui!

"Ka hre duh" hniam ruiha a tih chuan a thaw rimtui tak chu ka hip lut chiang kher mai, min en hnaiin min en chiang ropui si, ka va'n zâm teh lûl êm.

"Nei lo" ka ti thawp sep a, ka mita en tawh lovin ka hmui lam a en ta ngar ngar a, tawi têa nui suk hian a ṭhut dan a siam rem a, thutak hmel a pu tawh miah lo bawk.

"A ṭha e, ka awm a nuam huai mai" min rawn nuih leh suk a, a nui hmel mawi zet chu ka hmu ning thei lo, ka mitah chuan khawvela mipa nui mawi ber a ni. 

"I duh chuan i lut thei ang, a nih loh paw'n kan la inphur kual thei tho bawk. Hre lâwk la ka duh chu ka che thuai thuai mai thei a nia, i laka ka rilru puthmang dik tak hi ka thup rei ta mah mah a ni" a tih zawm leh nghal a, tunah chuan a sawi awmzia ka hre chiang tawh khawp. 

"Sir" tih bak sawi tur mumal pawh ka rilruah a awm thei rih lo, ka kut lá kángin a châng bul chu a hmuiin a fawp a nih chu maw le, electric man ang mai hian ka mur chhuak vek a, ka sa pup pup bawk.

"Lut rawh le, zanah ka lo bia ang che" a awm dan a siam ṭha zui nghal a, kei erawh ka laka a awm dan avang chuan chêt nachang ka la hre lo ta cheu!

"I chhuak lo a nih chuan kha i hmui, khawizû ang maia thlum tui hmel; fawh châk avanga ka suangtuaha fô ṭhin ngei mai kha ka hma lawkah a awm ta reng si a, ka insum thei lo mai ang Amte" chutah zet zawng ka har chhuak chiang ta khawp mai. 

Rang takin car aṭang chuan ka chhuk thuai thuai a, hawi lêt pawh ka hawi lêt tawh lo. Kan in kawngka te chu ka hawng ri rawk a, ka room-ah ka lut zui nghal a, eng thil chiah nge thleng zo chiah kha hriat loh der ka tum ṭalh a, mahse a tak ngei a ni bawk si. Ka kut chu ka en tlawk tlawk a, engati nge pu Muanawma khan a fawh ringawt le? A hmuiin ka taksa a si chiah kha chu awihawm loh khawpa nasain ka danglam hman kha a nia, eng vanga ti nge a nih? Ni lo, ka awih lo, a ni lo ang, ani khan min duh ka ring lo, mahse engati nge a ṭawngkam tin mai kha ka tâna inngaihbel awl em em a nih vek si? Ka hmui, he ka hmui ve mai hi, fawh châknaa khatin a lo suangtuah ṭhin maw!? Awih loh ringawt dâwn ila amah ngeiin hmaichhanah min hrilh zo chiah bawk si, ngaihtuahna fim tak put a va harsa êm.

Ka chhungte'n zanriah an ei lai te chuan ka mumal thei reng reng lo va, tlaia thil thleng khan keimahah hna a la thawk reng a, ka tihtawp theih a ni paw'n ka hre lo. Zanriah ei kham hnu rei lo tê ah Ruata a rawn lêng a, mak tak maiin ka rilruah lungawi lohna pakhat mah a awm tawh miah lo a nih chu! A chhan erawh ka hre chiang khawp mai, Ruata min biakna te chhang ṭhin mah ila ka rilru chu hmun dangah a awm daih thung a, tlaia thil thleng hlir ka ngaihtuahnaah a awm ngut ngut a, paih chhuah pawh ka tum chuang lo, pu Muanawman khang thu zawng zawng ka hnena a sawi chhan dik tak kha ka hre châk a ni. Tun atân chuan rin thu mai chauh a la ni a, nge ani hian a rukin ka duh tih a lo hre zawk ni ang le, a hriat vaih chuan a chi loh khawp ang. Eng pawh chu ni se ka kut a fawp zet kha zawng a hmui nêmzia leh sik nawmzia kha ka feel hman vek a, ka mur chhuak nasa em em bawk a nih kha! 

Ruata chu a ṭawng duh mawlh mawlh hle a, tlaia a kal bo thut avangin thuphate pawh a chawi hnuhnawh nghe nghe a, ka engah vak mah a thawk lem lo. Ka nuih liampui mai a, a lehpek a awm tawh loh tur thute a sawi a, dâr 9 leh a chanve velah a haw a, duh ai chuan a rawn lêng zing mah mah ka ti, a haw hnuah Thesis lam buaipui ka ngai leh ṭhin tho bawk si. Khumah ṭhuin Laptop nen ka awm leh ta ran a, Pathianin rem a tih chuan kum thar lamah Doctorate degree ka nei thei tawh dâwn a, ka Thesis ziah mêk pawh a hmawr bawk lam ka hnaih zo ve zel a, ka fimkhur em em bawk. Tin, final presentation ka neih dan tur thlengin ka inenlâwk ṭan a, ka theihtawp ka chhuah chuan ka hria. Message tone a rawn ri zeuh a, message lo thawntu chu tu dang ni lovin pu Muanawma ngei a ni. 

"I buai em?" khang kum liam ta chhung zawng khan vawi khata chhiar zawh nghal theih mai tur hlir hi a rawn thawn ṭhin a, tunah pawh a ni leh chiah. 

"Buai hran lo ve, eng nge ni ta Sir?" tlaia thil thleng avang khan chhan loh ka tum deuh na a, mahse ka chhang ta tho. 

"Hnathawhna a nih loh chuan 'Sir' min ti suh" a hmel hmu ila chu a nuih suk ka ring, a hmel tur awm ang ka mitthla thei hial. 

"I la mu lo ti raw?" a message ka dawn rual deuh thaw chuan 

"La mu lo ve" tiin ka chhang nghal a, ka awm dan leh ka chhan lêt dan hrim hrim chu a hrethiam ang tih ka hlau, min hriat chhuah vaih chuan ka tân a zakthlak dâwn lutuk, insum deuh ka ngai a ni.

"Ka lo kal lawk dâwn" a message chu ka seen nghal lo va, a tawi êm avangin ka open rih lo, mahse ka chhiar thei vek tho.

"A chi loh Sir" ka chhan lêt aṭanga rei lo tê hnuah chuan

"Sir min ti tawh suh ka tih khâ" tih hi ka dawng zui nghal a, lo kal pawh ni se eng nge tih a tum reng reng, tun ang zan rei tawhah leh nghal.

"Ka lo kal aw" chu chu a message ka dawn hnuhnun ber a ni a, awm dan tur min tithiam lo kher mai.

"Lo kal lo mai rawh, ka mu tawh dâwn a" tia ka thawn pawh a hmu tawh lo va, chhan lêtna pakhat mah ka dawng tawh lo bawk a, a lo kal tak tak a ni ngei ang. 

Ka pate chu an la meng ṭhap a, mahse anmahni room-ah an awm thung. Sitting room-ah keimahin ka ṭhu ngawi reng a, dâr 10 a pel tawh a, pu Muanawma chuan min tibuai ru tak zet. Lo kal ta se eng nge a lo tih dâwn? Tlaiah lah khan khati ang thu kha a sawi hmiah mai bawk si, min lo duh ve reng a nih rinna te ka nei dâwn ṭhin a, a nih loh ka ring leh lawi a, ngaihtuahna sen dan tur ka hre lo a ni. Engtia lo hmachhawn tur nge tih thlengin ka hre lo, nge ani hian khang kum 2 chhung zawng khan ka lo duh ru tawh tih a hre chhuak zawk emaw ni le? Ni lo, chung ém chu a ni lo ang. Hrilhtu an awm te a nih ngawt loh chuan a hriat ka ring lo, a rukin ka duh em em tih ka ṭhiante panga bakin an hre lo va, anniho phei chuan pu Muanawma an nêl lo vek leh nghal, a nêl ber Nunui ni se min duhpui der lo a nih kha! A hriat ka ring leh lo, thil dang vanga lo kal a nih zawk ka ring. 

"Pâwnah ka awm" a message ka chhiar lai chuan

"Ka rei lo ang" tih hi a lo thawn leh nghal a, ka phone chu hmet thimin ka ngawi vang vang a, ka ngaihtuahna a buai a ni. 

"Nge ka lo lut zâwk dâwn?" ka phone nghawr dat ka en rualin chu zawhna chu ka hmu nghal a, ka hrethiam lo, a hmanhmawh viauna chhan chu ka hrethiam lo.

Thawm dim takin kawngkapui ka hawng riai riai a, ka khar zâwngte chuan ka dim hle bawk. Kan in kawta motor ding chu pu Muanawma car a ni tih ka hre nghal mai a, car chhung lam light a on chuan a hmel ka zui nghal bawk. A lûin min thlek khum zeuh a, car chhunga ṭhu lut turin min duh ni maiin ka hria. Kal phei mai ka tum a, mahse ka inngaihtuah chiang hman hlauh a, in chhungah ka lut leh ta daih zawk. Ni e, va kal ta ringawt ila, a car chhungah khan va chuang ta ringawt ila chuan min ngaihdan a dang vek ang, min ngainep sawt dâwn tih ka chiang. Ka duh ngei alawm, hmelṭha ka ti a, ka duh lutuk tak zet bawk, mahse zahawmna ka nei ve a, chu ka zahawmna chu ka awm dan azirin a pung thei a, a chhe thei bawk, chung thil ka ngaihtuah chhuah avanga lut leh ta daih pawh chu ka ni. 

"Ka hmu hrim hrim che a, a ṭha tho e" ka room-a ka luh hnu chuan a message ka dawng nghal a, mahse ka open duh tawh rih lo thung. 

"Naktukah kan inhmu dâwn nia, mut tui le" tih hi a lo thawn leh a, ka chhiar zawh rualin ka mit ka chhing vang vang a, min duh ni theiin ka hre lo tulh tulh, a chhan chu ngaihzawng nei lai a ni tlat. 

Zingah chuan ka tho hma em em hran lo va, u Mapui a insuk laiin kei leh u Chhanin ei rawng kan bâwl a, u Maruata leh u Remzelan tui pipe an buaipui mawlh mawlh bawk a, tui a lo haw tuk hi chuan kan buai thei khawp mai. Ka pa erawh a lêng chhuak rihin ka hria, ka nu ve thung chuan a túte a awmpui a, choka aṭangin an ṭawng thawm pawh kan hre pha reng. Ei rawng kan bâwl zo va, naupang school kal a lo hun a, keini pawh kan hna kal a hnai ṭan a, tukṭhuan kan ei zui nghal mai bawk. Ka pa min leisak scooty hmangin MZU kawng lamah ka inkhalh chhuak a, thla eng emaw chhung kha chu ka khalh ngam lo va, ka inrintâwk loh vang a ni pakhat. Kawng leh lam zâwng tak chuan a ṭha phian ka ti, Nunui tihbuai reng a ngaih loh phah a, ka khalh thiamna a la rei lo bawk nen mi pawh ka la phur ngam vak lo hrim hrim; ka phur ngam awmchhun chu Nunui a ni mai.

Department floor ka thlen chuan common room a lo inhawng huau tawh a, mahse tûmah ka hmu lo thung. Ka office lamah ka phei ve leh mai a, ka office kawngka bula lo ding reng hmel ka hmuh rual chuan ka ding chawt a, ka thawm a hria a ni mahna a lo hawi phei a, mit lá sawn miah lova min en chung hian a lo kal phei zel a, en pawh ka en rei duh lo. Ka hma zawna a din chuan a âwm chu ka melh ngat ngat a, a pa tê chhe lo bawk a, a koki ka pél vel ṭawk a, tunah tak chuan a hmel ka en ngam lo hrim hrim bawk. Kal tuma ka chet rualin ka bánah a chelh chat a, ka kut chu ka hum ruh ngei mai. Chutah a kut leh lam zawk chuan ka khabe a rawn chawi a, chiang lutuk tak maiin kan inmelh ta.

"Nizan avang khan i mi hriatthiamna ka dil e, a thleng nawn tawh lo ang. Khawiah emaw kal lawk ang, thil sawipui duh che ka nei" tih leh min pawh kal a rual nghal a, lift-ah min kai lut a, buidling chung zâwlah min hruai chho daih a, kei erawh a tih ang ângin ka lo awm tawp ringawt. 

"Min en teh le" dam dapa a tih chuan ngampa lutuk lovin ka melh chho ral a, ka mitah chuan engtik lai pawhin a hmelṭha ni maiin ka hre tawh. 

"Ka duh che tih hi i hria em? I laka ka awm dan leh ka ṭawng dan thleng hian ka duhna che hi thup ka tum ṭhin a, mahse tunah chuan ka tum tawh lo" mak tihna hlirin ka khat a, a thusawi zawh chiah chu ka tân chuan awih a harsa lam hret a ni. 

"Nang pawh hian min ngaina tih chu ka hai lo" a tih leh chuan ka rilru zawng zawng, a ruka kum hnih tal tawp ka lo duh rukna zawng zawng kha a hre chhuak ta nge nge niin ka hria. 

"Min ngainat dan erawh thawhpui satliah ang maiin ka hre thung a, mahse chu chu ka duh lo, kei chuan thawhpui satliah angin ka en thei tawh lo che Amte" a aw chu a hniam fiah ruih a, a thaw rimtui tak nen lam ka hip lut chiang hle bawk.

"Sir...eng lo...kan awm dan hi a ṭha miah lo" ka ti thawp sep a, a mita en ngam tawh lovin a hnarah ka tawlh thla a, a hmuiah ka tawlh thla leh a, chutah erawh ka mit ka lá sawn thei ta meuh lo.

"Sir" ka aw chu a chhuak mang lo zâwk, a rawn kun hniam tial tial a, tu mipa mahin an la sik ngai loh ka hmui chu a hmui lúm leh nêm zet chuan a rawn fawp a nih chu! 

Ka meng káwk a, a vawi khatna a nih vang a ni mai thei, ka dawh mawl tawp a, ka meng kur laiin ani erawh a maimitchhing thung a, a thil tih chu ka beisei ngam loh leh beisei phak loh thil a ni miau a, awm dan tur ka thiam lo tak zet. Ngawi reng hian a inlahrang a, a chalin ka chal a rawn nawr zawm zat a, a thaw rimtui tak mawlh chuan tur ang maiin ka taksa chhung a fan kual vekin ka hria. A hnapthlenga hmul awm ṭhin ni awm tak mah se ziah fai vek tawh ni si thlâ langte chu ka en ngawt ngawt a, en tur dang awm hek lo.

"Ka duhzia che hi i hrethiam si lo, i engkim hi ka duh; ka hmuh tirh phat aṭang che khan" tih leh supin a vawi hnihna atân min fawp nawn leh a, a hmui tihchet dan vel chuan ngaihtuahna mumal min puttir thei tawh lo a ni ber.

Bangah min nawr bet titih a, a kut pahnih hnih chuan ka biang tawn tawnah a chelh a, min fawh dan chu ka rin phak bak a ni. Chuti ang tak chuan infawh a nawm ka ring ngai lo, nge ka vawi khatna a nih vang zâwk? Ni lo, a vawi hnihna a ni. 

"Ka ta ni rawh, ka ta ni mawlh rawh" ka chal rawn sik paha a tih lai chuan ka lo thaw hlawi hlawi a, ani pawh a thawk dan a rang ve thovin ka hria. 

"Ka thei lo" ti sepin a âwmah ka nam a, a lo awm sawn ve mai a, kan thil tih zawh chiah chuan ka taksaah nghawng a la nei nasa hle. 

"Engati nge?" tih leh banga min nawr beh a rual nghal a, a aw chu a ram mah mah bawk, amah a ang lo.

"Sawi teh le, kan pahniha kan inkawp theihna tur a nih chuan kawng dang pawh ka dap mai ang. Min hrilh rawh, engati nge i theih loh?" ka dar tawn tawna hmer chung hian a ti a, min en chiang hle bawk. 

"Ka hre lo" ka ti leh ang lawi a, a chhan sawi tur ka hre lo tak tak alawm, hria ni ila chuan ka sawi chiang khawp ang. 

"I zâm mah mah a ni lo maw Amte, i duhawm tak zet bawk" nui suk pah hian a ti a, ka hmuiah bawk a rawn fawh leh a tum a, ka lo nam sawn thuai thung. 

In hnuai lamah ka pen thla hlawk hlawk a, step-a ka kal te chu ka tlu lo chauh a, hmanhmawh tak ka ni. Common room-ah pawh lut kawi tawh lovin ka office-ah ka phei tlang nghal a, ka dawhkan bula ka ṭhut thlâk rualin ka indawm kun zui nghal a, ka ngaihtuahna chu a vak kual nasa hle bawk. First period ka neih avangin tlêma inenlâwk ka tum kha a nia, ka rilruah inenlâwk lam réng a lang thei tawh rih lo. Washroom-ah ka lut a, ka hmai ka phih leh ringawt a, darthlalang hmaah dingin ka hmel hmu mah ila a lang rei lo, chiang tak hian pu Muanawma, kan HOD nena kan infawp ngawng ngawng lai chu ka hmu chhunzawm daih a, a lan dan chuan inngaizawngte pawh kan ang mah zawk, mahse kan inngaizawng der si lo. Darthlalang chu ka va khawih a, a bo ve leh mai a, ka mitthlaah erawh ka thil tawn zawh chiah chu a la awm reng thung.

Rilru mumal lo zetin class chu ka la ta tho va, ka duh dan tak phei chuan haw daih ka châk, ka mood a fuh lo pawh a ni lo, ka awm dan a danglam nasa lutuk a, amah pu Muanawma berin ka danglam tih a hria ang tih ka hlau a ni. Lunch Break-ah pawh ka chhuak lo hrim hrim a, ka ril ṭam leh ṭam loh tak ngial pawh ka hre thei lo a nih chu! Ni e, a áwm lutuk, ka rilru a buai êm a ni. Khati ang khawpa chiang khan min duh thu a sawi a, ka awih ang nge awih lo vang tih erawh ka rilru tibuai bertu pakhat a ni tlat si a ni. Ka ṭhiante thurâwn zawng zawng ka ngaihtuah chhuak kher bawk nen min duh thu a sawi hnu lawka kan infawp ringawt te chu ka ngai dik lo vek a, awlsam taka min fawh nghal theih avangin keimah leh keimah ka inngainep a, amah pawh ka ngai lerh nghal vek ve tho bawk.

Bán a rawn hun a, a hmuh hmain ka tlan haw daih a, mahse Nunuin ka ruala haw a duh thu a sawi avangin park bulah ka ding a, chutah chiah chuan pu Muanawma chu ka rin ang a nih lohzia ka hre ve chiah. Education Department-a an professor pakhat nen bawk inngaizawng tih hriat tak hian an inbia a, an nui dun a, a hmeichhia zawk chuan a kuah leh thuak thuak ṭhin a, pu Muanawma ni se a haw lo tih a hriat si, ka piah lawka ka mipa duh ruk em em leh a ngaihzawngnu hlim thawm chuan min tinâ vawng vawng thei. Nunuin ka hminga min koh tâkah chuan ka hawi sawn ve thei ta chauh a, pu Muanawma te lam ka haw leh a, a bula mi biakna pawh ngaihsak tawh lo ang mai hian min lo en reng a, muangchang lo fê hian ka dinna lamah a rawn phei pawk pawk zui nghal a, kei pawh ka khawmuang duh bik der lo.

"Tihtur ka nei a nia, lo chuang hmanhmawh la" ka ti thuai thuai a, Nunui chu ka rilru engmah hrethiam tih takah a lo chuang ve nghal mai bawk a, Main Gate kan tlan pelh dâwna pu Munawman

"Amte" tia min kohna ri chu ka hre pha reng a, hre lo ang hmakin ka hawi lêt eih lo va, zing lamah min duh thu a sawi zuah zuah a, min fawp bawk a, engtin nge a fawhna te kha dawnsawn nuam ka lo tih em em theih zâwk? Engtin nge ngaihzawng nei lai a ni tih ka theihnghilh theih zâwk reng reng ni! Mawl leh lutuk! 

"Pu Muanawma kha engati nge? Biak duhna che a nei a ni lo máw, nang lah chu i ding duh bawk si lo" Nunui thil sawi chu chhan ka tum teuh lo, a duh dûh sawi rawh se, tunah tak chuan ka rilru a nâ a, ṭawng pawh ka ṭawng peih rih lo a ni.

"Eng thil chiah nge i tawn a Lal Am? Thinrim i ang si, min hrilh teh?" Ramrikawn Traffic Point kan thlen dâwn lai tak chuan a rawn ti leh a, ka la ngawi reng tho. 

"Min hrilh mai mai teh Ami, heti ang hian tlai dangah i awm ngai miah lo" ka dar chum zeuha a tih leh nghal chuan ka thaw hak a, engkim chu hrilh ila a fuh zawk ka ring. 

"Pu Muanawma kha maw le" ka ṭawng rin loh tehreng nen a rawn hre rang khawp.

"Pu Muanawma chu engtin? Ani nen khan in inkarah eng emaw ni a awm chiang ti raw? Zep miah suh Lal Am, nichina a lo ko che kha mak ka ti reng a ni" a ti mawlh mawlh a, kei pawh ka ngawi reng thei tawh bik lo. 

"Zing lamah min duh thu a sawi a, ka mawl tak zet Nunu, ngaihzawng nei lai a ni tih theihnghilh ṭhak khawpin kan infawp vel a nih chu! Mawl ka intihnuhnawh lutuk, in sawi dik chiah, a lo lerh ngei e" thinrim ru tak chuan ka ti ve ta hmawk hmawk a, chutah Nunui chuan zawi vak lo hian

"Pu Muanawma nen in infawp maw!? Awi, nangni hi in lo inngaizawng tawh reng zawk a ni lo máw?" a rawn ti nghal ringawt a, ka ngaihdan a ni lo nasa mai. 

"A teuh lo, kan inngaizawng lo hrim hrim, chu vang alawm kan lo infawp hman thawt thawt kha ka thin a rim hnuhnawh em em" ka ti hluai a, ka thaw leh halh ṭhin bawk. 

"Ngeiin a lakah thinrim ve mah ila thinrim thei ka ni miah lo, min fawhna ka lo dawngsawng ṭha em em te kha ka thiam loh vek zâwk a ni. Kan infawh lai kha chuan khati ang tak khan infawh a nawm ka ring pha ngai lo, tunah chuan min zuam sawt ngei ang. A va'n pawi tak, a thusawi zawng zawng kha ka ring pumhlum hman ṭep leh nghal" ngaihtuah zui vawng vawng pah chuan ka ti leh a, ka ṭawng tawp lam erawh ka aw a zuai raih thung. 

"Mipa dang hmu zo lo pawh i ni hleinem, pu Muanawma hi chu duh loh daih tum rawh, a thu hrimah i hmu hne ve tawh lo em ni? In thawkho reng bawk si, bansan daih rawh" Nunui ṭawng dan pawh a pangngai ta viau. 

"Ni e, bansan daih ila a ṭha zawk tak ang?" ka ti sep a, ka hnunga mi chuan a rawn hre pha lo mai thei, a hriat paw'n a hre kim lo tal emaw a ni ang, ka ṭawng zawi êm mai.

Zanah chuan ka beisei loh lutukin thil a thleng a, pu Muanawma kan inah a lo lêng a nih chu! Ka chhungte bulah chuan kei nena hna thawkho kan nih thu a sawi a, ka pa nen pawh an titi dun thei viau nghal a, thingpui siam laiin u Mapuiin a chanchin min zawh thuk a tum a, kei lah ka lo hre bik lo nasa, chu bakah ka sawi peih lo. U Chhani zawkin kum kal taa Central YMA President a lo nih tawh thu a hre thung a, TV-ah emaw social media aṭangin a hmu a nih ka ring. Thingpui ka sem lai te chuan min en chik em em a, ka mit sirin ka hmu ru reng, mahse hmu ang paw'n ka awm duh chuang lo. Engtin pawh min bia se ṭha taka chhan leh a thawhpui anga awm tlat ka tum a ngai a ni mai, Nunui sawi kha a dik ang, ka rilru chhungril dik tak a hriat hmain bansan ila, min duh thu sawi mah se ka ring thei rih lo, ngaihzawng nei lai a ni leh nghal. 

"Vawiina ka thusawi zawng zawng kha dawt a awm lo, i laka ka rilru puthmang dik tak a ni" ka kal sawn tur ka bána chelhin a ti nghet charh a, thlah tur ka lo chhuak kher kher chu ka inchhir hnuhnawh leh ta. 

"Ngaihzawng nei lai ni chunga khang thu zawng zawng i sawi thei kha a mak ka ti" ka ṭawngkam chu a tân hriat a nuam viau lo mai thei a ni. 

"Tu nge ngaihzawng ka nei ti a?" a zawhna chhang lovin ka ngawi reng a, chutah amah bawk chuan

"Khang hri lên chhung zawng khan ka ngaihtuah reng ṭhin che, a chhan chu ka duh tlat che a, ka ta ni la ka duh bawk, mahse kan hun tawnin a zir lo va, thup hram ka tum mai bakah sawina hun ka nei thei lo mai chauh a ni" a rawn ti leh a, a thutak hmel khawp mai. 

"Min hrethiam teh, kha i hmui fawh châkawm tak mai kha ka hmuh zin pôh leh ka insum theihna a bo zo mai dawnin ka hria" tih leh a lam hnaih zawnga min pawh phei a rual a, a vawi thumna atân min fawp leh ta, engati nge ami fawhna chu ka hnar theih miah lo le, hnar a hnêkin ka dawngsawng ṭha em em zawk chu a nia!

(End of Chapter 4)