PU MUANAWMA By Havali Adam (CHAPTER 3)

                                 PU MUANAWMA

                                    (Dear Crush)

                                           By 

                                   Havali Adam

                                      Chapter 3

Zirtawpni a ni a, class pawh kan bâng hma hle a, Nunui ruala haw tur ka nih avangin ka hmanhmawh em em hran lo. Khami nî, pu Muanawman min thlah haw nî aṭang khan kâr thum vel chu a liam leh tawh a, phaiah a zin daih a, kâr thum ngawt chu kan inhmu tawh lo. Dik tak chuan ngaihtuah veng veng loh te, a hmel mitthla loh te, vei loh te, a laka ka rilru puthmang hrim hrim chu thlak ka tum ṭhin, thlak ka duh vang pawh a ni lo, awmzia a awm dawn lo tih ka hriat chian avangin a laka ka rilru puthmang chu thlak ka duh zawk a ni. Ka tum ve tak ná a, ka tum rei thei lo, ka phal lo a ni ber. Ka duh tih chiang takin ka hre tawh a, ka thawhpuite'n an hria ang tih erawh ka hlau hle thung. An hriat vaih chuan ka mualpho khawp ang, ka mipa duh hmasak ber chu kan HOD pu Muanawma a ni tlawt bawk si a, ka duh lûatah a kum lam réng ka rilruah a lang thei lo a ni e.

Thla tawpah chuan a zin pawh a lo haw tawh a, T-shirt nghawng nei kawrkilh awm hi a rawn ha a, a chung ber tih loh a kilh vek a, ama'n min hmu lo hlauh zawk a, ka tum ai ka lo en rei leh ṭhin. Min be chuang lo hian min nuih suk a, miss Ruth-i nen an inbe daih a, documents eng eng emaw ni an siam dun a, kâr hmasa lawk aṭang khan guest lecturer te room-a awm phei ka ching ṭan a, common room a ni hrim hrim a, mahni chauha awm ai chuan a nuam daih zawk. Chu bakah ka office chhung a vawt mah mah lam a ni a, kan department hmunhmâ vel a dám bawk nen a vawt lek lek ṭhin. Guest lecturer te nen kan titi siam siam a, pu Muanawma chu ka va mitmei leh zauh ṭhin a, vawi khat erawh a lam ka hawi lai tak hian min lo en reng a, nui tawi sakin ka hawi sawn a, chiang deuha min en tawh hi chuan ka thin phu a rang thei khawp mai.

"Miss, hei i cofee hi a dai dawn a nia" miss Ruth-i lam chu ka hawi phei a, pu Muanawma nen an awm dun tawh lo tho bawk a, coffee in tur chuan ka phei zui nghal.

"Chapchar kut hman dan tur te kan lo rêl lâwk a" a bula ka ṭhut thlak rualin a lo ti a, ka ngaihtuah chiang a, Chapchar kut kan lo hnaih ve ta hle tih ka hre chhuak nghal. 

"Hmânah chuan kan HOD nen hian kan inngaizawng ve ṭhin asin, nakinah i la hre dâwn tho va, ka hrilh lâwk mai mai che. A mak i ti ve tho em?" nui sen sen chung hian a rawn ti leh a, mak ka ti viau. 

"A ni maw?" tih bakin ka chhang lo.

"Ni e, mahse kan inṭhen tâkah chuan tun thleng hian ṭhian kan ni chhunzawm ta zel a, kan thawkho bawk nen ṭhian ṭha tak a ni" miss Ruth-i chuan engah mah a ngai tawh lo niin ka hria. 

"Saw....kan sawi chhuak ringawt alawm" a hawina lam ka hawi chuan pu Muanawma ngei mai chu ka hmu nghal a, a kal pâwk pawk a, chhuahna tur a nei a ni ngei ang. 

"Engati nge in inṭhen a Miss? In hmelṭha dun sia, in inhmeh dâwn tehreng nen, ka sawi awmzia chu hmeichhia zawk an hmelṭhat hi chuan mipa hi chu an ngaihdam theih mai" ka va han inpuang chhuak teuh em, a tawp lamah ka khuh mawi thei hram a ni.

"Khang hun lai kha chuan amah zawk khan min duh em em lo alawm, kei lah kha ka rilru a la puitling lo bawk sia, ka thutak ang khan a thutak lem lo khawp, mahse kan inṭhen aṭang khan ṭhian kan ni chho ta char char a, HOD hi chu hmeichhe tam tak tân chuan a la iai awm loh reng maw le, nang eng nge i hmuh dan?" miss Ruth-i thil sawi leh a zawhna chu ka rin loh lam daih a ni.

"HOD angin ka hmu mai, hmuh dan vak ka nei lo" tiin ka nui lui sak a, dawt ka sawi vang a ni ang ka awm thiam lo vek; ka hawiher thlengin a danglam nghal.

"Ka va awih lo ê, kan guest lecturer te pawh hian an star hlawm teh asin, mahse amah ber hi ngaihzawng tih vel a ngaihsak tawh lo lutuk a, star-tu a ngah em em ringawt a nih hi!" a tih chuan a sawi dik ka ring, ngaihzawng lam a ngaihven hmel tawh lo êm mai.

"Tunah hian ngaihzawng i nei reng reng ém?" miss Ruth-i chu ka nuih sen sen a, lu thing náng nang pah hian

"Nei teh nâng, keini te zawng hmel duh leh ngainat nei ve teh mah ila duhtu pawh kan nei ve lo alawm, nangni angin luck ila chuan pasal ka nei daih tawh ang" ka ti lûam a, a rawn nui hak hak a, ka darah a chum taih bawk.

"Mipa tam tak hian an be ngam lo che a ni ang, i hnathawh a sang ve tho sia, mipa ṭhenkhat hi chu an ni châwk a nia, hmelah zawng keini lêtin i ṭha daih zawk. Kei pawh hi pasal ka nei ṭep tawh a nia aw, kan ti deuh thut mai thei a ni" ka nui nghal var var a, a bialpa nen hian vawi tam ka hmu dun ve tawh a, an inhmeh khawp mai. 

"A ṭhat hlauh chu, i Big Day-ah chuan ka inchei mawi khawp ang" tiin ka tho zui nghal a, class lák tur ka neih avangin ka office lamah ka phei a, common room boruak nen chuan a inang lo leh hle. 

Kum bul ṭan deuh chauh kan ni a, ka hna hmuh hun leh ka thawh ṭan hun chu a fuh ka ti ang reng. China ram aṭangin hri hlauhawm tak a darh thu News hrang hrangah kan hmu a, nikum December thla vel aṭang khan thawm neuh neuh chu ka hre tawh a, mahse an sawi ang em ema hlauhawm leh ṭihbaiawm a nih ka ring miah lo kha a nia, rin lo takin a lo hlauhawm khawp mai. China ramah mai ni lo hri chu a kangkâi zel a, a hming pawh COVID-19 a ni a, mit khap kâr leka mihring nunna a suat nasatzia chu pui tak a ni. A darh chhuahna ram China-ah phei chuan an buai luai luai tawh a, ram hran hranah pawh chu hri chuan nunna suatin ro a rel mial mial a, a damdawi emaw a tihdamna lah engmah hmuh chhuah theih a ni rih bawk si lo. France ramah phei chuan China ram lêtin mihring thi an tam zawk emaw tih theih tur khawpin an thi hnem a, chu erawh anmahni pâwng ngam rah niin ka hria. 

Chutah le, India ramah COVID-19 thawm a rawn awm ve ṭan ta, hlauh rukna ka ngah hle a, inkaichhawn a awlsam si, taksa tân a hlauhawm bawk si, Mizoram a lo thleng ve mai ang tih ka hlau. Ram dang leh State dangte chanchin hre reng chungin zirna lam chu kan kalpui zel a, class ṭhenkhatah phei chuan COVID-19 chungchang han sawipui te pawh ka ngah a, an lo hlau ve khawp mai. Thla rei lo tê hnuah North East State lamah hri kai an hmu chho ṭan a, Mizoram erawh kan la him zel rih a, mahse kan him rei tawp lo. Mizoramah COVID-19 hri kai an awm tih kan hre chiah chu a tua te pawh kan fimkhur em em a, sawrkarin lockdown a puang hial a,  ṭul thila khawi ilo chhuahna velah pawh ṭi dâkin ka awm a, hri kâi an awm belh zel leh nghal. A hnu lawkah phei chuan thuneitute'n total lockdown an puang ta hial a, keini pawh kan chawl ṭhap a, mahse online-in class kan lá tho va, exam nen lam online-a kan tih a ngaih hmel. 

Aizawlah lockdown puang mah se thingtlâng lamah erawh an la zalen ang reng viau a, Aizawl ai chuan him deuhin an inhria te pawh a ni mahna. COVID-19 lah chu a darh zual zel mai si a, ka Research lam thlengin a nghawng a, mahse field study neuh neuh ka lo nei hman hlauh a, ka ṭhiante ai chuan ka ti hnem hman zawk hrim hrim ang ka ring. Hri avangin online hmanga class kan lâk a ngai a, Google Meet apps te kan han download chawp a, a buaithlak ka ti. A chhan chu zirlai naupangte'n an ngaihsak tak tak paw'n ka hre lo. Net ni se chhiat châng a tam si, Classroom apps hmangin note kan inpe leh tawp a, an lo zir tawp a, chu chu a ni mai. Tin, pâwn boruak thianghlim tak hip tur a awm tawh rih lo leh in chhunga inkhung ngai reng chu ka ning, ning tak ka ni. Phone leh Laptop ka en hnem lutukna lamah lu a ná bûr a, páwn a chhuah theih bawk si lo.

Chutih rual erawh chuan hri hlauhawm tak lén lai mah ni se thil hlimawm tak tak hmuh tur leh hriat tur a awm nual a, nuihna tur a tam ṭhin khawp mai. Cháltlâng lama mi lêng ṭhenkhat phei chu Information mic hmang te'n an inko haw lâwp lawp a, ka hlimpui rualin pu Muanawma bawk ka hre chhuak leh tawh. Chàltlâng vêng a ni tlat a, an vêng hming ka hriat tawh hi chuan amah ka hre chhuak lo thei lo. Zan lamah hian professor ho bikin meeting kan nei leh zauh ṭhin a, zirtirna kan pek dan turah te thil kan sawiho nasa thei hle a, pu Muanawma bawk chuan sawi tur dik a hre leh ta a ni. Professor a ni bawk a, a thusawi reng reng chu a dik vel vek a, ngaihtuah chian pôh leh a dikzia kan hre thar áwn awn ṭhin. Tin, a hmel a chhe lo lehpek ṭhin hle. T-shirt nghawng bial mai mai pawh ha se a inhmeh em em zel a, a hmelṭhat mai bakah a fai sár zel bawk si, ka va'n duh ngawih ngawih tak.

Zan khat phei chu dar 9 hnu lamah meeting a rawt a, pu berin a rawt miau chuan hnial theih ni hek lo. Exam dan tur te, zirna kalpui dan tur te a sawi diat diat a, ruahmanna a siam fel vek tawh zawk hi a lo a ni a, a thusawi ngaithlain hre vek tho mah ila a hmel chuan ka mit a la ber leh daih. A sam chu tuai mám ṭhat loh tih hriat deuh hian a ro deuh halh a, mumal lo takin a awm nuaih a, mahse ka mitah chuan a inhmeh hliah hliah tho. A ṭawng mial mial lai chuan hmeichhe pakhat hian a dawhkanah in tur a lo chhawpsak a, kei tih loh professor dangte paw'n an hmu ve vek a, keimah berin rilru dang ka pu leh hman bik tlat tawh a nih chu! 

A dik alawm, ka rilru hmun dangah a awm daih tak tak, a chhan chu thingpui petu chuan a hnung lam aṭangin a en zui vawng vawng a, chu nu mitah chuan pu Muanawma a duh rukzia leh hmelṭha a tihzia ka hmu vek thei, chu chu ka lo thik vel a nia, pu Muanawma laka ka rilru puthmang mi dangin hre ngat phei se chu mak an tih ai mahin min hmuh dan a dang nghal vek ang ka ring. Dar 10 velah meeting chu kan titawp a, ka mitthlaah erawh a châm zui reng a, a T-shirt hak te nen lam fiah takin ka hmu thei a, awihawm loh khawpa nasain ka duh tawh tak zet a ni. Kum 30 ka hnaih ve tawh a, chuti chung chuan ngaihzawng emaw pawh ka la nei ngai miah lo va, ka ngaihtuah ngai loh lutuk vang a ni pakhat. A dang leh chu ka mipa hmelṭha tih zawng leh duh zawng ka hmuh loh vang a ni leh a, pu Muanawma ka hmuh hnuah erawh ka rilru chu hmeichhe ler kawh tak ang maiin a kal pêng dawr dâwr a, a rukin ka duh a ni tih a hriat ka hlau hle thung si.

Mizoram chu hri hlauhawm takin a chenchilh reng a, mahse ina inkhung reng ringawt zawng hmasawnna a awm thei bawk si lo. Thuneitute lamin dan chi hrang hrang an siam belh a, keini zirtirtute pawh kal min phalsak leh ta nge nge a, chutih rual erawh chuan fimkhur a ngai khawp mai. Face Mask nen kan kal ṭhap ṭhap a, insik leh inkuah tih vel pawh thil hlauhawm tak a nih avangin a tua man tih kan tum lo va, face mask hreng chungin kan inbe thei a ni mai. Hri hlauhawm tak kârah chuti ang chuan hna kan thawk mawlh mawlh a, a tak ngeia pu Muanawma hmel ka hmu leh chiah chu ka duhna a zual tawlh tawlh ni berin ka hria, hmeichhe zak lo tak ni ila chuan ka hrilh duh hial ang, mahse ka chhia leh ṭha hriatna hian thil mawi lo a ni tih min hriattir chiang ropui bawk si a ni.

Ni khat chu u Remzelan MZU-ah min thlah a, dar 10 vel a ni a, kawng chu a reh ṭha khawp mai. A car a hawl chhuak peih lo tlat a, bike-in min hruai a, ka chuang nuam em em hran lo. Tanhril pêng kan tlan laiin kan hnungah car pakhat hi a lo tlan a, kan tlan chak hran lo bawk a, u Remzela chuan kan hnunga car chu a kian a, car khalhtu chu pu Muanawma a ni tlatin ka hria. Car hnungah zel kan tlan char char a, ka en chiang ṭhin, kan tlanna lam a inang zel bawk si, pu Muanawma ngei a nih ka ring ta ringawt. Kan department awmna buidling kan thleng a, u Remzela chuan hruai ka ngaih huna call mai turin min hrilh a, engmah sawi belh tawh lovin a tlan chhuak zui nghal bawk. Ka inher rualin min lo en rengtu pu Muanawma ngei mai chu ka hmu ta, nichin aṭang tawh amah a ni khan ka hre réng a, a lo ni ngei e.

"I va thleng hma ve a Sir?" nui sen sen chunga ka tih chuan a ngawi reng a, min en deuh run a, ka zawhna pawh chhang lovin a kal daih a nih chu! 

Ka bangbo hman hle a, chuti ang em ema nêlawm loh leh hawihhawm loh chuan ka lakah a la awm ngai lo, ka hriat theih chinah tu lakah mah a la awm lo zawk. Common room ka luh chuan thingpui; khu rum rum khawpa sa ver vawr hi a lo inthlit a, inthlahrung ru zetin ka bag ah lai nen ṭhutthlengah ka ṭhu a, a mood a fuh lo hle a ni ang a nêlawm hlawl lo. Ni dangah te chuan thingpui ka in duh leh duh loh min zawt ziah ṭhin kha a nia, tun ṭum zet zawng hmelṭhain a thawmhnaw hak inhmeh viau mah se ka pawh ngam chiah lo, zing a tho fuh vak lo a nih ka ring ber. A chel vel chu ka en ru reng a, face mask vuah te chu engati nge a inhmeh em em bik le, kan professor pakhat zawk kha chuan a inhmeh hran miah lo, pu Muanawma zawng ka mitah chuan pu Muanawma nge nge a ni e.

"Puih i ngai em Sir?" ka be lo thei lo, powerpoint tihna tur hmanrua vel chu indaih lo zetin a keng khawm a, thil inkhawih pawlh vel tih chî vak rih lo mah se a chet dan aṭang chuan puih a ngai miau si a ni.

"Ngai lo" ram deuh tak hian a ti bul hmuk a, ka hrethiam lo lek lek zawk, chuti ang chuan a awm ngai lo tlat a tin ni! 

"I ngai lo tak tak ang maw?" ka ti leh hram chu min melh rum khawp mai, rei en ngam lovin ka hawi sawn vat a, ka ding tawh pawh ka ṭhut leh phah ringawt. 

Min biak dan te, a hmel rum tak te, a chet dan hrim hrim chuan ka awm a ti nuam lo, min be peih thlawt lo ni mai te'n ka hre hnuhnawh a, a hmuh phaka ka awm hrim hrim chu a duh lovin ka hre bawk. Min hnung chhawn chunga laptop a khawih mawlh mawlh lai chuan thawm dim zet hian ka chhuak daih a, dik tak chuan ka zo lo a ni. Ni e, ka zo lo chiang alawm, a huhâng a nât mai bakah min en dan vel kha hrehawm ka ti, common room zau ve takah khan kan pahnih chauha awm kha tawt ka ti ru tlat a, kan boruakin a zir lo bawk nen boruak dang hip rih a finthlak ber zawkin ka hria. Ka office lamah ka phei daih a, a piah bera awm a nih avangin a va hla deuh hret a, ka kal sawn tak na a, ka laka pu Muanawma awm dan chu ka rilruah a awm reng thung.

Building thlanga ramngaw chu ka en tlawk tlawk a, kawng tê reuh tê hi a lo awm a, ka vawi khat hmuhna a ni nghe nghe. COVID-19 hri lên hma khan thla tam ka thawk hman lo va, mahse chu lai kawng chu ka hmu ngai miah lo, ka ngaihven lo ve hrim hrim bawk. Ka rilru nuam lo ru zet chu tihreh ka tum ṭang ṭang a, a ho mah mah a ni. Pu Muanawman min biak deuh hmuk avang leh min melh rum avang mai maiin ka rilru a nuam lo ve ringawt a, a âtthlak lam hret chu a ni e. Ka duh a ni mai a, amah paw'n ka duh tih a hre hleinem. Tin, inngaizawng pawh kan ni lo va, ka awm dan vel chu a puitlin loh thlak ka tihnuhnawh kher mai.

"Lo kal la" aw lo chhuahna lam chu ka hawi a, pu Muanawma chuan min lo en reng a, a aw pawh nichin ai kha chuan hriat a nuam daih tawh zawk. 

"Nia, aw..aw le" ka ti ṭha ve mai a, a hnungah ka zui phei a, common room kan luh chuan professor pahnih leh guest lecturer te an lo awm kim vek tawh bawk.

Pu Muanawma chuan powerpoint hmangin a sawifiah char char a, a sawi rei hran lo va, chu bakah a aw hriat a nuam hrim hrim a, a ninawm hman loh. Tin, Mizo vek kan ni a, Mizo ṭawngin a sawi mai a, chu chu thil tiawlsamtu pakhat a ni. Kâr leh aṭang chuan online-a class kan pek leh char char a ngaih tawh thu a sawi bawk a, kár khat chhung kan chawl lailâwk zeuh kha a nia, ka peih lo ru ngei mai. Keimahah hi chuan a hlawkthlak hlawl lo, mit a heh si, offline ang khan a zirtir kilh kelh theih tawh bawk si lo va, ṭha thei ang bera inbuatsaih paw'n class attend ṭha duh lo leh thusawi ngaihsak ṭha tâwk lo an lo awm hman zel a, mahse student te chu dem lohna chen ka nei ve tho, a ninawm ve êm bawk a ni. Ka research paper lah buaipui ngai bawk, thla leh maiah Delhi-a zin ka ngai mai thei leh zel a, presentation neuh neuh neih phei chuan online class chu offline aiin hrehawm ka ti daih zawk.

"Ka lo thlah ang che chú?" min betu chu pu Muanawma bawk a ni a, zing lama min chhan dan ang hmuk hmuk kha chu a ni tawh teuh lo.

"Ngai lo mai Sir, ka u a lo kal mêk e" ka tih chuan zawhna mitmeng hian min en a, kei erawh ka hawi sawn daih thung. 

"Tukina mi kha em ni?" a kawng a dawm deuh kher a, a awm dan chu police a ang, thil tisual ka ang tawp.

"Aw, ni e" ka lo ti ṭha ve leh mai a, ván vadak chung hian a thaw ri ham ham a, min en dan chu ka hrethiam lo tulh tulh. 

"Thil ka lo hre sual a nih chu!" ti supin a motor lamah a kal a, keiin ka phone ka en zawm zat thung a, keini pahnih tih loh mi dang chu an haw vek tawh. 

"Ka thlah che chu i duh lo em ni?" motor-a lut ta mai lo chuan a rawn ti leh a, ka rilru dik tak sawi ngam ngat ila zawng ka duh thu leh a bula chuan haw ka châk lutuk ka sawi chamchí ang maw le. 

"Ka u a lo kal tawh laklawh sia, min hawsan zawk mai rawh" ka ti ve tak na a, min hawsan lo se ka duh ru reng tho. 

"Hawsan ringawt che zawng a chi nâng, ka lo nghahpui ang che" a lam ka hawi zawk a, ka hawi sawn leh nghal thuai a, ka rilru a hria emaw ka ti rum rum.

"Total lockdown lai khan i ning em?" kan ngawih deuh vang vang hnu chuan a rawn ti dam dap a, ṭawng châk tawh lutuk ang mai hian

"Awi, ning tak ka ni. Inah kan tawm reng bawk sia maw, tihtur awm bawk si lo. Phone leh Laptop ka en reng a, ka mit te hi a ṭhat loh phah vek dâwnin ka hria, COVID-19 hi chu a hlauhawm si, ngeiawm bawk si" ka ti mawlh mawlh a, min nuih suk a, ka ṭawng zawh vek hnuah ka awm dan mawlmang zet chu ka hre chhuak ve leh chiah.

"Min hrethiam mai teh, sawi tur ka lo ngah hle a ni ang, khati ang zawhna tuma'n min la zawt ngai bawk si lo a tin ni!" ka tihnuhnawh kual vel leh ang lawi a, a bulah hi chuan inthiamchawpna tur ka zawng ve ziah.

"Kei pawh min hrethiam mai teh" a tih chuan a lam hawi nghalin

"Engati?" ka lo ti a, a face mask phelh pah hian

"Ka'n vuah rih lo lawk mai, kan pahnih chiahin kan ni tho" a ti daih a, a nui hmel mawi zet chuan ka nuih za lo zet pawh min nuihtir thei ni maiin ka hre tawh. 

"Kan khawvel hman mêkin a zir lo bawk a, kan inṭhut hlat hle mai, ti raw?" a tih zawm leh chuan ka lo nui chhuak nghal hak hak a, ho tê mah ni se a sawi dik leh tho.

"Ni e, hri lêng lo se chu offline-in class pawh kan kal thei ang maw le" ka ti siam siam a, ka bulah ka mipa duh ruk em em a awm a, innêl takin kan inbia a, chu chuan ka mood a ti-on leh tawh khawp. 

"Tukina mi kha i ngaihzawng emaw ka lo ti hman a, mahse i u lek chu niin" a tih chuan ka nui ri leh hak a, kan ṭhutna a san deuh avangin ka ke ka then che pah reng a, ani erawh ṭhu chung paw'n lei a rap pha thung. 

"Ka u ve em em a nih kha, a fel a nia, engkim ka sawipui ṭhin. Unaunu ka nei bawk si lo va, ka thuruk tam tak pawh a hre ṭeuh mai" ka ti luam a, thil pawi sawiah ka inngai chuang lo.

"Tunah hian ngaihzawng i nei em?" pu Muanawma zawhna chuan min tihamhaih ang reng.

"Máw?" ka ti hniam raih a, min en reng mah se nui hmel a pu der bawk si lo, a thutak hmel viauin ka hria.

"Ka zawt mai mai che a nih kha, i u chu a lo thleng ṭep tawh ang chu máw?" tiin thu dang a sawi zawm nghal daih a, a bâna sana chu a en pah zeuh bawk.

"Ka hre lo le, a lo thleng ṭep ang ka ring. I hmanhmawh chuan min hawsan rawh Sir, i tlai phah lutuk palh ang" ka tih chuan

"Ka hmanhmawh hleinem" a ti leh ang lawi a, a sir zawnga a hmel ka en chian deuh chuan hmanhmawh hmel a pu lo tak tak.

Inbe lova kan awm char char laiin u Remzela a lo thleng ta nge nge a, car a rawn keng thung a, a pawi miah lo, tlai lam boruak chu a hrisel rih lo êm mai, zing lam nen a inang lo. Kan hnungah pu Muanawma a tlan a, kan inzui chho zel a, Zodin pengah kan inṭhen hrang a, u Remzela lo thlen thlak hmaa kan titi kha ho hlawm viau mah se min tihlim zui em em thung. In kawt kan thleng a, kawngka bula sanitizer chuan kut kan sil nawk nawk a, hri lêng avangin tih ngai loh tih thar ka'n va ngah phah tak ém. Kumin zet chu mi tin tân kum chhia tih theih tur khawpa khawvelin buaina a tawh kum a ni a, nakinah chuan zirlaibu thlengin COVID-19 chanchin hi a la awm ka ring, a chhan chu khawvel pumpui a tibuai miau a, zirlaibu ah awm ta pawh ni se àwm lo ka ti hran lo vang.

Thla hnih thum a'n vei meuh chuan khawvel mi thiam hrang hrangte'n hri kaite tâna damdawi ṭha tur an hmu chhuak pheuh pheuh ṭan a, hri hlauhawm tak a ni bawk a, a damdawi tur an hmu chhuak zing lo khawp mai. An hmuh chhuah ho lah chu ṭha tak tak a awm hlei thei bawk si lo, mihring nunna chân an pun belh zel a, Mizoramah pawh thihpui an awm ve ta nual a, mahse mak ve deuh mai chu ka hriat chinah natna dang nei an ni zel thung. Keini lam pawh hun harsa kârah class kan la lá vel zel a, kan nî hman dan a danglam tawh lutuk a, thla kan hman ral dan pawh kan hre zik tluak thei tawh meuh lo. Zan khat chu ka status pu Muanawman a rawn reply hlawl a, mak ti ru tak ka ni. 

"Eng nge i tih a?" tih tê hi a rawn thawn a, phone number in nei tawn ve ve tawh mah ila private message tak hian kan la inbe lo hrim hrim.

"Eng vak ka ti lo" ka seen vek tawh avangin ka chhan ngei ngei a ngai tlat.

"Nih chu" ṭawngkam a hmang tawi khawp mai. 

Ka tum loh deuhin a message chu ka seen rang em em leh nghal, ka khawih sual palh vang a ni. A pawi lo law law zawk, ka online tih a hmu reng dâwn tho va, engmah a rawn sawi belh tawh chuang lo. Chumi zan aṭang chuan mi rawn biak zauh a nei leh ṭhin a, a thawhpui ka nihna anga min rawn bia ni mai hian ka hria, mahse ka mut a va tui phah ṭhin si êm. Ka zing thawh thlengin zana min rawn biak hi chuan a nuam vek zel a, ka mood a tifuh cher cher thei hle. Tawi tê tê hian a message ka dawng leh nawlh ṭhin a, ka dawng khât thei hle thung, mahse pawi ka ti lo, a takah, hmaichhanah ngei ka hmu thei tho, pawi ka ti teuh lo. Beisei loh deuhin ka ṭhiante chuan a ruka pu Muanawma ka duh thu an hre chhuak ta, chu pawh Nunui ṭawng sual palh avangin, an va han 'ê' nasa hlawm mai mai tak. Ngaihawmi ngat phei chuan

"Engtin nge i duh zawk? Ngaihzawng a ngah teh mai a nia aw, vêng tinah a ngaihzawng hluite sawi tur an awm" a ti mawlh mawlh a, mahse thil sawi uar chi a nia, a zawng zawngin ka awih sak chuang lo. 

"Awi, tlangval senior phanchang tawh engtin nge i duh theih? Nang lah i ti a la tuaî nalh si, mawl miah suh Lal Am, i kum rualpui emaw nang ai tlêma upa hret ngaihzawn tum zawk rawh, pu Muanawma te chu a chi hian a chi loh hrim hrim" Esther-i thusawi chuan min tinui nasa ngáng mai. 

"A hmelṭha ve chiang êm alawm" tih chauhin ka chhang a, group video call-in kan inbia a, mipa pahnih tel lo mah se hmeichhiaho kan kim vek a, hri lên lai ni lo se chu kan inhmu khawm zing malh malh leh tawh khawp ang.

"A hmel chu a chhe miah lo, mahse dik tak chuan ka duhpui bik miah lo che" rawn titu chu Nunui ve thung a ni. 

"Engati nge in duh loh nghal vek ringawt a? Kan inngaizawng dâwn pawh ni hlei lo, Nunu nang leh zel pawh maw!?" nui var var chuan ka ti a, a enga mah chu ka la thutak lem lo.

"Hei leh chen hi MZU-ah ka thawk ve tawh a, a chanchin ka hre hnem ve tawh bawk. A sual chu a sual miah lo, ka lakah ngat phei chuan a fel lutuk, mahse a lerh ka ring tlat, a chhan chu ngaihzawng a nei rei ngai lo reng reng, a ngaihzawng anga sawi tur an kat fur thung" a tih leh chuan ka nui tawi tak a, chutah Ngaihawmi chuan

"A dik ang, Nunui sawi kha a dik ka ring. Awi, a hur tel ngei ngei ang, a upa tawh ropui si, a lerh phei chuan a zei dâwn nasa mai sia maw, in la thawk dun zui, inthlem thluk tir miah suh Lal Am" a rawn ti bawrh bawrh a, a ṭawng duham leh lutuk a, engmah pawh a sawi ve hman loh.

"In rin thu khan kal vak ṭhin suh u, hmelṭha ka tia, a rukin ka duh ringawt chauh alawm, amah hriattir ka tum teuh lo" ka ti ve tlat a, inngaizawng tur ang maia min ngai nghal ringawt chu a dik lo a ni.

"I hma hun engmah i hre lo Lal Am, i duh kher kher bawk sia, engtin emaw han duh der kual vel che se la chu i hmin fel der nghal ang, i ṭhiante'n kan lo hlauhthawnpui che a ni hi, hriatthiam tum rawh" Esther-in a lo tih zawm zat a, min ngaihtuah tih te chu ka hre ve tho. 

"Sawi tawh lo ang u, in ṭangrual ṭhah hlawm bawk si. Chu bakah kan thusawi hi awmzia a awm lo êm mai, upa deuh ka duh bik teuh lo tih lo hre phawt ula, hahdam deuhin awm teh u. Naktuk office in kal dâwn hlawm em?" thil danga pakaipui vat chu a ngai tawh. 

"Kei chu kan chawl dâwn, kan thawhpui pakhat kha a lo postive reng a, chawlh an puang nghal rup, ina awm nilén leh tlawng a ni mai" Ngaihawmin min lo chhang hmasa ber a, a dawtah Esther-i ve thung chuan

"Keini chu kan kal ang, a kal loh theih bawk si loh, hri hi ka ning tlat, nun a tibuai, kan kâi lo vang tih pawh a sawi theih loh" a tih zawm mawlh mawlh a, a sawi dik vel leh fuk zel.

"Dik chiah, kal loh thei se chu kei pawh ka awm mai mai ang" Nunui hi chu MZU-a thawk a ni a, a office dâwn tih ka hre sa a, mahse hri lén hnu aṭang hian kan kal dun thei meuh tawh lo.

"Ka mu dâwn, mu ang u, mut tui vek u" ka tih tâkah chuan kan inmangṭha hlawm ta sap sap a, kan inbiakna pawh kan titawp zui nghal bawk.

"I la meng em?" mut tawh dâwn a ruaiah pu Muanawma hnen aṭang message ka'n dawn leh hlawl chu le. 

"Ka mu dâwn chiah" tiin ka chhang lêt a, a seen rang khawp mai.

"Sorry" tih tê hi a lo thawn leh a, ka ṭhiante thu min hrilh zawng zawng kha ka rilruah a rawn lut zut zût a, ka seen vek tawh hnuah pawh pu Muanawma chu ka chhan tawh loh phah nghe nghe a, mahse an sawi ang em ema lerh leh hmeichhe mi a nih ka ring lo, ka ring phal lo a ni.

Chu bakah a upa tawh a, miss Ruth-i paw'n ngaihzawng a ngaihsak lutuk tawh lo a tih kha maw le, ka ṭhiante ai chuan miss Ruth-i khan a hre chiang zawk mai thei, a chhan chu inngaizawng tawh an nih mai bakah ṭhian an ni chhunzawm zel tlat a tin ni! 

(End of Chapter 3)