𝐓𝐀𝐑 𝐇𝐎𝐓-𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐋𝐀𝐒𝐓 𝐂𝐇𝐀𝐏𝐓𝐄𝐑 3)

TAR HOT-A

By

Havali Adam

Last Chapter 3

Inrinni tlai a ni a, rin ai hun leh ní a kal chak daih mai, kâr tluana ka buai ṭhin vang a nih ka ring. Thla hmasa phei kha chu chaw ei khawm neuh neuh kan nei reng a, chhungkaw chaw ei khawm a nih loh leh Chhara thawhpuiteho chaw ei khawm a ni thul, thla khat kan hman ral lai ka hre lo tluk a tih theih. Hmuifangah kan chhungkuain kan kal a, boruak a thiang ṭha bawk nen nuam kan ti tlâng hle. Pa ber chenin an ṭawng mawlh mawlh hlawm a, thla kan lá chhen bawk a, mahse thlalak hlutna ka hre fiah tawh a, thlalak neih tam hi a lo ṭha tak zet. Nakinah chuan kan la tar ang a, kan kumte a lo la upa ve ang a, chung huna sawi tur leh ngaih tur thlalak lo neih tam hi a pawi reng reng lo.

Kâr thar kan chuangkâi a, Têbera leh a ute pahnih hruaiin hun ka hmang leh ta malh malh a, kum thar aṭang chuan a ute pahnih hi chu hruai an ngai tawh lo mai thei a ni. An lian ve tawh a, chu bakah hruai an duh tawh kherin ka ring lo. In chhung tifaiin ka tei kûal ka tei kual a, ka tifai thawkhat viau chuan ka hria. Sawi tawh ang khan Valpuia room leh Thangsanga room hi chu ka enpui em en hran tawh lo va, a ṭul chuan anmahni zawk hian an sawi mai ṭhin. Mizo hla play-in ei tur ka siam a, naupang lo haw huna ei tur a ni ber. Valpuia tih loh school an kal vek a, Valpuia erawh a inhlawh a, inhlawh tawh rih lo mah se a pawi lo maw le.

A bike awh em em pawh a tuak ngah vek tawh a, college an ṭan ṭep tawh zawk a, mahse pocket money tur a duh avangin class ṭan tak tak hma chu a la inhlawh chhunzawm ta zel a ni. A pa a láwm a, kei pawh ka láwm a, kei ni chang ni lo nu leh pa dang pawh Valpuia anga mahni intodelh duhna rilru pu fapa nei ve ngat se chu an láwm ve tho ang. Naupang hruai tura ka chhuah chuan chawhnu her a ni tawh a, Têbera te school hi kan veng aṭang a hnai lutuk lo va, a chang chuan Bus-in haw ṭhin mah ila Taxi-a haw chang kan ngah ṭhin zawk. School ka thlen aṭanga rei lo tê hnuah an rawn bâng sap sap a, Nghaka leh Rohluate nghah pahin school bula ṭhutna awmah chuan Têbera nen kan ṭhu a, kan bula ṭhu nu nen chuan kan inbe leh zauh ṭhin bawk. 

"Nu, khu khu a pa a ni ém?" ṭawng melh melh pahin Têbera chu ka en a, a hawina lam ka hawi chuan ka ṭawng tawp chiang hle. 

"Pa!" ring deuh tak hian Têbera chuan a ko nghal a, mahse a pa erawh a fapa kohna ri hre lovin a tlan liam daih thung a, ka bula ṭhu nu'n ka awm dan dik lo a hriat ka hlauh avangin

"Eng nge ka sawi lai khá?" ka ti kual vel ta ringawt a, inngaihtuah chawp ngai lovin ka thil hmuh chuan min ṭhawng tak zet a ni tih ka hre chiang hle. 

"Nu, apa kha a tlan tlang daih!" Têbera min biakna chu ka hre lo der a, nu pakhat nen chuan kan titi zawm char char a, mahse lem chang mai ka ni, ka rilruah Chhara bak a awm tawh lo.

Nghaka leh Rohluate pahnih an lo bâng a, Taxi-in kan in lamah kan haw a, naupang tih takah Têbera chu pangngai deuh hian a ute bulah a awm leh mai a, a ṭawng melh melh a, kei erawh ka rilru kaptu a lian hle thung. Chharan a fapa kohna a hre lo leh a hmu miah lo chu ka dem hran lo, kawngpui chung aṭanga ko a nih avangin hriat pawh a harsa mai thei zawk, mahse tlangvalin a ngaihzawng a phur kual ang maia hmeichhe dang a phur tlat kha ka awm tinuam lo bertu a ni. Ka pasal a ni a, ka hre chiang ve thawkhat tawh a, ngaihzawng min neihsan ka ring ngai lo va, mahse tun ṭum erawh chung zawng zawng hre reng chung chuan ka rilru a nuam thei tlat lo a ni. A thu hrimah tu nge a hmeichhe phurh kha ni reng reng? Ngaihtuah loh ka tum ve tak na a, ka thei chuang der lo. Ka pasal a ni tlat alawm, eng vang ngawtin nge ka ngaihtuah loh ang nì!

In kan thlen hnu chuan naupangin ei tur an ei nghal sap sap a, in kawtah chhuakin insuk pho ro tawh ho chu ka seng a, ka rilruah Chhara leh hmeichhe dang bawk chu a la awm reng a, dik tak chuan ka lungawi lo a ni. Han titaua han thinrim chiam rual ka ni tawh lo va, ka hlauh ber erawh ngaihzawng neihsan a ni thung. Valpuia bike a hawl chhuah nî ber khera hmeichhe dang a phur lai ka hmu chu hrehawm ka ti, ka tha a nâ tlat a ni. Ni dangah hi chuan ama car a keng mai zel a, Valpuia bike tak hi chu office kal nân a hmang ngai lo a tih theih a, amah Valpuia pawh hian a hawl chhuak tam em em lo. A pa nen Gym kal dawnah an inphur chhuak mai zel a, chutah pawh chuan Valpuia ai Chharan a khalh hnem zawkin ka hria.

Ka thil hmuh avangin thil dang tih tur la nei reng si khan ka ti peih ta der lo mai a, ei rawng ka bâwl daih a, ka bâwl ṭan hma khawp mai. Ka rilru tinuam lo zual tur tak hian Chhara chu a la awm zui. Thangsang school bâng lo haw hnu leh Valpuia hna thawk lo haw hnuah pawh a lo la haw ve ta reng reng lo va, tlai dangah chuan Thangsanga lo haw hnuah lo haw ṭhin mah se Valpuia lo haw hmain in a rawn thleng ziah ṭhin thung. Dar 4 leh a chanve a pel vâr var tawh a, dar 5 a ri thuak tawh zawk a, ka ngaih a ṭha lo zual tak zet tawh bawk. Chokaah ṭhu ngawi ranin dar zat chu ka bih sek a, room lamah naupang an ri nak nak hlawm a, ei rawng bawl fel vek tawh mah ila chaw ei châkna reng ka nei rih lo a ni. 

"Vawiin chu tum loh deuhin ka awm alawm le, naupang an lo haw kim tawh em?" bike rum vut vut thawm ka hriat aṭanga rei lo tê hnuah ka lam pana lo kal mêk ka pasal ngei chu ka hmu a, ka bul a rawn thlen hmain Têberan

"Pa!" a lo ti thuai a, a pa lamah tlan pheiin a va kuah thuak a, an room-ah a tlan lêt ve leh mai a, vawiina a thil hmuh kha chu a hre tawh lo a ni mahna.

"Chaw kan ei hman tawh em ni? Eng nge kan hmeh dawn le?" min kal pel pah chuan a nui suk a, za lo zet hian ka lo nuih lêt a, chawhmeh siam sa ho chu a en kual dân dan a, lungawi teh chiam lo mah ila thinrim ringawt a fuh ber lovin ka hria.

"Chhawhchhi i dêng elo? A va tui dawn ve, ka va inbual thuai thuai ang a, zanriah kan ei dawn nia" amah bawk chuan a ti leh a, ka la ngawi reng a, ṭawng rih lo law law ila a ṭha zawk tak ang. 

"I nuamsam na nge?" a lam chu ka hawi a, inbual turin a kal tawh emaw ka ti zawk a, a lo la kal miah lo a nih hmel. 

"Nuamsam e" ka tih chuan ka ṭhutna bul chêtah a rawn ding titih a, ka khabea chawi kang pah hian

"I va hlim loh hmel hle, ka lo haw tlai deuh bawk si a, min lo ngai hman lutuk zawk a ni ang a?" a ti sup a, a ṭhen zui suk bawk a, ka nui ve leh ta ringawt. 

"Va inbual la" nui chunga ka tih chuan

"Dawn chiang e" tih leh ka bianga rawn fawh zeuh a rual a, ka beng vun nêm lai pet pah hian 

"Zanin chu hun nuam tak kan hman ngei ka beisei" a ti hniam ruih a, a ding ngil mai dawn emaw ka tih laiin ka nâk nêm laiah tak a kheuh a, a zâ bawk si nen ka che zawk a, zâ tih avanga nui ni tho mah ila a nui hmel hmuhnawm zet chu ka nuihpui a ni ber.

A inbual chhung zawng chuan ka inngaihtuah rauh rauh a, ka ngaihdan a dik lo thei ve thovin ka hre ta. Ni e, ani te chuan ngaihzawng a nei duh tawh tawp nâng, nupui fanau a nei a, ngaihzawng a nei lûl lo vang. Amaherawhchu duh ngat se zawng a neih theih ka ring, a chhan chu tlangval tam tak ai a ṭha tlat a tin ni! Tlangval ni tawh lo mah se a pian leh a taksa a la dik em em a, ka mitah chuan kan fate hian an puitlin hunah pawh an tlukin ka ring lo a ni. Tin, kum 40 ral chu a ni tawh ngei a, mahse tlangval tam tak taksa hian a tluk ka ti teuh lo bawk. Gym a kal hnu aṭang phei hi chuan a hma zawng ai a pian a dik a, a kawr hak te hi a inhmeh vel vek zel. Chu vangin nula ṭhenkhat hi chuan nupui nei lai mah ni se ngaihzawng atan an iai ka ring lo, an iai lo khawp ang.

Zanriah ei lai chuan pangngai thei ang berin ka awm a, Chhara paw'n a lo haw tirh angin min ngaihtuah hmel em em tawh lo. Tui ti takin chaw chu kan ei a, Valpuian a inhlawh tawh dawn rih loh thu a sawi chuan ka lawm ru khawp mai. A kum a la tam lo va, hna a thawk nasa lutuk ang tih ka hlau ṭhin. Zanah chuan Têberan Waiwai chhum a ngen tlat mai a, Valpuia leh Thangsangate pahnih chu lei turin an inphur chhuak a, mi dang erawh pa ber hovin kan awm thung a, inngheng chialin TV kan en ṭhap bawk. Chhungkuaa TV kan en ho tawh hi chuan ṭhutthleng kan dawh zawm ziah a, pakhatah kan leng ngai lo miau a tin ni! Thlasik lai hlei hlei hian nuam kan ti a, rizai kan sin ṭhap ṭhin a, pasal fanaute nena hun hman leh chhungkaw din nawmzia ka hriat thar phah fô ṭhin bawk.

Valpuia leh Thangsanga an lo haw hnu chuan ka chhum zui nghal a, hmeichhe awmchhun ka nih bakah ei tur siam ber ṭhin ka ni a, hmeichhe tan hi chuan ei rawng bawl leh ei tur siam tih vel hi chu kan tih tura dah tawp chîah ka ngai. Chutih rual erawh chuan mipa fel tak tak an tam a, nupuite duat thiam em em leh chet kawnga awl hneh em em an awm ve nual bawk a, mipa pakhat sual avanga mipa zawng zawng kan dem ṭhin hi a fuh lo ka lo ti ṭhin. Kei chu Pathian zârah ka vannei a, pasal ka nei fuh a, buaina tura ka ngaihah pawh kan inrem thei zel a, kan inhauh chang te hian ni khat chhung pawh kan thinrim tak tak thei ngai lo. A bul ber chu hmangaihna a ni a, chu chuan tlawmna te, inrintawnna te, zawldawhna te, induhsaktawnna te leh inngaihsaktawnna te a keng tel a, chungte chu hmangaihna tifamkima tinghet lehzualtu an ni réng bawk.

"Nu, a va'n rimtui, ka ei châk tawh ê" dingdihlip âk ak pah hian Têbera chu ka bulah a ding a, ka thil chhum lai hmuh a duh a ni ngei ang ṭhutthleng tê a lá sawk sawk reuh a, a phur fâl thei bik lutuk hi chu a pa a chhunna leh an unau zinga a danglamna pakhat a ni. 

"Plate hran ṭheuh hmang lovin bêlah hian ei mai ang u, sil a buaithlak" tiin ka thil chhuan lai chu ka chawi thla a, Têbera chu a pate ṭhutna lamah tlan pheiin dawhkan tê a va hûng rem a, ka dahna tur a lo va siam ve ngei a nih chu!

"Nu, chaw kha kan ei bang ém? Ka'n ei pawlh teh ang, tu nge duh ve dawn che u?" Thangsanga chuan zawhna min zawt tak na a, choka lamah a phei zawm zat thung. 

"Mi dang hi rawn tih kep nghal law law rawh, an duh ve leh vek tho ang" ka ṭawng ngai lovin pa ber zawk chuan a ti a, Thangsanga lo phei leh chu chaw bêl nen a lo phei a, an han ei tak tak chu tui an ti tlâng bawk a ni ang chaw an ei zo vek.

"Tumah mut nghal loh tur, darkar chanve tal nghak phawt r'u, chuti lo chu pumpui alcer a awm duh" kan ei zawh chuan ka ti a, Chharan kan eina bêl a sil fai mial mial a, naupangho chu ṭhutthlengah an ṭhu ṭhap bawk. 

Pa berin remote a chang a, zanin chu inkhel kan en lo ve teh mial a, UCL emaw EPL pawh inkhel a awm lo a nih ka ring, nge en a châk lo ve hrim hrim zawk pawh ka hre chuang lo. HBO Channel-ah chuan kan nulat ve lai pawha hmuhnawm kan tih ṭhin em em film chu a chhuak a, inthat vel awm tho mah se a rapthlak hran lo va, Star Movies Channel lamah ni se hmuhnawm tak a chhuak bawk a, fakna chhungin kan en chhawk a ni deuh ber. Dar 10 a ri hnai a, Têbera chu a chhing diar diar ṭan a, a pa chuan lo hmu vatin a pawm a, an room-ah a va mut a, mi dang erawh kan la meng ṭhap thung. Film kan en zawh meuh chuan dar 10 leh a chanve dâwn a ni tawh a, kan room lamah ṭheuh kan lut ta sap sap a, zing thawh hma ngai mah ila ka huphurh vak lo. Chhara a tho hma ṭhin tho va, min kai tho mai a ni ang chu!

Kan muhil zui nghal mai dawn emaw ka tih laiin Chhara zawk chu a harh kur a, aw thum hniam deuh tak hian a ṭawng sup sup a, a chet dan leh min biak dan aṭang chuan min mamawh tih ka hai bik lo. Mut chhuak ru viau e ti lo chuan nupa nun kan han hmang ta chéng a, ka dawngsawng ṭha leh em em lawi a, eng dang a ni lo, a zei thawkhat ve a ni e. Kan zo fel ta mawh tihah a âwm khanin ka mu bám a, a tua mah kan ṭawng tawh lo va, kan chau dun a ni mahna. Zinga ka harh chuan khua a lo vâr diam tawh a, dar 8 a lo pel vek tawh zawk a, thawh ka hai chian dan chu pui tak a ni. Zan lamah khan min kai tho tura hrilh ka tum a, mahse thil dang avangin ka mangnghilh a nih kha!

Chhunah chuan Bazar puiah chawhmeh lei turin ka kal a, ka ṭhiannu ka sâwm nghe nghe a, mahse a hman lo thung. Inrinni ah chawhmeh lei ṭhin tho mah ila ka lei tam vak duh ngai lo va, a hlui ai chuan lei thar zel pawi ka ti lo zawk a ni. Ka awm lah chu a nuam lo em em leh nghal a, ka Bus chuang ringawt pawh ka rui dawn ta mai. Tlan laklawh laiin chhuk ka dil tawp ringawt a, Bus Conductor-in min buaipui a tum hial a, mahse ka ṭhat tawh thu ka sawi a, ka ṭha chuang miah lo, an hna thawk se ka duh vang zawk a ni. Ní sa te chu ka do sual ni mai te'n ka hria, ka ni muai muai a, kal pawh ka kal peih rih lo, ka kal a nih chuan ka tluk ka ring. Phone dawra thawk hmeichhe pakhat hian an dawrah min hruai lut a, tui te min in tir a, minute eng emaw zah hnuah chuan ka zia ta deuh a, ka awm dan chu ka hrethiam bik lo hle.

Bazar pawh bazar lovin ka haw leh ta ringawt a, in ka thleng chiah chu ka nuam lo zual tak zet. Naupang hruai an ngai bawk si, hruai an hun ṭep tawh leh nghal. Tha nei lo zetin ka phone ka ban hram hram a, Chhara ka call nghal a, a la pick up thei lo zui. Ei sual ka nei ti dawn ila eng mah ei sual ka neih áwm ka hre si lo, ka dam lo ti dawn ila zingah te kha chuan ka dam vâr bawk si, ka va'n hrethiam lo tak êm. Ka taksa chau leh zuai chu thuhran, ka phone call Chharan a pick up lo lehzel te chuan min tichau hluah hluah, ka rilruah a hmeichhe phur nu nena awm dun tur anga ngaihna a rawn lut zut zut a, ka rilru a nâ em em ringawt bawk. Ka chhing diar diar laiin khuma phone chu a nghawr dat dat a, ka ban thuai a, Chhara ngei a ni e. Naupang ka hruai hman loh thu ka sawi a, chu bak ka sawi peih thlawt lo, kan inbiakna chu ka titawp zui ta hmak bawk. 

Ka muhil nghet hle a ni mahna ka harh leh meuh chuan puan ka lo sin diam tawh a, khum bul dawhkanah tui bottle leh damdawi a lo inchhawp a, khua chénin a thim ṭan tawh ang reng hle. Tho ta mai lo chuan lukham nghengin ka ṭhu mu awn duai a, damdawi la ei lo mah ila ka mu hrim hrim a, ka awm a nuam deuh sawtin ka hria. Thawm aṭang chuan naupangho an lo haw kim vek tawh tih ka hre mai a, kan room banga Sana intâr ka en chiah chu dar 4 leh a chanve lâi a lo ri tawh a, ka mu rei thawkhat viau a ni. Kawngka inhawng thawmah ka hawi chhuak a, Chhara chuan ka lam a rawn pan a, min ngaihtuah hmel khawp mai. Ka pang dekin min en reng a, kei erawh ka rilru a nâ thar em em ringawt. 

"I dam loh chuan min hrilh mai tur che alawm, damdawi ei lawk rawh aw" ti sup hian dawhkan têa damdawi leh tui bottle chu a lá a, min barh a tum chuan ka lo thle sawn hmak thung. 

"Chaw i ei phawt zawk em ni?" a ti leh a, ka ngawi reng a, a thil ken chu a awmna ngaia dah lêt lehin room aṭang chuan a chhuak a, eng nge a tih dawn pawh ka hre chuang lo.

"In ei puar hmasa la, chumi zawhah damdawi chu i ei dawn nia" rei pawh a rial lo vang tihah chaw nen a lo lut leh ta ngei a, ka ril chu a ṭam ve reng tho. 

"A pawimawh ber hi i dam lo bawk si a, ka'n duat em em mai ang che" ti leh fiana chaw min barh a rual a, ka lo âng ve mai bawk a, ka ei tui phian leh nghal.

"Engati nge!?" ka awm dan dik lo thut chu a lo hrethiam vat a ni mahna, a chaw barh lai pawh ka ei chhunzawm thei der lo.

"Ka luak a chhuak lutuk" ka ti thâm ṭiak a, bathroom lamah min pawm phei thuai a, ka thil ei zawng zawng ka luak chhuak leh vekin ka hria. 

"Valpui, motor lo tinung rawh, i nu hi damdawi inah ka va kalpui lawk ang e, nangin i nauteho lo awmpui la" Chhara chuan min la pawm reng a, Valpuia nena an inbiakna te chu ka hre chiang lo khawp.

"Kan thleng ṭep a nia" ka meng diar diar a, ka hmuh hmasak ber chu ka pasal Chhara a ni a, kan pahnih chauhin motor chhungah kan lo chuang reng tawh bawk.

Hospital kawt kan thlen chuan min pawm nghal a, ka dam lo tih chu kei ngei paw'n ka hre chiang tawh khawp mai. Doctor chuan min en dik mawlh mawlh a, damdawi ka ei tawh leh tawh loh te min zawt a, Chhara zawkin engmah ka la ei loh thu a sawi a, eng damdawi emaw ni hi ka ei a, a khá em em leh nghal. Ka lo muhil sek a ni ang ka harh leh chuan ka bulah Doctor pawh a lo awm tawh lo va, Chhara chuan min ṭhut chilh run a, ka harh tih a hriat rualin a nui suk bawk. A nuih chhan erawh pakhat mah ka hre lo, dam loh lai laia a nui thei chu mak ka tih bakah ka thin a tirim thar em em a, ka rilru leh mitthlaah a hmeichhe phur bawk kha a rawn awm leh a, ka melh rum khawp mai.

"Min melh no lo viau mah la thil lawmawm tak hrilh tur che ka nei, i lo rai reng alawm, ka lawmna hi tuipui angin a fawn vel ni maiin ka hria" a thusawi chu ka va han awih lo chiang tak! 

"Haw ang, ka ṭha tawh, naupangho rilru kan timangang lutuk palh ang" ka ti deuh hmak a, ka tho tur chu min dang a, a nui hmel te chu ka ei rih thlawt lo.

"Ka ti tak tak alawm, dawt a ni hleinem, i duh chuan Doctor pawh i zawt thei ang. Valpuia pawh ka hrilh vek tawh, mak a ti ve khawp mai, mahse kei chuan mak ka ti hran lo, ṭan ka lá nasa ve ê" a tih nuah nuah chuan

"Chhara!" ka lo ti deuh hrawk a, kan bula mite mitmei ven a ngai bawk si nen insum a harsa lam lek lek a ni.

"Haw ang ka Duat, ka va hmangaih mawlh mawlh tak che em" tih leh mi pawm a rual nghal a, ka tal buai vel peih lo, ka chau rih êm mai. 

"Doctor bulah min hruai phawt rawh, ka awih lo, ka rai ka ring hauh lo, awihawm loh lutuk" ka ti hmawk hmawk a, ani erawh a nui mai a, thla hmasaa ka awm dan ka ngaihtuah lêt rauh rauh a, a ruk tak chuan ka rai ka ring hnuhnawh ve leh deuh tho.

Doctor bulah chuan min hruai ta ngei a, chutah a sawi ang tak takin ka lo rai zui. Thla 1 leh tlêma upa nautê ka pum chhungah a awm tih ka hriat chuan ka hlim tho va, mahse ka rilru a nuam em em hran lo. Kan in lama kan haw kawngah te chuan street food min ei pui a, food truck-a mi a order a, ka ei ṭeuh leh nghal. Zanriah kha ka ei hman lo va, ni lo, tlêm chu min barh hman alawm, mahse ka luak chhuak leh vek a nih kha! In kan thlen chuan Valpuian zawhna min lo zawt nghal a, a pa zawkin a lo chhang a, fate awm lai leh lai lo pawh sawi lovin min fawp leh chawng chawng thul, a lakah ka lungawi lo ve kha a nia, awlsam têin a reh leh vek dawnin ka hria. Thinrima lungawi loh reng ka la duh, a chhan chu insawifiah a bâ tlat a ni.

"Tun ṭum chu hmeichhia ngei a ni dawn tih ka chiang, lawmthu ka sawi lâwk e" kan nupa room-a kan awm hnu chuan a ti a, chhan pawh ka chhang peih rih lo, ka chhang zel a nih chuan a tawpah ka rilru nât rukna zawng zawng a bo leh vek dawn tho tho tih ka chiang.

"Lo hawi teh ka Duat, i danglam ka tih kha i rai vang hi a ni chiang mai" ti lehin min kuai her a, ka inlêt tur chu min vuan bet a, min chelh hneh khawp mai. 

"Engati nge heti ang hian i awm tlat reuh a? A hma te kha chuan ka duat i thlahlel em em zel a nih kha le, i la dam ṭhat loh vangah ka ngai rih mai ang e, mahse nakinah min hrilhfiah vek thung" amah zawk chuan a la ti leh ta nghal a, insawifiah ngai chu amah zawk a ni. 

"Fanu min pe dawn bawk si a, ka duat zual ngawt ang che" ka hmuiah a rawn fawp zui nghal a, dawh satliah mai tum khan ka lo chhang lêt hram pek alawm le, insum viau lo se chu nupa nun kan hmang leh ringawt ang ka ring.

A tukah chuan kan chhungte ve ve hnenah ka rai thu kan hrilh a, min lawmpui rualin mak an ti hlawm khawp mai. A áwm ve reng, ka upa ve tawh bawk si a, ka kum rualpui hmeichhe ṭhenkhat chu an rai thei tawh ngai lo. Chu bakah a tam zawk chu an insiam a, keini ang duah duahin fa pawh an nei tam lo reng bawk. Ka vannei vang nge ni, fa neih hi ka harsat lem lo va, nâ te chu nei ve ṭhin tho mah ila Pathian zarah kâr khat velah ka dam hman vek zel. Kan chhungte lam aṭang ngaihtuahna ka dawng awl lo va, a mak ka ti zawk, tlai khawhnua ka rai leh vang a nih ka ring ve tawp ringawt. Valpuia te, Thangsanga te, Nghaka leh a naute zawng zawng ka pai lai khan min ngaihtuah tho mah se min ngaihtuah lutuk ngai lo, a mawi tâwk chiahin min ngaihtuah ṭhin, mahse tun ṭum ka rai chu a dan a dang deuh a ni e.

Pa ber ni se a phur em em a, kawng engkima a tih dan, ṭawng dan leh a chet dan zawng zawng entawntu Têbera lah a pa phur avangin a phur ve leh ringawt a, a ute ho chuan engah vak mah an ngai lo thung. Chhara chu a office bâng a rawn hma thei ta khawp a, ei rawng bawl hmanin a lo haw ziah a, zingah pawh inkhel tawh lovin a bawl vek zel a, ani pui roh pawh hi ṭum dang ai chuan a la urhsun deuh mah mah a ni. Min duat zual tur kha a sawi lâwk tawh ngei a, a sawi dik chiang khawp. Ṭhenawmte ngei paw'n an nuih deuh ṭhaw reng zel a, insuk thlengin min awl miau hek a, upat tawh lamah fa kan nei leh dawn chu a nia, hma hun hre lo mah ila kan hlimna tibelhchhahtu leh kan chhungkaw tifamkimtu a nih ka ring ve hmiah. 

"Eng nge hei hi a awmzia?" tiin ka ṭhiannu chu ka reply a, a thil min rawn thawn chu ka hmuh duh loh zawng tak a nih bakah ka rilru tinâ thei thil a ni tlat.

"Ka ṭhenawmnu status-ah ka hmu a, chuan in pa bula ṭhunu hi a hming te ka va zawt fiam mai mai a, min lo hrilh tak tak a, FB lamah pawh in pa nena an thlalak dunna a post asin, tum loh deuhin ka va zawng kual ringawt a, dik tak chuan in pa hi chu ka hre lo, mahse a hmeichhia zawk hian a ngaizawngin ka hria" a message ka chhiar zo chiah ka sa deuh pup pup a, mahse thinrim lo turin ka inthunun nasa hle thung.

"Ka lo zawt chiang chhin ang" tih chiahin ka chhang a, thlalak pangnga vel hi a rualin a rawn thawn ṭhawt a, ka open chiah chu ka rilru tinâ thei bawk ka hmu leh ta.

"En teh ṭhian, in pa hi chu ka ringhlel hran lo a nia, ngaihzawng a neihsan che pawh ka ring chuang lo, mahse a hmeichhia zawk hian a ngaihzawn ka ring tlat a ni. In pa ni se a chhe zawk zawk si lo va, fimkhur deuh teh aw, i rai tih chu ka hre tho va, i rilru tihnát pawh ka tum chuang lo. Zanin ka ṭhenawmnu status-ah an hun hman dan vel ka hmu leh bawk sia, ka lo hrilh tawp che a nih hi!" tih hi a rawn thawn leh a, ka chhang tawh lo va, Chhara berin ka rilru a luah tawh zawk a ni.

Khumah ka ṭhu ngawi reng a, ka ngaihtuahna a kal kual nasa khawp mai. Ka pum chhunga nautê paw'n thla 5-na a hmang leh daih tawh a, engmah hre chang lo khawpin min duat ṭhin a, ka rai tih ka hriat tirha insawifiah a bâtna pawh ka theihnghilh hman vek hial a, bike-a a hmeichhe phurhnu zawh ka tum te kha ka theihnghilh vek a, a chhan chu duat chitin renga min duat vang a ni. Zanin erawh ka rilru a ná thar tak zet, sawi theiha a awm tawh chuan eng emaw tak an inkarah a awm tihna a ni mai. Kan room kawngka bula dingin naupang nena an infiam lai chu ka ko phei ta ngei a, zanin la láa thu dik ka hre lo a nih chuan ka mu thei hauh lo ang, chu zawng aia ka huphurh chu ngaihzawng min lo neihsan tak tak ang tih a ni.

"I lo tho chhuak peih elo? Kan bengchheng viau em ni ka Duat?" ka bul a rawn thlen rualin a ti nghal a, engtin mah ka chhang lêt lo va, ka hmelah sawi duh ka nei tih a hrethiam a ni ang kawngka a khar zui nghal bawk.

"Thu dik tak min hrilh ang che, zep nei miah suh. Nang hian ngaihzawng i nei em?" ka aw chu thunun ka tum tehreng nen a chhuak dik lo nasa khawp mai. 

"Chuti ang zawhna daih daih engati nge min zawh? I ṭha em Duhtak? I va ṭhat loh hmel ve, khaw maw i pang" tia a bân a rawn lek chu ka lo beng sawn a, ka zawhna chhang lova a awm ringawt pawh chu ka thin a tirim zual. 

"Min chhang mai rawh, ngaihzawng i nei chiang ti raw? Kha nu, kha nu nen khan in inngaizawng chiang a ni. A hma paw'n ka hmu dun tawh che u, engati nge ka rilru tinâ zawng hian i awm kher ṭhin" ka ti hmawk hmawk a, ka ṭawng zawi tawh lo hle bawk. 

"Ngaihzawng ka nei lo hrim hrim, engati nge min rinhlelh ringawt a? I dam lo leh dawn a ni ang, damdawi ei khalh daih rawh" ka dara a kut a nghah a rualin ka nam pial nghal sawk a, ka thinrim lutuk chu ka ṭap thei mai dawnin ka hria.

"Bike-ah te in inphur kual vel a, in nui dun vel a ni lo'm ni? Ka hmu vek che u, kei chang ka ni lo, Têbera paw'n a hmu che u, a ko nghe nghe che asin, mahse nang chuan engmah i hre lo, kha nu nena chuan dun kha nuam i ti em a tin ni! Ka ngawi char char a, ka awih lo lui tlat a, a chhan chu ka pasal i nih vang a ni. Min lerhsan ka ring lo, ka duh lo bawk, mahse in thlalak dunna vel ka hmu leh a, ka rilru i tihnâtzia hi i hria em Chhara?" ka ṭawng tawp lam chu a zuai raih a, min sik a tum rualin

"Min khawih miah suh, min rawn si reng reng suh. Dawt ka sawi i la ring fan a ni maw, kha, hetah hian a awm vek, en rawh, i duh tâwkin en rawh" ka tih zawm nghal hmarh hmarh a, ka phone theh phei chu a lo dawng chat a, a hmelah ka thusawi awih lohna hmu lo ila chuan phone theh phei chu ka tum kher lo.

"Heti ang mai mai avanga ngaihzawng ka neihsan che i ring hi a mak zawk, thla kan la dun mai chauh alawm, chuti angin kan inkarah engmah a awm lo" a tih chuan 

"Ka awih lo, zanin chu i bulah pawh ka mu peih lo, ka nute bulah ka riak phei dawn" ka lo ti hmawk hmawk a, ka kal sawn tur chu min lo dang a, tal chhuah tumin ṭan khawh ve vak mah ila awmzia a awm lo hle.

"Heti ang thil ho lutukah i rilru tiná duh suh, a hma paw'n hmeichhe dang nena thlalak dun mai mai te chu engah mah i ngaih ngai loh khá Duhtak, kan thawhpui a nih hi, a lakah eng rilru dang mah ka pu lo" min kuah hle hle chunga a tih chuan ka ṭap chhuak hawk a, ka khabe a rawn chawi vat bawk. 

"Ṭahbelh reuh lutuk mai, heti anga kan inthlem lohna chen pawh hi a va rei ta ve ti raw, zanin chu Valpuia i pai lai ang mai kha alawm i nih le" a ti leh chuan ka che phut a, ka nam sawn dâwrh a, a inring hman bik lo a nih ka ring. 

"Nu, khawiah nge i kal dawn a?" kawngkapui lam pana ka kal pâwk pawk laiin Têberan a lo ti a, ka chhang eih lo va, hawi pawh ka hawi lêt lo hrim hrim. 

"Duhtak" tia Chhara min kohna aw ka hriat rualin ka kal chak zual a, pawn ka thlen chuan ka beisei aiin a vawt daih, mahse kawr lúm ha tura lêt ka tum lo, ka kal tawh laklawh.

"Lo ding teh, eng nge i hriat a?" min kuai her sawktu chu mittui tling pamin ka en a, aw dam takin min be tawh lo va, a lungawi a awi tawh bik chiah lovin ka hria, mahse ani ai ka lung a awi lo fê zawk.

"Ngaihzawng ka nei lo va, ka nei ngai dawn bawk lo. A chhan chu nupui fanau nei tawh ka ni, ka nupui tan pasal ṭha tak nih mai bakah kan fate tan pa ṭha tak nih ka tum kumkhua, a chiang em?" nem fahran lova a tih leh chuan

"LALCHHARLIAN!" ka lo ti vin hrawk a, thui pawh ka kal hmain min kuai her leh sawk a, nghet zet hian min kuah a, ka tal chhuak thei bawk si lo, ṭah bak tih theih ka nei thlawt lo.

"Kan buaina hi a ho lulai êm mai, hmeichhe pakhat vang mai maia intihbuai te chu a! A zahthlak zawk, ṭap tawh lo la, inah i lut teh ang" a aw chu a dam leh ta ruih a, chu chuan ka ṭah a tichhuak zual. 

"Keini ni ta ila ho i tih i ring em? Mipa dangin min biak hlek paw'n i ngaithei lo a ni lo'm ni? Kut thlaka insualpui i tum ṭhin a ni lo'm ni? Hmeichhe dang nen bike-ah hlim takin in inphur a, ka en liam mai mai theih che i ring reng reng em ni? LALCHHARLIAN, ka rilru i tinâ lutuk" ṭap chung hian ka ti zuah zuah a, min chhang lo va, a thaw ri hawk erawh ka hre thung.

"Eng pawh ni se inah lut phawt ang, ka thiam loh a nihna ka hre lo na chungin ka thiam loh ni mai rawh se" kan ngawih dun vang vang hnu chuan a rawn ti a, a ṭawng dan ber kher chu ka rilrem zawng a ni lo chiang khawp. 

"Eng nge? Sawi sual ka nei em ni? Kan thawhpuinu lakah pawh ka lo fimkhur tho ang a, min lo ngaizawng a nih paw'n ka dem hran lo, min duh a ni mai a, i pasal hi ka ṭha ve êm bawk a ni. Tleirawl ang maia tihtauh hrat hi ka hmangaih em em ber mai che si a, lawm hle zawk tur i ni asin le" rum zeta ka melh lai chuan a tih zawm leh nghal a, a la nui zui a nih chu! 

"Min thlah rawh Chhara, ka kal duh, ka nute bulah ka riak phei dawn, kâr khat vel chu ka awm bawk ang" ka tih chuan nâ lutuk lo hian ka chalah min nam dak dâwrh a, chuti ang a chet chu ka ring lo nasa a ni.

"Mawl leh lutuk, i riah phei daih te chuan tlan i ni mai dawn asin, kan intithiam lo khanglang bawk si. Kan inneih kum 50-na tlin kum te kan la lawm dun lâwp lawp ang chu le, lut ang ka Duat" tiin ka darah min kuah a, ka ipik ṭun kha a bo duak tawh a, ka ṭah pawh a chhuak tawh eih lo.

"Nang nu hi Valpuia i pai lai ang chiah khan i awm tak tak a nia, tun ṭum i rai chu i la nâ dawn a ni ang, khawi aṭangin nge thlalak kha i neih hrim hrim?"

"Ka ṭhiannu'n min lo thawn" tih chauhin ka chhang a, a mak lutuk, thinrimna pakhat mah ka nei tawh miah lo, a hma te kha chuan ka án nasat tehreng nen.

"Siamsiami a nih kha, i thik em em danah hian min lo ngaizawng tak tak mai thei a ni. Mipa hi chuan kan hrethiam nghal mai ṭhin lo va, kan mipatpui te vek hi kan hrethiam zawk ṭhin" a ti leh mawlh mawlh a, a sawi dik ve reng.

"Pa i ni tawh tih inhre reng la, hna thawhpui an ni emaw ni lo emaw hmeichhe dang hrim hrim lakah awm dan chin tâwk hria ang che" ka ti deuh salh salh a, nui sun sun hian ka biangah a rawn fawp a, a bulah hi chuan ka thinrim rei tak tak thei lo ṭhin. 

"Ka sawi kha ka Duat, kei chu serhhran ang hlak ka ni tawh alawm, mahse min lo ngaizawngtu leh duhtu an awm a nih chuan ka buaina a ni tawh lo, 'ngaihzawng ka nei dawn e' tihna pawh a ni chuang lo" ka biang piai nawk paha a tih chuan

"I inla luck vel em mai a! Mipa tam tak min ittu leh nu ka nih hnu pawha min ngaizawngtu hi e an tam lutuk, nang angin ka ṭawngthei lo va, ka sawi ngai lo mai mai zawk" ka lo ti thung a, huat enah pawh a en lo, a nui ringawt. 

"I ṭawng theih reng khâ" nui put put chung hian a ti a, ka melh hrep a, ani erawh a nuih a zat hmel em em thung.

"Ṭawng tawh lo teh, zanin chu kan fate bulah ka mu tak tak dawn a nia" ka tih chuan

"A chi nâng maw le, ka bulah lo chuan mut theih loh tawp, kan fate pawh ka thik a nia, hre reng rawh" a rawn ti a nih chu!

"Thik chi pawh va ni suh, fate leh nghal" tih chiahin ka chhang a, ani pawh a rawn ṭawng tawh lem lo va, in chhung kan luh rual chuan Thangsangan

"Nu, nichin khan khawiah nge kal i tum a?" a lo ti hmasa ber a, a dang zawngin TV an en ṭhap a, Thangsanga zawhna chhan tuma ka án lai tak chuan a pa zawkin

"Exer kan lá lawk alawm, i nu hian min lo hmangaih ber mai. Hmeichhe dang pawh a thik ngai lo, hmeichhe dang thik lutuk avangin a ṭap miah lo bawk, rai te hi a inhmeh a nia, in ti ve em fate u?" a lo ti zung zung a, a kâ hi chu a kal ve thlawt a ni.

"I sawi tâkah chuan kan Gym-a kal ṭhin senior ve deuh tawh hmeichhe pakhatin i phone number min dil asin pa, min dil zak miah lo maw le, pafa kan ni tih a hria a ni ang" Valpuia thusawi chuan ka beng a verh leh ta zar mai. 

"Het het het! Khati ang sawi chi a ni rih lo, zanin chu Mother India-i hi a hlauhawm teh mai a nia, kei chu a chhiahhlawlh mai ka ni. Nakinah kan la sawi ṭha dawn nia, tunah a hun rih lo" ka bula ding melh chho hrawk pah hian

"A ṭul teuh lo, Gym pawh i kal tawh lo vang" ka ti vin hlar a, nui vur vur chungin min pawm thut a, chak viau lo se chu min tlukpui ka hlau khawp ang, mahse a chak hrim hrim a, hlauhna ka nei lo mai chauh zawk a ni. 

"Aw le ka Lalnu, i thu ang zelin le, Valpuia nen pawh engmah kan sawi lo ang" tih leh kan room lama min pawm phei a rual nghal a, kawngka bul kan thlen chuan

"Mut tui vek u fate u, Thangsang nangin kawngkapui kha kalh ṭha la, mu har tawh s'u"  tiin kan fate chu a be leh lang lâng a, kei chuan sawi ve tur reng ka hre rih lo a ni ber e.

"Eng nge ni leh ringawt ta?" min kuah a tum ruala ka lo tawlh sawn vat chu a hamhaih deuhin ka hria, khumah kan mu fel vek tawh a, kei tak paw'n ka lungawi loh chhan ber chu ka hre bik chuang lo.

"Min kuah rih lo mai teh zanin chu, puan pawh a hrang ve vein sin mai ang" ka sawi zo hman ṭawk ang tihah a âwm ngheng ri dawt khawpin min pawt phei thut a, ka inring hman lo hrim hrim. 

"Kha ber kher kha chu ka thei lo ka Lalnu, lungawi lo tawh lo la ka Duat, i hmelṭha si, thinrim reng i inhmeh lo a nia, ka hmangaih em em nu hian hmeichhe dangte kha a lo thik vel a, âw ka va lawm tak!" duat zeta nautê pawm ang mai hian a âwmah min kuah bet a, a ṭawng dan vel chuan ka insum theihna a tichhe leh ta nge nge.

"Ṭawngthei viau ṭhin suh LALCHHARLIAN! Ka ning tlat, i hneawm! Ṭawngthei si, lêrh si, upa tawh si, mawng poh bawk si, 'upat tawh lamah Gym ka kal e' i ti kual vel a, sek pawh i sek lo, i taksa a chhah em em ringawt" ka ti hmawk hmawk a, ka thei dawn lo tih ka chiang bawk nen min kuahna aṭanga tal chhuah chu ka tum buai lo law law.

"I sawi dik vek a, mahse sawi kim loh i la nei a nia ka Duat. Ka hmelṭhatzia te, ka pian nalhzia te, ka felzia te, ka nupui ka duatzia te, ka fit-zia te, ka zeizia te, sawi kim vek law law la ka Duat" a rawn la ti ta deuh deuh a, chhan dan tur ka hre tawh lo lutuk chu ka nui tawp a, ka nui tih a hriat rualin a la phur em em zui.

"Ṭawngthei pa, harh bawk si" chiang zeta kan inen hnu chuan ka ti sep a, ka nuih a za ru reng a, ka hmelah a lan vek ka ring.

"Min hmangaih em em nu, thil ho tê avangin i rilru tinâ tawh suh aw, i rai leh nghal. I rai avang hian i rilru a dik lo deuh ṭhin tih chu ka hre tho va, mahse min ring tawp rawh, kum 1000 pawh dam dawn ila ka hmangaihna che hi a dai ngai chuang lo vang" thum dam dapa a tih chuan a biang chu ka biangin ka va nawr a, maimitchhing vang vang chung hian

"Min hrethiam teh, ka ring lo che pawh a ni lo, ngaihzawng min neihsan kha ka hlau êm a, chu bakah ka rilru a kal dik lo nasa hman lutuk alawm le" ka ti thawp sep a, ka aw chhuak chu a pangngai viau bawk.

"Hriatthiam i ni e ka Duat, muhil daih ang" tih leh kan puan sin chu siam ṭhat a rual nghal a, a ruk tak chuan ka inthiam lo ve tak tak, nutling pui tawh si kha naupangchhia deuhin ka awm kual vel a, kan chhungte'n hre phei se chu ka zak hnuhnawh khawp ang.

Chumi zan aṭang chuan lungawi loh tih vel engmah ka nei tawh lo hrim hrim a, ka hlim em em pawh a ni chuang lo, ka awm dan a pangngai hle thung. A chang hian chawhmeh rim ngaihtheih loh ka nei leh thut ṭhin a, kan fate lakah pawh ka inthlahrung ve reng. Chhara khan a sawi dik chiah, kan fa hmasa ber Valpuia ka pai lai ang chiah khan rai ka lá nâ phian a, ka nau pai a lo fual deuh hrim hrim bawk nen ka thil tihna reng rengah ka fimkhur zual khawp mai. Chhara lah chuan duat namên loh hian min duat a, min duat hlum lo chauh hi a ni ber. Pasalah ka nei lo vang tih ka hlau tak zet, heti ang em ema mihring harhvang leh zuanzâng, a hun leh hmuna tlawm hreh miah lo mipa hi chu tu hmeichhia paw'n pasalah nei se an hlim lo bik lo vang. A ṭul chuan a thiamna ngeiah pawh a tlawm mai ṭhin a, mahse eng dang vang a ni lo, kei min hmangaih vang a ni.

Tlai khat a office lo bân hma Valpuia ka titipui chu phone number vel chungchang bawk kha a ni a, Valpuia sawi dan chuan hmeichhe pakhat mai ni lo pahnih pathum velin a pa number an lo dil a ni àwm a, mak tih ka tih rualin zak lo ka va'n ti hlawm tak! Valpuia phei chuan a pa a hrilh duh lo zawk a, ka rilruah erawh hmeichhiate kan nasat tawhzia a lo lut daih thung. Hmeichhe ṭhenkhat hi chuan nupui fanau nei lai an ni tih hre reng chungin an ngaizawng duh a nia, an mak ka ti ve thlawt. Keini erawh Chhara rilru a nghet hlauh a, chhungkaw hlim tak kan la ni thei zel zawk a, chhungkaw ṭhenkhat hi chu ngaihzawng inneihsan tih vel avang hian an buai phah fo ṭhin.

Nupaah hi chuan hmangaihna hian hmun luah hnem ber se, chu chuan inrintawnna leh thil dang chi hrang hrang a hring chhuak a, nupa nun pawh a nghet nge nge ṭhin. Hmangaih tih avanga inhauh loh ringawt a ni lo va, inzilh loh ringawt a ni lo va, hmangaihna hi chuan a huam zau em em a, hmangaihna avangin kan hmangaih te kan vin hrawk hrawk chang a awm ang a, kan zilh chang a awm bawk ang a, hmangaihna hi zawng a mak ve ngawt mai. Tin, nupa inkarah hi chuan a hmeia pa hian intuaihnúm leh hriselna lam ngai pawimawh zel ila, nu nih tawh avangin che ṭawp kher lo ila, pa nih tawh avangin che upa nghal em em lo bawk ila, a bulṭhut chu hmangaihna bawk ni se la, engkim a kal dik vek a ni mai.

Nî leh thla liam ang zelin ka pum chhunga nautê pawh a upa ve tial tial a, a tawpa tawpah chuan nautê; kan fa parukna tur kan neih belh leh ta. Pa ber duhthusam ang ngeiin hmeichhia a ni a, a lawm lutuk chu kan chhngte paw'n an chhaih phah fô va, chuti ang tak chuan fanu a awh ka ring ngai lo, ka ring thiam lo zawk a ni. Vanduai thlak takin hliam ka nei deuh a, Doctor te thuráwn angin ka insiam nghal ta daih bawk a, an sawi dan chuan nei leh chi ka ni tawh lo a nih hmel. Engkimah Chhara ka râwn hmasa vek phawt a, a remtihna thlapa insiam ka ni a, ka upa ve tawh tho bawk nen kei tak paw'n insiam chu pawi ka ti hran lo. Chu bakah ka taksa lamin nautê hrin leh a zo tawh dawn lo bawk a, insiam ngei ngei a ngai zawk niin ka hria.

Kan fanu chu nitin zantin mai hian a pa'n a pawm deuh chawt a, a puak loh leh a bual a, a ek nen lam phur em em hian a ti vek zel a, min awl hneh vet vet khawp mai. Chaw ei thei rual a nih aṭang amah hlirin chaw a barh a, a siamsak a, buaipui loh lai a nei mang lo tih theih tluk a ni. A kum khat tlin nî te chuan office-a hruai a tum nghe nghe a, a enkawl ṭhat dawn thu leh nautê tana pawi thei thil engmah a tih dawn loh thu a sawi lâwk thlap a, mahse ka phal ta lo, a tih chi em em loh tlat a tin ni! An inawm tlei hnem ngáng bawk nen kan fanu chuan a pa a ngai em em a, hnutê tui ka pek loh hi chuan a pa bulah bak a awm duh ngai lo tluk a ni. A mut te hian a pa taksa si lovin a muhil ngai lo va, a pa tho hlek se a rawn ṭap nghal zel a, a muthilh ngheh hma hi chu a pa paw'n a thawhsan ngai lo reng bawk.

"In lo lei em? Ka siam nghal duh a nia, Bawihtei chu a la muhil rih, a la ṭap miah lo" ka pasal leh kan fate in chhunga lo lut mêk chu ka lo be nghal a, mahse engmah an keng paw'n ka hre lo.

"In lo lei na nge?" ka tih leh chuan

"Ka zawng nasa lutuk, a awm ngâng lo" a lo ti ve nghal a, mi mah chawhmeh atan siam châk tawh teh lûl nen, sangha an lo lei haw lo chu ka hnual vek thei.

"Engtin nge a awm loh theih le, niminah pawh ka hmu reng sia, phai sangha an zawrh ṭhinna bula step chhuk thlaah khan in kal em?" ka ti leh niah niah ringawt a, Chhara bawk chuan

"Kan kal àwm pawh ka hre lo, kal tura min tih lai ka hre lo hrim hrim" a rawn ti ta mai, ka va han lungawi lo hnuhnawh tak, kal tura ka hrilhna hmunah an kal lo tih ka hrethiam nghal mai bawk.

"Awi, ka hrilh ngun tehreng che nen, engtin nge i hriat loh theih zawk? Khaw maw pawisa kha min lo pe teh, keima'n ka va lei mai ang e" tih leh chet ka rual a, min lo chelh ding thung a, pawisa pawh chu min pek a tum chuang lo a nih hmel.

"La kal lo teh" tiin fridge chu a hawng a, ka beisei loh lutuk ka hmu ta ṭeuh mai, eng nge a awmzia? Engtin nge kan fridge chhungah chuan sangha a awm thut theih?

"I lawm em? Ka rawn hawn lai pawh kha i hre lo a ni ngei ang, lui sangha kher i ei châk bawk si a, ka zawn kual hrep phah. Nimin aṭang i sawi tawh si a, ka lo lei ṭawk a nih hi!" a tih leh chuan

"Khawia mi nge i lei a? A va'n tam ve le, nichin khan sangha lei turin in kal nge kal lo" ka ti hliai a, nui sun sun hian

"Naupangho thil ka eipui daih" a lo ti awlsam et a, amah pawh en tawh lovin sangha chu ka lá chhuak a, chhunah khan a lo haw ngei a, mahse sangha a rawn hawn awm reng ka hre lo thung.

"Awi, a tui dawn lutuk" tiin sangha chu tuiah ka chiah mawlh mawlh a, a vai vai paw'n ka siam phal rih lo, ka ui, a tui dawn bawk si.

"Tunah tak hi chuan sangha ka ni châk" ka hnung lam aṭang hian min rawn kuah a, ka nghawngah a khabe a nghat a, a kut chu a awm hle hle thei lo leh tawh.

"Inla zei vel viau ṭhin lo teh Tar Hot, min lo pui zawk rawh" ṭhen sak paha ka tih chuan

"Khati ang khan min ko ziah suh aw, min ko ṭhang dawn tlat. Ka Hot tih chu ka hre tho va, mahse ka tar kher lo, ka la fit lutuk, putar an fit ngai lo" a rawn ti duah a, a duh loh hi a pe nâ ve ṭhin roh sia, a lawmawm letling ṭhin. 

"Awi, a tui dawn ê" ka ti leh ringawt ṭhin, sangha chu ka ei châk ve êm bawk a ni. 

"Sangha ai hian min lo ei zawk la, tui min ti ngawt ang" ka beng bul cheta a tih chuan ka nui ri hak a, he pa pui roh hi eng nge a hriat ka hre lo, nge kan inngaihzawn lai ang khan a inla zei uchuak leh zawk dawn!?

"Zanin chu kan pahnih chauhin kan lêng chhuak dawn em ni ang?" ka biang fawp zeuh zeuh pah hian a ti leh sup a, a thil tih lai chu a tawp mai dawn emaw ka ti a, a tawp duh der lo. 

"Ka hre nâng, ei rawng hi bawl phawt teh ang" ka tih lai chuan nautê ṭap thawm a rawn awm a, a lam hawi chho nghalin

"Tun atan chuan i fanu awi mu turin kal phawt mai rawh le, nakinah kan sawi ṭha dawn nia" ka ti a, ani ve thung chuan

"Min MUAH phawt la" a ti tlat a, a sawi dan ber kher chu a fanu hmui leh biang vel a fawh kual dawn a sawi ṭhin a ni a, ka bulah tak hi chuan chuti angin a sawi ngai lo. 

"I chet vat loh chuan kan fanu khi a ṭap reng a ni mai" a la ti tlat zui.

"MUAH" tih leh inher ka rual a, a lam hawi zawngin min kuai her chiang khawp.

"A thu ringawt ka duh lo, a tak ngeiin ti rawh" a rawn ti leh ta, a va han buaithlak ṭhin tak, kan fanu lah chu a ṭap nasa tawh si.

"A ṭul kher emaw ni le, a hun lo ṭhin" ti niah niahin a hmui chu ka han fawp zeuh a, inlâk hran ka tum rualin min fawp tawk a, kan inthlah fel hnu chuan a nui sun sun a, kei pawh chuti tho. 

"Zanin chu aw, kan fate kan bum dawn nia" a fanu awi tlei tura a kal dawn chuan a ti a, engtin tak bum ang maw!

"I fanu pawh maw!?" ka tih chuan choka a chhuahsan titih tawh na chungin

"Aw, kan pahnih chauhin ka tih tawh khâ" a rawn la ti hram hram a, a kal liam hnu chuan ka nui hak hak a, kan fate bum vel chu a ti leh tak tak ang ka ring, mahse engtia bum nge a tum le, kan pahnih chauha hun hman te chu ka châk ve tho va, kan fanu erawh ka ngaihtuah ang reng, eng pawh ni se a kutah dah phawt teh ang. 

Bonus Pic

THE END