𝐓𝐀𝐑 𝐇𝐎𝐓-𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 2)

TAR HOT-A 

By

Havali Adam

Chapter 2

Thla a ral a, thla thar kan chuangkai zawm zat a, kâr hmasa ber inrinni a lo thlen chuan picnic turin kan insiam sap sap a, kan phur hlawm viauin ka hria. Valpuia chenin kal vek kan tum a, amah Valpuia tak chuan kal a tum em em lo zawk maw le, a pa'n inhlawh lova kal turin a ti a, a kal mai chauh a ni. Kan chhungkuain kan inphur a, motor chhungah pawh kan tawt ve tawh lam lek lek chu a ni e. Pa ber lah chuan fa neih belh te a la ti ta deuh deuh a, hmeichhia kan neih hma chu ṭan a lâk tur thu a sawi kha a nia, a ti leh tak tak ang ka ring. A hma te kha chuan mipa a awt a, mipa hlir panga lâi kan neih tâkah chuan hmeichhia a duh ve tawh te pawh a ni mahna.

Khua a thiang ṭha em em a, a hmaah Têbera pawm chungin ka ṭhu a, a hnungah mipa pathum an ṭhu thung a, eng eng emaw ni an sawi ri laih laih bawk. Chhara chuan hla a play a, a zaipui leh zauh ṭhin a, kei pawh ka hlim ve khawp mai. Thla tin hian a nupui fanaute hawi khawthawnna hun min neihpui ṭhin a, a tlangpuiin thla tawp lamah a ni ziah a, a ṭha phian ka ti, kan inpawh phah bawkin ka hria. Valpuia têt lai aṭang tawha a tih ṭhan a ni a, tun thleng hian a la ching chhunzawm zel a, min ngaihtuah vang a ni ber. Amah paw'n a sawi tawh alawm, ka lawmna hi chu a hre thei sia, han thinrim khum viau dawn ṭhin mah ila ka thei tak tak ngai lo. Ka hmangaih vang chu thuhran ni se, mi tihhlim dan leh ka mood thlak danglam dan a hre ve hrim hrim a ni.

Kan picnic-na hmun tur lam panin kan tlan zel a, darkar 1 dâwn vel kan tlan hnu chuan kan thleng a, Tlawng lui hnaih deuh tak hi a ni a, an siam thar a ni nghe nghe. Siam thar ni lo mah se ka hre chuang lo vang, picnic spot lam hi chu ka bengkhawn lo ve êm mai. In chhungkhur thil leina tur ka hre em em ringawt a, parda tur puanthán te hi ka lei nalh thei fû a, ka ṭhiante phei chuan ka chhuahpui an duh ngei ngei ṭhin. Nu nih tawh hi chuan kan rilru sukthlek, kan thil ngainat zawng leh kan ngaihven zawng te hi a danglam nasa em em a, nulat lai ang ngawt kha chu a nih theih tawh teuh loh. Bazar hlek ila mahni pawh inngaihtuah hmasa lovin pasal fanaute thil tur rilruah a rawn lang hmasa ber a, a tawpah keimahni kan inngaihtuah ve leh hnuhnawh chauh ṭhin.

Tun thleng hian kei phei chu ka la ni, ngaiah ka nei tawh zawk. Nu ṭhenkhat hi chu pasal fanaute ai anmahni an inngaihtuah hmasa phawt a, khawlaiah te hian an mawi thei lah lah khawp mai. Ka ṭhiante zingah ngei pawh chuti ang chu an awm, mahse ka sawisel ngai chuang lo. Ka hlauh ber zawk chu nupui ṭha lo tak nih te, nu ṭha lo tak nih te a ni. Kei ngat phei chu pasal te hlawh ringa khawsa lian ve mai mai ka ni leh nghal a, ka pasal hlawh tam tham viau mah se pawisa heh tak nih ka duh ngai lo bur. A mawi tâwk leh a awm tâwk te hi chu a awm ve a, a bikin hmeichhia hi chuan neuh neuh kan ngah hrim hrim. Make-up te hi ka nei to ngai lo reng reng, chu bakah kan tun lai zawk zawk tawh lo va, han inchei parh deuh hlek hi chuan lérh nih kan hlawh nghal zel a ni mai.

"Camera kha i keng ém?" ka pasal chu ka en thuai a, kan kal dawn khan keng turin min hrilh ngei a, a rawn sawi tâkah chuan ka theihnghilh tih ka hre chhuak nghal. 

"Keng nâng" ka tih chuan

"Âw, keng rawh ka tih che khâ, Valpuia hian a keng ang em áw" ti awn duaiin a call zawm zat a, an inbiak danah a lo keng a ni ngei ang, a kal sawn zui nghal bawk.

"Nu, i lo cheng ve dawn lo mi? Au Thangsanga te bulah sawn ka cheng ve châk ê, ka lo cheng ve?" Têbera lam hawi pah chuan

"An chenna te saw chu a thuk bik alawm, i pil daih mai ang. Kei pawh ka cheng ngam reng reng lo, a thuk lutuk" ka ti a, naupang chennaa cheng ve naupangte chuan an lo ko va, inti hleuh thiam takin a hleuh phei reuh a, a ute bula chen châkna pawh a nei leh tawh chuang lo niin a lang. 

"Lo hawi zeuh" aw lo chhuahna lam ka hawi rual chuan thla min lo lâktu ka pasal chu ka hmu nghal a, nui sakin ka hawi sawn ve leh mai a, ka ke chu tuiah ka chiah a, ní sat dan te chu a nuam tâwk hle.

"Valpui, lo kal teh, i nu nen hian thla min lo lâk lawk teh" tiin a fapa a au ri lawng lâwng a, ka bulah a rawn ṭhu nghal tharh a, Valpuia tui cheng laklawh lai pawh a rawn chhuak ve mai bawk. 

"Chhara!" ka ti hluai a, ka hawi kual zuk zuk a, kan awmna a ualau si, thlalak lai taka min fawp kher chu ka zak a ni ber. 

"Eng nge? I biangah a nih khâ, i hmuia ka fawh nghal loh! Le! I tih ve hun, Valpui lo hmet leh teh" ti zungin zungin Camera lam a hawi a, a thu anga awm ka tum teuh lo.

"Thil ṭul lo lô hi tih ching suh, mi an tam em hi!" tih leh thawh ka tum nghal a, min pawt ṭhu tur chu ka tawlh palh a, ka tlu thlawrh tur min lo vêng bawk nen kan pahnih chuan kan kawr hak lai chawpin tuiah kan inchiah huh ta vek mai. 

"Ti khan lo hmet mawlh mawlh rawh" a la ti ta deuh deuh a, Valpuia chuan nui vur vur hian kan thla a la char char a, tih vak ngaihna hre lovin ka nui tawp ringawt. 

"I va'n ha pan ve" ka âwm bawr en run pah hian a ti leh daih a, ka âwm chu ka en ve nghal a, ka kawr hak lai a huh bawk nen ka Bra hren chu a lang tlang titih vek. 

"Awi!" ti hluaiin ka hup deuh a, mahse awmzia a awm lo khawp. 

"I ha pan viau na chu a mawi tho" a nui hmel ka hmuh rualin ka melh deuh kâwk a, a nuih a za tulh tulh emaw tih tur hian a la awm zui. 

"I kawr kha phelh teh, ka lo hak thuah ang. Kan kal dawn khan kawr pangngai ha hman lêk lovin min hmanhmawhpui a, ka hak pan chhan hi chu i thiam loh a ni" ka tih chuan a phelh ve mai a, a ngawi hle hle dawn emaw ka tih laiin

"Ka nupui ka it em em zel che hi chu lawm zawk teh, tu mipa paw'n hmeichhe âwm bawr te chu an láwm vek alawm, a bikin an nupui te. Pastor leh kohhran upa chenin, chu vang chuan vawi khat chiah" a rawn ti a, ka hmuiah tak min fawp a nih chu! 

"Tûma'n min hmu lo, i láwm em!?" hawi kual zuk zuk pahin amah bawk chuan a ti leh nghal zat a, ka hawi kual a, tûma'n min rawn ngaihven lo tak tak.

"E hê, khaw nge i dul khá?" ti hliaiin a taksa chu ka en kual dân dan a, a mak tawp, a dul kiar lek lêk kha a bo daih. 

"Khá máw, i mitmeng aṭang khan ka taksa hi mawi i tihzia ka hre thei. Thla khat vel érh awrh chauh Gym ka la kal a nia, ka kal rei hunah phei chuan kawr ka hlih pawh i phal tawh lo ang" a ṭawng leh duah ta, ka zawhna pawh a chhang chuang lo.

"Pa, au Thangsanga te bulah sawn min lo chenpui ve, ka cheng ve châk" Têbera aw ka hriat rualin ka hawi sawn ve ta chauh. 

"Lo kal rawh" an inbiakna chu ka ngaihtuah chiang a, ka harh chhuak chiang khawp. 

"Hei hei hei! Kal pui ringawt suh, in che sual ang e. Chhara, in che sual tak tak ang e aw, Vapui, Thangsang, i pate kha lo veng teh u" hlauthawng ru tak hian ka ti lang lâng a, puitling chenna lamah phei hman tawh hek!

Ka pasal leh kan fate tui cheng chu ka en reng a, Chhara chuan Têbera a pua a, a hleuh kual pui a, an che sual thut ang tih mawlh ka hlau. Têbera lah chuan nuam a ti nasa mai si, ka sawi angin a ute pahnihin an vêng deuh reng a, tlêm chuan rilru an tihahdam deuh. Rei pawh awm lovin an lo chhuak ve leh mai a, Chhara chu min lo zui turin ka hrilh a, bathroom-a ka inthlak chhung zawng min nghak a, min veng a ni mah zawk. Ka kawr hak lang tlang deuh thaw khawpa pan chu ka hlip a, ka sâwr fu a, Chhara kawr zawk ka ha a, a chhah daih zawk bawk. Ka tan chuan a lian ang reng viau a, a sei em em pawh a ni lo, ka tan chuan a hlai ṭha khawp. Pa lian tak a ni lo va, sa muk lampang a ni a, Mizo zingah chuan a tâwk vel viau, chu vangin a kawr chu a sei thei lo hrim hrim, mahse a hlai ta a ni.

"Kha, sâwr fu leh deuh teh, ní sâah pho ro ila, ka ha leh mai ang. Kawr hak thlak ka keng lo, min tihuh khanglang a, tui chen ka tum reng reng hleinem" bathroom kawngka ka hawn hnu chuan ka ti a, ka kawr chu a sâwr fu leh a, ka sâwr nasa ve tawh hle khan ka hre sia, a sâwr meuh chuan tui a la rawn luang chhuak nasa hle.

"Kawr ha lovin awm reng suh, a dang ha rawh, nangte chuan hak thlak i keng ang chú?" ka tih chuan 

"Ka peih rih lo, kawr ha lova awm hi a nuam rih, tui ka la cheng dawn" a ti tlat a, a kal daih a, motor chunga ka kawr a pho lai te chu ka en reng a, zep lovah chuan ka pasal mah ni se a pian a nalh thlawt. 

Sán zawngah fit 5 leh inchees 10 vel chu a ni ve a, a taksa a muk ṭha bawk nen a lang tê vak lo. Mipa dang nen ka khaikhin a, mipa tam tak ai a taksa a lian zawk a, a bân a lian zawk a, a chawn nen lam a lian daih zawk. A ṭhiante angin a pian a zuih ṭut ve lo va, a kekawr bul hak te chu a malin a tâwn mar ṭha khawp mai. Chutia ka pasal ka thlir reng lai chuan nu pakhat hian min lo ko va, ka hming ngatin min rawn ko va, ka hming a hriat dan erawh ka hre lo. Ka phei ve mai a, chawhnu lam a ni tawh tho bawk a, ei rawng kan bawl dun a, mahse kan hmanhmawh lem lo. Dar 3 a rik tâkah chuan tui cheng peih an awm tawh mang lo va, Chharate pafa pawh an inti ro vek tawh a, keini'n ei rawng kan bawl fel titih tawh bawk. 

Dar 3 leh a chanve velah chaw ei kan peih a, kan fate chu Valpuia hovin an ei a, keini pahnih erawh nu leh paho eina ah kan ei thung. Chaw kan ei kham a, rei lo tê kan ṭhu khawmuang a, kan titi laih laih a, kan hlim dar dar hlawm hle. Ka hnung kham deuh chu ka ban leh ṭhin, ka ban pha chiah si lo, Chhara chuan a lo hrethiam a ni chêk ang chu! A ṭhianpa biak mawlh mawlh pah hian a rawn khawih a, min en chuang lo va, a kham lai tak a la khawih fuh chiang em em zui. Nâ vak lo hian a chul deuh a, a chum bawk a, rei tak pawh a chum lo, a kham lai a chum reh vek thei maw le. Dar 4 rik dawnah kan haw a, a tam zawk chu Bus-in an haw hlawm a, Department Hire a ni a, keini pawh chuang ve turin min sawm nghe nghe a, mahse tûmah kan chuang lo thung. 

Nghaka leh Rohlua chuan a pa an be char char a, kal leh huna tui hleuh inzirtir tur te'n an hrilh lâwk vel a, Têbera pawh a lo inrawlh nghal vat bawk. Valpuia leh Thangsanga erawh phone an en a, eng tak en ang maw! Ka ti leh pek ṭhin ang, Valpuia hi chu tlangval fel tak a nih ka ring. Pawl 12 a nih thleng hian phone a la nei miah lo va, a ṭhiante zawng zawngin an neih vek tawh laia kan thu a awih tlat te, nu leh pa min zah thiam thiam em em te hi ka chhuang ṭhin. Thla hnih liam ta mai khan a pa'n a leisak ve chauh a, a pass ve hlauh chuan college a kal ve tawh dawn vang a ni pakhat. A nau Thangsanga paw'n phone chu a awt ru ve reng tho, a u ta a en ṭawm mai ṭhin a, mahse neih kan phal hma chu a ngen lui dawn lo tih ka chiang em em a ni.

In kan thlen chuan kan inbual ṭha leh vek a, ka inbual zo meuh chu ka chau ru hle ringawt. A chhan ka hre chiah lo, chhunah khan eng vak ka ti bawk si lo va, ka ngaihtuah neuh neuh a, boruak kha ka zo lo ni ta berin ka hria. Mi dang erawh an chau paw'n ka hre lo, an awm pangngaiin an awm mai a, Chhara in tur bik thingpui ka lúm a, an vaiin inkhel an en a, an en tui bawk a ni ang Têbera nen lam an ngawi ṭhap mai. Thingpui ka pek zawh chuan room-ah ka lut a, cream ka inchulh a, phone khawihin khumah ka bawk zawm zat bawk. Facebook-ah ka lut a, notification chu ka check a, Chharan thlalak pakhatah hian min lo Tag a, ka en chiah chu ka khi ver ver ringawt.

Ka bianga a fawp lai tak hi a ni a, darkar pawh a liam hmain comment a tam hman khawp mai. Chhara hi chuan kei aiin hmel hriat a ngah daih zawk a, Facebook-ah te hian Friends leh Followers a ngah phian a, hmeichhia zawk mah ni ila ka tluk lo hle. A thlalak post chu ka comment ve nghe nghe a, min rawn reply nghal a nih chu! Inkhel a en emaw tia, chutah in khatah kan la awm reng zui, mi dang comment-na chu pakhat mah a chhang leh tawh chuang lo. A like sak vek thung a, nupa inhmeh tak kan nih thu deuh hlir comment a awm hlawm a, hlim avangin ka nui reng ringawt mai a ni. Whatsapp khawihin kan ṭhianho group-ah ka lut leh a, chuta ka thil hmuh chuan min tinui hnem kher mai, a nuih loh theih loh.

"Ṭhiani, in pa hi nang ai a khal zawk chiang, i ṭan a ngai a nia, hmeichhia ai mipa khaltir zawk reng reng" ka ṭhiannu hnen aṭangin message ka dawng nghal a, Chhara thlalak chu ka en nawn leh a, ka nui dir char char leh ta nge nge.

"Chu bakah a mawng tam hi a lian sâwtin ka hria, a hma khan ka hmuh ngai pawh ka hre lo e a!" message a rawn thlen zawm zat a, a sawi dik chiah, Chhara mawng tam chu a poh têrh tûrh lutuk, a kekawr mawng a la inzep zui.

"Upat tawh lamah Gym ka kal hnuhnawh e te a ti vel a, Gym kal hi a ngeih viau a ni ang" tih ringawtin ka chhang a, nui lai lem a rawn thawn tuarh a, ka type lai chuan

"Kan pa ka kal tir ve dawn chiang, a ṭha phian tak ang. U Chhara hi chu âw, a va'n inenkawl uluk ṭhin bik tak, kan pa ve hi chuan a duh kher pawh ka ring lo" tih hi a lo thawn leh a, an pa mizia ka ngaihtuah a, ani thei dawn lutuk!

"I ti duh e a! Kei chu ka phal lo chung a kal lui zawk alawm, tlangval emaw a la inti tlat hi a buaithlak, amah ber ber hian nuam a ti leh ta nghal a, Valpuia nen an kal dun ṭhin, a kal rei pei tak tak ang emaw!" tiin ka reply ve leh a, kan thusawi a peng tial tial a, a tawpah phei chuan Chhara thlalak lam reng kan sawi tawh lo.

Kan inbiak zawh meuh chuan dar 10 a lo ri ṭep tawh a, hriat loh karin hun a kal chak ngei mai. Kan ṭhianho hi nutling vek tawh kan ni a, kan titi a rualkhai thei em em a, whatsapp group hi chu kan siam hnuhnawh ve mai mai a, mahse a ṭha phian. An pasalte chungchang leh an rilrua awm ang âng an sawi ngamna a ni pakhat bawk a, a taka kan awm khawm chiah phei chu kan ri nawk nawk zel. Chhara chu ka nghak deuh a, a lo luh ve mai ka ring maw le. Nghah pahin Facebook-ah bawk ka lut leh a, kan ṭhianho group-a kekawr mawng inzep ṭut khawpa Chhara mawng lanna thlalak ang chiah chiah chu group pakhatah hian an lo post a, like tu pawh an tam narawh e! Thlalak chunga thu inziak chu ka chhiar a, ka chhiar lai takin Chhara a lo lut a, ka nui hmel a hmuh rualin a nui ve nghal ringawt a, fiamthu tak hian

"Tar Hot" ka lo ti a, nui ruh ruh pah hian min rawn bawh a, ka phone-a mi chu kan pahnihin kan en dun a, ka pasal hming atan 'Tar Hot' tia an phuahchawp chu ka nuih a zat rualin inhmeh dan riau a nei tlat a ni. 

"Gym i kal ve a, i bân lamah a thawk tawp lo mai, i mawng tam chiah a ṭhang, khaw maw inlet teh, mawng poh pa" nui var vara ka tih chuan a tal sawn thuai a, a zak emaw ni, awihawm loh zawk.

"Ka supplement ei kha a thawhna lo turah a thawk daih a ni ang, chu bakah ka mawng hi a ṭhang reng reng lo, a ngai reng" a ti niah niah a, a nui miah lo leh nghal.

"Awi Lalchharlian, khati ang khan min en vel lo teh, nangmah i ang lo lutuk, zahna tlachham zet khan awm leh zawk rawh" tiin ka nui char char a, a rawn nui ve leh ta ringawt a, nuihza lo tih hriat zet hian a ṭhen leh vak ṭhin, ka nui nasa lutuk chu ka pum a nâ vek. 

"Min nuih tawh lo teh, pasal azawnga hmelṭha ber hi ka zak ve tho a nia, khati ang group-a post tu lah kha ka hre der lo leh nghal, engtin nge a neih theih reng reng le! Ka ṭhiante paw'n min rawn thawn sup sup alawm, zanin chu phone khawih lo phawt mai teh ang" a tih chuan ka lo la nui reng a, a hmel leh a din dan zawng zawng chu ka láwmah a tla vek tawh tlat. 

"Khaw maw a sir zawng khan han ding deuh teh, i mawng a dep vak lo tih chu ka hre sa tho va, mahse Gym i kal hnu hian a poh belh chiang alawm, i nupui hian ka hre chiang lutuk, hai theih a ni lo" ka nuihza lutuk a reh ta deuh a, mahse ka nuih a la za ru reng tho. 

"I va ninawm reuh e aw, ka ke lam ka khawih vang kha a ni hrim hrim. Ke tha tih chak ka duh avangin squad ka ti tam ang reng sia, kha kha a chhan a ni chiang mai" a tih leh nuah nuah chuan

"Lo mu tawh teh, ka fiam tawh lo ang che. Kawngka saw va kalh leh lawk si teh, ṭha tê têin awm la, ka fiam tawh miah lo ang che Tar Hot" ka lo ti a, min melh no lo teh e! 

"Nang pui roh hi i len belh chiang alawm, vawiin pawh khan mi dang nen ka khaikhin vel che u a, i taksa hi a len belh chiang a ni. I âwm pawh hi a len belh, i bân pawh a hma ai khan a khauh ṭha daih zawk" pangngai takin ka ti a, a taksa chu ka tawk dên den a, ka bulah a mu run tawh bawk. 

"Lian ve bawk ang chú" tih chauhin min chhang a, zan tir lam khan ka chau viau emaw ka tia, ka nuih nasat lutuk vang nge ni mut hun tawhah ka la harh kur mai.

"Thlalak i post kha a fuh tawp, ka rin ai a mawi daih bawk"  ka tih chuan a rawn nui suk a, rizai chu min sintir a, ngawi rengin kan mu ta hle hle. 

A tukah chuan thawh ka'n hai chiang khawp a, mahse ama'n ei rawng a lo bawl vek a, inkhelh dress-in a lo la in-dress deuh thlap bawk. Ka rin dan chuan a inkhel lo haw laiin ka lo la mu a ni ang, ni lo se a inthlak daih tawh ang, zing dangah te chuan a ha rei peih ngai hleinem. Choka ka luh rualin bawlpui ka tum a, mahse a lo bawl fel vek tawh zawk a, a siam siam ang âng chu ka ei ta ringawt. Hmangaih berte nena nupa nih hi chu a nuam ve alawm, inhmangaihna na nâ na chuan inhriatthiamtawnna a awm lo thei lo va, inchhawk a ngaih paw'n kan inchhawk mai zel a, Chhara ang mipa hi pasalah ka nei lo ang tih ka hlau. Thawh hreh a nei ngai bawk si lo, mahse a luhluh a chhuah tawh vek vek hi chuan a buaithlak ṭhin ta a ni. A àwm tho e, mihring kan ni miau a, tûmah kan famkim thei tak tak hleinem.

Thla 3 a ral leh meuh chuan pa ber pawh a pian a mawi zual tawh khawp mai, a mak lutuk, ka pasal chu ka hmu tài tlat a nih chu! A hmelṭha tih chu ka hre tho va, mahse Gym a kal hnu hian ka hmu hmelṭha zual. Amah avangin a ruka exer lâk te ka ching chho ṭan a, a ruk tih takah tûma'n exer ka lá ṭhin tih an hre ngai lo. In chhungah ka lá mai zel a, chu bakah kan ṭhiante zinga nutling ber nih ka duh lo a ni. Anni chu nutling ṭhah ni mah se an pian a la nalh hlawm em em a, tunah chuan ka pasal inchengvawng lutuk azarah kei ngei pawh taksa hriselna lam leh mawina lam hawi ka hnaih ve ta hial a ni. A tir kha chuan ka peih miah lo tak tak, mahse Chhara ber khan

"Mizote hi chu kan inla upa hma thei lutuk a, a ṭha lo. Hnam changkang zawk leh fing zawk te hi en ila, nu leh pa an nih hnuah pawh an taksa an la enkawl ṭha em em zel a, an hmel pawh a ṭhat rei em hi! Keini ve te chu a hmeia pàin kum 40 kan pel dek dek a, upa viau tawh emaw kan inti nghal ringawt zel" a ti mauh mai si a, khami ni khan ka harh chhuak ve ta chiah a ni.

Zawi zawiin ka exer lâk ṭhin chu ka taksaah a rawn lang chho ṭan a, ka thau mah mah ka hlauh avangin Green Tea te ka in ṭhin a, chu erawh ka ṭhiante min râwn a ni. Cher nân Green Tea an in ṭhin tih vel ka lo hre ve der si lo va, a chang hi chuan ka ṭhiante ngei pawh hian hawi zau lo min ti thei ngawt ang. An hriat ang âng hi chu min hrilh hreh lém hlei lo va, kei paw'n ka záwm ve mai zel bawk. Ni khat chu kan inah an rawn lêng hlawm a, ka tih fel tur ho ka intih puitir zaih a, min ankhum nasa hlawm teh e! Exer lâk dan tur dang deuh hlek te min hrilh liam liam a, an tih hnu vek a ni tawh a, an hre chiang hlawm khawp mai. Chutih rual erawh chuan kei ang em emin fa an la nei ngah lo vek a, mahse an taksa angin ka taksa a mawi ve thei tih ka chiang, ka tum bur bawk.

Thawhlehni a ni a, Chhara leh kei leh Valpuia chu sitting room-ah kan ṭhu ṭhap a, Valpuia te result chhuah nî a ni a, engmah ka ti hlei thei lo, che sâwt lo tak ka ni. Pa ber pawh a bang chuang lo, chhun chawlh hmain a rawn haw daih a, a fapa pawl 12 exam result chhuak tur chuan a rilru a luah ve hle a ni ang. Dar 11 velah result chu a chhuak ta, link hmangin result kan en thuai thuai a, Valpuia hming chu kan zawng thla zel a, a tawpa tawpah chuan kan hmu ta, a lo pass ngei e. Chutah pass satliah a ni lo leh nghal, Distinction-ah a lo pass chu niin, subject palî ah letter a hmu ṭhawt a, lawm tak ka ni. A pi leh pute lam kan hrilh nghal thuai a, anni pawh an lawm ve khawp mai. 

Tlaiah chuan pass kan lawm nghal a, kan chhungte mai bakah Valpuia ṭhiante zanriah kan eipui hlawm a, kan tam ang reng, mahse pawi tihna pakhat mah ka nei lo thung. A hun lai a ni a, kâr khat hnua pass lawm daih thu a awm lo, a hun lai chuan a nih dan tur ang thlapa tih nghal vek mai tur, chu chu ka thupui a ni. Ka nu leh pate chu zan thleng an lêng tlang nghal a, kan ri laih laih a, kan in a zau ve viau tak na a, kan han awm khawm chiah chu kan chep lam lek lek a ni. Dar 10 leh a chanve velah an haw rém diak a, Valpuia ṭhiante phei chu an hawna a rei tawh. Mu turin kan room ṭheuhah kan lut zui sap sap a, mood-in a zir bawk nen zan boruak chu hip nuam ka ti hle.

"Nang nu hi tun lai chu i danglam riau mai, i cher deuhin ka hria" Chhara chu ka en zawk a, chhang chuang lovin khumah ka mu daih a, a ruk chuan ka nui tet tet thung.

"I va thau tawh lo tak tak ve a, ka lam lo hawi teh" ka dula kuah run pah hian a ti leh a, a hre chhuak thuai dawn tho va, zep ṭit ṭet lova hrilh tlang mai chu a finthlak zawkin ka hria. 

"A tara tarin i ṭang reuh bawk sia, ka ṭang ve a nih hi!" ka tih chuan a inbeng kang a, min en chiang sâwt khawp. 

"Ka ring deuh reng a! I pian nalh ta lutuk te, i hmel ṭhat belh ta lutuk te hi ka hmuh hmaih hauh lo" nui sun suna a tih zawh rualin

"Ka awih thlawt lo" ka lo ti nghal thung a, dik tak chuan ka awih tho va, ka awih lo der vel mai mai zawk a ni. 

"Awih thlawt rawh, ka hmangaih hliau hliau nu. I pian a nalhin i hmelṭha lehzual bawk sia, zanin chù?" a thusawi tawp ber chu ka rin lâwk ang chiah chiah.

"Phakar pa" ka ṭawng zo hman ṭawk ang tihah min fawp zui nghal a, ka pasal a ni miau a, tisa châkna lampang ko chhuak thei zawnga chet a lâk tawh hi chuan ka lo mamawh ve em em zel a ni ber e.

"Zei min va'n ti tak, i rilru ka hre vek" duhthusama nuama nupa nun min hmanpui hnu chuan nui pah hian a rawn ti a, ka chhiatkhum vak a, a nui nasa ngei mai. 

"Ka hmangaih bur che, Lal Ṭha Sêt sâwt nu, engtikah tak keini hian fanu nei leh ang maw! Kum 50 ka tlin hma hian nei hman ila ka ti asin le, Pathian lah hi a thu ropui si" a tih leh chuan ka nui tawp ringawt. 

"Ka hrilh tawh che khá, ka rai theih pawh ka ring tawh lo" ka ti sep a, ka aw chu a zawi ang reng viau, ka mut a chhuak ṭan tawh a ni ngei ang.

"Kan nei lo ta a nih leh a pawi chuang lo, nupa nun kan la hmang thei tho alawm" a tih chuan mut chhuak ru zetin a âwmah ka sik a, nâ a tih hmel loh khawp. 

"Eng nge? Sawi dik loh ka nei em ni? I pasal kum 50 tling ṭep tawhin ka la mamawh em em che te hi lawm hle zawk ta che, nupa nun te chu nupa kan ni miau a, hmang tur alawm kan nih! Kei chu ka lawm asin, hmangaihna hi chu thuhran ni se, tun thlenga kan taksa a la inmamawh tawn em em reng hi thil lawmawm tak a ni. A ṭha zawngin hriselna lam a nghawng leh zel bawk a, kei chu kan pahnih bik tê hian Honeymoon hman nawn leh mai ka duh" a ṭawng thum bul bul ri chuan ka mut a tichhuak zual. 

"I chau a ni máw? Naktuk chu keimah bawkin ei rawng ka bawl leh dawn a va ang ve, pawi lo, tun lai chu ka nautê lian chi hian duat i mamawh tlat" a kuta ka biang nul thuakin a ti leh a, maimitchhing chungin ka nui sak a, a hmui lúm nuam zetin ka chal a si tih bak ka hre tawh lo. 

(End of Chapter 2)