𝐓𝐀𝐑 𝐇𝐎𝐓-𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 1)

TAR HOT-A

By 

Havali Adam

Chapter 1

"Kal teh! I ninawm!" ka nam deuh sawk a, a ngai té bawkin ka dar a rawn chelh a, ka va han ning mai mai tak!

"Awm sawn teh, ka chet lai hi chuan min tibuai ṭhin suh" ka ti leh hmarh hmarh a, ka dul zawna kuahin khumah min bawh bet a, chutah che thei lêk lovin min la siam zui. 

"I rit si, mi delh run lo teh Chhara" ka tih pawh chuan awmzia pakhat mah a la awm chuang lo. 

"LALCHHARLIAN!" ti vakin a samah ka kek pawp pawp a, nâ ti hmel a pu lo hrim hrim a, a nuih a za zawk leh ta nghalin ka hria. 

"Han chhaih kawlh vel che hi chu a nuam chiang alawm, khum i siam reng erawh hmuh a hneawm" ti supin a inlet ve ta hram a, tur zetin ka melh hrep ringawt. 

"Min nuih reng reng suh, khum ka siam peih te hi chu lawm hle tur zawk i ni" a nuihza hmel ka hmuh rualin ka ti hmawk hmawk a, ka thin tirim tur takin a rawn nui ri vel a nih chu!

"Ka lawm tho a, mahse ka lawm lutuk lo. Zingah siam bawk, zanah siam bawk, i ning ve em em lo em ni?" tih leh mi awm hnaih sawt a rual nghal a, ka lo nam dâk âwrh thung. 

"Zanin chu?" a ti chiah chu

"A teuh lo, a teuh lo lutuk, panga lai kan nei tawh, neih belh ka duh tawh teuh lo, a hma paw'n ka sawi vek tawh" tiin ka lo chhang lêt nghal thuai a, a sawi tur ka hre ve chiang ém, a rilru nen lam! 

"Keima'n paruk ka duh alawm" min chhan dan avang chuan ka melh hraw a, a la nui thei nia maw le. 

"I duh leh rai la, i duh a nih te chuan nangma'n nei ve tawh rawh. Nautê hrin chhuah hrehawmzia pawh i hre ve tawp nâng, hre phei la chu hmeichhiate kan tawrhchhelzia i hre kuarh kuarh mai ang" ka tih chuan

"Kei te chu a siamtu alawm ka nih, nang a paitu leh a hringtu" a rawn ti leh hram a, a ngawih ve mai ka rin tehreng nen, he pa hi chuan a zia a sim thei lo kumkhua dawn a nih hi!

"Harh si, ṭawngthei bawk si, mi chhan lêt hrat si, i nupui lakah hian ngawih tumna pawh i nei lo. Naktuk zingah i tho hma a nih paw'n min kai tho hauh suh ang che, khum pawh hi siam chhunzawm rawh, i bulah ka mu peih lo" ti hmarh hmarhin kawngka lam ka pan a, a nui hawk hawk thawm chuan ka thin a tirim zual.

"Ka rawn kal zel dawn tho, kan fate bula i mut tlat leh an hmuh laiin nupa nun kan hmang mai a ni ang chu!" kawngka hawnna vuan tawh mah ila ka hawi lêt chiang khawp. 

"LALCHHARLIAN! I tum leh tak tak ang e aw, thil tih chi pawh a ni lo" ka aw chu a hma ai a nêm ta deuh a, kan thil sawi lai mêk chu kan fate'n an lo hre pha palh ang tih ka hlauh vang a ni pakhat. 

"Ka bula i mut leh mut loh a ni mai" ka bul dawhkan chunga lehkhabu chu láin ka vawm phei pawp a, a lo bum hman hram leh nghal. 

"A teuh lo" tiin ka chhuak zui sawk sawk a, kawngka pawh ka khar nâ khawp mai.

Ka ning tlat! Panga lai fa kan nei tawh a, paruk phei chu kan tlin tawh lo ang. Ni lo, amah tak chuan a tlin mai ang a, keimah zawk hian ka tlin tawh lo ang. A chhan chu nu alawm ka nih, ani te chu nu a ni ve hleinem, nu mawhphurhna sanzia leh hautakzia pawh a hrethiam lo, nge a hrethiam lo der zawk. LALCHHARLIANA tak hi chu âw, ka pasal a ni ve bawk si. A luhlul phian leh nghal a, a sawi ang khan chet lâk a tum leh tak tak mai ang tih ka hlau. A duh hunah chuan a zak lo si, insual pawh a hrat tak e, kan inneih tirh phei kha chuan ven reng a ngai ṭhin a nih kha! Kan in dan hma a ni hlauh zawk a, ni lo phei se chu mi eng zat chiah nge kut a thlak hman ang ni! A thinrim lah hian inthunun theihna a tlachham ṭhin si, ka hmangaih ve em em chu a ni sia, a chang hi chuan ka ning leh thut ṭhin.

Ka fapa te room-a ka luh chuan an lo awm deuh ṭhap a, Valpuia leh Thangsanga erawh anmahni room-ah an awm thung. Kan fate hi mipa rual ṭhah an ni a, a naupang pathum hi an piang zâwn deuh a, kum khat bakin an inthlau lo. Room khatah an mu khawm mai ṭhin a, kan fate zinga a mi lai hi phir an ni a, a mi lai ka'n ti tak na a, a mi lai tak chu phir zinga a naupang zawk Rohlua a ni a, a u Nghaka pawh tlêm tê chauhin a upa a, mahse an inû hran chuang lo. Kan naupang ber hi a ute pahnih ai kum khatin a naupang a, Têbera kan ti mai a, class 2 a zir ve mêk bawk. School a kal tirh phei kha chuan a luhlul reuh sia, ka buai rei phah thei hle.

"Nu, eng nge i lo tih dawn?" Rohlua chuan ka hmel a hmuh rualin a lo ti a, chhang lovin an bulah ka mu zâl nghal a, Têberan min rawn kuah vat bawk. 

"Pa, nang pawh maw? Kan riak khawm dawn chiang mai, nu, zanin chu mengrei ang u?" titu chu Nghaka ve thung a ni a, kei erawh room-a lo lut mêk LALCHHARLIANA chu ka lo melh hrep ringawt.

"Lo kal rawh le ka Duat, kan fate pawh an mut a chhuak tawh ang" tih leh ka kawnga chelh a rual a, ka lo phih thla sawk a, ka titau laklawh tawh tlat, hrem a phû hrim hrim. 

"Kan muho dawn na nge pa?" Têbera chuan a lo ti thuai a, riah khawm chu an châk hmel hlawm tak tak hle.

"Muho dawn nâng, kan muho a nih chuan zing thawh kan hai leh vek mai ang. Au Valpuia leh au Thangsanga pawh an mu daih tawh a nia, mu tawh r'u le, nang pawh lo kal teh" ti dam dap hian min pawm kang nawlh a, a sama ka kek tur chu a lo indang hman hram zui. 

"Pa, i va'n chak" Têbera bawk chuan a rawn ti leh reuh a, ani hi zawng a pa a ngaisang hrim hrim a, a kipa kawiin a pa thu a awih ṭhin bawk, ka thusawi ai paw'n a awih fê zawk, mahse a chang hi chuan a phakar ve reuh a ni.

"Chak ang chú, keimah anga chak in duh chuan mu thuai thuai ula, zingah exer kan lá dawn nia" tiin room aṭang min pawm chhuak nghal daih a, min nuih te chuan ka thin a rim zual.

"Mi ngai leh hle si" a thusawi avang chuan tur zet hian ka melh vak a, ka ngaih vanga inpawmtir pawh ka ni lo, thil ṭul miah lo a tih ka hlauh avangin ka duh lo chung min pawm lui zawk kha a nia, a thusawi chuan min va khei êm.

"Min dah thla tawh teh Chhara, zanin chu i bulah ka mu peih lo tak tak" ka tih pawh chuan awmzia a awm eih lo, min pawm nghet phian bawk si. 

"Valpuia bulah ka mu dawn" ka ti leh ringawt a, chek ri tlak tlak pah hian

"Tlangval a nih ve tawh saw hre ta che, chu lovah i bula mut a peih tawp lo ang, ka bulah hian mu mai mai rawh, ka ṭha ber" a lo ti charh charh a, a inring tâwk ve vel bawk sia, mipa mah ni se ka hnial hneh lo ṭhin. 

"Lo mu la, kawngka ka va kalh lawk ang e" khuma min nghah hnu chuan kawngka lam a pan a, a kalh zawm zat a, kei erawh khum ka lo en daih thung. 

"Khum hi i siam em ni?" khum inpawt mar vek chu ka hamhaih deuh, ani hi chuan khum a siam ka ring hlawl lo, mahse a siam thei tho, ka kalsan lai khan ka siam zo hman reng reng hleinem.

"Ni ang chú, i pasal hmelṭha leh pian nalh tak hi ka fel asin, chu vangin zanin chu min duat hle a ngai" a tih chuan

"Deuh vel a che! I duh leh nangmah kha induat rawh, min lo si miah suh ang che" ti deuh fakin ka mu zui nghal a, ani pawh a rawn mu rang khawp. 

"Min si suh ka ti a ni lo'm ni?" a kut hlei zet chu hmer vakin ka dah sawn a, sawi lâwk loh ang chiahin mi rawn kuah a tum leh nghal ringawt tawh. 

"Ve leh tawp ṭhin che hian, ka sik lo che chuan i muhil thei lo mai ang, kei pawh ka mu thei chuang lo ang" hre ber emaw hi a in ti a, a hre ber tawp si lo.

"Ka mu thei awm êm mai a! Min lo si miah suh, ka mood on lai i tichhe bawk a, a nghawng chu tuar i inhuam tur a ni" 

"I mood off tawh tih on leh dan ka hre tho, ka lungngai lo" a nui zui suk a, min chhang lêt zel bawk si, ka ngawi tawp ringawt.

"Ka Duat, ka lam lo hawi teh le, i pasal hian ka mamawh che a nia" rei pawh a ngawih hmain a rawn ti leh a, min kuai her zawm zat bawk.

"Zanin chu ka peih rih lo tak tak, chhunah ka insu ṭeuh a, ka chau ve a ni. Chu bakah kum 35 ka pel tawh a, fa ka nei thei tawh lo a ni ang, rei tak kan awl ngai pawh a ni si lo" ka ti ta duah a, mi en run chung hian a âwmah min kuah bei a, ka thil sawi chu ka rilrua awm dik tak a ni.

"Hmeichhia kan neih hma chu ṭan ka la zel dawn, mahse zanin chu kan awl mai ang, ka khawngaih deuh tlat che" a tih tâkah chuan ka rilru a nuam huai thei. 

"Awmpui te hi lá ve tawh mai ila, i chet nasat lutuk chuan i hriselnain a tuar thei a nia" a tih leh chuan

"Ka duh lo, hei leh chen awmpui tel lovin kan awm thei alawm, kan awm thei zel ang" ka lo ti thung a, pangngai taka kan ṭawng tâkah chuan a pangtilúm sîk nuam ka ti leh tawh hle. 

"Chu bakah kei chu awmpui tih vel hi ka ngaina lo, an pute an ngaizawng duh si, mi nupa inkar tichhetu an ni châwk a nia" ka tih zawm zat a, min kuah nghet sauh pah hian

"Min hmangaih a nih mai chu a!" a rawn ti a, a lam ka hawi chhoh rualin min lo fawp tawk a, ka inring hman reng reng lo. 

"LALCHHARLIAN!" tia ka ṭawng leh tur chu

"Ka hria, sawi dik loh ka nei reng reng hleinem. Min hmangaih a, ka hmangaih bawk che a, nang lét hian mipa dang lakah ka hauhna daih zawk che tih hre mai rawh. Ngaihzawng han nei vaih teh, chu i ngaihzawngpa chu ka sawisa hrep a ni mai" tiin min ṭawng khalh a, ngaihzawng nei ná ila chu a sawisa duh leh tak tak ang. 

"Awi awi awi, thil hi i inti hre ve ṭhin sia maw, muhil mai mai teh" ka tih deuh pang pâng chuan

"Mu dawn chiang e" a rawn ti leh hram a, a taksaah min kuah bei hle hle a, kan ṭawng tawh lo va, kei paw'n ka mit ka chhing zui nghal bawk.

Ka harh leh meuh chuan khua a lo vâr vek tawh a, Chhara chu chhuak turin a lo insiam mial mial a, a thawma harh ka ni nghe nghe. Zing tin inkhel turin a kal ṭhin a, badminton hi chu a tui ve chiang a ni. Kan inngaihzawn lai aṭang tawh a khelh ṭhin a, Mizo aiawh te paw'n a kal ve tawh hial a, kan inneih hnu thleng paw'n badminton khelh hi chu a bansan thei lo a ni. A insiam zawh chuan ka lam a lo hawi zeuh a, ka harh tih a hmuh chuan a nui suk a, min rawn pan hnaiin ka biangah a fawp a, hei hi chu a zing tin tih dan a ni hrim hrim. Zing tin mai ni nâng, a hna kal dawn te, hna avanga a zin dawn te hian ka bianga fawh hi chu a ti fô va a, kei paw'n ngaiah ka nei tawh.

"Muhil leh daih rawh, ei rawng bawl hmanin ka lo haw ka ring" ti supin a awm sawn a, nui sak chung hian

"Kan fate i hruai lo turah ka ngai, nizan khan i sawi lâwk ringawt a, thawm dim hle ang che" ka ti ve sep a, ka aw chu a thophang aw hle.

"Hruai dawn náng, lo kal ve zawk ta che, kan haw rual leh ang a?" a zawhna avang chuan ka nui ringawt a, ka kal dawn lo tih a hre chiang bawk a, a fiamthu mai mai a ni. 

"Va kal thuai rawh, vawiin chu Nghaka te pahnihin test an nei dawn a nia, inpeih hma a ṭha ang" ka tih chuan

"Min lo ngai hman viau lo la a ni mai" ti supin a tho va, a nui ruh ruh bawk a, badminton bag akin room chhung aṭang chuan a chhuak ta nal nal.

Maimitchhing chungin thil ka ngaihtuah neuh neuh a, ka mut a chhuak em em hran tawh lo. Muhil ta pawh ni ila ka pasalin ei rawng a lo bâwl vek dawn tih ka chiang, Chhara hi chu mipa tam tak hian an tluk teuh lo ang. Insuk a ngaih paw'n a insu mai zel a, a bikin ka rai lai hi chuan min awl hneh thei khawp. Têbera ka pai lai thleng khan min awl vek a, Valpuia leh Thangsanga chhawr theih tawh mah se an chet a phal ngai chuang lo. Amah hi zezawi tak a ni lo ve hrim hrim a, mahse zezawi tak ni se chu ka ngaina miah lo ang. Kei pawh ngawichawi tak ka ni chuang lo, engmah ngaihtuah kim hman lék lovin ka áng leh bawrh bawrh ṭhin a, a hnuah ka inchhir leh ziah tho. 

Nu ni tawh hi chuan a loh theih loh, fate awm dan thlithlai ngai bawk, pasal te ven reng ngai bawk, a án loh theih loh! Kan thikthu lah hi a'n chhe dun em em mai khawp a, kei phei chu ka ter at zel. Ṭawngkamin ka tilang tlangpui a, ani erawh a thinrim emaw mipa dang a thik tawh vek vek chuan chetziain a tilang ṭhin thung. A tawpah an insual leh nge nge fô va, Chhara hi a mak ve ngawt mai, a insualpui te hneh loh a neih àwm pawh ka la hre lo. Vawi khat pawh a thawhpui pakhat hian min chhâih min chhaih a, a lo innam sak bawk nen min chhaih dan vel chu Chharan a lo ngaithei awzâwng lo, kei tak paw'n ka ngaithei chuang lo. Chu pa chu Chhara ai a palian daih a, Chhara te chu a beng thleng vel daih a ni ang, mahse an han insual ta cheng a, a len tehreng nen hneh lo nasa tak a ni.

Insual hratin kut ram viau e ti lo chuan vawi khat mah kut min thlak ngai lo va, kan fate hmuhah phei chuan a thinrim khât khawp. Vawi khat chu teuh deuhin min beng ṭep tawh, khami nî kha chu ka inthiam lo ve reng. Ka ṭawg zuah zuah a, a huat tur tak thil ka sawi a nih ka ring. Min tin uaih a, mahse dawhkan a hnek chawrh thung. Kan in dan hma a ni a, kan room-ah a ni nghe nghe a, mahse ka nu leh pate khan engmah an hre lo. Tin, eng ang paw'n thinrim se a thinrim rei tak tak ngai lo. Nupa inkarah hi chuan han intihthiam loh deuh te a awm lo thei lo va, ka thlem loh leh amah zawk hian min thlem fô ṭhin.

Kan inneih tirh aṭang tawh a mizia hi a tlangval em em a, a chang phei chuan ngaihzawng min neihsan mai ka hlau a, mahse tun thleng hian min la neihsan lo thung. Ka tluk lohna pakhat leh bawk chu khawvel changkan dan azirin a inchei thiam em em bawk a, keimah zawk hian ka peih lo ṭhin. Thil eng eng emaw ni hi a tikual duah a, a thiam phian hlawm leh nghal a, guitar perh te hi a hnehsawh tawp, chung chu pa tam tak tih theih loh leh bawk a ni. Chhara hi chu a all round ve hrim hrim a, hun te hi a vawng dikin a hmang thiam em em a, a nî hman dan tur nen lam routine a siam thlap zel.

"Nu, zingah a pa'n min kai tho miah lo" Têbera chuan tukṭhuan ei laiin a ti deuh hlawl a, a pa bulah ṭhu mah se min rawn en daih thung. 

"I mu tui sia, a kai tho duh lo che alawm, ei vat vat rawh le, school kan tlai mai ang" a zawhna chhangin thu dang ka sawi zawm zat a, puihnam kán chu ka suak a, ka ei tui phian zui.

"U Val, eng zat nge i inkhawl tawh?" a nau Thangsanga zawhna chu chhangin Valpuia chuan

"A la tam lo, nuaih dâwn inkhawl a ngai" a lo ti ve mai a, chutah pa ber chuan

"Ka puihna tel lovin i khawl thei ang maw?" a ti ve nghal a, thinrim hmel leh lungawi lo hmel pawh an pu lo, eng pawh sawi se pafa inkawm ngeih tak an nihzia a lang ṭhin. 

"Thei mai ang, ka tum dawn alawm, ka ṭhianpa'n inhlawhna tur min hmuhsak nual a, exam chawlh lai hian a chanve tal inkhawl hman ka duh" Valpuia chuan a ti ve leh mai a, tun lai chu college a kal huna a bike tur a tûak ngawrh khawp mai. 

"A nih chuan bike tur chu tuak ṭang ṭang phawt la, i Gym kal man erawh hi chu ka lo tum tawh mai ang, kei pawh kâr thar aṭang chuan kal ve ka duh" Chhara lam chu ka hawi lo thei lo, fapa pangngai lai nei tawh a ni a, eng vanga Gym kal tum ringawt nge a nih leh tâk!

"Gym kal i tum maw pa?" ka ṭawng hmain Thangsanga zawk a ṭawng hmasa a, a fapa paw'n mak an ti a nia, ka tan phei chuan mak tak a ni.

"Tum chiang e, ka pian a nalh tawh sa tho va, tih nalh belh ka duh deuh tlat, i nu hian min han hmu tai chuaih chuaih teh se" min en chung hian a ti kher a, ṭawng ka insum leh ta zawk, ka ṭawng a nih chuan ka thinrim zui nghal dawn tih ka chiang.

"Lo kal ve tak tak teh pa, engmah i la hre dawn si lo va, a tih dan tur vel ka lo zirtir ang che" Valpuia chu ka melh hrep a, nui kur kur chungin chaw a bar zawm daih a, ka chaw ei tuina pawh a bo vek.

"Ei hmanhmawh r'u, in kal a hun ṭep" ti leh thawh ka rual nghal a, naupang pathum chuan ka thu awih takin an ei thuai thuai a, a dang mipa pathum erawh an la khi suk suk thung.

Rei lo tê hnuah chaw an ei kham sap sap a, thleng sil lovin kan fate chu ka siam a, pakhat ka siam hlanin a dang pahnih an lo infiam thul, ka'n hau deuh a, an reh ve leh mai a, duh ai chuan kan chhangchhe mah mah a ni. Pa ber chuan naupang pali chu an school thleng a thlah kual thlap a, Valpuia erawh inhlawh turin a insiam a, a hnathawhnaa fimkhur turin ka chah nasa hle. Valpuia hi chu a fel ve hrim hrim a, a rilru a puitling em em bawk. Duh se chu a pa hlawh aṭang paw'n a bike duh ang tak a lei thei reng, ama thawh chhuah ngeia lei a duh miau si a, a pa paw'n a remti ta ringawt a ni. A inhlawhna hmun hi kan hre ve thlap zel a, kan hriat lova thil tih a nei ngai mang lo. Bike leina tur a duh luatah damdawi te hi a lo zuar kual ang tih kan hlau em em a, a pa pawh hian a hna bân apiangin a tlawh kawi ziah ṭhin a, mahse Valpuia erawh chuan engmah a hre ngai lo thung.

"Gym kal tih vel kha i ti tak tak lo ti raw?" kan nupa room-a a lo luh rualin ka ti nghal a, Valpuia a chhuak tawh bawk a, ka aw chu a zawi hran lo hle.

"Ti tak tak e, kal ka tum alawm" mi pawh en lo hian a ti a, ṭul lo ka va'n ti ngawih ngawih tak. 

"Eng vangin?" ka tih chuan

"Sek ka duh vang pawh a ni lo, ka bân tha hi tih chak lehzual ka duh maw le. Chu bakah ka fitness hi a tlahniam hrim hrim, hmân kha ka pha tawh lo" a rawn ti deuh duah a, hna kal turin a insiam mial mial bawk. 

"Zing tin i inkhel ziah tho va, eng nge bân tha chak tih vel ngai? I fitness pawh a tlahniam tawp lo vang, i la fit reng" dam em em lo hian ka ti a, ka aw chhuak hi chu a nêm lo ve hrim hrim. 

"Nia, ka la fit reng" engtik laiin nge ka bul a rawn thlen phei hman ka hre lo, mei nei zeta a ṭawng te, a nui vel te chu ka ei hlawl lo, ka thusawi a lo la kawi leh tawh tih ka hrethiam mai. 

"Ka la fit reng ti raw ka Duat?" amah bawk chuan a ti leh a, min en dan te, min din hnaih zel dan te, sawi vak ngaihna ka hre lo, a nghal thlawt a ni.

"I fit bawk lo" ka ti ta ringawt a, chhan dan tur ka hre mai lo a tin ni!

"Chuti chu ka inlâk fit lehzual a ngai a ni mai alawm, nge a rukin fit min ti a, i sawi duh lo mai mai zawk?" ka nam vak a, a awm sawn rei lo hle thung. 

"Thil ni lo lô sawi suh, insiam la, kal vat rawh, thleng sil te ka la ngai" thu danga pakai tumin ka ti a, ani erawh a la nghal tluang zel.

"Han sawi teh ka Duat, ka enchim loh, ka hmangaih, ka Bawihte, ka lairil luahtu" a tih laklawh lai chuan

"LALCHHARLIAN!" ka lo ti hlak a, nui sun sun pah hian

"Duhawm leh lutuk mai" ti hlukin min fawp tawk a, ka nam sawn rualin a nui hawk hawk a, ka nuih a za ve der lo. 

"Eng chu maw Gym ka kal i phal loh chhan?" pangngai deuh hian a tih zawm zat a, a insiam leh mial mial tawh bawk. 

"I tar tawh, i upa tawh, kuminah kum 50 i kai dawn, i kum rualpui tûmah Gym kal an awm ngai lo" ka ti hlak hlak a, a rawn nui ri leh ta hawk. 

"Chu vang alawm min u tur i nih, min u duh der lo leh nghal" a ti daih thung a, mi chhaih kawlh hi chu a va'n thiam tak êm. 

"Nangmah a nih kha u lo tur chea min titu, ni lo se chu ka u em em ang che" tiin lukham chu ka rem ngil a, khum chu ka lo pawt mar vek tawh chu niin, ka siam zawh lai ka hre miah lo zui.

"Ka kal dawn, zanin kha aw" a thusawi hnuhnung zawk chuan min tibangbo khawp mai.

"Eng nge zanin?" amah en chungin ka ti hû a, ṭhen suk pah hian

"Nizan pawh kan awl tawh a, zanin chu a thei tawh lo" a ti a, a thusawi awmzia ka hre ve chiah.

"A teuh lo" ka tih rualin

"Teuh e, zan khat lêk pawh awl hrehawm nak a lai a!" a rawn ti nghal a, chutah amah bawk chuan

"Ka kal, mi rawn thlah i tum loh hmel bawk si, tlai chu chawhmeh tui tawk lo siam ang che" ti lehin a kal chhuak zui nghal a, ka nui tawi tak a, ka nuih chhan ber pawh chu ka hre chuang lo.

Kan room ka siam fel ta bawk a, naupang room ka en fel leh phawt a, Valpuia leh Thangsanga room hi chu ka buaipui tawh lo law law. Anmahni paw'n an duh zawk a, an thiam ang tâwkin an chengvawng ve khawp. Thleng ka sil zawm leh nghal zat a, insuk a ni leh mai a, mahse suk tur erawh a tam em em lo. In ka tih fel laiin ka nu hnen aṭang phone call ka dawng a, kan inbe rei ang reng. Ka nu hi chu ka pasal nu mah ni se a fel ka ti ve thlawt, ka ṭhiante ṭhenkhat chuan an pasal nute khirhzia leh hrawn hrehawmzia an sawi ṭhin a, kei erawh sawi tur pakhatmah ka nei ve lo. Ka pa chenin an fel em em vek a, kan fate pawh an duat hliau hliau ṭhin khawp.

A chang chuan keima nu leh pate ai pawh hian an duat zawk emaw a tih theih a, kan fate an hmangaih danah hi chuan inang khat vel tak an ni. Chhara te chhungkua hi rethei zawk zawk lo ve tak an ni a, an in pui phei chu a changkang khawp. Keini pawh kan reithei em em hran lo, mahse Chhara te chhungkua ai thlawt chuan kan hausa lo zawk ang ka ring. Kum hnih ngawt kha in puiah ka mo hman a, a kum thumna turah kan in dang ta kha a nia, harsatna kan neih vanga in dang pawh kan ni lo. Chhara ber khan in dan a duh tlat a, ka nu leh pate a dil a, an lo phal mai bawk si. Chu bakah chhungkaw rual an ni a, tun thleng hian lo la awm reng ta ila chuan kan chep mah mah ang, keini kan rual ve tawh si, kan lo in dang hma kha a fuhna chen a awm. 

Têbera school bâng hruai pahin a ute pahnih kan nghak tlang nghal a, an bâng har hran lo. Taxi-in kan haw mai zel a, a chang hi chuan ka inthlahrung ve ṭhin alawm, a bikin ka pasal leh a chhungte lakah. Houswife dik tak ka ni a, lehkha zir sang tak ka ni lo va, B.A te chu ka graduate ve ngei a, mahse hna zawn lamah hian ka tluang lo ta a ni. Ka pasal hriat miah lovin vawi eng emaw zah chu exam neuh neuh ka pe hman a, mahse a hnuah a hre chhuak leh vek a, min hau hrep nghe nghe. A hlawh hian min chawm zo ve chiang êm a, awm mai mai tura min ti te pawh hi kawng leh lam zawng tak chuan a awm tho. Han buai deuh hlek ila zawng hna ka thawh te pawh a phal mahna, mahse a phal lo leh tlat mai thei bawk.

A hna bâng lo haw chu a rawn zai lut a, pa ber aw an hriat rualin naupang pathum chu room aṭang an lo tlan chhuak a, hei pawh hi an têt tê aṭanga an tih dan nghet a ni bawk a, an sim tak tak thei tawh lo. Thingpui ka lo siamsak a, in pahin phone a khawih mual mual a, kan fate erawh an room lamah an lut leh diam tawh thung. A phone khawih lai chawl chuang miah lovin Valpuia lo haw tawh leh tawh loh min zawt a, a lo la haw loh thu ka sawi ve mai a, thingpui a in zawh chuan kan room lamah a kal nghal a, darkar dâwn a awm hnuah a rawn chhuak a, inbual zo tih hriat takin a rimtui ham hâm tawh bawk.

"Eng nge kan hmeh dawn a?" ti supin ka thil chhuan lai chu a bih dûk duk a, ka thil siam a hmuh rualin a khi suk a, fridge hawngin bahkhawr leh punrun a la chhuak a, thil a rawt dawn a nih ka ring. 

"Ka lo ti mai ang" ka tih chuan a ngawi reng a, a chet ngaiin a che reng a, a mood a ṭhat hmel khawp. 

"Thla leh inrinni hmasa berah khian kan department kan picnic dawn a, ka theihnghilh palh tâkin lo hrereng teh" thil rawt ri chawk chawk pah chuan a ti a, ṭawngkâa chhang lovin ka bu zeuh a, mahse min rawn en lem lo.

Ei rawng kan bawl zo titih a, tunah chuan ka inbual ve thei ta chiah e. Ei rawng bawl zawh vek hnua inbual hi chu ka tih ṭhan a ni a, inbual zawh hi chuan cream te kan lo inchulh duh ve ṭhin sia, ei rawng bawl chhung zawng ka inbual lo tawp zel. Pa ber chu sitting room-ah ṭhu thluang duaiin lehkhabu a chhiar a, Valpuia a rawn haw tawh bawk nen ka inbual zawh hûn hunah zanriah kan ei theih nghal mai ka ring. Inbual tur chuan Bathroom-ah ka lut a, ka inbual fai zung zung a, ka inbual zawh aṭanga rei lo tê hnuah chaw ei kan siam zui nghal bawk.

Zanah chuan Valpuia ṭhiante an lo lêng a, dar 9 leh a chanve vel thleng an lêng a, an haw hnu rei vak lovah mut zai kan rêl nghal mai a, zan lam hi chu kan mengrei vak ngai lo tlangpui. Room-ah kan awm fel ta maw tihah Chhara chu nghal chikim hian a nghal ṭan a, dan ka tum viau a, ṭawngkhum pawh ka tum hman úk a, zan hmasa lamah ka duh angin kan awm tawh bawk nen ka hnial ta lo law law. Nupa nun kan hmang nghal mai dawn emaw ka tih laiin min han dek nui leh uarh uarh phawt a, dek ka duh tawh loh thu ka sawi lawm lâwm chung paw'n a tawp duh der lo. Mittui tla phungin ka nui a, kan fate'n kan thawm an hriat phak chuan mak an ti ve khawp ang le!

"Che reng lo la" a tih chuan mak ka ti tulh tulh, ngawi rengin min kuah hle hle rei mah mah tawh, a theihnghilh a ni ngei ang.

"A nih, ka muhil dawn a nia" ti sepin ka ngawi ta ran a, nupa nun hman ka châk em em vang pawh a ni lo, zing lamah khan a sawi lâwk ve nasa bawk sia, mak ka ti deuh a ni.

"Ka tih der â le! Mak i ti áwm" kan ngawih dun vang vang hnu chuan ti deuh thutin min bawh nghal a, nui vur vur pah hian 

"I la men kur danah mak i ti tih ka hre mai, ka theihnghilh emaw i tih te ka ring hial, mahse ka theihnghilh teuh lo, ka theihnghilh phal i ring reng reng em ni?" ti leh nghalin ka biangah a piai a, ka lo en hû ringawt. 

"Awm ṭha rih teh, a mood-ah ka cheng leh tawh lo, i theihnghilh a nih kha!" ti deuh hmakin ka nam sawn a, ka saisir tur chu min kuah rang hle. 

"Ka theihnghilh emaw i tih avangin i thinrim vela maw!? Âw ka Duat, min lo va hmangaih tak! Min ngaichang reng tih ka hria alawm, i awm dan ka hre châk a, ka fiam vel mai mai che a nih kha!" a tih chuan

"Ka ngaichang bawk lo che, khawi teh, ka mu ṭha dawn" tiin a kut phelh ka tum a, che thutin ka chungah a bawk a, a la nui sun sun zui. 

"A mood-ah ka cheng tawh lo tak tak a nia" ka tih leh sep chuan ha langa nui pah hian

"A mood-ah ka chentir dawn réng che alawm, i va duhawm tak! Lalduhawmnu, a ruka min thlahlel em em nu" a ti sawk sawk a, a che zui nghal mawlh mawlh a, a sawi ang tak takin ka mood chu a thlak danglam hneh hle.

Mipa a nihzia chetzia hmangin a lantir mial mial a, ka thiam ang tâwkin ka lo chhang lêt ve a, ka lo mamawh ve tak tak hle a ni mahna le. Nupa nih tawh hi chuan zah ṭut ṭut a fuh ber lo va, ka pasal lungawi zánna tura chet lâk ka zak ngai lo bawk a, ani pawh a bang chuang lo. Tin, nupa nunah hi chuan sawiselbo ka ti ve thlawt, a zei vel vek a ni mai. Kum upa lam tawh mah ni se a ṭuan a la ṭha reng a, exer lâk ka mamawh chuti ek e bal e a ti kual vel a, ani hi chuan engmah a mamawh awkawngka lo, mamawh lo chiang tak a ni. Nupa nun kan hmang zo chiah tihah min han chhaih lai leh vel a, laih loh ka tum a, a theih thlawt loh. A ṭawngthei si, sawi tur a hre si, kan inngaihzawn lai aṭang tawh mi chhaih laih hi chu a Aim In Life ang maiin a hnehsawh.

Kâr tawp inrinni zan a ni a, kan vaiin in pui lamah kan lêng phei a, Chhara naute ho chhungkua pawh an kim ṭhap hlawm a, Chhara naute hian nupui pasal an nei vek tawh a, mahse kan chhangchhe ber thung. Sitting room-ah nu leh paho chu kan titi a, eng eng emaw ni sawiin kan nui dar dar a, keini mo ho chu rei pawh kan ṭhu lo. Choka lamah pheiin thingpui kan siam a, kan titi a rualkhai khawp mai. Mo hi pathum kan awm a, unau zinga upa ber nupui ka ni a, ka mopui te chu kei aiin an naupang ve ve bawk. Ka pasal te unau hi pali an ni a, mipa pathum leh hmeichhe pakhat an ni a, an naupang ber Zovi pawh zanin chu a rawn lang ve nghe nghe. A pasal hnathawh avang hian inhmuhkhawm nîah pawh lo kal theih loh a ngah ṭhin a, a pasal hi Mizoram pawna hnathawk ni lo se chu an lên fô ka ring. 

Dar 11 dâwnah kan haw ve ta hram a, Têbera phei chu a muhil daih tawh. Valpuian in chhungah a paw lut nghe nghe a, mut chhuak em em pahnih Nghaka leh Rohluate chu a pa'n a kai ve ve thung a, men pawh an meng ṭha hlei thei tawh lo, an muthlu lo chauh. Kan fateho kan mut tir fel hnu chuan kan room-ah mu turin kan lut zui nghal a, keini pahnih pawh kan mut a chhuak ve tawh tho, zan dangah chuti anga rei meng ngai hek lo. Zingah chuan ka harh hlawl a, ka bulah ka pasal a lo la muhil bám a, zan kan meng rei phian bawk nen inkhel turin a kal dawn lo a nih ka ring ve hmiah. Ka muhil leh a ni ngei ang ka harh leh chuan ka bula mu chuan min lo en reng a, kan inen hnai ṭha khawp mai.

"Eng nge?" ka tih sep chuan

"Eng nge?" a lo ti ve nghal a, a kiua inbeng kangin min en chiang sawt bawk. 

"Engmah" tih leh nuih ka rual a, kum 50 a kai ve tawh dawn chu a ni sia, upa ṭan tawh mah se a hmelṭhatna erawh a bo thei lo a nih dawn hi!

"Tukin chu office kal hma ka hmul min ziah faisak la" a biang hmul leh a khabe hmul vel ka chul kual den den lai chuan a rawn ti a, ka la ngawi reng thung. 

"Maw!?" naupangchhe aw deuh hian a ti thluk awn leh duai a, ka nui ta hak hak.

"Ṭul lo, heti hian i inhmeh" ka tih chuan ei loh hmel zetin min en a, a hmel a pe chhe vel lutuk chu ka nuih a za tawlh tawlh.

"I phakar reuh sia! Min mehsak tho ang, a nih loh chuan ngaihzawng ka neihsan daih che a ni mai" a ti thum bûl bul reuh a, naupangchhia taka a ṭawng vel chhan chu ka hre lo, nge inlâk Young a tum ve vel zawk!

"Tûma'n ngaihzawng atan an duh lo ang che, i upa tawh êm mai" nui hak hakin ka ti a, a nui duh miah lo hmel te chu a va ṭha tak, mi hnial hrat lo phei se chu khawvela mipa famkim ber a ni mai.

"A nih chuan ka hmul vel hi chu ziat fai lo phawt ila, nang berin inhmeh min ti bawk si a, hmeichhe dang phei chuan inhmeh min ti khawp ang, thik awih loh" nui pah hian a ti a, a tho zui nghal a, ka chhang tawh lem lo, ngaihzawng min neihsan dawn lo tih ka chiang ve êm mai a!

(End of Chapter 1)