PU MUANAWMA By Havali Adam (CHAPTER 2)

                                 PU MUANAWMA

                                    (Dear Crush)

                                            By

                                    Havali Adam

                                      Chapter 2

Thingtlâng khuaa zin ka ngai tawh rih chuang lo va, nitin in lamah hun ka hmang deuh chawt a, u Maruata nupui u Mapuii te, u Remzela nupui u Chhani te nen kan inkawm char char a ni ber a, ka nu pawh a tel tak e! Tin, an fate'n school an lo bân tawh phei hi chuan kan ri nuaih nuaih zel. A changin ka pa unaute lam an rawn lêng leh zauh ṭhin bawk a, kan in hi chu in pui tak tak ang hi a ni ve a, kan rethei zawk zawk lo bawk nen inlêng te hi kan nei ve reng zel. Ui erawh kawl ka duh miah lo thung a, mi ṭhenkhat hi chuan an in vêngtu atân te an hmang ṭhin a, a ṭhatna chen awm mah se inlêngte tân an hlauhawm dâwn hian ka hria a ni. Kei chang ka ni lo, ka pa pawh hian a ngaina vak lo hrim hrim a, keini chhungkuaah chuan ran vulh tih vel a tla ná lo hle a ni. 

Kâr khat a ral hnu chuan kan interview result a chhuak ta, kei ve mai; zirtirna lama experience pawh la nei máng lo leh ṭawngkam thiam lo ve tak hi ka lo tling a nih chu! Ka hming ka hmuh rualin ka en nawn leh ngat a, danglamna pakhat mah a awm si lo. A tawpah erawh hna ka hmu tih ka pawm thiam ve ta mai bawk a, mahse mak tihna leh lawmna chu ka rilruah a la inawm pawlh nuaih tho. Ka chhungte ka hrilh hnuah ka ṭhianteho ka hrilh kual a, anni chuan láwm an lo rawt nghal a, ka hnial hran lo, ka tan chuan a vawi khatna a nih mai bakah a hlu ve ém a ni. Zan lamah ka nu leh pa chhung leh khatte ho an lo lêng sap sap a, min lawmpui thiam hlawm khawp mai.

Ka hna hmuh tûk zanah kan ṭhianhovin kan láwm ta ngei a, kan dine out a, present min la pe ṭheuh zui. Whatsapp, Instagram leh Facebook tih velah lawmpuina thu nen min theh lár chuaih chuaih a, chúng êmah chuan ka duh lo ve deuh, kei lo Assistant Professor hna hmu an tam tawh êm mai. Anniho lah chu an ṭang tlat a, a lawmawmzia leh mi naran hmuh theih a nih loh thu min hrilh lêt ta vak hlawm zawk a, dik tihna chen ka nei ve leh tho bawk. Ni e, an hmang kumkhua dâwn pawh a ni hleinem le. A hun lai alawm, duh leh Whatsapp status-ah min hmang se, an duh dûhna ah min hmang teh se, a êng lam zawnga thlir phei chuan kei tak pawh min tihlim hrim hrim.

Department lama kal leh tura hriattir ka nih avangin MZU-ah chuan ka zu kal leh ta ngei a, mahse a ruka ka hmuh châk ber leh ka hmuh duh ber pu Muanawma erawh ka hmu miah lo thung. Associate Professor chuan Auditorium lama programme a hman thute a sawi a, min lawmpuina thu a sawi bakah thil chi hrang hrang min sawipui a, ka rilru sukthlek a man lutuk vang nge ni kan titi tui dun khawp mai. Department Dean, Miss Ruth-i bawk chu a fel ngaiin a lo la fel reng a, Professor nena kan awm dun loh lai chuan min be char char a, sawi tur a hre bawk sia, ka tling te chu min lawmpui thiam em em a, hmeichhe fel tak chu a ni. Professor pakhat a awm ve leh a, mipa a ni thung a, chu pa chu Assistant professor a ni a, ani pawh a fel tho, mahse a nélawm hran loh, Vaiho ang maia inhmuam up tlat chi niin ka hria.

Kár thar aṭanga hna zawm nghal tur ka nih avangin kár khat a ral leh hnu chuan ka hna thar chu ka thawk ṭan a, student te hnenah introduction ka pe a, mahse a ṭhen azar chauh a ni. Kan Guest Lecturer te'n an class lâk laiin min lo sawi vek tawh a, min fak leh lutuk chu a zahthlak zawk, ka awm a nuam lo vek thei. A tam zawk chu an sawi dik ngei a, mahse an sawi uar ve mah mah a ni. Student te pawh chuan min zah hmel hlawm hle a, min hlau ang tih erawh ka hlau viau thung. Student hi chuan zah tak leh hawihhawm tak hian teacher te nél em em se, chuti ang bawkin teacher te pawh student te tân inhawng em em ila, kan inkar a ṭhat phawt hi chuan inzirtir a harsat ka ring miah lo.

Ka first day-ah chuan eng vak pawh ka zirtir lo va, thil chi hrang hrang ka sawipui a, HOD class lâk nuam an ti ber chu mak ka tih rualin awm lo ka ti hran leh chuang lo, a chhan chu HOD ber pu Muanawma hi a fel ka ring tlat a nih chu! A ni hnihna aṭang chuan class pangngai ka lá tawh a, pu Muanawma pawh a lo kal tawh a, a ngaite bawkin a hmelṭha leh pek hle. Kan inawm hnaih hran lo va, professor chin chuan room hran ṭheuh kan nei a, guest lecturer ho erawh room khatah an awm khawm thung. Lunch chu kan building-ah eina tur a awm nghal a, hmun danga kal a ngai vak lo, mahse a tui em em lo a ni; a to phian leh nghal. Kan guest lecturer te nen pawh kan innél nghal em em vek a, mipa pakhat leh hmeichhe pahnih an ni a, kum lamah kan inthlau lutuk lo bawk nen kan titi a rual thei hle.

"Khaw'nge?" che dawtin aw lo chhuahna lam chu ka hawi vat a, ka phut lutuk luatah ka ṭe ṭhawt lo chauh a ni. 

"Ih.....eng lo...." sawi chhunzawm thei lovin ka ngawi zui daih a, min en chiang mai sia, en pawh ka en ṭha ngam lo. 

"6 Miles-ah thil han ei ka tum a, i lo kal ve duh em?" hriat nuam taka a tih leh chuan chhan dan tur ka hre mai lo, ka en leh zawk ṭhin a, ngawih reng zawng a dik theiin ka hre lo va, ka ngawih deuh vang vang hnu chuan

"Botany Department lamah khuan ka zu kal zawk ang e, a hnai a, a tui phian bawk a, ka zawngchhang tawh" ka ti deuh duah kher a, ka beisei ai ka aw a chhuak ṭha a, ka ṭawngkam pawh a felfai khawp mai.

"A tui ang máw?" a zawhna chu ka hrethiam leh ta bau lo, ṭhian inbiakin min biaa hriatna ka nei a, mahse ṭhian ni lovin hna thawkho kan ni thung si. 

"An siam tui ang reng, ei tur hian ka chhuk ziah alawm" ka ṭawng ring lem lo va, ka sana bun chu ka en zauh a, chawnhnu first period ka neih avangin ka muangchang hman lutuk lo. 

"A nih chuan zu kal ang hmiang, a tui phei chuan a hnai zawk a, a zawngchhang chí tak ang" pu Muanawma chu en reng loh ka tum a, ka thei der lo, a awm dan teh thut leh min biak dan vel chuan min tihamhaih a ni. 

"Eng nge?" min en chunga awki dam zeta a tih leh chuan ka awm ngaiin ka awm rei mah mah tih leh ka en rei mah mah tih ka inhre chhuak a, zah ruk lutuk avangin ka hawi sawn rang teh e! 

"Lo kal la, kan kal rual thei reng alawm" min sawmna chu ka hnar phal ngáng lo, buk khum zeuhin a car kawngka chu ka pawt hawng a, ka ṭhu lut zui nghal bawk. 

"Dam vêngah ti raw in awm? Khawi lai vel takah khan nge in awm?" Botany Department Canteen lam pana kan inphur thlak lai chuan a ti dam dap a, a aw hi chu hriat a nuam ve chiang a ni. 

"Kawngpui ánah khan a nia" tih bakin ka chhang lo va, chutah nui suk pah hian

"A nih chu, in vêngah chuan kan lo kal ve fô asin. Hmânah tawh vawi khat chu kan ṭhianpa bialnu kan rimpui a, in biak in awmna kha mak ka ti hlawm khawp a, a awm deuh thut ni berin ka hria" a rawn ti a, a kal tawh bawk a, kan véng awm dan vel chu a hre phian.

"Nia, an ti zel, pakhatah chuan a hmun hmâ a rem lo ve bawk êm a ni" han sawi thui vak tur ka hre ṭhin lo, a zawhna leh a biakna a mawi tâwka chhan lêt tih mai loh chu! 

"Khawi vêng nge i nih ve a pu......Sir?" kan ngawih deuh vang vang hnua ka ṭawng kher kher chu ka va han inchhir tak, chutah ka ko sual ṭep leh nghal. 

"Chàltlâng lam daih" tih leh zawimuanga motor tihdin a rual nghal a, canteen kawt kan thleng tih ka hre ve chiah.

Motor aṭanga chhukin canteen lamah chuan kan kal a, a hnungah ka zui a ni mah zawk a, thla khat chuang chu lunch break apiangin Botany canteen-ah ka zu inhnawh puar ṭhin a, kan HOD ka bula a lo kal teh thut chu mak ka tihna a la reh fel hlei thei lo. Tin, hun a kal chak ka ti bawk. Thla khat a ral leh daih tawh a nia, ka hna lamah eng harsatna mah ka nei rih lo va, buaina nei turin ka inngai lo hrim hrim. A chhan chu student te pawh puitling ṭhah an ni tawh hlawm a, zirtirtute an zah thiamin an fel em em vek a, zirtir an nuam thei khawp. Dawhkan pakhat a lo la awl hlauh lo va, a dang zawng chu zirlai naupangin an luah khat vek a, lunch break lai a ni bawk a, a lún ṭha hem hem hle. 

"An va tam phian ve" pu Muanawma lam chu ka hawi a, min be mah se phone a lo khawih mual mual daih a, chhan loh aiah tiin

"Nia, chhun chawlh a nih hi chuan an tam ṭhin alawm" ka ti ṭha ve mai a, chu bak chu inbiakna em em kan nei lo, kan thil order tur ziah dâwnah a duh zawng ka zawt a, chu chu a ni mai.

Minute 5 hnu velah kan thil chah a lo thleng a, pu Muanawma zawk chu ei nghal mai lovin a phone a la khawih mual mual reng a, a pawimawh viau a ni ang. Ka aw ka thian kharh kharh a, a nihna takah chuan min lo en se ka tih vang a ni. Min lo en se, amah zawkin ei rawn rawt se, kei lah rilṭam ru tawh bawk si, a hmeichhia zawk han ei hmasak lah ka zak leh tlat lawi a, a tawpah erawh ka thei tawh ngáng lo. Nizan ka men rei lutuk avangin tukinah tukṭhuan pawh ka ei hman lo va, chaw ei lovin ka kal a, ka hmaa ṭhu ngawi run pa chu zah zo tawh lovin ka ei ta mial mial a, chutah min en chuang miah lo leh a phone la khawih mual mual pah hian

"Ka laklawh lutuk a" a rawn ti a, ka buk khum zeuh tak na a, ani chuan min en lo hrim hrim thung.

"Ka hman e, a va tui hmel ser sawr ve" vawi 5 vel ka hawp hnuah ani pawh a ei hman ve ta, spoon-a a chawh kual lai vel chuan min en chung hian a nui tawi suk a, a va han hmelṭha ngawih ngawih tak, ka rilru chu a rawn hria ang tih ka hlau zawk. 

"Kum hnih a ni maw i la neih?" beef clear soup hawp tura a spoon a lék lai chuan a rawn ti a, a la ei tam lo ang reng, kei erawh ka ei phai hnem tawh mai. 

"Aw, mahse kum 2 lek emaw han tih hian a rei duh zêk a, a la rei viau ka ring" a zawhna awmzia hrethiam taka ka chhan lêt chuan 

"Kum te chu a liam chak zawk alawm, i ti ve lo em ni?" a ti daih thung a, min hnial pawh a ni lo, a thusawi ka ngaihtuah chian hnu phei chuan a sawi dik tih ka hre chhuak nghal. 

"Ni ngawt tak mai, hun leh kumte hi chu hriat loh kárin a liam zung zung a, engtin nge kan hman ral tih te hi a hriat hleih theih loh zawk ṭhin a nih hi!" ka ti deuh duah a, ka insawi thiam duh vang a ni pakhat a, Ph.D lâi ti ve si thil thlir thiam lo lutukah min ngai palh ang tih ka hlau a ni.

A ei muang phian bawk sia, zah pawh dâwn lovin ei tur ka chah belh leh a, tukṭhuan ei hman ila zawng ka chah nawn miah lo vang, pu Muanawma hmuhah thil heh tak angin ka lan phah zui, mahse a ho em mai, chaw ka ei hman lo tih a hre hleinem, hria se chu min hrethiam em em ang. Ka thil ei zawh min nghak ta thung a, min nghah chhung zawng chuan kan inbe lo va, a phone a khawih reng a, a tlei hmel khawp. Ni lo, thil pawimawh bak a khawih ka ring lo, thil ho mai mai chu a khawih tawp lo ang. Puar peng pawnga ka ei hnu chuan kan thil ei man pek tumin counter lamah kan phei a, pawisa ka phawrh lai tak hian pu Muanawma zawkin 500 a pe a, en deuh hâw pahin pawisa dawngtu hnenah chuan

"Kha ka pu, hetah hian cut zawk rawh" ka ti thuai a, a 500 ken lai chu hawihhawm loh vang pawh ni lovin ka láksak a, ka pawisa 200 chu ka pe ta zawk a, ka 500 ken lai pawh pu Muanawma lamah ka lek zui nghal bawk.

"Mipa zawkin ka pe ang chu le" tih leh a pawisa pek a rual nghal a, min nuih sun sun a, ka pawisa zawk chu ka kutah a rawn hmehbel zawm zat a, ka kut leh a kut a insi chiah chu ka sawi thiam lo, ka ṭek chuaih kher lo va, mahse ka mur chhuak vekin ka hria.

"Sir chu...i tizahthlak ê" ka ti sep a, a hmel hlim sâng te, a nui hmel te, a ha vâr rual nalh tak te, a vun ngo leh fai em em te chu hmuh a nuam vel vek. 

"Ni dangah min la treat zawk dawn a nia, vawiin chu keima'n ka'n pe phawt ang e" tiin pawisa kir a lá a, kal tura min signal zeuh hnu chuan ka kal ve mai a, ka kut a tawhna erawh ka si leh tawh lo hrim hrim, en chian phawt ka duh, hawn hunah pawh ka sil phal lo zawk hial mai thei a ni.

"Class lák nuam le" kan department floor kan thlen hnu chuan a ti a, nui sen senin ka buk khum nghauh nghauh a, a room-ah a lut zui nghal a, kei pawh ka room lamah ka phei zui nghal ve mai bawk.

Ka kut chu ka en vang vang a, ka hnim vel ṭhin, a rimtui hman rim kha a la nám chêk chekin ka hria. Thla khat lâi thawk tling ve tawh mah ila kan inhmuh te hian min si ngai lo va, min la tawk ngai lo hrim hrim a, a nêlawm em em reng ṭhin thung a, vawiin erawh amah zawkin ka kut a rawn si a, phat rual lovin ka mood chu a ṭhat phah vek tih ka chiang khawp mai. Ka kut a sikna lai tak chu ka chul heuh heuh a, amah ka mitthlaah a châm reng bawk a, tunah chuan pu Muanawma laka ka rilru puthmang ka hre chiang ta. Ni e, Nunui khan a lo sawi dik chiah, kei hian pu Muanawma hi ka duh a ni. Ka duh satliah lo, ka vei em em zawk, a hmelṭhat mai bakah a felin a nêlawm leh ta zel a, ka mitah hi chuan a va'n ṭha hliah hliah tak. 

Tlai dar 3 velah kan bâng a, bus stand thleng kan Department Dean Miss Ruth-in a scooty-in min phur chho a, MZU park bulah min drop a, Nunui kal loh nî tak a nih avangin mahnia ka haw mai a ngai a ni. Miss Ruth-i chuan min phur haw hreh pawh a ni lo, Tanhrila awm an ni a, ka chuang rei dâwn lo ve êm bawk a ni. Bus chu Park bulah an lo tlan phei ṭan a, chawhnuah hi chuan bus stand-a va kal phei kher ngai tawh lovin an lo tlan phei ṭhin a, keini tan a awlsam phah hle. Chutia phone khawih chunga ka din ngawih reng lai chuan ka bul lawkah Car vâr hi a lo ding teh deuh thut a, a khalhtu ka hmuh rual ka phone ka khawih chhunzawm tawh lo chiang hle. 

"Awi, saw pa han pázia saw chu âw...a fai si, a hmelṭha bawk si" pu Muanawma en ta lo chuan hmeichhe ṭawng thawm lo chhuahna lam chu ka hawi phei a, pu Muanawma a sawina tih ka hrethiam mai a, a zak hnuhnawh a ni mai thei a ṭhiante phenah a ding thuai a, pu Muanawma ber lah chu hre lo ang hmakin a awm a, a hriat phak vek erawh ka ring.

"Lo lut la, kan haw rual thei reng alawm, vawiin chu i ṭhiannu a kal lo em ni?" chhuak chuang lovin a Car chhung aṭang chuan min rawn bia a, a bân chu pawnah a dah chhuak zawm zat a, a zawhna chhan tuma ka án lai tak chuan kan piah lawk aṭangin hmeichhe pakhat hian

"Sir, hawpui tur i nei na nge? Vawiin chu i va riang awm ngâih ngaih ve, i remtih chuan ka lo chuang haw ang chú, bus-ah ka chuang haw peih lo êm mai" a lo ti a, chuan khalh hlau ang maia a ṭawng thawr thawr chu mak ka ti ang reng, a la naupan hmel bakah hmuh tawhna ka nei chiang a ni. 

"Remtih lohna tur a awm hleinem, hei....hawpui tur ka lo zawng mêk a nih hi!" pu Muanawma chu nêlawm tak hian a ṭawng a, mi zawng zawng lakah a nêlawm em em vek a, a thei ka ti zawk, an inbiak dan vel ka hre ve vek bawk nen engtin emaw ni ka awm tlat a nih chu!

"Awi, ka lawm lutuk Sir, vawiin chu engati nge tûmah phurh haw i neih loh? Tlai dangah te chuan pahnih pathum tal an chuang haw ṭhin sia, a mak ka va'n ti deuh" chu nu zet zet chu ka ngaithei bau lo, ka inher daih a, mahse ka kal sawn hma chuan

"I lo chuang dâwn na nge?" a rawn ti leh a, a lam hawi zawngin ka inher a, nui lui sak pah hian

"Aaaa......chuang lo mai, chuanpui tur i nei tho alawm, bus-in ka lo haw zawk ang e" ka ti thluk awn deuh duai a, dik tak chuan a bula chuan leh ka châk, mahse a bula ṭhu hmeichhia chu ka ngaina hlawl lo a ni.

"Lo chuang rawh, bus ai chuan kan thleng hma daih zawk dâwn a nia" a rawn la ti hram a, a bula chuang tura min sawm hrim hrim te chu ka lawm tâwk a tling em em a, a bula hmeichhe ṭhu ve runluih duh pah vang hrim hrimin ka chuang ta nge nge.

"Sir, zanin kan vêngah i lo kal leh dâwn èm? Lo kal leh la, mahse maw Sir, i lén ṭhinna ah kha chuan léng duh tawh suh. U Julie-i kha maw a ṭha lo teh mai a nia, kan vêngnu a nia, ka hre chiang lutuk" kan chuanpuinu chu ka rin phak bakin a ṭawngthei, kan chuanho aṭang tawh a la ṭawng char char.

"Khawiah nge kal se min tih a?" pu Muanawma aw chu a dam leh dap tawh, a dawhthei miah miah ka ti khawp mai. 

"Kan inah maw le, lo lêng ve tawh la, zantin kan ina i rawn lén beiseiin ka lo chang char char ṭhin che alawm, mahse lo kal tih nî reng i nei ngai lo" titu chu ka en tlawk tlawk a, ka hre chhuak chiah, MZU VIRTHLI Miss kha a niin ka hria; magazine-a ka hmuh nu kha a ni chiang lutuk.

"A tâwk e Saron, hla play te i duh em Amte? Eng hla nge kan play ang? Ka playlist ho hi 80s leh 90s deuh chiah a ni hlawm a, i ngaina lo mai thei a ni" pu Muanawma chuan min rawn biak zawm ta daih a, ka lo inring hman si lo va, ka phu deuh uih nghe nghe.

"I duh dûh kha play tawp rawh, ka ngaithla thei vek, 80s leh 90s hla vel chu ka ngaithla ve ṭhin alawm; ka ute zârah" ka ti ve hliai a, pangngai taka min biak chuan chhan ṭhat loh ka tum teuh lo, a bula mi zet zet chu ka ngei tlat, duh ai a ṭawngthei mah mah a ni.

Pu Muanawma chuan hla a play ta ngei a, Traffic a jam chho zeuh zeuh a, bus-in haw ila chuan a jam nasat hun lai tak àwm velah Vaivakawn kan thleng emaw a ni leh ang a, pu Muanawma zârah traffic jam tak tak hma Vaivakawn kan pel fel der mai. Kan tlan zel a, Upper Khatla bus stand piahah kan chuanpuinu, ṭawngthei zeti chu a chhuk a, a titau deuh reuhin ka hria. Zodin kan tlan lai khan pu Muanawma berin min thlah a tum thu a sawi lâwk thlap tawh a, hnial ka tum úk a, kan chuanpuinu runluih nân hrim hrim ka hnial duh ta lo kha a nia, mahse kan pahnih tê chauha kan chuan tâkah chuan ka zâm ru lutuk a, nuam ka ti em em hran lo. Oikos Hostel zawnah muangchang hian a ding a, ka lam lo hawi chuang lo hian

"Lo ṭhu thla daih la, khata i ṭhut reng te chuan ka hlauhawm hmel êm mai" a rawn ti a, a fiamthu tih ka hriat avangin ṭhut thlak pawh ka tum chuang lo. 

"Ka bulah hian lo ṭhu teh khai, thil sawipui duh che ka nei a nia" amah bawk chuan a tih zawm leh nghal a, a mawi lo mah mah dâwna ka hriat avangin ka insawn thla ta nge nge. 

"In titina ka dip bawk che u sia, min hrethiam mai dâwn nia" kan tlan chhuah rualin ka ti sep a, kan chuanpuinu kha ka ngaihtheih lo mai bakah ka lo chuang kher kher kha nuam lo tihna chèn ka nei tak tak, awm lo ila chuan an duh dúh an sawi thei ang. 

"Dip lo e le, nuam i tih ka ring lo reng a ni. Saron-i kha chu kan inhre ṭha ve a, a u nen kan inkawm ṭhin bawk nen min nêl ve khawp mai" a ṭawng dan vel chu a ṭan deuh reuh a ang ka ti, a bialnu pawh ni hlei lo hian a rukin ka lo thik tlat pek a nih chu!

"Min thlah duh kher a, kan vêng a inhlat ang reng sia, Zodinah khan min drop mai la chu i tân pawh hawna kawng a hnai zawk ang maw le" ka tih chuan

"Inthlahrunna tur a awm lo" ti supin a kut chu a tiche zeuh zeuh a, a hla play beat chuan a tiche a, a chet dan leh awm dan vel ka en rei lutuk hmain ka hawi sawn daih bawk. 

"A remchang laiah khan min drop dâwn nia Sir" kan vêng kan tlan luh lai chuan ka ti a, min chhang lo va, kan hma zawn a en reng a, kawng chhak lama dawr awmte chu a en phei diat diatin ka hria. 

"In in thleng law law aw?" muangchanga tlan pah hian a ti a, kan in zawn kan thlen chuan

"Khatah khan ka lo chhuk ang e, hei hi kan in chu a nia" ka ti nghal a, ding mai lovin kawngpui chhak lamah a side ṭha tê tê phawt a, chumi hnu chuan ka chhuk ve ta chauh. 

"A nih aw" kan ti rual ve ve a, chal tichuar náng hian min en a, kei erawh ka nui ver ver thung a, a chal tichuar zawng zawngte nen lam ka mitah chuan sawiselbo khawpin a hmelṭha hliah hliah a ni.

"Chaw ei tui" ka ti leh a, mi buk khum zeuh pah hian

"Mut tui le" a rawn ti thung a, kawng cross-a ka kal laiin a motor chu a turn a, chak lutuk lovin a tlan chhuak nghal a, a tlan liam thleng chuan ka en zui vawng vawng nghe nghe. 

"Awi!!" tiin u Mapuii chu a ṭe ṭhawt a, kei pawh ka bang chuang lo, ka phu lutuk chu ka thin a chhuak mai dawnin ka hria. 

"I va han ti ho tak! Thawm nei ta che, min tihphutzia hi i hria em?" u Mapuii chu veranda light on tura lo chhuak a ni tih ka hrethiam nghal mai. 

"Eng nge ni!?" u Maruata aw kan hriat rualin a hmel kan hmu zawm zat a, ka thin phu rang zawt zawt la reh fel lo mah se ka nui ta ringawt a, u Maruata mawlh chuan ka nuih a tiza.

"Amtei hi maw le, eng nge a tih pawh ka hre lo, thim zingah a lo ding ngawi reng a, min tiphu lutuk" u Mapuii chu a ṭawng dan aṭangin a thin phut dan a la pangngai lo tih a hriat hle.

"Eng chu nge i lo tih a Ami?" u Maruata chu ka nuih var var a, a fate lehkha a zirpui a ni ang a kutah lehkhapuan a awm ran mai.

"U Mapuii aw i hre bik vel em mai a!" tiin in chhungah ka lut zui nghal daih a, ka nui lut var var a, ka room ka luh thlengin ka la nui a, a bul ber chu pu Muanawma vang vek a ni.

Zanah chuan kan ṭhianho group-ah rei lutuk lo ka online a, bialnu leh bialpa nei deuh vek tawh an ni hlawm a, kei leh Sangtea chiahin kan la nei lo va, kei phei chu nei lo chatuan turah min ngai hmiah. Sangtea erawh a nei ve tawh ngei a, mahse tun hnai hian a nei leh tawh miah lo thung a, Nunfela bialnu mawlh hi kan sawi chhe nasa ṭhin ta a ni. A bikin Ngaihawmi leh Esther-i an ṭawng duham ṭhin hle a, Nunfela leh Sangtea an ṭang dun ve leh bawk a, khawlaia han inhmuh te hian nâ tak takin an infiam fô va, a tua mah chuan huat enah pawh an en chuang lo. Kan ṭhianho hi chu kan fiamthu a sang ve hrim hrim a, Sangtea a ruih buai deuh phei chuan mi dang a lo sual thul, Nunfela hian a vêng deuh tawp zel.

Dar 8 vel aṭangin ka research paper tur ka khawih zawm mawlh mawlh a, chhun lam aṭang tawha ka mood dik lutuk vang pawh a ni mai thei, zan dang ai ka ti sâwt hle. Dar 10 leh a chanve thleng chu laptop nen hun ka hmang a, a chang leh lehkhabua mi thu inziak ka la chhawng a, endiktute'n an check uluk dâwn bawk si a, tih mai mai a theih loh, ka uluk khawp mai. Ka hnungzâng kham tihziaáwm nân tiin ka ṭhu mu awn duai a, lukham nghengin ka phone ka khawih zui nghal a, zirtirtute group bikah kan professor pakhat hian thil a post a, an chai laih laih a, mahse pu Muanawma erawh a reh hmak thung. Phone number kan in-save tawn ringawt te, kan thawkho ringawt te chu ka hlimna pakhat a ni a, ka hna dilah tling lo ta ila chuan kan inhmu ngai lo ang a, kan inhre ngai lo ang a, biak pawh kan inbe ngai tawp lo ang.

Pu Muanawma hi chu ka vei ve chiang alawm, mahse ka duh tih a hre tur a ni lo. Chu bakah ka duh phak a ni lo hrim hrim, ani te zawng duh dûh thlang thei khawpa luck leh hna zahawm thawk a ni a, Nunui sawi dan takah nupui nei duh tawh se chu a nei nghal thei mai ang, chuti ang khawp chuan a luck thawkhat ve tih ka hria. Kum lamah a upa tawh tih chu ka hria, chuti chung chuan ka duh miau si a, tih ngaihna a awm lo a ni. Thla khat vel er awrh chhung chauh MZU-ah la thawk mah ila duh aia tam a chanchin ka hre tawh a, zirlai naupangte pawh an bang chuang lo, pu Muanawma zawng a hmelṭhain a fel em a tin ni! Mut zai ka rel a, mut hma ka phone ka en leh hram a, Facebook-ah ka lut a, friend request ṭhenkhat ka accept a, Mizo ni lo hi chu ka accept duh ngai der lo. Suggested-ah chuan pu Muanawma a rawn lang hlawl mai, a number ka save vang a ni tih ka hrethiam nghal.

Whatsapp-ah ka lut kawi leh a, ka ṭhiante status ka view kual thliah thliah a, pu Muanawma hming bawk ka hmu leh ta. Ka en ang nge en lo ang tihah ka rilru a insual nasa hle a, minute 15 chhung vel chu inngaihtuah nân hun ka khawhral hial ang ka ring. A tawpa tawpah chuan view sak ka ti tlu ta a, a status ka en chiah chu ka âng phuau ringawt. MZU Park leh a chheh vela mihring awm nuaih nuaih thlalak a ni a, thuziak engmah a dah lo va, mak ka tih em em zawk chu langsar takin ka lang ve tlat a ni. Ka phone khawih lai tak a ni leh nghal a, ka rin dan chuan a motor-a chuang tura min sawm hma vel kha a ni ang, mahse engati nge ka lan ve ringawt? Engmah thuziak a tarlang tel bawk si lo, ni lo, thil awm ang lo lutuk ngaihtuah chhuak lo teh ang. Status a nei khât êm a, a nei ve châk ang a, a hmuh remchan hmasa ber Status atân a lá tawp a nih ka ring. 

(End of Chapter 2)