PU MUANAWMA By Havali Adam (CHAPTER 1)

                                 PU MUANAWMA

                                     (Dear Crush)

                                             By

                                     Havali Adam

                                        Chapter 1

Lengpui ka thleng chiah chu Mizoram boruak nawm bikzia ka rilru leh ka taksain a hre chawpchilh nghal a, ka pian leh murna; ka seilenna ram ngei Mizoram tluang taka ka thleng thei chu ka lawm a, rual û zawk te'n khawtlang ngaih avanga lunglên an tih fô ṭhin ka neih phahna hial kha a ni ve hrim hrim bawk a, ka hlimna leh lawmna chu mi dangte hriatthiam phak ve hauh si lovin a va nasa tehreng êm. Khua ni se a thiang nuam em em leh ta zel a, chawhnu her tih hriat tak hian ni chu a êng sa vût tawh lo va, ka ngaihtuahna ka kawm nasat lutuk luatah phone phawrh nachang pawh ka hre lo nghe nghe. Eng dang vang a ni lo, kum tam a liam hnuah pangngai taka Mizoram boruak ngei mai ka hip leh thei chu ka láwm êm a tin ni!

Dinga awmhmun ngai luah reng thei ka ni lo tih inhre chhuak riai riaiin ka bag chhunga phone chu ka phawrh a, nui sen sen pah hian ka pa hming ka chhu lang a, ka call zawm nghal zat bawk. Thlawhna ka chuan hma khan kan inbe lâwk vek tawh a, mahse mahni hna lama ṭul ṭheuh an nih avangin min lo hmuak lo mai se ka ti a, kei erawh a naupang ber tih takah ka la zir zo lo deuh hret thung. Kan unau hi pathum kan ni a, ka ute pahnih hi mipa ve ve an niin nupui fanau an nei ve ve tawh bawk. Pathian zârah ka nu leh pa kan chhun tlâng hlawm bawk a ni mahna, zirna lamah hian malsawmna kan dawng nasa em em a, kan ṭhiante ai paw'n hma kan sawn chak fô va, ka ute pahnih phei chu sawrkar hna sang taka an inziah tlinna a rei tawh mai.

"I lo thleng tawh em ni?" phone a lâk rualin ka pa chuan aw hriat nuam leh dam zet hian a lo ti nghal a, ka pa hi chu pa biak nuam tak a ni ve chiang alawm, hei leh chen hringnun ka hmang ve tawh a, sawiseltu a neih áwm pawh ka hre ngai lo.

"Aw, ka lo thleng deuh chiah" ka ti ve nghal mai a, ka ṭawng leh hmain amah zawk chuan

"Ka buai ang reng lutuk a, i ute pahnih hi kan be ve ve ang e, tu emaw zawk zawk an hman ka ring" a rawn ti leh a, a sawi dik ka ring, a chhan chu doctor a ni miau a, buai tur reng pawh a ni.

"Taxi emaw paw'n ka lo haw thei tho asin, ka ute chu be lo law law zawk mai rawh" ka ṭawng laklawh lai chuan kan inbiakna a titawp daih a, Taxi hman tur a awm tho bawk nen ka ute tihbuai kher chu ṭul ka ti hran lo, haw mai chu a ṭha zawkin ka hria.

"Remzela a lo kal mêk e, lo nghak lawk mai rawh" tih chu ka pa hnen aṭanga phone call ka lâk rualin ka hre hmasa ber a, u Remzela a lo kal mêk si chuan Taxi pawh hman loh ka tum ta lo law law. 

"A nih leh ka lo nghak mai ang, a rei ang em le, a rei lo turah ngai ila" mi veivak vel thlir reng pah chuan ka ti sep a, ka pa chuan a rei a rin loh thu a sawi a, rei pawh inbe lovin kan inbiakna chu kan titawp zui nghal mai bawk.

Bungrua em em ka nei hran lo va, hmuh awlsamna laiah chuan ka ding deuh tawp a, darkar tam a liam hmain u Remzela hmel ka hmu ta ngei a, ka pa sawi lâwk ang ngeiin a rei lo ang reng hle. Aizawl lam pana kan tlan lai chuan ka ṭawng siam siam a, ani pawh a ṭawng tui hle a, kan naupan lai aṭang tawh kan inkawm ngeih hrim hrim a, u Remzela chang a ni lo, kan upa ber u Maruata pawh a bang chuang lo. U Remzela nen chuan kan titi tui bawk a ni ang Aizawl khaw chhung kan luh lai rêng ka hre lo, kan vêng lamah kan tlan zel a, kan in kawt kan thlen chuan ka nu a lo chhuak a, a cher deuhin ka hria. Kum tam tak chhung kha chu zirna avangin phai lamah ka awm char char a, han haw zauh ang chi kha vawi 10 ai tam ka neih awm pawh ka hre lo. Khang hun laia ka haw zauh ṭhin lai ai khan ka nu hmel chu a cher deuh zawk a, mahse cher chhe tak a ni chuang lovin ka hria. 

"Tluang taka i lo thleng hi ka va'n lawm èm" min kuah chung hian ka nu chuan a ti a, ngai zetin ka kuah lêt ve a, u Remzelan ka bungrua in chhung lamah a lo khai lut zung zung bawk. 

"Ka kal leh nghal mai ang, kan la bâng lo deuh a, tih tur pawimawh awm lo se ka kal tawh kher lo vang maw le" u Remzela chuan a chhuah pahin a ti nuah nuah a, ka lo nuih sak a, engmah sawi tawh lovin a chhuak zui nghal.

Ka inbual fai hnu chuan ka nu chu ei rawng bawlpui ka tum a, mu hahdam rih turin min ti thung a, ka hnial ta lo mai. Khumah bawk zalin ka phone chu ka khawih a, ka ṭhiante message ka reply mawlh mawlh phawt a, chumi hnuah muthilh ka tum ve ta chauh. Ka harh leh meuh chuan khua a lo thim vek tawh a, chaw ei nen lam an lo peih titih vek tawh a, min lo kai tho duh lo chu niin, room aṭanga ka chhuah chuan u Remzela fate leh u Maruata fate'n min rawn bawr nghal a, anniho nen hi chuan phone kaltlangin kan inbe hnem zawk a, a taka ka hmu chiah chu duhawm súrh surh hlawm tak an ni. Ka thil hawnsak chu ka pe liam liam a, u Maruata te hian fa pahnih mipa leh hmeichhia an nei tawh a, u Remzela te erawh pakhat chiah an la nei a, mahse a nupui u Sawmi a rai mêk thung.

Zanriah ei dâwnah chuan ka pa'n hun a hmang a, tluang leh himdam taka kan in lúm ngei ka thleng leh thei chu a lawm ve hle a, Pathian hnenah lawmthu a sawi mawlh mawlh a, kei tak pawh ka lawm a ni. Vai rama chaw ei ṭhang tih takah kan zanriah ei chu ka ei tui hle a, chawhmeh engkim chu a Mizo em em vek a, Delhi-a ka awm lai khan chuti ang chawhmeh chu ka ei khât khawp mai. A chang chuan Mizoram lam aṭangin min rawn thawn ṭhin ngei a, mahse kan awmna hmun leh eina hmunin a zir loh vang nge ni, ka ei tui tak tak thei ngai lo. Hostel-a awm ṭhin ka nih avangin Vaiho nen kan inawm pawlh nawk nawk a, chaw ei tui a har ve ṭhin hrim hrim a ni.

"Kan lo lêng dâwn" tih message ka dawn rual chuan ka khi sak a, Sangtea hnen aṭangin dawng mah ila mi dang a biak kual hmasak vek tawh ka ring. 

"Lo kal teh u, ka ngai lutuk che u" tiin ka thawn lêt nghal a, ka ṭhiante chu ka ngai ve tak tak. 

"Min ngaih lutuk kher chu ka ring hlawl lo, mahse kan lo kal tho ang" a message ka chhiar rual chuan ka nui leh sak a, hmai chhanah inhmu tawh phei ila chuan a ṭawng duham leh tawh khawp ang.

Minute 20 vel liam hnu chuan ka ṭhiante pangnga an rawn lang ta sap sap a, kan ṭhianho hi paruk niin hmeichhia pali leh mipa pahnih kan ni a, High school leh Higher aṭanga inkawm chho tawh kan ni hlawm a, ka tan chuan khawvela ṭhian ṭha ber berte an ni ve chiang a ni. In tur leh ei tur an lo keng nual a, Sangtea ber chuan a enga mah hmain ka pa chu min chhuahpui a dil nghal ngawt a, a rui emaw ka ti zawk, chuti ang chuan awm ngai hek lo. Ka pa lah chuan a lo phal ve mai a, mak kan ti hlawm ang reng hle. Ka pa leh Sangtea hi chu an inchú e kha vak ngai lo va, mahse innêl lo zawk zawk chu an ni chuang lo. Sangtea zawk hi alawm, zu in te a ching khanglang a, ka pa'n zu in mi a ngaina lo ropui bawk si. 

"Zanin chu i va'n huai em em Sang" motor-a kan chuan hnu chuan Esther-in a ti hluai a, mi dang erawh thu dang sawiin kan titi malh malh hlawm a, chutah Sangtea chuan

"Ka ning deuh thut alawm, kan inhriatna a rei tawh, ṭih dêk ka peih tawh lo" a lo ti awlsam át a, Nunfela chu lo ṭawng ve nghalin

"Pa Zochhuana hi chu zú in mi a ngaina lo ve êm alawm, chu bakah a hmuh laiin i rui chhe thei ṭhin ve bawk a ni" a rawn ti a, an thil sawi ngaithlain hmeichhe dangho chuan kan titi laklawh lai kan ti tawp daih. 

"Amtei chu hna sang tak thawh bak tih tur i nei tawh si lo va, a nuam awm bik" kan reh ṭhiap laiin Nunui chu a rawn ṭawng chhuak hmasa ber a, mi dang chuan an sawi zawm nak nak a, kei erawh ka nui ringawt thung.

"Induh te hi a induh sâwt a nia" nui hak pah hian Sangtean a rawn ti ve leh a, hna sang tak thawk nghal mai tur anga min ngai chu a dik lohna chen a tam mai. 

"In mak a! Chuti angin eng hna sang mah ka thawk dawn rih lo, hna pawh ka la hmu thei lo, ka la lai laklawh lutuk" ka ti ve ta hliai a, a hnung kil ber ṭhu Ngaihawmi chuan 

"Engtikah nge i zawh dawn reng reng a? Kei chu ka hrethiam ve vak lo, nangni angin kan zir sang ve si lo va, tuna ka hnaah hian ka lungawi em em ringawt" a rawn ti luam a, a nui zui sak bawk.

"Ka kum 3-na mêk, a pangngai hi chu kum 5 a ni hrim hrim a, kei pawh hian ka ning lek lek ṭhin. Ngaihtuah tur thil dang a lo tam ve bawk nen a chang hi chuan engmah ti lovin ka awm hahdam tawp zel. Kumin phei chu stress ka ngah phah lutuk, Ph.D hi maw zuam ngawt chi a ni paw'n ka hre lo" ka ti ve ta duah a, mipa pahnih chuan min lo nuih a, min ei lo tih a hriat khawp.

"I inla Research ti vel em mai a!" Sangtea zawk chuan a rawn ti a, a ṭawng duh dan chu ka rin tâwk vel chiah, hepa nen hi chuan kan inhnial kumkhua thei ang ka ring. 

Rei pawh tlan tawh lovin Sangtea te in kan thleng a, Sangtea hi fapa mal niin a nu nen chauh an awm a, a pa'n stroke natna avangin kum 4 liam ta khan a thihsan tawh a, PWD-ah a pa ai a lut a, zú in ve ṭhin mah se a nu a ngaihtuah thiam khawp mai. A ṭhiante pawh hian kan zilh nasa ve ṭhin alawm, Nunfela phei chuan a kawm tam a, an inah a kal chilh tam bawk a, ṭhian mah ni se inang lo tak an ni. Sangtea hi zú heh tak a ni lem lo va, a ṭhiante hian zú hrim hrim in lo se kan duh luatah kan zilh chamchí ṭhin a, a chang chuan a la thutak ngai lo nghe nghe. In chhung kan lut chu Sangtea nu'n min lo be siam siam a, Mizorama ka châm rei deuh tawh tur thute ka hrilh ve mawlh mawlh a, a la hrisel ṭhat hmel khawp mai.

Ei tur ei pahin kan ṭhianho chu kan inkawm laih laih a, dar 9 velah ṭin zai kan rêl a, in ka thlen rual chuan Nunui hnen aṭangin thlalak leh link ka dawng a, ka en chuan hna ruak lampang hi a lo ni a, MZU-ah Assistant Professor hna a dil theih mêk chu niin, ka dil ang nge dil lo vang tihah ka rilru a buai nghal hle. Nunui hi MZU-ah a thawk a, mahse ani chu Library lamah a thawk thung. A thawhna a rei ve tawh a, hna ruak leh thil chinchang hre tur chu a ni ve tawh khawp mai. Ka dil a nih chuan ka Research tih a buai phah ang tih ka hlau ru deuh a, keimah ngawt chuan thutlukna ka siam ngam rih lo, ka chhungte ka râwn phawt zawk ang. Nunui chu lawmthu tawi tê ka thawn a, ka mu zui nghal daih bawk.

A tukah chuan tukṭhuan ei laiin MZU-a hna ruak a awm thu ka chhungte bulah ka sawi a,  an ngaihdan ka hriat hma hauhin ka ngaihdan ka sawi tlang nghal pawp a, ka nu leh pa tak chuan eng vak an sawi hran lo. Ka ute pahnih zawk chuan an sawi ṭeuh a, u Maruata phei chu a ṭhianpa chanchin a sawi kái nghe nghe a, Doctorate degree nei tura a beih laia Assistant Professor hna a thawh kawp ṭhin thute a sawi duah a, tlém chuan ka zuam ve phah ta deuh. Kan sawi kan sawi tâkah chuan dil ve chhin hrim hrim ka tum ta zawk a, ka hmuh hlauh phei chuan ka hma hun zel atan a ṭha phian mai thei a ni. Ka subject Master-na leh Research ka khawih mêkna Sociology Department lam a ni a, qualification neuh neuh en chuan ka tlâk nghal tawp bik ka ring lo. 

Qualification aṭanga a lan dan chuan NET nei tawh tân chance a chhe lèm lo va, Research bei mêk tân Research Proposal thil tel an ngai bawk a, chung chuan mark a la pu ṭheuh zui. Chutah NET-a JRF pha chin chu an mark a sang lehzual a, Master ka zir lai daih tawh khan ka lo JRF kher bawk nen ka dil tur tak a ni zawk dâwnin ka hre ta. Dilna form theh luh hun tawp chu ka en chiang a, rin ai a  lo tepter viau leh nghal. Ka chhungte pawh râwn tawh chuang lovin chhun lamah chuan keimahin ka chhuak a, ka ṭhiante ho hna nei vek an ni bawk nen tûmah ka pun buai duh ta lo law law. Application form chu ka print out a, ka fill up nghal mawlh mawlh a, ni 3 bak hun a awm tawh loh avangin ka hmanhmawh a ngai tih chu ka hre chiang hle. Tin, post pakhat chiah a ni a, ka tlâk ka ring lo ve ringawt tak na a, ka tling lo thei tho, tunah rih chuan engmah a hriat loh.

Form fill up tih loh thil dang tih tur em em ka nei hran tawh lo bawk a, MZU-a application fom leh documents pawimawh ṭhenkhat zu theh luh nghal mai chu ṭhain ka hre hnuhnawh leh a, ruahman lâwk loh dan deuh deuhin ka awm nasa kher mai. Bus-a kal ka tum teh ringawt a, MZU lama tlan bus pakhat mah a awm miah lo. Ni lo, a awm ngei a, ka kal duh hunah chuan bus service a awm lo zawk a ni. Bus driver pakhat ka zawh chuan Ramrikawn lam bus service a awm ṭhin a nih hmel a, a bak chu MZU bus a ni mai. Two Wheeler Taxi hmang mai turin min hrilh zawk a, a fuh phian ka ring. A ruak ka hmuh hmasak ber chu ka lo phar ding nghal a, MZU lam kawngah chuan min phur thla ta vang vang a, a tlan muang lo khawp.

Main Gate bul kan thlen chuan ka dintir a, pawisa kan inpe fel a, mahse thil ka ngaihtuah kim lo tih ka hre chhuak thuai thung. Sociology Department awmna lam ka hriat loh mai bakah kalna tur ka nei reng reng hleinem, motor service áwm pakhat mah a awm bawk si lo. Gate bula duty te chu ka zawt ta ringawt a, ka kalna tur a hlat lutuk loh thu leh bus tlan remchang a awm rih loh thu min hrilh a, kea kal mai chu a finthlakin ka hre ta bawk. Duty te chuan Sociology Department Building awmna lam min hrilh a, an sawi ang ngeiin Lianchhiari Road-ah ka pêng a, MZU hrim hrim hi chu ka vawi khat kalna pawh a ni chuang lo, ka kal khât ang reng a, a hmun a lo zau ṭha ve bawk nen ka tan chuan hriat sen a har ve a ni. Ka kal zel a, motor veivak a awm pheuh pheuh a, chumi tih lovah chuan kawng chu a reh khawp mai.

A tawpa tawpah chuan Sociology Department awmna buidling, Cluster Buidling an tih mai lian zet chu ka thleng ta, lift te a lo awm thlap a, step-a kal chhoh ai chuan tiin ka chuang nghe nghe a, ka kal duhna building chhung berah ka awm tawh a, form theh luhna tur chu zawn hmuh a harsat ka ring tawh lo. Keimah ang rual vel hmeichhe pakhat, zirtirtu ni awm tak hi ka biak risk hmiah a, zirtirtu a lo ni ngei a, theh luhna tur te min kawh hmuh zung zung a, theh luhnaa lo ṭhunu chuan dil an tlêm thute min hrilh luam a, kan vawi khat inhmuhna ni mah se ka nêl nghal em em a, a nu lian sia, a nêlawm tawp. A ṭawng hriat a hahdam a, a hmelchhe miah lo leh zel a, a hawihhawmin a fel thlawt a ni. Chutia kan inbiak lai chuan mi pakhat, sang ṭha thlerh thlawrh, Mizo mipaah chuan pa lian pawl tak a ni ang tih tur khawpa sang leh taksa inphút mawi tâwk tak mai hi kan awmna room-ah chuan a lo lut a, ka bula mite chuan 'Sir' tiin an lo be sap sap a, kei erawh rei pawh ka en lo.

"I buai em? MZU-ah ka lo kal a, ka lo be mai mai che" chawhnu dâr 2 a pel tawh a, Nunui chu ka hmelhriat hnaivai ber a ni tho bawk nen a buai leh buai loh pawh dâwn lovin ka be ve hmiah ringawt a, ka thlen thlak tirh te khan hre chhuak ila ṭha tùr! 

"Awi, i lo kal maw!? Eng nge i lo tih? Tunah khan khawiah nge i awm?" phur hmel zet hian a lo ti nghal sawk sawk a, ka awmna hmun en kual deuh pah chuan

"Park bulah khan ka ding mêk, hawna tur ka nei lo va, engtin nge i haw dawn?" ka tih zawm nghal a, a tlan loh nî a nih avangin scooty a lo keng bik lo chu niin, mahse bus-a kan haw rual theih a rin thu a sawi thung. 

"Kawng péngah khan lo chhhuk thla char char la, ka lo hmuak ang che, ka bulah lo awm rih rawh, kan haw rual dawn tho" a tih tlat avangin a thu ang chuan ka awm a, Library awmna lam kawng erawh mi dang zawh buai ka ngai ém bik tawh lo ve, Nunui sawi zârah ka risk dik thei ve mai.

Library-ah chuan kan awm dun ta reng a, ka hna dil chungchang leh thil dang eng eng emaw ni sawiin kan nui dun leh hak hak a, an thawhpuipa pakhat chuan min be peih viau bawk. Fiamthu deuh reuh hian Nunui chuan tlangval a la nih thute a sawi a, chhan dan tur leh sawi tur pawh ka hre vak lo, ka nui vel mai mai ringawt. Nunui chuan a hna a khawih pah reng a, keiin ka lo fang kual thung a, zirlai naupang an tam ang reng viau bawk. Ka lehkhabu lák thlak chu dah ṭha lehin hmun dang ka melh a, ka tum loh deuhin application form ka theh luh laia mipa pian ṭha tak mai ka hmuh kha ka hmu leh hlawl a, zirlai naupang hruai kual pahin thil a sawi a, a sang ṭha bawk a, student lakah chuan a langsar bik khawp. Zep thu cheng lo, ka hma zawna mipa sang ṭha tak ṭawng mial mial chu hmelṭha ka ti tak zet, Mizo mipa ka hmuh tawhah chuan a la hmelṭha ber hial ang ka ring. A fai vêk vâwk si, a kamis vâr hak te chu a tâna siam bik emaw tih mai tur hian a inhmeh a, mahse a hmel aṭangin nupui fanau nei tawh a ni dawn tih ka chiang em em thung.

"Eng nge a án? Delhi University-a Library nen chuan a inang lo deuh ngei ang a, mahse Mizoram level-ah chuan kan neih ṭhat ber a nih ve hi!" ka ṭhut thlak rualin Nunui chuan min lo be nghal a, nuih zeuh pahin

"Ṭha tehreng e le, khu lam university library a tluk lohna a awm chuang lo" ka lo ti ve mai a, a hna khawih zawm lehin kan titi dun nghal char char a, ka tih ve tur awmchhun chu an bán hun nghah a ni mai. 

"Student ID hi lo verify sak lawk ta che, i buai em em loh chuan" mipa aw hriat nuam tak ka hriat rualin ka hawi chhuak a, ka bul lawka ding a nih avangin min bia emaw ka ti hman hial a, mahse min en miah loh danah min be lo tih ka hre chawpchilh leh nghal tho. 

"Aw le Sir, in va zo hma phian ve" Nunui chuan nélawm zet hian a lo chhang lét a, inhre sa an ang ka ti zawk. 

"A harsa hran hleinem, bán hma lutuk aiah ka lo kalpui mai mai maw le" a ṭawngkam chhuak hrim hrim chu hriat a nuam em em vek a, aw thum tak a ni lém lo va, mahse a sin chuang lo, ka bengah chuan a tâwk chiah ka ti mai.

"A nih ka kal ang e" tih leh kal sawn a rual nghal a, student te chu Nunui hma zawnah an rawn in-line diat diat a, kei erawh library kawngkapui awmna lam pana kal mêk lam ka hawi char char thung a, kawngka nam hawn pah hian a rawn hawi lét thut a, ka insiam ṭha rang hle. 

Darkar khat hnu velah Nunui chu a haw hman ta, Park bul kan thlen chhoh chuan bus a lo ding ṭhap tawh a, student tam zawk phei chu an chuang deuh vek a, vanneihthlak takin keini pahnih pawh seat kan chang ve hlauh. Chu pawh Nunui hmelhriatte zârah a ni a, an ṭhutna tur min kian a, a inthlahrunawm duh ang reng. Bus tlan chhuah hma hret chuan kan Bus chuanna tlan pel zawngin Car vâr hi a rawn tlan a, Nunui chuan min kheuh zeuh a, a lam ka hawi ve tak ná a, a hawina lam ka hawi zawm leh nghal. Car khalhtu kha ka hmu hman a, chu erawh ka tum a ni miah lo. Hmuh kher pawh ka tum lo, mahse a khalhtu kha kamis vâr ha a ni tlat a, ka mit a lá lo thei lo a ni. Amah bawk kha a niin ka hria, ka hre sual thei tho, amah a nih loh paw'n amah ang tak zawng a ni ngei ang.

"Pu Muanawma a nih kha!" Nunui lam chu ka hawi nghal a, a thusawi awmzia hre hek lo.

"A fel asin âw, a ngainatawm bawk si" a rawn ti leh a, tu chungchang nge a sawi ka la hre chuang lo, a sawi dan teh tawp chu hriatthiam nghal mai a harsa ve bawk a ni. 

"Tu chu maw?" ka tih chuan nui ver ver pah hian

"Àw....i en zui vawng vawng kha maw le, ka hmuh loh che i ring reng reng em ni?" a rawn ti ta mai, mak ti zetin ka en hâw a, a sawi awmzia ka hre ve chiah. 

"Library-ah pawh khan ka hmu ru reng che alawm, mahse i dem awm hran loh a nia, pu Muanawma te zawng hmelṭha titu an tam êm mai" a la ti ta deuh deuh a, ka rilru a hre chiang lutuk chu a zahthlak letling zawk. 

"Ka rilru ni lo pui sawi suh, chuti angin engtin mah ka awm lo, hmelṭha pawh ka ti lém lo" tia ṭanchhan ka siam lai chuan

"Awi, ngawi teh, nang hi! Sociology Department-ah a ni lo'm ni hna ruak kha awm? Chutah chuan Pu Muanawma kha HOD alawm a nih, form i submit te khan i hmu lo em ni?" a lo tih zawm daih a, Bus chu a tlan chhuak chiah bawk. 

"Hmu e" tih chiahin ka chhang a, mi tihlaih tum deuh hian min melh a, ka nghawk deuh sawk a, nuih chhan ber pawh awm chuang lovin ka nui ve leh ringawt.

"I educational background a ṭha mai sia, i tling ang a?" a tih leh chuan

"Tling bik kher lo vang, kei aia thiam leh background ṭha tak tak an tam awm êm mai" ka ti ve mai a, chu lampang chu haw kawng tluanin kan sawi zawm leh tawh lo va, kan sawi ho dun ang reng.

Zanah chuan ka khumah laptop nen ka inchhawp hnawk hle a, kum 2 leh a chanve zenzawn la nei mah ila a tawp lama inhnawh ṭawk ai chuan 80% emaw 60% emaw tal work tih zawh hman ka duh a, Delhi-ah khan tam tak chu ka ti hman a, mahse Field Study atan Mizoram leh a chhehvel ka thlang miau si a, chu bakah ka thlan dawn pawh khan ram dang ai a awlsam zawk ka rin vang a ni a, haw ka châk ve hrim hrim bawk. Laptop-a thil ka chhut mawlh mawlh lai chuan ka rilruah thil dang a rawn lut thut a, ka mitthlaa awm lah chu thil awihawm loh tak a ni. Kha pa bawk kha, pu Muanawma bawk kha a rawn awm tlat a nih chu! Vawi hnih chiah kan inhmu chiang hman kha a nia, mahse a tak ang maiin ka hmuh chin kha chu engkim chiang takin ka la ngaihtuah lêt vek thei maw le. 

Ka mitah chuan phat rual lovin a hmelṭha chiang alawm, mahse chuti anga han ngaihtuah zui ém tur chuan a awm ang lo mah mah a ni. Laptop chu bih zawmin ka thil khawih lai chhut leh mai ka tum a, mahse ka rilru pêng pakhatah pu Muanawma a awm tlat a nih chu! A mak zawk, engtin nge chuti ang chuan ka rilru leh mitthlaah a awm tlat theih? Thil chhut pahin pu Muanawma hmel, kawr hak rawng leh a vun rawng chenin ka ngaihtuah a, a loh theih loh. Thil chhut ka duh si, ngaihtuahnaah thil dang a awm daih bawk si, a pahnih hniha tihkawp chu ka tum ta tawp a ni. A naupangchhe tawh lo tih hriat taka a bek sam ṭuak lek lek te, a vun ngo ang reng tak te, a pian dik zaih te, a bek sam ṭuak ṭhek ṭhek inhmehzia te, engkim chu ka bul lawka awm ang maia chiang hian ka mitthlaah a châm reng a, tih ngaihna ka hre tawh bik lo.

Laptop chu off-in ka khup ta nge nge a, ka chhu sâwt lo ve êm bawk a ni. Rizaiin ka inkhuh a, ka mit ka chhing vang vang a, muthilh daih chu a fuh zawk, awmze nei lova men rei ringawt zawng a hlawkthlak loh êm mai. Zing dar 7 pelh hretah ka tho va, ka nu nen ei rawng bawl dunn interview hun te min zawt a, advertisement-a a inziah angin ka hrilh ve mai bawk. Kâr a ral a, thingtlâng khaw lamah ka zin ta zeuh zeuh a, ka research tih mêk tâna ṭangkai tur a ni a, khaw hran hranah ka kal kual a, ka pa Car ka hmang tawp a, mahse ka khalh thiam loh avangin driver ka chhawr thung. Riah ka duh ngai loh avangin khaw thim dâwnah te kan haw ṭhin a, kâr khatah vawi hnih vel bak ka zin hlei thei lo, ka chau ṭhin khawp mai. Ka nu ngat phei chuan chawl hahdam rih turin min ti a, mahse ka taimaka ka tih ṭang ṭang rih a ngai tlat si a ni. 

Thla thar kan chuangkai a, ka hna dil lam interview hun a lo thleng a, inbuatsaihna em em pawh ka nei hran lo. Kan interview ni chuan mi 10 vel kan kal a, an thiam hmel hlawm bawk sia, ka zâm ru ve reng. Ka hun a rawn thleng a, thawk la hmasa tê têin ka lut a, ka hmuh hmasak ber chu pu Muanawma hmel a ni. A bulah chuan mi dang pahnih an ṭhu a, kâr eng emaw zah kha chu ka rilruah a awm leh ta miah lo kha a nia, mahse tunah zet zawng a hmel ka hmu leh chiah chu ka zâm zual sawt tih ka hai lo chiang khawp. Ka CV leh ka documents thil tel neuh neuh chu ngawi reng hian a en dán dan a, a vei lama mi zawk chuan zawhna min rawn zawt ṭan a, ka chhang thei zel a, a nihna takah chuan han chhan em em tur a awm hran lo, min zawt ho ang reng phian, ka huphurh rûk aiin a ho daih!

"Delhi Universirty-ah chuan Professor Kumar-a em ni HOD ni ṭhin?" pu Muanawma chuan min rawn en ve ta, ngainatawm zet hian min nuih deuh suk a, a va han hmelṭha chiang ngawih ngawih tak. 

"Aw, nia...eng lo, ni e, amah a ni mai" a hma zawnga ṭawng felfai em em si kha ka ṭawng bah nawk nawk lutuk chu a hun lo kher mai, interview lai a la ni zui. 

"Mi zirtir thiam deuh mai hi a nia, Kumar-a student te chu thiam thei lo pawh an awm vak hleinem, nang pawh hi i pangngai khawp mai" ka CV chu a keu nawn leh a, a ding lama mi ve thung chuan

"He hna thawk tur hian lo tling ta la i student te nge i Research beih lai hi i ngaih pawimawh zawk ang?" a rawn ti daih a, ka inngaihtuah vang vang phawt a, chhan dan thiam a har zek leh nghal.

"Ka tum dan chuan ka kawp theih ka ring, mi dangte paw'n an lo ti fô tawh ṭhin alawm, a khawi zawk zawk pawh ka ngaihthah lo vang" inringtâwk tak chuan ka ti a, pu Muanawma bawk chuan min en chung hian

"Kei pawh kan hun lai khan ka kawp alawm, a  harsat leh harsat loh erawh a mihring azir a ni e" a lo tih zawm nghal a, a aw hriat a nuam sia, amah a faiin a hmelṭha bawk sia, ka zâm ru er er tih mai loh chu boruak nuam tak ka hip ti ila a sual lo ang.

"Kâr lehah khian result a chhuah beisei ila, lo ngaihven deuh la ti raw?" nélawm tak hian hmeichhe awmchhun chuan a ti a, ka ngaihven tur thu ka sawi hnuah ka chhuah theih thu min hrilh a, hawihhawm takin ka chhuak ve nghal mai bawk.

Nunui te awmna building lam chu kein ka pan hnak hnak a, mahse hrehawm tihna ka nei miah lo. A chhan chu ka hlim tlat alawm, pu Muanawma felzia kha! Nunui khan HOD a nih thu min hrilh tawh a, phaia BA leh MA ka zir laia kan HOD nen kha chuan inang lo tak an ni. A tirah khan a ṭawngmawh emaw a inhmuam up viau ka ring nghal ringawt a, mahse a lo ni teuh lo, ka HOD hriat tawhah a la inhawng ber ang, a hawihhawm ber bawk. Eng dang zawng ai chuan a hmel mawlh kha a ni ṭha chu, a rim te kha a va'n tui chem chem tak! Kal kawnga ka kal lai chuan ka khi leh sak ṭhin a, keimah ringawt paw'n ka hlim tâwk em em a, ka ngaihtuahna leh ka mitthla zawng zawng luah khattu pu Muanawma chu hmu zo deuh chiah mah ila hmuh leh ka châk zek zek a nih chu! Keimah leh keimah pawh ka inhrethiam tawh lo, a bul ber chu a nélawmin a hmelṭha ve bawk ém a ni.

"Eng nge kan án à? Kan tling thei dawn em? Eu....i hmel aṭang chuan tling sa kan va ang deuh ve, i interview chanchin chu min han hrilh teh le" kan awm dun hnu chuan Nunui chuan zawt nghal a, ka nui tawp ringawt. 

"I lo kalna lamah hmu ṭha i hmu zawk em ni? Engati nge i nuih leh ringawt ṭhin?" nui heu chung hian a rawn ti leh a, thawk ka la halh a, ka nuih a za em em hran lo va, mahse ka hlim em em thung. 

"Eng lo...en teh Nunu, nang i ni bawk a, ka sawi tawp ang. Pu Muanawma kha hmelṭha ka ti thlawt, ka mitah chuan hmelṭha tak a ni. Ka hmuh tirh phat aṭang khan ka mit a lá nghal lutuk, ka sawi duh lo mai mai alawm, vawiin phei chu a hmelṭha zualin ka hria" dawhkan chu ka bawh zawm zat a, ka ṭhiannu ni lo se chu ka rilru dik tak ka hrilh kher lo ang. 

"Nang nu hi i tak tak elo? Ka fiamthu mai mai lai khan hmelṭha i lo ti tak tak a ni máw? Mipa hmelṭha i sawi vawi khatna a ni lo maw Amte? Awi, mi dang ka hrilh châk tawh lutuk" a tih chuan ka nui ver ver a, 'mi dang' a tih chu kan ṭhiante bak va ni suh. 

"Interview chungchang ka zawt che a, nang lah chuan pu Muanawma hmelṭha i ti ngawih ngawih thu min hrilh daih thung a, tun ṭum i lo haw hi i danglam riau alawm Amte, nangmah pawh hian i inhriat ka ring" a tih zawm leh nghal a, a sawi dik chiah. 

"Ka first crush a ni ná chu pa a ni tawh bawk sia, a va'n pawi tak!" ka thil thlir ngai thlir reng pah chuan ka ti niah niah a, pu Muanawma chungchang bak ka rilruah sawi tur a lang rih lo tlat a tin ni!

"Leh ringawt ṭhin che hian, pu Muanawma kha pa a la ni lo, tlangval alawm a la nih" Nunui chu ka en thuai a, a thusawi chu ka awih lo nasa hle.

"Pa a la ni lo maw!? Engati nge 'pu' tih hlirin i koh si?" ka tih chuan

"Ani te chu mi zawng zawng pu alawm, hmán kuma Central YMA President a nih aṭang khan a ṭhiante'n a hming bulah 'pu' tih an dah fiamthu ṭhin a, tun thlengin amah hre chiangtu leh ngainatute chuan an pu chhunzawm zel, kei tiamin, hnathawhnaah hian ka pu lova a ni mai" a lo ti daih thung a, ka ngaihtuahna ka kawm leh ta char char. 

"Pu Muanawma kha i duh a ni maw?" ka suangtuahna aṭanga pawh chhuak sawk ang maiin ka awm a, ka ṭhiannu zawhna chuan min tiharh chiang teh e!

"A teuh lo mai, ka duh ringawt lo e a! A hmel erawh sawiselbo khawpin a ṭha, mahse ka duh kher lo, chu bakah tlangval pawh ni se a upa tawh ém mai" ka ti deuh luam a, min nuih hak hak a, a nuih chhan engmah ka hre lo. 

"Ka khawngaih reuh che ê Lal Am, i crush neih hmasak ve berah tlangval senior phanchang tawh lutuk tak mai, tlangval a nih lai pawha mite 'pu' ni thei ngat ang chi a la ni zui, chang lo turah inngai hmiah rawh, pu Muanawma te zawng ngaizawngtu a ngah ém mai, a duh tak hmu se chu nupui a nei daih tawh ang" Nunui chu a nui tawp hlei thei meuh lo, kei pawh ka nui ve leh ta ringawt. 

"Ka duh ka tih loh khâ, hmelṭha ka ti mai chauh alawm, mahse ka crush chu a ni tho mai" tiin ka insawi thiam dawn dek dek a, min nuih zel a, a nuih za a reh meuh chuan ka titi châkna a bo vek.

Social Work Department lam Canteen-ah thil kan ei dun a, mi dangte hriatthiam theih si loh hian min chhaih leh zauh ṭhin a, a duhnaah hi chuan a nghal thiam ve thlawt a ni. Ka ngaihtuah chiang mai mai a, pu Muanawma chu ka duh áwm ka hre lo reng reng. A hmel erawh ṭha ka ti lutuk, ani tluka ṭha Mizo mipaah ka la hmu lo hial ang, ka tan chuan ralkhat star ni se a tâwk chiah, Nunui sawi dan takah lo duh ta pawh ni ila awmzia a awm thui dawn lo êm mai. Class 12 ka pass aṭang khan phaiah lehkha zirin ka awm bo vang vang a, kum eng emaw zah ka awm a, ngaihzawng ang tur ang chi mipa lam reng ka ngaihsak ngai lo va, tlai khawhnuah sap hovin 'crush' an tih ṭhin ang ka nei ve a, chu pa lah chu pu Muanawma kha niin a la upa em em zui. Chu mai a ni náng, ka hna dilna ah HOD a ni nghe nghe a, min lâk pawh ka ring lo, post lah kha a tlêm si.

End of Chapter 1