LALRINCHHANA HAUHNAR By Havali Adam (CHAPTER 5)

LALRINCHHANA HAUHNAR 

By

Havali Adam

Chapter 5

A office aṭanga a lo chhuah lai te chuan ka hawi chhuak ṭha ngam tawh lo, ka kun deuh ngul a, dawr a chhuahsan ta maw tihah ka awm pangngai ve thei chauh. Chutah Julie-i lah ka huat tura sawi ang hrim hian thu thin khei tak tak a sawi chhen a, a chang leh min hmusit tih hriat tak hian a nui vel a, ka nî hman a nuam hlawl lo. Tlai bân hunah pawh pa Rinchhana hmuh hmain dawr ka chhuahsan daih a, ni lo, min hmu hman ngei a, mahse a bula chuan haw ka duh loh avangin ka chhuak lui zawk a ni. Bus-a ka lawn luh lai te chuan min en reng tih ka hria, ka rilru mai ni lo ka taksa thleng hian min en chuan ka danglam ṭhin a, engtin emaw ni ka awm tlat ṭhin bawk.

Bus-ah ka chuang haw a, pa Rinchhana lam reng ka ngaihtuah lo ang chu tih nâk a laiin ka rilruah a awm char char thung a, paih chhuaha ngaihtuah loh ka tum pôh leh a harsa tulh tulhin ka hria. Bus-ah ka chuang ve tak ná a, ka chuang nuam hran lem lo khawp. Kan veng Bus stand aṭangin kein ka kal a, kan in awmna nen a inhlat lutuk lo va, thlen phei pawh ka thleng phei har lo, mahse ka mi hmuh châk loh lutuk kan in bulah a lo ding run ta mai. A tirah chuan kal phei nghal lawk lovin ka tawi khawmuang a, tih tur em em pawh ka nei lo. Ka ding deuh tawp a, a haw hun ka nghak ang nge nghak lo ang tihah ka rilru a insual nasa hle a, mahse a tawpah erawh ka phei ta nge nge.

"Inbe teh ang" min hmuh rualin a lo ti nghal a, ka kutah a vuan chat a, khaw én lai a la ni bawk nen ka hawi kual zûk zuk a, mi dangin min lo hmu palh ang tih ka hlau a ni ber e. 

A motor chhungah min nawr lut titih a, hniala han ṭan ka tum deuh ná a, mahse hnial thei ka ni lo tih ka hria, chu vanga a thû thua awm ringawt pawh chu ka ni. Khawi lamah nge kan kal dawn pawh ka hre lo, ngawi reng hian rei fê chu kan chuang dun tlawk tlawk a, motor veivah tam lohna deuhah min dinpui a, in ding phei chu hmuh tur a awm lo hrim hrim. Min hmuh hlau zetin a lam ka hawi phei zawk a, steering chunga a kutzungchal tiche zeuh zeuhin hma lam a en reng a, min biak mai ka rin loh avangin ka mit ka chhinsan ta daih. Thil rim tui tak, a ruk têa rim tui, ni vût si lo rim hi ka hria a, ka hriat sual loh chuan a perfume inkah rim a ni ang. Ka mit erawh ka chhing nghet hle thung a, min awm hnaih tial tial tih chu hriat loh rûal a ni lo.

"Meng teh" ti supin ka khabe chu a kut hrawl tak; nêm leh lum vung vung si chuan a tawk zeuh a, ka meng lo thei tawh lo, ka mur nasa êm mai.

"Min hlau em ni?" a zawhna chu chhang lovin ka ngawi reng a, ka inen chiang leh lutuk chu ka thaw a chham mai dawnin ka hria, chuti ang em ema hnai chuan vawi khat mah kan la inmelh hleinem. 

"Ka hmeichhe rin theih awmchhun i ni a, nupuia neih che ka duh" a tih leh chuan ka nam sawn a, a ṭhutna ngaiah a ṭhu ṭha ve mai bawk a, a thusawi chiah chuan ka rilru zawng zawng a tibuai vek. 

"Pawisa hmanga thlem mai mai theih hmeichhia angah min ngai a ni maw? A awm tho e, i pawisa kan hmang nasa êm bawk a ni. Naktuk aṭang chuan i dawrah ka thawk tawh lo ang a, hnathawh tur dang ka zawng ang a, i pawisa kan lo hman tawh zawng zawng kha ka rul vek bawk ang che" ka tih chuan min melh rum khawp.

"Ka thusawi lâk kawih a ṭul lo, thu dik bak ka sawi lo bawk. Nupuia neih che ka tum, chu chu ka thu tawp a ni" a ti nghet charh a, a lam ka hawi zeuh a, min lo en chiang lutuk chu ka hawi sawn rang hle.

"I lo hetih vang a nih dawn hi a tir aṭang khan kan unau chunga i ṭhat em em, keini mi mawl chuan i rilru engmah kan hrethiam pha ve si lo. Khawngaihin heti ang hian kan chungah awm tawh suh pa Rinchhan, kan zah em em che a, harsatna kan tawh laia min puitu i ni a, kan lawm lutuk, mahse khawngaihin heti ang zawng hian awm suh" ka ti chuai raih a, hma lam ka en ngar ngar bawk. 

"I rilru tur awm ang ka hria, ka ngainat ruk ang che hian min ngaina lo tih ka hre bawk, mahse hei erawh ka chiang, min la ngaina thuai dawn" tiin a chawl deuh dat a, chutah a amah bawk chuan 

"Ngaihzawng i nei ngai lo tih leh ka tawhna che avangin i danglam nasa ṭhin tih thlengin ka hria, chuti ang chiah chuan kei pawh i taksa ka sik hian ka awm ṭhin" a rawn tih zawm leh nghal a, kan inen zawk nghe nghe. 

"Keini ang chu min ngaina suh, kan hniam lutuk, i nupui nih phei chu a awm ang lo lutuk. Khawpuimi i ni a, khawpui nula hmelṭha leh changkang tak nei zawk rawh" ka ti sep a, hnar dan tur ka vân tawh tak zet. 

"Chung khawpui nulaho aia ka thlan awmchhun chu nangmah hi i ni tlat si a ni" hma lam en pah hian a ti thung a, min en loh lai tak a ni bawk nen ka en tlawk tlawk ringawt. 

"Min thlang lo mai la, chu bakah nangte chu" ka tih laklawh lai chuan

"Ka hria alawm, pathlawi ka nihna hi i rilru tibuaitu pakhat a nih ka ring, mahse ka chiang lo, hemi lamah hi chuan i rilru i sen vak hmel loh" tiin a sawi zawm a, a sawi dik tak tak, pathlawi a nih leh nih loh lam ka ngaihtuah buai hran lo.

"Naktuk aṭang chuan dawrah ka lo kal tawh dawn lo ni mai rawh se, dawr danga thawhna tur ka zawng mai ang, min hrethiam hram dawn nia" ka thusawi avang chuan a hmel zawng zawng a inthlak nghal vek a, a lungawi hmel teh chiam loh bawk.

"Ka thu lo chuan i bâng tawp lo ang, zanin aṭang chuan zan tin min hmuh inbeisei bawk ang che" ti khauh hmukin motor a tirum a, muangchang lo fê hian a tlan chhuak nghal a, a awm dan leh a che velah a thinrim tih a hriat khawp.

Kan in kawt chu kan thleng har lo hle a, kan din rualin ka chhuk nghal thuai thuai a, ani pawh a haw rang hle. Rengtei nen ei rawng kan bawl dun a, ka mood ṭhat leh ṭhat loh hrethiam hauh lo hian a ṭawng siam siam a, ka nui lui vel mai mai a, ṭawng pawh ka ṭawng ṭha peih lo. Ka laka pa Rinchhana rilru puthmang te, nupuia min neih a duh thute chu hrilh ta ila a pawi ang em tihah ka rilru a la buai a, ka hrilh rih lo ta law law bawk. Ka mualpho theihna a ni tlat a, chu bakah duhna emaw ngainatna pakhat mah ka nei reng reng hleinem. Engtin nge ngaihzawng ka nei ngai lo tih te, min tawh apiangin ka danglam ṭhin tih te kha a hriat reng reng ni!

Ni tak e! Amah pawh khan a danglam ṭhin thu a sawi tak alawm, mahse ani chuan min ngaina miau a, nupuiah hial min neih a duh thu hmai chhanah a sawi a, danglam pawh ni se a hriatthiamawm deuh zawk. Kei ve chu, ka ngainat leh ngainat loh pawh ka hre lo a nia, nulain tlangval a va duha a va ngaina ang hi chuan ka ngaina rih lo ni berin ka hria, mahse min tawh apianga ka mur uaih uaih zel te, ka thin phu rang em em ṭhin te, ka danglam nasa ṭhin em em te hi a chhan ka hre bik hlawl lo a ni. Chu mai a ni nâng, a huhang leh a mi uap a nâ leh zel a, hriatthiam a harin sawifiah a har thlawt a ni. 

Zanah chuan a hmel ka hmu ta ngei a, chhun lam leh tlai lama thil thleng awm lo ang mai hian a awm dan a pangngai reng a, a ngaite bawkin a ṭawng tam lo leh hle. A duh hunah hi chuan thil a sawi ve duah ṭhin a, mahse a duh hun têah tak tak chauh a ni. Thingpui ka siamsak a, mi dang hi chuan an ngaina em em hran lo va, ka in tur leh Doro-i in tur ka siam tel a, mi dang pahnih erawh ka siam kep ta lo. Hminga nen an inbe leh zauh ṭhin a, a hnathawhna chungchang an inzawt a, a changin Rengtein a be leh ṭhin bawk. A nau in sak mêkah Hminga a thawh tir tak tak a, a thawh aṭang thla a liam leh tawh zawk a, mahse kâr khatah vawi khat chiah a ni thung.

"Pa Rinchhan!" ka inrin loh laia min kuah thut avang chuan ka ti hluai a, mahse ka ṭawng ring ngam lo, mi dangin min lo hmu palh ang tih ka hlau.

"Va haw tawh rawh" ka ti leh ringawt a, sawi tur dang hre hek lo, ani lah chu a awm ngaiin a awm ngul a, min la kuah reng bawk.

"Pathlawi ka nih avang hian min iai phah lo ang che, tlangval tam tak aiin ka ṭha zawk" mahni inring tâwk aw deuh hian a ti sup a, min kuah dan thlakin ka hnung lam aṭang min kuah ta thung a, ka ngainat vang pawh ni lovin ka hnial ngam lo a ni ber.

"Chuti angin ka iai hleinem che" ka sawi tur hre lo lutuk chuan ka ti thawp sep a, thil sawi ṭul lo tak ka sawi palh tih ka hre chhuak nghal. 

"Min iai lo hrim hrim pawh chu hmasawnna pakhat a ni phawt a, kei tih loh mipa dang reng reng inlêng i nei tur a ni lo" a thusawi hnuhnung zawk chu ka ngaihtuah chiang a, enga mah hmain min thunun a tum nghal viauin ka hria.

"Ka nawr tut tut dawn lo che a, mahse ka muangchang dawn tihna a ni lo. A tâwk chiahin, i ngainat thuai theih turin ka awm thung ang" ti lehin ka chalah a fawp zeuh a, ka taksa danglam zawk chu a hriatthiam leh vek ka ring.

"Mut tui" chu chu a tlan liam dawn a thusawi hnuhnung ber a ni a, inherin in chhungah ka lut a, kan awm dan leh kan inkar chu mutnaah ka ngaihtuah chhunzawm nasa hle bawk.

Eng vanga kei kher min ngaina nge a nih ka hre lo va, a nupui ni tura min duh chhan ka hre bawk hek lo. Dik tak chuan mipa hmelchhe zawk zawk a ni lo va, khawpuimi a ni tih a hriat ngawih ngawih a, a hang chhe lo va, a ngo vût lo va, a pa lian em em bawk. Hmeichhe tam tak tan chuan a chhe lovin a hmelṭha ngawt ang, a zahawm tel leh zel a, chu tak chu keimaha lian ber a ni. Ni e, ngaihzawng tur anga ka ngaih theih lohna chhan leh ka ngainat leh ngainat loh ka hriat chian theih lohna chhan pawh ka zah em em vang a ni a, ka tan leh kan unau tan phei chuan vantirhkoh a ni ringawt a, harsatna kan sut kian theih nâna min pui hreh lotu leh min pui rengtu a ni a, kei ve mai min ngainaa min lo duh ve chu a lawmawm rualin ka tan a buaithlak a ni.

A tuk zingah chuan hna kal turin min rawn hruai thlap a, a tirah ka hnial ve viau a, mahse engkima min buaipuitu a nihna laiah ka hnial rei thei leh ta pek lo. Dawr kan thleng a, ka thawhpuite chuan min en duh mai mai khawp a, mahse ka dem hran lo. Pa Rinchhana nen hian vawi khat mah kan la kal rual lo va, dawra ka thawh tirh pawh khan kan kal rual chuang lo. Tunah erawh a vawi khatna atan kan kal rual hlawl a, Julie-i ngat phei chu meng buai tak a ni. Pa Rinchhana thusawi kha ka hre chhuak zawk nghe nghe a, eng ang paw'n min hmusitin min ngainep mah se Julie-i vang mai maia intihlunghnur ka tum lo nasa hle.

Chumi nî aṭang chuan hna kal lamah leh haw lamah min hruai thlap thlap ziah a, duh lo eng ang mah ila awmzia a awm lo, a tih tawh lamah chuan luhluh tak a ni. Hnial pawh ka hnial buai peih tawh lo law law, min phur dawn tho tho tih ka hre chiang em em tawh zawk. Inngaihzawnna lam thil engmah kan sawi ngai lo va, mahse a chet dan aṭangin min ngaihtuahzia ka hre thei thung. Zan tin a rawn lêng ziah a, ka ṭhiannu leh ka unaute paw'n mak an ti ṭanin ka hria. A mawiah tiin a haw dawn hi chuan in kawt thleng ka thlah ve ziah a, ka luh nghal mai hlau ang tak hian min kuah ṭhin thung a, ka rilru a tibuai zual ṭhin a ni tih lah a hre ve tawh si lo.

"U, pa Rinchhana hi a lo kal dawn lo emaw ni le?" Rengtei chu ka en deuh hâw a, kei tak paw'n a lo lang har ka ti tawh a, zan dangah te chuan dar 8 hmain a lo thleng ziah. 

"Ka hre lo, zanin chu a buai a ni ang" ka ti ringawt a, a thil ziah lai a ziah chhunzawm ve leh mai a, ka naute hi chuan pa Richhana hi chu an ṭangkaipui ve ngawt mai, an zirlai thleng hian a pui ṭhin a, English Grammar te hi a thiam phian leh nghal.

"Kei pawh thil zawh duh ka nei asin le, a lo kal loh chuan Maths hi ka chawk rih lo law law mai ang" Hminga chuan a lo ti ve leh a, Doro-i erawh a lo nui sak a, a nuih chhan hre chuang lovin ka nui ve ringawt. 

Dar 10 a rik hnuah pawh a hmel hmuh tur a la awm thei lo tluang zel a, zep lovah chuan ka ngaih a ṭha miah lo. Ka ngaihtuah ru viau a, mahse ngaihtuah deuh anga awm ka hlau hle si. Doro-i ber chuan ka rilru a hre tlang vek ang tih ka hlau, ani mai ni nâng, ka naute pahnih chuan an hria ang tih ka hlau bawk. Dar 10 leh a chanve a ri hnai a, tawh sual a tâwk a nih ka ring ber tawh. Ka rilruah a ṭha lam ai a chhe lam hlirin hmun an chang a, ka awm a nuam thei thlawt lo. Ka phone chu ka phawrh a, sitting room-ah ka ṭhu ren rawn a, mahse a chi loh deuh hlek chu a ni. Pawnah thawm dim ang reng takin ka chhuak a, pa Rinchhana phone number ka hmet chhuak a, mahse ka call nghal mai ngam leh chuang lo. Rei fê ka inngaihtuah hnuah ka call ta nge nge a, a lo pick-up rang em em zui.

"Hello" a ti thum sup a, keimah zawkin ka vawi khat call-na a ni a, a aw ka hre chiah chu phone chhanah pawh ni se ka zâm nghal vek thei. 

"Eng lo, i dam lo ém? Ka sawi awmzia chu i lo kal dawn lo em ni? Ni lo, ka sawi tum pawh a ni em em lo, ka sawi lo angah ngai rawh, mut tui le" ka ti bah nawk nawk a, ka hmet tawp zui nghal a, ka mal ka hmer vak a, a hnen aṭangin phone call ka dawng zui nghal bawk. 

"Pawnah lo awm ang che" a phone call ka pick-up rualin a lo ti nghal a, a hmet tawp zui daih a, in chhunga luh ka tum deuh ut ut a, mahse ka lut ta chuang lo.

Ka chet dan atthlak zet avang chuan keimah leh keimah ka indem a, mawl ka inti hnuhnawh em em a, sâwtna pakhat mah a awm tawh si lo. Ka lo va call thawt thawt vel a, ka ngaihtuah tlat te chu thil ṭul lo tak niin ka hria, mahse ka awm a nuam thei thlawt lo a nih kha! Kan in bula Street light chu ka en vang vang a, zan rei tawh lam a nih vang nge ni, a reh ṭhiap a, in erawh a la êng fur thung. Motor thawm ka hriat rualin ka hawi phei nghal a, pa Rinchhana ngei mai chu awmhmun kawr ha hian ka dinna lamah a lo kal phei pâwk pawk a, a san hi chu a sang ve alawm, a pa lian tel bawk.

"Nang hian min ngaihtuah viau ti raw?" a ti sup a, inhnaih takin ka ding tawh a, enga mah hmain ka rilrua awm a hre dik leh ta chat mai. 

"Rengtei leh Hmingan an zirlai lamah zawh duh che an nei a, chu vanga lo call che chu ka ni. I lo kal lo thut bawk sia, an hamhaih a ni mahna" inring tâwk tak angin ka ṭawng chhuak a, ka zâm ru em em thung. 

"Dawt sawi thiam lo tak zawng i ni chiang e" tih leh a lama min pawh phei a rual a, chiang lutuk tak mai hian min fawp a nih chu! 

Kan hmui chu inchar tlat ang mai hian a awm a, mahse a inchar lo nasa mai si. A hmui a tiche kual vel a, ka taksa chhung kil khawr lai ber thlengin min fan chhuak vek a, min fawh hmasak ai kha chuan a let tam takin ka danglam nasa daih zawk. Ka kawngah chelhin min pawt hnai sauh a, kan hmui chu a la inbawhthuah reng bawk a, eng vanga ka hmui chu chet ve mawlh mawlh nge ka nih ka hre lo tak zet. Ka chhia leh ṭha hriatna zawng zawngte chuan min phatsan ta emaw tih tur khawpin ka rilru leh taksa ka thunun thei tawh lo va, engkim chu ama'n a thunun vek tawh a ni ber.

"I inpeih tawhin ka hria" a âwma min kuah bei hle hle hnu chuan a ti thum ṭial ruih a, ka thawk lak dan a la pangngai lo nasa em em a, ka la thaw hlawi hlawi a, kan thil tih zawh chiah chu dawnsawn dan ka la thiam chiah lo a ni. 

"Keini pahnih hi inngaihzawnna lam kawng zawh turin kan inpeih diam tawh" bahlah miah lova a tih leh chuan inlâk hran ka tum a, a lo phal lo nasa mai. 

"I hre sual a nih dawn chu!" ka thusawi chu keimah ngei paw'n dawt muhlum a ni tih ka hria, mahse kei thingtlang hmeichhia hian ka dai sual ang tih ka hlau, ka hlau satliah lo, ka hlau tak zet.

"Hre sual lah lo ve, thla 3 ngawt chu mipa nep tak ang maiin ka awm asin, a chhan erawh nang ka neih theih nân che a ni" tiin min nam hla deuh hret a, chiang zetin min en chhuk run a, ka hmuiah tak a rawn fawp leh zeuh bawk.

"Ka hlauthawng a ni" ka ti ta nge nge a, ngawi reng hian a âwmah min kuai bei leh hle hle a, engati nge a bula awm a thlamuan thlak em em bik mai le. 

"Ka vawi khatna tur a ni a, chu bakah ka zahna che hi ka paih bo thei lo, tunah chuan keimahah a la lian ber rih" ka tih zawm leh nghal zat a, ka beisei loh lutuk hian a nui nghawr dat a nih chu! 

"Nichin mai kha chuan min zahna aiin min ngainatna a va lang hnem zawk si ve" ti supin a nui nghawr leh dat a, a hmel ka en thuai a, tawi têa a nui chu ka vawi khat hmuhna a nih vang a ni mai thei, a pá thlawt! 

"Chuti ang lam a ni lo" tih bakin chhan dan tur ka hre tawh lo, ka dáng der. 

"Ka hrethiam e, min zah hi a àwm lutuk, nang leh i unaute laka ka chet dan avang pawh hian min zah tur reng chu i ni alawm, mahse kan inngaihzawnna tibuai thei tur khawpa min zah leh lutuk erawh a ṭul lo" a ti nghet charh charh a, sawisel rual lovin a sawi dik a ni. 

"I chhungte'n min duh ang maw?" kan ngawih dun vang vang hnu chuan ka ti leh sep a, kan boruakin a zir vang nge ni, a rukin nuam ka ti thar riau. 

"Ka duh che a, nangin min duh bawk a, nupuiah ka nei ngei dawn che a, chu vangin ka chhungte va ngaihtuah daih a ngai lo" ngaihsam zet hian a ti mai a, ṭawng leh tumin ka âng zuau a, mahse ka ngawi tlang ta zawk.

Inkuah rialin kan ding dun a, kan inlen hleih bawk a, min kuah lúm hneh khawp mai. Ka chhipah a khabe a nghat a, a taksa lûm nuam tak chuan min ur a, phat ngaihna awm lêk lovin ka ngaina a, ka duh bawk. Ni e, ka duh chiang alawm, khang thla kal ta chhung zawng khan keimah leh keimah ka inbum char char a nih kha! A lo lên te khan ka awm a nuam em em zel a, ka thla a muang ru ngawih ngawih a, ka tan ani ang baka mipa rin tlak tur ka hre lo a ni. A nihna takah chuan ka duh phakah ka ngai lo va, a ngaihzawng ni tur ém chuan ka inngaingam lo va, a nupui nih phei chu ka suangtuahna piah lam thil daih a ni.

"Engati nge i lo kal loh? I dam lo emaw ka ti dawn a, mahse i dam hmel tho si" ka tih chuan nuihza aw lek lek hian

"I rilru dik tak ka hre châk maw le, ka hre réng bawk a, a dik em?" a ti thum sup a, kei erawh ka ngawi daih thung.

"Va lut rawh le" ti dam leh ruihin min kuahna a phelh thawl a, muangchangin ka kal phei ve mai a, kawngka bul ka thlen chuan ka hawi lêt a, a dinna ngaiah a lo la ding reng a, tawi têa a nui suk chu ka vawi khat hmuhna a ni tawh miah lo, mahse a inhmeh thlawt a ni.

"Naktukah kan inhmu dawn nia" a tih chuan ka buk khum zeuh a, ṭawng ring hran lo mah se ka hre pha vek a, in chhungah ka lut zui nghal bawk.

Khuma ka mut hnu chuan ka muhil thei leh ta lawk lo mai, chutah pa Rinchhana ngawr ngawr ka rilru leh ngaihtuahnaah a la awm zui. Zanin khan a vawi khatna atan ka call hmasa a, zan dangah chuan amah zawk hlirin min lo call ṭhin a, mahse sawi tur a tlachham ve thei khawp. Khang thla kal ta chhung khan a thusawia din loh leh tihhlawlhtlin loh pakhat mah a nei lo va, inring tâwk tak khan ka ngainat thuai dawn thu a sawi lâwk vek a, awlsam takin ka ngaina thuai réng bawk a, ngaihtuah chet chet phei chuan a mak ve a ni. Ka tan a sang mah mah a, ka duhin ka vei ru em em lawi a, kei ve mai min han ngaina tlat hi a lem mai mai a ni ang tih ka hlau ṭan der a, inngaizawng angin kan awm ṭan dawn chu a ni si a, ni leh lo, kan inngaizawng tawh zawk maw le.

Zing khua a vâr a, ka tho nuam lo ang reng. Nizan lam khan ka meng rei fû a, ka tum pawh a ni em em lo. Mi dang aiin ka tho hma a, ei rawng ka bawl a, ka rilruah pa Rinchhana bawk a awm leh ta tlat mai. Ei rawng bawl lai em em chuan ngaihtuah loh ka duh, mahse chuti maia ngaihtuah loh ringawt theih a ni si lo a ni. A hmel tak run te, a hmel pà hrâk te, a âwm khauh leh taksa lian zet te, a rim chenin keimahah a châm tlat a, dik tak chuan pathlawi mah ni se ka hmu hmelṭha vek tawhin ka hria. A vun ni se Mizo mipaah chuan a tâwk vel viau a, amah a fai hrim hrim a, chu chuan a tilang ṭha zual ni berin ka hre bawk.

Doro-i a rawn tho va, ei rawng min bawlpui a, ani hian a hre ru deuh tlatin ka hria. Ka ṭhian ṭha ber a ni a, kâr han ral se pa Rinchhana nena kan inkar engkim hrilh vek ka tum tho. A hnathawhna lam min sawipui a, kei paw'n ka sawipui ve a, Julie-i nena kan boruak chhe zet pawh ka sawi chhuak nghe nghe. A tha a lo nâ ve khawp a, ka naute pahnih pawh ka la hrilh lo. Kan insual tawh thu chenin ka hrilh a, a nui tawp ringawt. Ka rilrua awm ru reng erawh pa Rinchhana bawk a ni leh a, ani chuan buaina ka tawh a phal dawn lo tih ka chiang, chu vanga Julie-i pawh khin lêt tum tawh lo ka ni. Chu bakah khin lêtin awmzia a nei vak lo, a awm awmin awm tir ila, a reh ve mai ang.

Zan lama a sawi lâwk tawh ang ngeiin pa Rinchhana chu min hruai turin a lo kal a, mi dang erawh an chhuak vek tawh thung. Inngaizawng e ti lo chuan ka lài deuh ṭut a, ngaihzawng ka vawi khat neihna a ni a, ka awm thiam chiah lo. Sawi tur nen lam ka bangbo hle a, ani ve thung chu a danglam paw'n ka hre lo. A awm ngaiin a awm reng a, ngawi ngulin a khalh mial mial a, mahse ni dang ai chuan a bula awm a nuam daih zawk. A nuam ka tih chhan pawh ka hre chuang lo, pangngai taka kan inngaihzawn tawh vang a ni mai thei. 

Hun leh nîte an inher danglam a, an liam a, thla hial kan hman ral tâkah chuan hmeichhe tana innghahna tlak tak mipa a ni tih ka hre fiah tial tial a, a sawi lâwk tawh ang ngeiin tlangval tam tak aiin a ṭha chiang e. Tlangvalin an tluk lo zawk hialin ka hria, ka sawi thiam chiah lo, a zei a ni tawp mai. Thil sawi duah chi a ni lo tih chu ka hre tawh a, min ngainatzia leh min duhzia te hi a chet ziain a lantir mai ṭhin a, kei lah hian ka lo dawngsawng ṭha thei em em zui. Ka hre chiang tulh tulh a, ka duhin ka vei tulh tulh a, mahse a chang chuan kan dinhmun a inthlau mah mah em âw ka ti hnuhnawh leh ṭhin. 

Kan inngaihzawn tâk chin aṭang hian dinhmun lo pawimawhzia ka hre chhuak chiah, inngaizawngte inkarah phei chuan chhungkaw dinhmun hi a lo pawimawh khawp mai. A ruk tak chuan ka inthlahrung ṭhin, an ina min hruai phei tum chang a nei a, ka la hnial char char thung a, a chhungte'n kan dinhmun zawng zawng an hre vek tawh a, min duh lo ang tih mawlh ka hlau a ni. Min duh lo ta se emaw min iai ta se chuan ka rilru a nâ dawn tih ka chiang, a chhan chu a ni télin pa Rinchhana ka duhna a zual zel a, ka ngai em em ṭhin bawk. Dawr khata awm dun reng chung si hian amah bawk ka lo ngaihtuah leh vung vung fô va, ka rilru hre thei phei se chu min nuihzat thei ngawt ang. 

A thlaa thla kan inngaihzawn ve tâkah chuan Doro-i pawh ka hrilh ta nge nge a, hlauhthawnna pakhat mah a nei miah lo a nih chu! Ka tan pa Rinchhana a ṭhat thu hlir a sawi a, min lawmpui thiam em em bawk. Ka ṭhian ṭha berin ka tana pa Rinchhana min duhpui chu ka lawm a, ka ngaih a tiṭha sawt a, a hmaa ka inrin tâwk lohna tam tak kha a kâm duakin ka hria. Ka naute pahnih erawh ka la hriattir duh lo tluang zel a, hun ka tih hunah chuan an la hre dawn tho tho. Tin, ka rin phak bakin pa Rinchhana thikthu a chhia, a chhia ka ti mai, nge a mi hauh a nâ zawk pawh ka hrethiam lo. 

Ka seat bul chiaha ṭhu Hriata chu hmun dangah a ṭhut tir daih a, amah paw'n mipa dang hnaih theiha ka awm a phal lo bur tih min hrilh tawh ngei a, ka thawhpui dangte tan chuan ka laka pa Rinchhana awm dan vel chu hai reng theih a ni ta lo bawk. Mi hausa leh zahawm tak nen kan inngaizawng mêk a, mi hausa tak angin ka inngai ang tih ka hlau em em thung. Pa Rinchhana awm loh hlan hian ka thawhpuite hnen aṭangin sum vanga ka ngaihzawn thu leh ka thlem ṭhin thu ka dawng mawlh mawlh zel a, pa Rinchhana bulah erawh engmah ka thlen duh ngai lo. Thlen ila zawng a bân nghal vek ang ka ring, chuti ang khawp chuan min chhan ṭhin a, ka nât a hlau a, min ngaihtuah em em ṭhin bawk.

"Rengte, Hminga, lo phei lawk ula" ka tih chuan an lo phei ve mai a, tlaiah khan thil sawipui duh a neih thu min hrilh lâwk vek tawh a, kei paw'n zanriah ei laiin ka hrilh ve ve tawh nghe nghe. 

"In u, Dampuii hi nupuia neih ka tum a, in u pasal atan min duh êm?" rang zet hian pa Rinchhana chu ka en vat a, ka naute pawh an meng buai hle a, ka zak bawk si nen ka kawr ka hmer vak ringawt. 

"In inngaizawng em ni pa Rinchhan? In inngaihzawn lai ka va'n hre lo em em, Hminga nang i hria em?" Rengtei zawhna chuan min tizak zual. 

"Kan inngaizawng ngei alawm" Hminga ṭawng hmain pa Rinchhana chuan a ṭawng khalh a, chutah Hminga ve thung chuan

"Ka hre thuak tawh alawm, chu pawh kan hnathawh laiin pa Rinchhana nauin a sawi thawi zuaih a, mahse engmah ka hre chiang bik lo" a lo ti a, pa Rinchhana nauin a hriat tawh phei chuan a nu leh pa beng ka thlen tawh ka ring. 

"Engati nge u Puii ber kher hi nupui atan i duh a? Keini phei chu kan reithei sia, hmeichhe dang an tam nen nen" Rengtei chuan a ti leh ta, a lungngaih ruk hmel viau bawk.

"A fel a, a hmelṭha a, a duhawm a, ka tan hmeichhe ṭha tak a ni dawn tih ka hre lâwk bawk a, in u hian min" a tih laklawh lai chuan

"Pa Rinchhan!" ka ti ta nge nge a, nui thum dat chung hian min rawn en a, ka zak lutuk chu ka sa chhuak vek mai dawnin ka hria. 

"Pui, i lâi chiang mai" Doro-i thil sawi ber kher chu a va han ṭul lo mai mai tak!

"A nih tak hi a" pa Rinchhan chuan a lo tih zawm zat a, anni pahnih chu ngei ru zetin ka melh a, Doro-i phei chu a lo nui ver ver a, ka naute pahnih pawh an bang chuang lo. 

"Lo kal rawh, ka lo thlah ang che" ka ti tawp a, ka ding zui nghal a, chutah pa Rinchhana chuan

"Ka la haw duh ringawt hleinem, thingpui min va lúm leh zawk teh" a ti daih thung a, thaw ri hluaiin choka lamah ka phei a, ka unau te'n kan inngaizawng tih an hria chu pawi tihna ka nei em em lo, mahse ka zak a ni.

Thingpui tur sô hma zawng gas bulah ka awm char char a, anniho erawh an hlim hlawm dar dar khawp a, ka lo ralkhat nuih ve leh sak ṭhin bawk. Kan inngaihzawn hnu hian pa Rinchhana nui thawm ka hre ve ta fô mai, a tir kha chuan ka hamhaih a, mak ka ti ṭhin a, tunah erawh a inhmeh ngawih ngawih tawh zawk. Min duh tih ka hriat zan aṭang khan pá ka ti thar em em leh ta nghal a, khang hun lai kha chuan hmelṭha tihna erawh pakhat mah ka nei lo thung. Nitin zantin kan han inhmu chho ṭan a, a hmel pá tak te chu ka mitah a ṭha tawlh tawlh a, a tirah hmelṭha ti lo mah ila tunah erawh ka mita mipa hmelṭha ber a ni tawh thung. A mizia ni se sawisel bo khawpin a ṭha a, Pathian hnenah pawh kan pahnih inkar a chhiat mai loh nân ka dil ṭhin hial bawk. 

"Hei tê hi ka ngai tawh" ti thum chhalin min fawp zui nghal a, vawi eng emaw zah chu kan infawp ve tawh ngei alawm, mahse a mi fawhna hi ngaiah ka la nei thei lo a ni ber.

"Khati teh tawp khan ka naute bulah i sawi ka ring miah lo" a âwma bei rán chungin ka ti sep a, ani'n duat takin ka hnung a chul hliau hliau thung a, liam vek tawh mah se ka la zak ru deuh reng tho. 

"Thu hi ka pehhel kual thiam lo ṭhin alawm maw le" pawn boruak nena inmil zet hian a ti dam ruih a, a sawi dik chiah, thu pehhel thiam lo tak a ni tih ka hre chiang ve tawh viau. 

"Ka nupui ni tawh la ka ti ngawt mai, mahse ka nupui ni êm tur chuan i la inpeih lo nasa em em lawi si, ka chhungte ngaihdan tur i va ngaihtuah ṭhin hi a ṭul hran lo" ti lehin min kuai dâk a, ril lutuk tak mai hian min fawp a, ṭum dang ang bawkin ka engkim a thunun vek a, duh ngat se zawng kan che sual tawh ngei ang, mahse chet sualna lam vawi khat mah kan la hawi lo thung.

"Lut rawh le, ka lo en ang che" kan inthlah hnu chuan ka hmai bul chêtah a ti lúm ham ham a, la thaw deuh hlawi hlawi chung hian ka bu nghat a, ṭawngkamin ka chhang duh lo ta law law, ka aw a phelh phang dawn tih ka chiang. 

"Mu tui aw" kawngka bul ka thlen dawn chuan hawi lêtin ka ti thei hram a, ka aw erawh a la pangngai thei chiah lo va, ngainatawm zeta nui tawi takin a bu zeuh a, in chhung lamah ka lut zui nghal bawk. 

(End of Chapter 5)