LALRINCHHANA HAUHNAR By Havali Adam (CHAPTER 1)

LALRINCHHANA HAUHNAR 

By

Havali Adam

Chapter 1

Thawhṭanni a ni a, ni dang zawng ai kan buai a zualin ka hria. Chu bakah dawra lo lut an tam hrim hrim a, ni dangah chuan tam tho mah se hahthlak lutuk a ni ngai lo. Dishwasher hna ka thawhna kan dawr hi a changkang ve ang reng a, Hotel Regency te ang êma lian leh changkang erawh a ni lo thung. A awmna a lai lî a, Kulikawn lam emaw Bawngkawn lam aṭang paw'n rawn kal vang vang hi an tam thei khawp mai. Restuarant deuh ngawr ngawr a ni a, mahse Restaurant satliah ngawt chu a ni lo chiang hle. A bikin kan pu ber hmel hriatte hi an lo chuangkai hnem a, ei man a to hlawm tehreng nen pawisa lam engah mah an ngai lo a ni mahna.

Dishwasher hna ka thawk e ti lo chuan a chang leh ei tur ka sem pui ang leh lâwp lawp a, harsa ka ti hran lo. B.A ka zir ṭan tirh lai aṭanga thawk tawh ka ni a, kan chhungkuain chhiat kan tawh thut avangin zirlai lam ka chawlhsan a, tun thlengin B.A ka la zir zawm ta lo a ni. Ka ṭhian hnaivai leh kan dawra thawk ṭhenkhatte hian IGNOU-a tih chhunzawm turin thu min ráwn a, mahse ka bawhzui lèm chuang lo. Kum 5 kal ta khan ka pa'n min thihsan tawh a, kan unau zingah a upa ber ka ni a, unau pathum niin ka naute pahnih hi mipa leh hmeichhia an ni bawk. Zirna lam chhunzawm ai chuan ka naute pahnih zirna senso leh an mamawh leina tur pawisa lo thawh chhuah chu a ṭha zawkin ka hria a, tun thleng hian ka tum nghet zui ta bur bawk.

Kan khua hi Hortoki daih a ni a, Kolasib District chhunga mi mah ni se thingtlang khua a lo ni ve bawk nen mi hian an hre vak lovin ka hria. Keimahin Aizawl lamah awmhmun ka khuar a, Aizawla Class 9 aṭanga class 12 ka kal chhung zawng khan Private Hostel-ah ka awm a, neih thinlung khawng tak meuha awm ka ni a, pawisa te kha inren thei tak ka ni. Inhlawh ka duh ṭhin a, mahse hun a awm ngai lo. Hostel-a awm kha chuan lehkha zir ngawr ngawr a ni mai a, chhuahvah tih vel pawh kan nei vak ngai lo. Lehkha zir kâr tluan ṭhin ta na ná ná chu zirna lamah ka ti ṭha thei hle thung a, class 10 leh class 12-ah pawh kan School aṭanga a tiṭha te zingah ka tel ve ve nghe nghe. 

"Puii, vawiin chu Dorothy-i pui leh lawk rawh aw, tun thla aṭang chuan hlawh kan insán tawh dawn bawk a nia" kan pu chuan ka thleng sil laiin a rawn ti a, sil tur la ngah viau mah ila 'aw' tih nân ka buk khum ta tho. 

Kan pu hi chuan hna leh sum hi a duh ve a, amah a taima phian bawk si, dawra thawkte hian kan tlin lo lek lek zel. Sum duh ka ti tak ná a, keini paw'n kan duh ve tho alawm, duh lo ni ila a dawrah kan thawk bik nâng. Sum hi chu mihring nunah a pawimawh ve êm a, a tua mah hi sum duh kan va ti nghal ngawt thei lo a ni. Kan puin min rawn koh leh chuan ka awmna aṭangin ka chhuak nghal a, ka ṭhiannu leh ka ṭhian ṭha tia ka chhal ngam Doro-i hmel ka hmu zawm zat bawk a, ani nen hi chuan inzui ni lêng dawn mah ila pawi tihna ka nei lo.

"Kan kalna tur a hla hran lo, haw hunah ka hman chuan ka silpui ve dawn che a nia, sil tur i la ngah em?" Doro-i chu nuih zeuh pahin lu ka thin khum a, sil tur la awm nual mah se a hna thawk zawk rawh se. 

"Nichin khan pûin min bia a, tun thla aṭang kan hlawh a sán dawn thu min hrilh a, lawm tak ka ni" Doro-i bawk chu a ṭawng siam siam a, kei erawh ka mi hmuh avang chuan ka va han hamhaih chiang ém. 

"Kal thuai ang" tiin Doro-i bânah chuan ka pawt a, ani lah a lo kal nghal lo nasa mai, kan thil ken tur an lo la dah fel kim lo chu niin, ka mi hmuh avang chuan ka che buai nghal vek a ni ber. 

"Eng nge i hriat a?" Doro-i chu ka en zawk a, mahse kan dawr chhunga ṭhu run awmna lam ka hawi zawm leh a, chiang lutuk hian kan mit chu a intawng ta siah mai. 

A chal a ti chuar deuh a, min hmu thut chu mak a ti ve thovin ka hria. Ei tur an pack fel ta maw tihah kan kal chhuak nghal a, ka taksa a zat mer mer danah min en zui tih ka hre thei. Dawr kawta kan din hnu chuan ka hawi lêt leh kher alawm le, min lo la en reng a, ka hawi sawn rang hle. En ṭha ngam lo mah ila a taksa leh a awm dan, a mizia zawng zawng chu a la ngai vek a, ṭawngthei lo ang maia a hmui a chip hmuk te, engkim chu hmâna ka hriat ṭhin pa Rinchhana chiah chiah kha a la ni. Amah pawh khan min la hre ve chiang lawm, ni lo, min hre lo thei nâng, min hriat ngei ngei theih nân ka awm tlat.

Hostel-a ka awm lai khan kum 4 ngawt chu kan inhrawn hman a, a tirah phei chuan kan awmna Hostel kha a ta a ni tih pakhat mah ka hre lo. Hostel chung berah a awm a, a hnuaiah keini kan awm thung a, Boys Hostel a siam theih laia Girls Hostel a siam tlat kha mak ka la ti bâng thei lo. Mi ṭhenkhat chuan an sawisel a, pathlawi a nih avangin lerh viau turah an ngai a, mahse a ni ringawt bik lo. Kan Hostel awmna neitu kha pathlawi mah ni se tuma'n kan hlau miah lo, hlauhthawnna pakhat mah kan nei lo zawk maw le.

Hostel kan chhuahsan dawn tuka thil thleng erawh ka dam chhunga ka theihnghilh tawh loh tur thil a ni a, tun thleng hian ka la zak bawk. A wallet thlauh pe turin ka lut a, ka hmuh mai loh avangin sitting room-ah ka lo nghak a, bed room aṭanga a lo chhuak chu ka va han hawi sawn rang kher ém. Boxer pawh ni lo underwear chauh hi a ha a, a la zak miah lo zui. Dawhkantê ah wallet chu ka dah tawp a, ualau taka dah ka tum loh tehreng nen ka dah ta tho chu a nia, mahse amah a awm tawh hrim hrim a, a hlauhthawn awm loh turah ka ngai hmiah. Min be chuang hlei lo va, kum 4 lai hmuin chenpui titih mah ila biak khat paw'n kan inbe ngai lo. Ka awm tirha kan senior pakhat phei chuan

"Pa Rinchhana te chu a nu'n a biak lai chiahin a ṭawng ka la hria, keini pawh tûmah min be ngai lo, kan mamawh a hriat duh paw'n a nau fanu a rawn chhuk tir ṭhin" a ti hial a, chuti ang khawpa mi inhmuam ûp chu ni mah se a Hostel-a awm hrehawm tihna kan nei leh chuang hlawm der lo. 

Kum eng emaw zah a vei hnuah kan inhmu leh hlawl chu a nia, kan inhmuh khan kan inhlat tehreng nen ka zâm ru er er tho a nih kha! Order pea kan kal chhung zawng chuan ka rilru leh ngaihtuahnaah pa Rinchhana hmel leh hun kal tawh hlir chu a awm a, ka thaw leh hawk ṭhin ringawt. Order kan pe zo va, Doro-i chuan min be melh melh a, dawr pawh kan thleng har lo. Amaherawhchu dawr chhungah pa Rinchhana hmel ka la hmu tlat mai, ani lah chuan a ngaite bawkin min lo en run a, ka zâm lutuk chu ka ke chheh thlengin a dik lo vek thei. 

A hmuh phaka awm lang reng duh lovin thleng silna lamah ka kal ta daih a, thawk ka la vang vang phawt a, ka hna chu ka thawk zui nghal bawk. Ka sil chhung zawng chuan pa Rinchhana hmel tak run bawk chu ka mitthlaah a châm reng a, a chhan ka hre bik lo, ka hre lo tak zet a ni. Doro-i pawh a buai chhunzawm a ni mahna a hmel ka hmu ta miah lo va, mahse ka ngaihtuahna a kal péng tak tak thei lo. Pa Rinchhana bawkin ka rilru a luah tlat a, ka awmna aṭang chuan ka va bih dêk dék ta ringawt a, vanneih thlak takin a lo awm tawh lo hlauh. Kan dawrah pa Rinchhana a awm tawh lo tih ka hriat chinah chuan ka thaw a veng hawk a, ka awm a nuam sawng sawng a ni ber. 

Tlai dar 5 leh a chanve velah kan bâng a, Doro-i nen chuan Bus-in kan haw a, kan titi melh melh a, tlai dang ai Bus-a chuang chu kan tâwt viau bawk. Chutah Traffic a rawn Jam a, a lum bawk si, a ninawm duh khawp mai. Ram pawn aṭangin mi tu emaw, mi pawimawh tak a lo kal thu te kan hre chawpchilh a, chu vanga Traffic Jam chu a ni nghe nghe a, keini ang mahni hna chiah ngaihtuah nilêng ṭhin tan chuan ram pawn aṭanga lo kal an awm leh awm loh pawh kan hre hman meuh lo chu a ni e. Hre ta pawh ni ila keini tan zawng a ṭangkai lutuk lêm lo, mi dang tan te chuan a ṭangkai viau a ni mahna. 

Dar 7 dâwnah kan in luah kan thleng ve thei chauh a, ril ṭam zawng zawng pawh a reh vekin ka hria. Doro-i hi kei ang bawkin Aizawl khaw mi leh sa dik tak a ni bik lo va, Serchhip lam daih a ni a, kei Kolasib lam ka ni thung a, kan khaw inkar chu a hla ve reng. Chaw kan chhum chawp a, kan thawhna dawra soup bàng kan hawn chu chawhmeh tur a ni nghal mai a, a awlsam ang reng viau. Hmeichhia ve ve e ti lo chuan ei rawng tak ngial pawh kan bawl ṭha hman ngai lo va, zing lamah hian kan bawl hman a, chu chu a ni mai. Chaw chu dar 8 rik dâwn ṭêpah kan ei a, kan ei hnem dun phian leh nghal. 

Kâr tluanin kan hna ngai kan thawk ṭauh ṭauh a, sum mamawhna a sâng bawk nen zawmthaw duhna rilru kan pu hman meuh lo chu a ni e. Kan dawr thawhna neitupa paw'n thawk ṭha min ti thei hle a, kan hlawh pawh a sán ta ngei bawk. Zan lamah ka chhungte nen kan inbe ziah a, ni khatah vawi khat tal inbe lovin kan awm ngai lo. Mahnia ka awm fâlna pawh kum tam a ni ve tawh a, ka kum khatnaah phei chuan min ngaihtuah hle. Tunah erawh a tir ang em emin min rawn ngaihtuah khu vul chûk tawh lo va, mahse min ngaihtuah ru reng tih ka hre tho.

Kum tir lam a la ni a, KṬP General Conference a hnai tawh tih kan hriat rualin Doro-i chu a phur fâl em em a, an khuaah an nghat dawn kher bawk nen haw chu a tum ruh hle. Kei pawh min sawm ve ngei a, mahse ani ang em emin ka phur teuh lo. Dik tak chuan keini ang KṬP-ah pawh inkhawm ṭha mumal hman lo te kal ve na chîah pawh ka ngai lo va, pawisa lo thawh chhuah ṭeuh ka duh daih zawk a ni. Beisei lo takin kan dawr neitupa chuan kal a lo tum hle a, dawr pawh ni 4 chhung khar a nih dawn thu a sawi nghe nghe a, Doro-i lawm lutuk chu ka nuih nasat phah hle.

Kâr a ral a, KṬP General Conference kâr a ni ta reng mai. Zirtawpni aṭangin an kal ṭan hlawm a, kei leh Doro-i erawh inrinni tlaiah kan kal thung. Zirtawpni ah te chuan kan inhlawh daih a, vanneih thlak takin inhlawhna tur hi kan hmu thei fû a, ni lo phei se chu kan rethei dun ṭhin ngawt ang. Doro-i hian nu leh pa a nei tawh lo va, chuti chung chuan a chhel em em a, unau tak ngial pawh a nei lo va, ka khawngaih ṭhin. Kei te chu pa nei tawh lo mah ila nu tal ka la nei a, unau ka nei bawk a, rethei mah ila ka chan a la ṭha zawk tho tho. Chu vangin hlim lo ngawt thei pawh ka ni lo, ka dinhmunah chuan ka lungawi a ngai zawk a ni. 

Kan veng Branch Bus Hire-a kal kan nih avangin zanriah ei dâwnah Serchhip chu kan thleng a, inkhawm hmanin thleng mah ila ka inkhawm ta lo. Bus ka chuang fuh lo deuh bawk nen ka awm a nuam lo ru hle a, ka luak chu a chhuak ru reng a, mahse ka luak thei chuang lo. Doro-i te inah kan thleng a, an in ti ila a nîtei te in a nih ber chu! Nu leh pa a neih loh aṭangin an enkawl tawp a, an fel ka ti ngei mai. Doro-i paw'n a nêl em em a, a nîtei te nupa tak phei chuan Aizawla hna thawh an phal der lo va, mahse amah zawkin a duh tlat si a, an phal hnuhnawh ve mai hi a lo ni a, a nîtei te nupa chu an fel hi a ni tawp. 

A tuk Pathianni chawhma leh chawhnu chu kan inkhawm thung a, keimah tak chuan a ninawm mah mah ka ti. Kan thlenna in, Doro-i te inah chuan mikhual dang an thleng ve nual a, a ṭhen chu Kawlkulh aṭang te, Khawzawl aṭang te, Chhawrtui aṭang te leh Thenzawl aṭangte an ni nawk hlawm a, mipa vek mah ni se an fel hlawm hle. An ṭawng duh em em bawk a, kan kum rualpui vel an ni a, kan titi a rualkhâiin kan inkawm tâwk viau mai. Pathianni tlaiah chuan lén an rawt a, Thenzawl a hla lo bawk nen Thenzawlah kan va lêng a, nuam ka ti ta phian. Zan inkhawm hmanin kan haw leh a, inkhawm an kal hma hlawmzia chu pui tak a ni. 

Keini pawh inkhawm dâr hmasa rik hma daihah inkhawm turin kan kal a, mahse ṭhutna kan chang tawh teuh lo. Mihring chu a tlep hian kan tlep a ni ringawt, kan phu mur mur a, a ṭhen an lam a, an zai a, a ṭhenin ṭhutna an zawng bawk a, zah pawh a sawi theih tak tak loh. Keiniho pawh ṭhutna zawngin kan tei kual zak zak a, a tua mah chu kan inngaihsak hman lo a ni ber. A tawp a tawpah chuan ṭhutna kan hmu fuh hlauh a, leiah a ni thung a, mahse inkhawm chhung zawnga din tluan zak ai chuan a thlanawm zawk tho tho. A ṭhen te phei chu Bus chungah an lâwn a, an ṭhu ṭhap a, chuti ang em ema mihring tam chu ka vawi khat hmuhna a ni nghe nghe. 

Vanglaini te kan zawng chawp a, kan ṭhut a, ṭhut rei tâkah chuan a nuam leh chuang miah lo. Zaipawl zai kan ngaithla deuh reng a, an zai thiam hlawm khawp mai. Ka tih tur hre lo chu ka hâwi ka hawi kual a, tum loh lutukin ka hmel hriat ka hmu fuh hlauh mai. Ka mi hmuh ber lah chu ka beisei loh ber a ni a, ani chauh hmel hriat ka hmu ta hauh lo. Kan piah lawkah chuan Hostel kan awm laia kan senior te chu an awm a, an ṭawng melh melh a, pakhat chuan min rawn hmu fuh ta. An zavai chuan kan ṭhutna lamah an lo kal a, min be bawrh bawrh a, sawi tur an ngah ngei mai.

"E hê...saw pa Rinchhana" an zinga pakhat chuan a ti a, an hawi ṭhap a, kei erawh ka hawi buai vel peih lo, an hmuh hmain ka hmu vek tawh. 

"Hawh u! Thla la ho ang u, kan inhmu khât hlawm si, pa Rinchhana saw ka va ko ang e" chu nu bawk chuan a rawn ti leh a, pa Rinchhana hmuh hlauh nâk a laiin thlalak ho te a la rawt ta deuh deuh a, a va han ṭul lo ber tak!

Pa Rinchhana chu a va ko ta ngei a, mak ka tih ruk em em pakhat erawh KṬP General Conference-a a lo kal ve nulh chu a ni. Kum 40 a pelh var var tawh ka ring kha a nia, nge a lo la pel miah lo zawk. A hmelah chuan pel hmel a pu hran lo, mahse pathlawi te chu kum 40 ral an kai vek ṭhin a ni lo'm ni? Ni e, kum 40 chu a pel tawh ang, ka ring sual a nih paw'n a lo ber kum 35 chung lam chu a ni dawn chiang a ni. Ka hriat tirh ata tawh mipa incheng vawng tak a ni a, pathlawi hmel zawng zawngah a la fai ber hial ang. A hang chhe lo va, a ngo dan a mawi tâwk em em bawk a, a bikin thawmhnaw dum lam hi a inhmeh zual ṭhin. 

"Dampui, lo hawi ta che" Doro-i ṭawng thawmah ka harh chhuak zawk a, eng thil em em nge ka lo ngaihtuah ni! Pa Rinchhana ber lah chuan min lo melh run zui a, ka zâm ru ngei mai.

Kan senior te nen chuan phone number kan inpe tawn a, thlalak kan inthawn sap sap a, nêl taka pa Rinchhana an be mawlh mawlh thei chu a mak a ni. An biak ber erawh a ṭawng lo tluk a ni a, a chhan paw'n aw leh aih bakin a chhang lo. A aw thum chhah ṭha tak ka hre chiah chu hun kal tawh ka hre chhuak a, kha nî, a aw ka hriat hmasak ber nî leh saruak deuh thawa a awm lai ka hmuh nî kha chuan mak ka ti hle a, a taksa lang tam lutuk chu thuhran ni se, a aw ri hriat mawlh kha keini ang tan chuan a mak a ni. Hostel-a ka chhuk hnu thlengin ka buai a, ka hamhaih a, mak ka ti hle a nih kha! 

Dar 11 leh a chanve velah inkhawm kan bâng a, pa Rinchhana chu ka hmu leh ta miah lo. Zep lovah chuan ka zawng ru deuh ngei alawm, kan senior te anga nêl taka biak ve ka châk a, mahse inhmu leh ta pawh ni ila ka ngam leh chuang lo vang. Mut hmun thlengin ka ngaihtuah zui rauh rauh a, zinga kan harh chiah chu engkim a pawi zo tawh. Kan Bus chuanna chu a lo chhuak fel vek tawh a, thawh kan hai chiang ve êm bawk a ni. Phone ka check a, whatsapp group-ah an chhuah hma dawn thu an lo sawi lâwk vek chu niin, kan tlaw azarah kan veng Bus-ah kan chuang haw lo chiang hle.

"Lawk!" ti hluaiin kan dinna tlan pel chiahtu motor chu ka um titih a, a tlan chak hran lo va, ka um luih chhan pawh pa Rinchhana ni tlata ka hriat vang a ni.

"Lo ding lawk!" ring deuh tak chuan ka ti a, zah hreh miah lova ka awm chhan chu Aizawla haw thlak thuai ka duh vangah ka puh ta ber. 

Motor chu a tlan muang deuh sawt a, a ding ta nge nge a, ka rin ang ngeiin amah ngei a ni e. Min en dan chu urhsun deuhin min en ka ti mai, kum tam liam ta khan a Hostel siamah kan awm a, nizan maiah thla kan la ho leh a, eng thil thil emaw lo hmu tawh pawh ni ila hlaua ṭih viau tur ka niin ka hre ta bik lo. Motor horn ri thawmah ka harh chhuak a, ni lo lô ka lo ngaihtuah leh hman chu niin, ani pawh kawng sirah a ding ve mai a, min en chik hle bawk.

"Eng lo, Aizawlah i chhuk dawn em?" ka zawhna chu chhan a tum paw'n ka hre lo, min en reng ringawt a, duh aiin mi en a nghal mah mah a ni. 

"Ka tihna chhan chu kan veng Bus-in min tlansan daih a, chawhma ngeia thlen thlak kan duh si a, Sumo-a kan chhuk a nih chuan chawhnuah kan thleng a ni mai" ka ti leh a, ka zak lo ta sa sa, zah theih loh chhuah law law a fuh zawk tlat.

"Mi dang phur tur i neih loh chuan ka ṭhiannu nen kan lo chuang ve thei ang em le?" zak lo ka va han inti ru tak ém, a ngena ngen tawp chu a ṭul miau si a ni. 

"Khawiah nge?" thum chhah ṭha taka a tih chuan ka ding mar zawt a, Aizawla a haw thlak dawn leh dawn loh pawh hre hmasa hawt lovin ka dil ṭhuai kha a nia, kan thlenna min zawt chu a mak lo hranpa miah lo.

"Khi lai deuhah khian" ka ti ve nghal mai a, Doro-i te in lam panin ka kal chho va, a chhan ka hre lo, pa Rinchhana chu a lo tlan chhoh ka ring tawp a, kan thlenna in kawtah a rawn ding chat ta reng bawk. 

"Nizana mi kha a ni em?" Doro-i chuan ka beng bulah a ti sar sâr a, ka buk khum nghauh a, kan mi rel pa hmuh erawh kan hlau dun hle thung. 

Motor khatah chuangin Aizawl lam chu kan pan a, mahse khawvelah a bula chuan a nuam lo ber ang. Ṭawngkam khat paw'n min be eih lo va, Thenzawl penga kan din te chuan engmah a sawi chuang lo. Dar 8 vel a ni a, thingpui kan in khawmuang a, min la be ta chuang lo a nih chu! Doro-i zawkin a be hmasa a, a motor-a kan chuang thei hlauh chu a lawmawm thu a sawi a, mahse buk khum bak chhanna pakhat a dawng lo. Kei paw'n ka be tawh ngei alawm, a motor khalh lai chiah ngaihtuah ang hrimin a awm a nih kha le.

Inbe miah lovin kan chuang ho ta zel a, Doro-i lah chu a muhil daih zui. A hnungah kan pahnihin kan chuang a, mut hilh ve daih tumin ka mit ka chhing a, mahse ka muhil thei teuh lo. Ka sawi thiam chiah lo, motor chhung chu a uap ka ti mai, a nuam hlawl lo a ni. A khalhtupa ni se biak chi a ni der si lo va, ngawi renga chuan tlawng zawng thil nuam tak a ni lo, mahse Aizawl kan thlen thlak hma theihna a ni tlat si. Maubuang kan thleng a, Doro-i chu a rawn harh a, earphone vuahin a mit a chhin zawm leh nghal daih. Rin ai takin kan tlan tluang a, a tlan muan loh tehreng nen a khalh dam phian bawk a, insawh tih vel pawh ka nei miah lo. 

"Chaw ei ang" Aibawk khaw tawn tirh kan luh rualin a rawn phun sup a, kei chuan a ṭawng dan chu phun ka ti mai, ṭawng pawh a ang lo tlat alawm; chu bakah hawihhawmna chhe tê tal te chu a hriat ngei ka ring.

Kan chuanna motor neitu a ni miau bawk si a, dawrah chuan inhnawh puar turin kan chawl ta ngei a, tum loh deuhin chaw kan ei ve ringawt leh nghal. Chow emaw vel mai mai ei tum kha kan ni a, pa Rinchhana chuan kan pathuma ei tur chaw a chah hmiah a, mahse sa pakhat mah a chhawp tir miah lo. Thlai hnah bai leh thil kân chi hrang hrang bakah ántui hâng hawp tur a chhawp tir a, kan chawhmeh duh zawng tak a la ni zui. Doro-i nen chuan inthlahrung ru zetin kan ei ṭeuh a, Chow vel mai mai ei ai ngawt chuan kan puar dan a chiang hle. Kan ei man pek kan tum chu zah thlak tak a ni; a phal lo tih hriat lutuk tak mai hian min pek khalh a, motor lamah min pheisan leh daih bawk.

Motor chhunga kan awm hnu chuan pawisa pek kan tum a, chhe tê paw'n kan lam a rawn hawi lo hrim hrim. A ṭul loh thu a sawi duh lék chauh a, kei chuan a Hostel-a kan awm lai aṭangin a mizia awm ang ka hre tawh a, Doro-i ber chuan mak a ti a ni. Ka beng bulah a phun sêp sep a, pa Rinchhana chanchin bak a sawi lo. Vawi khat hmuhna leh hriatna atan chuan pa Rinchhana mizia pawh chu a mak ve ém alawm, ṭawng zauh zauh tal se chuan mak a ti em em bik miah lo vang. Chutah a thu a duh phian bawk si a, Doro-i tan chuan mak tih loh theih pawh a ni lo, kei pawh ni ila mak ka ti tho ang.

Dar 10 leh a chanve dâwnah Aizawl kan lut a, darthlalang aṭanga min rawn en chung hian kan awmna min zawt a, kan veng awmna chu ka sawi ve mai a, Doro-i erawh a muhil leh rih tawh thung. Kan veng kan lut a, ka hlauh ruk ang ngeiin kan in awmna min zawt ta chat mai. Dik tak chuan hre lo se ka duh, kan awmna a ṭhing ve ang reng si a, chu bakah hre lo se ka duh a ni tawp mai. A luhlul ngar ngar hle a, ka sawi hma chu din a tum lo va, Doro-i a lo harh leh tawh bawk nen ka rilrua awm hre miah lovin kan in luah awmna chu a sawi mai a, ka khap duh ta lo law law. 

"Eng nge i lo tih dawn?" motor aṭanga chhuakin kan kalna lamah a lo kal ve zel a, a awm dan chu mak ka ti alawm, haw nghal daih tura ka ngaih laiin a lo kal ve zel thung si. 

"Thingpui i lûm thiam em?" ka zawhna pawh chhang lovin zawhna vek min zawt lêt a, Doro-i erawh ina a luh tawh avangin keini pahnih awm dan chu a rawn hre ve kher lo ang ka ring. 

"Engati nge?" ka chhan lêt dan chu ka ngaihtuah chiang a, a ât thlak ka ti hnuhnawh viau a, ani phei chu min kal pelin in chhungah a lut nghal daih. 

Kan in chhung, zim ve taka ṭhutthlengah chuan a ṭhu ngawi run a, a va han nelawm loh chiang tak! Min rawn en a, a mit ko a sán âk a, thingpui lûm turin min duh tih ka hrethiam nghal mai bawk. Doro-i bawk chuan mak a ti a, pa Rinchhana hmuh loh laiin kan in luah ve mai maia a lo luh chhan min zawt a, ka hre bik teuh lo. Ka thingpui siam a in zawh hnuah pa Rinchhana pawh a haw ve leh mai a, a chhuah dawn te chuan a hawi kual tê tê phawt a, a awm dan chu a mak thlawt. Chawhnu lamah dawra kal nghal kan ngaih avangin haw thlak hma kan duh kha a nia, mahse kan pu chuan kal a ngaih loh thu a rawn sawi hnuhnawh leh a, a tih chî tak tak a ni.

Chawhnu lam chu kan mu hahdam a, ei rawng bawl hun velah kan tho va, rei lo tê mut pawh ka dam phah sawng sawng. A tuk aṭang chuan a ngaite bawkin dawr lamah kan buai leh char char a, ninawm ve ṭhin tho mah se nin theih pawh a ni chiah lo, kan sum hmuhna kha a ni ve miau a, chu bakah kei phei chu nakumah ka nau Aizawlah a rawn awm hmel si a, kumin aṭang ka lo inkhawl lâwk char char a ngai zawk. Ka nu ni se a upa ve tawh si, hna erawh a la thawk reng a, hlawh tam tak neiha chawm ka châk ṭhin. Keini a fate min chawm nân hna a la thawk ṭauh ṭauh a, ka pa tal kha la dam se chu a zia deuh tur.

Ni khat chu kan dawr kawtah motor an insu palh a, pakhat zawk phei chu a nât hmel hle a, damdawi in lam an pan pui thuai a, ka lo hlauthawng ve vek thei. Nunna te hi kan ta a nih lohzia ka hriat thar phah a, fimkhur tluk a awm lo a ni. Chutia pawn lam thlira ka hawi lai chuan kan pu'n dawr chhung lama lut turin min ko va, ka lut ve nghal mai a, ka hna ṭhulh ṭhak khawpin ka lo thlir chu niin, a nuam lo ve reng. Chutah ka beisei loh lutukin thla leh aṭanga Doro-i hna ang ka thawh dawn thu leh Dishwasher tur mi dang an lâk dawn thu min hrilh a, ka lawm lutuk chu awm ngaihna ka hre lo zawk. 

Lawmthu ka hrilh mawlh mawlh tawp ringawt a, ani paw'n nui var varin min kalsan a, kan pu hi chu a fel ve chiang a ni. Hna a duh chu thuhran ni se, a hnathawk te min ngaihtuah em em a, chawlh kan dil paw'n kan chawlh chhungin ama'n kan hna tur a lo ti mai ṭhin. Chu vang tak pawh chuan chawlh kan dil khât réng a, kan chawlh hi chu a ṭul tawpkhawk a ni mai. Ka hna thawh a dang tawh tur ka lawm mai bakah Doro-i chu kei aiin a lawm zual a, lawm dun tak kan ni. Zan mut hmain ka nute nen kan inbia a, ka hna lam erawh ka hrilh duh rih lo thung. Nakinah, hun remchang zawk a awm mai ka ring.

Thla thar kan chuang kai a, Doro-i nen kan hna thawh a inang ta ngei a, kan dawr lianin lún viau mah se kan che a muang lo va, min dawrtu te kan vil hneh khawp mai. Kan pu lung pawh kan tiawi tih ka hria, rilru a nuam veng veng thei. Tin, Dishwasher hna nen chuan a inang lo hle bawk a, a innawm hleih viau a, a inhahdam hleih a, mi ṭhenkhat tan hna hniam tak mah ni se ka tan chuan hna ṭha leh thianghlim tak a ni. Nilaithawhṭanni zan ka nute nen kan inbia chu rin loh lam takin thil a thleng a, ka nu a lo dam lo mêk chu niin, amah nen pawh kan inbe lo, ka naute pahnih nen kan inbe char char zawk. 

Ka nau chiah Remgtei chuan haw a ngaih loh thu a sawi ve tak nà a, haw erawh ka tum tho. Kan naupang ber Hminga nen pawh kan inbia a, ani paw'n a u ang chiahin haw a ngaih loh thu leh ka nu chu a ṭhat ve leh mai an rin thu a sawi a, mahse ka rilruah ka nu a lian ber tawh thung. A tukah chuan ka harsatna leh ka nu dinhmun chu kan pu ka hrilh a, inrinnia haw zawk ka tum thu ka sawi bawk a, a rem a ni mahna. Kan pu chuan a lo phal em em a, heti ang lam kawngah hi chuan a rilru a zau em em a, mahse dawt sawi a haw em em thung. A hmain kan thawhpui pakhat pawh dawt a sawi a, a dawt sawi vang chuan a bân daih nghe nghe.

Zirtawpni zan a ni a, a tukah kan khuaa haw zawk ka tum bawk a, ka in-pack fel mial mial a, beisei loh deuhin inlêng kan nei ta tlat mai. Kawngka ka va hawn chuan pa Rinchhan lêk a lo ni a, mak ka ti teh e! Kei chang ni lo Doro-i pawh chuan mak a ti ve hle a, kan in luah awmna a hriat tawh loh zawk ka ring kha a nia, a la hre ve ngei chu a nih hmel. A lo lêng e ti lo chuan a ṭawng leh chuang miah lo va, a mizia hi chu a mak ve thlawt a ni. Doro-in thingpui a lum sak a, mahse ṭawngkam khat paw'n an inbe miah lo. Kei erawh room-ah thawmhnaw khungin ka buai char char a, Doro-i chu lo lutin

"Va awm ve tawh rawh, in inhre zawk leh nghal" a rawn ti ringawt a, ka thil tih lai chu a tih zawm mial mial a, room aṭangin min nam chhuak titih nghe nghe.

"Eng nge i tih?" pa Rinchhana chu ka en vat a, kan ina a lo lêng pawh mak tih tawh nak a laiin min be hlawl chu mak ti tak ka ni. 

"Ka thawmhnaw ka khung fel a, eng nge i lo tih dawn?" amah pawh en ṭha ngam lovin ka chhang a, a bula thingpui inhûng chu a la in miah lo zui. 

"Naktukah nge i tih dawn?" a ngaite bawkin ka zawhna a chhang leh ta miah lo, a upa tawh bawk a, a thu tê lo chuan thil tih a duh dawn lo tih ka hre tlang nghal vek thei, a khirh ngawt tak ang. 

"Kan khuaah ka haw ka ring" ka tih chuan chiang zet hian min lo en a, a kut tih chet lai chu a tawp chat a, ka melh ṭha ngam leh ta hauh lo mai.

"Eng nge i tih dawn?" zawhna hlira min be bik reng chu ka ning ru ve reng. 

"Ka nu a dam lo va, ka haw a ngai" ka aw chu a hma aiin a khauh a, nelawm loh rawngkai mah ni se ani min biak dan lakah te chuan a la nep lutuk.

"Thingpui kha i in zawh tawh chuan ka lo seng ang chú?" tih leh thawh ka rual a, ka hmuh chian tâkah chuan a lo la in miah lo tak tak maw le. 

"I la in miah na nge?" mak ti zetin ka ti leh a, ani lah chuan ngaihsam hmel fê hian

"Ka in peih lo" a lo ti awlsam thân a, a ṭawng zawi der bawk si lo, Doro-in a ṭawng chu a hriat phak vek ka ring.

"Chuti ka lo sil ang e" tiin no chu ka lá a, glass tile lamah ka phei a, ka sil fai zui nghal a, ka sil zo ka inher chiah chu taksa lian leh chhah ṭha tak ka su deuh chawrh a, ka mi sut chu tu dang ni lovin pa Rinchhana ngei a la ni zui.

"Eng nge tih i tum?" ka dar tawn tawna a chelh rualin ka melh chho kiau a, ani'n min melh chhuk run thung a, a rimtui inkah rim nam chêk te, a huhâng te, inhnaih taka kan awm hrim hrim chu ka zo lo, ka zâm ru tak zet bawk.

End of Chapter 1