LALRINCHHANA HAUHNAR By Havali Adam (CHAPTER 4)

LALRINCHHANA HAUHNAR

By

Havali Adam

Chapter 4

"Lo kal r'u, lo kal r'u" kawngkapui lian zeta kan luh rualin nu pakhat hian a lo ti zung zung a, pa Rinchhana nu a nih thu te amah chuan a sawi a, pa pakhat chu pa Rinchhana pa a nih thu a sawi bawk a, pa Rinchhana naute thlengin min hmel hriattir a, pa Rinchhana nau chiah mipa phei chuan nupui fanau a nei duah tawh nghe nghe.

"In ril a ṭam tawh hlawm em? Ei rawng kan bawl mêk a, kan peih har lo ang" pa Rinchhana nu, pi Masiami chuan a ti leh a, min lo láwm thiam lutuk chu a inthlahrunawm zawk. 

"Kan lo pui ang che u" tiin Doro-i nen chuan kan che chhuak a, Rengtein min lo zui bawk a, an choka te chu pui tak a ni. 

"Lo che hah vak duh suh u, kan chaw eipui tur zawk te in nih kha, hei awmpui an awm reng alawm, lo ṭhu mai mai r'u" an mo ni àwm tak chuan a lo ti siam siam a, an hausak sak nen an fel thlawt. 

"U Rin, Simon-a te unauin an zawn nasat che khâ, han hruai thla daih rawh" a tih zawm leh nghal a, pa Rinchhana a biak danah an mo tih hai rual a ni ta lo. 

Pa Rinchhana chu in chung lamah a chho va, rei lo tê hnuah naupang pathum hi a lo hruai thla a, mipa vek an ni leh nghal. Pa Rinchhana chu an bawr luih luih ka ti mai, an duh dûh an sawi a, keini tihtur nei lo ho chuan kan en leh zuk zuk ṭhin. Hminga chu pa Rinchhana pa, pu Zawnga nen an inbia a, an awmna a va hla deuh a, eng lam nge an sawi kan hre pha lo. Awmpui pakhat an nei a, an mo nen chuan an che char char a, mo zawk chuan kan in tur thei tui min thlitsak ṭheuh a, kan chunga an fel siam siam lutuk chu inthlahrunawm duh tak a ni. Awmpuinu pawh a bang chuang lo, hmel hriat sa ang mai hian min be reng a, nu upa lam deuh tawh hi a ni a, min biak tlângnel an tum ni berin ka hria.

"U, lo phei lawk teh u" Hminga lam chu kan hawi rual ṭhap a, ngawi reng hian kan phei ve mai a, pu Zawnga chuan min lo nuih sun sun a, ka nuih lêt ve tawp ringawt. 

"Puii te, Rengtei te, Doro-i te maw in nih a, in dinhmun leh in thil tawn Rinan a sawi tirh khan kan lo khawngaih lutuk che u a, in in luah chu a nuam maw? Ani pui roh hi, a ngawi ang ngul a, ṭawng lamah hi chuan min chhun lo leh lutuk a, in ngainat loh viau ka ring" pu Zawnga chu pa Rinchhana ai chuan a ṭawng duh deuh. 

"A nuam lutuk zawk maw le, a dawrah hial min thawhtir zui a, ka naute pahnih school kalna tur nen lam min ngaihtuahsak vek bawk a, pawisaa rulh sen loh kan bâ a ni" a tawp lam chu ka aw chhuak a zuai raih a, ka nu leh pa ka mitthlaah an lo lang tel kher bawk si nen ka hnuk a ulh dawn der. 

"Ka fapa hi chu ka fapa mah ni se a ṭawng tam lo ná a, ka chhuang ve asin, harsatna in neih loh hram ka beisei" pu Zawnga chuan a ti leh a, hawihhawm tak hian

"Harsatna kan neih ka ring lo, keiniho tana pa Rinchhana ṭhatna hi chu engtikah mah kan theihnghilh tawh lo ang" ka tih zawm zat a, ka beisei loh lutukin a nui huah huah a, keini palî chuan mak kan ti hlawm hle. 

"Engtin maw tunah khan i koh a!? Pa Rinchhana i ti em ni!?" tiin a nui leh huah huah a, sawi dik loh ka neih áwm pawh ka hre lo, nge ka koh dan a dik lo zawk!

"Pathlawi a ni tho sia, pa Rinchhan tiin kan ko ringawt mai asin" ka ṭawng zo chiah chu ka ṭawng sual tih ka inhre nghal.

"Ni tak e! Pathlawi a ni ve zuaih hman tak alawm, mahse ama'n chutia koh chu a duh reng reng em ni? Ni lo, a duh a ni ang, a hma paw'n in lo ko reng tawh ang chû?" nui chung hian a ti hlauh a, ka ṭawngkam hman dan a haw miah lo chu vanneih thlak tak a ni.

"A pathlawi dan lah kha a ho ang reng bawk si a, amah ber pawh hian a chhuang lo teh asin, nupui kha nei zuaih khanglang lo se chu a pathlawi tawp lo ang" amah bawk chuan nui var var pah hian a ti leh nghal a, ka beisei loh deuhin pu Zawnga chu a nelawm daih.

"Keini ve mai mai chaw eiah te min sâwm a, kan lawm tak zet a ni" ngawi renga awm ai chuan tiin ka ṭawng chhuak sep a, kan inṭhut hlat lo bawk a, ka ṭawng ring lem lo. 

"In duh hûn hunah in lo ei ṭhin dawn nia, chaw ei tih te mai mai chu a uiawm hleinem le" a tih hnu rei lovah pi Masiami a lo ṭhu phei ve a, titi a vawrh nghal char char a, an hausain an inhmangaih tawn hmel bawk sia, nupa awhawm tak an ni.

Sitting room-ah chuan kan ṭhu ṭhap a, zawhna min zawh apiang chu ṭha takin kan chhang thlap thlap a, keimah chauh ka ṭawng lo. Mi dang pawh an ṭawng ve luam a, Doro-i chenin, ani phei chu kan unau zinga mi emaw an ti a, a ni lo tih erawh ka sawi buai duh kher lo. Kan unaunu ang maiin kan ngai tho va, sawi leh sawi loh a inang reng. Awm mai mai thiam lo chî ka ni bawk nen ka tho tharh a, choka lamah a ṭhen azar ei rawng bawlpui turin ka phei a, an mo chuan a lo phal lo hmasa ber leh a, mahse ka pui lui ta tho. Kan bulah naupang infiam an lo tlan lut chhen a, a nu chuan a hau ve ṭhin tak ná a, awmzia a awm lem lo. An tlan kual zek zek a, an hlim hlawm viau leh nghal a, anmahni avang chuan ka nui leh sak ṭhin.

"Kha kha kha! Simon!" a nu hawina lam hawi thuaiin naupang chu ka en nghal a, filter inhûng awn riai riai chuan a delh dawn chiang tih ka hria, che thutin ka va kuah hman hram a, ka lua thil rawn tla chuan ka lu a tihai muai muai nghal bawk. 

"Awi! A va'n zia lo êm, a nâ em?" nuapang nu chuan min rawn buaipui hmasa ber a, vawi leh khatah min delhtu filter tê lo tak chu a awm sawn dâwrh a, chu filter dah sawntu chu pa Rinchhana ngei a ni.

"I ṭha em? Simon! Ninhlei mah ta che!" pa Rinchhana aw chhuak chu a khauh hmuk a, naupang nen chuan min tung ding a, kan din hnuah erawh ka lu chiah a en thung. 

"Khaw maw ka lo en" aw nêm lo zeta tiin ka lu chu a endik a, kei paw'n ka khawih a, mahse thisen ka khawih fuh ta tlat mai. 

"Ka lu a hai" mi dang hriat hlau zetin ka ti sep a, a hai tak tak réng a, min pawm kang thut a, ka meng deuh kâwk nghe nghe.

In chung lamah min pawm chho a, ka naute min kohna chu ka hre pha reng, mahse ka chhang chuang lo. Room pakhatah min luhpui a, bâwm pakhat aṭangin damdawi leh bandage a la chhuak sawk sawk a, a che vel chu ka en reng a, a tira ka lu hai muai muai pawh a zia deuh tawh. Ngawi reng hian ka chal chu a endik a, detol emaw ni hi a hnawih hmasa phawt a, bandage chuan a tuam zui nghal a, chuti anga nâ tak han tih tur a ni lo va, tuam kher chu ṭul ka ti hran lo. A tuam zawh chuan min en ta, kan inawm hnaih bawk si, ka thawk lâk dan thlengin a buai nghal vek thei. Ka tum loh deuhin ka hmui te chu ka pet kual vel a, a thaw rim hre pha khawpin kan inhnaih chilh a, ka buai vek tak ngial dawn. 

"Ka lawm e" ka ti sep ringawt a, chu pawh amah en lovin, ka en ngam rih teuh lo mai, kan inhnaih ropui si.

"A zia deuh tawh em?" thum hniam ruiha a tih chuan

"Zia tawh, heti anga ka awm kher hi a zia lo ngawt mai, a nuam lo ka ti" ka tih zawm daih thung a, ka rilrua lo lang hmasa ber a ni tlat a, a ṭhutna aṭanga a tho chiah chu ka lawm ru veng veng.

"Lo zu chhuk hmasa rawh" tih leh tukverh lama phei a rual a, ṭawng tawh lovin kawngka lam chu ka pan muangchang lo hle a, min hnung chhawn zawnga ding ngawi reng chu ka chhuahsan ta vang vang.

Inhnuai ka thlen thlak rualin zawhna min lo zawt nghal mawlh mawlh a, min ngaihtuah hlawm lutuk chu a nuam lo zawk. Simon-a chu a nu'n a hau leh ṭhin a, kum 10 pawh a la tling lo vang, ka khawngaih reuh khawp. A ṭi deuh dâk a, chaw ei hma zawng chu ninhlei zawngin a awm leh tawh miah lo bawk. A naute pahnih pawh an harh zawk zawk tawh lo va, pa Rinchhana nau pa Sawma paw'n ka hnenah thupha a chawi nghe nghe a, ka nât loh thu ka sawi ve mai bawk. Filter chungah khan thil dang inhûng awm lo se chu ka chal pawh a thi kher lo ang, kha khan ka lu tak a rawn tlâk a, a tirah kha chuan a nâ ve reng, mahse a nâ rei tak tak chuang lo.

Zanriah kan ei lai te chuan nelawm tak hian min be siam siam hlawm a, pa Sawma chenin an ṭawng duh em em a, pa Rinchhana erawh tûma'n a ṭawng lûam kan beisei lem lo, a ṭawng mang lo reng bawk. Bawngsa te, vawksa te, arsa te chawhmeh atan min hlui a, chawhmeh a tam lutuk chu ei ber tur kan hre lo zawk. Pu Zawnga chuan chaw ei hnem rûal kan nih thu te a sawi a, ei hnem leh hnem loh lama kan inthlahrun a hlauh vang niin ka hria. Hminga ber chu chaw an khawrh ṭawk ṭawk a, phat rual lovin thingtlangmi a ni tih kan hre tlâng vek a, a taksa lian lem lo mah se pa Rinchhana leh pa Sawma ai paw'n a ei hnem daih zawk.

Zanriah kan ei kham a, kan eina vel kan seng fel pui dawn a, a ngaite bawkin chet an phal lo leh a, mahse Hminga tih loh ka che lui ta tho va, an thusawi ang zela awm ringawt zawng a mawi lo tawh zawk a ni. Awmpuinu chenin kan awl vek a, Doro-i nen thleng kan sil dun a, Rengtein dawhkan tifaiin sil tur a lo dah phei zel a, pa Rinchhana chhungte paw'n tih ngaihna an hre vak lo. Zan inkhawm kan duh avangin haw nghal kan tum a, pa Rinchhanan min thlah a tum thu a sawi sup a, kan haw dawn te chuan an vaiin an lo chhuak a, kan tlan liam hma zawng an ding ṭhap a, engtin emaw ni tak; a ṭha lam emaw a chhe lam pawh ni se, min sawi zui ngei ka ring.

Pa Rinchhana chuan kan in kawt thleng min thlah a, lo lut tawh lovin a tlan lêt leh nghal a, lawmthu te sawiin a tlan liam hma thlah ve teh mah ila pakhat mah chhan lêtna ka dawng lo va, ka dawn pawh ka beisei buai duh lo hrim hrim. Zan inkhawm kan bâng a, tih tur kan nei lo tlâng hlawm bawk a, kan mu hma khawp mai. Mutnaah chuan kan hun tawn mêk te ka ngaihtuah rauh rauh a, thawm a reh ṭhiap a, ngaihtuahna a kal ding duh viau. Ka chal tawk zeuhin pa Rinchhana ka ngaihtuah chhuak a, kan unau chunga a ṭha lutuk hi a chhan ka hre châk ngawt mai, a bikin ka chungah hian a ṭha tak zet. Tlaiah lah khan amah hlau lo tur leh ngaina tura min duh thu te kha a sawi ringawt a, kha pawh kha a chhan dik tak ka hre châk.

A tukah chuan dar 8 leh a chanve velah a lo lang hlawl a, hna ka thawh a phal der lo zui. Rengtei leh Hminga te'n school an kal tawh a, Doro-i a hna lamah a kal tawh bawk a, pa Rinchhana chu a ṭhu deuh reng bawk. Ka thawhna dawr neitu berin hna ka thawh a phal loh miau avangin chawlh mai a ṭhat ka ring ta zawk a, hnial pawh ka hnial buai lo ta law law. Bathroom-ah ka lut zuaih a, ka chhuah leh chuan a lo awm tawh lo va, ngaihṭhat lohna em em pawh ka nei lo, mahse kan awm dun chhung khan kan ṭawng hnem dun lo khawp. In chu tihfel ka tum tak ná a, a ngai hran lo, a fai em em zawk. Tlaiah ka naute pahnih an lo haw a, inah ka awm hlawl chu mak an ti viau a, ka nui tawp ringawt a, ina ka awm an ring lo hle a ni.

"Puii hi ka rin ang a ni miah lo, thingtlangmi ve si, sum a lo duh viau dawn a nih hi!" tia ṭawng melh melh hmeichhe aw chu ka hre chiang khawp mai, an bul hnaiah ka awm lo emaw an ti a ni ngei ang. 

"Kei chu a tir aṭang tawh khan ka nêl lo hrim hrim a, ka biak áwm in la hre lo ang, mahse Sir hian a vil hneh ka ti mai, ka ṭhiannu pakhat phei chuan a naute nen lam a chawm vek a ti" titu chu Ramtei a ni thung a, kei erawh ka che tawh lo hrim hrim.

"Sawi tawh s'u, a lo phei thut ang e" Hriata aw ka hriat zawm zat a, ka zun hlan ringawt paw'n min lo rêl hman chu a nia, ka awm loh lai te khan min sawi nasa thei ngawt ang. 

"A ho ê, duh leh hria ang hmiang, a nihna alawm kan sawi, huat chi pawh va nih suh" ti hmawk hmawktu chu Julie-i a ni tih ka hai lo, ka thawmhnaw chûl marin ka insiam ṭha a, thawk ka la vang vang a, rilru pangngai deuh angin ka awm a, an hmel ka hmuh chuan min lo nuih sâng hlawm a, lemchang thiam tak an ni. 

"Puii, lo kal lawk teh a, i hman tho a, ei tur min va lei lawk la, kan ril a ṭam hlawm tawh teh mai a nia" Julie-i chuan a lo ti nghal a, ka ṭhutna pawh ka la thleng hman lo hial ang. 

"Customer an lo lut thut ang e, pakhat khan va lei zawk mai ula" ka ṭawngkam chhuak chu huat tur a awm miah lo, mahse min huat hmel hlawm hle thung. 

"Keini zingah chuan a Junior ber i ni a, va kal lawk rawh, rei i thang chuang nâng. Chu lovah i kal bo chhung lek te chuan dawrtu kan nei kher lo ang, kan nei ta a nih leh kan awl hneh dawn che êm mai" a ti deuh tlat a, pawisa min pe a, ei tur lei tumin ka chhuak ve mai bawk.

Dawr pakhatah ka lut a, ni danga kan ei ṭhin chu pack turin ka order a, an siam zawh chuan ka lêt leh nghal a, ka muangchang hran lo. Pa Rinchhana ber hi ka zah ṭhin, a lo kal laia awm loh a nuam si lo va, a khawngaihna kan dawn avanga thawk ve mai mai leh hlawh nei ve chauh ka ni a, ṭha tawp khawka awm ka tum ṭhin, mahse hmâna a sawi kha a dik, ka thawhpuite chu an fel miah lo tak tak. Thingtlangmi ka nih avangin min hmusit tih ka hria, mi â ka ni bik lo, ualau takin an tilang lo mai chauh zawk a, chu pawh pa Rinchhana an zah vang a ni pakhat. Thla khat chu ka thawk tling tawh a, thla hnihna ka thawk ṭan leh mêk a, a hmeia pain ka thawhpuite mizia tlangpui chu ka hre chiang thawkhat ve tawh hle.

Kan thawhna dawr chhung ka luh chuan ei tur an lá nghal sap sap a, a khawmin an ei bik a, kei erawh ka seat-ah ka ei thung. Seat hi a hran ṭheuh kan nei a, dawhkan hran ṭheuh kan nei bawk a, dawhkan leh a vel chenvawngah chuan min tluk lo ve chiang a ni. Tlai dar 2 leh a chanve velah pa Rinchhana a lo thleng a, phai lama mi biak neuh neuh tur a nei a, CITY CAR BAZAR ngawr ngawr hi a eizawnna a ni lovin ka hria, mahse eng nge a tih ṭhin erawh ka hre chuang lo. Ka thawhpuite chuan 'Sir' an ti vek a, mak tak maiin 'Sir' tia ka koh ṭul a ti lo leh mauh mai a, ka thawhpuite paw'n mak an ti khawp. Kei tak paw'n 'Sir' tia koh ka thiam chiah lo, koh ṭhan dan nghet ka neih tawh vang a nih ka ring.

Dar 4-ah kan bâng a, pa Rinchhana chuan min thlah leh thlap a, ka inthlahrung ṭhin zawk. Thlah ka ngaih kher loh thu hi chu kâr khatah vawi khat tal ka sawi ang tih theih khawpin ka sawi zing a, mi pawh chhang lêt lem chuang hlei lo hian min thlah haw ziah tho va, ka thusawi engah mah a ngai lo a ni ber. Bus-in ka haw ve thei reng a, ka thawhpuite phei chuan min ei loh phah zual, mahse pa Rinchhana hnenah engmah ka hrilh duh lo, min zawt lo hrim hrim a, min zawt a nih chuan a sawi te pawh kan la sawi ve mahna. Chu bakah a tuarzuau thlak ka ti, an duh dûhin min sawi chhia pawh ni se, min rél pawh ni se, ka tan hlawkna a awm lo va, an tan hlawkna a awm lo va, kan thlakhat hlawh a inang vek tho tho.

Hun leh nite chu khawmuang lovin an liam zel a, ka naute pahnih pawh kum tira school sawn mah ni se zirna lamah an ṭha sâwt em em a, khawpui school nge nge chu an ṭhatpui hle. Thingtlang school lam ka hmuhsitna ni lo se, khawpui hi chu khawpui a ni a, a boruak a ṭha zawk mah a, zirtirtu te thlengin an ṭha nge nge bawk. Tin, Aizawla kan inbengbelna pawh thla 4 lâi a ni ve leh tawh a, an vun nen lam an êng sawt sawt a, khawpui boruak an ngeih a ni ber e. Pa Rinchhana chu kâr khatah zan hnih te, zan thum te a lo lêng ṭhin a, lêng tih lemah min veng ka ti mai, ka naute pahnih zirlai thlengin a ngaihven a, Doro-i nen pawh an inbe ve ta zeuh zeuh.

"Awi, ka tihpalh lutuk" tiin Julie-i chu ka bulah a rawn ṭhu hniam vat a, ka kut en a tum chuan ka lá sawn thuai thung a, ka kut tin nât dan chu pui tak a ni. 

"Buaipui ka ngai lo" ka ti hmarh a, ka thinrimna ka thup peih tawh bik lo, ka kut chu a rap lui tih chiang takin ka hria, ka bul lawkah ṭhu tawh lo se ka ti ngawih ngawih.

"Ka lungawi lo e te chu i ti ve khanglang leh nghal a, ka buapui tawp lo ang che. Ka rah luih pawh ni hlei lo, a nât vak a rinawm loh" Julie-i hi chu ka lakah a ṭha lo ve thlawt alawm, min rap lui tih lah ka hre chiang si.

"En teh Julie, engati nge min hmusit em em mai le? I pawi ka sawi em ni? Pakhat tal sawi la, insiam ṭhat ka ngaih chuan ka insiam ṭha hreh reng reng lo" thinrim awkâ tel hauh lovin ka ti ta thlawt a, ka en kar bawk. 

"Ka hmuhsit áwm che ka hre lo" ngaihsam hmel fêa a tih chuan

"Min hmusit ngei alawm, thingtlangmi ka nih vang ti raw? Thingtlangmi nihna hi hmuhsit chi a ni lo asin, thingtlang awm lo se khawpui a awm thei reng reng lo" ka ti ve ta fak fak a, nêm taka ṭawng reng tum mah ila ka thei tawh lo. 

"Junior zawk si mi lah chu i chhang ang zuah zuah a, i ngawi lo a nih chuan i tan a pawi palh ang nge" a tih chuan ka thin a khei fak a, ani ang em ema mahni mihringpuite hmusit thiam hi ka la hre lo, rapthlak leh lutuk mai. 

"Ka ngawih theih ka ring lo" ka ti chiah chu ka samah a rawn kek nghal buan buan a, ka sual lêt ve nghal a, kei aiin upa zawk mah se hlauhna pakhat mah ka nei tawh lo, a sam chu ka kek bawrh bawrh a, min hneh lo khawp. 

"Duh tâwk nghal rawh u" pa Rinchhana aw ngei kan hre ta, kan la inthlah lawk loh avangin kan thawhpuite'n min lo ṭhelh thuai thuai a, ani pawh hi lemchang mai an ni; pa Rinchhana lo lan hma te kha chuan min ṭhelh an tum lo a nih kha le.

"Ka dawr chhungah in insual ngam a maw!?" a thinrim thawkhat bawk a ni ang a aw chu hlauhawm tak a ni; ka kimki chawih thei. 

"Julie, thil thlen dan sawi rawh" a ti thum khauh leh hmuk a, chutah Julie-i chuan men pur chung hian

"A kut ka rap palh a, ngaihdam ka dil a, ka inrin hmain min rawn kek nghal vak vak ringawt a, ka tan chuan sual lêt loh ngaihna a awm lo" a ti zuah zuah a, a va han dawthei mai mai tak! 

"Vawi khat mah insual tawh s'u, inhnaih takin in ṭhu tawh lo bawk ang" pa Rinchhana chu ka en tlawk tlawk a, insawifiahna hun pakhat mah min pe ve miah lo chu ka hrethiam lo, min tihrilhhai hle bawk.

A kal liam chiah tihah ka ṭhu hnawk a, ka ṭah a chhuak hran lo, mahse ka rilru a nâ em em thung. Vui ka tum viau a, vui thei ka ni lo tih ka hre chhuak a, insawifiahna hun min pe ve lo mah se ka haw ringawt thiang lo a ni. Ka hlawh neihna tur hna min pe a, kan awmna tur in min zawn hmuhsak a, ka naute pahnih school kalna tur a buaipui vek bawk a, ka laka a chet danin ka lung tiawi zân lo mah se langsar taka lungawi loh khum zawng thil dik a ni lo a ni. A nihna tak chuan ka dik zawk a, kut thlak hmasatu pawh ka ni lo va, mahse kut thawh hmasatu zawkah min ngai ngei ang. A pawi lo ve, vanduaina te chu tu paw'n kan tâwk ṭhin alawm, pa Rinchhana zawng ka thinrim khum phak a ni lo.

Tlai dang ang bawkin min hruai haw leh a, vawi khat mah kan inbe lo va, a lam pawh ka hawi lo hrim hrim. Ka dik lo miau a, ánkhum bawrh bawrh ka châk, ka ngam der si lo. Zanriah kan ei lai te chuan ka awm a nuam lo ru hle a, ka rilru ber a nât miau chuan tih ngaihna a awm lo. Ka ṭhiannu leh ka unaute erawh hlim takin an titi siam siam a, kei chu ka nui lui vel mai mai chauh a ni. Zan lah chu a la rei dawn em em leh nghal, dar 8 pawh a la ri lo. Mut zal mai mai chhuanlamin room-ah ka lut daih a, phone khawih ka tum tak ngial a, khawih tur ka hre hlawl lo. Ka rilruah tlaia thil thleng kha a awm reng a, ngaihtuah zui ka tum loh tehreng nen ka ngaihtuahnaah a awm tlat tho.

"Thingpui in a va châkawm ve" titu chu tu nge a nih ka hai hauh lo, a lo luh lai chenin a thawm ka hre vek a, mahse room-ah ka mu laklawh bawk nen ka tho peih lo ta law law. 

"U, pa Rinchhana a lo kal a nia, i thingpui lúm bak a in ngai lo tih i hriat ve vek kha aw, thingpui a in châk thu a sawi leh nghal" Rengtei chuan min sawi pah hian a ti a, kei erawh rizaiin ka la inkhuh hlún thung.

"Lo tho teh, kan lakah a lungawi lo palh ang e, a chi loh viau ang" a tih leh chuan rizai hlìmin ka tho tharh a, room aṭangin ka chhuak a, tûmah en lovin gas lam ka pan dìng nghal a, thingpui tur ka chhuang nghal bawk. 

Ka mit sirin min en reng tih ka hria, min chík hmel viau bawk. A thingpui tur siamsak zung zunga mut leh daih chu ka tum a, a pawina a awmin ka hre lo. Thingpui a so ta maw tihah ka siam zui nghal a, ka siam zawh hnuah ka va chhawp a, chutah pawh chuan ka la en chuang lo. Room-ah ka lut tlang nghal daih a, zan dangah pawh Rengtei leh Hminga te deuh ngawr ngawr nen thil an sawi ṭhin tho a, ka inthlahrung buai kual vel peih rih lo ta law law. An ṭawng thawm ka hre pha reng a, muthilh vang vang tum si kha ka muhil leh thei ta chuang bik lo va, ka mit ka chhing nghet em em ringawt a, an titi ka ngaithla kar a, mahse pa Rinchhana ṭawng áwm reng ka hre tawh miah lo.

"Ka va haw ang e" tih chu a thusawi leh hmasak ber a ni a, Hminga leh Rengtein pawn thleng an thlah a, kei erawh a ngai ngaiin ka la mu harh kur thung. 

A tukah chuan pangngai deuhin hna ka kal ve leh mai a, Julie-i nen pawh kan inmelh no lo dun hle. Ka bulah a ṭhu lo ta ngei a, Hriata zawk a ṭhu a, mahse ani pawh hi nel chi vak a ni lo. Dar 10 velah pa Rinchhana a lo kal a, min en dawn chiah tihah ka hawi sawn a, a laka lungawi lohna neih loh ka tum ngial a, ka thei thlawt lo. Dawt muhlumin Julie-in min puh kha a nia, insawifiahna hun pawh min pe ve lo va, a ruk tak chuan mize ṭha lo min ti ngawt ang. Dik tak chuan a lakah ka lungawi lo ve thlawt, tu nge dik lo taka inpuh duh bik reng reng ang. Nizanah tal te khan min zawt se, sawina hun min pe se chuan engkim ka sawi vek ni mai tur.

"I damsam lo em ni?" motor-ah kan chuang dun leh reng tawh a, tlai tin inthlahtir ziah pawh hi a ṭul em em tawh lo, a lakah ka lungawi rih lo laklawh bawk nen a bul hnaiha awm ka châk hlawl lo a ni ber.

"Ka ṭha e" ka ti sep a, kan in kawt kan thlen rualin ka chhuk nghal thuai a, tlai dang ang lo takin thlahna thu leh lawmthu sawina thu engmah ka chhak chhuak lo hrim hrim bawk. 

In chhung ka lut a, Rengtein ei rawng a lo bawl melh melh a, a zai rât rat pah a, ka mood ṭha lo zet chu tihreh daih ka duh ngei mai, chuti maiin a reh thei bawk si lo. Zanriah kan ei lai chuan Doro-i leh Rengtei an ṭawng char char a, chaw kan ei kham a, insuk ngai ho ka su a, a bak chu tih tur em em a awm hran tawh lo. A tukah chuan a ngaite bawkin ka hun hman dan a fuh teh chiam lo va, ka rilru a la dam thei ngang lo a ni. Nitin Julie-i chuan ka lakah sual a chhuah thar zel a, ka dawh hram hram a, ka ngawi mai mai zel a, ka thin a tirim leh ang tih ka hlau khawp. Ka thinrimna ka thunun hman loh chuan insual a ni leh mai a, insual pawh hi ka duh dan a ni teuh lo, mahse a hma kha chuan ka thin a tirim ve êm a ni.

"Lo kal teh" ti ram hmuka min kai dawr dâwrtu pa Rinchhana chu ka en reng a, a office-ah min hruai lut a, ka thawhpuite an awm loh lai tak a ni hlauh zawk a, min hmu se chu sawi tur an ngah leh khawp ang. 

"Eng vanga min pehhel tlat nge i ni?" a aw chu a ngainatawm hlawl loh, chil ka lem khawlh a, kâr khat chuang chu dawrah mai ni lo kan inah nen lam ka pehhel tawh chiang alawm, ka awm danah a hrethiam vek a ni mahna.

"Sawi rawh Dampui" a hma ai chuan a aw a nêm deuh zawk a, mahse chu pawh la khauh ṭha vet vet tak a ni. 

"A chhan a awm lo, ka pehhel lo hrim hrim che" ka ti ve tak ná a, dawt ka sawi tih chiang takin a hriat ka ring, ka aw chhuak aṭangin ka zâm tih thlengin a hriat vek ka ring bawk.

"Ka lung tiawi lo zawngin awm hlek suh" ram hmuk hian a ti vin deuh ṭhawt a, inpehhel vang mai maiin chuti anga a thinrim chu ka ring miah lo, ka ring miah lo tak tak!

"Ka tihpalh" ka ti sep a, ka darah hmerin bangah min nawr ber titih a, tun ṭum chu ka hlau ni berin ka hria, ani lah a thinrim hmel nasa mai si. 

"A chhan sawi mai rawh" a tih chuan ngam leh ngam lo hian

"I lakah ka lungawi lo alawm, Julie-i dawt sawina hun i pek laiin kei erawh thu dik sawina hun min pe lo va, mahse a hnuhnawh tawh êm a, tunah thu dik sawi ta pawh ni ila i awih ka ring lo" ka ti ta nge nge a, a thinrim hmel chu a inthlak tial tialin ka hria.

"Ka tihpalh, sawi tura min tihluih tlat avangin ka sawi mai chauh a ni. I laka lungawi lo ringawt thei ka ni lo tih ka hria, min hrethiam hram dawn nia" ka ti leh sep a, min din hnaih sauh a, a rim te, a huhâng te, a mi uap hrim hrim chu ka dawl zo lo, ka thaw a chham mai dawn.

"Eng nge tih i tum?" ka hmai bul chêta a lo kun hniam chiah chu ka thawk dan a buai nuaih tawh a, a thaw rim tui ru tak thlengin ka hre vek thei tawh bawk. 

"Khawngaihin awm sawn rawh" ka sawi zo hman ṭawk ang tihah a hmui leh ka hmui a insi thut a, ka meng kâwk a, ka hamhaih mai bakah ka taksa danglam nasa lutuk chu ka khawng vek titih a, harh chhuak thuaiin ka nam sawn deuh a, mak ti aw zet hian

"Pa Rinchhan!" ka ti hluai a, a âwmah nam leh vakin ka melh chho kar a, rei awm sawn lovin min rawn fawp leh a nih chu!

Ka che tur chu a kutkhing khatin ka kut pahnih a man bet a, man bet lo se chu engtin emaw tal ka khawih ngei ang. Ka hmui chu fawp satliah mai lovin a hmui a chet ṭan ta, ka tum ni miah lo hian ka hmui ka lo chet ve sâwih sawih a, engkim chu ka thunun theih piah lam thil vek a ni tawh. Tal pawh ka tal tawh lo, awlsam taka min thunun thei chu mak ka ti, ka rilru thlengin a dik lo ṭan a, ka chhia leh ṭha hriatna erawh tlêm tê a la awm ve ṭawk ṭawk a, a mi fawhna dam tak chuan min tichawmawlh vek ni berin ka hria. Ka mit ka meng phal lo hial a, chuti ang em em chuan infawh a nawm ka ring ngai lo. Min fawptu hmui chu a nêmin sík a nuam em em a, a lúm vung vung a, min fawh dan lah chu min pet ni berin ka hria, mahse ka dawngsawng ṭha em em thung a, nuam ka ti tih chu hai rual a ni lo.

"Ngaithla teh Dampui" thum chhala tiin ka chal chu a chalin a rawn nawr a, nghet zetin ka mit ka chhing vawng vawng a, pa Rinchhana laka ka awm dan chu ka inzahpui a, kan awm dan leh kan thil tih zawh chiah chuan min tizak ngawih ngawih. 

"Kei hian nasa takin ka ngaina che, thup sen a ni lo" a tih chuan ka la maimitchhing tlat thung a, ka meng ngam rih lo hrim hrim zawk. 

"Min pehhel zawngin awm tawh suh, CCTV aṭangin Julie-i dawt sawi theihzia ka hria, mahse hmeichhe tlawm awlsam tak ni turin ka duh lo che, chu vanga la bán lo pawh chu ka ni. I mit meng rawh le, min en teh" ti lehin ka biang tawn tawn chu a kut lian zetin a khuap a, ka mit ka men tâkah chuan kan inmelh hnai hle.

"Ka thusawi awmzia i hria tih ka hria, i theihnghilh mai mai lo bawk ang" a sawi zawh rualin ka hmuiah bawk a fawp leh zeuh a, ka chunga a chet dan chu min hmusti ni maiin ka hre tawh. 

"Khawngaihin heti ang hian ka lakah che tawh suh, i zara nung ve hram hram leh ka naute chawm thei ka ni tih chu ka pha lo, mahse mihring ka ni a, zahawmna ka nei ve asin" ka ti thawp raih a, lungngai ru zetin ka melh chho rán bawk. 

"I laka ka rilru puthmang hi sawi nawn kher ṭulin ka hre lo, i zahawmna tîamin humhimsak che ka tum zawk. I duh chuan i chhuak thei, i la awm thei tho bawk" a tih tâkah chuan rang zetin ka che chhuak a, ka chhuahsan ta vang vang. 

(End of Chapter 4)