LALRINCHHANA HAUHNAR By Havali Adam (CHAPTER 3)

LALRINCHHANA HAUHNAR 

By

Havali Adam

Chapter 3

"Riah chu i lo tum tak tak em ni?" in chhunga ka luh hnu chuan ka ti a, phone khawih mual mual hian a ṭhu ngawi run a, ka naute'n ka ṭawng an hriat ka hlauh avangin ka ṭawng ring hran lem lo bawk. 

"Pa Rinchhan?" ka tih leh chuan a phone khawi lai en tawh lovin ka lam a lo hawi chho va, kan in a nia, hawi sawn hmasa zawka ṭan ka tum lo ve bur. 

"Rizai sin tur a awm loh chuan sin lo paw'n ka mu thei" a rawn ti daih a, dik tak chuan a riah ka phal lo pawh a ni lo, mak ka tihna chu a la kiam thei lo zawk a ni. 

"Rizai sin tur chu a awm reng alawm, mahse chhuata mut a ngai dawn a, eng lo, khumah i mut duh chuan a theih tho" ka ti ta ringawt a, a lu a thing a, a phone a khawih zawm leh daih. 

"Khumah mu mai rawh aw, Hminga chhuatah mu zawk rawh se" ti lehin chet sawn ka rual a, mahse ka kal thui hman lo, ka bán rêkah a vuan a, a kut a lian ṭha hem hem bawk a, ka bân rêk chu a hum hneh kher mai.

"Chhuatah ka mu thei" ti supin ka mitah tak min en a, a hma zawnga hawi sawn hmasa zawka ṭan tum lo ve ngar ngar kha tunah chuan ka hawi sawn leh ta nge nge, ka taksa a sik apianga ka danglam em em zel chu a chhan ka hrethiam lo tak zet.

"Rizai ka lá dawn" min vawnna a kut en chunga ka tih sep chuan ṭha takin a thlah ve mai a, bedroom-ah lutin rizai bâwm ka hawng a, ka naute pahnih chu khumah an lo mu fel diam tawh a, mahse an la muhil lo ve ve thung. 

"I duh chuan khumah pawh a mut theih tak tak a nia, Hminga te chu chhuatah a mu ṭhang alawm, nang zawng i mu ngai tawp náng" rizai leh lukham ṭhutthlenga dah pahin ka ti a, a lakah chuan ka inthlahrung ve reng.

"Mutna tur ka'n phahsak nghal ang che, i mut a chhuak palh ang" keimah bawk chuan ka ti leh a, a ṭawng lo miau alawm, kei tal ka ṭawng lo a nih chuan a reh tlawk tlawk a ni mai.

Chhuat ka phiah fai hnuah a mutna tur chu ka phahsak nghal mawlh mawlh a, rizai ṭhenkhat chu ka phah mai a, chhuat changa mut tir tlawng ringawt zawng a dik lo a ni. A mutna chu a dup vak hran lo, mahse chhuat chunga puan pakhat lêk phah ai te chuan a dup nuam zawk hrim hrim ang. Rei pawh hun hmang lovin ka phah fel zung zung a, a lukham leh a rizai sin tur nen lam ka siamsak vek a, ka hawi chhuak chiah chu min lo en reng a, ka hawi sawn rang khawp. Room-ah ka lut daih a, ka naute pawh an muhil tawh a, khum khatah Rengtei nen kan mu dun a, Hminga khum hrangah a mu thung a, ka mut lah chu a chhuak eih lo leh nghal.

Dar 12 a ri dawn tawh a, ka la meng kar a, thawm a reh ṭhiap danah an muhil vek tawh a nih ka ring. Kan hma hun tur ka ngaihtuah neuh neuh a, buaina pakhat ka nei leh ta. Aizawlah chhuk ta pawh ni ila khawiah nge kan awm ang, Doro-i nena kan in inluah ṭawm kha chu a tê mah mah, keini unau pathum awm belhna chi a ni lo. In luah tur kan zawn chhung tal chu awmna tur kan neih a ngai, chutah kan in luah tur chu a luah man a lo to fû thei bawk a, rilru a buai leh ta hle mai. Ka che sêk a, ka bula mi chu a mu tui tawh em em thung a, ka zun a chhuak deuh tho bawk nen zung turin room aṭang chuan ka chhuak ta ringawt.

Sitting room-a mu thluang duai mipa lian leh sei zet chu tihharh hlau takin ka kal ṭhem ṭhem a, chhuat thing a ni bawk si a, a cháng lai chu ka hel hram hram a, a cháng lai rah hi chuan chhuat a chik ṭhawt zel a, zan lai a ni leh nghal, ka rap a nih vaih chuan thawm a ring viau ang. Bathroom chhung ka lut chiah chu ka thaw huai thei, tihharh ka hlau êm bawk a ni. Ka zung zo ka chhuak tur chu ka insiamṭha hmasa tê tê phawt a, kal lam ang bawkin thawm chu ka dim phei leh viau a, bedroom kawngka ka thlen dawn chuan pa Rinchhana hmel ka en zauh a, tui taka a muhil sûk suk hmel chu lut ta mai lo chuan ka en deuh reng a, kan unau pathum tan Pathian rawn tirh a ni maiin ka hria.

Khum ka thleng a, ka mutna ah ka ngaihtuah zui rauh rauh a, Pathian hnenah lawmthu ka sawi rilru nghal bawk. Kan laka pa Rinchhana awm dan ber chu ka ngaihtuah nawn leh ṭhin, min pui ringawt te, a dawra thawk tura min sawm ringawt te, engkim chu a mak thlawt a ni. Amaherawhchu awm lo se chuan kan buai viau ang, ka nu thihnaa insenso ngai zawng zawngte kha ama'n a tum vek a, a lakah chuan inthlahrun loh theih pawh a ni lo. Ka mit ka men leh meuh chuan khua a lo vâr vek tawh a, ka bulah Rengtei a mu tawh lo va, chuti ang bawkin Hminga pawh a lo tho daih tawh. Sitting room ka thlen chuan pa Rinchhana mutna a lo ruak huai a, in chhungah tûmah an awm lo hrim hrim zawk.

"Khaw'nge pa Rinchhana? A haw tawh em ni?" tui khai chunga Rengtei lo lut chu ka be nghal a, nui chung hian

"Haw lo ve, Hminga nen tuikhurah an awm mêk, tui min chawipui a, pa Rinchhana hi maw a hmel phû lovin a fel tawp" a ti ta mai, mak ka va ti tehreng ém.

"Pa Rinchhanan tui a chawipui che u maw!? A va zahthlak zawk ve, engati nge min kaihthawh loh?" ka ti hluai a, hmai ka phih sawk sawk a, tui min chawipui ngai khawpa kan awm chu ka inthlahrung leh em em tawh.

Hmai ka phih zo ka inhruk hul lai vel chuan Hminga hnungah pa Rinchhana ngei chu a lo lut a, ṭin pahnih a lo khai lut a, Hminga erawh chuan pakhat chiah a khai thung. Ṭin chu tuikawhnaa kawh ngai khawpin keini tan chuan a lian ṭha ve a, mahse pa Rinchhana tan zawng a lian lo kher mai. Pahnih a rawn khai lut hial a nia, amah a pa lian hrim hrim a, kawngkaa a chhuak tur te chu a kun a, inthlahrung viau mah ila ka be ta lo law law. Chawhmeh inchhuang chu ka vil zawm a, siam belh tur ka dap a, nizan lamah sanghaṭin kan ei bang deuh nual a, a rin theih mai turah ngai ila, mahse a hlui ngawt hmeh ai chuan chawhmeh dang siam belh ka tum tho.

Alu ka káng a, pa Rinchhana berin a ei duh lo leh si ang tih ka hlau khawp. Ka tho har ve hrim hrim bawk a, thawh hma ka tum tehreng nen, mahse nizan khan ka mengrei deuh hret chu a ni. An pathuma an têi an tei tâkah chuan tui pawh an chawi ngah thuai a, ka naute pahnihin pa Rinchhana an nêl ta viau chu ka hrethiam lo lek lek. Chaw kan ei lai te chuan Hmingan a be deuh reng a, pakhat lahin tawi tê tê hian a chhang thung a, Rengtei pawh a bang chuang lo. A ṭawng siam siam a, keimah ber chu chaw ei chhung zawngin a ngawiah ka ṭang tluan zak a, chaw kan ei kham hnuah pawh ka la ṭawng lo hrim hrim. Rengtei school kal tur chuan min biak lawk a duh thu a sawi a, pawn lamah ka zui chhuak ve nghal mai bawk.

"En teh maw u, tukin khan pa Rinchhanan a sawi a, mahse nang chu i lo la tho lo. Aizawla kan school kalna tur a biak fel tawh thu min hrilh a, pa Rinchhana hi a mak ê, upat hmel viau tawh mah se a fel ka ti. Hminga paw'n Aizawla awm a châk hmel tawp, e chuan maw, kan awmna tur nen lam min ngaihtuahsak vek tawh, vawiinah a haw chhuk hma lawmthu lo sawi ngei ngei rawh aw" Rengtei ṭawng chhung zawng chuan ka ngawi reng a, kan unau laka pa Rinchhana chet dan chu hriatthiam a har tak zet, min khawngaih vang a nih ka ring ber tawh. 

"Fimkhur la aw" tiin kan inthlah liam a, in chhungah lutin pa Rinchhana hmel ka hmu zawm zat a, a kamis chung lam kawrkilh pahnih inkilh lo kara a âwm lang chuan ka mit a lá ru em em leh nghal.

"Dar engzatah nge chhuah i tum?" ka tih chuan min rawn en a, a sana bun lai en zawkin ka lam a lo hawi leh a, kei erawh ka hawi sawn daih thung. 

"Ka rualin chhuk nghal mai ula a ṭhat ka ring" ka en nghal thuai a, min en lovin a kawrkilh chu a lo kilh ṭha mawlh mawlh tawh a, chhan dan tur pawh ka hre rih lo.

"In awmna tur pawh ka ngaihtuah fel tawh" a ti leh a, kawngka bulah dingin tile bang chu ka ngheng a, a ruala chhuk leh chhuk loh chuan ka rilru a tibuai leh ta khawp. 

"Sawi lo mah la min khawngaih tih chu ka hrethiam a, mahse engati nge heti ang em ema min puih kher i tum? Kan lawm lo lam ni lovin, a chhan tal ka hre duh a ni. I dawrah min thawhtir i tum a, kan in luah tur nen lam i lo ngaihtuah fel vek tawh bawk a, a chhan min hrilh thei ang em?" ka tih chuan min en chung hian

"Aizawl thleng thla phawt ila, ka puih chhan che u dik tak ka hrilh dawn che a nia" a rawn ti a, a inha ṭha zui mawlh mawlh a, a insiam zo titih chu a ni mai. 

"Engtika chhuk nge i tih? Eng pawh ni se, ka naute pahnih hma hun ka ngaihtuah tho bawk nen kan zui thla phawt che ang a, a theih ang ângin keini unau min puihna hi kan rul leh ngei ang che" ka thusawi chu a bengkhawn zawng tak a ni mahna min en chiang hle. 

"Rulh ka phut lo tih hre reng rawh, i naute pahnih school bâng lo haw phawt se, kan chhuk ang" a ti deuh hmuk a, a hma ai a ṭawngkam chhuak chu hriat a nuam lo va, a thinrim ni maiin ka hria.

Kal sawnin tih tur dang awm chu ka ti zung zung a, vawiin la láa kan chhuk dawn a nih si chuan engmah ka la insiam fel hleinem. Ka naute thawmhnaw chu ka khung felsak thlap a, bag erawh kan ngah deuh ta a ni. Amah pa Rinchhana ber paw'n min tihpui ve a, mahse vawi khat mah kan inbe leh tawh lo. Ngawi reng hian a thingpui in tur ka siamsak a, ka pe a, a in ve mai bawk a, kan innêl tawn lo ve chiang a ni. Keimah tak hi chuan hmân ang thovin ka zah a, ka zahna chu awlsam takin a reh thei mai lo leh nghal. Kan harsat laia min puitu a nih mai bakah kan hma hun tiêng thei tur khawpin min puih a la tum leh zel a, keini tan chuan han zah loh ngawt chi a ni lo a ni.

Tlai lamah ka naute pahnih school bâng an lo haw a, kan tum angin thil a kal lo chiang hle. Keimah ber pawh ka tlaw hrim hrim, awlsam taka school kalna sawn theih mai tur angin ka ngai ringawt a, ka tawn hnu vek a ni leh nghal, ka ngaihtuah kim lo tak zet. Pa Rinchhana pawh a chhuk loh phah a, a ngaite bawkin chhuatah a mu leh a, a tuk zingah erawh ka tho hmasa ber tawh thung. Ka naute pawh an Principal hnen aṭangin certificate an rawn hawn a, an marksheet ṭhenkhat an lo hawn bawk a, engkim chu pa Rinchhana kutah kan dah tawp a ni ber. Keimahni chenin a lakah kan innghat bur a, zakthlak chu ka ti ve reng, mahse pa Rinchhana chu ka tana Pathian tirh ni maiin ka hre tlat si.

Rengtei leh Hminga chu school an kal lo ta law law a, Aizawl lamah kan chhuk a, a hmaah pa Rinchhana nen kan ṭhu a, a hnungah Rengtei leh Hminga an ṭhu bawk a, kan bâwr thla ang reng. Bungrua ni se kan keng thla nual a, mutbu leh eng emaw ni neuh neuh a tam fû a, kan inkeng thla kim thawkhat viau chuan ka hria. Doro-i pawh ka bia a, kan chhuk thu te ka hrilh a, min hmuh a châk tawh thu a sawi a, mahse kan awm dan tur ka sawi chiah chu mak a ti teh e. Kan chawlh lai a ni a, ni lo se chuan mi dang awm laiin ka sawi ngam teuh lo mai. A bikin pa Rinchhana ber kher kan bél tur chu mak a ti a, ka hnathawh lai nen lam ka bâng vek dawn bawk si a, mak a ti pawh chu a àwm ve tho. 

Aizawl kan thleng a, kan in luah tur awmna lamah kan tlan tlang nghal a, a zauin a changkang khawp mai. Luah man a to ka ring em em bawk a, kan inchawm zo lo mai ang tih ka hlau hle. Mutbu te chu keng thla ve teh mah ila hmanna tur em em a awm hran lo, a chhan chu a awm sa vek a, kan mutbu ai mahin a thianghlim zawk a, a felfai zawk bawk a, kan inkeng thla thlawn a ni ber. Pa Rinchhana chuan kan in kawngka kalh dan te, hmanraw hman dan tur thlengin min hrilh nghal vek a, kan zingah zanriah a ei bawk a, zan dar 8 dâwnah a haw ve thei chauh. Doro-i ka be nghal a, kan in luah thara min lo zawm turin ka hrilh a, mahni chauha in luah hran zawng a ngaihṭhat thlak loh êm mai.

Doro-i chu a lo lêng phei ta ngei a, a nîtei te kan be nghal a, Doro-i berin kan bula awm a hreh lo bawk nen in inluah ṭawm chu an lo phal khawp mai. Doro-i chu a riak ve nghal daih a, ka naute nen hian an innêl em em a, an infiam bawrh bawrh a, Hminga nen phei chuan an inngam ang reng. A tukah chuan pa Rinchhan hmel kan hmu hma hle a, school kalna tur buaipuiin Hminga leh Rengtei a hruai chhuak a, kei leh Doro-i erawh dawrah kan kal thung a, ka bàn dawn thu leh dawr danga ka thawh tawh dawn thu kan pu hrilh ka duh vang a ni pakhat. Dawr kan va thleng a, kan pu chuan min lo lawm thiam khawp a, ka bân tur thu a hriat tâkah chuan min ui hle a, mahse rilru zau tak hian ka duhna hmuna ka thawh theih thu a sawi thung a, ka rilru a nuam huai thei.

Aizawl kan thlen thlak aṭanga ni hnih hnuah chuan pa Rinchhana dawrah ka thawk ṭan a, dawr pangngai leh restaurant dawr bawk a ni dawn emaw ka tih laiin showroom deuh reuh hi a ni a, CITY CAR BAZAR & RENTAL neitu a ni tih ka hre ve chiah. Ka thawhna chu a changkang em em a, a faiin a thianghlim hle a, ka thawhpuite nen chuan kan inthlau vawng vawng khawp mai. Kan incheinaah leh kan hmel hrim hrimah ka inang lo hle a, anni chu khawpuimi tih hriat tak hian inchei an inhmeh em em a, an incheina pawh a hniam hran lo. A ṭawngkam te, an nuih dan te, an nungchang hrim hrim chu a khawpui zia ngawih ngawih. Chu tak chu ka inthlahrunna chhan pawh a ni chiah reng a, a hmeia pain tûma'n min be duh lo nghe nghe.

Tlai dar 4 velah keimahni bik kan bâng a, hnathawk dang erawh an la awm ṭhup a, kei phei chu pa Rinchhanan min hruai haw daih a, ka thawhpuite chuan min en duh hlawm teh e. Kei paw'n mak ka ti ve tho, min hruai kher ngai lovin ka haw ve thei reng a, bus paw'n ka haw thei reng, mahse min hruai chu ka sawisel pawh a ni lo, ka duh lo pawh a ni chuang lo. Ni lo, tlêm chuan ka duh lo deuh leh si, a chhan chu amah a zahawm khep khup si a, a lakah ka inthlahrung a ni. Kan in kawt thleng min thlah a, Doro-i kan bula a awm ve daih thu te ka hrilh ve luam a, a tirah kha chuan ka hrilh ṭha ngam lutuk lo, mahse engkim min buaipuisaktu a ni tlat a, a lakah chuan zep neih emaw dawt sawi ka tum hauh lo.

Ka ṭawng deuh lûam tak ná a, ṭawngkâa chhanna erawh pakhat mah ka dawng lo va, min buk khum zeuh loh leh a ngawi tawp a, mahse chu chu a mizia ve reng a ni tih ka hre bel tawh a, huat enah pawh ka en lo hrim hrim. A haw tlang tura ka ngaih laiin a lo peng lut a, Rengtei te unau school an bâng tawh bawk a, thingpui siamsak a tum chu a duh der lo. Mak ve tak chu ka thingpui siam chauh hi a in duh ni maiin ka hre tawh, Doro-i siam tak ngial pawh a in ngai lo va, an chhawpsak paw'n a ngai ngaiin a hûng dài vek zel tho. Ka thingpui siam erawh a in har lo em em leh lawi a, ka chhawp rual deuh thaw hian a in nghal mai zel a, kan inhriat tak takna la rei hran lo mah se a thu a duh hle tih leh a luhlul tih thlengin ka hre chiang thawkhat ve tawh hle. 

"U, pa Rinchhana a lo kal" Rengtei lam ka hawi zawk a, kawngka lam ka hawi zawm nghal a, pa Rinchhana ngei mai chu a lo ding ngawi reng a, a dawra ka thawhna pawh kâr 1 a ni ve leh tawh a, ṭawng tam lo viau mah se ka rin phak bakin a fel daih.

"Lo kal rawh, vawiin i kal bik na nge?" ka ti zung zung a, ama'n chawlh min pek miau avangin inrinni tin ka chawl dawn a, chu vanga chawl pawh chu ka ni reng a, ani erawh a chawlh chhan ka hre miah lo. 

"Khawiah nge Hminga?" ka zawhna pawh chhang chuang lovin a ti daih a, Rengtei zawk chuan ngaihsam fê hian

"A inhlawh a, engati nge? Thil hrilh duh i nei em ni? I neih chuan sawi la, kan lo hrilh chhawng mai ang" a lo ti nghal a, pa Rinchhana hmel tak run a hmu ve lo zawk a, kei phei chu min melh no lo hle.

"Naktuk tlaiah ka lo hruai ang che u, inbe lawk ang" tih leh min melh zeuh paha chhuah a rual nghal a, Rengtei lah chu zai rât rat pah hian bathroom-ah a lut daih a, pa Rinchhana min biak duh chhan chu ka ring thiam nghal mai. 

"Tun thla hlawh ka pe lâwk che a ni lo'm ni? Engati nge Hminga chu a inhlawh? Nge i hlawh hi in kham lo zawk?" pawna kan din dun hnu chuan a ti hmuk a, ka va inthlahrung tehreng êm.

"Eng lo a nia, dik tak chuan hrilh rawh i tih kha ka la hrilh lo hrim hrim, ka theihnghilh daih, ka tihpalh a ni" zep awm hauh lovin ka ti ta ringawt a, en pawh ka en ṭha ngam lo. 

"Zaninah lo sawipui ngei ngei tawh ang che, i hlawh hi in khamkhawp lo a nih chuan ka pek belh mai ang che u" a ti chiah chu a lam ka hawi thuai a, ani paw'n min lo en reng tho. 

"A ngai lo, ka tih awmzia chu kan kham lutuk alawm, pek belh kan ngai lo. Ka lo sawipui ngei ngei tawh ang, ka tihpalh a ni e" ka ti vat vat a, tun thla hlawh min pek lâwk nî khan Hminga inhlawh a phal loh thu min hrilh vek tawh a, sawipui turin min ti nghal nghe nghe a, tun thlengin engmah ka la sawipui lo zui, ka thiam loh vek a ni.

"Buaina i nei em?" aw pangngai deuha min be thut chu ka hamhaih hman hle a, mak ka ti bawk a ni ang

"Maw?" ka ti hû a, kan inen chiang dun hle bawk.

"I thawhpuite hnen aṭangin buaina i tâwk em?" a tih leh chuan a zawhna awmzia ka hrethiam ta chiah a, heti ang em ema keini nu leh pa nei tawh lo leh nghal min ngaihtuahtu an awm hi ka ring ngai lo. 

"Tâwk lo ve, eng buaina engmah ka tâwk lo, an fel em em hlawm zawk" ngainatawm taka ka tih chuan

"Dawt sawi a ṭul lo, an fel leh fel loh hre turin in la thawkho tam hleinem" a ti deuh hmuk a, a sawi dik reng, ka ngawi dâk a, an fel leh fel loh ka hre lo tak tak.

"Naktuk chu i hman hûn huna i hruai theih turin kan lo inruahman dawn a nia" ka ti ta daih a, a hma zawn en ngur chung hian a bu nghut a, a lungawi lohna a kiam deuh hlek ka ring ve ringawt.

"Zanah Hminga ṭhiante an nih loh chuan mipa inléng nei lo ula, in tan pawh a him zawk ang. Inlêng innei lo a nih leh dar 9 hnu lamah chuan kawngka kalh tawh ang che, theihnghilh mai mai tawh suh" a awah chuan thinrimna pakhat mah a lang lo va, a duh hunah hi chuan a ṭawng thui ve deuh ṭhin a nih dawn hi!

"Aw le" ka ti ṭha ve mai a, ni dang ang bawkin ngawi reng hian a motor hùnna lamah a kal phei a, a tlan liam chu ka thlir zui vawng vawng a, keini unau tan chuan vantirhkoh a ni ringawt.

In chhungah lutin ei rawng ka bawl mial mial a, Rengtei inbual zo a lo chhuak chiah a, kan awm nuam ve ta lutuk chu a awihawm loh zawk. Kan awm thei ang tih pawh kan rin phak lohna hmunah kan awm ta chu a nia, kan in luah man ni se a sâng em em a, mahse ka hlawh a tam thawkhat bawk a, ka hlawh chanvein kan in luah man a daih a, pa Rinchhana zarah kan khawsak a nuam sawt hle a ni. Chutah Doro-i hlawh a awm bawk a, in luah man min chawipui a, mahse tam tak inpek tir ka duh lo. A thawk hah ve ṭhin hle a, a bán pawh an bâng hma lo ṭhin, chu vang chuan inkhawl se ka duhpui zawk a ni. Ani pawh keini anga nu leh pa nei tawh lo a ni ve tho va, dinhmun inang khata kan awmho vang a ni mahna kan innêl em em a, unau dik tak ang mai kan ni.

Zanah chuan eng eng emaw ni sawiin kan nui ho dar dar a, kan kum a inthlau lutuk lo hlawm bawk a, kan thil sawi duh zawng a inmil hlawm hle. Hminga hi a thil sawi duh zawng leh a nuihpui duh zawng a dang deuh a, ani hi chu mipa a ni tlat a, a awm ve tho. Hmeichhe pathum erawh kan inkawm ngeih hlawm em em a, unau dik tak vek kan ang mah zawk. Dar 10 a ri tawh a, mahse kan la meng kar hlawm a, Doro-in Momo a lo hawn ṭeuh bawk nen thingpui ka lûm hnuhnawh a, zan rei lama thingpui in hi a nuam phian a, ṭha chu ka ti chuang lo, kan ching chho ṭan dawn tlatin ka hria. Kawngka inkik thawmah chuan ka phu deuh zuk a, chuti ang hunah tûma'n kawngka an rawn kik ngai lo miau a, mi dangho lah chu room-ah an awm daih zui, kawngka inkik thawm an hre tawp lo ang.

"Tu nge âw?" kawngka bula ding chungin ka ti thluk deuh duai a, tu nge a nih hriat hma hauhva hawnsak ringawt ka tum teuh lo, kan zingah mipa awm mah se ka hlau ve tho.

"Keimah" titu aw chu ka ngaihtuah chiang a, ka hriat hnu a ang em em leh nghal, pa Rinchhana ni tlatin ka hria. 

"Pa Rinchhan! Nangmah i ni em? Nge ni lo?" ka ti tawp ringawt a, pawn lama mi chuan nelawm fahran lo hian

"Kawngka hi hawng rawh" a ti chhumbung hmuk a, a aw chu ka hriat hnu a ni chiang lutuk, amah pa Rinchhana ngei a ni e.

"Engati nge kawngka i kalh kher?" ka hawnsak rualin a ti nghal a, chiang zet hian min en chhuk run a, mu tho hlim a ang viau leh nghal. 

"Eng lo, nangma'n dar 9 hnu lama kalh turin min tih khâ, tlaiah khan i sawi alawm, eng nge i lo tih dawn reng reng a?" ka tih chuan

"Mi dang nen min ngaih pawlh suh, kan inang lo" tiin in chhungah a lo lut a, a kalna tur ka lo kian ve mai a, mi dang nena ka ngaih pawlh lai awm reng ka hre lo. 

"Thingpui ka lûm asin, i duh ve ang ti raw?" ka ti leh ta daih a, ṭawngkâa mi chhang lovin min buk khum zeuh a, a awm dan aṭang chuan a mood a fuh teh chiam lovin ka hria.

"E hê, i lo lêng elo? Momo kan ei dawn asin, ei ve nghal rawh aw? Eng nge i lo tih dawn a pa Rinchhan?" room aṭanga lo chhuakin Rengtei chuan a ti a, pa Rinchhana a nêl ta lutuk hi a mak zawk, a la rei lo tehreng nen.

"Ka mu thei lo alawm le" a mi biak pa chuan a ti ṭha ve mai bawk a, thil mak ve tak pakhat leh chu, ka biakna aiin Hminga leh Rengtei biakna hi a chhang ṭha duh daih zawkin ka hre ṭhin. 

"Rengte, Momo chu lo chhuang lûm zuaih la, a dái chuan a tui in ti lo ang, pa Rinchhana pawh i lâk kep nghal dawn nia" thingpui chawh pahin ka ti a, Doro-i leh Hming pawh room aṭang an lo chhuak har lo dun hle. 

"I u nen in sawi dun tawh em?" pa Rinchhana chuan Hminga a en ran a, Hminga pawh bu zeuhin

"Sawi dun tawh e, mahse intûak ve te ka duh a, inhlawhna tur a awm chuan inrinni hi chu inhlawh ka duh asin, inhlawhna ka hmu reng dawn tihna pawh a ni chuang lo va" a ti ve niah niah a, ka sawi thiam lo, thisen zawmpui dik tak inkawm khawm an ang ka ti ber.

"A nih chuan ka nau hian in a sa mêk a, chutah chuan inrinni tin i thawk duh ang em?" a ti leh ang lawi a, tlai lamah te kha chuan inhlawh phal lo bur ang khan a awm reng sia, ka en deuh hû ringawt. 

"Duh tehreng mai, mahse Helper bak ka la ni pha lo, cement work phei chu ka la zei lo lutuk. Chuan i nau chuan Vai mistiri a chawr êm? Chhawrtir miah suh, Mizo chhawrtir zawk rawh, Vai chu maw an phakar reuh lutuk, kan khuaa kan kan school saknaah ka thawhpui tawh alawm, ho tê pawh hi darkar chuang thawh an thiam khawp mai" Hminga chu a ṭawng duh ta viau. 

"An chhawr ngei kha le" pa Rinchhana chuan a ti ve sup a, engmah a sawi zawm chuang lem hlei lo va, Hminga pawh chuti tho.

"Thingpui a in theih e" tiin an ṭhut khawmna lam chu ka pan a, tray-in ka chawi phei a, pa Rinchhana chu a hmaah ka húnsak a, mi dang erawh chuan anmahni ta tur ṭheuh an la thung. 

Rengtei chu che chhuakin Momo chhuan lûm a va la a, kan ṭhutna bul dawhkan têah a chhawp hnuk a, a tam ang reng, kan puar ṭawk dawn a nih hmel. Pa Rinchhana ber chu mak ka ti leh tlat tawh, a sirah ka ṭhu a, a bul bak ṭhutna tur dang awm hek lo. Tui tih hmel deuh hian Momo chu a ei ve a, thingpui a in bawk a, ka lá leh turin a kut ka va tawk chu engtin emaw ni hian ka awm a, ka zâm nge pawh ka hre lo, mahse ka taksa awm dan erawh a danglam ṭhin tih ka hre chiang hle thung. Amah paw'n min rawn en zawk a, kei chuan ka en rei hran lo, ama'n min ei rei ta a ni. Mi dang pathum lah chu an thil ei lai chiah an ngaihsak hlawm a, ka khuh kharh kharh hnuah erawh pa Rinchhana chu a hawi sawn ve hram. 

Dar 11 dâwnah daih pa Rinchhana chu a haw a, a mu thei lo tak tak a nih ka ring, zan rei tawh lamah pawh a la meng fiah êm mai. A haw hnu chuan kawngka kalh ṭhain kan mu zui nghal a, khum hranah ṭheuh kan mu a, kan in luah hi chu a changkang ve chiang a ni. Zing khua a vâr a, Pathianni a ni a, kan naupan têt aṭanga kan tih ṭhin angin tukṭhuan ei dawnah hun kan hmang a, Pathian hnenah lawmthu ka sawi deuh reng mai. Sawi reng tur pawh ka ni hrim hrim, kawng engkima min ngaihtuahtu pa Rinchhana hming ka chham tel nghe nghe a, Pathianin keiniho tana pa Rinchhan ang mipa a lo tir chu ka lawm tak zet a ni.

Hun ka hman zawh chuan chaw kan ei a, hmeichhia a tam zawk kan ni bawk a, chaw ei lai te chuan kan ṭawng deuh char char a, chaw ei khamah inkhawm turin kan insiam nghal bawk a, inkhawm hi chu hmaih thiang loh a ni tawp mai. Khawpui lama kan inkhawm dan hi chu a dang deuh a, thingtlang nen a kalhmang inang lo a tam hle. Mi ṭhenkhat erawh an incheina a sâng mah mah ka ti ṭhin, mahse sawisel thei ka ni ngawt lo. Anni chu an hausa a ni mai, a ni loh paw'n an inhmel tal a, keini te chuan an thawmhnaw inbel ang ha ve ta ila kan inhmeh kher lo ang. Inkhawm kan bâng a, hmel hriat leh chhung tih vel kan nei lo bawk nen inah kan awm ṭhap a, chawhnu lamah erawh chhuak turin kan insiam thung.

Dar 3 a rik chuan pa Rinchhana hmel kan hmu a, kâr tir khan min hrilh tawh a, chaw eiah min sâwm a, ama min sàwm pawh a ni chiah lo, a nu leh pate'n min sâwm a ni mah zawk. A motor-ah kan chuang a, a hmaah kei leh amah kan chuang a, a hnungah mi dang an chuang bawk a, a hmaa min chuantir bik ziah chu tih ṭhanah an nei ang tih ka hlau, ni lo deuhin thil an ngai kawi awlsam thei hlawm si. Pa Rinchhana te in kan va thleng chu awihawm loh khawpin an in a changkang a, an hausa a, ka in hmuh tawh zawng zawngah a la mawi ber hial ang. Ka bula mite pawh an bang bik chuang lo, an thlir dauh dauh ve tho va, an in chu a mawi êm asin, a mawi mai bakah a ropui tel bawk.

"Motor-ah thil ka theihnghilh, min lo pui lawk teh" kawngkapui zawna kan din lai chuan a ti deuh thut a, ka zui ve mai a, motor hnung lam kawngka chu hawngin thlai hnah hi a la chhuak a, mi pahnih ém kalna atan chuan a ho ka ti ang reng.

"Min hlau tlatin ka hria" kan phei leh nghal mai dawn emaw ka tih laiin min chelh ding a, motor chu ka ngheng a, ani ka hmaah dingin min chhuk melh run a, kan inlen hleih khawp mai.

"Min hlau em?" a rawn ti leh sup a, chhan dan tur ka hre mai lo, ka kut a vawnna chuan ka taksa a tidanglam leh vek tawh a, ka awm dan chu a hma ang bawkin mak ka ti nawn leh ta.

"Phei tawh ila, hetia awm hi a mawi miah lo, kan thil lâk a ho si" ka tih chuan a chal a tichuar nâng a, hawi sawnin a âwm chu ka en reng ringawt a, a bak en vak tur a awm lo, min uap hneh ve êm a ni.

"Min ngaina la ka duh" thum hniam ruiha a ti chiah chu ka en chho leh ta nge nge, a sawi tum leh a sawi chhan pakhat mah ka hre lo va, kan inawm hnaih bawk nen a rim mawlh chuan ka hnar a verh chiang hle a, ka zâm ru bawk si, ka dik lo tulh tulh dawnin ka hria.

"Phei ang" tih leh chet sawn a rual a, a hnungah ka zui phei dat dat a, mi dang chuan kan phei tih lam réng an ngaihsak lo, in leh a vel chu an lo la thlir reng a, ropui an ti ve hle a ni mahna le.

(End of Chapter 3)