LALRINCHHANA HAUHNAR By Havali Adam (CHAPTER 2)

LALRINCHHANA HAUHNAR

By

Havali Adam

Chapter 2

"Engmah" ti thum bulin min thlah a, a awm dan chu ka hrethiam lo kher mai, zâm ru zet hian ka en chho kiau ringawt. 

A inher a, kawngka lam panin a kal nul nûl a, Doro-in kan awm dan leh kan ṭawng chu lo hre pha tak ang maw! Pindanah a awm a, keini choka lamah kan awm thung a, a hre pha maithei, a chhan chu kan in chhung a zau lo ve êm mai. Min ngai eng emaw vek ang tih te, ka laka pa Rinchhana awm dan leh kan inbiak dan aṭang chuan ngaihdan dang a nei ang tih te ka hlau hnuhawh hle a, keimah chu ka dik lo ru ta viau. Kawngka chu pawn lam aṭangin a rawn inpawt hawng a, pa Rinchhana hmel tak run chu ka hmu leh ta, a chhuak daih tawh kha a nia, theihnghilh a nei emaw a ni ngei ang.

"Khawiah nge i haw dawn?" min biak dan teh tawp avang chuan ka en hâw a, chhan mai nachang pawh ka hre lawk lo va, ka ngawih deuh rén ràwn hnuah

"Maw?" ka ti ve thei ta chauh a, mak ka ti em em pakhat chu kan awmna a inhnaih fahran loh tehreng nen min uap pha tlat lawi a, a huhâng chuan min rawn zém pha ka ti mai, ka zâm ru leh er er tawh. 

"Khawi khua nge in nih?" a ti leh hmuk a, a ṭawngkam chhuak tawiin ni deuh hmuk mah se a thinrim chuangin ka hre lo, a ṭawng dan ve hrim hrim a ni zawk. 

"Hortoki" ka tih chuan a dinna ngaia la ding reng chung hian

"Engtik thleng nge i châm dawn?" a rawn tih zawm nghal zat a, a mak ka ti ang reng, a hma zawng khan min zawt thei reng si a, haw a tum tawh hnua chuti ang thu min zawt hnuhnawh leh vak si chu a mizia ngaihtuah phei chuan a mak thlawt a ni.

"Ka hre lo le, sawi tawh angin ka nu a dam lo va, ka châm chen tur ka hre rih mai lo" pangngai tak chuan ka ti ve mai a, amah pawh ka en lem hlei lo va, a hmel chu ka en ṭha ngam lo a ni ber.

A hma ang bawkin a chhuak leh daih a, mize mak tak chu a nei chiang a ni. Mak ka ti tak ná a, a mize ṭhenkhat erawh ka hre nual tawh a, kum 4 zênzâwn a Hostel-ah kan awm a, khatah khan a mize tlangpui chu ka hre hman vek a, mahse hriat loh tam tak ka la neih ka ring. Pindana ka luh chuan Doro-in min lo en kar a, ngaihtuahna dang a pu ngei dawnin ka hria, mahse engmah min zawt lo va, ka thawmhnaw chu kan khung malh malh a, thil dang a sawi ta daih bawk. 

A tukah chuan kan khaw lam panin ka haw a, motor ka rui deuh nghe nghe a, motor ruih hi ka hrat ve ang reng a, chuan fuh tê ka nei te a nih loh chuan ka rui ngei ngei hi a ni tawp. Motor chhungah kan chuanpuipa pakhat hian mei a la zu khu luih luih zui a, a upa tawh a, driver-in han khap deuh ṭhin mah se awmzia a awm lo. Kan khua chu darkar 3 leh a chanve hnu velah kan thleng a, thingtlang tih takah Aizawl angin in ṭha leh building mawi tak tak a awm ve lo va, mahse chu thingtlang khua chu ka pian leh murna ngei a nih avangin ka hmusit lo va, nuam lo ka tih phah lo hrim hrim a, nuam ka ti hle zawk a ni. 

Ka nu hmel ka hmu chu ka inthiam lo em em a, a cherin thisen a nei lo tih hi a hriat ngawih ngawih a, dam ṭha ver vawr thei se ka duh a, mahse chuti ang ngawtin thil a thleng thei rih bik si lo. Ka naute pahnih chu ka thil hawn ka pe a, ka nu tan pawh kawr ka leisak a, dam lo chungin a nui var var a, kei pawh ka nui ve tak ná a, ka nuih a za lo hle. Ka pawisa khawl sa zawng zawng chu ka nu damdawi lei nân te, damdawi in kal nân leh amah enkawl nân ka hmang ta vek a, insenso a ná duh khawp mai. Ni tam a ral hmain ka pawisa khawl sa te chu a zo thuai a, Aizawl lama lêt lehna tur tak ngial pawh ka nei tawh lo, mahse ka nu dinhmun erawh a ṭha chho viau thung.

"Pui, nizanah mi pakhat kha a lo kal leh a, i haw tawh leh tawh loh a rawn ngaihven deuhin ka hria" Doro-i thusawi chu ka hrethiam mai lo, tu nge ka haw leh haw loh lo ngaihven ve ringawt ang ni!

"Tu mi pakhat maw?" ka tih chuan

"I zin hma zana lo leng kha maw le, en teh Pui, a ngaihven tlat chein ka hria, a ṭawng duh lo ve bawk sia máw, nizan te khan vawi khat bak a ṭawng lo, i awmna min zawt a, i la châm thu ka sawi a, a haw leh daih" a rawn ti lûam a, pa Rinchhana a sawi tih ka hre ve nghal mai. 

"Engmah a ni lo vang, a lo kal mai mai a nih dawn chu! Ka lo lêt thei ṭep a nia, ka nu pawh a zia tawh e" tiin thu dangah ka pakai pui a, eng eng emaw kan sawi hnuah kan inbiakna chu kan ti tawp zui bawk.

Zanah chuan ka nu taksa a chak lo thut a, ka va han buai phili mai mai tak ém. A khua a rawn sik a, a tlun char char a, ka khawngaih bawk si, engmah tih theih ka nei thei bawk si lo chu ṭah tawp mai ka duh. Ka nau pawisa khawl tlem azawng a la awm a, ka nu inenkawl na tur a daih dawn lo tih ka chiang, chu vanga mangang ru em em pawh chu ka ni. Kan khaw sumo-in damdawi in ṭha zawk lamah kan inphur phei a, Doro-i chu a pawisa puksak lawk tumin ka call a, mahse a mu tawh a ni ang a la thei lo. Zan tlai ve tawh tak a ni a, mu tawh pawh ni se a awm tho e.

Ka naute pahnih chu an muhil a, kei erawh ka tlaivar ta ṭhak thung a, ka pa ka ngai hle bawk. Mipa tal ni ila chuan a zia ang maw le, hna ka thawk bawrh bawrh ang a, cement work thlengin thawh hreh ka nei hauh lo ang. Tin, pawisa pawh ka la lut hnem zawk ngei ang a, ka nu enkawlna tur pawisa ka thawk chhuak chiang khawp ang. Ka phone chu a nghawr dat dat a, ka phawrh rualin a tawp hman chiah chiah a, number lawng aṭangin a ni a, ka call back duh ta lo. Ka nu chu zing dar 9 velah a rawn harh a, doctor paw'n a ngaihven viau a, keini a fate tak paw'n kan ngaihven hle. 

Doro-i chu ka be ta ngei a, damdawi in luh man pek tur kan neih daih loh avangin pawisa puk ka dil a, a lo phal khawp mai. Ka nu pawh a dinhmun a ṭhat leh tawh avangin chawhnu lamah kan chhuak a, kan in kawta car pawl lo ding váng chu mak ka ti ang reng. Ka en zeuh zeuh a, a glass a dum vek avangin a chhungah mi an chuang em tih ka hre thei lo. Chu bakah va bih dûk duk kha a mawi chiah lo ve bawk a, a chhungah mi an lo chuan phei chuan zahna a ni mai. In chhung kan lut fel a, ka phone a rawn ri râl ral a, number lawng bawk a ni leh a, zing lama mi kha a niin ka hria. 

"Hello" ka tih rualin a off nghal daih a, ka phone chu ka en ngawt ngawt a, signal emaw network a bo ti dawn ila a ni hauh si lo. 

"Lo lut rawh" kan in kawngka inkik ri ka hriat rualin ka nau chuan a ti nghal a, ka nu khumaah kan mut fel tawh tho bawk nen kei pawh chu pindan aṭangin ka chhuak ve mai a, ka mi hmuh avang chuan ka ding chiang hle. 

"Eng nge i duh a ka pu?" ka nau Rengtei bawk chuan a ti leh a, a biak pa erawh ka lam a rawn hawi ngar ngar a, engtin nge kan in awmna a hriat ka hre hauh lo. 

"Eng nge i lo tih dawn?" min en reng bawk si a, be lova ngawih reng ringawt zawng a dik lo a ni. 

"Ka tih awmzia chu lo lut rawh, lo lut rawh" ka ti hnuhnawh leh a, ka biak dan teh tawp chu a hawihhawm lo ve êm alawm, chu bakah lo kal chhan a nei turah ka ngai ve hmiah.

"Engtikah nge Aizawlah i lo lêt dawn?" ṭhutthlenga a ṭhut fel hnu chuan a rawn ti a, a ṭawngkam chhuak a thum chhahin a pangngai fû a, ṭum danga a ṭawng dan angin a ni hmuk miah lo. 

"Ka hre lo le, ka nu hi ka awmpui deuh phawt ang a, a ṭhat hunah ka lêt chauh ang ka ring, a nih loh paw'n ka lêt tawh kher lo maithei bawk" min en nghal run a, ka hawi sawn daih a, Aizawl lama lêt leh ka tum em em tawh lo tak tak. 

"I nu chu a ṭha lo viau em ni?" pangngai deuh deuha min bia chu a awihawm loh zawk lek lêk a ni. 

"Nizan kha chuan a ṭha lutuk lo va, tunah erawh a zia leh tawh viau, thingpui lo lúm sak la Rengte" ka nau chu ka biak zawm zat a, mahse ka hmaa mi chuan

"Ka in châk lo" a lo ti thung a, Rengtei pawh choka lamah kal ta lo chuan pindanah a lut ve leh mai a, kan naupang ber Hminga a chhuak lawk bawk si a, pa Rinchhana nen tlawng kan awm dun ta ran mai.

"Eng nge i lo tih dawn a?" ka tih chuan 

"I nu dinhmun hi eng chiah nge?" tiin zawhna min zawt lêt thung a, ka en zawk a, ka en rei lém lo, mi a en deuh run ṭhin bawk si a, dik tak chuan ka awm a nuam lo ṭhin.

"A ṭha lutuk lo, Septicemia a nih thu doctor-in a sawi a, mahse Pathian zarah a dam ṭha ve leh mai ang" ka ṭawngkam chhuak reng reng chu zám ru viau e ti lo chuan a tluangtlam phian lawi a, a bulah hi chuan engtin emaw ni ka awm tlat zel. 

"Ka lo kal lawk maw le" kan ngawih dun vang vang hnu chuan a rawn ti a, kan in chhung chu a en kual dân dan a, a chet dan te, a ṭawng dan te, amah hrim hrim chu ni dang a ang lo tak zet.

Kan ṭhu ngawi rei dun tlawk tlawk bawk nen thingpui ka lûm a, a duh loh thu leh a in châk loh thu pawh a sawi miah lo. Rengtein lúmsak a tum lai khan a duh tawp si lo va, thingpui ka pek lai te chuan in châk hmel deuh hian a lo ban leh ang lawi a, min en run tawh lo va, a zia hrim hrim e. Dar 4 velah pawh kan in chhungah a la ṭhu ngawi ve reng a, tawi tê têin kan inbe zeuh zeuh tih loh chu kan ṭawng lo tluk a ni. Chu bakah ngawi rengin a ṭhu rei thei zawk hi ka tia, amah chauh paw'n awm se a tlei viau ang ka ring. Ei rawng ka bawl zo ṭep tawh tihah Rengtei chuan ka nu a khua a sik thu a rawn sawi a, ka ei rawng bawl lai pawh ka ngaihsak tawh lo. 

Ka nu chu rei lo tê hnuah a luak ta bawrh bawrh mai, thla a va han muang lo duh tak êm. Pa Rinchhana motor-in damdawi in ṭha zawk lam ka pan thuai a, awm lo se chu mang a ang zual khawp ang. Damdawi in kan thleng a, doctor-in ka nu chu a buaipui zui nghal mawlh mawlh a, Rengtei phei chu a ṭap tawp ringawt. Ka kuah a, Hminga leh pa Rinchhana erawh an ngawi reng a, ka nu dinhmun ṭha lo tluang lutuk chu a hahthlak a ni. Doctor chuan a thisen a hniam thu a sawi a, a hniam dan lah chu a hlauhawm em em a, ka nu chuan min kalsan ang tih ka hlau tak zet.

Zan lai dar 12 a pel fel âwrh tihah ka hlauhthawn ang ngeiin ka nu chuan min peih loh san ta nge nge a, ka nâ lutuk chu ka ṭap lawk thei lo va, ka inring hman lo a ni ber. Rengtei a ṭap tlawk tlawk a, Hminga a ṭap bawk a, kei erawh ka la ṭap ve thei tlat lo. Ka nu thihna chu ka awih lo va, awih ka duh lo va, mahse kan khaw lama a ruang kan phur haw chiah chu awih loh theih a ni ta lo. Khaw chhung kan lut a, khawtlang mipuiin min lo hmuak ṭhap a, ka nu a thih tih an hriat dan ka hre miah lo, Hmingan a ṭhiante a hrilh ang a, chuta ṭang chuan an lo hria a ni maithei. 

Ka nu chhungte leh ka pa chhungte pawh an rawn lang sap sap a, ka huatna a zual hle. Va pawh ngamin an awm ngai lo va, kan unau tan kan têt tê aṭang tawh belh tlakin an awm ngai lo va, ka nu leh pa phei chu an chhungte dik tak ang lo maiin an en ṭhin. Chu vangin hnaih buai kan tum lo bur a, pawisa kan neih loh lai pawh khan Doro-i pawisa puk ka duh zawk a nih kha! Ka nu leh pa chhungte hi keini tan chuan chhungte tih tlak an ni lo, an ni ngai lo hrim hrim. Ka nu kan chân ta bawk nen ka dinhmun leh ka mawhphurhna sánzia ka hriat belhchhah a, ka hma hun chu a thim vekin ka hria. 

A tukah chuan ka nu kan vui liam a, ka thawhpuite an lo kal kim vek a, kan pu thlengin an lo kal a, Doro-i phei chuan min khawngaih hle. Pa Rinchhana hmel erawh ka hmu leh tawh miah lo va, a Car pawh ka hmu tawh lo, a haw daih a ni maithei. Ka tawt em em a, ka rilru a nâ a, mi min biakna pawh ka chhang ṭha peih tak tak lo. Ka naute pahnih chu an puitling ka ti phian a, a hun laiin ṭap mah se mi biakna an chhang thei leh vek tawh a, an tuar thiam em em a, keimah ber; a upa ber si chu ka awm dan a puitling lo hle. Kan dawr neitupa chuan pawisa min pe a, duh loh pawh ka sawi lo, ka ṭawng châk rih lo a ni ber e.

"Eng nge i tih?" aw lo chhuahna lam chu hmanhmawh lo fê hian ka hawi riai riai a, pa Rinchhana hmel chu hmuh ka inbeisei tawh miah lo, ka awmna a rawn hre chat ṭhin chu mak ka ti bawk.

"Dampui?" ka bul lawkah a rawn ding tawh a, kei erawh ka ṭhut ngaiin ka la ṭhu reng a, ka hmaa tlâng; nî êng avanga pâw ruai te chu ka thlir tlawk tlawk a, kut lian leh lum vung vungin ka kut a rawn si chiah chu ka mur chiang teh e. 

"I ṭah a chhuak a nih kha!" min en run chung hian a ti sup a, a hmel rumin tak run mah se a aw erawh a dam thum chhal thung a, ding lovin ka bulah a rawn ṭhu tawh nghe nghe a, ka hmel aṭangin ka ṭah a chhuak tih a hre thei a ni mahna le.

"Thil i ei tawh em?" zawhna min zawh rualin ka mittui tling pam chu a baw ta zawih a, ka ṭah a chhuak zual em em a, a chhan ka hre lo, ka hre bik miah lo tak tak. 

Che hrutin a âwmah min kuah bet a, kan ṭhut dan rem chiah lo mah se min kuah bet hneh hle a, ka ṭap chhuak ta feih feih bawk. Hahdam ruk riauna leh thlamuanna ruk riauna hi ka nei tlat a, a taksa khauh ṭung chu ka ngheng ar ar a, ka ṭah chhuak insum zo tawh lo chu zah ka hre tawh lo a ni ber. Ani lahin ka tal chhuah hlau tak ang mai hian min kuah hneh em em bawk si, ka ṭah chhuak zawng zawng chu ka bun ruak ta vek a, ka thawl hawk a, mak tak maiin ka ipikna te leh ka rilru nât em emna te chu a bo duak a, ka chhia leh ṭha hriatna a rawn lêt leh chiah chu ka inla hrang rang hle.

"Ka tihpalh, min hrethiam teh" ka tih chuan ngawi reng hian min en a, ka kut pawh a vuan tawh lo va, ka zâmna te chu an lo lêt leh tawh ni maiin ka hria. 

"Dampui" chuti ang chuan tûma'n min la ko ngai miah lo, ani ber kherin min ko chu a dan a dang zual. 

"Engmah i la ei hauh lo" a tih chuan ka melh zawk a, ka hawi sawn leh nghal thuai a, ka en rei ngam thlawt lo ṭhin. 

"Nichin lawka ka awm dan avang khan i mi hriatthiamna ka dil e" tia thawh ka tum chu ka bân rekah a chelh a, ka ṭhu thla leh chiang teh e.

"Pa Rinchhan" ka ti hluai a, a lama min pawt hnai thut chu mak ti zetin ka en chho kar a, kan inhnaih bawk nen ka zâm dan chu pui tak a ni. 

"Ka rilrua i awm reng chhan hi ka hre lo" a ti sup a, ka khabe a chawi chiah chu ka thin a phu dawt dawt a, kan inen hnai si, a thaw rim te chu ka hre pha vek tawh. 

"Pa Rinchhan" ka ṭawng zawh rualin ka chalah a rawn fawp a nih chu! Nasa takin ka mur chhuak vek a, a hrawk bawk che ralh chu ka hmuh theih awm chhun a ni mai.

"Heti laia i awm reng hi a mawi lo, i naute an ngaihtuahawm" dam tak leh thum chhah ṭha tak hian a ti hniam ruih a, chiang takin kan inmelh ran bawk a, sawi tur ka hre lo hrim hrim. 

A thawh rualin min pawt ding ve nghal a, ka bân rekah ni lovin ka kutah ngei chuan a vuan a, min kai a, a car hunna lamah min hruai a, ka rilruah eng thil dang mah a awm thei rih lo; amah tih chauh lo chu! Car-a kan chuan luh hnuah pawh ka la ngawi reng a, ka kut a vuan tawh lém lo va, ka thin phu erawh a la rang ṭha dawt dawt hle thung. A hre thei hial ang ka ring, a phu nasa ém mai. Kan inbe bawk si lo nen a thusawi ka ngaihtuah lêt a, a sawi dik ka ti thar hle a, a upa ber hmun fianrial lamah ka awm daih a, ka naute tan a hrilhhai thlak dawn lutuk tlat.

Kan in kawtah kan ding a, kan inbe leh tawh lo hrim hrim a, khaw dang aṭanga ka nu ṭhiante leh amah hretu te pawh an lo kal nual a, tawrhpuina thu an chhah chhuah lai te chuan pangngai takin ka chhang a, ka nu thihna chu tuarin hrehawm ti em em mah ila ka awm dan a dik chho ṭan a, ka ṭah chhuak zualpui a reh tawh vangah ka ngai tawp. Zanah chuan inlêng kan nei nual a, pa Rinchhana hmel ka hmu leh tawh lo va, ngaihtuah pawh ka ngaihtuah thui peih lo. Doro-i chu ka bulah a awm chawt a, ka rilru hah reng hlauvin min be siam siam a, ka naute nen pawh an innêl har hran lo.

Ka nu thih aṭangin kâr khat a liam a, Aizawlah ka la lêt leh ta miah lo va, ka hna aṭang ka bâng pawh a ni chuang lo, ka lêt lo ve tawp. Doro-i erawh a lêt leh tawh a, kan thawhna dawr neitu'n lêt tura a tih vang a ni hrim hrim a, kan pu chuan ka duh hûn huna zawm turin min ti bawk. Ka naute pawh school an kal leh ṭan tawh a, ka rilru a buai ru ta khawp mai. Ka mawhphurhna a sâng sawt a, ka tih ngei ngei ngai a ni tih ka hria, ka tlin lo palh ang tih erawh ka hlau khawp mai. Aizawlah hna thawkin awm leh dawn ta ila ka naute an pahnih chauha awm turin ka ngaingam bawk si lo, hna thawk lova awm ringawt lah pawisa kan mamawhna a sâng si, ka rilru chu a buai ve tak zet.

"Lo lut rawh" kawngka inkik thawm ka hriat rualin ka ti nghal lang lâng a, kawngka hawnga kan in chhung lo lut mêk erawh ka mihring beisei loh tak a ni thung. 

"Eng nge i lo tih dawn?" hawihawm lo zet hian ka ti tawl a, min en deuh run a, mahse a thinrim lo tih ka hria, thinrim chhan tur pawh a nei lo, a hmel ve hrim hrim a ni zawk.

"Thil sawipui duh che ka nei" a tih chuan sawi mai tur ka hre lo, chhang lêt lawk lovin ka en deuh hâ a, ṭhutthlengah ṭhuin banga thlalak intar vel chu a en dên den a, eng thil nge min sawipui a duh chu ka hre hauh lo bawk. 

"Aizawlah lêt leh i tum em?" zawhnaa mi biak hi chu a uar tih ka hre ve tawh a, ngaiah neih mai a ṭha zawkin ka hria. 

"Ka hre lo le, ka lêt tawh kher lo maithei" ka tih chuan

"Eng vangin?" a rawn ti nghal a, chiang deuh hian min en a, kan in chhung mah ni se ka en ṭha ngam leh ta hauh lo mai.

"Ka naute hi ka ngaihtuah ve an ngai tawh alawm, Aizawla awm bo san leh ringawt hi ṭha ber lo a ni" pangngai deuh hian ka ti ve mai a, min en reng tih ka hria, mahse a lam ka hawi tawh lo hrim hrim. 

"Ka thusawi hi ngun takin ngaithla rawh Dampui" ka en zawk a, ka hawi sawn leh nghal thuai a, ka hming a lam hian engtin emaw ni ka awm tlat zel. 

"Ka dawrah lo thawk rawh, i thawhna hmasa lêta tam i hlawh ang" pa Rinchhana chu ka en lo thei ta lo, eng vanga min sawm nge a nih ka hre lo va, chutah a la thutak hmel em em zui.

"Ka sawi vek tawh khâ, Aizawl lama ka lêt leh paw'n ka naute zirna vang chauh a nih tawh ka ring. Chuti maia lêt leh awlsam a ni hleinem, i hrethiam lo a nih kha" ka tih chuan

"Ngaithla teh" ti thum chhal hian ka dar tawn tawnah a chelh a, ka ṭhutna bulah a rawn awm phei leh daih tawh a, a lam ka hawi tlêm vang a ni mahna a lo tawlh phei lai pawh ka hre lo. 

"I thawh mêkna dawrah hian thawk tawh suh, ka dawrah lo thawk zawk rawh, i inchhir lo ang. Hlawh pawh a ṭha dawn, i naute pawh Aizawlah an zirna i chhunzawm tir vek thei ang, chuti ang khawp chuan hlawh ka pe ṭha ang che" a ti thum bul bul a, ka hriat tawhah a ṭawng sei ber a ni hial ang.

"Eng vangin nge heti ang hian kan unau lakah i awm? Eng vangin nge i dawrah chuan thawh tir min duh chhan? Min khawngaih em ni?" ka aw chu a zuai raih a, min khawngaih pawh ni se awm ka ti viau tho. 

"Khawngaih vang lam a ni lo, thawk la a ni mai" a ti nghut a, ka lu ka thing vat thung a, a hmel aṭang chuan a lung a awi loh hmel khawp mai. 

"Ka lawm hrim hrim e, min duhsak a, chaw lo ei ve nghal ta che, i duh zawng chawhmeh kan hmeh ka ring chuang lo ná a" ka ti ta daih a, zep lovah chuan offer ṭha tak a ni tih ka hre ve reng, hlawh a tam hmel bawk si nen thawh pawh ka hreh em em lo, mahse awlsam takin ka ring nghal ringawt thei lo thung. 

"Lo inngaihtuah ang che, ka lo kal leh hunah chuan i rilru dik tak min hrilh la, chutah chuan chaw pawh ka ei zawk dawn ni rawh se" tih leh din a rual a, min hnung chhawn zawng hian a chhuak ta nul nul a, ka thlah lo law law. 

Nîin tlâk lam a hnaih a, ka naute pahnih pawh school an rawn bâng a, an fel hi ka ti ve thlawt a ni. Anmahni tâwkah an puitling dun em em a, Hminga phei hi chu mipa a nih vang nge a puitling zual em em a, Rengtei pawh a bang chuang lo. Ei rawng bawl leh in chhung sekrek khawih kawngah min awl hneh em em a, keimah ber hian u nih ka tlin lo ni berin ka hria. Zanriah eina ah pa Rinchhana nena kan inbiak dan chu sawipui ka tum rilru deuh a, mahse an ṭawng duh siam siam bawk si a, kan hlim ho dar dar leh zel bawk nen ka sawi theihnghilh daih. Mut dawnah ka hre chhuak hnuhnawh leh chauh a, a tuka sawipuiah ka dah ta tawp. 

A tukah chuan a ngaite bawkin inah ka awm leh a, pa Rinchhana thusawi chu ka rilruah a awm reng a, ka naute pahnih an lo haw chuan ei rawng bawl pahin ka sawipui ta nge nge. Anni chuan thawk turin min duh viau a, kei tak paw'n thawh hrehna ka nei lém lo, mahse eng emaw a awm palh ang tih ka hlau a ni. A dawra thawk turin min sawm tawp ringawt a, a chhungte paw'n ka thawh an duh kher lo maithei asin, eng pawh ni se ka thawh dawn rau rau chuan zawh chian leh deuh chu a ngai a ni. Ka naute pahnih berin ka thawh pawi an ti lo va, hlawh a ṭha dawn tho bawk nen thawh tumin rilru ka siam fel ta ringawt. 

Ka naute pahnih school kalna tur zawng zawng nen lam ka tum theih vek tur thu kha min hrilh miau a, ka naute lahin Aizawla school kal an châk bawk si, an duh anga awm leh thutlukna siam chu a fuh berin ka hria. Zirtawpni tlaiah pa Rinchhana hmel ka hmu leh a, ka naute school bán hma hian a lo kal ve ziah a, kal hun a hria ka ti viau mai. Kan in chhunga a lo luh tirh chuan a ze ngai te bawk hian engmah a sawi lo va, a lo lut tawp a, biak vak ngaihna ka hre ṭhin lo. Ei rawng bawlsan ka tum a, mahse a la hma ang reng bawk si, zep lovah chuan a bula awm chu a zámawm ka ti ru ṭhin, min uap churh ni mai hian ka hria.

"I ngaihdan i siam fel tawh em?" a tawpa tawpah chuan min zawt ta nge nge alawm, mahse min en chuang miah lo. 

"I dawra thawk turin min ti ringawt a, hnathawk tur i mamawh nge min khawngaih avangin min thawh luih tir dawn?" chu thil chu ka hriat châk ber te zinga mi pakhat a ni. 

"Chu lam zawng i hriat a ngai hran lo, ka thu awih tawp mai rawh, hlauhthawn tur a awm lo" min chhan dan chu a lungawi thlak lem loh hle mai.

"I chhungte'n hemi chungchang hi an hre ve em? Hei tal hi chu i sawi ka phut ve e, lungmuang taka ka thawh theih nân" ka ti leh hram a, a hne hmel hle leh nghal. 

"An hria alawm, kan inbiak hmasak tlai khan ka hrilh vek tawh" a tih chuan ka awm pawh a nuam deuh, a chhungte hriatpuina tel miah lova thawh ringawt zawng thil dik a ni lo tlat.

"Eng nge chawhmeh i siam dawn?" a zawhna min zawh ber kher chu mak ti tak ka ni, ka hawi hû mai.

"Maw?" ka ti deuh tawp a, chal tichuar náng hian min chhuk melh run a, hawi sawnin a zawhna awmzia ka ngaihtuah chiang a, ka hre chhuak rang teh e.

"E...aw....eng lo, ka hre lo, sanghaṭin i duh ang em? Eng nge kan hmeh ang?" ka ti bah nawk nawk a, ka che reng reng chu a lái vel vek a, ni dang ai a mi uap chu a ná zualin ka hria. 

"A tui ang" ti supin kawngka lam a pan a, ngawi reng hian a chhuak daih a, veranda-ah chhuak nghalin a kalna lam ka en zui a, dawrah a kal dawn a nih ka ring, a motor pawh a khalh chhuak hleinem. 

Dawr aṭanga lo lêtin sanghaṭin bur thum lai mai hi a rawn keng phei a, ṭul ka va'n ti lo tak, a inthlahrunawm bawk. In chhungah lutin ngawi reng hian a che a, chemtê a zawng a, a hmu mai a, sanghaṭin chu awlsam tê hian a hawng zung zung a, a chet dan vel chu ei rawng bawl thiam a ang ka ti, nge a lo bawl thiam reng zawk. Ka naute pahnih an lo bâng a, kan in chhung ngeia pa Rinchhana che vel an hmu chiah chu mak an ti ve tho. A mak ve êm asin, khawpui mi a ni a, mipa a ni leh nghal a, sanghaṭin te a siam thiam vek a, a thir bel chhuang lai leh a ei rawng bawl lai hrim hrim chu a mak tawp, thingtlangpa chu ni se ka hrethiam deuh mahna. 

"U, i thawhna tur dawr neitupa chu em ni?" pindana kan awm laiin Rengtei chuan a ti a, engkim kha ka hrilh vek tawh a, an vawi khat inhmuhna a ni lo bawk nen an hrethiam nghal deuh reuh chu a awm ve tho mai. 

"Aw, mahse biak huam huam chi a ni kher lo, chuti ang mi chu a ni paw'n ka hre lo" ka ti ṭha ve mai a, ka thu sawi chu a hre kar dawn tih ka hria, a zawm ngei bawk ang. 

Pa Rinchhana hovin zanriah chu tui takin kan ei a, sanghaṭin pawh a kang tui teh e. A ṭawng duh lo viau e ti lo chuan a ṭawng tawi hmuk hmuk a, Hminga chuan a nêl phian leh nghal. Mipa ve ve an nih vang a ni ang ti dawn ila Rengtei paw'n a nêl tho bawk si, kei erawh ka nêl leh nêl loh pawh ka hre lo, ka zah em em zawk a, a bulah chuan a chhan ka hriat si loh hian ka zám ru er er zel bawk. Chaw kan ei kham a, pawnah a chhuak daih a, a rukin ka thlithlai deuh a, a mei zu lai ka hmuh chuan in chhungah ka lut leh daih. Pawnah chuan a awm ta reng a, a thawm a reh vung vung a, a haw ti dawn ila a motor a la inhung run bawk si, amah chauh paw'n a tlei khawp mai. 

"Naktukah ka lo haw ang, mut tui ule" mipa aw thum bul ka hriat rualin ka ke pen ka tawp chat a, dar 10 a ri dawn hnai a, ngaihven tuma chhuak kha ka nia, a aw ka hre chiah chu luh leh daih ka châk rum rum. 

"Eng nge?" a rawn ti chuan ka phu dâwrh a, min lo en reng tawh chu niin, ka awmna lamah a lo kal phei a, a pa lian bawk si, a va han zâmawm duh mai mai tak. 

"Eng lo, i haw dawn ém? Ka sawi awmzia chu haw i tum ém? Nge riah i tum zawk?" inthlahrung aw zet hian ka ti a, kan indin hlat lo ta viau bawk. 

"Tun ang zanah hian ka haw duh i ring em?" zawhna bawkin min chhang lêt a, ka ngawi kar a, ka awm dan leh kan boruak chu ka sawi thiam chiah lo, a nuam lo ti dawn ila a nuam lo si lo, a nuam ti dawn ila a nuam chuang der si lo.

"Riah ka tum a, a theih ém ang chu!?" tih leh min kal pelh a rual a, in chhungah a lut tlang nghal daih a, a awm dan chu hmâna pa Rinchhana kha a ang tawh lo, mahse amah ngei a la ni a, ka zawhna te chhanga min be ve peih te, a dawra thawk tura min ti leh zel te chu a mak a ni. 

(End of Chapter 2)