KRISMAS CHIBAI (Short Story) By Havali Adam

KRISMAS CHIBAI

By

Havali Adam

November thla tir a ni a, Krismas lam kan hnaih ve tawh tho bawk nen boruak hrim hrim chu a vawt súk a, December thlaah phei chuan a vawt viau ang ka ring. Chawhma lamah nî sa mah se chawhnu lamah erawh a tla hma em em thung a, kan in awmna hian a zir lo hran pa reng reng bawk a, nî hi kan hmu rei tak tak ngai lo. Insuk pho dawn te hian in chung berah chhoh phawt a ngai ṭhin a, in chung bera pho loh chuan a ro kim lo a ni mai. Ni danga ka tih fô ṭhin ang bawkin insuk spin sa nen in chung lamah ka kal chho hnak hnâk a, a rit hran lo, mahse ken a buaithlak thung, kalna tur a zau vak si lo.

In chung zawl ka thlen chuan inpho nghal mai lovin ka ṭhu chawl rih a, ka thawk lak tihhahdam ka duh vang a ni pakhat a, keini ang hmeichhe lian lo tak tan chuan insuk pho tur nena chhoh chu a hahthlak ve êm a ni. Minute 2 vel ka ṭhut hahchawlh hnuah ka inpho ṭan a, ṭum dang ang lo takin inpho tur a tam lém lo va, ka hmanhmawh hran lo bawk. Ka tih tur zawng zawng ka ngaihtuah fel vek tawh a, ka hun hman dan tur nen lam thlengin, a chang hi chuan ka ning ve ṭhin; insu leh in chhungkur sekrek khawih reng renga nun hman hi! 

Chutah fate an lo awm bawk, mahse ka fate kher hi chu phurritah ka ngâi ngai lo. Ka hmangaih em em zawk a, an tan hi chuan ka engkim ka hlan phal a ni. Ka chauh em em lai te, ka mut a chhuah em em lai pawh ni rawh se, min mamawh a nih phawt chuan an tan ka che chhuak vat ṭhin. An kum la tam lo mah se an puitlingin an fel phian a, ka lawm tak tak a ni. Tin, ka thusawite hi an hre rei em em a, an awih bawk a, ka tan hi chuan an ṭha hlawm vek a, duat bik pawh ka nei chuang lo. An pathumin ka duat em em vek a, ka mood a dik loh lai paw'n ṭawngkâ vinin ka be ngai mang lo hial a ni. 

"Chawite, i va rei ve, lo chhuk la, inlêng kan nei a nia" ka nu aw ka hriat tâkah chuan chhuk lam zai ka rel nghal a, ka pasal nu a ni a, nu fel tak tih tur ni lo mah se sual tak erawh a ni chuang lo. 

In hnuaia ka chhuk thlak rualin ka nu chuan thingpui chhuang turin min lo hrilh a, chhang lovin ka buk khum zeuh a, choka lamah ka kal tlang nghal law law a, inlêng lah chu kan nei tam phian leh nghal. An vaiin mi pariat vel an ni maithei, an ṭawng duh hlawm mai si a, an ri nawk nawk mai. Ka nu hi a ṭawng duh ve hlein ka hria a, mahse ṭawngna hun a chang meuh lo. Nalh takin an chei hlawm fur a, ka nu pawh a bang chuang lo, a inchei nalh khawp mai, an lêng chhuak dawn a ni mahna. Kan inlêng te chu mi hausa nupui vek an nih ka ring, ka nu pawh a ni tho va, sawi hranpa a ngai lo, a nih loh paw'n mo nei vek tawh an ni ngei ang, an hman hlawm êm mai.

"A in theih tawh dawn em Chawite? Chhuah thuai kan duh a nia, han hmanhmawh deuh teh" ka nu chuan a rawn ti leh a, a ṭawngkam chhuak chu amah ang lo takin a dam diai a, a ṭhiante hmuhah chuan min duat ve hmel tawp. 

"A so chiah e, ka'n siam vat vat ang e" ka ti ṭha ve mai a, an thingpui tur ka siam lai chuan dar zat ka en leh zauh zauh ṭhin a, ka fate pahnih school bân hun a hnaih tawh leh tawh loh ka ngaihven a ni ber. 

"Kei chu in leh lo mai ang u, ka hmanhmawh, kal vat ila, haw leh vat zawk ila" ka nu ṭhiante zinga pakhat chuan a ti lang lâng a, an ṭawng ka hre pha vek a, kan inawm hlat lo hrim hrim bawk. 

"Nia, i kal phawt mai ang u, duh leh haw hunah thingpuite chu thlamuang deuhin kan in zawk dawn a nia" ka nu bul chêta ṭhu nu chuan a rawn ti ve leh a, an ṭhutna aṭangin an tho ta sap sap mai.

"Siam leh lo mai rawh Chawite, kan lo haw hunah kan in zawk dawn a nih chu" ka nu chuan ka lam lo hawi pah hian a ti dam leh diai a, dik tak chuan ka ngei ve thlawt, an hmanhmawh viau a nih chuan a tirah sawi tlang nghal law law se, ka siam lo ni mai tur.

"I kal ang u, kan tlai lutuk palh ang e" ka nu bawkin hma a hruai a, kei ve chu pakhat mah min rawn ngaihven eih tawh lo va, a ngaihven ka phut lo bawk, a chhan chu vawi khat pawh min ngaihsak tak tak ngai hleinem. 

Kum 13 chuang chu mo ka ni tawh a, kan inhrawn kum tluan ṭhin a, a fapa nen kan inneih tûk aṭangin min duh lohzia leh min ngainat lohzia a tilang nghal a, kei tih loh mi dang kha chuan an hrethiam ngai lo. Ka pa te, ka pasal leh a naute pahnih hmuhah chuan min be chhe em em ngai lo, kan pahniha kan awm dun chiah hian a hrehawm ta a ni. Ka biak te hian a hre lo der tlat zel a, phone a en loh leh nui var var chungin mi dang a be daih zel a, ka tan chuan a tlawm thlak ngawih ngawih ṭhin. A sual ti dawn ila mi dang tan hi chuan a sual chuang si lo, a fel ti dawn ila fel ka ti thei bawk si lo, a buaithlak a ni. 

Dik tak chuan thingthlang khaw tê ve tak aṭanga seilian ka ni a, ka pasal u Faka nena kan inngaihzawn lai aṭang tawh ka nu hian min duh lo nghal em em a, chu chu a chhan bulpui ber a ni tih pawh ka hria, ka mo tirh te khan hrehawm ka va'n ti ngawih ngawih ṭhin tak! Thingtlangmi kan nihna laiah thil changkang leh hmanraw changkang hman thiam loh ka ngah a, mahse pakhat mah min hrilh ngai lo tluk a ni. A ṭhen azar hi chu u Faka hian min hrilh mai zel a, a hna lamah a kal leh daih zel bawk si a, ka nu phei chuan pakhat mah min hrilh lo tawp. Ka chet chetin min chet tir a, ka tih sualah mi dang awm loh laiin min zilh thung a, tawrhchhel a ngai ve ṭhin khawp mai.

Dar 1 a ri hnai a, ka fate school lamah ka kal a, dar 1 leh a chanve velah leh dar 2 dâwnah te an bâng ṭhin a, zirtawpni hian an bâng hma deuh a, mipa ve ve niin a û zawk Tharthara hi kum 8 a ni mek a, kan naupang ber Ngurtea erawh kum 6 a ni thung. An school kalna inang mah se an bân hun a inang chiah lo va, Tharthara zawk hi a bâng tlai ziah a, a nau nen kan lo nghak tlang law law ṭhin. Dar 1 leh a chanve aṭanga rei lo tê hnuah Ngurtea hmel ka hmu nghal a, ka lam panin a rawn tlan thla chak khawp mai. Ka taksa nghenga a awm chiah chu eng eng emaw ni hi a sawi ve nuah nuah reuh a, ni dang ang bawkin a u Tharthara kan nghak tlang dawn a nih hmel.

Dar 2 a pelh ve leh tâkah chuan Tharthara pawh a rawn bâng ta, kan nufain Bus-ah kan chuang a, Ngurtea ka pawm a, ka bulah Tharthara a ṭhu bawk a, kan pathuma kan awm tawh hi chuan ṭawng kan inchuh nak nak zel. Tharthara chuan an test paper min hmuh a, min hmuh châk tawh hle a ni ang in kan thlen hun pawh a nghak thei lo. Ka beisei ruk ang ngeiin a ti ṭha em em zui a, zirna lamah hi chuan an pahnih hnîh hian sawisel bo an la ni rih a, nakín zelah erawh eng nge an án dawn ka hre bik chuang lo. Tin, u Faka an chhun a, an thil zirlai an thiam thei em em a, kâr tira an zir te hi kâr tawpah pawh an la hre reng thei ṭhin. 

"Chawite, thingpui a siam theih chiah aw" ka nu aw ka hriat rualin a lam ka hawi a, a ṭhiante'n an lo zui lut dam dam a, mahse thingpui siam sak nghal mai ka tum lo, ka fate thil ei tur siam zawh sak phawt ka tum zawk. 

"Hmanhmawh ve deuh la, kan buaiin tih tur kan la ngah hlawm teh a nia" ka nu bawk a rawn ṭawng leh ta, anni ṭhiante ai chuan ka fate pahnih ka ngai pawimawh zawk chiang em mai, ka hman hunah an thingpui tur chu ka siam mai ang.

"Nu, ka lo haw" ka fanu neih chhun leh kan fate zinga upa ber Saii a lo haw hlauh a, ka nu chu a thinrim hmel ta vak lo, Saii hi chuan thil a hrethiam ve ṭan tawh a, tunah hian kum 12-na a hmang mêk bawk.

"I pite saw thingpui lo siam sak lawk mai teh, i naute pahnih ei tur hi ka'n siam zo law law mai ang e" ka tih chuan a che ve nghal mai a, naupang mai mah ni se a che fel em em a, ei rawng bawl thlengin min puih a tum ṭhin a, inzir nân tiin ka inpuih tir lek lek duh chauh rih a, hna a thawk nasa nghal lutuk ang tih ka hlau a ni.

Ka nu ṭhiante an haw fel chiah chu ka thaw a veng huai thei, an bulah va awm chiah lo mah ila an boruak ka zo ve lo ni berin ka hria. An rimtui inkah rim ni se a nâ hlawm em em bawk si, an ṭawng duh dan lah mawi lo a tam hle a, ka fate pathum hriat atan pawha mawi lo an chhak chhuak nual a, ka nu chenin, inla changkang hlawm viau mah se an mawl ka ti ru khawp mai. Ka nu ber hi mak ka ti ṭhin, kum 13 chu kan inhrawn tawh a, ani ang em ema lemchan thiam hi an awm kher lo ang. A ṭhiante bulah tih tur la ngah lutuk ang te khan a insawi vel a, an haw rêm chiah chu an room-ah a lut a, a mut bak ka ring lo. 

Ei rawng ka bawl mial mial laiin ka pa a lo haw a, ka nu awmna min zawt a, an room-a a awm thu ka sawi ve mai a, ka pa hi chu pa ṭha tak a ni a, ka nu'n ani ang pasal a nei hi chu a vannei ve thlawt a ni. A tú hmuh hmasak ber chu Saii hi a ni a, a hming pawh ama sak a ni nghe nghe a, ka nu erawh engah mah a inrawlh duh lo thung. Khaw thim dâwn hnaiah u Faka pawh a lo haw a, haw har ka'n ti khawp a, ni dangah te chuan dar 4 velah a lo haw ziah a, tun ṭum chu a lo haw har khawp. A fate nen hun an hmang ho nghal a, naupang nen kan ni bawk a, kan room-ah chuan thawm a ri nasa leh tawh hle. 

Saii erawh rei pawh awm lovin room aṭang chuan a lo chhuak a, ka bulah a rawn awm a, ka chawhmeh siam chu min puih a tum a, ka phal lo chuang lo. Tun aṭang hian lo inzir ve zel se, a pasal tan ei rawng bawl thiam tak nupui la ni ve ngei se ka duh a, a ṭhiante an awm mai mai ṭhin thu amah pawh hian a sawi fô va, ani erawh ka fanu a nih vang a ni ang khawpuimi mah ni se chet a peih khawp mai. Anṭam buh bai ka tum a, Saiin chaw a hmet nawi a, anṭam buh bai hi tui kan ti tlâng em em a, u Faka ngat phei hi chuan tui ti tak a ni. Ka vanneia siamin ei rawng bawl hi keima tâwkah ka thiam ve a ni mahna, ka chawhmeh siam tui ti lo an awm ngai lo tluk a ni.

"Nu, apa kawr rim khi a mak tawp" Saii chu ka en zawk a, ka hawi sawn ve leh mai a, ani paw'n a sawi chhunzawm tawh chuang bik lo va, a thusawi chu ka thengthawngah a thawk hran lo.

"Engtik thleng nge School in kal dawn khá?" ka tih chuan chaw hmet nawi chung hian

"Kan school calendar ka en phawt loh chuan ka hre tawh lo, December ni 15 vel thleng a ni ang, kum dangah pawh ni 15 kan kal thleng ziah" a ti ve mai a, a ṭhiante chanchin min sawipui zawm zat a, hmeichhia ve ve hi chu kan hriat hran deuh ṭhin. 

Zanriah ei lai chuan Ngurtea ek a chhuak tlat a, ka nu mitmei ka veng hmasa ber a, a chaw ei a tui loh hmel leh tawh khawp mai. U Fakan toilet lamah a kalpui thuai a, u Faka nau Ruata leh Sawma erawh ten lém lovin an ei mial mial a, ka pa pawh a ei pangngaiin a ei reng a, ka nu awm dan ber chu ka tan chuan hmuh kân a har ṭhin a ni. Rei pawh awm lovin u Fakate pawh an lo lêt ve leh mai a, ka nu chu rei lo tê hnuah a la kham daih zui. Ka pa chuan a nawmsam vak loh a rin thu a sawi a, Ruata leh Sawma a biak chhunzawm zat a, u Faka nau chiah Ruata zawk hian tun hnaia nupui neih a tum deuh a, mahse ka nu'n a la phal bawk si lo, chung vel chu an thil sawi ber a ni. 

Zanriah kan ei kham a, eina ka seng fel a, Saiin min pui a, thleng ka sil laiin dawhkan leh hmun vel a lo phiat fai a, ani ang fanu fel lutuk hi kan nei lo ang tih a hlauhawm zawk. Kan tihfel zawh hnu chuan kan room lamah ka lut a, Saiin lehkha a zir a, u Fakan mipa pahnih a zirpui bawk a, kei erawh zan mah ni se insuk a ni rih mai. Washing Machine a awm bawk a, insuk tak hi chu a har hran lo, inpho tak hi a buaithlak ka ti ṭhin. U Faka kamis ka khawih chiah chu rim dang ka hre ta, ni danga a perfume inkah rim ang a ni ta hauh lo mai. Tlaia Saii min hrilh kha ka hre chhuak zawk a, u Faka lam ka hawi a, kan fate pahnih a lo ṭhut chilh run bawk si nen thil inzawh hunah ka ngai ta lo. 

A kamis chu Washing Machine-ah ka vawm lut a, a rim a nâ ang reng phian leh nghal. Perfume hi amah leh keima'n kan nei a, kan fate hi chuan an duh zawk zawk an hmang mai a, a bikin Saiin hian a rawn hmang chho ṭan a, mipa pahnih erawh an phur thut changin an hmang a, hmang lo ang vel an ni. An sam phir mawi leh mawi lovah an buai em em zawk a, mipa an nih vang te pawh a ni mahna le. Thawmhnaw chu ka spin leh nghal vek a, a tuk lama pho ro pawh a harsa lutuk hran lo ang. Ka insuk zawh meuh chuan dar 9 a lo hnai kuarh tawh a, room chhung vel ka tifai leh thuak thuak a, naupangte pawh an mut a chhuak ṭan ta. 

Saiin lehkha a zir rei deuh bik a, mipa pahnih erawh an muhil fel diam tawh a, anni pahnih hi zawng mut harsat lo dun tak an ni. An bulah u Faka a mu thluang duai a, phone a khawih mual mual a, dar 9 leh a chanve a pelh tâkah chuan Saii pawh a meng rei peih ta lo. Room khata kan awm vek avangin mipa pahnih kan la mut pui a, Saii khum dangah a mu thung a, mahse ani pawh hi a chang chuan kan bulah a rawn mu leh thut zel. Kan room piah chiah hi siam mek a ni a, a pu'n Saii room atana a siam tir a, mahse tun lai chu dam lohna avangin kan mi chhawrte an lo lang tam thei lo va, zawh pawh an la zo fel hlei thei lo. 

"I kamis saw rim dang daih a nam" u Faka en pah chuan ka ti sep a, a laiah kan fate pahnih an muhil bâm tawh a, ṭawng rin vak chi a ni lo, Saii kan piah maiah a mu bawk si.

"A chhan ka va hre lo ve" pangngai deuh hian a ti mai a, a phone a la khawih reng a, a awm dan chuan ka lung a tiawi zân lo a ni. 

"Ka thusawi hi ngaihsak ve deuh la" ka tih leh chuan min rawn en ta chat a, a phone pawh khawih zawm lovin a dah thla ta riai riai. 

"Lungawi lo nghal ngawt ṭhin lo la, a chhan ka hre bik hleinem" min chhan lêt dan chu a mak ka ti, 'lungawi lo nghal ngawt ṭhin lo la' a tih danah ho tê ah pawh lungawi lo ṭhin ka ang hlein ka hria. 

"Ka lungawi lo pawh a ni chuang lo, ka sawi lo angah ngai rawh" ka ti hnuhnawh ta ringawt a, inhnial buai ai chuan pumpelh ka duh daih zawk. 

"Kum tam tak ka hmuh tawh loh ka ṭhianpa nen kan inhmu a, kan inkuah ngei a, a rim kha a ni maithei" kan ngawih dun vang vang hnuah a rawn ti a, ka mit ka chhing daih thung. 

"Vawiinah eng nge i lo tih? I chau em?" chu zawhna min zawt chiah chu ka meng lo thei lo, kâr tam tak hnuah min ngaihtuahna awkâ ka hre ve leh chu a nia, chutah hmangaih tak angin min la en chiang em em zui. 

"Ka chau ve thei hleinem" ka ti sep a, chu ṭawngkam chu ka nu ṭawngkam ngei a ni a, tukṭhuan ei lai te, zanriah ei lai te leh chaw ei pui kan neih lai te paw'n a sawi hreh lo va, mahse tûma'n min ṭawng elhsenna a ni tih an hrethiam pha ve ngai lo. 

"Tun kâr tawp chu khawiah emaw kan kal dawn a nia" a ti hniam sup a, amah pawh en chuang lovin

"Ka hman lo ang ka ring" ka lo ti thung a, ka hman lo tak tak ang, a chhan chu kâr tawpah tih tur ka ngah ber zel, ka nu'n bazar turin min ti leh ngei ang a, ka lo chhuah daih vel chuan mi dang awm loh laia zilh ka tâwk leh dawn tih ka chiang. 

"Hman tum la, kan chhuak ho khât a nia" a ti leh a, ka chhang tawh lo va, a sawi chu a sawi dik ve reng, chhungkuain kan chhuak ho khât ve êm bawk a ni.

Kan ngawi dun ta tlawk tlawk a, mahse kan la muhil lo ve ve thung. Min en reng a ni mai thei ka za mêr mer a, fa pathum lai nei tawh mah ila kan nupa inkar chhe ta em em chu ngaihtuah chian ngai tak a ni. A bul ber nia ka hriat chu ka nu bawk a ni a, ngawi deuh hlek ila titau angin min chhuah zel a, ka tan hi chuan awm dan thiam a har ve ṭhin. Tihtauh hrat anga min ngaih avangin u Faka paw'n vawi khat chu tihtauh ching angin hmaichhanah min ṭawngkhum tawh a, khami ṭuma ka rilru nât dan kha chu pui tak a ni. Ani paw'n a sawi leh tawh lo va, mahse kan nupa inkar a chhe chho em em thung. 

A tukah chuan ngawi rengin office a kal a, zing lamah kan fate an school thleng a thlah thlap a, dik tak chuan ka thlah hman meuh lo ṭhin. Hun awl neih tuma ṭhut ve dawn hlek paw'n ka nu'n min lo melh hrâ zel a, ka vanduaina a kal tluang a ni ber e. Kan nupa inkar ber a ṭhat loh miau si chuan ka eng tih mah a nuam thei bik lo va, mahse engtia siam ṭhat tur nge tih ka hre chuang bawk si lo, u Faka nen tal hi chuan hlim ila zawng ka nu hi chu engah mah ka ngai miah lo ang. Kan fate chuan hlimna leh hahdamna min pe na meuh mai, mahse hmangaih ber te nge nge chu a thawh dan a dang daih thung si a ni e.

"Ka ṭhiante an lo kal leh dawn a, i nungchang mawi lo tak kha phawrh chhuak tawh suh ang che" ka nu lam chu ka hawi thuai a, ka thleng sil lai pawh ka tawp hmak. 

"Hrethiam lo ang deuh khan min en suh, min tizak zawngin awm tawh lo hram ang che" ti lehin kal sawn a rual nghal a, engtik lai khan nge ka lo tih zah ka hre miah lo. 

Thleng ka sil zo va, a sawi lâwk ang ngeiin a ṭhiante pathum an lo lêng a, ka sawi thiam dan ber chuan korean drama vela nu ho hi an ang ka ti ṭhin. Zep lovah chuan an bula awm a hrisel lo ka ti hle bawk, a chhan chu an ṭhian emaw an hmel hriat tu tute emaw an sawi chhe chiam a, an rel chiam a, nu hlang mah ni se an thingpui inna leh an chhang eina hnawk vel tak ngial pawh an tifelfai peih der lo. Ka nu min tirh kawi vel danin a zir bawk a, mo mah ni ila awmpui ang maiin ka awm thung a, awmpui hlawh nei lo ka nih ber chu! 

"Engati nge khatah khan i la din reng? I fate school bân a hun tawh, in chawr chhuahna hi a hriat leh ṭhin" ka nu min biak duh dan chu ka rùn khawp mai, thingtlangmi ka nihna a hmusit tih a chiang em em a, mahse thinrim hman ka ni lo, ka fate ka hruai vat an ngai.

In aṭangin ka tlan chhuak titih a, ka hmanhmawh hle a, an bân huna ka fate'n ka hmel an hmu lo tur ringawt chu ka ngaingam lo a ni. Bus-ah ka chuang lut thuai thuai a, Bus fare tur pawisa pakhat mah ka la ak chhuak lo zui. Ka nu leh a ṭhiante thil ei inna kha seng fel hmasa tê tê lo ila chuan ka hman vâr var ang a, hmanhmawh miah lovin ka fate school lam ka pan ngei ang. Ka thil ngaihtuah hnuhnawh chu sâwtna pakhat mah a awm tawh lo tih ka hria, mahse ka nu ka ngei dan a nasa hle thung. Ka ngei em em lai leh ka thinrim em em lai paw'n ka ngawi mai zel a, ka pai dam ve leh mai zel a, ka ṭhat chhuahna te, ka zahna te, a laka ka awm dan engkim chu a tan chuan engmah a ni lo, min hmusit zual zel zawk tih ka hre chhuak uarh uarh a, ka rilru a buai mawp mawp hle.

"Awi!" tiin ka ṭe ṭhawt a, ka chawn leh ka ke rek chu a nâ vawng vawng a, mipa pakhat hian min lo buaipui vat bawk. 

"I nâ viau em? Kawng i en lo lutuk a tin ni! Kawng laiah motor tlan leh tlan loh en miah lovin i tlan ringawt a, fimkhur ta che, thawh tum ringawt suh" ka darah chu pa chuan a chelh bet tlat a, kei lah ka hmanhmawh tawh si. 

"Khaw maw min thlah teh, ka nâ lo, ka kal thei, min sutu zawk si min la vin zawk za mah a!" ka ti hlawk hlawk a, a bân chu ka vai thla lâwp a, kal ka tum chiah chu ka ke a va nâ tehreng em.

"Ka sawi reng khá" min sutu bawk chuan a rawn ti a, min din hnaih hle a, kan bul vela mite chuan min en duh hlawm hle. 

"Khawiah nge i kal dawn hrim hrim? I hmanhmawh hmel nasa mai si a, fimkhur tal tur alawm" hriat nuam lo takin min be leh ta, thinrim ruk sa tawh nen, ka nuam lo zual khawp mai. 

"Ka fate ka hruai dawn, an bân a hun tawh" tih leh kal ka rual a, nâ ti chung chungin ka pen lui a, ka kal lui zel a, ka bai auh auh a, ni danga ka awmna ṭhina min lo nghak rengtu Ngurtea ka hmu chu ka hahdam huai thei.

"Nu" a lo ti réng bawk a, a bân laia ka awm lo chu mak a ti ve khawp ang, Tharthara kan nghak tlang nghal a, ani pawh a rawn bâng har chuang lo.

"Ka lo thlah ang che u, a zia lo hle mai" kawnga kan kal laia min betu chu min sutu bawk kha a ni a, a hma ai chuan a ṭawngkam pawh hriat a nuam ta deuh e. 

"A ngai lo mai" tih chauhin ka chhang a, kan kalsan nal nal a, Bus-a kan chuan lai te chuan ka ke chu a nâ ru veng veng a, a tur ka ti mai, zanah phei chuan a nâ ngawt ang ka ring.

In kan thleng a, ka nu'n min tirhna tur a lo zawng nghal char char a, a ṭhiante awm lai a ni nghe nghe a, mahse ka ke nâ avangin a thusawi engmah ka zawm peih lo. Room-ah ka lut tawp a, ka mu saisir a, ka fate min biakna tak ngial pawh ka chhang ṭha peih lo. Ka nu pawh kan room kawngkaah a rawn dak zuai a, án hla a chhak chhuak leh hram a, ka thatchhiat thu a sawi bawk a, ka rilru nâ lutuk chu ka mittui a tling pam a, mahse a hmuh laia ṭah ka tum teuh lo. A kal sawn chiah chu ka inhru zeuh a, Tharthara chuan a nau a inthlak pui a, hmu reng mah ila ka buaipui thei lo chu hrehawm ka ti thlawt a ni.

Saii a lo haw ve leh a, mahse ka awm dan a dik lo tawlh tawlh a, ka muhil tlang a ni ngei ang ka harh leh meuh chuan khua a lo thim vek tawh. Ka bul hnaihah tûmah an awm lo va, dar zat ka en a, dar 7 a lo ri ṭep tawh a, ka chhungte chuan chaw an ei mêk a ni maithei. Ka rizai sin keuin ka ke ka en a, a lo intuam vâr bûr a, a nâ bawk a, intuam àwm reng pawh a ni. A intuam chung pawh chuan chhungril lamah a la nâ et et tho va, mahse a tir ang em emin a nâ tawh lo thung. Mut reng zawng a ninawm lamah a kal a, insiam ṭhain ka ṭhu mu awn duai a, ka pum a rawn ri a, zing chaw tih loh engmah ka la ei lo tih ka hre chhuak leh bawk a, ka ke a nâ kher kher chu a pawi ngei mai, engkim a tikhaihlak vek.

Kawngka a rawn inhawng a, u Faka hmel ka hmu zawm zat a, min ngaihtuah hmel viau bawk. Ni e, min ngaihtuah awm reng pawh a ni ve alawm, a thlaa thla lai kan nupa inkar a ṭha tawh lo va, a chhan tak han sawi fak tur pawh a awm chuang lo. Kan sawi dawn a nih rau rau chuan ka nu a ni leh mai, ka nu hi nu ṭha tak a ni lo chiang ve êm a ni. Amaherawhchu han sual vûr tia sawi theih a ni lo leh lawi a, keimahah chuan a ṭha lo tih hian a sawifiah rih ber a, mi dang tan zawng a ṭha chiang a, ka tan a ṭha lo thung a, a chang chuan kan fate tan pawh hian a ṭha lutuk chuang lo.

"Engtin nge i ke chu i tihnât theih a?" u Faka chu ka bulah a ṭhu tawh a, ka ke a en leh zauh ṭhin a, chhang lovin ka ngawi reng a, min en chiang ta hle. 

"Ṭha taka ka biak che chuan min chhang ve la, Tharthara khan i ke a nât thu min hrilh a, engtin nge i tih nât?" thinrim chuang miah lova a tih leh chuan

"Motor-in min su" ka ti deuh tawp a, amah pawh ka en tawh lo va, kawngka ngawr ngawr ka en char char a, nupa mah ni ila kan boruak chu a nuam lém lo khawp mai. 

"Dawt i sawi em?" min ṭhut hnaih sauh a, a aw chhuak ang chiahin

"Dawt ka hrilh tawh che em?" ka ti ve nghal a, min en tih ka hria, mahse kei erawh a lam hawi ka la tum lo hrim hrim. 

"Thinrim lovin min hrilh ṭha teh le, motor-in a su che a nih chuan tu nge sutu che chu? Engati nge a buaipui miah loh che?" a aw chu a khauh tawh miah lo, a dam deuh dap zawk. 

"Tûma'n min ngaihtuah ngai hleinem, ngaihtuah ka phut lo bawk. Ka ke hi chu a dam mai ang, min ngaihtuah ang deuhin awm suh" ka ṭawngkam aṭang chuan ka thin a rim ru tih a hriat ngei ka ring.

"Ka ngaihtuah lo che i tihna em ni?" a rawn tih chuan

"Chuti ang lam ka sawi lo" ka lo ti thung a, a ni deuh tak tak a, a ngaihtuah leh a ngaihsak chu ka thlahlel ngei alawm, mahse ka nu min tih dan vel zawng zawng zawkin ka rilru a tinâ zual a ni.

"En teh, kan nupa inkar hi a hma ang khan a ṭha tawh lo tih ka hre ve tho, siam ṭhat pawh ka duh ṭhin, mahse nangmah hian i zir lo zel bawk si" chu thu a sawi zet chu a lam ka hawi lo thei ta lo.

"A dik ang" ka ti sep a, kei thingtlang aṭanga chawr chhuak ve mai hmeichhia hi chuan thiam lohna leh zir lohna tam tak ka neih ngei ka ring tak tak.

"I rilru tihnât tuma sawi ka ni lo, i buai leh lutuk ṭhin a, ka nu nen in inkar a ṭha lutuk lo tih pawh ka hria, awl ve deuh la, che reng lo turin ka duh che tih hrethiam rawh" awkâ vinin min la be lo tluang zel a, hmâna u Faka kha a ang zawk alawm le.

"Khawngaihin sawi tawh lo teh, ka ke a nâ reng bawk si, ka awm a nuam lo êm mai" ka ti hluai a, ka awm a nuam lo tak tak a, ka rilṭamna zawng zawng pawh a reh vekin ka hria.

"I ṭha em?" aw dam dapa min be reng chu ka rilru tino tu pakhat a ni a, ka lu lah a hai nasa em em a, ka ni muai muai a, ka hnap thleng te chu ka thawk zawngin a sa hut hut bawk.

"I ṭha miah lo" tih thawm chu ka chhin hnan a, ka harh leh zawk ṭhin a, ka fate paw'n min lo kil luai luai tawh a, hriat mumal pawh ka nei tawh lo, a changin ka harh leh zawk a, a changin ka muhil a, ka dam lo chiang a ni.

"Nu" ka mit ka men ruala min be hmasa ber tu chu ka fanu Saii a ni a, a bulah a pa a ṭhu ngawi run a, Tharthara leh Ngurtea erawh room chhungah an awm lo thung.

"I ṭha em nu? Ka hrethiam lo emaw ti suh u, ka hrethiam vek che u. Nang pawh pa, hmana apa kha i ni tawh miah lo, anu i ngaihsak lo sâwt si, api lah hi..." a tih lak lawh lai chuan ka kutin ka khap vat a, a thil hmuh leh hriat zawng zawng va hre ve kher lo mah ila thil pawi a sawi ang tih ka hlau.

"I pi chu engtin maw?" u Faka chuan a fanu chu a en ta ran mai, Saii erawh min bawh chungin a kun ngul a, a pa zawhna pawh chhang lovin a ṭawng tawh lo hrim hrim.

"Ka nu nen chuan engti ang chiahin nge boruak in lo neih ṭhin a?" keimah zawk min rawn en ta thung a, ka mit ka chhing daih a, ka nu lam ai chuan kan fanuin a nu leh pa inkar ṭha lo a lo hrethiam ve vek chu pawi ka ti ta ber mai.

"Api hian anu hi chhiahhlawh ang maiin a tir kawi ṭhin" thawm a reh vung vung laiin Saii zawk chuan a ti hlawl a, ka khap hman bik ngâng lo va, amah lah chu a la kun reng zui.

"Enga!?" u Faka pawh a fanu thusawi chuan a ṭhawng hle a, ngawi reng hian min rawn en a, ka hawi sawn thuai a, ka mittui a lo tling hman thawt thawt chu ṭul lo ka ti hle.

"Nangte chu hnaah i kal daih zel alawm, hmanni ah pawh anu ni lo motor-ah i phur lai ka hmu asin, mahse anu pawh ka la hrilh duh lo, inah a che chau thei si a, a rilru a nât ka hlau" a pa en kar chungin Saii chuan a tih zawm leh a, ka rin loh lutuk thil ka hre chiah chu ka hmui ka hup tawp ringawt. 

"I ngaih ang kha a ni lo" a fanu ni lovin keimah zawk min rawn en chat a, a hmel chu a pha deuh dui bawk a, min ṭhut hnaih sawt lai chuan kan fate pahnih leh ka pa an lo lut a, engmah kan sawi zawm ta lo. 

Ka pa chuan damdawi ei ṭha tur te'n min hrilh ve lûam a, ani pawh u Faka hian a chhun fuh khawp a, thil sawi duah chi a ni lo ve a, mahse a rilru a zauin a ṭha em em thung. Ka nu erawh a hmel ka la hmu leh ta miah lo va, lo lang lo mah se pawi tihna ka nei lo. Tunah rih chuan ka pasal leh hmeichhe dang inphur haw chungchangin ka rilru a luah ber a, ngaihzawng a neih leh neih loh hre lo mah ila ka rilru a tinâ zual hle a ni. Phone a khawih mual mual ṭhin te, min ngaihsakna a tla hniam nasa em em tawh te, engkim chu ka ngaihbel lo thei lo. Ngaihzawng a lo nei tak tak a nih phei chuan ka awm dan tur ka hre mai lo, ka tuar nâ ngawt ang ka ring.

"Saii, i thil hriat zawng zawng, i hmuh zawng zawng nen lam sawi vek rawh le" u Faka chu ka en duh rih lo law law, ka ṭah a ti chhuak dawn tlat. 

"I sawi dawn em?" a ṭawngkam chhuak chu a khauh ta hmuk a, a fanu pawh a kimki deuh chawih a, ka fanu chu ka khawngaih ve reng, kei min khawngaih avangin a rilru a sawi chhuak ve a ni mai.

"Vawi thum lai ka hmu tawh che u pa, kan school lamah in rawn tlan kual ziah a, mahse kha nu kha tu nge a nih ka hre lo. Api pawh hi a fel miah lo, a ṭhiante bulah anu hi awmpui ang mai a nih thu a sawi lai ka hre tawh bawk a, i bula awm a nuam tawh lo êm mai pa, ka sawi thiam lo, kan naupan laia mi kha i ang tawh lo" tiin Saii chu a khum lamah a mu phei daih a, a nu leh pa erawh kan ngawi ran ringawt.

U Faka chu ding hluaiin a thil ziah ṭhinna dawhkan lamah a kal phei a, a ṭhu ngawi run a, a ngaihtuah thui hmel khawp mai. Ka pa a chhuak tawh a, mipa pahnih an muhil tawh bawk a, mahse a sirah an mu thung. Ka pasal chuan ka en vawng vawng laiin min rawn en thut a, ka mittui chu ka dang zo tawh lo. Ka biangah a baw zawih a, ke nâ bawk, rilru nâ bawk, hrehawm ti tak ka ni. Ka mittui luang chu hruk hul pawh ka tum chuang lo, a luan ang ângin ka luan tir tawp a, en rei duh lovin hma lam ka hawi daih a, ka en reng a nih chuan ka mittui a chhuak zel dawn tlat a ni. Che hrutin kan khum chu a kal pel a, a fanu khum lamah a kal phei zel a, Saii erawh rizaiin a lo inkhuh daih thung.

"Ka tihpalh" u Faka che vel chu ka en leh ta reng a, rizai chawpin a fanu inkhuh hlûn chu a kuah a, a bulah mu saisirin a hnung lam aṭang chuan a kuah a, Saii chu a ṭap feih feih bawk. 

Hmeichhia mah ni se kan fa hmasa ber kha a ni ve a, a pa hi a ngaisangin a ngaina em em ṭhin a, tun ṭum zet zawng a pa awm dan chuan a tinâ te pawh a ni mahna le. A hnuah phei chuan a pa âwm lamah a inlet a, nghet zet hian a kuah a, ka mittui an kai chhuak leh ta nge nge. Mahni tawka ṭah insum thei leh ṭah chhuak mai mai ngai lo ka ni ve ṭhin a, mahse tun ṭum erawh insum theihna ka nei lo chiang hle. Ka bul dawhkana damdawi chu la kángin ka ei a, ka ke a rawn nâ leh thut a, chu vanga ei ringawt pawh chu ka ni. Ka ṭah chhuak ru ṭun mah se ka lu a rawn hai leh ṭan a, ka mut a chhuak tial tial ka ti mai, ka awm dan chu a mak tih bakin ka ngaihtuah thiam lo.

Zinga ka hmuh hmasak ber chu ka pasal a ni a, a hmelah a mu lo tih ka hre nghal a, ka kut a hum lum vung vung a, ka harh tih a hriat rualin min ngaihtuah hmel hle bawk. Ka pang a rawn dek a, ka khawsik leh lu hai pawh a reh vek tawh thung a, ka damdawi eiin min chhawk a nih ka ring. A kut vei lama ka biang dawmin min en a, a hmelah chuan pawi tihna te, inthlahrunna te pawh ka hmu nual a, mahse ka en rei duh leh ta chuang lo. Ka ṭah a chhuak miah lo va, ka rilru erawh a la nâ reng thung a, tunah chuan ka nu min ṭawngkhum vang chauha rilru nâ ka ni ta lo e.

"Ka tihpalh" a ti hniam ruih a, ka kut chu la kángin a fawp vang vang a, ka ke nâ lo se chu kan kal nal nal ang. 

"Ka tihpalh tak zet" a tih leh chuan zan lam ang bawkin ka ṭah a rawn chhuak leh et et tawh a, ka insum ngar ngar a, ṭah rik palh ka hlau a ni.

"A pawi lo" ka aw chu a lawi rât a, ka hmui ka pet fan fan a, ka mittui rawn tling tur ka khap let zawt zawt bawk a, a hmuhah chuan ka khawngaih thlak ngawt ang ka ring. 

"Min en teh" ti leh a lam hawi zawnga min kawih her a rual a, aw dam zetin min be mah se ṭah ka hlauh luatah ka maimitchhing tawp ringawt a, a sawi tur leh a rilrua awm tur awm ang ka hre tho bawk nen

"A pawi lo" ka ti nawn leh ṭuau a, ka ṭap ri tak ngial dawnin ka hria, mahse ṭah rik a hun si lo. 

"Pa mawl leh pasal mawl tak chu ka ni chiang e" tiin a âwmah min kuah bet a, ka bân bul chu a chul hauh hauh a, ka insum theihna te chuan min phatsan leh ta nge nge.

"Ka bulah ka nupui a ṭap ngam lo va, chhungkua nei ve si ka chhungkua pawh ka uap lum tâwk lo va, zu rui leh nupuite kutthlak ching ai pawhin ka lo sual zawk hle a nih dawn hi!" ka pasal rilru nâ leh inchhir aw chuan min tinâ zual tak zet.

"Ka tiam a che, ka danglam ang. He kan nupa inkar ṭha lo tak leh kan chhungkaw boruak awhawm loh tak hi ka siam ṭha vek ang, ka siam ṭha ngei ang" a ti mawlh mawlh a, ka chalah a fawp a, a hmuiin ka chal, ka biang leh ka hmui a sik khat zia ka hre chhuak leh a, ka ṭah a chhuak zual leh ta sauh mai.

A âwm lum nuam zet nghengin ka mit ka chhing vang vang a, ka mut a chhuak riai riai a, ka pasal ka hmangaih em em âwm nghenga ka awm leh chiah chu a nuam êm asin, nuam tak a ni. Kha leh chen kha thlahlel em emin ka awm a, ka khua a har ru ṭhin em em a, mahse a hrethiam ngai lo a nih kha! Ka harh leh meuh chuan nî pawh a lo chhuak tawh a, ka bula mi chu a ṭhu ngawi run a, ka nu ei rawng bawl vel tur ka ngaihtuah lo thei lo va, ka inthlahrung em em a, ani chuan ka ke nâ mah se min phut duh dawn tho tih ka chiang. U Faka phal lo chung ka tho lui a, chokaa ka lut tur chu thinrim hmel zet hian min en a, ka ke a la nâ deuh ná a, bai chungin ka kal thei sawih sawih tho va, dik tak chuan ka nu lungawi lo hmel hmuh ai chuan nâ ti chûng chunga chet luih ka thlang fê zawk.

U Faka leh ka nu chu an inhauh phah nghe nghe a, nuam duh lo tak a ni. Ka pa a rawn lang rang hle a, chutah Ruatan nupui a lo ru reng chu niin, kan va han buai luai luai tak! Ka pa pawh a thaw huai ringawt a, u Faka nen hian inruk hnuaah kan innei a, keini phei chu kan puk lâwk leh nghal a, tunah Ruata ve thung a ni a, a rilru a buai pawh chu a awm lo hran lo. Ka nu ni se a âng hlawk hlawk a, Ruata hmeichhia lo hruai haw pawh a ngaihsak tawh lo. U Faka chuan min pawm nawlh a, thinrim zet hian kan room-ah min pawm lut a, kan fate school kal tura an insiam lai a ni bawk nen kan awm dan chu mak an ti hlawm teh e. Ngurtea phei chuan nui ver ver chung hian

"Apa'n anu a pawm" a ti hial a, min pawm lohna a rei ve tawh bawk a, mak an ti pawh chu dem chí ah ka ngai lo, ka pasal hian min pawm khât êm a ni.

U Faka chuan kan fate pathum an school-ah a thlah leh thlap a, office kal loh ringawt a tum a, a tirah phal lo teh mah ila a tum luih tlat avangin ka ti chhen duh ta lo. Hna kal lovin min awm pui deuh chawt a, motor-a min sutu pawh an rawn lang hlawl a, kan in awmna a zawn chhuah dan te a sawi luam a, mawl ka intihnuhnawh ve reng. A chhan chu kan veng emaw kan in awmna tal kha lo hrilh ni ila chuan min zawn buai vak a ngai lo ang a, ka hmuh tirh khan nelawm lem loh mah se biak a nuam tawh khawp mai. U Faka paw'n a lo kal hrim hrim chu lawmthute a lo hrilh ve a, pawisa min pek a la tum zui a, mahse kan la lo chiang hle.

Ni lêngin ka nu a lêng chhuak a, tlai zanriah ei dawnah a lo haw chauh a, ka pa'n a awm dan chu a zilh nghe nghe. Ni e, a pasal a ni tho bawk a, zilh ve rawh se, a mawi lo ve êm mai. Ka ke pawh ruh tliak a ni lo bawk nen a zia chho ve zel a, mahse ka duh ai chuan a dam har a ni. Saii pawh nuam lo a ti lutuk a, a pa hnenah ngaihdam a dil nawn tluk tluk a, amah avanga a pi leh a pa inhmu thiam lo angah a ngai tlat a, a pa'n a hrilhfiah hnuah erawh a zia ve leh mai bawk. U Faka chu a danglam nghal viau dawn emaw ka tih laiin a buai a zual em em a, office a kal reng a, ka nu lakah erawh ka thlavang a hauh nâ tawh hle thung. 

November thla tawp kan thleng a, Ruata leh a ṭhiannu pawh an inkutsuih ta nge nge a, an hmanhmawh dun em bawk a ni. Keini angin an puk lâwk ve lem lo va, Ruata nupui Christy-i chu a mo tûk aṭang hawtin a che peih lo nghal em em a, ka mo tirh min tihre chhuak rum rum a, mak tak maiin ka nu chuan a la hau miah lo. Christy-i chu mi hausa fa a nih tih hai rual a ni lo va, thiam mumal a nei lo thung a ni. Ka ke pawh a dam titih tawh a, a hma ang em emin la hmang ngam rih lo mah ila ka zia thawkhat tawh viau. December thla kan chuangkai chiah chu boruak a vawt zual em em a, puan lum pawh kan sin thuah hnem tawh khawp mai.

"Kâr leh chu naupangho school an chawl vek tawh dawn tho va, kan khaw lamah ka zin chhoh pui lawk dawn aw?" kawr ro ho thleh fel pahin ka ti a, a ṭhutna lam pawh ka hawi chuang lo.

"Engati nge?" a tih chuan

"Ka haw chho châk êm a" ka ti ṭha ve mai a, mi en run chung hian

"Min ṭhen i tum tihna em ni?" a rawn ti khauh hmuk a, chuti ang lam erawh ka ngaihtuah lo hrim hrim. 

"Ka hre lo" ka ti sep a, ka thil thleh lai pawh ka tawp chat a, ka rilrua awm chu sawi chhuah mai a ṭhain ka hria. 

"Dik tak chuan kan nupa inkar siam ṭhat i intiam a, mahse i siam ṭha chuang miah lo. Ka nu lakah erawh ka thlavang i hauh tih ka hai lo, kumin hi chu kan tan kum chhiat kum a ni ang, ka tana inphal leh min tihlim em em ṭhintu, ka hmangaih em em u Faka kha ka ngai a ni. Ani kha chuan ka nu hmuhsitna ka dawn lai te, ka rilru a nât chang te leh ka lungngaih chang te khan a ruka ka pai ka rilru nâtna zawng zawng theihnghilh vek thei khawpin min tihlim tlat zel a, amah avang khan harsatna pawh ka paltlang zung zung ṭhin, mahse tunah chuan kha kha i ni tawh miah lo, ngaihzawng min neihsan tak tak a nih ka ring ṭan bawk. I insawifiah ve te ka ring a, mahse kei ve mai hi chu i tan engmah ka ni lo a nih dawn hi!" ka ti zawm leh nghal duah a, ka rin lâwk ang ngeiin min chhang miah lo.

"Naupangho zin chhoh pui ka tum tak tak a nia" ka tih zo chiah tihah chauh hmel zet hian

"Tun lai chu ka buai êm a ni, min hrethiam teh" a ti zuai ruih a, a chau tih ka hre ve tho, mahse min tiam anga kan nupa inkar a ṭha tak tak thei lo chu ka rilru tinâ ber tu a ni.

"Ka hria alawm, sawi theih vak pawh ka nei lo. I chawmhlawm ve mai kan ni hlawm a, i pawisa thawh chhuah sa ringin thil te kan lei ve a, min ngai pawimawh lo mah la a áwm lutuk" ka ti leh hmawk hmawk a, ka thinrim titih dawn der.

"Khati ang zawng khan ngai lo la" min vin deuh hrâwk ka ring ngawt pek a, a aw a dam viau thung.

"En teh u Fak, nupa chu kan la ni ngei mai, mahse maw ka laka i awm dan aṭang hi chuan min hmangaih ve tak tak pawh hi ka ring tawh lo. Kum 13 chhung chu in hriat lovin ka tuar ve ṭang ṭang tawh asin, a chhan chu nang leh kan fate vang a ni" ka tih chuan chhuat lam a bih ngur a, a ngawi run bawk. 

"Zanin chu Saii bulah ka riak dawn a nia, naupang pahnih mutpui ang che" ka thawmhnawh thleh lai pawh thlep zo lovin ka chhuahsan a, Saii room sak zawh a ni tawh tho bawk nen riah sawn daih chu a ṭha rih zawkin ka hria. 

Saii room-ah chuan ka riak ta ngei a, mahse zan dang ang lo takin ka muhil thei nghal lawk lo thung. Naupang pahnih ka ngaihtuah ru viau a, thawm lah chu engmah an rawn nei der si lo. A pa'n thawnthu a hrilh emaw a nih ka ring ta ringawt a, an muhil tawh a nih ka ring bawk. Ka mit ka chhing chiah tihah kawngka a inchum ri dawt dawt a, thawm aṭang chuan Tharthara a niin ka hre nghe nghe. Kawngka chu ka va hawng vat a, chutah Tharathara ngei chuan hlauhthawn hmel fê hian

"Nu, apa a khur nasa lutuk" a ti a, chu velah room aṭanga tlan chhuakin kan room-ah ka tlan lut nghal a, Saiin min lo zui zel bawk a, u Faka chu a lo tlún chu niin, a khua a la sik nasa em em zui.

"Damdawi leh tui va la vat rawh" tiin Saii chu ka tir nghal thuai thuai a, ka theih tawp chhuahin u Faka chu ka kai tho va, a zawi vek bawk sia, rit tak a ni. 

"Âng rawh le, damdawi hi ei lawk la, i mu leh nghal dawn nia" ka ti mawlh mawlh a, maimitchhing chung hian a lo âng ve mai a, a ei zawh rualin ka mutpui thuai a, ka va mangang tehreng êm. 

"Saii, i naute pahnih kha i room-ah va riahpui mai rawh" ka tih chuan a chhuah pui ve mai a, u Faka awm dan ber chuan min tihlauthawng tak zet.

Mahni inthiam lo ru zetin a bulah ka mu a, ka ṭawngkhum hmawk hmawk lai te khan a chauh hmel em em a, duh tawk chin lah kha ka nei har si, ka mawl thlawt a ni. Mi dangin engmah an rawn hre lo hlauh zawk a, a bikin ka nu, hria se chu min dem leh nasa khawp ang. Zingah chuan min lo kuah bet run a, thawh khalh ka tum tehreng nen ka la harh har em em zui. Chet sawn ka tum a, min kuah nghet sauh a, a harh tawh tih ka hria, kei lahin ka ngaihtuah bawk si. A khawsik leh sik loh hriat tumin a chal ka han dek a, a lo dai vek tawh.

"Ka ṭha tawh alawm, nizanah i lo buai phili phah em?" ka chhipa a khabe nghatin a ti sup a, a aw hi chu a thum ṭha ve chiang a ni.

"Ka buai khawp mai" zep nei hauh lova ka tih chuan

"I rilru ka tinâ reng hi hrehawm ka ti ngawt mai, nizana i sawi dan aṭang phei kha chuan ka khawngaih hle che a ni. Ka hriat lovin harsatna i lo tâwk nasa áwm ṭhin si a, ka lakah vui ta la ka nu hnenah ka ṭuan dawn tih i ngaihtuah pha vek bawk a, eng pawh ni se naupangho nena in zin chhoh chu ka phal e, hahdam takin hun han hmang la, i duh chen chen i awm thei ang" a rawn ti daih a, mak ka ti teh e!

"A nih nang ve?" ka ti leh deuh tawp a, ka pasal a ni miau a, ka ngaihtuah lo thei lo ṭhin.

"Kei te chu ka awm thei mai ang, ka pa thil sawipui ka duh hrim hrim bawk" a awah chuan thil dik lo a awm tih ka hre thei, mahse eng nge tih ka ring thiam mai lo thung.

"I phal tak tak maw?" ka tih leh chuan

"Phal lutuk e" a lo ti mai a, min kuah behna aṭanga tawlh chhuak deuhin a hmel ka en chho a, a lo maimitchhing daih a, a rilrua awm tur awm ang engmah ka hrethiam lo.

Ni dang ang lo takin office lo turin ka ti a, a chawl ta reng bawk a, chhun lamah erawh a ṭha khawp mai. Ka nu leh Christy-i pawh an inkawm ngeih hmel khawp a, mahse thikna pakhat mah ka nei lo. U Fakan ka thlavang a hauh aṭang khan min ṭawngkhum ngam ta vak lo va, a ṭha letling phian mai. Tin, Christy-i nen an awm dun tam hrim hrim a, kei nen awm dun ila zawng vawi khat tal chu min hau leh ngei ang. Ka nu hi chu a mak ve ngawt mai, mi dang chunga ṭha em em si hi ka chungah a ṭha leh chuang der si lo va, mi dang tan chuan sual han tih vak ngaihna a awm lo tluk a ni.

Chumi ni aṭang chuan u Faka pawh a danglam chho ta viau a, hmuh theih khawpin a awm dan leh a hun hman dan a thlak a, inah a awm tam a, a fate a awmpui tam bawk a, mahse ka lakah erawh a inla hrang tlat thungin ka hria. Khuma kan mut dun hi chuan min kuah mai zel a, a ṭawng tam lo chi hi a ni hrim hrim a, keimah zawk ka ṭawng loh chuan kan ngawi dun kar zel. Kâr kan hmang ral a, thingtlang lama zin chho turin kan inbuatsaih malh malh hlawm a, ka nu chuan ṭul lo a ti khawp mai, mahse ka pa leh ka pasal berin an phal miau a, ka nu chu engah mah ka ngai lo lui ve hmiah. 

Ka chhungte pawh kan zin chhoh dawn thu engmah ka la hrilh lo va, surprise thut ila a ṭhat ka ring. U Fakan Sumo Counter thleng min thlah a, kan fate chuan lo chho ve thuai turin an hrilh mawlh mawlh a, a nui mai zel a, ka ngaih a tiṭha lo rum rum. Sumo-a kan chuan lai chuan ka ngaihtuahnaah u Faka hlir a awm a, kan hun hman dun dan zawng zawng te, kan inngaihzawn ve lai chenin ka ngaihtuah chhuak a, ka lung a lêng ru khawp mai. Tin, mo fel nih hi a lo har dawn a nih hi ka ti ta. Kan pasal chhungte tan fel em em pawh ni ila keimahni chhungte lam ve thung chuan â min ti leh lawi a, chu bakah vawi khat che sual hlek emaw han intithiam lo hlek ila engkim a chhe nghal vek a ni mai.

Dar 6 leh a chanve velah kan khua kan thleng a, ka nu leh pa, ka u leh naute'n keini nufa min hmu chiah chu mak an ti hlawm hle. Pa ber lo chhoh loh chhan min zawt chat a, ka sawi hlei thei miah lo, ka hre lo tlat a tin ni! Kan chhoh dawn thleng khan inngeih tak angin lang mah ila kan nupa inkar kha a la ṭha chiah lo va, kan zin chhoh a phal chhan te, kan ruala lo chhoh ve a tum miah loh chhan te kha ka hre miah lo tak tak. Tharthara leh Ngurtea chu an ninhlei nghal khawp a, ka nu leh pa bula an awm loh leh pawnah an tlan chhuak a, an harh mah mah a ni. 

U Faka hnen aṭangin phone call ka ngai chang ru deuh a, mahse zan dar 11 a rik tawh hnuah pawh min rawn be eih lo. A tuk zing thlengin min call lo va, ho tê mah ni se ka rilru a tinâ ru khawp mai. Ni lo, a ho miah lo. A nupui leh a fate kan zin a, min be tur chu a ni alawm, min ngaihtuah ve ka ring asin le, ka ring sual chiang hle a ni. Ni hnih a ral a, ka pa zawkin min rawn bia a, naupangho nen an inbe bawk a, ka pa hi a fel thlawt a ni. U Faka awm dan zawh ka tum ûk a, mahse ka zawt leh ta lo. Nupa kan ni ve a, kan inbe ngai lo tih a hriat kher ṭul ka ti lo leh thut a ni ber e. Ni thum hnuah erawh min rawn be ṭan ta, mahse keimah ni lovin kan fate hlir a be thung a, zep lovah chuan ka thik chiang a ni. 

Krismas kan hnaih tial tial a, ka nute chuan Krismas leh kum thar hmang tlang nghal law law turin min ti a, min sawm fô va, u Faka min be ngai lo lutukin ka rilru a tidanglam bawk nen râwn pawh râwn eih lovin kan hman tlang dawn thu ka nute chu ka hrilh ve ta hmiah. Ṭhenawm khawveng te'n Boney M hla an play ri chuah chuah a, a ṭhenin Lalroutmawii Krismas hla an play bawk a, motor-ah nen lam an play a, chung chuan a ti Krismas zual ngawih ngawih. Biak in tin chei mawi a ni a, a dê sep sep hlawm a, Banner nen lam theih tawp chhuahin kohhran tin chuan ṭan an la a, Krismas leh kum thar tana an inbuatsaihna chu ropui ka ti hle.

"Hello" phone call ka lâk rual chuan ka ti a, a reh vawng vawng thung a, min rawn call chhan ka hre hauh lo. 

"Ka dah dawn a nia" tia hmeh tawp ka tum chu

"Ka ngai hle mai che u" a ti thum hniam ruih a, min ngaih ka ring thlawt lo, kha chen kha min be lovin a awm thei alawm le.

"Kan lêng dawn a, ka dah mai aw" ka tih leh chuan ka dah hlau ang hrim hian

"Min ngai ve miah lo em ni? I rilru ka tinâ tih chu ka hria, pawi ka ti em em bawk, min haw viau mah la min ngaih thu tal chu han sawi ve teh" a ti zung zung a, a aw aṭang chuan a khua a har hmel em em zui.

"Min ngaih tak tak ka ring lo, mi rawn biak pawh i tum reng reng hleinem. Kan chhoh dawn paw'n lo chhoh ve duh lo tu kha i ni miau a, kan bula awm hi nuam i ti tak tak lovin ka hria" ka tih chuan

"Vawi khat pawh in bula kal turin min sawm em ni? I rilru tih nât leh ka hlauh luatah nawr luih che emaw ka thu anga kal tawp kha a dikin ka hre lo va, min sawm bawk si lo nen heti hian nangmahni ngai em emin ka awm tawp a nih hi!" a rawn ti ve nghal a, awih tur nge awih loh tur pawh ka hre rih lo.

"Ka lo chhoh i duh nge duh lo? I duh chuan ka lo chho nghal ang a, i duh lo a nih erawh chuan hetah ka awm thung ang" a tih zawm leh zat a, hmeichhia zawk tih takah ka tlawm leh ta nge nge.

"Duh e" ka ti mawl tawp a, phone a off nghal a, ka sawi tur pawh ka sawi chhunzawm hman lo, ka call leh a, a pick up rualin

"Rawn tlan chak suh ang che, zan a ni leh nghal" ka ti zung zung a, a off leh daih ang tih ka hlauh vang a ni pakhat.

"A teuh lo mai, tlan muang dawn lo tak ka ni. Lo mu suh ang che, darkar 3 emaw darkar 4 vel chhungin ka lo thlen hman ka ring" a tih chuan

"Em em a che! Tlan chak lo la, naupang dawh thlak tur lo lei chho bawk rawh. Tlan chak lo tak tak teh aw u Fak, i accident mai ang" ka ti mawlh mawlh a, a accident chuan a pawi khawp ang. 

"Min ngaihtuah tihna a ni em?" a tih chuan ka ngawi reng a, min fiam nge fiam lo pawh ka hre lo e a! 

"Ur lâwk zan ber khera kan inbe chat hi Pathian remruat a ni ngei ang, lo meng char char rawh, ka hmu châk tawh lutuk che" ti lehin kan inbiakna a hmet tawp zui nghal a, thawk ka la vang vang ringawt. 

Zep lovah chuan a lo chho chu ka lawm ve reng, mahse a che sual ang tih ka hlau ta a ni. Amah ngaihtuah reng rengin hun ka hmang a, lêng tura insiam vek tawh si kha ka lêng leh ta lo nghe nghe. Naupang pathum erawh a pi leh pute bulah an lêng daih hlawm a, an tlei em em a, inah chuan keimah chauhin ka awm bawk. Dar zat ka en chhen a, a che sual ang tih mawlh ka hlau a ni. A tih tawh lamah chuan a ri phut zel bawk si, a khalh chak khawp ang le. Tap chhakah ṭhuin chhangban chhum ka vil a, biak leh ka tum ṭhin, network a awm lo zel a, ka ṭawngṭai tawp ringawt. Kan mut dan tur te ka ngaihtuah kual vel mai mai a, khumah chuan a mu leng dawn lo tih ka chiang a, chhuata kan mut ho dial dial a fuh zawk ka ring.

Dar 10 leh a chanve pelh hretah min rawn call a, khaw chhung a lo luh chiah thu a sawi a, tlan chak ka'n ti mai mai khawp a! A dah hmain fimkhur turin ka chah hman hram a, pawnah ka lo nghak a, ka chhungte leh naupangho lêng an lo la haw lo bawk a, a lo thlen hun chu fuh ka ti letling phian. A motor ngei kan in lam pana lo tlan phei mêk ka hmuh tâkah chuan engtin emaw ni hian ka awm a, ka lawm tih chu phat rual a ni lo. Motor a hung ṭha sawk sawk a, muangchang lo fê hian a rawn chhuak a, engmah pawh sawi lovin min kuah vawng vawng a, chu chu kan thil tih hmasak ber a ni. 

"Tumah an awm lo, an lêng vek" a inlâk hran hnu chuan ka ti sep a, in chhungah min kai lut thuai thuai a, ka hmangaih em em ka pasal chuan min fawp ngawng ngawng a, kan hmui insik lohna a rei ve tawh bawk nen dawnsawn a nuamin kan duhthaw dun hle.

"Min haw tawh lo em? I lung a awi tawh em? Min ngai em?" a ti mawlh mawlh a, eng ber nge chhan tur pawh ka hre lo. 

"U Fak" ka ti hman ṭawk ang tihah ka hmui rawn hup vatin

"Ka hria, ka thiam loh vek a ni. Ka tihpalh, ka insawifiah loh chhan chu thil ni lovah insawifiah ṭul ka ti lo a ni. Saii hmuh kha chu a dik ngei a, ka phurnu pawh khan min ngaizawng ngei e, mahse ka nunah hian ka nupui leh kan fate baka pawimawh an awm lo, a bikin nang phei chu kan fate ai pawhin ka ngai pawimawh zawk che a ni" a ti leh mawlh mawlh a, min en chiang hle bawk.

"I danglam sâwt êm alawm, tihtauh ching angah te min ngai a, min sawi bawk a, mahse ka titau khât khawp asin, hmeichhe rilru nâ hma leh tuarzuau tak nih ka duh reng reng lo. Ka buai ve thei si a, chet reng ka ngai bawk a, nu ka ni tawh bawk nen duh ang paw'n ka inchei mawi hnai hman lo tih te i hriatthiam mai ka ring a, min hmangaih tawh lo ni mai te'n ka hre ṭhin, a chhan chu maw i awm danin a zir lo ve êm alawm, dem phet che ka tum pawh a ni lo" ka ti ve leh nghal a, a pawi ti hmel chu hmuh kân a har khawp mai. 

"Ka thiam loh vek a ni tih ka hria, kum tharah chuan kan in dang tawh dawn nia, hna chiah ka ngaihtuah mah mah ṭhin tih pawh ka hria, mahse nangni ka chhungkua hi vawi khat pawh ka la phatsan lo che u. Ka nu thusawi ṭhenkhat hian ngaihtuahna min sén tir ṭhin ngei a, mahse ka awih tak tak ngai chuang lo. Ka hmangaih che Chawite, min haw tawh lo ka duh, ka hmangaih em em nu" tiin min fawp leh a, chhan lêt loh chu har tak a ni. 

"Min haw tawh suh aw" ti thum chhalin min fawp leh ṭhin a, hmangaihna hi chu a lo mak a ni; ka pasal chu ka ngaidam nghal vek a, huatna pakhat mah ka nei tawh lo bawk. 

"Naupang thil tur chu i lo keng chho em?" ka tih chuan

"Dawn lo'm ni? Motor-ah ka dah rih, Krismas leh kum thar nen hmang nghal law law ang aw, January thla pum chawlh ka la bawk ang a, kan chhungkuain kan zin daih dawn a nia" a rawn tih zawm daih a, kum tluana ka chet vel ṭhinna a ni bawk a, kan in ka ngaihtuah thleng leh ta nge nge.

"A chi nâng, ka nu a buai lutuk ang" ka ti thuai a, in dan te kha a sawi tak nâ a, ka thlawp em em rih lo, mahse Christy-i a awm tawh a, an buai lo viau thei tho bawk. 

"Ruata nupui a awm alawm, ka nu'n a tlawn bawk a, han inhrawn teh se. I pawimawhzia te, i ṭangkaizia te, i tel lova awm hrehawmzia te hi hre ve hrim hrim rawh se" a ti duh lek chauh a, a ngai awlsam leh lutuk chu mak ka ti zawk. 

"Kâr khat lek i awm lo pawh a nuam lo nghal teh asin, ka nu a phun reng mai. Ruata nupui lah khu ei rawng bawl tak ngial pawh a thiam lo, kei phei chu chaw ka ei chhuak daih zel, ka ngai em em bawk che" ti lehin ka biangah a fawp nghal zeuh a, a sawi dik vek ka ring. 

"In dân kher kha ka ti chuang lo a nia, chuti anga Christy-i ber a chhawr tlak loh phei chuan" ka ti ve leh ta nge nge a, in dán chu ṭul em emah ka ngai lo tak tak. 

"In dáng dawn chiang e, i pasal mawl luatah hian i hrehawm rei tawh e. Han ngaihtuah ve mah teh, chhuah dun pawh kan nei ngai hleinem, chuti ang khawp chuan i buai ṭhin asin, ka nu dem viau ka tum a, mahse a bul chu keimah vek a ni" a tih chuan ka ngawi ta hle hle. 

"Pa!" thawm awmna lamah kan hawi rual ṭhawt a, Ngurtea chuan a pa chu a kuah nghal chung chung a, Tharthara leh Saii pawh an bang chuang lo. 

Ka nute lêng an lo haw tawh bawk a, u Faka pawh ka nu leh pa bulah a awm deuh chawt a, eng eng emaw ni sawiin an titi a, u Faka hi chu mi sual tak a ni lo ve chiang a ni. A zaidam si, kum 13 lai chu innei tawh mah ila a thinrim deuh changte hian kut min thlak ngai chuang lo reng reng. Ṭawngkâ vina min biak pawh hi a nei khât hle a, a nei lo tluk zawk. Naupang an muhil fel ta maw tihah motor aṭangin dawh thlak tur kan la chhuak a, ka rin aiin a lo keng chho hnem daih. Thlengah kan dah sak dîat diat a, Ngurtea leh Tharthara ber chuan nuam an ti dawn tih ka chiang.

"Krismas chibai ka hmangaih" ka pasal aw thum chhal avang chuan ka nui sak a, dar zat ka en a, dar 12 a lo pel fel chiah a, mahse minute khat pawhin a la pel lo ang.

"I va hma ve, min dang min chibai khalh i hlau chiang mai" fiam deuh reuha ka tih chuan

"Hlau ang chú, kei chu i nunah hi chuan a hmasa ber zel nih ka duh, ka ni zel bawk a, a tawp ber nen lam nih ka duh, min ṭhen ka hlauzia te kha pui tak a ni" a ti thum bul bul a, current kan off vek tawh a, keini pahnih tih loh chu an muhil fel vek tawh bawk.

"Ṭhen che ka tum hleinem, tu nge hmangaih ber te ṭhen duh bik ang, hahdam deuha awm ve zawk ka duh mai a ni" ka ti sêp sep a, a lamah min pawt hnai a, zei tak hian min fawp leh zeuh a, a âwmah min kuah bet ta hle hle.

"Ka hmangaih che tih i hre reng dawn nia" ti supin ka hnung a chûl a, duat zeta nautê kuah a ang mah zawk. 

Zingah chuan naupang ṭe thawmah kan harh a, an dawh thlak chu an hlimpui a ni ber. Tukṭhuan chawhmeh atan ar kan talh a, u Faka hovin ka u leh naute ho an che a, ka pa erawh a awl thung. Ka nu nen ei rawng kan bawl bawk a, Saiin tui a chawi bawk a, kan indaih khawp mai. Chutah Tharthara zawk chuan mau hmanga siam kahpuk a lo nei reng chu niin, Ngurtean a duh ve leh a, Tharthara chuan mi pek a nih thu leh a nau pek a phal loh thu a sawi a, rei fê hnuah kan inthlem lungawi thei hram. Krismas ní tak a ni bawk a, ní én dan te, boruak awm dan leh chhum rawng thlengin a Krismas ngawih ngawih ka ti mai. Kan inkhawm vek a, zo chhangban ngei hnaha fun chu thingpui nen inkhawm bánah kan ei in a, naupang pahnih phei chuan an lem lawk thei lo nghe nghe. 

Inkhawm kan bâng fel chiah a, inlêng kan ngah fû a, ka nu ṭhiante leh ka pa ṭhiante an lo lut khawm a, kan in hi chu hmân aṭang tawh lo lêng lut an tam ve ṭhin hle a, tun thlengin a lo la ni dawn a nih hi! Mipa pahnih u Fakan a chhuahpui a, khawiah nge a kalpui dawn pawh ka hre lo. Kei leh Saii erawh inah kan awm a, ei rawng bawl a hun nghal mai a, hun chu a kal chak phian ka ti. Tlai a rawn nih chuan u Faka te pawh an lo haw ve leh mai a, tape an play a, kan fate chu an lâm a, min tinui hnem ngei mai. Zanriah te chu tui takin kan ei dial dial a, chuti ang anga hun nuam leh hahdam thlak chu ka tawng khât hle tih ka hre chhuak bawk.

"Kum thar aṭang chuan nautê lam hi ngaihtuah leh tawh ila" ti thum chhaltu ka pasal kut ka dul zawna awm chu ka zût dên den a, ka nghawngah a hmai a rawn phum a, a bula awm hi chu a va'n nuam tak!

"I thu thu" ti sepin ka ngheng chial a, a pangtilum sik nuam tak chuan ka mut a ti chhuak ṭan a, kan fate phei chu an muhil fel leh diam tawh zawk a, keini pahnih erawh a mengrei ber kan ni ziah thung.

"Khawpuimi i ni lo te hi ka lawmna tizual tu pakhat a ni asin, i insiam ṭha zung zung zel a, nupui atan chuan nang tluka duhthusam hi ka nei lo. Kan fate enkawl kawngah lah i ṭha em em a, pa ber zawk hian ka tluk lo hle che a ni" a muhil dawn emaw ka tih laiin a rawn ṭawng leh a, titi a duh a nih ka ring.

"Mipa leh hmeichhia hi chu kan inang thei hleinem, tum eng ang mah ila kan intluk thei lo hrim hrim. Pathian min siam dan a ni miau a, kei aia ṭhatna i nei ang a, nang aia ṭhatna ka nei bawk ang a, nupa hi chu inhmangaih em em ila a dik vek a ni mai" ka tih chuan

"A dik chiah, sawi dik reuh lutuk" tih leh ka chhip sama fawh a rual a, chutah amah bawk chuan

"Krismas chibai" a rawn ti leh a, ka bo hman teh e!

"Dar 11 leh minute 59 a ni mêk a, i nunah hi chuan a hmasa ber leh a tawp ber nih zel ka duh tih ka sawi tawhin ka hria" a tih chuan ka nui sen sen a, a awm dan vel chuan min ti hlim tak zet. 

"Nang pawh Krismas chibai, i nunah a tawp ber ka ni ve duh tho" tiin a biangah ka han fawp zeuh a, a nui nghawr dat a, ka mu ṭha ve leh nghal mai bawk a, a ngai té bawkin a taksa nghengin ka mu tawm kâk a, a pangtilum sik reng chu a nuam chiang a ni. 

A tukah chuan Tharthara zawk chu a ṭhiante'n ruai ṭhehna tur changel hnah lâk puiah an lo sawm a, engtik laiin nge ṭhian a lo neih hman ka hre hauh lo. Ngurtea awm loh lai tak a ni bawk a, a pa'n a phal tho bawk nen a kal ve a, an rawn haw te chu sawi tur ngah tak a ni. A tan chuan a vawi khatna a ni hrim hrim a, nuam pawh a ti hle. Ka pa ni se a fatu bawk a, mahse a fatu rei lo, ka nauin a va chhawk a, Lawisa kan hmeh dawn a nih hmel. U Faka pawh chhang a deng ri chawrh chawrh a, Ngurtean a mawngkhak lai a lo duh ve chhen bawk a, nuam ka tih dan chu sawi ngaihna pawh ka hre lo zawk.

Tlai dar 2 leh a chanve velah ruai ṭheh turin kan kal a, mi an tam hle a, kan naupan lai ang chiahin changel hnahah ngei kan ei a, savun ṭhutthleng kan ṭhut bawk a, puar a awl khawp mai. Inei berh nei nuai kan awm lo va, sa chek kan hawn ṭeuh nghe nghe bawk. Ruai kan ṭheh zo va, motor-in khaw chhung kan fang kual a, hmána chhungkaw hlim tak ni ṭhin kha tunah chuan kan ni leh ta, ngai kan awh chho mêk a, kan chhungkaw boruak leh kan nupa boruak chhiat ai chuan ka pasal thu anga in dán pawh pawi tihna ka nei chiah tawh lo, ka nu a insiam ṭha emaw te a nih ngawt loh chuan awm ho leh mah ila kan buai zel tho ka ring.