𝐊𝐀 𝐏𝐀𝐒𝐀𝐋 𝐂𝐇𝐔 𝐊𝐑𝐈𝐒𝐓𝐈𝐀𝐍 (𝐒𝐡𝐨𝐫𝐭 𝐒𝐭𝐨𝐫𝐲) 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦

KA PASAL CHU KRISTIAN 

(Short Story) 

By 

Havali Adam

Ka hma maia muhil siai siai mipa; pa tê lo ve tak chu ka en reng a, a mit a chhing ná chungin a hmel ṭhatna a bo phah chuang lo. Ka pum chu ka dawm a, ka chul dên den a, la puar lian lutuk lo mah se ka fa a awm tih ka hriatna chuan min tihlim ru tak zet a, hlauhthawnna pawh ka ngah hle bawk. Ka muhil a ni ngei ang ka mit ka men leh chuan khua a lo vâr vek tawh a, boruak aṭangin a hma tawh lo tih ka hria, zing lama muhil ve chauh ka ni bawk a, thawh ka hai chiang hle. Ka pum chhunga awm nautê pa hmel hmuh tur a awm lo va, a tho tawh a ni maithei.

Tho ta mai lo chuan khumah ka ṭhu ngawi reng a, ka ngaihtuahna a kal thui hle a, ka chhungte lam thlengin ka ngaihtuah a, anni chuan ka pum chhungah nautê a awm tih an la hre ve hauh lo. Ni e, ka hrilh te a ni ngawt loh chuan an hre mai mai lo ang. A chhan chu ram dangah ka awm daih a, Delhi-ah Hotel-a thawkin ka awm bo char char a, kum eng emaw zah chu a ni tawh nghe nghe. Kumin erawh kum dang ang lo takin kum tir phat aṭang a danglam em em a, ngaihzawng ka nei a, mahse ka ngaihzawng chu Mizo a ni lo, hnam dang a ni. Vai a ni a, mahse ka sawi thiam dan chuan Vai changkang an tih ang chî hi a ni thung.

"A ei theih e" nui sun suna lo phei mêk lam chu ka hawi a, ka nuih lêt ve sak a, tawnzau vâr hain a âwm hmul chu tlêm tlêm a lang bawk a, a bulah hi chuan mak tak maiin ka hlim em em zel. 

"I la ei lo em? Ei ve nghal la?" ka tih chuan

"Ei ve nghal dawn e, ei in lam i tih ṭhat zual a ngai a nia, kan nautê tur hi ka hmu châk tawh ngawt mai" tiin ei tur chu min barh a, a thil siam rim tui tak ei tur chuan ka lo âng a, a tui teh e!

"Vawiin chu Hospital-ah kan kal ang a, naktukah ka chhungte kan hmu dawn a nia, ṭha i ti em?" a tih chuan

"Neeraj, eng lo, kâr khat vel emaw tal chu inngaihtuahna hun min pe lawk la, tih ber tur leh awm dan tur ka hrethiam rih lo" ka lo ti hniam raih a, amah ka en kar a, min ngaihtuah hmel ta viau. 

"Aw le, a pawi lo, mahse chawlh ka nei tlem tih min hriat pui la ka duh, thla khat pawh ka nei tling tawh lo" ti leh ei tur min barh chu a rual a, hun a neih lohzia chu ka hre ve reng, mahse ka la inpeih chiah lo a ni. 

Chawhma lamah chuan Hospital-ah kan kal a, kan in-check-up a, insawiselna ka nei lo bawk nen kan nautê, thla khat leh a chanvea upa chu a ṭha khawp mai. Ka rai tih ka hriatna pawh a la rei lo hle a, Neeraj-a nena kan inhriatna phei hi chu thla 6 a tling vel âwrh ang. Ka hmuh tirh khan hmelṭha ka ti a, mahse ka duh nghal teuh lo. Amah zawkin min veh char char a, min ngaizawng hmasa a, dik tak chuan khang hun lai khan ka hlau deuh ṭhin. Vai chu Vai an ni miau a, hnam dang an ni a, ngaihzawng enah pawh ka en ngai lo. 

Ka chhungte hlauh ber leh ka hlauh ber pakhat chu hnam dang mi ngaihzawn leh an zuam theih tura awm a ni a, mahse ka rin loh lam zawngin thil a kal daih thung. Neeraj-a nen kan inhriat aṭanga thla 2 hnuah ka vei ṭan a, min zém hneh bawk nen ka duh tulh tulh a, ka ngai a, keimah leh keimah ngei pawh ka inhmusit ṭhin. A chhan chu Mizo ka ni a, ka hnampui Mizo mipa ngei ngaihzawng neiha pasala neih ka tum ṭhin, mahse thil a kal zung zung a, kan inngaihzawn aṭanga thla tam a ral hmain Neeraj-a hnenah ka thianghlimna; Mizo mipa hnena hlan ka tum ruh em em chu ka hlan ta si.

Chumi avang pawh chuan ka inhmusit a, ka inzahpui a, Neeraj-a nen kan inngaizawng tih leh kan mu dun tawh tih chu ka chhungte ka hrilh ngam lo hrim hrim. Ka ṭhiante tak ngial pawh ka hrilh duh lo va, mahse anni chuan Neeraj-a nen kan inngaizawng tih an hre deuh reuh thung. A ruka sawisel leh rél ka tawk ṭan a, a va han nuam lo duh mai mai tak ém. Neeraj-a erawh ka laka a awm dan a danglam lo va, ka thianghlimna ka hlan hnu aṭang phei chuan min ngaihven zual a, phone kaltlangin min be reng ṭhin.

Neeraj-a hi Pilot a ni a, mahse a hna vel hi thuk takin ka zu hriatpui chiah lo. Chawlh an neih te hian kan inhmu ziah a, ka thawhna Hotel-ah kan riak nghal ṭhin bawk nen min rawn lén chilh fô va, amah ang em ema min duhtu mipa ka la tawng miah lo. High School kan kal lai khan a hmingin ngaihzawng chu ka nei ve tawh ngei a, mahse khang kha chu naupan lai ang vel lêkin a ngaih theih. Kum 20 ka pelh hnua ka ngaihzawng hmasa ber leh awmchhun chu Neeraj-a hi a ni a, a fel a, a hmelṭha a, min ngaihtuah thiam thiam em em a, a hna lama a kal bo te hian ka ngai ru veng veng zel. 

Neeraj-a te hi an têt laiin Mizoramah an awm tawh a, Mizoramah pawl khat aṭanga pawl nga thleng chu school a kal hman nghe nghe. Chu vang pawh chu a ni mahna Mizo ṭawng hi a pái chhe tê lo va, a ṭawng thluk pawh a Mizo em em a, a hmel leh a chetzia aṭang Mizo a ni lo tih a hriat deuh hlek a ni mai. A chhungte pawh ka la hmu miah lo na chungin an sual ka ring vak lo, Neeraj-a a fel êm mai. Tin, Vaiho zawng zawng hi an ṭawngthei uchûak vek emaw ka ti ṭhin a, mahse Neeraj-a ka tawn hnuah erawh ka ngaihdan a inthlak vek.

"Kal tawh suh Bawihi, in pu pawh ka be mai ang. Pawisa te chu ka ngah alawm, ka chawm vek ang che" ka nuih sak a, ani'n ka bânah a chelh thung a, ni dang ang bawkin ka ṭhulh leh ta nge nge. 

"A nih chuan i chhungte va hmu ang le, ka inpeih tawhin ka hria" ka thusawi chu a awih lo a ni mahna, a meng buai nák a, nui sen senin ka ngheng ṭâlh ṭalh a, min nam hla zawm zat bawk.

"Tak tak em?" a tih chuan

"Tak tak e, hnaa ka kal i phal tawh ngai bawk si lo, i chhungte va hmu thuai ila, i zin bo hma ngeiin ka chhungte hmu dun ang, a ṭha em?" ka ti lêt nghal a, ka khabeah chawiin min fawp vang vang a, dawnsawn a va'n nuam chiang tak. 

"Ka lawm e Bawhi, ka lawm tak zet, ka chhungte paw'n an ngainat ngei che ka ring" ti supin min kuah hle hle a, che deuh thut hian

"Le! Insiam ang aw, kei chu ka phur tawh teh mai a nia" a tih zawm leh nghal a, min nawr kal dat dat a, nui ar arin ka thawmhnaw hak tur ka phawrh a, min hak tir vel a nih chu! 

Kan insiam zawh chuan Airport lamah kan kal a, a chhungte awmna hi Delhi a ni lo va, thlawhnaa kal hian a awlsam ber a, kan thlen hma ber ka ring. Ka chhungte nen pawh kan inbe tawh ngei a, mahse ka rai tih leh Neeraj-a nen kan inngaizawng tih an hre miah lo thung. Ka rai tih hre ngat se zawng engtin tak ngai ang maw, chutah Mizo ni lovin hnam dang fa ka la pai zui leh ta nghal a, an lungawi ngawt chu ka ring bik chiah lo a ni. Lungawi lo mah se ka dem miah lo ang, a chhan chu a tirah kei ngei paw'n hnam dang ngaihzawn ka tum miah lo va, ka ngaizawng ang tih leh a fa ka pai ang tih ka hre lâwk bik tlat hleinem. 

Darkar 2 vel dâwn thlawhnaa kan chuan hnuah an khua chu kan thleng a, an khua ti ila a pa an post-na a ni mah zawk. An awmna hmun dik tak hi ka la hre miah lo, a pa hnathawh avangin an awm sawn chhen a, a chang chuan kum khat danah te an insawn a, a sawi danah erawh Mizorama an awm lai kha awm hmun an luah rei ber a ni nghe nghe. A chhungte awmna, an in chu Quarter a ni a, a hmun a zawl zauin boruak pawh a uap ve churh lo va, rethei tak an ni lo tih a hriat hle. Gate kan tlan pel a, Neeraj-a chu Duty te'n an lo hre nghal mai a, chu vanga lut tlang awlsam em em pawh chu kan ni. 

"Engmah hlauthawng suh aw, ka chhungte chu an fel alawm, Mizo pawh an ngaina viau" ka kuta chelh ranin a ti a, ka buk khum nghauh a, a sawi dik ka ring ve tawp. 

In chhung kan lut a, a pa ni awm tak chu ka hmu nghal a, a nu awm ang deuh reuh ka hmuh bakah pitar pakhat ka hmu nghal bawk. In chhung rim chu a Vai rim hle a, Neeraj-a Hotel awm ṭhinna room chhung rim nen chuan inang lo tak a ni. A pa nia ka rin leh a nu nia ka rin chu an lo ni tak tak a, pitar lo awm ve chu a pi a nih hmel. A pa chuan a kuah a, kuai kunin a chalah a fawp a, a nu paw'n chuti ang chiah chuan a ti ve nghal a, kei erawh ka ding ngawi reng ringawt. Min be ve miau lo alawm, chu bakah Vai ṭawng vekin an ṭawng a, engmah ka hrethiam lo. 

"Thil hrilh duh che ka nei ka pa" Neeraj-a chuan a ti ta nge nge a, ka kutah a la vuan reng a, a pa ve thung chuan nui sun sun hian Vai ṭawng a rawn hmang leh a, a fapain Mizo ṭawngin a bia a, Mizo ṭawng a thiam awm reng si a, te ka ti rilru neuh neuh a, mahse ka sawi tur a awm lo khawp. 

"Ani hi ka bialnu a ni a, ka fa a pai mêk bawk a, nupuia neih ka duh a ni" a tih leh chuan a pa chu a nui tawp riai riai a, Vai ṭawng bawk hian pitar chu a va biak zawm zat a, kei leh Neeraj-a tih loh chu an lung a awih loh hmel hlawm ta hle. 

A pa chuan Vai ṭawng hian a be mawlh mawlh a, a ṭawng rin zawng aṭangin a hau tih ka hrethiam nghal a, ka awm a nuam lo ta viau mai. Ṭawngkamin a duhtâwk mai dawn emaw ka ti a, kutzungchal lai a hmuh ta, Neeraj-a pawh chu a ṭawngkam a dam bik tawh miah lo. A pa mai ni lo a nu leh a pi thleng chuan an ánkhum rawn ta luai luai a, Neeraj-a'n thu a sawi leh chiah chu a pa chuan a beng ri ta sawk mai. Mit sen ramin min rawn en a, ka kun vat a, a pa bawk chuan Neeraj-a chu a beng leh a, a kawr âwmah a ṭham a, thinrim takin a hau mawlh mawlh a, Neeraj-a pawh a awm dan a dik lo hle tawh a ni mahna min vawnna chu a nâ vek thei.

"Kal ang" ti hmukin Neeraj-a chuan min pawt kal dawr dâwr a, kan kal thui hman tehreng nen a pa ṭawng vin tak erawh kan la hre pha zel a, a awm dan aṭangin an fapa nupui atan min duh lo tih ka hrethiam ta mai. 

"Hotel-ah awm rih ang" motor-a kan chuan laiin a ti leh a, hnial tumna ka nei lo va, ka la ṭawng lo hrim hrim zawk, dik tak chuan hrehawm ka ti ru ve reng. 

Hotel-ah chuan kan awm ta ngei a, kan awm man a la to em em zui. Zan lamah amahin a chhuak a, zui ka tum lém lo va, a chhan pawh a chhungte bula a kal leh dawn vang a ni. Phone khawihin room chhungah ka awm ngawt ngawt a, amah berin ka biak hma chu be lo turin min ti tlat si a, chanchin hre châk zek zek mah ila ka la be lo tluang zel. Ka phone chu ka khawih ve tak ná a, ka rilruah Neeraj-a a awm daih thung a, a chhungte kut a tuar leh hrep ang tih ka hlau a ni. A pa kut ramzia mawlh kha a mak zawk, Mizo ṭawng te kha kawi khat tal chu a thiam àwm tehreng nen a hmang duh miah lo a nih kha! 

"I lo haw tawh maw!?" Neeraj-a hmel ka hmuh rualin ka tho nghal thuai a, ka lo muhil a ni ngei ang a kawngka hawng thawm pawh ka hre lo, a ke pen ri hre lo ila chuan ka la muhil tlang ngei ang. 

"Eng nge chanchin? Engtin nge an tih che? In inbe ṭha thei em?" ka tih chuan 

"Naktukah kan sawi dawn nia, mu ang le" a ti dam dap a, mahse ka thei teuh lo, a lo haw hun ka nghak ve ṭang ṭang a, hriat nghal ka duh a ni.

"Min hrilh mai la, a harsa tawp nâng, ka awm a nuam thei lo. I awm loh chhung khan ka awm a nuam lo tak tak, engtin chiah nge in va inbiak?" ka ti leh ta mawlh mawlh a, ani erawh a ngawi reng thung.

"Neeraj?" ka ti thluk awn duai a, min en zeuh hnuah hmun dang a hawi a, lungngaih hmel zetin thawk a la ri hawk a, tukverh lamah a kal phei daih bawk. 

"Nang chán ai che chuan ka pa'n min tuithlar ta a ni" a thusawi ka hre chiah chu ka khawng deuh awt a, a taka intuithlar ka vawi khat hriatna a ni a, mak ka ti lutuk chu sawi tur reng ka hre lo. 

"Zodin, i rilru ti hah lo la ka duh. Nautê i pai mêk a, hahdam taka awm i mamawh ber, rilru hahna tur a awm lo" ti lehin ka awmna lamah a lo kal phei a, ka biang tawn tawnah dawmin min chhuk melh a, sawi tur ka la hre chuang lo. 

"Min ring rawh Zodin, mipa nep tak nih ka tum lo. Ka pa'n nupuia neih che ka duh avangin min tuithlar tawh mah se nang leh ka fa hi ka thlahthlam ngai lo ang che u, min ring thei ang em?" a tih chuan nghet zetin ka kuah a, ani paw'n min kuah lêt nghal a, ka khawngaih bawk si chu sawi tur ka hre lawk lo a ni ber.

"Min ring thei ang em Zodin?" a tih nawn sup rualin ka melh chhoh ral a, ka buk khum tâkah chuan min kuah leh a, ka rin phak bakin thil a kal a, ka rinna a mamawh tih ka hria, ka rin ngei a ngai tih ka hre bawk. 

"I rilru ti hah suh ka tih kha aw, ka chawm vek ang che u. Hna ka nei alawm, mangang miah suh. Engtikah nge i chhungte min hmuhpui ve dawn? Nupuia neih thuai che ka duh, eng dan pawh ni rawh se, ka neih ngei che a ngai" a tih leh chuan

"Mu ila" ka ti tham ṭiak a, ka awm dan chu ka hrethiam chiah lo, ka zuai vek ni berin ka hria. 

"Aw le, naktukah kan sawi chhunzawm dawn a nia, a ṭha em?" ka buk khum zeuh a, a âwmah min kuah bei thuai a, ka mit ka chhing vang vang a, tunah rih chuan kan pahnih hma hun chu ka hmu êng thei thlawt lo a ni.

A tuk khaw vâr chu rilru hahna nen ka hma chhawn a, ka rilru a hah lo thei lo. Keimah avangin Neeraj-a a chhungte'n an tuithlar a, engti ang chiahin nge a tawrh nât hre lo mah ila ka lo nâ ve vawng vawng thei. Tin, ka chhungte bawkin ka rilru an ti hah lâwk bawk. A chhan chu Neeraj-a hnam dang a ni miau a, a fa ka la pai leh ta zel a, an bula kan inlan hun tur thlengin ka ngaihtuah tawh a, ka zâmin ka zak lâwk tak zet. Neeraj-a chuan min tih hlim a tum tih ka hria, min be reng a, ka lungawi loh leh ka rilru hah a hlau em em a, a awm dan chu ka khawngaih zual phah fê zawk. 

Ni khat kan chhuak dun chu an pute hnen aṭangin phone call a dawng a, a hna aṭanga ban a nih thu an rawn hrilh a, mak kan ti dun teh e. Neeraj-a pawh a hamhaihin a thin a rim em em a, engkim chu a pa thil tih a nih a rin thu min hrilh a, chumi tlai la lâ chuan kan va kal nghe nghe a, a lo ni ngei e. A pa chuan silai hial a phawrh a, a thin a rimin a ṭawng ri pawh a zawi lo hle. Neeraj-a min hrilh dan chuan chhungkaw harsatna ang zawngin a hna aṭanga a bán ngei ngei theih nân a pa'n hma a lo va la a, an pute nen an lo va inbia a, a tan chuan tih theih dang a awm tawh lo. 

"Ka thutiamah ka ding reng dawn tih hre rawh, nupuiah ka nei tho tho ang che. Pawisa lam pawh lungngaih a ngai lo, ka thawk chhuak em em ang" Delhi-a kan haw nî chuan a ti nghet charh charh a, a pa mawlh chu ka rin phak bakin a sual a ni. 

"Inṭhen ila, i chhungte bulah lêt leh la, i nun a nuam zawk ang a, i hna pawh i hmu lêt leh theih ka ring" ka tih lahin a duh lo nasa mai si a, ka khawngaih lutuk chu ka ṭap tawp ringawt.

Delhi kan thlen nî chuan ka chhungte lam ka be nghal a, ka haw dawn thu ka hrilh a, mahse thil thleng engmah an la hre chuang lo. Neeraj-a pawh Hotel-ah a awm hman meuh lo, mi tu tu emaw ni a be kual sek a, a chhuak chhen bawk a, a buai ve tak zet a ni. Kei lah rilru hah ru deuhin ka awm tawp ringawt a, a tan chuan ka va han ṭangkai lo tak êm. Ani ka tan a ṭangkai tehreng nen, a buaipui ngai leh ngaihven ngai zawk ka ni zel a, a chhungte'n an tuithlar tawh chung pawha a tuarchhel em em chu ka khawngaihna ti zualtu pakhat a ni.

Inrinni a ni a, thlawhnaah kan chuang dun a, Mizoram lam panin kan chuang haw mêk bawk. Dem ka hlawh dawn tih ka hre lâwk vek a, sawisel thlengin ka thil tawn tur chu ka hre chiang hle. Neeraj-a chuan ka kut a hum chawt a, a dara min kuai beiin ka chhip samah a fawp leh zauh ṭhin a, ka rilru a hah rualin a bula awm chu a hahdam thlak tak zet. Chawhnuah Aizawl kan thleng a, Taxi-in kan veng lam kan pan nghal a, thin phu a va rang duh zawt zawt êm. Kan in kawt chu kan thleng ta, Neeraj-a chuan zâm lo tur leh hlauthawng miah lo turin min hrilh a, dawt tel miah lova engkim hrilh turin min ti bawk.

"A lo thleng e" in chhung kan luh rualin ka nu aw ka hre hmasa ber a, nui var var hian min rawn kuah a, ka hnunga Neeraj-a ding pawh a hmu tawh ngei a, mahse engah mah a ngai rih lo.

"I thawhpui em ni Bawihi?" ka pa zawkin a ti a, ka chhang nghal mai lo va, a chhan chu ka sawi hreh ve êm a ni. 

"Pa, thil pawimawh tak sawi tur ka nei, chu vanga lo haw thut pawh chu ka ni e" ka tih chuan min en deuh reng a, Neeraj-a chu hui zeuhin ṭhutthlengah ka ṭhutpui a, ka ute ho pawh an lo haw chiah bawk.

"Neeraj-a hi ka ngaihzawng a ni a, tunah hian a fa ka pai mêk, in rilru tur chu ka hrethiam, mahse in ngaih ang kha a ni lo, Neeraj-a hi mipa ṭha tak a ni" ka tih chuan mak ti zetin min en a, ka nu zawk lo ṭawng hmasain

"Zodin, engtin nge a nih theih? Kum dangah te chuan ṭha takin i awm ṭhin a ni lo'm ni?" a ti ta mawlh mawlh a, ka ute ho pawh an meng no lo hlawm hle.

"In rilru ka tinâ tih ka hria, mahse khawngaihin Neeraj-a hi dem suh u, hmu dik lo bawk suh u. Kei min neih a duh avangin a chhungte'n an tuithlar tawh a, hrethiam hram turin ka duh che u a ni" ka ṭawng zo chiah tihah ka pa a ding ngil nghawl zawt a, a hmel aṭang chuan a lung a awi hlawl lo tih ka hria.

"Ka pu, i fanu hi nupuia neih ka duh a ni. Khawngaihin min neih tir rawh, ka hmangaih a, ka hmangaih reng bawk ang" Neeraj-a thusawi chuan ka rilru a khawih hle a, ka ṭah a chhuak ru tet tet bawk.

"Khawngaih takin ka pu, tunah i phal lo a nih paw'n i phal hma chu i duh apiang ka ti ang. Mizo ka nih loh avangin min ngaihdan tur pawh ka hre mai, mahse i fanu hi ka hmangaih tak zet a, ani leh ka fa hi thlahthlam ka tum lo a ni" Neeraj-a bawk chuan ka pa hmaa ṭhingṭhi hian a ti a, ka khawngaih lutuk chu ka mittui a luang ta nge nge. 

Ka room-ah ka tlan lut a, ka nu leh ka nauin min lo zui lut a, rizaia inkhuhin ka ṭap feih feih a, ka mitthlaah Neeraj-a tlawm hmel leh tlawm lai a awm reng a, chu chu ka rilru nâtna pakhat a ni. Ka nu leh ka nau chu an ṭawng lo hrim hrim a, min thlir tawp a nih ka ring. Ka rilru nâin hrehawm viau mah se ka ṭap rei hran lo va, ka ṭah chhuak zualpui pawh a reh fel vek tawh a, ka inkhuhna aṭanga ka tho chhuak chiah chu room chhungah ka chhungte an lo awm kim vek a, Neeraj-a hmel erawh ka hmu miah lo thung. 

"Engati nge heti ang hian i awm? Ka hlauthawng asin, heti ang hun a thlen palh hi ka hlau teh asin Zodin, tunah chuan engkim a ni vek tawh bawk si. Kan thusawi te kha i hre tawh lo em ni? Kum dangah i ni ngai si lo, engati nge hnam dang fa lai pai tur khawpa i lo khawsak tâk?" ka pa chu ka zah ngawih ngawih. 

"Mizo i ni a, Mizo ngei nei turin ka duh che tih pawh i hre vek, mahse engati nge ka duh ang chuan i awm leh si loh? Ka rilru i timangangin i tihah hle mai Zodin, i tibuai tak zet a ni" a tih leh chuan

"Ka tihpalh ka pa" ka ti sep ringawt a, chu bak thu dang sawi tur ka hre teh chiam lo, min hau hrep se ka rilru a nuam zawk maithei, ṭawngkam vinin min be bawk si lo, nuam lo duh tak a ni. 

"A fa i lo pai hman hi a pawi ber, thil dang chu engtin tin emaw ni chin fel dan a awm mai ang a, a pawi ngawt mai" titu chu ka nu ve thung a, ka ute mipa pahnih leh ka nau hmeichhia erawh an la ngawi reng thung. 

"Ka insawi thiamna ah ngai lo ula, Neeraj-a hi ngaihzawn ka tum bik reng reng lo, Vai ngaihzawng nih kha ka zak bawk, mahse tunah chuan ka pum chhunga nautê pa a ni a, ka hmangaih tawh hial a ni" inthlahrung zetin ka ti a, ka pa lam ka hawi ngam rih thlawt lo. 

"Eng pawh ni se i nu sawi ang khan a fa i lo pai hman hi a pawi ber chu a ni a, a chhungte'n an tuithlar phah i ti em ni kha!? A chhungte paw'n hnam dang neih an phal lo hle a nih dawn chu!" ka pa'n a tih chuan hlauthawng ru zetin

"Min tuithlar ve dawn em ni ka pa?" ka ti nghal thuai a, ngam leh ngam lovin ka melh chho kar a, chutah ka pa chuan rum zeta min en chung hian

"Vai ka ni ve em ni?" a ti hmuk a, ka khup zal zal a, a sawi dik chiah alawm, Vai a ni lo va, kei a fanu; a rilru tinâ em emtu hi Neeraj-a pa angin min tuithlar ve dawn lo tih ka hre chiang ta hle.

"I ṭhianpa, Neeraj-a i ti em ni? Ani kha chu ka hmu duh rih lo, ngaihtuahna ka sên fê hnuah chauh ka hmu duh ang, a insawi ang em em khan a hmangaih che ka ring lo bawk" a ti khauh leh hmuk a, engtin mah ka chhang lêt duh tawh lo. 

Zan thlengin Neeraj-a hmel reng ka hmu lo ta ngei a, mahse message min hnutchhiah thung a, Hotel pakhata a awm thu te, zan reiah kan inbe nghe nghe a, a thusawi tam ber chu amah avanga rilru tihah lo turin min duh a, mahse chuti ang ngawt chuan ka awm thei bik bawk si lo. Engkim ka hrilh nghal a, ka pa'n a hmuh duh rih lo thu thlengin ka hrilh a, a dawngsawng thiam khawp mai. Ka mu tui lo bawk nen zingah chuan ka tho nuam lo hle a, mipaho chu an hna lamah an kal vek a, kei leh ka nu leh ka nau inah kan awm a, ka nu chuan Neeraj-a ko turin min ti hlawl a, a tirah phei chuan mak ka ti hman hle.

Ka nu chuan zawhna eng eng emaw ni a zawt kual duah a, a chik ka ti mai. Tin, Neeraj-a'n Mizo ṭawng pai miah lova a hmang thei chu mak a ti tih ka hria, a hmel aṭangin a lang vek. Neeraj-a chu ka pateho hna bân dawn hnaihah a haw ve leh mai a, kan in kawt thleng ka thlah thlap a, ka chhungte chu an fel ka ti thlawt. Min ânkhuma min hrawk hrepa kut hial min thlak kha ka ring a nia, mahse a teuh lo, a thinrim ber pawh ka pa a ni mai a, thil thleng tawh a nih tlat avangin sawi ngaihna vak an hre lo ni berin ka hria. Zanriah ei laiin kan upa berin min zilh ve ngei a, mahse ani paw'n ṭawngkam nâ leh dengkhawng tak a hmang chuang lo.

Kâr khat zet chu chhun lamah Neeraj-a kan inah a lo lang ta ziah a, ka pate hriat lo hlan a ni zel a, ka nu erawh ka pa thu thuin a awm dawn tih ka chiang a, ka pa thutlukna chu a thutlukna a ni mai. Zana ka pa a mut ṭhat ngai loh thu te min hrilh a, ka khawngaih ve reng. Keimah avangin a rilru a hah a, thui tak a ngaihtuah dawn tih ka hria, min tuithlar ve miah lo te chu ka zah zual phah a ni. Zan khat chu ka pa'n Neeraj-a hmuh a duh thu a sawi a, mahse kâr tawpa hmuh a duh thung. Chu mai a ni lo, a fal ngeia hmuh a duh a, Neeraj-a pawh ka hrilh a, ni dang ang bawkin hlauthawng lo turin min ti leh tawh a, ka thisen zawmpui tih lovah chuan ani ang em ema mi ngaihtuahtu mipa hi ka la tawng lo. 

Kâr tawp kan thleng a, ka pa leh Neeraj-a chu an chhuak dun ta ngei a, awm a va nuam lo duh mai mai tak. Eng nge an sawi dun hriat châkna hlirin ka khat a, room chhungah ka tei sek a, ka nute pawh an bang chuang lo, ka pa leh Neeraj-a inbiakna chu an hre châk ve tho. Dar 10 dâwnah ka pa leh Neeraj-a chu an lo inzui lut a, mak kan ti hlawm teh e. Ka pa chuan kan inneih a phal thu a sawi a, kohhrana inneih pangngai ang erawh a theih dawn lo tih a sawi tel bawk a, ho têa inneih emaw inkawl tawp ang zawngin kan inneih a phal a ni ber. Chutih rual erawh chuan kan inneih vut vut a phal ngawt lo va, Neeraj-a chu en thlithlai ve a duh vang a ni pakhat.

Chumi zan aṭang chuan Neeraj-a pawh zan lamah a lo lêng ta ziah a, ka pa nen pawh eng eng emaw ni an sawi dun ṭhin a, Neeraj-a chuan a naupan laia Mizorama an awm tawh thu te, a pa hna avanga an insawn kual reng ṭhin thu te a sawi kai a, ka pa chuan a chhungte'n an tuithlar tih a hre vek tawh tho bawk a, chu lam chu a zawt duh ngai lo. Ka bulah hi chuan Neeraj-a a hmuh dan a sawi ngai lo va, engmah a sawi ngai lo a ni tawp, mahse ka nu hnen aṭangin mi sual tak leh Vai satliah ang mai mai a nih a rin loh thu erawh ka hre zauh zauh ṭhin.

Nupa an ni miau a, ka nu bulah zawng a rilru dik tak a sawi ka ring. Ka pa a ni tho ná a, a chungah pawh ka lawm tak zet. Kan inneih a phal mai te, kut min thlak miah lo te, nasa taka min ṭawngkhum miah lo te chu pa ṭha tak a nihzia lan chhuahna a ni. Thla kan hmang ral a, lang thei leh hriat theihin ka pa paw'n Neeraj-a chu a nêl lo tawh bik miah lo. A nêl thu emaw a ngainat thu erawh a sawi duh lo tluang zel a, a sawina awmchhun chu ka nu a ni mai. Ka nu lahin ka rilru hah a hlauh avangin ka pa ṭawng dan min hrilh chhawng zel a, nau pai lai ka ni kher bawk nen hnam dang fa pai lo phei ila chu min duat ngawt ang.

Thla hnih hnuaah erawh veng chhung mite'n min sawi sep sep ṭan a, mahse engah mah ka ngai lo lui ve tlat a, chu bakah ka tawn turah ka ruat sa tawp. Ka pa paw'n chuti ang chiah chuan min hrilh a, keimah avanga an hmingchhe tel ve zel chu hrehawm ka ti ṭhin a ni. Fate enkawl ṭha lo angin an thang titih a, kohhrana inkhawm uar ûarin an sawi thui peih a, mak ka ti hlawm hle. Tin, ka nu pawh kohhran hmeichhe lamah lo khak deuh fak fak tu an awm a ni áwm a, nuam lo ka tih dan chu pui tak a ni. Ngaihdam ka dil leh ringawt ṭhin a, ṭah erawh ka ṭap kher chuang lo. Ka nu leh pa ber lah chuan mi sêlna te chu an pawmzam thiam em em lawi a, khawvela nu leh pa ṭha ber an va ni chiang tak.

Neeraj-a nen Aizawla kan haw aṭangin thla thum a liam ta, ka pa chuan kan inneih a rem ti ta a, mi pawh kan sawm mang lo. Chu bakah inneih pangngai ang kha a ni lo tlat a, lehkhaah kan innei tih kan nemnghet a, a awlsam khawp mai. Man leh mual tih vel pawh pakhat mah kan ti lo, a chhan chu ka pasal hnam dang a ni miau a, tih theih ni hek lo le. Neeraj-a chuan ka pa hnenah awm hran a dil nghal a, hna zawn nghal a tum thu te, min enkawl a tum dan chu zep awm miah lovin a hrilh tlang vek a, mahse ka pa chuan kan inhnuai a siam tir a, chutah chuan awm rih turin min ti thung. 

Neeraj-a chuan hna a zawng nghal char char a, a hna hmasa a thawh laia a hlawh khawl sa ho chu la tam viau mah se hna hmuh thuai a duh a, thla tawpah kan in-check-up ziah bawk a, ka chhungte bula a inthlahrung lutuk leh a inphahhniam lutuk mawlh chu ngaimawh loh harsa ka ti ṭhin. Ka pa paw'n pangngai taka awm turin a ti a, a chhungte dik tak anga en turin a hrilh a, phat rualin a khawngaih ve tho a ni. Ka pum pawh a ṭhang lian ve zel a, an zavaiin min ngaihtuah em em vek a, thla 8 ka pai laiin Neeraj-a chu Bank lamah a inziak tling a, kan lawm tlang em em a, amah ber chu a lawm a ni. 

Hna a hmuh aṭanga kâr khat hnuah ka pa chu in dán a dil thlap a, mahse ka pa chuan a lo phal leh chuang lo. Nautê ka neih fel vek hnua indan a phal ta zawk a, Neeraj-a paw'n hnialna a nei lo va, ka pa hi chu a zah ve thlawt a ni. A pa dik tak la dam tho mah se an tuithlar tawh miau a, ka pa chu a pa angah a ngai ni berin ka hria. A thil tawn ang te, a hma chhawn ang te leh a kawng ang te zawhin tawng ve ta ila chuan ani anga ka tawrhchhel rei theih ka ring lo, Pathian hnenah pawh ka dil fô ṭhin; Neeraj-a chu mi sual tak ni lo turin. Ka thinlung zawng zawngin ka hmangaih ngei a, mahse hnam dang a ni miau a, harsatna ka tâwk ang tih ka hlau tho, Pathian zarah ka la tâwk miah lo thung. 

Hun chu a liam leh deuh a, nautê duhawm tak ka hring chhuak a, mipa a ni nghe nghe a, kan va han lawm hlawm mai mai tak. Neeraj-a chuan kan fapa hming chu ka pa phuah turin a hrilh a, a ngen a ni mah zawk. Thil mak tak pakhat chu a insiam rem awlsam em em a, Mizorama a lo awm ṭhin tawh vang a ni maithei. Mizo chawhmeh leh nun dan thleng hian a insiam rem zung zung a, hnam dang mah ni se Mizo chawhmeh hi ei theih loh pawh a nei tawh lo. Ka pa chuan kan fapa hming chu a phuah a, kan lungawi tlang viau a, fapa kan nei ta bawk nen Neeraj-a ber chu a lawm leh ta a ni. 

Kan fapain thla 3 a tlin hnuah kan in dang a, ka pa remtihna thlap a ni bawk. Kan in luahna chu kan veng nen a hlat ve deuh hret a, inlén pawh a harsa ṭan hle. Chutih rual chuan Neeraj-a hna thawhna nen a inhnaih thung a, kawng leh lam zawng tak chuan in luah tur a thlang thiam phian ka ti. Tin, kan in luah man chu a tlawm zawk zawk lo hle a, a changkang ti ila a sual lo ber ang. A luah man nen pawh a inhén viauin ka hria, a nuam phian bawk. Nitin a hna lamah a kal a, a buai thei khawp mai. Pathianni chawhma leh zanah hian kan inkhawm ziah bawk a, thil a chik thei em em a, kan awmna vengah chuan hmel hriat thar pawh a nei chho ṭan a, hmeichhe mit a la ṭan viau tih pawh ka hria, a hnaa a kal dawn te hian fimkhur turin ka chah fô ṭhin.

Dik taka sawi chuan a hmelṭha ve chiang alawm, Vai hang dum tak tak te angin a hang ve lo va, a thawhpui hmeichhe ṭhenkhat te'n hmelṭha an ti dawn tih ka chiang a ni. Kan fapa lah chuan a mitah a chhun em em a, a taka ka hmuh tawha Neeraj-a mit ang em ema mawi ka la hmu lo. A pawl râng deuh raih a, a mawi thlawt a ni. Amah a pa lianin a taksa a inphut mawi tawk em em a, hnam dang tih takah a mawng a chhing hle bawk. A kekawr ka nawhsak te hian sei ka ti ṭhin, ka ute pahnih ai paw'n a sang zawk a, ka ute chu a beng chen vel an ni ang. Kei lah a dâr ka pel âwrh chauh a, chu pawh pheikhawk sang bun chung leh nghalin.

Neeraj-a hna a kal hlanin ka nu a lo lêng a, ka sawipui duh tak ka sawipui a, ka rilru a hahdam huai thei. Ka thil tih tum rilruk chu ka nu'n min thlawp ta phawt a, ṭha a ti hle bawk. Ka pa a hrilh tur thu te a sawi bawk a, pawi ka ti hran lo. Tlai dar 2 bawr velah a haw ve chauh a, min hmangaihtu nu leh pa neih zawng a va'n nuam ṭhin tak êm. Neeraj-a ka ngaihtuah lo thei lo va, a chhungte'n an han tuithlar mai kha a nâ dawn lutuk, chutah a hna thawh lai thlengin an tih tawp sak vek a, hmangaihna an nei lo lutuk chu ka haw ngawih ngawih. Dar 4 velah a lo haw a, tlai dang ang bawkin ka lo be siam siam a, a inbualna tur tui siamsak ka tum chu a phal lo va, ka chet hi a phal vak lo leh ṭhin.

"Neeraj, thil sawipui che ka duh a, i hman em?" a phone khawih lai chu tawp chatin min rawn en a, ṭhu thluang duai hian a bân a phar a, a bula va ṭhu turin min duh tih hrethiam zetin ka kal phei nghal a, a âwm nghenga ṭhut chu a nuam tak zet. 

"Eng nge i sawi duh chu ni a? Bawihtea a mu tawh em ni?" min kuah pahin a phone chu a khawih mual mual a, Vai ṭawng hian eng emaw ni a type ṭeuh a, a hna thil lam a nih ka ring. 

"Kan sakhuana hi i pawm duh ang em? Ka sawi awmzia" ka tih laklawh lai chuan chiang deuh hian min melh chhuk run a, ka sawi zawm loh phah a, a thinrim nge rim lo pawh ka hre lo.

"Ka tihna chhan chu maw Pathianni zing leh zan kan inkhawm ziah tho a, chu vang a nia" ka tih leh chuan ka hmui a rawn hup chat a, a phone-a thil type lai chu thawnin a hmet thim nghal a, sawi a hun rih lo ni berin ka hre ta.

"Mu ang le, ka chau riau mai" a ti daih a, kan room lamah min pawm lut a, nui zeuhin min fawp vang vang a, lem zetin ka nuih lêt a, a harsa viau ang tih ka hlau a ni. 

Khuma kan mut hnu chuan a muhil nghal mai a, kei erawh ka muhil thei lawk lo thung. Ka pasal hmel chu ka en vang vang a, Pathian hnena inngah tawp loh chu tih theih vak ka nei lutuk dawn lo tih ka hre lâwk vek a, mahse ka theih tawp chhuah chu ka tum em em tho. Ni e, ka pasal Neeraj-a, hnam dang bakah sakhuana pawh dang daih a ni a, kan sakhuana ang chu vuan ve se ka duh a, duh satliah mai ni lovin ka duh tak zet a, ka pasal chu Kristian chhungkua min dinpui turin ka duh a ni. A thei tih ka hria, mahse chuti maiin a rilru hneh a awlsam dawn lo tih erawh ka hre reng thung.

Chumi zan aṭang chuan sawipui lam ka áwn lo ta vang vang a, zawi zawiin a rilru hneh tum ila a ṭhat zawk ka ring. A chhungte tuithlar huam khawpin nupuiah min nei a, chu ringawt pawh chu a tan chuan a lian tham viau tawh a, kei a nupui lah hian kan sakhuana ang vuan se ka duh a, amah nen Kristian chhungkaw dik tak din ka duh bawk si a ni. A tan chuan a har ve ngawt ang, kei ngei pawh hi an sakhua vuan turin min ti ta se ka duh teuh lo ang. Hmangaihin ka fapa pa ni mah se Pathian phata ka Kristianna hlih ai chuan inṭhen ka duh zawk maithei, thil chi hrang hrang ka ngaihtuah a, ka rilru a kal thui khawp mai.

Hnam tin mai hian kan sakhuana kan dah chungnung ber zel a, hnam dangte sakhuana ai paw'n ṭha zawkah kan ngai vek a, kan sakhuana ang ring lo tam tak tan hian rin a harsa awm ṭhin ka ti. A bikin kan Pathian ngat phei hi chu hnam dang tan chuan rinhlelh a awl dawn lutuk, mahse kei chuan ka ringhlel ngai lo va, a awm tih leh thil tithei tak a ni tih ka hre chiang em em a, a hun taka che ṭhin Pathian a ni tih ka hre bawk. Ka pasal, hnam dang mi pawh hi a hun takah a lam a hnaih theih nân keimah kaltlangin a che dawn tih ka ring ve tawp a, Pathian a nihzia a lantir leh ngei ka ring.

Bawihtea chu a leikang chho ta viau a, râk a ching chho ṭan a, a pute ho lahin an lawm em em bawk si, hnam dang ka neih avanga min en hrang ta miah lo te chu ka lawm tak zet. Neeraj-a pawh an be ṭha reng a, amah Neeraj-a tak paw'n a la zah em em reng zel a, ka chhungte chuan ngaiah an nei tawp tawh a ni ber. Ka nu nen kan awm dun hi chuan ka thil tih dan leh Neeraj-a chungchang min zawt deuh tawp zel a, zep awm lovin ka hrilh vek a, mahse ani paw'n beiseina chu a nei chiang a ni. Kâr tawpah hian a chang zeuh zeuhin chaw kan ei phei ṭhin a, mahse thla khatah vawi khat pawh kan ei phei ngai lo. Lên erawh kâr tawp apiangin kan lêng ṭhin thung a, nuam kan ti tlang thei khawp. 

Nilaini zan a ni a, ka piancham a nih avangin Hotel-ah chaw min ei chhuahpui a, Delhi-ah awm ila chuan hmun nuam taka min kalpui a tum thu a sawi nghe nghe. Kan fapa paw'n thla 6 a tling ve var var tawh a, mipa a nih vang nge ni a chak ang reng viau a, a pa a chhun tawlh tawlh bawkin ka hria. Neeraj-a chuan birthday present min lei sak a tum a, mahse ka birthday hma nî aṭang tawh min leisak lo turin ka ti a, thil min lei aiah thil dang dil duh ka neih thu ka sawi ta zawk a, ka duh dan chu remtiin zanriah tal min ei chhuah pui a, min hmangaiha min ngaihtuah em em ṭhin hi ka fak ve thlawt a ni. Zanriah kan ei zawh chuan inah kan haw tlang nghal a, ka nute in lamah pawh kan pêng kawi duh ta lo law law.

"Neeraj" kan fapa awi hliau hliautu ka pasal lam chu ka hawi reng a, nui sukin kan fapa chu a fawp leh zeuh a, a awi mu tawh dawn emaw tih laiin Bawihtea erawh a la nui uar reuh hle. 

"Ka hria e, eng tak chu ni ang maw!?" ti nuah nuahin Bawihtea chu khumah a mut a, thin rik theih a khâl tur a pe zui nghal a, ka thil dil tur chu hre châk viau mah se a hriat hunah a lung a awi lo leh si ang tih ka hlau.

"Han sawi teh le ka hmangaih em em nu, vawiin hian i upa sawt a, i hmelṭha sawt thung. Eng chu nge min dil i duh a? Ka pek theih apiang chu ka pe ang che, ka tiam e" nui sun sun hian min kuah a, kan lam dun a ni mah zawk. 

"Kei leh i fapa hi Kristian chhungkua min dinpui turin ka duh che, ka ngen a che, min dinpui thei ang em?" ka thusawi chuan a ṭhawng hle a, ka taksa hlatah a awm vat a, ngawi reng hian tukverh bulah a va ding daih a, a hnung lam aṭangin ka kuah thuai bawk. 

"I lung ka tiawi lo a nih chuan min ngaidam rawh Neeraj, mahse maw ka rilru a nuam thei lo. Ka pasal hmelṭha leh fel em em, hmangaihna ngah em em hi kan Pathian ring turin ka duh a, kan sakhuana min vawn pui turin ka duh a ni" ka ti zui mawlh mawlh a, ka kuah nghet hle a, ani erawh chuan min kuah lêt eih lo. 

"Khawngaihin Neeraj, a harsa dawn tih ka hria, mahse kei i nupui leh i fapa tan hian tum la ka duh che a ni. Kristian ṭha tak ni ila, hnam dang ni mah la Pathian tan chuan ang khat vek kan ni, khawngaihin ka dilna che hi tihlawhtling rawh Neeraj" ka ṭawng zo hman ṭâwk tihah ka lam a lo hawi a, a rilru a hah hmel tak zet.

"Khawvela ka châk ber chu Mizo nih hi a ni asin, a chhan chu maw khawvela ka mihring hmangaih ber hi Mizo i ni tlat a, kan hnam inang lo mah se ka hmangaih em em che a, Mizo ni ila chuan in Pathian rin hi ka rin ve theih mai ka ring" thawk a lâk vang vang hnuah a rawn ti a, a rilru tur chu ka hrethiam khawp mai. 

"Ka sawi tawh kha, kan Pathian rin hi chuan mihring zawng zawng a hmangaih vek, hmangaih loh a nei lo. Kei pawh min hmangaih a, nang pawh a hmangaih che a, ṭanpui kan ngaihna laiah min ṭanpui bawk a, kan Pathian hi hmuh theih loh mah se a awm ngei a ni. Chu tak chu i buaina a ni tih ka hria, mahse maw Neeraj, kan hmuh theih loh leh khawih theih loh te hi thil awm lo tihna a ni lo" ka ti ta duah a, ka thusawi chuan kawngro a su vak hran lo.

"Sawi tawh lo zawk teh ang" tia kal sawn a tum chu ka chelh bet a, ka chhoh melh ral a, ani chuan rilru hah hmel zet hian min en chhuk run thung. 

"Ka thil dil che hi min tihhlawhtlinsak dawn lo tihna em ni? Khawngaihin Neeraj, ka pasal hi Kristian ni la ka duh che alawm, pa ṭha tak; a nupui leh a fate tana Kristian pa ṭha tak ni la ka duh che a ni" ka tih leh mawlh mawlh a, a thaw huai ringawt.

"Min nawr lui suh Zodin" kan ngawih dun vang vang hnuah a rawn ti chang rút a, ka sawi zawm tawh lo va, ka nawr nghal mah mah a ni mahna le.

"Ka tihpalh" tih leh kal sawn ka rual a, rilru nuam lo deuhin bathroom-ah ka inkalh hnan a, ka rilruin ka ṭawngṭai pah reng bawk. 

Thawm chu a reh vang vang a, minute 15 hnuah pawh bathroom aṭang chuan ka la chhuak lo va, ka ngaihtuahna a kal kawi nasa êm bawk a ni. Thawm a awm loh danah Neeraj-a chu a mu tawh a nih ka ring ve tawp a, chhuah ka la tum ta chuang lo. Ka ṭhu ngawi reng a, ka awm vang vang laiin kawngka chu pawn lam aṭangin a inchum ri a, ka phu nasa hle.

"I ṭap em ni Zodin? I ṭha em?" Neeraj-a aw ngei a ni a, a muhil thei bik lo a ni maithei. 

"Ṭap lo" pangngai tak chuan ka chhang ve mai a, ka awm ngaiin ka la awm reng a, ka chhuah loh chhan chu ka hre tawh bik lo.

"Kawngka hi lo hawng teh le, ka awm i tinuam lo zual a nia, ka ngaihtuah hle che a ni. Hawng rawh le, i ṭha tih ka chian hma chu ka hahdam thei lo" a tih chuan muangchang hian ka che a, kawngka ka hawn rualin min pawt chhuak rang khawp. 

"Ka tihpalh Zodin, i thil min dil ber kher hi a harsa êm a ni" ti supin a âwmah min kuah bet a, ka hnung zâng leh ka sam chu a chul hliau hliau a, min duat hle bawk. 

"Ka hmangaih che Neeraj" ka tih chuan min nam hla deuh hret a, chiang taka min en chung hian

"Aw le, ka tum chhin phawt ang a, mahse ka thei lo a nih chuan in sakhuana vuan tur hian pen khat pawh ka pen leh tawh lo thung ang" a ti ta hlawl mai, ka lawm leh hamhaih lutuk chu ka buai vekin ka hria.

"Ka hmangaih berin a pianchamah thil min dil a, tihhlawhtlinsak loh ngawt ka duh bik hleinem, lungngai hmel min hmuh tawh suh Zodin" ti lehin ka biang pahnih chu a khuap a, mittui tling pamin ka melh chho a, amah bawk chuan 

"Ṭah tum ringawt lo la, Kristian nih hi nangmah vanga chauh tum ka ni" tiin min fawp a, hmangaih takin ka chhang lêt tawn tawn a, ka pasal ka hmangaih em emin keimah avanga Kristian nih a tum chu ka lawm a ni.

A tuk aṭang chuan ka ngaihven zual em em a, a office bag-ah Mizo Bible a keng ta ziah bawk a, a bul ṭanna chauh mah ni se ka lawm nghal em em. Pathian hnenah lawmthu ka sawi bâng lo va, ka pasal nun chu keimah kaltlanga kaihruai turin ka ngen a, ka dil a, a chhan chu ka pasal lû chu Krista ni se, ka lu chu ka pasal ni bawk se ka duh a ni. Ka chhungte pawh ka hrilh a, mak an ti ve hle. Ka pa phei chuan

"Neeraj-a hi ka hriat tirh aṭang tawh ka rin ang a la ni lo char char, a hmangaih viau che a nih dawn hi le, missionary hna thawk ang mai alawm i nih" min ti nghe nghe a, ka hlim rualin ka hlimna chu engmah lo mai a ni ang tih ka hlau ru tho. 

Kâr kan hmang ral a, thil awm dan chu mak tak a ni. Pathianin hna a thawk tih ka chiang, Neeraj-a ni se a danglam sâwt em em a, min hmangaih zual ka ti mai. Inkhawm zan apiangin kan inkhawm ziah a, a chang chuan ka chhungte pawh kan biak in lamah an rawn inkhawm phei nghe nghe ṭhin. Hmuh theih khawpin ka pasal chuan hma a sawn chak a, Bible chhiar chhuah vek a tum a, Mizo ṭawng ziak a chhiar lohna a rei ve tawh bawk nen a bei ngawrh thei hle. Zan tlai tak tak a men phah a, min hmangaihna chu ropui ka ti lo thei lo. Kristian a nih duh vang ni lovin kei min hmangaih vang zawkin Kristian nih a tum a, ka pasal chu ka ngaisang tak zet.

Thil mak tak pakhat a thleng leh a, Setana a che ka ti mai. Ka pasal thawhpui pakhat hnam dang tho hian ka pasal chu Kristian sakhuana vuan lo turin a lo thlem ṭhin a, ka pasal chuan engkim min hrilh leh vek ṭhin a, a chhan lêt dan thlengin. A hlimna bulpui ber chu a chhungkua, kei leh kan fapa a nih thu a sawi tih ka hriat ní chuan ka awm a nuam veng veng thei, engkim chu Pathian remruatna a ni hialin ka hre ta. Mizo mipa ngei pasala neih tumin hnam dang mi ka hmangaih tlat dan te, pasala ka neih dan te, Pathian ruat ni lo se chu Neeraj-a nen kan intawng miah lo ang. 

Ka pasal rilru hneha Kristian chhungkua min dinpui tura ka duhna te chu Pathian remruat ka ti lo thei lo, chutah Neeraj-a ber chuan hma a sawn nasa em em a, Bible pawh a chhiar chhuak ṭep tawh hial a, engkim chu Pathian hnathawh bawk a ni. Chutih rual chuan a thawpuite hnen aṭangin harsatna neuh neuh a tâwk ve a, ka tan tak pawh a nuam lo ṭhin. Ni khat chu a nuamsam vak lo va, a hna lama kal lo mai turin ka ti a, a kal lo ve mai bawk. A ṭha leh mai dawn emaw tih laiin a dam lo zual ta vak a, ka nute ka ko phei nghe nghe a, tum loh deuhin Hospital-ah kan lut ta ringawt bawk.

Ni hnih chhung vel khum betin a dam lo va, a ṭha chho ve leh mai a, hna pawh a kal leh thei tawh a, keimah avanga Kristian nih tum ka pasal chu ka khawngaihin ka hmangaih thlawt a ni. A tirah kei min hmangaih avangin a chhungte'n an tuithlar tawh a, chumi hnuah kei min hmangaih vang bawkin an sakhuana aiah kan sakhuana vawn a tum leh zel a, ani ang mipa ṭha lutuk chu ka phu lo zawk a ni. Tlai khat a lo haw chu Pathian a rin tawh thu a sawi hlawl a, ka awihsak mai lo va, a chhan pawh ka lawm nana sawi a nih ka ring a, mahse a lo ni teuh lo. Ka zawh fê hnuah pawh

"Ka dam loh lai khan ka hmu alawm, ka hmu chiang a ni. Min tidam tih pawh ka hria, ka ring duh lo va, ka pehhel zel a, a tawpah chuan ka ring ta nge nge e. Kristian sakhua hi ka sakhua a ni tawh a, ka phatsan ngai lo bawk ang" a tih tlat a, awih loh theih a ni ta lo.

"Ka lawm e Neeraj, ka lawm tak zet a ni" tiin ka kuah thlawp a, ka mittui pawh a hnai kuarh a, thil thlen dan leh Pathian a hmuh dan zawng zawng chu a lem ka tih rualin a tak ngei a ni bawk si, ka pasal chuan dawt a sawi lo tih keimahah hian a chiang em em bawk.

"I hlim tawh em?" a tih chuan ka bu nghat a, min pawm kangin min fawp ngawng ngawng a, chu ní ang renga hlim chu ka la nei lo ang ka ring. 

Kan veng Pastor te a be nghal a, ka kalpui nghe nghe a, ka pasal chuan Baptisma chan a duh a, ka lawmna a va zual tak êm. Kei ve mai mai, dik lohna leh sualna pawh ngah ve tak, Pathian duh lo zawng ngei pawh lo ti ve tawh leh lo paltlang tawhin ka pasal; hnam dang mi Kristian ka nih tir thei chu mak ka ti bâng thei lo, Pathian hnathawh vang liau liau a ni. Pathianni chawhnuah ka pasal chuan Baptisma a chang ta ngei a, kohhran mipui chuan mak an tih mai bakah min lawmpui hle a, ka pa sawi ang tak takin missionary hna pakhat ka thawk ve ni maiin ka hre ta. 

Synod bookroom-ah kalin Kristian nun dan hrang hrang lehkhabu a lei ṭeuh a, English ṭawnga inziak a chah thleng nual bawk a, a sawi dan chuan English chu chhiar nuam a ti zawk a nih hmel. A àwm ve reng, Mizo ṭawnga inziak lehkhabu a chhiar lai hi chuan a bih deuh ngawt ngawt a, hun a duh rei ṭhin. English lehkhabu erawh a chhiar zung zung thei a, thla tam a ral hmain ka pasal nunah chuan a lehkhabu chhiar rah a rawn lang chho ṭan a, Mizo mipa Kristian tam tak te hian an tluk ka ring bik miah lo. Chuti ang khawp chuan a fel a, a nun a ngil a, thinrim pawh a nei ngai meuh lo zawk. 

Kan fapa paw'n kum a'n tling chho a, ka rai leh mêk tawh bawk a, Pathian malsawmna kan dawng mawlh mawlh hi a ni mai. Zan khat chu lungngaih hmel deuh hian a ṭhu ngawi run a, a lung tiawi lo zawnga ka awm ka hre bawk si lo. A hmaah chuan paper a awm hnawk nuaih a, ka rem ṭhatsak lai pawh chuan engmah a la sawi duh chuang lo.

"Thil thleng a awm em?" ka tih chuan min en zawk a, a hawi sawn leh nghal a, a sawi duh chiah lo a nih ka ring, mahse a lungngaihna chu ṭawmpui ve ka duh tlat si a ni. 

"Neeraj?" tiin a bulah ka ṭhu a, a kut chu ka hum ve tak ná a, a inlen hleih teh e. 

"Kan pu pakhat hian mipui sum tur a ei ru ṭeuh a, engkim ka hre bawk si, ka rilru a nuam thei lo" a ti ta nge nge a, ka rin loh lam daih a rawn sawi. 

"Kei chuan ei rukna hi ka hua, ka Kristianna nen hian a inmil theiin ka hre lo" min en chuang lo hian a ti leh a, a pen ken chu a chhu ri kauh kauh a, ka pasal chu ka va ngaisang thar tak êm.

"I sawi dik chiah, nang chu Kristian i ni tawh alawm Neeraj, nang ang mi ṭha lutuk pasala ka nei che hi ka lawm a ni" tiin ka biang chuan a biang ka va nâwk a, ka kuah rualin min kuah ve nghal a, a biang chu ka fawp zeuh bawk. 

"I pum a nuam maw?" dam dapa a tih chuan ṭawngkâa chhang lovin ka bûk khum a, ka pasal chu hnam dang ni mah se a Kristian nihna chu ka ngai hlu ber a, ka hmangaih a, ka hmangaih tluk zetin min hmangaih bawk a, hmangaih ber te nena Kristian chhungkua kan din thei chu Pathian pawh a lawm ngei ka ring.

A TAWP TA

A ziaktu tawp kharna

He thawnthu ka ziah lai hian ka rilru a insual nasa em em a, a chhan pawh sawisel theihna lai a tam êm vang pakhat a ni. Hnam dang nupui pasala neih ka thlawp vanga ziak ka ni lo va, a nihna takah chuan ka thlawp bik miah lo, mahse Pathian remruatna hi tûma dal theih a ni lo tih kan hriat ve a ngaiin ka hria. Tin, keini Mizo te chauh ni lo hnam dangte pawh hi Pathian ringtu ṭha tak an ni thei a, Mizote ai aia Kristian zawk te pawh an awm thei a, awm lo tam tak an awm tih thlengin kan hriat tel ve a ngai bawk.