HMINGHLUI By Havali Adam (Part II)

HMINGHLUI

(Mizo Arranged Marriage Short Story)

By 

Havali Adam

Part II

Kan inneih aṭanga kum 3 a liam meuh chuan kan fapa paw'n kum 1 a tling ve ta, ka nupui, ka hmeichhe hmangaih em emin fapa min pek nî kha chuan lawm lutuk avangin ṭawng mai nachang pawh ka hre lo a nih kha! Ka pa paw'n min sáwi harh hial a, ka lawm bawk si, hlim bawk si kha chet nachang ka hre lo a ni ber. Hminghlui ni se taksa nâ nei miah lovin a awm a, a hriselna a chhiat phah lo va, ka lawm tak zet a ni. Chutah kan fapa lah chuan a pian tirh aṭang hawtin min chhun em em a, a meng fiah reuh si, pa nih zet zawng a dang daiin nuam ka ti hle.

Ka office bâng ina ka haw te hi a tê a tê hian min lo pan vat ṭhin reuh a, kan fapa chu a ṭha thei ang berin kan enkawl a, ei tur lam pawh kan fimkhur mai bakah a him chin bak kan ei tir ngai lo. A nu hnutê seh a ching reuh leh nghal a, eng dang a ni lo, a lâwmawmin a duhawm thlawt a ni. Hminghlui phei chu ka hmu ṭha tawlh tawlh a, ka pa thu zawm lovin nupuiah ka nei lo vang tih ka hlau hnuhnawh tak zet tawh. Ka hmangaih em em a, ani paw'n min hmangaih a, inhauh pawh kan nei ngai meuh lo. Amah aia kei leh kan fapa ngaihtuah zawk chang a ngah a, a lawmawm rualin amah ber ṭha se ka ti ber thung.

Ruah a sur cher cher a, khua chu a chéng ang reng viau bawk. Office-ah ka ṭhu tum bûr a, a chhan pawh phone signal a awm loh vang a ni. Nitin ka nupui ka be ziah a, chhun chawlh hun a ni tawh bawk nen ka be thei lo chu nuam ka ti lo hle. Thil dang ngaihtuah rauh rauh paha phone ka khawih mual mual lai chuan signal a rawn awm a, mahse a tam chuang lo. Hminghlui ka call ta vat a, signal awm lai ka chuh a ni ber. Vawi thum lai ka call hnuah pawh a la thei reng reng lo va, ka ngaih a ṭha lo viau bawk. Chawlh lai a ni tho alawm ti rilru chungin office aṭang chuan ka chhuak thuai a, ruah lah chu a sur nasa phian leh nghal.

In ka va thlen chuan Hminghlui leh kan fapa ka zawng ruaî a, tui taka an muhil ka hmu chiah chu ka hahdam sawng sawng thei. Ka thawmah kan fapa zawk a harh a, fiah tak hian min en kiau reuh a, ṭah pawh a ṭap miah lo. A nu erawh a la mu tui em em a, ka awm loh hlana a lo khawhar ṭhin turzia te ka ngaihtuah chhuak a, ka inthiam lo rum rum bawk. Kan fapa chu ka pawm a, ka awi mu leh daih a, kei pawh ka nupui kuahin ka mu a, office lama lét ka châk lo kher mai. Hminghlui chu ka kuah aṭanga rei lo tê hnuah a mut dan a siam rem a, nuam tih hmel deuhin min khan chial a, kei tak paw'n nuam ka ti.

"E hé....i lo haw tawh maw!?" a pum ka zût ka zut tâkah chuan a harh ta nge nge a, a zawhna pawh chhang lovin ka nui suk ringawt. 

"Thawh ka hai nasa hle mai, ruah chu a va'n sur rei tawh em em" a rawn ti leh niah niah a, a tho phang hmel te chu a ṭha ngawih ngawih. 

"Min thlah la, ei rawng bawl ka ngai alawm, ka nute pawh an lo haw ṭep tawh ang" thawh a tum a, mahse ka la kuah bet tlat thung. 

"U Jimmy" a tih leh chuan inbeng kángin ka nupui duhawm zet chu ka en vang vang a, a lài deuh reuh te'n ka hria, mahse chu chuan a tilang duhawm zual tak zet a ni.

"Thawh a la hun lo, dar 1 pawh a la ri lo ang" ka tih chuan

"Eng nge i sawi awmzia?" a ti nghal a, min chhoh melh deuh hû bawk. 

"Chawlh lai a ni a, ka call ṭhin che a, i là thei bawk si lo, ka lo haw tawp a nih hi, office lamah pawh ka lêt tawh kher lo vang" a beng vun ném lai khawih neuh neuh paha ka tih chuan mak a tih hmel teh e!

"Tlai a la ni lo maw!?" tih leh lukham hnuaia a phone lak a rual nghal a, hahdam hmel zeta thawk láin phone chu a awmna ngaiah a rawlh lut a, thlamuang takin a ka âwm a bei leh ta hle hle.

"Kan fapa nen chauha awm hi a khawhar thlak áwm ṭhin?" ka tih chuan ka lam a rawn hawi chho zeuh a, mahse min chhang ta mai lo chuan a mut ngaiin a mu leh daih a, min chhan dan tur a ngaihtuah hmasa tê tê phawt a ni mahna.

"Dawt sawi i inhmel lo a nia, i pasal hi i rilru dik tak min han hrilh teh le" kan ngawih dun reng hnu chuan ka ti leh sup a, duh aiin a ngawi rei mah mah a ni.

"Dik tak chuan a khawhar thlak ve ṭhin tho, mahse a ho lutuk, engah mah ka ngai lo. Chhunah kan inbe ziah tho alawm, ka khua a har tak tak lo, ka sawi ve mai mai a nih kha!" a ti sêp sep a, a ṭawng tawp lam chu a inthlahrun hmel hle bawk. 

"Awmpui tur kan la mai dawn em ni ang?" râwn ang takin ka lang a, mahse ka râwn em em pawh a ni chiah lo, hahdam takin awm se ka duh ber. 

"Ka duh teuh lo mai, a chi loh lutuk! Nangni angin sawrkar hna pawh ka thawh ve loh hî, ina awm te mai mai a khawhar thlak loh, harsatna ka nei lo hrim hrim" a ti nghal mawlh mawlh a, a inthlahrung tih erawh phat rual a ni lo. 

"Keini angin sawrkar hna i thawk miah lo, mahse kan chhungkaw hlimna bulpui ber zingah i tel thung alawm, awmpui la ta pawh ni ila tûma'n pawi an tih ka ring lo" ka tih chuan rang zet hian

"A chi loh u Jimmy, a chi loh tak tak!" a rawn ti thuai a, ngenngawl deuh hian min en ran a, mahse min en rei lovin a hawi sawn a, ka âwmah a bei leh ta daih. 

"I lung ka tiawi lo em ni?" tiin a khabeah ka chawi a, kan inen chiang ná chu a hawi sawn hmasa zawkah a ṭang leh tho. 

"Tiawi lo lo ve, nangte chuan kha nî, min hmangaih thu i sawi nî aṭang khan ka lung tihawi loh i nei tawh ngai hleinem. Khami nî bak kha chu min hmangaih thu i sawi leh ta miah lo va, mahse ka laka i awm dan aṭang te, min biak dan aṭang te, min ngaihtuah reng rengin nitin hun i hmang tih ka hriat hian min hmangaih tih ka hriat chian phah em em thung" ngaihthlak nuam zet hian a ti sêp sep a, ngawi zui ta mai lo chuan

"Ka tan hi chuan i fel ve ê u Jimmy, min ngaihtuah leh lutuk a, ka sual phah vek mai ang. Lehkha zir sang ka ni lo va, hmeichhe changkang tak ka ni lo bawk. Ka hun kal tawh thlengin in hre vek a, ka duh ber chu maw nu ṭha tak nih te, ka pasal tan nupui ṭha tak nih te, ka nu leh pate tana mo fel tak leh u Lucy-i tana unaunu ṭha tak nih a ni" a tih zawm nghal zat a, a nui sak a, hmangaih loh a har thlawt a ni. 

"Chu, ka hmaingaih che thu ka sawi fô i phut ru deuh tihna em ni?" fiam deuh reuh pah chuan ka ti a, nui sen sen hian ka âwm a chum taih a, bei zawm nghal zat a tum chu ka kuai dak a, hmangaih takin ka fawp ta vawng vawng.

Office lamah chuan ka lêt lo ta ngei a, ka thawhpui pakhat ka hrilh a, mahse ka chawlh thut chhan ka sawi lém lo. Ka nupui nen chuan kan inkuah chial a, ka mut a chhuak lo bawk nen ka meng kar a, ani erawh thaw ri sêk sekin a muhil daih tawh thung. A muhil tho ná chu a biang no leh nem nuam takah chuan ka fawp leh zeuh ṭhin a, ka lung a tiawi ve thlawt a ni. Ka lo muhil a ni ngei ang thil dangin ka hmui a rawn tawh avang chuan ka harh zawk a, mahse ka mit ka meng lo va, vawi khat mai ni lo min fawp zeuh zeuhtu chu tu dang ni lovin ka nupui a ni tih ka chiang hle.

Khum aṭanga a chhuk tur chu ka man bet a, ka harh tih a hriat rualin a meng phawk hle a, a zak emaw a ni leh tawh ngei ang. Kuai muin ka fawp ngawng ngawng a, ani paw'n min rawn chhang lêt ve leh mial mial a, a taksa sik te, a hmui fawh nuam tak fawh reng te chu ka duh a, ka kham thei mawlh lo a ni. Kan bulah kan fapa a muhil bam reuh bawk si a, ka mamawhna inlinglet chho ṭan mah se nupa nun ka hmanpui ta lo. Khua erawh a dul ruih a, a hniam ruih a, khum laizawla hmangaihna han chen dul vel chu a inmil phian lawi a, mahse ka che lo ta law law.

Ei rawng kan bawl dun a, kan inchhaih nui ar ar a, a changin kan infawp leh nge nge ṭhin. Pa nih te, nupui neih te zawng a nuam chiang a ni. Kan fapa a harh tâkah chuan keima'n ka pawm chawt a, ka pawm emaw ka taksa sia a awm tawh hi chuan ka sam a khál mai zel a, a tlei thei khawp. A nu ei rawng bawl tibuai chuang lovin chokaah kan awm ve reng a, dar 3 a pelh fel hnu chuan mi dang chu an lo haw sap sap a, kan fapa pawh Lucy-i'n a pawm daih a, ka nu leh pa thlengin an bang lo. Nautê pawm an inchuh laih laih a, hmuh nuam ka ti ṭhin. Ka dem lo va, áwm ka ti viau zawk, tû an awt ve tawh ém a, tú tam tak nei se ka duh bawk. 

"Eng nge?" muangchanga a kawr hnuai hak ka pawh thlak riai riai lai chuan a rawn ti sep a, chu zawhna chu min zawt ve tak ná a, ka rilrua awm a hriat vek tho ka ring. 

"Kan tiharh palh ang e aw" ti lehin khum sira mu kan fapa chu a en zeuh a, min rawn en leh chuan ka lo nuih suk a, tlai aṭanga insum ru deuh reuh tawh kha ka nia, kan fapa tiharh lo zawnga ka chet a ngai a ni mai. 

"Min ring tawp rawh duhawmnu" ti supin ka fawp zui nghal mial mial a, ani pawh a dawh hle hle thei ta bik lo, min mamawh em em ang hian a awm a, chu chu a taksa awm dan leh a rilrua awm dik tak a nih ngei ka ring bawk.

A tir lamah chuan thawm dim takin ka che a, mahse ka thei rei lo chiang kher mai. Keimah leh keimah pawh ka inthunun thei lo, a chhan chu ka nupui taksa chuan min zém tlat a, min thunun zawk ni berin ka hria. Kan zawh fel meuh chuan thlan tui nen kan inkuah chial a, kan fapa pawh a harh lo hlauh e. Zingah chuan thawh khalh ka tum tehreng nen ka nupui chuan min thawh khalh a, a hah lutuk ang tih te, a chau lutuk ang tih te ka hlau ṭhin. Thingpui min siam a, kan in dun a, a ṭawng melh melh a, a kum phu lovin a puitling sâwt viau a, mahse ka bulah zawng a la naupangchhia tluang zel tho, kei tak paw'n ka duh daih zawk.

Ka nu leh pate laka a awm dan lah a lungawithlak hliah hliah bawk si, a nun hmasa lam duhawm loh mah se kan chhungkaw tan chuan a ṭha hliah hliah a ni. Amah avangin ngaihtuahna ka sén hnem phah a, a dinhmun chu ka ngaihtuah lo thei lo a ni. Mo nih hahthlak turzia ka dâwn a, mipa tam tak chuan hmeichhiate dawl zawh  ang hi kan dawl zo kher lo vang. Pasal an nei a, an nulat lai angin an zalen tak tak thei tawh lo va, chhungkaw tan nungchang ṭha put a ngai reng bawk a, kei ngei pawh hian an dinhmun ang chu ka tlin kher lo maithei.

Tin, amah hi lehkha zir sang a ni lo tih ka hria, mahse mizo ṭawnga ziak lehkha chhiar a peih viau a, a hman chang hi chuan a chhiar mai ṭhin. Zirlai eng thle nge a zir ka zawt ngai lo va, a chhan chu zawh a ṭulin ka hre lo tlat. A zir sang lo tih chu a hriat sa reng, zawt ta ila a inthlahrung emaw a ni ngei ang a, a rilru tih nât ai chuan zawh lo law law a fuh zawk. Chutih rual chuan a hriatna a ṭha phian a, thil te hi a hre rei thei fû a, office ka kal dawn te hian ka thil ken kim leh kim loh min zawt hmasa thlap a, chumi hnuah min thlah liam chauh ṭhin.

"Champhaiah chuan zin in tum ṭalh maw? Nautê hi chu hetah awm rih mai rawh se, a dam lo palh ang" ka pa chuan kan fapa pawm pahin a rawn ti a, keiin bag-ah thawmhnaw ka khung mial mial a, kan chhungkua bik têa zin khawthawn ka duh tlat a, office chawlh kan nei nual bawk nen chawlh ka la hmiah a, hun remchang bawhpelh ka tum lo bur. 

"Ni e Jimmy, Hminghlui hi a dam ṭha vak lo leh nghal" ka nu chu ka en vat a, Hminghlui lam ka hawi zawm leh zat a, ani erawh lu a lo thing nang nang thung. 

"Ka ṭha alawm, engmah harsatna ka nei lo" a rawn ti ta thuai a, ka thawmhnaw khung lai pawh ka tawp chat a, a dam ṭha lo tih reng ka hre ve hleinem. 

"Ka nu sawi ang khan ka awm miah lo a nia, ka hritlang deuh mai chauh a ni" kan nupa room-a ka kaih luh rualin a ti mawlh mawlh a, ngenngawl deuhin min melh chho ral bawk.

"Kan ṭhulh mai dawn em ni ang? Hun dang a awm leh turah ngai ila, ka lo ngaihtuah lo deuh che a ni" ka tih chuan

"Aih, a chi loh, kal ang, chawlh i nei khât thei si. Ka ṭha tak tak, hritlang satliah mai alawm ka kai, ṭhulh ka duh lo" a ti zung zung a, a hmelah chuan ṭhulh a hlauhzia a hriat kher mai.

"U Jimmy, ṭhulh ka duh lo tak tak" a rawn ti leh a, ka kut chu a rawn hum chat a, min en kar a, thawk ka la huai ringawt. 

"Damdawi eng eng emaw ni kan keng chho dawn nia, i nawmsam loh paw'n min hrilh zel tur a ni. I dam lo ang tih ka hlau ber, i dam loh phah chuan a pawi khawp ang" ka ti ta nge nge a, dik tak chuan ṭhulh loh theih chuan ṭhulh loh pawi ka ti miah lo.

Dar 10 velah in aṭangin kan chhuak a, nautê nen kan ni bawk a, ka tlan chak hran lo hle. Kan fapa hnutê pek pahin Hminghlui chu a ṭawng siam siam a, a chhaih bawk a, kei erawh chuan an thawm ngaihthlak nawm zet chu ka lo ngaithla tawp a, boruak te lah chu hip a nuam em em leh nghal. A chanve vel kan tlan hnu chuan kawng laka Restaurant-ah kan chawl a, kan inhnawh puar a, ka nu leh pate lam aṭangin phone call kan dawng deuh reng bawk. Kan inei puar ta maw tihah Champgai lam panin kan tlan chhuak leh a, ka nupui leh ka fapa chu an muhil har lo hle.

Champhai thlen dawn ṭepah Hminghlui zawk a rawn harh a, a tho phang viau leh nghal. Hotel-ah kan thleng a, ni lî chhung châm tur angin kan inruahman a, kâr thar lamah office kal ngai dawn lo se chu Pathianni thleng châm pawh ka pawi ti miah lo. Kan thlen zan aṭang hawtin nuam kan ti tlang em em a, Hminghlui pawh damdawi ka ei tir thlap a, kan in ang maia chet a tum chu nuih a tiza ang reng. Eng emaw hnawk hlek se tih felfai a tum nghal zel a, che vak lo tura ka tih paw'n awmzia a awm lo, a che lui zel tho va, mahse chu chuan ka lung a tiawi hnuhnawh leh em em tho.

A tuk aṭang chuan hmun nuam tak takah ka kal kualpui a, kan fapain nuam ti bawk, ka nupuiin nuam ti bawk, kei ve thung chu an hlim chuan ka hlim a ni mai. Champhai hi chu ka kal zing ve ang reng a, nupui ka neih hma phei kha chuan hna thil avangin kal zing thei tak ka ni. Nupui ka neih hnuah erawh ka kal leh hmasak berna a ni thung a, ka tan chuan hmuh hnu vek mah ni se ka nupui leh kan fapa tan erawh Sap ram ang mai a ni. Hminghlui mawlh chuan nuam a ti tih ka hai lo, a hriat loh apiang min zawt a, min zawt zak lo va, chu chu ka duh dan tak a ni. Dam lohna emaw harsatna a nei ta miah lo va, ka lawm khawp mai. 

Aizawl lama kan haw thlak tlai chuan a dam lo ta thung a, nuam lo ti tak ka ni. A dam loh hi vawi khat chiah ka la hria a, chu chu Grace-i te ina ka len zàn kha a ni a, khang hun lai kha chu ngaihtuah pawh ka ngaihtuah chhuak fô peih lo. Ka népzia te, ka mawlzia te, ka awm dan avang ka nupui lo khawngaihthlak ṭhin zia te ka hriat chhuah phah ṭhin. A dam lo chu a la nâ hran lo va, mahse ngaihtuah tak tê hian ka ngaihtuah thung a, kan fapa pawh ka ngaihsak loh phah hial zawk. Zan tira eng vak ni lo kha zan reiah a rawn zual deuh a, damdawi ka ei tir a, ka mangang ru ngei mai.

"A vawt" a rawn ti thâm chhal ta fô va, rizai phei chu pathum lai ka sin thuah tir tawh a, zia lam ai a zual zel dawn tlatin ka hria.

"Ka chungah hian mu mai rawh" tih leh chet ka rual a, ka chawi kang a, ka âwmah ka bawh mut tir a, a zawi hnuang leh nghal a, ka ngaih a tiṭha lo tulh tulh. 

"I lum deuh em?" ka tih chuan min chhang lo va, a mu ngawi reng a, ka tan chuan rizai pathum em em sin chu a lum mah mah, mahse ka nupui tan ka tawrh ve a ngai tlat.

"A nuam" dam lo aw zet hian a ti sep a, chu bak engmah a sawi leh tawh lo va, a awm a nuam deuh tak tak a ni ang vawt a tih thu tak ngial pawh a sawi tawh lo.

"Mut tui le" ti supin a chhip samah ka fawp a, duat leh hmangaih takin ka kuah a, kuah nât ka hlauh rualin ka kuah lum lo vang tih ka hlau hle.

Mi dangin kan awm dan an rawn hre ve kil kelh tawh lo bawk a, zing thlengin ka tlaivar ta ṭhak a, zing lamah erawh chhin sek ka nei thung. A che ṭual ṭualah ka harh a, a pang ka dek vat a, a lo la lum thar thar a, a la dam lo chiang a ni. Ṭawng lovin ka kuah hle hle a, a lum a tih thu a sawi tâkah chuan rizai pahnih chu ka dah sawn a, a zia ṭan tawh tih ka hrethiam mai bawk. Ka taksa hlatah erawh a awm lo hrim hrim a, inzawm reng ang kan ni. A muhil thaw ri sek sek chu ka en leh ṭhin, ka khawngaih tak zet. Ka nu thusawi kha awih ta ang ni ila chuan a dam lo miah lo vang, mahse engkim a nih tur ang a ni vek tawh.

Ei rawng bawl tur tak ngial pawha a thawh peih loh tâkah chuan ka nute paw'n an rawn ngaihven zual hle a, ka pa'n a ṭhianpa Doctor a ko va, kan inah a en chilh a, ka pa ṭhianpa'n a thluaka khawsikpui a luh ṭep thu a sawi chiah chu hlauthawng tak ka ni. Thluaka khawsikpui lut phei chu thihpui an tam tawh a, a hlauhawm thawkhat tih ka hre chiang a, chu vanga hlauthawng em em pawh chu ka ni. Office kal lovin chawlh ka la leh hmiah a, tunah tak chuan office kal loh avangin ka hna aṭang min bân dawn mah se pawi tihna ka nei lo, ka tan chuan kawng engkimah ka nupui a pawimawh ber a, a hmasa ber zel bawk.

Ni 2 chhung chu a dam lo zawm ta zel a, a ni 3-na aṭang erawh zia lam a pan a, ka khawngaih bawk si, tih theih ka nei tam bawk si lo, rilru a mumal lo ṭhin teh e! Office-a ka awm lai paw'n ka rilru a nuam ngai lo va, kâr khat hnuah pawh ka ngaih a ṭha thei thlawt lo. Amah tak chuan nui sen sen hian a ṭhat tawh thu min hrilh fô va, hlauthawng lo tur te'n min hrilh ziah a, ka ngaithla liam mai zel thung. Ni khat chu damdawi inah kan kal dun ta nge nge a, ka rilru a nuam thei ngang lo a tin ni! Doctor hnenah chuan ka nupui taksa dinhmun te, natna dang a neih ruk leh ruk loh te, ka hlauhthawnna zawng zawng chu ka zawt vek a, vanneih thlak takin ka nupui chu natna emaw harsatna tawk maithei dinhmunah a awm lo hlauh.

"U Jimmy" ka nupui lam chu ka hawi a, nui var var hian a thil ken lai ka kutah a rawn dah a, ka en chiang chiah chu ka awm dan ka siam ṭha rang hle. 

"A ni tak tak em?" ka ti hluai a, min buk khum nghauh nghauh a, ka lawm leh hlim lutuk chu ka kuah vawng vawng a, ka pawm kang a, sawi mai tur ka hre lo bawk nen ka fawp ngawng ngawng ta ringawt.

"Ka lawm e Hminghlu, i hmabak chu inenkawl ṭhat a ni mai. Nautê i neih hma chu awmpui kan la tawh ang, min hnial suh ang che" ka ti zui nghal zung zung a, ani erawh ka thusawi vang a ni ngei ang nuam a tih hmel ta vak lo. 

"Min ngaihtuah ve la, hmeichhia ka nih hi u Jimmy. Mo ka ni a, ka rai avangin in chhungkhur chetah ka awl kher dawn tihna a ni lo. Awmpui lâk ka duh miah lo, a ṭul lo bawk" a rawn ti ta ngei a, a inthlahrung tih ka hria.

"Min hnial suh ka tih khâ, tun ṭum chu min hnial lo tak tak rawh. I la damkawr si, chu bakah i rai hmasak paw'n min hnial tawh a, nau pai chunga in chhung hna thawk tur chuan i dam ṭha lo, chu vangin awmpui kan la ngei ang" ka ti dam dap dap a, ka ngaihtuahzia chu hrethiam mawlh teh se. 

"Thla khat vel ér âwrh chauh ka pum chhungah nautê a la awm a nia, awmpui lo lak nghal ringawt a dik lo. Hnial ka tumna che pawh ni lovin, awmpui kan lá dawn rau rau a nih chuan ka rai len hunah emaw ka chet a nawm lo hunah chauh lák ka duh" a ti tán tân reuh a, mak tak maiin ka rilru a hahdam vek thei. 

"Ni rawh se" ti supin ka fawp zeuh a, room aṭangin ka kai chhuak a, kan chhungte kan hrilh chiah chu lawm tak an ni. 

Chumi ni aṭang chuan indim tur leh che vak lo turin ka chah fô va, ani'n ka hna thawk ṭha turin min hrilh ziah thung a, ka thil theihnghilh min hrilh ziah bawk. A mak ve ngawt mai, nupui ka neih hma te kha chuan mi ti thlip thlep, incheng vawng leh thil theihnghilh mai mai ngai lo kha ka ni ṭhin a, nupui ka neih hnuah erawh danglam tak ka ni. Amaherawhchu pawi ka ti miah lo, ka taksa peng pakhat ang maia ka ngaih, ni nâng, ka nunna ang hiala ka ngaih zawk maw le. Hminghlui ka nei tawh a, zawi zawiin ka rinna a nei a, ka laka zep a neih ngai loh ang bawkin thil pawimawh engkim ka hrilh vek ṭhin.

A rilru te hi a ṭha em em reuh a, mi ṭanpui a hreh lo si. Vawi khat Bazarpuia kan bazar pawh kutdawh a hmuh zawng zawng kha pawisa pek vek a tum a, ka phal der lo, mahse a pe vek tho. A hmuh tam tak tak hmain ka haw pui daih nghe nghe a, zan mutnaah erawh ka ngaihtuahna a tikal thui viau thung. A mipa zawk, Kristian chhungkaw dinna kawnga pawimawh zawk leh chhungkawpa berin kutdawh mai mai pawh pawisa pek ka phal lo chu a nia, insiam ṭhat ka ngaihzia ka hriat chhuah phah a, kum lamah kei aiin naupang daih mah se ka nupui nun thianghlim lutuk chuan thil tam tak min zirtir thung si.

"Hello" kan ṭhenawm Mawimawi hnen aṭanga phone call ka dawng teh hlawl chu mak ka ti ang reng viau. 

"U Jimmy, lo haw thuai rawh, in ina aṭanga thawm lo chhuak hi a mak lutuk. Mi dang an awm ve tlatin ka hria, chhung lam aṭangin kawngka an kalh tlat bawk si" a tih chuan 

"Eng nge i sawi awmzia?" ka ti thuai a, ka hlauthawng ru sâwt hle bawk. 

"Hminghlui ṭap thawm leh ṭe thawm ka hria alawm, vawi khat mai a ni lo. Tukverh ho hi parda a inzar vek bawk si, lo haw vat la ka ti tak zet, u Lucy-i ka call tlang thei lo va, ka lo call tawp che a ni" a rawn ti leh a, chhang tawh lovin ka off hmak a, ka tlan chhuak zui nghal.

Ka tlan chak bawk a ni ang kan in kawt chu minute tam a ral hmain ka thleng thuai a, Mawimawii chu hlauhthawn hmel fê hian a lo ding ngei a, kan ṭhenawm dangte pawh an lo pung khawm ṭan mêk a nih hmel. Kawngka chu hawn ka tum a, a chhung lam aṭangin a inkalh a, hun a duh rei lo zawk dawna ka hriat avangin tukverh darthlalang chu ka hnek keh chuaih a, hawng vatin ka lut nghal thuai a, ka nupui ṭap thawm leh ṭe thawm chu ka hre ve ta. Rang fahran hian thawm awmna lamah ka kal a, chuta ka thil hmuh zet chuan min tilum pup thei.

"Eng vanga ka nupui lo khawih nge i nih?" tivin ṭhawtin ka nupui khawih mêktu lam chu ka pan a, a tlanin ka tlan phei a, ka lam a rawn hawi rualin ka hnek tlu nghal pawp a, ka thinrim lutuk chu ka buai vek tawh.

"Nang pa bawk maw lo ni leh a, i zak miah na nge? I hmeichhe khawih hi ka nupui a ni tih i hria em?" vin taka ṭawngin a hmaiah chuan ka hnek ri chawrh chawrh a, min beih lêt chu a tum ve tak nâ a, a che hman hlawl lo. 

Vawi tam kut ka thlak hnuah chuan a zal raih a, chet emaw min beih lêt pawh a tum tawh lo. Kei erawh chau thei lo ang maiin ka la che mial mial a, ka kutah te chuan thisen a kai nuaih a, thil ka hre chhuak ta zawk. 

"Hminghlu!" zawi thum chhal chuan ka ti khauh hmuk a, mitthi tawh ang maiin a lo mu a, a awmna lamah chuan ka phei ta vat.

"Harh teh Hminghlu, harh rawh, harh nghal rawh" ka ṭawng tawp lam chu a vin hle a, ka hlauthawng bawk si, a harh lawk bawk si lo, a tawpah erawh a rawn meng a, ka lawmzia chu pui tak a ni. 

"U Jimmy, Matthew-a" ring lo zet hian a rawn ti thâm ṭiak a, ka fapa ka lo theihnghilh hmin fel der tih chu ka hre chhuak zawm zat nghal. 

Ka nupui pawm kang lawpin kan fapa chu ka zawng a, ka nupui chuan harsa tih hmel zet hian ka nute khum hnuaia a awm thu a sawi a, chu veleh ka nute room-ah ka lut nghal a, kan fapa chuan khum hnuaiah Toys a lo khâl a, pawt chhuakin ka pawm vawng vawng a, mahse muangchang hman ka ni lo. Ka pa ka call hmasa ber a, thil thlen dan ka sawi a, a lo haw thuai ka ring bawk. Police lam ka call leh nghal a, mi sual chuan an sual man hmu mawlh rawh se, chu chu ka thupui a ni. Hminghlui lo sawisatu mipa chu tu dang ni lovin an khuaa ka han kal ṭuma lo sawisatu bawk kha a ni a, inchhung dik tak pawh an ni lo leh nghal a, khawngaihna emaw zahngaihna lantir ka tum hauh lo.

Hminghlui chu damdawi in lamah ka hruai vat a, ka fapa ka hruai tel bawk a, mahse ani chuan hliam engmah a nei lo thung. Police lamin ka nupui lo sawisatupa chu an hruai a, ka pa pawh a thinrim ve hle. Ka nupui ber chu ka khawngaih ngawih ngawih, a hmai a duk chûr a, hmeichhe tawrh atan chuan a nâ mah mah a ni. Nautê erawh a chhiat lo hlauh a, Lucy-i leh ka nu paw'n an khawngaih hle. Police station lamah kalin thu an zawh fiah lai chuan ka awm ve a, ka nupui sawisatu chuan a patea tih tir vek a nih thu te, thiam lohna a neih loh thute chu ṭap titihin a sawi a, ka va han sa mai mai tak em. 

Police kal hmain Hminghlui patea te in lamah ka kal phei thuai a, ni lo, inchhung dik tak pawh an ni awzawng lo. In chhung ka luh rualin a hmel ka zawng a, mipa a nihna chuan ka insum theihna min hloh tir ni berin ka hria. Ka hnek let tawp a, mahse vawi khat chiah a ni thung. Mipa ni lovin hmeichhia chu ni se kut ka thlak ka ring lo, ka hrawk hrep zawk ang. Kei ai chuan a upa fê ngei e, mahse ka mipat pui lakah chuan kei ai u emaw nau emaw pawh ni se ka thinrimna ka thunun bet zo bik lo tlat. A nupui zawk chuan rak ṭhat hian min rawn khawih a tum a, ka nam sawn dâwrh ringawt.

Rei lo tê hnuah Police an lo thleng a, Station lamah an hruai nghal a, thu an zawh fiah lai thlengin ka awm ve leh ta vek. Hminghlui patea chuan Hminghlui a huat thu hlir a chhak chhuak a, Hminghlui nu leh pate thih ruala an fanu a thih ve thu te, an fanu thih chhana Hminghlui te chhungkua a puh thu te, hrehawm tawp khawka Hminghlui siam a duh thu te a sawi hmiah hmiah a, a zâm map lo leh nghal. Kan awmna hmun inang ngat se zawng ka kut tum a dawng hnem khawp ang, hmun dang aṭangin ka thlir hlauh zawk a, a vannei mai mai a ni. Ka nupui kut thlaka ruahmanna lo siamtute chan tur a chiang tawh tho bawk nen damdawi in lamah ka lêt a, ka nupui chu a lo pangngai viau tawh a, mahse taksa nâ erawh a la nei nual ang ka ring.

"Engati nge u Jimmy? I ṭap maw!?" mak tih hmel deuh hian min en a, ṭah ka tum pawh a ni lo, ka nupui ka khawngaih lutuk leh ka hmangaih lutuk chu ka mittui ka biangah a rawn luang a, chu chu a lo hmu a ni ngei ang.

"Ka tihpalh" ti supin a kut pakhat zawk chu ka la kang a, ka fawp vang vang a, a kut leh lamin ka bianga mittui luang chu a hru hul a, a ṭap ve ta nge nge. 

"Ka theih tawp ka chhuah ang, tihnât tumtu te lakah ka venghim tlat tawh ang che, ka tiam a che" ka âwma kuah beh pahin ka ti leh a, nghet zet hian min kuah lêt a, an vanduaina chu Pathianin lâk bosak daih se ka ti tak zet.

A tukah chuan office-ah kalin bânna ka theh lut a, mahse chuti maiin a lo ban thawt thawt theih awzawng loh. Ka thawhpuite chuan ka bân chhan te min zawt a, a vai vaia hrilh lovin thu dik tak ka sawi a, min ui thiam hlawm viau bawk. Ka pa erawh a lawm em em a, engkima ka chhawk tur chu a lawm a ni ber. Min ring nghal bur a, a sumdawnna lam ka enkawl zawm a nih chuan ani tal inah a lo awm thei ang a, a zia phian tak ang. Hminghlui pawh a ṭha chho ve zel a, a hmai duk erawh a la reh hlei thei lo. Lucy-i'n hnawih tur chi hrang hrang a lâk khawmsak a, nautê ber a chhiat miah lo te chu ka lawm hnuhnawh hle.

Thla khat hnuah ka hna aṭang chuan ka bâng ta ngei a, ka pa sumdawnna dawr; ka enkawl chhunzawm tâk awmna leh kan in inkar hi hla tak a ni lo va, chu chu ka thla timuangtu pakhat a ni. Ka pa sumdawnna ka enkawl zawm hnu aṭang chuan mak tak maiin nuam ka ti phian a, ka duh hun hunah ka haw thei a, ka duh hun hunah ka chawl thei bawk a, ka nupui pawh ka ngaihsak hman ta viau. Hminghlui hmai duk chu a zia chho ve zel a, kan fapa ni se a ṭhang duh reuh em em leh nghal a, tun lai phei chu fiah lutuk lova ṭawng nawk nawk a ching a, fiah takin ṭawng thei vat vat se ka ti ṭhin hle.

Hminghlui a rai len hnu chuan awmpui kan lá ta ngei a, nautê a hrin hma zawng chu lângin a rawn kal ziah a, a zawngchhang chî viauin ka hre bawk. Thla kim thlapa ka nupuiin nau a pai hnuah nautê kan neih belh leh ta, hmeichhia a ni thung a, a nu a chhun em em dan chu pui tak a ni. Kan fapa paw'n a duat nghal em em reuh a, kan chhungkua chu kan hlim tlâng tak zet. Hnutê hnek lamah erawh a buaithlak ṭan a, kan fapa hnutê tui tur kan siam chawp a, a chang chuan a duh lo va, a nu hnutê ngei hnek a duh ṭhin. Hnutê nghei rual a la ni chiah si lo va, kawng leh lam zawng tak chuan a khawngaih thlak ve tho.

"Pathianin keini pahnih min intawn tir hi ka lawm, intawng lo ila chuan engtin nge ka awm ang le" ka nupui lam chu ka hawi a, a kut chu ka hum a, nui sukin ka fawp zeuh a, a piancham zan a ni a, kan chhungkua bikin Hotel Regency-ah zanriah kan ei a, naupang nen kan ni ve duah tawh a, a hma ang ngawt chu a nih theih tawh bik loh.

"Ka zawng chhuak che ang a, nupuiah ka nei tho ang che" ka tih chuan a nuih a za em em a, khawvela hmeichhe hmelṭha ber chu a ni miah lo, tlin lohna leh ṭhat lohna pawh a nei ve tho, mahse khawvela ka hmeichhe hmangaih ber a ni thung.

"Ka hmangaih te kiangah ka piancham lawmin hun ka hmang thei a, zanin chu nuam ka ti hle mai" nui sen sen hian a rawn ti leh a, sawi tum nei rân hian

"Hmangaih te hi neih belh leh ka duh thuai dawn a nia, ka upat tak tak hmain kan fate puitlin hun ka hmu kim hman vek duh bawk" ka ti a, a nui dir cher cher a, kei pawh ka nui ve ta sun sún.

A TAWP TA