BENJAMIN ROHLUZUALA (Short Story) By Havali Adam

BENJAMIN ROHLUZUALA

(Mizo Romantic Short Story)

By

Havali Adam

"Han châm rei viau lo la, lo chhuk leh thuai ang che" nîtei chuan a ti lang lâng a, ka nui ringawt a, min ui der thiam lutuk chu a nuihzat thlak reuh tawp.

"Ka châm chen tur ka hre bik lo, rei deuh pawh ka châm maithei a ni" fiamthu ru taka ka tih chuan a ner sak a, nîtei hi chu pasal nei tawh ni mah se a lawmawm ve hrim hrim.

"Khitah te chuan i u leh nautê an awm thluah alawm, keini'n hetah tûmah kan nei lo va, pakhat lek chu an ui tawp lo ang che" a ti bawng bâwng a, ka ṭawng hmain pa Dika chuan

"A tawk e a tawk e, i ṭawng leh duah ṭhin" min lo tih khalh a, ka nî zawk chuan a melh chho hrâ a, an nupa hian an lawmawm thei tawp, an inhmeh sia, pa Dika lah hian a dawhthei em em leh nghal.

"Lo chhuk har miah suh ang che" ka lam lo hawi zeuhin nîtei chu a kal sawn nghal nal nal a, pa Dika chuan min nui suk hnuah a umzui ve mai bawk a, an inthlem leh ngei ka ring.

"An ui hle che a nih dawn kha le" ka ṭhutna bul chiaha ṭhu; pa upat hmel ve tawh tak chuan a lo ti a, hawihhawm zet hian

"Nia, kan awmho tam bawk sia, kei pawh hian ka ngai ngawt ang" ka ti pangngai ve mai a, a bak ka sawi zawm lem lo.

Sumo chu dar 9 leh a chanve velah a chhuak a, kum lâi hawl June thla a ni tawh bawk a, boruak chu a nuam em em rih lo. Keimah hi chuan thlasik hi nuam ka ti ber zel, a chhan chu hek a tam ve lo tlat a tin ni! Nipui te, fur te, ṭhâl lai te hi chuan a buaithlak ka ti, khua a lum leh kawr thlak reng a ngai a, inbual reng a ngai a, tui a vân leh zel phei hi chuan a buaithlak ka ti ṭhin. Chutah fur a'n ni a, fur pawh hi kawr a pho ro hman tak tak ngai loh, ruah a tla reng a, thlai tan erawh a ṭha viau lawi a, mahse thlai kan ni der si lo. Thlasik hi chu a vawt ṭhin tak ná a, hek a tam lo thung a, a hek ber chu thing a ni mai, thlasik hi chu a dan a dang daih a ni.

Sumo chhungah chuan Daduhi hla te, Albatross hla te, Gnat-a hla te leh Mizo hla tam tak an play chho a, chuan a tinuam phian mai. Kan khua hi a hnai lutuk lo ve a, Aizawl aṭangin kilometer 100 vel a ni a, tluang deuha tlanin darkar 4 emaw darkar 5 vel chhungin kan thleng thei ṭhin. Kan chuanpui te zingah chuan naupang pawm an bawk a, kawng chanve vel kan thlen laiin a rui a, a luak deuh bawrh bawrh a, ten mah ila ka khawngaih ru khawp mai. Naupang hi chu muhil daih zawk se ka ti, an ruih lah hian an khawngaih thlak ve tho bawk si. Kan naupang chuanpui chu a nu'n a buaipui char char a, rei lo tê hnuah a pangngai ve leh mai a, a rawn rui leh ṭhin a, chuti ang vel chuan kawng tluanin an inbuaipui a, naupang ber chu a chau ngawt ang ka ring.

Tlai dar 3 leh a chanve velah kan khua kan thleng a, kan naupang chuanpui a ruih vang a ni pakhat. Kan in ngei mai ka lut chiah chu rilru a hahdam vawng vawng a, ka nu leh pate pawh an lawm hmel khawp. Keini hi unau pali kan ni ná a, hmeichhia erawh keimah chiah ka awm thung a, upa ber dawttu ka ni a, kan chhungkuaah chuan ka nu nen chiah hmeichhia kan awm tihna a nih chu! Final Semester exam zo hlim haw ka ni bawk a, ka châm rei fû ka ring. Ka nu paw'n châm rei turin min ti nghal ngawt pek a, ka nîtei lam ka ngaihtuah a, anni nupa kha chuan châm rei turin min ti miah lo va, mahse ka châm rei deuh zawk ang.

Khua a rawn thim a, hlim takin chaw kan ei a, ka nu ber chuan min ngai a ni. Kei paw'n ka ngai lutuk tho, hmeichhia ve ve tih takah kan titi char char a, ei rawng kan bawl dun bawk a, ka awm chhung chu awl ka tum nghet bur. Kum tluan deuh thawin zawl khawpui lamah ka awm bo kum tin ṭhin a, mahse zirna vang a ni miau a, ka u leh naute paw'n min thik ngai lo. Ka unaute hi an mak ve ngawt mai, a tua mah lehkha zir sang peih an awm lo va, pawl sawm erawh kan pass vek thung. Kan upa ber hovin kuthnathawh lamah an ṭuan a, ka pa hovin huan an siam a, sawhthing huan te, lakhuih huan te, thei leh thlai chi hrang hrang huan te an enkawl fur a, sangha dil chenin an enkawl a, an taima bawk nen an ṭhiante zingah pawh mi chung en an ni pha vek.

Kan upa ber hi vawi khat chu nupui neih a tum zuaih tawh a, mahse a ngaihzawngnu zawkin a lo phatsan a, khami kum aṭang kha  chuan hmeichhe lam hi a them paw'n a ngaihsak leh ngai tawh lovin ka hria. Ka naute pahnih erawh ngaihzawng nghet an nei ve ve thung a, mahse phone-a kan inbiak chang te hian upa berin nupui a neih hma chu neih an tum lo ve bur. Ka u hi chu sawrkar hna thawk lo mah se a felin a zahawm em em a, ka pa paw'n a ring tâwk hle a, nupui a la nei lo te hi kawng leh lam zawng tak chuan a ṭha letling phian tho mai. Mipa hovin ka pa an chhun a, an len em em hlawm laiin kei erawh ka lian lem lo va, len leh têt kawngah hi chuan ka nu ka chhun a ni mahna.

"Arin, nizanah ka u ṭhianpa a lo lêng a, a Research tihna vel thil avangin in khuaah khan lo zin a ngai a, a hna azirin ni thum vel riah a ngai mai thei a, i number ka pe tawp"  ka ṭhiannu ve em em Rosalyn-i chuan a ti a, kei chuan kan inkawm tirh aṭang Rosa ka ti mai ṭhin.

"Chu pa chu tu nge? Ka hmu tawh ang em le? U Eric-a ṭhiante chu ka hmu nûal tawh a, a hming eng nge ni hrim hrim?" ka tih chuan

"U Ben-a a nia, a fel lutuk, a lo biak che ka ring. Ph.d a ti mêk a, riahna tur zawn chawp vel ai chuan in ina riah tir a fuh zawk ka lo ring ve ringawt" a lo ti ve mai a, a hming hre tawh mah ila u Eric-a ṭhianpa chu tu nge a nih ka la hre chuang lo.

"I hriat ka ring chiah lo, u Ben-a ber kher hi chu a chhuak vâk tam lo ve a, u Eric-a zawk hian a va lén pawh tam ṭhin. A fel a nia, mahni awm awma awm chi a ni ve roh a" amah bawk chuan a tih zawm leh a, ka mi hriat ngai ni lo mah se riahna tur zawn chawp ai chuan kan inah riak tak rawh se.

"A nih chû, duh leh a number i neih tho chuan min lo biak buai ngai lovin a lo riah theih thu hrilh la, kei paw'n ka nute ka lo sawipui ang. An phal dawn chiang sa a, a hming chauhin ka sawipui ang" ka tih chuan

"Aw le, ka lo be leh dawn nia, mahse i number ka pe tawh a, a lo call thut thei tho che a nia" a rawn ti a, rei pawh inbe tawh lovin kan titawp a, ka nute ṭhutna lamah ka kal phei nghal bawk.

"Nu, ka ṭhiannu u ṭhianpa kan khuaah a lo zin dawn a, heta a riah a rem ang ti raw? Khaw'nge ka pa hi?" ka nu awmna bula ṭhut thlak pahin ka ti a, a hmel aṭang chuan a phal dawn tih ka hre sa.

"A nih chu maw le, lo riak se a ni mai alawm, tu nge chu pa chu ni a?" a tih chuan

"Ka hre bik chiah lo, u Eric-a ṭhianpa chu a ni ngei a, mahse ka hmuh àwm ka la hre lo reng reng" tih leh thawh ka rual a, pawnah ka chhuak a, ka haw chhoh aṭang kar 1 lâi a liam leh tawh bawk a, Aizawl nen a boruak inang lo viau mah se ngaiah ka nei chho leh ṭan mai dawn a nih hmel.

"Insuk ka ngai tak e" ti sepin in chhungah ka lut leh a, thawmhnaw bal ho leh hnathawh thawmhnaw ṭhenkhat chu bal bawmah vawm lutin insu tur chuan ka chhuak a, kan in awmna aṭangin tuikhur hi a hla ve deuh hlek a, mahse harsatna ka nei hran lo.

Tin, kan khaw nawm ve em emna chu, thingtlang khua hrim hrim i ti zawk teh ang. Aizawl te angin tui lamah connection tih vel la awm ve lo mah se kan hnianghnar em em thung a, ṭhâl lai hi chu ṭhâl lai a ni a, sik leh sa inthlak danglam hun lai a nih avangin sawi theih kan nei lo. Ṭhâl lai tih lovah hi chuan tui kan hnianghnar thei em em a, kan khaw ṭhenawm ṭhenkhat te phei hi chuan tui te an rawn chawi zawk ṭhin a, a bikin kan khua hi tuiah chuan kan vannei ve hranpa hrim hrim. Tuikhur pawh hi veng tinah a awm a, kan veng hi a zau deuh hlek avangin kan in leh tuikhur inkar hi a hnai lutuk lo va, mahse kal ṭhan chuan ngaiah a neih theih mai.

Tuikhur ka thlen rualin ka insu nghal mawlh mawlh a, kutin ka insu mai a, tui a tamin mi dang an awm lo bawk nen tui chu ka ren teh chiam lo. Ka bulah ka phone ka play a, Zomuanpuii hla te, Malsawmtluangi hla te, Mizo hla chi hrang hrang ka play chhawk a, kei chu tun lai hla tih vel hian ka lung a lén lo ve hrim hrim. Upa vak erawh ka ni chuang lo va, kum 2000 hma lamah te chuan kan piang ve ngei a, mahse kan zu hriat phak si loh hla nalh tih ka ngah mai. A bikin Mizo hlaah hian, kan hriat phak ve chin Vanlalsailova te, Robert-a te, Joseph-a te, an tam mai, tun lai hla chhuak thar ai chuan cassette play uar hun laia kan hla play ṭhin hla te kha tun thleng hian ngaihthlak nuam ka la ti zawk tho tho. Ka phone chu a reh hmak a, ringtone ka hre zawm zat a, min lo call tu chu Rosa-i a nih ka ring ringawt a, a ni miah lo, number lawng tawp.

"Hello" ka ti a, mipa aw thian thawm ka hre hmasa ber a, chutah leh lama mi chuan

"Arini i ni em?" a rawn ti a, chawp leh chilhin u Eric-a ṭhianpa u Ben-a a nih ka ring nghal hmiah.

"Ni e, eng lo, u Eric-a" ka tih laklawh lai chuan

"Ben-a ka nia, Rosalyn-in a lo biak tawh che ka ring a, a lo be tawh che em le?" min tih khalh zung zung a, a aw aṭang chuan a hawihhawm viau bawk.

"Aw be tawh e, u Ben-a maw i nih, a lo riah theih aw" ka ti tlang nghal pawp a, ka rilrua awm hmasa ber a ni hrim hrim.

"A lawmawm rualin a inthlahrunawm hle mai, ka lo chho mêk a, kan inhmuh thuai ka beisei, a nih le" tiin kan inbiakna chu amah zawkin a hmet tawp a, kei pawh ka insuk chhunzawm ve leh nghal mai.

Ka insuk zawh chuan kan in lamah ka haw a, dawrah chhun thil ei tur ka lei bawk a, mi dangho pawh ka lei kep nghal nghe nghe a, hna an thawk rim hlawm si a, ei in lam hi chu tui tak tak ei se ka duh ṭhin. A bikin ka pa ber hi, a kum a upa ve tawh a, mahse hna a la thawk reng bawk si, keimah ber hian sawrkar hna ka thawh vat a ngai a ni. Amaherawhchu khawpuimi tam tak aiin an hrisel zawkin ka hria, a chhan chu an la fit ṭha em em a, khawpuimi awm nuam leh awm awl tam tak hi chu kum 50 kai hlek se nâ neuh neuh an ngah em em a, BP sang leh hniam an nei awlsam em em bawk a, stroke nen lam. Thingtlangmi ve thung chu an che reng te hi a ṭha zawk a ni mahna, an hriselna chhia ang deuhin lang mah se an feî ru viau a, kea an kal tam hrim hrim te hi hriselna atan a ṭha dawn hian ka hria a ni.

In ka thleng a, insuk ka pho nghal a, in chhung tih fai ngai leh chhuat nawh ngai te ka nawt zung zung a, pakhatah chuan u Ben-a a lo thlen thut ka hlau a ni. Mikhual kan nei dawn a, in a fai loh chuan min hmuh dan a dang lutuk palh ang. Ka pa chu dar 1 velah a lo haw a, ka ute ho erawh an lo la haw lo thung. Dar 2 a rik chuan in chhung zawng zawng ka tifel fai vek tawh a, ka awl lai ber a ni rih. Ka pa chuan thing eh a tum leh hram a, a taima leh lutuk hi chu a buaithlak ṭhin. U Ben-a lo kal dawn thu te, lo riah a tum thute ka hrilh vek tawh a, a phal mai a, thing ek lo tura ka tih lah chuan engah mah a la ngai lo zui. Ka nu hnenah ka sawi tawp a, ka nu hrilh erawh a dan a dang zar mai, ka nu thusawi zarah a ek ta lo hlauh e.

Dar 2 leh a chanve velah u Ben-an min lo call leh a, a number ka save vek tawh a, kan khaw tawn tirha a awm tawh thu leh kan in awmna ber a hriat loh thu a sawi a, kan veng lama lo tlan chho zel turin ka hrilh a, a lo thlen har a rinawm loh khawp. Kan inbe zo chiah tihah ka ute ho an lo haw thleng chiah a, thingpui ka siam nghal zung zung a, ka rilruah u Ben-a pawh a awm reng tho. Ka rin lâwk ang ngeiin u Ben-a chuan min lo call leh a, tap chhaka ka awm lai a ni a, kan in aṭanga chhuakin a awmna ka zawt a, kan in chhak lawk kawngpuiah a lo ding reng chu niin. Helmet full face-in a khum a, a hmel tak pawh ka hmu thei rih lo.

"U Ben-a i ni ang maw?" a dinna bul ka thlen chuan hawihhawm takin ka ti a, a helmet phelhin min buk khum zeuh a, tunah chuan a hmel ka hmu chiang ta, a ngovin khawpuia awm ṭhang tih a hriat ngawih ngawih.

"Khawiah nge in in a awm?" a aw chu phone aiin a takah a thum daih zawk.

"Khu laia mi khu kan in chu a nia" ka kawhna lam a hawi thla a, mi pawh en chuang lo hian

"Hél a ngai dawn a ni maw" a ti sup a, a helmet chu khum ṭha lehin bike a tirúm a, hél chu a ngai ngei ang, a chhan chu step a awm tlat a tin ni!

"Lo chuang rawh le, kal kawng pawh ka hre mumal hleinem" a tih chuan ka ká ho mai.

"Saw tah sawn i tlan phei zel ang a, i ding lamah kawng kual a lo awm ang a, chuta ṭang chuan a ngilin i tlan phei char char ang a, kan in kawtah khuan ka lo nghak ang che, hriat a harsa lo lutuk" ka ti deuh duah a, ka thusawi hre lo ang mai hian

"Lo chuang la, hun a heh lo va, a awlsam zawk bawk" a ti deuh tlat a, tìm dáiin ka chuang ve ringawt a, kan tlan chhuah te chuan miin min lo en duh hlawm khawp mai.

Kan in chu motor tlan theihna lam kawng aṭangin kan hél a, bike hnung chu tlak hlau zetin ka vuan a, ka ṭang ṭun a, mahse a khalh chak hran lo. Kan in kawt kan thlen lai te chuan kan ṭhenawmte'n min en duh hlawm hle a, ka u thing ek meuh paw'n min lo en a, ka awm a nuam lo em em ve ringawt. In chhungah u Ben-a chu ka hruai lut a, ka nu leh pate bulah ka inhmel hriattir nghal zung zung a, a ṭawngkam leh a che zia aṭangin a naupang zawk zawk tawh miah lo ang. Ka pate bula ka inhmel hriattir zawh hnu chuan pawnah a va chhuak a, ka pa hnen aṭangin pawna thing ek mek chu kan unau zinga upa ber a ni tih a hre tawh bawk a, a va chibai thlap a, ka rin loh lutukin thingte chu a eh pui zawk maw le.

Thing eh lah chu a hnehsawh phian leh ta nghal a, khawpuia awm ngai lo ang mai a ni. Ka u hi kan chhungkuaah chuan a sang ber a, a lian ber bawk a, mahse u Ben-a chu a tiat miah lo. A lian zawk na ná na chu a kutthlak pawh a ná khawp mai, a chêk ri sawk sawk a, a ek phel phawk phawk a, ka u chu min rawn en chung hian a nui suk suk ringawt. Ka pa pawh chuti tho, u Ben-a chet dan chuan tu pawh min ṭhawng vek a ni. In chhungah lutin ka nu nen ei rawng kan bawl a, ka ute pawh rei lo tê hnuah an lo lut a, an ek zo hma hle. U Ben-a chu a inbualna tur ka kawhhmuh a, ka u zawkin inbual hmasa turin a kian tlat a, chu vanga inthlahrun hmel em em pawh chu a ni.

Zanriah ei laiin u Ben-a chuan a lo kal chhan te, a thil tih tur te, Research a tih mek thute chu a sawi a, ṭawngkam thiam tak ni lo mah se a sawi ngaihnawm ang reng. Ka nu lah a'n dilchhut mai mai khawp a, zawhna a lo nei ve hman ziah a, mi dangho chuan kan nui tawp ringawt. A sawi danin u Ben-a chu a kum 4-na a ni tawh a, a zawh ṭep tawh thu te a sawi tel bawk a, puitling àwm reng pawh a ni e. MZU-ah Assistant Professor hna a thawk mek tih ka nu zawhna avangin a sawi duh hram a, zawt lo se chu a sawi miah lo ang. Rosa-in ṭawng tam lo chî a nih thu a sawi lâwk tawh bawk a, kan inhriatna leh a taka kan inhmuhna la rei lo mah se a dik ngei ka ring.

"Eng nge i tih a?" mipa aw thum hniam ṭha tak ka hre chiah chu ka va han phu nasa tehreng ém.

"Tih phut che ka tum lo" ka awm dan leh ka hmel aṭangin a hrethiam a ni chék ang chu!

"Engmah pawh ka ti lo, chhuatah mu la pawi i ti em u Ben?" pangngai taka ka tih chuan

"Ti lo ve, min u lo la ka duh bawk" a rawn ti a, ka bul chêtah a lo ding a, mak deuh chu ka zám ta tlat mai.

"I ṭhiannu hnen aṭangin ka lo hria a, PUC-ah maw i kal a!? Eng Semester nge i nih mêk?" amah bawk chuan a ti a, min hnaih ta viau chu a chhan ka hre der lo.

"Final Semester Exam kan zo chiah a, Result nghah chhungin ka zin chho lawk a nih hi" ka tih chuan

"Graduate ta la eng nge tih chhunzawm i tum?" a rawn ti nghal a, ka zám ru er er a, ka zám chhan tal chu hria ila awm dan ka thiam deuh ang maw le.

"Ka hre lo" ka ti mawl tawp a, a hmel en tuma ka hawi chho chu min lo en reng chu niin, ka hawi sawn rang teh e!

"B.Ed te hi tih zawm daih la, hmeichhia hi chu zirtirtu lam in áwn deuh vekin ka hria, thil zirtir in awlsam hrim hrim bawk" a tih chuan ka ngaihtuah zawm a, a ṭha phian dawnin ka hria.

"A ṭha ngawt ang, MZU-ah khuan a awm tho ti raw?" la zâm ru tho mah ila thil dang daih ka ngaihtuahnaah a awm tawh a, a hma ai chuan ka aw chhuak pawh a zia deuh.

"Awm tho e, hna hmuh vat i duh chuan Master zir chhunzawm aiin a fuh zawk ang, tun laiah B.Ed lo chu zirtirtu atan pawh an duh vak tawh lo" a tih hnu chuan kan ngawi dun vang vang a, sawi tur a vâng a ni.

"Ka u dawn lo tak tak che em ni? Ka u zawk mai ang che, kan u rual i ni tho a" ka ti deuh phawng a, ka awm dan a hriatthiam ka hlauh luatah ka ṭawng tawp a ni ber.

"Min u lo turin ka duh che alawm, i ṭhiannu chuan min u tho mah se nang erawh min u suh" a ti tlat a, u loh a duh bawk a, ka u lo mai a ni ang chu!

In chhungah kan lut a, ka bula a awm tlat chhan te, ka hnaih tak taka a din tlat chhan te chu ka hrethiam seng bik rih lo, a hmel hriat awm chhun ka ni ti dawn ila kan vawi khat inhmuhna leh inhriatna ve tho a ni a, mahse dik tak chuan a hmelchhe miah lo. Mut hmunah ka ngaihtuah zui neuh neuh a, a bialnu vannei turzia ka ngaihtuah thleng vel a, ka thil ngaihtuah chu thil ṭul lo tak a ni. Zingah chuan a tho hma khawp a, kei hmeichhia ai pawhin a tho hma zawk a, a nuam lo duh ang reng. Tukṭhuan ei khamah a Research lam a buaipui a, bag ak chhuakin khaw chhung a fang a, eng nge a tih ber pawh ka hrethiam lo, Research a nei mêk tih ka hrethiama a ni mai.

Zan thum riaka Research a tih hnu chuan a zo fel titih a, Aizawl lamah a chhuk thla leh a, pawisa a la hnutchhiah zui. Cheng 3000 lâi mai a mutna lukham chhungah a lo dah a, lawmthu sawina lehkha pakhat nen a ni a, ka pa phei chuan ṭul a ti lo hle a, ka phone-in a be nghe nghe a, pawisa erawh kan dawng ta tho a ni. An hausak chu ka ring sa hrim hrim a, a chhan pawh u Eric-a ṭhiante hi rethei tak an ni lo hlawm vek a, anmahni pawh rethei lo tak an ni. Ka nute'n lawmthu sawi leh hrim hrim tura min tih tlat avangin Ben-a chu ka be leh a, lawmthu min lo hrilh lêt zawk a, a ṭawngkam hman dan vel hi a puitling thei tawp. A dik thlap a, sawi sual emaw ṭawng bah nuaih a nei ngai lo reng reng.

Kâr hnih hnuah a hnen aṭangin phone call ka dawng leh hlawl a, mak ka ti ru teh e. Eng vak pawh kan sawi lo, zâm ru tak chungin a ṭawng hnem zawkah ka ṭang a, ama min rawn call mah ni se a ṭawng tlêm viau lawi a, kan inbiakna titawp ringawt dawn ila ka ui ru ve deuh tho bawk si a ni. Chumi zan aṭang chuan kâr khatah vawi khat te min rawn be ve ṭhin ta zeuh zeuh a, message tih vel hi chuan kan la inbe lo hrim hrim. Ka rin dan chuan a type peih lo a ni ang, mipa hi chuan an type peih vak ngai lo tlangpui hrim hrim a, phone call hi an ngaina zawk mah a, mipa an nih vangte pawh a ni mahna le. A chang leh kâr khatah vawi hnih te min be leh nulh ṭhin a, kan thil sawi lah hi ho hlawm viau mah se ka hre rei thei em em zui.

Phone call-a thla khat leh a chanve kan inbiak fô hnu chuan kan innêl ve tawh hle a, kâr khatah vawi thum emaw hi chu kan inbe ta ziah a, zep lovah chuan hmelṭha ka ti a, a pa lian bawk si, a chak bawk si, a awm dan leh a ṭawng dan engkim chuan min hip a ni ber. Ni e, a takah kâr khat pawh la inhmu tling lo mah ila hmelṭha ka ti chiang alawm, Rosa-i pawh ka la hrilh lo, a rukin Ben-a chu ka duh tih hre ngat phei se zawng mak a ti khawp ang. Amah Ben-a ber paw'n a laka ka rilru puthmang a hre lo va, a hriat chî a ni lo hrim hrim. Eng nge ka awmzia pawh ka hre lo, ka duh ringawt dan te, hmelṭha ka tih ringawt dan te, thil awm dan chu a mak teh thut a ni. Ka duh ka ti tak ná a, ngaihzawng enah ka va en chuang hlei lo va, ka phu lo lutuk ve êm alawm, ani te chuan khawpui nula changkang leh chhe lo tak ngaihzawng a nei ngei ang ka ring.

Zan khat chu zan danga min lo biak ang hunah min rawn be ta miah lo va, dik tak chuan zan khat lek min be lo pawh keimahah nghawng nasa tak a awm tawh a, chuti ang khawp chuan ka duh tawh a ni ber. Ka mut pawh a tui lo vek a, zinga ka tho te chu ka ni bûr a, ka ni hman thlengin a nuam lo vek thei. Zirtawpni zanah min rawn bia a, a dam loh thute a sawi a, ka khawngaih khawp mai. A damdawi ei tur nen lam ka hrilh mawlh mawlh a, ka ngaihtuah dan chu pui tak a ni. Zan dangah erawh pangngai takin kan inbe leh thei a, thla thara kan result a chhuah a rinawm thu te ka sawi ve a, amah tak phei chuan kei aiin a hre daih zawk. Kan inbiak aṭang hian thil tam tak ka hriat belh phah a, zirna lam a ni emaw ni lo emaw ka thluak ka hman nasat phah hle.

"Zep miah lovin min hrilh tlang nghal rawh, u Ben-a nen hian in inngaizawng em? In inbe ṭhin tih ka hre vek a nia, in inngaizawng chiang ti raw?" Rosa-i chuan a ti lang lâng a, engtin nge chuti ang daih daih a hriat theih zawk!

"Ringawt a, kan inngaizawng teuh lo mai" ka ti ve tak ná a, awih loh tih hriat zet hian a chek ri tlak tlak a, kan inbe ṭhin tih a hriat dan chu ka hre châk ru viau bawk.

"U Eric-an u Ben-a phone-a i thlalak a hmuh thu a sawi alawm, pakhat mai a ni lo leh nghal. Whatsapp a check sak a, in inbiakna engmah a hmu lo, mahse call history aṭangin in inbe ziah tih a hre thung" a rawn ti ta mai, sawi tur ka haihchham nghal der.

"Min hrilh ṭha rawh le Arin, engtia rei nge in lo inbiak tawh?" a ti leh a, thawk ka la hmasa tê tê a, ka awmhmun ka sawn a, mi dangin an lo hre palh ang tih ka hlau a ni.

"Thla hnih dâwn chu a ni tawh ang, thla hnih a tling tawh mai thei zawk" ka tih chuan

"Kei tal te chu min hrilh ve mai ta che, ka sawi chhuak dawn pawh ni hlei lo, i ṭhian ka ni lo em ni?" tiin a âng buan buan a, a lungawi lo pawh chu a áwm ve reng.

"Kan inbe ṭhin ringawt alawm, kan inkarah engmah a awm chuang lo" ka ti leh ringawt a, zawhna a ngah dawn tih ka hria, mahse kei erawh chuan min zawt tawh lo se ka ti hle thung.

"Eng nge in sawi ṭhin a? Nang nu hian i duh chiang ti raw?" zawhna min zawt mawlh mawlh chu a ni sia, engtin nge ka chhan zel tâk ang!

"Chuti ang an inzawt tlawng ngai lo lal Rosa, inbe tawh rih lo ang" ka tih chuan ka dah hlauh hmel deuh hian

"Dah tum ringawt suh, eng nge in sawi ṭhin chu sawi a har viau em ni? I duh leh duh loh pawh sawi a harsa lo, min hrilh ṭha mai mai teh. U Ben-a hi i duh chiang mai, zep thu cheng lo, i zak a nih ka ring" a ti zawt zawt a, a sawi dik tho bawk si.

"Eng lo, amah chu hrilh chuang lo la, zep lovah chuan hmelṭha ka ti, a pá bawk" ka ti ta nge nge a, Rosa-i bulah hi chuan hmân aṭang tawh thil ka zep rei tak tak thei lo ṭhin.

"Awi, a tirhah i duh tih kha sawi vat mai tur che alawm, u Ben-a reng reng pawh hi a duh ru ve reng che a ni lo maw? Ama'n a rawn be ṭhin che nge nangma'n i be ṭhin?" a tih chuan

"Amah hlirin min rawn bia" ka lo ti vat a, phone-ah inbe lovin kan awmna hmun inang se chu min chum emaw a nui thler leh vak vak tawh ngei ang.

"A duh chiang che a nih chu! Awi in mak reuh ê, a bikin u Ben-a zawk hi a mak tawp, eng a sawi ve ṭhin? Ani hi a zei phian lo maw?" a rawn ti ta deuh deuh a, a hahthlak ṭhin.

"Ka dah dawn, engmah sawi chhuak suh ang  che, ka chhungte paw'n an la hre lo hrim hrim" tih leh kan inbiakna tih tawp ka rual a, ka hmet tawp lo a nih chuan zan khua paw'n sawi tur a hria ang.

In chhungah ka lut a, phone-a mi ka biak hi chuan pawnah ka kal daih zel a, a bikin u Ben-a nena kan inbiak hian ka chhuak ngei ngei zel. Zanin pawh Rosa-i a ni a, a ṭawng zawi dawn lo tih leh sawi hreh a nei dawn lo tih ka chiang a, ka chhuak daih a, ka chhungte paw'n engtin mah min rawn ngaihsak lém chuang lo. Mut hmunah u Ben-a bawkin ka rilru leh ngaihtuahna a luah a, a mak ka ti, ka ngaihtuah zan tin mai a ni. Kan inbiak loh zanah te hian ka ngai ru veng veng zel a, kan inbiak zan ka nghakhlel thei tawp. Hmeichhia zawkin zu biak huam huam mawi ka ti bawk si lo, chu bakah min ngaihnep phah vek ang tih ka hlau a ni.

Nilaini zan a ni a, nîtei hnen aṭangin phone call ka dawng hlawl a, Aizawlah chhuk turin min duh tawh khawp mai. Ka pa a be bawk a, ka pa erawh a nui huah huah a, an unau zinga naupang ber kha a ni ve miau a, ka pa hi chuan nîtei hi chu a duat ve thei tawp. Nîtei pawh hi naupang ber a nihna a lang leh ṭhin, pa Dika ang pasal ṭha lutuk a nei hlauh zawk a, hmuh an nuam ṭhin. Result chhuah huna chhuk ka intiam ta ringawt a, ka pate paw'n pawi an ti lem lo. Nîtei duh dan phei chuan kâr thara chhuk turin min duh a, mahse chuti ang em em erawh ka duh bik lo. A ṭûl ṭul thawkin ka phekawi nitin ve ṭhin a, zan lamah pawh ka mu hma thei khawp mai. Kum dangah te chuan zirna avangin ka awm bo vang vang zel a, kumin pawh hi result a chhuah hnuah chuan ka awm bo leh a ngai ngei ang.

Tlai khat chu Ben-a hnen aṭangin phone call ka dawng a, tlaiah ber kher hi chuan kan inbe ngai lo, chuti ang huna min lo be teh thut chu a mak a ni. Kan khaw tlan pela a zin dawn thu min hrilh a, kan khaw tawn tirh hmaa a awm reng tawh thu a sawi a, inhmuh a rawt bawk. Ei rawng ka bawl zo titih tawh tho bawk nen hmu turin ka chhuk vang vang a, zan tin deuh thaw kan inbiak hnuah kan inhmu leh chiah chu ka lái nasa teh e. Ani erawh a awm ngaiin a awm reng a, laih pawh a lâi ve eih lo. A awm dan aṭang te, min biak dan aṭangte chuan min duh ve leh ve loh pawh ka hre thei lo, a chhan chu a ṭawng tam lo em em a, kan thusawi chu inngaizawngte thusawi lam a ni bawk si lo va, kan inkar chu sawifiah fak a har a ni.

"Zanah ka lo bia ang che" tiin min kuah thuak a, kan inkuah chhung rei lo mah se a rim pà tak chu ka hip lut chiang hle a, a taksa lùm nawmzia zawng zawng nen lam ka hre hman vek nghe nghe.

"Fimkhur la aw" tiin ka thlah ve thlap a, ngainatawm zet hian a nui suk a, a bike tirùmin a tlan chhuak a, kan inhaw lo ve ve tih ka hre chiang tawh bawk a, ka awm a nuam sawng sawng thei.

"Arin" min kotu lam chu ka lehhawi a, a tlan liam daih tawh emaw ka tia, ka dinna lamah a lo tlan lêt leh a, ka bul chêtah a bike a hûng ṭha a, ka lo en hâw ringawt.

"I laka ka rilru puthmang hi ka awm dan aṭang i hrethiam ti raw?" min din hnaih sauh a, ka chhoh melh ral a, ka zâm ruk dan chu pui tak a ni.

"Ka duh che tih i hrethiam em Arin?" ka ngawih reng avangin amah bawk chuan a ti leh a, mak ti bawk si, ka lawm ru tho bawk si, chhan dan tur leh awm dan tur pawh ka hre lo.

"Ka rilruah i awm reng ṭhin" ti supin min din hnaih lehzual a, ka khabe chawiin ka hmui bul chêtah a thaw lûm ham hâm a, ka maimitchhing tawp, awm dan tur hre hek lo.

A hmuiin ka hmui a rawn bawhthuah chiah chu ka meng kâwk a, kan infawh ring lâwk deuh tho mah ila chuti ang em emin mipa hmui a nêm ka ring lo a tin ni! A mi fawhna chuan min zém ka ti mai, ka mur deuh chem chem a, ka maimitchhing leh tawp a, ka kawngah kuahin min fawp duhthaw zual sauh a, ka mumal tawh lo tak zet. Min fawhna aṭanga a inla hrang chiah chu ka thaw hlawi hlawi a, ka zak hnuhnawh khawp mai. Awm sawn ta mai lo chuan ka chalah a fawp leh zeuh a, a mitmengah te chuan min ngaina tih a hriat hle a, a hriatthiam loh theih loh zawk, a thu ngei paw'n ama'n a sawi zo chiah a nih kha!

"Ka duha ka ngainat che ang hian min haw lo tih ka hria, infawh erawh zirtir i ngai dawn a nih hmel" a tih chuan ka sa chhuak pup pup a, a mi fawhna thiam leh thiam lova ka chhang lêt lai ka ngaihtuah chhuak kher bawk nen ka zak ru tak zet.

"I hmai sen tan tân te hi i duhawm thlawt a ni" ti leh supin min fawp zeuh a, ka inring hman lo chiang kher mai.

"Eng lo, ka kal dawn" tih bah deuh nuaihin ka inla hrang a, ka kal sawn thuai thuai a, a bulah ka awm reng a nih chuan ka hrilh ngai lovin ka rilru zawng zawng a hre thei mai dawnin ka hria.

In ka thleng te chu ka hmai ka phih vel ringawt a, ka zak bawk si, nuam ka ti tho bawk si, ka awm dan chu ka sawifiah thiam lo a ni ber. Zanriah ei lai thlengin tlai lama kan awm dan chuan keimahah nghawng a nei a, min chík deuh tan phei chuan ka awm dan a danglam tih hriat a awl ngawt ang. Dar 8 velah min rawn bia a, min fiam leh zauh ṭhin a, zah luatah vawi khat phei chu ka hmet tawp daih nghe nghe. Amah bawkin min rawn call leh a, kan inbiak dan erawh a dan a dang ta deuh. Min duh thu engmah a sawi leh tawh lo va, zan danga min zawh ṭhin ang bawkin chhun lama ka hun hman dan min zawt a, ṭha takin ka chhang ve zel a, tlai lam thil thleng engmah a sawi ta miah lo chu a zia phian.

Kâr hnih a liam leh meuh chuan kan result pawh a chhuak ta, Distinction-ah ka pass a, Mizoram púmah Top 10 zingah ka tel ve a, ka lawm rualin ka awih lo lek lek zawk a ni. Kei ai mahin ka chhungte chu an lawm thiam zawk a, pass min lawmsak ngei ngei an tum bawk. Zanah Ben-a nen kan inbe leh a, ka pass thu leh Top 10-a ka lan thu ka hrilh ve a, min lawmpui thiam khawp mai. Thil min lei a tum thu a sawi chuan ka hnial nghal vat a, ka duhin ka ngai ru em em ṭhin tih ka la hrilh lo char char a, kan inhmuh leh hunah sawi te pawh ka tum ve tawh a, mahse a remchan dan azir a ni mai. Aizawla ka chhuk thlak hun tur min zawh zawm zat a, ka hriat loh thuin ka chhang thung a, ka chhuk hun tur ka hre lo tak tak!

B.Ed ka zir zawm dawn a nih chuan Admission ti thuai turin min hrilh a, Aizawla chhuk vat turin min duh hranpa ve hrim hrim bawk. Ama'n a sawi leh vek alawm, a thusawi ho tê tê te hian min tihlim a, min tilungawi a, ka awm a tinuam veng veng thei ṭhin. Kan result a chhuah aṭanga ni hnih hnuah ka pass kan lawm a, ka pa'n vawk min talhsak a, nuam kan ti tlâng hlawm hle. Kâr thar kan chuangkai a, Aizawl lama chhuk turin kan inbuatsaih ṭan ta. Nîtei ber chu a lo lawm a, ka chhungte pawh an nui tawp ringawt. Pa Dika pawh a fel ngaiin a la fel reng a, ani hi zawng a dam thlup mai a, ka pa te, Ben-a te ho nen hian inanna riau an nei tlatin ka hria.

Aizawl ka thlen thlak zanah Rosa-i a lo lêng nghal a, Ben-a nena kan awm dan leh kan inbiak dan min han zawt tak tak alawm le, hneawm tak a ni. A tir lamah chhang ṭha peih lo mah ila a tawpah erawh ka sawi vek leh lawi a, min fawh thu te, engkim zep awm hauh lovin ka sawi a, ani bialpa nei tawh chuan thuráwn min pe hnem nghal ngei mai. Ben-a pawh ni thum hnuah a lo lêng a, kan in awmna a rawn zawng chawp a, ka nîtei te nupain kan ina tlangval lo lêng chu mak an ti hle a, an lo chhawnchhaih thiam khawp mai. Chutah nîtei chu a uak ṭhawt ṭhawt a, pa Dika nen toilet lamah an inzui lut a, an lo chhuah aṭanga rei lo tê hnuah Hospital-a kal an rawt a, vanneih thlak takin nîtei chu a lo rai reng a, kan va lawm hlawm tak êm.

Kum 6 chuang pa Dika nen hian an innei ve tawh a, nupa inhmangaih leh indawhthei tak an ni a, thinrim taka inhauh pawh hi an nei ngai lo tluk a ni. Kum 6 hnuah nîtei a rai chu a nia, a lawm loh theih loh. Ka pate pawh ka hrilh nghal thuai thuai a, an lo lawm ve khawp a, a nihna takah chuan lawm loh chî ziazâng a ni lo. Khang kum kal ta chhung zawng khan fa nei lovin an awm a, an awt em em ṭhin tih pawh kan hre vek, anmahni tak pawh hi an beidawng dâwn deuh ṭhin, mahse a hun takah Pathianin a rai tir a, fa tam tak nei ṭeuh se ka ti hle bawk.

"Naktuk chu ka lo lam ang che" Ben-a aw hi chu phone kaltlang pawhin ka hre hrang thei tawh ang.

"I buai lo ang maw?" ka ti thung a, B.Ed ka training-na pawh thla eng emaw zah a ni leh tawh a, Ben-a nen phei chuan zan tin deuhthaw ka inhmu ṭhin.

"Hun ka insiam alawm, pheikhawk lei ka ngai hrim hrim" a rawn ti leh a, kâr tir aṭang tawh chhuah dun a rawt a, Research ti mêk a nih avangin a buai ka ring a, aw pawh ka pawh vak lo va, mahse hun a insiam tâkah chuan chhuah dun chu ka châk ve tho.

"Ka lo nghak dawn che a nia, mahse kan bazar hunah thil min lei tum suh ang che" ka ti lâwk a, min lei a tum deuh tlatin ka hria.

"Lei che chu ka tum ngei alawm, engati nge i duh loh?" a ti ta ngei a, zep nei hauh lovin

"Ka duh lo a ni tawp mai, sawi vak tur pawh ka hre lo, min lei lo tak tak rawh Ben" ka ti a, thil dang a sawi daih a, kei pawh ka ngaih a ṭha ve leh mai.

A tukah chuan kan bazar dun ta ngei a, dâr 12 dâwna chhuak kan nih avangin restaurant-ah kan chawl hmasa tê tê phawt a, rilṭam saa kal kan ni bawk nen kan ei hnem dun phian. Kan inei puar ta maw tihah pheikhawk en turin kan chhuak nghal a, kan zawng kual hrep a, a chhan pawh keimah vang a ni. A duh zawng a sawi a, a hmuh hmasak apiang lei mai a tum zel a, a to leh to lo pawh a ngaihtuah tawh ngai lo. Kei lahin tlawm si leh mawi si ka zawng thung a, kei aiin upa daih zawk mah se ka tih ang ângin a awm ve mai zel a, kan zawn fê hnuah tlawm deuh, mawi tak si chu kan hmu ta a, amah paw'n a duhzawng tak a nih thu a sawi a, mahse fiamthu deuh reuh hian thu ka duh thu a sawi thung. Ka nui mai a, ani pawh fiamthu tih takah thinrim hmel a pu hran lo.

Zan khat chu a ṭhiannu birthday party-ah kan kal dun a, ka beisei loh deuh thil ka tawng ta. Chumi zan chuan a ṭhiannu chu a over mah mah hret ka ti mai, a ṭawng siam siam tak ná a, mite pawh a be siam siam a, mahse ka ngainat chi a ni lo. Chu bakah Ben-a a duh tlatin ka hria, hmeichhia leh hmeichhia hi chu kan inhrethiam zung zung a, a awm dan aṭang chuan Ben-a a duh chiang a ni. Ben-a ni se a hriatthiam loh hmel nasa si a, mahse lungawi lo angin ka awm lo hrim hrim. Nuam ti vak lovin ka tlingtla thei ve mai a, Ben-a chuan min ngaihtuah ve tho tih ka hria, vuina thu pawh ka chhak chhuak lo, kan inngaihzawnna a la rei lutuk lo va, thil ho têa han vui nghal ngawt chu dikin ka hre lo a ni.

Ka duh thu ka hrilh zan aṭang khan inngaihzawn pangngaiin kan inngaizawng ṭan a, amah zawkin ka duh leh duh loh min zawt lo se chu ka sawi ngam miah lo ang. Thla 4 vel chu kan inngaizawng ve tawh a, harsatna pakhat mah kan la nei lo va, neih erawh ka hlau khawp mai. Zan tin rawn lêng ṭhin na nâ ná chu ka chhungte paw'n kan inngaihzawn thu an hre tawh a, mak an ti ve khawp mai. Pawi tihna an nei lo thung a, Ben-a a lo ni kher bawk nen ka pa phei chuan sawselna pakhat mah a nei lo, fel a ti em em zawk a, a fel ve reng a, kei tak pawh hian sawiselna tur ka la hre miah lo. Min biak dan te, a ṭawngkam hman duh zawng hrim hrim te, engkim hi a ti thlip thlep a, a fel bawk a, mipa ṭha tak a ni.

Thla thar kan chuangkai a, Ben-a nen chuan kan inbe khât ta deuh a, a Research tih lai mêk hmawr a bawk ṭan tawh a, thla hmasa khan a buai zual dawn thu min hrilh tawh ngei a, kei paw'n ka hrethiam khawp. Kan inngaihzawn tirh ang maiin kâr khata vawi hnih khat lek inbiak changte kan nei chho ta zeuh zeuh a, dik tak chuan ka ngai ṭhin. Zan khat lêk a hmel hmuh loh te, a aw hre lova ka awm ṭhin te chu hrehawm ka ti ru viau a, mahse ka thlakhleh leh ka mi ngaih ber lah chu a buai em em ṭhin si. A zin dawn hi chuan ṭha tak hian min hrilh thlap zel a, a sual hi chu a sual lo ve chiang alawm, a ze ngawichawi zet te hi ka ngai ngawih ngawih zel a, hmeichhia zawk mah ni ila biak hmasak chang ka ngah ve ta.

"Saw u Ben-a, saw nu saw tu nge le?" Rosa-i hawina lam chu rang zetin ka hawi phei a, Ben-a leh hmeichhe pakhat ka hmu nghal a, ka thin phu chu a rang khawp mai.

"Ka'n ko ang e" tih leh koh a rual nghal a, Ben-a leh a bula hmeichhe ṭawng siam siam chu an rawn hawi a, chu nu chu birthday party zana a ṭhiannu kha a ni tih ka hre nghal.

"Saw an lo phei alawm" Rosa-i chuan a ti mai a, inngaizawng reng mah ila inbiakna hun kan neih khât tawh zia a hre ve der si lo.

"Eng nge in tih a?" kan dinna bul an lo thlen rualin Ben-a chu a ṭawng hmasa berah a ṭang a, ka lo en reng a, min nuih suk a, za lo zet hian ka nui ve mai a, inhaw lo taka hmeichhe dang nen an awm dun chu ka thik chiang a ni.

"Engmah pawh kan ti lo, serthlum kan lei lawk a, nangni zawk eng nge in tih?" Rosa-i chu a aw aṭangin a lungawi vak bik lo tih a hriat hle.

"Lehkhabu kan zawng a, tun lai i mu ṭha lo em ni?" tiin Ben-a chuan min biak zawm daih a, ka biang tawn tawn chu khuapin min en a, a awm dan vel chu ka hrethiam rih hlawl lo.

"Nia, mu ṭha vak lo. I zin khan ka hre sia, engtikah nge i lo haw a?" ka thinrim rukna chu ka thup hram hram a, a ṭhiannu chuan min lo en chiang khawp mai.

"Nizan khan ka lo haw alawm, ka haw tlai bawk si a, ka rawn be ta lo mai che a nih kha!" nui suk hian a ti a, kei erawh ka nui ve thei tawh der lo.

"Kan haw ang e" tih leh chet ka rual a, mak tih hmel deuh hian min en a, en pawh en rei duh lovin Rosa-i chu ka signal zeuh a, ka kalna lamah a lo kal ve nghal mai a, ka thil tawn mêk ang chu tawng se tu hmeichhia mah an lungawi bik lo ang.

"Arin, i lungawi lo em ni?" Ben-a aw ngei a ni tih ka hria, ka hawi lêt a, kan kalna lamah min lo zui chu niin, amah chauhin a ni tawh bawk.

"Inhmuh emaw inbiak ka duh rih lo, i ṭhiannu nen khan lehkhabu chu va lei zawk rawh u" ka aw chu ka thunun nasa hle a, mahse ka aw aṭangin ka lungawi lo tih a hriat tho ka ring.

Bus-in kan haw a, Rosa-i an veng lamah a tlang a, kei pawh ka tlang nghal a, in chhung ka lut te chu ka ni nghulh mai. Zanah min rawn be ta ngei a, phai lamah presentation pe tura a zin dawn thu min hrilh a, ka lungawi tawh lo sa bawk nen ka off khum hmak ringawt. Min rawn call leh nghal thuai a, ka pick up rualin ka off chhan min zawt a, pakhat mah ka chhang lo. A buai tih ka hria, mahse engati nge hmeichhe dang a bazar pui kher nì, a bialnu zawk pawh ka awm ve reng a, tun ṭum chu a tidik lo ve chiang a ni. Kan inbiak chhung zawng chuan nuam tihna pawh ka nei lo, ka chhang zeuh zeuh duh lêk chauh a, a zin haw huna sawifelah kan inkar chu a dah ta ringawt.

Class kan kal lai te chuan ka rilruin ka ṭawngṭaipui leh ang lawi a, ṭha taka presentation pe turin ka duh a ni. Doctorate degree nei ngei se ka ti a, chu chu amah paw'n a duh a, a lakah lungawi lo mah ila hlawhtlinna a chan ka duh tho si. A chhan chu ka thinlungah hmun a chang hnem tawh em em a, a nât te, a beidawn te ka hlau a, a hlawhtling lo ang tih mawlh ka hlau ṭhin. Engkim chu hmangaihna vang a ni a, phat rual lovin ka hmangaih tawh a ni. Kâr khat chhung vel chu kan inbe lo vang vang a, a zin lai a niin ka hria, a hma angin biak ka tum tawh bik lo va, ka ngaih ang leh ka thlakhlelh angin min ngai ve lo ni mai te'n ka hre ṭhin. A kâr hnihna zan hmasa berah a lo lang hlawl a, lungawi lohna aiin mak ka tihna a tam zawk.

"Lo leng rawh, tun lai chu i va lo lêng khât ve, ti khan lo inkawm rawh u, ka va mutsan ang che u" tiin nîtei chu an room lamah a lut nghal daih a, pa Dika erawh an room-ah a awm sa thung.

"Pawnah awm ila" a ti sup a, ding deuh thutin ka kal a, min lo zui ve mai a, ka lungawi lohna pawh a la reh fel bik chuang lo.

"I mamawh ang tawka ka biak ngai loh che avangin ngaihdam ka dil e, presentation pawh ṭha takin ka pe zo a, degree ka nei tawh ang chu a ni mai" pawna kan awm hnu chuan a ti a, ka lawmpui rualin ka duh tak a la sawi lo tlat.

"I lung a la awi lo reng em ni? Engtin nge i lung ka tihawi ang? Min han hrilh teh le! Zanin chu i lungawi hma zawng haw ka tum lo a nia, sawi rawh le!" ka hnung lam aṭanga min kuah chung hian a ti leh a, ka ngawi reng thei lo ta nge nge.

"Heti ang hun a thlen hi ka hlau ṭhin, nangni chu khawpuimi in ni a, hmeichhia ni se duh duh in thlang thei hial ang. Kei ve mai min duh te hi ka lawm em em a, ka phu lohzia che ka hre bawk. Ka zep lo ang, hmeichhe dang changkang tak tak te nena in awm dun ka hmuh hian ka thik ṭhin asin, mahse nang chuan engmah i hrethiam ngai chuang lo. Thil zep thei deuh ni ila ka ti ngawt mai, ka inpuang ta ringawt a, i duh chuan min ngainep sawt thei ang. Kan inmil tak tak dawn lova i hriat chuan inṭhen rawt mah la pawi ka ti lo, kan nât tak tak hma hian a fuh zawk ka ring" ka ti duah a, aw dam zet hian

"Inṭhen i duh em ni?" a ti tawi fel ât a, thawk ka la hmasa phawt a, min kuahna aṭang chuan tal chhuah pawh ka tum chuang lo.

"Ka hre lo, ni lo, duh lo, ka sawi awmzia chu eng lo" ka ti bah nawk nawk a, ka beisei loh deuhin a nui hawk hawk a, chuti ang taka zà chuan a nuih ka hre ngai miah lo, chu vanga mak ti ru em em pawh chu ka ni.

"Kei paw'n inṭhen ka duh hleinem, duh loh tak ka ni. A bul chu keimah ka ni tih ka hria e, ka ṭhiannu pawh kha thik buai duh suh, ka tan chuan ṭhian chauh alawm a nih" a tih chuan

"Engtin nge ka rin theih ang che? Lehkhabute in lei dun vel a nih khâ, khatah pawh khan ka rilru i tinâ hle asin" ka lo ti ve nghal pang pâng a, a nui suk duh lêk chauh maw lè.

"Ka rilrua awm reng ṭhin, ka ngaih em em, biak ka châk em em, mahse ka biak chuan hun tam tak ka hmang ral ang tih ka hlauhna awm chhun chu nang chauh hi i ni Arin. Ka chhungte ai paw'n ka ngai zawk che, research ka ti mêk bawk si a, ka biak che chuan nuam tih lutuk avangin hun ka hmang ral hnem dawn si a ni" a tih dap dap chuan ka ngawi kar ringawt.

"Min en teh le" ti lehin min kuai her a, ka biang chu a dawm a, min en chiang hle bawk.

"Ka hmangaih che" a ti chiah chu ka kâ hau a, nui suk hian

"Mak i va tih hmel ve, B.Ed training zawh hûn hunah kan innei nghal ang. Final Presentation ka pek dawn zan thleng khan ka nupui i nih hun tur ka suangtuah nasa asin, min lo ngai ve ṭhin em?" a tih leh chuan ka kuah thlawp a, lungawi lohna pakhat mah ka nei tawh lo.

"Ka hmangaih che Ben" tih chauh ka sawi a, min chawi kang lâwp a, a lakah chuan nautê ang vel lêk ka nih ka ring.

"Ka hria alawm, min ngai em em tih ka hre bawk. Kan inkarah hian buaina a awm tawh tur a ni lo, a ṭha em?" tiin min fawp vang vang a, hmangaih ber te nena infawh zawng sawisel bo a ni.

"I laka ka lungawi loh vak avang khan ka tihpalh, i hah awm tehreng nen, ka inthiam lo tak zet" ka ti mawlh mawlh a, inthiam lohna hlirin ka khat tak tak. 

"Ka ngaidam nghal che ni rawh se" tih leh min fawh a rual nghal zat a, kan taksa chu insi reng se ka duh hial.

"Ka training zawhah pasal ka nei nghal ngawt thei lo ang, ka nu leh pa chawm ve phawt ka duh alawm, têt tê aṭanga min chawm seilian tute an ni a, ka chawm lêt ngei ngei a ngai" min pawm ṭhat hle hle hnu chuan ka ti a, nui thum bul chung hian

"I nu leh pa ka bia ang a, engkim a fel vek mai ang. Chu bakah kan innei ang a, kei paw'n ka chawm thei dawn tho alawm, kha lam kha chu a harsa lo, hun lo la awm tur a nih angin dah bo rih teh ang" a ti a, ka nghawngah a hmui a nghat a, nuam tho mah se ka tawn ngai loh a nih avangin ka phu leh deuh zawk ṭhin.

"Hetia awm char char hi ka châk" sawi awm leh awm loh pawh ngaihtuah hmasa lovin ka ti thâwr a, ani chu a lo nui nghawr dat thung.

"Nang berin i tih te chuan kan awm char char mai a ni ang chu!" a ti hniam ruih a, fiamthu deuh reuha a ṭawng ṭhin hi ngaihthlak nuam ka tih zawng tak a ni.

"Haw tawh mai la" kan ngawih dun vang vang hnu chuan ka ti leh lawi a, ani pawh a nui leh ta nge nge. 

"I len loh tehreng nen i rit zêk a, chaw i heh reuh dawn a nih hi! Ka bân a kham vek tawh alawm, chhuk tawh rawh le" tiin leiah min nghat a, a âwmah ka chum zui nghal a, min sawi dan ber kher chu ka ngei reuh lutuk.

"Ka nupui i nih hunah phei chuan i va hmelṭha zual dawn tak êm, ka chawm ṭha dawn che si, fa tam tak neih ka duh dawn bawk a nia" amah bawkin a ti leh a, nui chung hian

"Zanin hi eng nge i hriat a? I rui ti dawn ila zû rim emaw damdawi rim i nam bawk si lo, i ṭawng duh reuh tawp" ka ti hluai a, a nui ve leh ta hawk hawk. 

"I bulah hi chuan ka hlim tih hrethiam rual i ni tawh asin le" min kuai dâk pah hian a ti a, min fawp vang vang a, kan inthlah lawk thei lo va, kan hmui a inbawhthuah loh hnuah pawh ka hnung lam aṭangin min la kuah reng tho.