𝐌𝐄𝐋𝐎𝐃𝐘 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦

MELODY

(Mizo Romantic Short Story)

By 

Havali Adam

Khua chu a duai ruih a, awm a tinuam lo ang reng. Nî dangah te chuan nî a sa ṭha ver vawr zel kha a nia, vawiin chu insuk pawh in chhûnga ka pho mai a ngâi ang.

Nu nih zet zawng nulat lâi nen a inang lo ngei mai, kan nulat lâia kan awm dan te, kan thil tih ṭhin tam tak tih loh a ngai a, keimahni chiah kan inngaihtuah thei tawh lo a ni.

Pasal tan nupui ṭha tak nih a ngai a, ka mona chhungkaw tan mo fel tak nih a ngaih mai bakah kan fate tan nu ṭha ber nih a ngai lehzel bawk a, hmeichhiate hi chu kan chhel a va'n ngai bik ṭhin tak!

Eng emaw hlek awm se kan hmingchhe hma si, zaah thil pakhat lêk pawh tidik lo ila tidik lo vek ang kan ni!

Keimah tak chuan a harsa ka tih ṭhin ber chu lemchan a ngai tel ṭhin hi a ni; mahse chu chu kan tihmakmawh a ni lawi bawk si.

Ni e, tu mihring nge lem chang lo bik ang ni!

Kan duh zawng anga thil a kal chiah loh paw'n mo ni tawh chuan pawm der thiam a ngai a, nuih luih te a ngai fô ṭhin.

A bik takin kan pasal chhungte; keini mo tâna chhungkaw tharte bulah phei chuan a ṭha thei ang bera awm a ngai a, an sual emaw an fel emaw a ṭha thei ang bera awm a ngai a ni tawp mai.

Hrehawm kan lo ti deuh a nih paw'n ngaia neih tum mai a finthlak a, chu chu hmeichhiate; a bikin mote thil hma chhawn zinga langsar tak pakhat a ni.

Ka pasal nen kan inneih hma khan ka mawhphurhna sân turzia leh ka nun dan ka her rem a ngaih nasat turzia ka hre láwk vek a, mahse a taka tawn leh nunpui chiah chuan a danglam kher mai.

Fate kan han nei a, fa enkawl ngai bawk, in chhungkhura chet a ngai tel zel bawk, indaih loh a ná ṭhin a ni.

Kum 7 lái chu ka pasal nen hian kan innei ve tawh a, fa pawh pathum kan nei tawh nghe nghe a, an chhang a zing ve ang reng.

Vawi khat nau chhiat lo phei ila chu fa pali kan nei tawh zawk ngei ang, mahse Pathianin rem a ti rih lo a ni mahna!

Kan tê ber hian kum a la tling lo deuh a, mi dang pahnih erawh kum inzáwnin an piang a, enkawl buaithlak chang tam mah se an naupan zual lai ang em ema harsa erawh a ni tawh lo.

"Melo, min lo pui lawk mai teh, i buai loh chuan" ka nu aw ka hriat rualin choka lamah ka phei nghal a, bawngsa a lo zai mêk a, vawnpui a ngai a ni hrim hrim ang.

"Chemtê hi a bil tawh a nih hi, Lawmsanga lo haw se, tâh hriam a hun leh tawh viau mai" kan awm dun hnu chuan a ti melh melh a, tlai lamah chaw ei khawm kan neih dawn avanga bawngsa chu buaipui kan ni bawk. 

"Khaw'nge maw Lâtei pawh hi a awm reng reng le, chawhnu her a ni tawh a, kan inbuaipui fel thuai thuai a nih loh chuan kan tlai duai palh ang tih a hlauhawm" ka nu thusawi aṭang chuan thil hriat chhuah ka nei ta zawk!

"Elpuia ka hruai a lo hun reng tawh a nih khi ka nu, ka va kal lawk ang a, ka lo haw hunah ka pui leh dawn che a nia" dar zat en pah chuan ka ti a, min buk khum zeuh hnuah kut ka sil sawk sawk a, ka kal chhuak zui nghal. 

Kan fapa upa ber Elpuia te School hi kan in aṭang a hla hran lo va, kan veng chhunga awm a ni nghe nghe a, mahse kumina school kal ṭan ve chiah a nih avangin hruai a ngai a, thla eng emaw zah chu kan inhruâi kan inhruai ve tawh!

Ni dang ang bawkin school kawt chu a chep leh khawp a, kawngpui ân a ni tlat bawk si a, veng dang aṭanga an fate lo hruai tur te motor a ding tam thei si a, kawng chu a chep lo thei lo a ni.

Kei erawh kein ka kal phei mai zel a, ke bawkin Elpuia ka haw pui ṭhin bawk a, keini tan chuan a awlsam phian!

Darkar tam nghah ngai lovin Elpuia hmel ka hmu thuai a, min hmuh rualin ka lamah a rawn tlan a, a tluk hlau ru zetin ka lo kuah vat bawk.

"Anu, ABC ka thiam vek tawh, ka sa thiam tawh asin" hlim taka min betu ka fapa chu ka en a, ani chuan min en lo va, kal pahin a ke a khai leuh leuh a, khaw duai tih vel a ngaihtuah lo tih a chiang hle. 

"A nih chú, inah i sa chhin ang a, Naunaua i zirtir ve anga ti raw? Api bulah pawh i sa ang a, apa lo haw hunah i sa bawk ang a" ka ti ve siam siam a, thu dang sawiin ka be phei melh melh a, nuam a ti khawp mai. 

"Api, ABC ka sa thiam asin, ka thiam vek tawh" in chhunga kan luh rualin Elpuia chuan a ti a, ka nu pawh choka lam aṭang a rawn chhuak a, a sa khawih lai chu a ngaihsak tawh bik lo. 

"A ni maw? Ka tupa lian tawh chu i va'n thiam ve le, khaw maw api hriat lai hian han sa chhin teh le" ka nu leh Elpuia chu ka kalsan a, kan room lama thawm ka hriat vang a ni pakhat!

"A lo harh tawh em ni âw ka fapa duat hi? A u pawh a lo haw tawh asin, ka pawm daih ang che aw" tih leh Naunaua chu pawm kán ka rual nghal a, a harh chiang hle leh nghal. 

"Nu, ka ril a ṭam" fiah lutuk lo hian a ti ṭial ruai reuh a, room aṭanga ka chhuahpui hmain kan tê ber muhil bam chu ka en leh tê tê phawt a, chumi zawhah ka chhuah pui ta chauh!

Sitting room-ah pawh ṭhut khawmuan pui lovin choka lamah ka luh tlang pui a, Fridge ka hawng a, thingpui leh chhang ka chhawp sak a, a ril a ṭam viau tak tak a ni ang, chhangte chu a ei hnem reuh hle.

Elpuia leh api erawh an la zai a, an hlim dun khawp mai. Naunaua chu ka ṭhut pui a, a u nen inchhangbung an ni bawk a, a u ei zata tam a ei ziah a, Elpuia a len khalh mai te ka ring ṭhin.

Thil a ei zawh chuan a ute bulah a kal a, u Lâtei pawh a rawn lut a, ka nu sawi dan takah a lo lang har phian. Chokaah kan pahnihin kan che dun malh malh a, eng eng emaw ni kan sawi bawk.

Dar 4 rik dawnah ka pasal a lo haw a, a fate pahnihin an pan nghal chawt a, ka pasal hi kan vêng kohhran upa e ti lo chuan a fate bulah erawh a che naupangchhia ve thei tawp!

Kum tam tia sawi theihin kohhran upa a la ni lém lo va, a nihna a la rei loh aiin a puitling phian thung a, a che fel viau bawk.

KṬP a over deuh chiah tihah tual upa atan kohhran mipuiin an thlang tling a, a hnuah kohhran upaa nemngheh a ni leh a, zan lamah te hian a buai thei khawp mai.

Kan inngaihzawn lai khan hna ka nei ve a, mahse kan inneih hnuah erawh hna ka thawh a phal lo va, ama'n min chawm tawp a ni ber. 

Hmân aṭang tawh school pakhatah a la thawk char char a, a nghetin a thawk nghe nghe a, a thawhpuite zingah pawh kum lamah upa hran lo mah se a senior pawl chu a ni ve tawhin ka hria.

Min rawn rim ṭhin lai khan ka pa a la dam a, ka pa nena awm kha kan ni a, kan inngaihzawn laiin ka pa'n min kalsan thut a, ka va'n tuar nâ mai mai tak!

Chutih rual erawh chuan u Lawmsanga hnen aṭang min hmangaih thu ka hriat phah thung a, khang hun lai kha chuan ka bulah a awm chawt a, KṬP aṭanga inhre chho kan ni bawk a, min hnem dan te kha a ringtu thlawt a ni.

Ka rinna zawng zawng amahah ka nghat a, ka hmangaih a, nu leh pa ka chân ve ve tawh bawk nen min hmangaih zual phahin ka hria. 

"U Hrila chu a rawn haw hma thei dawn ém?" tiin u Lâtei chu ka zawt a, ei rawng kan bawl fel titih tawh a, hmanhmawh taka chet a ngai tawh lêm lo. 

"Haw hma ka lo tum ang kha a tia, ka hre lo, tun ang hunah te chuan lo haw hma ve mai tur asin maw le, an pute lah hi Vâi an ni vek bawk si" a ti ve nghal mai a, zawh zawm lovin thil dang ka sawi pui ta daih.

"A va rimtui ve le, i chawhmeh siam hi chu ka hai lo chiang a ni" ka pasal chu engtik laiin nge chokaah a rawn luh ka hre lo reng reng!

"Melo-i siam a ni hleinem, ka siam a nih kha!" u Lâtei chu nui chungin ka melh a, anni pahnih hi zawng ngaiah ka nei tawh, ka mo tirh kha chuan mak ka va'n ti tak, an infiam peih lutuk kha mak ka ti hle ṭhin.

"I chawhmeh siam te chu hetiang rim a nam ngai lo, u Hrila lah a awlsam si, i tan chawhmeh siam a hautak loh phah a, i vannei ka ti" u Lawmsanga chhan dan avang chuan ka nui var var a, u Lâtei erawhin a ei loh hmel nasa mai.

"Awi awi awi, Lalhrilliana chiah chiah, in unau hi chuan in nghal ve thlawt a ni. I ti ve em Melo?" u Lâtei chu ka buk khum nghauh nghauh a, ka pasal chuan ka chalah nâ vak lovin a rawn nam nghal. 

"Min ṭan dawn na nge?" ka pasal âwmah ka nam ve nghal a, chhang lêt lovin ka nui tawp ringawt!

"Elpuia te ho an mu em ni?" ka ti ta zawk a, hmarcha rawt tur ka la chhuak mawlh mawlh a, u Lâtei erawh a chhuak daih thung. 

"Khawi teh, awm sawn rih la, ei rawng ka bawl hi u Lawmsang" ka hnung lam aṭanga min rawn kuah chuan ka ti thuai a, a awm dan chu tlai dang a ang lo riauin ka hria. 

"Inbual ila" a thusawi avang chuan ka che lai ka tawp chat a, a va han ti awm ang lo ṭhin tak.

"Nangmah paw'n i inbual thei reng alawm, lo va inbual rawh, kei chu ka hman veleh ka inbual ang" ka tih chuan 

"Va inbual hmasa zawk rawh, khawi keima'n ka lo bawl chhunzawm ang, i hah tawh awm si" a ti leh lawi a, tlai dang a ang hlawl lo. 

"I va inbual hmasa dawn nge kan inbual rual dawn?" ka awm sawn tawh chu min rawn din hnaih sauh a, ka kawnga chelhin a lamah min pawt hnai zawm zat a, kan inen hnai thawkhat ta viau!

"Nang pui hi eng nge i hriat a?" ka ṭawng zo chiah tihah min rawn fawp vawng vawng a, min fawh dan chu dawnsawn a nuam kher mai. 

"Ka nupui hi ka ngai che maw le" nâ vak lova min nam dak deuh âwrh pahin a ti sup a, a nui sun sun a, ka pasal mah ni se ani hi zawng sawisel bo khawpin a ṭha a ni. 

"Eng lo" tih bak sawi tur ka hre lo, ka lai tlat pek a nih chu! 

"Va inbual rawh le, in inbual chhungin ei rawng ka lo bawl ang a, zanah min duat thung ang" nui chunga a tih chuan a âwmah ka chum a, sitting room lam ka hawi phei a, a ṭawng dan chu mi dangin an lo hre palh ang tih ka hlau ru hle. 

"A nih chuan ka phei dawn a nia, chuan dawl rép kha bai teh a, i bai ka ei châk thut" ka kal sawn tak tak hma chuan ka ti hnuhnawh leh a, chawhmeh dahna enin a zawng zui nghal a, a kun dûk duk danah a hmu lo a ni ngei ang.

"Ka hmu lo" a tih chuan ka zawn pui ve nghal mai a, keimah tak paw'n ka hmu bik miah lo, a zo tawh a ni maithei. 

"Va inbual phawt la, thlai zuar hovin an nei em em ang, ka nupuiin dawl rép bai a ei châk a nih chuan ka va lei ang e" ka chhiat khum deuh vak kher a, tlai dang ka ang bik lo tih ka hria, a chhan chu ka lai zel tlat!

Kan room-ah ka lut a, kan tê ber chu a la harh lo va, ani pawh tun ṭum chu a mu rei phian! Ka inbualsan a, u Lawmsanga nena kan awm dan vel chuan min tihlim hnuhnawh khawp mai.

B.A ka graduate hnu lawkah Contract-in hna ka hmu nghal a, mahse rei ka thawk lo. U Lawmsanga nen kan inngaizawng chho va, kei aiin a upa fê a, keini tleirawl chhuak hlim hlawl min duh daih kha mak ka ti ṭhin.

KṬP huang chhungah ni se ngaihzawng tur a hmuh zawh tehreng nen, ṭhenkhat kha chuan min thik ṭhin chiang a ni.

Mi kaihhruai a thiam mai bakah thutiama ding nghet em em mi a ni a, amah a puitling a, ka pa pawh khan a dam lai khan a ring hle a, ka tana mipa ṭha tak niin a hria a, kei ngei paw'n ani tluka mipa ṭha hi chu ka hre tawh kher lo vang.

Kum 20 kan pel chho ve ṭan chiah a, ani erawh tlangval senior thanin a thang tawh thung a, tlangval naupang aiin senior lam hian zun a ngah zawk ni mai te'n ka hriat phah nghe nghe!

Kum 2 leh a chanve vel chu kan inngaizawng a, kum 3 a tlin hmain ka pa'n min boralsan ta si a, mahse ka mal lo chiang hle. U Lawmsangan nupuiah min sawm thuai a, chu pawh ka khawhar a hlauh vang leh keimah chauha ka awm a phal loh vang a ni.

Kei paw'n ka remti a, ka pa thih aṭanga thla 6 hnu velah dan khatnain kan innei ta ngei a, lawmpui tu pawh kan ngah khawp mai. Veng chhung mai ni lo veng pawn aṭang kan inneihnaa lo kal an ṭhahnem ve hle a, ka ṭhiante pawh an lo kal kim vekin ka hria. 

Zanriah ei lai chuan kan hlim hlawm hle a, kan chhung hnavai ho zawng zawngte nen kan ni bawk a, kan bengchheng chuah chuah hlawm hle. Chaw ei khamah puitlingho chu kan titi a, eng eng emaw ni kan sawi a, chu zawng chu a ni mai, kan bengchheng hran lo.

Naupangho erawh a rak hian an rak a ni ber a, u Lâtei te fapa ni se a harh nasa mai si. U Hlira paw'n a pawm hlei thei lo, kan fate ai kum 4 velin a upa zawk a, fa dang erawh an neih belh leh ta miah lo.

Keini ve thung chu Pathian zarah fa kan nei deuh zung zung a, kan fapa tê ber hi a fal hret a ni mai a, u Lawmsanga lah chuan fa neih tam a la support em em zui.

Zan dar 9 velah kan venga awm lo, kan chhungte chu an haw sap sap a, keini paw'n kan thlah thlap a, kan fate erawh an muhil leh diam tawh thung.

U Lâtei te chhung chu an ṭhu khawmuang rih a, anni nen hi chuan kan inawm hnaih hrim hrim a, haw tlai pawh ni se a pawi lo. Thingpui ka lum leh a, thingpui in pahin thil chi hrang hrang kan sawi a, an haw meuh chuan dar 10 leh a chanve a ri thuak tawh!

Mut zai kan rel nghal a, ka nu chu a room-ah a lut a, u Lawmsanga nen kan inhriat hma aṭang daih tawh pasal a sûn a, kum a vei hnem tawh bawk si a, a khua a har thei ṭhin ngawt ang ka ring.

"Vawiin chu eng nge i lo tih à?" ka pasal chuan ka hnung lam aṭangin min rawn kuah a, ka dul zawnah a kut a rawlh zawm zat bawk. 

"A ngai a ni mai" ka ṭawng zo chiah tihah a lam hawi zawngin min kuai a, thu dang sawi tawh lovin min fawp ta mawlh mawlh a, kan kal thui tak tak hmain ka nam sawn thung. 

"Ka ban deuh chuap a nia, tlaiah inbual tawh tho mah ila ka va inbual leh lawk" tia thawh ka tum chu min chelh vat a, tal chhuah ka tum em em bik chuang lo. 

"Kan inbual rual zawk dawn nia, ka la inbual hleinem" tih leh min fawh a rual nghal zat a, ka chungah rawn bawkin min fawp mawlh mawlh a, ka pasal lakah chuan ka mamawhna ka thup seng lo va, thup buai ka tum lo hrim hrim!

"Ka rai leh ringawt mai ang a!" inhmangaih tawn taka nupa nun kan hman hnu chuan ka ti sep a, ani erawh a nui nghawr dat a, khum aṭanga thovin min pawm kang ta nawlh. 

"In ha phawt ila" ka tih chuan

"Inbual zawhah kan inha zawk dawn nia, kan fapa muhil mêk hmuh hlau rual i ni tawh lo Melo, Elpuia te pahnih chu ni se thuhran" ti sûp supin bathroom lamah min pawm phei a, chhang lovin ka nui ringawt!

Rei pawh kan inbual lo va, kei phei chu ka intleuh zuaih zuaih a, inbual pangngaia inbual chu amah zawk a ni. A chang hi chuan bathroom-a nupa nun hman changte pawh kan nei ve ṭhin tho va, mahse kan ti zen zen chuang lo.

Khuma kan mut fel leh hnu chuan a laiah kan fapa a mu a, keini pahnih a sir tawn tawnah kan mu a, Elpuia leh a nau chu khum khatah an muhil bam tawh bawk.

A chang leh a pi bulah an riak mai zel a, an têt zual lai kha chuan kan bulah hlir mu ṭhin mah se tunah erawh an intitlangval hle tawh thung.

Zingah chuan zing dang ang bawkin ka harh hma hle a, ei rawng bawl hmain tui lum tur ka chhuang a, a sô hnu rei lovah thingpui ka siam zui nghal bawk.

Ka nu hmel pawh ka hmu har lo va, mi dang erawh an la mu ṭhap a, tho tlai mah se a pawi hran lo. Chu bakah u Lawmsanga phei chu a chawl dawnin ka hria, a sawi tlat a ni.

Ka nu ṭhiannu pakhat a rawn lêng lut a, an inkawm char char a, keiin ei rawng ka bawl zawm mial mial a, rin ai takin u Lawmsanga chu a lo tho hma!

Kan fapa tê ber Ngaihtea a rawn pawm chhuak a, ka ei rawng bawlna bulah an awm ve reng a, Elpuia leh a nau pawh an rawn lang har lo hle. 

Thla kan hmang ral a, u Lawmsanga nau chiah u Parvuli phai aṭanga a lo haw dawn thu kan hria a, kan fate phei chuan an hmu châk tawh khawp mai.

U Parvuli hi phaiah hnathawkin a awm a, kum khatah vawi khat chauh te a lo haw thei ṭhin. A lo haw chhunah erawh thla khat emaw thla hnih emaw lawih te a awm ṭhin thung a, tun ṭum a lo haw tur pawh a awm rei ka ring.

U Lawmsanga nau mah ni se kei aiin a upa daih a, chu vanga u pawh chu ka ni. Keimah nen tak hi chuan kan innêl lutuk hran lo, u Hrila nupui u Lâtei nen an innêl zawk a, mahse ka be nasa thei tawp, innêl lo deuha awm ka duh vang lo a ni.

A lo haw dawn tih kan hriat aṭanga kâr khat hnuah chuan kan in chhung ngei a rawn thleng ta, amah paw'n nuam a ti viau. Chhunah te chuan Elpuia min hruai chhawk zak zak a, kum dangah chuti ang em em chuan min pawh ngai miah lo va, mak ka ti ṭep ṭhin nghe nghe!

Ka biak hmasak ngai lovin min be zel a, kâr khat hnuah phei chuan ṭum dang ang lo zetin innêl tak kan ni. A châm theih chhung tur ka zawt a, a la chian loh thu a sawi ve mai a, châm reng tur te'n ka ti ve lûam a, ani paw'n châm reng chu a châk hmel khawp. 

"Ni lo, anu bulah i ṭhu ang a, nuam i ti viau ang" u Lawmsanga chuan Elpuia a la thlem char char a, Elpuia lah a pa bula ṭhut a duh tlat bawk si. 

"Lo kal rawh leh Elpui, Naunauan a en reng che a nia, naute hmuhah an ṭap ngai lo. Chu bakah apa te chu kohhran upa ṭhutnaah a ṭhu daih dawn alawm, putarho bula ṭhut i duh em ni?" tia ka thlem ve paw'n awmzia a awm chuang lo. 

"Kei chu Hulk-a lem ka nei asin, lo kal daih rawh Naunau, au Elpuia chu a ṭahbelh em mai, a ṭah loh hunah chauh entir kan phal dawn nia" tiin u Parvuli chuan thil dang a rawn sawi leh a, Elpuia beng verh zawng tak a ni hlauh a, chuti ni lo se chu u Lawmsanga a kal tlai phah khawp ang. 

Inkhawmnaah chuan beisei loh lutukin a buaithlak leh tlat a, Pathianni zan a nih mai bakah inkhawm an tam si, ka va han mangang ru tak!

Elpuia bawk chu a pa bulah ṭhut a duh a, ka phal lo ṭhin, ṭah a tum zel mai bawk si, u Lawmsanga chuan min rawn en leh zawk ṭhin a, a fapa ṭe hiar ri chu a hai lo chiang hle.

Min buk khum zeuh tâkah chuan Elpuia ka chelhna chu ka thlah ta nge nge a, Elpuia lah a pa ṭhutna lamah hmanhmawh zetin a tlan phei titih a, mipui chuan an en duh hlawm viau bawk. A pa mal chungah a va ṭhu tawm kâk a, Naunaua erawh u Parvuli bulah a ṭhu ngawi reng thung. 

Keiin Ngaihtea ka pua a, kan bulah ka nu a ṭhu bawk a, chhungkuain kan ṭhu chu a ni mai. Kan hnungah u Hlira te chhûng an ṭhu leh zel a, anni tak ngial paw'n Elpuia chu an thlem thei bik lo.

Zan danga kan inkhawm te chuan a fel ber leh awm ṭha ber a ni ṭhin a, tun ṭum chu a mak ngawt mai. A dam lo ti dawn ila a dam ṭha tho bawk si, eng emaw tak chu amahah dik lo a awm chiang a ni. Inkhawm kan bang a, kohhran upa te'n ṭhut fual an nei lo hlauh a, a zia zawk!

Elpuia chu a pa'n a pawm haw a, a muhil daih tawh a, Naunaua pawh a muhil tawh bawk a, ani erawh u Hrilan a pawm haw thung.

"Engati nge maw'n le zanin chu, a dam lo em ni?" khuma a fapa mut pahin u Lawmsanga chuan a ti sup a, ka chhang lo va, Ngaihtea chu ka mut ṭhat tir ve nghal mai bawk. 

"Melo?" a rawn tih leh chuan

"Ka hre bik miah lo, inkhawm kal dawn aṭang khan a dik tawh lo, a ṭha ve leh mai turah ngai ang" ka lo ti ve mai a, ka inthlak zawm daih a, ani pawh ding reng lovin a inthlak ve nghal.

A tukah erawh Elpuia chu a pangngai ve leh mai bawk a, a pa a ngai thut a nih ka ring ta ber. Ka ni hman dan leh ka hun hman dan chu a ngai ngawt ngawt a, thil thar vak hi a awm ṭhin lo. Nupui nih chuan pasalte tana nupui nih tlin tak nih a ngai a, kei ngat phei chu ka mawhphurhna a sangin ka fimkhur a ngai hle.

A chhan chu ka pasal ber kan kohhran upa a ni tlat a, lungnih loh chang pawha ṭawng vak vak te, vin chiam te, engkimah inven fimkhur a ngai hi a ni tawp mai. 

Chutah ka pasal chhungte tan mo ṭha tak ka nih a ngai bawk a, ka ning em em pawh a ni lo, hmeichhe dinhmun buaithlakzia ka ngaihtuah chhuak mai zawk a ni.

U Lawmsanga chu a lo haw hma ang reng hle a, Elpuia a ngaihtuah vang a ni pakhat. A lo haw hma chhan ber Elpuia ni se engtin mah a awm leh tawh chuang bawk si lo, ei rawng te kan bawl dun ta ringawt a, a nuam letling phian.

Min kuah loh leh ka biang velah a rawn fawp leh thut zel a, kohhran upa mah ni se ka dem lo, mihring ve tho a ni a, kum lamah pawh kum 40 chung lam ni vâr var tawh mah se mipa a ni a, a nupui min ngai a, min kuahin min fawp châk ve a ni mai.

A hma kha chuan kei ngei paw'n kohhran upa te hi puithu leh inhmuam up lutuk turah ka ngai ṭhin a, mahse ka pasal ber kohhran upa a ni tâkah chuan ka hrethiam ve chiah. 

"U Lawmsang, Love Song hi awm mai mai lai te hian sa ta ila a pawi em?" ka tih chuan a nui suk a, a kiua inbeng kangin min en a, min chhan lawk loh danah a ngaihtuah a ni maithei. 

"Sak a pawina em em ka hre lo, mahse áwm leh mawi hi chu a awm ve a, a hmun leh a hun azir te pawh a ni ang. Kan rinna a ngheh phawt chuan engah mah ka ngai lo, mahse Pathian kan hlat theih nân Setana hian hmanraw ṭha deuh deuh hi a hmang duh khawp mai" a ti dam dap dap a, sawi dik ka ti viau.

"Eng nge tih i tum?" Ngaihtea muhil lai a pawm káng chu mak ti ru zetin ka en a, ka mutna bulah a rawn mut a, min saisir tir rualin ka hnungah a mu zui nghal.

"Hetia mut hi ka châkna a rei tawh" tih leh ka dula a kut nghah a rual a, keiin kan fapa muhil bam chu ka en reng a, nuam ka ti ve reng tho.

"Kan mu ziah dawn nia" fiamthu deuh reuha ka tih chuan min kuah nghet sauh a, tui taka mut tumin ka mit ka chhing zui ta vang vang bawk. 

Ni khat chu u Parvuli nen chauh inah kan awm a, chawhma lam a ni a, phai aṭanga a lo haw tirh a ang lo leh ta khawp mai. Zing aṭang daih tawh khan a mood a fuh lo tih ka hria, chu vanga be em em lo pawh chu ka ni!

Ka nu'n Naunaua a lén chhuah pui daih a, Ngaihtea ka awi mu zo chiah bawk a, in chhung chu a reh ang reng. Elpuite hi dar 2 rik dawn velah an bâng ṭhin a, dar 2 rik nân hun a la tam khawp mai.

Bungbel nawh fai tur te ka en thlithlai a, tlêm chu a awm a, ka nawt fai zo rang hle bawk. Parvuli nen chuan inbe lovin kan awm dun ta reng a, thingpui a siam a, min siam kep a, ngawi reng bawkin ka in ve mai.

A mood a fuh loh hi chuan biak reng chi a ni lo va, en liam tawp chi zawk a ni. Dar 1 a ri hnai a, ka ni deuh nghulh a, tih tur em em ka nei tawh rih lo bawk nen khumah ka mu zâl a, ka lo muhil tlang palh a ni ngei ang ka harh leh meuh chuan rizai ka lo sin thân tawh a, dar 2 a pel var var tawh bawk.

Thawh mai ka tum chu ka bulah mi dang mu an awm ve tlat mai, ka va han phu nasa tehreng em. Ka bula mu mêk mipa chu ka pasal a ni lo va, ka hmel hriat ngai pawh a ni lo, ka thin chu phu rang tak a ni. Ka tho chiah chu Bra leh Underpant chiah ka lo inbel reng chu niin, ka ṭe chhuak ṭhawt a, ka inhup nghal vat bawk.

Room kawngka a lo inhawng a, Elpuia hmel ka hmuh rualin u Parvuli ka hmu zawm zat a, an va han meng phawk nasa tehreng ém. Che sawk sawkin thawmhnaw ka ha ṭha thuai thuai a, kan nupa khuma mu, ka hriat ngai pawh ni lo mipa chu a inha ṭha rang ve hle bawk.

A inha fel zo chiah tihah room aṭangin a tlan chhuak thuai a, u Parvuli paw'n a man hman lo. Chutah minute tam liam hmain ka nu leh Naunaua an lo haw a, u Lawmsanga hna bâng a lo haw lehzel bawk a, ka rilru hrehawm lutuk chu ri lovin ka ṭap tawp ringawt! U Parvuli chuan a thil hmuh a sawi mawlh mawlh a, u Lawmsanga hmel ber chu ka en ṭha ngam thlawt lo. 

"Min chhuahsan rih lawk teh u, chhuak rih r'u, vatin!" u Lawmsanga ṭawng tawp lam chu a vin hle a, an chhuak fel ta maw tihah room kawngka a kalh nghal thuai a, awm dan tur ka va'n hre lo tak êm!

"Tu nge i mipa lo mutpui chu ni reng reng? Khawi venga mi nge? Ngaihzawng i nei em?" ka pasal zawhna chuan min chhun zawk zawk a, mahse rinhlelhawmin ka awm tlat bawk si a ni. 

"Nei lo, ngaihzawng ka nei lo u Lawmsang. Tu nge kha pa kha ka hre bik lo, engtin nge kan lo mut dun theih ka hre lo tak zet" a mita en ngam lovin ka ti mawlh mawlh a, ka khabeah a rawn chawi chiang hle. 

"Min en teh, dawt i sawi leh sawi loh ka hre duh" a hma aiin a aw chu a vin tawh lo va, kei erawh ka ṭah a chhuak em em ringawt!

"Min hmangaih em? Nge min hmangaih tak tak lo zawk?" ka pasal chu mittui tling pamin ka melh chho ral a, ka dar tawn tawn a hmer nât danah a thinrim hle tih ka hre thei. 

"Ka hmangaih che" tiin ka ṭap chhuak feih feih a, min thlah a, thawk la ri hawkin khumah a ṭhu hnawk a, mahse room chhungah chuan a awm rei lo hle. 

U Parvuli leh ka pasal inbe mawlh mawlh thawm chu room chhung aṭang ka hre pha reng a, Ngaihtea ṭap ri ka hriat rualin ka chhuak ta vat! Room-ah ka pawm lut daih a, hnute ka pek hnuah erawh a ṭap bang ve leh mai.

Elpuia leh a nau chu a pi'n a rawn hruai lut a, min en dan mawlh chu hrehawm ka ti zual! Ka hriat ngai loh mipa nen khum khata kan lo mu dun thut te, engkim chu a thleng thut vek a, a mak a ni.

Ngaihtea chu a muhil thuai a, khum pawh a chuar ngaiin a la chuar reng a, ei rawng bawl hun theihnghilh ṭhak khawpa thawh ka hai chhanah chuan u Parvuli ka puh ta ber. 

Ni e, a thingpui siam ka in zawh hnu khan ka dik miah lo. Ka mut kha a chhuak ru em em a, ka mu ta ngei a, mahse ka harh leh meuh chuan khawvela ka thil duh lo ber te zinga mi a thleng thung si!

Room aṭanga ka chhuah chuan u Lawmsanga hmel reng ka hmu tawh lo va, sitting room-ah u Parvuli a lo ṭhu kun ngul a, u Lâtei hmel pawh ka hmu ta vat. Zawhna min zawt a, chhan theih mumal pawh ka nei lo, engmah ka hre lo tlat a ni.

Chu bakah engtin nge thil thleng a lo hriat hman ka hre lo, u Parvulin a hrilh hman a ni maithei. Ka nu min en dan te, an zavaia min en dan chu hrehawm ka ti a, zahna hlirin ka khat a, nuam lo ka tih dan chu pui tak a ni. 

"Kha pa kha khawiah nge a awm?" mut hun daih tawh ni mah se u Lawmsanga nen chuan kan mu lo chiang ngei mai. 

"Ka hre lo, tu nge a nih pawh ka hre lo tak tak" hrehawm ti viau mah ila ṭah erawh ka tum mai mai tawh bik lo. 

"A nih chuan engtin nge kan nupa khumah i lo mutpui theih?" a rawn ti leh a, kan inen lo ve ve a, kei phei chuan ka ngam teuh lo, a lakah ka inthlahrung ngawih ngawih zawk. 

"Ka hre lo, mahse u Parvuli thingpui siam ka in aṭang khan ka dik lo tih ka hria" ka thusawi hnuhnung zawk chuan a beng a verh hle a ni mahna, min rawn en ta vat!

"Muhil rawh" ti bul hmukin room aṭang chuan a chhuak a, khawiah nge kal a tum ka hre lo, ka zui chhuak ve nghal a, u Parvuli room kawngka a kik dawt dawt ka hmuh chuan ka hlauthawng nasa em em bawk. 

"Pari, Parvul, lo hawng teh!" tiin kawngka chu a chum ri dawt dawt a, rei lo tê hnuah u Parvuli chuan a lo hawng ve mai a, mahse a lung a awi loh hmel teh e!

"Eng vangin nge Melo-i thingpui in turah thil dang i lo pawlh? Sawi rawh, kha pa thleng khan tu nge a nih i hriat vek ka ring" u Lawmsanga aw chu khauh ṭha tak a ni. 

"Engati nge tun ang zan rei tawhah bengchheng in siam?" ka nu hmel pawh kan hmu thuai a, keimah chuan hrehawm ka ti ta ber mai.

"En teh ka nu, ka u hian Melo-i uire chhanah min puh daih a nih chu! Eng nge ka tih sual? Engmah ka tisual lo asin, Melo-i hi huatna pawh ka nei lo" u Parvulin uire tia min sawi chiah chu ka nâ vawng vawng!

Room-ah ka lut a, ka inngaihtuah a, ka uire leh uire loh pawh ka hriat loh laiin ka lo uire reng a, u Parvuli chu ka dem ta miah lo, a chhan chu ka uire tlat a ni.

Ka zak a, sawi tur pawh ka hre lo va, thiamthu sawi tur pawh ka ni lo tih ka hre chiang ta viau bawk. Ka pasal lo luh lai te chuan ka ṭhu ngawi reng a, kan inbe lo va, bathroom-ah ka lut daih nghe nghe!

Zan khuain kan muhil lo ve ve a, khumah erawh kan mu tho va, ka muhil thei thlawt lo a ni. A tuk aṭang chuan ka rin phak bakin kan chhungkaw boruak a chhe chho ṭan a, ka nu'n min ṭan zawnga thil a sawi hlek lahin u Parvuli a ṭeu hlar a, ka nun chu a chep ngawih ngawih a ni ber.

Ka pasal ber erawh a awm pangngaiin a awm a, kan nupa khuma ka mipa mutpui pa chu a zawng mawl tawp ṭhin a, zawn ngaihna a hre thui bawk si lo.

Kei lah chuan a hmel tih loh pakhat mah ka hre der lo va, a thlalak nei hman paw'n kan khawsa lo a nih kha! U Lawmsanga chu a lungngai tih ka hria, mahse amah aiin hrehawm ka ti daih zawk!

Veng chhungah ka lar ta vak a, uire thanin ka thang a, engtin nge an hriat ka hre leh ta hauh lo mai. U Parvuli ka ring deuh tawp a, mahse min huatna a neih loh thu a sawi zuah zuah zel bawk si. Kan fate thlahthlam a thiang si lo, tawrhchhel a va'n ngai tak ém!

Hrehawm ka tih mai bakah u Lawmsanga lakah chuan ka inthlahrung tawlh tawlh a, veng chhungah dem rawn ka hlawh a, pawn pawh ka chhuak ṭha ngam ta meuh lo.

Inkhawm châkna reng ka nei tawh lo va, mi zawng zawng chuan uire angin min ngai vek a, chhuanlam siama inkhawm loh pawh ka ngah ta mai.

Ka mipa lo mutpui pa lah chu a hmel hmuh tur reng a awm zui lo va, zawng dawn ila zawn ngaihna ka hre si lo, ka vanduai ni berin ka hria.

Zan khat chu u Lawmsanga te an Committee a, ka nu leh u Parvuli an inhnial thinrim deuh a, ka tih tur dik tak ka hre ta bawk. 

Ka fate pathum nen in aṭangin kan chhuak a, kan chhuah lai chuan ka nu emaw u Parvuli paw'n dan min tum lo reng reng. Chaltlang lama ka nutei te bulah kan chho va, ka thil tawn leh ka chanchin zawng zawng chu zep awm hauh lovin ka sawi a, min lo khawngaih khawp mai.

Ni e, ka khawngaihthlak reng asin, ka uire tih pawh ka hriat loh laiin ka uire miau a, tawrh thiam chu a har a ni. Zan dar 10 velah u Lawmsanga hnen aṭang phone call ka dawng a, mahse ka la lo. Nu Rammawii hnen aṭang ka dawn zawm nghal zat a, ani erawh ka la ta thung.

"Rina a lo kal a, hetah in awm bawk si lo va, a mangang teh asin, khawiah nge in awm? Chaltlangah in chho em ni?" a rawn ti zung zung a, u Lawmsanga mangan thu a sawi chiah chu ka ṭah a chhuak zual sauhin ka hria.

"Nia, ka lung a lêng ém a, kan chho lawk mai mai maw le" ka aw aṭang chuan ṭap thei mai dinhmunah ka ding reng tih a hriatthiam vek ka ring. 

"Tunah khan Lawmsanga kan in aṭang a chhuak chiah, a lo kal nghal ka ring, ṭha takin inbe rawh u Melo, keini chuan i uire kan ring miah lo a nia, Lawmsanga nau Parvuli hi kan ringhlel ber" a tih leh ta mawlh mawlh a, mahse engmah ka sawipui peih rih lo.

"Ka dah mai aw" ti sepin phone chu ka hmet tawp a, ka pa nena kan awmna ṭhin kan in kha kum eng emaw zah chu an luah ve tawh a, tun thlengin an la luah reng a, ka nêl mai bakah hman changin ka lêng thla zeuh zeuh ṭhin a, min zawnga u Lawmsanga a kal pawh chu a awm ka ti viau tho.

Ngaihtea chu ka awi hliau hliau a, a muhil thuai a, Elpuia leh Naunaua erawh ka nutei te nupa bulah an awm a, an tlei khawp mai. Ka nutei te nupa hian fa an la nei lo va, an nei thei lo ni berin ka hre tawh, ka nu nau chiah a ni a, engkim ka sawi ngamna a ni ṭhin.

Ka naupan lai paw'n min duat thei em em a, pasal ka neih hnu thleng hian mangan changa ka belh ber a ni ta a ni. Kan titi laia u Lawmsanga hmel ka hmu chu ka hawi sawn vat a, room lamah luh tumin ka ding ûaih bawk. Ka nutei biakna pawh ngaihsak lovin ka lamah a rawn phei pâwk pawk a, ka kal sawn hmain min kuah ta thlawp!

"Ka tihpalh, ka tihpalh tak zet Melo" a ti dam thluam a, kei erawh zah pawh dawn lovin ka ṭap hawm hawm a, ka rilru a nâ ém a ni.

"Engati nge maw ka ât em em mai le, ka ngaihtuah tâwk loh che avangin min hrethiam hram dawn nia, ka tihpalh aw" ka bianga mittui luang thla ngiai ngiai hruk pah chuan a ti dap dap a, kei erawh ka ṭah a la chhuak em em thung. 

"Inṭhen mai ang u Lawmsang, ka uire bawk si, ka zak êm mai" ka ti ta thlawt a, mi dang réng ka ngaihsak thei tawh lo. 

"Ni lo ve, kei chuan i uire ka ring ve hleinem, min hmangaih a ni lo'm ni? Min hmangaih em Melo?" a tih chuan ka buk khum nghat nghat a, ri lovin ka la ṭap reng bawk.

"Kei paw'n ka hmangaih che a, i lo uire a nih paw'n tihpalh thil thu a nih ka ring. Tihpalh thil thu ni lo ta pawh ni se ka ngaidam tho ang che, a chhan chu ka hmangaih tlat che a ni" nghet zeta min kuahin a ti hniam ruih a, ka ṭap leh ta hawm hawm!

"Engmah ka hre bik lo, ka mu zâl mai mai ka harh kha mipa pakhat nen kan lo mu dun reng a, engmah ka hre bik lo tak tak, khawngaih takin min ring rawh" ka ṭah ṭawng zuah zuah a, ka ṭawng zawi lo viau ang ka ring.

"A tâwk e, ṭap tawh suh le. Ka ring che alawm, ka nupui thusawi hi ka ring lutuk, kei min phatsanin i uire dawn lo tih ka hre chiang em em bawk" tih leh min pawm kân nawlh a rual a, nghet takin a kawngah ka kherh ve nghal thuai!

Darkar chanve dáwn chu kan inthlem titih a, ka pasal bulah chuan duh tâwkin ka ṭap a, ka ṭap nasa bawk a ni ang ka mit a bui vek thei. Dar 1 rik dàwnah kan veng lam kan pan a, kan fate chu an muhil vek tawh thung.

Motor-a kan chuan lai te chuan ka kut a rawn hum leh ṭhin a, in chhung kan lut chu an lo mu fel vek tawh a, u Lawmsangan Elpuia leh Naunaua a pawm a, keiin Ngaihtea ka pua a, thawm te chu dim tak ka ni!

Kan nupa room-a kan fate kan mut fel hnu chuan ṭawngṭaina min neih pui a, thu dik tak hai chhuak tura a chet theih nân Pathian a dil a, ka ṭap leh ta nge nge!

U Lawmsanga min hmangaihzia ka hria, keimah avanga veng chhunga mi sawi dan thlengin ka hre vek. Ka zah a, a lakah ka inthlahrung lo thei lo va, ka hmangaih em em rualin a hmangaihna dawn chu phu lo ka inti a ni.

A ngaite bawkin kan muhil lo ve ve leh a, mahse kan inkuah reng thung. Ngaihdam min dil deuh chhen a, ka laka a awm dan avangin a inthiam lo va, nuam lo ka ti daih zawk! A theih tawpa ka uirena pa zawn chhuah a tum thu a sawi a, thu min tiam bawk a, a thutiam chu a tih hlawhtlin ngei ka ring.

A tuka tukṭhuan ei laiin u Parvuli chu a thil hmuh dan engkim a zawt nawn leh thlap a, a hma ai kan in chhungah chuan buaina a punlun ta zawk hlauh mai.

Ka nu pawh kei min ṭan zawngin eng thu mah a sawi tawh lo va, min mil hmel viau ta lo bawk. Veng chhungah ni se chhe takin ka thang laklawh tawh a, u Lawmsanga ber chu ka khawngaih ṭhin.

Kohhran upa a ni bawk si, keimah avanga mi sawi a kai reng chu ka duh lo va, keimah leh keimah ka inhaw tak zet bawk. U Parvuli nen kan inkar a chhe chho ta viau a, u Lâtei erawh ka uire a ring chiah bik lo va, u Hrila paw'n a ring lovin ka hria.

Zan khat chu kan room-a ka fate nen kan awm laiin ka nu leh u Parvuli inhau thawm ka hria a, Elpuia leh a nau paw'n an hre pha vek a, ka nute pahnih lah chu an la ṭawng zawi lo em em zui!

Room aṭangin ka chhuak thuai a, u Lawmsanga awm loh lai tak a ni bawk nen ka hlauthawng ru hle. Ka nu chuan u Parvuli chu a hau hrep a, a hauh chhan ber erawh ka hre mai lo. U Parvuli pawh a ṭawngkam ngaihthlak a nuam lo hle a, a ṭawng malsawm lo em em bawk.

Ṭawng zawi deuh tur leh an inhauh chhan hriat tuma ka va inrawlh rualin u Parvuli zawkin min kawk chung hian inrawlh miah lo turin min vin tuarh tuarh a, ka ngawi chiang hle. U Lawmsanga ka call tawp a, a hman vela lo haw a tum thu a sawi a, biak pawh kan inbe rei lo. 

"Ngawi tawh rawh Pari!" ka nu'n a ti vin leh ṭhawt a, chuti ang em ema ka nu thinrim hmel chu ka la hmu ngai miah lo, ṭhinrim tak a ni. 

"Zanin la lá hian Melo-i hi thu dik tak hrilh ang che. I hrilh lo a nih chuan keima'n ka sawi ang, i chet dan tenawm zet kha thup hauh lovin sawi rawh" ka nu bawk chuan a tih zawm leh phiar phiar a, kei chu ka ngawi kar ringawt. 

"I sawi dawn lo maw?" ka nu chuan u Parvuli chu a melh ran a, a din hnaih sauh a, u Parvuli ve thung chu a ṭawng lo hrim hrim. 

"Melo, engkim kha i u Parvuli lo ruahman vek a nih kha! A rilru tenawmzia hi a rapthlak zawk, phaiah pawh chhuk tawh suh ang che, i mizia a ṭha lo tawlh tawlh, ka hai lo khawp che Parvul" ka nu ṭawng hmawk hmawk laiin u Lawmsanga a lo lut a, ka nu'n a lo hui thuai bawk.

"Lo kal teh Lawmsang, i nau hian engkim kha a lo ruahman vek a ni. Tlaiah khan mipa pakhat nen an inbe thawm ka ngaithla fuh palh a, chuti ni lo se chu thu dik kan hre miah lo ang" a tih chuan u Lawmsanga pawh mak a tih hmel teh e!

"Ka nu sawi hi a dik em?" u Lawmsanga aw chu a khauh ṭha ngei mai, u Parvuli a din hnaih hle tawh bawk a, ka nu sawi zawng zawng chu thu dik tak a nih phei chuan a thin a rim khawp ang. 

"Sawi rawh Parvul" a hma ai u Lawmsanga aw chu a khauh ring zawk a, u Parvuli chu a rawn ṭap chhuak ta feih feih.

"Ṭap lovin sawi nghal rawh, Melo-i uire theih nân ruahmanna i lo siam em ni?" u Lawmsanga bawkin a tih leh chuan

"Siam pawh ni ila eng nge a pawina!? Melody-i hi kan inah awm reng lo se ka duh alawm, ka duh lutuk. Kei in thisen zawmpui ai paw'n in ngaihsak a, a duh engkim in pe a, kei chu engah mah min ngai lo. Uire se, inṭhen ula, kan zingah cheng ve tawh miah lo se ka duh ngawih ngawih" a ti vin tûarh tuarh a, ka nu chuan a beng chiang hle. 

"I zak miah na nge? I zak em? Kan mo a nih tirh aṭang tawh i mil lo nghal tih chu ka hria, nang aia a naupan avangin i duh duha tih kawi i tum bawk a, kan fanu, kan thisen zawmpui zawk i ni a, puitlinga fel hle tur i ni asin, engati nge itsikna hlira i khah?" ka nu chu a âng tawn tawn a, ka tawlh hnung ta riai riai.

"Kha pa, ka nupui bula lo mu pa kha call nghal rawh, tunah call nghal rawh" u Lawmsanga aw chu khauh mai ni lovin a vin hle tawh zawk a, thinrim pawh ni se a awm hliah hliah, u Parvuli chuan a call ve mai a, a call pa chuan a lo lá rang em em leh nghal.

U Parvuli chuan u Lawmsanga hrilh ang chiahin kan ina lo kal turin a hrilh a, a la ṭap deuh pur a, keimah avanga thikna rilru a pu te, engkim chuan min tihrehawm ru hluah hluah. Ka tawlh hla zel tur chu u Lawmsangan ka bân rékah a chelh chat a, min en chiang em em bawk.

A nau hau zawngin ṭawngkam khat mah a chhak chhuak leh tawh rih lo va, mahse a hmel leh a awm dan aṭang a thinrim tih a hriat hle thung. U Parvuli ṭhianpa chu kan in ngeiah a lo lut ta, a tîm dái a, tîm áwm reng pawh a ni. 

"Keini min hnaih zawnga i awm leh emaw kan chhungkaw tana pawi i khawih leh a nih chuan i chungah thil pawi tak a thleng tawh ang. Nang pawh Parvul, he pa hnaihah hian awm tawh suh ang che" u Lawmsanga chuan a nau chu a zilh zawm zat a, a ṭawngkam chhuak erawh a dam dap thung.

"In inah haw la, keini chuah ni lo mi dang tana pawi tur thil engmah ti leh tawh suh" tiin u Lawmsanga bawk chuan u Parvula ṭhianpa chu a hrilh a, a hrilh pa chuan lungawi lo hmel zet hian

"I nau ruahmanna vek a ni tih i hre lo em ni? Ka thiam loh engmah a awm lo, kohhran upa ve si, i nau nun dan dik tak pawh hi i hre tawp náng, vawi eng zah nge sex kan hman duh tawh i hria em? Duh duha ka talpui theih a nih hi!" a ti hmawk hmawk a, inthlahrung viau tura ka lo ngaih kha a nia, tunah erawh a ṭawng dan aṭangin a chapozia ka hmu thei.

"Ngawi hmak rawh, ka thin a rim zual tak tak hmain haw la a ṭhat ka ring" u Lawmsanga aw chu a vin khauh leh ta khur khûr mai, a kut chu a hum ruh hle bawk a, insum nasa viau lo se chu kut a thlak tawh hrim hrim ang. 

"Ka haw dawn reng alawm le, hre rawh Pari, ka duh luatah che i ute nupa inkar i tih chhiat theih nân ka pui che a, tunah chuan ka duh ther tê tawh lo che" ti leh hramin u Parvuli ṭhianpa chu a chhuak ngháwng nghawng a, zak lo ka va'n ti tak!

"I room-ah lut rawh, phaiah hna thawk turin i chhuk tawh lo bawk ang" u Lawmsangan a tih leh chuan u Parvuli chu a room-ah a lut nghal a, a insut feih feih a, keimah chu buaina chhuahna bulpui berah ka inngai ta ringawt. 

A dikna chen a awm alawm, an mo ni lo ila chuan uirena te, thikna te leh buaina hrim hirm a chhuak miah lo vang. U Parvuli rilru tur ka dáwn a, uire anga min lantir a tumna tih lovah chuan ka dem miah lo, a chhan chu thil awm thei a ni ve tlat a ni. An tan chuan mo satliah ve mai, thisen zawmpui pawh ni lo ka ni a, mahse ani aia min duhsak áwm réng ka hre miah lo thung.

Kan room tukverh bulah ka ding ngawi reng a, thil chi hrang hrang ka ngaihtuah kual a, ka mut a chhuak hlawl lo a ni. Dar 1 a pel daih tawh a, u Lawmsanga leh kan fate chu an muthilhna a rei viau tawh bawk a, kei pawh an mut hnua tho hnuhnawh leh mai chauh ka ni.

"Melo" u Lawmsanga aw ka hriat rualin ka lehhawi thuai a, tho hlim tih hriat zet hian a mit a sen deuh ram a, a harh thut a nih ka ring.

"I mu thei na nge?" ti leh ka dinna lama lo kal a rual a, a hmuhah ka nui lui ve tak ná a, ka nuih a va za lo chiang ém.

"Mu ila" khuma lama phei pui ka tum chu min chelh ding a, min en chhuk run a, a meng pangngai ta viau bawk. 

"Thil thleng tawh chu thil thleng tawh a ni a, kan nupa chunga ka nau leh a ṭhianpa chet dan kha ngaihtuah zui tawh lo la ka duh, i ngaihtuah tih erawh ka hria. Naktukah Parvuli pawh ka be ṭha ang a, ngaihdam a dil ngei che ka ring" a ti dam dap dap a, chhoh melh rálin ka nui sak a, chu erawh ka thla a muan vang a ni tawh thung. 

"Chuti ang lam pawh a ni lo" ka tih chuan

"Ni chiang e" a rawn ti nghal vat a, ka kut chu lá kangin a fawp zeuh a, a hnim titih a ni mah zawk. 

"Inṭhen lam ngaihtuah thleng tawh lo ang che Melo" a tih zawm zat a, ka sam chu a ka bengah a zep a, a hmaa inṭhen mai ka lo rawt kha nuam lo ka ti zui nghal vawng vawng.

"Ka tiam e, inṭhen lam ka sawi tawh lo ang. Ka hmangaih che a, ka hmangaih zual zel bawk ang che" nui sen sen paha ka tih chuan a âwmah min kuah a, ka chhip samah a fawp zeuh bawk. 

"Mu ang hmiang, i mut loh vang a ni mahna ka mut pawh a tui theih reng reng loh" ti supin khum lamah min kuah phei a, ka muthilh hmâ min veng ang maiin min en reng a, ka awm a nuam sawng sawng thei. 

A tukah chuan a nau chu a falin a be ta ngei a, mahse rin ang a lo ni hauh lo. Zan lama inchhir hmel em em si kha ka lakah a la hel nasa em em a, ṭawngkam mawi lo tak takin min ṭawngkhum a, ka nu paw'n a beng leh ta nge nge a, nuam ti bik lo tak ka ni!

Min thik tlat si a, u Lawmsanga erawh school lama kal a ngaih avangin chaw ei khamah a chhuak zui nghal daih a, u Lâtei leh u Hrila paw'n ka uire lo tih leh u Parvuli ruahmanna vek a nih thu an hre tawh a, ka nu'n a hrilh a nih ka ring. U Lâtei chuan a zilh hlak hlak a, mo ve tho ni mah se ani chu a zah deuh zawkin ka hria.

Zanah chuan u Parvuli hmel hmuh tur a awm ta reng reng lo va, ka nu pawh a mangang nasa hle a, kei pawh ka bang chuang lo. U Lawmsangan a zawng kual a, a zawng tlaivar ṭhak zawk maw le! A phone a ken loh avangin a ṭhianpa te inah te a va zawng thul, a ṭhianpa pawh a chhungte'n an lo zawng ve mêk chu niin, mang a va'n ti ang zual êm!

Varṭian tak takah u Lawmsanga a lo haw a, tukṭhuan ei khamah School kal lovin Police Station lam a pan thuai bawk a, a nau chu a ngaihtuah hle. U Hrila erawh a theih ang angin a nau zawng ve mah se a hnathawhnate Vai an ni tlat a, chawlh an phalsak ve lo va, phone hmangin mi a be kual nasa hle thung.

Ni 3 chuang kan zawn hnuah Police lamin ruang an chhar thu u Lawmsanga an rawn hrilh a, pakhat mai ni lo pahnih lâi an chhar a ni áwm a, u Parvuli ruang a ni ang tih mawlh ka hlau a ni.

Ka nu phei chu mi dang zawng aiin a hlauthawng zual a, kei leh naupangho tih loh ruang an chharna lamah an kal vek a, darkar pawh a liam hmain ruang chu u Parvuli ruang ngei a nih thu ka pasal hnen aṭang ka hre ta! Ka fate pathum leh u Lâtei te fapa ka awmpui a, ka ei rawng bawl lai pawh ka chhunzawm thei lo. 

U Lawmsanga chuan phone kaltlangin chanchin min hrilh zel a, an postmortem thu te, mi kut tuara thi ngei a nih thu te chu min hrilh a, a thattu chu Police lamin an ruang hmuh pakhat zawk a nih an rin thu a sawi bawk.

Veng chhung information mic-in chhiat tawh thu an puang lauh lauh a, kan ṭhenawm te paw'n mak an ti hlawm hle. Ruang hmuh a nih nî la lâin u Parvuli thattu chu hriat chhuah a ni nghal a, a ṭhianpa ngei a lo ni e. Police te sawi dan chuan a rek hlum phawt a, chumi zawhah amah leh amah a intihlum ve nghal a ni.

Ka nu ber chuan a tuar ná a, a ṭah hlaah a inchhir thu te, amah leh amah a indem thu te a chham mawlh mawlh a, a ṭah nasat lutuk avangin a chau vek bawk. Kei pawh ka ṭap a, u Parvuli ka khawngaih êm avanga ṭap ka ni. U Hrila leh ka pasal pawh an ngawi ngul a, u Lâtei thlengin kan ṭap nasa hlawm hle.

Kan chhungkuain chhiat kan tawh aṭanga thla khat hnuah chuan kan pangngai chho ta viau a, ka nu pawh a zia ta viau. A fanu chunga thihnain ro a rel dan chu a pawm thiam a, a ngai em em tih ka hria, u Lâtei te pawh kan inah an rawn lên zin phah hle. 

Zan khat chu College ka kal laia ka ṭhiante hnen aṭangin phone call ka dawng a, ṭhian na ná na chu rei fê kan inbia a, sawi tur kan ngah tlâng a ni e.

Chaw ei khawm te, inhmuh khawm te an rawt a, min sawm zui zat a, a nî tur nen lam an lo ruat fel diam tawh zawk chu niin, mahse ka kal dawn chuan ka hrilh ṭhat leh tur thu ka sawi thung.

Ka fate chhuahsan chî an ni loh thu te, ka hman loh thu te leh chhuanlam chi hrang hrang siamin hnar ka tum ngei alawm, ka pasal dil hial an tum tlat si a, sawi ṭhatah ka dah ta tawp a ni. 

"I kal dawn ta em?" answer paper check mial mial pahin ka pasal chuan a rawn ti a, tun lai chu school lamah an buai a zual a, in lama khawih zawm tur hna a rawn hawn ta fô mai. 

"Min sawm ngawrh viau ná chungin ka kal leh lo mai ang" ka tih chuan

"Kal tur ang khan i insawi lâwk vek tawh a ni lo'm ni?" a lo ti ve leh nghal a, min rawn en chuang lém hlei lo va, duh aiin a buai mah mah a ni. 

"Sawi lâwk tawh e, mahse ngawi rengin kal lo tawp ila, min lo biak hunah ka sawifiah mai ang" tih leh a bula ṭhut ka rual a, kâr hmasa khan ka kal theih nân ka pasal hial an rawn dil a, u Lawmsanga paw'n a lo phal mai a, mahse keimah berin ka kal loh a fuh zawkin ka hria. 

"I kal leh loh thut chhan hi a awm em?" min la en ta chuang lo fô va, room chhunga kan fate pathum awm loh lai tak a ni bawk a, ṭawng rin a ngai lo khawp mai. 

"Awm ve e, dik tak chuan ka kalna chî niin ka hre lo a ni. Eng eng emaw in tur a awm ngei dawn a, an in vek dawn tih pawh ka hre lâwk nghal, mahse kei chu in ve chî ka ni lo. Kohhran upa i ni a, i nupui ka ni a, zû in dawn lo mah ila thil ṭha lo kha ka va hnaih buai peih lo law law a ni" ka ti ta duah a, a thil khawih lai chawl meuhin min en nghal. 

"I nupui ka ni a, ka hmingchhiat chuan i hmingchhe ve nghal a ni mai. Ka nihna ho lam tak anga lang hian kawng tam takah ka nun dan a phuar a, mahse ka ngaihtuah chian hian a ṭha lam hlir a ni, ka sawi dik viau lo maw?" nui sen sena ka tih leh chuan a nui suk a, a bu nghauh nghauh bawk.

"I hming thar atan Lungtiawii tih ka phuah mai dawn asin" nui nghawr dat hian a ti hniam ruih a, kei pawh ka nui chiang e. 

"Nang pawh i hming thar chu Lungtiawia a ni ve leh mai, puih i ngai tlatin ka hria" ka ṭawng zo chiah chu min fawp vawng vawng a, ka inring hman reng reng hleinem le!

"Ka bula i awm hian min pui chu a ni phawt a, min puih dan ṭha leh dangdai deuh hlek pawh a awm tho" khi suka a tih chuan 

"I rilrua awm ka hre kar a nia, FET awih loh" tih pahin a kuta ka bân rawn zut a tum chu ka nam sawn a, ka beisei loh lutukin a nui ri ta hawk hawk!

"Ka dar hi min hmehsak teh, a kham riau" a la ṭhen deuh suk suk a, a hna lam a khawih zawm leh daih tawh bawk. 

"Phakar suh aw" ka tih chuan

"A ni tak tak alawm, keiin ka duat tehreng che nen hian, kan fate hlir i buaipui a, duat chu ka phu ve lo maw?" a lo ti deuh nui nui a, min chhang lêt rang em em leh nghal!

"A nih leh, ka'n duat hlak ang che" tiin ka tho tharh a, a hnungah dingin a dar chu ka hmehsak a, nuam a tih hmel viau bawk.

"Kan fate chu an va tlei ve maw le, ka nu bulah hi chu nuam an ti ve a ni" kan ngawih dun vang vang hnu chuan ka ti sêp sep a, dar zat ka en a, naupang mut a hun dawn der tawh!

"Tlei rawh se, an nu leh pate hi hun thawl pawh min pe ngai hleinem, ka nu bulah sawn awm fô se a ṭha ang" ti thum bul bultu ka pasal chu a biangah ka zu fawp zeuh a, a rawn hawi lêt rang ngei mai. 

"Han tinawn leh teh" ti supin min chhoh melh run a, a sam khawih nuam leh nêm tak chu ṭham deuh sawk pahin

"I hna kha khawih zo thuai thuai mai teh" ka ti a, chutah nghal zet hian

"Ka zawh thuai i duh chhan a awm chiang" a ti leh hram a, ka nui ve leh tawp ringawt!

"I hre leh vek tawh ang, nangte chuan mi rilru i hre thei alawm" hma lam hawi zawngin a lû chu ka chelh a, kan fate awm loh lai a nih rih bawk nen inkuah chiala awm dun ka châk a ni. 

"Ka nupui rilru chiah hi ka hre theiin ka hria" tiin a nui zui leh hawk hawk a, chhang tawh lovin a dar chu ka hmet mial mial a, ani pawh a ṭawng leh tawh bik chuang lo. 

A tawp ta......